رواية وسيطرت المشاعر الفصل الحادي والعشرون والثاني والعشرون بقلم الكاتبه زهرة الربيع حصريه وجديده
 |
رواية وسيطرت المشاعر الفصل الحادي والعشرون والثاني والعشرون بقلم الكاتبه زهرة الربيع حصريه وجديده
اختار... يا اما تفسخ خطوبتك منها يا اما تطلقني... من غير كلام كتير.... لاني مصدعه
سليم بص لها بدهشه وقال ....مصدعه
مشاعر قالت بلا مبالاه .....جدا
سليم ضحك بخفه وقعد على السرير وقال.... بس ده مش طلب ....انت قاصده تعجزيني ... انتي عارفه انا عملت ايه لحد النهارده وخسرت قد ايه علشان اوصل لهنا..و خلاص قربت ارجع حقي منهم فاضل خطوه...خطوه واحده يا مشاعر...و انت بكل بساطه بتخيريني بين كل ده وبينك... مش حاسه انك بقيتي قاسيه عليا قوي
مشاعر قالت باصرار ......ده اللي عندي .....اعتبرني قاسيه..و اعتبرني ما عنديش احساس حتى...... بس لازم تفهم حاجه واحده بس..... انا كرامتي عندي بالدنيا ومفيش حاجه هتصون كرامتي وترجعك في نظري زي الاول وترجعني احس اني فعلا اغلى حاجه في حياتك غير انك تعمل كده ....واقل من كده مش هقبل ابدا
سليم اتنهد بياس وقال...... انا بحبك ....ومعنديش اغلى منك في حياتي ....بس نفس اللي بتدافعي عنه انا كمان بدافع عنه ...انا كمان بحاول ارجع كرامتي وكرامة اهلي من اللي نصبو علينا وصغرونا واكلو حقنا ....ومش هحس ان ليا اي قيمه لا قدامك ولا قدام نفسي لو خسرت معركتي قصاده واخد مني حقي دراع و بالبساطه دي ....ده مبدا انا رفضته من الاول وحربي هكملها لاخر نفس
مشاعر قالت بغضب.... يبقى ...
بس قاطعها وقال بسرعه....... وكمان مش هتخلى عنك ....انسي اني اطلقك...... انا هكمل في الحرب دي للنهايه ...ولا هخسرك ولا هخسر شركتي اللي بنتها على كتافي ولو حازم قدر ياخد مني واحد فيكم هيبقى اخر يوم في عمري ...لازم تعرفي ان المساله مش مسالة عند...المساله مسألة مبدأ ولو انهارده خسرنا بكره هيتداس علينا اكتر واكتر....ومش هقدر احمي اي حد فيكم وقتها وانتي اول واحده هتروح فيها ....اللي جاي مش سهل زي ما انتي متوقعه ....ولو انت مش عايزه تثقي فيا وتكملي معايا معركتي انا هكملها لوحدي يا مشاعر ..بس ابقي افتكري انك رفضتي تقفي جنبي وقت ما احتاجتلك..و شكرا على ثقتك الغاليه
قال كده ومشي ومشاعر قعدت على السرير بتعب ....كلامه فعلا اقنعها بس مش قادره تتخطى اللي حصل اتنهدت وقالت ......يا رب ساعدني و اقف جنبي وخليني اختار صح يا رب انا خلاص ما بقتش عارفه اصدق ايه واكدب ايه ما تسيبنيش لوحدي يا رب
عند سليم طلع بعربيته بتعب وعلى الطريق جاله اتصال غاده فتح السبيكر ورد وهو سايق وقال.... موناليزا قلبي .....عامله ايه يا بت
غاده قالت بضيق ....لا والله ...بقى لي ساعتين بتصل عليك لو مش واخد بالك
سليم ضحك وقال.... واخد بالي بس كنت مقموص...بس برضو ما هونتيش عليا في الاخر ورديت
غاده قالت بدهشه .....نعم مقموص .....هو مين اللي يزعل يا بني ادم انت...ولا نسيت اللي حصل اخر مره لما جيت عندكم البيت ...هو انا كل ما اجي عندك اتهزأ وامشي و بعد كده انت تعمل زعلان واكلمك صح
سليم قال...... اكيد مش صح .....كل الفكره ان كل ما تيجي عندنا تزعليني بسبب مشاعر.... وانا ذنبي ايه ليه بتاخديني بذنبها كل مره انا قلت لك قبل كده اني قبل ما نتجوز هطلقها ....عايزه ايه اثبات لحبي ليكي اكتر من كده
غاده قالت بسخريه....مش لما تلاقيها علشان تطلقها.... سمعت انها هربت تاني
سليم ابتسم بارتياح ...لان طالما هيه قالت كده يبقى اكيد ابوها صدق انا مشاعر هربت قال.... واحده مجنونه وكل يوم والتاني تسيب البيت هعمل لها ايه.... بس الحق عليا قلبي الطيب هو اللي بيورطني.... لو كنت اخدت منها الولد وطردتها من اول يوم ما كانش حصل كل ده..... على العموم هتروح مني فين هلاقيها يعني هلاقيها
