رواية هكذا يكون الحب الفصل الأول والتاني بقلم إيمان جمال رواية هكذا يكون الحب البارت الأول والتاني بقلم إيمان جمال رواية هكذا يكون الحب الجزء الأول والتاني بقلم إيمان جمال

 رواية هكذا يكون الحب الفصل الأول والتاني بقلم إيمان جمال

رواية هكذا يكون الحب البارت الأول والتاني بقلم إيمان جمال

رواية هكذا يكون الحب الجزء الأول والتاني بقلم إيمان جمال

 _مهاب العمري_: شاب عمره ٢٨ سنة، طويل، وجذاب بعضلات جسمه الرياضي، عيونه بنية، وشعره اسود، ودقنته مش طويلة ذادت من جاذبيته، بشرته بيضا، ملامحه رجولية وشخصيته قوية جدا والكل بيعمله حساب، شخصيته مزيج بين الطيبة والقسوة وبين العصبية والحنية، مهندس معماري، وبيشتغل مع جده وكان شريك ومدير ذيه ذي جده بالظبط 

_مهاب العمري (الجد)_: عمره في اواخر السبعينات بس رغم سنه صحته كويسة وشديد المعاملة وقاسي وله كلمة مسموعة، ملامحه قاسية والكل بيعمله حساب وبيخافوا منه الا حفيده *مهاب* الوحيد اللي بيعمل اللي على مزاجه، مدير شركة (العمري جروب للهندسة المعمارية)

_فيروز_: بنت عمرها ٢٢ سنة، في اخر سنة في كلية تجارة وبتشتغل في شركة عبدالحميد هلال (جد مهاب_ابو والدته)، شعرها طويل واصل لآخر ضهرها وناعم ومفرود وعيونها عسلي وبشرتها بيضاء وملامحها هادية وبسيطة ومش طويلة، وعندها غمزات 

_عبدالحميد هلال_: جد مهاب (ابو والدته)، عمره ٧٨ سنة وشخصيته قوية بس طيب جدااااا وبيحب الناس ومتواضع مع الكل، مدير شركة هلال للحديد والصلب 

_باسم_: ابن خال مهاب، عمره ٢٨ سنة من نفس عمر مهاب صديقه المقرب، شخصيته مرحة جدا، عيونه لونها اخضر وشعره بني فاتح وبشرته بيضا وجذاب جداااااا والبنات بتعجب بيه

_فايز مهاب العمري_: والد مهاب، عمره ٥٤ سنة، رجل طيب عكس شخصية ابوه؛ لانه تربية مامته الله يرحمها، وكان بيشتغل مع ابوه وابنه في الشركة بس اتجوز بعد وفاة زوجته وقعد من الشغل

_ناني_: دي بقى زوجة فايز وعندها بنت من زوجها اللي توفى، امرأة انانيه بتحب المال جدا كل همها في الحياة الموضه واللبس وبس وانها تصرف فلوس 

~ريماس_: بنت ناني، عمرها ٢٥ سنة، هي بنت طيبه و كويسه جدا بس امها اللي مخلياها عكس كدا بجشعها وطمعها في كل اللي حواليها

بنت هادية ملامحها جميلة ومش محجبة بشرتها بيضا وشعرها اصفر وعيونها بني ودايما بتلبس عدسات 

حبيب فيروز هنعرفه في اول حلقة عشان دا ميستاهلش اصلا نتكلم عنه😂

وبقية الشخصيات هنعرفها❤

                ❤❤❤❤❤❤❤❤

#الحلقة_الأولى

#رواية_هكذا_يكون_الحب❤

#بقلم_ايمان_جمال❤

              ___________________________

 في بيت بسيط في منطقه متوسطه، بنت عايشه لوحدها ابوها ومامتها اتوفوا من تلات سنين وهي ما لهاش حد، فيروز صحيت وغسلت وشها واتوضت ولبست اسدال الصلاه وادت فرضها، وبعد كده لبست وكان لبسها عبارة عن بنطلون واسع وبلوزه واسعه وحجابها طبعا ومش بتحط خالص اي ميك اب، تليفونها رن وكان ضياء حبيبها

(ضياء: جارهم من زمان بس شخصيته تافهة جدا، وعلى الرغم انه بيحبها بس لو في يوم شاف بنت غنيه هيسيب فيروز عشانها ودي مش اول مره طبعا تحصل وحصلت كتير جدا وفيروز كانت بتعدي عشان للاسف ما لهاش حد غيره

فيروز: صباح الخير

ضياء: صباح الورد لبستي ولا لسه؟ 

فيروز: ايوا لبست

ضياء: طب يلا هانزلك عشان اوصلك الشركه عشان الانترڤيو

فيروز: ماشي

ضياء نزل واخد فيروز وركبوا تاكسي وبعد شويه وصلوا عند شركه هلال

ضياء: اطلعي وانا هستناكي تحت

فيروز بتوتر: اطلع معايا

ضياء: انتي مش صغيره وبعدين انا واقف هنا اهو مش همشي يعني

فيروز: طيب

فيروز طلعت فوق وقابلت السكرتيره

فيروز: كنت جايا عشان وظيفه السكرتيره الجديدة

السكرتيره بصتلها من فوق لتحت: تفضلي اقعدي جنب البنات دي، وشاورت ليها عالبنات اللي قاعده اللي كانوا جايين لنفس الوظيفه، وفيروز قعدت عشان تستنى دورها

  #######################

في ڤيلا العمري: 

 في اوضة مهاب (الحفيد)، صحي على صوت المنبه، ودخل حمام اوضته وغسل وشه واتوضى وصلى فرضه (تقريبا هو الوحيد اللي في البيت اللي محافظ على صلاته هو وابوه)، لبس بليزر اسود وقميص ابيض وبنطلون اسود وحذاء اسود وحط البرفيوم بتاعه ونزل، وكان بقية العيلة في اوضة السفرة قاعدين بيفطروا 

مهاب دخل: صباح الخير

الكل: صباح النور

مهاب(الجد): عندك اجتماع كمان ساعه في الشركة لازم تكون هناك بدري

مهاب(الصغير): انا مش محتاج حد يقولي ايه اللي ورايا

مهاب(الجد): انا جدك ومديرك في الشركه

مهاب(الصغير): وما تنساش باردوا ان انا المدير التاني يعني احنا في مكانة واحدة

مهاب(الجد) رغم انه مضايق من طريقة حفيده بس معجب بشخصيته القوية

مهاب(الجد): تمام يامهاب

ريماس(دي بقى بنت مرات ابو مهاب وامها مفهماها انها تحب مهاب عشان فلوسه بس هي بتحبه بجد): ميهو

مهاب بصلها بغضب: قولتلك الف مره بلاش الاسم ده

ريماس دموعها نزلت

فايز: ريمو بتهزر معاك يا مهاب

مهاب: وانا ما بحبش هزار العيال ده

ناني: ريماس مش عيلة يا مهاب وبعدين دي مقام خطيبتك

مهاب قام من على السفرة بغضب: لا مش خطيبتي ولا هتكون

ريماس اضايقت اوي وطلعت اوضتها

مهاب(الجد): عاجبك كده اهي زعلت وبعدين انت ناوي تقعد كتير من غير جواز

مهاب(الصغير): مش انا اللي هتمشوني على مزاجكم

مهاب(الجد): وانا عاوزك تتجوز

مهاب بصلهم بضيق وسابهم وخرج وركب عربيته وراح الشركة

  #######################

نرجع لفيروز، كل البنات اللي قبلها دخلوا الانترڤيو وخلاص جه دورها، فيروز دخلت مكتب رئيس مجلس الادارة، وهتقابل (عبدالحميد هلال)

عبدالحميد اول ماشافها اعجب بلبسها لان كل البنات اللي كانوا موجودين كلهم سايبين شعرهم وحاطين ميك اب كتير، فيروز دخلت وعبدالحميد سمحلها تقعد

عبدالحميد: اسمك وعمرك ايه؟

فيروز: اسمي فيروز احمد عبد الرحمن، وعمري ٢٢ سنة

عبدالحميد: سنك لسه صغير شكلك كدا لسه بتدرسي صح؟

فيروز بخوف انه يرفضها: ايوا انا في اخر سنه كليه تجاره

عبدالحميد: بس انتي اكيد عارفه ان الوظيفه دي عاوزه حد يكون متخرج وكمان عنده خبرة وكمان يبقى عارف لغة

فيروز بتوتر: انا فعلا ما اشتغلتش قبل كده في المجال ده بس انا بعرف اتكلم انجليزي كويس  و كنت اتمنى اشتغل لما اتخرج، اشتغل محاسبة في شركه كبيره بس الظروف اجبرتني اني اشتغل قبل ما تخرج

عبدالحميد: ممكن اعرف ايه الظروف دي؟

فيروز بصتله بإستغراب: هو ده لازم؟!

