شيطان امرأه بقلم الكاتبه ناهد خالد حصريه وجديده وكامله جميع الفصول على مدونة النجم المتوهج للروايات والمعلومات
نيرة هي اللي زقتني وسقطتني.. هي كانت قاصدة توقعني من على السلم.
صدمة احتلت وجوه الكل بعد كلامها، الكل سكت وكأنهم اتجمدوا في مكانهم، و خصوصا المتهمة "نيرة" اللي وشها ظهر وكأنها فقدت الروح، والصدمة بتتردد في ودنها وعقلها مش مستوعب الاتهام البشع اللي اترمى عليها، عشان تكمل الصدمة وتثبت عليها التهمة وواحده من الواقفين تخرج عن سكوتها وتقول:
_ وانا شوفتها.. مكنتش احب اتدخل في الموضوع بس دي شهادة حق، انا شوفت نيرة وهي بتزق ندى عشان توقعها على السلم..
والكل في اللحظة دي بص لنيرة اللي حرفيًا على وشك الإغماء، نظرات الكل مكانتش فارقة معاها، واتهام الكل ليها ملوش أي معنى.. كل اللي كان فارق معاها نظرته هو "زياد" جوزها وجوز "ندى" في نفس الوقت لكن "نيرة" هي الزوجة الأولى، الزوجة اللي سمحت لجوزها يتجوز لغرض الخلفة اللي اثبت كل الدكاترة ان أمرها مستحيل عند نيرة.. بصتله وهي بتتمنى تشوف نظرة مختلفة عنهم في عينه، نظره معناها انه مصدقها وواثق انها متعملش كده، لكنها اتفاجات واتوجعت لما لقته بيبصلها زيهم.. باستفهام وعتاب.. هزت رأسها برفض وهي بتسأله:
_ أنا أعمل كده؟؟
وقبل ما يرد خرج صوت والدته "ماجدة" وهي بتقول
 |
_ ومتعمليش كده ليه! انتِ اكيد مش متحملة انه اتجوز عليكِ، لأ وكمان حامل وهتجيب العيل اللي اتحرمتي منه، اكيد الغيرة دبت في قلبك ومتحملتيش كل ده يحصل حواليكي.
نزلت دموعها بقهر وهي بتسمع اتهامها، في الحقيقة ان ماجدة من وقت ما ظهرت مشكلة نيرة في الخلفة وهي متغيرة معاها، واتغيرت اكتر واكتر لما طلبت كذا مره من زياد يتجوز ورفض، ولما السنين كانت بتمر من غير ما تشوف احفادها وزياد الولد الوحيد وهو اللي هيجيبلها عيال تشيل اسم العيلة، لكن حتى بعد جوازه فضلت على نفس وضعها ومقلش ضيقها من نيرة، بل والادهى زاد مع حمل الزوجة الجديدة وعرفت انها طلبت من زياد انه يطلقها منعا لأي مشاكل ممكن تحصل ويفضل مع ندى وابنه الجاي.. بس هو رفض.
_ أنا اغير منها واموت ابنه اللي بيترجاه من الدنيا؟
كملت من بين بكائها:
_ هعمل كده ليه! اسألي ابنك.. اسأليه مين اقنعه يتجوز، اسأليه مين الح عليه شهور وشهور لحد ما قبل يتجوز ويخلف، أنا هرجع ابوظ كل ده واموت ابنه اللي هو اتجوز عشانه اصلاً! طب ماكنتش سمحتله يتجوز من الأول.
اتملك الغيظ من ماجدة وهي سامعة نيرة بتتكلم ان لولاها ما كان زياد قبل يتجوز فقالت:
_ ابني كان هيتجوز سواء وافقتي أو لأ، فمتحسسيناش إنك سبب جوازه.
بصتله بدموعها وعياطها وقالت:
_ رد عليها.. قولها كنت هتتجوز فعلا لولا الحاحي ورغبتي المستميته؟ قولها ان بكلامي او عدمه كنت هتتجوز!
زفرة قوية خرجت منه بتعبر عن غضبه وقال:
_ هو ده وقته؟ يعني بجد عاوزاني اسيب المشكلة الأساسية واشوف كنت هتجوز لولا كلامك ولا لأ! انتوا مش حاسين باللي حصل؟ انا ابني اللي كنت طاير من الفرحة بيه وكنت مستنيه من سنين مات قبل حتى عيني ما تشوفه.. وانا حالا محتاج اعرف مين السبب في موته.