غاده قالت بابتسامه...... يعني انت بجد حابب اننا نتجوز ياسليم .... ارجوك ما تضحكش عليا لو انت مش حابب كده يا ريت تقول لي.... انا مش بحب اتامل على الفاضي وانت عارف انت ايه بالنسبالي بلاش توجعني لو سمحت
سليم حس بحزن شديد عليها ...بس الطريق اللي مكمل فيه مستحيل يكمل من غير اذاها حاول يطلع صوته طبيعي وقال..احم .... انتي لسه عندك شك فيا .....على العموم بكره نتجوز وانا هعرف ازاي امحي كل شكوكك
غاده ابتسمت بسعاده وقالت..... انا بحبك قوي يا سليم
سليم اتنهد بجزن على براءتها وطيبتها وقال.....و انا كمان يا قلب سليم ....معلش انا مضطر اقفل دلوقتي لاني سايق...و هرجع اكلمك
قال كده وقفل بسرعه ووقف العربيه وفك الكرفته وقال بخنقه ...تمام .....تمام بكره كل ده يعدي....و اكيد هتنسى محدش بيقف عند حد.....انت ماشي صح
واخذ نفس عميق ورجع ساق تاني بتعب شديد
في البيت ادهم رجع مبسوط جدا وجري على والدته حضنها بقوه وقال...... يا لهوي على الجمال.... انا بعشقك على فكره
امه قالت بدهشه وابتسامه.... والله ما في اجمل منك ...ايه سر السعاده دي كلها ....عرفتو حاجه عن مشاعر
ادهم خد باله لطريقته واصطنع الحزن وقال بسرعه.... لا لسه ما اعرفش حاجه .....ولا حتى اعرف حاجه عن سليم
وبص يمينه وكان خالد واقف بيبص له بشك فقال بسرعه علشان يتوهوا....انا كنت مبسوط لان المشروع الجديد بتاعي تم على خير....انما سليم معرفش عنو حاجه بتصل عليه كتير مش بيرد عليا
في الوقت ده وصل سليم وقال بغضب..... نعم عايز ايه من زفت ....عندك خبر عن مراتي وابني اللي ضيعتهم
بقلم...زهرة الربيع
ادهم هز راسه بالرفض وسليم قال بغضب ......يبقى ما تجيبش اسمي على لسانك .....والافضل لما ادخل البيت مشوفكش في وشي...انا مش عارف ايه البجاحه والحقاره اللي انت فيها دي..ايه بتحسش يلا ...بقولك مش طايق اشوفك ده لو حمار عمل عملتك كان اتكسف على دمه
ادهم بص له بدهشه من كمية الاهانات دي قدام ابوه وامه وقال بضيق ....سليم خلاص بقى..... قلت لك انه ما كانش قصدي
بس سليم قال بغضب اشد...... هو ايه اللي ما كانش قصدك..... هو انت دوست على رجلي ... بسببك هربت تاني واخذت ابني معاها عايزني اسقف لك..... لما انت لسه عيل ومش قد انك تدير بيت... وغبي وما بتعرفش تعمل اي حاجه في دنيتك بتتصرف من نفسك ليه
ادهم غمض عينيه بخنقه شديده وبص لخالد لقاه مشي راح على المطبخ فاخد سليم من ايده بعيد عن اهله ومشي بيه على جنب
نادر قال باستغراب....هو فيه ايه ....حاسس فيه حاجه مش طبيعيه
هدى اتنهدت وقالت... لو فهمت حاجه ابقى قولي
عند ادهم اول ما بقوا لوحدهم مسك سليم من هدومه و قال بغضب ..فيه ايه... استحليت للشتيمه يلا .....انت اصلا عايز تشتم وواخدها حجه مش كده
سليم ضحك وحاول يوطي صوته علشان ما يسمعهوش وقال .....في ايه ياض... انت زعلت ولا ايه بحبكها بحبكها عشان يصدق
ادهم قال بغضب ..عن امه ما صدق .....ايه السفاله دي لم نفسك شويه ....ده انا ابويا ما شتمنيش كده
سليم ضحك على عصبيته وقال بسرعه ....خلاص خلاص اهدى اهدى اعوذ بالله من الشيطان الرجيم ..استعيذ ...ياض بقولك استعيذ هتكفر
ادهم سابو و اتنهد وقال ...اعوذ بالله من الشيطان الرجيم
سليم قال ..ايوه كده...يا حلاوته طلع بيتعصب يا ناس
ادهم قال بضيق ...سليم خلاص بقى..... بجد خف شويه انا ساكتلك من وقتها علشان اساعدك ..بس اكتر من كده هبهدلك
سليم قال ....تمام ...خلاص ريح نفسك انا كده كده هظبط الموضوع ده ...وهخلص منه
ادهم قال باستغراب...مش فاهم...قصدك خالد
سليم قال.....مين غيره
وراح لابوه وقال بجديه ....ممكن كلمه على جنب يا نادر بيه
ابوه اتفاجئ وشاور على نفسه وقال ....انا
سليم بص يمين وشمال وقال..... في نادر غيرك هنا
نادر وقف بسرعه وقال......لا..قصدي اه طبعا.... تعال بينا على المكتب
و راحوا على المكتب سوا
و هدى استغربت اكتر وبصت لادهم وقالت ..هو ايه الحكايه انهارده
ادهم هز كتفه باستغراب وقال...علمي علمك
