رواية انكسار امرأه الحلقه الأولي والثانية بقلم الكاتب الكبير محمد منصور حصريه وجديده

رواية انكسار امرأه الحلقه الأولي والثانية بقلم الكاتب الكبير محمد منصور حصريه وجديده

سنة 2000. ومع دقات الساعة 7 م. ومن جوة اوضة الدكتورة ضحي في مستشفي خاص كانت ضحي قاعدة

وماسكة الموبيل بتاعها و بتكلم جوزها رؤوف وكانت بتقول له

والله انت ما تعرفش انت واحشني قد اية. يارب ترجع بقي من السفر

رؤوف

ارجع ازاي بس دة انا ورايا شغل متلتل هنا في امريكا و بخلص صفقات كتير مع اخونا بتوع اللحوم المجمدة والمعلبات

ضحي

ما انا اكتر من مرة اقول لك مش لازم انت تسافر انت عندك سلسلة مطاعم وفي كل مطعم تلاته مديرين يسدوا عين الشمس اي حد منهم يقدر يسافر ويخلص الشغل دة

رؤوف

ضحي احنا بدنا سلسلة المطاعم دي سوي بعربية بتبيع سندوتشات قصاد جامعة القاهرة . تفتكري اني هأمن لاي حد يكمل اللي انا وانتي تعبنا في واخلي هو اللي يسافر يجيب لي البضاعة اللي مخلينا نمره واحد في السوق

ضحي

وفي ايه اكيد موجود عندك اللي يعمل كدة وبنفس الكفاءة اللي انت بتخلص بيها المشاوير دي

رؤوف

ما حدش يعرف يعمل اللي انا بعمله. دة انا رؤوف عزيز. ملك الاكل في مصر. المهم قولي بقي انتي بتعملي اية دلوقتي

ارتبتك ضحي وقالت

قاعدة في اوضي بقراءة رواية

رؤوف

يا دي الرويات.

ضحي

ما انت علي طول سايبني اروح فين بس

رؤوف

الشغل يا ضحي غصب عني.

ضحي

الله يعينك.

رؤوف

اومال فين البنات

ضحي

فاتن بتذاكر وليلي اتعشت ونامت

رؤوف

نوم الهنا

وهنا يظهر علي شاشة رؤوف اسم جميلة تتصل بي بص للشاشة وقال ل ضحي

طيب اقفلي انتي دلوقتي علشان جت لي مكالمة شغل وشوية وهتصل بيكي

وفعلا قفل رؤوف ورد علي جميلة واول ما فتح الخط سمعها بتصرخ وبتقول

الحقني يا رؤوف، ،،،،،،،

ومن جوة مستشفي كان رؤوف واقف مع ممرضة و بيقول لها وهو بيديها 400ج.

خدي دول وابقي طمنيني عليها اول ب اول اصل دي اول ولادة ليها وانتي ما تعرفيش انا خايف عليه ازاي

الممرضة وهي بتحط الفلوس في جيب البلطو

ما تخفش دي هتولدها احسن دكتورة عندنا

رؤوف

طيب انا هخرج اشحن باقة الموبيل واقعد علي القهوة شوية و هرجع لك تاني اصلي ماليش في جو المستشفيات دة وبخاف منها

و فعلا خرج رؤوف وضحي هي اللي ولدت جميلة وجابت جميلة ولد وكان زي القمر وخرجت ضحي من كشك الولادة ووقفت علي باب الكشك وكانت بتكلم الممرضات اللي معها و بتطلب منهم رعاية الطفل والام جميلة وسمعت صوت رؤوف جاي من وراها وكان بيقول

انا في ممرضة شاورت عليكي وقالت انك انتي اللي بتولدي مراتي. ياتري هي ولدت ولا لسة

اتصدمت ضحي اللي البلطو كان مغيرها لدرجة ان رؤوف ما عرفهاش من ظهرها وبدات ضحي تلف وشها وهي بتقول يارب اكون غلط وبصت له وهو اتصدم وبرق ومباقش عارف يقول اية

طيب بالراحة كدة وعلشان تعرفو اية اصل الحكاية واية اللي وصلنا للمشهد دة تعالو احكي لكم الحكاية من الاول حكاية

انكسار امراة

مستوحاة من احداث حقيقية

الحلقة الاولي

من تأليفي

محمد منصور **منص**

وقبل ما نبدأ نوحد الله ونصلي علي خير خلق الله سيدنا محمد.

