رواية وسيطرت المشاعر الفصل الثامن والتاسع بقلم الكاتبه زهرة الربيع حصريه وجديده على مدونة النجم المتوهج للروايات والمعلومات

رواية وسيطرت المشاعر الفصل الثامن والتاسع بقلم الكاتبه زهرة الربيع حصريه وجديده على مدونة النجم المتوهج للروايات والمعلومات 

رواية وسيطرت المشاعر الفصل الثامن والتاسع بقلم الكاتبه زهرة الربيع حصريه وجديده على مدونة النجم المتوهج للروايات والمعلومات

 بلعت ريقها بخوف لما كسر الباب ودخل وبص لها بنظرات وقفت الدم في عروقها نطقت بالعافيه وقالت.... اسمعني ...انا....احم انا عارفه انك متضايق..... بس الولد قام لما كسرت الباب وممكن يتخض لو اتخانقنا .... خلينا نتكلم في مكان تاني و

 بس قطعت كلامها لما مسكها من دراعها وولواه ورا ضهرها وقال بغضب شديد .... ايه اللي عملتيه ده ...ها...ايه اللي عملتيه ده 

مشاعر كانت بتتالم بس مش عايزه تصرخ علشان الطفل وقالت بوجع وغضب......سيب ايدي يا سليم... سيبني بقول لك احسن ما اوديك في 60 داهيه

 سليم شدد على ايدها اكتر وقال بغضب...لا والله ...تصدقي خفت يا بت.... شوفي شعر ايدي وقف من الرعب

مشاعر لسه هترد عليه بس قاطعهم الولد لما بقى يبكي بشده قالت بخنقه..... شايف جنانك...اهو  خوفت الولد ....سيبني بقى 

سليم دفعها بغضب وعصبيه وهي كانت هتقع واتسندت على السرير وجريت شالت الولد وحضنته بقوه وهي حاسه انه درع حمايه ليها 

سليم بصلها بغضب وقال.... انت فاكره ان العيل ده هيحميك مني ... بتتحامي في طفل صغير

 مشاعر حضنت الولد اكثر وقالت بحسره.... كان المفروض اتحامى في ابوه.... بس ما ليش حظ 

سليم بهتت ملامحه لما قالت كده وافتكر  ايامهم سوا كانت دايما تقول له انها ما بتحسش بالامان غير بين ايديه...بس حاول  يبعد الافكار دي من دماغه لما حس انو هيضعف وبص لها بغضب شديد وقال..... للاسف من هنا ورايح مش هتخافي في حياتك كلها غير من ابوه....و العبط اللي عملتيه من شويه ده مش هعديه 

مشاعر بلعت ريقها بتوتر وقالت بقوه مصتنعه....انا معملتش حاجه ...الاوضه دي بتاعتي وانت اللي ابتديت وادتلها حاجه من حقي

قرب منها بغضب وقال من بين اسنانه....انا وانتي عارفين مين اللي بدأ ...يشهد ربنا اني شلتك فوق دماغي شيل ...وحقوقك كانت حقوقي اللي ادافع عنها بروحي .....بس انتي اللي مش وش نعمه

 مشاعر ابتسمت بسخريه ووجع وقالت..اه...ما انا عارفه...انت هتقولي

سليم بصلها بغيظ وقال بغضب وزعيق شديد ..عارفه ايه...عارفه ايه ما تنطقي ..اتكلمي ولا لسانك اتقطع ...قولي اللي عرفاه واللي مزعلك ...قولي انا اذيتك في ايه 

الولد بقى يبكي تاني من زعيقه ومشاعر ضمته وبقت تهديه وقالت....اطلع ياسليم الولد خايف

سليم قال بغضب بيحاول يسيطر عليه...لا انسي ...خليه يخاف....اصلا مش لوحده اللي هيخاف...امه كمان هتخاف

وقرب منها وقال بهمس في ودنها....وخالو كمان 

بقلم زهرة الربيع

مشاعر اتسعت عنيها بقلق شديد وهو بصلها وابتسم بسخريه وقال...ايه ....اتفاجأتي ليه ...مش هو اللي ساعدك  وجاب لك القرف اللي حطيتيه في الاوضه 

مشاعر لسه هتتكلم قاطعها وقال بغضب .....هو ولا مش هو ما تلوكيش كتير ....مصدع

 مشاعر هزت راسها بالموافقه بيأس وقالت.... ايوه هو.... بس انا اللي طلبت منه ...وهو ما يعرفش انا عايزاه ليه...هو كان  جاي يسلم عليا عادي وانا قلت له يجيب.....

 سليم قطعها و قال بسرعه.... استني استني جه ايه....يسلم عليكي.... جه فين..... هو طلع لك هنا ....في الاوضه

 مشاعر بلعت ريقها بتوتر وقالت..... هو يعني ....طلع لانه انا كنت جايه من المستشفى تعبانه وما قدرتش انزل و....