اما سليم اول ما دخل المكتب بص لابوه وقال بجديه...انا عمري ما اتوقعت اني ممكن اطلب منك طلب في يوم ....بس انهارده انا محتاج لخدمه منك
نادر قال بحزن ...انت تطلب عنيا يا ابني
سليم قال ...خالد.....عايزه ياخد اجازه اسبوع او اتنين ضروري
نادر لسه هيتكلم سليم قاطعو وقال..قبل ما تفتكر اني بقطع عيشه علشان بكرهه والكلام ده ....مرتبه هيفضل ماشي زي ما هو...انا بس عايزه يبعد عن البيت لهدف في دماغي ومش عايزه يشك اني انا اللي عايز ابعده ..ممكن تعمل كده علشاني
نادر ابتسم وقال ...واعمل اي حاجه مهما كانت علشانك ...الصبح هصرفله مرتبه واديلو اجازه
سليم ابتسم وقال...تمام ...شكرا
ولسه هيخرج نادر قال...لو حابب اساعدك في اي حاجه تاني ..انا موجود ديما
سليم اتنهد وهز راسو بالموافقه ومشي بسرعه
نادر ابتسم وهو حاسس ان ممكن يبقى فيه امل ويقبل يسامحو مع الوقت
في صباح يوم جديد رحمه طلعت من بيتها وساقت عربيتها بقلق وهيه بتتصل على ميرا اللي مكانتش بترد ابدا
و بعد محاولات عديده ردت وقالت بتعب ونوم...ايوه مين
رحمه قالت بسرعه اخيرا رديتي ....وقعتي قلبي
ميرا كانت مش حاسه بالدنيا من شدة السكر وقالت ...مين.... انت او انتي مين
رحمه قالت بدهشه..انا مين ازاي.....انا رحمه يا ميرا.... فيه ايه
ميرا قالت بتوهان ..رحمه مين
هنا رحمه غمضت عنيها بزهق وقالت.....ميرا انتي سكرانه صح..تاني يا ميرا ....حرام عليكي يا بنتي حرام
ميرا فاقت اخيرا لكلامها و لسه هترد واحد جنبها قال بصوت عالي ..اششش ...ميرو عايزين ننام افصلي
اول ما قال كده ميرا غطت التليفون بسرعه وقالت...اششش... الله يخربيتك اتخمد
بس رحمه سمعته واتسعت عنيها بصدمه وقالت...ثواني بس...انتي كنتي سهرانه مع شلتك زي العاده صح
ميرا بلعت ريقها وقالت.....انا هفهمك ..انا
بس قاطعتها رحمه وقالت بغضب شديد ...تفهميني ايه ....يعني انا طول الليل منمتش وقلقانه عليكي وهموت من قهري وانتي بتسهري وتسكري... معقول
ميرا قالت بتوتر ..يارحمه متفميش غلط ...انا كنت بس بفك عن نفسي لاني كنت مخنوقه وخايفه تحصلي حاجه في البيت لوحدي
رحمه قالت بغضب..فقولتي تحصلك وانتي سكرانه مش كده...الحق مش عليكي اصلا.... الحق على الهبله اللي سهرت طول الليل قصادك
ميرا اتوترت من طريقتها وقالت بدموع وتمثيل...عيزاني اعمل ايه يعني...اقعد لوحدي استناه يجي يخلص عليا وانا لوحدي ....حرام عليك يارحمه انا فيا اللي مكفيني...انا مبقتش طايقه الشقه
رحمه اتنهدت بحزن و قالت ..طيب طيب خلاص اهدي..انا مش هسيبك لوحدك تاني متعيطيش...واصلا هحللك الموضوع ده....الشاب اللي اسمه ادهم عرفاه ..قالي انو يعرف ناس وممكن يساعدنا و
ميرا قاطعتها بسرعه وقالت بخوف....اوعي...انا مش عايزه مساعده من حد ..لو سمحت يا رحمه متنسيش انا عمي من الفيوم ولو عرف باللي حصل مش هيسكت و هيجبرني اروح اعيش هناك عندهم ...وانا بالعافيه قدرت اخليهم يسيبوني هنا بعد طلاقي
رحمه اتنهدت بيأس وقالت ...طيب طيب يا ميرا اهدي ...خلاص اللي تشوفيه
و قفلت معاها بضيق ولسه هتطلع على الشغل شافت ساعة ادهم...بصتلها باستغراب وقالت...ايه ده بتاعة مين دي
بس افتكرتها فورا لانها في المطعم كانت في ايده ابتسمت بخفه وقالت...وبعدين بقى
عند سليم كانو كلهم بيفطرو بهدوء وخالد واقف جنب السفره علشان لو احتاجو حاجه
هدى بصت لسليم و قالت....سليم هو انت عملت ايه في موضوع مشاعر ..بلغت الشرطه زي المره اللي فاتت
سليم قال بضيق..وهما الشرطه قدرو يعملو ايه يعني المره اللي فاتت ..اهو وجع دماغ وخلاص انا هلاقيها بطريقتي
وبص لادهم وقال بخنقه مصطنعه...الله يجازي اللي كان السبب
ادهم اتنهد وسكت وسليم بصلو تاني وقال ...بجد مش مكسوف من نفسك
ادهم بص باستغراب حواليه مش عارف يقصد مين
سليم بصلو بغضب وقال..ايوه انت مين غيرك..مش مكسوف من نفسك وقاعد بتفطر بعد اللي حصل بسببك
