رواية بنات الحاره بقلم الكاتبه نسرين بلعجيل حصريه وجديده على مدونة النجم المتوهج للروايات والمعلومات

رواية بنات الحاره بقلم الكاتبه نسرين بلعجيل حصريه وجديده على مدونة النجم المتوهج للروايات والمعلومات

في عمارة بسيطة جدًا، الصريخ كان جايب الحارة كلها.

بطة: هاتي الذهب يا بت!

نوارة: حرام عليكي، ده دهبي! يرضي مين إنك تاخديه علشان تساعدي بنتك؟

أحمد: مش أنا اللي جايبه، هاتي بقى!

نوارة: جايبهولي في شبكتي، هو ده اللي عندي، واللي فضل منه انت كل مرة تاخد حاجة!

بطة: هو إنتي هتعصي كلامي يا بنت المركوب انتي؟ هاتي بقى!

نوارة: يا شيخة، حرام عليكي! منك لله، تاخدي حاجتي علشان تديها لبنتك الحرباية؟ ربنا على الظالم والمفتري!

بطة راحت عندها، وأخدت علبة الذهب.

بطة: ربي الكلبة دي، لسانها طول عليا! والذهب ده حقي وحق ابني، فاهمة ولا لا؟

أحمد: ياما، هي حامل، مش خلاص أخدتي اللي إنتي عايزاه؟

بطة: قولتلك ربيها يا ولا...

راح أحمد مسكها من شعرها، ونزل فيها ضرب من غير شفقة ولا رحمة، وصوت بكاها مالي الحارة.

الناس اتجمعت على الباب وفضلت تخبط، راحت بطة فتحت الباب بكل برود.

دخلوا الناس، وراحت زينب تجري على نوارة، كانت سايحة في دمها.

بطة: خير يا جماعة، في إيه؟

حامد أبو زينب: إنتي اللي في إيه؟ صوتكم مسمع الحارة! عيب عليكي يا ولية، البنت دي يتيمة وإنتي مبهدلاها!

بطة: مراته ابني مش متربية، وابني بيربيها!

زينب: ابعد يا حيوان! البنت هتموت!

راحت بطة لزينب، و بعدتها بإيديها.

بطة: يلا برا! هي وكالة من غير بواب؟ برا يا أختي!

زينب: إنتي إيه؟ مش بني آدمه؟ حرام عليكي يا شيخة، هتروحي من ربنا فين؟

بطة: لمّ بنتك يا حامد، ولا أنت عارف إن دور الجمعية عليك، ومش هتشوف منه جنيه!

حامد راح عند بنته.

حامد: يلا يا أختي، ملناش دعوة.

زينب: هو إيه اللي ملناش دعوة؟ البنت سايحة في دمها!

أحمد: يلا برا، هي شوية وتفوق.

تدخلت أم رحاب.

أم رحاب: يا بطة، البنت قاطعة النفس يا أختي!

بطة: يوووووه بقى، هي قصة ولا إيه؟ البت عاملة علينا فيلم! هي أول مرة ولا إيه؟

الكل واقف يبص، واللي ابتدا يطلع.

حامد راح يجر زينب، خايف لا بطة تنفذ تهديدها، وهو مستني الجمعية دي علشان يجيب جهاز بنته.

زينب: حرام عليكم، حد يدخل! البنت هتموت! ذنبها في رقبتكم كلكم!

في اللحظة دي، دخل جمال الشقة لما شاف الناس واقفة.

جمال: في إيه؟

زينب: الحق يا باشمهندس! نوارة بتموت!

ابتدت نوارة تفوق وتعيط من الوجع.

جريت عليها زينب.

زينب: إنتِ كويسة؟

نوارة بأنين وصوت مش مسموع.

نوارة: أنا بموت... حسبي الله ونعم الوكيل.

زينب: لا يا حبيبتي، مش هتموتي إن شاء الله! عدوينك اللي يموتوا!

الحقني يا باشمهندس!

أحمد ماكنش قادر يشوف نوارة، نزل قعد على القهوة.

جمال راح شال نوارة.

بطة: على فين العزم إن شاء الله؟

جمال: على المستشفى، أوعي من سكتي!

زينب: أنا جاية معاك!

حامد مسكها من إيدها.

حامد: أقسم بالله لو اتحركتي لأقتلك!

جمال طلع من الشقة، والكل وراه، وراحت وراه زينب.

على باب مدخل العمارة، جمال بصوت عالي.

جمال: اشهدوا يا أهل الحارة!

نوارة، البت اليتيمة اللي جوزتوها لأحمد، اهي غرقانة في دمها بعد ما حماتها وجوزها ضربوها!

والراجل نزل قعد في القهوة!

إيه يا رجالة، نوديها المستشفى ولا نسيبها تموت؟

كل الرجالة استنكروا الوضع.