عبدالحميد ابتسم وقام من مكانه وقعد ادامها: هو مش لازم بس باين عليكي بنت كويسه ومحترمه غير كل البنات اللي كانت قبلك من شوية 

فيروز: شكرا لحضرتك

عبدالحميد: بصي يا فيروز انا هوافق انك تكوني معانا في الشركه بس تحت الاختبار لمده شهر

فيروز بفرحة: انا مش عارفه اقول لحضرتك ايه بجد

عبدالحميد: ما تقوليش حاجه وعشان فرحتك دي انا هخلي السكرتيره الخاصة بيا اللي المفروض تكوني مكانها تعرفك الشغل ماشي ازاي

فيروز: حضرتك تقصد البنت اللي قاعدة بارة؟

عبدالحميد: لا دي موظفه في HR  عادي بس هي النهاردة مكان حنان السكرتيرة 

فيروز بتنهيدة: الحمدلله

عبدالحميد بإستغراب: مالك؟!

فيروز: بس باين عليها انها صعبه ومش حبيتها بصراحة

عبدالحميد ضحك: هي فعلا كده بس شاطره في شغلها

فيروز: تمام طب هستلم الشغل امتى؟

عبدالحميد: من بكره بس المفروض ان الفترة دي بداية العام الدراسي التاني هتعرفي تضبطي وقت الشغل مع المحاضرات؟

فيروز بثقة: ايوا يا فندم ما تقلقش

عبدالحميد بحنية: ماشي يابنتي ربنا يوفقك، تقدري تخرجي

فيروز خرجت وكانت فرحانة انها خلاص اتقبلت في الوظيفة ونزلت بسرعة عشان تفرح ضياء معاها بس الاستاذ كان قاعد يعاكس في البنات اللي راحة وجايا وهي هزت راسها بيأس ان مافيش فايدة، ضياء اول ماشافها قرب منها

ضياء: ها عملتي ايه؟

فيروز بهدوء: اتقبلت الحمدلله

ضياء: مبروك يافيروزتي

فيروز ابتسمت نص ابتسامة وسكتت

ضياء: يالا عشان اركبك تاكسي عشان تروحي وانا اروح شغلي 

فيروز اكتفت بهز دماغها وركبت التاكسي ورجعت البيت

        ################

في شركة العمري، مهاب في مكتبه بيراجع الملفات عشان الاجتماع اللي بعد شوية، وشوية ودخل باسم ابن خاله

مهاب: حبيب قلبي

باسم قعد: بلا حبيب قلبك بلا زفت انت فين بقالك كام يوم

مهاب: ماتهدى ياعم انت عليا، يعني انت مش شايف الشغل اللي ورايا

باسم: ياسيدي شايف والله بس شغل المعرض محتاجك دا غير الملفات اللي عاوزة امضتك

مهاب: هجيلك النهاردة بالليل المعرض

باسم: مش ناوي تقول لجدك على المعرض؟

مهاب: لا انا اشتغلت معاه في الشركة عشان بابا قعد من الشغل لكن انت عارف ان المعرض دا حلمي من زمان وحبيت يبقى ليا شغل بعيد عن شغل جدي

باسم: ماشي ياصاحبي، يالا انا هقوم انا بقى

مهاب: ماشي

باسم خرج وساب مهاب قاعد يكمل شغله وشوية والسكرتيرة دخلت

اسماء(السكرتيرة): مستر مهاب، مهاب بيه عاوز حضرتك في مكتبه

مهاب: ماشي يا اسماء واطلبيلي القهوة بتاعتي وخليهم يجيبوهالي في مكتبه

اسماء بإحترام: حاضر يافندم

اسماء خرجت ومهاب خرج بعدها ودخل مكتب جده من غير مايخبط وقعد ادام جده

مهاب(الجد): ماخبطش عالباب ليه؟

مهاب(الصغير): طلبتني ليه؟

مهاب(الجد): كنت عاوز اراجع معاك شوية اوراق قبل الاجتماع

مهاب(الصغير): لو على المراجعة ماشي بس الورق اللي معايا مش محتاج حد يراجعه

مهاب(الجد): بس انا مش اي حد يامهاب

مهاب(الصغير): وانا باردوا مش اي حد عشان تراجع ورايا شغلي

مهاب(الجد) معجب جدا بشجاعة حفيده: انت عارف انك انت الوحيد اللي ماشي بدماغك ومش بتسمع كلامي

مهاب(الصغير) بإحترام وثقة: عارف وكمان عارف اني مش صغير عشان اسمع كلامك او اسمع كلام غيرك وطول ما انا ماشي صح يبقى خلاص ولا انت عندك رأي تاني يامهاب؟

مهاب(الجد): نفسي مرة تقولي ياجدي

مهاب(الصغير) بصله وسكت

مهاب(الجد): لسة مش عاوز تنسى؟

مهاب(الصغير): لا مش هنسى انك السبب في طلاق امي من ابويا، مش هنسى انها ماتت من حزنها بسببك 

مهاب(الجد): هي اللي غلطت

مهاب(الصغير): تقدر تقولي غلطت في ايه؟

مهاب(الجد) سكت وماردش

مهاب(الصغير) وقف وبصله اوي واتكلم: انا بقى هقولك غلطت في ايه.....غلطت انها حبو ابويا، غلطت انها دخلت عيلة العمري.........لو دا الغط بالنسبالك فإنت انسان مريض.....بس الغلط اللي انت تقصده هي انها فضلت ابوها عنكم.......ابوها اللي هو سندها في الدنيا اختارته عشان لاقت نفسها من غير سند......انت عارف ابويا مكرهتوش ذيك ليه؟ عشان ابويا حبها من كل قلبه بس جبروتك وقسوتك هما اللي اجبروه يطلقها وانت اجبرته يتجوز تاني.....هو اه اتجوز ودا زعلني بس كفاية عندي انه اتجوز بعد وفاة امي

مهاب(الجد) وقف وبكل جبروت وقسوة: هي مكانتش تستاهل اصلا حب ابوك 

مهاب(الصغير) اتكلم بصوت كله غضب: انت اللي متستاهلش اصلا 

مهاب(الجد) ضرب مهاب بالقلم، مهاب بصله بصدمة وفي اللحظة دي كان عاوز يخنقه بس للأسف دا جده.....مهاب خرج من المكتب ومن الشركة كلها ونزل اخد عربيته وراح عالبحر (بحر اسكندرية) لان ابطالنا من اسكندرية (عروس البحر المتوسط)

               ############

اليوم عدا عادي، وبالنسبة لفيروز فهي فرحانة انها خلاص هتشتغل عشان تقدر تعيش وكمان ان عليها ايجار متأخر وبتدفع بالتقسيط واللي كانت فاكراه هيكون واقف جمبها بيتحجج ليها انه بيكون نفسه عشان يتجوزها، بالنسبة لمهاب فاليوم عدا عليه صعب جداا وخصوصا ان دي اول مرة جده يمد ايده عليه، مهاب فضل قاعد عالبحر لفترة طويلة وراح لباسم المعرض

  #######################

_في المساء_

في معرض عربيات كبير ومشهور وكان اسمه (M & B CARS) ودا كان اختصار لأسامي مهاب وباسم

