الحلقة السادسه والعشرون حتي الحلقه الثلاثون رواية_رشيد_وكارمن بقلم الكاتبة_ملك_إبراهيم
"الدكتور بص ل كارمن وساب من ايديه القلم اللي كان بيدون بيه كلامها"
وقال ليها بهدوء: "مين قال ان مو.. تك هيخليهم مبسوطين! انا شوفت قد ايه جوزك بيحبك وميقدرش يعيش من غيرك."
قالت بحزن: "مسيره في يوم هيكرهني لما يعرف اللي انا عملته."
بص ليها الدكتور باستغراب وقال ليها بهدوء: "اللي يحب بجد مستحيل يكره.."
سكت شوية وهي بتبكي وبعدين قال ليها بثقة: "انتي عارفه المشكله فين."
بصت ليه باهتمام وهي بتجفف دموعها: "المشكله ان انتي مش قادرة تحبي نفسك.. جواكي خوف كبير بس مش خوف علي نفسك.. بالعكس.. خوف علي اللي بتحبيهم.. خوفك الكبير عليهم وخوفك تخسريهم هو ده اللي عمل فيكي كده.. الخوف اللي جواكي هو اللي بيأذيكي ودلوقتي بتفكري في الانتحار بسبب خوفك من مواجهة مشاكلك.. اكبر خطأ عملتيه انك مواجهتيش اول مشكله قابلتلك وسبتي المشاكل تاخدك وتبتلعك من مشكله للتانيه لحد ما بقيتي الشخصية اللي قاعدة قدامي دلوقتي."
بصت ليه بدهشة وقالت: "انا مش فاهمه حاجة..؟"
جاوب الدكتور بثقة: "انا متأكد ان كل مشاكلك دي بدأت بمشكله صغيرة انتي مقدرتيش تواجهيها وسبتي المشكله الصغيرة تكبر وتصاحبها مشاكل كتير تتحكم فيكي وانتي برضه عاجزة عن مواجهة مشاكلك، ودلوقتي عايزة تستسلمي لكل المشاكل دي وتمو.. تي نفسك وفاكرة ان كده هتمو.. تي المشاكل معاكي."
بصت ليه بصدمة وهي بتفكر في كلامه، كمل الدكتور مرة تانية بثقة: "انتي دلوقتي بتفكري ان حل كل مشاكلك ومشاكل اللي حواليكي في مو.. تك صح؟"
هزت راسها بالموافقة. كمل الدكتور بثقة: "خلينا متفقين ان اخر حاجة هتحصلك في الحياة دي هي المو.. ت."
هزت راسها بالموافقة. ابتسم ليها وكمل: "يبقى نأجل فكرة المو.. ت دي دلوقتي ونفكر في حل مشاكلنا بنفسنا والاهم مواجهة المشاكل ومنخفش من اي حاجة ممكن تحصلنا لان اي حاجة هتحصلنا اكيد مش هتكون اصعب من المو.. ت."
بصت للدكتور وبدأت بالتفكير في كلامه، كمل بثقة وهو بيتابع اهتمامها بالاستماع لكلامه: "يبقى اول حاجة لازم نقضي عليها ونتخلص منها هو الخوف.. مش لازم تخافي من اي حد لان مفيش اي حد يقدر يأذيكي. الإنسان هو اللي بيأذي نفسه بنفسه لما بيخاف من مواجهة مشاكله ويهرب.. واجهي يا كارمن.. واجهي نفسك وواجهي مشاكلك ومتخافيش تاني."
بصت قدامها وهزت راسها وصوت الدكتور وكلماته بتتردد في ودنها، ابتسم ليها الدكتور وبلغها ان الجلسة خلصت النهاردة وبلغها بميعاد الجلسة الجاية.
خرجت من أوضة الدكتور وهي بتردد كلام الدكتور جواها وبتفكر في مواجهة مشاكلها مهما كانت العقوبة، عليها تتخلص من الخوف ده اللي سجنها جواه طول السنين دي ودلوقتي عايز يقتـ.. لها.
وقف رشيد قدامها بيرمقها بنظرات غاضبة، وطت وشها بعيد عنه وهمست ليه بصوت خافت: "لو سمحت عايزة ارجع البيت."
أخدها للعربية من غير كلام ورجعوا للبيت.
رواية رشيد وكارمن بقلمي ملك إبراهيم.
كانت سهير قاعدة جوه عربية أجرة مستنية خروج رشيد من البيت عشان تطلع وتتكلم مع كارمن، اتفاجأت بيه جاي بعربيته ومعاه كارمن وأخدها وطلع لشقتهم اللي فوق، زفرت سهير بضيق وهي بتفكر ازاي هتقدر تتكلم مع كارمن في وجود رشيد!
جوه شقة رشيد وكارمن.
دخلت كارمن الشقة قدام رشيد بخطوات مرتبكة، قفل باب الشقة عليهم وصدح صوته غاضبا: "استني يا كارمن."
وقفت خطواتها بخوف والتفتت بتبص ليه، قرب منها وهو بيرمقها بنظرات غاضبة وقال بنبرة صارمة: "انتي كنتي فعلا حامل؟!"
شحب وشها من شدة الخوف ومجاوبتش عليه، مسك بدراعاتها وصدح صوته عالي: "ردي عليا يا كارمن.. انتي ازاي متعرفنيش انك كنتي حامل..؟"
جاوبت بتلعثم: "خوفت."
قال بغضب: "خوفتي من ايه؟"
سكتت بخوف وهي بترتعش بشدة، قال ليها بحزن: "ليه الحمل مكملش؟"
جاوبت عليه ببكاء: "ما..ت."
ساب دراعها وبص ليها بصدمة، بكت أكتر وكملت بحزن وهي حاطة ايديها فوق بطنها: "ما..ت في بطني."
بص لايديها فوق بطنها بصدمة، بكت أكتر وكملت: "انا اسفه."
صرخ بيها بغضب: "كفايه بقاا.. كفايه تقولي الكلمة دي بقيت بكرها.. مش عايز اسمع صوتك.. انتي دمرتيني.. نفسي اعرف انا عملت فيكي ايه عشان تنتقمي مني بالقسوة دي.. خونتي ثقتي وضيعتي مستقبلي.. الطـ..فل اللي مات جواكي ده ملوش ذنب ان تكون امه بالقسوة دي! انا اللي غلطت لما اتجوزتك.. كان لازم اختار الزوجة اللي تصلح تكون ام لاولادي.. مش عيله زيك ابداا.. انا بقيت بكرهك يا كارمن.. بكرهك."
وقفت بتسمع كلماته القاسية وهي بتبكي. سابها وخرج من البيت غاضبًا، قفل عليها بالمفتاح من بره عشان متقدرش تخرج من البيت في غيابه، قعدت على الأرض وهي بتبكي بانهيار، عارفة ان ليه كل الحق في كلماته القاسية ليها.
بالاسفل.
نزلت سهير من عربية الأجرة عشان تطلع لكارمن وتحاول تتكلم معاها بعيد عن رشيد، رجعت لورا بسرعة لما شافت رشيد خارج من البيت. أخد رشيد عربيته وانطلق بيها. التقطت سهير انفاسها براحة وبعدين اتحركت بسرعة ناحية البيت وطلعت لشقة كارمن اللي فوق.
وقفت سهير قدام باب شقة كارمن وضغطت علي زرار الجرس وخبطت بايديها بقوة.
جوه الشقة بصت كارمن لباب الشقة باستغراب وهي قاعدة على الأرض بتبكي بعد ذهاب رشيد.
وقفت كارمن وقربت من الباب وقالت باستغراب: "مين؟!"
جالها صوت والدتها من بره: "انا مامتك يا كارمن افتحي!"
استغربت كارمن وحاولت تفتح الباب لكنها اتأكدت من قفل رشيد الباب عليها من بره، بكت بحزن وقالت لوالدتها: "مش عارفه افتح يا ماما رشيد قافل عليا بالمفتاح."
قالت سهير بعصبية: "يعني ايه قافل عليكي بالمفتاح.. انا لازم اتكلم معاكي في موضوع مهم.. في مصيبه."
غمضت كارمن عينيها بتعب واستندت علي الباب وقالت: "مبقاش في مصايب تخوفني خلاص يا ماما."
قالت ليها والدتها بغضب: "بس دي مصيبه هتوديكي لحبل المشنقه.. الزفت اللي انا كنت متجوزاه ظهر تاني وجالي وطلب فلوس كتير اوي وهددني انه لو مخدش الفلوس اللي طلبها هيبلغ عنك ويفضحنا."
مخافتش كارمن زي ما اتعودت وردها كان صادم لسهير: "خليه يبلغ ويعمل اللي هو عايزه انا مبقتش اخاف من حاجة."
اتصدمت سهير وقالت بغضب: "انتي اتجننتي يا كارمن!!.. اوعي تكوني فاكره ان رشيد هيقدر يحميكي!"
صرخت بيها كارمن بقوة: "انا مش محتاجة حد يحميني.. انا مش خايفه منه ولو انتي خايفه منه تقدري تدفعيله الفلوس اللي هو عايزها من الفلوس اللي بعتيني وبعتي حقك في الارض واخدتيهم."
غضبت سهير كتير من كلام كارمن وقوتها وجاوبت عليها بنبرة حادة: "فلوس ايه!.. انتي فاكره ان انا لسه معايا فلوس؟ كل الفلوس اللي كانت معايا خلصت ومش معايا حتى ادفع ايجار الشقه اللي انا قاعده فيها!"
قالت كارمن باصرار: "وانا كمان مش معايا فلوس وتعبت وعايزة اخلص من كل ده بقا."
قالت سهير بصدمة: "يعني ايه يا كارمن؟! اومال فين فلوس ارضك؟!"
جاوبت كارمن بقوة: "انا مش هضيع ارض عيلتي وفلوسي ياخدها واحد نصاب زي ده! كفايه حياتي وحياة جوزي اللي اتدمرت بسببه.. قوليله يبلغ زي ما هو عايز ولو مبلغش هو هبلغ انا عنه وهقول ان انتم اجبرتوني احط المخد.. رات في دولاب جوزي عشان تضيعوا مستقبله."
شهقت سهير بصدمة وهمست بذهول: "لااا.. دا انتي شكلك اتجننتي!"
صرخت كارمن من جوه: "ايوه اتجننت.. ابعدي عني وسبيني في حالي بقاا."
بصت سهير للباب بصدمة وبعدت بسرعة وهي بتجري للاسفل مرة تانية ومش عارفة هتعمل ايه دلوقتي.
جوه الشقة قعدت كارمن على الارض مرة تانية وبيتردد جواها كلام الدكتور ونصيحته ليها بمواجهة مشاكلها وعدم الهروب او الاستسلام مرة تانية.
رواية رشيد وكارمن بقلمي ملك إبراهيم.
متوقفش عقل رشيد عن التفكير وهو جوه عربيته بيقودها شاردًا لحد ما وقف قدام بيت عيلته. بص لبيت عيلته بتعب ونزل من العربية واتقدم لجوه البيت.
استقبلته والدته بكلمات حادة بتلومه على غيابه عنهم وتركه للبيت. مجاوبش علي والدته واستمر في سيره لحد ما وقف قدام أوضة مكتب جده وفتح الباب من غير استأذان ووقف بيبص لجده بصمت.
استغرب جده من وقوفه قدامه صامت ووقفت والدته بتتكلم معاه بلوم علي اهماله ليها وعدم رده عليها.
وقف الجد وطلب من مرات ابنه المغادرة ويسيبه مع حفيده لوحدهم.
ذهبت والدة رشيد باستغراب وقال الجد لرشيد بنبرة غامضة: "اهلا.. حمدلله على السلامه .. جيت من الصعيد امتى؟"
اتقدم رشيد لجوه وقال: "اللي بلغ حضرتك اني روحت الصعيد.. اكيد بلغك انا رجعت امتى؟"
قعد الجد فوق مقعده براحة وقال: "اللي انا مستغربه انت لك ايه في الصعيد عشان تسافر لهناك.. معقول لسه بتجري ورا البنت اللي خانتك ودمرت مستقبلك؟!"
قعد رشيد قدام مكتب جده وجاوب: "انا بجري ورا الحقيقه."
الجد: "ولقيت الحقيقه اللي خدتك لحد الصعيد؟!"
رشيد بغموض: "نص الحقيقه عند حضرتك وانا جيت دلوقتي عشان اعرفها."
الجد باستغراب: "حقيقة ايه اللي عندي؟!"
اتنهد رشيد بعمق: "ليه مقولتليش انك روحت لكارمن في بيت مامتها؟.. وليه مقولتليش ان حضرتك هددتها وقولتلها اني اول لما اخرج هقتـ.. لها؟!"
اتوترة الجد شوية وجاوب: "انا كنت بحميك.. ومتأكد ان انت كنت بتفكر تقـ.. تلها اول ما تخرج! والطبيعي اني اعمل كده.. اكيد مش هقف اتفرج عليك وانت بتضيع مستقبلك عشان واحدة زي دي!"
رشيد بغضب: "حضرتك كنت تعرف مكانها طول السنين دي؟!"
الجد بصدق: "انا اللي حجزتلهم تذاكر الطيارة ومهتمتش اعرف عنها اي حاجة بعد ما سفرت وخصوصا بعد ما انت طلقتها."
غمض رشيد عيناه بحزن وبعدين قال: "حضرتك قولتلها ان انا طلقتها قبل ما اطلقها ليه؟!"
الجد بثقة: "عشان متفكرش ترجعلك تاني.. كنت عايز اخلصك منها بعد ما دمرت حياتك وضيعت مستقبلك.. مينفعش بنت زي دي تكون مراتك وتشيل اسم عيلة الجبالي."
وطى رشيد وشه وابتسم ساخرا بحزن: "حضرتك عارف ان في الوقت اللي هددتها فيه واجبرتها تسافر.. كانت وقتها حامل في ابني."
بص ليه جده بصدمة، كمل رشيد بحزن: "ابني اللي لو كان جه الدنيا كان زمانه دلوقتي من غير اب ولا عيلة بعد ما هددتها وخوفتها مني وحذرتها انها لو رجعت هنا تاني انا هقـ.. تلها.. مش عارف اشكر ربنا ان ابني ما.. ت في بطنها عشان ميتبهدلش طول السنين اللي فاتت ولا احزن علي ابني اللي ما.. ت جواها قبل ما اشوفه بعيني او المسه بإيدي."
بص الجد حواليه بصدمة وهو بيردد: "صدقني يا رشيد انا مكنتش اعرف انها حامل.. واكيد لو كنت اعرف مكنتش هسمحلها تسافر وهي حامل في حفيدي!"
قال رشيد بحزن: "ابني اللي ما.. ت ده ذنبه في رقبتي انا.. انا اللي مقدرتش احافظ علي حياته.. انا اللي بنيت بيت من غير ما اسسه كويس.. وفي النهاية البيت ده وقع على دماغي انا وخسرت كل حاجة."
