رواية وسيطرت المشاعر الفصل العاشر بقلم الكاتبه زهرة الربيع حصريه وجديده على مدونة النجم المتوهج للروايات والمعلومات

 رواية وسيطرت المشاعر الفصل العاشر بقلم الكاتبه زهرة الربيع حصريه وجديده على مدونة النجم المتوهج للروايات والمعلومات 

رواية وسيطرت المشاعر الفصل العاشر بقلم الكاتبه زهرة الربيع حصريه وجديده على مدونة النجم المتوهج للروايات والمعلومات 

ضربها قدام كل اهله بطريقه مهينه ومشاعر وقعت على الارض وهيه حاطه ايدها على شفتها اللي انجرحت بصدمه

سليم بص لايده بذهول وهو مصدم من نفسو ازاي عمل كده جري عليها بسرعه حاول يوقفها وهو بيقول...مشاعر..انا..انا اسف..انا مكنتش اقصد ..ا 

بس مشاعر قاطعتو لما دفعتو وقامت بتعب اخدت ابنها بدون اي كلام وطلعت على اوضتها جري والدموع بتجري على خدها 

سليم بص لطيفها بحزن وغضب من نفسه  متوقعش انو يعمل كده خصوصا قدام اهله  بس دفاعها عن خالد لدرجة انها تسبو بالطريقه دي قدام الكل جننه 

امه قالت بدموع..ليه كده يا سليم ليه 

نادر قال بضيق..اهدي يا هدى اكيد مقصدش.... هو شيطان داخل بينهم ...لاحول ولا قوة الا بالله 

هنا خالد قال بغضب واندفاع... مفيش شيطان اسوء من ابنك يا نادر بيه ...ولو سمحتو كفايه بقى تستغلو ضعفنا وقلة حيلتنا ..مش علشان انا شغال عندكم هسمح اشوف اختي تنضرب قدامي كده عيب عليكم ..اسمع يانادر بيه انا عايز اطلق اختي من ابنك ..هيه مبقتش عيزاه ومش بالعافيه 

سليم بصلو بغضب شديد و لسه هيرد بس نادر سبقو وقال بقوه...اولا محدش قاصد يستغلكم يا خالد وعمرنا ما عملناها معاكم او مع اي حد من اللي بيشتغلو عندنا.. ثانيا مشاعر مرات سليم وهيه غلطت لما سبتو كده وخرجتو عن شعوره ..وهو غلط اكتر منها لما استسلم لغضبه ومد ايده عليها ...بس الموضوع بينهم وهيحلوه اكيد.....وبالنسبه لاختك انا بعتذرلك بالنيابه عنه لانك اضطريت تشوف الموقف ده ...بس موضوع الطلاق ده هما يقرروه مع بعض هما فيه بينهم طفل ولازم يحسبوها صح 

خالد بص لسليم بغضب وحقد ومشي من غير ما يتكلم وهو بيتألم جدا من اديه وبيتألم اكتر من اللي حصل وبيتوعد لسليم وعنيه كلها غضب 

سليم بص لابوه باستغراب لانو دافع عنه بالطريقه دي ومكانش عارف يقول ايه

نادر بصلو وقال بضيق ...اطلع راضيها...انت غلطت ..مهما حصل متمدش ايدك على مراتك وتكسرها قدام الناس..اطلع راضيها ولينا كلام في وقت تاني 

سليم هز راسو بالموافقه على كلامه لاول مره وطلع ورا مشاعر بسرعه 

ادهم اتنهد بحزن وقال...ربنا يطبطب على قلبك يا ابن ابويا.....طيب يا جماعه انا مضطر امشي... معايا شغل مهم 

ابوه قال...ماشي يا ابني ربنا معاك 

ادهم باس اديهم زي العاده ومشي وهدى قعدت بحزن وقالت...والله الواحد تعب بجد 

نادر اتنهد وقعد جمبها وقال بمرح مصتنع ...انا اللي  يتعبك اتعب اللي خلفوه ...كلو الا انت يا هدهد قلبي 

هدى ابتسمت بالعافيه وقالت...وانبي فايق ورايق ..ربنا يهديك انت وابنك 

نادر اتنهد وبص قدامه بشرود وهو كل اللي بيفكر فيه ليه مشاعر لما شافت خالد كده انفعلت على سليم ...ومش قادر يتوقع غير ان سليم هو اللي حرقلو اديه ....بس محتار لو ده فعلا حصل ايه السبب و ليه خالد متكلمش 

