رواية وسيطرت المشاعر الحلقه الخامسه والثلاثون والاخيره بقلم الكاتبه زهرة الربيع حصريه وجديده على مدونة النجم المتوهج
 |
رواية وسيطرت المشاعر الحلقه الخامسه والثلاثون والاخيره بقلم الكاتبه زهرة الربيع حصريه وجديده على مدونة النجم المتوهج
مش خير ابدا يا باشا..كلموني من بيت حازم ...غاده هانم ...
سليم قال بتوتر وجديه...مالها غاده
طه قال بارتباك...بيقولو عرفت باللي حصل مع بباها وانهارت جدا ولمت شنطها ومشيت على المطار وحالتها صعبه
سليم اتسعت عنيه بذهول وقال...لمت هدومها ومشيت ازاي...هما بهايم اللي شغالين هناك ولا ايه ...ازاي يسبوها تمشي بالحاله دي
طه قال ..ما انا سالت الحارس ازاي سبتوها تمشي كده.. قالي هيه رفضت جدا واصرت تمشي ...حتى مقبلتش تروح تشوف والدها
سليم قال بسرعه.....تمام تمام انا هتصرف
وقفل معاه وقال بسرعه...يلا بينا يا مشاعر..... لازم نروح المطار بسرعه...غاده عايزه تسافر وبيقولو عرفت بان ابوها اتسجن ومنهاره جدا
مشاعر قالت بدهشه.....ابوها اتسجن..امتى
سليم قال باستعجال..مش وقته يامشاعر.... يالا بينا
واخدها وركبو عربيتهم وطلعو على المطار بسرعه
عند ادهم خلصو من عند الدكتوره الي كانت متفاجأه وفرحانه جدا بعلاقة ادهم ورحمه لان ده انجاز كبير في حالتها ونصحته بشويه توجيهات علشان تبقى احسن
اول ما طلعو من عندها رحمه قالت بارتباك...سمعت..قالت اني بتحسن وهبقى احسن ..لو ..لو انت حابب ناجل ارتباطنا دلوقت لحد ما تتأكد اني هبقى كويسه معنديش مانع
ادهم ضحك بخفه وقال ...طب لوحابب نقدم ارتباطنا ادوس نجمه ولا اعمل ايه
رحمه ضحكت بخفه وقالت..بجد يا ادهم...يعني انت عايز ...
قاطعها وقال بسرعه ووقاحه..انا عايز قوي...قوي..الله يخرب بيت ابليس وعاميله
رحمه ضحكت جامد وقالت ...لا طالما فيها ابليس مش هساعدك انت بتمشي حلو لوحدك
ولسه هتمشي مسك ايدها وقال..بجد يا رحمه انا حابب نقرب اكتر..... خلينا نتجوز ..اوعدك مش هتندمي
رحمه ابتسمت وقالت...جواز حته واحده...شوف احنا هنعمل خطوبه الاول ...وبعد كده نبقى ندرس بعض ..وبعد كده ن...
