رواية تربية حواري الفصل الرابع بقلم ولاء حامد حصريه وجديده على مدونة النجم المتوهج للروايات والمعلومات

رواية تربية حواري الفصل الرابع بقلم ولاء حامد حصريه وجديده على مدونة النجم المتوهج للروايات والمعلومات

فوجئت حور براجل غريب هدومه مبهدله بيشيل كل الخرده اللي موجوده في الورشه

حور: بتعمل ايه يا عم

الراجل: بشيل الخرده زي كل مره

حور: من أمته وانتا بتاخدها انا اول مره اشوفك هنا

الراجل: انا اللي اول مره اشوفك انا جاي حسب اتفاقي مع المعلم وائل صاحب المكان

حور بمده بوز: اممممم المعلم وائل قولتلي وعلت صوتها اوي علشان يسمع كل اللي في المكان طب بص يا حاج المعلم وائل بتاعك داه مالهوش مسمار في الورشه وكل نصيبه الربع في التوكيل بتاع قطع الغيار و¾ ملكي وبإسمي ورث عن المرحوم ابويا المعلم عامر وايدك يا حاج متمدش على حاجه مش ملكك ولا ملكه اظن الكلام واضح ودلوقتي طريق وسكه ورايا اكل عيش

نزل وائل على صوت زعيق حور

وائل بعصبيه وصوت عالي : في ايه يا ست البنات اول ساعه ليكي هنا ونازله شخط ونطر مقولنا الشغل هنا للرجاله قولتوا اطلعوا من البلد

حور بعصبيه وصوت أعلى: صوتى يعلى زي ما انا عايزه من حكم في ماله ما ظلم ياااا ههه معلم وائل انتا هنا مالكش مسمار في الورشه انتا كل اللي ليك ربع التوكيل وبس وعايزه أعرف الراجل داه بياخد الخرده على اي أساس وحتة الشغل للرجاله دي سيبها بقى على جمب اصل بنت المعلم عامر ارجل من ارجل رجل فيك يا بلد.

وائل بخوف من قوه حور وصوتها العالي: طيب تعالي يا ست البنات المكتب نتكلم وانتا يا معلم تعالى معايا

طلعوا كلهم مكتب حور

قعدت حور على مكتبها كإثبات منها للكل انها هنا صاحبه المكان والمال والكل في الكل وقعد وائل والرجل الآخر أمامها

حور ببرود: خير فهمني ايه اللي بيحصل بقى بالظبط

وائل بمساسيه ومحايله لحور: يا بنتي انتي عارفه ان الخرده بتعمل ازمه في المكان هنا وان احنا بنتخلص منها كل أسبوع والمعلم جمعه بيشيلها كلها مره واحده وبيدفع حسابها

حور: امممم وداه كلاله ولا مفروز

وائل بعدك فهم: يعني ايه

حور: يعني بشيل الخرده مره واحده ولا كل حاجه لوحدها

جمعه: لا كلاله يا ست البنات وبدفع اللي فيه النصيب مهو كده كده انتوا مش لازماكم في حاجه يعني

حور برفعه حاجب: اللي فيه النصيب ليه يا معلم شايفني واقفين على باب السيده ولا مقام الملاحه بنقول لله يا محسنين علشان تدينا اللي فيه النصيب

جمعه: لا العفو يا ست البنات انا بقول اللي بيحصل

حور : والموضوع داه من أمته

جمعه: من ايمة 3 شهور كده

حور : امممم طيب اسمع بقى دكر الكلام يا معلم الخرده هاتخدها بالوزن مفروزه عجبك امين معجبكش بدل التاجر الف ويرمح رمح

جمعه بعدم فهم: يعني ايه لا مؤاخذه

حور: يعني الخرده هاتتفرز البلاستك لوحده والالمونيه والاتمونيه والنحاس لوحده والرفايع لوحده الصاج لوحده والحديد لوحده فهمت يا معلم ولا اعيد وكل حاجه بسعر السوق وبيني وبينك حد الله