بقلم...زهرة الربيع

عند ادهم طلع على شغله وهو على الطريق التليفون رن وكان اسم ميرا قال بضيق شديد...ايوه..مكانش ناقص غيرك 

 ووقف على جنب ورد وقال....نعم يا ميرا خير 

ميرا قالت برعب...الحقني يا ادهم الحقني 

ادهم قال باستغراب...فيه ايه اهدي 

ميرا قالت بخوف...فيه حرامي في البيت.... انا بكلمك من الحمام فيه حد في الشقه... الحقني 

ادهم قال بقلق.. ايه حرامي...طيب ...طيب اهدي.اهدي خالص انا جاي... كلمتي البوليس 

ميرا قالت بهمس وخوف...لا انت اول حد جيه في بالي كلمتك انا خايفه..خايفه قوي يا ادهم ارجوك تعالى ارجوك انا... 

بس قطعت كلامها بصرخه عاليه والخط فصل 

ادهم اتخض جدا وبقى يقول ..الو..ميرا  ...ميرا.... الو 

بس محدش رد وهو ساق باقصى سرعه وهو بيتصل على البوليس 

عند مشاعر كانت في الاوضه حاطه ايدها على خدها مكان ما ضربها ودموعها بتنزل بغزاره ومش متخيله انه مد ايده عليها وقدام اهله 

بس مسحت دموعها بسرعه لما حست بيه بيفتح الباب 

سليم دخل وشاف وشها احمر من كتر ما بكت وشفتها مجروحه من اثر ضربته اتنهد بحزن وقرب منها وقال.... انا احم ....انا ماكنتش اقصد ابدا اعمل كده.... انتي عارفه ان عمري ما عملتها ....انا اسف 

مشاعر رفعت عنيها ليه و قالت بسخريه.... سليم باشا بيعتذر غريبه....ويا ترى بقى الاعتذار ده عن ايه بالظبط...علشان ضربتني و لا علشان اهانتي قدام اهلك ولا علشان ايدين اخويا اللي حرقتهم بجبروتك

 سليم قال بسرعه وهو بيحاول يسيطر على غضبه... الاعتذار ده عشان مديت ايدي عليكي وما كنتش اتمنى ابدا اعملها في اي يوم ولا معاكي ولا مع اي ست عموما ...اما اي حاجه غير كده انا ما ظلمتش حد فيها ....اذا اهنتك قدام اهلي فانت هنتيني برده قدامهم قبلها بدقايق وشتمتيني الف شتيمه .... واذا علشان ايدين اخوكي فالاحسن يحمد ربه انهم ما تقطعوش

 ولسه هيمشي وقفته لما قالت بذهول شديد ....يعني انت بتعترف قدامي ان انت اللي عملت فيه كده ..ليه..... بتعمل معاه كده ليه يا سليم

سليم لسه هيتكلم قالت بسرعه ورجاء...لا لا هتجاوبني ....سليم انا عارفاك وحفظاك اكتر من نفسي.... عارفه انك مش طايق خالد من زمان بس ما توصلش للاذيه دي ...ارجوك قولي هو عمل ايه علشان تعمل فيه كده .....عمل حاجه انا معرفهاش صح ..فيه حاجه انت مخبيها عليا لو سمحت اتكلم

 سليم اتنهد وقرب منها قوي ومسح بصباعه على شفتها المجروحه وقال بندم ....بتوجعك 

مشاعر بعدت وشها عنه بالم وقالت ....انت اكتر حد بيوجعني ...هترد على اسئلتي امتى يا سليم 

 سليم اتنهد بخنقه وقال.....مش لما تفكري انتي تردي على اسئلتي

و كمل بتعب وقال وعيونه بتترجاها ....انا كمان حافظك اكتر من نفسي ....وعارف انك ما تتخليش عن كل اللي كان بينا بسهوله .....ريحي قلبي وقولي لي مشيتي ليه ....التفكير هيقتلني يا مشاعر.... فيه حاجات بتخطر في بالي مش قادر اتحملها ...مش قادره استوعبها ولا افكر فيها ...الناس ياما قالوها قدامي وبعيد عني ...وانا مش قادر اتصورها ابدا ...بتحرق من جوايا كل يوم والنار دي لو متطفتش هتحرقك غصب عني ....سبتي بيتك ليه يا مشاعر اتكلمي علشان خاطري وحياة كل دقيقه حلوه كانت بنا 

مشاعر بصت بعيد عنه وقالت....لو كنت تستاهل اقولك كنت اتكلمت...لكن الكلام خساره معاك

