رواية بنات نادر والقدر البارت الاول والثاني بقلم زهرة الرمان حصريه وجديده على مدونة النجم المتوهج للروايات والمعلومات
الطاحو من العين طاحو جي خفاف
...❤️
شكلك... اسمك. اهلك... أبدا لم يكونوا بارادتك.... اختيارهم
المكان:
بغداد /الشعب /
هناك دمعه.. حزن... فرح... خوف.... شوق
واليوم س.. نتجول لنرى الدمعه الاولئ،،
، ،،،،،،،، ،
_تنظيف الاحذيه اليوم عليج.. اول شي بوصله ووخري الطين وهااا. بالج وأياج تزيدين المي بالوصل.. تشلعين الاحذيه
وراها تغسلين الجواريب... كل الجواريب
_ياربي شنو من ذنب ارتكبت حتى
الله ياخذ امي وابوي يتزوج غراب اقصد رحاب
_3سطوله مليانات مي وكل سطل بيه وصله مسح
بممر طوله ست أمتار
_شوفي اليوم غراب متحزمه لو يطلع جدها من گبره الا ازلگها واخليها توگع
_حتى ابوج يعلن حداد لا نطب لا نطلع لاتيفي. ونصير خفر مطبخ لازم نسيتي من فلونزا فلاونزا وسوه البيت دخان من اليكالبتوز
والورد والزعتر والبابنوك وسولها هيج ولاتسوون هيج اسكتي هي بس تطبخ وعالگتها هلنوب نكسرها
_اششش شرفت غراب
_عصرت اول وصله شمرتها بأول الممر
يلا اسراء امسحي
_مسحوا اسمج ان شاء الله من الأرض كولي امين (بصوت ناصي) اخاف منها تسمع....
 |
مسحت الممر واحك بالكاع متامله حت ما أعيد لان متعوده اعيد اذا معجب غراب المسح وصلت يم السطل يالله وضهري طگ...
سمعت وكعه الوصله الثانيه
تحركي روحي نشفي
رجعت وادعي الله ياخذ غراب من الدنيا
... وينج حوراء بسرعه اقل من خمس دقايق اجي. الگا كل قطعه ملابس بمكانها طلعي اخذي سله ملابس الناشفه
الروتين اليومي بعطله المدارس... كل وحده عليها شغله تتغير كل يوم بمزاج غراب... او عذاب اقصد رحاب زوجه ابوي
،،،،،،،،،،......
حوراء... إسراء... عذراء... والصغيره دعاء
بنات نادر نوفل.....
تشرف علينا رحاب بتنظيف البيت من باب الخارجي لحد اخر كاشيه بالبيت تفتر علينا. والبيت چبير
هي عليها بس تطبخ....
من زمان چان يكولون ايد الام متوجع حت لو تضرب.....
چنا نتمنى نحس باحساس ام تضربنا وبعدها تحضنا ونبچي وتسكتنا او تجي. بالليل تراقب اذا ما متغطين
من تسولف بنيه عن علاقتها بامها نترك المكان... حتى ما ننقهر
لان امي ماتت واكبر وحده بينا حوراء جان عمرها 11 سنه من توفت أمنه وماعرف سوء حظ خلا امي جانت مستعجله
ع الأربعين تحمل بالثانيه لحد ما سوتنا
اربع بنات.....وكل وحده بين الثانيه سنه او اقل..
حوراء اكبر الأخوات.. عمرها 16
اسراء 15
عذراء 14
دعاء 13
عوده إلى الماضي قليلاً.........
نادر نوفل... الابن الكبير بين اخواني
بالاعداديه. ووالدي طبق بدل لا اذا كبر ابنك خاويه
ابوي استخدم
اذا كبر ابنك عاديه
ارجع من المدرسه الگاه محضر نفسه
حتى اروح للمحل وياه.. محل مواد احتياطيه...مال سيارات لو الحك اكل لگمه
لو احصل رزاله بدايتها ابو حلگ الفاهي او الفكاكه
وينهيه دوم بغلطه
غبي وما يصير براسك خير
تبقى امي عيونها مغوركه وتسكت لان اذا دافعت ينغلط عليها وتنسب كدام أولادها
ف تشتري كرامتها بسكوت
من نوصل للمحل وجنت اتمنى اسوق سيارته
وما اتجرأ اكله اريد اسوق
بينما عمي مر مره ومخلي ابنه يسوق بسيارته وهو أصغر مني ومكبر راسه ويفتخر بيه
كدامنه ابوي بدل لا يحجي شي زين بيه
كله احسن من حظي هذا فاهي وغبي
اشوف نظره انتصار بعيون عمي رغم لسانه الي يدبر كلمه او كلمتين
ب
يكبر ويصير زين وكأن اني مريض
و
ما جربت ابوگ سيارته .
من نوصل للمحل. ويجون أصدقاء
ابوي ما يتورع من الغلط عليه كدامهم بالعكس يزيد
بينما ارتب واعزل وابقى افكر اكو خلل اصحح اخاف من الغلطه
ما احبه يغلط ومن اسوي شي اتمنى اشوف نظره رضا منه او كلمه طيبه
لكن دوم يكتفى ب هز راسه
مرت الايام وعندي 4اخوات بنات
وأخ اخر العنقود
مدلل عند ابوي
نجحت للسادس اعدادي وامي كالتله يحتاج مدرس بالرياضيات والفيزياء
انهال عليه بالرزايل والغلط
وأكثر كلمه يعيدها انته غبي وما اترجى منك يصير براسك حظ
ودوم يدلل البنات ويكول اللواه خلفتي كلها بنات. الحنينات
الطيبات
ومن نكعد
يقويهن عليه ويكللهن انتن احسن من هذا الكديش
الكديش جانت الكلمه المتعارفه. وعلم اخوي وعلم اخواتي يكولونها
لكن امي هي التنهيهم وما تخلي احد يكولها
والأكثر من شافت روحتنه لبيت عمامي
ويبقون نسوان عمامي يتشفقون او يتشفون بس مبطن الكلام يسوون نفسهم مقهورين عليه لكن همه يفرحون
من احنه عدهم وكدام. الكل وابوي يهين ويغلط
قللت روحاتها الا مناسبه وتبقى توصيني ما احجي شي يصير ببيتنه
صرت بالسادس ومن الدور الأول. حبيت افرح امي واكسب ابوي كلت من أنجح رح يتغير وياي
ومن الدور الأول طلعت معدل 73وجان بمجهود فردي حتى ملازم استعير او اروح لأصدقاء رايحين خصوصي اصور أوراقهم وأقرأ
لكن حتى فرحه ما حسسني غير كلمه كالها الينجح لنفسه
مرت الايام ودخلت كليه آداب
وكنت الأول ع قسمي اول سنه احس اني انسان اقل من الموجودين لكن لو اباوع البس مثلهم واكل مثلهم لكن بداخلي شي مكسور
عوضت هالشي اريد اضحك من كل گلبي مثلهم
او اكون علاقات وصداقات مثلهم لكن مكدرت حاولت اتقرب الهم بشطارتي
. احسن واحد احفظ وأكثرهم اقرا صرت معروف بين الطلاب اشطر واحد بالقسم
كملت مرحله أولى
ما مسلم ع بنيه اتحاشاهم
لان من اول يوم ضحكو ببارتي التعارف
ع اسمي
اسمك نادر بقن يضحكن
فصار عندي رد فعل
وخاصه اذا انذكر اسمي يضحكون عليه
بالمرحلة الثانيه
اكو طالب ويانه
تمرض اني مكنت محتك بيه ابد
جان كشاخ ومبين مرتاح
لكن المرض ما يعرف چبير
التزمت وياه اراجعه واكتب المحاضرات اله وهالشي خلاه يكون قريب مني
وتعلق بيه. بداخلي اعرف ان اي واحد يتقرب مني لمصلحته من تخلص بعد ما اشوفه
وكملت السنه الثانيه واني اشوف طلاب كبلت وطلاب انكتب فلانه رسمي تبع فلان
الا اني متفرج وما اتجرأ
بدا العام الدراسي بالمرحلة الثالثه الغيرت موازين ونضريات عندي
وقبل سنه تزوجت اختي اخر سنه معهد معلمات وشرط تتعين وقبلو.