جمعه برفض: وليه ان شاء الله كنتوا بتدفعوا ابو كلب في الخرده دي منا بشيلها بديكم حقكم

حور: كتر رغي فاضي ملهوش لزوم معايا بين البايع والشاري يفتح الله

جمعه بتفكير: طيب يا ست البنات يا واش يا واش يعني احنا كلنا بنجري على أكل عيشنا وعندنا بيوت وعيال زي الناس بردوا ومصاريف وعمال وهم ما يتلم

حور بهدوء: بص يا معلم الخرده نهر فلوس يعني انتا بتاخدها كلاله وبتفرزها وبتاخد الطاق 10 فيها واحنا كمان والله عندنا عمال وصنيعيه وبيوت مفتوحه وداه مال ولايا ويتامه قولت ايه يا معلم علشان ننجز يا اه يا يفتح الله علشان اشوف غيرك

جمعه بغضب: ماشي يا أسطى

حور : يبقى آمين اخر كل أسبوع هاتشيل الخارج مره واحده وانا هانزل بنفسي افرزه واوزنه قبل مااسلمهولك

وائل بغضب: وليه داه كله

حور ببرود: اظن مالي وانا حره فيه الورشه بكل مسمار فيها ملكي وانا حره في مالي بس لوجه الله هافهمك كل خرده وليها سعر يعني الحديد كيلو الخرده بيلعب من 8 ل 10 جنيه والمعلم بيسلم على 15

وخرده الالمونيه من 30 ل 35 جنيه والاتمونيه من 30 ل 33 جنيه والمعلم بيسلم على 40

وخرده النحاس بيلعب في 60 ل 75 جنيه والمعلم بيسلم 85 او 90

وخرده البلاستيك من 3 ل 5 جنيه والمعلم بيسلم 10

وخرده الرفايع والمسامير من 12 ل 15 جنيه والمعلم بيسلم 25

يعني انتا بتديله الكل كلاله ب الفين ثلاثه وفاكر انك ابو العريف وغمزتله بعينها مش بالسن وبصت لجمعه من هنا وجاي هاتشيل على سعر السوق وبالوزن كده عداني العيب وأزح

يلا بالسلامه علشان ورايا ورق وحسابات عايزه تتراجع قالتها وهي بتبص للمعلم وائل بنظره غريبه

فهمها وائل بإرتباك بس مشي وهو جواه هايطق

نزلوا الورشه وقدام الورشه

جمعه بغضب: وبعدين يا معلم البت دي مش سهله دي عارفه دبة النمله في السوق بنت ابوها بصحيح والعمل المصلحه اللي كانت بتطلع من الخرده بح

وائل بغيظ: وانتا يا راجل يا عره بتستكردني وتقولي الخرده مبتجبش همها وبتحاسبني الكيلو في قلب بعضه ب 20 جنيه وانا اللي فاكر نفسي ناصح

جمعه بلوع: يا ملعم احنا في سوق والسوق مفتوح وماشي بشيلني واشيلك

يعني انا بشيل الخرده بس بردوا انا بجيبلك البضاعه الحلوه النص عمر اللي بتدخلها التوكيل بأقل من ربع تمنها والباقي بتدبه في جيبك غير العربيات المسروقه اللي بتتحل وبتتباع يعني ليا وعليا وليك وعليك آمين يا أبا شوف هاتعمل ايه مع البت دي الا كل المصالح كده هاتتعطل والبت دي دماغها شغاله اكتر من أبوها وهاتقفلنا زي اللقمه في الزور

