رواية وسيطرت المشاعر الفصل الرابع والثلاثون وقبل الاخيره بقلم الكاتبه زهرة الربيع حصريه وجديده على مدونة النجم المتوهج

اخو مرات حضرتك هنا في القسم...بيقولو..احم بيقولو كان مع مجموعة متشردين تحت الكبري اتقبض عليه تسول

سليم اتسعت عيونه بصدمه وقال..ايه...تسول

في الوقت ده نزلت مشاعر وقالت بفرحه...انا جاهزه يلا

سليم بصلها بتوتر ومبقاش عارف يقلها ازاي بصلها وقال بارتباك..ثواني بس اخلص المكالمه دي

وخرج في الجنينه بسرعه وقال بصوت واطي..طيب اعمل اي حاجه وخرجه من عندك

طه قال..... ما انا بقول لسيادتك حاولت بس رافض يتكلم معايا او ينطق حتى

سليم اتنهد وقال....تمام تمام انا جاي حالا

ولسه بيلتفت وراه لقى مشاعر بتبصلو بشك وقالت...فيه ايه يا سليم..انت عرفت حاجه عن خالد صح...عرفت ومش عايز تقولي

سليم مكانش عايز يقولها بس شاف ان خالد مش هيقبل يتكلم مع حد غيرها بلع ريقه وقال بارتباك...مشاعر يا حببتي انا عايزك تبقى هاديه تمام...اي مشكله مهما كانت انا هحلها ...بس انتي متزعلش روحك انا معاكي

مشاعر بصتلو بقلق وقالت...فيه ايه ياسليم بالله عليك

سليم اتننهد وقال ..خالد

مشاعر بقت تبصلو بخوف شديد وهو قال...محجوز في القسم...كان نايم تحت الكبري واشتبهو فيه تسول وكده

مشاعر شهقت بذهول وحطت ادها على بقها بصدمه وهيه مش مصدقه اللي سمعته

عند ادهم كان مش عارف يبطل ضحك على اللي عملته رحمه لانه متخيلش يطلع منها كل ده

رحمه قالت بغيظ..انت بتضحك يا ادهم

ادهم حاول يبطل ضحك وقال...هعمل ايه تاني ...الموضوع يضحك قوي ...بقى انتي يا فرفورتي يطلع منك كده فاجأتيني والله

رحمه قالت بحزن...بس بقى يا ادهم من غير هزار....انا بجد زعلانه قوي...عمري ما تخيلت اني ابقى مؤذيه كده...ولا اني اخطط وادبر علشان اوقع حد في مصيبه...ده انا اتصلت على واحده صحبتها ودفعتلها فلوس علشان تبيعها وتاخد الشله ويروحلها يباتو عندها علشان لما عمها يجي يلاقيهم عندها....صحيح ده كان بيحصل على طول وانا مفترتش عليها بس انا نصبتلها فخ ...مش قادره اصدق اني بقيت وحشه زيها .....صاحبتها قالتلي ان عمها خدها بالعافيه وكانت بتعيط.... قلبي وجعني قوي

ادهم اتنهد بحزن وقال...انا حاسس بيكي ..حتى انا مش حاسس اني مبسوط انها وصلت لكده...بس صدقيني مكانش فيه حل تاني..اصلا عمرها ما كانت هتسيبنا في حالنا..ويمكن كده احسن علشانها ...ميرا بقت شبه مدمنه على الكحول وحياتها بايظه وكلها تغضب ربنا...يمكن لو قعدت عند عمها يمنعها من كل الحاجات دي وتتحسن حياتها...عسى ان تكرهو شيئا وهو خير لكم

رحمه قالت بدموع.....تعرف انا كنت بحب ميرا قوي قوي ...بس من وقت ما عرفت اللي حصل وانا متغاظه جدا منها...اصلا من وقت ما عرفت انها طليقتك وانا مش قادره اتحمل بحس بوجع كل ما شوفها ..بحس بغيظ وديما شيفاها اجمل من الاول واجمل مني بكتير ...وبفكر انو ممكن تكون انت كمان شايفها كدا ..حاسه بغيره و...