سليم استغرب وقال بلهفه...ليه...انا..انا زعلتك في حاجه صح..ايوه اكيد انا عارف نفسي انا غبي شويه وهمجي و مش باخد باللي لتصرفاتي...بس..بس تمام..تمام قوليلي زعلتي من ايه وهنتكلم ونحلها....وهنسامح بعض وننسى و

بس قاطعتو وقالت بغضب....ايه....ننسى...فوق من اوهامك ياباشا ...عمري ما هنسى كل اللي عملتو معايا ..ولا هنسى اذيتك ليا ولاخويا

سليم قال بغضب شديد وانفعال ...ومتنسيش ليه...ما انا هنسى...هنسى علشانك....هنسى انك بعتيني من غير سبب...هنسى انك كنتي في حضني وصحيت لقيتك غبار وطار ...هنسسى ولادة ابني اللي محضرتهاش واسمو اللي مخترتوش واول نظره واول لمسه ليه

ومسكها من درعاتها بقوه وقال بغضب ودموع....هنسى كلام الناس عنك رغم انو ميتنسيش  قالو هربت مع عشيقها قالو كنتي بتخونيني وبتستغفليني ...قالو كتير وسمعتو بوداني وهنسى

وسند جبينه على جبينها وقال بالم...هنسى علشان بحبك ..علشان عايزك وهموت عليكي وحياتي وقفت من وقت ما خسرتك...ليه عملتي فيا كده ليه ريحيني ارجوكي

مشاعر نزلت دموعها بحسره بس حاولت تقوى وبعدت من بين اديه وقالت بجمود.... اتفضل اطلع ... انا مش طايقه اتكلم معاك 

سليم اتغاظ جدا من برودها وقال بغضب ووجع.... تمام..... انا قلت لك قبل كده هعرف كل حاجه لوحدي .....بس ابقي افتكري اني عملت اللي عليا وسالتك.... واديتك فرصه انك تتكلمي بس الظاهر اني غلطت لما فكرت انك تستاهلي فرصه

 قال كده ومشي بغضب وهو بيفتح الباب قالت بحده... وانت كمان افتكر اني اديتك فرصه تقول اذيت اخويا ليه وانت ما تكلمتش

 سليم التفت لها بدهشه وقال... نعم....انت بتهدديني ولا ده عدم تركيذ علشان انا لسه صاحي وما فطرتش 

مشاعر وقفت قدامه بتحدي وقالت ....لا بهددك يا سليم ....وخاف مني قوي ...انا مش مكسورة الجناح وضعيفه زي ما انت بتتمنى اكون...و مش هسيب حق اخويا وزي ما حرقت ايديه هحرق قلبك 

سليم كان كاتم ضحكته بالعافيه وبصلها من فوق لتحت بسخريه و طلع ولاعة السجاير بتاعته حطها في ايدها وقال باستفزاز..طيب خلي دي معاكي ....عشان لما تيجي تحرقي  قلبي ما تدوريش على كبريت.... يلا مستنيكي تشعليلها بموت انا في الساخن

ومشي وهو بيضحك بطريقه عصبتها ضربت الولاعه في الحيط بغضب وقعدت على السرير وهي متنرفزه جدا من سخافته 

سليم نزل ولسه هيمشي ابوه وقفه وقال ....سليم عايزك

 سليم وقف بضيق وقال... نعم 

نادر قرب منه وقال ....مراتك ليه عملت كده... ليه اتهمتك فورا باللي حصل لاخوها..... انت فعلا اللي اذيت الولد بالشكل ده 

سليم قال بدون اي تفكير وبمنتهى البرود ....اه انا 

ابوه اندهش وبص له بذهول وقال ....نعم....انت ازاي.... ليه... ليه عملت كده 

سليم قال بطريقه مستفزه.... جيه على مزاجي العب شويه 

ولسه هيمشي ابوه مسكه من ايده وقال بغضب شديد ....المره دي انا مش هسيبك تستظرف زي عادتك واسكت لك ..اقف هنا اتكلم زي الخلق وقولي عملت في الولد كده ليه 

سليم سحب ايده بضيق شديد وقال ....فيه حاجات خاصه بيا ما اقدرش اقولها لك ....بس اقدر اقول لك حاجه واحده بما ان حضرتك اللي مشغله هنا ومقويه ومخليه يقف قصادي...لو قلبك فعلا عليه فهمه وعقله خليه يروح يشوف له شغله في اي مكان تاني اامن له 