اللهم صل وسلم علي محمد صلاة تحل بيها العقد وتفك بيها الكرب

احنا دلوقتي سنة 1988. وضحي في خامسة كلية طب قسم نساء وتوليد يعني فاضل لها سنتين وتبقي دكتورة وكانت ضحي بنت بسيطة جدا شاطرة متفوقة ديما من الاوائل بنت كدة تتمناها اي عيلة. ضحي بنت موظف في الجيش شغال في مكتب من المكاتب الادارية كان معيشها عيشة زي الفل مش مخليها محتاجة حاجة. وكان مدلع ضحي ما هي بنته الوحيدة والام ميته كان الاب اللي اسمه صابر عايش هو وضحي في شقة كبيرة خمس اوض وصاله. والدنيا كانت بينهم زبادي خلاط. لغاية ما الحب دق ابواب قلب ضحي. مع انها قافلة الباب كويس لكن هو الحب بيستاذن علشان يدخل القلب ودة حصل لما شافت رؤوف الوسيم الرياضي واقف قصاد طالب مفتري اسمه خيري كان ضرب زميلة من يوم فات اللي اسمها رشا ورؤوف وقتها كل خيري حتة علقة من وقتها حست كدة انه راجل. وما كنتش تعرف اسمه لكنه من النوع اللي هي بتحبة بطل كدة زي اللي بتقراء عنه في الرويات وبمجرد من امن الكلية جه ومسك الاثنين. راحت ضحي المكتبة لصاحبتها الوحيدة وقتها واسمها الهام وكانت الهام بتقراء في كتاب يخص الطب ومندمجة علي الاخر ومركزة وما خرجتهاش من الحالة دي الا صوت ضحي اللي بتقول

انتي قاعدة هنا وشجيع السيما برة مكسر الكلية فوق دماغ الواد الرخم خيري

نزلت الهام نظارة القراءة شوية لتحت وقالت وهي بتبص لها

وانا مالي.

ضحي

مالك ازاي بس هو مش انتي معانا في الكلية

الهام رجعت بصت في الكتاب تاني وقالت

واية المطلوب مني اقوم ألم اللي كسروا شجيع السيما

ضحي

وربنا انتي رخمة وانا غلطانة اني بكلمك

الهام

صلحي غلطك وبطلي تكلميني خليني اكمل قراية

ضحي ضربتها في كتفها وقالت

خلي القراية تنفعك انا قايمة ومش هحكي لك عنه

هنا قفلت الهام الكتاب وقالت باهتمام

عنه.

ضحي حست انها عكت فقالت

انا ما قولتش عنه. انا قولت عنها واقصد ب عنها دي الخناقة طبعا

الهام

دكتورة ضحي بتعرف تكدب طيب ازاي

وقلعت نظارة القراءة وقالت بلهجة فتاة قاتلها الفضول

خشي في قلب الحكاية وقولي تقصدي مني ب عنه دي

كانت ضحي عايزا تحكي ما هي ما رحتش ل الهام علشان تسكت او علشان تحكي لها عن الخناقة وفعلا حكت ضحي وقالت

انتي عارفه اني احب البطل في الرواية كدة يكون راجل يكسر و يدغدغ طالما علي حق والكل بيخاف منه اصله مش سهل. واد كدة رشدي اباظة في نفسه او احمد رمزي في شقاوته كدة يعني

الهام

هه انجزي عارفة انا دة كله وعارفة انك ميلولك تتجوزي بلطجي. انا مش عارفة انتي دكتورة ازاي. المهم فين الجديد

ضحي

الجديد بقي اني شوفت بطل رواياتي برة بياكل خيري حتة علقة

الهام

خيري دة اللي كان مصاحب رشا

ضحي

هو دة

الهام

واسمه اية بقي اللي عمل كدة

ضحي

ما عرفش لاني اول مرة اشوفه في الكلية

الهام

يعني مش طالب معانا

ضحي

مش طالب معانا ازاي ودخل لغاية المدرج من برة

الهام

طيب ازاي طالب معانا وانتي ما تعرفهوش

ضحي

هو انا يعني اعرف كل اللي معانا

وسكتت ضحي فقالت لها الهام

خلاص كدة خلصتي يلا بقي اتاكلي علي الله خليني اكمل قراية

وفتحت الهام الكتاب تاني مع صوت ضحي اللي كانت بتقول

طيب مش هتساعديني

الهام وهي بتبص للكتاب

اساعدك في اية

ضحي

تعرفي لي مين دة

الهام بصت لها وهي بتخبط علي الكتاب بايديها.