بس سكتت بسرعه لما خدت بالها للي قالته

ادهم كان بيبصلها بدهشه و مش مصدق اللي سمعه

...وهيه نزلت عيونها بكسوف وقالت بتوتر...احنا..نمشي ...نمشي احسن... اتأخرنا قوي

ولسه هتسوق بس ادهم مسك ايدها ورفع وشها ليه وقال بسعاده بتلمع في عيونه..انتي...انتي قولتي ايه...غيره...قولتي غيره صح..انني غيرانه عليا بجد

رحمه قالت بتوتر وكسوف...مش بالظبط انا..انا بس زعلت منها على اللي عملته فينا و...

ولسه هتكمله لقتو بيبصلها بعدم تصديق ونظراته كلها سعاده قالت بسرعه....بس بقى يا ادهم خلاص... ولا تسألني ولا تبصلي كده ...اصلا انا غلطانه اللي اتكلمت معاك

ادهم ضحك من قلبه وقال بسعاده...تعرفي ان ده اجمل يوم عدى عليا في حياتي كلها....انا مش عارف حتى اوصفلك حاسس بايه....بس هقولك حاجه ...انتي مفيش اجمل منك ولا ميرا ولا غيرها ويارتني عرفتك من الاول بجد ندمان على كل دقيقه عدت عليا من غيرك...انتي لو تعرفي قيمتك عندى وشكلك في عيوني عمرك ما تغيري من اي واحده ابدا

رحمه ابتسمت بسعاده وقالت ...انا كمان بتمنى لو عرفتك من زمان...بتمنى لو كنت اول واحده في حياتك زي ما انت بجد اول واحد في حياتي

ادهم ابتسم بحب شديد وقال...وانتي كمان اول واحده في حياتي..لاني هحسب عمري من انهارده وبس ...كاني اتولدت دلوقت ....مبروك عليكي ابنك الصغنن

رحمه ضحكت وقالت ...ربنا يخليلي يارب

وساقت العربيه وهما بيتكلمو سوا وبيضحكو طول الطريق

عند مشاعر وصلو القسم وهيه بقت تدور على خالد بعيونها اللي اتملو دموع لما شافته قاعد وسط المجرمين والمتشردين وحاله ميفرقش عنهم ...هدومه متوسخه وشعره متبهدل ومنزل عيونه في الارض والحزن واضح على ملامحه

قربت منو وقالت بدموع وصوت بالعافيه طالع..خالد

خالد التفتلها باستغراب وهو مش مصدق انها قدامه ولمعت عيونه بالدموع وقال....غريبه..... بتعملي ايه هنا يا مشاعر هانم...ان شاء الله خير

مشاعر نزلت دموعها بحسره وقالت ...ايه اللي انت عامله في نفسك ده يا خالد...ازاي كده

خالد قال بسخريه ودموع...عامل ايه ...كنت في مكاني الحقيقي مش اكتر

مشاعر قالت بدموع وانفعال...مكانك الحقيقي في وسطنا ...جنبي يا خالد ....جنب عيلتك

خالد قال بسخريه ....عيلتي...اللي هما مين دول

...انتي....لا يا مشاعر هانم انتي مش من عيلتي ابدا..لان باختصار انا مليش عيله

مشاعر مقدرتش تتحمل كلامه ولا حالته وقالت بانهيار....ليه ...ليه بتعمل فيا كده ليه....هو انا مش مقسوم لي افرح.... هو انا مينفعش اعيش مرتاحه من غير وجع قلب ...حرام عليك ..حرام....ليه تقتلني كده ..انا عشت احلم بفرحه وجواز وبيت وعيله ..ويوم ما اتجوز واستقر اخسر ابويا واخويا سوا ..ليه توجعني كده يا خالد لييه

وبقت تبكي بشده

سليم وخالد اتفاجأو بحالتها وقربو منها وسليم قعدها بسرعه واخد منها الولد وهو بيقول..اهدي يا مشاعر مش كده... اهدي يا حببتي كل حاجه لها حل