_ يعني انتَ شاكك فيا؟
سألته من بين بكائها فغضب وثار اكتر وهو بيخبط الحيطة اللي جنبه بايده:
_ يوووه.. بردو هيسيبوا المشكلة ويتكلموا في تفاهات.. بصي يا نيرة انا قولت سؤال وعاوز اجابته وشاكك في أمي نفسها..
وكلامه كان صدمة ضربتها وهي بتبصله بلوم وعتاب كبير، ازاي شك فيها ولو لثانية، ازاي واضعها موضع الاتهام وشايف انها ممكن تعمل كده فعلا وتأذيه في ابنه، ابنه اللي بسببه اتحملت اللي مفيش ست تتحمله وقبلت انه يتجوز عليها عشان يجيبه، واضح ان التغيرات اللي لاحظتها الفترة الأخيرة منه كانت أكبر من توقعاتها واهي واحده منهم ظهرت وبقت واضحة زي الشمس انه مبقاش يثق فيها، هزت رأسها بيأس وهي بتقول:
_ واضح اننا خسرنا حاجات كتير الفترة اللي فاتت وأهمها ثقتنا في بعض.. انا اللي عندي قولته، انا معملتش كده واستحاله اكون سبب في اذية ابنك.. واذيتك.
وسابته واتحركت خارجة من الشقة نازلة لشقتها ودموعها موقفتش لحظة كل ما تتخيل انه اتهمها اتهام بشع زي ده، ايوه اتهمها حتى لو مقالهاش صريحة، اتهمها لما شافت في عينه نظرة شك وعتاب على شيء معملتوش، لما قال انه شاكك في الكل، لما ماهتمش لكلامها وقال ان كل همه يعرف مين أذى ابنه، نظراته وكلامه لها مبيفارقوش خيالها طول الليل وده خلاها موقفتش عياط ولو لحظة..
*******
_ اوعى تكون صدقتها بالدمعتين اللي نزلتهم والكلمتين اللي قالتهم، انا بقولك هي اللي زقتني وانا اكيد مش هتبلى عليها.
بصلها بسكوت كحاله من ساعات ومردش، صرخت فيه بعصبيه:
_ رد عليا! انتَ ساكت ليه من وقتها؟ ايه بتفكر هتبرأها ازاي؟
خرج عن سكوته وقال:
_ لأ.. انا مش عاوز ابرأها، انا مش عاوز اظلمها، ولو هي فعلا عملت فيكي كده يبقى فيها طلاقها.
سيطرت على سعادتها اللي غمرتها بعد سماع جملته الأخيرة وقالت:
_ وهتعرف ازاي ان كانت هي ولا لأ؟
بصلها بنظرة غير مفهومة وقال:
_ هعرف... متقلقيش.
*****
_ بصراحة معتقدش نيرة تعمل كده.
قالتها مرفت اخت زياد بعد ما سمعت اللي حكته ماجدة، بصتلها ماجدة بضيق وقالت:
_ وليه متعملش كده! لو فكرتي فيها هتلاقي انها الوحيدة اللي لها مصلحة في موت الواد.
_ بالعكس هي الوحيدة اللي ملهاش اي مصلحة في كده، نيرة جوزت زياد عشان يخلف اصلا هتقوم تموت ابنه! غير بقى انها لو فكرت كده معناه ان كل ما ندى تحمل هتسقطها، الموضوع مش منطقي ولو هي مش قابلة وجود ندى ولا ان يكون زياد عنده عيل من حد تاني مكانتش قبلت جوازه من الأول.
بصتلها ماجدة بتفكير وسألتها:
_ تفتكري تكون معملتهاش صحيح؟ طب لو معملتهاش ندى هتتبلى عليها ليه؟
_ فكري معايا كده.. دلوقتي ايه لازمة وجود نيرة في البيت؟
بصتلها باستغراب وبدأ كلامها يجذب انتباهها:
_ يعني ايه؟
_ يعني ايه صفة وجود نيرة في البيت؟
_ مرات زياد.. السؤال غريبة ومش فاهمه عاوزه توصلي لأيه؟
ابتسمت لها وقالت:
_ بالضبط مرات زياد.. هو ده اللي عاوزه اوصله.. نيرة مرات زياد.. لكن ندى مرات زياد وام ابنه.. صفة وأهمية ندى اكتر بكتير من نيرة، نيرة حياله مراته مبيربطوش بيها غير ورقة سهل تتقطع، وعشان كده الطبيعي تكون ندى هي اللي مالكه كل حاجه.. تكون المسيطرة على البيت، واحنا اهتمامنا بيها يكون اكبر، واهتمام زياد بيها نفس الشيء.. وحبه ليها يكون أكبر، ده الطبيعي.. لكن اللي بيحصل واللي ندى شيفاه العكس.. احنا مهتمين بنيرة ومدينها مساحه في حياتنا بشكل أكبر، وزياد نيرة عنده حد مهم جدا وكلنا عارفين انه بيحبها ازاي ومستعد يعمل اي حاجه عشانها.. ندى حست نفسها مجرد ست جاية تحمل وتجيب عيل وخلاص من غير اي صلاحيات تانية وده متحملتوش.. وبما انها أهم من نيرة قررت تخلص منها وتبعدها عن زياد عشان تكون هي المسيطرة الوحيدة على كل حاجة..