هو انا يا بنتي مباحث. دة انا طالبة علي باب الله اعرف لك ازاي مين دة وانا ما شفتهوش وانتي اللي شوفتي بتقولي انك اول مرة تشوفي في الكلية

ضحي

ودة سؤال برضو. انتي زي الشطورة هتروحي ل رشا وتعرفي مين دة بطريقتك

الهام

طيب ما تروحي انتي هي رشا غريبة عليكي

ضحي

الهام انتي اقرب ل رشا مني وتعرفيها قبل انا ما اعرفها. واللي انتي هتعملي دة هيكون قصاد منه 1/2 فرخة مشوية وانا عرفاكي بقي قصاد الفراخ

الهام بلعت ريقها واتخيلت طعم الفرخة في بوقها وقررت تروح ل رشا، ،،،،،،،،

وفعلا وقت ما كانت رشا واقفة مع كام واحدة من زمايلها تظهر الهام وتقف قدام منهم وتقول

رشا حبيبتي طمئنيني عليكي اية اللي حصل

رشا

ما تخافيش عليه انا بخير وعرفت اخد حقي من خيري والبركة في رؤوف ابن عمتي

الهام

رؤوف دة الواد الجامد اللي كسر دماغ خيري

رشا

هو

الهام

الله عليكي و بالراحة بقي عليه واحكي يطلع اية رؤوف دة، ،،،،،،،،

وبعد الكلية تقعد الهام في مطعم وضحي قدام منها بتقول ب لهفة

انطقي بقي عرفتي اية نشفتي ريقي

الهام

اخد النص فرخة في حضني الاول وبعد كدة اقول

ضحي

ما انا طلبت هنفضل قاعدين كدة ل غاية الاوردر ما يجهز. قولي اللي عندك مش قادرة استني

الهام

طيب اهدي مالك كدة

ضحي عدلت نفسها وقالت

مالي وعايزا تحكي احكي مش عايزا بلاش

الهام

طيب بس بس انتي هتعيطي. هاحكي لك. اللي عرفته. اسمه رؤوف. صعيدي بس اتولد في القاهرة وعايش هو واهلة هنا في القاهرة في نفس المنطقة اللي عايشة فيها رشا ويبقي ابن عمه رشا وهو خريج كلية تجارة.

وسكتت الهام لان الاكل كان بينزل علي التربيزة وقالت ضحي

ما تكملي سكتي لية

الهام وهي بتبص للفراخ

الكوكو لي احترامه وما ينفعش اتكلم والكوكو قدام مني

ومسكت ورك الفرخة وبدات تاكل،،،،،،،

وعدي اسبوع من وقت اللي حصل دة وكل شوية ضحي تبص ودور بعيونها علي رؤوف يمكن يجي تاني الكلية

ل رشا. والهام ملاحظة حالة صاحبتها فقالت لها

جري لك اية بقيتي عاملة زي اللي ندهت عليها النداهة

ضحي

ما عرفش اوصلها لك ازاي بس بجد نفسي اشوفه

الهام

نعم يا ختي

ضحي

اشوفه

الهام

انت اتهبلتي صح

ضحي

ما عرفش بس كل اللي اعرفه اني عايزا اشوفه تاني

الهام

ودي بقي نعملها ازاي

ضحي

نضايق رشا وتجيب اللي يضربنا

الهام ضحكت وقالت

انتي عبيطة صح

ضحي

لا. مجنونه

الهام

طيب يا ستي المجنونه انتي ناسية ان امن الكلية مستحيل يسمح بان رؤوف يدخل الكلية تاني

ضحي

ما هو اللي هيرخم علي رشا هيكون من برة الكلية

الهام

بلاش يا ضحي اللي ناوية تعملي دة.

