رواية عروس الجبايش الحلقه الثامنه بقلم ياسه حصريه وجديده

رواية عروس الجبايش الحلقه الثامنه بقلم ياسه حصريه وجديده

لا شيء أجمل من الصمت

عندمــا تخــيب الظنــون

يُـمن :- بُـرهان جان ما قابل اروح و يحجي همس ما يريدني اسمع و واثـق يجاوبة

-- يا بيت جدها صدك تحچي انتَ شايف الوضع هناك شايف أسلوب عمامها وجدها إذا رجعت يمهم يموتونها حلال بعد لو مهما صار ويا أمها تبقى تخاف عليها وتحميها يعني تريدني ابقيها هنا بذمة رائـف وهوَ ما معترف بيها وما يريدها وفوگ هذا امـي وخطيبنه مسوياتها چيس ملاكمه

بُـرهان :- نرجعها البيت جدها يا أخي هنا أأمن الها

-- ليش مجاي تفهم هذولاك وحوش بعدين همَ ميردونها رحت وشفتهم وشفت حقدهم الها والامها مستحيل يتقبلونها إذا رجعت الله يخليك اترك بيت جدها على جهه

لميعة :- ليش شبيها امها متفهموني الموضوع

بـرهان :- استغفرالله

واثـق :- ما بيها شيء خاله و رجاءً بُـرهـان هذا الموضوع ما ينفتح خلينا ناخذ الابنية الامها ونخلصها من الحزب هذا

ما سمعت صوته بعد وانا بقيت على وگفتي وصافنه شبيها امي ليش ما يقبل اروح الها شني الموضوع شوية وطلعت لگيتهم واگفين اثنينهم وخالتي گاعدة بس شافوني خالتي گامت من مكانها و واثـق اجه عليه ويگول

-- كملتي

-- اي

-- يلا لعد امشينا

اجيت على خالتي سلمت عليها وتشكرتها

وهي تبوس بيه وتدعيلي و بُـرهان عافنا وطلع بين ما خلصت سلام ساعدني واثـق

وصلني للسيارة اول ما طلعنا لگينا بُـرهان

واگف منتظرنا

واثـق :- شنو تروح ويانا

بُـرهان :- اي صعدو بسيارتي نروح

ساعدني واثـق صعدت بالسيارة و راح گعد ليگدام وراها انطلقنا الأمي الطريق كله

ايدي على خدي وصافنه على الجام

عود صدگ راح اشوفها راح احظنها مثل قبل راح انام بين اديها راح اكل من اكلها الطيب راح اشكيلها من العشته راح تعوضني هسه مشتاقتلي مثل ما انا مشتاقتلها راح ارتاح وبعد ماكو ضرب ولا ذله ولا قهر ما اصدك يارب دخيلك جاي ارجف ما اصدگ

وگعت دموعي بقهر بسرعه مسحتهم وغمضت عيوني وتأمله خير بقيت هيج لحد ما فززني من صفنتي وتفكير صوت نقال واثـق يدگ فتحت عيوني واسمعه يرد على عمي

-- شوية ونوصل الأمها

وراها انطاني النقال گال ابوي يريد يحچي وياج اخذته من عنده ورديت

-- شلونج بابا

-- هلا عمي شلونك

-- صار مده طويله أندور على امج والحمدلله حصلنا مكانها وهسه منتظرتج وفرحانه لأن راح ترجعين الها

-- رحم الله والديك ما قصرت وياي ربي يجازيك الخير

-- اني مذنب وما اعرف شلون اكفر عن ذنبي ردت اخلصج من مصيبة جدتج تالي وگعتج بمصيبة رائـف وامـه

-- لا والله ما قصرت رحم الله والديك

-- هسه اوصلي بسلامة وخير ومن يرجع رائـف اگعد وياه گعده طويله نقرر وراها بقرار يفيدج ويفيد مصلحتج

-- الله كريـم

قفله وانا رجعت النقال الواثـق شوية وصلنا للمنطقـة الگاعدة امي بيها منطقـة زراعيـة وترابـة البيوت متوزعه مو ناس بصف ناس لا اكثرها قطع فارغـة طسات وحفر و زباله والمكان بيه شبه من مكان بيت جدي

لحد ما وصلنا البيت صغير اول ما طفى بُـرهـان السيارة باوع الواثـق ضايج واثـق گال يلا رجع بُـرهان رد