واخوي الصغير ابوي خله مدرسين بكل الدروس رغم ثالث متوسط
لكن احمد الله ما عندي غريزه الغيره من حرماني شي واعطاءه لأخوي بالعكس
بهاي الفتره ابوي بدل لا يحس هو ما عدل
يلوم بيه
لو انته اخ بيه حظ جان درست اخوك لكن اني كنت ادرس واروح لامحل وخاصه ابوي صحته تعبت
من عصبيته المفرطه
الي ما ورثتها منه
ودوم يكول طالع ع خوالك فاهي
بهاي السنه الدراسيه رجع زميلي المريض وتفاجأت صاير احسن
لكن اول واحد فات للقسم وسلم عليه انه وكان سلامه مميز
لان يدور عليه وجنت بالمكتبه ومن فتت للقسم عاط وحضني
والطلاب بين اليستهزا وبين الضحك وبين المستغرب
بقى وياي مثل ضلي ومن اساعده
لاحضت لو يشتري اكل اليه لو
وره يوم يجيب عطر
وبحجه اشتريت اليه وذكرتك
لكن امتعضت
من هذا الأسلوب
اعتبرته
يريد بدل مساعدتي اله
وكتله بعد لا اساعدك ولاتذكرني
استغرب ليش
لان مو بأجر اشتغل وإنما بدافع الزماله قبل وهسه صرت صديق
_واني هم بدافع الصداقه اشتريلك
_الصداقه اذا جانت لمصلحه تشتري ومن تخلص المصلحه ما تشتري
هاي مو صداقه. وانته ما تشتريلي الا لان ساعدك...
_متوهم لكن هاي طريقتي وي كل اصدقائي
اعزمهم واشتريلهم ومتعود محد يعترض بالعكس همه يطلبون مو الا انت الي واگفلي
_وهي هاي نقطه اختلافي وياك انته تصرف ع جماعتك وهذا غلط
_شنو الغلط بالموضوع أكثرهم ما عدهم واني اساعدهم واحب اللمه والفرفشه والوحده واحد ماتصير حلوه
_ماعرف انته ادره لكن اني اعذرني ما اقبل بهالشي اذا تريد تبقى علاقتنا ما تصرف بعد عليه ولا تشتريلي شي
استمرت علاقتي بيه وقوت بنفس الوقت
وتعرفت ع شخصيته الطيبه الكريمه لكن جماعته استغلالين وحيل يتمادون وياه ومن اخر مره حذرته تحاشيت اكوله
كلت بمرور الايام رح يتعلم
مرت نص السنه وصار حادث وي ابوه
وابوه تاجر معروف ويروح هو يستورد بضاعه وبحادث صار عنده شلل الرجال فأخذ مكانه ابو بالشغل
وقليل يجي للجامعه اضطريت اروح واخليه يستمر بينما راد يبطل هاي السنه لكن اني وكفتله يوم اجازه ويوم هيج ردت تخلص السنه وما تروح عليه وحت تصدف بقى يعيط عليه شموازيك تجيني ولا تجيب المحاضرات لكن اني مصر جنت حگ الصحبه
خبر الغير حياتي وتعسني وصار الحمل مضاعف
رجعت من المحل لان ابوي صار كم يوم اني اطلع بمكانه
. رجعت ع تلفون اجاني تعال المستشفى
اركض وبيني وبين نفسي اتمنى ما اصدك السمعته ان ابوي متخربط
لكن صراخ اخواتي وزوج اختي وعيونه وعمامي
عرفوني انو ابوي خلصت رحلته ويانا
حصره صارت بگلبي اريد عيوني تدمع مكدرت جمدت مشاعري من شفته ميت منظره خلاني احس كبرت عشرين سنه
انتقل ابوي لرحمه الله... لكن بموت ابوي ضهرت الوجوه ع حقيقتها طلعت الانياب الي جانت تضحك هسه تريد تقطع بينا
صرت بمسوليه امي واخواتي واخوي مراهق
المهمه ابد مو سهله والأصعب عمامي وعماتي الي ما خلو الأربعين تفوت الا وكفو النه بالباب يردون البيت ينباع ويتقسم لان باسم جدي وابوي الوحيد ما كان عنده واخوته طلعو من البيت لأن اشتروا الا ابوي حالته ما تساعد وهو الجبير وجان جدي وجدتي ويانه لخد ما توفوا
. لكن هسه الوضع اختلف
ورجعت من المحل اليوم واسمع عمتي وزوجه عمي شون واكفات لأمي
=
شوفي فاطمه دبروا حالكم خلصناها اقصاد ودين وما كملت بيوتنا وانتم كاعدين ببيت ابوي مرتاحين وهاي صار سنين لا بفلس ولا احساس
_وليش ما حجيتي قبل لاخوج لو لان جنتو تخافون منه محد تجرأ ووكف وكاله هسه تقويتو عليه
ما ناكل حقكم لكن اصبرو اذا اتباع البيت حصتنه شتجيب تره ما تجيب 50متر واني صاحبه بنات
والحمل بس ع نادر
من سمعت كلام عمتي الي جانت صوتها ما يعلى بحضور والدي والأكثر كلهم جانو ولا يتجرون يفكوو حلوگهم
عرفت صار لازم انتبه وادافع عن امي واخواني
. وفتت
_شكو عمه شصار تره هذا بيت اخوج الي جنتي من تفوتي ما اسمع صوتج الا
تدعين لأبوي والنه شنو التغير وهسه صوتج من باب الطارمه
_شوف لا تصير براسي رجال فهمت
ابو حلگ الفاهي طالعلك لسان
بيت ابوي فلا تاكل تبن شنو رايدين منكم شي لو لان نطالب بحگنه
-وسمعتي امي شنو جاوبت وابو حلگ الفاهي هسه كاعد يگولج هذا البيت يتعذرج
اطلعين وما اشوف احد منكم لحد ما يجي القسام الشرعي وتاخذون حصصكم الله لا يعوزنه الكم
لوما أربعين مصار لأبوي جان شسويتي
يلا بره بره
طلعت بعياط يا طايح الحظ ما رباك ولا تعلمت من ابوك التربيه ع
خوالك. رحت وراها دفعتها وسديت الباب من كل قهر انقهرته بقيت اعيط يممه ممنوع تفتحيلهم الباب وما نبقى ولا تذكرون احد من كل هلعمام
_يمه مو هيج مهما كان مالك احد غير عمامك
وأهلك لا تهلك
_وعمامي يردون الزله يردون طيحتنه مو عازه فلوس شيجيب البيت وشتطلعلهم
لكن يحبون يشوفونه واكعين وما يهللهم الراحه النه
. ليش مو دوم ابوي يداينهم وما يرجعون دينه وكال طايحات بعيوني اشوف سجل الديون ذااك هو بعده بخط ابوي
يمه دومه يكتب ع عطيه إخوانه تم التسديد واني اشوف بعيوني من يجون يكللوله
مستحين منك ما عدنه ويشطب وكال روح اعتبرهن اندفعن
ليش مو حكي وحك اخواني
_مي خالف يمه كلها صدقات لروحه منو ياخذ هاه راح بطرگ القماش الأبيض الي احنه اشتريناه مو هم هو يختاره
لا تحقد وانه امك
_ما احقد يمه بس ما ينبت ورد بصخر
_ينبت يمه ينبت يم الله كل عمل اوهبه لله احسنلك يمه زرع الحقد يمه اذا سكيته يكبر وتخنگك اغصانه
بديت اغير نضرتي عن كل الحواليه وخاصه عمامي الي يترددون للمحل ويطالبون بحصصهم
وأكثر كلمه سمعتها معقول ابوك هاي السنين ما أمنك ع فلوسه وين ظامهن يشتغل صاره سنين وهذا المحل خير من الله
وكاعد بالبيت بلا إيجار
وسيارته
وجان ردي
فلوسكم توصلكم واحنه عدنه خير من الله
اگول بداخلي صيت الغنى ولا صيت الفگر... ومحد اله بيهن شغله وتعبه
وهذا الكلام اني سيارته ضربتها چادر وما يهلي اشوفها اتخيل شكل ابوي من يسوق بيها ومالي نفس اوصللها
وكل كلامهم هذا واني اعرف ابوي ماعنده غير كم فلس طلعتهم امي كفن دفنته ومكان لدفنه وتكاليف الفاتحه صح محتاجينه ابد للفاتحه. والبقو هي اصلا فلوس منهن لاصحاب محلات ابوي ياخذ منهم
وفلوس لاقصاد اخوي مال مدرسين خصوصي
ودفعتهن
وطلبت من اخوي يشد حيله مردت تفوت عليه السنه
وبديت بالمحل اسدد واسأل عن ديون ابوي اجمعهم حت اجهز بضاعه لكن
مع الأسف ما يسدآ إيجار المحل
بديت اطلع من الصبح افتر ادور بالمناطق ع بيوت رخيصه
وين ما يوصفون ادور حت البيت ينباع ويأخذون حصصكم عمامي
شهر اني ما مداوم لحد ما اجاني صديقي
فراس الي هو الوحيد ذكرني ويتردد عليه ويتواصل يخاف عليه اترك او انفصل
وراي وراي خطيه
من عرف الوضع كال اساعدك ندور بيت
لكن. لكيت بمنطقه جديده بيت هنا وبيت هناك وما مبلطه وما بيها خدمات مدارس بعيده وكلشي بعيد
لكن مضطر
رغم فراس مل مني يريد يشتري وانه اسدده
لكن اعرف ما أكدر اسدد لان المحل وكف حيل شغله
. رجعت ولكيت ناس جايبهم عمي يفترون بالبيت وتخبلت امي لازمه عده وانته تفرفر بالبيت وما انطيتني خبر
_انطيك خبر ع بيتنه
_بيتك شنو وامي واخواني بيه وامي لازمه عده
ع عياطنه رياجيل ثنين ومره.. يفترون واني صرت عصبي
طلعو
وتكررت هاي الشغله وامي تصبر بيه
لان لكيتها بالترك يم السخان كاعده هي واخواتي بيومها فقدت وطلعت عمي دفع
وهو تخبل
وصار عمي وعمتي ومرت عمي الثاني طاردهم وصارت بينه فجوه جبيره حتى باربعين ابوي ما التقينه
رحنا وحدنا اني واخواني وامي وهمه تعمدوا يجون غير يوم
وامي تلوم بيه روح صالحهم
واني رافض لان همه ما احترموا غيبتي ولا تراب ابوي البعده ما نشف وانتهكو بيته
ولحد ما اجت عمتي الصغيره وبلغتنه البيت انباع ورح يجي القسام الشرعي
ووراها كل واحد ياخذ حصته
وقبل لاتطلع كالت لأمي وانتي خلي فلوس اخوي الي لحد ما مات وهو يكد الج ولجهالج
ببيت واشتروا شكو عليكم راح اخوي وانتم تنعمو بخيره الي راح عمره وصحته يلم الكم
راحت واني بالغرفه نايم وسمعت كل الگالته عمتي اريد افتح الباب لكيتها مقفوله ادك محد يفتح
وراها صارت صنطه عرفت راحت واني الوب لحد ما امي فتحت الباب وعرفت متقصده مرادت اصتدم بعمتي لكن اني روحي تفور عليها شلون امي هيج تسكتلها
وره شهر استلمت
فلوس الورث وأخذت امي واخواني وهاي اول مره اسوق بالسياره
وامي توقعت ما اعرف لكن اني اعرف
اخذتهم للمنطقه
حتى يشوفو البيت
من رجعنا شفت الوجوه مگلبه مال اخواتي
منئ ولمئ. ونهله
دخلت بدلت امي اسمعها تسكت باخواني
شنو القضيه
طلعت صارت بوجهي منى اختي الأصغر من رنا المتزوجه
_اكولك نادر شنو من بيت ومن منطقه كل عقلك تريدنا نكعد هناك شنو احنه طليان
_شبيج تخبلتي...
يعني فلوس الاخذتهم ع الموجود كله كوه دبرت هذا الماعجبج تره مطلوب عليه كومه وما اعرف شلون رح يدبرون
_كله من وراك خربت وي عمامي وعماتي
لوما لسانك وتصرفك اقلها جان ساعدونه
وكامت لمى نفس الكلام وحتى اخوي المراهق عجيب
وامي تسكت بيهن ونهله ساكته مثل امي
بقيت اعيط
ردت كرامتجن مرادت احد يمن علينا ولكم شلون تقبلون اشوف شلون يحجون وي امي واسكت وشلون تقبلن
امجن بالترك وعمج ابو الغيره والناموس يفرفر بالزلم بالبيت وامج لازمه عده
_انته مصعبها ومكبر الموضوع عمامنه وعماتنه. كرهت الناس بينه وهسه مودينه بتلايف الدنيا
والزاد غضبي ويومها صار تجاوز مني
لما منى ردت عليه هو كديش ينلام ابوي بيه من يكول فاهي يريد يصير رجال بروسنا هنا صدك فقدت عليها وأريد أكلها بسنوني لكن امي وكفت بعيني لان تنقهر وتكول مات ابوهن وتتقوه عليهن
لكن امي هي الفاجئتني راحت عليها وملختها وضربتها راشديات وعاطت
شوفو من وجاي كل اموركم بيد نادر ويا ويله اليعارض
والما يعجبه يروح لليحبهم
يا ادب سززيات
شوفنه محتركه وجناته من فرته ع بيت وحفه ع مكان حتى يحفظكم
امي كانت هي التصبرني ودين البيت هواي بقيت حاير وحتى البيت يحتاج ترميم
اول خطوه بعت السياره بأمر من امي اسمع اخواتي شلون يدردمن لكن بعد آخر موقف بطلن يحجن كدامي
واني من الصبح لحد الليل افتر اريد أدبر وضعي لان المهله بدت تخلص مال البيت ولازم نطلع
فراس ساعدني واني اصريت ع كمبيالات رغم رفض ويعيط لكن هاي حقوق ومحد ضامن نفسه
واصلا فلوس والده
المحل هو المصدر الوحيد لعيشتنه.
وبقيت حاير وخاصه البيت ما قبل صاحبه الا تكمل فلوسه يلا يحوله
_شوري عليه يوم ابو البيت يريد يحول ويريد فلوسه
_يمه بيع المحل ذاك الشهر انطينه الإيجار من فلوسنا البقت الشهر الجاي شلون ومحلك فارغ حت بضاعه مابيه
رحت جردت الموجود بالمحل وبعت الأغراض البيه واجه عامل المحل صديق ابوي كال انه اريد المحل
بعته وهو سر قفليه يعني اخذت حكي وطلعت
حاير بامري الفلوس كلهن ما يسدن بس التحويل مال البيت زين منين اعيش اهلي
ضاگت الوسعه بعيوني
واني اشوف نفسي عاجز
المن ألجأ لا عمام بيهم نخوه عليه ولا خوال حالتهم الماديه كوه مدبرينها رغم نفسيتهم حلوه ولو يداينون اعرف ما يردوني لكن ما اريد احملهم فوگ طاقتهم
الفلوس دومهن بيد الما يستاهلهن
رجعت وكبت العيطه مال اخواتي شلون تبيع محل ابونه
ورجعت المشاكل وصار وقت لازم اوكفهن عد حدهن
_وربجن اي وحده تفتح حلگها اطمها بگاعها وابيع واشتري ومالجن كلمه فهمتن بعياط واختي اول ما غلطت كمشتها شبعتها ضرب لان انه حاير بامري وهاي تتمضيك
تلمن البيت وأريد وحده بعد اسمعلها نفس حقيرات امي حتى ما حمتها مني لان عاله گلبها من اطلع لحد ما اجي واسمعها ادردم هي وراي اني وياها جنه رويسيه لكن المفروض اني الاغار او ااذيها لكن هي كتله غيره وحقاره
من صغرها لكن اختي واحبهن حيل واخاف عليهن وما اريد احد يستضعفهن وكلت تكملون دراستكم وما اريد وحده تكول ابطل لان نهله بالسادس اعدادي وتريد تبطل مقبلت
ولمئ ثاني معهد منى جانت عايده بالسادس اعدادي
وردت يكملن ردت بيت ابوي يبقى ماشي ع نفس نظام ابوي لان جان عنده البنات لازم وحده عدها شهاده حت اختي الجبيره ما قبل ابوي ينطيها لحد ما كملت معهد معلمات وتعينت
انتقلنا لبيتنه رغم المكان ابد ولا يشبه مكانه القديم ولا الناس الكنا يمهم قضينا عمرنا بالاعظميه
اخواتي وحدتهن تريد تشرب من دمي الا امي تصلي وتسلم وتكول الحمد لله والشكر سكف يلمنا والعيشا ع الله راتب ابوي التقاعدي قليل جداً
وره كم يوم من كعدتنا منطقتنا أكثرهم مثلنا توهم يبنون فإني طلعت اشتغل عماله وياهم اخوي يروح لمدرسته ويأخذ بطريقه اخواتي لان مكان بعيد صار عن مدارسهم
لكن مضطر. يوميتي امي تقسمها بين مصرف البيت وكراويهم
لحد ما رجال عمره نهايه الأربعين عنده سياره اتفقت وياه ياخذ اخواتي واخوي
اختي للمعهد والباقين مدارسهم قريبات وحده يم الأخ
اليوم الطاسه مال الخبط اصعد بيها الطابق الثاني
وسمعت من جوا
ولك ابو النوادر.. باوعت شفت فراس
كملت شغلي وصار وكت الغدا وبقي يحجي عليه شلون كليتك ولك هاي مرحله ثالثه
_ انسى انه برگبتي عائله والمثلي ما يكدر ع مصاريف الدراسه ولا وقتها
اذا تحبني شوفلي شغل
بقى يحجي حرااامات ولك هي بقت منها هاي السنه كم شهر وبس السنه الجايه اجل
واخواتي ثنين سادس واخوي ثالث وصعب امي علاج الها نست شي اسمه علاج لان ما أكدر اوفرلها جانت مهما كان مدلله بجال ابوي
انه شنو سويتلها
مرت كم يوم واجه فراس كال لكيتلك شغل العماله تكسر ضهرك
معمل بسكت بس ع تعبئه بالمنصور
رحت وراتبها نوعا ما زين وفراس فرحان حتى ارجع للدوام لان اتفق ع شفت ليلى
اني من حسبت الراتب ما يكفي
فقررت اخذ شفتين وبس اربع ساعات راحه لروح بيهن لأهلي
امي ما قبلت وكالت ندبر حالنه
لكن اني
ما هان عليه تعيش حياه تلزگ جانو مدللين بجال ابوي
وبيدي افتش ملابس اخوي والاحذيه مال الاخواتي
انتبه لان امي متقبل تكول اذا يحتاجون شي
لكن اني بفتره بسيطه بقيت اتقرب لاخواني حتى يكلولي شنو يحتاجون
لذلك اشتري وانطيهن فلوس
وأخذت الشفت الثاني
والمهم اشوف راحه بعيونهم
مشا الحال وتعودت والعمال ورئيس العمال الكل صارو يحبوني ويثقون بيه
اخواتي دخلتهن من انطوهن عطله
يم مدرسات ودفعت فلوس الهن
حت يخلصن السادس
خلص العام الدراسي نحجت اختي البلمعهد محاسبه
واخواني نجحوا وارتاحيت احس سويت شي
اخوي رفض يروح اعدادي وراد صناعه
والبنات
لمى انقبلت معهد طبي
ونهله رفضت اصلا تكمل شكد حاولت مقبلت
كالت السنه الجايه.....
تركض الدنيا
وصار دوره السنه مال والدي وامي تلح اروح اصالح عمامي لكت اني گلبي شايل عليهم وارفض لان همه ولا احد سأل عنه ولا ذكرنا لكن هاي الايام يلحون امي واختي منى نروح لبيت عمامنه
بقيت رافض
الا بيوم فتت وعندي ساعتين اسبح وانام شويه وارجع وعطله اخر السنه جانت اختي الجبيره جايه النه
وعدها بنيه اسمها ملاك وهي صح ملاك
مثل الفراشه تفتر علينا
كالت خويه عمي ابو رياض مريض روح واخذ اخواني وشوفوا مو زين قطيعه الرحم
وتره همه طلبو حقهم منك ما رادو شي زايد
_شبيج ام ملاك اني جانت نيتي اكل حقهم لكن تجاوزت عمتج ومرت عمج ع امي ورجع عمج الخير ابو رياض وجايب ناس وذني امج وخواتج بالترك وهو يفتر وي المشتريه. وهي بالعده
منى من يمها ردت
انت ليش كلبك اسود صار سنه تجيبها وتردها كافي شنو ابتلو راد يبيع البيت شنو يبيع سمج بالماي غير يشوفوه
_انتي معقول هيج عندج عادي فهموني يعني كلكم متفقين اني غلطت انوب بحقهم
ردت ام ملاك خويه انته تكبر السالفه ولمى حجت مهما كان عمامنه لو ابوي عايش مقبل ع تصرفك
والزاد اخوي بعده هسه يلا 16سنه وهد بالكلام عليه
نبقى مكطمين عاجبك كاعدين ببيت مال
طليان وباخر الدنيا وهم ننقطع من أهلنا ..
خضعت لكلامهم وكلت يجوز اني غلطت واخذتهم ورحت اتسامح من عمي ابو رياض
وجان مريض صح.. تفاجأت مغيرين عنوانهم من اخذت العنوان رحنا عليه بيت دبل فاليوم دنك
مساحته 500متر فتنا واني مستغرب هم بالاعضميه. لكن أرقى من بيته والمحله احلى بعد من الكان بيها
رحب بينه وكان ولا صاير وياه شي حتى اني استغربت لان ما غثني ولا نطق بكلمه ورحب بينه
وهو بيومها عازم عماتي وعمي الثاني
وعوائلهم لكن اني اختنك من اشوف واحد من اسلم عليه اتذكر موقفه كل واحد وموقفه اول ما اسلم عليه ترجع ذكرياتي وياه من سنه وعمي ابو رياض مسوي نفسه حنين ع والدي ثواب لوالدى جمعهم وكال هاي مال دوره السنه مال اخونه مجاملات ووجوه مزيفه والدليل حت ما سأل شنو اشتغل او شمحتاجين ابد بس مجرد شلونكم وبس
اولاد عمامي كل واحد بيده سويج سيارته ويحجون معلك
بداخلي متضايق منهم لكن مو غيره لكن حقيقتهم عرفتها مجرد مصالح والكلام يصيرون ماكو احن منهم
وره شهرين تقريبا
اجت زوجه خالي وخالي طلبو اختي منى... لكن بكل صلافه رفضت وبقت تحجي انه اطلع من هذا الفكر وارجعله
خلي يروحون لوحده كون تقبل بطياح الحظ
لكن لان امي كايلتلهم يجي اخوها ونكله لان خجلت منهم
وما راده خبر وما يدرون بمنى هيج موقفها من رجعت هيج حجت
_والله يمه بيت خالي حرامات منى تصير الهم ما يستاهلون ناذيهم بيها مرت خالي وخالي طيبين وبنتج نسره
_"ولك يمه استحي من اخوي وولا مره طالب مني شي
دومه يذكرني ويجي محمل واذا اروح الكا بجيوبكم فلوس من جنتو زغار لو بعلاليك طحين التمن خطيه يضم فلوس اليه
شكله بنتي ما تقبل
_يمه همه حددوا يعني أمير عينه ع منى
_يا لا يمه مرت خالك كالت نريد من جوا ايدج ومثل طيبتج وحنيتج
_والله يمه ماعرف شكلج لكن منى ولمى
ما يوالمن فقاريه مرت خالي
اكول يمكن نهله أقرب وحده يشبهها الج
لكن مفتحنا موضوع كم يوم وعمي ابو رياض دز ابنه كال ابوي يكول معزومين ع الغدا تعالو باجر جمعه
ردت أرفض امي كالت يمه نروح ونشوفه وخاصه انته عندك اجازه مي خالف
رحت واني ضايج منهم
كعده وسوالف وعمي كال تعال انته والوالده للحديقة طلعت اني وامي بره
وهو عدل الكراسي
وصاح ع بنته سووي جاي
_شوفي ام نادر احنه رغم ابتعدنا ومو نفس المنطقه لكن يبقون ولد المرحوم أولادي وتهمني مصلحتهم
ولذلك اني نويت ازوج بسام وما اريدله وحده منعرفه اني اريد منئ ولمئ
ل اسعد
اني بداخلي مقبلت لان اعرف بسام شنو واسعد شنو
شكو مكسرات عدهم وشايفين نفسهم ع الاخر
امي تعرف وجهه نضري بيهم وتعرف رأيي لذلك كالت خويه منى السنه تخرجت من المعهد ولمى اول سنه معهد
_مو مهم التكمل بكيفه والتتعين هم بكيفه
_خويه منك الهن انته هم والد
واعرف امي من كالت هيج حت توصيهن يرفضن من يمهن ولا تصير مفاشل
من رجعنا وامي صاحتهن واني كاعد كالتلهن
اول مره سكتن من سمعن عمي طلبهن لأولاده لكن اني كلت
_بنات لا بسام يفيدج منى ولا اسعد يفيدج لمى
اني شاب واعرفهم وجنه منطقه وحده
محبيت احجي بالقلم العريض
لكن رد منى..
_والله يا نادر انته اذا يجي ابن نبي هم ترفضه واطلعله عيب مو الا يلا بيت عمي التكرهم
_انتي متعرفين تحجين ولاتعرفين الشباب ولج شنو اطلع عيب بيهم اريد مصلحتجن
_وتتوقع مصلحتنا وي بيت خالي افضل
_شفايتلج لو تقبلين
_اي مو اكول تموت ع الفگر والفگربات. تريدنا نبقى طول عمرنا بنگره
_خاب شحجي وياج صدك حرامات بيت خالي بيج وانتي لمى
_اني اهم شي عندي اكمل معهدي يخلوني واتعين
_انتي اهم شي عندج الدراسه والتعيين
هاي حياه واكولج ابن عمج مو كفوه
_ينصلح شبيه قابل
واني ما موافق
_اووووو بقيت انته تتحكم بحياتنه
وره كم يوم المعمل جان عدهم صيانه وفتت للبيت اسمع امي
وبقيت اتسمع لان سمعت اشياء متوقعتها..
_ولج دگيتي الا نصالح عمج وكلت مي خالف
ورفضتي ابن خالج وكلت براحتها
وهسه تكليلي لو بسام لو ما اتزوج واخوج رافض
والاتعس اسمع انتي الكايله لابن عمج يخطبج لان عرفتي بابن خالج وانه كلت صدفه خطب عمج ايا كلبه
دخلت مثل الإعصار وكمشتها
ضربتها
_شعنددددج وي بسام ادب سزز
_معلللليك فهمت معليك
اضربها ملختها وآخرها كالت والله لو بسام لو اخلي عمي يتصرف
_تهدديني يا كلبه
وصارت صح كوه بسبب امي البقت تتوسل خليها تتندم ويطيح حضها
_شوفي رح اقبل لكن انسي نادر
_بعد احسن وكلشي تم واني ما اهتميت لكن اخذت سلفه ولا خليتها تحتاج شي
آمنت امي ما تخليها بنقص ويعايرونها
قبل زواجهن ب اربع ايام عمي اجه ويباوع بالبيت وكأن ما عاجبه
تالي كال
_شوفوا بيتكم بعيد وصغير اني اكول لو ناخذها لبيت عمك ماهر بيته قريب ع بيتي وهم اكبر وارتب ويبقى هو هم بيت عمامهن وابوهم
_عمي غير تطلع البنيه من بيت ابوها
_ماكو فرق نادر لا تصير حساس شكو بيها
اني صح شايل بگلبي عليهن لكن يبقن اخواتي وكرامتهن من كرامتي ردت يطلعن من بيت ابوهن معززات مكرمات
رحت للشغل وقبل الحنه اجت امي وطبيعتها اذا عدها كلام تبقى تسأل ها يمه مامحتاج شي
تعبان لو زين
تفتر فاعرف وراها كلام
_احجي يوم شصاير
_يا يمه سلامتك شيصير عساك سالم وطيب
بس عمتك اليوم اجت وباجر تاخذ البنات للصالون تعرف يسون شعرهن وسوالف نسوان
_اي خلي اخوهن يروح وياهن لو واحد من ولد عمي
_لا يمه عمتك راح تاخذهن لبيت عمك ماهر يبقن هناك ليوم الزفه
_هااا هنا الحجي يوم براحتهن بس نهله لا تروح
_لا يمه بس بالحنه نروح ونرجع وي اخوك وبيوم العرس هناك نروح وبليل نرجع
_براحتكم يمه
وقبل حنتهن بيوم
اني نايم ووراي رجعه للمعمل لكن من اتعب زياده ما اكدر انام بقيت اتگلب
واسمع امي
_ولجن روحن طيحن عليه وسلمن عليه شنو من گلوب اخوجن شالجن ولا يوم تعاجز منجن
ادفع بيهن كوه
فاتن كعدت لمى يم طرف الدوشك وحركت رجليه
نادر نايم كاعد
فتحت الجرجف وكعدت
فاتت منى... نادر باجر حنتنه ومنريدك تبقى شايل بگلبك علينه
_انتن اخواتي وتمنيت اطيعني وازوجچن لليستاهلجن لكن عبالجن الماده هي أساس الراحه
ولو اتمنى حدسي خطأ الله يهنيجن
وسحبت لمى واشرت لمنى اخذتهن بين ايدي كل وحده بجهه
وهنه حضنني وبچن
نزلت اول دمعه ع مصير وقدر اخواتي الي اتمنى يكون مو مثل ما أتصور...
دمتم بخير .. .
فرينداتي النايسات.... هذا اول بارت من القصه.... تفاعلوا وصوتوا وعلقو وتكتكو لصقيقاتكم
حت أكملها فوديت.....
طبعاً المقطوعه الاخيره بقلم وحده حشريه لكن محبوبه ☝️😅
بنات نادر والقدر
بقلم زهرة الرمان
البارت 2
احلف بعد لا تخطي لدربهم
ولو عازتك هواهم اخنگ الريه ولاتشم هوا شماتك.......G🖋️
عمر اليروح ما يرجع تنحسب علينا الايام وتسجل عمر ما شفت منه بس التعب والفراگ..
مساء الورد ❤️
البيت اليوم فارغ. امي مخليتلي اكل من فتت شفت الگدر وصتني اكل
لكن شنو طعم الاكل والبيت فارغ
عياط اخواتي وملاخهن الصبح ع ملابس او هذا مالتي وليش تلبسيه
او اخوي عادل
ونگرته وي نهله ع الاكل نقناقي ونگرزه
وتلعب نفسه من اي شي...
صبيت ماعون تمن وخليت فوكه مُركه
بديت اكل واباوع ع الكراج تذكرت كلمه امي لاتاكل وانته واكف
وتذكرت ابوي من يبقى يعيط استعجل العيشه ينرالدلها ركضه مو حلكك الفاهي وجنت اكل واني اركض...
اي يااابه صح الدنيا تحتاج ركضه
رغم قساوتك واذيتك لكن تعلمت ما انام اذا ما مأمن لگمه اهلي
مثلك تضوج اذا ما تشتغل جنت....
فقدتك يابه واني اتمنى يوم حاضني بقت بنفسي ضحكه ولمه ايد منك حرمتني يابه من عمر 10سنوات وبقيت تبعدني وتكولي صرت رجال
الاكل برد وما صار الي بيه نفس للأكل
كمت اخذت الاكل امي خاله صينيه بره
تخلي بيها التمن او الخبز اليزيد تكول تاكل منها الطير لوجه الله ولسلامتكم
وبركه للنعمه
رجعت واني حيلي مهدود من الشغل ركضت الساعه ركض وما احس الا
بقت ساعه ونص ارجع لازم للمعمل واني طالعه روحي مو كأن تزوجن خواتي كأن روحي راحت وياهن.... لكن شنو اكدر اسوي...
بعد كم يوم من زواج البنات وامي احسها تتختل وتبجي عليهن
حلفتها
_يوم شنو البنات تحسيهم ما مرتاحات شفتي شي
_لا يمه لحگن بعدهن عرايس من رحت للسبعه هنه تلگني
لگيتهن بالمطبخ
_هاي هيه يمه أخذن. برأيهن. لكن اساليهن ولا تخلين شي بنفسهن ابد
واي شي تحتاجين بس كولي
_الله يحميك ويخليك الهن يمه
مرت ايام والشغل مستمر الا بيوم صاحب المعمل قرر يقلص العمال بسبب
قله الايرادات وبردو يصفون وجان اسمي اول القائمه القراها رئيس العمال رغم الرجال انقهر عليه لان اشتغل ولا اسخت ودوم يكول للعمال چن يشتغل بمعمل ابوه.. ويوميته مثلكم لكن الأمر صدر رجعت وأقدم خطوه وارجع الثانيه
خوفاً من سؤال امي واختي واخوي
رجعت الضهر ومثل كل يوم امي الگاها خطيه تتمدد بالمطبخ تنتضرني
هاي طبيعتها من زمن ابوي ماترتاح الا تغدي الكل بيدها وتباوع علينه
فزت من فتحه الباب وسلمت عليها وبست راسها
استغربت جيتي من وكت لكت ماحجت لان رادتني اتغدى
گابلتني واني اتغدى...
_هاا يمه نادر بيك شي
_بيدي الخبزه ثلمتها وحجيت يمه صاحب المعمل قلص العمال عنده فائض
واني انطردت
_لا اله الا الله.. لاتهتم يمه الرزق على الله
اكل يبعد عوينتي
_دخل عادل وبعدنه نسولف وعرف اني انطردت
ركزت ع شعره مسويه عالي
_عادل شنو هاي حلاقتك
وهذا البنطرون مو كلت بورده ماينلبس(بورده موديل بنطلون)
والزلف جورجي سلامات خويه اعداديه صناعه لو صياعه
_اووووووو شبيك نادر تريد اتذب حركه طردتك بيه حالي حال الشباب البس مثلك تريد
_تأدب لا اطيح حضك سمعه ابوك واخواتك بتصرفاتك واكل باليعجبك والبس باليعجب الناس
. احنا عايشين بمجتمع من تروح لكرايب لو لأصدقاء شبكولون ما احد كله لبسك يفشل
شوف اليوم إنذار باجر تودي بنطروناتك للخياط يعدلهن
وتروح للحلاق وترتب شعرك لا بالقرآن اسوي شي ما يعجبك ولي يلا
_والله معليه ولا اسوي شي شنو وحد انه كلها هيج
يمشي راح لغرفته ويعيط
_عيفه يمه
_يممه هذا فاهم الدلال غلط
الدلال من اليشوفه يحسده ع أخلاقه ع عقله
هذا ابتذال مو دلال
ولا يتوقع اذا ابوي الله يرحمه جان شبكله يكله تم اني هم لا والله اطيح حضه ولا اخليه يدمر نفسه
مرت ايام وانه اطلع من الفجر للمغرب ادور شغل بلا فايده
رجعت لگيت فراس صديقي بالباب
سلمت عليه
_فوت فروسي
_وينك لخاطر الله هاي يومين اجي ما الكاك
_ادور شغل فراس
يوم جاي غدا بكيفج
_لالا ما اريد خلينه نطلع
_وين
_نتمشى ونسولف رحت للمعمل عرفت مطلعيك
_اي بعد حظ نادر
_كتلك كمل كليتك بلكي تعيين
_شبيك فراس هو الراتب يكفيني يكفي البيت
بهذا الكلام صارت طلعتي بدخله عادل اخوي من الدوام سلم عليه واني اباوع نفس الشي ملابسه وشعره وفراس يباوع عليه
كلت لفراس روح جايك
طلع فراس وأنه رجعت بعد عادل بالكراج
سحبته وشميت ملابسه
ريحه الجكابر لزمته من شعره عطت افتح حلگك افتتتتح
فتح حلكه الريحه واضحه ظربته راشدي حيل وبوكسي فوت شويه وارجع واتفاهم وياك وهو يعيط شنو شنو ما سويت شي
_انجب
يووووم ممنوع عويدل يطلع يروح فراس وانه اجي قسم بالله اموته اذا لكيته طالع
طلعت وانه القهر مله گلبي ياربي الحمل ثگل والحيله قلت ربي
_شبيك يمعود وين رحت
_فراس هذا يشرب جكاير وشفت ملابسه وشعره فراس خايف ينحرف والجكاير اول خطوه للانحراف
_انه شميت ريحته اول ما سلم عليه لكن هسه اخوك يحس نفسه جبير خاويه وانطيه الأمان حت يقتربلك لان يعند وهو مراهق
_انه اهم شلون اوفرله مصرفه وهو شوف شلون يتصرف
_مراهق بابا شبيك احتويه لا يعاند وتالي متصيطر عليه
شوف نادر انه من رحت للمعمل شفت مطلعيك
رحت ع صديق لوالدي صاحب فندق
وقاعه حفلات ومطعم الي خاطر يمه
وسولفتله عنك طبعا هو بالحزب وواصل حيل اذا رضى عليك تعلى وتصير أحوال
الفندق محد يعرف هو اله لان مخلي مدير لكن احنه نعرف ومن رحت كال اريد واحد أعمى واخرس واصم
وأمين وأهم شي اسالك انته بالكليه شنو كان تدرجك الحزبي
_شمعرفني يمكن نصير
_اي اني كتله نصير لان من جنه بالكليه كلنا سوانه نصير
اليستمر يصير عضو
ع العموم باجر تجيني ساعه اربعه العصر حلق ورتب وتعال يلا اروح
_تعال فراس فهمني هسه شنو اشتغل بالفندق لو وين وع شنو أصم واعمي
_باجر افهمك بس اصبر وروح ارتاح ومثل ما وصيتك ع كيفك وي عادل لا نوب يفلت اكثر...
_رجعت والف حسبه براسي
لكيت عادل بالغرفه وامي ونهله يمه
_اطلعي يمه انتي ونهله واتركونه رجال لرجال
امي اشرت ع كيفك يمه وياه اشرتلهل روحي
سدى الباب نهوله
كعدت يمه وهو ينافخ
عادل انه اخوك مو عدوك وما شاء الله صاير أطول مني
واني افتخر اخوي يصير احسن مني اتمنى تصير احسن مني
تركت كليتي علمودكم ولهسه عندي استعداد احفر الصخر في سبيل تكمل دراستك وتصير فد شي
بس أسألك الما يشرب جكاير مو رجال عنده نقص؟؟
رد ليش ساكت
عدولي حبيبي إذا ما تتمرض فشوف لوما فدشي مخجل مجان تختلت وشربتها
لان شي معيب بعمرك وجكاره بحلكك
ولعلمك اليكلك اشرب هذا غيران منك لأن هو. طايح حضه يريد الباقين يصيرون مثله
والي يكلك ملابسك حلوات يضحك عليك ويتشمت بيك
كل الحواليك عدهم مصلحه بهيج لكن اني الماعندي مصلحه وياك انه وامك واختك نريدلك الأحسن
شنو ببالك اسويلك وتعال كول
صدك ما رح امانع
بقى ساكت
. _عادل تحب والدي..
رفع راسه عيونه نترست دمع
اعرف تحبه لو عدل تفتخر بالتسويه ويشوف حبيبه هيج
ابوك الي وده ينطيك روحه
يفرح من يشوف هذا حالك بعده
شنو الحب لعد
وشنو رد الجميل لابوك الي اذكرك من تمرضت وتعارك بالمستشفى لان كالو بيه حساسيه معديه وهو حاضنك ويكول اعديني ويسبحك ويمشطك ويبدلك بيده وانعده ومخلا احد يقتربلك
حماااك بينما الطبيب كال دخلوه لمستشفى الأمراض المعديه
وما قبل خاف عليك وسوا مستشفى البيت الك وعزل بيك عن الكون
راد ينقذك
مووو ترد الجميل بمرض مو معدي لا فتاك مهلك
هو أخلاقك ولبسك واسمه الوره اسمك والجكاير الي جان يخاف عليك يكلك بيوم التراب غيب
يخاف عليك تالي رئتيك تمليهم دخان نكس
رفع راسه يبجي وشهك بصوت نادر مشتاقله ضايع بلياه مشتتتاق لأبوي نادر ضيعني ابوي من ماااات
حضنته ودموعي نزلت وهو بحضني يشهك مثل الطفل
طبطبت ع ضهره.... أسند نفسك عدول وصير رجال ابوك روحه حواليك ما راح
وانه يمك... الخميس نروحله اخذك اله ولك انه اصير لك اب وأخ وصديق
ما تضيع الا انه جوا الكاع
انته امانه بركبتي ليوم الدين
بقى يبجي بصوت
لك استرجل كبرت حت عيب عليك أطول مني
هدا واحس تأثر.
يلا روح غسل وبدل
ثاني يوم ع الموعد رحت ل فراس
بيت اشبه بالقصر بمنطقه راقيه وصلنا
فتنا اني وفراس واشر لفراس ولك وين جايبني بس لا ورطه
وهو يضحك
رجل بالخمسين لكن شكله مرتاح وهيبه
ومبين اله سلطه
ولكنه لسانه غريبه
_ها فراس هو هذا الشاب
_نعم رفيق
_اي حياكم الله اشنو تعرف وليدي تشتغل
_استاذ بكيفك
_اها شوف ابني انه مو استاذ انه رفيق
اولا
والثانيه لازم تكون ولائك للوطن اهم شي بدماغك هذا الوطن يريد ارجال
انته صرت عضو ومنا وجاي هذا رفيق مروان رح يعلمك شنو شغلك
اجه رفيق مروان اخذنه. لغرفه وبقي فراس يم ذاك
مروان بدا كلامه وياي
_انطيني اسمك الثلاثي
عدكم شهيد بالعائلة
_لا
شوف منا رايح منطقتك رح توصلك قوائم بأسماء تسوي عليهم جرد منو مستمر بالخدمه العسكريه ومنو
فرار
عليك فقط ترفع الأسماء
هذا عملك الرئيسي وبدون أي علم منطقتك ابد
اما عملك الثاني هو بالفندق
وهسه شنو تعرف
_اشتغل اي شي
-طيب رح اخليك ع الرسبشن
شغله سهله واذا عجبتك استمر واذا ما عجبك بلغني واني رح انطيك رقم تتصل وتتواصل وياي
_طلعت واني ما عجبني الكلام مال اسماء الفراريه والجنود
_فراس هاي شغله مو زينه شنو اصير
جاسوس
_ضحكه طويله من فراس
ولك جاسوس مره وحده وينك وين التجسس
لكن البلد أموره بعد حرب إيران صار بيها هواي شهداء واسرئ ومفقودين
والجيش محتاج لكل جندي ويردون يرجع كل جندي لموقعه
_ماعرف فراس ما ارتاحيت
_خاب ياراحه انته عرفت شكد راتبك
وراتبك ضعف مبلغ التاخذه من المعمل الشفتين ودوام من 4لل 12بليل
ويردونك بالنهار متفرغ لكل المناطق الحوال بيتك تشوف الجنود الملتحقين وتبلغهم والمختار تبلغ يساعدك يعني شي اصولي وقانوني
ومراح تسوي شي
_يعني ما بيها كسران رگبه احد
_شوف هذا هو جندي وماكو لا حرب ولا شي يخلص خدمته ويتسرح ويولي
يردون يخلصون من البطالين وعطالين وباقين بس يصيرون حراميه من يخلص مصروفهم
_هاي هيه..
بديت بالنهار ومساعده المختار افتهم كل عائله وبيها عسكري واجرد الأسماء
واداوم بالفندق العصر
فتره مشت الأمور طبيعيه
وعيني وكعدتي بالبيت بالنهار خلتني اتقرب ل عادل لكن اشوف شعره ابد ما قبل يكصه
تعبني رغم التحذير وتاكدت ما يشرب جكاير
لكن الملابس والشعر
..
زارنه اخواتي بعد شهر رغم اعزمهم ويتعذرون
واسأل امي كالت عيفهن
لحد ما عصبت ورحت لبيت عمي وعزمتهم. ردت اشوف اخواتي ليش ما يجن
بيوم العزيمه اجن ومنتظر ازواجهن
اجو وامي ونهله فرحانات سوون اكل كومه وشنو يحبن لمى ومنى امي سوته
من دخلن لمى متغيره ضعفانه استغربت
حضنتهن وهنه هم فرحن بملگاي الهن
بقيت مكابلهن لان مشتاقلهن حيل وحتى وجود ولد عمي
جنت ما مهتم الهم لان مشتاقلهن
واباوعلهن
انتبهت أصابع منى متورمه وبيها اصبع الاضفر وارم
بعفويه سألتها شبيهن اصابعج
لان جانت حيل مهتمه بيها وتعصب وتبجي اذا ينكسر اضفرها
ردت مرتبكه لالا مابين وتضم باضافرها
صار وقت دوامي سألت ان شاء الله باقيين اليوم رد زوج مني لا نروح هسه سألت والبنات
رد يرحون والله ورانا دوام باجر وكذا ما ضغطت عليهم
فتت للغرفه صحتهن
دخلن.
_بنات شخبارجن شكو ماكو
_بخير نادر زينين
_هاا محتاجات شي عمامي شلونهم وياجن احجن
_زينات أمن مرتاحين
_شبيج لمى ضعفانه ام لگمه جنه نسميج شبيج خويه
_لا والله ما بيه زينه
_وانتي اضافرج وين صارن شبيهن اصابعج
اوديج للطبيب
_لا رحت وأخذت علاج كم يوم واصير زينه
رغم ما مقتنع لكن هنه مصرات ما يحجن
اخذت من جيبي فلوس وانطيتهن
ما قبلن
_ شعندك خويه
_عندي خير من الله ولا تترددن اذا تحتاجن شي بس كولن
وهاااا تره هذا البيت بيتجن الأول ومفتوحلجن وگلبي هم مفتوح اذا تردن تحجن
باسني وراحن بدلت ورجعت لدوامي
بديت اسوي جولات ع المناطق الي لازم
اجرد الناس...
من ضمنهم شباب صح ملتهين يكمشون أبواب المدارس ع البنات او يبوگون
وبديت اخذهم بالتي هي أحسن
وما استخدم سلطه القوه دوم باللين والأكثر اوعدهم بشغل بس يتسرحون
يقبلون
ورفيق مروان ع اتصال وياه وكتله ع مشروع التشغيل وانطاني ضوء أخضر اوعد اليستاهلون
اما الي اذاني عائله معليها شاب يشتغل باليوميه فران
وفرار وعنده بركبته عائله
بقيته وشكد يسألون عنه ابعده لان فر مو متبطر لان يريد يعيش عائلته
وهواي مثله بقيت اساعدهم بالاكدر عليه لكن ما اخليهم يرحون
والراحو الا من صار العفو
وراتبي حلي هواي امور صارت عندي مصرف وبدت امي تجمع اليه وتقترح نعدل البيت وصح رممت البيت ورتبت شويه شويه
وره أشهر دز عليه رفيق مروان....
_شوف نادر اني بديت اثق بيك والاسبوع اريد منك شغله
واتمنى تساعدني بدون ما احد يعرف
_أأمر شنو
_اني عندي شك بشخص وماعندي احد اثق بيه أريدك تراقبه واذا حصلت نتيجه صدك اغير كل حياتك وعملك
اذا ع الثقه ان شاء الله اكون عند حسن ظنك
لكن لازم اعرف الشخص والموضوع
_هسه تاخذ اجازه وانطيك كل المعلومات عنه
وانته عليك تجيبلي كل تحركاته
_عرفت هذا شاب كرايبه او معارفه
لكن استغربت انو هالشخص
يمكن يريد يخطب بنته
وبقيت اراقبه... وره كم يوم عرفت كل زغيره وجبيره وكل المعلومات انقلها اله بكل امانه ودقه واخر شي دليته ع مكان يترددله هذا الشخص مزرعه وينجمعون هواي أشخاص ويحيبون بنات وشرب
تخبل مروان
وكال بآخر لقاء.... جنت شاك وهسه انته نورتني بأمور جنت أشك بيهن وما اكدر افرفر وراه وماعندي احد يحجي الصدك الكل عدهم مصالح
والعرفته هالشخص هم واصل بالدوله وبالحزب
والعرفته.مروان عنده بنات لكن بخاف ينطيهن لنفس المجتمع العايش بوسطه
كملت مهمتي وياه وراتبي ماشي اول يوم رجعت لكيت الأمر الإداري صادر اكون مدير ع المطعم مال الفندق اتصل مروان وكال هاي اكراميتك وراتبك تضاعف وهم ترفعت صرت عضو منظمه
أريدك تلتزم بالحزب والاجتماعات
رغم ما اريد ارتباطي يزيد بالحزب
لكن صار مصدر عيشه
وفراس اول المشجعين اليه ويساعدني وفرحانلي. سنه مرت البيت رممته
وبديت بالعطلة احتوي عادل لجانبي صادقته اطلعه وياي واخذه حت لعملي للمطعم احس هو هم بدا يتغير
. اخواتي يجون لكن ولا مره شكن من حياتهن
رغم احسن عيونهن حزينه اختلي وأحلف بيهن لكن بدون رد منهم إلا احنه بخير
نهله خوالي رجعوا طلبوها
واني رحبت بالفكره لان نهله فقيره وخوالي زينين...
...... بعد زواج اختي وكثره انشغالي وصارت المسؤوليات اكثر.... ع قدر ما أتقدم بعملي يزيد التعب
امي بقت تلح يمه خلينا نشوفلك بنت حلال واني مو ببالي هالسالفه اريد اثبت ع عمل ودماغي اربد ارجع للكليه اريد اكون نفسي بصوره صحيحة
واشوف مني ولمى نفس الكلام يلحون إلى أن بدن يلحن ويحجن ببالنه وحده الك لكينالك وحده
منيه... بنت عمك...
هااا هنا الحجي حماتجن
انه من عمامي مااا اريد بقن يلحن وانه ما اريد بنات عمي
نهيتها وياهن.. مستحيل اتزوجها شيلوها الفكره من دماغجن
بين عملي والحزب
بيوم تغير قدري الاول.....
من مروان دز عليه..
_نادر احنه نعرف كولشي عنك واني اثق بيك وكان انته ابني واني ماعندي ولد عندي 3بنات
تعرف شنو بنات تخاف عليهن من كل الدنيا... وما تأمن عليهن لا بكرايب ولا بغريب..
الا الي تجربه.. واني جربتك انته خوش رجال
_اشكرك رفيق مروان
_ما أريدك تشكرني اريد أسألك انته خاطب او بگلبك وحيده لو من هاي الناس البنت العم لابن عمها
_هههههههه لا رفيق ماعندي ملتهي بالدنيا والعيشه
_كفو... اذن ماتريد تكمل نص دينك
_والله الحجيه تلح لكن الزواج تعرف ينراد اله واحد متفرغ وجيوب مليانه
_هههههه لعد سهالات لان الجيوب تنترس والوقت نفرغه
شوف ابو المثل يكول اخطب لبنتك ولاتخطب لابنك
وانه عندي جوهره غاليه اخاف انطيها لواحد ما يعرف فيمتها ويعاملها غلط
تذكر التابعته اليه
شفت شون شكله وسيارته وهيبه خلفته
واسمه واسم عشيرته وأهله
وهو أخلاقه فلس ما يسوه...
لذلك شنو رأيك
مو هسه تكول روح واخذ وقتك فكر ومن تريد تشوفها تعال اخليك تشوفها وتشوفك وما اريد اوعدك لكن بالايام راح تعرف اني اريد ابن مو زوج لبنتي
ابن يسندني..
_طلعت منه واني افكار صارت أمواج ع
عقلي شنو اتصرف والموضوع شبه محسوم رغم واجهته خيرني مروان
زين اذا ماعجبتني البنيه او طريقتها وعائله منعرف عنهم شي
وأهلي وامي واخواتي الكمشني لبنت عمي
دخت قررت اروح واسولف لفراس هو الوحيد صديقي بلا مصلحه واكيد رأيه محايد والأكثر هو يعرفهم عن قرب قبل لا اتورط واكول لأمي
_ولك طگيت ابن نوفل ولك غير امك داعبتلك بليله القدر اثول غير وحدتهن تشك شك حلاوه ع دلال ع ادب اوووف احجي براحتي هسه قبل لا تصير وحده مرتك ولك هذا مروان شكد شخصيه ومركز لكن اهله خط أحمر بكولشي بدراستهن واخلاقهن
يعني مد ايدك وغمض لان من كلك جوهره ضلمها غير شمس شمس تخبببل
ويغمض تك عين ويعض بشفته
_انته ماعندك عقل. شكلهن وشكلهن اكلك اخاف عيشتها ما تتوالم ويانه اهلي ع بساطتهم
_شوف هذا ليش هو مروان يعوفك راح ياخذك وياشر بيده ليفوك
امشي وبشر امك كللها دعائج وصل
بالفعل رحت لأمي وفرحت ورحبت
المهم تتزوج وتستقر رغم اخواتي عرفت ضاجن لان رايدات اخذ بنت عمي لكن اني قبل بنت مروان ما احب بنات عمي ولا أريد أقرب عمامي بسبب جشعهم وانانيتهم
صار يوم لقائي ببيت مروان وحدي رحت أخذني مروان للبيت بمسمئ اليوم عازمك ع الغدا
فتت لبيته توقعت بيت فخم واثاث ملفت
لكن كان طبيعي جدا رغم مساحه البيت كبيره...