ادهم نفخ بزهق وقال....يعني بلاش افطر يعني ولا ايه
سليم قال بغضب...لا افطر وخد راحتك ...ابني ومراتي في الشارع وانت افطر عادي..... هاقولك ايه جبله مبتحسش
ادهم داس على شفتو بغيظ منو وقال بتحذير...لا ما انا متأكد انهم بخير علشان كده بفطر... مشاعر قويه وهتخلي بالها من نفسها وابنها..هيه اول مره تعملها يعني
سليم كان عايز يضحك لما فهم انو بيهددو انو هيتكلم لو مبطلش شتيمه اتنهد وقال....ادعي يكونو بخير ..لان لو حصلتلهم حاجه هنفخك سامع
ادهم مردش وسليم قال بغضب ..سامع
ادهم قال بعصبيه ..سامع سامع....لو حصلتلهم حاجه هتنفخني ..اصلا اتنفخت من دلوقت...حتى شوف من النفخه مش قادر اكل .. الحمد لله
وقام من على الاكل بغضب وهو بيتوعد له ولسه هيخرج جيه الحارس وقال...فيه واحده عايزه تقابلك يا ادهم بيه
ادهم ابتسم بسعاده شديده وقال بسرعه.....رحمه مش كده
الحارس قال بسرعه......ايوه هيه قالتلي اسمها كده
ادهم قال بسرعه ولهفه.....دخلها.... دخلها حالا..اوعى تمشي
وبص لواله ووالدته وقال..زي ما فهمتكم ..ها
هزو راسهم بالموافقه وابوه قال...متقلقش خالص
ادهم بص لسليم وقال......عدي يوم انهارده علشان خاطري
سليم مكانش فاهم حاجه وبيبصلو باستغراب ولسه هيسأل
دخلت رحمه وقالت...صباح الخير
ادهم اتقدم عليها وقال بسعاده..هو فيه خير اكتر من كده ....يا اهلا وسهلا اتفضلي
رحمه دخلت بتوتر وسلمت على والدته اللي حضنتها وقالت......اهلا ياحببتي... ده ايه الحلاوه دي ....لا فهمت المرادي
ادهم قال بسرعه......ماما... ايه ....سيبك من ماما خالص سلمي على بابا .....نادر بيه النمس
نادر سلم عليها و قال بمغازله..... نمس ايه بقى..... ده انت اللي طلعت اسد
بقلم...زهرة الربيع
رحمه سحبت ايدها بسرعه وقالت...هو عمو بيعاكس ولا انا فهمت غلط
ادهم لسه هيرد سليم ضحك وقال ..لا بيعاكس ايه... ده بس بيجدد شبابه
رحمه التفتتلو وقالت باستغراب......هو احنا اتقابلنا قبل كده..صوتك مش غريب عليا
سليم ابتسم وقرب سلم عليها وفضل ماسك ايدها وقال......معرفش والله بس يمكن لاني اخو ادهم ... تؤمه يعني صوتنا واحد ....وقلبنا واحد ....هو مين الجامد ؟
رحمه رجعت لورا وقالت بحده..اهو ده بقى بيعاكس مفيهاش كلام
ادهم قال بسرعه..لا والله ده هما طريقتهم كده
وبص لسليم وقال بغيظ .....بتعمل ايه الله يخربيتك
ورجع قال بسرعه...ده اصلا متجوز وعندو ولد
سليم ضحك وقال....معاه حق.....فيه حد متجوز بيعاكس برضو
رحمه قالت بحماس ......الله ولد صغير انا بموت في الاطفال فينو بقى ومراتو فينها
سليم ضحك وقال...رد بقى
ادهم بلع ريقه ولسه هيرد خالد قال بسخريه...طفشت
رحمه اتسعت عيونها بذهول وووو
ادهم جنى على نفسه وعلى علاقته اللي لسه مبداتش لما قال لرحمه تيجي بيته 😂... ياترى ايه اللي هيحصل اللي جاي تحفه تحفه
الثاني والعشرون
مراته طفشت بعيد عنك...هو ده حد يستحمله
سليم بص له بغضب شديد وقال بسرعه ....من المسؤوليه ...طفشت من المسؤليه موجوده عند اهلها اصل الولد لسه طفل صغير ودي اول ولاده لها فمتوتره شويه
خالد لسه هيتكلم نادر قال بسرعه .....خالد تعالى معايا بره عايزك في موضوع مهم
واخذه ومشي بيه
ادهم ابتسم بتوتر وقال.... انا اول ما مشاعر ترجع هجيبك تشوفيها وتسلمي عليها وتشوفي النونو كمان
رحمه قالت بابتسامه .....حلو اسم مشاعر
سليم قال بسرعه .....مشاعر كلها حلوه ....ما تفرقش عنك ابدا في الجمال والرقه
رحمه بصت له بحده وقبل ما تتكلم ادهم شد سليم بسرعه واخده على جنب وقال بغضب.....ما تلم نفسك يا سليم.... ليه بتعمل معايا كده
سليم ضحك وقال .....مين المجنونه دي
ادهم قال بغضب... ما لكش دعوه بيها ومتوترهاش اكتر من كده ..هيه متعرفش غتاتك دي ومصدقه انك بتعاكس بجد متستهبلش
سليم قال ...اممم مزه جديده يعني ... وقايل لابوك وامك وانا اخر من يعلم