 بس انتفضت بخوف لما سليم دفع الطاوله اللي جمبها برجله كسرها وقال بغضب شديد.... يعني طلع لك هنا الاوضه.... انا مش مليون مره قلت لك الحيوان ده ما يجيش الاوضه..... وما تقعديش انت وهو في مكان واحد لوحدكم ....ما بتسمعيش الكلام ليه 

مشاعر بصتلو بدهشه من غضبه الغريب وقالت بزعيق... انت مجنون اتجننت رسمي خلاص..... فيها ايه لما اقعد معاه في مكان واحد... خالد اخويا .....اقعد معاه وانام معاه في سرير واحد كمان ....ايه المشكله في كده 

سليم قرب منها وعيونه بتلمع بغضب شديد واخد الطفل من بين ايديها وهي محاولتش تقاوم علشان الطفل ما يتالمش

وسليم طلع بيه بره الاوضه ونادى على ابتسام الخدامه وقال ....ابتسام خدي الولد نزليه عند جدته.... خليها تنيمه

 ابتسام هزت راسها بالموافقه واخذت الولد ومشيت

سليم  دخل وقفل الباب وقرب من مشاعر بغضب شديد وهي بقت ترجع لورا برعب لحد ماحاصرها  عند الحيط وقال بغضب مكبوت..... عمل ايه لما جيه هنا 

مشاعر كانت مرعوبه منه واستغربت السؤال قوي وقالت...ها... هيعمل ايه يعني.... سلم عليا و

بس قاطعها بسرعه وقال.....سلم بايده وبس

مشاعر لسه هترد قال بسرعه...بايده ازاي بقى اخته ووحشاه و حضنك اكيد 

مشاعر قالت بتوتر...انت بترد على نفسك ...اديك بتقول اخته واكيد وحشاه 

سليم ضغط على اسنانه بقوه وقال..... يعني حضنك ...مع اني حذرتك قبل كده

 مشاعر بلعت ريقها بارتباك وقالت..... انا ....هو يعني 

سليم  قال بنفاذ صبر .....حضنك ولا لا

مشاعر قالت بسرعه وخوف .....ايوه ايوه حضني... فيها ايه يعني..... ده اخويا انت مجنون

 سليم احتدت عيونه بغضب ميتوصفش وبقى يضرب الحيطه جنبها بقوه كذا مره بطريقه هستريه 

مشاعر اتفاجأت جدا  وهو زعق بجنون وقال ....انتي حيوانه ....انا مش قلت لك ما تخليهوش يلمسك...... مش قلت لك  ما تقعديش معاه في مكان واحد ما بتفهميش ليه..... عايزاني اكسر دماغك ولا عايزه تجننيني 

 مشاعر كانت مرعوبه من الحاله اللي وصلها ودموعها بقت تنزل بخوف وفاجئته لما قعدت على الارض وضمت رجليها بخوف وبقت تبكي بشده وتقول.... سليم وحياه اغلى حاجه عندك طلقني ....ارجوك....انا تعبت مش قادره استحمل طلقني لو سمحت ...ارجوك

 سليم اتوجع جدا عليها وشدها بقوه وضمها لقلبه وغمض عنيه بقوه عايز ينسى كل حاجه

مشاعر بقت تدفعه وتبكي وتضربه علشان يسيبها بس مقبلش يبعد

فضل شويه وبعد عنها وبلع ريقه وبص بعيد وهو بيلعن نفسه وضعفه وقال بوجع.... انتي اللي جبتي لنفسك التعب ... جبتيه ليكي ولغيرك.... طلاق مش هطلق ....واحمدي ربك انك لسه عايشه وابنك معاكي

 ومشي بسرعه بس قبل ما يطلع من الاوضه صرخت وقالت .....هموت نفسي ياسليم

 سليم ابتسم بسخريه وقال من غير ما يبصلها...طيب ... اكتبي الحاجات اللي هتحتاجيها وابعتها لك...... عشان تبقى موته عليها القيمه يعني

 قال كده ومشي ومشاعر قعدت على السرير بعصبيه وجذبت شعرها لورا وهي مش عارفه تعمل ايه ولا تتصرف معاه ازاي 

سليم خرج ونادى على ابتسام وقال.... اسمعي خدي الحيوان اللي اسمه خالد وخليه ينظف الاوضه من القرف اللي فيها...خليه هو ينضف ويمسح قوليلو عايز الاقيها بتلمع اكتر من قفاه

ابتسام هزت راسها  بالموافقه وسليم لسه هيمشي امه نادتلو بتوتر وقالت.... انت رايح فين دلوقتي يا حبيبي 

سليم لسه هيرد بس نادر سبقو وقال بسخريه ....هيكون رايح فين يعني..... هيروح يصلح ويلطف لحسن حازم بيه يغضب عليه

 سليم اتنهد بخنقه وبص له وقال بسخريه.... بالظبط زي ما قال لك كده يا ماما..... رايح اصلح اخطاء غيري ....هي الدنيا كده ناس تفرح بالمطر وتلعب فيه زي العيال الصغيره .. وناس الميه تنزل على دماغهم وتقرفهم

 قال كده ومشي ونادر قال بغضب .....طب سامعه قله الادب 

هدى اتنهدت وقالت ....معلش يا نادر اديك شايف الضغوط اللي عليه ما تتكلمش معاه اليومين دول