-- لا حول ولا قوة الا بالله

نزلنا وانا جسمي كله يرجف من الفرح والخوف والقلق دگ واثـق الباب وگلبي يدگ اقوى من دگت الباب ثواني واجاني صوتها

شهيناز :- منووو

حطيت ايدي على گلبي يدگ بكل سرعته

والايد الثانية مثبته روحي عليها

فتحت الباب وشافتني شهگت وطلعت

عليه سريع حظنتني وتبچي بصوت عالي

وانا شكو قهر عشته شكو عذاب تعذبته شكو ذله مرت عليه شكو أذيه شفتها

طلعتها بين اديها وبحظنها ابچي بحرگه وقهر ساعه كامله نبچي وراها باستني ومسحت دموعي وساعدتني اطب للبيت

فتت للبيت بنيان جديد ديوانية ( استقبال)

و الصاله بيها كاونتر وسنك وطباخ يعني هي صاله وهي مطبخ و غرفه ، البيت صغير ومأثث من كل شيء حتى غرفه اخشاب موجودة

گعدتني بالدوانية والولد ويانا طبوا

تبوس بيه وتحظن بيه وتسأل شلونج وشلون صحتج

ما ارد بس ابچي مده طويله هذا وضعنا

وراهـا بُــرهان حچى

-- ام يوسف هذه بنتج واكيد انتِ احرص عليها من عدنا احنه حچينالج حالها والوضع المرت بيه وهسه جبناها وشفتي وضعها بعينج بنتج طفلـه و الدنيا تعبتها وظلمتها اتمنى تعوضينها ودارينها واكيد ما اوصيج عليها ولا احچي شي ثاني كل اللي اگوله واتمنى تحافظين عليهـا وتعوضينها وبس

شهيناز :- بروحي احطها بروحي اضمها

بنتي وقطعي من گلبي هاي تعبت واني ابچي على فراگها ما اصدگ والله ما اصدگ رجعت الحظني

-- خير آن شاءالله نترخص احنه وقبل لا اروح حبيت اذكرج ترى بنتج بذمة رجال واكيد فهمج كفاية

امي سكتت و واثـق باوع البُـرهان وباوعلي ورجع گال

-- وهذا الرجال خبل ولحد الان ما يدري بمرته رجعت الامها يعني خالتي العزيزة

ديري بالج على امانة اخوي

شهيناز :- ماكو داعي الهذا الكلام هيَ بنتي قبل لا تصير مرت اخوك

بُـرهـان :- خير آن شاءالله من رخصتكم

يُـمـن :- شكراً ما قصرتوا وياي ربي يحفظكم ويستر عليكم

بُٓرهـان باوع عليه مقهور ونظره شفقه واضحه بعيونه وراها طلع و واثـق تقرب عليه وضربني خفيف على راسي ويگول

-- الشكراً هاي نگعيها وحطيها بالتانكي مالكم اختي انتِ ومرت اخوي الكبير وبنت عمومتي يعني عرضي وهذا واجبي مو هيج خاله

شهيناز :- اي اكيد

-- يلا اروح اني وإذا احتاجيتوا شيء رقمي يمج خاله بس دگيلي

-- اريدك سالم حبيبي امي ما تقصر

راح طلع وامي وراهم بقت برى يمهم قرابة العشر دقايق ما ادري شيحجون وراها رجعت طبت عليه بس شفتها انهاريت من جديد ومتت من البچي وهي حاظنتني وتبچي وياي

يُـمـن :- ليش عفتيني ليشش مو تدرين بيهم ما يرحمون ليش هيج سويتي بيه دمروني دمروني

شهيناز :- حسبي الله ونعم الوكيل بيهم

-- ربطوني بالشباك لا اكل لا شرب لا حمام يطبون ويطلعون يكتلون بيه جسمي صبغوه من الصونده تالي زوجوني الواحد

حقير شايف روحه شوفه ما يشتريني بنعال

حسبني خدامه وبنت ليل عنده هاني وكسر بختي وامي لعبت بحالي موتتني لج يما موتتني شوفي شسوت بيه شوفي حتى حرك حرگتني