ادهم قال بغيظ.... وانت بتردها لي يعني ....خلاص يا سيدي انا اسف ما لحقتش اقول لك .....عشان خاطري بقى اتلم شويه وكفايه اللي قالوا الحيوان اللي اسمه خالد.... ليه عايزين تفضحوني قدامها ده انا قايل لها اننا محترمين
سليم ضحك و قال .....يا عم خلاص سكتنا .....بس لو ميرا شافتها..يالهوي دي هتبقى مسرحيه
ادهم قال بضيق ....وميرا مالها ومالي ...احنا متطلقين هو انا هتجوز عليها
سليم ضحك وقال ...او هو هو ..ده انت فايتك كتير يا باشمهندس.. امبارح حصل موضوع عجب... هابقى احكي لك بعدين
ادهم قال.. طيب ...انا المهم عندي تخرس دلوقتي ..فاهم
قال كده ورجع لرحمه وهو بيحاول يهدى
بره عند نادر طلع فلوس كتيره اداها لخالد وقال ....شوف يا حبيبي انت اعصابك تعبت الفتره اللي فاتت خصوصا بعد موضوع مشاعر وكمان موضوع ايديك واكيد مش قادر تشتغل ... علشان كده انا اديت لك اجازه اسبوعين كده تهدي اعصابك وجسمك وبعد كده تبقى ترجع شغلك
خالد بصلو باستغراب وقال ......بس انا ما طلبتش اجازه يا نادر بيه
نادر ابتسم وقال...... انت ابني.... زيك زي سليم وادهم بالظبط ....ومش شرط تطلب مني انا شايف انك تعبت قوي الفتره اللي فاتت وما تقلقش الاسبوعين دول مش هيتخصموا منك ابدا والفلوس دي خليها معاك يمكن تحب تروح تشوف دكتور تاني علشان ايديك او كده
خالد استغرب جدا وشك في سليم انه عايز يمشيه زي العاده ...بس استبعد الفكره لان سليم مش بيتكلم مع ابوه في اي موضوع
عند ادهم رجع الصاله ولقى رحمه قاعده جنب هدى وبتضحك من قلبها
ادهم ابتسم وقال ....ما تضحكونا معاكم
رحمه قالت .... دي طنط دمها عسل قوي
ادهم ابتسم وقال ....وانا طالع لها على فكره
رحمه ضحكت و قالت .... انا بجد اتاخرت على الشغل عن اذنك يا طنط
هدى قالت بسرعه .....لا ازاي انتي لازم تتغدي معايا النهارده هو الشغل هيطير ابقي روحي بكره
رحمه ابتسمت وقالت .....لا والله بجد مش هقدر يا طنط اكيد هاجي تاني ونقعد ونتكلم
هدى حضنتها وقالت .....طيب انا هستناكي
رحمه ابتسمت بس اختفت ابتسامتها وهي بتبص لسليم بغضب ومشيت بسرعه وادهم راح وراها يوصلها لحد عربيتها
سليم ضحك جامد وقال... هو ابنك ايه حكايته مع المجانين
هدى ضحكت وضربته على دماغه وقالت... مش هي اللي مجنونه ...انت اللي متربتش
اما رحمه قبل ما تخرج لقت نادر على الباب سلمت عليه وهو قال بسرعه.... انت هتمشي ....ما لسه بدري يا بنتي
رحمه ابتسمت و قالت .....لا معلش يا عمو تاخرت قوي على شغلي
نادر ابتسم وقال...تمام بس اكيد الجيه دي مش محسوبه وهنستنى تنورينا تاني يوم خاص لينا
رحمه ابتسمت و قالت ...ان شاء الله يا عمو ..عن اذنك
قالت كده ومشيت و ادهم راح وراها اول ما خرجو قالت بابتسامه ....اهلك لطفين جدا والله ...ماعدا اخوك الصراحه مش مريح خالص ...ميبانش انو اخوك ابدا
ادهم ابتسم وقال ... افهم من كده اني مريح بالنسبالك
رحمه قاللت بكسوف..انا مقصدتش كده ....عموما انا جيت علشان ارجعلك ساعتك ..بعتذر اني جيت بدون ميعاد ..اصل لقيتها على الطريق وما كانش معايا رقمك بس العنوان سهل كنت حافظاه
ادهم قال بسرعه .....ميعاد ايه بس انتي تيجي في اي وقت وبعدين انا كنت عارف انك هتيجي ترجعيها عشان كده حطيتها
بقلم...زهرة الربيع
رحمه بصتلو بدهشه وقالت.....ده ايه الصراحه دي ..وبتعترف كمان انك انت اللي حطيتها مش نسيتها في العربيه
ادهم ابتسم وقال... هكذب عليك يعني....كل الحكايه اني كنت عايز اشوفك تاني
رحمه ابتسمت وهزت راسها بيأس وادتلو الساعه وقالت... الساعه غاليه جدا...معقوله تغامر بيها كده.... افرض ما كنتش رجعتها
ادهم قرب خطوه وقال....هيه غاليه ماديا ومعنويا بالنسبه لي اصلها هديه اخويا في عيد ميلادي...بس مفيهاش حاجه لو نغامر بنجمه علشان نطول القمر
رحمه ضحكت بخفه واتنهدت وقالت .. انت عايز ايه يا ادهم من الاخر
ادهم ابتسم وقال.... عايز اشوفك كل يوم باي طريقه وباي حجه وبالشكل اللي تحبيه المهم اشوفك دي الحاجه الوحيده اللي بقت تسعدني