 نادر قال بسخريه ...اليومين دول...وهو ابنك امتى كان متربي علشان نتحمله اليومين دول....لحد انهارده مشيلني ذنب اللي حصل للشركه ...انا ذنبي ايه ان صاحب عمري طلع حيوان وغدار...الاسهم نزلت وكنا بنخسر الشركه وهو كان مسافر  وهيتأخر ... الحيوان اللي اسمو حازم عرض عليا يدخل شريك مؤقت على اساس نرفع الشركه شويه.... صدقتو لانو كان صاحبي وزي اخويا .....بس هو اتلاعب بالناس اللي في الشركه واجر ناس من قلب شغلنا ووصل لمستندات مهمه وبقى ليه النصيب الاكبر في الاداره ..اكيد انا مكنتش عايز ده يحصل يعني... ولا عايز اضيع تعبي وتعبو... بس هو كالعاده ما صدق يلاقي حاجه يلومني فيها زي ما اكون جوز امه

هدى ضحكت وقالت...معلش متنساش ان سليم الفتره اللي فاتت تعب كتير وحالتو النفسيه كانت مش كويسه..كمان متنساش انه لما رجع اتصدم باللي حصل للشركه ...وكمان اكتشف ان سرقة البينات لسه مستمره ..ولما حاول يعمل كمين ويكشفهم اضرب عليه نار و كان هيروح فيها لولا ستر ربنا وقفلو عم ناصر الله يرحمه ويسقيه من انهار الجنه 

نادر قال بسرعه ...بالظبط ...اديك قولتي بنفسك....كان هيروح فيها لولا ان الراجل فداه بروحه...ويبقى ده جزاته معانا...نعمل في بنته كده...بس الغلط عليا مش عليه... انا عارفه طول عمره واطي.... مكانش يصح اوافق على جوازهم 

هدى اتنهدت وقالت...بس للامانه يا نادر هو كان شايلها في رموش عنيه ....وعمرو ما زعلها ولا اذاها ...دي كانت حته من روحه...لحد ما عملت اللي عملتو.... بس لو تقبل تقول ايه اللي مزعلها وايه اللي خلاها تسيب بيتها كده 

نادر قال بسرعه...طب ما تحاولي تسأليها

هدى اتنهدت بيأس وقالت...سألتها في المستشفى بس بقت تبكي ومرضيتش تتكلم ..خليها تهدى شويه وهحاول تاني

 عند سليم لسه هيطلع بعربيته شاف خالد راجع كان بيجيب طلبات للبيت 

وقف قدامه وقال بسخريه.... يا سلام على حظي الحلو.....كان نفسي اشوفك قبل ما امشي يا صياد الفيران

 خالد ضحك بخفه وقال.... مدام حضرتك متضايق كده يبقى المصلحه دي كانت تخصك...... اصل الصراحه مشاعر ما قالتليش عايزاهم ليه

 سليم حط ايديه في جيوبه وقال بثقه .....وهتخص مين غيري.....  انا هقول لك يا سيدي... اصل انا بتجوز زي ما انت عارف .....وطبعا مشاعر مش قادره تستحمل.. غيرة ستات وكده ...انت فاهم طبعا اللي بتحب راجل بتغير عليه ومش بتقدر تستحمل تشوفه مع واحده تانيه .... واكيد انت اكتر واحد عارف هيه بتحبني وبتموت فيا قد ايه....فجابتهم تخوف بيهم غاده شغل عيال هنشوف منه كتير .....عموما الحركه كانت لطيفه قوي  عرفتني قد ايه هيه لسه بتحبني وبتغير عليا...و عشان كده كنت عايزه اشكرك...الاحساس اللي حسيته انهارده بسببك  ما يتوصفش 

وطلع مبلغ حطهوله في جيب القميص وقال .....تستاهلهم...يلا نظف الاوضه بقى..ها 

قال كده  ولبس نضارته ومشي وخالد بص لطيفه بغضب شديد ودخل البيت وهو متعصب جدا وهيتجنن حرفيا

 اما ادهم فكان مستني رحمه قدام مدرسة الباليه اللي بتشتغل فيها ما رضيش يمشي ابدا لحد ما خلصت شغلها وخرجت هي والاطفال وكانت بتودعهم بسعاده وركبت عربيتها وطلعت على بيتهم 

ادهم طلع وراها لحد البيت واول ما دخلت نزل وكان في ايده بوكيه ورد جواه كارت صغير قرب من البواب وقال..... مساء الخير

 البواب قال باستغراب ....مساء النور ..مين حضرتك

 ادهم قال ..مش مهم انا مين.... الورد ده للانسه رحمه اللي دخلت من شويه دي 

البواب قال....ايوه بس اقولها مين يعني

ادهم طلع مبلغ واداه للبواب وقال .....الكارت جواه ...انت بس وصلهولها

 قال كده وطلع بعربيته ومشي

سليم بقى طلع على بيت غاده علشان يصالحها بس اتفاجئ بشده  لما الجارد منعوه من الدخول 

قال بغضب....انت بتقول ايه انت وهو...مين ده اللي ممنوع يدخل ... انتو مش عارفين انا مين 