مشاعر قالت ببكا وغضب.....فعلا كل حاجه لها حل ...والحل الوحيد اني اموت ....لو انا مت مشاكلكم كلها هتنتهي.... يارب اموت ياري اموت وتخلصو مني يارب

قالت كده وطلعت جري بره القسم وهيه مش قادره تشوف خالد بالحاله دي... الشخص اللي طول عمرها شيفاه اخوها وحبيبها وحته من دمها

خالد اتصدم بحالتها وكان هيجري وراها وهو بيقول..مشاعر استني

بس سليم منعه ومسك ايده بقوه وقال بحزم ...استنى..انا عايزك

خالد بصلو باستغراب وقال...اظن مش وقته

سليم قال بقوه...لا هو ده وقته ..اقدر اعرف هتفضل كده لامتى

خالد قال بضيق ....كده ازاي

سليم قال بخنقه....كده اللي هو بمنظرك ده ....ناوي تفضل على الحاله دي لامتى يعني

خالد لسه هيرد سليم قاطعو وقال...اسمع ...انا اخر حاجه توقعتها في حياتي اني اهتم لامرك ووقف اتناقش معاك كده....بس بعمل كل ده علشان مشاعر...مشاعر لسه شيفاك اخوها متغيرش اي حاجه ...بغض النظر عن احساسك وعن امنياتك انما هيه كل اللي عيزاه انك ترجع اخوها اللي كان يقف جنبها وكان كل حاجه ليها

خالد لمعت عيونه بالدموع وقال بتعب...انا مش قادر....مش قادر اكون اخوها...ةمش قادر اشوفها معاك ...مش طايق اشوف ابنها منك ...مش هقدر على الحياه الي هيه عيزاها مش هقدر ليه محدش فاهمني

قال كده وقعد وحط اديه على دماغه بتعب ودموع

سليم اتنهد بحزن وقعد جنبه وقال...فاهمك...والله فاهمك

خالد قال بدموع...لا مش فاهم...في النهايه هيه اختارتك انت ...هيه حبتك انت وعيزاك انت...عمرك ما هتحس باللي حاسه

سليم اتنهد وقال.... اسمعني كويس يا خالد ...قالو زمان اللي بيحب بيضحي..لو هيه عيزاني انا زي ما انت بتقول يبقى تتمنالها الخير....ومتسبهاش عايشه كده ودموعها على خدها...حرام عليك..مشاعر تعبت كتير جدا ..انا وانت جرحناها بما فيه الكفايه...وانا دلوقتي بحاول اكفر عن غلطي وانت كمان لازم تعمل كده لو كنت ...

واخد نفس عميق لان الكلمه تقييله على لسانه وقال... لو كنت بتحبها المفرض تكفر عن غلطك كمان

خالد بصلو بحزن وسليم قام وهو بيقول...انا همشي دلوقت وهكلم الضابط انك تبعنا وهيفرج عنك...وهستنى منك تثبت فعلا ان مشاعر نهمك وانك فعلا عايزها مرتاحه ومبسوطه ..حتى لو ده هيوجعك...وانا بجد لاول مره في حياتي اكون واثق في كلامك ..متاكد ان كل حرف قولتو كنت صادق فيه وهستنى الدليل يا خالد

قال كده وكلم الضابط عنه وسابه ومشي وخالد اتنهد بحزن وهو بيفكر غي كلامه وكلام مشاعر ودموعها

اما سليم لسه هيطلع من القسم شاف حازم متكلبش وواخدينه الحجز بعد التحقيق

بصلو وقال باستفزاز ...حلوه الاسوار يا حزوم....عقبال العقد

وغمز ومشي

وحازم نزل راسه بيأس رهيب واستسلام

عند ادهم كانو عند الدكتور بتاعه اللي قال...عظيم كل حاجه تمام والاشعه نضيفه الكسر التأم كتير.....عشر ايام كمان ونفك الجبس باذن الله