ادهم قاطعها وقال بسرعه..ايه ايه...ايه كل ده ندرس ليه يا ماما....حرام عليك يارحمه انا صدقت ما اتخرجت
رحمه ضحكت وقالت....فترة الخطوبه ضروريه في اي جوازه ...واحمد ربك اني موافقه اصلا...لاحسن اغير رايي
قالت كده ومشيت قدامه بكسوف وسعاده
ادهم ضحك بخفه وراح وراها وهو بيحمد ربه انو جمعه بيها وكتبله اللي اتمناه بعد تعب
عند سليم وصل المطار وقال لمشاعر خليكي هنا ...انا هروح اكلمها واجي
ونزل من العربيه وراح جري على المطار
بس الامن منعوه لما عرفو انه مش تبع اي رحله وواحد منهم قال ...معلش الطياره قربت تطلع يا فندم مينفعش تدخل
سليم قال بغضب...ابعد انت وهو انتو مش عارفين انا مين و
بس قطع كلامه لما شاف غاده شاده شنطتها وراها بدموع زعق جامد وقال...غاده غاده تعالي...استني عايز اتكلم معاك
غاده استغربت وجوده ومسحت دموعها بسرعه ورجعت طلعتلو بره وقالت...فيه ايه..انت ايه اللي جابك هنا
بقلم....زهرة الربيع
سليم خد نفسو بتعب وقال...كده برضو يا غاده نشفتي ريقي...يلا يلا تعالي معايا
غاده قالت بدهشه..اجي معاك ..اجي فين
سليم قال ..هترجعي بيتك بلاش جنان... اهدي شويه وفكري بعقلك.... حتى لو حابه تسافري ابقي سافري بعد ما تهدى متاخديش خطوه وانتي منفعله
غاده حاولت متظهرش دموعها وقالت بعصبيه....لا شكرا انا كبيره وعارفه بعمل ايه كويس...ومش منفعله ابدا ...بس مستغربه وجودك هنا...انت مش ده كان هدفك من البدايه...انك تسجن ابويا وتخلص مني وترجع لمراتك..وده حصل ..ايه اللي جابك بقى
سليم اتنهد وقال ...طيب ارجعي مش علشاني علشان والدك يمكن يحتاجك و
غاده قالت بسرعه وغضب وانهيار....لا انا بنت عاقه ...اعتبرني كده ...انا مش عايزه اشوفه بعد ما طلع مجرم مختلس وتاجر اثار ...مش عايزه اشوف وشه ...انا هريحكم كلكم مني هطلع ايطاليا عند ماما ...يمكن جوز امي يكون اشرف من ابويا
سليم اتنهد وشاف ان مفيش فايده من النقاش معاها قال بحزن شديد...طب..طب وانا...هتسامحيني يا غاده...لو مسامحتنيش مش هعرف انام صدقيني
غاده نزلت دموعها بوجع شديد وقالت ...للاسف مش عارفه ازعل منك...في النهايه اللي اهله ميصنوش كرامته محدش بيصونها...ابويا حطني في طريقك علشان يسرق وينهب ويكمل في شغل الحرام بتاعه براحته ...ومهتمش ان انا اللي هدفع التمن.....بس فيه حاجه عايزه اقولهالك ....سواء اللي عمله هو او اللي انت عملته عمري ما هنساه يا سليم ...عمري
قالت كده وسمعت نداء الطياره ولبست نضارتها ومشيت وهيه بتبكي بصمت ووجع
سليم اتنهد بحزن شديد ورجع بيأس
اول ما رجع عند مشاعر ركب العربيه وقال بحزن...مقبلتش ترجع...معاها حق في كل حرف قالته ... كلنا ظلمناها وجينا عليها
مشاعر لمعت عيونها بالدموع وقالت..حتى انا مديت ايدي عليا..نرفزتني وانا كنت فاكره ان عندها علم بكل حاجه...ياريتنا كنا قدرنا نصالحها
سليم شدها ليه وسند دماغها على كتفه وقال ..انا مش هسيبها ...اعرف ناس كتير في ايطاليا وهخليها تحت عيني وهحاول اراضيها....مستحيل اسيبها كده