ضحي

هيحصل اية يعني الشاب اللي هتفق معه هيجي له رؤوف يدي له قلمين مع شلوطين زي ما عمل ما خيري و بعدها هدخل انا و احوش ما بينهم. و اتعرف عليه

الهام

انا اول مرة اشوف واحدة تتعرف علي واحد بالطريقة المجنونه دي

ضحي

انا بتاعت الجديد وانتي عارفة بقي القصص اللي بقرها كتير خليت الخيال عندي مافيش زية. بس بطل روياتي يكون ليا

الهام

دة اللي هو رؤوف

ضحي بصت لها وسكتت سكوت معني هو دة ، ،،،،،،

وفعلا ضحي اتفقت مع الشاب اللي بيقف في الكشك اللي جنب الكلية علي انه كل يوم و رشا خارجة من الكلية يرخم عليها وفي المقابل هتدي له 100.ج. كان رقم كبير وقتها وافق الشاب اللي كان اسمه عربي وبدا ينفذ الخطة باتقان شديد لغاية وكانت كل يوم ضحي تراقب رشا وهي خارجة علشان لما رؤوف يجي تعرف وفعلا رشا في يوم جابت اخرها وبلغت رؤوف باللي بيحصل وجه رؤوف وبدا يلطش في الشاب وهنا قالت الهام ل ضحي

الله يخرب بيت فكرتك عربي هيموت في ايد رؤوف

ضحي

لازم نتحرك دلوقتي ونحوشهم

وقبل ما توصل ضحي ليهم شافت رؤوف بيشيل عربي ويرمي علي الرصيف نزل عربي علي سن الرصيف ودماغه بدات تجيب دم وكان قاطع النفس برقت ضحي وبصت ل الهام اللي ماكنتش مستوعبة اللي حصل ،،،،،،،،،،

ح(2)

انكسار امراة

من تأليفي

محمد منصور **منص**

وقبل ما نبدأ نوحد الله ونصلي علي خير خلق الله سيدنا محمد.

اللهم صل وسلم علي محمد صلاة تحل بيها العقد وتفك بيها الكرب

ضحي شافت عربي الشاب اللي واقف في السوبر ماركت فاقد الوعي والدم نازل من دماغة جريت بسرعة ناحيتة وحاولت توقف نزيف الدم وهي بتقول

اسعاف بسرعة

وفي الوقت دة شافت رؤوف وهو بيجري و خايف من اللي حصل و رشا جريت وراء منه. وضحي بتبص لهم ورجعت تاني تشوف نبض عربي وتصرخ في اللي واقفين يتفرجوا وقالت

اسعاف، ،،،،،،،

ومن قدام المستشفي تقف ضحي وجنب منها الهام قصاد كشك وكانت ضحي بتتكلم في التيلفون الارضي مع والدها صابر وبتقول

ايوة يا بابا انا هتاخر شوية النهاردة علشان رايحة مع الهام مشوار

صوت صابر

مشوار اية

ضحي

الهام هتشتري هدوم وانا هكون معاها

صابر

هتتاخري

ضحي

قبل الساعة 9. باذن الله هكون في البيت

صابر

طيب خلي بالك من نفسك

وقفلت ضحي والهام بصت لها وهي مرعوبه وبتقول

يا جبروتك يا شيخة قادرة تتكلمي وتكذبي ولا كانك قاتلة قتيل

ضحي

الهام انا اعصابي بايظة ومش مستحملة وبالله عليكي كفاية اللي انا في لان فعلا عربي دة لو مات انا يبقي مستقبلي ضاع

الهام

مش انتي صاحبة الفكرة المتخلفة دي نفعك في اية بقي رؤوف اهو اقتله وهرب

ضحي بعصبية

الهام ورحمة امك كفاية. وبعدين عربي لسة عايش ما ممتش كفاية بقي وتعالي ندخل المستشفي نشوف حالته وصلت ل اية

الهام

انا كان مالي بس ومالك ما انا كنت في حالي،،،،،،،

ومن جوة المستشفي تقف ضحي مع الهام قصاد الدكتور المعالج ل عربي وكان الدكتور بيقول

احمدوا ربنا ان الخبطة جت بعيد عن المراكز الحساسة في المخ.