واحد منهم قال ......عارفين يا سليم بيه....بس دي اوامر حازم بيه ان حضرتك ما تدخلش .....بيقول لحضرتك معلش غاده هانم جات منهاره ومش حابه تشوفك اديها وقتها

سليم قال في نفسه..... منهاره اه .....لحقت قالت له 

وركب عربيته ورجع بضيق شديد 

وهو على الطريق اتصل عليه طه

 سليم اول ما شاف اسمه اتنهد بيأس ورد وقال....ها ...اشجيني حصل ايه

 طه قال بسرعه...حصلت كارثه يا باشا  ..حازم بيه اتصل ولغى معاده بكره مع الوفد الاجنبي ...بيقول انه مش موافق ومش هيتمم الصفقه الجديده ...ده الشرط الجزائي يخرب بيتنا ...هو حصل حاجه ولا ايه

سليم متفاجأش ابدا واتنهد بخنقه وقال...تمام سيب الموضوع ده انا هحله

وقفل معاه واتنهد وقال... مش قادر ادعي عليكي يا مشاعر ...ربنا ياخدني انا وارتاح

ورجع على البيت وهو متنرفز منها جدا 

اما مشاعر  اخدت ابنها من حماتها ورجعت على اوضتها الاولى تاني بعد ما نضفوها وابتسمت بانتصار وهيه بتدور فيها وقالت...ولسه يا سليم مش هتتهنى ابدا وانت قاهرني 

 وحطت ابنها على السرير ولسه بتنيمه سمعت خبط على الباب فتحت واتفاجات بخالد قدامها قالت بتوتر ....خالد ...فيه حاجه يا حبيبي 

خالد قال بخنقه.....هنتكلم من على الباب..... مفيش اتفضل ولا ايه 

بقلم....زهرة الربيع

مشاعر قالت بتوتر اكبر..... بصراحه يا خالد ما تزعلش مني انا مش عارفه انت عملت ايه مع سليم خلاه رافض انك تدخل الاوضه خالص...... بس انا اكيد بكره الصبح هنزل ونتكلم سوا تحت 

خالد ضحك وبعد ايدها ودخل وقال.... يا بنتي اصلا هو طلع بالعربيه من زمان قبل ما انضف الاوضه ...و مش هيجي دلوقت 

مشاعر قالت بضيق .....اكيد رايح ورا الهانم..... طبعا لاحسن الويفر بتاعته تتكسر ولا حاجه

 خالد قال بخنقه..... هو انتي مش كنتي قلتي لي في التليفون ان كل اللي بقى يربطك بسليم هو ابنك وبس... ليه عملت كده مع خطيبته النهارده 

مشاعر قالت بتوتر..... اكيد مش علشانه  يعني...بس علشان اخذ مني الاوضه اللي كنت قاعده فيها علشان يديها لها....انا قلت له يشوف لها اوضه ثانيه ورفض ....طالما هو مش قابل يطلقني يبقى يسيبني اختار المكان اللي اقعد فيه ....بني ادم مستفز 

خالد قرب منها بلهفه وقال .....بجد يا مشاعر يعني انت مش بتحبيه  ولا غيرانه علشان هيتجوز 

مشاعر استغربت كلامه وقالت...... لا يا خالد..... احبه ايه بس هو انا لو بحبه كنت هربت انا لسه من شويه كنت بترجاه يطلقني ومش قابل.... بني ادم غريب مش عارف نفسه عايز ايه 

خالد ابتسم بسعاده وقال..... طيب متشليش اي هم ....انا هطلقك منه

مشاعر ضحكت بخفه وقالت.... انت... هو راضي يسمع من اهله ...علشان يسمعلك

خالد قرب منها ومسك ايدها وقال ..... انت مش لوحدك.... انا موجود معاكي

مشاعر ابتسمت و قالت.....ربنا يخليك ليا....وعلشان خاطري متورطش نفسك في المواضيع دي.... علشان انت ما تعرفش سليم شراني وهيضايقك انا عارفاه ...ويلا بقى انزل علشان خاطري

خالد قال بضيق....يابنتي بقولك مش هيجي دلوقت

مشاعر قالت ...معلش يا خالد ...حتى لو هو مش موجود مينفعش اعمل حاجه هو رافضها .... علشان هو لسه جوزي ما اقدرش اخبي عنه وما اقدرش اقول له لاني هخاف عليك ارجوك علشان ابقى مرتاحه

خالد ضحك وقال..... يا بنتي انتي محسساني اني عشيقك... انا اخوكي يا مشاعر..... وبعدين بتوحشيني قوي....يلا تمام هعمل اللي يريحك بس هاتي حضن لاخوك قبل ما امشي

 مشاعر بلعت ريقها بتوتر وافتكرت عصبية سليم لما عرف انها حضنته بس قبل ما تنطق خالد حضنها بقوه وقال..... انا بحبك قوي... انت مش بس اختي انت حته من قلبي 

مشاعر قالت بتوتر ....وانت كمان يا خالد

بس فاجئهم سليم لما قال بطريقه ترعب.... و انتو الاتنين حبايبي وحته من طييييبة قلبي و سحب السلاح بتاعه وووو