مشاعر ابتسمت وضمته وقالت..انا واثقه فيك..لحد انهارده حليت كل حاجه كنا فاكرين ان ملهاش حل ...ربنا يخليك لينا
سليم باس جبينها وباس ابنه وقال...انا مليش غيركم ..انتو وابويا وامي وادهم ثروتي وقوتي ..ربنا ميحرمناش من بعض ابدا
بعد مرور ست شهور اخيرا وافقت رحمه على جوازها من ادهم بعد اصرار كبير منو وعملو احتفال كبير جدا بفرحهم في جنينة الفيلا و كان الكل متجمعين بسعاده بحضور الاهل والاقارب والاصحاب
كان سليم واقف مع مجموعه من رجال الاعمال الكبار اللي رجع بقى واحد منهم في فتره قصيره ورجع شركته افضل من الاول
كان بيتكلم معاهم وبيقول....دي شركة تصميم للمناسبات هيه لسه صغيره و جديده بس راقيه جدا ...وابصم بالعشره هتبقى من الاوائل في المجال ده
واحد منهم قال بثقه...طالما سليم بيه شايف كده يبقى فعلا موهبين.... ممكن كارت ليهم لاني هعمل احتفال لعيد ميلاد حفيدتي
سليم طلع كارت اداه له وقال....كل سنه وهيه بخير...انا متاكد ان التصميمات هتعجبك ...انا واثق فيهم لولا كده مكنتش خليتهم يعملو فرح اخويا ..و
بس قطع كلامه بابتسامه مقدرش يمنعها لما خرجت مشاعر وهيه شايله ابنها وبتضحك مع والدته وبيهزرو سوا
سليم استأذن من الحضور وقرب منهم وقال....ايه الجمال ده كلو بس يا دودو ..ينفع كده ..تخطفي كل الانظار وانا بغير
مشاعر ابتسمت بكسوف وهدى ضحكت جامد وقالت..دودو برضو...على العموم غير وولع ..هو لما دودو ميتغارش عليها مين يتغار عليه
سليم ضحك وقال...انتي امي انا على فكره
هدى ابتسمت وقالت بحب..امكم انتو لاتنين ربنا يخليكم ليا ...واخدت الولد وقالت...انا هروح اشوف العرسان
سليم ابتسم وقال...الست دي كل ما تكبر تفهم اكتر..ايه الجمدان ده
مشاعر ابتسمت وقالت..بطل حركات المراهقين دي قدام والدتك بتكسفني
سليم شدها ليه وقال بابتسامه....انا هفضل مراهق قدام عيونك لحد ما اموت
مشاعر ابتسمت وقالت بحب...بعيد الشر عنك ..انا مقدرش استغنى عنك ولا انا ولا نادر ولا هدى
قالت جملتها الاخيره ومسكت ايده حطتها على بطنها
سليم قال بغباء...ايه دخل هدى ببطنك ..هيه هدى نطت في كرشك ولا ايه
مشاعر اتنهدت وقالت ...ركذ معايا يا سليم ..احنا مش عندنا نادر
سليم قال بسرعه..لا احنا عندنا اتنين نادر ركذي انتي
مشاعر قالت بغيظ...انا قصدي نادر ابننا يا سليم ...مش ابوك ..وحطت ايده على بطنها تاني وقالت..هيبقو نادر وهدى ...فهمت كده
سليم اتسعت عيونه بذهول وقال ...نادر وهدى.
مشاعر ابتسمت وقالت..امم
سليم ابتسم بسعاده شديده وقال..انتي حامل
مشاعر ضحكت وقالت..اخيرا
سليم ضمها بقوه وقال بسعاده..... انا مش مصدق...مش مصدق ابدا
مشاعر لسه هترد جيه خالد وشافهم وحاول يبتسم وقال بمرح مصتنع....كفايه نحنحه هنا ...سايبني لوحدي وقاعد تحضن... فيه مشكله
سليم قال بسعاده.... سيبك من الشاكل ..مشاعر حامل يا خالد
خالد حاول يبتسم وقال بضحك...ودي اول مره يعني...مبروك يا سيدي ..مبروك يا شوشو.