بص ليه جده بحزن. وقف رشيد وقال لجده بقوة: "لو سمحت يا جدي.. من اللي اللحظة دي متدخلش في حياتي مرة تانيه."
حاول الجد الكلام معاه وتهدئته لكن رشيد سابه وذهب بخطوات مسرعة، قعد الجد بحزن وندم على اللي عمله بحياة حفيده.
رواية رشيد وكارمن بقلمي ملك إبراهيم.
صباح اليوم التالي.
جوه شقة سهير.
دخلت الخادمة أوضة نوم سهير وقالت ليها بهدوء: "مدام.. حارس الامن بتاع العمارة عايز حضرتك برا."
قالت سهير بصوت ناعس وهي نايمة: "قوليله يبقا يجي في وقت تاني وسبيني انام."
قالت الخادمة: "قولتله كده وهو مصمم يقابل حضرتك ومش راضي يمشي!"
زفرت سهير بغضب وقامت من فوق الفراش ولبست الروب الحريري وخرجت من الأوضة وهي بتزفر بغضب واستقبلت الحارس بصوت حاد: "خير عايز ايه.. ايه الموضوع المهم اللي مطلعك هنا بدري كده؟!"
وطى الحارس وشه للأرض وجاوب باحترام: "انا بعتذر لحضرتك جدا يا مدام بس صاحب الشقة عايز فلوس الإيجار."
زفرت سهير بغضب وقعدت بتتناول واحدة من السجاير: "مش انا قولتلك خليه يصبر عليا شويه.. في فلوس هتتحولي من ايطاليا واتأخرت شويه!"
قال الحارس باحترام: "والله انا قولتله الكلام اللي حضرتك قولتيه ده وهو رافض التأخير وقال ان الفلوس لازم تندفع النهارده ضروري او تسيبي الشقه."
سابت علبة السجاير من ايديها وقالت بنبرة حادة: "يعني ايه اسيب الشقه لو مدفعتش!.. هو اتجنن ده ولا ايه!!"
قال الحارس باحترام: "والله يا مدام صاحب الشقه اللي قال كده وانا كنت عرفت حضرتك قبل ما نمضي العقد ان صاحب الشقه دي مش بيقبل اي تأخير."
غضبت سهير وكملت بعصبية: "يبقا تبلغه اني مش هسيب الشقه وغصب عنه لازم يصبر عليا لحد ما تجيلي فلوس!"
قال الحارس: "خلاص يا فندم انا هبلغه برد حضرتك وانتوا احرار مع بعض.. عن اذن حضرتك."
خرج الحارس وهو بيزفر بغضب، وقفت الخادمة بتفكر بقلق ايه لو سابت الشقه ومدتهاش مرتب شغلها طول الشهر؟
قربت منها الخادمة وقالت بقلق: "انا اسفه يا مدام بس كنت محتاجة المرتب بتاع الشهر عشان محتجاه ضروري."
انتفضت سهير من مقعدها وقالت ليها بانفعال: "هو انتي مبتفهميش.. مش شايفه اننا ممكن ننطرد من هنا عشان مش معايا فلوس الإيجار!"
قالت الخادمة بصدمة: "انا مليش علاقة بالايجار يا مدام انا ليا مرتب ولازم اخده!"
قالت سهير بعصبية: "وانا هجبلك فلوس المرتب بتاعك منين دلوقتي! خليني اشوف حل اخرج من المصيبه دي!"
نزعت الخادمة اللي بتلبسه وقالت باصرار: "يبقا انا مش هينفع اكمل شغل مع حضرتك علي النظام ده.. انا عندي ظروفي متسمحش اني اشتغل من غير ما اخد مرتب ثابت."
انفعلت سهير بغضب: "خلاص غوري في ستين داهية."
سابتها الخادمة وخرجت من البيت بعد ما أخدت متعلقاتها الشخصية، قعدت سهير بتزفر بغضب وبتلعن الفقر اللي بيجري وراها كل ما تحاول ترجع لحياة الثراء.
بعد عدة ساعات. دق جرس الباب وذهبت سهير عشان تفتح الباب.
سهير: "افندم؟"
جوزها السابق: "ايه يا سوسو.. بتفتحيلي الباب بنفسك!"
دفعها بعيد عنه واتقدم لجوه، شهقت سهير من دفعه ليها وجراءته وقالت ليه بغضب: "انت ايه اللي جابك هنا دلوقتي؟! ياريت تمشي دلوقتي عشان انا مش فيقالك خالص."
قال ليها ببرود: "انا جاي اخد فلوسي وماشي!"
سهير بعصبية: "وانا معنديش فلوس."
قرب منها ومسك بدراعها بعنف: "انتي هتلاعبيني ولا ايه يا سهير؟ مش انتي قولتيلي اجي اخد الفلوس اللي انا طلبتها؟! جايه ترجعي في كلامك دلوقتي."
بعدت عنه وصرخت بيه: "قولتلك مفيش فلوس.. انا هترمي في الشارع عشان مش قادرة ادفع الإيجار وانت جاي تقولي فلوس.. وبعدين كفايه اوي فلوسي اللي انت سرقتها زمان."
قرب منها ومسك بخصلات شعرها وضغط عليها بقوة: "لا يا سهير.. دا انا اقتـ.. لك هنا.. انا خلاص مش باقي علي حاجة."
صرخت بيه وهي بتتألم وبتحاول تخلص خصلات شعرها من ايديه: "ابعد عني يا حيوان.. قولتلك انا معنديش فلوس.. روح بلغ واعمل اللي انت عايزه ومتنساش ان انت متورط زينا واكتر كمان."
قامت بدفعه بقوة بعيد عنها، ارتطم جسمه بالحيطة بقوة وبعدين جري وراها، جريت سهير للمطبخ وأخدت سكـ..ين ومسكت بالسكـ..ين بقوة وقالت ليه بصوت قوي: "ابعد عني والا هقتـ.. لك."
ابتسم ساخرا وهو بيقرب منها وقال ليها بمكر: "واهون عليكي يا سوسو تقتـ.. ليني بعد كل اللي بينا."
قرب منها وهي بتحذره بالسـ.. كين وقام بخداعها وأخد السـ.. كين من ايديها ومسك بشعرها وهددها بقوة: "الفلوس فين يا سهير بدل ما اقتـ.. لك."
صر.. خت بهلع وقامت بركله بقوة في نص جسمه، سابها وانحنى على جزعه بيتألم بشدة، جريت لبره المطبخ بسرعة، لكنه لحق بيها بسرعة وهو بيتألم بشدة من ركلة رجليها القوية، وبعدين مسكها قبل ما تقرب من باب الشقة وطعنها بضهرها.... بقلمي ملك إبراهيم.
النهاية الطبيعية لكي يا سهير ساالم🫣🏃
تفتكروا سر كارمن هيتكشف بموت والدتها😱🤔 ♥️
#الحلقة_ال27
#رواية_رشيد_وكارمن
#الكاتبة_ملك_إبراهيم
"طلع حارس العقار ومعاه صاحب الشقة اللي جه عشان ياخد الإيجار من سهير"
بصوا لبعض باستغراب لما شافوا إللي بيفتح باب الشقة وعايز يهرب، مسك بيه حارس العقار بسرعة بمساعدة صاحب الشقة ودخلوا جوه، وكانت الصـ..د..مة لما شافوا سهير بتمو.. ت قدامهم، اتصل الحارس بالشرطة وبلغهم باللي حصل.
رواية رشيد وكارمن بقلمي ملك إبراهيم.
بعد عدة ساعات.
جوه شقة رشيد.
كانت كارمن قاعدة قدام رشيد بياكلوا مع بعض بصمت، متكلمش معاها رشيد من امبارح، كان بيبص ليها من وقت للتاني، لسه بيحبها وقلبه بينبض بعشقها، لكنها دايما بتوجع قلبه بأفعالها الغامضة وسكوتها المستمر! رن تليفونه وقطع الصمت اللي بينهم، رد رشيد وسمع صوت خالد الحزين بيقوله: "البقاء لله يا رشيد.."
قال رشيد بصدمة وافتكر إن جده حصله حاجة: "مين يا خالد؟!"
جاوب خالد بحزن: "سهير سالم مامت كارمن.. اتقـ..تلت النهارده في شقتها."
انتفض رشيد من مكانه بصدمة وهو بيبص لكارمن بذهول. استغربت كارمن من رد فعله وبصت ليه بترقب. قام رشيد بسرعة ودخل أوضة النوم وقفل الباب وراه وقال بصوت واطي: "انت بتقول ايه يا خالد؟!"
جاوب خالد بثقة: "زي ما بقولك كده.. طليقها الاخير طع نها بسكـ.. ينة في شقتها وصاحب الشقة وامن العمارة قدروا يمسكوه وبلغوا.. لكن للأسف مقدروش يلحقوها وما..تت قبل ما توصل المستشفى."
سمع رشيد الخبر بصدمة وهو بيفكر في كارمن وصد..متها الكبيرة بعد ما يخبرها بالخبر الصادم ده، كمل خالد بتأكيد: "كارمن لازم تيجي عشان تتعرف علي جـ..ثة مامتها وكمان عشان إجراءات الد.فن والتحقيقات انت فاهم."
قال رشيد باعتراض: "مش هينفع يا خالد.. انت عارف كارمن بتمر بإيه.. مش هتستحمل تشوف مامتها كده."
قال خالد: "وبعدين يا رشيد.. لازم كارمن تيجي وتتعرف على ج ثة والدتها!"
زفر رشيد: "انا جايلك دلوقتي يا خالد ونحاول نشوف حل بعيد عن كارمن.. مش لازم كارمن تعرف دلوقتي اللي حصل لمامتها."
قال خالد بقلة حيلة: "اللي تشوفه يا رشيد انا في المستشفى دلوقتي تقدر تيجي تتعرف على الجـ.. ثة بما انك جوز بنتها."
قفل رشيد التليفون ولبس هدومه وخرج بسرعة من البيت من غير ما يتكلم مع كارمن.
تابعت كارمن خروجه بسرعة بدهشة وبعدين سرحت في التفكير في والدتها وهي بتتساءل جواها ايه اللي هيعمله طليق والدتها بعد تهديده ليهم وعدم اعطائه الفلوس اللي طلبها!
رواية رشيد وكارمن بقلمي ملك إبراهيم.
جوه المستشفى.
اتعرف رشيد علي جـ.. ثة سهير سالم وحزن كتير بعد رؤيتها، قال معاه خالد وبلغه انه هيرجع لقسم الشرطة ويبدأ التحقيق مع المتهم في صباح الغد وهيحاول يسرع في انهاء تصريح الد..فن وشهادة الوفاة ويخبر رشيد بكل التفاصيل.
ذهب خالد لقسم الشرطة ورجع رشيد لبيته وهو بيفكر ازاي هيخبر مراته بمو..ت والدتها.
رجع رشيد لبيته ودخل أوضة النوم، كانت كارمن نايمة وبتعانق جسمها بخوف، كانت زي الطفلة الصغيرة، بقى هو دلوقتي كل حاجة ليها بالحياة، تساءل جواه؛ هل يقدر يعيش معاها بسلام بعد كل اللي حصل بينهم؟ هل هينتهي فراقهم ويرجعوا عاشقين زي ما كانوا بالسابق بعد رحيل والدتها؟ هل بمو..ت والدتها انتهى كل حاجة سببت في فراقهم ولا فيه حاجات تانية هتكشف في الايام الجاية؟ لقد ارهقه التفكير كتير واشتاق ليها اكتر !
قرب منها واتمدد جنبها فوق الفراش وهو بيتأملها بنظرات عاشقة، هي مكانتش حبيبته ومراته بس، بل كانت طفلته وكل حاجة ليه بالحياة، اشتاق كتير لضمها ورؤية ابتسامتها، رفع ايديه بهدوء ومسد على خدودها الناعمة وبعدين شعرها الطويل وهو بيتأملها باشتياق.
قربت منه بجسمها وكأنها بتشتاق هي كمان لضمه. فتح دراعاته وضمها بقوة، كانت خايفة وحست بالأمان لما قربها من قلبه، همست بصوت خافت: "متبعدش عني تاني يا رشيد.. انا بموت من غيرك."
ضمها بقوة وهمس ليها: "انا عمري ما بعدت عنك يا كارمن.. انتي دايما اللي بتبعدي عني."
بكت جوه حضنه وهي متمسكة بيه بقوة عشان ميبعدش عنها، اتمسك بيها هو كمان وظل يمسد علي شعرها وهو جوه صراع قوي بين قلبه اللي بيعشقها وعقله اللي بيرفضها خوفا من ان تخذله تاني بدافع سذاجتها وضعف شخصيتها. غمضت عينيها جوه حضنه وهمست ليه: "انا بحبك اوي يا رشيد."
رق قلبه ليها وهو بيسمع صوتها الهامس، كان مشتاق ليها كتير، ضمها بقوة وبعدين رفع وشها ليه وتأملها بنظرات عاشقة وهمس لها بحب : "انا بعشقك.."
قدر اشتياقهم يذيب الجليد اللي كان بينهم واكتملت علاقتهم من جديد كزوج وزوجة.
رواية رشيد وكارمن بقلمي ملك إبراهيم.
في الصباح.
جوه قسم الشرطة.
دقق خالد النظر بواحد من الملفات واللي بيجمع معلومات عن المتهم وبيه معلومة هامة عن شغله السابق مع سعد بشار.
استغرب خالد من ترابط علاقة شغله بسعد بشار وهي نفس الفترة اللي اتجوز فيها من سهير سالم.
دقايق قليلة ودخل العسكري بالقا.. تل وسمح ليه خالد بالجلوس وبدأ الكلام معاه وتسجيل بعض المعلومات الشخصية عنه وأكد القا.. تل ان سهير هي اللي عايزة تقـ.. تله واللي عمله كان دفاع عن النفس وبدأ في قص رواية مش حقيقية عن الحادث.
حس خالد ان القا.. تل ده بيخفي حاجة، استخدم خالد حيلة ذكية وقال للقا.. تل بثقة: "عايز اقولك ان القصة اللي انت حكتها دلوقتي دي مش حقيقية.. لان المجني عليها كانت حاطة كاميرات في كل زوايا الشقة وكل حاجة اتسجلت وشوفناك وانت بتتـ.. هجم عليها وتقـ.. تلها."
انتفض القا.. تل بخوف وقال: "يا باشا انا كنت بهزر معاها صدقني وكان تهديدي لها مزيف مش حقيقي."
قال خالد بذكاء: "بس تهد..يدك لها كان حقيقي وده واضح جدا من كلامك معاها."
قال القا.. تل بتوتر: "يا باشا دا كان موضوع قديم وصدقني انا مينفعش ابلغ عنها ولا عن بنتها اساسا! انا كنت بهددها عشان اخد منها شوية فلوس، بس هي اللي صدقت وحاولت تقـ.. تلني وانا كنت بدافع عن نفسي وغصب عني قتـ.. لتها."