خالد ده مش هيجيبها لبر بس سليم اصعب واصعب ياترى هيتصرف معاه ازاي ومشاعر هيكون موقفها ايه وتفتكرو رحمه هتعمل ايه لما تشوف الورد 

التاسع 

كانت في حضنه لما اتفاجأت بسليم وجه سلاحو عليهم وهو بيقول ....وانتم الاتنين حبايبي وحته من طيبة قلبي والله

 مشاعر اتخضت جدا وقالت بذهول .....يا لهوي ..ايه اللي في ايدك ده... نزل الهباب ده ياسليم بلاش جنان 

 بس سليم كان موجهه على خالد بغضب شديد وحقد ميتوصفش

 خالد كان مرعوب من نظراته وكان هيموت مكانه  بس في الوقت ده مشاعر وقفت قدامه وقالت بسرعه.... سليم انا بكلمك ..شيلو بقولك السلاح ليطول 

سليم بص لها بغضب شديد وقال....ابعدي من قدامه.... ما تستعجليش على رزقك... دورك لسه جاي

مشاعر قالت بتوتر.....يا سليم نزل السلاح وبلاش جنان ....عيب عليك التصرفات دي .....خالد اخويا اكيد مش هتحرمني منه 

بس سليم زعق فيها بغضب شديد وقال ....قلت ابعدي من قدامه ....انا جايب اخري الساعه دي بدل ما اخلص عليكي قبلو 

هنا مشاعر انهارت وقالت بزعيق وغضب.....لا مش هبعد ..واقتلني  قبلو عادي .....اصلا ما بقتش عايزه اعيش

وبقت تبكي بقوه وقالت.....بعد موت بابا محدش هون عليا الدنيا غيرك يا سليم ...بس دلوقت خلاص الشخص االي عوض لي فراقه ما بقاش موجود.... مستحيل تكون انت ...انت حد غريب ما اعرفوش..... موتني يا سليم الموت اريح بكتير من العيشه دي

 سليم كان الغضب مسيطر عليه بس اول ما قالت كده وشاف دموعها وجسمها اللي بيرتعش بخوف نزل السلاح وبص لخالد وقال بهدوء.... انزل شوف شغلك 

خالد ومشاعر اتفاجئوا بهدوئه وخالد هز راسه بخوف وجري بسرعه من الاوضه

 سليم قفل الباب وراه وبدا يقلع البدله بتاعته بهدوء ونظراته متطمنش

مشاعر استغربت جدا ولسه هتتكلم الباب خبط و راح سليم فتح وكانت ابتسام الخدامه جايبه له شنطة هدومه اخدها منها وقفل الباب وفتح الشنطه اخذ منها هدوم علشان يغير ولسه رايح على الحمام وقفته مشاعر لما قالت بتوتر..... انت بتعمل ايه...انت ..انت جبت هدومك هنا

سليم بص لها وابتسم بسخريه وقال...اه ...فيه مشكله ... مش دي اوضتنا اللي ما قدرتيش تستغني عنها ....وعملتي اللي قدرتي عليه علشان ترجعي لها تاني

 وقرب منها قوي وقال.... شكلك مش قادره تنسي الذكريات اللي كانت فيها..... فقولت اجي اجددلك زكرياتك

مشاعر بلعت ريقها بتوتر وقالت ....سليم انا بسالك جبت هدومك هنا ليه 

سليم بص لها جامد وقال.... وانا قولتلك عادي.... هقعد مع مراتي في اوضتنا ....واهو انا اولى من الغريب

 مشاعر بصتلو بدهشه وقالت...انت بتقول ايه... جرى لعقلك حاجه... ايه الكلام العبيط ده...وليه كل ما تشوف اخويا قريب مني تعمل مشكله.....فيه ايه بالظبط 

 سليم قرب منها وبص لعيونها بقوه وقال....مبحبش حد يحط ايده على حاجه بتاعتي.... بغير..... زيك بالظبط ....مش انتي النهارده تعبتي نفسك وعملتي خطط عشان بتغيري عليا 

مشاعر دفعته وبعدت شويه وقالت..... ده في احلامك ... انا عملت كده علشان ما اطلعش من اوضتي مش اكتر ...ولو سمحت تطلع ....انا قلت لك من اول يوم اني مش حابه اقعد انا وانت في مكان واحد ...لاقيلك مكان تاني تقعد فيه يلا اتفضل امشي

سليم ابتسم بسخريه وقال ..تعرفي ايه الفرق بين دماغك وجوز الهند

مشاعر بصتلو باستغراب من كلامه العجيب وهو قال....مفيش فرق ..الاتنين عايزين كسرهم

وخد هدومه وراح على الحمام وقبل ما يدخل مشاعر قالت بقوه....والاتنين كمان صعب جدا تكسرهم

سليم ابتسم ابتسامه جانبيه وقال....انا معرفش كلمة صعب...مش في قاموس النمس

ودخل الحمام وسابها ومشاعر بصت لطيفه باستغراب وكانت قلقانه جدا من هدوئه و لانو ساب خالد ينزل من غير ما يأذيه اتوقعت حتى يضربه او يمنعه عن الشغل ...قعدت على السرير بحيره وتوتر وهيه مش قادره تجذم بيفكر في ايه