وائل بشر: ولا تشغل بالك كده كده هي متعرفش عن الحتت اللي بتدخل الورشه وانا هاتصرف

كانو يتحدثون وهم غافلين عن الأذان التي تستمع إليهم

*************

ياسر: هاتفضل قاعد كده يا أبا خلاص اللي حصل حصل خلينا في اكل عيشنا

عابد بهم: امك السبب بنت الكلب زي الشيطان فضلت توسوس في اوداني منا كنت عايش سلطان زماني طمعتني ان البت وأمها بقوا لقمه سهله ونسيت ان البت تربيه عامر اللي بداء من مفيش وعمل فلوس لا تاكلها لا نار ولا حطب والبت بنت ابوها وبص لياسر مش زيك يا خيبه الأمل

فلاش باك

بعد وفاه عامر دخلت نعمه على عابد وهو حزين: ايه يا راجل مالك اجمد كده اومال وفوق لمصالحك وحقك وتجيبه من عين هدي وبنتها

عابد بعدم فهم: حق ايه ومصالح إيه

نعمه بخبث: هو مش المرحوم كان عنه شيئ وشويات

عابد بهزه راس: ايوه

نعمه: ومعندهوش راجل يبقى إيه

عابد: إيه

نعمه بقلب وش: يا راجل فتح معايا يبقى انتا ليك في الورث بشرع الله ويا سلام بقى لو حطينا ايدنا على الورث كله وزياده الخير الف خير مش خيرين بس

عابد بطمع وقد تناسي حزنه على اخوه: قصدك إيه

نعمه بشرود وكره طالع من عنيها قبل لسانها: يعني نحط ايدنا على ورث البت وأمها

عابد: وداه ازاي بقى يا ام العريف

نعمه على نفس وضعها: نجوز حور لياسر واهو ابن عمها وأولى بيها واهز نلم لحم اخوك ومعاهم كمان فلوس اخوك بدل ما ييجي عيل صايع يلف على البت ويلهفه منهم

عابد: طيب وهدي يا ام الأفكار

نعمه بشر وكره: تتجوزها على ورق وتسيبهالي بقى اربيها بمعرفتي وانا هاعرف اكسر شوكتها ونفسها وعينها ومنخيرها اللي رفعاهم في السما دول

عابد وقد اقتنع بكلام نعمه وعشش في دماغه

نهايه الفلاش باك

ياسر بنفخه: الله انا مالي يا أبا هو انتا هاتطلع غلبك عليا وبعدين انتا اللي غلطان كان لازم تسأل وتتطأس قبل ما تطُب عليهم زي القضا المستعجل واهي البت رقدتلنا ولبدت في الدره لحد ما خدتنا على خوانه

عابد: بطل بقى تبكت فيا بقى انا اللي فيا مكفيني وكفايه عليا رقدت أمك

ياسر: ايو اللا بالحق هانعمل معاها ايه دي بقالها ياما راقده وعماله تعيط ولا حتى قادره تحط الزاد في بطنها

عابد: مقهوره القهره نزلت بطنها من اللي عملته بنت الكلب فينا علمت علينا بالجمله

ياسر: اااخ يا ناري لو تسيبني عليها

عابد: يا شيخ اتوكس داه البت علمت عليك وعملتلك محضر بعد ما فتحت قرنك

ياسر: خلاص يا أبا البت خدتنا على خوانه بس بردوا مش هاتفلت من تحت ايدي ليها يوم تقع ومحدش هايسمي عليها

عابد: اسمع ياض البوقين دول علشان مش هاعيدهم تاني حوار اطرانة البرك داه تمسحه من نفوخك كفايه اللي نابنا منها البت دي نابها حامي وازرق كفايه لحد كده بدل ما تخسرنا الجلد والسقط وتبيعنا هدومنا فوق البيعه

ياسر بقلة حيله: ماشي يا أبا وفي نفسه بس بردوا ليها يوم وتقع تحت ايدي

دخل عابد وياسر عند نعمه وهي راقده لا حول ولا قوه

ياسر وهو بيبص على امه بحسره: قومي يا أما ايه اللي صابك بس دانتي كنتي قويه وجبل

نعمه بصوت مبحوح من العياط ووش شاحب كشحوب الأموات: خدت نور عيني طفت نور عيني بنت هدى اااه يا حسرتي على شقا عمري اااه يا وجع قلبي على مالي وحالي اللي ضاع وفضلت عيط