قال خالد بشك: "لا انا عايز اسمع الحكاية من الاول عشان افهم؟"
طليق سهير بخوف: "انا هفهمك الحكاية كلها يا باشا وهتتأكد بنفسك ان مكنش في نيتي قـ.. تل وكان دفاع عن النفس... من حوالي اربع سنين او اكتر، الباشا اللي كان مشغلني هو اللي طلب مني العب على سهير واتجوزها وبعد كده طلب مننا نستدرج بنتها.. اصل بنتها كانت متجوزة ظابط وكان الظابط ده معلم علي الباشا والباشا كان عايز يفضحه وينتقم منه وعشان كده طلب مننا نضحك على بنتها ونجيبها شقة سهير وواحد من الرجالة لمؤاخذة يعني يغـ.. تصبها ويصورها وهو معاها وننشر الصور والفيديوهات ونفـ.. ضح الظابط."
بص خالد للمتهم بصد.. مة وانتفض جسمه وهو بيتكلم بعنف: "وعملتوا ايه في بنتها؟!"
بص القا.. تل ليه بخوف وقال بتلعثم: "والله يا باشا محدش قرب من بنتها.. بنتها اصلا دافعت عن نفسها وضربت الواد على دماغه وفكرت انه ما.. ت."
التقط خالد انفاسه بصعوبة وكمل: "يعني ايه فكرت انه ما.. ت؟!"
قال المتهم بصدق: "يومها كلمنا بنتها وقولنالها ان امها تعبانه اوي وانا اخدت سهير وخرجنا وهو كان مستنيها في البيت ولما جت حاول يعـ.. تدي عليها زي ما كنا متفقين بس هي ضر.. بته بحاجة واغمى عليه وهي فكرته ما.. ت وانا استغليت خوفها ده وعملت اتفاق مع سهير ضد جوز بنتها بس والله العظيم يا باشا انا مليش دعوه كله كان بترتيب سعد بشار وهو اللي طلب مني اهدد بنت سهير ونستغلها ونحط مخد... رات في دولاب جوزها ونبلغ عنه وبعدها سعد بشار طلب مني اقنع بنت سهير تروحله السجن وضحكنا عليها وفهمناها انها لو راحتله هيخرج جوزها من السجن وبعد كده جالي اوامر من سعد بشار اني اطلق سهير وابعد عنها، بس بصراحة انا طمعت في فلوس سهير ونصبت عليها وخدت كل فلوسها قبل ما اطلقها وبعدها سهير اختفت هي وبنتها اربع سنين وانا انفصلت عن شغلي مع سعد بشار بعد ما عصيت اوامره وخدت فلوس سهير من غير ما هو يعرف ومن فترة عرفت ان سهير رجعت غنيا أكتر من الاول وظهرت في حفلة وهي معاها فلوس كتير وعشان كده فكرت ارجع ابتزها واطلب منها فلوس واهددها بالموضوع القديم يمكن اعرف اطلع منها بقرشين.. والله يا باشا انا مكنش في نيتي اقتـ.. لها وهي اللي صدقت وحاولت تقـ.. تلني."
سمع خالد كلامه بصدمة وذهول. موقفش المتهم عن الكلام وهو بيقسم ليه انه قتـ.. ل سهير دفاعا عن النفس، قال ليه خالد بفضول: "اسمه ايه الظابط اللي انتوا عملتوا معاه كده؟"
جاوب المتهم بخوف: "اسمه رشيد الجبالي يا باشا بس احنا كنا بنفذ اوامر سعد بشار وملناش دعوه."
قال خالد مرة تانية: "والراجل اللي حاول يعتدي على مرات الظابط حصله ايه؟"
جاوب المتهم بثقة: "كان جرح صغير في راسه وفاق بعدها وسعد بشار امر انه يختفي عن هنا وبعته يشتغل في اسكندرية ومعرفش بعدها حصله ايه!"
قال خالد: "عايز اعرف اسمه ايه؟"
هز المتهم راسه بالموافقة وقال برجاء: "انا قولتلك كل الحقيقة يا باشا والله انا مظلوم وكنت بدافع عن نفسي."
بص خالد للعسكري وامره بأخد المتهم للحبس تاني. خرج المتهم من أوضة التحقيقات وبص خالد قدامه بصدمة مش مصدق كل اللي سمعه دلوقتي.
رواية رشيد وكارمن بقلمي ملك إبراهيم.
جوه شقة رشيد.
صحي رشيد على صوت تليفونه بيعلن عن اتصال من خالد. بص للتليفون ووطى صوته وبعدين بعد عن كارمن وخرج من الأوضة عشان يقدر يتكلم بعيد عنها.
سمع صوت خالد وهو بيتكلم معاه بنبرة حزينة وطلب منه مقابلته دلوقتي ضروري . استغرب رشيد وحس ان فيه حاجة هامة عايز خالد يقوله عليها. رجع للأوضة بسرعة وأخد هدومه ودخل للحمام. صحيت كارمن لكنها ادعت النوم بخجل بعد اللي حصل بينهم ليلة امبارح.
بعد دقايق قليلة خرج رشيد من الحمام وبعدين اسرع في الخروج من البيت وذهب لمقابلة خالد في واحد من الاماكن الهادية اللي اتعود الاتنين يروحوا ليها عشان يتكلموا مع بعض بهدوء.
وقف رشيد بعربيته قدام عربية خالد، نزل خالد من العربية ونزل رشيد هو كمان وهو بيبص ليه بفضول، وقف قدامه خالد وقال بقلق: "في حاجات مهمة عرفتها وانا بحقق مع طليق سهير وانت لازم تعرفها."
بص ليه رشيد باهتمام. زفر خالد بضيق وكمل: "اول حاجة لازم تعرفها ان طليق سهير طلع واحد من رجالة سعد بشار."
بص ليه رشيد باستغراب: "يعني ايه!!؟"
جاوب خالد بتردد: "مش عارف ابدأ منين!"
قال رشيد بقلق: "ماتتكلم يا خالد نشفت د..مى..؟!"
بص ليه خالد بتوتر وبدأ يخبره بكل حاجة قالها المتهم.
انتفض رشيد من مكانه بعد ما قاله خالد انهم رتبوا لا.. غتـ... صاب مراته وتصويرها وبعدين قاله انها قدرت تدافع عن شرفها وقامت بضر.. ب الراجل فوق راسه واستطاعوا بخداعها انه ما.. ت وابتزازها انها تحط ليه المخد... رات جوه خزانة هدومه وابتزازها لحد ما تروح لزيارة سعد بشار.
قعد رشيد مكانه بصدمة بعد ما قاله بيه خالد. مش مصدق ان كارمن اتحملت كل ده لوحدها، لكنه تساءل ليه معرفتوش بكل ده من قبل؟ مين منعها من الكلام؟!
قال خالد بحزن بعد ما قاله بكل حاجة: "كلنا ظلمنا كارمن يا رشيد وهي للاسف كانت ضحية لمجر.. مين معدومين الضمير وامها الله يرحمها هي السبب في كل ده."
قال رشيد بحزن: "انا مش قادر افهم هي ليه خبت عليا كل ده!"
جاوب خالد بثقة: "اكيد خافت منك يا رشيد.. يعني هي فاكره انها قتـ.. لت وجوزها ظابط.. يعني اكيد هتخاف تقولك."
قال رشيد بحزن: "انا اللي مقدرتش اكسب ثقتها كفايه يا خالد."
قال خالد بفضول: "المهم انت بتفكر تعمل ايه دلوقتي؟"
قال رشيد: "انت عرفت منه اسم اللي كارمن فاكره انها قتـ.. لته؟"
جاوب خالد: "اه عرفت اسمه وعرفت انه في اسكندرية."
هز رشيد راسه بالموافقة. كمل خالد بفضول: "طب هتعمل ايه دلوقتي.. تصريح الد.. فن هيخرج بكره الصبح."
قال رشيد بحزن: "ربنا يرحمها هي اللي كانت السبب في كل اللي حصلنا ده."
قال خالد: "كارمن لازم تعرف يا رشيد وكمان لازم ناخد اقوالها بكره على الاقل."
هز رشيد راسه بالموافقة: "حاضر يا خالد انا هحاول اقول لكارمن."
خالد: "والكلام اللي طليق مامتها قاله؟ هتقولها انك عرفت؟"
جاوب رشيد: "لا يا خالد.. مش قبل ما اوصل للي حاول يعـ.. تدي عليها وهي فكرت انها قتـ.. لته.. انا لازم اعلم كارمن تثق فيا."
هز خالد راسه: "اللي تشوفه يا رشيد.. وانا هخلصلك كل الإجراءات وان شاء الله بكره تيجي تستلم تصريح الدفن."
هز رشيد راسه بالموافقة وشكره علي مساعدته ووقف شاردا في اللي قاله خالد. دلوقتي اتأكد من برائة كارمن.
رواية رشيد وكارمن بقلمي ملك إبراهيم.
بعد عدة ساعات وقبل ما يرجع رشيد للبيت.
كلم جد كارمن في الصعيد وبلغه بوفاة والدة كارمن وطلب منه انه يجي في الصباح لحضور مراسم الد..فن.
وبعدين رجع لبيته وهو بيفكر ازاي هيخبر كارمن بمو.. ت والدتها.
كانت كارمن قاعدة شاردة قدام التلفاز، بتفكر في اللي حصل بينها وبين رشيد، وبتفكر في والدتها وبتتساءل جواها ايه اللي عملته والدتها مع طليقها وهل ادته الفلوس اللي طلبها ولا هينفذ تهديده ويخبر رشيد بكل حاجة. مش عايزة تخسر رشيد تاني.
بعد كتير من التفكير قررت انها تواجه مشكلتها وتخبر هي رشيد ويحصل اللي يحصل مبقتش تبالي بحاجة! هي خسرت كل حاجة ومبقاش فيه حاجة تخسرها تاني.
دخل رشيد الشقة وقرب منها وهو في حيرة ومش عارف منين يبدأ الكلام وازاي يخبرها.
كانت كارمن في نفس الحيرة وقال الاتنين مع بعض في نفس اللحظة:
رشيد: "في حاجة مهمة عايز اقولهالك."
كارمن: "في حاجة مهمة عايزة اقولهالك."
بص الاتنين لبعض بدهشة وتأملها رشيد بدهشة وقال: "حاجة ايه اللي عايزة تقوليها؟!"
قالت كارمن بتوتر: "قول انت الاول كنت عايز تقول ايه؟"
قفل التلفاز وقعد قدامها وهو بيبص ليها باهتمام وقال: "مش مهم انا كنت عايز اقول ايه.. المهم انتي عايزة تقولي ايه.. اتكلمي يا كارمن وانا هسمعك."
اتوترة كتير وبعدين وطت وشها وهي بتفرك بايديها بقوة وقالت بصوت هامس: "انا عايزة اعترفلك بحاجة.."
هز راسه وقال: "قولي انا سامعك؟"
غمضت عينيها عشان تشجع نفسها علي الكلام وبعدين قالت بصوت قوي وسريع عشان متخفش تاني وتتوقف عن الكلام زي ما كان بيحصل معاها دايماً: "انا السبب في كل اللي حصلك.. انا اللي حطيت المخد... رات في دولابك.."
وبعدين رفعت عينيها اللامعة بالدموع وبصت ليه وكملت: "بس صدقني كان غصب عني.. انا مكنتش اعرف ان كل ده هيحصل."
متفاجئش من كلامها زي ما كانت بتتوقع، بل استقبل كلامها بهدوء وقال: "مين اللي طلب منك تعملي فيا كده؟"
بكت وجاوبت: "ماما وجوزها.. هما اللي طلبوا مني اعمل كده وماما فهمتني ان انت مش هتتأذي.. قالتلي ان انت هتاخد جزا في شغلك بس ومش هيحصل اي حاجة."
سمع ليها من غير رد فعل غاضب وده اللي استغربته كارمن وحست انه يعرف كل حاجة واعتقدت ان طليق والدتها نفذ تهديده لوالدتها وقاله بكل حاجة.
كارمن باستغراب: "رشيد انت ليه مش متفاجئ من كلامي؟!"
تأملها بصمت، حست بالقلق أكتر وقالت بسذاجتها المعتادة: "انت قابلت طليق ماما؟.. هو قالك حاجة؟!"
قال بهدوء: "مش فاهم.. هو كان بيهددك بحاجة؟"
وطت وشها وقالت بتوتر: "ايوه.."
وبعدين سكتت شوية وبعدين كملت بخوف: "طلب من ماما فلوس وهددها لو مخدش الفلوس هيبلغ عني وهيقولك كل حاجة."
قال بغضب مكتوم: "هيقولي ايه بالظبط؟"
بصت ليه بتوتر، مش هتقدر تتراجع دلوقتي، كان قلبها علي وشك التوقف من شدة الخوف لكنها بدأت الكلام وعليها تتخلص من خوفها دلوقتي: "هيقولك ان انا قتـ.. لت."
بص ليها بصدمة، بكت بحزن وبصت لايديها وهي بتفتكر د..ماء الراجل اللي قتـ..لته وبدأت في قص عليه كل اللي حصل معاها. انهارت في البكاء وهي بتفتكر اللي حصل في الماضي وبتقوله كل حاجة بحزن وندم.
بص ليها بحزن وقال: "لو كنتي حكيتيلي اللي حصل معاكي ده وقتها اكيد مكناش هنوصل للي وصلناله دلوقتي."
شحب وشها بخوف وقالت بتلعثم: "خوفت اقولك.. صدقني انا كتير حاولت اقولك بس خوفت."
قال بحزن: "خوفك مني ملوش غير معني واحد.. ان انتي عمرك ما وثقتي فيا."
بصت ليه بحزن وهي بتبكي: "انا عشت عمري كله مسجونه جوه الخوف.. خوفي هو اللي كان بيتحكم فيا... كتير اتمنيت ان يكون عندي القوة واقدر اهزم خوفي وانتصر عليه.. بس كان دايما هو اللي بينتصر عليا وانا كنت بخسر.. خسرتك وخسرت حبك ليا وخسرت ابني وخسرت اربع سنين من عمري.. خسرت حاجات كتير بسبب خوفي وجه الوقت اواجه خوفي وكفايه خسارة لاني تعبت ومبقتش هتحمل خسارة تانيه."
هز راسه بحزن وهو بيتأملها: "في حاجة كمان خسرتيها.."
بصت ليه بدهشة، اتنهد بتعب وبعدين التقط نفسا عميق: "مامتك.."
بصت ليه بصدمة واعتقدت ان والدتها عملت حاجة تانية، اتنفس مرة تانية بعمق وكمل: "مامتك اتوفت امبارح.. وتصريح الد..فن هيكون جاهز بكره الصبح."... بقلمي ملك إبراهيم.