 عند رحمه كانت لسه داخله البيت وبتتكلم مع والدتها لما الباب خبط راحت الخدامه فتحت وجات لها ببوكيه ورد وقالت.... انسه رحمه.... الورد ده علشان حضرتك 

رحمه استغربت وقالت ...علشاني انا..متأكده 

لبنى ابتسمت وقالت بمشاكسه..... ايه ده يا عم الجمال واللطافه والرومانسيه دي

 رحمه اتنهدت وقالت...... ماما مش زي ما انت فاهمه.... ده اكيد حد غلطان...مين هيجبلي ورد يعني..استني اهو في كارت هنعرف يقصد مين

 وفتحت الكارت وقرأت فيه

  ما لقيتش انسب من الورود تعتذر عني.... لانكم من نفس النوع فاكيد اقرب لك مني

 اسف على الذنب اللي ما قصدتهوش.... المتحر،،،ش 

رحمه اتسعت عينيها بذهول وقالت بهمس.... معقوله الجنان ده 

في الوقت ده  امها خطفت منها الكارت وقرأته بدهشه وقالت....يا الله على الجمال.... مين ده يا رحمه 

رحمه قالت بتوتر...ده....احم  ده المجنون بتاع القسم يا ماما ...شكله كده هربانه منه على الاخر 

امها قالت بابتسامه وحماس......مش معقول ...الجدع بتاع قضية اول امبارح.... والله كلامه لطيف جدا ....وانسان ذوق بجد

 قاطعتها رحمه لما قالت.... ماما بلاش حماس زياده ...ها....ده واحد اهبل وهيه مش ناقصه هبل ...عن اذنك انا هروح ارتاح 

امها قالت بيأس ..... معاكي حق .....هو شكله فعلا مجنون... انا على العموم هدي الورد ده لمياده ترميه في الزباله المهم متضايقيش نفسك انت

 رحمه كانت لسه هتطلع بس رجعت تاني اخدت منها الورد وقالت بارتباك .... لا مش شرط ...احم يعني حرام يترمي.... وانا كده كده كنت هشتري لاوضتي هحط ده وخلاص..هو مش قد كده بس اهو اللي يجي منه احسن منه

 واخدت الورد وطلعت بيه وامها بصت لطيفها بدهشه وابتسامه امل

 واتصلت بميرا فورا وقالت..... ايوه يا ميرا ...مش هتصدقي الجدع بتاع القسم اللي رحمه اتخانقت معاه من يومين....بعتلها انهارده ورده على البيت...و شكله كده قابلها كمان 

ميرا قالت باستغراب.... ايه ده بجد 

لبنى قالت بسعاده..... ايوه والله .....والاغرب من كده انها احتفظت بالورد في اوضتها.... انا حاسه ان ممكن يبقى في امل المره دي .....بقول لك ايه يا حببتي ...هيه قالتلي انها هتعدي عليك بكره .... انا عايزه منك خدمه ... هيه اكيد هتحكيلك عايزاكي بقى تشكري لها في الموقف ده ...وقولي لها ان الشاب اكيد ما كانش قصده يضايقها ماشي .....يعني كلمتين حلوين منك اكيد مش هقول لك تقولي ايه 

ميرا ابتسمت وقالت..... من عيني يا طنط ....ما تقلقيش سيبي لي الموضوع ده هظبطها

بقلم...زهرة الربيع

عند سليم خرج من الحمام وهو بيصفر ببرود 

مشاعر بقت تبصلو بضيق وزهق بس لثواني تاهت في ملامحه وهو بيسرح شعره واتحولت نظراتها لاعجاب واضح

سليم خد بالو لنظراتها وغمزلها بطرف عينه وقال...عارفه ليه الحريم سموهم حريم 

مشاعر قالت باستغراب ...ليه

سليم بصلها وقال ...علشان بيحرمو نفسهم من حاجات كتيير جدا علشان يحافظو على كرامتهم ...يعني اللي يحبوه ...يلعنو اللي جابوه 

مشاعر قال بضيق...اممم...معلش فيه ناس كده كرامتهم غاليه عندهم...وفيه ناس بيشوفو الكرامه شئ ملوش قيمه علشان متعودوش عليها

سليم ابتسم بسخريه وقال...ماشاء الله ردودك بقت حاضره ولسانك طويل...بس يحقلك مهو ملقتيش اللي يقصهولك

مشاعر اتنهدت وقالت بضيق.....على فكره السرير يا دوب شايلني انا و نادر..... يعني هتنام على الكنبه اللي عندك دي... شوف بقى ضيقه ازاي ووجع ضهر ورقبه...بس  براحتك 

سليم ابتسم بسخريه وقال..... حتى لو نادر مش موجود مش هنام جنبك تاني..... انسي ما تحاوليش 

مشاعر بصتلو بدهشه وقالت ...ايه...احاول !!!

