رواية زوج مأجور الفصل الخامس بقلم زهرة الربيع حصريه وجديده على مدونة النجم المتوهج للروايات والمعلومات

رواية زوج مأجور الفصل الخامس بقلم زهرة الربيع حصريه وجديده على مدونة النجم المتوهج للروايات والمعلومات

قربت منو ولسه هتبوسو زقها بقوه وقال بغضب هتعملي

ايه..انتي مجنونه..انا اخو جوزك لو مش واخده بالك ..اما ست سا،فله بصحيح

سمر بصتلو بدهشه وقالت...ده انت شكلك ناسي فعلا يا رشيد..هيه دي اول مره يا حبيبي

جلال كان مصدوم حرفيا من الي بيسمعه وقال..قصدك ايه...مش..مش فاهم

سمر قالت بخبث..غريبه مع ان شكلك بيقول انك فهمت..وفهمت اوي كمان..بس برضو هصدق انك مش فاهم وهفهمك...انا وانت كانت بنا حاجات كتير سوا...وقربت منو وقالت..يعني دي مش اول مره نقرب من بعض.. بس متخافش احنا عمرنا ما اتكشفنا ولا دلوقتي هنتكشف..عمران مش في البيت..متقلقش

جلال بصلها بزهول و قرف وقال..اذا كنت فعلا عملت معاكي كده..فالحمد لله اني نسيت...ودي اخر مره تحاولي معايا..لان بعد كده انا الي هسلمك لجوزك واحكيلو على كل حاجه..وانتي اكتر واحده تعرف عمران

سمر خافت وبلعت ريقها ولسه هتتكلم جلال مشي بسرعه وهو مش شايف قدامو ومش مصدق ابدا

عند عمران كان بيستلم شحنه كبيره جدا اغذيه ومعلبات وبيتكلم مع العمال وقرب يخلص

بس فجأه وقفت عربيه الشرطه ونزلت منها روفان ورائف وعساكر كتير

عمران بصلهم باستغراب وروفان قربت عليه وقالت...عمران باشا..معلش هنعطل حضرتك شويه...البضاعه دي لازم تتفتش

عمران بصلها بغضب رهيب وقال...البضاعه دي اتفتشت اكتر من مره ومفيهاش اي حاجه...وانتي عارفه كده كويس

روفان قربت عليه وقالت باستفزاز ..عارفه..ومتاكده ان مش دي الشحنه الي مخبي فيها شغلك المشبوه...بس لقيت نفسي فاضيه انهارده قولت اعطلك شويه... وبصت للعساكر وقالت..يلا ياشباب تفتيش..وخدو راحتكم عمران باشا مش مستعجل

عمران كان هينفجر لانو كان خلاص هيخلص ويمشي وفضل باصص لها بغضب وقال لرائف...الي بتعملوه ده هتدفعو تمنو غالي قوي...والافضل ليك تعقل اختك لان رصيدها عندي تقل قوي

رائف قال بسرعه..ندفعو..واي دين علينا نردو يا باشا...بس...مدام هنتحاسب تدفع انت الي عليك الاول

عمران اتنهد بغصب وقال...تمام..خلصو براحتكم ..الظاهر انكم فاضين ..بس انا ورايا اشغال تانيه همشي دلوقتي ونتقابل باليل...وبص لروفان وقال بهدوء شديد...اوعي تتأخري انهارده..محضرلك مفاجأه تجنن.

عمران قال كده ومشي وهو مبتسم ولا على بالو ...روفان اختفت ابتسامتها واتوترت جدا وقالت..يا تري يقصد ايه

رائف قال..ولا يهمك منو واضح انو بيوترك مش اكتر

روفان قالت بقلق..لا..عمران عمرو ما هدد الا وعمل مصيبه ...ربنا يستر

رائف بص في الساعه بقلق وقال...بقولك ايه..هو انا ينفع امشي ورايا مشوار ميتأجلش

روفان قالت باستغراب.. على فين يعني

رائف مكانش عايز يقولها انو هيقابل عليا قال..احم..ابدا واحد صاحبي تعبان وضروري اشوفه

روفان ابتسمت وقالت..مبتعرفش تكدب..كل اصحابك معانا في الاداره يعني لو في حد تعبان كنت انا كمان عرفت ..على العموم روح مشوارك وحصلني عند انكل شفيق