تفتكروا كدا الشر انتهى ولا لسه في مفاجأت تانيه 😱🤔🏃🏃 ♥️
#الحلقة_ال28
#رواية_رشيد_وكارمن
#الكاتبة_ملك_إبراهيم
"كارمن عقلها رفض الاستيعاب"
وقالت بصوت متقطع: "انت قولت ايه؟! مامت مين اللي ما..تت؟ انت بتهزر معايا يا رشيد صح؟ انت عارف ماما.. ماما بتحب الحياة، هي اكيد زعلانة مني عشان انا اتكلمت معاها بعصبية اخر مرة لما جت هنا صح؟ انا والله كنت بفكر ازاي هجبلها الفلوس عشان تديها لطليقها عشان يبعد عنها.. ماما بتحب الفلوس واكيد هتكون فرحانه اوي لو اخدت تمن ارضي واديتهولها.."
بص ليها بحزن وبعدين جذبها من ايديها وضمها بقوة، موقفتش عن الكلام ومستوعبش عقلها اللي قاله لحد دلوقتي، ضمها بقوة شديدة لحد ما بكت جوه حضنه وقالت بصوت باكي: "ماما كويسه يا رشيد؟ انت بتهزر صح؟"
ضمها بقوة أكبر وهمس ليها: "ادعيلها بالرحمه يا كارمن."
صر..خت جوه حضنه وهي بتبكي بانهيار، مش مصدقة ان والدتها فارقت الحياة وهي غضبانة منها، كانت بتنادي والدتها بصر.. اخ وبتقولها انها هتديها الفلوس اللي هي عايزاها ، عارفة ان والدتها بتعشق الفلوس.
مسبهاش تبعد عنه وهو بيحاول يهديها وهي بتصر.. خ وبتصر.. خ وبتنادي والدتها بصر.. اخ وبكاء لحد ما فقدت الوعي.
شالها بين ايديه وأخدها لجوه الأوضة وحطها فوق الفراش برفق وقعد جنبها بيتأملها بحزن وهو بيمسد فوق شعرها وبعدين كلم الدكتور وبلغه باللي حصل معاها وجه الدكتور واداها حقنة مهدئة عشان تقدر تنام لوقت اطول.
فضل رشيد صاحي جنبها لحد الصباح الباكر. وصل جد كارمن وعمتها وداد وفراج ابن عمها ومراته ازهار لبيت رشيد لحضور مراسم الد..فن. بلغهم رشيد باللي حصل مع كارمن لما بلغها بمو..ت والدتها وبلغهم انه مقدرش يقولها ان والدتها لقت مصر..عها علي ايد طليقها السابق.
فهم الحاج عبد الرازق اللي عمله رشيد وطلب من وداد وازهار انهم يفضلوا مع كارمن بالبيت والرجالة هيروحوا لد..فن جثمان سهير.
ذهب رشيد مع الحاج عبد الرازق ومعاهم فراج لاستلام جثـ.. مان سهير من المستشفى واكرامها بالد.. فن.
قعدت وداد جنب كارمن فوق الفراش لحد ما صحيت كارمن وفتحت عينيها وهي حاسة بألم شديد براسها.
مسدت وداد فوق شعرها وهي بتبتسم ليها بحنان وقالت: "عامله ايه دلوقتي يا حبيبتي؟"
بصت ليها كارمن بدهشة وقالت بصوت خافت: "انا فين؟!"
جاوبت عليها ازهار بابتسامة حزينة: "انتي في بيت جوزك يا كارمن.. طمنينا عليكي عاملة ايه دلوقتي؟"
اعتدلت كارمن فوق الفراش وبصت ليهم باستغراب: "انتوا جيتوا هنا امتى؟!"
جاوبت عليها عمتها بحنان: "من شويه يا حبيبتي.. جوزك كلم جدك امبارح وقاله اللي حصل واحنا جينا علي طول عشان نكون جنبك."
بصت كارمن قدامها وافتكرت كلام رشيد معاها قبل ما تفقد الوعي، نزلت دموعها على خدودها واصطحبها شهقات قوية وهي بتتكلم ببكاء: "رشيد بيقول ان ماما ما.. تت!!"
بصت لعمتها وداد ولقتها بتوطي وشها بحزن، سألت عمتها بصدمة وهي بتبكي: "كلام رشيد حقيقي!؟ ماما فعلا ما.. تت؟"
قالت ازهار بحزن: "ادعيلها يا كارمن بالرحمه.. هي مش محتاجة منك دلوقتي غير الدعاء."
قالت كارمن وهي بتبكي بانهيار: "لا هي كانت محتاجة مني فلوس وانا قولتلها لا.. هي كانت مش محتاجة مني غير الفلوس.. طب خلوها ترجع وانا هديها الفلوس اللي هي عايزاها بس ترجعلي تاني."
قالت وداد بحزن: "لا حول ولا قوة الا بالله.. فلوس ايه بس يا بنتي اللي هي عايزاها دلوقتي! وهتعملها ايه الفلوس وهي عند اللي خلقها.. الفلوس مش هتنفعها دلوقتي بحاجة يا كارمن.. دعائك هو اللي هينفعها دلوقتي يا بنتي.. ادعيلها ربنا يرحمها ويسامحها."
بدأ عقل كارمن يستوعب حقيقة مو.. ت والدتها، صوت والدتها وهي بتخبط على باب بيتها وبتتكلم معاها وبتطلب منها الفلوس، لسه الصوت بيتردد في ودنها، حاسة بالذنب ناحية والدتها، بتتمنى لو يرجع الزمن كانت ادتها كل الفلوس اللي عايزاها عشان متسيبهاش وتمشي. فضلت تبكي وبتهمس بكلمات مش مفهومة للقاعدين جنبها، كانت بتردد الاعتذار لوالدتها والشعور بالندم كان بيقطع نياط قلبها. عانقتها عمتها وداد بقوة وهي بتطبطب علي ضهرها وبتقرأ ما تيسر ليها من آيات القرآن الكريم لحد ما تهدأ كارمن وترضى بقضاء الله.
رواية رشيد وكارمن بقلمي ملك إبراهيم.
وقف رشيد قدام القبر بعد دفن جثـ.. مان سهير وبجواره خالد وفراج وبيقف في الخلف الحاج عبد الرازق جنب اللواء نور الدين الجبالي وبجوارهما والد رشيد اللي كان واقف حزين علي مو.. تها وبيدعي ليها من قلبه بالرحمة.
كان رشيد واقف قدام القبر رافع ايديه وبيدعي ليها بالرحمة والمغفرة، بيفتكر لما قابلها اول مرة لما راح ليها مع جده لانهاء زواجها من والده، وبعدين مقابلته معاها لما راح يطلب منها الجواز من بنتها، ذكريات كتيرة جمعتهم ومواقف عديدة، بيفتكر اللي كانت بتعمله وبيدعي ليها بالرحمة والمغفرة.
انتهى كل شئ وذهب الجميع وتركها.. وتبقى جسد سهير تحت التراب لوحدها امام الله عز وجل.
ندعو الله بالرحمة والمغفرة لكل امواتنا واموات المسلمين اجمعين.
رواية رشيد وكارمن بقلمي ملك إبراهيم.
رجع رشيد لشقته ومعاه جده ووالده وجد كارمن وفراج عايزين يقابلوا كارمن لتأدية واجب العزاء.
قالت وداد لكارمن وبلغتها ان الجميع في الخارج مستنيينها عشان تستقبل العزاء في والدتها.
ساعدتها وداد علي لبس ثوب اسود وخرجت كارمن من الأوضة جنب عمتها وهي صامتة ودموعها اتجمدت جوه عينيها، وقف الجميع قدامها. سمعت كارمن صوت والدتها مرة تانية وهي بتناديها من ورا الباب، بصت لباب الشقة وصوت والدتها وخبطها القوي على الباب بيتردد علي ودنها وكأنها بتسمعه حقيقي، سابت الجميع وجريت لباب الشقة وقامت بفتحه وهي بتتكلم بلهفة: "ماما.."
ملقتش حاجة، وقفت بتبص يمين وشمال بتدور على والدتها وبعدين رجعت ببصرها ليهم وقالت بثقة: "ماما كانت هنا بتنادي عليا دلوقتي."
استغرب الجميع وتبادلت النظرات بينهم، قرب منها رشيد وقال ليها بهدوء: "مفيش حد بينادي عليكي يا كارمن!"
مسك بايديها وأخدها لجوه وقفل الباب، نزعت ايديها من بين ايديه بعنف وصر.. خت فيه بغضب: "انت قفلت الباب ليه؟.. انت مش عايز ماما تيجي هنا صح؟.. انت اصلا مبتحبهاش.."
وبعدين بصت لجدها وفراج وجد رشيد ووالده وقالت ليهم بنبرة غاضبة وهي بتبص ليهم بعدوانية: "انتم كلكم مبتحبوهاش.. جايين تمثلوا ان انتم زعلانين عليها بس الحقيقة انكم كلكم مرتاحين وفرحانين انها ما.. تت..."
وبعدين قربت منهم بخطوات واسعة غاضبة ووقفت قدام جد رشيد وقالت بقسوة ونبرة عدوانية: "انت طبعا اكتر واحد في الدنيا بتكرهها.. اه طبعاا.. ازاي سهير سالم تتجوز ابن اللوا نور الدين الجبالي!! لا ومش بس كده.. دي بنت سهير سالم كمان اتجوزت حفيدك!! لا.. لا.. سهير سالم وبنتها لازم يمو.. توا! يا اما يبعدوا عن البلد وكأنك انت وابنك وحفيدك اشتريتوا البلد كلها واحنا ملناش حق نرجع غير بأمر منك!! انت اكتر انسان يستاهل المو.. ت مش هي.. علي الاقل سهير سالم كانت واضحة وصريحة لكن انت طول الوقت عايش جوه شخصية الراجل الشريف والحقيقة غير كده.. اكيد مفيش راجل شريف يروح يهدد ست وبنتها بالمو.. ت لو مبعدوش عن حفيده وسابوا بيتهم وحياتهم وسافروا لبلد تانية.. مين اداك الحق ده؟ انت مين اصلا عشان تتحكم في حياتنا؟!"
بص ليها جد رشيد بصدمة! مهتمتش بصدمته ولا بصوت رشيد وهو بيحاول يمنعها عن الكلام، وقفت قدام والد رشيد وقالت: "على فكرة ماما زي ما كانت بتدور على الفلوس كانت بتدور على راجل بجد يكون امانها وحمايتها.. بس للاسف من بعد بابا مقابلتش الراجل ده!! كلكم شايفين ان سهير سالم كانت بتتجوز الرجالة طمع في فلوسهم.. مفيش مرة سألتوا الرجالة دول كانوا بيتجوزوها طمع في ايه؟! انا بسألك دلوقتي قدام الكل.. انت اتجوزت ماما ليه؟"
بص ليها والد رشيد بصدمة، ابتسمت ساخرة وكملت: "مفيش حد فيكم احسن ولا اشرف من ماما.. اوعوا تفكروا انكم ملايكة.."
بعدت عنهم ووقفت بتتكلم بصوت مرتفع: "ماما كانت احسن واشرف منكم كلكم 100 مرة."
قرب منها رشيد وقال ليها بغضب: "كارمن.. اسكتي.. كفايه."
ضحكت ساخرة وهي بتبص ليه وقالت بنبرة غاضبة: "رشيد باشا الجبالي.. رشيد المظلوم اللي انا ضيعت مستقبله.. رشيد باشا اللي اتجوزني غصب عن ماما.. عارفين هو اتجوزني ليه؟! عشان شافني بنت ضعيفة ومليش شخصية، لعبة بين ايديه يقدر يتحكم فيا وفي حياتي براحته. واهو بالمرة ينتقم من ماما على جوازها من باباه.. طبعا حفيد اللوا نور الدين الجبالي لازم ينتقم من الست اللي اتجوزت باباه من غير اذن الباشا الكبير حضرة اللوا."
بص ليها رشيد بصدمة وقال بذهول: "انتي اكيد اتجننتي!"
صر..خت بقسوة: "انا فعلا اتجننت.. اتجننت لما ماما وقفت تصر..خ علي باب بيتك هنا وانا مش قادرة اشوفها بسبب ان انت حبسني وقافل عليا.. انا مش مسجونة عندك عشان تتعامل معايا بالطريقة المهينة دي.. انا انسانة ومش من حق اي حد فيكم انه يهد..دني او يخو..فني.. انا خلاص مبقتش اخاف من حد واقدر اواجه كل واحد فيكم بحقيقته."
قال ليها رشيد بغضب: "المهم تبقي واثقة ان الحقايق اللي انتي بتوجهينا بيها دي هي دي الحقيقة مش اوهام من خيالك."
جاوبت عليه بقسوة: "لو كانت اوهام من خيالي كان زمانك طلقتني من اربع سنين.. تقدر تقولي انت ليه سبتني علي ذمتك طول السنين دي! مفكرتش لحظة ان انا كنت ممكن اتجوز غيرك وانا مسافرة وطبعا كنت فاكرة انك طلقتني زي ما جدك قالنا...! اقولك بقا انت مطلقتنيش ليه؟ عشان عايزني طول عمري اكون عبدة ليك.. عايز انت بس اللي تتحكم في حياتي وعمري ومستقبلي."
بص ليها بصدمة وبعدين جاوب عليها بغضب: "لا انا مطلقتكيش عشان حاجة تانية خالص.. عشان حبيتك.. فاهمه يعني ايه؟!"
ضحكت ساخرة وقالت بغضب: "وانا مش عايزة الحب ده.. ملعون اي حب يعيشني مسجونة.. انا مش هقبل ان باب البيت ده يتقفل عليا تاني.. انا اتخلقت حرة وملكة نفسي ومش هكون ملك ليك او لغيرك تاني."
عقد ما بين حاجبيه وقال: "تقصدي ايه؟!"
جاوبت بقوة وثقة: "يعني انا عايزة اطلق منك دلوقتي حالا."
شهقت ازهار بصدمة وجريت وداد ناحية كارمن وقالت بفزع: "انتي بتقولي ايه يا بنتي.. استهدي بالله."
قال الحاج عبد الرازق: "كارمن تعبانة واكيد مش في وعيها.."
وبعدين بص للواء نور الدين وابنه وجيه وكمل: "متأخذوناش انتوا اكيد مقدرين اللي هي فيه دلوقتي."
قالت كارمن باصرار: "لا يا جدي.. انا عارفه انا بقول ايه.. انا مش هينفع اكمل حياتي مع رشيد.. احنا لحد كده وحكايتنا انتهت والافضل ان كل واحد فينا يروح لحاله."
قال رشيد بعناد: "انتي عندك حق.. فعلا احنا مبقناش ننفع لبعض وكفايه لحد كده.."
تأملها بعمق وكمل: "انتي طالق يا كارمن."
هربت دمعة من عينيها وهي بتسمع كلمة الطلاق، صر.. خت وداد بصدمة: "يا حزني.. لا حول ولا قوة الا بالله.. ليه كده بس يا بني!"
قال رشيد وهو مازال بيبص لكارمن: "دا الافضل لينا احنا الاتنين وان شاء الله ربنا يوفقها في حياتها.."