-- الله لا ينطيهم ان شاءالله ، كافي يروحي سكتي يرحولج فدوة اله اندمهم وداعتج

وخرت من حظنها ومسحت دموعي وسألتها

-- بيتمن هذا

-- بيتي

-- منيلج

-- اهل الحلال هواي ما قصروا وياي

-- يعني شني الناس اشترته الج

-- اي

-- منو هذول الناس وليش ما اجيتي عليه اخذتيني إذا صار عندج بيت

-- ما اگدر اجي عليج بهذا الوقت لو اجيت يذبحوني ردت اضبط وضعي يلا

-- وانا ما فكرتي بيه يذبحوني يموتوني

-- ما رحتي من بالي لحظة وحده

-- شلون نمتي ليلج وانا تحت رحمتهم شلون تاكلين وشربتي وتدرين بيهم حارمين من الاكل والشرب

-- وداعتج ليلي ما انامه وسويت المستحيل بس حتى ارتب وضعي وارجعج الحظني شمرت روحي بنص النار الخاطر يصير عندي بيت اجيبج تگعدين بيه

ما جاوبتها سكتت وعيوني كل شويه تروح على حاجه بيها متغيره صايرة وحده ثانية

هي من الاصل حلوة كلش بس هسه صايرة حيل حيل حلوة مسوية شعرها خصل و حواجبها داگتهن تاتو وايدها بيها وشم ومن دارت هدومها دلعه وظهرها

هم شفت مسوية بيه وشم وتلمع لمع ولابسه تراجي ثلاث ازواج وكلاده وسوار

ساعدتني اروح للغرفه انام وانا امشي عيوني على البيت اشكال الغراض اشكال الترتيب وريحته طيبة متروس معطر وهي ريحتها تخبل تمددت على جربايتها

فراش الجرباية عبالك مال عرايس

و الترتيب اخر مديل هيَ طلعت للمطبخ وانا عيوني على الغرفه والغراض

باوعت للميز متروس عطور ومكياج

منين هذا كله البيت الغراض الذهب

والتغير هذا كله الهيَ بيه شو طلعت بطرك الثوب من بيت جدي واهلها متبرين منها

طلع الها ورث باليا نصيب لو منين اجاها هذا الخير

شوية واجت جايبة صينية الاكل وگعدت يمي توكل بيه وكل شوية تبوسني فرحانه بچيتي وراها گالت

-- نامي شوية واني راح اروح للسوك اجيبلج ملابس وغراض ابد لا تفتحين الباب إذا اندگ اني عندي مفتاح من ارجع افتحه

ما جاوبتها بس صافنه عليها فتحت الكنتور

طلعت جبه و شال لبستهن و الشحاطه ام الاصبع بلا جواريب واضافرها مصبغه

ورجليها تلمع والمكياج والعطر يوصل للشارع والجيزدان ترسته فلوس حمر وخضر من الكنتور وباستني وطلعت

بس سمعت باب الشارع انسد سندت روحي وگمت للكنتور مالها فتحته

اشكال الهدوم اشكال التريب اشكال

الملابس الداخليه وسيتات النوم

لزمتهن وصفنت بيهن

شني هذن ؟؟ ليش هيج عدها شأسوي بيهن ؟؟ الكنتور بيه جراره صغيرة فتحتها

بيها فلوس حتى ورق

بسرعه سديتها ورجعت گعدت على الجرباية شني الموضوع منين جابت هاي الفلوس اكثر من ورقه عدها وخضر وحمر

وزرگ فوك المليونين عدها منين هذني

البيت الغراض الترتيب الهدوم شني جاي تشتغل لو شني سالفه بالضبط

شگد ردت انام بس ماكو ما اگدر القلق والتفكير موتني طلعت افتر بالبيت والعكازة بـ ايدي صار المغرب وهي ماكو

وانا گاعدة وحدي متانيتها خلصت الصلاة وراها بساعه تقريباً سمعت صوت سيارة قريبة يم الباب انوب انفتح الباب بالمفتاح وطبت بيدها علاليگ هواي

شهيناز :- گعدتي حبيبتي

يُـمـن :- ما نمت ابد

-- تأخرت عليج السوك ازدحام وبعيد علينا منا لازم اروح بسيارة وارجع بسيارة

فتحت حجابها و نزعت الجبه دنگت تفتح بالعلاليگ عيني صارت على صدها بيه اثر

خفيف حاولت اركز وصفنت بيها خايفه شنو هذا بس لا هذا اللي بالي ، خاف هذا تاتو رجعت اباوع اريد اتأكد بس ما لحگت رفعت راسها بسرعه لگتني صافنه عليها گالت

-- بله شوفيهن يعجبنج لو لا باعي حتى ملابس طلعه جبتلج باجر نروح بيهن للدكتور يشوف رجلج

-- شني شغلج شجاي تشتغلين

-- ها

-- منيلج هذا البيت والذهب والغراض والفلوس شجاي تشتغلين يماا

-- صالون عندي صالون

-- وين صالونج

-- بغداد الجديدة

-- هاا ومنين جبتي فلوس الصالون هم الناس ساعدتج بيه

-- لا عامله اشتغل بيه ، بلا شوفيهن حلوات لو لا

-- حلوات

-- قيسيهن خاف صغار لو كبار

-- مابيه حيل بعدين عود

-- جبت عشه وياي خليني احضره

شالت العلاكه مال العشه وگامت شوية واجت جايبة لفات همبركر وببسي حاطتهن بصينيه

-- اكلي

-- ما اشتهي

-- شنو ما تشتهين اكلي تعشي شوفي حالج شصاير بيج

-- قبل شوية اكلت ما اشتهي

-- براحتج راح اضملج لفتج من تجوعين تاكلين

-- وين لگوج الولد شلون تعرفوا عليج

-- اني الگيتهم مو همَ لگوني

-- شلون

-- من اول يوم انهزمت واني ادور على بيت حاكـم ردته يدخل واسطه خير بيني وبين بيت جدج ما ادري بيه ماخذج الابنه ، كل يوم والثاني اروح ادور عليهم بالمنطقة مالتهم الجانوا عايشين بيها قبل لا يسافرون بس ماكو ما اندلهم كل اللي اندله واعرفه گاعدين بالدورة والمنطقة جبيرة ولا بيت ولا بيتين بيها اروح اسأل وارجع محد يعرفهم اخر شي سألت واحد يشتغل بفرن مال صمون كال سافروا من فترة طويله ومن رجعوا من السفر قبل اربع سنين باعوا بيتهم و شالوا بس وين شالوا ما يعرف ، من سمعت شايلين بچيت الولد گال

-- خاله ابنهم الصغير بين فترة وفترة اشوفه هنا المنطقة يمكن يجي الاصدقائه

-- ما تعرف اصدقائه

-- لا والله ما اعرفهم بس شفته اكثر من مره هنا بسيارته أذا تردين عوفي رقمج

و عنوانج وإذا يجي مره ثانية اگوله عليج

عفت الرقم والعنوان يم الولد وبعد ما رجعت للمنطقه بقيت منتطرته بلكي يدگلي راحت ايام واجت ايام وهو ماكو

أيست وما مخابرني بعد لحد اول البارحه الصبح دگلي رقم غريب گال

-- سأله علينه وعايفه رقمج وعنوانج يم ابو الفرن منو انتِ

هنا ما صدگت من خابرني ، وهوَ من عرف بيه اني أمج عبالك وگعت عليه من السماء طار الولد من الفرح ساعه يمكن هوَ و أبن خالته اجو علينا حجوالي حالج واللي صار وياج بست اديهم بس اجي وياهم للبيت اخذج بس ابن خالته ما قبل گال باجر هو يجيبج لليل ورجعوا اجوا وياهم حاكـم ونفس الشي گالوا باجر احنه نجيبها وللصبح ما نمت منتظرتج والصبح خابرني حاكـم گال صار عدنا ضرف ما نگدر نجي اليوم ياجر نجي كتله اني اجيكم ما قبل اله همَ يجيبونج وهيج بقيت منتظرتهم لحد ما اليوم جابوج واجوا

و الحمدلله من شفتج ورجعتج الحظني

-- زين إذا عمامي دروا انا يمج خاف يجون عليه وياخذوني مره ثانية

-- لا تخافين بس هاليومين ارتب وضعي وإني الهم حتى هذا زوجج الناقص اني اعلمه

-- شلون

-- هاي عوفيها عليه وارتاحي و معليج بالباقي

-- بس رائـف شلون بيه كلش عصبي

-- كتلج هذاا اني اعلمه إذا ما عدت تربيته من جديدة ما اطلع امج بس صبريلي

-- لا خلي ما اريد الطلايب وياه بس خل يطلگني وهذا هـو

-- سهله كل شيء سهل بس اول شيء گومي نامي وارتاحي وكل شيء سهل لا تخافين

-- هنا راح انام

-- ليش هنا گومي هناك على الجرباية

-- لا ما اريد هنا احسن

-- راح اجيبلج فراش تمددي عليه واني راح ارتب ملابسج بالكنتور

گامت جابت فراش ومخده فرشتهن ورجعت تعزل بالهدوم مالاتي تمددت وصافنه بزمانـي حايرة بروحـي و بحالي