نادر لسه هيتكلم سليم قال .....والله انا كان بودي اخذ وادي معاك بس للاسف لازم امشي ..حصلت كوارث في الشركه وبرده بسببك.... لان الراجل اللي انت شاركته وحطيت تعب السنين كله تحت ايده  دلوقتي بيهددنا وهيتلغي عقد بملايين عشان مش عايز يكمل فيه

 نادر قال بغيظ من كلامه .بطل تحملني فوق طاقتي ....انا من اول ما حصل اللي حصل وعرفت ان حازم بقى متحكم في الشركه وبقت تحت ادارته قلت لك نستعوض ربنا فيها ونكبر شركتنا الصغيره ونبتدي من اول وجديد ....على الاقل نكسب كرامتنا وما نبقاش تحت ضرسه بس انت اللي حابب تفضل مذلول ليه وتفضل تحت طوعه... وكده كده مش هيعمل اللي في صالحك لان الشركه اول او اخر ما تهمهوش هو بس بيحاول يستفاد منك وطالت او قصرت هيهدها على دماغك

سليم سقف باستفزاز وقال .....طب برافو  حلو تكنيك الهروب ده ....نسيب له شغلنا  اللي احنا  تعبنا فيه او بمعنى اصح تعبي وسهر الليالي على الشركه عشان نكسب كرامتنا ومنبقاش تحت ضرسه...طب معلش تجاوبني.... هي فين كرامتنا دي  لما ياخد مننا شركتنا وتعبنا ...فين كرامتنا لما يبقى نصب علينا وخسرنا اسمنا في السوق ...فين كرامتنا لما يبقى قدام الناس قلعها من عنينا غصب..... عموما انا وانت مش هنتفق في النقطه دي ....زي كل النقط اللي في حياتنا...... سيبني انا بتصرف وعارف بعمل ايه 

ولسه هيمشي ابوه قال ....يعني هتتجوز بنته وتبقى تحت ايديه وتخسر مراتك وبيتك وابنك عشان تكسب الشركه وتعب الليالي 

سليم لبس النضاره وقال بحزم..... انا معرفش حاجه عن الخساره ...ولا هخسر مراتي وابني ولا هخسر شركتي..ارتاح انت واتفرج

قال كده ومشي ونادر بص لطيفه بحزن شديد وهو قلقان جدا عليه لانو اكتر واحد عارف حازم...قعد على الكرسي بتعب وهو مش عارف يعمل ايه علشان يحميه

 عند ادهم وصل عند شقة ميرا وبقى يخبط على الباب بشده وقلق

 ميرا فتحت الباب بسرعه وقالت بخوف.... ادهم الحمد لله انك جيت 

ادهم دخل وقال بسرعه.... في ايه..... ايه اللي قلتيه في التليفون ده

 ميرا قالت بقلق...... مش عارفه في صوت في الشقه ....وشكلو لما سمع الباب اتخبى في البلكونه لاني سمعت صوته من الاوضه 

ادهم قال بذهول ...غريبه حرامي هنا في كمباوند راقي زي ده ...بصي خليكي هنا ما تدخليش ورايا .... لو حصل ايه متجيش فاهمه

 ميرا لسه هتكلموا سمعوا خبط على الباب وصوت عربيات البوليس

 ميرا قالت بذهول شديد.... ايه ده..ايه  الصوت ده يا ادهم 

ادهم قال بارتياح ....ما تقلقيش ده البوليس.... انا كلمتهم

ميرا اتسعت عينيها بصدمه وقالت...ايه بوليس ...بوليس ليه 

ادهم قال باستغراب.... ليه ازاي.... فيه حرامي في المكان لازم يتصرفو

 ولسه هيروح يفتح الباب مسكت ايده وقالت بسرعه..... لا ما تفتحش....هقول لهم ايه

ادهم بص لها بدهشه وقال ....في ايه مالك... هتقولي لهم اللي حصل بالظبط ..وهما هيحققوا في الموضوع

ميرا قالت بتوتر شديد.... قصدي يعني ممكن يكون هرب من البلكونه

ادهم قال بضيق منها .....وحتى لو هرب .....ممكن يرجع تاني لازم يامنوا المكان ويحققوا في الموضوع ....اوعي ما تعطليناش 

بس ميرا وقفت قدامه بسرعه وقالت بتوتر ....لا لا مش هينفع صدقني

 ادهم بص لها بشك وقال... في ايه يا ميرا 

ميرا بلعت ريقها و قالت بحرج شديد.....بصراحه كده ما فيش حرامي ولا حاجه ......انا عملت كده علشان توافق تيجي.... كنت عايزه اشوفك يا ادهم 

ادهم اتسعت عينيه بذهول وقال ...نعم يا اختي

بقلم...زهرة الربيع

عند سليم كان في الشركه هيتجنن لان حازم قافل تليفونه ورفض يجي يتمم الصفقه والوفد مشي وادالهم اخر معاد بالعافيه بعد الحاح شديد من سليم لان الصفقه مهمه بالنسباله وبيجهزلها  بقالو كتير 

سليم بقى يلف في المكتب بغضب وجنون وهو بيقول ..... هو قاصد ....قاصد يعمل كده ابن الكلب ....قاصد يصغرني قدام الناس و يوقف الشغل...بيلوي دراعي عشان بعد كده اللي يقول عليه هو وبنته يتم ....عايز يخسرني كل حاجه...بس مش هسكت هدفعه التمن 

ودفع كل الحاجات اللي على المكتب اتكسرت  كلها 

طه قال بخوف عليه....يا باشا اهدى مش كده .....هنلاقي حل اكيد

 سليم قال بغضب....مفيش حل غير اني اخلص عليه وارتاح و...

بس قطع كلامه بزهول لما شاف حاجه صغيره على الارض كانت في الفازا اللي اتكسرت

سليم وطى مسكها وهو بيبصلها بصدمه وقال....ايه ده...كاميرا...فيه كاميرا في المكتب

 طه قال باستغراب...دي شكلها كانت في الفازا ولما كسرتها وقعت

سليم بصلو بضيق وقال بسخريه...والظاهر كمان كان حد مخبيها 

وزعق فيه بغضب وقال...ما واضح انها كانت في الزفت ..ايه اللي جابها هنا ..ازاي حد حاطط كاميرا في مكتبي وانتو نايمين..فريق المراقبه فين....ولا انا هستغرب ليه...تلاقيه حازم الكلب ..ماهو متعود يخبي عيونو في الشركه كلها 

طه قال بتوتر....معنى كده انو كان بيعرف بكل شغلك في المكتب

سليم ابتسم بسخريه وقال..خليه يلف على الفاضي...اصلا من اول ما حط رجلو في الشركه وانا عارفه ملوش امان وممكن يرشي اي حد فيها...علشان كده اي حاجه مهمه بتممها في البيت...بس للاحتياط خد الكاميرا دي فرغها باي طريقه... وشوف لو فيها حاجه مهمه واعرف حاططهالي هنا من امتى 

طه هز راسو بالموافقه وقال....تحت امرك 

ولسه هيخرج سليم وقفو وقال....استنى... وانا جاي على الطريق قلت لي انك عايزني وفيه حاجه مهمه  ....في ايه كمان اتحفني 

طه بلع ريقه بتوتر وقال.... بلاش النهارده يا باشا ..كفايه اللي انت فيه ... اقول لك يوم تاني 

سليم بص له بطريقه رعبته وقال....طه...اخلص في ايه

 طه قال بتوتر شديد...هو احم.... هو  حضرتك قبل كده كنت قلت لي اعرف لك مين اللي ساعد مشاعر هانم وكتب ابن حضرتك 

سليم قال بسرعه ولهفه....و لقيته صح... حد من معارفنا مش كده 

طه بلع ريقه بتوتر وقال.... طبعا حضرتك مهو عشان يكتب ابنك لازم يكون يعرفكم

 سليم زعق فيه بغضب وقال..... ما تتكلم يا طه ....هو انا ناقصك النهارده

 طه قال بسرعه وخوف..... ادهم بيه....... ادهم بيه هو اللي كتب الباشا الصغير ....وهو اللي كان بيساعدها 

سليم اتسعت عينيه بذهول شديد ومسكو من هدومه بلا وعي وقال بعنف....انت بتقول ايه...ها بتقول ايه يا غبي انت.... ادهم اخويا انا .....ادهم كان عارف مكان مشاعر وووووو

وسيطرت_المشاعر

العاشر

بقلم_زهرة_الربيع

سليم_ومشاعر

بوووووووم صدمه لا تعقل مش قولتلكم فيه مفاجأه ... اللي جاي دماااار دمااار دمااار يلا وروني اروع تفاعل تفتكرو ايه اللي هيحصل اكتبو توقعاتكم للي جاي وشاركونا بارائكم وتحليلكم على جروبنا ومتنسوش ترفعو البارت بتفاعل عالي ومشاركات كتييير علشان تشوفو الللي بعده يلااااا🏃‍♀️🏃‍♀️🏃‍♀️🏃‍♀️