رواية وسيطرت المشاعر الفصل السابع بقلم الكاتبه زهرة الربيع حصريه وجديده على مدونة النجم المتوهج للروايات والمعلومات
![]() |
رواية وسيطرت المشاعر الفصل السابع بقلم الكاتبه زهرة الربيع حصريه وجديده على مدونة النجم المتوهج للروايات والمعلومات
انت هتهتمي بالديكور وانا ههتم بالنضافه اصلي بقالي يومين شامم للاوضه ريحه وحشه اوي...بطني قلبت منها
قال كلامه وهو بيبص على مشاعر بغضب وهيه اتصدمت جدا بكلامه بس كتمت غيظها جواها وقعدت على السرير وبقت تنيم ابنها بهدوء
سليم فضل يلف في الاوضه مع غاده وقال بخبث.... وده سريرنا ده هيبقى احلى حاجه في الاوضه كلها
غاده كانت متوتره جدا من وجود مشاعر اللي كانت بترضع ابنها بهدوء واتجاهلته بنفس الطريقه اللي اتجاهلها بيها ونيمت الولد على السرير وراحت جنبه علشان تنام ولا كانهم موجودين
سليم اتنرفز من حركاتها وهدوئها ده ولسه هيزعق بص على ابنه اللي نايم وحاول يتكلم بهدوء علشان ميصحهوش وقال... خدي الولد واطلعي يا مشاعر من غير مشاكل
بس مشاعر ما ردتش عليه ابدا وبقت تدندن لابنها بصوت جميل
هنا سليم اتنرفز قوي وشدها من دراعها وقفها بغضب وقال.... هو انا مش بكلمك ولا خلاص الكلام باللسان ما بقاش يجيب نتيجه معاكي ونفسك تجربي مد الايد وقلة الادب
مشاعر قالت بخنقه.... الاوضه دي اوضتي ....من وقت ما اتجوزنا وانا قاعده فيها ومش هسيبها لحد.... انا مش غصباك على حاجه عايز تفضي الاوضه وتاخد راحتك في البيت طلقني وكل واحد يروح يشوف حاله ....وابقى ساعتها افتح الاضتين على بعض وبرطع فيهم براحتك زي ما انت عايز
سليم ابتسم بسخريه وقال..... حظك حلو ...عارفه لولا ان ابني لازم هيكون معاكي في المكان اللي هتكوني فيه.... كنت رميتك في اوسخ اوضه للخدم تحت.... مع اني عارف انه مش هيفرق معاكي كتير ...ما انت متعوده على عيشه الخدم ....بس اهو على الاقل ارتاح من خلقتك
مشاعر حاست بوجع شديد في قلبها من كم الاهانات اللي بيقولها لها قدام غاده.... بس حاولت ما تبينش عشان ما تديهمش فرصه يفرحوا بكسرتها وقالت بقوه مصطنعه..... هو عموما اوسخ اوضه في الدنيا كلها مش بس في البيت ده هتبقى الطف بكتير من اني اشوفك قدامي ليل نهار
سليم بص لها بغضب شديد ولسه هيرد غاده قالت بسرعه وتوتر ...سليم ...سليم هي كلها اوضه وهي معها حق دي اوضتها من الاول وهيه معاها طفل يعني الافضل تقعد في الاوضه الاوسع ....مش مشكله ناخد الاوضه الثانيه اصلا كل الاوض كبيره وحلوه ..يلا يلا بينا ارجوك
بس سليم بص لمشاعر بغضب وعند وقال ....بس انتي اخترت الاوضه دي وهتاخديها
غاده قالت بسرعه علشان تلم الموقف ....انا اخترتها لما كانت فاضيه...بس دلوقتي صاحبتها رجعت خلاص... مش مشكله ناخد غيرها
سليم بص لمشاعر بتحذير وقال..... لا يا عمري هي هتخرج.... مشاعر عاقله وعارفه ان الافضل ليها انها تسمع الكلام... اهو على الاقل تفضل مع ابنها ولا ايه يا شوشو
مشاعر بصتلو بغضب وعند اكبر وقالت..... اعلى ما في خيلك اركبه..... ومش هخرج
بقلم.....زهرة الربيع
ولسه هتقعد على السرير مسكها من معصم ايدها بغضب وقال .....شكلك مصره اطلعك بايدي ....اقول ايه عمرك ما اتعودتي على الذوق
وشدها بقوه من ايدها عايز يطلعها بره الاوضه
غاده اتصدمت جدا باللي بيعمله وحاولت توقفه بس مكانش بيسمع منها
ومشاعر بقت تحاول تفلت من ايده بس طبعا كان اقوى بكتير منها فضل يجرجرها لحد ماوصلها عند الباب فقالت بسرعه... طيب خلاص..... سيب ايدي.... سيبني هاخد هدومي وابني وامشي
سليم قال بضيق...خدي الولد وغوري ... وهبقى اخلي الخدامه تجيب لك هدومك
مشاعر قالت بدموع .....لا انا عايزه اخد لي لبس.... مش معايا اي حاجه البسها..... معلش تعالى لنفسك انت والسنيوره واستنوني بره خمس دقائق ةخد حاجتي
سليم لسه هيتكلم غاده قالت بسرعه.... طيب.... بسيطه يلا يا سليم.... يلا علشان خاطري
واخذته وطلعوا بره بالعافيه
مشاعر مل صدقت انهم طلعوا ونزلت دموعها بحسره مش مصدقه ابدا المعامله اللي بعملها بيها.... حاجه صعبه ومش متعوده عليها ابدا منه
جابت شنطه صغيره وخدت شويه هدوم
ومسحت دموعها بقوه وابتسمت بخبث وهي بتبص على صندوق خشب حطاه جنب الدولاب
اما عند رحمه كانت مش مصدقه عيونها اتصدمت جدا بوجود ادهم ...دفعتو و بعدت عنو بسرعه وهيه بتبصلو بذهول شديد
ادهم بلع ريقه بتوتر وقال ....طبعا انا لو قلت لك اني ما قصدتش ....مش هتصدقي
رحمه بقت تبص له بغضب شديد وقالت..... لا هصدق...و متوقعه منك اي حاجه ....طبيعي طالما ما اخذتش عقابك على اللي عملته الاول ...اكيد هتتجرا تاني وتالت
ادهم اتنهد وقال...... يا انسه اقسم لك بالله اني في المرتين كان قصدي اسندك مش اكتر
رحمه هزت راسها وقالت بسرعه....... اه طبعا واخده بالي.... انت وكل الرجاله معروفه شغلتكم تحمونا وتاخدوا بالكوا علينا امال ايه .......تعرف انا مش جديد عليا وقاحتك.... عدى عليا من عينتك كتير قوي
وكملت بزعيق وقالت ....بس اللي جديد عليا و مش مصدقاه انك قادر تيجي تقف قدامي تاني يا بارد يا تلم ياللي ما عندكش ريحة الدم
ادهم اتوتر قوي ......لما لقى صوتها ابتدى يعلى تاني وقال بسرعه.... طيب ....طيب اهدي.... اديني بس فرصه اوضح لك اللي حصل و.....
رحمه قاطعتو وقالت بغضب شديد.....لا استنى عليا انا اللي هوضحلك
واتصدم لما بقت تنادي على الامن بغضب وقالت.....السكيورتي فين ...منعم انت يا زفت
دخلو اتنين شباب بسرعه ورحمه بصتلهم بغضب وقالت.....ازاي تسمحوا لاي حد يدخل بالشكل ده...... البني ادم ده قليل الذوق واتعدي عليا خرجوه بره
ادهم قال بقلق.....ياجماعه والله في سوء تفاهم
بس رحمه قالت بسرعه وغضب........ لا ما فيش سوء تفاهم ....ده بني ادم قليل الادب وممنوع يدخل هنا تاني ..يلا طلعو يا منعم مستني ايه
منعم قال بجديه..... اتفضل معانا حضرتك.... اتفضل لو سمحت من غير مشاكل
ادهم لسه هيتكلم منعم ميل عليه وقال بهمس..... اتفضل معانا يا بيه...و صدقني احسن لك ما تتعاملش معاها خالص انت شكلك ابن ناس متجبش لنفسك البلاوي
ادهم مستغرب اكتر واتنهد ومشي معاه و عند الباب قبل ما يطلع بصلها وقال بمعاكسه..... طب على فكره بقى انت جامده من الاخر ....وزي القمر ....ومزه كمان ايه رايك بقى..... ويلا بينا يا منعم احسن هتقول اغتصب،،،تها المره دي
وخرج بسرعه هو والامن اللي كانوا بيضحكوا على كلامه
رحمه بصت لطيفه بدهشه وذهول من الكلام اللي قاله وظهرت ابتسامه على شفايفها غصب عنها وقالت....مجنون ده ولا ايه
في البيت كانو هدى ونادر قاعدين سوا و هدى قالت بحزن.....شايف اللي بيعملوا ابنك في الغلبانه مراته..عاجبك كده ...ماشي صحيح هيه غلطت ...وغلطت قوي بس مش لدرجه المعامله دي....معقوله بعد كل الحب الللي كان بينهم يزلها كده..... حبكت الاوضه اللي قاعده فيها مش كفايه هيتجوز
نادر اتنهد وقال....اعمل ايه بس يا هدى .....اكيد مش عاجبني وبعدين ابنك ايه الجديد عليه ما طول عمره مستفز ووقح وميتعاشرش
هدى قالت بضيق...شكلنا معرفناش نربي ابدا
نادر قال ....الفكره مش في ربايته ...هو من يومه كده ...طب ما اهو ادهم اخوه توأمه شالتهم نفس البطن واتولدوا في نفس الوقت ورضعوا نفس اللبن وعاش معاه في نفس البيت كانوا توام ملتصق يا هدى يعني حتى جسمهم كان واحد مع ذلك فرق ربايتهم فرق السما من الارض ... ادهم اخلاقه غيره خالص وحتى لما حب يطلق مراته فارقها بالود والمعروف وداها كل حقوقها ومقبلش حتى يطلع سرهم ويقول سبب طلاقهم....ربنا قال امساك بمعروف او تسريح باحسان ...لو هو مش قادر ينسى خلاص يطلقها ولا هيه علشان غلبانه وملهاش حد يدوس عليها...نسي ان ابوها انقذ حياته وفداه بروحه
هدى قالت بسرعه ....طب ما تكلموا يا نادر.... قوله كده يمكن يسمع منك
نادر ضحك بوجع وقال ...يسمع مني انا....وهو من امتى بيسمع مني .....ده انا لو كلمته هيعند اكثر .....ده انا عمري ما حسيت اني ابوه ...بالعكس بحس اني قتلتلو ابوه مش عارف بيتعامل معايا بالطريقه دي ليه .....عملته له ايه علشان الكره ده كله ....واصلا ما بقاش عندي خلق اعرف زمان الموضوع ده كان مضايقني قوي وواجع قلبي خصوصا لما بشوفه بيبص لي بنظرات صعبه ....زي ما اكون عامل حاجه وحشه في حقه زي ما اكون اذيته وانا مش عارف....ياما حاولت اتكلم معاه واعرف السبب بس مفيش فايده...كل اللي متاكد منه ان ادهم عارف اللي مزعله بس بخبي عني ...بس عارفه دلوقتي حتى ما بقتش اسال ادهم....لان مبقاش يهمني...يعني اللي عدى من عمري وهو بيكرهني اكيد مش هعيش قده ... فمبقتش فارقه
هدى بصتلو بحزن وحاولت تهون عليه وقالت... بعيد الشر عنك يا نادر ....سليم اكيد في حاجه فاهمها غلط.... ويمكن زي ما انت قلت هو عقليته كده.... ما تزعلش منه يا حبيبي مهما هو قسي ما تقساش انت..... ده ابنك
نادر ابتسم لها بحب وقال...... انا بزعل عليه يا هدى مش منه ...وانا ازعل منو ازاي ده انا خلفتهم بعد مرار جبناهم بعد علاج وتعب ومقدرناش نجيب غيرهم ...ازاي بس هكرهه ربنا يهديه
عند سليم كان واقف قدام الاوضه هو وغاده اللي كانت بتبصلو بعتاب وقالت....على فكره الحال ده مش هينفع.... انت كل حاجه عمال تكبرها كنا اخدنا اي اوضه وخلاص...دلوقت اهلك يقولو عليا اني طلعتها من اوضتها
سليم قرب منها وقال.... اهلي عارفين كل حاجه وحتى لو مش عارفين انا هنا قرراتي من نفسي ما حدش يقدر يوصلك ولو بكلمه
غاده قالت بحزن...ايوه بس
لكن سليم قاطعها لما حط صباعه على شفايفها وقرب منها قوي وقال بهمس....اششش... انتي هتبقي مراتي سليم النمس ....يعني تؤمري وما حدش يأمر عليك
غاده ابتسمت بسعاده وهو قرب منها قوي وقال.... عيونك بيقتلوني
غاده لمعت عينها بفرحه شديده وقالت....انا...انا بحبك قوي
سليم قربها ليه اكتر وسند جبينه على جبنها وقال.... مش اكتر مني
غاده لسه هترد في الوقت ده خرجت مشاعر وغاده بعدت عنه بخضه
مشاعر اتفاجأت بالمنظر و حست بنار جواها لما شافتهم بالشكل ده بس حاولت تقوى وقالت.... فضيت لكم الاوضه اللي عاجباكم...يلا اتفضلوا على الاقل تبقوا متدارين عن عيون الناس عشان فيه خدم يعني وكده لو حد شافكم الله اعلم يقول ايه
وبصت لغاده وقالت بسخريه..... هو كده كده مهزق عادي.... بس انا قلبي عليك يعني
غاده قالت بسرعه وتوتر...لالا لا انت فاهمه غلط... احنا ما كناش بنعمل حاجه احنل...
بس مشاعر قالت بسرعه..... انا عارفه يا حببتي ...انت عينك اتطرفت وكان بينفخها لك.... انا مقدره ...لان حركاته المقرفه دي ياما عملها معايا قبل كده.... بس الفرق بقى ان انا عندي اخلاق وفاهمه ديني كويس..و ولا ديني ولا تربيتي يسمحوا لي اخليه يقرب لي بالشكل ده قبل الجواز.... فكانت كل محاولاته على الفاضي.... عشان كده ما كنتش ابقى خايفه لحد يشوفنا ولا كنت اتفزع زيك كده ...انما انتي بقى.... يلا الظاهر عينك كانت وجعاكي قوي ما نظلمكيش
قالت كده وراحت على الاوضه بابنها وغاده اتعصبت جدا منها وقالت بغضب ودموع...... سامع بتقول عليا ايه .... قصدها اني ما تربيتش يعني ولا ايه
سليم كان مش قادر يخبي ابتسامته وسعادته بكلام مشاعر لانو بيحس بغيرتها وحبها اللي بتخبيه
لكن حاول يهدي غاده وقال...اكيد تسمعي عن حاجه اسمها غيره .....هي غيرانه مش اكتر..... يلا نشوف الاوضه كانك ما سمعتيش حاجه ....يلا يا قلبي
واخدها ودخلوا على الاوضه وبقى يفرجها على المكان وهي مبسوطه جدا وبتقول له على الحاجات اللي هتعملها
سليم كان واقف معاها بيصطنع الاهتمام وهو في دنيا تانيه مخنوق جدا لانه اجبر مشاعر تخرج..وبيفكر ياترى بتعمل ايه دلوقت ..وبيقول في نفسه.... ممكن تكون بتبكي...اكيد بتبكي ..طيب ما ده احسن ..في داهيه وانا مالي ...هيه اللي ابتدت
كان تايه وسط افكاره لحد ما فاق على صوت صرخه قويه من غاده اللي رجعت لورا بفزع وهي بتصرخ وهتقع من طولها من اللي شافته على الارض
سليم كمان اتصدم بشده لما شاف مجموعه من الفيران المقززه طالعه من ورا الدولاب كثيره جدا بحجم صغير وعدد كبير مهول في كل الاوضه
غاده مسكت فيه بقوه وقالت بصراخ.... ايه ده.... ايه ده يا سليم..... يا مامي ..انا انا بخاف منهم بخاف قوي
سليم حاول يهديها وهو بيقول ...غاده..غاده اهدي..اهدي متقلقيش انا هتصرف ..تمام اهدي
بس غاده كانت مش بتسمعله و بتصرخ بقوه خصوصا لما واحد من الفيران دي طلع على رجلها
بقت تصرخ بجنون وطلعت بره الاوضه كلها ونزلت على السلم جري
سليم جري وراها وهو بيقول .... غاده ارجوكي استني...غاده اسمعيني
بس كانت بتجري بخوف وبالعافيه قدر يلحقها قبل ما تطلع من الفيلا مسكها من ايدها وقال بغضب.... غاده ..انا مش بكلمك
بس غاده دفعته وقالت ببكا وصراخ ....سيبني في حالي يا سليم ....مش هينفع ...مش هينفع ابدا.....مراتك هي اللي عملت كده ....وانا مستحيل استحمل الطريقه دي .....مش هقدر ..انا مش بالقوه دي ....مقدرش مقدرش ... ابعد عني
وسابته ومشيت وهيه بتبكي بشده
سليم جذب شعره لورا بذهول وهو مش مصدق اللي حصل ابوه وامه كمان كانوا مصدومين ومستغربين ايه اللي بيحصل لانهم كانوا طالعين كويسين وبيهزروا هدى قربت منه وقالت .....في ايه يا ابني... في ايه يا سليم
سليم احتدت عينيه بغضب شديد وقال بزعيق ...في انها لعبت بعداد عمرها بنت السواق ...كل ما احاول اصلح حاجه تبوظهالي ....اقسم بالله ما هحلها
وطلع على السلم وهو بيقول بزعيق يرعب...مشاعر
هدى حطت ايدها على خدها بذهول وقالت..... يا لهوي يا لهوي يا نادر..... هي عملت ايه
نادر ما كانش فاهم حاجه وقال بتوتر...علمي علمك .... ربنا يستر
سليم راح على الاوضه زي الاعصار وحاول يفتح الباب بس كان مقفول من جوه بقى يخبط بشده على الباب ويضربوا برجله وهو بيقول..... مشاعر.... افتحي هكسروا على دماغك ودماغ اللي خلفوكي
مشاعر بلعت ريقها برعب و قالت بقلق شديد من صوته... نتكلم بعدين يا سليم..... الولد نايم
بس صرخت بقوه لما ضرب الباب برجله كسره ودخل بغضب يرعب ووووو
وسيطرت_المشاعر
السابع
بقلمي_زهرة_الربيع
العب يا فااار اللي جاي دمااار😂😂 تفتكرو سليم هيعمل ايه في مشاعر ...ووالد غاده هل هيسكت على اللي حصل لبنته وياترى ايه اللي مزعل سليم من ابوه ...كل ده واكتر في اللي جاي ..ويلا بقى عايزه تفاعل يدغدغ الدنيا علشان نلحق البونيه الغلبانه😂🙆♀️ 🏃♀️🏃♀️🏃♀️🏃♀️
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺
تعليقات
إرسال تعليق