ضحي

ومافيش اي احتمال ان يكون في نزيف داخلي مثلا

الدكتور

لغاية دلوقتي ما فيش اي اعراض لوجود نزيف داخلي لكن هو تحت الاختبار وهنشوف خلال 48 ساعة حالته هتوصل ل فين

الهام

ان شاء الله خير. طيب يا دكتور احنا هنمشي دلوقتي وهنبقي نفوت عليه بكرة

الدكتور

مش هينفع لاني طلبت البوليس وهو جاي في السكة

اتصدمو الاثنين وقالت الهام

بوليس لية بس

الدكتور

لازم محضر دة واحد جاي لي دماغه مفتوحة بسبب مشاجرة كان لازم ابلغ علشان ارفع عني المسئولية

ضحي

طيب واحنا نستني لية. هو احنا اللي عورنا

الدكتور

انتم اللي جبتو هنا وانتم اللي تعرفو مين اللي عمل في كدة

ضحي

لا ما نعرفش

الدكتور

ازاي وانتم اول ما دخلتو حكيتو لي الخناقة اللي اتصاب فيها الاصابة دي

الهام

يا دكتور ما فضلك قدر اننا بنتين ومش هينفع نقف قصاد ظابط ونحضر تحقيقات واحنا كل ذنبنا اننا لقينا واحد واقع علي الارض غرقان في دمه وجيبنا يتعالج. من فضلك احنا لو اتاخرنا علي اهالينا هتبقي فيها مشكلة

الدكتور

دي مسئولية كبيرة عليه

ضحي

اللي يسال حضرتك ممكن تقول له ان اللي جابو سابو ومشيوا وانت ما تعرفش مين هما.

الدكتور

وبيانات حضرتك اللي في كشف الاستقبال انتي ناسية ان موظف الاستقبال خد اسمك وعنوانك من بطاقة الشخصية قبل استلام الحاله

ضحي

بلاش الشرطة تعرف شئ عني طالما الحكاية ممكن تخلص من غير شوشرة

الدكتور فكر للحظات وقال

طيب علشان خاطر انكم بنتين انا هتحمل المسئولية وربنا يسترها

الهام فرحت وقالت

يعني نقدر نمشي

الدكتور

اة.

ومشيو الاثنين وكانو فاكرين انها خلصت كدة لكنهم ما يعرفوش انها لسة بتبدتي، ،،،،،

ومن جوة شقة صابر ووقت ما كان صابر قاعد بيتفرج علي التيلفزيون يتفتح باب الشقة وتدخل ضحي بص لها وبص في ساعته لقاها لسة 6. فقال باستغراب

الله غريبة يعني رجعتي بسرعة انتي ما روحتيش مع الهام تيجبوا هدوم

ضحي كانت ناسية الحوار دة فقالت

هدوم اية

صابر

هدوم اية. هو مش انتي اتصلتي بيا قبل العصر وقولتي انك رايح،،،،،،

افتكرت ضحي وقالت

اة اة. كنا رايحين لكننا ما روحناش

شك صابر في امر بنته لكن ضحي قالت وهي رايحة ناحية اوضتها

هغير واسخن الاكل تلاقيك جعان

وسابته ودخلت الاوضة وهو قال بصوت ما يسمعهوش غيرة

لا قلقان. مخبيئة اية يا ضحي.،،،،،،

وبعد نص الليل بدقائق معدودة يصحي صابر علي صوت رن جرس الباب اتصدم وبص في ساعة المنبة وقال

ودة مين اللي جاي في الساعة المتاخرة دي

وضحي صحيت ووقفت وراء باب اوضتها علشان تعرف مين اللي جاي في ساعة زي دي وفتح صابر الباب ولقي مخبر واثنين عساكر استغرب وقال صابر

في اية

المخبر

فين ضحي صابر النهر

صابر

انا صابر النهر وضحي تبقي بنتي خير هي عملت اية دي دكتورة وفي حالها وملهاش دعوي باي نشاط سياسي وانا ابوها موظف في الجيش في مكتب الاحصاء و ،،،،،،

المخبر قاطعة وقال

استاذ صابر انا عايزك تهدئة خالص واحنا مش من امن الدولة احنا دخلية وبنت حضرتك مطلوبة في القسم علشان في واحد اسمة عربي تم الاعتداء عليه بسببها

صابر وهو مصدوم

بتقول اية ،،،،،،،

ومن جوة القسم تقف ضحي قصاد مكتب الظابط ومعها صابر اللي ما كنش عايز يبص في عينيها وهي عماله تعيط وتمسح دموعها في منديل وتقول ل نفسها

اية اللي انا عملته في نفسي دة. انا غبية ومتخلفة ذنبه اية بابا يتحط في موقف زفت زي دة. اما احاول اكلمة تاني يمكن يرد عليه مع انه مش عايز يكلمني من ساعة ما خرجنا مع المخبر والعساكر

وراحت وقفت قدام منه وقالت

بابا.