هزت ماجدة رأسها باستنكار وقالت:
_ انتي مجنونة يا بنتي.. يعني هتسقط نفسها عشان تبعد نيرة عن زياد، دي أم.. في أم تقتل ابنها عشان أي سبب مهما كان.
أصرت مرفت على موقفها وقالت:
_ في ناس تعمل اي حاجة عشان مصلحتها، والغيرة لما بتشعلل في القلوب الناس بتتعمي.. وندى في الفترة الأخيرة كان واضح أوي إنها على أخرها من نيرة، واعتقد لاحظتي انها قدرت توتر العلاقة بين نيرة وزياد في اخر فترة... عارفة ليه؟
هزت ماجدة رأسها بلأ، فقالت مرفت موضحة:
_ عشان لما عرفت بالحمل وبلغتنا بيه كانت فاكرة ان معاملتنا هتتغير.. هنهمل نيرة خالص وكل تركيزنا يكون معاها هي وبس لكن ده محصلش وفضل اهتمامنا لنيرة زي ما هو.. وخصوصا زياد.
حطت ماجدة كفها على رأسها وبصت بعيد بسرحان وقالت:
_ لو كلامك ده طلع صح تبقى كارثة.. اللي تقتل ابنها عشان مصلحة ليها تعمل اي حاجه تانية وفي أي حد حتى لو كان زياد نفسه..!
الجزء ٢
نزلت تاني يوم الصبح من شقتها لشقة حماتها زي ما متعودة وقت الفطار، وشها وارم وعنيها حمرا من كتر البكا طول الليل، دخلت فقابلت ميرفت قاعدة في الصالة فقالت بصوت هادي:
_ صباح الخير يا ميرفت.
رفعت ميرفت عينها من الموبايل وردت بشفقة بعد ما شافت شكلها:
_ صباح النور يا نيرة.. تعالي اقعدي.
_ الباب مفتوح ليه؟
_ ماما لسه طالعة تطمن على ندى وزمانها نازلة.
قعدت جنبها ومرفت بتبصلها بسكوت دام لمدة، لحد ما قالت ميرفت:
_ متزعليش من زياد هو غصب عنه، انتِ مش متخيلة قهرته على ابنه، وبعدين هو لسه في عز غضبه وحزنه لكن لما يهدى هيقول انك مستحيل تعملي كده.
ابتسمت بسخرية وقالت:
_ اخوكِ باع عِشرة ست سنين عشان عِشرة سنة واحده، كدب اللي عاشرها ٦ سنين وصدق اللي لسه مكملوش سنة سوا.. انا اكتشفت ان في ٥ سنين ضاعوا مني على الأرض ودلوقتي بقيت متساوية بيها ومش عارف مين فينا كداب ومين صادق.
قالت ميرفت بحذر:
_ بصي انا والله مش قصدي حاجه، ولا قصدي ادافع عن اخويا.. بس لو انتِ مزقتيهاش ايه اللي حصل؟ ايه اللي وقعها كده؟ مش معقول هتوقع نفسها.
بصتلها بتفحص وقالت:
_ انتِ شاكة فيا زيهم؟
هزت رأسها بلأ وقالت:
_ قولتلك متفهمنيش غلط.
اتنهدت بقوة وافتكرت المشهد اللي حصل بتفاصيله...
من يومين...
كانت طالعة من شقة حماتها اللي في الدور الأول فقابلت ندى على السلم وهي نازلة واللي قالت اول ما شافتها:
_ استني يا نيرة عوزاكي.
وقفت نيرة وهي بتقول:
_ صباح الخير يا ندى.