رحمه حست بكسوف شديد وتوتر وقالت بسرعه ....احم انا اتاخرت لازم امشي
و لسه هتطلع في عربيتها ادهم قال بسرعه ....ايه رايك تيجي معايا الموقع ...حابب اوريكي شغلي هناك
رحمه سكتت شويه وقالت.... هافكر
ادهم ابتسم بحماس وقال....طب قولي والله
رحمه ابتسمت وقالت.... انا قلت هفكر ما وافقتش لسه...و كفايه كده انت معطلني
وطلعت في عربيتها وهيه مبسوطه جدا ولاول مره تبقى سعيده بالشكل ده من سنين
وقبل ما تدور خبط على القزاز وقال .....ها فكرتي...اعدي عليك بعد ما تخلصي شغل
رحمه ضحكت جامد على جنانه وقالت...... يا لهوي....حاضر..حاضر هنروح يا ادهم تمام كده
ادهم قال بسعاده...تمامين تلاته عشره
رحمه هزت راسها بيأس منو ومشيت بسرعه وهيه مبسوطه جدا
ادهم كمان كان طاير من السعاده ولسه هيدخل اصطدم بسليم اللي رفع حواجبه وقال وهو بيقلدوا..... ما فيش مشكله لما نضحي بنجمه علشان نطول القمر ...يا حنين..... انت عارف الساعه اللي بتشقط بيها دي تمنها كام لكن هقول لك ايه....انا الغلطان اللي بجيب لك هدايا اصلا
ادهم باسو من خده بسعاده وقال .....ما تزعلش يا سولو ده كلام .....يعني اكيد هديتك اغلى حاجه عندي
سليم ضحك بخفه وقال .....بس يا رب تفلح المره دي
ادهم ضحك وقال.... هتفلح ان شاء الله.... بس كنت بتقول لي جوه في حاجه حصلت تخص ميرا تقريبا...انا لقيت في موبايلي مكالمه من رقم غريب لما كان معاك
سليم كان هيقول له بس شافه فرحان جدا ومحبش ينكد عليه وقال ....اه انا رديت ...عارف فيه واحده صاحبتها صوتها يشبه ...
بص انسى انا شكلي من شغلي مع حازم بقيت شكاك ذياده
ادهم قال بسعاده شديده و عدم اهتمام.....عموما انسالي ميرا خااالص النهارده و ما حدش يجيب لي سيره اي حاجه تنكد عليا انا طاير يا سليم ..طااااير حاسس رجليا مش على الارض
سليم ابتسم لسعادته وقال....للدرجادي...طيب ياعم ربنا يوفق....عموما علشان بالك يبقى رايق بالمره شيل الخط ده خالص واشتري لك خط جديد
ادهم قال باستغراب.... ليه يعني
سليم قال .....اسمع مني وهترتاح.... يلا عن اذنك ...انا طرقت اللي اسمه خالد علشان ميعرفش اني ببات بره ويشك...ومن انهارده هبات عند شوشو محدش يستناني
قال كده ومشي وادهم دخل عند والدته وهو مبسوط جدا
عند مشاعر كانت قاعده بزهق عايزه تتصل على سليم بس بتكابر وقالت .....لا مش هتصل عليه... براحته يعمل اللي عايزه هو ما سالش فيا من امبارح
ورمت التليفون على السرير بزهق
في الوقت ده الباب خبط وهي فتحت وقالت... نعم
واتفاجأت باتنين من الحرس دخلوا سرير اطفال كان صغير وجميل جدا وواضح انو غالي قوي
وقالوا سليم بيه بعت ده وخرجوا فورا
مشاعر جريت على السرير بسعاده وبقت تبصلو بفرحه شديده
في الوقت ده دخل سليم وقال بابتسامه.... عجبك
مشاعر لمعت الدموع في عيونها وقالت ... مش عارفه .....بس لما اتولد كنت هموت واجيب له سرير زي الاطفال اللي في سنه كنت عايزه اعمل له اوضه وافرح بولادته بس ما كانش معايا اللي يكفي
سليم قرب منها قوي وقال....انا موجود....و معايا اللي يكفيكم وكل اللي بتحلموا بيه أوامر... انتي بس تتمني يا مشاعري
مشاعر نزلت دموعها وبعدت عنه وقالت ..... انا مش عايزه منك حاجه..... انما اللي تجيبه لابنك ما ليش دخل فيه
سليم ابتسم وقال بمشاكسه .....انا عارف انك مش عايزه حاجه .....كل اللي عايزاه انا وبس مش كده
مشاعر بصت له بدهشه وقالت ....لا طبعا مش كده
سليم ابتسم وقال... على العموم حتى لو ما كانش كده انا هخليه يبقى كده.... جبت هدومي وقاعد لك اسبوعين هنا مش هرجع البيت ابدا
مشاعر قالت بسخريه..... ومش خايف ...انت مش قولتلي ان خالد بينقل اخبارك....مش خايف يروح يقول لابو السنيوره
سليم قال بابتسامه .....لا ما انا خلاص خلصت منه
مشاعر اتسعت عينيها بذهول وقالت بخوف.... ايه ....خلصت منه يعني ايه ...عملت فيه ايه