من غير ما يبص لها قال بحدة

ارجعي اقفي مكانك وبلاش تفرجي الناس علينا وانا اللي استاهل اني دلعتك

ضحي

والله انا اسفة بس انت فاهم غلط

ما ردتش عليها وهنا العسكري وقف قدام منهم وقال ل ضحي

تقدري تدخلي حضرة الظابط عايزك

صابر بص للعسكري وقال

انا ابوها ممكن ادخل معها

العسكري بتهكم

تدخل معاها فين هي داخلة شئون الطلبة خليك قاعد هنا لغاية ما الظابط يطلبك

صابر بحدة

انت بتتريق علي كلامي لية كدة انا موظف في الجيش وليا وضعي واسمي ودي البطاقة بتاعتي وبنتي طالبة في كلية طب مش واحدة بصمجية

وحط البطاقة في وش العسكري اللي كش شوية وقال

انا ما قصدش اضايقك وخليني استاذن حضرة الظابط ولو سمح بدخولك انا مش هقدر اقول لا،،،،،،

ومن جوة مكتب الظابط وبعد موافقته علي دخول ضحي وابوها صابر كان الظابط بيقول

انسة ضحي ممكن اعرف انتي لية طلبتي من عربي انه يرخم علي زميلتك رشا وبالبلدي كدة يتحرش بيها لفظية دة علي حسب كلام عربي لينا في محضر رسمي قدمه ضدك وقال كمان ان الخناقة بينه وبين الشاب اللي جابته رشا كان ل السبب دة

بص لها صابر وضحي ساكتة مش عارفة تقول اية. ف الظابط قال

السكوت دة مش في مصلحتك حاولي تساعدي نفسك و اتكلمي

ضحي

اصل،،،،،

وسكتت تاني وصابر لسة باصص لها مستنيها تتكلم الظابط بحدة

انا ما عنديش وقت اضيعة ومش قضيتك بس اللي تحت ايدي. ف من فضلك جاوبي علي السؤال

ضحي بارتباك

اصلها خدت مني فلوس وما رجعتهاش وانا كنت عايزا عربي يرخم عليها لغاية ما ترجع لي اللي خدته مني

صابر لسة باصص لها وضحي كان باين عليها انها بتكذب فقال صابر للظابط

حضرة الظابط بنتي طالبة في خمسة طب واي شوشرا حوالين منها هيقصر علي مستقبلها ف من فضلك شوف نقدر نحل المشكلة دي ازاي من غير وش

الظابط

ملهاش غير حل واحد المحضر يتقفل ب ان اللي اسمه عربي يتراضا ونجيب اللي عمل في كدة. وهو وصف لنا الشاب دة و قدرنا رسامنا في القسم هنا يرسم صورة لي وطلع عيل سوابق اسمه رؤوف عزيز. مسجل سرقة بالاكراة وبلطجة واللي يعرف له طريق بياجروا بالفلوس علشان يضرب ويعلم علي اللي مضايقهم و واضح ان اللي اسمها رشا دي تعرفه ودفعت له علشان يروح يضرب عربي

ضحي اتصدمت وقلبها رفض يصدق اللي سمعه. و الظابط مكمل وبيقول

بس هنجيية و وقتها هنحتاج شهادة الانسة ضحي لانها كانت موجودة وقت الخناقة. وبالنسبة ل عربي. دة عيل غلبان ابقو راضون ب قرشين وهو يتنازل عن محضرة ضد الانسة ضحي،،،

وفعلا عربي يتنازل عن المحضر و بعدها ب تلت يوم ومن جوة شقة صابر ضحي حضرت الاكل و حضته علي السفرة

و راحت خبطت علي باب اوضة صابر وقالت له

بابا الاكل جاهز

صوت صابر من وراء الباب وكان بيقول ب صعوبه

كلي وانا كمان شوية ها كل

ضحي

بابا بقالك تلت ايام بتاكل لوحدك. بجد انا اسفة ومش قادرة اعيش وانت زعلان مني

صابر

روحي كلي يا ضحي

ضحي

مش هاكل من غيرك

وخبطت تاني علي الباب وصابر ما ردتش وهنا تسمع ضحي صوت خبط علي باب الشقة بصت ل باب الشقة وراحت تفتح علشان تلاقي رشا واقفة قدام منها. استغربت وقالت