رواية العرافه العجوز الحلقة الثالثة بقلم عادل عبدالله حصريه وجديده

رواية العرافه العجوز الحلقة الثالثة بقلم عادل عبدالله حصريه وجديده

وقبل يوم الفرح بأسبوعين وبعد ذهاب فريد الي عمله ومازالت الساعة لم تصل للعاشرة صباحا وجد جرس هاتفهه يرن فنظر فيه ففوجئ باتصال والدته !!! " أول مرة ماما تتصل بيا في الوقت ده !! خير يارب " .

رد عليها فريد : صباح الخير يا ماما ، خير ؟ في حاجة ولا ايه ؟

أم فريد " تبكي " : ألحقني يا فريد أبوك مات !!!

وبعد وفاة والده بعدة أيام اتصلت تغريد بفريد لتطمئن عليه .....

تغريد : عامل ايه دلوقتي يا فريد ؟

فريد : الحمد لله انا كويس .

تغريد : أنت لسه تعبان يا حبيبي ؟ولا بقيت أحسن ؟؟

فريد : لأ ، احسن دلوقتي الحمد لله .

تغريد : البقاء لله يا حبيبي ، باين من صوتك انك لسه زعلان !! يا حبيبي باباك الله يرحمه كان انسان طيب وهو اكيد دلوقتي في الجنة ، أدعيله وحاول تنسي أحزانك علشان تقدر تكمل حياتك وعلشان كمان مامتك تخرج من احزانها .

فريد : بابا الله يرحمه كان كل حاجة في حياتي وانا مش متخيل أعيش ازاي وهو بعيد عني .

تغريد : معلش يا حبيبي أنا كمان كنت بحب بابا الله يرحمه أوي قبل ما يموت ، لكن مع الوقت بننسي احزانا وبنفضل فاكرينهم وبنكمل حياتنا .

فريد : عندك حق ، هي فترة وهتعدي ان شاء الله .

تغريد : نويت تعمل ايه في الفرح يا حبيبي ؟

فريد : فرح ايه ؟؟!!

تغريد : فرحنا يا حبيبي .

فريد : فرح ايه يا تغريد اللي بتقولي عليه ؟! أزاي أعمل فرح وبابا لسه ميت ؟!!

تغريد : وهنعمل ايه يا فريد في حجز القاعة والفستان والبيوتي سنتر اللي حجزناهم ؟! والناس اللي عزمناهم ؟!!

فريد : كل حاجة هتتأجل .

تغريد : تتأجل أزاي بعد ما عزمنا الناس كلهم وعملنا كل الترتيبات ؟!!

فريد : دي ظروف خارجة عن ارادتنا ، ومستحيل اعمل فرح قبل مرور سنة علي الاقل من وفاة بابا .

تغريد : انت بتقول ايه يا فريد ؟!! سنة !!!

فريد : ايوه طبعا مش اقل من كده .

تغريد : أحنا حتي لو فكرنا نأجل مش معقول ناجل الفرح سنة !!! سنة كتير اوي يا فريد !!

فريد : طيب بعد أذنك مش عايز كلام في الموضوع ده دلوقتي لأن أعصابي تعبانة ، ومش قادر اتكلم في اي حاجة .

وبعد يومين اتصل توفيق " خال تغريد " بفريد .....

وقاله : ازيك يا فريد يا ابني ؟ عامل ايه دلوقتي ؟

فريد : الحمد لله احسن دلوقتي يا عم توفيق .

توفيق : كنت عايز اقعد معاك شوية .

فريد : حاضر يا عمي ، تحب اجيلك امتي ؟

توفيق : هستناك النهاردة تعدي عليا في بيت أم تغريد .

فريد : حاضر يا عمي ، ساعتين بالظبط وأكون عندك .

بعد ساعتين ذهب فريد الي منزل أم تغريد وكانت جالسة مع أمها وخالها ، و قابله خالها بالترحاب

وقال له : أهلا وسهلا ، اتفضل يا فريد يا ابني تعالي اقعد .

جلس فريد ثم قال له : خير يا عم توفيق ؟

توفيق : كل خير يا فريد يا ابني ، انا كنت عايز اطمن عليك واكلمك في موضوع مهم .

فريد : موضوع ايه يا عمي ؟ اتفضل .

توفيق : موضوع جوازك أنت وتغربد .

فريد : حضرتك عارف وفاة والدي لخبطت كل الترتيبات وأكيد لازم نأجل .

توفيق : عندك حق طبعا ، اكيد لازم نأجل الفرح ، لكن كنت عايز اعرف مدة التأجيل ، هنأجل قد ايه ؟

فريد : علي الاقل سنة .

تغريد : شوفت يا خالي ، زي ما قولتلك .

توفيق : سنة !!! كتير أوي يا بني !!! ده انتو خلاص كنتو جهزتوا كل حاجة حتي الشقة كمان فرشتوها وعزمتوا الناس !! معقول تأجلوا فرحتكم سنة كاملة ؟!!

فريد : يعني حضرتك عايزني اعمل فرح وأبويا لسه متوفي ؟!!

توفيق : لا طبعا مينفعش ، لكن ممكن نأجل شهر أو اتنين زي ما تحب ، أنما سنة كتير أوي !!

فريد : شهر !!! لا طبعا مستحيل أتجوز بعد شهر .

توفيق : ايه اللي مستحيل يا فريد ؟! أومال نأجل الفرح سنة ؟!!! هو ده اللي ينفع ؟؟

فريد : يا عمي انا قولت لحضرتك مش هينفع اعمل فرح قبل سنة ، لو هتوافقوا نتجوز بدون فرح بعد ٣ او ٤ شهور علي الاقل انا معنديش مانع .

أم تغريد : أنت من الأول يا فريد مش عايز تعمل فرح وأخدت وفاة والدك حجة تتحجج بيها .

فريد : أنا يا طنط ؟؟ دا أحنا كنا حجزنا القاعة اللي تغريد طلبتها وحجزنا كل حاجة !! يعني مش زي ما بتقولي بتحجج بوفاة والدي الله يرحمه !!

توفيق : أنا مصدقك يا فريد ، لكن معقول هتتجوزوا بدون فرح ؟!! دي ليلة العمر ومش بتتكرر تاني .

فريد : طيب قولي حضرتك رأيك نعمل أيه ؟ حضرتك كبير وفاهم في الأصول أكتر مني .

خالها توفيق : طيب أنا عندي حل وسط ومعقول في نفس الوقت ، أحنا نعمل فرح بأذن الله ويكون بعد ٦ شهور ، وبكده تكون المدة معقولة وفي نفس الوقت نعمل فرح علشان تفرحوا زي باقي العرسان والعرايس .

فريد : لكن يا عم توفيق حتي لو أنا وافقت أكيد والدتي وإخواتي هيزعلوا مني !! وانا مقدرش أزعلهم في موضوع زي ده .

تغريد : ماشي يا فريد ، متزعلهمش هما لكن زعلني انا !! صح كده ؟؟

فريد : ولا أقدر أزعلك ولا أزعلهم .

خالها توفيق : يبقي تاخد رأيهم وترد علينا وان شاء الله هيوافقوا .

فريد : حاضر يا عمي .

وبعد يومين أتصل فريد بخال تغريد وقاله : أنا كلمت ماما وأخواتي يا عمي والحمد لله وافقوا واقتنعوا أننا نعمل الفرح بعد ٦ شهور زي ما حضرتك قولت .

وبعد مرور ال ٦ شهور وبعد أنتهاء حفل الزفاف أخذ فريد عروسته وذهب بها الي عش الزوجية ....

وقف فريد امام منزله وقدم تغريد امامه وقال لها .....

: اتفضلي يا اجمل عروسة في الدنيا .

تغريد : اي يا بني انت مش هتشيلني زي ما بنشوف في الافلام ولا ايه ؟؟

ضحك فريد وقالها : يا بنتي انتي عاوزة تقطمي ضهري من دلوقتي ؟!!

تغريد " بدلال " : قصدك اي يعني ؟ قصدك اني تخينة ؟

فريد " ضاحكا " : لا يا قلبي ده انتي عسل ، ده أنتي موزة الموزز .

تغريد : طيب هتشيل ولا ارجع لبيت ماما ؟؟

فريد " يضحك " : خلاص خلاص انا بهزر ، هشيل وامري لله .

حمل فريد عروسته علي يديه ودخل حتي المصعد وأنزلها ودخلوا الي المصعد .

واثناء صعودهم بالمصعد حاول فريد مداعبة عروسته لكنها تمنعت وتدللت عليه ....

وقالت " بدلال " : بطل قلة ادب انا بقولك .

ضحك فريد وقال : قلة ادب ايه بس !! انا متربتش اصلا ( ويضحك بصوت عالي ).

تغريد : طيب مش هينفع كده في الشارع يا حبيبي !!

فريد : احنا مش في الشارع يا قلبي ، احنا في بيتنا .

تغريد : بيتنا ده فوق يا دودي !! انما احنا هنا لسه في الشارع .

فريد " يتوعدها مازحا " : بقي كده يا توتا ؟!!! طيب والنعمة لتشوفي لما نطلع فوق و يتقفل علينا باب هتشوفي هعمل فيكي ايه .

تغريد : بقي كده با فريد ؟!! انت كده بتخوفني منك اكتر ما انا خايفة !!!

فريد : لا يا قلبي أنا مقدرش اخوفك يا توتا ، دا انتي قلبي و روحي من جوه ، ده انا بهزر معاكي ............. ثم يعاود الضحك ويقول لها : ده انتي هتموتي فوق يا توتا .

تغربد : تاني انت بتخوفني ؟؟

خرجوا من المصعد وفتح فريد باب عش الزوجبة وحملها علي ذراعيه مرة أخري ودخل ثم أغلق الباب بقدمه ودخل بها حتي غرفة النوم .

فريد يمسك يد تغريد ...

ويقول : انا مش مصدق نفسي يا توتا ، انا بحلم !!!

تنظر تغريد له باستحياء وخجل وصمت !!

يضم يديها الي صدره في اتجاه قلبه ويقترب منها ...فتقاطعه تغريد : استني استني .

فريد : في ايه ؟ ما احنا في بيتنا اهو يا قلبي ومفيش حد شايفنا .

تغريد : يابني افهم ، انا عايزة اغير الفستان .

فريد : ايوه صح ، عندك حق ....طيب ما تغيري الفستان وانا أساعدك .

تغريد : لا يا حبيبي مينفعش .

فريد : ليه يا توتا ؟؟

تغريد : هو كده ، سيبني انا اغير الفستان براحتي وبعدها هنادي عليك .

فريد : ماشي يا توتا ، أنا هدخل اخد شاور علي ما تغيري الفستان .

تغريد : طيب استني رايح فين ؟ افتح سوستة الفستان الأول ، مش هعرف افتحها لوحدي .

فريد : ما أنا قولتلك يا توتا خليني معاكي اساعدك !!

تغريد : لأ ، ساعدني في السوستة بس .

فتح فريد سوستة الفستان وتحركت مشاعره تجاهها......

تمنعت تغريد وضحكت وقالت له : استني استني يا حبيبي ، ادخل خد شاور وانا هغير هدومي .

دخل فريد الي الحمام وبدلت تغريد فستانها وارتدت ملابس النوم و خلعت طرحتها وصففت شعرها .

خرج فريد من الحمام فوجد عروسته كملكة جمال في انتظاره .....

فريد : حبيبة قلبي انا مش مصدق نفسي !!! معقول حلم عمري اتحقق !!!!!

تغريد : لكن انا حلمي للأسف متحققش .

فريد : ليه يا قلبي ؟ أنتي مش كنتي بتحلمي اننا نتجوز ؟ !!!!!!

تغريد : كنت بحلم طبعا اننا نتجوز يا بيبي ، لكن كان حلمي كمان اننا نقضي الليلة دي في اسبانيا او فرنسا او لبنان او حتي شرم الشيخ او الساحل الشمالي ، انما انت خلتنا نقضيها هنا في البيت !!!

فريد : يا حبيبتي ماهو ده كان رأيي من الأول !!!

تغريد : أنت كنت عايزنا نسافر ومنعملش الفرح .

فريد : وهو معقول هنعمل فرح كبير زي ده وكمان نسافر ؟!! ما انتي عارفه ان السفر ده محتاج فلوس كتير وان كل الفلوس اتصرفت في تجهيز الشقة و الفرح .

تغريد : مليش دعوة كنت اتصرفت لو بتحبني .

فريد : معلش يا قلبي لما يبقي معايا فلوس نبقي نعوضها ونسافر المكان اللي نفسك فيه .

تغريد : وهي الليلة دي بتتعوض يا دودي ؟!! ده هي ليلة واحدة في العمر !! احنا نأجلها بقه أحسن لما يبقي معاك فلوس ونسافر .

فريد : نأجل ايه يا حبيبتي ؟

تغريد : نأجل دخلتنا .

فريد : نعم !!!! انتي بتهزري !!!

تغريد : لا مش بهزر يا حبيبي ، انت مش هتلمسني الا هناك .

فريد : هناك فين ؟؟؟

تغريد : في المكان اللي هنقضي فيه شهر العسل .

فريد : بطلي هزار بقه ويلا .

تغريد : يلا ايه !! مش هتلمسني الليلة خالص .

فريد : انتي بتتكلمي جد يا توتا ؟!!

تغريد : ايوه اومال بهزر يا حبيبي ؟

فريد : بلاش تعكنني علينا الليلادي .

تغريد : خلاص ماشي يا حبيبي ، معلش يا بيبي ازازة البرفين بتاعتي تقريبا في الشنطة اللي في اوضة الاطفال روح هاتها .

ذهب فريد سريعا الي الغرفة المجهزة للاطفال ولم يجد بها أي حقيبة !!!

عاد فريد يسألها عن مكان حقيبتها فوجدها أغلقت غرفة النوم بالمفتاح !!

فريد : انتي قفلتي الباب ليه يا توتا ؟

تغريد : زي ما قولتلك يا حبيبي مفيش دخلة النهاردة ، هنأجلها لما تسافر .

فريد : افتحي يا مجنونة .

تغريد : مش هفتح ، متتعبش نفسك روح نام عندك في اي حته .

فريد : أنتي حقيقي بتتكلمي بجد ؟؟

تغريد : أيوه با بيبي ، انت مش مصدق ليه ؟!!

فريد : ده اخر كلام عندك ؟

تغريد : ايووووون ( وتضحك بهيستيريا )

فريد : بطلي هزار بقي .

تغريد : يابني مش بهزر ، انا بتكلم جد .

فريد : طيب ماااااااشي .

فريد ذهب وجلس في الريسبشن ويفكر " هي بتتكلم جد ولا بتهزر ؟؟ " ، معقول ليلة العمر هتضيع كده !!!!

أمسك فريد بهاتفهه وكاد أن يفتح مواقع السوشيال ميديا ، فتذكر وقال لنفسه " دي تبقي فضيحة لو حد شافني اون لاين الليلة دي !! ، هيمسكوني تريقة العمر كله " .

فتح فريد شاشة التليفزيون وجلس يغير القنوات حتي شعر بالملل !!

مر حوالي ساعة ، قام فريد ووقف خلف الباب ونادي علي تغريد ....

: تغريد ، يا توتا ، أفتحي يا قلبي .

" لكنها لم تجيب !! "

نظر فريد من ثقب مفتاح الباب ليري ماذا تفعل فوجدها نائمة !!!

فريد : معقول !!! دي نامت بجد !!!

فريد حين رأئها نائمة تحركت مشاعره وشعر بضيق شديد وأراد دخول الغرفة بأي وسيلة .

وفجأة تذكر وجود نسخة اخري لنفس الباب .

جري فريد واحضر مفتاح اخر لباب غرفة النوم ، وفتح الباب ودخل .

تغريد مازالت مستيقظة و تتظاهر أنها نائمة !! ولكنها أندهشت حينما وجدت فريد فتح الباب ودخل !!!

ظلت تغريد تتظاهر له أنها نائمة وصعد فريد لينام بجوارها .

وبدأ يداعبها كي تستيقظ .