شيخ الجامع اتصدم لما شاف نوارة وهي قاطعة النفس.

شيخ الجامع: بسرعة على المستشفى! تعالي يا زينب معانا!

حامد: لا يا شيخ، بنتي مالهاش دعوة!

شيخ الجامع: دي صاحبتها! يا راجل، خايف من بطة ومش خايف من ربنا؟

جابوا عربية وطلعوا على المستشفى.

في نفس الوقت، كانت صفاء واقفة مستنية ريان.

ريان: معلش، اتأخرت عليكي.

صفاء: أنا كنت همشي!

ريان: الطريق كانت زحمة والله.

صفاء: انت كويس؟

ريان: هبقى كويس لما أعمل اللي في دماغي وأقف على رجلي.

صفاء: والله بدعيلك كل يوم.

ريان: صفاء، أنا عارف إنك مستحملة حاجات كتير علشاني، وإنك واقفة جنبي، بس أول ما أقف على رجلي هعوضك عن كل حاجة.

صفاء: كل اللي عايزاه أشوفك كويس وناجح، وإنك توفي بوعدك ليا.

ريان: والله يا حبيبتي، هتجوزك متخافيش، وعد مني، أنا بس الظروف جت عليا.

صفاء: طيب، خد المبلغ ده، ماشي بيه حالك لحد ما ربنا يكرمك.

ريان: انتِ كده بتهينيني، وأنا عارف ظروفك، مش عايز أجي عليكِ، أنا اللي لازم أديكي، مش العكس.

صفاء: أنا وانت واحد. أنا لازم أمشي، اتأخرت.

ريان: تعالي في حضني شوية، يا هدية ربنا ليا.

(أخذها في حضنه، وصفاء كانت طايرة من الفرح.)

فوق السطوح

(رحاب كانت قاعدة على نار ومش طايقة نفسها.)

(نورهان جات عندها.)

نورهان: في إيه؟

رحاب: شُفت زينب في العربية مع جمال!

نورهان: انتِ اتجننتي؟؟

رحاب: زي ما بقولك كده، أنا ما فهمتش، الحارة كانت واقفة على رجل!

نورهان: استني، هتصل بيها.

(نورهان تتصل بزينب، لكنها ما بتردش.)

نورهان: مش بترد؟

رحاب: رني تاني.

(صفية سمعت الموبايل بيرن.)

صفية: ألووو؟

نورهان: ألو، خالتي، هي زينب فين؟

(صفية تمصمص شفايفها بضيق.)

صفية: لا يا أختي، غارت في داهية.

نورهان: يعني إيه غارت في داهية؟

صفية: أخدتها شهامة يا أختي وورطتنا مع بطة صاحبة الجمعية.

اكشمني، ابنها—صلَّى على النبي—ضرب مراته، والباشمهندس جمال أخد البِت وهي غرقانة دم!

مو اللي شوفته، البِت مش حتطول… أهو راحوا بيها المستشفى.

نورهان: يا لهوي، يا لهوي!

رحاب: في إيه؟؟

نورهان: الحيوان ضرب نوَّارة! وزينب وجمال راحوا بيها المستشفى.

رحاب: شفتي أهل الحارة عملوا إيه في البت اليتيمة؟! الكل عارف إن الزِّفتة بطة وحشة، وابنها معندوش شخصية، وجوزوها له!

نورهان: ما هي كانت بتحبه…

رحاب: يقطع الحب وسنينه!

نورهان: طول عمرك قلبك جامد.

رحاب: أحسن ما أتجوز حد يبهدلني ويضربني، ولا أحب واحد أصرف عليه!

(قالت جملتها بعد ما شافت صفاء جاية عليهم.)

صفاء: تقصدي بكلامك إيه؟؟

رحاب: أقصد اللي فهمتيه! بقالك سنة ونص بتحبيه، قوليلي عملك إيه؟ لا اتجوزك، ولا خطبك، ولا حد أصلًا يعرف إنكم مع بعض، ولولا إنك اتفضحتي قدامنا، حتى إحنا صاحباتك خبيتي علينا!

لا، والحلوة بتصرفي عليه؟! قوليلي مستنية منه إيه؟ أو أصلًا تعرفي عنه إيه؟

صفاء: هو اللي طلب مني علاقتنا تكون في السر، وعنده ظروف

قريبا

تابعوووووووني

رواية بنات نادر والقدر من هنا

رواية كيان الزين الجزء الثاني من هنا

رواية بنات الحاره من هنا

رواية دهب لاترحلي من هنا

رواية فراشة في سك العقرب من هنا

رواية حياة فارس الصعيد من هنا

رواية شيطان امرأه كامله من هنا

رواية في عيوني حكايتها من هنا