(المعرض دا كان حلم مهاب ولما عرف ان باسم كمان حابب الفكرة قرروا يفتحوه ويشاركوا بعض بس طبعا مهاب(الجد) مايعرفش عنه حاجة لانه مش عاوز مهاب يشتغل في شغل لوحده.....يعني بالعربي كدا عاوز كل حاجة تكون تحت سيطرته)

مهاب وصل المعرض وطلع فوق في المكتب وباسم كان قاعد مع عميل

باسم: تقدر تستلم عربيتك بكرة ان شاء الله

العميل: متشكر جدا وسعيد اوي اني اتعاملت مع حضرتك

باسم: متشكر لحضرتك

مهاب دخل: مساء الخير

باسم والعميل: مساء النور 

باسم: دا مستر مهاب شريكي في المعرض

العميل سلم على مهاب: اتشرفت بمعرفتك وان شاء الله مش هتكون اوي مرة اني اتعامل معاكم

مهاب: تحت امر حضرتك

العميل استأذن وخرج ومهاب وباسم قعدوا مع بعض

باسم: مالك شكلك مش مظبوط ليه؟

مهاب بصله: انا كويس ماتقلقش، المهم انا هروح معاك الڤيلا النهاردة كلمهم يجهزوا اوضتي

باسم: مهاب انت متأكد انك كويس؟

مهاب: اه ياباسم، ليه في حاجة؟

باسم: اصل يعني بقالك فترة كبيرة مانمتش في الڤيلا عندنا 

مهاب اتنهد: باسم الله يخليك مش قادر اتكلم الوقتي 

باسم: حاضر....ومسك شوية ملفات: اتفضل امضي عالملفات دي

مهاب اخد منه الملفات: ماشي 

باسم: بالنسبة لنصيبك بتاع الشهر اعمل فيه ايه؟

مهاب بصله: هو انا كل مرة يعني هقولك تعمل ايه؟

باسم: ياحبيبي لازم اسألك قبل ما اعمل اي حاجة عشان دا حقك

مهاب: لا من غير ماتسأل، ذي كل شهر هتبعت نصه للملجأ اللي مكتوب بإسم امي والنص التاني هنحطه في حسابي في البنك

باسم: تمام

مهاب خلص امضة عالملفات 

باسم: يالا نرجع سوا الڤيلا بعربيتي 

مهاب وقف: ياريت عشان مش قادر اسوق

باسم ومهاب خرجوا من المعرض وركبوا في عربية باسم، وفي الطريق باسم بلغهم في الڤيلا انهم يجهزوا اوضة مهاب 

  #######################

عند فيروز، قاعدة في شقتها بتتفرج على التليفزيون وكان فيلم كارتون(سندريلا) ومستمتعة جدا وهي بتتفرج، وشوية والباب خبط لبست حجابها وفتحت وكان ضياء

ضياء: مساء الخير 

فيروز بإبتسامة: مساء النور

ضياء: وحشتيني 

فيروز اتكسفت وبصت للأرض 

ضياء: ايه مش هتقوليلي اتفضل

فيروز بصتله: انت عارف انه ماينفعش

ضياء: وفيها ايه يعني؟

فيروز اضايقت: يعني ايه؟ يعني لما اي حد من الجيران يشوفك داخل هنا يقولوا ايه....طب بلاش الجيران مافكرتش في ربنا وبعدين احمد ربنا اني سمحت انك تقف كدا 

ضياء: على فكرة كل اللي في العمارة عارفين انك في حكم خطيبتي 

فيروز: بس انا لسة مش خطيبتك ياضياء وحتى لو خطيبتك باردوا ماينفعش

ضياء: شكلك مش واثقة فيا

فيروز بصلته اوي وسكتت

ضياء بغضب: سكوتك دا معناه انك مش واثقة فيا وبتخافي مني على نفسك

فيروز: لو سمحت ياضياء مش عاوزة اتكلم الوقتي

ضياء: تمام يافيروز تصبحي على خير

فيروز: وانت من اهل الخير 

فيروز قفلت الباب واضايقت من تصرفات ضياء بس هي للأسف بتحبه واستحملت تصرفاته اللي تجرح اي بنت ومش اي حد يستحمل كدا ولا يقبل على نفسه اي اهانة، قفلت التليفزيون واتوضت عشان تصلي العشا 

  #######################

في ڤيلا عبدالحميد هلال 

باسم ومهاب وصلوا، والكل كانوا قاعدين عالسفرة

باسم ومهاب: مساء الخير 

الكل: مساء النور

(اللي كانوا قاعدين،(سراج) دا ابو باسم، عمره ٦٠ سنة وطيب جدا وبيحب مهاب اوي،(ليلى) زوجة سراج، عمرها ٤٤ سنة وطيبة جدا وبتحب ولادها ومهاب جدااااا، (شروق) بنت سراج وليلى واخت باسم، عمرها ٢٢ سنة وفي اخر سنة كلية تجارة (صاحبة فيروز الانتيم)، بنت طيبة جدا وبتحب فيروز، بشرتها بيضا وشعرها بني قصير لحد اول كتفها، ومش طويلة وعيونها بني، وكان موجود كمان (ايمن) خال مهاب، دا توأم سراج، طيب جدا وبيحب عيلته ومهاب اوي، (وفاء) زوجة ايمن، عمرها ٤٣، طيبة جدا وحنينة اوي وبتحب مهاب اوي وكانت بتحب رباب ام مهاب الله يرحمها، (خلود) بنت وفاء وايمن مافيش غيرها، عمرها ٢٢ سنة وفي اخر سنة كلية اعلام، بنت طيبة اوي وعيونها خضرا وشعرها اسود طويل لنص ضهرها

سراج: وحشتنا يامهاب ايه الغيبة الطويلة دي؟

مهاب قعد معاهم على السفرة: انت عارف ياخالو بقى الشغل 

عبدالحميد بيبصله اوي وحاسس انه مضايق: مالك يامهاب؟

مهاب بصله: انا كويس ياجدي

عبدالحميد: طب يالا كل معانا 

مهاب وقف: ماليش نفس انا هطلع اصلي وانام

عبدالحميد: انا قولت تقعد تاكل معانا 

مهاب قعد: حاضر

مهاب قاعد بيقلب بالمعلقة في الطبق اللي ادامه وسرحان

وفاء: مش بتاكل ليه يامهاب؟

مهاب: ما انا باكل اهو يافوفا

ليلى: بتاكل ايه بس، انت قاعد تقلب في الاكل مش بتاكل

مهاب: لا باكل والله يالولا اهو 

سراج بهزار: مش ملاحظ انك قاعد تقول لولا وفوفا......وبص لأيمن اخوه: ولا ايه رأيك يا ايمن؟

ايمن ضحك: عامل نفسي من بنها

مهاب ضحك: مش هتبطلوا غيرة بقى

سراج: الحب يا ابني من غيرة مايبقاش حب واحنا بنحبهم اوي وعشان كدا غيرتنا عليهم هتفضل لآخر نفس فينا

ايمن: وحبنا ليهم بيزيد يوم بعد يوم، حياتنا من غيرهم ماتبقاش حياة

ليلى ووفاء مبسوطين جدا من كلامه ازواجهم 

مهاب: تفتكروا هلاقي بنت تحبني ذي حبكم لبعض كدا؟

عبدالحميد: هتلاقي ياحبيبي 

مهاب: يارب ياجدو؛ لاني بجد محتاجها في حياتي 

شروق: وانا هدورلك عليها واهو اعمل فيك ثواب😂

الكل ضحك على كلام شروق، مهاب رغم انه بيضحك وفرحان انه في وسطهم بس حزين

عبدالحميد قام وبص لمهاب: خلص اكلك وحصلني على المكتب

مهاب وقف وعبدالحميد قعده تاني: انا قولت لما تخلص اكلك

مهاب: انا خلاص اكلت

عبدالحميد بجدية: قولتلك كمل اكلك

مهاب قعد تاني على السفرة وعبدالحميد دخل مكتبه

خلود: معلش يامهاب انت عارف جده بيحبك اد ايه 

مهاب: عارف، بس انا فعلا ماليش نفس

وفاء: مالك ياحبيبي

مهاب: مافيش يافوفا، انا كويس

مهاب قعد شوية وقام دخل لجده المكتب

عبدالحميد: يالا اقعد واحكيلي

مهاب قعد: احكيلك ايه؟

عبدالحميد: اتخانقت مع جدك مهاب ليه؟

مهاب بصله اوي: وانت عرفت منين؟

عبدالحميد ابتسم: بقالك فترة مجيتش تنام هنا، وباين عليك انك مضايق 

مهاب اتنهد بحزن: تعبان اوي ياجدو

عبدالحميد: سلامتك من التعب ياحبيبي، قولي اتخانقت معاه ليه؟

مهاب حكاله اللي حصل

عبدالحميد اتنهد: ليه يامهاب بتفتح في اللي فات، مش اتفقنا اننا ننسى

مهاب: لو انت قدرت تنسى انا هنسى، دا انت كنت اقرب صديق له وبقالكم سنين بعيد عن بعض عشان اللي حصل