مشاعر قالت بابتسامه...الله يبارك فيك يا خالد
خالد رجع بص لسليم وقال بضحك .....تعالى معايا بقولك فيه مشكله...العروسه مش بتسلم على اي راجل يروح يسلم عليها ...والاضائه عليهم وكل ده هيظهر في البث بتاع الفرح...ايه العمل بقى علشان ده اغرب فرح اعمله
سليم اتنهد وقال..وبعدين في الجنان ده بقى
مشاعر قالت بسرعه...سليم براحه ...رحمه بتخاف ذياده خلي ادهم يكلمها...وهنحلها يلا
على المسرح كانت رحمه ماسكه في ادين ادهم بقوه وقالت بارتباك..انا حاسه انها مش فكره كويسه اننا نعمل فرح
ادهم ابتسم بخفه وقال....انتي بس لو تهدي شويه كل حاجه هتمشي بطريقه لطيفه....وبعدين انا معاكي متوتره ليه
رحمه قالت بارتباك...اصل الناس بيبصولي الرجاله كلهم بيبصولي يا ادهم
ادهم ضحك بخفه وقال..كلهم...ما طبيعي الرجاله والستات هيبصولك انتي العروسه يعني نجمة الليله ... وبعدين هما هيشوفو احلى من كده فين مهو لازم يبصولك
رحمه ابتسمت بسعاده من كلامه وقالت..... يعني انت مش مضايق لاني مسلمتش على صحابك
ادهم ابتسم وقال...ابدا عادي انا قولتلهم انك مش بتسلمي عادي
رحمه قالت بحب ..انا بحبك قوي و....
بس قطعت كلامها وقالت بغضب...طب شايف علشان انت مش مصدقني اهو حتى الراجل العجوز اللي قدامنا ده مشالش عينه من عليا
ادهم بص قدامه وشاور على واحد بدهشه وقال..قصدك ده
رحمه قالت بغيظ..ايوه هو شايف مبرقلي ازاي
ادهم حاول ميضحكش وقال..حبيبي ده خال ماما...واصلا ضرير مش بيشوف خالص
رحمه عضت على شفتها بكسوف ولسه هتعتذر جيه سليم وقال ...ايه اللي بيحصل يا كتاكيت..نسيتو ان الفرح بث مباشر ولا ايه..يينفع يعني الناس تمد ايدها منسلمش
رحمه قالت بضيق منو ...مش بسلم على حد دي طبيعتي ..مفهاش مشكله يعني
سليم حاول يداري غيظه بابتسامته وقال..مش مشكله ازاي...هو انتي متوضيه..حتى لو الفرح اسلامي كنا قولنا ماشي ...هما هياكلو من ايدك حته مثلا
رحمه قالت بضيق..دي حريه شخصيه
سليم قال بغيظ..حريه شخصيه اه...ده عندها ...اللي بتروح وتيجب لوحدها و...
بس قطع كلامه ادهم لما حط ايده على بقه واخده على جنب وقال بضحك..فيه ايه يا سليم اهدى شويه
سليم قال بغضب...ينفع اللي بيحصل ده
ادهم ابتسم وهو بيساويله بدلته وبيهديه وقال..وحياتي ياسليم علشان اخوك عديها...متوترهاش بقى انا مش عايزها تزعل...علشان خاطري
سليم اتنهد وقال...طيب يا نحنوح براحتك...هتنزلو ترقصو ولا دي كمان حريه شخصيه
ادهم ضحك وقال..... اهدى انت بس وهنعمل كل حاجه ...يلا روق بقى دي ليلة اخوك
وبص لمشاعر وغمزلها تيجي تاخده وفهمته وجريت شدت سليم من ايده وهيه بتقول...... الرقصه دي متنفعش من غيرنا
سليم ضحك وهز راسه بيأس منهم وراح معاها
وادهم رجع لرحمه
على زاويه كان خالد بيظبط الاضائه وبيعمل ترتبات الفرح وبيهتم بكل حاجه وجاب الاضائه على مشاعر اللي كانت في حضن سليم وبقى يبصلهم شويه وابتسم وقال...ربنا يهنيك يا مشاعر