رحبت بينا بغرفه الاستقبال زوجته والاستقبال تصميمها مفتوحه ع غرفه الطعام ميز وكراسي
واني كاعد يتنقلون اشوف بنات لغرفه الطعام واني ومروان كاعدين
لحد ما كال
_يلا ابني الغدا جهز
مشينا سوا للميز وزوجته تصب كدامنه
وصاح وينكم بنات تعالو يلا
فاتو البنات اول وحده صارت كبالي لفت نضري فستانها وردي وبيه كركش من جوا لان مكدرت ارفع راسي خجلا واحتراما لكن هيه فرشت فستانها ع الكرسي مقابيلي وبصوت رخيم كالت
_مرحبا
_ردي.. مراحب
وراها سمعت شلونكم جميعا
وصوت اشبه بالطفوله رفعت راسي مثل ما توقعت بنيه ب 13سنه تقريبا
وراها التفتت ع صاحبه الفستان الوردي
وجه مثل قرص القمر بياض مشرب بحمره غروب الشمس...
وعيون كصفار.. شروق الشمس بأول النهار..... تجذب لدرجه قطعت النفس وما هي إلا ثانيه او ثانيتين
وكان نضرها اشبه بغزو نضره وحده اليه ودنكت
وقطع هذه السفره
صوت ثالث ب شلونك بابا
فاتت
بهذا الغدا تمنيت اكمل واسمع من من مروان منو المقصوده وبداخلي تمنيت ام الفستان الوردي المقابل اليه هي المقصوده لان سخبت من داخلي روح نايمه وبسبات روح اسمها
الإعجاب
بعد ما كملنا الغدا اجت وقدمت الجاي هيه تأكدت هيه المقصوده وحسيت براحه مو طبيعيه
وكملت بكلام مروان الامرها
_اكعدي بنتي انفال...
هذا نادر گدامج وهذا شرع الله أن لازم تشوفي الإنسان الاختاريته الج
وهو هم لازم يشوفج
ارفع راسك ابني وهاي كدامك والتفاصيل نسولف عنها وتعرف كولشي عنها مني اي سؤال اجاوبك
رفعت راسي صح خجلان لكن هنا الخجل مو حلو للرجل لازم تعرف اني رجال....
تفاجأت هي مشخصه نضرها عليه رغم ايديها لامتهم ببعض
اختصرت كلامها اهلا.
اهلا بيج...
خلص اليوم وطلعت اول ما وصلت للبيت لكيت عادل واكف بالصاله وبيده سطل فافون
هلا بعريسنا هلا... هلا بجيتك هلا
يطبل ويغني
_ولك عويدل اششش فضيحه
_وشنو فضيحه بابا الزواج اجهااار
واني دا اجهرررر وانته الصبح گضيتها
ترتب وتتهندم وتختار ملابس
وتحلق هاي حلاقتك
خليتني أشك قبلت بيك بنت المسؤول
ع هلبس والشعر
_اسكت عويدل تريده يصير مثلك بريكي(مصطلح بريكي موديل)
اخوك اختاره لاخلاقه وامانته
احجي يمه ها بشر
_ضحكت ع امي تشوفني احسن شاب
يمه شفتها وحلوه
_وهاااله وهللله وحلللوه بويه اريد اختها معليه
_ولك شلون مانسولف
خلينا نفهم
_عويدل من يشوف هاي كذلتك مروان
انه ما ينطني بنته
_شوف هذا من بأجر.. باجر شنو هسه اروح ل خليل واحلق صفر صفر
وها عند خليل حلاقك بعد شتريد
_ضحكت ع عادل من يشوفهن ما استبعد الصار بيه يصير بيه
سولفت لأمي وفرحانه
تكررت روحاتي لمروان لكن مو لبيته لا لمكان عمله حجالي كل التفاصيل واني كتله اهم شي عندي اني اخوي وامي
_ماعندها مشكله المهم البيت ترتبه الفوك الها
والتاثيث عليه
مقبلت لكن هو أصر وحدد خارطه الفوك
الطابق الثاني
مثل ما راد سويته رغم ما بقى عندي ولا فلس اداينت من فراس كلت اعوضهن من اشتغل
وفراس وكفلي
رتبت البيت حسب ما راد مروان وقبل كل شي لا خطبه ولا شي
وبعدها حدد مروان وقت الخطبه وسولف
_شوف نادر كتلك ورح اعيد أريدك ابن وتسندني مو مجرد زوج بنتي
_يوم دز ع عمامك وخالك اهلك عزوه لازم تروح مرفوع الراس
_ان شاء الله يوم اروح لعمامي وابلغهم
وابو فراس وفراس كالو وياك احنا بالخطبه
رحت لبيت عمي ابو رياض وبديت اسولفله
اشوفه ما عاجبه لا هو ولا عمي ماهر واعرف لان ما أخذت بناتهم
وبدو يتبحوشون
زين ما اختاريت الا بنت مسؤل وحزبي
شنو قلت بنات الحموله
_عمي هذا اختياري ومشكورين اذااجيتو او ما اجيتو
_ها احنا اكماله عدد مالنه كلمه عليك
_عمي الزواج اختيار ولا يحتاج كلام لان مامختار وحده بيها شي ولا بأهلها
عشيره ونعم منها وابوها بأيام العطلت وما عندي مصرف بجيبي. عيني ووثق بيه وبفضل الله وفضله وكفت ع رجليه
_انته شنو جاي تبين الغربه احسن من أهلك الك ولك
_ما كلت بيكم شي لكن اتركو سوالف الاختيار.. انه اختاريت وانتم بكيفكم بعد عمامي اتباها بيكم
اعرف يحبون الفخفخه والنفخه الجذابه
من كلت هيج ردو
لازم تتباها بينه عمامك مو غمان
ناخذك ونخطبلك
_بگلبي كلت ما كلفتو نفسكم بسؤال محتاج شي..
والحمد لله ما محتاج...
وصار موعد الخطوبه وخالي وابن خالي زوج نهله وعمامي وولد عمامي اليشوف الشارع لسيارتهم ونفختهم
يحسدني ع محنتهم
مع ذلك فرحت بجيتهم
يردون يبينون بأحسن حال سياراتهم ولبسهم
وخطبنه انفال مروان كان عبالك ابنه الخاطب من الفرح.....
رجعت مليان فرح بعد ما اخواتي انجمعن وسون كعده وهويات وركص
بليلتها فرحت لمه اخواتي وعادل يغني ويعيط بربكم صوتي حلو لولا
هاب بسالفه صوتي حلو
وأريد اصير مغني نضحك عليه.....
اثث مروان الطابق الثاني بإشراف ام انفال الي عرفت هيه اكبر البنات امها تجي للبيت مالتنه ورتبت اثاث بنتها بأكمل ما يكون واعرف امي ما تتدخل بس ترحب وفرحانه وتصلي ع النبي
كمل اثاث الطابق الثاني
وعادل اقترح نغير باثاثنه
وبالفعل صح زاد الدين لان اشتريت ذهب ثگيل رغم ما قبل مروان لكن امها وهي حسيت فرحن
اكيد المرأه تريد من زوجها
واني ما اريد اقصر....
هم اداينت واثثت
وعزمتهم ردتهم يلتقون عائله لعائله ودزيت ع اخواتي
واجو اخواتي وامي رفعن راسي بالأكل والترتيب
امها رغم تباوع بطرف العين لكن انفال احسها فرحت وعرفت متواضعه
وصار تعارف
وتحدد الزواج
ونوع ما تقاربنا اني وانفال
اني ماعرف ارتب الكلام لكن
جمالها خلا لساني ينطلق الها واني احب الشعر. ارتجل والف بجمالها شعر وهي تطير احس وتكول كمل.. لحد ما يوم فاجئني جوابها....
اني اتغزل بشكلها سحبت ايدي وكالت....
لسانك بيه سحر خلاني احبك..
نبض گلبي لكلمتها سحبني شي الها.. اخذت ايدها بستهاا بوسه عطش
رديت. وانه حبيتج من اول يوم شفتج
.... بدت. احلى ايام وي انفال تهون كل التعب....
تزوجت انفال.... وهديه ابوها وره ايام اجه ضرف خلاه بأيدي بيناتنه
وكال..
_بعد ممنوع تتداين.... ابوك بالدنيا..
سدد الديون
لكن دينك ابد لاتنساه
بنتي امانتك اريد ضحكتها ماتتبدل
ولا اكولك بسببي غير نفسك وع الغلط لكن لاتظلمها فقط وهي صدكني اصيله واعرف بنتي رح تكون كد المسئوليه....
_لأول مرة احس اكو أب يحس بيه بلا كلام....
وامانته لبنته مكانت بدافع خوفي منه لكن.. حبا بيها اني متعهد ادللها بمستوى أهلها....
مرت ايام واسابيع وشهر وشهرين وي انفال باجمل ايام كأن عايش بجنه
لحد بدايه عام 1990
غير مجرى حيات الكثيرين.... وجعلت الدمعه.. تفر من العيون.....
تابعوووووووني