عبدالحميد قام من مكانه وقعد ادام مهاب: عمري ماهنسى يامهاب، بس دا جدك ياحبيبي وحاول تنسى عشان تقدر تتعامل معاه

مهاب: مش قادر ياجدي مش قادر والله

عبدالحميد: عارف يامهاب ساعات بفكر اني اسامحه بس للأسف جبروته مسيطر عليه وكبريائه مأثر عليه

مهاب: لا ياجدو اوعى تسامحه 

عبدالحميد اتنهد: المهم شغلك عامل ايه؟

مهاب: اهو كويس 

عبدالحميد: والمعرض؟

مهاب: كويس ياجدو الحمدلله

عبدالحميد: ماشي ياحبيبي، اطلع صلي ونام 

مهاب: حاضر، بس كنت عاوز حضرتك تحجزلي تذكرة لباريس بعد يومين

عبدالحميد: هتروح باردوا؟

مهاب: لازم ياجدو، مقدرش اسيبها لوحدها مش كفاية مش بشوفها غير كل خمس شهور بسبب شغل جدي

عبدالحميد: هتفضل مخبي عليهم لحد امتى؟

مهاب: لحد مايجي الوقت اللي كلهم يعرفوا بوجودها 

عبدالحميد: طب هاتها معاك وتيجي تعيش في وسطنا هنا 

مهاب: دا اللي ناوي عليه ان شااء الله

عبدالحميد: ماشي ياحبيبي 

مهاب طلع صلى ونام 

عاوزة اللي يقرأ يعمل لايك ❤ وتعلقوا بتوقعاتكم❤❤ عاوزة الاقي تفاعل على الحلقة❤

#الحلقة_التانية

#رواية_هكذا_يكون_الحب❤

#بقلم_ايمان_جمال❤

              __________________________

تاني يوم الصبح

فيروز صحيت صلت ركعتين الصبح ولبست وخرجت عشان تروح الشركة وضياء كان مستنيها تحت البيت

فيروز: صباح الخير

ضياء: صباح النور، يالا عشان مش تتأخري

فيروز: حاضر

ضياء وقف تاكسي وركبوا هما الاتنين وصلها الاول الشركة وراح شغله

فيروز وصلت الشركة وطلعت، عبدالحميد كان لسة ماوصلش الشركة بس السكرتيرة حنان كانت موجودة

فيروز مستر عبدالحميد لسة ماوصلش؟ 

حنان: لسة، اكيد انتي فيروز صح؟ 

فيروز بإبتسامة: ايوا انا واكيد انتي حنان صح؟ 

حنان: ايوا، مستر عبدالحميد كلمني وقالي عليكي

فيروز ابتسمت وسكتت

حنان: بصي ياستي انا خلاص هتجوز وعشان كدا هسيب الشغل، فأنا هعرفك كل الشغل ماشي ازاي ووريني شطارتك

فيروز: مبروك ياحبيبتي، ان شاء الله هتعلم بسرعة 

حنان: الله يبارك فيكي ياحبيبتي، انتي فعلا باين عليكي انك شاطرة وهتتعلمي بسرعة

فيروز قعدت مع حنان وبتتعلم الشغل

نيجي لڤيلا عبدالحميد هلال: 

مهاب صحي وصلى ركعتين الصبح ولبس من اللبس اللي موجود في اوضته، ونزل تحت والكل كانوا قاعدين على السفرة بيفطروا

مهاب: صباح الخير

الكل: صباح النور

سراج: يالا اقعد افطر

مهاب: معلش ياخالو انا مستعجل عشان الشغل

عبدالحميد: باردوا هتخرج من غير فطار

مهاب باس دماغ جده: انت عارف ان مستعجل وهاكل اي حاجة في الشركة

عبدالحميد: ماشي ياحبيبي 

مهاب: ماتنساش تحجزلي تذكرة الطيارة 

عبدالحميد: حاضر

مهاب مشي وراح شركة جده اللي هي في نفس الوقت شركته، واول ماوصل السكرتيرة بلغت مهاب(الجد) بوصول مهاب(الصغير) 

مهاب(الجد) دخل مكتب مهاب(الصغير): كنت فين من امبارح؟ 

مهاب بصله وفضل قاعد في مكانه مقامش وماتكلمش

مهاب(الجد) قعد ادامه: على فكرة انا بكلمك

مهاب(الصغير) بصله: نعم

مهاب(الجد): كنت فين؟ 

مهاب(الصغير): كنت في بيتي التاني

مهاب(الجد): اها عند عبدالحميد

مهاب(الصغير): اه عند جدي عبدالحميد 

مهاب(الجد): اشمعنا بتقوله جدي وانا لا؟ 

مهاب(الصغير): انا مش عاوز اتكلم ولا عاوز اتخانق تاني وكفاية اللي انت عملته 

مهاب(الجد) مضايق انه لأول مرة يضرب مهاب(الصغير): انت اللي استفزتني

مهاب(الصغير): تقوم تضربني؟......ليه انت شايفني عيل صغير؟ 

مهاب(الجد): هتفضل بالنسبالي عيل صغير مهما كبرت

مهاب(الصغير): وانا مش هقبل كدا

مهاب(الجد): المهم خلينا في شغلنا، دلوقتي جهزت التصاميم اللي طلبتها منك؟ 

مهاب(الصغير): بكرة هيكونوا على مكتبك

مهاب(الجد) قام واتحرك لعند باب المكتب ودور وشه لمهاب وفتح الباب وخرج

مهاب(الصغير) بيكلم نفسه: حتى مش عارف تقولي اسف، صدقني دا كان هيفرق معايا اوي

      ####################

شركة عبدالحميد هلال: 

عبدالحميد وصل وطلب حنان وفيروز، وشوية ودخلوا مكتبه

حنان: خير يافندم

عبدالحميد: اقعدوا

حنان وفيروز قعدوا

عبدالحميد: عاوزكم تحضروا الاجتماع اللي بعد ساعة 

حنان: تحت امرك يامستر عبدالحميد 

فيروز: حاضر

عبدالحميد بص لحنان: ايه رأيك في فيروز؟ 

حنان بصت لفيروز: حبيتها جدا وماشاء الله عليها شاطرة وفهمت الشغل

عبدالحميد: كنت متأكد من كدا

فيروز: ان شاء الله هكون عند حسن ظن حضرتك

عبدالحميد: اكيد، المهم دلوقتي ياحنان جهزي اوراق الصفقة الجديدة 

حنان: حاضر

حنان وفيروز خرجوا يجهزوا الورق

بعد ساعة كان الاجتماع والكل قاعد في اوضة الاجتماعات 

عبدالحميد: اجتماع النهاردة مهم جدا ولازم الكل يكون فايق

الكل: مع حضرتك 

عبدالحميد بيكلم محاسب الشركة (فؤاد): عملت ايه في دراسة الجدوى اللي قولتلك عليها؟ 

فؤاد: جاهزة يافندم....مسك الملف: اهو حضرتك 

عبدالحميد مسك الملف وبيبص فيه: الاسعار دي عاوزة تتقلل شوية يافؤاد

فؤاد: كدا هتبقى خسارة لينا

عبدالحميد كان لسة هيرد بس فيروز سبقته: بعد اذن مستر عبدالجميد....مين قال اننا هنخسر بالعكس احنا هنقدم شغلنا والمناسب للصفقة وان شااء الله يوم مانكسبها هتفتح علينا شغل اكبر وفرص كتيرة للشركة وبكدا هنكسب مش هنخسر