اتجاهلت ترد الصباح وهي بتقول:
_ زياد بات عندك امبارح، مش المفروض تيجي منك وتكوني ذوق وتقوليله بات مع ندى.
بصتلها باستغراب وسألتها:
_ وليه اقوله كده؟ هو مش كان بايت عندك اول امبارح وأول! يعني انتِ فايزة عني بيوم كمان.
بصتلها بغيظ وقالت:
_ تقولي كده عشان انا حامل واكيد بحتاج حد يكون جنبي بليل.. عشان ممكن اتعب في أي وقت مين هينجدني وقتها؟ المفروض كانت تيجي منك من وقت ما عرفتي حملي لكن كالعادة مبتفكريش غير في مصلحتك.
هزت "نيرة" رأسها بذهول وقالت:
_ انا مبفكرش غير في مصلحتي؟ انا لو ما بفكرش غير في مصلحتي زي ما بتقولي ما كنتش خليته يتجوز اصلا ولا انتِ ما عرفتيش إن الجوازه دي بموافقتي، ولولا موافقتي عمره ما كان هيتجوز.. واعتقد الست اللي تسمح لجوزها انه يتجوز عشان يخلف تبقى ابعد ما يكون عن الانانيه اللي انتِ بتتهمني بيها دلوقتي، بس انت ِ اللي أنانيه .. أنانيه لما تبقى عاوزاه معاكي طول الايام بحجه حملك رغم انك لسه في الشهور الاولى يعني مش على وش ولاده.. على فكره من اول ما دخلتِ البيت ده وانا فاهمه كويس انتِ بتحاولي تعملي ايه وملاحظه محاولاتك انك تقربيه منك وتخليه دايما معاكي وبتجاهل بمزاجي، لكن لما الاحظ انك قاصده تبوظي علاقتي بيه مش هسكتلك...
ظهر الغيظ على وشها بوضوح وهي بتقول:
_ تسمحيلي؟ انتِ مين انتِ عشان تسمحيلي وما تسمحيليش! انتِ هنا زيك زيي.. انتِ مراته وانا برده مراته بس بقى انا أزيد حته.. ما انا مراته وام ابنه يعني اتنين في واحد..
ورغم وجعها من كلامها واحساسها بالجرح اللي هي قصدت تضغط عليه قالت بابتسامه هاديه:
_ هو انت ليه بتتكِ قوي على ام ابنه على فكره انا عارفه انك حامل وبعدين اصلاً انتِ جايه هنا عشان كده... عشان العيل اللي بقى في بطنك يعني مهاش حاجه مفاجاه ليا بالعكس دي حاجه كلنا عاوزينها ومستنينها من ساعه ما دخلتِ البيت، ما تفكريش انك هتعظيني بيها لان ابنه احبه زي ما بحب ابوه.
اتمايعت في وقفتها وهي بتقولها:
_ما هو اللي بيحس بالعجز ما بيحبش يبين عجزه، انتِ بس بتحاولي تفهميني إن الغيره مش واكلاكي .. و إن موضوع الحمل عادي بالنسبالك، لكن انا عارفه انه مش كده، وانك مهما حاولتي تعملي برده الست اللي جواكي هتغير وتحقد مني ومن ابني.
_ طب اغير منك وفهمتها، لكن هو انا مريضه زيك عشان اغير ولا احقد على عيل صغير!
اتعدلت في وقفتها وهي بتهز رجليها بعصبيه وقالت:
_ بقولك ايه بلاش تعمليهم عليا، انا وانت فاهمين بعض كويس وما حدش واقف بينا دلوقتي فطلعي يا اختي اللي جواكي كده عشان نبقى بنتعامل على نور وما تحسسنيش ان انا اللي وحشه، فإن كنت انا وحشه قيراط فانتي وحشه 24.
بصت لها نيرة بذهول وهي بتقول بصدمه حقيقيه:
_ شوفتي مني ايه عشان تقولي ان انا وحشه؟ انا عملتلك ايه من ساعه ما دخلت عشان تقولي عليا كده؟
_ لا من ناحيه عملتي فانتي عملتي كفايه ان انتي في كل مناسبه ما بتفوتيهاش وعاوزه تاخدي الراجل جنبك تكسبيه ليكي وتاخديه تحت باطك، خايفه ومرعوبه لأحسن ينحاز ليا وأنا هبقى مراته وأم ابنه.. وباين قوي تصرفاتك وباين كمان انك بتعملي كل حاجه لما بتحسي بس انه مال ليا شويه، انتِ عاوزه تخليني هنا ام الواد و بس، لكن جوزك ما جيش ناحيته وده بقى مش هيحصل عشان انا مش متجوزه يا حبيبتي عشان اخلف واقعد بالواد انا متجوزه عشان جوزي يبقى قريب ليا ويكون جوزي بحق وحقيقي ومش هنولك اللي عاوزه تعمليه.