سليم قال بسرعه..... اهدي هو بخير ....بس اديته اجازه مش اكتر ...وبعدين ما تتسرعيش عليه قوي كده قدامي قلت لك ان ده ملوش اي صله بيكي
مشاعر اتنهدت وقعدت على السرير وقالت بحزن.... سليم هو انا ممكن اطلب منك طلب
سليم قعد جنبها بسرعه وقال ....تطلبي عيوني
مشاعر بصيت له بدموع ورجاء وقالت ......كل اللي عايزاه منك اجابه واحده بس ...و لو سمحت ما تكدبش عليا ....هو فعلا خالد مش اخويا...سليم لو انت بتكذب في الموضوع ده ابوس ايدك قولي الحقيقه ..انا مش باقيلي حد من اهلي كلهم غير خالد
سليم اتنهد بحزن شديد عليها وقال ......وحياه ابني مش اخوك يا مشاعر ...صدقتي كده
مشاعر نزلت دموعها بغزاره و هو كمل بحزن شديد وقال.... بعد الكلام اللي قالهولي ابوكي في المستشفى قلت يمكن يكون لانه بيموت و مش عارف بيقول ايه... وعملت تحليل ليكو وطلع فعلا مش اخوكي ..ولما واجهته ما انكرش هو نفسه عارف انه مش اخوك وبيتصرف معايا ومعاكي على الاساس ده ....هو بيقول انو...احم ....انو بيحبك وعايز يتجوزك
مشاعر حطت ايديها على بقها بذهول وبقت تبكي بشده وقالت.... بس... بس ما تكملش.... اسكت خالص
وبصتلو بدموع ووجع وقالت.... كل مره توجعني فيك اكتر من الاول..... كنت عارف حاجه زي دي وساكت ....ليه...ازاي كنت قابلها على نفسك قبل ما تقبلها عليا
سليم اتنهد بوجع شديد وما كانش عارف يقول لها على السبب اللي سكته قال بحزن ....مكنتش قابلها ..وعمرها ما كانت سهله عليا ...ما تزعليش مني يا مشاعر اقسم بالله انا كل حاجه بعملها بتبقى علشانك انت مش علشاني..... انا بحبك فوق ما تتصوري عمري ما اتمنى اني اكون في يوم سبب وجعك
و لسه هيكمل التليفون بتاعه رن بعد عنها بضيق لما لقاه حازم ورد وقال .....نعم يا حازم بيه..خير
جالو صوت حازم بيقول... خير ...وكل خير انا معايا سفريه مهمه وهطول فيها اول الشهر..و عايز اعمل لكم فرحكم قبلها ...يعني على اخر الشهركده حلو معاك
سليم قال بدهشه...... اخر الشهر ده ....ازاي ما انت عارف المشاكل اللي على دماغي وابني اللي مش لاقيه
حازم قاطعه وقال.... مش هيعطلك في حاجه.... تقدروا تتجوزوا وتدور براحتك على مراتك وابنك...ها نقول مبروك ولا انت بتحور ومش ناوي تتجوز...لاني مش فاضي للعب العيال ده
بقلم.....زهرة الربيع
سليم اتفاجأ جدا وكان في موقف صعب حس بتوتر شديد و ما كانش قدامه اي وسيله للرفض اتنهد وقال.... تمام اللي تشوفه
عند ادهم عدى على رحمه اخذها الموقع وكان احلى يوم حرفيا في حياته
بداوا يلفوا سوا في المكان ولبسها الخوذه بتاعته وهو بيشرح لها الشغل تم ازاي
رحمه كانت مبسوطه جدا جدا وبتسال عن كل حاجه بحماس رهيب
ادهم كان بيجاوبها وعيونه ما نزلتش من عليها بيبص لها باعجاب وحب ما يتوصفش
رحمه كمان كانت بتحاول تشغل نفسها عنه بس برضو كانت معجبه بيه جدا ومش مصدقه ان في راجل بالانسانيه والهدوء ده وكانت بتقضي افضل وقت في حياتها معاه
واستمرت الاحداث على هذا الحال ....وادهم اشترى خط جديد بعد نصيحة سليم ورمى خطه القديم علشان يخلص من زن ميرا
وبعد مجهود جبار قدر ياخد رقم رحمه ومن فرط سعادته بالرقم مخدش باله ابدا انو نفس الرقم اللي كان على خطه القديم واللي رحمه كلمت بيه سليم
وبدأ يكلمها يوميا و يتحجج ويروح يقابلها ويخرج معاها لدرجه انها بقت تستناه وتستغرب لو اتاخر شويه...وبقى فيه بينهم اعجاب متبادل وصريح
اما سليم حاله ما اختلفش كتير رغم الخبر السيء اللي قالوا له حازم بانه قدم موعد جوازهم لكن هو ما قالش لمشاعر وفضل معاها الاسبوعين دول هو وهي وابنهم ورمى كل حاجه ورى ضهره وبقى كل اولوياته انه يحاول يخليها تطمن له وترجع تثق فيه
مشاعر كانت مبسوطه جدا باهتمامه بس برضو اوقات تحس بحبه وحنانه و اوقات تحسه غامض ومتقدرش ترتاح لتصرفاته
بعد مرور اسبوعين ادهم خرج من البيت وركب عربيته وهو معاه علبه قطيفه جميله فيها خاتم غالي جدا