في الوقت ده قربت منو بنت جميله في العشرين دي ساره شغاله معاه في الترتيبات وقالت بتوتر...انا متوتره قوي ده اكبر فرح نعمله يارب ننجح...التورته شويه وتنزل خليك جاهز علشان الشو
خالد ابتسم وقال بمعاكسه..انا مش عارف احنا جبنا حلو ليه وانتي موجوده
ساره ضحكت وقالت ..مفيش فايده ..شوف انا في ايه وانت في ايه
ولسه هتمشي مسك ايدها وشدها وقال..ما تيجي نرقص احنا كمان ..الجو فيه طاقه حلوه
ساره ابتسمت بكسوف وقالت...اتلم ها اتلم ...كل الفريق جايبين سيرتي بسببك
خالد ضحك وقال...ليه ممنوع الواحد يبدي اعجابه بجمال حبيبتو ولا ايه
ساره اتسعت عيونها بدهشه وقالت..ح..حبيبتو
خالد قرب منها قوي وقال..انتي شايفه غير كده
ساره ابتسمت بسعاده شديده ودفعتو وجريت بكسوف راحت تكمل شغل وهيه مش مصدقه اللي قاله
خالد ابتسم ورجع لشغله وهو حاسس بانجذاب شديد لساره رغم انه اوقات بيفكر في مشاعر بس بيحاول يخرج من الدوامه دي وبيتقدم كتير
عند سليم كان بيرقص مع مشاعر وسمع صوت يعرفه كويس قال...مبروك يا سليم بيه
سليم اتسعت عيونه بذهوا وهو مش مصدق انها قدامه وقال..غاده..اذيك
بقلم...زهرة الربيع
غاده ابتسمت وقالت....انا بخير انتو اخباركم ايه
مشاعر قالت بابتسانه..ازيك يا غاده وحشانا
غاده ابتسمت وقالت..بجد...ده انا قولت اكيد انستوني لحد ما جاتلي الدعوه للفرح مقدرتش محضرش
سليم قال بسعاده ....انا مبسوط جدا بحضورك شكرا شكرا جدا يا غاده
غاده ابتسمت وقالت...وانا مبسوطه انك افتكرتني ودعتني
سليم قال بابتسامه وانتي اخبارك ايه وحياتك في ايطاليا عامله ازاي
غاده قالت بابتسامه..احسن كتير عملت براند ملابس وماشي حلو جدا هناك
سليم متفاجأش لانه متابع كل اخبارها وكمان مسهلها حاجات كتير وكلملها ناس يعرفهم هناك ساعدوها من غير علمها
مشاعر قالت بابتسامه..انا متأكده هيكون روعه لان انتي زوقك ماشاء الله
غاده ابتسمت وقالت...شكرا يا مشاعر...هبقى ابعتلك حاجه من اختياري وتبقي تقوليلي رايك فيها
مشاعر ابتسمت وقالت ...متاكده انها حلوه
غاده قالت بابتسامه ...ربنا يتمم بخير.... امال عمو نادر فين ده وحشني
سليم شاورلها على ابوه اللي كان بيحاول يمشي ابنه وبيقول...يلا اتحرك متبقاشش كسلان زي اللي خلفك
سليم قال...اهوه زي العاده بيموت في سيرتي
غاده ضحكت وراحت تقعد مع هدى ونادر اللي رحبو بيها جدا وكانو مبسوطين بوجودها
اما ادهم اخد رحمه ونزلو يرقصو بسعاده وفرحتهم بتلمع في عيونهم
رحمه قالت بحب...انهارده اسعد يوم في حياتي يوم متوقعتش اني اعيشه اصلا
ادهم ابتسم وقال بحب.... ولا انا والله..ولا طنط لبنى الظاهر لانها مبطلتش عياط...مش فاهم هتفرح امتى لما الفرح يخلص
رحمه ضحكت وبعتت بوسه في الهوا لوالدتها اللي بادلتها بحب وهيه بتبكي برضو
ادهم سند جبينه على جبين رحمه وقال...عايزك توعديني...تفضلي معايا العمر كلو ...نعيش سوا ونفرح سوا ونبكي سوا..لو في يوم زعلتك وده قطعا مش هيحصل..عايزك تزعلي في حضني ومتسبنيش دقيقه واحده..توعديني