ادهم ورحمه ابتسمو وشكروه وخرجو من عنده بسعاده

رحمه قالت بحماس...شوفت وشي حلو عليك ازاي

ادهم ضحك وقال..هو وشك حلو عموما ...دي حاجه ما فيهاش كلام ...هو فيه احلى من كده اصلا

رحمه ضحكت بخفه وقالت...ياخوفي من الكلام المعسول ده مش بتطمنلو

ادهم ضحك وقال...ليه بس ده انا غلبان قوي

بقولك ايه ....ايه رايك نخليه يوم الطبيب العالمي واجي معاكي تعرفيني على الدكتوره بتاعتك

رحمه وشها بهت في ثواني وقالت بخوف...ليه

ادهم قال ...عادي اتعرف عليها و...

بس رحمه قاطعتو وقالت بسرعه وخوف...لا لا يا ادهم صدقني انا كويسه...دي هتكرهك فيا وهتقولك كلام مش صح عني...هيه كمان شيفاني مجنونه ...وشايفه اني بقول كلام مش صح عن الرجاله ....والله انا مش كده صدقني.. انا كويسه و....

ادهم قاطعها وقال بسرعه ..اهدي... اهدي يا رحمه ...حببتي انا مصدقك...انا فكرت يعني علشان المشاكل اللي سببتهالك ميرا الفتره اللي فاتت ممكن تكوني حابه تتكلمي مع دكتورتك ....انما انا مش حابب اسمع حاجه لا منها ولا من غيرها لاني مش هيفرق معايا كلام الدنيا كلها عنك ....انتي عجباني كده وماليه عيني وعايزك حتى لو بتدبحي في الرجاله مش بتكرهيهم ...وخلاص طالما الموضوع وترك كده اتلغى خلاص .....انتي تؤمري بس

رحمه ابتسمت بحب من كلامه ودعمه وحست باطمئنان غريب ان الشخص ده الوحيد اللي فيه حنية والدتها وعمره ما هيكرها او يلومها لو مهما قالتله الدكتوره عنها ابتسمت وقالت...لا خلاص غيرت راي يلا نروح

ادهم بصلها باستغراب وقال....بلاش بجد... انا مش عايز نعمل اي حاجه انتي مش عيزاها او قلقانه منها

رحمه ابتسمت ومسكت ايده وقالت...انا مش هقلق من اي حاجه طول ما انا معاك

ادهم ابتسم بحب وقال ...ده اللي هحاول اعمله عمري كلو

ومشيو مع بعض بسعاده

عند سليم طلع بره القسم لقى مشاعر واقفه على البحر بتشم هوا ودموعها بتنزل بحزن شديد

قرب منها وقال بابتسامه....ايه شغل العيال ده ...بتدعي على نفسك وتمشي طب لو كان حصلتلك حاجه مكنتش هسكتلك علشان تعرفي تدعي على نفسك كويس

مشاعر قالت ...سبني في حالي يا سليم...وبعدين ايه الجمله دي اصلا...بقولك ايه روحني...انا مخنوقه

سليم اتنهد وقال بابتسامه جميله....هو انا سبق ووعدتك بحاجه وخلفت بيها...سبق حصلت مشكله ومحلتهاش

مشاعر مسحت دموعها وقالت....اه كتير

سليم قال...احم....مش كتير قوي يعني...المهم المرادي هحلها صدقيني ...وبعدين يا ستي هو ايه اللي حصل يعني..ده جاي في تسول امال لو جاي في تعاطي كنتي عملتي ايه

مشاعر بصتلو بدهشه وقالت..انت بتقول ايه

سليم قال بسرعه..بتحصل ...كل الي بيقعدو تحت الكبري هناك بيشمو

مشاعر بصتلو بقلق وهو ضحك وضمها وقال....بهزر معاكي ...بنكشك يا شوشو...مش بعرف يا بت اشوفك زعلانه...لما بتزعلي بحس بمغص في قلبي والله