عند عليا وصلت شقه بسيطه وبعيده شويه عن القصر وفتحت الباب بالمفاتيح اللي معاها ودخلت وهيه متوتره جدا ورايحه جايه في الشقه بتوتر رهيب

بعد شويه وقفت بفرحه لما اتفتح الباب وسمعت صوت رائف بيقول..عليا....عليا انتي هنا

عليا طلعت من الاوضه وجريت عليه حضنتو وبقت تبكي في حضنو

بقلم..زهرة الربيع

رائف استغرب وشدها ليه جامد وقال..عليا في ايه..مالك ..طيب اخدي يا حببتي...ايه الي حصل لكل ده

عليا بعدت وقالت وهيه بتترعش..فيه..فيه مصيبه..مصيبه يارائف..انا..انا حامل

رائف اتسعت عنيه بشده وزهول وقال..حاامل...ازاي

عليا قالت ببكا.. .هو ايه الي ازاي بقولك حامل يا رائف ..انا خايفه خايفه اوي

رائف ابتسم بفرحه وقال..وده خبر يخليكي زعلانه..

عليا بصتلو باستغراب وقالت..طبعا لازم ازعل انا مرعوبه..عمران لو عرف اني متجوزاك انت بزات هيخلص عليا...انا مش عارفه اعمل ايه ده انا مش قادره اتخيل رده فعلو اصلا

رائف اتنهد وقال..طيب اهدي علشان نلاقي حل..هو انتي متأكده يعني

عليا قالت ببكا..متاكده عملت الاختبار اكتر من عشر مرات انا اصلا بقالي كام يوم تعبانه وواحده زملتي عارفه بجوازنا هيه الي قالتلي اعمل الاختبار..

رائف اتنهد وقال..بس انتي قولتيلي قبل كده انك عامله حسابك مش كده

عليا قالت بدموع وخوف...ايوه..ايوه كنت باخد حبوب بس..بس مش عارفه ازاي ده حصل يمكن نسيتو مره او ممكن اكون حملت انا وباخدو مش عارفه مش عارفه غير اني انتهيت هيقتلني ..هيقتلني يا رائف

رائف قال بغضب..هو مين ده الي يقتلك..ويقتلك ازاي اصلا هو انتي فرخه..انتي مراتي على سنة الله ورسوله سواء وافق او لا..وبعدين كفايه تحكمات بقى كفايه الي حصل لرشيد بسببو

عليا قالت بدموع...بس ..بس انا مش هقدر اقولو حاجه من الي انت بتقولها دي يا رائف..عمران هو الي مربيني بابا كان كل وقتو للشغل وللسفر وكل حياتي كانت مع عمران..مش عارفه لو عرف هيعمل ايه وبصتلو بدموع وقالت.انت اكيد مش هتتخلى عني يا رائف مش كده

رائف ابتسم وشدها لحضنه وقال..بلاش هبل..هو انا ماشي معاكي يا بت..انتي مراتي يا عبيطه انا بحبك بعيد عن كل المشاكل الي بين اهالينا..واوعدك اني هحل الموضوع ده من غير ماتتأذي شعره منك ..خليكي واثقه فيا

عليا ابتسمت وحضنتو جامد وهيه مطمنه وقالت...ربنا يخليك ليا يا رائف انا بحبك اوي

رائف ابتسم وقال..وانا اكتر والله...كده جه وقت المواجهه... باليل هروح اطلبك من اخوكي ولو رفض...هتكلم مع والدتك وهنلاقي حل خليكي مطمنه محدش يقدر يمسك طول ما انا معاكي

عند روفان كانت في المكتب مستنيه شخص وفعلا دخل راجل في سن الخمسين ببدله الشرطه رتبه لواء ده شفيق النبراشي خال روفان

روفان وقفت وحيتو وقالت...صباح الخير يا سياده اللوا

شفيق ابتسم وقال...وبعدين انا مش قولتلك ميت مره اني مش بحب اسمع سيادة اللوا دي ..ولا ناسيه اني خالك

روفان ابتسمت وقالت.... ده تاج فوق راسي مستحيل انساه ..عامل ايه يا انكل شفيق

شفيق ابتسم وقال...انا بخير يا بنتي ...انتي اخبارك ايه ..رائف طمني عنك وقال كمان ان الخطه الي عملناها ممتاذه

روفان ابتسمت وقالت...جدا..فوق ما تتخيل ..انا دلوقتي اقدر اراقب عمران واعرف تحركاتو بسهوله كل ده بفضل خطتك العظيمه

شفيق ابتسم وقال...طب والولد ده عمل معاكي ايه..هو..هو اسمو ايه بنساه

روفان قالت بسرعه .جلال..اسمو جلال..شب ظريف قوي...وبان على ملامحها الحزن وعيونها اتملت دموع وقالت..بس...بس يشبهو اوي..اوي يا خالي...يشبهو بطريقه توجع القلب

شفيق وقف وقعد على الكرسي الي قصادها ومسك ايدها وابتسم وقال...متيأسيش ياروفان اوعي اشوف اليأس او الحزن في عنيكي مش انتي الي تستسلمي بسهوله كده ورشيد هيقوم بالسلامه هيقوم لانو زيك قوي.. وبيحبك..بكره تقولي خالي قال

روفان بصتلو بدموع وقالت بسرعه..طب...طب هو انا ممكن

بس شفيق قاطعها وقال..لا ياروفان.مش هينفع تشوفيه..يا بنتي انا قولتلك اكتر من مره عمران ممكن يكون مراقبك ولو عرف ان اخوه عايش وان الي في البيت ده مش اخوه هنروح كلنا في داهيه ومش هنقدر نثبت عليه حاجه

روفان اتنهدت وقالت بدموع..بس مره يا خالي ارجوك مره واحده علشان خاطري

شفيق اتنهد وقال...تمام..ماشي ياروفه..هخليكي تشوفيه بس هتوعديني تكون اخر مره

روفان مسحت دموعها وقالت..وعد والله وعد

شفيق ابتسم وقال..ماشي ياقلبي خلصي شغلك انهارده..وبكره مش ورانا حاحه هأخدك ونروحلو

روفان قامت وقالت بفرحه..شكرا شكرا يا خالو ربنا يخليك ليا ..وطلعت جري وهيه مبسوطه زي الطفل الصغير

شفيق ابتسم عليها وقال..ربنا يردهولك يا بنتي

عند جلال كان رايح جاي في الاوضه بارتباك وغضب وقال وهو بيكلم نفسو باستغراب ..ايه ده..ايه قوم ابو جهل الي اترميت وسطهم دول..يعني ايه..دي مش مرات اخوه..ايوه مرات اخوه..طب ازاي..ازاي قالت ايه...قالت عمرنا ما اتكشفنا...يعني الموضوع بيحصل كتير...احيه.....احيه احيه احيييييييه

بس اخد نفس وقال..اهدى يا جلال لازم اهدى علشان افهم ومسك التليفون واتصل بروفان

روفان كانت مشغوله بتحاول تخلص بدري علشان تروح مستعجله تنهي اليوم ده علشان بكره هتزور رشيد وسمعت صوت تليفونها ردت وقالت..ايوه

جلال قال بسرعه وارتباك..انتي تسيبي الي وراكي وتيجي حالا..حالا فاهمه

روفان اتنهدت بخنقه وقالت..فيه ايه اخلص اتكلم انا مشغوله

جلال قال بغيظ...يا بت انتي رضعوكي لبن كلبه وانتي صغيره ايه التناحه الي عندك دي بقولك فيه موضوع مهم ..اغنيهالك..طيب يالليل يا عين ..هنتشوح علي الجنبين

روفان قالت بغضب..استني عليا لما اجيلك هشوحك على كل الجناب علشان طوله لسانك دي و

بس قطعت كلامها لما الباب خبط قفلت في وشو من غير ما تستني الرد

جلال بص للتليفون بزهول وقال بغيظ..دي قفلت...ماشي ياجزمه.. ماليها اي لزمه.. هربيكي

عند روفان قالت ادخل ودخل شاب جميل جدا بطله انيقه في سن التلاتينات لابس بدله كامله وبالطو طويل ونضاره شمس قلعها وقعد بغرور وقال بابتسامه..روفه...وحشتيني

روفان بصتلو بغضب وحاولت تتمالك اعصابها وقالت..نعم...خير

الشاب قال بابتسامه مستفزه..ابدا كنت قريب قولت اشوفك بقالي كتير ما شوفتش عيونك

بقلم...زهرة الربيع

روفان بصتلو بغضب وقالت بضيق....بس اظن اني قبل دلوقتي وضحتلك اني مش بطيق خلقت امك

قال بمنتهى البرود..اه عارف علشان كده

مجبتش ماما معايا....على العموم انا جيت اقولك كلمتين...فادي الأسيوطي لما يحط عينه على حاجه بتبقي ملكه..وانتي ضميتك لاملاكي من اول يوم شوفتك فيه...ولازم تعرفي ان مش معني ان جوزك قام بالسلامه يبقى كده خلاص...لا...المفروض تكوني اعتبرتي من الي حصل الاول ومتعرضهوش للخطر تاتي..ده اذا بتحبيه يعني

روفان بصتلو بغضب شديد وقالت..الي معاك اعملو..انا مش بتهدد...ولازم انت الي تخاف على نفسك لاني قريب قوي هجيب رجلك انت والي مشاركو..بس ساعتها هتأكد انك متشوفش الشمس الا بعد السبعين..ده لو فضلت عايش يعني

فادي اتنرفز وقال..ده اخر كلام عندك ياروفه

وقفت بغضب وقالت.. حضرة الرائد روفان الشيمي ده الاسم الي امسالك بينادوني بيه

فادي وقف ولبس نضارتو وقال..ماشي ..براحتك ..على العموم ..بكره هتعرفي قيمه قعدتي دي وقد ايه كانت فرصه بالنسبالك ومشي وهو مش شايف قدامو من الغضب

بعد يوم طويل من الشغل والتعب روفان وصلت البيت واتفاجأت برائف قاعد مع نجوى وبيشرب القهوه

روفان قربت عليه بقلق وقالت...رائف خير فيه حاجه

رائف ابتسم وقال..ابدا مفيش يا روفه..انا كنت جاي لعمران في كلمتين بس مش موجود وقعدت اشرب قهوه مع مدام نجوى علي بال ما يجي

روفان استغربت جدا وبصتلو بدهشه وقالت...معلش مستني مين...عمران..ههه الي هو ازاي الكلام ده يعني

جلال كان قاعد وسامع كلامهم قال ...انت لو قولتلها ان فيه ديناصور عدى على البيت بالغلط كسر لكم الشيش وجاي تاخد حاجه علشان تركبو..هتشوفها مقنعه اكتر من جملتك دي

نجوى ضحكت ..وروفان قالت وهيه باصه لرائف باستغراب..معاه حق والله..على العموم يا خبر بفلوس بعد دقايق يبقى ببلاش

رائف لسه هيتكلم عمران دخل وقال مساء الخير

الكل بصولو ورائف وقف واخد نفس بيحاول يهدى علشان يكلمة بهدوء

عمران بصلهم بابتسامه جانبيه وقال...مش معقول..بقى انا اقولك تعالي بدري عاملك مفاجأ حضرة العقيد بنفسو يجي معاكي ...ده كده المفاجأه بقت اجمل

روفان ورائف مانو مستغربين ورائف قال... احم.. انا ...انا مجتش معاها اناجايلك انت.. عايزك في موضوع

عمران قعد وحط رجل على رجل وقال بابتسامن مستفزه..لا مش اهم من موضوعي ..انا قولتلكم اني محضر لكم مفاجئه حلوه

روفان لسه هتتكلم دخلت بنت مغطيه وشها ووقفت جمب عمران

عمران بصلها وقال ..دي مراتي الجديده..اتجوزتها انهارده ..شوفو كده مطيعه ازاي..حببتي..انزلي قلعيني الجزمه ونضفيها

البنت جريت عند رجلو وبقت تقلعو الجزمه تحت استغراب الجميع الي مش فاهمين يقصد ايه بكده

بس وضح المغزى من كلامو لما زقها برجلو بقوه وقعها على الارض وقال بغضب..ايه مش عارفه تقلعيني الجزمه وقرب منها شد الطرحه الي مغطيه وشها وقال..زي كده صعبه دي

هناكانت الصدمه لروفان ورائف كانو هيقعو من طولهم لما شافو وشها وكانت فرح اختهم وووووو

الفصل السادس من هنا

بداية الروايه من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا

وكمان اروع الروايات هنا 👇

روايات كامله وحصريه من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺

خلصتوا قراءة الفصل إتفضلوا جميع الروايات الكامله من بداية الروايه لاخرها من هنا 👇❤️👇💙👇❤️👇

رواية درة الغالب