اخد نفس عميق و هو متحمس جدا انه يصارح رحمه بحبه ليها ويعرض عليها الجواز
طلع تليفونه واتصل عليها وقال..... انت فين يا قمر ....لازم اقابلك ضروري.... موضوع حياه او موت
رحمه ضحكت و قالت....هو انت كل مواضيعك طارئه كده...بس للاسف النهارده بجد مش هقدر اقابلك ....اصلي رايحه اقابل واحده صاحبتي معاها موضوع مهم جدا
ادهم قفل العلبه باحباط وقال... انا كنت متحمس جدا اقابلك دلوقت ...طيب خلاص تمام ناجلها بالليل وخلاص
رحمه ابتسمت وقالت ...خلاص متزعلش بقى وتكشر
...ما انا الليله هشوفك مش هلحق اوحشك يعني
ادهم ضحك وقال ...انتي وحشاني من امبارح اصلا ...بس خلاص مش زعلان هستنى والامر لله
وودعها وقفل معاها
ولسه هيطلع بالعربيه ميرا فتحت الباب وركبت وقالت بغضب ...كل الوقت ده قافل تليفونك عشان ما تتكلمش معايا
ادهم نفخ بضيق شديد وقال...لا مكانش مقفول انا رميت الخط خالص و اشتريت واحد جديد ....واكيد مش هدي لك رقمه
ميرا قالت بدهشه....ماشاء الله على الصراحه...عموما انا مش قاتله نفسي علشان اكلمك...بس مضطره في موضوع مهم جدا لازم نتكلم فيه ...وبعد كده مش هتشوف وشي
ادهم قال بخنقه..... اتفضلي قولي وخلصيني .....انا مخنوق لوحدي ومش ناقص
ميرا قالت بضيق.... مش هينفع خالص ...الموضوع مهم بجد ....اطلع مش هعطلك... في كافيه قريب انا بقعد فيه دايما تعالى هنقعد ونتكلم
ادهم نفخ بزهق وقال ....يا رب ارحمني يارب
وطلع بالعربيه على الكافيه اللي هي قالت عليه
بعد دقايق كانو في الكافيه وكان ادهم قاعد بضيق شديد وهي قالت.... تشرب ايه
ادهم قال بغيظ ....ميرا....احنا مش جايبن نشرب ...قولتيلي في موضوع مهم قوي ممكن تتكلمي بقى
ميرا قالت بحزن ....انت بتكلمني كده ليه ....هو معقوله كل الوقت اللي عدى بيننا ده وما وحشتكش ولا مره يا ادهم
ادهم قطع عليها اي كلام وقال .....ميرا انا بحب واحده تانيه وهتجوزها..... ممكن بقى تنسي موضوعنا خالص ولو فعلا عايزه تقولي حاجه اتفضلي
ميرا اصتنعت المفاجاه وقالت..بجد...مبروك ...عموما تتهنى... انا كنت عايزه اقولك انا الفيلا اللي كنت اشترتهالي واحنا متجوزين فيه واحد عايز يشتريها
ادهم قال بضيق....هو ده الموضوع المهم...وانا مالي بكده
ميرا قالت ....مالك ازاي ...يمكن انت مش حابب تبيع ..او حابب نبيعها لشخص معين
ادهم قال ...ميرا انا اشترتهالك ووثقتها باسمك...وقبل كده قولتلك اي حاجه جبتهالك في جوازنا خلاص بقت بتاعتك..يعني تبيعيها تولعي فيها مليش دخل
ميرا قالت ...بس برضو من الزوق اخد رأيك ...خصوصا انك وثقتها باسمي بعد الطلاق يعني كنت تقدر تستردها بس انت كتبتها باسمي وسبتهالي ...فقولت ممكن نتقاسم حقها او ...
بس قطعت كلامها لما دخلت رحمه جري وحضنتها من غير ما تبص لادهم وقالت..... اتاخرت عليك.... انا اسفه والله الطريق
والتفتت لادهم بغضب شديد
ادهم وقف بصدمه شديده وهي اتحول غضبها لذهول رهيب وقالت.....اد... ادهم... انت بتعمل ايه هنا
ادهم قال باستغراب .... انتي اللي بتعملي ايه هنا
ميرا اصطنعت عدم الفهم وقالت...ايه ده هو انتوا تعرفوا بعض ولا ايه ....انتي تعرفي ادهم طليقي يا رحمه
رحمه حرفيا اتجمدت كل اعصابها من شده الصدمه ووووو
وسيطرت_المشاعر
الثاني_والعشرون
رويات_زهرة_الربيع
سليم_ومشاعر
بوووووووم💥💥💥 مش هنتكلم على اللي جاي لكم ان تتخيلو 🙆♀️🙆♀️
بارت طوييييل اهوه زي ما بتحبو والاحداث نااار واللي جاي ميتوصفش وروني التفاعل الجامد اللي بحبو لو حابين نستمر لان الصفحه فيها مشكله وحرفيا بحاجه لتفاعلكم علشان اقدر انزل بشكل يومي انطلقووووو🏃♀️🏃♀️🏃♀️🏃♀️
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
الفصل الرابع عشر والخامس عشر والسادس عشر من هنا
الفصل السابع عشر والثامن عشر والتاسع عشر من هنا
الحلقه الحاديه والعشرون والثانيه والعشرون من هنا
❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺
تعليقات
إرسال تعليق