وبعدين كمل وهو بيبص للحاج عبد الرازق: "انا كاتب الشقة دي باسم كارمن من اول ما اشتريتها.. هبعت حد ياخد حاجتي وان شاء الله حقوقها كلها هتوصلها كاملة."
وبعدين بص لجده ووالده وكمل: "خلينا احنا نمشي.."
وبعدين بص ليها نظرة اخيرة وذهب من البيت، لحق بيه جده ووالده وهما بيبصوا لكارمن بصمت.
استنى الحاج عبد الرازق لحد ما ذهب رشيد وجده ووالده وبعدين قال لكارمن بحزن: "ليه عملتي كده يا بنتي؟ جوزك كان بيحبك وباقي عليكي.. ليه تهيني اهله قدامه وتهينيه قدامنا كلنا؟!"
بكت كارمن وقالت بحزن: "خلاص يا جدي.. انا ورشيد مبقناش ننفع لبعض بعد كل اللي حصل.. كل ما اشوفه هفتكر ماما وهحس بالذنب."
قربت منها عمتها وداد وربتت فوق ضهرها وبعدين ضمتها، انهارت كارمن جوه حضن عمتها.
بص فراج لجده بقلة حيلة، أخدتها عمتها وداد لجوه الأوضة ودخلت ازهار معاهم.
قرب فراج من جده وقال: "وبعدين يا جدي.. هنعمل ايه دلوقتي؟"
جاوب جده: "كارمن هترجع معانا البلد وهتعيش معانا هناك.. مش هينفع نسيبها تعيش هنا لوحدها."
رواية رشيد وكارمن بقلمي ملك إبراهيم.
بعد مرور شهرين.
جوه دوار الحاج عبد الرازق.
قعدت وداد جنب والدها وقالت بحزن: "وبعدين يا ابويا.. هنسكت علي الحالة اللي كارمن فيها دي؟"
اتنهد الحاج عبد الرازق بحزن وجاوب: "واحنا في ايدينا ايه نعمله يا وداد.. احنا بنوديها للدكتور في مصر ومتابع معاها! مفيش في ايدينا حاجة نعملها أكتر من كده."
قالت وداد بعدم رضا: "متابع معاها ايه بس يا ابويا.. دي البت مبتتكلمش مع حد فينا خالص وطول الوقت ساكتة وقاعدة في الارض بتتفرج على الفلاحين وهما بيشتغلوا وهي سرحانة وكأنها في عالم تاني!"
قال الحاج عبد الرازق: "واللي هي عاشته مش قليل برضه يا وداد.. سبيها لوحدها تعمل اللي هي عايزاه.. الدكتور قالنا كده.. واكد ان محدش فينا يضغط عليها في حاجة."
اتنهدت وداد بعدم رضا: "اللي تشوفه يا ابويا."
رواية رشيد وكارمن بقلمي ملك إبراهيم.
تحت الشمس الساطعة وسط الأراضي الزراعية الخضرا..
كارمن كانت قاعده بتتابع شغل الفلاحين، كانت بتبص للأرض اللي بتنبت الزرع والفلاحين وهما بيحصدوا المحصول وبعد ايام بيقوموا بتجهيز الارض لاستقبال زرع جديد وكأن حياة الارض بتتجدد مع كل زرع جديد بينبت جواها. اتمنت لو تقدر تحصد اللي عاشته بعمرها السابق وتسيبه بعيد عنها وتبدأ حياتها من جديد. اتمنت لو تقدر تزرع الشغف والأمل والحياة والسعادة والحب جواها من جديد. ومين يقدر يمنعها دلوقتي! اتنهدت وابتسمت وهمست لنفسها: "وايه يمنع ان انا انسى كل اللي فات وابدأ من جديد.. انا عايزة اعيش حياة اكون فيها مرتاحة ومبسوطة.. حياة بدون خوف، بدون هروب، بدون ناس يضغطوا عليا نفسيا، انا حرة وعايزة اعيش حرة."
وقفت واتحركت بخفة وكأنها فراشة بتحلق بين الأزهار، بتفتح دراعاتها للحياة، مش خايفة من حاجة بعد دلوقتي، هي عايزة بس تعيش وقلبها بينبض بالحياة. وقعت فجأة على الارض فاقدة الوعي، جري الفلاحين عليها بهلع. صدح صوت واحد من الفلاحين بيطالب واحد من الخفر بسرعة اخبار الحاج عبد الرازق باللي حصل مع حفيدته. وقاموا بأخدها للوحدة الصحية بالقرية بمساعدة بعض السيدات.
رواية رشيد وكارمن بقلمي ملك إبراهيم.
فتحت عينها وهي حاسة بحاجة باردة بتضغط علي بطنها، ابتسمت ليها الدكتورة وقالت: "حمدلله.."
استغربت كارمن وبصت لايد الدكتورة وهي بتكشف عليها عن طريق السونار الطبي وبتبص للشاشة قدامها وبتبتسم وبعدين قالت الدكتورة: "الجنين وضعه تمام جدا ماشاء الله ومفيش قلق عليه."
شهقت كارمن بصدمة وقالت: "جنين ايه؟!"
بصت ليها الدكتورة باستغراب وقالت: "معقول انتي مش عارفه انك حامل في شهرين؟!"
شهقت كارمن وبصت للشاشة جنبها وقالت بصدمة: "حامل ازاي مش معقول!!.. اكيد في حاجة غلط؟!"
حركت الدكتورة الجهاز واشارت بايديها علي نقطة الجنين وقالت بثقة: "لا طبعا مفيش اي حاجة غلط والجنين واضح قدامي اهو."
بصت كارمن للنقطة اللي بتشاور عليها الدكتورة بصدمة واسترسل ليها عقلها بسرعة اللي حصل بينها وبين رشيد قبل طلاقهم بيوم.
أخدت الدكتورة منديل وادتهولها عشان تجفف بطنها بعد انتهاء الكشف ورجعت الدكتورة وقعدت قدام مكتبها عشان تدون ليها بعض الأدوية والفيتامينات اللازمة في الشهور الأولى من الحمل.
دخلت وداد أوضة الكشف بلهفة وقلق وجريت لكارمن بتتكلم معاها بقلق: "كارمن ايه اللي حصلك يا بنتي.. الفلاحين بيقولوا انك وقعتي في الارض فجأة.."
وبعدين بصت للدكتورة وقالت بلهفة: "طمنيني يا دكتورة ايه اللي حصلها فجأة كده خلاها تقع من طولها؟"
انتهت الدكتورة من كتابة الدواء اللازم ليها وجاوبت على سؤال عمة كارمن بهدوء: "اطمني حضرتك ده بيحصل طبيعي في الشهور الأولى.. بس الأم محتاجة تتغذى كويس جدا وتاخد الادوية دي في مواعيدها."
بصت وداد لكارمن باستغراب وبعدين بصت للدكتورة مرة تانية وقالت بعدم فهم: "شهور ايه اللي اولى يا دكتورة وام ايه انا مش فاهمه حاجة؟!"
جاوبت الدكتورة باختصار: "بنت حضرتك حامل في شهرين."
بصت وداد لكارمن بابتسامة وسعادة وقالت بحماس: "بجد يا كارمن.. الف مبروك يا حبيبتي."
بصت ليها كارمن بحزن: "مبروك على ايه يا عمتي! انا في مصيبة."
قربت منها عمتها وقالت باستغراب: "مصيبة ايه يا حبيبتي بعد الشر عليكي.. دي بشرة خير عشان ترجعي لجوزك والماية ترجع لمجاريها."
قالت كارمن باعتراض: "لا يا عمتي انا مش عايزة ارجعله بالطريقة دي ومش عايزة ارجعله اساسا."
عقدت وداد ما بين حاجبيها باستغراب وقالت: "يعني ايه يا كارمن الكلام ده؟!"
جاوبت كارمن بثقة وهي حاطة ايديها فوق بطنها بحماية: "يعني انا مش هستخدم الطفل ده عشان ارجعله ومش عايزاه يعرف اصلا ان انا حامل.. الطفل ده انا هربيه لوحدي."... بقلمي ملك إبراهيم.
تفتكروا رشيد هيعرف ان كارمن حامل ولا لأ؟ 🤔🫣♥️
#الحلقة_ال29
#رواية_رشيد_وكارمن
#الكاتبة_ملك_إبراهيم
"إبني انا هربيه لوحدي."
وداد قالت باعتراض: "استغفر الله العظيم.. ايه الكلام اللي انتي بتقوليه ده يا كارمن! انتي كده بتغـ.. ضبي ربنا يا بنتي.. ربنا حرم اللي انتي عايزة تعمليه ده! وانا مش ممكن اشجعك على كده ابدا."
قالت كارمن باصرار: "ارجوكي يا عمتي دي حياتي وانا مش عايزه حد يتحكم في حياتي تاني.. انا مش هينفع ارجع لـ رشيد بعد كل اللي حصل بينا وهو مستحيل هيسامحني بعد ما اهانت اهله قدامه واهانته قدامكم كلكم."
قالت وداد بحزن: "رشيد بيحبك يا كارمن واكيد هيسامحك وهيقدر ان انتي كنتي زعلانة على فراق امك الله يرحمها.. سبيها لله بس وشوفي لما يعرف ان انتي حامل هيعمل ايه."
قالت كارمن باصرار: "ارجوكي يا عمتي انا مش عايزاه يفهم ان انا بستخدم الطفل ده عشان ارجعله.. انا مبقتش كارمن بتاع زمان مبقتش انفع رشيد خلاص."
اتنهدت عمتها براحة وقالت: "طيب يا كارمن اللي تشوفيه.. خلينا نرجع الدوار عشان ترتاحي هناك."
هزت كارمن راسها بالموافقة وذهبت مع عمتها بعد ما سمعت إرشادات الدكتورة لمتابعة الحمل.
رواية رشيد وكارمن بقلمي ملك إبراهيم.
جوه القاعة اللي بيقعد جواها الحاج عبد الرازق.
ضرب الحاج عبد الرازق بعكازته في الارض باعتراض علي كلام وداد وقال برفض: "انتي بتقولي ايه يا وداد! انتي عايزاني اغـ.. ضب ربنا واخبي حملها علي جوزها.. انتي فكراني ممكن أوافق علي الكلام اللي بتقوليه ده؟!"
قالت وداد بحزن: "صدقني يا ابويا انا قولتلها نفس كلامك ده بس هي منشفة راسها ومش عايزة تعرف جوزها."
قال الحاج عبد الرازق بقوة: "دماغها الناشفة دي تتكسر، جوزها لازم يعرف انها حامل وبعدين نشوف هنعمل ايه.."
وبعدين بص لفراج وكمل: "اسمعني يا فراج.. انت تتحرك دلوقتي وتاخد اول قطر لـ مصر وتروح عند رشيد وتعرفه ان مراته حامل وتتكلم معاه وتشوفه ناوي على ايه."
قالت وداد: "طب ما تتصل عليه يا ابويا وعرفه وشوفه ناوي علي ايه."
اعترض الحاج عبد الرازق: "الكلام ده مينفعش في التليفون يا وداد.. لازم حد مننا يسافر ويتكلم معاه ويعرفه عشان نبقى عملنا اللي علينا."
هز فراج راسه بالموافقة وقال: "حاضر يا جدي اللي تشوفه."
وقف فراج وذهب زي ما امره جده، بصت وداد لوالدها وقالت بقلق: "ربنا يستر."
قال الحاج عبد الرازق باقتناع: "هو ده الصح والأصول يا وداد.. وان شاء الله ربنا يقدم اللي فيه الخير."
رواية رشيد وكارمن بقلمي ملك إبراهيم.
صباح اليوم التالي.
وصل فراج لبيت عيلة رشيد. استقبلته والدة رشيد لوحدها، بلغها فراج انه ابن عم كارمن وعايز يشوف رشيد.
قعدت والدة رشيد بتبص ليه بغضب وقالت بنبرة غاضبة: "رشيد مش موجود تقدر تقولي اللي انت عايز تقوله وانا هبلغه."
قال فراج باحترام: "انا لازم اتكلم معاه بنفسي بعد اذنك.. انا جيت المشوار ده كله عشان اتكلم معاه هو."
قالت بنبرة حادة: "وعايز تتكلم معاه في ايه؟ مش خلاص موضوع كارمن ده اتقفل وخلصنا منها هي ومامتها.. فاضل ايه تاني في حياة ابني جايين تدمروه؟!"
قال فراج باحترام: "حضرتك انا جاي اتكلم معاه في موضوع مهم ولازم اقابله."
قالت بنبرة قوية: "ورشيد مش موجود."
قال بهدوء: "طب ممكن اعرف هيجي امتى او ممكن اقابل والد رشيد او جده."
قالت بعجرفة: "رشيد سافر خارج مصر بقاله شهر.. وباباه عنده شغل ومش فاضي.. وجده تعبان ومش بيقابل حد.. وبعدين احنا عندنا حاجات كتير اهم من كارمن ومشاكلها.. ياريت لو تبعدوا عننا وتسيبوا ابني في حاله لانه دلوقتي اتجوز بنت من عيلة تليق بعيلتنا وبيقضوا شهر العسل برا مصر وهيستقر هناك."
غضب فراج من اسلوبها معاه في الكلام وقال ليها بغضب: "وعيلة الهواري مش اقل من عيلتكم في حاجة.. شكلك متعرفيش ابنك كان مناسب عيلة مين قبل ما يناسب العيلة اللي تليق بعيلتكم دلوقتي.. على العموم ربنا يصلح حاله ويوفقه.. عن اذنك."
قالت ليه بعجرفة قبل ما يمشي: "ياريت تبلغ بنت عمك انها تبعد عن ابني وتسيبه في حاله ومتفكرش تدخل حياته تاني لانه مبقاش يكره حد في الدنيا قد ما بيكرها."
وقف فراج وقال ليها بغضب: "متقلقيش.. اللي في قلب ابنك مش اكتر من اللي في قلبها وبنت عمي متعرفش ان انا جيت اقابله النهارده وطلع عندها حق لما اصرت انها تخلص من عيلتكم."
سابها فراج ومشي، قعدت والدة رشيد مكانها بتحرك رجليها بعصبية بعد كلام ابن عم كارمن معاها. بعد دقايق قليلة نزل والد رشيد من فوق وقال ليها: "صباح الخير.. قاعدة كده ليه يا ماجدة.. كان في عندنا ضيوف ولا ايه؟!"
ارتبكت كتير وقالت بتوتر: "لا ضيوف ايه اللي هييجوا بدري كده.. انا هروح احضر الفطار عشان تفطر قبل ما تروح شغلك."
قال ليها قبل ما تمشي: "رشيد كلمني امبارح وطمني عليه وعلى جده وقالي ان ميعاد عملية جده اتحدد خلاص اخر الشهر الجاي."
وقفت ماجدة وقالت بتوتر: "احنا لازم نسافرلهم قبل ميعاد العملية بيوم ولا حاجة يا عمي يكون مطمن واحنا كلنا حواليه.."