عابد نفخ بزهق: خلاص يا نعمه بقى ما انتي السبب فضلتي تزني زي التمبور اللي زن على خراب عشه واهو النار طالت الكل

ياسر: خلاص يا أبا بقى عمال تبكت فينا داه بدل ما تجيبلها بدل دهبها اللي خدته اللي متتسمى

نعمه بلمعه أمل: ايوه يا عابد والنبي رجعلي نور عيني رجعلي دهبي

عابد بلويه بوق: منين يا حسره البت قلبتني من السماسرة غير الارنين ونص اللي خدتهم تمن نص البيت والمحلات اجيبلك منين 3 كيلو دهب تاني ربنا يفرجها وابقى اعوضهوملك

نعمه بنواح: ااااه يا شقى عمري يا خراب بيتي اااه حسره قلبي كشفت راسي ودعيت عليكي يا حور يا بنت هدي اشوفك مسخوطه كلب إلهي يجيك ويحط عليك قادر يا كريم بحق حرقة قلبي

عابد بزهق: انا قايم مفييش مراره لنواح النسوان داه

ياسر: نامي يا أما علشان تبقى زي الفل خدني معاك يا أبا

***************

يا اثطى حوي يا اثطى حوي

حور بدهشه: في ايه يا يا ديشا

مثيبه يا اثطى مثيبه

حور بدهشه: مصيبه ايه ياض انتا

ايمعيم وائي كان بيتكيم مع اياجي بتاع الخيده عن حواي كبيي

(المعلم وائل كان بيتكلم مع الراجل بتاع الخرده عن حوار كبير)

حور بعدم فهم: لا استنى كده وواحده واحده

المعلم وائل والمعلم جمعه مالهم وواحده واحده على ما افهم الطلاسم اللي بتقولها

ديشا: كانو بيتكيمو في موضوع يخص الويشه

حور كشت وشها بمعنى كمل

ديشا: المعيم وائي بيقويه انهم مش هايعيفو يفكوا العيبيات المثيوقه عيشان انتي عينك مفتحه عييهم وكمان بيدخي قطع غياي التوكيي نث عمي عي انها جديده عيشان يكثب فيها

(المعلم وائل بيقوله انهم مش هايعرفوا يفككو العربيات المسروقه علشان انتي مفتحه عليهم وكمان بيدخل قطع غيار التوكيل نص عمر على أنها جديده علشان يكسب فيها

حور بذهول قامن من المكتب وشدته من ياقه التيشيرت: سمعت الكلام داه من فين ياض

ديشا: كانو بيتكيمو تحت قدام الويشه

(كانوا بيتكلموا تحت قدام الورشه)

حور في نفسها: يانهار اسود يعني استغل مرض ابويا وموته ومشغل الورشه شمال ماااشي يا وائل الكلب

بصت لديشا: اسمع ياض عايزاك تطرطق ودانك مع وائل بالذات لحد ما اتصرف انا في الحوار داه

ديشا: من عنيا يا اثطى حوي

قعدت حور على مكتبها بشرود وهي دماغها هاتنفجر ولنفسها: طيب والحل لو موضوع العربيات المسروقه داه اتشم انا اللي هاروح في الرجلين مهو الورشه بإسمي ومفيش دليل على اللي بيعمله الكلب داه يااارب انا تعبت ضاقت أوي يارب حلها من عندك

وفجاءه افتكرت حور حاجه مهمه جدا

ياترى حور افتكرت إيه وهاتتصرف ازاي اللي جاي ضرب نااار……؟؟؟

الفصل الخامس من هنا

بداية الرواية من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا

وكمان اروع الروايات هنا 👇

روايات كامله وحصريه من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺

خلصتوا قراءة الفصل إتفضلوا جميع الروايات الكامله من بداية الروايه لاخرها من هنا 👇❤️👇💙👇❤️👇