هزت راسها بيأس وقالت:
_ صدقيني انتِ مريضه.. كل التصرفات اللي انتِ بتقولي بعملها عشان اشده ناحيتي تصرفات عاديه لو واحده عندها نص عقل فكرت فيها من غير حقد وغل هتعرف ان انا مش بعمل كده عشان يبقى جنبي ويبعد عنك... لما يبقى تعبان واسهر بيه طول الليل وأصر اخده عندي عشان ادوايه واليوم ده يومك، مش معناها ان أنا ببعده عنك، معناها ان أنا خايفه عليه.. أنا اللي عاشرته وحبيته اكثر منك بكثير... أنا اصلاً مش حطاكي في دماغي! انتي اللي حطاني في دماغك فكل اتصرف بعمله بتحسبيه عليا بطريقه تانيه طب جربي كده ما تحطينيش في دماغك، والله كل تصرفات هتعدي عليكي ولا الهوا.
_ بس اليوم اللي انتي بتتكلمي عليه دي كانت ليلتي كان المفروض يبات عندي أنا، ولا انتي بس اللي هتعرفي تداويه وانا هعمل ايه؟ هموته!
_قلتلك من خوفي عليه اصريت اني اخده عندي مش عشان ابعده عنك ولا عشان اوريكي إن انا اللي بقف جنبه في محنته وانتي لا.
_ لا ما هي ما ظهرتش غير كده، وعشان كده بقولك ما تجيش على حقي فيه عشان مضطرش اوريكي الوش الثاني اللي انتي عمرك ما هتتخيليه.
استفزها كلامها واخرجها عن شعورها فطلعت على السلم وهي بتزقها بدراعها وبتقول:
_ طب حاسبي بقى عشان ما اغلطش فيكي.
ومجرد ما انهت الكلمه سمعت صوت صراخها ومع التفتتها شافتها بتقع على السلم ووقتها وقفت مصدومه ومش عارفه ايه اللي حصل؟ غير ان الزقه اللي زقتها لها مش كفيله ابدا انها توقعها الوقعه دي من على السلم!
خلصت حكي الموضوع بتفاصيله ل ميرفت اللي قالت اول ما خلصت:
_ زي ما توقعت هي اللي وقعت نفسها.
اتسعت عيون نيره بصدمه وهي بتقول:
_ انتي بتقولي ايه؟ هي اللي وقعت نفسها مستحيل في واحده توقع نفسها وهي عارفه انها حامل وان ابنها هيسقط!
_ خلاص يبقى الزقه اللي انتي زقيتها لها هي اللي وقعتها.
هزت راسها بنفي وهي بتقول:
_ لا والله، يا بنتي انا خبطها في كتفها خبطه ما توقعش عيل صغير هتوقعها هي من على السلم!
بصيت لها ميرفت بمعنى وهي بتقول:
_ خلاص وضحيلي بقى هي وقعت ازاي لما انتي ما زقتيهاش وهي ما وقعتش نفسها ايه في عفريت وقعها؟
سكتت نيره وهي بتفكر في كلام ميرفت وباصه قدامها بشرود وفي نفس الوقت دخلت حماتها من الباب وقفلته وراها، راحت ناحيتهم قعدت جنبهم بسكوت فوقفت نيره منعا لاي كلام يحصل ما بينهم وقالت:
_ طيب هدخل اجهز الفطار.
_استني يا نيره.
قالتها ماجده عشان ترجع نيره تبص لها فتكمل:
_ اقعدي عاوزه اتكلم معاكي.
قعدت نيره وهي بتقول:
_ يا ريت لو هتتكلمي معايا زي كلامك امبارح تأجليه لأن بجد مش مستحمله اسمع كلمه واحده من أي حد، اعتقد كفايه التهم اللي انت رميتوني بيها امبارح من غير حتى ما تتاكدوا كلامي انا اللي صح ولا كلامها هي.
سألتها ماجده بهدوء:
- طب وانتي عاوزانا نتأكد ازاي؟ قوليلي على طريقه وانا ايدي على كتفك!
