رواية وسيطرت المشاعر الحلقه السادسه والعشرون بقلم الكاتبه زهرة الربيع حصريه وجديده على مدونة النجم المتوهج

رواية وسيطرت المشاعر الحلقه السادسه والعشرون بقلم الكاتبه زهرة الربيع حصريه وجديده على مدونة النجم المتوهج

هو انت اللي قتلت ابويا يا سليم... لا اكيد مش انت صح.... ماترد ياسليم ساكت ليه

سليم حس بسكينه غرزت في قلبه ما بقاش قدامه اي اختيار تاني غير المواجهه نطق بالعافيه وقال...احم هو مش بالظبط يعني...هو انا ضربت عليه بس ما كنتش عارف انه ابوكي

مشاعر حطت ايدها على بقها ونزلت دموعها بغزاره وهيه بتهز راسها بصدمه

سليم اول ما شاف حالتها قرب منها وقعدها على السرير بهدوء وقعد عند رجلها على الارض وقال برجاء...مشاعر احنا لسه من ثواني كنا بنقول اننا هنفهم بعض و هندي بعض فرصه ومش هنسيب اي حد يدخل بينا تاني...ارجوكي خليني اشرح لك اللي حصل

مشاعر كانت بتسمعوا ودموعها بتنزل بوجع شديد و هو كمل وقال...... فاكره لما رجعت من السفر ولقيت الشركه اتنصب عليها وبقت في ايد الزفت اللي اسمه حازم...انا وقتها بقيت ادور في الموضوع وعرفت ان فيه حد وصلو بينات واوراق مهمه من مكتب الشركه....والشخص ده اكيد حد معاه المفاتيح عشان يقدر يدخل ويجيب حاجات زي دي من المكتب....و اتفقنا انا وطه حطينا كاميرات علشان اول ما يدخل الشخص ده نمسكه على طول ...بعد ايام جاتلي مكالمه من طه ان في حد دخل المكتب...و لما روحت هناك لقيت واحد كان لابس قناع بس قبل ما امسكه نط من الشباك وانا نطيت وراه ......فضلت اجري وراه بس ما كنتش هلحقه فضربت عليه نار على رجله عشان يقف ..وهو رد الطلقه وضربني طلقه في دراعي علشان يعطلني ويقدر يهرب .....ولما لقيته خلاص هيختفي ضربته طلقه جات في ضهره

مشاعر كانت بتسمعه باستغراب و ما كانتش فاهمه ايه دخل ده بموضوعهم

سليم نزلت دموعه وقال بحزن... لما قربت منه علشان اعرف مين ده وشلت القناع من على وشه لقيته.... لقيت والدك

مشاعر اتسعت عيونها بشده وذهول وانتفضت واقفه وقالت بصدمه....انت. .. انت بتقول ايه ....لا طبعا لا مستحيل ....مستحيل انا ابويا ميعملش كده ...انت بنفسك.... انت بنفسك قلت ان هو حماك من الراجل اللي كان عايز يسرق المكتب وكان عايز يقتلك

سليم اتنهد بحزن عليها وعلى حالتها ووقف وقال..... انا قلت كده علشانك ....انا بحبك قوي يا مشاعر ....ما كنتش عايزك تحسي الاحساس ده.... ولا تعرفي ان الراجل اللي سلمنا لحازم وبوظ حياتنا بالطريقه دي يبقى ابوكي.... ولا كنت عايزك كمان تحسي ان دمه في ايديا ما كنتش عايز حاجه تبعد بينا ابدا....والله انا اكتر منك ما كنتش مصدق اللي حصل ...ده كان احن عليا من ابويا ....ما كانش سواق عندنا وبس ....انا حدش هون عليا سنين طفولتي غيره ..انا وحماكي كنا بنثق فيه جدا لدرجة انو كان معاه مفاتيح البيت والمكتب ..ومع ذالك لما عرفت اللي حصل مشكتش فيه ابدا ولا جيه في بالي اصلا

وكمل بدموع وهو بيفتكر اللي حصل وقال...والله انا....انا اتصدمت جدا باللي حصل.... شلته واخذته على المستشفى كنت حابب الحقو .. بس حالته كانت صعبه جدا...وقبل ما يتوفى طلب يشوفني واعتذر لي وقال لي انه عمل كده علشانك ....عشان كان خايف من حازم يؤذيكي لو هو رفض...و يومها قال لي ان خالد مش اخوكي ووصاني اخلي بالي عليكي ...و....و مات ما قدرناش نلحقه

مشاعر هزت راسها بالرفض وهيه مش مصدقه اللي بيتقال وبتبكي بشده

وسليم كمل وقال بحزن....بعدها خالد من خلال شغله مع حازم عرف منه انه ابوكي كان شغال معاه وان انا اللي قتلته ....ومن وقتها وهو بيهددني بالموضوع ده علشان كده ما قلت لكيش انه مش اخوك ....عشان ما يحصلش اللي حصل دلوقتي ده..... وحياه ابني يا مشاعر انا كل اللي بعمله كان علشانك ....خفت تكرهيني وما كنتش عايز صورة والدك تتهز في نظرك..... انا قلت في البيت هنا انه كان بيحميني ...ما كنتش عايزك تشوفيه غير انسان شريف زي ما انا كنت شايفه طول عمري

مشاعر حست بقلبها اتقسم نصين وبقت تبكي بقوه وانهيار شديد وحالتها كانت صعبه جدا

سليم نزلت دموعه بحزن عليها و لسه هيقرب منها رجعت لورا وقالت بغضب شديد خليك بعيد عني سامع اياك تلمسني تاني... انا بكرهك ..مكرهتش في حياتي قدك يا سليم

سليم اتنهد بحزن وقال.... اقسم بالله يا مشاعر كنت بدافع عن نفسي مش اكتر..... انا هقتل عمي ناصر ليه يعني... ده كان ابويا اللي ما خلفنيش..... والله لو كنت اعرف ان هو ما كنت لمسته حتى بعد اللي عرفته عنه

مشاعر صرخت فيه وقالت بانهيار ودموع ...عارفه ....عارفه.... انا مصدقاك ...المصيبه اني مصدقاك

وبقت تبكي بقوه

سليم اتسعت عنيهه بذهول وبقى يبصلها باستغراب ومكانش فاهم قصدها ايه

بقلم.....زهرة الربيع

عند رحمه فتحت لميرا بتوتر وقالت بهدوء.... اتفضلي

ميرا دخلت وقفلت الباب وقالت.... ليه بتعملي كده في والدتك.... هي ذنبها ايه .....الست هتتجنن تحت

رحمه مسحت دموعها وقالت بخنقه.... اول ما احس اني كويسه هطلع ...تحبي اطلب لك حاجه تشربيها

ميرا بصيت لها بدهشه وقالت..... ياه ....تطلبي لي حاجه ...هو الموضوع بنا بقى رسمي للدرجه دي.... في ايه يا رحمه.....ايه اللي حصل لكل ده ..كل الموضوع مش مستاهل تعملي في نفسك كده

رحمه قالت بدموع ....مش مستاهل .....مش مستاهل ازاي يعني ....ميرا انا كنت حب....

بس قطعت كلامها وقالت بتنهيده..... انسي خلاص

...كل حاجه انتهت

ميرا قالت بسرعه..... اهو ده اللي انا جايه لك علشانه.... انتي لازم تعتبري ان كل حاجه انتهت وما تضغطيش على نفسك اكتر من كده.... ايه يعني..... هو ده اول راجل ندل وغدار نعرفه في حياتنا

رحمه حست بغضب شديد لما قالت عليه كده وقالت باستفهام.... ميرا ممكن اسالك سؤال.... هو انا لما كنت عندك وخليتيني كلمت ادهم في التليفون اللي رد وقتها كان اخوه سليم صح.... انا لما روحت بيتهم لاحظت اني سمعت صوته ولما زعق في المستشفى اتاكدت انه هو.....انت ليه يومها قلتي لي ان اللي كلمني ادهم

ميرا اتوترت جدا وقالت ...ها....عادي يعني ...احم .. انا يومها كنت في ايه ولا في ايه يا رحمه..... انا بقول لك يومها كان معتدي عليا ...والصوت كان في التليفون وبعيد وهم اصلا اخوات وصوتهم شبه بعض ...ما ركزتش كويس.... وبعدين انتي بتسالي كده ليه

..هو انت كمان هتظلميني زيه

رحمه قالت بضيق....اكيد لا يا ميرا.... انا واثقه فيكي ...بس اللي حصل وترني شويه

ميرا قربت منها وقال..... رحمه حبيبتي انتي اختي ....ومستحيل اخسرك علشان اي حد....على فكره هو كمان افتكر اني كنت اعرف وجبتك المطعم مخصوص علشان تشوفيه واتعصب عليا.... اتفضلي شوفي عمل ايه وقلعت اسكارف كانت ربطاه على رقبتها

رحمه اتفاجئت لما لقت رقبتها كلها علامات باللون الازرق نزلت دموعها وقالت...هو.... هو عمل كده

ميرا قالت بدموع مزيفه.... ايوه هو.... دخلت اشوفه واطمن عليه في المستشفى قولت برضو العشره متهونش ...بس هانت عليه ..شايف اني كشفتو قدامك وفجأه لقيتو بيخنقني تخيلي..... كنت هروح فيها لولا ستر ربنا اخوه لحقني

رحمه قعدت على السرير وبقت تبكي جامد وهيه مش قادره تستوعب ابدا

ميرا ابتسمت بخبث وقربت منها وقالت.... رحمه حبيبتي اهدي.... احنا مش لازم نبكي ....احنا لازم نقوى عشان نعرف نواجه الزمن الصعب ده .....انا كل اللي طالباه منك حاجه واحده بس..انك تبقي قد روحك ومتخليهوش يهينك اكتر من كده.....ومهما طلب يقابلك او يتكلم معاكي اياك توافقي..... لانه خلاص لعبته واتكشفت واللي جاي بعد كده هيبقى على المكشوف ...وممكن يقول لك انه عايز يقابلك ويكون عايز يعمل حاجه تانيه زي ما عمل معايا ...او....او زي ما الاستاذ بتاعك عمل زمان

رحمه انتفضت واتسعت عينيها برعب شديد

عند سليم استغرب كلام مشاعر وقال باستفهام...عارفه...عارفه ايه

مشاعر نزلت دموعها بحسره وقالت....عارفه ان كلامك حقيقي... ابويا في المستشفى وهو بيموت قال لي اطلب منك ومن عمي نادر تسامحوه ...قالي خليهم كلهم يسامحوني.....انا مكنتش عارفه على ايه..... دلوقتي بس اللي فهمت..... يا ريتني ما فهمت ....ياريتني ما عرفت ان هو السبب في كل اللي عشته لحد النهارده

سليم حاول يقرب منها يطبطب عليها وقال .... طيب ممكن تهدي..... اهدي علشان خاطري

بس مشاعر رجعت لورا وقالت بحده .....انت بالذات ما تكلمنيش نهائي .... مش عايزه اسمع صوتك ياسليم ...فاهم ..... انا بجد ما بقتش طايقاك ....ولا طايقه كدبك ولا طايقه طريقه الاقناع الوقحه اللي بقيت في طبعك.... كل ما اسامحك واقول خلاص بقى قدامي كتاب مفتوح الاقي جراب ما لوش نهايه مليان بالكدب والتاليف والخداع.... جيت ضحكت علينا كلنا وفهمتنا انه بطل وقف قدامك وحماك.... مش مصدقه ازاي الكدب سهل عندك وبالبساطه دي

سليم قال بسرعه...... والله عملت كده علشانك و..

بس قاطعتو و صرخت فيه وقالت بجنون وغضب .... ومين قال لك تعمل كده علشاني...... انا مش فاهمه مين عينك وصي عليا .....انا اتفطمت بطلت رضاعه من زمان ....وسننت ...ومشيت على رجليا.... انا كبرت كبرت مش انا الطفله اللي كنت بتضحك عليها زمان ....انا زهقت منك ومن كدبك اللي بقى في دمك ....من كدبة الشركه لكدبة غاده لكدبة اخويا اللي طلع مش اخويا .....ودلوقت ابويا بقى فجاه حرامي...سايبني اعيش في وهم ملوش اخر ليييه...ليه ما تقعدش معايا وتصارحني.... انت فاكر انك كده بتحميني انت كده بتدمرني كل ما اعرف حاجه .. بتقتل ثقتي في كل كلمه بتقولها...انت بتموتني ياسليم

سليم نزل عيونه وما بقاش عارف يرد عليها وهي بقت تبكي بقهر وقالت بانفعال.....عارف الغلط مش عليك .....الغلط عليا انا.... انا حيوانه ... بكشف كل كدبه والثانيه وارجع اقول دي اخر واحده خلاص واديلك فرصه ورا فرصه ...انا استاهل ....اطلع بره يا سليم

سليم بص لها بدهشه وهي قالت بغضب وزعيق .....سمعتني ..بقولك اطلع بره

سليم قال بتوتر..حببتي انتي تعبانه دلوقت ارجوكي اهدي وهنتكلم و

بس مشاعر دفعتو ناحية الباب ورمته بالقميص بتاعه بغضب وقالت ...لا انا هاديه كتر خيرك....يلا مش عايز اشوف وشك ....يلا اطلع

وبقت تدفعه ناحيه الباب وسليم قال بذهول .....يا مشاعر ما يصحش كده ....هطلع اروح فين دلوقت

لكن مشاعر ما كانتش بترد عليه وبتدفعوا ناحيه الباب وفتحت الباب ودفعته لبره وقالت بغضب....مش عايزه اشوف وشك هنا تاني سامع

وقفلت الباب جامد لدرجه سليم انتفض من صوته وبقى يخبط بتوتر وهو بيلبس قميصه وبيقول.... مشاعر ..مشاعر طب خليني جنبك النهارده حتى

مشاعر صرخت وضربت الباب برجلها وقالت بغضب... اسكت بقى وامشي من هنا ....انا مش هموت يعني لو انت مش جنبي ...كل مشاكلي اصلا بسببك ..انت مرض مرض

سليم اتفاجئ بعصبيتها الغريبه وقال بهمس..هو انا جننتها ولا ايه

وعلى صوته وقال بتوتر...طب بلاش علشانك علشاني انا ....افتحي الباب هنتكلم .....يعني يقولوا عليا ايه في البيت مراتي طردتني من الاوضه.... افتحي الباب وهنتفاهم ..اقولك هرجع انام على الكنبه ...اصلا شكلها المشكله في السرير

مشاعر قالت بمنتهى العصبيه ...لو ممشيتش من هنا هرمي نفسي من البلكونه وارتاح ايه رايك

سليم قال بسرعه ...طيب ...طيب خلاص ...همشي ...مشيت اهوه

ومشي خطوات وقال بغضب ...صبرك عليا يا خالد الزفت

واتصل على طه وقال ....طه..... انت طبعا عارف خالد اللي شغال عندنا

طه قال ...قصدك اخو مشاعر هانم

سليم قال بغضب...ايوه هو زفت مشاعر هانم....عايزاك تلاقيه في ظرف 24 ساعه هو مشي من البيت وهيحاول يختفي الفتره دي .....مش عايزه يلحق يفكر يهرب حتى... فهمت

طه قال ..اعتبره عندك ياباشا

سليم قال بضيق ..تمام..اه صحيح عملت ايه بالنسبه لموضوعنا.... لسه برده

طه قال ...لسه للاسف

سليم اتنهد وقال طيب فتحوا عينيكم كويس

وقفل معاه ونزل وهو بيقفل زراير قميصه

مشاعر اول ما اتاكدت انه مشي قعدت على السرير وبقت تبكي بقوه وهي حاسه بوجع شديد حاسه انها كل شويه بتصغر في البيت ده اكتر واكتر ومحروقه على اللي عرفته عن ابوها

تحت كان نادر قاعد بيقرا الاخبار على النت وبيقول ...

والجدير بالذكر ان شركه النمس للصناعات قد ساهمت اليوم بمشروع الموت المالي ..حيث رمت بكل اسهمها في اسوء مشروعات العام مما يجعلها على حافة الانهيار مما اثار الجدل حولها كيف لشركه كبيره مثل شركة النمس ان ترتكب هذا الخطأ الفادح

نادر اتنهد بخنقه وقال..... اتفضلي يا ستي بدأ من دلوقت .....مش بيضيع وقته

هدى قالت بحزن....والحل ايه دلوقت

نادر لسه هيرد شافو سليم نازل على السلم وهدى غمزت نادر عشان ما يقولش قدامه بس اتفاجئوا لما لقوه نازل حافي وبيلبس قميصه على السلم امه قالت بدهشه..... ايه المنظر ده .....نازل حافي ليه انت اتخانقت مع مراتك ولا ايه

بقلم...زهرة الربيع

سليم قال بغيظ .. لاطبعا.... هو يعني لو هتخانق معاها هنزل حافي ليه... هيه جزامه....كل الحكايه بس ان الولد صدعني بيزن كتير.... فقلت ممكن انام في اوضه تانيه يعني الليله دي

هدى قالت بسخريه.....بيزن اااااه صدقتك ياحبيبي...قال على وشك يبان.... يا نايم عند الجيران

نادر ضحك جامد وقال ....حلوه دي

سليم اتنهد بغيظ وقال خلصتو استظراف انا اصلا واقف اتكلم معاكم ليه انا هروح اقعد مع ادهم

وراح على اوضة ادهم

نادر وقف وقال... والله انا ما عارف ابنك ده هيعقل امتى

هدى ضحكت وقالت ..طالع لابوه

نادر رفع حاجبه وقال...طب هو ابوه عمره زعلك يا غزالي

هدى ضحكت بخفه وقالت ...لا اقصد هربانه منه زيك...هو انت وقفت ليه... رايح فين

نادر كان مخنوق من اللي قراه عن الشركه وحاسس ان كل ده بسببه بس حاول ميظهرش وقال بمرح مصتنع ..انا هروح اقرى شويه في الجنينه ...لما بقعد جنبك مش بعرف اقرى حاجه

قال كده ومشي وهدى ابتسمت بحزن وقالت....لو محستش انا بيك مين هيحس يا نادر ...ربنا يهونها عليك

عند ادهم كان قاعد بيقلب في تليفونه وبيشوف صور رحمه بحزن شديد بس قفله بسرعه لما دخل سليم وقال.... ممكن تستضيفني النهارده عندك ولا هتهرج انت كمان

ادهم بصلو بذهول بسبب شكله وقال.... ايه يا ابني المنظر ده

سليم اترمى على الكنبه وقال بتعب .....نصيحه من اخوك بما انك لسه على البر ..اياك تنزل البحر تحت اي ظرف ومهما كانت المغريات حتى لو هتموت حر وعطش ... ولو حتمت سيب لهم البر اصلا وامشي

ادهم ضحك بخفه وقال.....ايه اللي حصل بس لكل ده

سليم قال بخنقه..... ستات نكد ..لو ملقوش نكد بيتنكدوا عشان ما فيش نكد

ادهم بصلو بشك وقال ...اممم... ده على اساس اني مش عارفك ....عملت ايه بالظبط

سليم قعد واتنهد وقال بحزن شديد ...الصراحه لها حق متبصش في وشي...انا مش عارف ايه اللي بيحصل معايا ...انا محبتش في حياتي كلها قد مشاعر..وفي نفس الوقت محدش اتجرح مني قدها ..غصب عني والله انا ..انا بعشقها انت عارف ...بس انهارده كملت معانا ...عرفت اني قتلت ابوها

ادهم اتسعت عيونه بذهول وقال ...ايه ..عرفت ازاي

عند مشاعر كانت قاعده بتبكي في الاوضه وهيه بتفتكر ابوها وهو بيموت في المستشفى..مسك ايدها وقال بدموع..قوليلهم يسامحوني ...خلي نادر بيه يسامحني وسليم كمان

مشاعر كانت فاكره انو بيقول كده علشان بيموت خصوصا لما سألت نادر وسليم وقالولها انو مزعلهمش في حاجه

بقت تبكي بشده بس مسحت دموعها وحاولت تقوى لما سمعت صوت بكا ابنها قامت بسرعه وراحت تشيله بس اتصدمت بشده لما حد خبطها على دماغها بقوه

مشاعر اتسعت عيونها بذهول من شده الخبطه وحاولت تتكلم او تصرخ بس مقدرتش ووقعت على الارض مغمى عليها في الحال ووووو

وسيطرت_المشاعر

السادس_والعشرون

زهرة_الربيع

مشاعر_وسليم

بارت طويل اهوه زي ما بتحبو ايه رايكم في الاحداث قولو رأيكم وتوقعاتكم وعايزه تفاعل يليق بالحلقه علشان نكمل يلااااااااا انطلقووووو🏃‍♀️🏃‍♀️🏃‍♀️

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم

الفصل الاول من هنا

الفصل الثاني من هنا

الفصل الثالث من هنا