سليم  بص لها وابتسم ببرود وقال.... اه واضح المحاوله والنكش اللي مالوش لزوم.... بس انا قلت لك من الاول خلاص ما بقتيش تعجبيني 

مشاعر قالت بذهول....لا والله... انا اللي بحاول ....على اساس ان انا اللي جيت لك اوضتك... مريض بجد

 سليم ابتسم باستفزاز وقال.....براحتك ... انا كان غرضي انورك بدل ما تتعبي على الفاضي ....انا دلوقتي هتجوز بت زي القمر.. مكنه انتي متجيش جمبها حاجه ...يعني كلك على بعضك ما تحركيش فيا شعره ..علشان متتعبيش نفسك... كان فيه وخلص 

مشاعر اتغاظت جدا من كلامه وقالت استفزاز....امم... يا حرام خلص خالص.... طب ابقى اكشف بقى قبل الجواز عشان تعرف تسوق المكنه ...بدل الفضايح وكده يعني

و نامت جمب ابنها وشدت الغطاء عليها

 وسليم قال قبل ما يستوعب كلامها.....ملكيش دعوه بجوازي و

 بس قطع كلامه لما خد بالو لقصدها وداس على اسنانه بغيظ ومسك مخده حدفها عليها وقال ....طب اتخمدي بقى بدل ما اجي انيمك نومه ما تقوميش منها تاني

 مشاعر شدت المخده اللي حدفها عليها تحت دماغها ونامت من غير ما ترد عليه وهي مشغوله جدا بكلامه وهل فعلا مبقاش يفكر فيها ولا بقت تهمه

 نزلت دموعها بحزن شديد وفضلت وسط افكارها لحد ما راحت في النوم 

سليم كمان كان بيغلي حرفيا كل ما بيتكلم عن جوازه مش بيلاقي منها غير البرود.... وده اكتر شيء بيخنقه ....والاسوء منظر خالد وهو حاضنها مش بيروح من باله هيموت ويبعده عنها ويرميه بره البيت بس مش قادر ... شرد بافكاره لموقف قديم مش قادر ينساه 

كان خالد واقف بينضف الجنينه وسليم قرب عليه بغضب ومسكو من هدومه بشراسه وقال...يعني اللي كنت شاكك فيه صح...مشاعر مش اختك ...وعمال تقرب منها بمنتهى العشم وناسي انها هتبقى مراتي...عمال تحضن وتبوس وتقل ادبك في بيتي وقدامي ...يا بجاحتك يا اخي

خالد دفع ايده وقال بتوتر...انت بتقول ايه...هو انت علشان مش طايقني تقول اي كلام وخلاص

سليم قال بغضب وتحزير...متكدبش..انا عرفت كل حاجه ..ابوها وهو بيموت قالي انك عيل ابن حرام لقاك في الزباله يازباله....بس انا برضو قولت الراجل في سكرات الموت ويمكن بيخرف ..وعملت تحليل واتاكدت...استنى عليا بس تهدى من موت ابوها ....وهعرفها كل حاجه وارميك من البيت زيك زي اي حشره 

قال كده ولسه هيمشي خالد قال بسرعه...تمام قولها ...عرفها اني مش اخوها..وانا هعرفها انك انت اللي قتلت ابوها بايدك

سليم اتجمد مكانو والتفتلو وقال بتوتر وغضب...انت لو عملت كده هخلص عليك زيو

خالد ابتسم بسخريه وقال..ميهمنيش...ميهمنيش خالص ...انا ربيت مشاعر على ايديا ومليش غيرها..ولو هخسرها معنديش مشكله اخسر حياتي ...هقولها انك انت الللي حرمتها من ابوها مماتش وهو بيدافع عنك زي ما فهمتها علشان تضحك عليها وتتجوزها

سليم قال بقلق واضح...مش هتصدقك 

خالد ضحك بشر وقال ...لا هتصدقني متشغلش بالك...فكر كويس ياباشا .... لو هتخليها تخسرني  يبقى بتخليها تخسر ابوها واخوها...وحبيبها في نفس الشهر الملعون

سليم فاق من شروده وهو حاسس انو مش قادر ياخد نفسه وبص لمشاعر بحزن وقال بوجع....محدش هيقدر ياخدك مني ...انتي نفسي اللي عايش بيه...... مهما عملتي فيها هيكون اهون من فراقك 

وبص قدامه بغضب وحقد وقال....انا صحيح مش قادر اخليه بعيد عنك...بس اطمني مش هخليه يلمسك تاني ..اوعدك

وطلع تليفونه وعمل مكالمه 

 في اخر الليل و البيت كله نايم كان خالد في المطبخ بيرتب شويه حاجات قبل ما يروح بيته

كان خلاص قرب يخلص لما اتصدم بتلاته من الحرس دخلو المطبخ

خالد قال باستغراب...خير ياشباب... جاين هنا ليه 

بس اتفاجأ لما اتنين منهم مسكوه من ايديه والتالت وقف وراه بطريقه مخيفه 

بقلم...زهرة الربيع

خالد بص لهم بذهول وخوف وقال ....هو في ايه يا جدعان ...انتو..انتو ماسكني كده ليه 

 بس محدش منهم رد وواحد منهم شغل البوتاجاز وخلى النار عاليه جدا وخالد اترعب ولسه هيستنجد الشاب اللي وراه حط ايده على بقه بقوه والاتنين التانيين حطولو ايديه على النار بقوه 

خالد اتسعت عنيه بشده وبقى يتألم بطريقه فظيعه حاول يصرخ بس مقدرش لانهم قافلين بقه بقى يصرخ من جواه ومش عارف يتصرف 

بعد دقايق من العذاب واحد منهم قال في ودنه.....سليم بيه بيقولك بلاش تحط ايدك على حاجه مش بتاعتك يا شاطر.... المره دي قرصة ودن و بس

خالد كانت حالته صعبه جدا ودموعه بتنزل وهو  بيحاول يشيل ايده  بس كانو ماسكينو بقوه  فضل يعافر معاهم لحد ما تعب جدا و اغمى عليه ووقع على الارض

الحرس سابوه  في المطبخ وقفلو النار وخرجوا

في صباح يوم جديد صحيت مشاعر بدري جدا كانت عايزه تنزل قبل ما سليم يصحى علشان ما يمنعهاش من النزول

جهزت قوام وجهزت ابنها ونزلت بهدوء وسابته نايم 

تحت كان خالد قاعد على الكنبه وبيبكي ويشهق بالم زي العيال الصغيره ...وايديه الاتنين ملفوفين بشاش وحالته صعبه

 نادر قاعد قصاده وبيقول.... لا حول ولا قوه الا بالله ....يا ابني مش كنت تاخد بالك.... اما حاجه عجيبه ....يعني ازاي ايديك تفضل على النار لحد ما استوت كده وانت مش حاسس... وليه ما نادتش على اي حد لما البوتاجاز كان في مشكله...و ايه اللي وداك للبوتاجاز اصلا انت مش بترص الخزين  في المطبخ كل مره وتطلع 

خالد كان ساكت ودموعه بتنزل وبس وهدى قالت بحزن... خلاص سيبه يا نادر دلوقتي... هو مش قادر يتكلم.... اهدى يا ابني يا حبيبي دلوقتي الألم هيخف... الدكتور قال ان المسكنات اللي اخدتها هتخليك ترتاح...وكلها ايام والحرق هيخف ان شاء الله ما تقلقش

 ادهم كان واقف ومستغرب الوضع وقال ....هو انت متاكد انك حرقت ايدك من غير قصد.... انا مش مصدق الحوار ده خالص ...في حاجه مش مفهومه 

خالد بصلو بتوتر وفضل ساكت وهدى اتنهدت و قالت ....وبعدين بقى انت وابوك هتعملو فيها محققين ...قلت لكم الولد تعبان مش قادر يتكلم دلوقتي و.....

 بس قطعت كلامها لما شافت مشاعر نازله على السلم 

اتنهدت  بحزن واتقدمت عليها اخذت منها الولد 

 مشاعر لسه هتصبح عليهم اتصدمت جدا بمنظر اخوها و جريت عليه بسرعه وقالت بذهول ... ايه اللي حصل ...فيه ايه..مال اديك ..رد عليا مالك ياخالد

 ادهم اتنهد وقال ...بسيطه ان شاء الله ...حروق في ايديه الاثنين ...الظاهر  نسيهم على البوتاجاز

مشاعر بصتلو بدهشه ونادر قال بضيق..ادهم وبعدين

ادهم قال بسرعه...انا قصدي نار البوتاجاز طالتهم من غير قصد 

مشاعر اتسعت عينيها بذهول وصدمه وبصت لعيون خالد وهيه متمنيه يكون اللي في بالها غلط

بس خالد نزل عيونه بسرعه فتاكدت ان سليم هو اللي عمل فيه كده واحتدت عيونها بغضب رهيب ودموعها بتنزل بغزاره 

ولسوء الحظ سليم كان نزل في الوقت ده وبيصفر ببرود 

بصلهم شويه وقال بسخريه ...ايه ده  ....خير يا خلود ...عامل لنا ايدين مشويه على الغداء ولا ايه 

هنا مشاعر قربت منه وهي بتبصلو بصدمه ومش مصدقه اللي عمله

سليم اتنهد بحزن عليها وكان عايز يهرب من نظراتها ويمشي بس مسكت ايده بقوه وقالت بحقد شديد قدام الكل .....هتفضل طول عمرك كلب وسافل وحقير وزباله ياحيوان...بكرهك يا قذر 

مشاعر كانت مش حاسه باللي بتقوله وسليم فقد اعصابه وفوقها بقلم قوي جدا وقعت على الارض ووووو

وسيطرت_المشاعر

التاسع

الكاتبه_زهرة_الربيع

سليم_ومشاعر

سليم هبت منو جااامد والدنيا بتولع يا حلوين ومحتاجين مطافي مواجهه ناار بكره بين سليم ومشاعر ومفاجات متتعدش....تفاااعل مشجع  زي امبارح وانا عند وعدي اهوه لما بارت امبارح كمل الفين تفاعل نزلت انهارده وهنستمر يوميا طالما فيه تفاعل يلا علو الريتش واعملو مشاركات كتيير علشان نكمل يوميا انطلقوووو

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الفصل الاول من هنا

الفصل الثاني من هنا

الفصل الثالث من هنا

الفصل الرابع من هنا

الفصل الخامس من هنا

الفصل السادس من هنا

الفصل السابع من هنا

الفصل الثامن والتاسع من هنا

❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