اتعصبت وهي بتقول:
_ ما اعرفش المفروض تتاكدوا ازاي، مش المفروض انا اللي اقول الطريقه بس على الاقل ما تتهمونيش من اول ما هي تقول عليا كلمه.. يعني انتوا صدقتوا اللي لسه يا دوب بقالها سنه متجوزه وكدبتوا اللي بقالها ست سنين معاكوا.. يبقى يا خساره عشرتي هنا.
بصت لها ماجده شويه بسكوت وبعدين قالت اللي صدم نيره وميرفت:
_ ولو قلت لك ان انا كمان دلوقتي بقيت حاسه ان هي اللي سقطت نفسها..
شيطان امرأة الجزء٣.. بصوا لبعض بصدمه وقالت ميرفت:
_ وايه اللي خلاكي بقيتي شاكه كده؟ انتي لحد امبارح كنا بنتكلم ما كنتيش مصدقاني لما قلتلك ان ممكن تكون هي اللي سقطت نفسها.
_ عشان مش زعلانه على العيل اللي راح، مش زعلانه على ابنها زعل الأم، لما طلعت دلوقتي عشان اطمن عليها لقيتها قاعده وبتتكلم وبالها رايق ولا أي حاجه ناقص تقوم تهد الشقه وتبنيها ولا تقوم تتحزم وترقص، ما فيش واحده تكون لسه مسقطه امبارح وتبقى قاعده النهارده بتتفرج على التلفزيون وعماله تكلم اخواتها في التليفون وتقول لاختها تعالي اقعدي معايا شويه اصلي زهقانه! انا اعرف ان اللي بتسقط دي تبقى حالتها النفسيه زي الزفت تقعد لها حتى يومين ثلاثه مش قادره تتكلم مع حد ودموعها ما بتجفش حتى لو كان لسه الحمل ما كملش شهرين، لكن هي مش كده وده خلاني اشك ان تكون فعلا هي اللي عملت في نفسها كده، احكي لي يا نيره ايه اللي حصل بينك وبينها يومها.
حكت نيره اللي حصل تاني وماجده بتسمعها باهتمام واول ما خلصت لقت ماجده بتقول:
_ واهو دلوقتي شكي زاد، معتقدش انها وقعت غصب عنها، او زقتك ليها خلتها متحافظش على توازنها، بس زي ما قلت لك امبارح يا ميرفت البنت دي لو سقطت نفسها عشان بس تعمل مشكله ما بين اخوك ومراته تبقى تعبان وعيشتها بينا خطر، واللي يخليها تعمل كده في نفسها ويهون عليها ابنها عشان غرض في دماغها يخليها تعمل اكتر من كده.
_ طب وبعدين يا ماما احنا لازم نعرف الحقيقه، ولازم كمان زياد يعرف الحقيقه قبلنا عشان لو هي فعلا اللي عملت كده في نفسها يطلقها زي ما قلتي ما ينفعش تعيش ما بينا.
_اخوكي شكله مصدقها، انتِ مشوفتيش حتى ما حاولش يسألني ايه اللي حصل، بصته ليا كانت كلها عتاب ولوم كأني انا فعلا قتلت ابنه! شكلها عارفه تسيطر عليه كويس وتقنعه باللي في دماغها.
قالت نيرة كلامها ودموعها بدأت ترجع تاني وكل كلمة بتقولها بتحيي جواها وجع ميتداويش، اتنهدت ماجدة وقالت:
_ طب قوموا.. قوموا يلا حضروا الفطار الواحد من امبارح ما دقش الاكل، قوموا وربنا يعدلها نفكر فيها بعدين.
******
في شقه زياد...
_ هو ايه اللي حصل بينك وبينها عشان توقعك انتوا اصلا اللي وقفكوا على السلم؟
بصت له بهدوء وهي بتتكلم:
_ ما فيش انا كنت نازله لحماتي وهي كانت طالعه من عندها وقفت صبحت عليها واتكلمنا كلمتين شدينا مع بعض شويه بسبب ان هي لما كنت تعبان اصرت تاخدك عندها، قلتلها يعني ان أنت لو كنت جيت عندي واصلا كان اليوم يومي كنت برده هعالجك واخد بالي منك زي ما هي عملت، بس هي حرجتني لما اثرت تاخدك عندها كأني مش ههتم بيك.
سكتت ترتب افكارها وتاخد نفسها.
_ وبعدين؟
_ بس شدينا مع بعض شويه لأن ردها ما عجبنيش، وقعدت تقولي كلام كده ما لوش لازمه.. انا اولى بيه وانا اهتم بيه اكتر منك واخاف عليه اكتر منك وانا اقدم منك وميستغنوش عني، كلام كده يعني ما عجبنيش فعصبتني شدينا مع بعض.. كلمه مني على كلمه منها لقيتها راحت طالعه من جنبي وزقاني زقه جامده روحت واقعه من على السلم ما لحقتش امسك نفسي.
بص لها وقال:
_ طب ما يمكن هي لما زقتك ما كانتش قاصده توقعك، يمكن لما زقتك زقتك من غيظها منك.
_ لا طبعا كانت قاصده، بقولك واقفين على السلم وزقتني زقه الراجل ما يزقهاش للراجل اللي زيه مش هتبقى قاصده توقعني!
_ ماشي.
قالها وسكت فبصتله بغيظ وقالت:
_يعني ايه ماشي! هو انت مش مصدقني ولا ايه؟
_هو انا قلت مش مصدقك؟
_ لا مهو من غير ما تقول، اصل يعني مش شايفاك خدت موقف معاها ولا عملتلها حاجه، هو انتَ مش زعلان على ابنك اللي راح!؟
بصلها وقال:
_ قولي لي اخد موقف معاها اعملها ايه؟ اقتلها قصاد موتة ابني؟ ولا اروح اوقعها من على السلم زي ما انت وقعتي؟
_ انت بتتريق عليا! هو ايه اللي تعملها ايه! لما دلوقتي وقعتني وسقطت ابنك وما عملتلهاش حاجه على كده بعد كده لو دخلت عليا خنقتني في قلب شقتي هتبقى عارفه انك برده مش هتعمل لها حاجه! هو مش المفروض ان انت تبين لها العين الحمرا عشان ما تفكرش تقرب مني بعد كده! ولا انت في العموم ما بتاخدش معاها موقف؟
وقف وهو بيقول:
_ انا سألتك عن اللي حصل وانتي حكيتي ما تفتحيش الكلام في الموضوع ده تاني عشان ما يعملش مشكله بيني وما بينك.
وخرج من الاوضه فتعصبت اكتر وهي بتقول بصوت عالي عشان يوصله:
_ كمان يعني لما اتكلم في حقي وعاوزه حقي منها تقولي يعمل مشكله ما بيني وما بينك.. اه لا كده انا فهمت اللي فيها استني بقى لما تبقى تموتني انا شخصيا وابقى خد موقف.
رجع لها وقف على باب الاوضه وهو بيقول وباصص لها بتمعن:
_ يعني ما شفتكيش زعلانه على ابنك نص اهتمامك بالموقف اللي انا اخده ضدها! ده انتي من ساعه ما سقطي مش هامك حاجه في الحوار كله غير هي عملت ايه وانا هعمل فيها ايه ما سمعتكيش قلتي كلمه واحده تبين حزنك على ابنك؟
اتوترت وبان عليها اللجلجه في الكلام وقالت:
_ هو انا يعني لازم اقعد ابين لكوا حزني، انت كمان بتتهمني ان انا مش حزينه على ابني انا ربنا عالم ان قلبي بيتقطع عليه، بس انا بقى ما بحبش اسيب حقي ومش هرتاح ولا هيبرد ناري غير لما اخد حقي منها.
_ لا ما هو الحزن باين قالها بتريقه ومشي من قدام الباب عشان بعدها تسمع صوت قفل باب الشقه فعرفت انه يانزل لها يانزل لحماتها، وللأسف ما كانش ينفع تقوم وراه وتعرف هو نازل لمين فيها.
شيطان امرأة الجزء الأخير..
يعني انتي وقعتي نفسك؟ انتي موتي ابنك بايدك عشان توقعي بيني وبين زياد؟!!
وهنا اتحولت ملامحها للغضب وقالت:
اه... عشان فكرت لما ابنه يموت بسببك هيطلقك وتغوري من حياتنا, لكن هو طلع خايب ومخدش معاكي رد فعل, يعني ابني راح على الفاضي, وبسببك .. لكن صدقيني مش ههدى ولا هتبرد ناري غير لما اطلعك من البيت ده.
وهنا دخل زياد وهو بيقول:
مش هتلحقي, لانك هتطلعي قبلها.
اتسعت عينيها بصدمة ووقفت وهي بتبصلهم وكمان بعد دخول ماجده وميرفت من الباب المفتوح, مش مستوعبه ايه اللي بيحصل, فابتسمت نيرة وقالت:
ربنا مبيرضاش بالظلم, وانتي ظلمتيني وجيتي تخربي بيتي بيتك هو اللي اتخرب.
انتي ام انتي؟ بتقتلي ابنك بايدك عشان وسوسة شيطان, تعملي كده في ابنك عشان تخربي على ضرتك.
قالتها ماجده وهي بتبصلها باشمئزاز, وقالت ميرفت:
لا يا ماما مش وسوسة شيطان, دي هي نفسها الشيطان... اللي تعمل كده في ابنها متبقاش من وسوسة شيطان تبقى من نفسها المريضة.
وبدون أي فتح في الموضوع قال زياد:
لمي هدومك ومعاكي لبليل تطلبي حد من اهلك ييجي ياخدك.. انتي طالق.
وقعت على الكرسي وراها ووشها شاحب وعينها متحجرة وهي بتبص لنيرة اللي باين عليها الهدوء.. نيرة كسبت وهي خسرت, نيرة انتصرت رغم انها معملتش أي حاجه وهي اللي بغبائها حفرت الحفرة اللي وقعت هي فيها ...
*******
بعد يومين...
مسك ايدها وهو قاعد قصادها في شقتهم وقال:
اوعديني متفتحيش معايا موضوع الجواز تاني, ده حتى لو انا اللي طلبت اقفي في وشي وعارضيني.
ابتسمت وهي بتقول برضا:
اوعدك.. هنرضى باللي ربنا كتبهولنا وهنكون احنا السند والدعم لبعض مش محتاجين تالت..
وايه رايك لو جبنا تالت؟
بصتله بعدم فهم وقالت:
يعني ايه مش فاهمه؟
ابتسملها وقال:
بفكر نجيب طفلة نربيها واهو تونسنا ونعيش معاها كل المشاعر الأبوية اللي عوزانها وفي نفس الوقت ناخد ثواب تربيتها ويكون في ميزان حسناتنا.
دمعت عينيها بشدة وقالت بابتسامة واسعة:
موافقة...موافقة طبعًا.
وقد كان بعد شهرين اخدوا بنت جميلة من دار ايتام ودخولها لحياتهم غيرها تماما وخلى فيها روح حتى ماجدة تقبلت الوضع واتمنت لابنها السعادة.
وفي النهاية يا سادة مش كل القصص بتنتهي باللي بنتمناه, عشان كده مشكلة نيرة في الخلفة متحلتش ودي إرادة ربنا لها زي ناس كتير جدا.. "ويجعل من يشاء عقيما" ومش دايما الراجل بيتخلى عن الست مادام العيب مش منه, في رجاله أصيلة وبتقدر تتأقلم مع الوضع, وبتخسر الابن مقابل الزوجة الصالحة..
ومش دايما الزوجة الثانية بتخطف الراجل من مراته الأولى وبتكون هي النغشة اللذيذه اللي بتعيد شبابه.. كتير بيعرفوا قيمة زوجاتهم بعد ما يجربوا جوازة تانية فاشلة..
انتهت .
رواية شيطان امرأه كامله من هنا
رواية زواج مع إيقاف التنفيذ من هنا
رواية عاشق بدرجة مجنون كامله من هنا
رواية سر الشيطان الأسود كامله من هنا
رواية رحيل الهواري كامله من هنا
رواية انكسار امرأه كامله من هنا
رواية عشق بلا رحمه كامله من هنا
رواية جرح يداويه العشق كامله من هنا
رواية من أجل أبنائي تزوجتك من هنا
رواية زواج لدقائق معدودة كامله من هنا
رواية بسمه موجوعه كامله من هنا
رواية معشوقتي الصغيره كامله من هنا
رواية طلاق بلا تبرير كامله من هنا
رواية الفرار من الحب كامله من هنا
رواية مستشفى بلا حياه كامله من هنا
رواية فرقتنا الظروف وجمعنا القدر من هنا
رواية متمرده عشقها الشيطان من هنا
رواية عذرا لقد نفذ رصيدكم من هنا
رواية نار قلبي وانكسار فؤادي من هنا
رواية قاصره في قلب صعيدي من هنا
رواية مالم تخبرنا به الحياه من هنا
رواية اللعب مع الشياطين من هنا
رواية أحببت مربية ابنتي كامله من هنا
❤️🌺❤️💙🌺❤️💙🌺❤️💙🌺❤️💙🌺❤️💙🌺
الروايات الكامله والحصريه من هنا
انضموا معنا على تليجرام ليصلكم اشعار بالروايات فور نزولها من هنا
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