رحمه لمعت عيونها بالدموع وهزت راسها بالموافقه وقالت..اوعدك....وانت كمان اوعدني عمرك ما تتخلى عني ولا تجرحني ابدا .....مش عايزه ازعل منك خالص انت بذات
ادهم ضمها لقلبه وقال اوعدك...وربنا شاهد عليا ..بجبك يا رحمة ربنا ليا
عند سليم كان واقف هو ومشاعر و بيبصو للكل بسعاده و للفرحه كانت ماليه المكان و الكل مبسوط.... ادهم مع البنت اللي تمناها وفي قمة السعاده ..و خالد بينفذ مشروعه اللي بيحبه وواقف مع ساره وبينهم نظرات جميله... وابوه وامه بيضحكو مع بعض بفرحه...وغاده بتلعب مع نادر الصغير بسعاده وبتتكلم مع الصحافه اللي اتوافدو عليها وبقم يسالوها
عن شغلها
اما سليم مش عارف يفرح بايه ولا ايه... بفرح اخوه ولا هدوء عيلته ...ولا حمل مراته.... رفع راسه للسما وقال بامتنان ..الحمد لله..الحمد لله يارب
مشاعر بصتلو وقالت بابتسامه...مبسوط يا سليم
سليم قال بسعاده ...واكتر يوم انبسطت فيه ....ربنا يدمها نعمه...انا مش عارف اشكر ربنا ازاي يا مشاعر...انا عدت عليا اوقات صعبه حسيت ان مستحيل ارتاح بعدها
مشاعر حطت ايدها على خدوده وقالت...سامحني على اي وقت احتاجتني فيه ومكنتش معاك
سليم باس ايدها بحب وقال..سامحيني انتي على كل ثانيه نزلت دموعك بسببي...انا بعشقك يا مشاعري...شوفي احنا تعبنا ازاي واتوجعنا ازاي ولفينا ودورنا بس في النهايه الحب كسب وسيطرت المشاعر على كل قلوبنا 💖🥰
يا امنية القلب يا مهجتي 💖 ويا شمعة تنير البصائر
طال البعد بيننا فعذبني 💖 وترك المُحب بائسًا حائر
يا سيدة في قصر حبي 💖 اما آن اوان قلبي الساهر
عودي الي يا سيدتي 💖 فقد هُزمت وسيطرت المشاعر
💖💖💖💖💖💖💖💖💖💖💖💖💖💖💖💖💖💖
.................تمت بحمد الله...................
حابه اكتب نصيحه للجميع
المواجه سلاح اقوى من الهروب..والعتاب محبه ..لما تحس بوجع من حد عزيز عليك فكر الف مره قبل التجاهل والخصام...وحط في بالك ان جايز قوي يكون عندو سبب قوي ...الحبيب بيبان حبه لو لبس ثوب العداوه الف مره ..والخبيث بيبان خبثه لو لبس ثوب المحبه الف مره ......ربنا يبعد عنكم كل متصنع للود ويدوم عليكم محبة اهلكم واحبابكم يارب🤲
واللي لسه مش متابعني فايته كتييير اتاكدو انكم عاملين متابعه ولايك للصفحه ده من ضمن النصيحه😂😂
كنتم مع روايه [ وسيطرت المشاعر ] بقلمي زهرة الربيع اتمنى تكون عجبتكم واستمتعتم بها .. زهرتكم تحيكم ودمتم في امان الله مع من تحبون💖🥰
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
الفصل الرابع عشر والخامس عشر والسادس عشر من هنا
الفصل السابع عشر والثامن عشر والتاسع عشر من هنا
الحلقه الحاديه والعشرون والثانيه والعشرون من هنا
الحلقه الثالثه والعشرون من هنا
الحلقه الرابعه والعشرون من هنا
الحلقه الخامسه والعشرون من هنا
الحلقه السادسه والعشرون من هنا
الحلقه السابعه والعشرون من هنا
الحلقه التاسعه والعشرون من هنا
الفصل الخامس والثلاثون والأخير من هنا
❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺🌹💙❤️🌺
تعليقات
إرسال تعليق