مشاعر ابتسمت على جنانه وقالت ..مغص في القلب...جديد المرض ده ..لا الف سلامه

سليم قال بابتسامه...الله يسلمك ...شوفتي بحبك قد ايه...طب ده انا حتى امبارح الفتلك قصيده وملحقتش ..اسمعي اسمعي هتليق مع البحر والقسم والجو الرومانسي ده

وحمحم وقال برومانسيه

يا واخد قلبي غسيل ومكوى ...وحتى بحبك مبتقولهاش

قدمت في غرامك الف شكوه ...اعمل ايه تاني ياللي متتسماش

مشاعر بصتلو بذهول وقالت...متت ايه....متتسماش ..دي تبع القصيده دي

سليم ابتسم وقال..اه تبعها ..حلوه

مشاعر حاولت متتضحكش وقالت...اه...جدا...حلوه جدا...بس متقولهاش قدام حد ...خليها بنا علشان الحسد وكده

سليم قال بثقه... انا بقول كده برضو

مشاعر ضحكت بخفه وهو ضحك معاها وسند جبينه على جبينها وقال...ايوه كده بقى اضحكي خلي الدنيا تضحكلي

مشاعر ابتسمت وقالت...انا بحبك قوي

سليم ابتسم بحب وقال...الحب كلمه عاديه قوي بالنسبه للي بحسو معاكي

ولسه هيكمل خرج خالد وقرب منهم وقال...احم ...مشاعر ...انا اسف...حقك عليا مقصدتش ازعلك او ابكيك

مشاعر بصتلو بدموع وقالت....توعدني مش هتروح هناك تاني وانا مش هبقى زعلانه خالص

خالد هز راسه بالموافقه وقال....اوعدك....عن اذنكم انا هروح انام ...وقال بالعافيه...شكرا يا سليم بيه

سليم ابتسم وقال...العفو ...انا طبعا مش محتاج اقولك ان مكانك في الشغل وفي البيت لسه موجود

خالد اتنهد وقال...لا شكرا انا مش هرجع الشغل تاني

مشاعر قالت بقلق...هتروح فين

بصلها وابتسم وقال..هرجع على بيت ابوكي القديم...متقلقيش امتى ما تحتاجيني هتلاقيني هناك..وطبعا تقدري تتصلي عليا امتى ما تحبي هفتح التليفون

مشاعر هزت راسها بابتسامه وشافت ان كده افضل من الشارع مهما كان

خالد مشي خطوات وسليم قال بسرعه...خالد...ابوك الله يرحمه كان بيقول انك بتحب تصميم الاعراس والحفلات جدا ونفسك تشتغل فيه..انا عندي مكان كويس جدا وصغير على القد تقدر تجهزه وتظبطه وهتجيلك عروض حلوه باذن الله

خالد ابتسم بحزن وقال...انا فعلا كنت ناوي اني اشتغل في المجال ده بس مش حاليا...لو قررت ابدأ فيه عندي مكان هظبطه للمشروع ...شكرا جدا

قال كده ومشي ومشاعر ابتسمت لسليم بحب وقالت...مش عارفه اقولك ايه...شكرا شكرا ..انا بحبك قوي يا سليم

سليم لسه هيرد جالو اتصال من طه نفخ بغيظ وقال...عارفه لو نطيت في البحر ده وعشت فيه زي السمك هلاقي طه بيكلمني برضو او باعتلي رساله مع حوت

مشاعر ضحكت وهو رد وقال...حبيبي سنترال المصايب اتفضل خير

طه قال بتوتر...مش خير ابدا يا باشا..كلموني من بيت حازم ...غاده هانم

سليم قال بتوتر وجديه...مالها غاده وووووووو

رواية_وسيطرت_المشاعر_بقلم_زهرة_الربيع

الرابع_والثلاثون

قبل_الاخير

سليم_ومشاعر

ياترى ايه اللي حصل لغاده ...وايه اللي هيحصل مع ابطالنا بعد كده ..هنعرف في الحلقه الاخيره بكره ان شاء المولى🏃‍♀️🏃‍♀️🏃‍♀️

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم