رواية عروس الجبايش الحلقه العاشره والحادي عشره والثانية عشرة والثالثة عشره بقلم ياسه حصريه وجديده

رواية عروس الجبايش الحلقه العاشره والحادي عشره والثانية عشرة والثالثة عشره بقلم ياسه حصريه وجديده 

الحياة تشبة لوحة فنية تحتاج إلى الصبر

لرسمها ، وإلى التفاؤل الرؤية جمالها 

الصبر والتفاؤل ليس مجرد صفات 

بلـ هما حبال النجاة التي تنقذنا من الغرق 

في بحــر الأحباط 

يُـمـن :- شني ماتت هاي أمي وانا ما صدگت لگيتها شلون تريدني انساها واعوفها

رائـف :- العندي حچيته وكلش ما احب اعيد 

-- بس هيَ أمي و مو من حقك تمنعني منها 

-- اني زوجج واجبج عليج اطيعين زوجج صح لو غلطان

-- غلطان لا طاعه للمخلوق في معصية الخالق وهاي امي يعني والدين ما اگدر اعوفها على مودك الله يغضب عليه  

رفع حاجبه وراها ابتسم مستهزء ورد 

-- والله وطلعتي تعرفين تحچين وتضربين امثال وتقرين احاديث والله زين تطورات

ما رديت عليه بقيت ساكته بس احس اختنكت فد مره رجع گال

-- امج من تصير مثل الامهات بهذاك الوقت عود الله يعاقبج

-- وشبيها شمسويه حتى مو مثل الامهات

-- هههه 

-- عليمن تضحك 

-- عليج وعلى الست الوالده 

عفته وگمت اريد اطلع من الغرفه روحي گامت تفور بسرعه گام وراي لزمني من ايدي ودفعني على الباب  و وگف گبالي ويگول

-- ايي ست بله شوفينا شتعلمتي من الوالده بس كون علمتج وانطتنج من خبرتها لو بقتح بزون مغمضه 

-- ليش هيج تحچي على امي شمسويتلك

ما جاوبني بس جر القراصه من شعري

و نثره بيده بحركات سريعـة واخذ خصله شمهم ويگول

-- صايرة حلوة وهاي الگصه ليگتلج اكثر من قبل صح قبل جان حلو بس هسه لا صاير احلى  و ريحتج كلش طيبه وانـي اخرب على النظافه والعطر الطيب  

............. 

غمضت عيوني وراسي على ايده حظني قوي وهمس بـ إذني 

-- شنو هذا الاثر

سكتت ما رديت استحي احچي رجع گال 

-- هذا جديد ما جان موجود شلون صار شنو السبب شكله حرك محتركه ؟ 

-- اي  

-- شلون هيج احتركتي 

-- امك حرگتني 

جر ايده مني بسرعه وگعد گعده متفاجئ 

ويگـول 

-- شنو

-- بيوم المشكلة البنات لزمني الها وهيَ حرگتني 

گام سريع لبس وطلع عرفته راح الامه وراح تصير هوسه وتعال يا عمي شيلني گمت للحمام وادعي ربي تخلص هاي الايام الصعبه وتعدي بسلامه فتحت الماي

و اسمع صوتهم عالي جوه ما جنت اسمع التفاصيل كامله لان صوت الماي قوي جنت اسمع بس الهوسه لحد ما كملت وطلعت بعد ما سمعت اي شيء من عركتهم طلعت خلصانه العركه ورايحه وباقي بس صوت عمتي تبچي وتدعي عليه من كل كلبها جانت تگول 

-- الله لا يوفقها يارب يلوعها ويعلعلها الله يوجع گلبها ويبهذله وما تشوف الراحه بيوم من الايام 

حاكـم :- وتاااالي وتااااالي شلوون وياج خجلي على نفسج فوك كل هاي الاعمال المسويتها تدعين عليها عبالك صاحبه حق وانظلمتي اشووو كافي تعبتيناا حتى نستحي يومية مرزلينج خلي عندج إحساس وكرامه 

سويت روحي ما سمعت ضميتها دعاويها  بگلبي وكملت دربي للغرفه فتحت الباب وطبيت لگيته صاعد و گاعد على الجرباية يدخن 

ذبيت الخاولي و وگفت گبال المرايه امشط وهو يباوع عليـه لا هو يحچي ولا انا 

لحد ما كملت تمشيط گـال تعاي شويه

اجيت يمه لزمني من ايدي و گعدني 

يمه ويباوع عليه شكله ما اعرف افسره 

مقهور لان يحبني لو مقهور عليه لان مالي احد و جنت بركبته امانه وما حافظ عليها 

بس يباوع عليه وساكت شويه وگال 

رائـف :- باجر راح يطلعون العمال يرتبون المشتمل ونحول بيه 

-- الله كـريـم 

-- اريدج تتحملين امي هاليومين إذا حچت لو غلطت ما اريدج تردين عليها منا لحد ما نحول 

-- انا اصلاً ما ارد والله أحبها وأحترمها بس هيَ ما تحبني 

-- ميخالف تبقى امي ومكانتها من مكاني سكتي عنها الخاطري 

نزلت راسي وانا اگول بيني وبين روحي 

اي هيَ امك لازم اتحملها و أحترمها حتى لو ادوس على راسي بالقندرة بس امي انا تريدني ما احچي وياها هيج بلاية سبب والله وضعي وضع بس الله يعلم بيه رجع گال 

-- انتِ متعشيه لو لا 

-- اي اكلت قبل لا اجي

-- اني جوعان گومي سويلي شي خفيف وسريع 

-- صار 

لبست حجابي ونزلت اول ما وصلت للصاله لگيتهم گاعدين وعمتي بعدهي تبچي بس شافتني نزلت مسحت دموعها 

و دارت وجهها ما تريدني اشوفها تبچي 

كملت طريقي كبل للمطبخ فتحت الثلاجة طلعت بتيته سويتها اصابع و كليت طماطه وياها هو كال سوي خفيف و ماكو شي اخف من هذا بالثلاجة 

بين ما يستوي الاكل حضرت الزلاطه بعدني احضر بيها و اجه واثـق يضحك ويگول

-- يصير اكل من هذا الاكل لو هذا بس للعريس 

ابتسمت ورديت 

-- كله گدامك بالعافيه 

-- يا يابة ام نفس الطيبة لو عشرة مثلج بـبغداد افيشش جان الناس بخير 

-- الله يسلمك ويحفظك هاي لأن انتَ طيب تشوف الناس طيبه مثلك 

ابتسم و گعد على الكرسي بين ما كملت الاكل صعدت اصيح رائـف ينزل ياكل وياه جان باب الغرفه مفتوح شويه بعدني ما طابه سمعته يخابر ويگول

-- گتلج لا تخابرين لو ما گلت 

-- لا تتنعوصين لا وانعل والديج انجبي وروحي يلااا

--  شبيه موو تسألين ما تعرفين شبيه ما مسويه شي فقيرة 

-- بيج بخت بعيده عليه اليوم جان عرفت شلون اعلمج بحدودج ادب سزز

--  ديلاا ولي وبعد لا تخابري 

بسرعه فتحت الباب وطبيت عليه رفع راسه و سد الخط ونزل النقال من اذنه 

حطه على الجربايه 

يُـمـن :- كمل العشه و واثـق يريد ياكل وياك حضرته بالمطبخ الكم 

گام من مكانه و يسأل 

-- وانتِ ما تاكلين

-- لا بالعافيه متعشيه 

عافني ونزل اجيت للنقال شلته اريد افتحه ما عرفتله بيه رمز خفت لا يخرب رجعته بمكانه بس شني متت من القهر على روحي هاي أديان متأكدة هيَ ماكو غيرها وهوَ لا مخرب خطبته ولا عايفها بس چذبوا عليه وجابوني هيج چذب بچذب 

رجع دك النقال مره ثانية باوعت عليه المتصل ( أم أوس) ما رديت ولا شلته بس اباوع عليه وعيوني گامت تحرگني انوب مسميها ام أوس وراسم وياها حياة وجهال و عائله زين إذا هيج رايدها ومخطط الحياته وياها شكو رجعني ليش ما طلگنـي وخلاني رحت الحال سبيلي ليش رجعني ما كمل حياته وياها وخلص مني 

زين هسه انا شأسوي اسكت لو احچي اخاف احچي و يسوي عليه سالفه ويطلعني غلطانه واخاف اسكت واطگ واموت من القهر 

جريت المخده و حطيت راسي عليها وشبعت بچي لحد ما تعبت وغفيت 

شويه وحسيت عليه يگعد بيه فتحت اباوعله بلا ما احچي گـال 

رائـف :- بعد لو لابسه قبوط و جواريب ونايمه بيهن مو احسن 

ما حچيت ولا جني سمعت درت وجهي للصفحه الثانية وغمضت عيوني سمعته يتأفف و يگول خرب حظي اي والله وراها جر المخده بحرگه و نام عليها وكل شوية ورجع يتأفف لحد ما رجعت انا غفيت مره ثانية

 و ثاني يوم گعدني الصبح قبل لا يروح الدوامه گال العمال راح يجون گومي حظري الريوك 

گمت غسلت ونزلت كلهم گاعدين بس  عمتـي ماكو حظرت ريوكهم تريگو وكل واحد راح الدوامه بس هوَ تأخر يلا طلع 

جان متانيني لحد ما كملت الاكل والماي والجاي اخذهن للعمال ورجع عليه لگاني انظف بالمطبخ 

رائـف :- الولد برى مو اطلعين 

يُـمـن :- لا ما اطلع 

-- كملي البيدج وصعدي الغرفتج سمعتي

-- اي 

-- معليج بـ امي لو تغلط تنعل تگلب الدنيا ما تفتحين حلگج وتردين عليها ماشي

ما جاوبت رجع گـال 

-- سمعتي 

-- اي 

-- ساعتين وارجع بس اسجل حظور راح امر بطريقي للسوك شتردين اجيبلهم تسويلهم للغده

-- ما ادري بكيفك

-- ماشي راح اشوف شنو اجيب يلا رايح 

-- الله وياك 

طلع وسد باب المطبخ وراه وأنا رجعت اغسل بالمواعين واعزل بالمطبخ كملت 

وطلعت لگيت عمتي گاعدة بالصاله بس شافتني گـالت 

-- فرحانه مطلعين عمال للمشتمل

و تحضرين وترتبين اكل الهم عبالج اخليج تنامين بيه ليلة وحده والله يا ربي بحلامج 

ما رديت عليها كملت طريقي اريد اصعد بعدني هسه حطيت رجلي على بايت الدرج گالت

-- لا مفركش خطبته ولا عايف خطيبته 

كله چذب ولعلمج رجعج بس حتى تخدمينه وتخدميني وتخدمين زوجته بالمستقبل 

درت باوعت عليها واحس حروره تطلع من عيوني من گد القهر بقيت اباوعلها وهيَ ابتسمت وهزت ايدها وتگول

-- ما بقت عليه غير الهمج ولد الهمج فرحانه تريد تصيح چنتي وام احفادي ههه والله يربي  

لا جاوبت ولا نطقت بحرف واحد صعدت للغرفه وقفلت الباب ونطيت بچي والله

ادري بيه ما مخرب خطبته وادري بيه ما يريدني ولا يهواني ورجعني  بس حتى اخدمهم رجعني لان شافني على گد ايده گال اعوفها للخدمه والتعب وهذيج تصير ام أوس بنت الاصل والفصل وهاي الخدامه الما الها قدر وقيمه 

ساعه كامله ابچي وراها سمعتها تصيح عليه مسحت وجهي و مديت راسي من المحجر ورديت عليها 

-- ها عمه

-- وعمه العماج متسمعين طرشه لو تسوين نفسج مطرشه 

-- تردين شي 

-- تعالي نزلي جابوا المسوك سوي الغده للعمال ورتبي البيت وياج 

بعدني اريد نزل وسمعت صوت بُـرهان يحچي وياه

-- صلِ على النبي عمه مو هيج تحچين وياها خطيه 

-- محد خطيه بهذا البيت غيري  

-- شلون يعني ما نخلص من هاي المشكلة رجعنا من جديد غير التفقتوا و تراضت النفوس بينكم ورجعتوا الابنية شنو معنى هذا الحچي بعد

-- لا تراضت النفوس ولا هم يحزنون

 و رجعوها غصباً عليه وشوفت عينك صبحت العمال تارسه البيت الخاطر ست الحسن والجمال 

-- ترى اول واخر يطلع ويستقر وحده تركي الولد يعيش لا تخربين حياته بسوالفج هاي ما تحصلين غير بس يباس راسه وتعرفين ابنج طگه ونص وشلون عناد شايل ويباس راس دخيل الله مخبل 

-- هو لان اعرفه عنودي وراسه يابس 

و طگه ونص ساكته على هاي المهزله اريد اشوف تاليها وين تصفه 

يُـمـن :- رجعت للغرفه لبست حجابي 

و نزلت بـعدهم يحجون بس شافوني نزلت سكتوا سلمت على بُـرهان أبتسم ورد السلام وأنا كملت طريقي للمطبخ لگيت المسواك على ميز الطعام 

عزلته و بديت احضر بالغده و عزلت البيت الداخلي وكنسته وراها رجعت للمطبخ وگفت احمس بالجدر اجه بُـرهـان يمي وگف مبتسم و يگول

بُـرهـان :-  رائـف ما گدر يطلع من الدوام واتصل عليه حتى اجيب المسواك بمكانه وانطيج خبر تحضرينه بس ما شاءالله عليج حضرتي بدون ما اگولج 

-- مو رائـف قبل لا يروح گال راح يتسوك للعمال 

-- عاشت ايدج 

-- وايدك الله يسلمك 

-- شلون صارت رجلج 

يُـمـن :- الحمدلله 

-- اريد احچي وياج كلمتين 

-- تفضل 

-- والله ما اعرف شنو اگلج بوية مدري خوية المهم اريـد تشوفيني واحد من اهلج وتحسبيني بمثابه اب أو اخ  أو عم  أو خال بكيفج المهم واحد منهم ويريد ينصحج نصيحه تقبلين بيها لو لا 

-- اي تفضل 

-- شوفي يابـة ماكو واحد بهاي الدنيا كامل الكمال بس لله عزه وجل وكل بشر بهاي الدنيا عنده مشكلة معينه ، وبيت جدي خوالي يعني  الله يسلمهم مشكلتهم الانا وشوفت الحال على الناس يعني خالتي ام رائـف وامي و خالاتي الباقيات واخوالي يعانون من الغرور والتكبر وانتِ حظج جابج و وگعج بنصهم فــ نصيحتي الج لا تتأثرين بكلامهم وبنظرتهم الج يعني إذا شافوج بعين وحده انتِ لا تشوفينهم وإذا تكبروا عليج انتِ لا تعبرينهم اصلاً ولا تشيلنهم من گاعهم لان التكبر على المتكبر هو التواضع بعينه، صح انتِ أبنية من گاعج متواضعه وعايشة على الفطرة بس بهاي الفطرة ما تگدرين تعيشين وياهم راح تتعبين اهلي اعرفهم كلش زين إذا وگع بيدهم واحد فقير مثلج يمرضونه نفسينا ما اكلج تعاركي وياهم أو تجاوزي عليهم أو غيري اطباعج لا بالعكس خليج مثل ما انتِ طيبة حبابة مؤدبة خلوقة بس عامليهم بالمثل و طبقي القاعدة التگول ( تشوفني بعين وحده اني ما اشوفك اصلاً) هيج يلا تگدرين تعيشين بنصهم فهمتي قصدي

بقيت ساكته رجع أبتسم و گـال

-- اما رائـف فـ هذا اخوي وماكو واحد بالعالم يعرفه اكثر من عندي هو صح طبعه شوية بيه صعوبه بس تگدرين تلينين هاي الصعوبه وراح انطيج سر عليه 

حچى هيج وضحك وراها كمل حچيه وگال 

-- شوفي هو يحب يستلم بس ما يسلم 

بقيت ساكته واباوع عليه رجع هوَ هم سكت وراها ضحك وهز راسه وكمل كلامه 

-- يعني ما يحب ينطي مدري شلون افهمج الموضوع  والله حرت بس شوفي هو يحب اللي ينطيه ويحسسه هو وبس يعني شنو يگول يتنفذ بصار وتأمر ومن عيوني يحب المقابيله يصير مثل الأخرس والاطرش

 و الأعمى وهوَ الكل بالكل وانتِ سبحان اجيتي على مرامه الهذا السبب تمسك بيج هسه انتِ شأسوين تستغلين هذا طبعج

و تخلينه بصفج صدگيني راح تشوفينه شلون تغير بس صبري وياه شوية 

-- اصلاً انا من اول يوم اجيت هنا عرفت طبعه

-- عفيه عليج عاشت ايدج ابقي هيج فطنه وحفظيهم وحفظي اطباعهم والاهم منهم كلهم زوجج ديري بالج عليه وكسبيه  وحافظي على حياتج الزوجيه وياه وبنفس الوقت حافظي نفسج وعلى صحتج

والله يوفقج و يهدي النفوس بينكم 

-- رحم الله والديك شكراً على نصيحتك ربي يوفقك

-- والديج الرحمه واي شي تحتاجين اني موجود ومثل ما گتلج واحد من اهلج وما يردج غير اللسانج

-- ريتك سالم 

-- الله يسلمج، هسه اني راح اروح ومن يكمل الغده خلي خالتي تتصل عليه اجي اخذه للعمال

-- ان شاءالله 

راح وانا كملت طبخ و رجعت مسحت البيت الجوه و طبيت للديوانيه من باب الصاله عزلتها ومسحتها بين ما كمل الغده كملت تنظيف البيت كله اجيت العمتي دگيت باب غرفتها صاحت

-- خيررر

-- بُـرهان گال من يستوي الغده تخابرينه يجي ياخذه 

ما جاوبتني عفتها ورجعت للمطبخ گعدت ايدي على خدي هسه يجي هسه يفوت ماكو ساعتين كاملات گاعده وايدي على خدي إذن الظهر صعدت توضيت وصليت 

خلصت صلاتي وسجدت ما احچي شي بس ابچي بدموع بدون صوت لحد ما حسيت بروحي ارتاحيت والخنكه البصدري راحت يلا رفعت راسي 

شلت التربه بستها وطبگت المصلاية وتمددت على الجربايه بس غمضت عيوني بعدني ما نمت انفتح الباب وطب رائـف گعدت گعده و گتله

يُـمـن :- الله يساعدك

رائـف :- ويساعدج ، كملتي الغده

-- اي من زمان 

-- نزلي صبي بس ابدل وانزل اخذه

نزلت صبيته وحضرت الصينيه نزل هوَ وراي مبدل هدومه شال الصينية وطلع بيها وانا ضليت گاعده بالمطبخ اجت عمتـي باوعت عليه و گالت

-- حضري الزلاطه ورتبي الميز عمج راح يوصل 

گمت بلاية صوت حضرت الزلاطه والطرشي ورتبت المواعين على الميز طب عمي 

حاكـم :- السلام عليكم 

يُـمـن :- وعليكم السلام الله يساعدك 

-- ويساعدج بابا شلونج

-- الحمدلله 

-- رائـف ويـن 

-- يم العمال 

-- خير ان شاءالله 

طب الغرفته وعمتـي وراه بين ما بدل وغسل اجوا الباقين من دواماتهم و رائـف من العمال غسلوا والتموا بسفـره وحـده 

جبت الخواشيـك وگعـدت گـالت عمتـي

-- شگد راح تبقى هاي الهوسـه والصوت مال العمال

رائـف :- أحتمال أسبوع 

-- زين لعـد اني العصر اروح البيت اهلي لحد ما تخلص الهـوسه يله ارجع 

غـادة :- وتبقين أسبوع بيت جدو 

-- اي ما اتحمل الصوت العالي

رائـف :- بس الصبح يشتغلون ما يحتاج الهاي الدراما 

-- مدا تلاحظ هوايه جاي تتجاوز عليه 

-- بشنـو تجاوزت 

-- حقك متحس بعد بالغلط تعايشت وياه وصار أمر طبيعي عندك

ذب الخاشوكه من ايده وگـام صعد فوط

حاكـم :- البيت مسويته جحيم علينا يعني نبقى هيج حـرب ماكو گعده مثل الاوادم 

-- اي حقكم إني اللي گلبت حياتكم جحيم 

حقكم إني اللي خليت الأبن يتجاوز على امه والزوج ينفر من زوجته والأخ يضرب اخته كُله منـي 

انا من سمعت حچيها و البسامير مالتها بسرعة الاكل وگمت كلش لعبت روحي من هذا الوضع العيشه جحيم وما تنطاق وياها حرب نفسـيه مدخله البيت كله 

صعدت لگيته بالحمام حضرت هدومي كلت بين ما يطلع هو افوت انا اسبح 

حليت شعري و گعدت الهدوم بيدي 

دگ نقاله باوعت ( أم أوس) لزمته اريـد ارد 

فتح الباب وطب شاف النقال بيدي 

تفاجئ بسرعه گـال

-- منو يتصل 

-- أم أوس 

اخذه مني و لغه الاتصال وانا شلت غراضي ورحت للحمام سبحت و المي احسه ينزل 

على اعصابي مثل التيزاب ويحرك بيهن 

روحي شايطه الموتني الكتمان ما احچي وضاله اضم بگلبي وراح انفجر واموت 

طلعت لگيته مجطول على ظهره و النقال بيده مدري شيكتب بيه حتى من طبيت ما عافه بقى يكتب مشطت و لميت شعري 

واجيت جريت الغطه و نمت 

بسرعه غفيت وهو اصلاً ما عبالك شافني 

ملتهي يتراسل ومن گعدت العصر لگيته طالع من البيت كله وعمتـي رايحه الاهلها 

البيت هدوء ماكو صوت ولا اكو حركه 

كل واحد بغرفته رجعت انا گعدت بغرفتي 

ثواني وصاح عليه عمي نـزلت 

حاكم :- امج تتصل عليج تعالي شوفيها خطيه 

اخذت منه النقال ورحت گعدت بالمطبخ ورديت

يُـمـن :- الو 

شهينـاز :- الو شلـونج يمه حبيبتي 

-- الحمدلله زينـه، انتِ شلونج 

-- بالي يمج شلونج شنو الاخبار طمنيني

-- زينه لا يضل بالج 

-- زوحج هم حچه شي ضوجج زعلج لو فرحان برجعتج 

-- لا زين حباب ما حچه شي

-- والمشتمل 

-- طلعوا العمال يعدلون بيه 

-- زين هاي الأخبار الحلوة عمتج خو ما حچت 

-- لا وأنا ما اگعد يمها ومعليه بيها

-- عفيه عليج عاشت ايدج إذا حچت لو ضوجتج عوفيها وحدها تلغي منا لمن تكملين بيتج 

-- ان شاءالله 

-- اتصلي عليه مو تعوفين بالي يمج 

-- ان شاءالله 

-- احچي وياه زوجح ياخذلج موبايل حتى نحچي براحتنا 

-- خاف ما يرضا

-- ليش ما يرضا اكو احد ما عنده موبايل بعد 

-- ما ادري اشوفه بله 

-- ماشي ، بعد شكو ماكو

-- ماكو شي 

-- زين اروح هسه وانتِ ديري بالج على نفسج 

--ان شاءالله ، الله وياج 

قفلته من أمي واگول تريده يجيبلي نقال ما تدري حاط شروط عليه حتى حچي ما احچي وياها ، اخذت النقال رجعته العمي وصعدت صليت ونزلت احظر بالعشه هم ياله ابدي بيه كلهم ينامون من وكت حتى يگعدون للدوام من وكت 

اجت هاله وياي حظرت الزلاطه وانا واگفه على الطباخ اگلـي طب رائـف بدون ما  يحجي وياي ولا انا احچي وياه تعدانا وطب گعد بالصاله 

كملنا العشه اجوا گعدوا كلهم بس عمتي ماكو بـبيت اهلها وانا گعدت حالي من حالهم تعشينا وكل واحد راح الغرفته 

غسلت المواعين و اخذت الجاي وصعدت وراه للغرفه 

اخذ الجاي مني بدون صوت حتى شكراً انعم الله عليج ماكو اجيت تمددت على الجربايه شرب جايه و كمل و طلع من الغرفه 

ضليت متمدده وصافنه بالسكف كل شي ما اسوي ربع ساعه و رجع اجه قفل الباب وبدون ما يحچي شي وياي تمم علاقة المزوجين وياي و دار وجهه ونام 

مرت الايام هذا حالنا ماكو اي سالفه تجمعنا الصبح يطلع للدوام ويرجع يتغده وينام و بالليل حالنا حال الناس المتزوجين اتم علاقتنا لا كلمه حلوة لا ضحكة لا شي حلو حتى ضنيت وحسبت كل الناس هيج 

علاقتهم 

شغلي بالبيت طبخ تنظيف غسل والعمال 

والزايده والناقصه كلها انا حتى هدوم عمي و واثـق اگويهن حالهن من حال هدوم رائـف أمي ما اخابرها يومية كل يومين لو بين يوم ويوم من عمي ومن احچي وياها اضل متحذره خاف رائـف يجي ويشوفني وتصيرلي سالفه لان ما يرضا اخابرها 

وهيَ من تسأل شلونج وشلون وضعج 

ارد بخير والحمدلله اسبوع ورجعت عمتي 

للبيت لان العمال طولوا والبنات كل شويه يخابرنها يردنها تجي رجعت على مودهن 

لا تحچي وياي ولا اطيقني بس بوكت من تريد حاجه تصيح عليه اسويها شغل البيت مشمور كله براسه وحتى خبز رجعت اعجن واخبز كل هذا ما اشكي واكول تعبت عود

مرات هاله تساعدني لو تواكف وياي بالعشة لو بيوم الجمعه تمسح الديوانيه والصاله 

جنت اموت من التعب وظهري احسه ينفتح بالنص لان عمتي الشغله تسويها عليه بشغلتين بس ساكته وما اشكي 

واگول ميخالف هي هاي العيال تريد شغل وتريد وگفه كل الناس هيج مو بس انا

رائـف يوم وره يوم يبعد و العلاقة بيناتنا 

عبارة عن غسلي هذا اكوي هذا سوي هذا جيبي هذا حطي هذا لا سالفه لا گعده ولا 

حتى يباوع بوجهي 

لحد ما عده شهر و فوكاه يومين عدل 

يلا كمل المشتمل و راحوا العمال وده عليه رحت انظفه 

المشتمل يصير بالحديقه مال البيت بس نصعدله بدرج طبيت اباعله فرحانه راح يصير عندي بيت صغير واعيش بيه واستقر وتصير عندي عائله الف الحمدلله 

البنيان جان اول ما اطب مطبخ وبيه شباك جبير اشوف منه الحديقه الجوه وراها صاله صغيره كلش وبيها صحيات

و غرفه نوم جبيره الفهمته عايد ترتيب المشتمل من جديد الجام والصبغ والكاشي والسگف كله مسويه جديد 

استلمته غسل من الساعه بالثنتين الظهر لحد وره صلاه المغرب اني منگعه بالماي 

اغسل ولا خليت شي يعتب عليه حكيته حك كملت كل شي ودنكت امسح بالگاع 

رجع طب عليه 

رائـف :- الله يساعدج 

رفعت روحـي من الگاع و رديت والوصله بيدي 

-- ويساعدك 

-- عاشت ايدج خوش غاسلته غسله قبل شويه حرت شلون راح ينظف نسيت ماكو شي يصعب عليج 

أبتسمت ورديت 

-- ماكو احلى من النظافه وانا احب انظف وارتب مو عاد بيتي 

-- اجن البنات وياج لو وحدج نظفتيه صار عندي شغل وطلعت و وصيتهن يجن وياج

سكتت ما رديت رجع گال

-- عوفي بعـد على باجر كملي

-- كملت ما بقى شي بس امسح الماي

-- وليش بالوصله مو هاي ماسحه 

-- ما اعرف امسح بالمساحه 

-- براحتج سوي اللي يريحج اني رايح للبيت كملي وتعاي 

طلع وانا كملت مسحت البيت و عفت الشبابيك مفتوحه حتى تطلع ريحه الصبغ  وسديت الباب وطلعت راجعه البيت عمي بعدني هسه طبيت واسمع صوت عمي يصيح 

حاكـم :- لعبتج هاي روحي لعبيها على غير واحد حرام عليج طفله يتيمه لعبتي بحالها لعب ما كفاج الليل ونهار مشغلتها خدامه جوه ايدج هسه تردين تكسرينها هالكسره 

بديعـة :- ابو رائـف الله يخليك مو يوميه عايدين الموضوع احنه متفقين شكو بعد هسه تعيط وما قابل 

حاكم :- شوكت التفقناا لا تخبليني هذا البيت بيتها ترى امها رجعتها بهذا الشرط

-- والله زين ويحطن شروط الهوانم 

-- سكتي وسدي الموضوع وعوفي الابنيه تعيش بالمشتمل 

-- والله لو اخر يوم بعمري ما اخليها تنام بيه ليله وحده 

يُـمـن :- سمعت كل الحچي و گلبي احسه بقى يفرفح يعني شتريد مني شو لا حاجيه وياها ولا واصله صوبها وكافية خيري شري ليش هيج تكرهني وتريدلي الأذيه والقهر 

طبيت للصاله كلهم گاعدين بس واثـق ماكو 

اول ما شافوني طبيت عمـي سكت وباوع الرائـف و رائـف گام من مكانه و گالهم 

-- تصبحون على خير 

صعد وانا إذا الحايط حچه انا حچيت وسألت گبل صعدت وراه بعدني بنص الدرج وصاحت عمتي 

-- وين ان شاءالله اليوم انام بدون عشه شنو

يُـمـن :- بس اصلي واجي

-- اي قبل الله عود

عفتها وصعدت بوجهي للحمام توضيت وطبيت للغرفـه شفته متمدد على الجربايه و يلعب بنقاله 

فرشت سجادتي صليت المغرب والعشة 

ومن كملت سجدت وغمضت عيوني فوك التربه كل شي ما احچي بس ساجدة ودموعي تنزل بلاية صوت ما اگدري ادعي بصوت لان گاعد ويسمعني بس متأكدة 

ربي يدري بگلبي وحسرتي وتعبي وأذيتي جنت احچي وياه واگول ، شكيتلك بلايه ما احچي وانتَ ربي السامع متأكدة جاي سمعت شكواي 

بقيت مده طويله ساجدة ودموعي تصب وفاصلة من الدنيا كلها احس رحت بغير عالم عالم كله رحمة و حب وحنان 

وسكينة 

لحد ما اجه وحط ايده عليه و طلعني من السكينة والرحمة و رجعني العالم الدنيا المره 

رائـف :- بيج شـي 

رفعت روحي من المصلاية ومسحت وجهي بسرعه بجادر الصلاة ورديت 

-- لا مابيه

-- ليش تبچين 

-- هيج 

-- شنو الهيج يعني بدون سبب 

رجعت امسح بوجهي بدون ما احچي 

رائـف :- ادري بيج سمعتي كلام امي بس معليج بيها تحچي وحدها هذا الاسبوع نحول هناك بس اكمل تأثيثه 

-- الله عليك 

-- اي يلا گومي كافي بچي مسحي دموعج ما احب اشوفج تبچين اضوج 

طبگت سجادتي و گمت اجيت انزل گال 

-- ويـن رايحه 

-- اسوي عشة 

-- عوفي العشة اكو غيرج يسوي تعاي نامي تعبتي 

-- خاف عمتـي ما ترضا گالت سوي عشة گلت الها بس اصلي

-- ولا ترضا مشكلتها هاي 

بقيت واگفه بمكانه حايره اخاف تسويلي سالفه وانا مابيه على الطلايب گال

رائـف :- لا تحيرين گتلج معليج بعشاهم 

-- وإذا حچت عليه وعاركتني 

-- عود من تحچي اني هنا واجاوبها 

#عــروس_الچبـــايــش 🌼

بــقلم يـــاســـة الحلقة (11)

الوجع أن تبني أحلاماً 

ويسكنها غيرك  

............................... 

يُمـن :- من بقى مصر عليه اعوف العشة وارتاح رجعت للكنتور اخذت هدوم ورحت للحمام سبحت و رجعت للغرفـه مشطت واجيت تمددت بفراشي ظهري احسه صاير 

نصين من التعب جاي اشتغل شغل الحواوين ما تشتغله وما اصدك يجي الليل حتى بس امدد جسمي وانام 

جرني عليه وحظني و باس گصتي و گـال 

-- الصبح نروح نجهز بيتنا 

-- انا اروح وياك

-- اي و أختاري كل شي بنفسج اريدج تشترين كل شي على ذوقج  

-- شكراً

-- بلخدمه 

ضحكت وانا اباوعله أبستم وضمني بحظنه حيل وگـال 

-- ادري بيج تعبانه وامي مأذيتج بس هانت هذا اخر أسبوع وترتاحين 

-- بجالك وبخيرك ان شاءالله اعيش الراحه والسعادة 

ضحك و رد

-- اللسانج حلو واسوالفج أحبها بس انتِ بخيله ما تحچين ولا تسولفين وياي 

-- لا والله مو بخيله بس انا ما احب احچي هواي ولا احب السوالف هذا طبعي من وانا صغيره

-- هههه اعرف واني اصلاً احب هذا الطبع 

يعني احبه وما احبه 

-- شلون يعني حزوره 

-- هههه احبه بوقت معين واضوج منه بوقت ثاني 

-- وشوكت تحبه وشوكت تضوج منه

-- احبه من اصير عصبي و احچي واعيط وانتِ تبقين ساكته ما تردين و اضوج من تضوجين من شي وتبقين ساكته ما تگولين شبيج ولا شتردين احسج تعاقبيني 

-- لا مو اعاقبك بس انا من جنت صغيرة ماكو شي اضوج منه ابوي عايش وانا مدلله ومن مات واجينا البيت جدي گمت إذا انقهر ما احچي اخاف على امي لا تنقهر واخاف لا ننطك انا وياها 

-- هذا الوضع قبل هسه انتِ يمي يعني إذا ردتي شي لو ضجتي من شي گولي لا تخلين بگلبج 

سكتت ما رديت رجع گال 

-- هاا شو رجعنا سكتنا 

-- شـگول يعني ما اعرف 

-- هههه كل شي لا تگولين تعالي 

حظني و باسني بخدي وراها ضحك وگال

-- شلون خدوم ناعمة يربي 

ضحكت رجع تقرب عليه وانا ويا رحنا بعالمنا ماكو غير دقايق واجانا صوت عمتي تصيح بكل صوتها يُمـن ما يُـمـن فزيت مرعوبه من الصوت ومن گد ما انرعبت من صوتها دفعته من عندي قـوي رفع روحه منـي و حچى بعصبيه 

-- شبييييج 

-- عمتـي تصيح عليه 

وخر منـي بعصاب و دفعني قوي و گال بصوت عالي 

-- خره بيج وبعمتج امشي وليي العمتج انعل حتى الساعه السودة العرفتج بيها 

شلت ثوبي من الگاع لبسته و رديت عليه وانا واگفه مو تسمعها تصيح جاي عليه

-- امشيي من وجهي روحي خدمي هذا قدرج وقيمتج يلاااا ولي من خلقتي 

حصرتني البچيه واختنكت طلعت من الغرفه و هيَ بعدهي تصيح بكل صوتها 

ضليت واگفه يم الباب و احچي وياه روحي 

هسه هوَ ضاج مني انا شعليه غير امه تصيح ما يروح يحاجيها انوب ارد على روحي واگول حقه يعني رجال بعزه نومته ادفعه والله شني امك تصيح عليعه وتصيح شأسويلها 

استغفرالله يا ربي هسه انا الغلطانه لو امه لو هوَ مشيت وباوعت الها من المحجر ورديت عليها

-- ها عمه

-- وعمه العماج مو كتلج سوي عشه

-- مو جنت اسبح 

-- نزلي يلاا 

بسرعه نزلت للمطبخ حضرت العشه

و كملته ورتبته على الميـز ورحت صحتهم اجوا رجعت صعدت اصيحه يجي يتعشه 

سمعته من وره الباب يحچي بالتليفون جان يگول

-- كتلج ما اجي الصبح عندي شغل 

-- اي ادري جمعه شغلي بالبيت مو بالدوام 

-- وانتِ شعليج تسألين 

-- اهوووو شكد تلحين ترى روحي طافرة وگوه صابر مالي خلكج العصر امر عليكم وكافي ملحه 

فتحت الباب وطبيت اول ما شافني بسرعه عدل گعدت و گـال 

-- يلا ماشي 

-- اوك 

-- تمام 

-- باي 

يُـمـن :- العشة كمل انزل تعشة

گام نزل وانا ضليت ما نزلت احس گلبي غده جمر وراسي گام يطلع نار متت 

ياهي هاي و وين يريد يروح و النقال اخذه وياه وحتى لو عايفه هنا ما اعرفله بيه رمز 

ضليت اخذ الغرفه و اجيبها اريد بس تبرد اعصابي ماكو كلي ارجف وگلبي جمر طلعت من الغرفه مديت راسي من المحجر اسمع صوته يتعارك وياه امه شلون تصيح بصوت عالي وليش ما يسون هنَ العشه وترجع عمتي تردله 

-- والله زين حتى بشغل البيت گمت تتدخل وتحط نفسك

رائـف :- هذا مو شغل بيت هذا شغل حيوانات حرام عليج جاي تصعد تنام مثل الميته من التعب وحاطه بيها فزه من صوتج 

-- والله هذا الموجود منو گالها تصير جنتي

-- سهله يصير خير 

-- تهددني شنو

-- لااا العفووو استغفرالله حقج عليه 

حچه هيج وراها سمعت صوت الباب انطبك حيل عرفته طلع رجعت للغرفه 

ميته من القهر هسه انا شمالني ما اكسبه شو جاي يدافعلي و يتعارك وياه امه الخاطري وسوالي بيت و يريد انا الاختار الغراض شبيه ما اعرف ارضيه ليش اخليه يكرهني ويروح يحچي ويا غيري 

وگفت على المرايه واباوع الروحي وصافنه 

هسه هاي منين اليخابر بيها أديان لو غير وحده ما ادري ليش گلبي يگلي هاي اديان 

وما مخرب خطبته منها ويريد يكمل البيت و يحطني بيه ويجيبها هنا بهاي الغرفه وحتى عمتي گالت ما مخرب خطبته يچذب عليج يربي تعبت وحرت ساعدني هسه انا شأسوين 

ضليت واگفه وصافنه بالمرايه اخـر شي فتحت شعري مشطته ولبست طوك حلو جابته امي ويا الغراض فتحت الجراره وحطيت كحل ومسكارة وحمره الخدودي والحلگي من الجابتهن امي حسيت روحي صرت غريبة بس طلعت حلوة 

رحت للكنتور و اخذت سيت من الجابتهن امي لبسته و انا ميته من المستحه استحي من روحي اجر بيه منا ومنا وكوه امشي احسها عيب ما ادري هاي النسوان شلون تلبس هيج لبس وتضل تفتر بيه 

گدام ارجالها ذابات فلك 

رحت وگفت على المراية و احچي وياه روحي شو انا مستخقه ومستهتره شني شجاني هسه شيگول عليه والله زحمه منه 

حطيت ريحه واجيت جريت الغطه

و تغطيت بيه وضليت نايمه على ظهري ومغطيه روحي و صافنه على السكف 

ساعتين وانا صافنه ومغطيه روحي فتح الباب و طب اول ما شفته طب جريت الغطه زايد وغطيت حتى وجهي ضلت بس عيوني طالعه باوع عليه و اگف بمكانه وراها شمر تراكسودة على الميز و اجه يريد ينام جر الغطا ما انطيته بقيت مجلبه بيه 

باوع عليه و رجع جره مره ثانيـة جلبت بيه اكثر گـال بصوت عالي 

-- شبيييج مجلبه بيه شكوو

-- لا ماكو 

سحبه من جديد جريته منه قوي وغطيت وجهي كله حتى عيوني عاد هو هنا جره مني بكل قوته انا بسرعه غطيت وجهي

بـ اثنين اديـه ما اريد اشوف وجهه استحي 

ضحك بصوت عالي وراها گـال 

-- الحمدلله والشكر ربي 

جر ايديه من وجهي و هو يضحك و يگول

-- غير تنطيني خبر بالموضوع ارجع من وكت 

ما احچي بس مغمضه عيوني حيل

-- ههههه ترى مو اني المبدل حتى تغمضين مني شو فتحي 

حچى بهدوء فتحت عيونه وانا كون الگاع تنشك وتبلعني ابتسم و سحبني گعدني گعده ، گعدت گباله 

رائـف :- صدقه الربج شكد حلوة

يُـمن :- انا والله مو قصدي اضوجك بس فزيت من صوت عمتي 

-- ضوجيني يوميه اقبل بس صالحيني بهيج منظر 

..... دعيني ارتوي بكِ عانقيني قبليني خذيني 

الى حديث لا اعلم الى عالمك الجميل عالم الحكايات اللطيفـة دعينا نخوض المغامرات الشيقــة يا سيدتـي لا ترحميني

فـ انا مغرم بتفاصيلك المثيـرة

ولكننـي بذات الوقت مغـرور و بـلمساتك سيـزداد الغـرور احـذري وايـاك

أن تمنعينـي ولا ستكـون النهايــة مخيبـة معيبـة مريبـة   ....  ( بقـلمي يـاسـة) 

الصبح گعدت من وكت سبحت ونزلت حظرت الريوك والميت البيت كله گبل لا يگعدون وطلعت غسلت الحوش ورشيت الزرع و عيوني ليفوك على المشتمل فرحانه 

رجعت صعدت گعدته بس يرد اي وما يگوم ساعه كامله اگعد بيه لحد ما تعبت يلا گام 

بوجهه للحمـام سبح وطلع لگاني اعزل بالغرفه أبتسـم ابتسامـه اول مره اشوفها 

و اجـه عليـه رفع وجهي بـ ايده وباسنـي 

ويگـول

-- تدريـن بوجهج يفتح النفس من الصباحيات

-- ههههه 

-- والله صدك مو شقه وجهج كلش حلو ويفتح النفس 

بقيت ساكته ما اعرف ارد ضحك وگال

-- معجب بيج لدرجة احـب حتـى هذا السكوت ليضوجني 

-- كملت الريوك 

-- ههههه يربي وين اني وين انتِ خرب بالحظ هههه نزلي هسه اجي وراج

نزلت فرحانه بيه صدك كل ما حچه وگـال خرب حظي بس وضعه هسه احسن من وضعه گبل گام يسولف ويضحك ويغازلني شرايد اكثـر 

بس نزلت لگيتهم گاعدين وعمتي جايبه الريوك المحضرته انا و صابته الهم

و گاعدين يتريگون بيه ما حچيت شي بس صبحت عليهم و رحت للمطبخ بلايه ما صوت شي خليهم ياكلونه بالعافية 

وگفت سويت غيره بين ما نزل مبـدل گعدنا نتريت هسه بدينا ناكل و دگ نقال عمتـي ردت وراها صرخت و ضربت على خدها وتگول

-- عزااا العزاني وشلونها هسه 

-- يا مستشفى صخام بعين العدو 

-- يلا جايين جايين

حاكـم :- شكو 

بديعـة :- أديان منتحره وماخذينها للمستشفى 

حچت هيج و هي تمشي سريع الغرفتها 

والباقين نخبصوا حتى رائـف عاف اكله وشال نقاله وطلع برى يخابر 

دقايق وكلهم راحوا بقت بس هاله يمي 

صادف يوم جمعه وماكو دوام ومن وصل هذا الخبر راحوا كلهم 

انقهرت عليها وحطيت اللوم كله عليه وحملت روحي خطيتها وهاله گاعدة ونقالها بيدها كل شوية تخابر تسأل 

لحد العصر وما راجعين بعدهم وياها 

صح كالو زينه وحالتها استقرت بس بعدهي بالمستشفى طلعت المسودنه

شاربه سم بس ملحگين عليها و ماخذينها مسويلها غسل معده 

انا راسي گام يوجعنـي بالليل نمت متأخره و گعدت من الصبح گلت خل اصعد ارتاح شوية وانوب انزل بقيت ساعه فوك و هاي الساعه كتلت روحـي كتل وكل الذنب حطيته بيه انا الاجيت وخربت حياتها كله مني لو ما متزوجته چا هسه مرتاحين 

و الله هاديهـم وحياتهم بخيـر 

بعدني گاعدة وحدي و سمعت صوت عمي و واثٓق بسرعـة لبست حجابي ونزلت لگيتهم جايين بس لا رائـف ولا عمتـي بس واثـق وغـادة و عمـي 

هاله :- بشروني والله متت قلق

واثـق :- خبله واابتليتا بيها 

غـادة :- مسكينـه خربت حياتها و ضاع حبيبها وخطيبها من بين اديها بساع بساع

ما اگول غير الله يجازي السبب 

حچت هيج و صعدت الغرفتها و انا الچان الحايط يتحرك ويحچي فتحت حلگي وحچيت متت بدمي ضليت واگفـه والدمعه خنكتني خنگ 

عمي ما حچه شي عافنا و راح الغرفته

و واثق شمر روحـه على القنفـه 

هاله :- طلعوها من المستشفى لو لا

واثـق :- اي هسه طلعت

-- لعد ماما وينها

-- راحت وياهم 

-- ورائـف همات وياهم

-- اي 

انا افتريت وصعدت فوگ طبيت للغرفه وبچيت هسـه انا تحملت ذنبهـا وكسرت خاطرها واخذت حبيبها بيا وجه اباوع على الناس بعد شتگول عليه العالـم 

ضليت فوك ما نزلت لحد الليل كلـش يلا اجه رائـف فتح الباب وطب بس شفته عدلت گعدت و گتله 

-- الله يساعدك

رائـف :- هلا بيج 

حچى هاي الكلمه و راح للكنتور طلع هدوم وراح للحمام بقى هواي بالحمام ومن طلع عيونه صايره حمر شمر الخاولي على الميز و جر الغطا ونام بلا ما يحچي شي 

وانا نفس الحال نمت بلايه صوت وثاني يوم 

من گعدت البيت هدوء والوضع طبيعي 

عمتي ابد ما حچت ولا فتحت الموضوع وياي توقعتها راح تتعارك وياي و تسويلها هوسة بس جانت ساكته و طبيعية كلش  وهوَ گعد بلاية صوت وبلاية اكل بدل وطلع

يوم يومين ثلاثه اربعه لحد ما صار أسبوع كامل الصبح يروح الدوامه و يرجع الظهر يتغده و يصعد ينام ساعه ويگعد يبدل ويطلع ما يرجع غير بالوحده لو بالثنتين 

لا يحچي وياي ولا يطلب مني شي 

انا من شفته بعد روحه مني ضليت بعيده ولا حچيت وياه ولا ادنيت يمه اسبوع گامل على گد صباح الخير والله يساعدك وهذا هو 

عمتي يوميه وره العشه تروح البيت اختها سميعة ام غـادة وما ترجع غيـر ويا رائـف بالوكت المتأخر 

واليوم مثل كل يوم كلهم بالدوام وبس انا وعمتـي بالبيت هيَ بالصاله والنقال بيدها 

تكتب بيه و انا انظف بالديوانيـة الباب انفتح و طب رائـف وراه طبوا زلم كل واحد لازم خشبه بـ ايده صعدوا بيها للمشتمل 

ضليت واگفـه يم الشباك واباوع عليهم 

يطببون بالخشب وراها مرايه جبيرة وانوب جربايـة عرفتة جاب غرفه نـوم 

صعدوها فوك وما نزلوا بعد وانا رحت للمطبخ اكمل باقي شغلي شويه وشفته نزل وراح على باب الشارع فتحته وطبب زلم جدد وهاي المره غراض مطبخ كاونتر

وطباخ وثلاجة 

گلبي طار من الفرح جاب غراض للبيت وراح اگعد وارتاح واصير مثل العالم عندي بيت وعائلة

اجت عمتـي باوعت من الشباك و افترت على الكاونتر طلعت كهوة حطتها واگفت يمها تحضر بكوبها عين على الطباخ وعين عليهم شلون يطببون بالغراض لحد ما فارت كهوتها اخذتها وراحت بلاية صوت 

جريت الكرسي و گعدت بالمطبخ واسمع صوتهم وهوستهم لحد ما خلص إذان الظهر يلا كملوا وصلهم للباب و اجه بس طب بس شفت ضحكت و گمت من مكاني

يُـمـن :-الله يساعدك

رائـف :- ويساعدج 

-- جبت غراض للبيت 

-- اي 

حچه هيج و طب ضليت واگفه واباوع عليه راح للصاله گعد حرت اروح اشوفهن لو لا شو ما گالي تعاي شوفيهن و ضايج وگـوه يحجي روحه بخشمـه 

طبيت وراه لگيته نايم على القنفه وحاط فوگ وجه الكوشه حچيت وياه

-- يصير اصعد اشوفهن 

جر الكوشه من وجهه شمرها و گـام ويگول 

-- اي يصير ليش ما يصير تعاي 

حچى هيج ولزمني من ايدي اخذني للمشتمل المطبخ يخبل يخبل لونه رصاصي و الغرفه بيضه و تخبل من هاي الراقيه عبالك مال ملوك صليت على محمد وانا اشوف الغراض وباوعت عليه فرحانه 

رائـف :- شنو رائيج

-- يخبلن الله يرزقك وان شاءالله تشوف على عينهن كل الخير 

اجه عليه وجر الحجاب من راسي و باسني وگال

-- يصير نستفتحهن بهذا الوجة الحلو

ما رديت بقيت ساكته ومستحيه منه رجع باسني بخدي و يگول

-- تدرين تستاهلينهن 

-- الله يحفظك 

دنگ عليه يريد يبوسني گتله 

-- بس اجيب هدومنا اول مره

-- لاااا بعدين 

حچى هيج وشالني وانا خربانه من الضحك وفرحانه من كل گلبي طببني للغرفة وسد الباب برجله  

شوية و نقاله دگ وخرني من ايده ورد 

-- ها يـوم

-- اي بالمشتمل 

-- اي وياي

-- شعليج انتِ 

-- ههه والله اعتذر بعد ما تنعاد 

حچه هيج و سده وشمره على ميز الجربايـة و رجع يباوع عليه ابتسمت فرحانه على خجلانه گـال

-- راح اروح دقايق وارجع لا تنزلين ابقي هنا ماشي

هزيت راسي بلا ما ارد گام طلع وانا لبست وگمت افتر بالبيت فرحانه طايرة ما ناقصه شي ابد حتى تفزيون حاط بالصاله شو ما شفتهم صعدو جوز من گعدت صعدو هسه هو كمل الحمدلله بعد عوزه بس هدومنا خل يجي واروح اجيبهن 

طبيت للمطبخ فتحت الثلاجة فارغه وبعدهي ما مشتغله ضليت افتح بخانات الكاونتر فارغات ما بيهن غراض رجع اجه بـ ايده صينيه صغيرة بيها طاوه و اثنين طماطيات وخيار وخبز و بطل زيت وعلية الملح ضحكت واگول

-- شني هاي

-- سويلياهن جوعان

-- انا طابخة جوه خير من الله ليش تاكل طماطه

-- اريدج اطبخين بالمطبخ

-- هههه توازيت عليه اول وتالي اطبخ بيه خل ننزل نتغده جوه ومن نگعد هنا اطبخلك اشكال والوان

حطهن على الكاونتر و طب للصاله و يگول 

-- جوعان استعجلي 

من شفته عاجبه ياكل هيج شغلت النار

و سويت الطماطه و غسلت الخيار اجيت اسويه زلاطه ما جايب مواعين عفته بكبره 

بين ما استوت حطيتها بالصينية واجيت 

لگيته بالغرفه صحته اجه گعد بالصاله 

اكل بلايه صوت حرف واحد ما حجه وانا هم ساكته واكلت وياه على الواهس فرحانه اول اكل اكله بـ بيتي 

بس كملنا شلت الصينيه للمطبخ صاح عليه مشمشة مديت راسي عليه من باب المطبخ والضحكة تارسه وجهي وطايرة من الفرح وگلبي يركص لان صاحني هيج 

أبتسم وهو يشوف فرحتي و گـال 

-- عوفي من ايدج وتعاي 

بسرعه اجيت لزمني من ايدي وگعدني بحظنه وعيونه بعيونـي ويگول

-- انتِ طيبة حيل و حبابة زيادة عن اللزوم 

گلبج نظيف و شكلج يفتح النفس بس حظج زفت 

-- هههه لا والله انا محظوظه بيك وحظي هاكبرة

-- تحبيني 

ابتسمت مستحيه رجع گـال

-- تحبيني 

-- شعندي غيرك حتى ما احبك انتَ صرت كل شي بحياتي 

-- كلش ضجت من ابوي خطبج و دك صدره الاعمامج و جابج هنا غصب عليه 

وجودج جان كلش زاعجني بس ابد ما كرهتج صح ضجت وانزعجت بس ما كرهتج جنت اشكي من وجودج بحياتي

و حاير شلون ارجعج الاهلج واخلص منج لحد ما غركت بيج وحبيتج واني ما حاس على نفسي 

سكت وانا اباوعله واديه احسها صار حاره من گد مستحيه منه اول مره هيج يحجي وياي باسني بخدي و رجع يگول

-- إذا اگلج اني احبج تصدگيني لو لا

-- اي اصدگك وادري بيك تحبني لو ما تحبني ما سويتلي هذا البيت بس حتى ارتاح ما رجعتني من امي من زعلت ما عاركت عمتي على مودي وما خربت خطبتك الخاطري 

-- يا ترى راح تضلين هيج حبابة وفقيرة لو راح تغيرج الايام  

-- ابو طبع ما يغير طبعه وانا هذا طبعي من اول ما جابتني امـي لو تريد الايام تغيرني چا غيرتني من اول ما اجينا البيت جدي وعشنه وياهم

-- اتمنى

-- شوكت نجيب هدومنا 

سكت ما جاوبني بس گام للغرفه واخذني من ايدي اتمدد و حظني لا هو يحجي ولا انا لحد ما غفينا اثنينه وهل النومه نومه لحد المغرب فزينا على صوت الباب يندگ 

ردت اكول افتحه ما خلاني راح هو ثواني ورجع عليه گال

-- هذا بُـرهـان جاي علينه واجت هاله انطتني خبـر لا تنزلين ابقي هنا شوية وارجع

-- هدومي جوه واريد اسبح 

-- من اجي اجيبلج وياي 

راح يشوف بُـرهان وانا ضليت بالبيت ما اسوي شي بس فرحانه طايره من الفرح 

كل شـوية اگوم اباوع عليه وافتر بيه ما مصدگه روحـي 

ساعه ورجع بس ضايج كلش وماله خلك حتى روحـه حط هدومي بالگاع و راح تمدد بالغرفه رحت انا سبحت واجيت فتح اديه وصاحني نمت على ايده 

الصبح گال گومي ننزل نتريك وراها اخذج الامج تفاجأت شعجب راح يوديني الامي من رجعت منها لليوم هو ما يطق يسمع إسمها  كيفت وخفت بنفس الوكت بس ما سألته بقيت ساكته عافني ونزل نزلت وراه محد گاعد بسرعه حطيت الجاي على النار و حظرت الريوك گعدت عمتي جرت الكرسي بدون ما تحجي شي وانا هم ما حجيت وياها شوية وگالت

بـديعـة :- متخجلين من نفسج ماكو عيب عندج 

درت عليها متفاجأة ورديت

-- ليش شمسوية

-- ممسويه شي فقيرة فطيرة مو شوفي وين وصلتينا عائلتنا صارت ناس ضايجة من ناس ناس متتحمل ناس أديان فقدت صحتها و وصلت بيها للأنتحار وين تردين توصلين بعد شوكت تحسين على نفسج وتطلعين من حياتنا ، سوينا زين وياج

و حميناج من القتل هذا جزات احسانا

مو لگيتي امج مترحين يمها متخلصينا من شرج 

درت وجهي منها ورحت للكاونتر طلعت الكلاصات حطيتهن بالصينية رجعت گالت

-- عبالج اكرهج وهيج احجي وياج لا غلطانه اني ما اكرهج بس ما اگدر اتقبلج زوجة الأبني الكبير ابني تعبان على نفسه ودارس وفاهم ومثقف ومرتب وانتِ ابنية ريفيه لا فهم لا علم لا شهادة لا ترتيب لج حتى حچي ما تعرفين تحچين شجابج اله وفوگاها خاطب بنت اختي يعني ابداً ما اگدر اتقبلج بـ اي شكل من الاشكال 

نفس الشي ساكته ما ارد بس احس اختنكت والغصه وگفت بلعومي 

بديعـة :- ابقي ساكته لا تردين ولا تنطين اي ردت فعل بس خلي اگلج شغله كلش مهمه ومنها وعرفي قيمتج واخذي نصيحي لان صدگيني ما راح ترتاحين رائـف ما يحبج ولا يريدج و تمسكة بيج مجرد شفقه وبنفس الوقت مستفاد منج الخدمته لان نحس وكلشي يريده كون على مزاجه واجيتي انتِ على مزاجه تسوين كل شي بدون اعتراض بس اول واخر راح يخلص دورج وينتهي موضوعج 

رحت فتحت الثلاجة طلعت الجبن وانا حرف واحد ما راده من شافتني هيج ساكته وما احجي گامت و گفت وگفه واجت عليه صارت كلش قريبة وحچت بصوت ناصي ما تريد واحد يسمع 

بديعـة :- ابقي بدون إحساس بدون مشاعر وبدون كرامه وخلي اگولج من الاخير باجر حنه رائـف و عگب باجر الزواج والبيت الفرحانه هذا راح يزف بيه حبيبة عمره أديان وانتِ هناا مكانج يمي خدامه لا اكثر ولا اقل 

عافتني وطلعت وانا بقيت لازمه الجبن واگفه صافنه لا چذب ماكو هيج حچي ما اصدگ ابد ابد 

مشيت للصينية شلتها واخذتها للصاله لگيت عمي و رائـف گاعدين صبحت على عمي وحطيت الصينيه بالگاع ومشيت اريد اصعد صاح عليه

رائـف :- وين تعالي تريگي 

يُـمـن :- بالعافية ما اريد راح اكل يم امي

حاكـم :- شنو رايحه الامج اليوم

-- اي 

سكت و باوع الرائـف و رائـف ما انطه اي رده فعل صعدت فوك و عيوني ما صدگت تلگه مكان فارغ حتى تصب براحتها متت شكو قهر بگلبي بچيته و طلعت حرگته بالبچي ومن ارتاحيت رحت للحمام غسلت و بدلت و نزلت لگيته گاعد يدخن وعمي وعمتي والبنات گاعدين يمه من شافوني نزلت سكتوا بسرعه وهوَ گام من مكانه

و گال

-- بس ابدل واجي 

هزيت راسي و رحت للحوش طلعت عيوني صارت على المشتمل صفنت عليه ميته من القهر بگلبي شگد حچي شگد سوالف شگد قهر بس ما اگدر احجي والسكوت موتني 

محد اجاني ولا واحد حچه وياي ربع ساعه وطلع مبدل والسويج بـ ايده مشى گدامي وانا امشي وراه صعدنا بالسيارة محد بينا يحچي شويه و گـال

-- المغرب جاي اطلع للشمال اني و بُـرهان عندي شغل نهاية الاسبوع ارجع ابقي هاي الايام بيت امج ومن ارجع من السفر امر عليج ماشي

هنا حسيت طلقه ونبتت بنص گلبي متت يعني صدگ حچي عمتي و جابني الأمي يريد يعرس إذا راح يعرس شكو عايفني ليش جاي يقشمرني ويسوي روحه يحبني ليش خلاني انام بالمشتمل إذا مو الي والغراض مو غراضي

رائـف :- تعرفين اني وامج مو على وفاق ما راح انزل وياي للبيت 

ما اجاوب رجع گال

-- ليش ساكته بيج شي

--لا ما بيه 

-- ممنوع اطلعين من البيت بدون علمي 

و إذا اجه زوج امج حاولي تقللين احتكاكج بيه خليج بعيدة عليهم بس هالكم يوم فهمتيني 

ما اجاوب من شافني ما ارد ولا اباوع عليه استغفر وسكت لحد ما وصلنا للباب شال فلوس وانطاني 

يُـمـن :- ما اريد شكراً

رائـف :- خليهن مصرف اسبوع كامل راح تبقين هنا خاف تحتاجين شي 

-- رحم الله والديك بس ما احتاج وإذا احتاجيت امي عدها وتنطيني

-- هههه اي بهاي حقج امج عدها فلوس من رجلها الشريف الأمين 

باوعتله وهو نفس الشي باوعلي وهز ايده ورجع يگول

-- ممنوع اطلعين وياها فهمتي مو 

-- اي فهمت 

عفته ونزلت وهوَ بقى بالسيارة دگيت الباب وهو گاعد ويباوع عليه لحد ما فتحت امي الباب وطبيت يلا راح

شهينـاز :- شلونج حبيبتي شخبارج طرت من الفرح من دزلي رائـف رساله گال راح تجين 

-- الحمدلله زينه انتِ شلونج 

-- بخير إذا انتِ بخير تعاي فوتي 

طبينا للديوانية وهي طايرة بيه گامت تحضر بالاكل وجابت الماي والجاي وكل شوية و جايبه حاجه 

ما ادري شلون مر عليه اليوم وشلون خلص كل الوقت جنت گاعده وصافنه وروحي احسها شايطه ثاني يوم امر من القبله نفسي مگطوع وعـيوني تحركني 

ما خابر ولا سأل ولا شافني وانا ميته 

امي شگد فرحانه بجيتي وگاعدة يمي تسولف وتضحك وتجيب وتحط وانا بغير عالم شگد سألت شبيج وليش ضايجة وياهو وياج ما ارد غير بس  مابيه شي

ثالث يوم اللي على اساس يوم عرسه الساعه بـ 3 الظهر خابر على امي وطلب يحچي وياي جاوبته گال

-- شلونج

-- الحمدلله 

-- مشتاقلج

-- بعدك بالشمال

-- اي 

-- شوكت ترجع

-- گتلج نهاية الاسبوع

-- خير ان شاءالله

-- شكو ماكو شسويتي ما سويتي

-- ماكو شي ما سويت گاعدة وساكته

-- زوج امج هنا 

-- لا ما جاي من اجيت الهسه

-- ها زين 

-- اي

-- يُـمــن تدرين بيه احبچ

-- اي ادري واثقه بيك كلش 

سكت ما رد بقى ساكت شوية وانا ساكته وراها گـال

-- شنو تردين اجيبلج وياي من ارجع

-- سلامتك ما اريد غير تبقى سالم الي وهذا هو 

-- راح اروح هسه عندي شغل وبعدين اخابرج ديري بالج على نفسج 

-- الله وياك 

سد الخط وراح وانا حطيت راسي بين رجليه وبچيت بچي روحي احسها طلعت اجت امي تركض على صوتي تسأل شبيج ما ارد گاعدة گبال و تسأل تريد بس تفهم 

ماكو ما اجاوب بس ابچي بصوت عالي وبحرگه گلب لحد ما تعبت عفتها وگمت غسلت وجهي ورجعت عليها لگيتها گاعدة بمكانها وصافنه بموضوعي گالت الها 

يُمـن :- گومي وديني للبيت 

#عــروس_الچبـــايــش 🌼

#بــقلم_يـــاســـة

#الحلق_12)

فكرة انه أختار ان يسكن في مدينتي مع حب جديد يخصه اوجعتني، والطريقة التي 

أستطاع بها المضي قدماً جعلتني أدرك الفرق بين المدينة والوطن فأنا أحببته 

كـ وطن لا وطن لي غيره بينما هـوَ احبني كـ مدينة يرحل عنها ويعود اليها متى شاء

ليست كل المدن اوطان لنا و سيضل ذلك الحب القديـم يسكن مدينتي حتى يقبر بها دون ان يجـد مدينـة أخرى تحملـه..... 

.......................... 

يُـمـن :- اخذيني للبيت

شهيناز :- ياا شسوين بالبيت إذا رائف مسافر وجابج هنا

-- يماا اخذيني فدوة رحتلج

-- ليش تردين ترحين سويت شي ضوجج وما ادري

-- لا ما سويتي بس انا اريد اروح الله عليج يما اخذيني فدوة رحتلج

-- شبيج شكوو غير افهم السالفه اول مره

-- راح اموت گلبي جمر جاي احترك ولج يما جاي احترك لهيب بروحي گومي وديني

-- يا ستار يا ربي شبيج

-- بس خل اروح واشوفه بعيني بس خل يطلع اللي بالي چذب مو صدگ

-- شنو اللي بالج غير افتهم

-- بس اخذيني وانا احچيلج

سكتت وتباوع عليه حايرة بحالتي شوية وگالت گومي نروح ركضت لبست بسرعة هدومي و حجابي و طلعنا وانا الف دعاء دعيت كون اتخايل و كون حچي عمتي چذب كون ماكو هيج سالفه و الطريق صار شطوله عليه

إديه على گلبي و عيوني على الشارع و افور و الخوف ياكل بروحي لحـد ما وصلنا الشارعهم انا وصلت وانا تمنيت السيارة طولت والبيت صار بتلفات الدنيا تمنيت متت بالدرب وما وصلت وشفت هاي الشوفه 

الشارع متروس ناس و الفرح مبين بوجه كل العالم عمـي واگف واثـق ولـد خالتهم واخوالهم وناس غرب هواي وانا عيوني ادور عليه من بين العالم گالت امي

-- شكو ليش هاي الهوسه

رديت وانا فاقدة اخر أمل بهاي الدنيا

-- عرس

-- منو العرس

-- رجلي عرس يما

-- شنوو ؟ شجاي تحچي شبيج

فتحت باب السيارة و نزلت ومشيت گبلها و هي نزلت واجت تمشي وراي مصدومة

صرت بنص الناس والكل شافني بس هوَ ماكو ما شفته اجه عمي و واثـق عليه عمي لزمني جريت ايدي منه و مشيت اسرع

و طبيت للبيت سبقني واثـق وصار گبالي بالحوش ما يخليني اطب

يُـمـن :- بس خليني اشوفـه حتى عيوني تصدگ وما تبچي عليه بعد

سكت و شكله كله تغير وهوَ يسمع حچيي

تعديته وطبيت للديوانيـة ( الاستقبال) 

غادة واگفه تركص و عمتي تهلهل والباقين يصفگون و أديان لابسه البدله البيضه

و فرحانه والضحكة تارسه وجهها ترس

وهو لابس قاط العرس و شكله مرتب على الأخير و گاعد و مبتسم أبتسامة طالعه من نص گلبه 

وگفت بـباب الديوانيـة و اباوع عليه وعيوني تحرك بيه حرك و گلبي گمت اسمع صوت دگاته امي وگفت بصفي ما تحچي شي بس ساكته مصدومة 

رفع راسـه الجهه الباب وشافني اول ما شافني طاحت دمعه من عيني دمعه اعتاب عيوني چن عاتبته وحچت صدمتها بدمعه 

عيوني جن گالتله ليش صعدتني للسماء وشمرتني للگاع 

رفعت ايدي مسحتها بسرعه گام من مكانه وانا بس شفته گام افتريت وطلعت اركض 

ركضت بكل سرعتي وبكل قوتي ركضت مثل الجاهل لا حسبت احساب احد ولا فكر بعيب ولا شفت احد گبالي عيوني صارت ما تشوف غير منظره وهو بقاط عرسه ومرته بصفه 

طلعت من البيت اركض ما ادري وين اريد اروح كل الادري بيه اريد اشرد ما اريد اشوفه بعد اريد اروح بعيد ما اريد اشوف واحد من المعازيم ولا واحد من اهله وكرايبة كلهم يذكروني بخذلاني وكسرتي 

طلعت من الفرع و أمي تركض وراي وتصيح عليه تريدني اوگف و صوت واثـق يتوسل بيه اوگف عثرت وطحت على اركبي 

ضليت بطيحتي ما گمت ولا حاولت اگوم 

وصلوا امي واثـق لزموني وگوموني من الگاع

شهيناز :- عمت عيني عليج كون إن شاءالله

واثـق :- يُـمـن صل على النبي وداعتج ما يستاهل دمعه من عيونج هو الخسران 

رفعت راسي وباوعتله بعتب ورديت

-- مو گلت انا اخوج وبظهرج ليش هيج هانت عليك أختك 

سكت ما رد وأمي جاوبتني بمكانه

-- كافي يمه كافي طابخينها بيناتهم يا اخت يا بطيخ 

واثـق :- لا خاله والله مو هيج السالفه

شهيناز :- اسكت رجاءً خليني لازمه اللساني منا الشارع ما أريد افضحكم 

حچت هيج ولزمتني من ايدي و عبرت بيه الشارع ويا ما عبرنا اجه رائـف عبر ورانا

 و وگف يمنا بكل عين صلفه وانا جسمي غده سعفه ارجف واعصابي كلها ترجف وياي 

رائـف :- اوگفي يُمـن بس افهمج

شهيناز :- والله والإسمه الله إذا ما خليتك تحلم تشوف اظفرها ما اطلع بنت امي وأبوي بسيطه اله أندمك 

جرني قوي من ايدي و صاح بـ امي

-- امشييي لجج تهدديني شنو 

--  لا ما اهددك اني انفذ وعيونك تشوف وإذنك تسمع 

دفعني يريد ياخذني جريت روحي منه حيل 

وصرت وره أمي ، و أمي ما سكتت بقت تصيح عليه وتغلط وهو تخبل غلط ونعل

بـ أمي وما أحترمها و واثـق واگف بنصنا يسكت بيهم وهذيج الفضيحه بنص الشارع والما يشتري بقى يتفرج علينا شهرتهم أمي شهرية لمت عليهم المنطقة 

عمي وبُـرهان و باقي الولد كلهم اجوا ورانا 

وصوت امي عالي فضحتهم فضيحه سبتهم ونعلتهم وغلطت عليهم لحد ما ارتاح گلبها 

وعمي حاير بيها يريدها بس تسكت و الولد

اخذو رائـف الصار واحد ثاني و نزع ثوب المستحه و فشر على أمي اشكال الفشار 

وعمـي و واثـق وبُـرهان بقوا يمنا يتوسلون بيها تسكت 

حاكـم :- ام يوسف الله يخليج انفضحنا گدام الناس كافي الله يخليج

شهينـاز :- يا ناس هاي المستحين منها والله والإسمه الله إذا مت خزيتكم ما اتسمه ولكم ما بيكم شريييف تضحكون علينااا تجون ترجعونها وفصخ وما فصخ تالي تسولها كمين وتجيبون المره بدلتها بنص بيتكم مو هاي يتيمة ومكسورة جنح شتكولون الربكم يا ظالمين فوك ظلم عمامها وجورهم عليها انتـوا

بُـرهان :- واثـق بس جيب سيارتي بسرعه 

اخذ واثـق السويج وراح يركض وعمي رجع يگول

-- حقج شتگولين شتحچين حقج بس انطينا مجال نتفاهم مو بالشارع والله عيب خزيتينا انتِ وهذاك طايح الحظ الما مربه

شهيناز :- سهلة أني أربيه منا وجاي بسيطه 

أمي ترجف من الإعصاب وانا ارجف من القهر انوب على حظنا ولا سيارة تكسي اجت وفاتت بس سيارات خصوصية تفوت ماكو تكسي ، وانا كل هاي الهوسه حرف ما نطقت كلمه ما حچيت بس واگفه

 و جسمي يختض مثل السعفه وگلبي اخ يا گلبي جمرة مشتعلة بيه جمرة طاحت فوگاه وحركته حرك 

اجه واثـق بسيارة بُـرهـان ياخذنا يرجعنا للبيت وامي ما قبلت تصعد توسلوا رادو ماكو قفلت عليهم وخزتهم وفضحتهم فضيحه اخر شي گالت ما يروح ويانا هذاا

على واثـق 

هوَ من سمعها شال السويج وانطاه البُـرهان واخذنا بُـرهان رجعنا البيتنا 

الطريق بطوله امي تغلط وتسب بيهم 

والولد ساكت ما يرد وانا ساكته ولا انطق ولا احچي اخر شي امي جرتني الحظنها

و گالت

-- عساهم احتركوا بنار گلبج عسا الفقر والظيم والجوع والعوز اكلهم عسا حسرة گلبج هاي كسرت شكو عافية عدهم وضلوا بسكتهموما حچوا مثل ما ضليتي بسكتج يروحلج فـدوة الچلب النكس 

حطيت راسي بحظنها و بعد هذا حدي بچيت بس مو بچي تگول ماتت امي مات ابوي القهر كله طلعته الظيم كله شكيته بصوت بچيتي الاخ جانت تطلع من نص گلبي 

جنت ابچي واصيح اخخخخ جانت الاخ تطلع مني مال وحده موجوعة روحها

و گلبه يوجعها و الدنيا كلها توجعها 

امي حاظنتني و تسكت بيه وانا ياهو اليطفي نار گلبي جنت ادري بيه ما يحبني وادري بيه يحبها ويرديها ادري انجبر بيه 

و ادري ما يهواني وراح يجي يوم وياخذها

هذا كله ادري بيه وما هماني الموتني شلون قشمرني وچذب عليه شلون خلاني اصدگه شلون خلاني احبه واتعلق بيه وأامن بيه هذا الموتني أمنت بيه و ثقيت بيه گام يحبني و يريدني راح اموت ربي ليش علقني بيه وكسر گلبي هاي الكسرة 

الولد طبگ و دار علينا وگال

-- گولي يا الله گلبج راح يوگف 

شهيناز :- وگف گلبه وگلب امه ان شاءالله

-- ام يوسف لا تزيدين النار حطب الله يخليج سكتي الابنية مو وكت هذا الحچي 

ما تسمعينها شلون تبچي 

-- كافي يمه حبيبتي يروحلج فدوة والله اله ازوجج تاج راسه وراس الخلفه والله اله اخليه يعض اصابعه ندم والله كافي 

-- استغفر الله العظيم 

حچى هيج وشغل ومشى شكله ما قبل على حچي امي و امي سكتت وانا ضليت ابچي بس صوت أقل لحد ما وصلنا للبيت الولد راح واحنه طبينا بوجهي للديوانية جريت الغطاه وغطيت روحي وغمضت عيوني ودموعي جوه الغطا تصب لحد ما تعبت ونمت بساع بعد لا حسيت ولا فكرت 

عبالك ربي نزل السكينة بگلبي عبالك مسح على عيوني ورحت بسابع نومه لا حسيت بشي ولا فكرت بشي ولا سمعت شي مثل الرحت بغيبوبـة من الساعة خمسة العصر لحـد ما صار وگت إذان الفجر 

فزيت على صوت الاذان يصيح حي على الصلاة حي على الصلاة رفعت روحـي من الفراش امي نايمة على القنفه يمـي 

گمت للحمام غسلت وتوضيت و فرشت السجادة بالحوش و صليت صلاة الصبح 

و رگعت و بچيت بهدوء بلاية صوت ما جنت احچي شي بس ابچي ما اشكي ولا اسولف بس اكيد ربي يسمعني ويسمع صوت روحي و گلبي و يدري شبيه وشيوجعني وشـ اريد 

بقيت مده طويله هذا حالي لحد ما حسيت بگلبي برد شويـة وروحـي ارتاحت والخنگه البصدري راحت شلت السجادة و رجعت الفراشي و سبحان الله بس حطيت راسي على المخده رجعت نمت بلايه تفكير 

ما گعدت غيـر الساعـة بالعشرة الصبح شلون مشى عليه اليوم هذا ما اتذكر شلون تعدى وما متت بيه من قهري وحسرتي ما ادري بيومها خلصتها بس ابچي وامي يمي وتسكت بيه و تبوس بيه ترديني بس اسكت خلص اليوم وصار الليل و من قدرة الله بس اجاني الليل الله نزل عليه السكينة

و الأمان ونمت بلاية أحساس وما فزيت  غير مثل البارحه ويا صلاة الفجر صليت

 و شكيت الربي  ورجعت نمت 

وثاني يوم فزيت على صوت امـي جانت تحچي ويا عمـي هـاشـم شلون رحنا وشفنا گاعد يم مرته ابدله العرس وشلون ضحكوا علينا وهو يـرد 

-- لا تحچين يمها بعد بالموضوع سدي كافي خطيه 

-- لا ما احچي شي هذا هو بعد كل شي انتهى

-- تركي الابنيه هي تاخذ قرارها لا تتدخلين بحياتها 

-- مستحيل اقبل ترجعله بعد

-- شوفيها بالاول لا تاخذين قرار عنها 

-- هيَ ما تريده 

-- سأليها و تأكدي منها وراها تصرفي

-- الله كـريم

بقيت بمكانـي وصافنه على البنكه بلايه حركه طبت أمـي عليه لگتني گاعدة گالت

شهيناز :- گعدتي حبيبتي صباح الخير

يُـمـن :- صباح النور 

-- گومي غسلي حتى نتريك 

-- عمي جاي 

-- اي 

بقيت گاعدة واباوع عليها بسرعة گالت

-- گومي حبيبتي لا تستحين والله عمج يحبج و خوش رجال هسه تتعلمين عليه بس گعدي يمه و سمعي سوالفه راح تحبينه وداعتج

ما جاوبت شي رحت للحمام غسلت

و اجيت وگفت يمها بالمطبخ جانت تحضر بالريوك وانا واگفه وساكته اي رده فعل اي حركه ما اسوي طلع عمي من الغرفة بس شافني ضحك وگـال

هاشـم :- اليوم منو منورنا يُـمن الحلوة  شلونج بابا 

يُـمـن :- الحمدلله 

-- حبيبتي عمو سمعيني زين و خلي هذا الكلام ترچيه بـ إذنج هذا البيت بيتج و انتِ تگعدين بيه واحنه نطلع واني عمج وابوج وانتِ بنتي أن شاءالله ، لا تخجلين مني وحسبيني ابوج و صديقح و شنو تحتاجين بس أشري بـ ايدج وكل شي يجرالج وكل احنه بخدمتج 

-- ريتك سالم عمي ربي يحفظك ويوفقك رحم الله والديك

ضحك وباوع الامي أمي بسرعه ردت 

-- يُـمـن ماخذه لهجه اجدادها وابوها شگد عشنا بغداد ودرست لحد المتوسطه بغداد بس بقت على نفس لهجتها مثل ابوها الله يرحمه 

هـاشم :- والله عاشت ايدها بقت متمسكه بـ اصلها وهي عمر كامل گاعدة هنا بغداد

شهيناز :- احنه صح عشنا بغداد بس  بمنطقه شعبية يعني اهل منطقتنا القديمة كلهم يحچون قريب على العمارة الناصرية و بغداد مثل الخلط صايرة الهذا السبب ما تغيرت بقت مثل اهلها

-- الله يحفظكم 

حچى هيج وراح للديوانية گعد وانا ضليت يم أمي بالمطبخ لحد ما كملت الاكل واخذته و رحنا يمه الزلمه أمانه الله ولا حسسني انا غريبة عنه حچى وياي وسولف وضحك بس انا مستحيه منه و ما ماخذه راحتي 

كملنا الاكل وگفت غسلت المواعين اريد اتسله الرجال گال اليوم عازمكم على سفرة من هاي السفرات المعدله ردت امي

-- حي الله أبو تميم والله 

ضحك و جاوبها

-- كم يُـمن و أم يُـمن عندي 

ابتسمت على حچيه وامي بقت تحچي وياي تريدني ابدل ما قبلت اطلع راحت صاحته عليه و اخذوني وطلعوني غصباً عليه 

بيومها رحنا للزواء وهاي اول مره اطب الها صدگ غيرت جو وتونست و عمي عاملني مثل الجاهل ما خله لعبة ما صعدني بيها ما خله حيوان ما شوفنياه واشترالي وجابلي و يجيبني منا ويحطني منا الزلمه مالت الله ما خله شيء بنفسي وكل هذا سوى بس حتى انسى الظيم شوية و ما رجعنا للبيت غير المغرب 

اول ما وصلت بدلت هدومي ونمت متكسرة تكسر حتى ما لحگت افكر وانقهر بساع نمت وثاني يوم بس تريگنا امي گامت بدلت و گالت 

-- راح نروح انا وعمج بشغل ونرجع لا تفتحين الباب الاي بشر 

ما سألتها وين رايحه سديت الباب وراهم ورجعت گعدت وبس فرغ البيت وضليت وحدي راح بالي هناك يمه هسه شـ گاعد يسوي بالبيت طالع نايم گاعد يضحك يسولف هم يذكرني هم ينقهر عليه 

انوب ارجع اگول ليش هيج كسرتني مو انا حبيتك و ثقيت بيك وصدگتك وبنيت عليك أمال ليش تكسرني هالكسرة أنتَ من الاول گتلي ما اريدج و ما اهواج وضليت بعيدة عليك وما وصلت يمك ليش رديت عليه و عشمتني بيك و خليتني أحبك

و اصدگ بيك رايدني وهاوييني 

انوب الجاي يموتني اخذتني للمشتمل

و نومتني بيه و وكلتني بيه و فررتني بيه

و كل الحچي الحلوة الجنت اتمنى اسمعه منك حچيتليا هناك ليش هيج سويت ليش بيه 

ضليت گاعدة و دموعي على خدي وراها 

گمت غسلت وجهي و بديت انظف بالبيت 

ما خليت شي يعتب عليه بديت بيه من باب الشارع لحد الغرفـة الاخيرة غسل بالماي والقاصر 

اريد اشرد من قهري اريد التهي عن كسرتي هاي اريد شيء افرغ بيه همـي وماكو غير الشغل اخلص الوكت بيه وانسى بيه الظيم 

ساعه ساعتين ثلاث ساعات وانا بعدني اشتغل ومنگعه بالماي سمعت صوت نقال يـدگ رحت ادور على الصوت لگيته فوك الثلاجة شلته طلع نقال امي ومكتوب 

حبي يتصل 

رديت گلت هذا عمي و اضن يدورون على النقال عبالهم ماخذينه وياهم وضايع منهم خل ارد واگلهم بالبيت 

-- الو 

شهيناز :- ها يُـمـن

-- هاا يما هذا نقالج بالبيت ناسيته

-- لا ما ناسيته اني عفته خاف تحتاجينه ونسيت انطيج خبر 

-- شني اجيتوا بعدكم

-- لا بعدنا نتأخر باعي بدلي ملابسج راح يجي عليج مــراد يجيبج النا

-- يا مراد وين يجيبني چا انتم وين  

-- احنه بيتنا الجديد طلعنا نريد نحول بيه وعمج گال ما دام فارغ بعد خلينا انظفه فد مره حتى باجر نحول بيه بسلامة

-- خوش بالعافية بس يا مـراد هذا 

-- أبن عمج هاشـم 

-- استحي يما

-- منين تستحين قابل جاي تعشين يمه هي بس مسافـة الطريق يجيبج النا 

و فضت وراحت عود حسبي تكسي و يلا استعجلي راح يوصل وجيبي التليفون وياج 

-- يلا خوش 

رحت ذبيت هدومي المنگعه ولبست هدومي مال الطلعه الجيت بيهن وحطيت دشداشه ثانية بعلاگه گلت خاف هناك ابدل هذني من اشتغل 

بين ما كملت تبديل گعدت متانيته شوية واندگ الباب گمت وگفت وره الباب وصحت 

-- منو 

رد

-- اني مـراد إذا كملتي يلا اوصلج

فتحت الباب صار بوجهي ولد بكصه واثـق وعين النبي تحرسه الطول والجسم والزيان يخبل كلش مرتب الله يخليه بس شافني أبتسم و گـال

مـراد :- السلام عليكم 

-- وعليكم السلام 

-- كملتي ؟ 

-- اي 

-- زين لعد قفلي الباب وتعالي 

قفلت الباب و طلعت هو يمشي وانا امشي وره لحد نهاية الفرع طابگة سيارة سودة عليه صعد بيها وانا فتحت الباب الوره وصعدت ما گال شي بس باوع من الجام ودار وجهه 

شغل ومشى هو ساكت و انا ساكته محد بينا يحچي بس صوت المسجل مشتغلة بيه أغنية مشينا مسافة ودگ نقاله نصى المسجل ورد 

-- ها يابة

--اي اجينا

-- اي 

-- تمام 

-- لا ما جبت 

-- ماشي سهلة 

-- صار 

قفله ورجع عله المسجل و مركز بالطريق رجع دگ نقاله مره ثانية رد بس هاي المره امه تخابر گال الها 

-- هلا يوم حبيبتي 

-- عندي شغل

-- لا اتأخر أحتمال 

-- لا تنتظريني تغدي بالعافية

-- هاا شبيها ؟ 

-- ضاربهاا ؟ 

-- يعني ما ضاربها 

-- زين ابوي يعرف 

-- ماشي تمام سهلة

-- الله وياج

قفله من امه وفتح الجام وشغل جكارة كام يدخن انا جنت مركزه وياه شلون يحجي وياه امه  انقهرت عليها المسكينة نايمة ورجليها بالشمس رجلها متزوج عليها و ولدها يدرون و ما يحچون الله يساعدها إذا درت شلون حالها عفية زلم

ما بيهم واحد يخاف الله بمرته 

مشينا مسافة وهوَ طبگ ونزل للأسواق وانا غمضت عيوني واگول بيني وبين روحـي عفيه دنيا لا بيها زلمه ولا بيها مره بيهم حظ كلها الوادم عايشة بالغش والخديعة شلون الواحد يگدر يتلون و يلعب على الحبلين شلون يسيطر اعوذ بالله 

ضليت گاعده بالسيارة و صافنه على الشارع وهذا طب للأسواق وما طلع ما ادري شعنده نام هالنومه نومه نقاله دگ وانگطع ورجع دگ مره ثانية وانگطع انوب دگ نقال امي بـ ايدي باوعت طلع عمي يخابر جاوبته

هاشم :- ها بابا 

يُـمـن :- هلا عمي 

-- وين مـراد اتصل عليه ما يرد

-- نزل للأسواق ما ادري شـ يشتري 

-- هاا تمام من يرجع گوليله يمر على ابو عبدالله يجيب السمج من يمه ويجيب وياه خبز فد مره

-- ان شاءالله  

سديته من عمي و اجه الولد بـ ايده غراض فتح الباب اليمي و حطهن بصفي بلاية صوت وصعد شغل ومشى گتله

-- عمي خابر 

باوع عليه من المراية و رد متفاجئ ورد 

-- يا عمج 

-- عمي ابوك 

أبتسم وگال

-- ها اي و شراد 

-- تجيب خبز و السمج من ابو عبدالله 

-- وشيوديني الابو عبدالله دخيل الانبياء صدگ يحجي 

طلع نقاله وخابر ابو 

-- ها يابة 

-- شيوديني الابو عبدالله اني وين وطريق

 و ابو عبدالله وين 

-- ازدحام وحلت دوام يابة صدك تحچي 

-- يلا يلا 

سده و گال بنتر استغفرالله يا الله 

وافتر من الاسدارة و رجع انا لا اندل ولا احچي ولا ادري شني السالفه اطرش بالزفه 

الشارع ازدحام و الهورنات والدنيا مگلوبه 

واحنه واگفين بالازدحام حلت دوام والشارع ما يتباوع من الازدحام رفعت راسـي اباوع من الجام شفت بُـرهان لابسه نظاره و سيارته بصف سيارتنا والزلمـه صافن عليـه ومصـدوم 

نزع نظارته و يباوع بصدمـة شعندي صاعدة بهاي السيارة وبهاي الظهاري ويا هذا الولد وانا متت بدمي هسه شيگول عليه وين اضم روحي شگول عليج يمـا كل منج

مـراد انتبه عليه وشافه شلون يباوع عليه نزل الجامه وگاله بصوت عـالي 

-- شكووو على شنو تباوع محتاج شي 

بُـرهان بسرعة صعد جامته ودار وجهه من يمنا ما رد و مراد رجع يگول

-- الناقص أبن الناقص 

چا هسه انا غير احچي وارد ضليت بس اطگطگ بـ اصابعي ومتيته بدمي گوه حچيت وطلعت الكلمه مني ورديت عليه

-- هذا أبن خالة رجلي خوس ولد خطيه بس تفاجئ لان ما يعرفك وشافني صاعدة بسيارتك بهذا الوكت 

باوعلي من المراية ورفع حواجبه اثنينهن 

و گال

-- هاي شنو أنتِ متزوجة 

-- اي 

مشى السير وطلعنا قبل بُـرهـان رجع الولد يگول 

مراد :- حسب ما اعرف انتِ جنتي بيت جدج و ما يقبلون تجين يم امج بعدين بعدج صغيرة شوكت لحگتي تتزوجين 

-- هاي بعد القسمة  

-- على الخير ان شاءالله

-- رحم الله والديك 

وصلنا الابو السمج طبگ ونزل ويا ما نزل 

طبگت سيارة بُـرهان بصف سيارتنا ونزل منها واجه علينا مراد وگف ما راحو يباوعله

و بُـرهان مصدوم و عين عليه وعين على مراد وصل يم السيارة فتح الباب عليه

و گـال

-- نـزلييي 

بصوت عالي احس رجليه بادت عبالك هذا صاحبي وكضوني وياه اجه مـراد عليه ويگول

-- بس دقيقه اخي

باوعله و گال

-- وو منووو انتَ

--اني مراد ابن ابو زوج ام يوسف 

سكت بُـرهان و باوعلي وراها گال

-- اي اهلاً وسهلاً و شـتسوي يُـمـن بسيارتك بهاي الظهرية وين رايحين 

مراد :- جاي اوصلها البيت امها 

-- وين جانت هـيَ حتى تريد توصلها البيت امها 

-- جانت بالبيت القديم وماخذها للبيت الجديد 

باوعلي و گال بعصبية

-- زوجج يدري بيج لو لاااا

ما جاوبت بقيت ساكته صاح بصوت عالي

-- تخلصين حياتج خرسه لو شنو موضوعج

نفس الشي ما اجاوب 

مـراد :- اخي لا تصيح وتسويها دراما الابنية جانت بيت امها القديم وامها حالياً بالبيت الجديد وماخذها الها واني مو غريب عليها تعتبر وحده من عائلتي فـ لا تسويها مشكلة و هذا يعرف وذاك ميعرف وتعظم الموضوع رجاءً احنه بالشارع و يانا أبنية نصي صوتك إذا ما بيها زحمه 

-- اي صح حقك عليه 

حچى هيج ورجع السيارته و مراد سد الباب وراح يجيب السمج وانا إذا السيارة فتحت حلگها وحچت فتحت حلگي وحچيت لو رديت بس ساكته و عيوني عليه شلون شغل ومشى سريع 

دقيقة ورجع واجه مراد جايب السمج صعد وشغل ومشى اول ما مشى باوعلي من المرايه و گال

-- خو ميسويلج مشكلة هذا 

-- لا 

-- اكيد زوجج متفهم يعني ممعقوله يكبرون الموضوع ويسون مشكلة اني مو غريب 

ما جاوبت بقيت ساكته وهوَ هم سكت لحد ما وصلنا البيتنا الجديد المنطقه حلوة والشارع مرتب مثل منطقه بيت عمي حاكم تقريباً طبگنا بالباب ونزلنا البيت من بره مبين حلو دگ الباب ثواني وفتح عمـي  

هـاشم :- تأخرتوا 

مـراد :- الطريق ازدحام و دزيتنا النص بغداد نجيب السمج ما تفهمني شنو موضوعك قابل بس ابو عبدالله يشوي سمج بـبغداد ماكو غيره 

-- دفوت فوت على أساس ما تعرف ما اكل السمج من غيره

همَ طبوا وانا ورهم طلعت امي من باب المطبخ تضحك فرحانه بالبيت مدري بيه 

شهيناز :- هلا نور البيت 

درت وجهي اباوع للتصميم حوش لا جبير ولا صغير وعلى الجهه اليسرى حديقه صغيرة و باب للديوانية و باب من جهه اليمنى للمطبخ 

ومن باب المطبخ اكو هول يعني صاله صغيرة بس مرتبة بيها غرفتين وحده بصف وحده و درج دائري وبالنهاية حمام وبصفه ترك بنيانه كلش حلو و كله حديث و يخبل بس فارغ ما بيه غراض 

شهيناز :- ها شلونه البيت 

يُـمن :- عتبة خير عليكم ان شاءالله حلو بالعافية

شهينار :- الله يعافيج 

هاشم :- حضري الغده يمعودة متت من الجوع 

-- صار ثواني 

مـراد :- اعتقد نسيت الخبز 

هاشم :- صدگ تحجي وين عقلك 

-- هسه اجيب ما اتأخر بس اعصابك مو زين عليك العصبية لا تموت إسم الله عليك ونسوانك تبقى بالظيم 

امي ضحكت وعمي نفس الشي ابتسم والولدطلع يجيب رجعت امي تصيح وراه وياك سفره جاهزة ولبن 

يُـمـن :- هذا بيتج لو بيت عمي

-- بـ اسم عمج بس بيتي

-- بالعافية

-- الله يعافيج وهاا ترى هذا بيتج مو بس بيتي و هاي الغرفه شوفيها الج 

ما جاوبتها بقيت ساكته و عمي اجى فات للحمام يغسل دقايق و رجع مـراد جايب الخبز و باقي الغراض فرشت امي و گعدوا على الاكل انا بقيت بالغرفه ما اجيت استحي اگعد وياهم صح اكلت ويا عمي وطلعت وياه بس بعدني استحي منه وانوب اليوم ابنه وياه شلون اگعد يمهم عيب

صاحت امي رادت ما رحت انوب عمي صاحني بعد استحيت منه وغصباً عليه 

اجيت گعدت بصف امي و المستحى كاتلتني كتل 

هاشم :- مو حچيت وياج و گتلج ما اريدج تخجلين من عندي قابل كل شوية نعيد الموضوع يا حبيبتي بعدين إذا على مـراد

 فـ مراد اخوج  وأن شاءالله ماكو احراج وخجل بين الاخوه مو صح باشا 

ضحك ورد 

مـراد :- والله يابة اني بالنسبة عليه ماكو عندي اي خجل والموضوع كلش عادي وطبيعي جداً اوصلها اخذها اجيبها اگعد وياها بنفس السفرة بس اعتقد الموضوع يمها ويم أهل زوجها بيه انه واخواتها 

حچى هيج وباوعلي و أبتسم 

هاشـم :- لا ما بيه احنه اهلها ان شاءالله

-- قبل شوية واحد من اقرباء زوجها شفنا بالازدحام و اجه ورانا لحد ابو عبدالله

و يصيح وسواها هوسه شلون صاعدة وياي 

شهيناز :- منو هذا

يُـمـن :- بُـرهان 

-- وشنو بُـرهان وكيل كفيل بيج حتى يصيح عليج ويحاسبج

--  لا ما صيح بس تفاجئ وحقه من شافني بسيارة عالية ويا ولد ما يعرفه وانا مرت أبن خالته وصاحب عمره واخو اجه وسأل مابيها شي

امي سكتت وعمي وأبنه نفس الشي ما ردوا كملنا الغده والولد و عمي طلعوا ما ادري وين وانا وامي استلمنا البيت غسل 

احس بروحي متت من التعب و جسمي بعد ما بيه قوة لان جنت مسوية حمله على هذاك البيت واجيت هسه الهذا انتهيت

ساعه ورجعوا طبوا للغرف يعدلون بالكهرباء وانا وأمي لحد الليل انظف

و همَ يعدلون بدكم البيت دگمه دگمه

وين يلا كملنا كملوا الجوه و طلعوا للحوش يسون بالكابينه الرئيسية اندك الباب واجانا صوت ابنه الچبير تميم  

امي طلعت يمهم وانا ضليت گاعدة على الدرج شويه وطب يشوف البيت و امي وراه تمشي بس شافني گاعدة ضحك و گال

-- يا مرحبا شلونج اخبارج

-- الحمدلله الله يسلمك

-- اگـول البيت حلو طلعتي انتِ بيه ومحليته 

طب عمي و مـراد وراهم وسمعوا سوالفه التعبانه مـراد بسرعه ضحك و ردله 

-- عبيـر تدري بيك تنتمي الصنف الزواحف لو عبالها من الطيور الجميلة 

-- ههههه انجب لك اختـنا هاي 

هـاشـم :- على طاري اختكم تدرون بـ سمر من صباحيات الله اجت زعلانه لو ما تدرون

مـراد :- اي امي گالتلي الظهر

تميم :- لا أني ما ادري ليش شكـو 

هاشـم :- جاي تشك بيه يخونها و متعاركة ويا الولد و هاجمة بيتها على ابو شكت بيه يعني لا شافت ولا لزمت هاي نسوان بطرانه لو مثل هاي المسكينة الشافته بعيونها ابدله عرسه جان شـسوت 

اثنينهم باوعوا عليه وانا الدمعه وگفت بطرف عيني على الموقف النحطيت بيه وعلى نظره الشفقه الشفتها بعيونهم 

فركت عيوني سريع حتى ما اطيح دموعي ما اريد ابچي گدامهم 

مـراد سكتت و تميم رد 

-- طيح الله حظ الثولان

شهيناز :- متعافي ودافر النعمة بـ رجلية

-- لا اثول وما يفتهم 

امي سكتت و انا من الاصل ساكته وعمي طب للحمام يغسل و الولد بعد اثنينهم طلعوا للحوش بين ما غسل عمي وطلع لبسنا احنه وطلعنا نريد نرجع للبيت القديم اكيد  ما راح انام هنا اليوم لان بعدهم ما جايبين الغراض ولا الفراش

هاشـم :- مـراد وصل خالتك ويُمـن للبيت واني رايح للبيت زوج سمـر يريد يجي علينا

تميم :- اني اوصلهم على طريقي يصيرون

-- لا انتَ اريدك عندي شغل وياك

-- والله ما مسوي شي

شهيناز :- ههههه بعد ميفيد صدر عليك اللقاء قبض 

ضحكوا وطلعوا عمي بسيارته وتميم  بسيارته راحوا واحنه بسيارة مـراد امي يمه گاعدة وانا وره والولد دره فد حباب

و مرتب ومحترم روحه احسن من اخو بالف مره هذاك هم حباب بس خفيف وغثيث شوية و ما ينهضم ومن اول يوم شفته ما ارتاحيتله بس هذا خوش ولد محترم روحه  وثكيل ما عدنه سوالف مال لطلطه مثل اخو 

خلص الدرب كله هو وامي يحچون على اثاث البيت وعلى المنطقه هاي والناس العايشين بيها ابد ما رفع عينه وباوع ولا حچه وياي اصلاً جني ما گاعدة وياهم لحد ما وصلنا للبيت وراح 

انا بسرعه طبيت للحمام سبحت و حطيت راسي على المخده بعدني ما ملحگه افكر وانقهر واتذكر غفيت من گد ما تعبت اليوم بالشغل حتى عشه ما تعشيت 

ما گعدت غير ثاني يوم بـ 11 الصبح حتى صلاة الفجر فايتتني وما گاعدة فزيت امي هم نايمة بعدهي ما گاعدة 

غسلت وحطيت الجاي على النار سمعت الباب يندگ حطيت شالي على راسي ورحت اشوفه وصلت للباب وگبل لا اگول منو گلبي بزني جن علم ضليت واگفه ما فتحت رجع اندگ مره ثانية گلت 

-- منو 

اجاني صوته يگول اني 

#عــروس_الچبـــايــش 🌼13

#بــقلم_يـــاســـة

 #الحلقة_13

بسيطـة هــي أحلامنا ولكــن يبـدو

أنهــا جــاءت فـي زمــن بخيـل 

أحببنــا الحيـاة وتمنينــا أن نعيــش 

كمــا نــريـد خانتنــا وأرغمتنــا على أن نعيــش كمــا تـريد فـ سلامــاً علينـا

وعلـى أحـلامـنا وقلوبنـا وخطواتنـا 

وجميـع محاولاتنــا 

...................................... 

يُـمن :- بس سمعت صوته رجعت ليوره

و إحس رجليه ماتت ما اگدر اوگف عليهن كلش كسرني وكسر خاطري ما اريد اشوفه ولا اريد اسمع صوته

رجع يدگ بالباب و انا واگفه و ما اگدر افتح واشوفه گـال

-- فتحـي

ما جاوبت عفته وطبيت اركض الامي گعدتها فزت من النوم مرعوبه وتگول

-- اسم الله شبيج

-- واثـق يدگ بالباب

گعدت گعده و هزت رأسها و راها گامت للحمام غسلت وانا امشي وراها وهيَ تمشي وتتحرك على راحتها ولا عبالك اكو واحد يدگ بالباب

يُـمن :- يما رائـف بالباب

-- خلي واگف ساعه وساعتين ويوم وشهر لحد ما يتأدب

-- ما راح تفتحين

-- لا

اجت للمطبخ فتحت الثلاجة و گامت تحضر بالريوك دگ نقالها راحت تشوفه ورجعت تگول

-- هذا هو جاي يخابر

-- انا اگول طلعي واحچي وياه حتى يطلگني

-- لا اطلع ولا احچي وياه عوفيه عليه الا اطيحلج حظه واندمه ، طفي الجاي راح احترك

طفيت الجاي واخذت إمي الصينية ورحنا للديوانية الباب بعد ما اندگ والنقال هم ما دگ بعد اضن راح

شهيناز :- اكلي لا تصفنين وتعيشين الدور

-- ما اشتهي

-- تشتهين وغصباً عليج يلا اكلي

شلت الجاي شربت شوية وهي سوت لفه وحطتها بـ ايدي اكلت و گلبي هناك يم الباب راح بعده واگف

دگ نقالها مره ثانية بس هاي المره عمي هاشـم ردت عليه وانا گمت للمطبخ غسلت المواعين وعزلت المطبخ اجت وراي وتگـول

-- لبسي راح نروح للبيت الجديد

-- مالي خلك عوفيني هنا إذا ما عندج شغل اليوم 

-- لا عندي يلا فضيها

راحت تبدل وانا كملت المواعين ورحت بدلت وطلعنا انا وياها للشارع اجرنا تكسي وبوجهنا للبيت من طبينا لگينا ابو الكاونتر

جاي يشد بيه وابو الاخشاب يشد بالغرفه

أمي ضحكت فرحانه عمي مسويلها مفاجأة ومشتري غراض جديدة ما تدري بيه

 تذكرت أنـا شلون فرحت بـيوم الجابوا الغراض و شدوهن عبالي الي والبيت بيتي ثاري طلع يجهز المرته الجديدة منكم لله ماگول غير شي

گعدنا انا وامي بالديوانية وهمَ يشتغلون كل واحد بمكان ساعه وكملوا وراحوا

اجينا انا وامي نباوع للغراض تخبل تخبل

هاشم :- ها شلونهن 

شهيناز :- حبيبي اروحلك فدوة الله لا يحرمني منك يجنن

-- بعد عندي مفاجأة ليُـمن

حچى هيج وضحك وطلع من الغرفه وأشر النا نجي وراه طب للغرفه الثانية جايب بيها

غرفه اخشاب تركية صغيرة جانت مديل التركي هسه نازل ومسوي ضجة بوكتها باوعت عليها كاملة جرباية وكنتور وميز مراية و رف طويل بصف الميز 

امي ضحكت فرحانه من كل گلبها وانا ابتسمت وباوعتله واگـول

يُـمـن :- رحم الله والديك عمي ما تقصر ليش كلفت روحك

-- ماكو اي تكلفه هاي غرفتج الخاصة وشي بسيط الج حتى تاخذين راحتج بيها الف عافية

-- الله يعافيك ويطول بعمرك

طلع من الغرفـة وامي باستني فرحانه

بـ بيتها وبغراضها و بغرفتي و راحت طلعت وراه

گعدت على الجربايـة بعدهي مابيها دوش

وضليت اباوع للغرفـة واحچي ويا روحي شصار لو من الاول اجيت هنا و ما رحت عليهم ولا تزوجته وانكسر ظهري شصار

 لو من الاول انا وامي مرتاحين وعايشين حالنا حال الناس

شوكت اصير مثل امي وانسى واتخطأ هيج بسرعة شو حتى أخوي تخطئته و ما تذكره ولا تفكر بيه معقوله ما تحن عليه ولا يجي على بالها شني نسته لو تكابر حتى تعيش بعدني گاعدة وصاحت عليه طلعت الها

شهيناز :- مسحي الاخشاب مال الغرف اثنينهن واني وعمج رايحين ساعه ونرجع

-- وين رايحين

-- نجيب الاجهزة الكهربائية وباقي النواقص

-- صار

-- لا تفتحين الباب لحد

-- اي

طلعت هيَ وعمي وانا مسحت الاخشاب والكاونتر من بطنه ورجعت مسحت البيت من جديد بديتول لحد ما كملت كل شي

رجعت طبيت للغرفه مالتي حطيت ايدي جوه راسي و انمطلت

ما گدرت انام شبعانـة نوم و شغل ما عندي  اخلص بيه الوكت ضليت حسبه تاخذني وحسبه تجيبني و الدموع على خدودي ينزلن

خلص الظهر والعصر وانا بالبيت وحدي وامي ما رجعت واكل ماكو هو انا من الاصل ما اشتهي بس ضل بالي عليهم لان ما تعوفني بلاية اكل طلعت للحوش شغلت الماطور و غسلته الحوش ورشيت الحديقة وگعدت متانيتهم للمغرب وانفتح الباب وطبوا اثنينهم

شهيناز :- سودة عليه تأخرت عليج وانتِ لا اكل ولا شرب تعاي جبتلج اكل وياي

يُـمـن :- لا عادي ما اشتهي

-- يلا تعاي بسرعـة لا تشلعين گلبي

طبينا انا وياها گعدنا بالهول انا اكل وهيَ رجعت ويا العمي اطبب بالغراض جايبة جدورة ومواعين و اشكال واللوان غراض مطبخ بعدهي تعزل بيهن واندگ الباب وجابوا باقي الغراض وراهم ثلاجة وطباخ 

و اوفن و خلاط والفراش والمخاد كله جديد 

گمت وياها عزلنا الغراض كلها كل واحد بمكانه الخاص وهي طايرة من الفرح بيهن 

وانا اعزل و اسولف ويا روحي عمي شني شغله منين جاب هاي الغراض كلها والبيت هذا اليخبل الله يرزقه بس شني شغله هي گالت واصل بس ما گالت

شـ يـشتغل واستحيت بعد اسألها هسه تگول شافت الغراض والبيت و حطت عينها 

لحد لليل يل كملنا كل شي و رجعنا البيتنا و بس وصلنا امي وعمي طبوا ناموا وانا ضليت گاعدة وايدي على خدي الوكت يمشي عليه يركض ركض وانا مثل الحايط

 لا الي حياة ولا الي عيشة اضل هيج يتغير حاليالله أعلم 

ثاني يوم اخذنا بس هدومنا و رحنا للبيت الجديد ومنا وبعد استقرينا بيه و البيت القديم سمعت على أساس راح يأجرونه

 هو وغراضـة الغير ناس 

مر اليوم والاثنين والاسبوع والعشر ايام والشهر وانا بيت امي و عمي صار يجي هنا اكثر من قبل و أمي عين الحارة باردة عليها عروس شوكت ما تجيها المكياج والتبديل والريحة التخبل والاكل اشكال والالوان مدللته ومدللها وهذيج السوالف التخبل وهذيج الگعدة الحلوة مسويتله واهس ما يفاركها تضيعونه تلگونه يمنا گاعد ويباوع عليها الليل ونهار 

وانا بس اكل وانام لا اشتغل ولا اسوي شي اكثر شي اسوي اغسل المواعين مال الغده لو اطلع اغسل الحوش وباقي الوكت كله گاعدة على البلازمه واتابع مسلسلات تركيا

و القهر باقي بروحي لا احچي ولا اشاركة الواحد ولا اشكي جنت اشرد منه واروح اباوع على مسلسلات وبعد ماكو اخبار عليه ولا أنا سألت أمي ولا أمي فتحت موضوعهم بعد انسد بيتنا 

لحد ما بيوم من الايام جنت اباوع مسلسل تركـي بوكتها جان المسلسل التركي هسه طاش والناس كلها متابعته والدنيا كلها مگلوبه عليه  

جنه انا وامي گاعدين نباوع بالهول وعمي وأبنه تميم الجبير بالديوانية يشتغلون

جان تميم يجي كلش هواي علينا بس ما يحچي وياي شي غير بس السلام وهذا هو يگعد يم ابوه لحد ما يخلص شغله و يروح

صدگ مرات عود يحشش ويشاقة بس ما متجاوز حدودة وياي ابد و من عاشرتهم عرفت طبعه هوَ هيج يحب يسولف ويتشاقة وماله قصد بشي عكس گبل عبالي عوينج وابو نسوان  

صاح عمـي على امي گامت تشوفه شوية واجت وجهها مگلوب وضايجة باوعتلي وگالت

-- عمج حاكم و رائـف جايين علينا

فزيت من مكاني رجعت گالت

-- لا تفزين ولا تعيشين اللحظه ماكو رجعه لو يشعل العشرة شمع 

ما حچيت عفتها وگمت الغرفتي كلي ارجف و الغصه وگفت بنص روحي باوعت الروحي بالمراية واگول

-- شبيه ارجف خايفه منه لو مشتاقتله لو مقهورة على روحي وشيـريد جاي مو عرس وشاف حياته شيـريد بعد جاي ولا ارجع ولا اريدة لو يموت ويموتني 

ضليت اخذ الغرفه واجيبها و دمي نشف واظافري اكلتها كلها لحد ما عدت ساعـة وشوية و سمعت باب الشارع اندگ وراها صوت عمي ابو رائـف يسلم وعمي هاشم يرحب بيهم 

گعدت بالگاع ارجف طبت امي عليه لگتني گاعدة باوعتلي ما عاجبها حالي وحچت

-- ديري بالج تجين حتى لو صاحوا عليج لو اني صحت عليج وكتلج تعاي ما تجين سمعتي 

-- انا ما اريد ارجع ما اريدة

--  اي هوَ ما ترجعين بس ديري بالج تجين مفهوم 

عافتني وراحت يمهم بالديوانية و أنا اجيت وحطيت إذني على الباب مال الديوانية من جهه الهول اريد اسمع الوعود الجايين بيها هاي المره شني 

سمعت عمي حاكـم يحچي شلون من راح على وجهه للچبايش ولگاني يردون يكتلوني وشلون جبر أبنه عليه وأبنه يحب بنت خالته ويريدها من الصغر يعني كله الحچي الجاي يحچي بس حتى يبرر عرس أبنـه ويطلعه مظلوم ومجبور و ماكو منه 

الكل ساكت وبس عمي يحچي شلون ابنه تعب وخربت حياته بس بقى محافظ عليه وما عافنـي  حتى سالفه الانتحار مال أديان سولفها انا من سمعت الحچي هذا افتريت ورحت الغرفتي گاطعه الامل حتى من عمي 

ساعه تقريباً وهمَ عدنا ويحچون بهدوء وراها سمعت صوته ضل يحچي بعصبيه وراها اجاني صوت أمـي انوب علگت بينهم 

لحد ما عمـي هاشـم صاح على امي وسكتها عافتهم وطلعت وهـيَ تگول

-- والله لو تتعلك نخله براسه ما يلوح شعره من راسها بعد 

اجت امي للهول و همَ بعد مناك طلعوا بس طلعوا اجـه عمـي هـاشم على امي بيومها تجاوز عليها لان صيحت وهو گاعد وما أحترمته بقى يصيح ويغلط و هيَ ما سكتت منه ضلت ترد عليه وابنـه موجود وكل الهوسة صارت گـدامه وهـوَ غلط عليها وگالها طايحة الحظ هنا هيَ طاحت وگالتله 

-- اي أني طايحة الحظ و أنتَ لا تتدخل بـبنتي ولا تگعد بگعدتها هاي بنتي مو بنتك ومالك اي حق تحچي عوفني اني أربيهم هذول الادب سززية 

-- هو منو متدخل بنتج أني احچي على صوتج العالي وتجاوزج واني واگف

-- من حقي اتجاوز واصيح والدنيا اگلبها ما تدري بيهم شمسوين بيها لعبوا بيها فلم وساكته ما تحچي وترد عليهم

-- كل عائله بيت تصير بيها مشاكل وإذا على زواجه ترى بنتج اجت وخربت حياته هو من الاصل جان يريد غيرها ماكو داعي الهاي الهوسه بعدين شكو گلبتي الدنيه تزوج عليها وتزوج عليها مو انتِ تزوجتي واحد متزوج لو على الناس حرام وعليج حلال 

-- ماكو داعي الهذا الحچي وعيب عليك تحچي بيه وبنتي مالك شغل بيها وما مسموحلك تتدخل بحياتها لا من قريب ولا من بعيد هاي گدام أبنك ممنوع يحطونك وسيط وتبقى تضغط عليه اطلع منها وعوفني أني وياهم 

-- خره بيج وبـنتج وخره باليدخل بيها بس سمعي زين وحطي هذا الحچي براسج إذا سمعت بيج متصايحه وياهم لو معليه صوت ادفنج هنا بهذا البيت وانعل اليطلع وراج 

هسه غير شافته عصبي ويصيح تسكت منه وتتكفى الشر ماكو ضلت تاخذ وتنطي وياه گـدام أبنه وهيَ من الاصل معليه صوتها 

و متعاركه ويا الناس گدامه غير تكف ماكو قفلت و بس گالها ادفنج ردت عليه 

--  اي يدفني غير دفان أبن دفان 

هيَ گالتله هيج وهو تخبل ركض عليها موتها موت اجى وگف تميم بينهم وجر ابو منها ويحچي وياه يريده بس يهدى و امـي طبت الغرفتها وصوت البچي وصل للشارع

و عمـي باقي يغلط عليها وأبنه كل شويه وگاله صلِ على محمد گول يا الله مو هيج 

وانا تمنيت الگاع تنشگ وتبلعني وبعد ما يطلعلي ذكرت ولا اشوف احد على الموقف الانا بيه الدنيا انگلبت من وراي ومن وره مشاكلي 

عمي هاشـم وابنه راحوا و البيت فرغ محد بقى بس احنه رحت انا وره امـي الغرفتها لگيتها تبچي من شافتني طبيت بسـرعه گالت

-- كله مني اني الوديتج للتهلكه بـ اديه 

-- تعاركتي ويا عمي وطگج من وراي گدام أبنه 

-- لو اعرف يموتني ما اسكت على هذاك الناقص فوگاها جاي يشمر عليه بالحچي وهو ابو الراهي ابن الكلب فوك ما كسر بختج جاي وحاسب الخالقه ما خلق غيره بسيطـة اني اله 

-- عوفيه لا تحچين وياه بعد هوَ ما يسكت وانتِ ما تسكتين وعمـي ما يرضا وتخرب حياتج من وراي

-- معليج بعمج واصلاً ماله حق يدخل بيج انتِ بنتي مو بنته وماله حق حتى يحچي بموضوعج 

سكتت وعفتها ومر هذا اليوم علينا والوراه والوراه كلها قهر بقهر روحـي گمت ما اتحملها الدنيا احسها ضايگه عليه عمي هاشم بعد ما رجع و أمـي ضايجة ومقهورة شوكت ما تجيلها 

باقيـة تروح للصالون مالها و ترجع بس بخلك ضيك وانا كل الوكت بالبيت إحس البيت صاير سجن صدگ انا ما اطلع ولا متعلمه على الطلعه بس هسه گايمة اختنك وحدي الليل ونهار بالبيت والقهر بگلبي لا احچي ولا اسولف ولا اشتكي كله گام يأثر عليه 

شوكت ما تجيني گاعدة و بگلبي گومه سوالف عـدت أسبوعين تقريباً على جيتهم والمشكلة الصار وعمـي الهسه ما جاي ولا متصالح وياه أمـي واأمي صايرة روحها بخشمها بهاي الايام اجه تميم مره جاب مسواك و طب گعد شوية يم امي بالهول 

انا ما طلعت يمهم ولا شوفته روحي أستحي و مره ثانية اجه مـراد بس ما فات من الباب جاب مسواك و سأل إذا محتاجين شي لو لا وراح 

رائـف بعد ما اجه ولا سمعت شي عليه 

لحـد ما عـده شهـر تقـريباً جانت الدنيا عصـر وأمـي بالصالون يوميـه تروح بال11 لو بالعشرة الصبح و ترجع ويا المغرب لو وره المغرب وكل هذا الوكت انا وحدي بالبيت 

اندگ الباب رحت اشوف منو بالاول عبالي 

واحـد من ولـد عمـي هاشـم لان بس هم يجون علينا يجيبون غراض البيت بس تفاجأت من سمعت صوت عمـي حاكم يگول هذا انا 

بقيت واگفه وره الباب و حايرة افتح لو لا 

رجع گال فتحي عمو وياي خطار استحيت منه و انجبرت افتح الباب اول ما فتحت شفته هوَ و بُــرهان و ابـو بُـرهـان

يُـمن :- هلا و كل الهلا تفضلوا

حاكـم :- هلا بيج حبيبتي عمو شلونج

-- الحمدلله 

محمد :- شلونج عمو

-- الحمدلله على الله تفضلوا 

طبوا جوا وانا امشي وراهم و ارحب بيهم بُـرهـان ما سلم عليه فات بلاية سلام وانا هم ما سلمت عليه إذا هذا الخير مالهم هيج لا عتب على الباقيـن 

طبوا بالديوانية ويسألون على حالي واحوالي وانا ارد على گد السؤال سألوا على امـي رديت بالصالون ويا ردي صارت عيني على بُــرهان لوره شفته وهز راسـه مثل المستهزء بالموضوع ما ادري شبيهم على أمـي قابل اول وحده تتزوج عليهم حلال وعلى الوادم حرام 

غلست ما حچيت شي وعفتهم ورحت للمطبخ حضرت الماي والجاي و خابرت امي گالت الها عليهم ردت 

-- ديري بالج ترجعين وياهم مسافـة الطريق واوصل

-- لا شلون ارجع بس لا تتأخرين

-- ما اتأخر 

سديته منها واخذت الماي ورحت عليهم 

گـال عمـي حـاكم 

-- خابرنا زوج امج أبو تميم گال مسافر ما ردنا نجي البيته بدون علمه

-- البيت بيتكم مو غربة انتم 

-- شنو وضعج عمو حبيبتي لشوكت تبقين عايفه بيتج و زوجج 

-- ما ضل لا بيت ولا رجل عمي كلهن راحن وهوَ عافني انا ما عفت احد 

-- لا هذا الكلام ما مقبول منج تدرين كلش زين محد عايفج رائـف رايدج و مشتريج 

-- اي ادري من گد ما رايدني ومشتريني جاب شريجة على راسي

محمد :- بصراحة اني ما احب ادخل بين الازواج لا بخير ولا بشر لان اول شي البيوت اسرار وثاني شي اليدخل بنصهم دائماً يطلع بالوجه الاسود اول واخر يتصالحون 

و الناس تطلع بالوجه الاسود وتتفشل الهذا السبب ما ادخل بينهم ابداً لا من قريب ولا من بعيد بس انتِ طيبة و حبابة ومؤدبـة

و ما يهون عليه يصير كل هذا الزعل بينج وبين زوجج الهذا السبب اجيت اليوم عليج و بنفس الوقت رائـف بمثابة بُـرهـان يعني انتوا الاثنين الكم معزه خاصه عندي

-- الله يحفظك ويستر عليك

-- رحم الله والديج ، شوفي بابا ما اريد ارجع احچي بنفس الموضوع واگول جان يريد بنت خالته وجان ناوي يخطبها وابو جابج وحطه گدام الامر الوقع لان هذا الحچي بعد ميفيد اللي صار صار و كل شيء انتهى وصرتي زوجته بس بنفس الوقت هو يگول اني منطيها خبر من قبل احب أديان واريدها يعني من الاول متفق وياج ومن الاول تعرفين بيه يريد غيرج يعني ما خلاج وراه صح تزوج بدون علمج بس هذا الزواج جان معروف من البداية وحسب كلامة من ضم عليج موضوع الزواج ما رادج تنقهرين هيج جاي يگول 

-- عمي انتَ على عيني وراسي وگبل شوية خوش حچيت حچي گلت البيوت اسرار وانا اگلك لا عاب حلگك صدگ البيوت اسرار واكو سوالف انتَ ما تدري بيهن انا صدگ اجيت غصب عليه واخذني مجبور وكثر الله خير كسب بيه اجر وخلصني من الموت بس من كتلني عمتي والبنات

و جبتوني بـ بيتكم  وراها اجيت الامي طلبت منه يطلگني و يروح يشوف حياته بس ما رضا و امي گالت الهم ما تتحمل الشرج وما تگدر عليه گالوا لا بعد ما يعرس خرب الخطبه و كل شي تريدة يصير مو صدگ عمي لو انا غلطانه

حاكم :- لا ما غلطانه بالله العلي العظيم فركش خطبته و بُـرهان شاهد و عمج محمد شاهد على كل حرف احچي الناس كلها درت بيه من خربها بس من انتحرت 

تغير الموضوع ورجعها

-- وانا يا عمي لعبه فركش رجع عرس يريدج انتحرت صحت 

-- لا مو هيج بس اكو شغلات صارت ما تعرفين بيها الهذا السبب رجعها و تزوجها

-- وشني الشغلات عمي هذا مو مبرر حتى يرجعها ويكسر خاطري 

-- لا هذا مبرر و مبرر كلش كبير عمو حبيبتي تدري بيه شگد احبج وشگد اتمنالج السعادة والاستقرار بس الوضع مو مثل ما مفكرته صدگيني رائـف انجبر يتزوج أديان و ما اگدر احچي الاسباب صعبه بس ثقي هو يحبج لو ما يحبج ما يضم عليج زوجه 

-- شـضم وهو جايبها بيتي المتانيته يوم يوم يعني بـ رأيك ضم عليه بيوم العرس ما فكر ثاني يوم من ارجع ما راح اشوفه واشوف مرتـه

محمد :- يگول ما ردتها تنقهر وتشوف الزفه وتسمع الناس على أساس مفكر يفتح الموضوع وياج شوية شوية 

-- ههه چا ما فتحه گبل الزفه ما فتحه من خلاني بـ ايدي اغسل البيت واعدله وارتبه 

يريد يفتحه وراه البدله والهلهوله حتى يحطني گدام الامر الواقع لو شني سالفته 

سكتوا محد رد و عمي حاكـم بـاوع البُـرهان ورجع گالـي 

-- عمر بلا امر عليج جيبيلنا نفاضه

گمت جبت نفاضه ومن رجعت قبل لا اطب عليهم سمعت بُـرهان يگول

-- گتلكم ما اجي وياكم من الاول جلبتوا اله تجي هسه شراح يغير وجودي وياكم عذركم اقبح من ذنب ما اشوف اي مبرر الهذا التمسك راح تگولون يحبها فـ اني اكثر واحد يعرفه بالعالم لا يحبها ولا هم يحزنون بس ليش هذا التمسك بيها ما اعرف گتله يا أخي انتَ تزوجت و مشيت عوف الابنيه تشوف حالها ماكو ما يرد وبشنو يفكر ما اعرف 

محمد :- مو وقت هذا الحچي هسه جايين نهدي النفوس مو نزيد النار حطب يا أبني

-- يابة مو كل الحچي ينحچي جان يشكي ويبچي بس يريد يخلص منها وياخذ حبيبته اشو من عافته و راح تزوج حبيبته رادها وصارت عزيزة والله هاي الابنية مسكينة صارت ضحيه أم انانيـة و زوج نـرجسي 

حاكـم :- كله من عندي صوجي اني وصلتها الهذا الحال

طبيت عليهم بسرعـة سكتوا گعدت يمهم 

محد يحچي ساكتين وراها بشوية رجعوا فتحوا الموضوع من جديد و بقوا يقنعون بيه ورجعوا يحاولون يثبتون هو يريدني

و يحبني لحد ما اجت امـي

گعدت يمهم و رجع الموضوع انفتح من جديد أمـي اللسان ما يگدرون عليها منين 

ما يفوتون عليها تطلع الهم بسالفه تفرهم بيه ما انطتهم مجال و أخر شي خصمتها وياهم وگالت الهم 

-- رجعه ما ترجع لو يركع راسه بالحايط 

و وصلوله هذا الحچي اني وياه والزمن طويل

توسلوا رادو عدلي بدلي حطي شروط ماكو ما ردت عليهم موقفها ثابت اله اخليه يعض اصابعه ندم اخر شي سلموا وطلعوا 

عمي حاكـم وعمـي محمد طلعوا و بُـرهـان بقى واگف بالحوش من تأكد منهم راحوا گال الامـي

-- طول الگعده واني ساكت ما حچيت ولا ادخلت بس فهمت نيتج شنو عايفتها يمج حتى تجرين إذنه مو صح لو غلطان قبل لا تردين اني اجاوبج اي صح وزين تسوين وعاشت ايدج بـس يا ترى تعرفين بـ رائف 

تمشي وياه سوالف جرت الاذن والعقاب لو ما تمشي

-- شنو قصدك تهددني لو شنو 

-- ابداً بس اريدج تفهمين عنادج هذا راح يضر بنتج و راح تكسرين ظهرها للمره الثانية شـوفي يا أم يـوسف إذا خايفه على بنتج مثل ما تتدعين فـ طلبي طلاقها وخصمي الموضوع وإذا الشغله شغله عناد بـ رائف حتى تردين عليه التجاوز اللي تجاوزة عليج فـ خلي بالج رائـف دكتوراة بالعناد ومستعد يحرك الاخضر واليابس ولا واحد يكسر كلمته وابد لا تحسبين هذا تهديد مو اني اللي يهدد مره لا بالله بس جاي ابعدج وابعد بنتج المسكينة من النار 

و اتمنى تاخذين كلامي بعين الاعتبار

و تفكرين بمصلحة بنتج وتتركين غرورج شويـة 

افتر و طلع وصل يم الباب و ورجع تقدم علينا كم خطوة و گـال بهدوء

-- و لا تنسين بنتج بـذمه رجال وما يصير تطلع واطب ويا ولد زوجج بدون علمه بحجه يجيبونها ويرجعونها ولا تنسين شلون بنتج عجينه ومن أهل الله والناس شياطين والوضع تعبان فكري عدل قبل لا تخلين فلان ياخذها وفلان يجيبها ترى الشيطان بعده ما مات 

عافنا وطلع وامـي اول ما طلع گالت بعصبيه

-- طايح الحـظ 

عفتها و طبيت جوا و هي طبت وراي تحچي عليهم وتغلط عليهم واحد واحد 

وره يومين اجه عمي حاكم ونفس الشي امي ما قبلت حتى يفتح الموضوع 

بقيت بيت امي تقريباً ثلاث اشهر وره زواجه روحي بهتت ومشاعري بردت ما گمت احس بشي قوي مثل قبل صدگ تجيني ساعه انقهر وابچي بس باقي الوكت عادي عندي عكس گبل جنت الليل ونهار افكر بيه ومقهورة 

جنت كل شويه اصفن واگول هسه

شـ گاعد يسوي يسولف وياها يضحك ياكل شرب نام گعـد وبالليل اشبع بچي يلا اغفه 

هسه لا بعد ما افكر وگمت اتعود على فراگه وإذا اتذكرته وبديت افكر بيه بسرعـة ارد على روحي هذا مو الي مو مالي من الاول مو مالي و لا گلبه الي من الاول هو ملك غيري وانا الاجيت وهدمت حياتها مالي حق انقهر ولا الي حق احاسبه 

ليش اسأل وينه وليش افكر شيسوي شعليه اسأل عليه مو ما اريد ارجعله بعد ليش افكر واشيل همه شـيسوي هسه اكيد لو گاعد يمه مرته لو ياكل وياها لو يسولفون ويضحكون لو طالعين لو نايمين بعد عليمن حايرة شيسوي وشيسوي

 گمت اجبر روحي على هذا الوضع حتى اتقبل فكره عرسه وانسى وما اهتم 

بهاي الثلاث اشهر عمي حاكم كل اسبوع يمنا يحاول بكل الطرق يصلح الوضع بينا ويرجعني بس امي جانت معاندة ويا رائـف وما تقبل ترجعني اله وانا من الاصل ما عندي كلمه ولا اعرف اخذ قرار و روحي باهته وكل لون ما بيها عايفتها وره أمي

هنا عمـي هـاشم رجع تصالح ويا امي ورجع يروح ويرجع علينا بس الرجال مالت الله ما سمعني كلمه باطلة لو ثكل عليه 

بالعكس ، بس قبل لا يتصالحون امي ما قبلت تصالحه الا تحط عليه شرط ما يدخل بيه و يعوفها هي تأدبهم  

ومنا والرجال اشال ايده من سالفتي واصلاً من يوم عركتهم شال ايده مني وحتى من اجه عمي محمد وعمي حاكم وخابروا گالهم مسافر ما راد يتدخل واخر مره مخابرة عمي حاكم وطالب منه يتدخل واسطه خير بيناتنا رادله هذا الموضوع ما ادخل بيه بينكم وبينها حتى ما ذاكر اسم امي شامرها براسي گايله بينكم وبين يُـمن

مشت الايام وحالي مثل ما هو و عمي حاكم مل وبعد ما خابر ولا اجه و هنا رائـف قرر يجي وحده و عسى ما اجه ولا قرر بيومها تعارك عركه ويا امـي بحيث وصلت بيه فشر على امـي و تلفظ بكلمات 

عيب تنگال بحق المره 

وامـي سمعته لو تخبلت و صارت بينهم 

فد نوب يعني الوضع كلش خرب ولو جان أكو أمل واحد بالميه امي ترجعني هسه راح الواحد و انتهى الموضوع 

بيومها الف الحمدلله عمي هاشم ما جان موجود لو جان موجود وسمع بالعركة والحچي لا چا امي اطلگت و رائـف فصلوا بالعشاير و سجنوا بالحكومة على غلطه وحچيه 

انا بوكتها ما طلعت ضليت بغرفتي وهم بالحوش واسمع حچيهم وغلطهم بوضوح 

لحد ما طلع من البيت و هو يگول سهلة بسيطـة 

السهلة والبسيطة هاي ما همت أمي

 و مرمت عليها حالها من حال اي كلام عادي بس هو جان يقصدها ويقصد معناها 

طبت تغلط و تسب وتنعل بيه وبـ اهله وبعشيرتـة وحتى أبوي سبته وشعلته شعل وهو بالكبر على هذول الاهل وهذول الگرايب هنا من شفتها هيج انفعلت 

گلت هـيَ ما جاي تهتم الحياتي بگد ما جاي يهمها عنادها ويا رائـف وكسرت خشمه هيَ لو تفكر بيه چا حلت الموضوع بالتفاهم و فكرت بحچي بُـرهان وتحذيراته من هذا العناد وطلبت منه يطلگني وفضت كل هاي الهوسه 

ضلت معاندة وعاجبتها روحتهم ورجعتهم علينا تريد تذلهم عود لحد ما تعاركت وياه وصلت بينهم الطريق مسدود هوَ طلع من البيت يتوعد وهـيَ طبت للبيت تسب وتغلط عليه وبالأخير و عودة تنفذت وفاز عليها وانا صرت الضحية للمره المليون 

وثانـي يوم هيَ راحت للصالون مثل كل يوم و وراها بنص ساعه تقريباً اندگ الباب رحت افتحه وگفت وره الباب وصحت منو بسرعـة گال انا عمج غازي 

ضليت واگفه وحايره شعنده جاي وشيريد رجع دگ مره ثاني ويگول 

-- فتحي عمـي اريد احچي وياج خابرنا أمي هسه راح تجي فتحي الباب بين ما تجي 

وانا من گد ما ثوله وما افتهم طحت وفتحت الباب عبالي صدگ مخابر أمي وحاچي وياها 

اول ما فتحت جفتوا علينا النص البيت هو

و عمامي الباقين اول شي سواه طگني جلاق خلاني اطفر من الوجع وراها جرني من شعري واخذني للبيت الجوه والباقين وراه شمرني بنص الهول ويصيح 

غـازي :- وين عباتج ولج دايحـه لبسي عباتج بسرعـة

لبدت بالزاويـة و انا اتشاهد واگول رحت بيها بعد محد يخلصني منه رجع سحلني سحل و جبرني اللبس حجابي وجبتي

 و اطلع وياهم وين ما ادري شراح يصير بيه ما ادري كل الادري بيه رجعت تحت اديهم وانتهى امري 

يتبع..... 

طبعاً ما اعرف شلون اشكر كلامكم الحلو على المنشور اللي نـزل الظهر لو بـ ايدي ارد عليكم وحده وحده بس والله ما اگـدر كلش هواي تعليقات أحبكـم ♥️

يـاســة  🌱

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الحلقه الاولى من هنا

الحلقه الثانيه من هنا

الحلقه الثالثه من هنا

الحلقه الرابعه من هنا

الحلقه الخامسه من هنا

الحلقه السادسه من هنا

الحلقه السابعه من هنا

الحلقه الثامنه من هنا

الحلقه التاسعه من هنا

الحلقه 10/11/12/13 من هنا

تابعوا صفحتي علشان يوصلكم اشعار فور نزول الروايات من هنا 👇 ❤️ 👇 

صفحة روايات ومعلومات ووصفات

❤️💙🌺🌹❤️💙🌺🌹❤️💙🌺🌹❤️💙🌹🌺💙❤️