قال وجيه بتأكيد: "ان شاء الله اكيد هنسافرلهم قبل العملية بيومين."
سكتت شوية وبعدين قالت: "ربنا يشفيك يا عمي.. دا كان كويس وعمره ما اشتكى من حاجة.. مش عارفه تعب ايه ده اللي حصله فجأة ودهور حاله بالشكل ده؟!"
قال وجيه بحزن: "من بعد ما رشيد طلق مراته وبابا حاسس بالذنب وقلبه تعبه.. والحمد لله اننا عرفنا بالمرض ده بالصدفة قبل ما ينتشر في كل جسمه."
قالت بغيظ: "الحمدلله ان ابني خلص منها.."
وبعدين بصت ليه بمكر وكملت: "واحنا خلصنا من امها.."
بص ليها زوجها وهمس جواه: "الله يرحمها.."
وبعدين وقف وقال بغضب: "انا رايح الشغل.. مليش نفس افطر."
مشي ومستناش يسمع كلامها.. وقفت والدة رشيد بتبص قدامها بغضب بعد ما افتكرت لما اتجوز عليها سهير والدة كارمن.. اشتعلت النيران جواها من جديد واتضاعف الكره جواها وحقدها على كارمن.
رواية رشيد وكارمن بقلمي ملك إبراهيم.
في المساء.
رجع فراج للقرية ودخل الدوار وهو غاضب بعد مقابلته مع والدة رشيد ومعرفته بخبر جواز رشيد في اقل من شهر بعد طلاقه لكارمن.
صدح صوت فراج عاليا وهو بيتكلم مع واحد من الخفر بغضب وبعدين اتجه للقاعة اللي بيقعد فيها جده وقال ليه جده بقلق: "خير يا فراج.. شكلك راجع مضايق؟"
قربت ازهار من باب القاعة بخطوات هادية عشان تسترق السمع زي ما اتعودت تعمل.
زفر فراج بعصبية وجاوب على جده: "يارتني ما كنت سافرت يا جدي.. كارمن كان عندها حق لما قالت انها مش عايزة تعرفه انها حامل."
استغرب جده وقال بقلق: "ليه ايه اللي حصل يا فراج؟ هو رشيد قالك ايه ضايقك كده؟!"
قال فراج بغضب: "انا مشوفتوش اصلا يا جدي.. الباشا اتجوز من شهر وسافر مع عروسته."
كتمت ازهار شهقتها وهي بتسمع كلام فراج.
جوه القاعة قال الحاج عبد الرازق بصدمة: "كلام ايه ده يا فراج؟ مين اللي قالك الكلام الفارغ ده! اتجوز امتى وازاي ؟! دا لسه مطلق مراته ومخلصتش حتى عدتها!"
قال فراج: "الست امه اللي قابلتني وقالتلي انه اتجوز وقالتلي كلام ضايقني.. شكلهم مش عارفين هما كان مناسبين عيلة مين!"
قال الجد بصدمة: "ايه الكلام اللي انت بتقوله ده! .. طب انت قابلت جده او ابوه؟!"
قال فراج: "الست امه بتقولي انهم مش فاضين لنا!"
قال الحاج عبد الرازق بصدمة وهو بيبص لهاتفه وبيدور على رقم رشيد: "انا هكلمه كده وافهم منه ايه الحكاية.."
حاول الاتصال بهاتف رشيد لكن جاله الرد ان الرقم ده خارج الخدمة، بص الحاج عبد الرازق لحفيده وقال بدهشة: "تليفونه مقفول.. وبعدين؟"
قال فراج بغضب: "والله هو حر بقا يا جدي.. احنا كده عملنا اللي علينا وبعدين بصراحة الست امه دي طلعت صعبة اوي وشكل عيلته كلهم زيها ولو رجعنا بنت عمي تاني للعيلة دي يبقى بنظلمها."
اتنهد الجد بحزن وقال: "مش عارف هنعمل ايه دلوقتي.. حرام نخبي حملها.."
قال فراج بغضب: "احنا مخبناش حاجة يا جدي.. هو اللي استعجل واتجوز واحدة تانية وسافر.. لما يبقا يرجع بقا يحلها ربنا."
سمعت ازهار الكلام وبعدين اتحركت بخطوات هادية وطلعت للدور اللي فوق حيث أوضة كارمن ودخلت الأوضة وهي بتشاور بايديها ووشها لوالدتها وكارمن وهما قاعدين فوق الفراش مع بعض: "عرفتي اللي حصل يا امي.. عرفتي اللي حصل يا كارمن!!"
بصوا ليها بدهشة وقالت وداد بقلق: "ايه اللي حصل يا ازهار قلقتينا؟!"
قالت ازهار: "فراج رجع من مصر وبيقول ان جوز كارمن اتجوز واحدة تانية وسافر معاها."
شهقت وداد وانتفضت من مكانها بفزع بتتكلم لبنتها: "انتي بتقولي ايه يا ازهار؟!!"
سمعت كارمن كلام ازهار بهدوء متعودوش عليه، جت مايا في تفكيرها لما عرفت ان رشيد اتجوز مرة تانية، بسرعة اترتبت الاحداث بعقلها واعتقدت ان رشيد ومايا كانت بتربطهم علاقة غرامية واتجوز منها رشيد بعد الطلاق. حطت ايديها فوق بطنها بحماية وكتمت حزنها جواها ورسمت ابتسامة هادية علي وشها صدمت بيها عمتها وداد وبنت عمتها ازهار.
بصت ليها وداد وقالت بصدمة: "شكلك مش مستغربة يا كارمن ان رشيد اتجوز؟ معقول انتي كنتي عارفة وعشان كده مكنتيش عايزة تعرفيه ان انتي حامل؟"
جاوبت كارمن بهدوء: "رشيد اختار حياته يا عمتي خلاص وربنا يوفقه فيها.. انا مش عايزة حاجة دلوقتي غير ان حملي يكمل بخير المرة دي واشوف ابني او بنتي.. ده الوحيد اللي يستحق اعيش عشانه."
قربت منها عمتها وربتت على ضهرها بحنان: "ان شاء الله يا حبيبتي ربنا يكملك على خير وتقومي بالسلامة."
رواية رشيد وكارمن بقلمي ملك إبراهيم.
بعد مرور شهر.
بإحدى المستشفيات بلندن.
اتمدد الجد اللواء نور الدين الجبالي فوق الفراش قبل الاستعداد لاجراء عملية استئصال ورم.
وقف رشيد قدامه وقال ليه بابتسامة هادية: "متقلقش يا جدي ان شاء الله هتعمل العملية وتقوم بالسلامة."
قال الجد بحزن: "حتى لو مُت يا رشيد انا عايزك تسامحني.. انا حاسس ان كل اللي حصلي ده كان ذنبك وذنب كارمن.. انا فرقتهم عن بعض بدل ما اجمعهم وانا عارف انت قد ايه بتحبها."
قرب رشيد منه أكتر وقبل ايديه وقال: "القدر هو اللي فرقنا انا وكارمن يا جدي وانا ميهمنيش دلوقتي غير ان حضرتك تقوم بالسلامة.."
وبعدين لمعت عينين رشيد بالدموع وكمل: "انا مش متخيل حياتنا من غيرك يا جدي.. اوعدني انك تقوم بالسلامة."
بكى جده وقال بحزن: "مقدرش اوعدك بحاجة مش في ايدي يا رشيد.. الاعمار بيد الله وحده يا بني."
دخل وجيه والد رشيد ومعاه مراته وقربوا من رشيد وجده وقال وجيه بقلق: "عامل ايه دلوقتي يا بابا.. ان شاء الله تعمل العملية وتقوم بالسلامة."
بص اللواء نور الدين الجبالي لابنه ومراته وقال ليهم بحزن: "لو مخرجتش من العملية دي عايزكم كلكم تسامحوني."
بكت ماجدة وقالت بحزن: "متقولش كده يا عمي ان شاء الله هتقوم بالسلامة وترجع تنور بيتك تاني."
دخلت الممرضات لتحضيره للعملية، بعد رشيد عن جده ووقف بعيد بيبص ليه بحزن وقلق.
بعد عدة ساعات من دخول اللواء نور الدين لغرفة العمليات، خرج الدكتور من غرفة العملية ويبان على وشه الحزن، قرب منه رشيد ووالده وقال معاه رشيد وبلغه الدكتور بكل أسف ان جده فارق الحياة أثناء اجراء العملية.
استقبل رشيد الخبر بصدمة كبيرة، كان جده بمثابة والده وصديقه وكل حاجة ليه بالحياة.
رواية رشيد وكارمن بقلمي ملك إبراهيم.
رجعوا كلهم لمصر لدفن جثمان اللواء نور الدين وفي اليوم التالي كان العزاء.
قعد خالد جنب رشيد في العزاء وكان الحزن الشديد باين على رشيد بعد فقدان جده، قال خالد لرشيد بصوت واطي وهو قاعد جنبه: "انا عارف ان الوقت مش مناسب بس في حاجة لازم تعرفها.. الراجل اللي حاول يعتد.. ي علي كارمن في شقة مامتها اتقـ.. تل في شقته في اسكندرية."
بص ليه رشيد بصدمة، قال خالد مرة تانية: "تقريبا اللي قتـ.. له حد تبع رجالة سعد بشار وخصوصا ان اسمه اتذكر في قضية قـ.. تل سهير.. عموما احنا بنعمل تحريات ولو وصلت لحاجة هبلغك."
بص رشيد قدامه وقال بحزن: "خلاص يا خالد.. كل ده ملوش لازمة دلوقتي.. كل حاجة انتهت.."
سكت شوية وهو بيبص قدامه بحزن وبعدين كمل: "انا شكلي هسافر تاني واستقر هناك."
قال خالد بدهشة: "معقول هتسافر تاني يا رشيد؟!"
جاوب رشيد بتأكيد: "مبقتش عايز اعيش هنا خلاص يا خالد وكمان بابا ممكن ينقل شغله خارج مصر وانا هبدأ شغل معاه."
قال خالد: "وكارمن؟"
جاوب رشيد بغضب: "كارمن اختارت الطلاق وانا تعبت ومش هجري وراها تاني.. كارمن في لحظة غضب قالت كل اللي جواها وعرفت هي بتفكر فيا ازاي وبعد اللي قالته مبقناش ننفع لبعض."
اتنهد خالد بحزن: "بس كارمن بتحبك يا رشيد واكيد موت مامتها صدمها ومكانتش في وعيها."
قال رشيد بغضب: "وانا كمان بحبها.. بس كارمن قالت اللي جواها يا خالد وبعد كلامها واهانتها ليا ولأهلي حكايتنا انتهت.. خلاص."
سكت خالد شوية بحزن وبعدين قال بقلة حيلة: "اللي تشوفه يا رشيد.. ربنا يوفقك ويوفقها."
رواية رشيد وكارمن بقلمي ملك إبراهيم.
بعد ستة أشهر.
جوه المستشفى.
ولدت كارمن طفلها وشالته بين ايديها مش عايزة تسيبه لحد ولو لحظة واحدة.. كانت بتتأمله بعينيها وقلبها والدموع نازلة من عينيها بسعادة.
قعدت وداد جنبها وقالت ليها بسعادة: "حمدلله على السلامة يا كارمن.. ماشاء الله ابنك زي القمر ربنا يحفظه ويبارك فيه."
قالت ازهار بفضول: "هتسميه ايه يا كارمن؟"
بصت كارمن لطفلها وقالت من غير تردد: "هسميه عمر"
ابتسمت وداد وقالت: "ربنا يباركلك فيه يا حبيبتي."
ابتسمت كارمن وهي بتبص لابنها وهمست جواها: "عمر رشيد الجبالي."
خارج أوضة كارمن بالمستشفى.
قعد فراج جنب جده الحاج عبد الرازق وقال بغضب: "لو سمحت يا جدي انا قولتلك مليون مرة انا مستحيل اروح اسأل عليه عند الست امه دي تاني وبعدين هو اتجوز وسافر ومن بعدها لا حس ولا خبر.. مش احنا بقا اللي هنجري وراه ونقوله تعالي شوف ابنك!"
قال الحاج عبد الرازق بحزن: "يا فراج عايزين نعمل اللي علينا للاخر عشان ربنا يا بني مش عشانه."
قال فراج بغضب: "حاضر يا جدي هروحلهم تاني بس دي اخر مرة اروح للعيلة دي اسأل عليه."
قال الحاج عبد الرازق: "لو ملقتوش برضه عرفهم ان كارمن خلفت ولد وهما حرين بقا يعرفوه ولا لا احنا كده نبقا عملنا اللي علينا."
هز فراج راسه بالموافقة ومشي من المستشفى.
رواية رشيد وكارمن بقلمي ملك إبراهيم.
اليوم التالي..
وصل فراج قدام بيت عيلة الجبالي وكان البيت مقفول ويبان ان مفيش حد بالبيت. قرب منه حارس البيت وقال ليه: "خير يا استاذ حضرتك عايز مين؟"
قال فراج باستغراب: "عايز اي حد من عيلة الجبالي."
قال الحارس: "كلهم سافروا يا باشا من بعد موت سيادة اللوا الله يرحمه."
بص ليه فراج بصدمة: "هو جد رشيد مات؟.. مات امتى ؟!"
قال الحارس: "من كام شهر كده يا استاذ والعيلة كلهم سافروا وانا شغال هنا حارس على البيت."
قال فراج: "متعرفش سافروا فين؟"
جاوب الحارس: "لا والله انا استلمت الشغل هنا بعد سفرهم ومعرفش هما سافروا فين!"
هز فراج راسه بتفهم ومشي.
رواية رشيد وكارمن بقلمي ملك إبراهيم.
جوه الدوار قعدت كارمن جوه أوضتها شايلة ابنها وبتبص ليه وقلبها بينبض بالحياة وكأنها اتولدت معاه من جديد.
رجع فراج للدوار وبلغ جده بموت اللواء نور الدين الجبالي من عدة أشهر وسفر عيلته كلهم لخارج مصر.
رواية رشيد وكارمن بقلمي ملك إبراهيم.
"بعد مرور ثلاثة اعوام على فراق كارمن ورشيد"
قدر رشيد يأسس عمل ضخم بيشاركه بيه والده في احدى الدول الاوروبية، استقر في العيش هناك ومفكرش في الرجوع. كبرياؤه بيمنعه من الرجوع او معرفة اخبارها، كل ما فكر فيها بيفتكر كلماتها القاسية اللي جرحته واهانته قدام عيلته وعيلتها.
مش حاسة كارمن بمرور التلات اعوام وهي بتشوف ابنها بيكبر يوم بعد يوم قدام عينيها، كانت بتشغل وقتها ويومها بمتابعة ابنها، كل ما كبر يوم كانت ملامحه بتزداد في الشبه من والده، كانت بتبص ليه وكأنها بتبص لرشيد، كانت حياتها هادية لحد ما توفي جدها.
قعدت كارمن جنب عمتها وداد بيلبسوا الثياب الأسود حزنًا على وفاة الحاج عبد الرازق من شهرين.
بقى عمر ابنها بعمر التلات اعوام وكان بيلهو وبيلعب حواليهم.
قالت كارمن لعمتها بهدوء: "لو سمحتي يا عمتي كنت عايزة اتكلم معاكي في موضوع مهم واستنيت يعدي على موت جدي الفترة دي عشان اعرف اتكلم معاكي."
سمعت ليها وداد باهتمام: "قولي يا كارمن انا سمعاكي؟"
قالت كارمن: "انا من بعد موت جدي وانا بفكر ان انا لازم امشي من هنا.. عايزة ارجع القاهرة تاني."
قالت وداد بصدمة: "ليه يا كارمن في حد زعلك في حاجة يا بنتي؟!"
قالت كارمن: "لا طبعا يا عمتي مفيش حد زعلني ولا حاجة بس انا مش مرتاحة كده.. وخصوصا ان وجودي عامل مشكلة لـ ازهار.. انا فاهمه يا عمتي وعارفة ان ازهار بتحبني بس مضايقة من وجودي انا وعمر هنا وطول الوقت خايفة وغيرانة علي جوزها وبصراحة ده حقها.. انا والله مستحيل ابص لـ فراج لاني بعتبره اخويا مش ابن عمي وبس.. لكن ازهار ست ومن حقها تغير وتخاف علي جوزها وخصوصا لما يبقى في ست مطلقة عايشة معاهم في نفس البيت."
وطت وداد وشها بحزن لانها عارفة فعلا ان بنتها مش حاسة بالراحة في وجود كارمن وابنها معاهم بالبيت. قالت وداد بحزن: "مش عارفه اقولك ايه كارمن."
قالت كارمن برجاء: "قولي ان انتي موافقة يا عمتي.. عشان خاطري وخاطر ازهار.. كده كلنا هنرتاح."
قالت وداد بحيرة: "وهتعيشي هناك لوحدك ازاي يا بنتي؟"
قالت كارمن: "هعيش في شقتي يا عمتي اللي كنت متجوزة فيها انا ورشيد.. رشيد كان كاتبها باسمي والشقة مقفولة من يوم ما سبتها.. وكمان بفكر اعمل مشروع بفلوس الارض بتاعي."
بصت ليها عمتها بتفكير وقالت بحزن: "اللي تشوفيه يا كارمن.. انتي مبقتيش صغيرة يا بنتي واكيد هتعرفي تحافظي على ابنك وفلوسك."
ابتسمت كارمن وهي بتفتكر قد ايه كانت بنت ساذجة بالماضي وقالت بثقة: "متقلقيش يا عمتي.. انا مبقتش العيلة الصغيرة بتاع زمان.. انا دلوقتي ام وبربي ابني لوحدي.. يعني لازم اكون ليه الام والاب واقدر احميه واحافظ عليه وعلى فلوسي."
قالت وداد بقلق: "بس هتقدري تشتغلي ازاي يا كارمن وتعملي مشروع وابنك لسه صغير ومحتاجك يا بنتي؟!"
قالت كارمن بثقة: "انا فكرت في المشروع خلاص يا عمتي.. انا هفتح مطعم وكافيه وهيكون فيه كيدز اريا للاطفال عشان اقدر اخد عمر معايا كل يوم وميحسش بملل هناك وفي نفس الوقت اقدر اتابع شغلي وابني قدام عيني."
قالت وداد بابتسامة: "ربنا يوفقك يا حبيبتي وان شاء الله يوسع عليكي ويباركلك في ابنك ويعوضك عن كل اللي فات."
ابتسمت كارمن وعانقت عمتها بسعادة وهي حاسة بالراحة بعد دعاء عمتها ليها.
رواية رشيد وكارمن بقلمي ملك إبراهيم
رجعت كارمن للقاهرة ومعاها ابنها، وقفت قدام باب شقتها وقامت بفتحه، دخلت لجوه وهي بتفتكر كل حاجة حصلت بالماضي، بتفتكر خطواتها الأولى لداخل البيت ده وهي بنت صغيرة في سن التسعتاشر.. النهاردة بقت ست ناضجة في التمانية والعشرين من عمرها ومسكة ابنها بايدها. اللي مرت بيه كان كافي يبدلها من بنت صغيرة مدللة لامرأة ناضجة.
كانت بتبتسم وهي بتبص لكل حاجة بالبيت عكس شخصيتها السابقة اللي كانت بتبكي دايماً، دلوقتي عارفة قيمة دموعها. بصت لابنها صاحب التلات اعوام وقالت ليه بابتسامة: "ايه رأيك في بيتنا يا عمر؟"
بص ليها ابنها وابتسم وجري يلهو ويلعب جوه البيت، ابتسمت وهي بتتابعه بعينيها وبتشوف قد ايه بيشبه رشيد في كل حاجة. اتنهدت جواها وهي بتفكر باصرار في العمل الجاد وإنشاء مشروعها الخاص والسعي ورا النجاح.
رواية رشيد وكارمن بقلمي ملك إبراهيم.
بعد مرور عامين تانيين.
قدرت كارمن تحقق النجاح اللي عايزة توصل ليه خلال عامين من العمل الشاق، بقى مشروعها من اهم واشهر المطاعم والكافيهات وبيميزه وجود كيدز اريا عشان يستمتعوا الامهات والاباء برفقة ابنائهم.
أكتر من خمس سنين ونص مرورا على طلاقها من رشيد.. صاحبة التلاتين عاما دلوقتي بتدير مشروع ضخم وبتتحمل مسؤولية تربية ابنها لوحدها. مشافتش رشيد من يوم طلاقهم ومازالت معتقدة انه اتجوز وسافر للخارج زي ما بلغت والدته فراج من خمس سنين.
رواية رشيد وكارمن بقلمي ملك إبراهيم.
قدام مطار القاهرة الدولي.
وقف خالد قدام عربيته مستني خروج رشيد من مطار القاهرة. خمس سنين مخطتش رجليه ارض الوطن.
ظهر رشيد وهو لابس نضارة سودة بيخفي وراها اشتياقه لوطنه وكل حاجة فقدها بهذا الوطن.
استقبله خالد بسعادة وعانقه بقوة: "اخيرا يا رشيد.. متعرفش انت وحشتني قد ايه."
ابتسم رشيد وقال بهدوء: "انت كمان وحشتني اوي يا خالد.. مصر كلها وحشتني."
قال خالد: "واضح ان مصر وحشتك فعلا عشان كده سبتها خمس سنين ومكنتش ناوي ترجع تاني لولا شركة باباك اللي هنا والمشاكل اللي حصلت فيها مكنتش هترجع."
قال رشيد: "خلاص متزعلش انا قاعد معاك هنا اسبوع احل فيه مشاكل الشركة او اصفيها ونخلص من مشاكلها وارجع تاني."
صعد خالد جوه العربية وقال بنبرة ساخرة: "يااااه اسبوع بحاله.!"
ابتسم رشيد وصعد جنبه: "يدوب اسبوع لان عندي شغل كتير جدا هناك وبابا مبقاش يقدر يدير الشغل انت عارف."
قال خالد: "عارف.. ربنا يعينك."
بص رشيد من الشباك على الطريق وخالد بيقود العربية، بيطالبه قلبه انه يسأل خالد عن كارمن، موقفش عقله عن التفكير فيها طول الخمس سنين، لكن كبرياؤه بيمنعه من نطق اسمها.... بقلمي ملك إبراهيم.
يا وجع قلبك يا رشيد لما تعرف ان عندك ابن عمره خمس سنين 🫣🏃🏃♥️
#الحلقة_ال30
#رواية_رشيد_وكارمن
#الكاتبة_ملك_إبراهيم
"وصل خالد بالعربية قدام بيت عيلة رشيد وقال ليه بتأكيد: "بقولك ايه انت ترتاح النهارده وتفضيلي نفسك بكره عشان نخرج مع بعض ونتكلم شوية.. ومتقلقش انا اللي عازمك."
ابتسم رشيد وقال بمزاح: "ياااااه اخيرا جه اليوم اللي تعزمني فيه!"
ضحك خالد بمرح: "عشان تعرف ان بـ سفرك ده ضيعت علي نفسك حاجات كتير."
ابتسم رشيد ونزل من العربية وقال بمزاح: "ماشي لما نشوف.. رغم اني متأكد ان انا اللي هدفع في الاخر."
ضحك خالد وقال: "اكيد طبعا انت اللي هتدفع.. انا هعزمك على المكان بس."
هز رشيد راسه وقال بمزاح: "عمرك ما هتتغير يا خالد."
ابتسم خالد وقال بتأكيد: "هاجي اخدك من هنا بكره متنساش.. سلام."
هز رشيد راسه بالموافقة ودخل لبيت عيلته.
رواية رشيد وكارمن بقلمي ملك إبراهيم.
جوه أوضة مكتب كارمن بالمطعم.
"انا اسفه جدا يا فندم بس صدقيني عمر ابن حضرتك هو اللي غلطان وهو اللي ضرب الولد الاول."
قعدت كارمن جوه مكتبها بتسمع كلام واحدة من الموظفات اللي بتشتغل في كيدز اريا التابع للمطعم الخاص بيها، كانت بتشكي ليها من سلوك ابنها عمر مع باقي الاطفال. سمعت كارمن لشكوتها وهي بتبص لعمر صاحب الخمس سنين وهو قاعد بكل كبرياء مش مهتم بكلام الموظفة وهي بتشكي لوالدته.
وقفت كارمن من مكانها وقالت: "وعملتي ايه مع مامت الولد؟"
قالت الموظفة: "اعتذرتلها يا فندم ولما سألتني عن مامت عمر مقدرتش اقولها ان مامته صاحبة المكان عشان المشكلة متكبرش أكتر."
هزت كارمن راسها وقالت: "تمام.. تقدري تتفضلي انتي على شغلك وانا هتصرف في الموضوع ده."
هزت الموظفة راسها ورجعت لشغلها. بصت كارمن لابنها وقالت بغضب: "ينفع اللي حصل ده؟! دي مش اول مشكلة من النوع ده تعملها هنا."
قال عمر بصوته الطفولي: "ماما حضرتك قولتي انها مش اول مشكلة صح.. يعني عادي بقا."
بصت ليه كارمن بصدمة وقالت: "هو ايه اللي عادي.. انت ليه ضربت الولد انا عايزة افهم؟"
قال عمر: "عشان لما وقعني كان لازم يعتذر يا ماما وانا قولتله كده عيب وهو قالي انه هينادي مامته تضر..بني.. وكان بيخو..فني بباباه وعشان كده انا ضر..بته عشان يعرف ان انا مش بخاف من حد."
قالت كارمن بغضب: "اللي انت عملته ده غلط يا عمر ومش هسمحلك تكرره تاني."
قال عمر بحزن: "هو بابا هيرجع امتى من السفر بقا انا عايز بابا."
غضبت أكتر وقالت بنبرة حادة: "وانت عايز ايه من بابا دلوقتي؟ انت طلبت مني حاجة وانا معملتهاش؟!"
قال عمر بصوته الطفولي: "اشمعنا كل الولاد اللي بييجوا هنا عندهم بابا.. انا كمان عايز يبقا عندي بابا زيهم."
بصت ليه كارمن بحزن وبعدين ضمته بقوة وقالت ليه بصوت مكتوم من شدة رغبتها في البكاء لكنها مسمحتش لعينيها تذرف الدموع: "انت عندك بابا زيهم يا حبيبي بس بابا مسافر عشان شغله وان شاء الله هيرجع قريب."
بعد عنه عمر وقال: "كل مرة بتقولي كده وبابا مش بيرجع.. طب هو مسافر فين وانا اسافر عنده."
بصت ليه كارمن بحزن وجاوبت: "صدقني يا عمر المرة دي انا هكلم بابا واقوله يرجع عشان تشوفه."
هز عمر راسه بالموافقة وسكت، بصت ليه كارمن بحزن وهي بتفكر في رشيد وعارفة ان اللي جاي هيكون اصعب لان عمر كل ما يكبر يسأل عن والده آكتر.
رواية رشيد وكارمن بقلمي ملك إبراهيم.
مساء اليوم التالي.
وقف خالد بعربيته قدام بيت عيلة رشيد. خرج رشيد من البيت وقرب من عربية خالد وقبل ما يركب جواها بص بدهشة للمقعد الخلفي لما شاف طفلين قاعدين جوه عربية خالد.
فتح باب العربية في المقدمة جنب خالد وهو بيبص للطفلين بدهشة وقال: "مين دول يا خالد؟ معقول اولادك؟!"
ابتسم خالد وقال وهو بيبص لاولاده: "ياسين وكيان."
ابتسم رشيد بسعادة والتفت بيبص ليهم وقال ليهم بلطف وبدأ يتعرف عليهم بطريقة مرحة. كيان صاحبة السبع سنين وشقيقها ياسين صاحب الخمس سنين.. قال خالد لرشيد بقلة حيلة: "نهى لما عرفت ان انا اجازة من شغلي النهارده سابت الولاد وراحت مع مامتها عند الدكتور وانا لبست الولاد وملقتش حل غير ان انا اجيبهم واخرجهم معانا."
بص رشيد للاولاد وقال بدهشة: "هنخرجهم معانا ازاي؟!"
قال خالد بثقة: "انا اسمع عن مطعم حلو اوي وفيه كيدز اريا للاطفال.. احنا هنقعد في المطعم والولاد في الكيدز اريا يلعبوا."
قال رشيد: "طب ما نأجلها ونخليها مرة تانية وخلاص."
قال خالد باصرار: "دا انا واخد اجازة النهارده بالعافية عشان اقعد معاك شوية ومش هعرف اخد اجازة تاني."
قال رشيد بتردد: "انا بصراحة مش متخيل اننا نخرج ومعانا الاولاد!"
قال خالد بثقة: "متقلقش.. المكان اللي احنا هنروحه ده كل الناس بيشكروا فيه وحتى نهى مراتي كانت هناك امبارح بالاولاد وقالت ان المكان كويس."
قال رشيد وهو بيبص وبيبتسم لاولاد خالد: "خلاص تمام.. خلينا نروح."
رواية رشيد وكارمن بقلمي ملك إبراهيم.
جوه أوضة مكتب كارمن بالمطعم..
قالت كارمن لعمر: "عمر انا عندي شغل كتير النهارده وحسابات لازم اراجعها.. ممكن تروح تلعب في الكيدز اريا بس من غير مشاكل."
قال عمر وهو بيجري لبره أوضة المكتب: "حاضر يا ماما."
خرج عمر وجري يلعب في المكان المخصص للاطفال.
وصل خالد بعربيته قدام المطعم. نزل من العربية وساعد اولاده علي الخروج من العربية. وقف رشيد بيضحك وقال لخالد بنبرة مرحة: "الله يعينك بصراحة.. انا مش مصدق اللي انت فيه ده!"
قال خالد بغيظ: "اضحك براحتك بكره تتجوز ويبقى عندك اولاد وانا اشمت فيك زي ما انت شمتان فيا كده."
اتبدلت ملامح رشيد للحزن وشرد في كارمن بسرعة، ملاحظش خالد تبدل ملامح رشيد وذهب يسأل عن المكان المخصص للاطفال. بعد دقايق قليلة رجع خالد لرشيد وقعد الاتنين مع بعض جوه المطعم.
رواية رشيد وكارمن بقلمي ملك إبراهيم.
جوه المكان المخصص للاطفال.
قرب ياسين ابن خالد من عمر وقاله بصوته الطفولي: "انت لسه هنا بتلعب! على فكرة انا جبتلك بابا معايا المرة دي وهو ظابط وهيقبض عليك."
بص ليه عمر بسخرية وبعدين ابتسم بثقة وسابه وذهب يلعب في مكان تاني، غضب ياسين من تجاهله ليه وذهب وراه وقام بدفعه على واحدة من الالعاب، صرخت كيان اخت ياسين لما وقف عمر من جديد وقرب من شقيقها وحصلت بينهم مشاجرة. جريت ليهم المشرفة وعدد من الموظفات المسؤولين عن الاطفال. جريت كيان لوالدها بالمطعم وهي بتبكي وبلغته ان شقيقها بيتشاجر مع طفل تاني وسبق والاتنين اتشاجرا مع بعض بالامس. وقف خالد بسرعة ووقف رشيد وذهب الاتنين للمكان المخصص للاطفال.
قرب خالد من ابنه وبص لوشه بعد ما اصابه عمر باظافره وبعدين بص لعمر والمشرفة المسؤولة وقال ليها بغضب: "ايه التهريج اللي بيحصل هنا ده! ازاي اسيب ابني هنا خمس دقايق بس وارجع الاقيه متبهدل كده؟!"
جاوب عليه عمر بصوته الطفولي الغاضب: "هو اللي بدأ الاول وبيخوفني عشان باباه ظابط."
بص رشيد للطفل اللي بيتكلم بكل قوة واعجب بقوة شخصيته رغم صغر سنه.
انسحبت واحدة من الموظفات وذهبت عشان تبلغ مديرة المطعم باللي حصل.
قال ياسين ابن خالد وهو بيتحامى في والده: "اه بابا ظابط وهيقبض عليك دلوقتي."
قال خالد لابنه بغضب: "عيب كده يا ياسين.."
وبعدين بص للطفل اللي واقف قدامه بكل قوة وتحدي: "انت باباك فين عشان نتكلم معاه.. اكيد انا مش هقف اتكلم مع عيل صغير."
قال عمر بتحدي: "بابا مسافر وانا مش صغير."
قالت المشرفة المسؤولة عن الاطفال باعتذار: "انا بعتذر جدا لحضرتك يا فندم بس فعلا ابن حضرتك اللي بدأ الاول ووقع عمر وده كان بسبب مشكلة حصلت بينهم امبارح ومدام حضرتك تفهمت المشكلة."
قال ليها رشيد بغضب: "الاطفال دول مش غلطانين.. الغلط والتقصير منكم انتم.. تقدري تقوليلنا انتم كنتوا فين والاطفال بيضربوا بعض بالشكل ده؟"
وطت المشرفة وشها للارض بصمت، قال خالد بعصبية: "انا عايز المسؤول عن المكان ده حالا.."
جت كارمن بسرعة بعد ما بلغتها الموظفة باللي حصل وشافت اتنين من الرجالة واقفين قدام ابنها والمشرفة المسؤولة وصوت واحد من الرجالة مرتفع وبيطلب المسؤول عن المكان.
وقفت كارمن وراهم وقالت بثقة: "خير حضرتك انا المسؤول هنا."
التفت الاتنين بيبصوا ليها، بص ليها خالد بصدمة وهمس بدهشة: "كارمن."
ارتجف جسم كارمن شوية لما شافت رشيد وتعلقت عينيها بعينيه.
اسرعت دقات قلبه بقوة عند رؤيتها ووقف بيتأملها بصدمة. مش مصدق عينيه! كارمن قدام عينيه دلوقتي! لكنها اتبدلت كتير عن الماضي، مازالت جميلة زي ما كانت بل بقت أكتر جمالا، وبتبان كمان أكتر جدية بهدومها الرسمية الانيقة ووقفتها الواثقة قدامه.
بسرعة رجعت بذكرياتها للماضي وافتكرت لحظات كتيرة جمعتهم مع بعض، لكنها مستسلمتش للذكريات دي انها تاخدها من الواقع اللي بتعيشه دلوقتي، عليها مواجهة اللحظة دي، عارفة ان المواجهة دي كانت هتيجي يوما ما وعليها المواجهة بقوة ومن غير تردد.
حاولت تظهر عكس اللي حاسة بيه وتمسكت بقوتها ووقفتها الواثقة، بعدت عينيها عن رشيد وبصت لابنها. قال خالد بصدمة وهو بيحرك عينيه بين كارمن ورشيد: "كارمن.. ازيك.. انتي بتشتغلي هنا؟!"
بصت ليه وقبل ما تجاوب على سؤاله، جاوبت المشرفة عليه: "مدام كارمن صاحبة المطعم."
بص رشيد للمشرفة بدهشة وبعدين رجع ببصره لكارمن.
قال عمر بصوته الطفولي وهو بيقرب من كارمن: "ماما صدقيني انا مش غلطان المرة دي وهو اللي بدأ الاول."
فتح رشيد عينيه بصدمة وهو بيبص للطفل اللي بيقرب من كارمن وبيتكلم معاها بثقة وبيقول انها امه. بص خالد للطفل بصدمة هو كمان وبعدين لرشيد.
عقد رشيد ما بين حاجبيه بدهشة وهو بيبص للطفل باهتمام.
اتوترة كارمن ومسكت بايد ابنها وقالت بصوت حاولت انه يبان طبيعي: "ايه اللي حصل؟"
قال عمر بصوته الطفولي: "الولد ده يا ماما اللي كان بيحاول يخوفني امبارح والنهاردة برضه بيخوفني عشان باباه ظابط."
بصت كارمن لابنها وبعدين بصت لرشيد وقالت بصوت بارد: "ممكن اعرف ايه المشكلة؟!"
استغرب رشيد من قوتها الظاهرة قدامهم وبرودة صوتها، مازالت هي بنفس ملامحها الرقيقة لكن نظراتها وصوتها لامرأة تانية، امرأة قوية مسؤولة واقفة قدامهم بكل ثقة.
قال ليها رشيد وهو بيبص للطفل باهتمام: "ده ابنك؟"
كان قلبها بينبض بسرعة وجسمها بيرتعش شوية، حاولت تخفي توترها وجاوبت بثقة: "اه ابني."
قال مرة تانية باهتمام: "انتي اتجوزتي تاني؟!"
بصت ليه بصدمة ومجاوبتش على سؤاله، استنى رشيد اجابتها وبعدين بص للطفل وبدأ في التفكير ومقارنة عمر الطفل بعمر ابن خالد صاحب الخمس سنين وبدأ يتسلل الشك لجواه ان الطفل ده من المحتمل انه يكون ابنه.
بصت كارمن للمشرفة وقالت ليها: "خلي عمر معاكي وتابعي شغلك وهنتكلم في المشكلة اللي حصلت دي بعدين."
هزت المشرفة راسها بتوتر وأخدت عمر وذهبت عشان تتابع شغلها. بصت كارمن لخالد وقالت ليه بثقة: "اتفضلوا المكتب نتكلم."
بص خالد لرشيد، تابع رشيد بعينيه ذهاب عمر مع المشرفة وبعده عنهم، وبعدين رجع ببصره لكارمن وتأملها بدهشة؛ مش مصدق ان الست القوية اللي واقفة قدامه هي كارمن البنت المدللة الساذجة اللي اتجوزها بالماضي.
سابتهم كارمن ورجعت لأوضة مكتبها، قال خالد لرشيد بدهشة: "رشيد.. معقول الولد ده ابنك؟!"
بص رشيد ناحية عمر وخفق قلبه بقوة، وبعدين رجع ببصره لخالد وجاوب عليه: "مش عارف يا خالد.."
وبعدين بص لأوضة مكتبها وقال باصرار: "انا لازم اعرف منها الولد ده ابن مين."
ساب خالد واقف مع اولاده وذهب هو ورا كارمن لأوضة مكتبها. اتقدم لجوه وهو بيبص حواليه بعدم تصديق، مازال مش مصدق ان البنت الصغيرة المدللة بقت سيدة اعمال وليها مشروع ضخم بتقوم بإدارته لوحدها.
كانت كارمن مستنياه في أوضة مكتبها وهي بتحاول ترسم الجدية والهدوء علي ملامح وشها. وقف رشيد قدامها وهو بيتأملها باهتمام وتركيز. اتوترة من نظراته ليها وقالت ليه ببرود: "حمدلله على السلامة."
عقد ما بين حاجبيه وقال ليها: "انتي كنتي عارفه ان انا مسافر؟"
جاوبت عليه بهدوء: "في الحقيقة مكنتش مهتمة اعرف وعرفت بالصدفة."
استغرب ردها البارد عليه وقال ليها بغضب: "انا سألتك سؤال برا وانتي لسه مردتيش.. انتي اتجوزتي تاني؟"
بصت ليه بقوة وجاوبت: "رغم ان ده سؤال شخصي ومش من حقك تسأله بس انا هجاوب عليه لاني عارفه انت ليه بتسأل السؤال ده."
بص ليها باستغراب، مش مصدق ان دي كارمن اللي يعرفها واتجوزها. مهتمتش بدهشته كتير وجاوبت عليه: "لا متجوزتش."
قال ليها بصدمة: "والولد اللي برا ده يبقى ابن مين؟"
بصت ليه وهي بتفكر في الإجابة وبعدين جاوبت عليه بثقة: "يبقى ابني.."
قال بغضب: "ومين ابوه؟!"
جاوبت بثقة: "انت."
اتفاجئ من ردها وبص ليها بصدمة، بصت ليه بتحدي وكملت: "اكيد مش هينفع اخبي عليك حاجة زي كده وخصوصا ان عمر شايل اسمك.. عمر رشيد الجبالي."
صرخ بيها بصدمة: "انتي بتقولي ايه!! يعني الطفل ده ابني وانا معرفش.. انتي ازاي تخبي عليا حاجة زي كده كل السنين دي؟!"
جاوبت عليه بصراخ هي كمان: "انا مخبتش حاجة!! انت اللي سبتني ورميت كل حاجة ورا ضهرك وسافرت.. كنت عايزني اعمل ايه؟ اكيد مكنتش هسافر وراك وادور عليك عشان اقولك ان انت عندك ابن!!"
قال ليها بغضب: "كنتي تقدري توصليلي بمليون طريقة بس انتي اختارتي تحرميني من ابني كل السنين دي ومين عارف لو مكنتش قابلتك النهارده اكيد مكنتش هعرف ان عندي ابن."
قالت ليه بغضب: "انت اللي حرمت نفسك من ابنك وحرمته منك لما سافرت ومفكرتش غير في نفسك وبس.. على الاقل انا اتحملت مسؤولية تربيته لوحدي وكنت ليه الاب والام طول الخمس سنين.. لكن انت عملت ايه! روحت اتجوزت بعد طلاقنا بشهر واحد وعشت حياتك."
بص ليها رشيد بصدمة وقال: "جواز ايه؟! مين ده اللي اتجوز؟ انتي بتقولي ايه؟! انا جدي مات بعد طلاقنا بشهرين ومقدرتش اعيش في البلد دي بعد كل اللي حصل بينا وعشان كده سافرت."
وقفت بتبص ليه بصدمة وبعدين قالت بعناد: "كل ده ميهمنيش.. المهم دلوقتي ان انت عرفت ان عندك ابن.. وكمان ابني طول الوقت بيسأل عنك وانا مبقتش عارفه اقوله ايه وكل ما بيكبر أسئلته عنك بتكتر."
بص ليها رشيد بصدمة وقال: "انتي ازاي بتتكلمي عادي كده!! انتي مش عارفه انتي عملتي ايه؟! انتي حرمتيني من ابني خمس سنين.. حرمتيني من اني المسه بايدي وهو لسه مولود.. حرمتيني اشوفه وهو بيكبر قدام عيني.. وبعد خمس سنين بتفاجئيني ان عندي ابن وبتتكلمي عادي وكأنك معملتيش حاجة؟!"
تلألأت عينيها بالدموع وجاوبت عليه: "انت اللي معملتش أي حاجة يا رشيد عشان تستحق انك تعيش مع ابنك كل اللحظات اللي اتحرمت منها."
قال ليها بغضب: "وانتي ملكيش الحق تحرميني منه."
قالت بدهشة: "انا مستحيل احرمك منه.. عمر محتاجلك وكل ما هيكبر هيحتاجه أكتر وانا مش عايزة ابني يعيش ويتربى من غير اب ويحس باللي انا كنت بحس بيه وانا من غير أب."
قال رشيد بغضب: "عمر لازم يعرف ان انا ابوه."
قالت بالايجاب: "هو دايما بيسأل عليك وانا قولتله انك مسافر وكنت وعدته انك هترجع قريب.. خلينا نستنا يومين كده وانا هقوله انك رجعت من السفر."
قال ليها بغضب: "انا مش هستنا ايام وابني لازم يعرف دلوقتي حالا ان انا ابوه."
قالت هي كمان بغضب: "وانا مش هأذي ابني نفسيا عشانك!! عمر عارف ان باباه مسافر والولد ذكي جدا واكيد لو خرجت دلوقتي قولتله ان انت باباه الولد مش هيصدق.. وانا مش مستعدة اخسر ثقة ابني."
رمقها بنظرات غاضبة، وقفت قدامه بتبص ليه بقوة وتحدي وبعدين كملت: "لو سمحت يا رشيد.. بلاش تدخل ابننا في اي مشاكل كانت بينا.. الولد هيعرف ان انت باباه.. بس في الوقت المناسب."
قال رشيد بغضب: "والوقت المناسب ده هيجي امتى؟"
جاوبت ببرود: "لما الاقي طريقة اقدر افهمه بيها سبب انفصالنا عن بعض."
هز رشيد راسه بذهول وقال ليها: "مكنتش اعرف ان السنين بتغير اوي كده يا كارمن!! مين يصدق ان انتي كارمن اللي كانت بتخاف من اقل حاجة ورجليها تقف من شدة الخوف."
هزت راسها بالموافقة وقالت: "انا مبقتش اخاف غير علي ابني وعشان احميه لازم اكون الشخصية اللي قدامك دلوقتي واللي انت مش مصدق انها كارمن.".... بقلمي ملك إبراهيم.
...يتبع
شخصية كارمن الجديدة فجأتنا كلنا بصراحة 🫣🏃
رايكم ان السنين وقسوة الايام ممكن تغير حد كده🤔🤔
حبايبي متنسوش التفاعل بعد القراءة ♥️

تعليقات
إرسال تعليق