عبدالحميد وفؤاد معجبين جدا بكلام فيروز

فؤاد: انتي عندك حق يا انسة فيروز

فيروز ابتسمت وسكتت

عبدالحميد لفؤاد: بص يافؤاد، فيروز هتكون معاك في اي حاجة تخص الحسابات وتساعدوا بعض ودا طبعا جمب انها تكون سكرتيرتي الخاصة

فيروز فرحت جدا: شكرا جدا على ثقة حضرتك الكبيرة فيا

عبدالحميد: تشكريني على ايه؟ انتي فعلا اد الثقة دي

فيروز فرحت جداااا

فؤاد: خلاص يافندم بعد الاجتماع هقعد انا والانسة فيروز ونراجع الورق تاني

(فؤاد: شاب عمره ٢٧ سنة، طيب جدا واخلاقه كويسة، وطويل وملامحه حلوة وبشرته بيضا وعيونه عسلي وشعره اسود) 

عبدالحميد: تمام يافؤاد........دلوقتي بقى لازم الشغل يكون خلصان قبل يومين عشان نقدم ورقنا عشان الصفقة الجديدة

الكل: حاضر يافندم

الاجتماع خلص والكل خرج بس عبدالحميد طلب من فيروز تستنى

عبدالحميد: انا مبسوط اوي منك، انتي فعلا هتكوني محاسبة شاطرة

فيروز بفرحة: متشكرة اوي 

عبدالحميد: ربنا يحميكي يابنتي ويوفقك، تقدري تخرجي

فيروز خرجت وهي فرحانة وحنان اخدتها كافتيريا الشركة وبيفطروا، وفؤاد شافهم راح قعد معاهم

فؤاد: انتي خريجة ايه يافيروز؟

فيروز: انا في اخر سنة كلية تجارة

فؤاد: ماشاء الله، انتي هتبقي شاطرة جدا في الحاسبات ودا باين من كلامك في الاجتماع

فيروز: متشكرة اوي لحضرتك

فؤاد: حضرتك ايه؟ احنا زمايل وياريت نشيل الألقاب.......وبص لحنان: ولا ايه ياحنان؟

حنان: ايوا يافيروز احنا كلنا هنا زمايل واخوات 

فيروز: حاضر

فيروز فرحانة بالشغل واصحابها ورغم ان حنان خلاص هتسيب الشركة بس هتفضل صاحبتها وفؤاد هيكون معاها في الشغل ومعاها، وشوية وتليفونها رن وكانت شروق صاحبتها

فيروز: صباحو فل ياشوشو

شروق: صباحو ورد يافيروزتي

فيروز: عندي ليكي خبر حلو

شروق: ايه قولي بسرعة

فيروز: انا اشتغلت خلاص

شروق بفرحة: بجد

فيروز: ايوا.......وتخيلي كدا اشتغلت فين؟

شروق: فين؟

فيروز: في شركة جدك عبدالحميد

شروق بفرحة: انتي بتتكلمي بجد؟

فيروز: اه والله بس اوعديني انك مش تعرفيه اني صاحبتك

شروق: طب ليه؟

فيروز: انا مش عاوزاه يعرف عشان اثبت نفسي من غير مايكون في اي واسطة 

شروق: ماشي يافيروز اوعدك اني مش هقوله خلاص

فيروز: حبيبة قلبي انتي

شروق: بما انك خلاص اشتغلتي فأنا هحتفل بيكي بقى وعزماكي على الغدا في المكان بتاعنا

فيروز: كان نفسي اكون انا اللي اعزمك 

شروق بعتاب: عيب عليكي هو فيه فرق بنا باردوا....احنا اخوات يابنتي وبعدين ياستي لما تاخدي مرتبك ابقي اعزميني

فيروز: خلاص اتفقنا.....هخلص بقى واكلمك

فيروز خلصت مع شروق ورنت على ضياء

ضياء: الو 

فيروز: الو ياضياء....انت في الشغل؟

ضياء: ايوا ليه؟

فيروز: كنت عاوزة اقولك اني هخرج مع شروق صاحبتي بعد الشغل 

ضياء: ماشي بس متتأخريش

فيروز: حاضر 

ضياء قفل معاها، والسكرتيرة الخاصة بمدير الشركة اللي شغال فيها دخلت 

(ضياء محاسب في شركة استيراد وتصدير)

سلمى دخلت وقربت منه: وحشتني

ضياء: انتي اكتر

سلمى: لسة ادامك شغل كتير؟

ضياء: اه ساعة او ساعة ونص

سلمى قربت من ودانه وهمستله: عاوزة اخرج معاك النهاردة اصلك وحشتني اوي

ضياء بنفس الهمس: وانتي وحشتيني اوي 

(عرفتوا بقى ان ماردتش اتكلم عنه في تعريف الشخصيات عشان مايستاهلش)

  #######################

فيروز خلصت الشغل وشروق كانت مستنياها تحت الشركة بعربيتها

شروق: وحشتيني اوي 

فيروز: انتي اكتر والله

شروق: يالا عشان نروح مكانا 

فيروز: ماتيجي نقعد عالبحر 

شروق: هناكل الاول في الكافيه المفضل لينا وننزل نقعد عالبحر

فيروز: ماشي 

بعد شوية وصلوا عند كافيه اسمه (7Sky) 

(الكافية ده مكانة مميز جداً على البحر على طول بڤيو على قلعة قايتباي مباشرة، بيقدم جميع المشروبات، والمأكولات المختلفة، بالإضافة لأطباق السوشي المميزة جداً عندهم)

فيروز وشروق دخلوا وقعدوا على ترابيزة وطلبوا الاكل

شروق: بس انا فرحت انك خلاص اشتغلتي وفرحت اكتر انك عند جدو في الشركة

فيروز: بجد مش عارفة اقولك انا مبسوطة ازاي وهو كويس اوي معايا وطيب جدا

شروق: هو فعلا كدا واحنا بنحبه جداااا وحقيقي الحمدلله انك معاه

فيروز: الحمدلله

شروق: اخبار ضياء ايه؟

فيروز بتنهيدة: كويس

شروق: مش ناوية تسيبك منه؟

فيروز بصتلها: انا حبيته اوي ياشروق.....رغم انه زفت بس اعمل ايه بحبه وماليش غيره

شروق: انتي خلاص اشتغلتي ومعتيش محتجاله

فيروز: يارتني كنت اقدر اسيبه بس حقيقي رغم انه بيجرحني بتصرفاته وبيوجع قلبي بس للأسف قلبي بيحبه

الجرسون نزل الاكل على التربيزة

شروق: طب يالا ناكل وبعد كدا نبقى نشوف الموضوع دا بعدين

البنات بدأوا ياكلوا وفرحانين انهم سوا، وخلصوا الغدا ونزلوا يقعدوا عالبحر 🌊

               #############

نيجي لمهاب، قاعد في مكتبه والسكرتيرة دخلت 

مهاب: في حاجة يا اسماء؟

اسماء: انسة ريماس بارة وعاوزة حضرتك

مهاب بإستغراب: عاوزاني انا؟!

اسماء: ايوا يافندم

مهاب: ماشي دخليها 

اسماء خرجت ودخلت ريماس

ريماس: هاي مهاب

مهاب: اهلا ريماس

ريماس قعدت: كنت جايا لجدو مهاب وقولت اشوفك

مهاب رفع سماعة التليفون وبصلها: تشربي ايه؟

ريماس: عصير برتقال

مهاب طلب ليها عصير وطلب لنفسه قهوة مظبوطة

ريماس: ماتيجي نخرج النهاردة شوية 

مهاب بصلها: مش فاضي عندي شغل كاير 

ريماس: بس انا طلبت من جدو مهاب كدا وقالي اننا نخرج عادي

مهاب: وانا قولت عندي شغل مش هعرف

ريماس بحزن: عشان خاطري يامهاب انا بجد زهقانة وعاوزة اخرج

مهاب ببرود: اخرجي مع اصحابك

ريماس: ماشي عن اذنك

مهاب: طب والعصير اللي زمانه جاي؟

ريماس بصتله بغضب: ابقى اشربه انت....عن اذنك

ريماس خرجت ومهاب ضحك 

  نيجي لباسم شوية 

باسم قاعد في مكتبه في المعرض، والشاب اللي بيشتغل معاه خبط ودخل

باسم: في حاجة ياحمادة؟

حمادة: فيه انسة تحت مصممة تاخد عربية محجوزة

باسم: مش فاضي للعب العيال دا، انزل قولها تختار غيرها

حمادة: مش راضية ومصممة عليها 

باسم وقف: طب ادامي اما نشوف مين دي

باسم نزل واتفاجئ انها خلود بنت عمه

باسم: خلود؟

خلود: ايه رأيك في المفاجأة دي

باسم: حلوة بس غريبة اوي انك تجيلي المعرض 

خلود: عادي كنت قريبة من هنا قولت اشوفك....انت مضايق اني جيت؟

باسم: لا ابدا تعالي نطلع المكتب

باسم اخد خلود وطلعوا المكتب وطلبلها ليمون

باسم: ليه ماقولتيش انك بنت عمي وطلعتي على طول بدل ماتقولي انك مصممة تاخدي عربية محجوزة

خلود: ومين قالك اني مش عاوزاها فعلا؟

باسم: يعني ايه؟

خلود: يعني انا عاوزة اخد العربية دي

باسم: ماينفعش عشان هي اصلا محجوزة وصاحبها هيستلمها النهاردة 

خلود: بس هي عجباني

باسم: عادي استني يجي منها موديل تاني او خدي اي نوع تاني مافي انواع احدث

خلود: بس انا مش عاوزة العربية ياباسم انا عاوزاك انت

باسم بغضب: تاني ياخلود هنرجع للكلام دا؟

خلود: غصب عني

باسم: وانا قولتلك بلاش كدا

خلود غصب عنها الدموع اتجمعت في عنيها: ماشي ياباسم انا اسفة.......ووقفت: انا همشي

خلود سابت باسم ونزلت ركبت عربيتها وقبل ماتتحرك سندت على الكرسي ورجعت براسها لورا وغمضت عنيها

*فلاش باك*

من تلات سنين، اول سنة خلود تدخل فيها الجامعة 

خلود كانت فرحانة ان خلاص هتدخل الجامعة وخلاص كبرت وشافت باسم قاعد في الجنينة وراحت تقعد معاه

خلود: ممكن اقعد معاك؟

باسم: اكيد تعالي

خلود قعدت: باسم كنت عاوزة اقولك حاجة

باسم: قولي 

خلود: انا بحبك

باسم اتفاجئ بالكلمة: طب ما انا كمان بحبك

خلود فرحت: بجد؟

باسم اتفاجئ من فرحتها وفهم هي عاوزة تقول ايه: بحبك ذي اختي ياخلود

خلود انصدمت اوي: بس انا مش بحبك ذي اخويا

باسم: يبقى الاحسن انك ماتفكريش في اللي انت بتفكري فيه

خلود نزلت من عنيها دمعة ومسحتها بسرعة: يعني ايه؟

باسم شاف دمعتها: يعني خلينا كدا ولاد عم واخوات وبس

خلود بوجع: حاضر ياباسم

خلود سابته ومشيت

*عودة من الفلاش باك*

 خلود غصب عنها دموعها نزلت واتحركت بعربيتها ورنت على شروق

شروق: الو ياخوخة 

خلود: انتي فين؟

شروق: انا وفيروز صاحبتي قاعدين عالبحر

خلود: انا جيالكم

شروق: ماشي

شروق قفلت مع خلود، وفيروز قاعدة جمبها

شروق: خلود بنت عمي جايا تقعد معانا

فيروز: ايه يعني تيجي، هي فعلا وحشتني اوي من زمان ماشفتهاش

بعد شوية خلود وصلت وركنت عربيتها وقعدت جمبهم

شروق بتبصلها: مالك؟

خلود بحزن: مافيش......وبصت لفيروز: عاملة ايه يافيروز؟

فيروز بإبتسامة: الحمدلله 

شروق: اخلصي واتكلمي وقولي مالك

خلود: مافيش 

فيروز: سبيها ياشروق ممكن مش عاوزة تتكلم ادامي

خلود: عيب عليكي والله انتي صاحبتي ذي ماهي صاحبتك، بس كل الحكاية اني مخنوقة اوي

شروق بشك: هو انتي اتكلمتي مع باسم؟

خلود بصتلها والدموع نزلت من عيونها: كنت عنده في المعرض

شروق: لييييه؟

خلود عيطت اوي ومش بتتكلم، فيروز مش فاهمة حاجة من اللي بيحصل

فيروز: تقدروا بس تفهموني في ايه يمكن اساعدكم

خلود حكتلهم اللي حصل وكمان حكت لفيرود عن اول مرة اعترفت بحبتا لباسم

فيروز: ممكن اقولك حاجة وتسمعيني؟

خلود: قولي طبعا

فيروز: بصي ياخوخة انا مش هقولك ماتحبيش والكلام دا بس الحب من طرف واحد دا اصعب حب في الدنيا......لما تكوني بتحبي حد وهو مش حاسس بيكي ولا بمشاعرك يبقى دا تعب ليكي انتي ولنفسيتك وصدقيني يمكن اللي بيحصل دا خير ليكي

خلود: مش هقدر احب غيره ولا حتى ابطل احبه

شروق: انا قولتلك نفس الكلام، لاني عارفة اخويا كويس وهو معتبرك اخته ذيي 

خلود بوجع: مش عاوزة اسمع اي حاجة ولا عاوزة اتكلم في الموضوع دا وغيروا الكلام بقى عشان مش اسيبكم وامشي

فيروز: لا خلاص هنسكت وهنتكلم ونهزر وكل حاجة 

البنات فضلوا قاعدين سوا وبيتكلموا والى حد ما غيروا مود خلود وضحكت وهزرت معاهم

    ######################

سلمى وضياء قاعدين في كافيه وبيتكلموا

سلمى: عملت ايه في عرض السفر اللي المدير اقترحوا عليك؟

ضياء: مش عارف لسة

سلمى: وافق ياضياء دي فرصة كبيرة اوي ليك ولحياتك وكمان عشان نقدر نتجوز

ضياء: طب مانيجي نسافر سوا؟

سلمى: طب والله فكرة واهو كمان نكون سوا ونكون نفسنا وحياتنا عشان نقدر نستقر 

ضياء: خلاص تمام انا كمان يومين هقول للمدير على موافقتي 

سلمى بفرحة: ايوا كدا ياحبيبي 

(اهو اللي ذي ضياء دا مايستاهلش يتحب اصلا)

مهاب خلص الشغل وراح الچيم، ودخل اوضة اللبس وغير هدومه (تيشرت وشورت رياضي وكوتشي)

مهاب بدأ يتمرن وشوية وباسم وصل وغير هدومه وبدأ يتمرن جمب منه وباين عليه انه مضايق

مهاب بصله: اهلا بباسم باشا

باسم: بس يارخم

مهاب ضحك: مال وشك مقلوب ليه كدا؟

باسم: مافيش

مهاب: عليا باردوا

باسم: ماخلاص بقى سبني اتمرن

مهاب: امممم ماشي انت حر 

باسم بدأ يتمرن وكأنه بيتخانق مع الجهاز اللي بيتمرن عليه، ومهاب بيبصله بإستغراب، بعد شوية خلصوا تمارين ودخلوا الساونة 

مهاب: مش هتقولي مالك

باسم: مافيش يامهاب مخنوق بس شوية ومش عارف من ايه فقولت اجي اطلع خنقتي في التمارين

مهاب: هحاول اصدقك

باسم ضحك: دا انت رخم اوي

مهاب ضحك: ايوا كدا اضحك وروق

باسم: ماشي ياسيدي......اه صح جدو هحجزلك تذكرة الطيران

مهاب: تمام

باسم: خلاص ناوي ترجعها معاك؟

مهاب: اه ياباسم بس مش هيعرفوا بوجودها غير في الوقت اللي انا احدده

باسم: خايف عليك

مهاب: عيب عليك مش مهاب العمري اللي يتخاف عليه

باسم: وجدك هيعمل ايه لما يعرف؟

مهاب: جدي دا بقى حسابه معايا عسير......عمري ماهنساله انه السبب في كل اللي حصل لأمي

باسم: بلاش الانتقام يسيطر عليك يامهاب

مهاب: هو اللي بدأ ياباسم ويستحمل بقى....كان دايما يقولي انت النسخة التانية مني، انا فعلا النسخة التانية منه بس على انضف ما انكرش ان ساعات بكون قاسي بس بيكون معايا الحق مش هو اللي جبروته هيدمره

باسم: صدقني هيجي اليوم اللي هيفوق فيه

مهاب: يفوق ولا مايفوقش المهم عندي اكون انا مرتاح وامي مرتاحة 

باسم: صدقني عمر ما الانتقام كان راحة 

مهاب: بقولك ايه خلاص سيبنا من سيرته واسمعني في اللي هقولك عليه كويس 

باسم: قول 

مهاب اتكلم مع باسم وبعد شوية خلص كلام

باسم: باردوا يامهاب؟

مهاب: لازم اشوفه بيغرق ادامي ويطلب مني اساعده

باسم: بس دي شركتك ذي ماهي شركته

مهاب: عمره ما اعتبرها شركتي.....هو فاكر نفسه اللي بيؤمر وبس.....بس خلاص جه وقت اللعب

باسم: بلاش يامهاب

مهاب بغضب: باسم بلاش كلامك دا.....ولو مش عاوز تساعدني قولي وانا اشوف حد تاني يساعدني

باسم: لا يامهاب هساعدك عشان انا استحالة اسيب اي حد غريب يساعدك في كدا ويجي في يوم يقولك انت عملت وعملت

مهاب: تمام ياباسم انا خلاص هسافر بعد بكرة ومش هاجي غير بعد اسبوع تكون انت عملت اللي طلبته منك

باسم: حاضر......بس جدك عبدالحميد لو عرف مشـ..........

باسم كان لسة هيكمل بس مهاب قاطعه: حتى لو عرف انا هتصرف 

باسم: ماشي

الشباب خرجوا من الساونة واخدوا دش ولبسوا هدومهم وكل واحد ركب عربيته ورجعوا لڤيلا عبدالحميد

والبنات كل واحدة فيهم رجعت لبيتها، فيروز رجعت بيتهم، وشروق وخلود رجعوا الڤيلا 

ضياء خلص غدا مع سلمى ورجع بيته

فؤاد من ساعة مارجع بيتهم وهو بيفكر في فيروز وعقله مشغول بيها

(فؤاد من عيلة كويسة مادياًّ، بس قرر يشتغل في اي شركة كبيرة الاول وبعد كدا يأسس شركة لوحده)

مهاب(الجد) قاعد عالسفرة مع عيلته اللي هي اصلا مكونة من مين من ابنه فايز ومراته ناني وريماس بنت مراته

مهاب(الجد): هو باردوا مهاب مجاش؟

فايز: لا يابابا انا كلمته وقالي انه عند جده عبدالحميد

مهاب(الجد): تمام

ريماس: هو زعلان من حاجة؟

ناني: لا ياحبيبتي

مهاب مضايق ان حفيده بعيد عنه وان عبدالحميد اقربله، مهاب ساب الاكل وطلع اوضته

نيجي لڤيلا عبدالحميد هلال

الكل قاعد عالسفرة، منهم اللي سرحان ومنهم اللي زعلان ومنهم اللي بيضحك وبيهزر عادي

باسم عينه على خلود اللي قاعدة تقلب في طبق اكلها ومش بتاكل وسرحانة ومش فاهم هو ليه مضايق انه اتكلم معاها كدا

شروق ملاحظة تركيز باسم على خلود بس مش عاوزة تعشم بنت عمها بأمل ممكن يطلع وهم

مهاب قاعد بياكل وكان مرتاح نفسيا

عبدالحميد: جهز نفسك للسفر بعد بكرة

مهاب: باسم قالي ان حضرتك حجزت وانا جاهز 

سراج: خلاص ناوي ترجعها؟

مهاب: اه ياخالو خلاص كفاية عليها كدا تقعد لوحدها واهلها موجودين

ايمن: دا احسن قرار هتاخده يامهاب

مهاب: انتوا بس جهزوا اوضتها وكلها يومين بالظبط وهتكون هنا معانا

عبدالحميد: ماتقلقش يامهاب كل حاجة جاهزة 

باسم قاعد مش معاهم اصلا ومهاب لاحظ دا

مهاب بيهمس لباسم: مالك سرحان في ايه

باسم فاق من سرحانه: ها.....لا مافيش

مهاب: انا هصبر عليك لحد ما ارجع من السفر ولينا قاعدة سوا 

باسم بصله وسكت 

خلصوا اكل ومهاب طلع يصلي العصر في اوضته وشوية ونزل قعد معاهم 

فيروز في بيتهم خلصت صلاة العصر وعملت فنجان قهوة وقعدت في البلكونة بتفكر في اللي جاي وشوية والجرس رن وكان صاحب البيت 

صلاح: مساء الخير

فيروز: مساء النور

صلاح: ها مش ناوية تدفعي بقى الايجار 

فيروز: انا قولتلك ان اخر الشهر هدفعلك نصه والشهر التاني اكون خلصته

صلاح: ماليش دعوة انا صبرت عليكي كتير عشان غلاوة ابوكي اللي يرحمه عندي

فيروز: صدقني مش هعرف ادفع غير نص الايجار بس اخر الشهر

صلاح: معرفش اتصرفي

فيروز بحزن: حاضر هتصرف 

صلاح سابها ومشي وهي قفلت الباب بس ضياء رن الجرس وهي فتحت 

ضياء: وحشتيني

فيروز ابتسمت وسكتت

ضياء: مالك؟

فيروز: صاحب البيت عاوز الايجار المتأخر 

ضياء: مش انت قولتي هتدفعي اخر الشهر من مرتبك؟

فيروز: ايوا قولتله كدا قالي انه عاوزه كامل

ضياء: خلاس خدي سلفة من الشغل

فيروز: ازاي بس وانا لسة مكملتش يومين

ضياء: عادي

فيروز: طب ممكن تسلفني انت الفلوس واخر الشـ......

ضياء قاطعها: الظروف وحشة وكمان انا كلها كام يوم واسافر 

فيروز بصدمة: تسافر فين؟

ضياء: هروح فرع الشركة اللي في عمان

فيروز: طب وانا؟

ضياء: كلها كام شهر بس وهرجع واتجوزك 

فيروز عيونها دمعت: يعني هتسبني لوحدي؟ 

ضياء: انتي مابقتيش صغيرة وانا بعمل كل دا عشانك (ياكدااااااااب)

فيروز: خليك جمبي ياضياء وانا خلاص اشتغلت ونقدر نلم فلوسنا على بعض ونتجوز

ضياء: انا شايف ان دي فرصة كويسة لحياتنا وهنعيش مرتاحين بعدها

فيروز مصدومة من كلامه ومش عارفة تقوله ايه

ضياء لاحظ زعلها وحاول يلحق نفسه: زعلانة ليه بس يافيروزتي ماهي كلها كام شهر وتكوني مراتي حلالي وفي حضني

فيروز اتكستف من كلامه وبصت للأرض وهو رفع وشها بإيده: عاوز اشوف ابتسامتك

فيروز ابتسمت غصب عنها ومن جواها نار بتحرق في قلبها 

ضياء سابها ونزل عشان كان خارج وهي دخلت قعدت تعيط وتدعي ربنا انه يحلها ويكون جمبها في اصعب اوقاتها

مهاب قاعد مع باسم في الجنينة وشروي وخلود قعدوا معاهم

شروق: انتوا رخمين على فكرة 

مهاب رفع حاجبه: ليه ان شااء الله؟

شروق: عشان مابقتوش تخرجونا ذي الاول 

مهاب: في دي بقى فعندك حق فيها 

خلود: طب يالا نخرج

باسم مستغرب انها بتتعامل عادي وكأن مافيش اي حاجة

مهاب لباسم: ها ياباسم قولت ايه؟

باسم: ماشي هطلع اغير هدومي ونخرج

مهاب: وانا كمان

مهاب وباسم طلعوا يغيروا هدومهم 

شروق لخلود: احلى حاجة انك بقيتي مرتاحة شوية عن الصبح

خلود: عادي ياشوشو المفروض اني اتعودت خلاص

شروق: والله هو الخسران 

خلود ضحكت وسكتت، بعد شوية الشباب نزلت وركبوا هما الاربعة في عربية واحدة وكانت عربية مهاب، باسم ومهاب جمب بعض في الكرسي الامامي وخلود وشروق في الكرسي الخلفي، ومهاب شغل كاست العربية وكانت اغنية *حبيته بيني وبين نفسي*

خلود دموعها نزلت منها غصب عنها على كل كلمة في الاغنية وباسم شافها من في مرايا العربية وقفل الكاست

مهاب: ايه يارخم قفلت الاغنية ليه؟

باسم: مافيش

مهاب رجع شغل الكاست تاني بس جاب اغاني تانية واكترها كانت مهرجانات😂، وبعد شوية وصلوا النادي ومهاب ركن العربية ودخلوا سوا وقعدوا وطلبوا اتنين عصير واتنين قهوة 

خلود: مهاب احنا هننزل حمام السباحة 

مهاب: في حد ينزل الماية الوقتي.....احنا لسة خارجين من الشتا ولسة الربيع مبدأش

شروق: عادي يامهاب الجو مش برد وبعدين احنا صيفنا خلاص اصلا 

مهاب: ماشي 

شروق وخلود قاموا يلبسوا مايو اسلامي وينزلوا حمام السباحة

باسم لمهاب: انت سمحتلهم ينزلوا ليه؟

مهاب: عادي ياباسم ماهما بينزلوا على طول

باسم كان مضايق ومش عارف من ايه

شوية والبنات لبسوا ونزلوا المايا ومهاب ماسك تليفونه بيقلب في الفيس بوك وباسم عينه على البنات وخصوصا على خلود ، شوية والبنات خرجوا من المايا، وكان في ولد واقف وكان وائل زميل خلود في الجامعة، وشروق سبقت خلود وراحت تغير هدومها

وائل: خلود! ايه المفاجأة الحلوة دي

خلود: اذيك ياوائل

وائل: الحمدلله، عملتي ايه في اجازه نص السنة؟

خلود: ولا اي حاجة بس قضناها SHOPPING (تسوق)

وائل ضحك: ما انتوا بنات بقى 

خلود ضحكت، وباسم وقف وراح عليهم 

باسم بغضب: انتي واقفة عندك تعملي ايه؟

خلود: بكلم وائل

باسم: وائل دا يطلع مين؟

وائل: انا وائل المنشاوي زميلها في الكلية

باسم سلم عليه وضغط على ايده كان هيكسرها: تشرفنا 

وائل: طب عن اذنكم

باسم بيبص لخلود: حضرتك واقفة تضحكي وتهزري معاه

خلود: انا معملتش حاجة غلط وبعدين دا زميلي

باسم بغضب: بلا زميلك بلا زفت وازاي اصلا تسمحي لنفسك تقفي ادامي وانتي هدومك بالشكل دا 

خلود اضايقت من كلامه بس فرحت انه خايف عليها بس فرحتها راحت لما قالت دا خوف اخ على اخته وبس: بعد اذنك ياباسم عشان اغير هدومي

خلود مشت من ادامه وهو واقف مضايق وبيكلم نفسه: الله وانا مالي يعني هي اول مرة تنزل حمام سباحة او هدومها تكون مبلولة ولازقة على جسمها

باسم راح قعد مكانه ومهاب مستغرب من تصرفاته

مهاب: مش بقولك لينا قاعدة حلوة سوا بس بعد ما ارجع من السفر

باسم: قصدك ايه؟

مهاب: ولا اي حاجة خالص 

شوية والبنات قعدوا معاهم وباسم مضايق من خلود اوي وهي اصلا عملت نفسها من بنها 

                 ###########

عدا يوم وجه يوم سفر مهاب، وخلاص سافر 

فيروز كانت قاعدة في مكتبها في شركة عبدالحميد هلال وفجأة وقف ادامها حد

فيروز بصتله: حضرتك مين؟

....... : في حد مايعرفش مهاب العمري؟

فيروز وهي لسة قاعدة مكانها: معلش محصليش الشرف قبل كدا

مهاب العمري(الجد): انتي لسة جديدة هنا؟

فيروز: ايوا

مهاب العمري(الجد): طب بلغي عبدالحميد اني عاوزه

فيروز دخلت لعبدالحميد 

عبدالحميد: في حاجة يافيروز؟

فيروز: اه يافندم، مهاب العمري عاوز حضرتك

عبدالحميد استغرب اوي لان اكيد اللي واقف بارة مش مهاب حفيده دا مهاب صاحب عمره اللي مقاطعين بعض من سنين

فيروز: اخليه يدخل؟

عبدالحميد: ها....اه دخليه

فيروز دخلت وسمحت لمهاب يدخل، ودخل وقعد ادام عبدالحميد

عبدالحميد: نورت شركتي

مهاب بصله: انا عاوزك تسحب نفسك من المناقصة الجديدة

عبدالحميد بصله: انت جاي عشان كدا؟

مهاب ببرود: امال فاكر جاي عشان ايه؟

عبدالحميد: عشاني مثلا

مهاب بغضب: واجي عشانك انت ليه....وبعدين انا لولا الشغل ماكنتش هاجي هنا ولا اشوفك حتى

عبدالحميد بهدوء: المفروض انا اللي اكون زعلان منك يامهاب 

مهاب وقف: انا كنت جاي عشان اقولك اللي عندي وياريت تنفذ......ومشي عند الباب وكان هيخرج بس وقف على جملة عبدالحميد

عبدالحميد: مش هتنازل عنها يامهاب

مهاب بصله بشر وسابه وخرج وقابل فيروز وهي قاعدة على مكتبها

مهاب: تاخدي كام وتجبيلي ملف المناقصة؟

فيروز انصدمت من اللي سمعته: نعم؟!

مهاب: اللي سمعتيه

فيروز وقفت: انت اكيد بتهزر مش كدا؟

مهاب بغضب وبصوت واطي: مش مهاب العمري هو اللي يهزر مع عيلة ذيك

فيروز: طلبك مرفوض يافندم ومش الفلوس اللي هتخليني اخون مديري

عبدالحميد بصلها من فوق لتحت: شكلك عاوزة حاجة تانية غير الفلوس.....بس مايبانش عليكي خالص

فيروز اضايقت: قصدك ايه؟

عبدالحميد: يعني مثلا مش الفلوس اللي تخليكي تجيبي الملف ممكن ليلة مثلا مع اي راجل

فيروز هنا مقدرتش تستحمل اهانة وضربته بالقلم (اوبس.....تستاهل)

     #####################

الحلقة خلصت 

ياترى مهاب(الجد) هيعمل ايه في فيروز بعد اللي حصل دا؟

ياترى مين هي اللي بيتكلم عنها مهاب (الصغير) ومخبيها عن الكل؟

ياترى باسم وخلود ايه هيحصل معاهم؟

معقول فؤاد يحب فيروز؟ طب هي هيكون رأيها ايه؟

ياترى فيروز لو صاحب البيت طردها هيحصل ايه؟

وضياء الواطي نهايته ايه مع فيروز؟

تكملة الرواية من هنا

قبل ماتخرجوا اتفضلوا الروايات الكامله من بداية الروايه من هنا

 هنا 👇❤️👇❤️👇

 🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺

  روايات كامله وحصريه