وبحال أمي الغريب لحد ما تعبت ونمت

ثاني يوم اخذتني للدكتور شاف رجلي ورجع مره ثانيه صباها وگال أسبوع و جعوا نفتحها

خلصت يومين كاملات بيت امي ما اسوي شي غير بس اكل وانام وهي گاعدة يمي

وحايرة بيه تجيب وتحط حايرة شلون ترتبلي وتعوضني حتى تتحسن صحتي

باليوم الثالث اندگ الباب طلعت امي من الحمام الخاولي براسها والدشداشة مالتها الگصيفه ربع ردن رتحت فتحت باب الشارع دقيقة ورجع انفتح باب الاستقبال عليه وفات رائـف

جريت حجابي لبسته و هو صفن على حالي بقى واگف وأمي واگفه يمه هو صافن على حالي وانا صافنه على امي شبيها هاي شو وضعها ما جاي يعجبني

شلون هيج باقية بهذا للبس گدام الولد گالتله

شهيناز :- اگعد استريح

باوع الها و دار وجهه وانا صافنه بيها وراها تقدم عليه گعد قريب من عندي وهيَ راحت وسدت الباب

رائـف :- الحمدلله على سلامتج

ما جاوبت رجع گال

-- ادري مقهورة وزعلانه من الصار بس حقج عليه بعد ما تنعاد

نفس الشي ساكته ما اجاوب

رائـف :- تفاهمت وياه امي و بعد ما تتقرب منج

نفس الشي ما اجاوب رجع گال

-- ليش ساكته ما تردين

باوعتله ميته من قهر على روحي وهاي اول مره احط عيني بعينه من بعد اللي صار بيناتنا گتله

-- شتريد ارد شـ اجاوب يعني اكو شي ينحچي اكو سالفه تتسولف رحم الله والديكم جبتوني عدكم وخلصتوني من الموت وما قصرتوا الله يجازيكم الخير وهسه اجت امي و راح ترتاحون من مسؤوليتي وحملي الثكيل وانا الاسفه واعتذر وحقكم عليه طبيت بحياتكم وخربتك وياه خطيبتك وخربت امك وياك ويا اهلها

-- شنو يعني

-- طلگني وارتاح وارجع الحياتك واخلص مني

-- هسه انتِ تعبانه من تصيرين زينه وراها نحچي

طبت امي بيدها جاي باقية بنفس اللبس بس شايله الخاولي و مشطه شعرها

بس فاتت هو بسرعه نزل راسه للگاع وانا

إذا الحايط فتح حلگه وحچه فتحت حلگي وحچيت بقت بس عيوني معلگه عليها

حطت الچاي گدامه وتربعت وگعدت وتباوعله وتگول

-- طلعت امك ملاكمه ما شاءالله عليها

-- ساعه شيطان وغلطت بحقها وبحقي

-- يُمـن سولفتلي شلون جبتوها وحميتوها من عمامهم رحم الله والديكم مشكورين

سكت ما رد رجعت گالتله

-- ابوك انسان طيب واخوك وردة وانتَ عين الله عليك مبين شلون مرتب ياريت بدون هوسه وتعب ترمي اليمين عليها وتخلصنا وتخلص نفسك من المشاكل

باوعلها بنظره استهزاء وراها شال باكيت الجاكير مالته والنقال وگام ضمهن بجيه

وگال

-- اطلگها واگعدها يمج مو

-- شنو تگعدها يمي احچي عدل امها اني

-- والله والنعم

-- ينعم الله اصلك وفصلك تستهزء حضرتك

سوالها بحلگه حركه بمعنى لا و باوعلي وگال

-- يله عيني ست خلصت الاجازة گومي نروح البيتنا

شهيناز :- وين تروح الامك لو الخطيبتك

و اختك

-- وشبيهن امي وخطيبتي واختي بس لا مو گد المقام

-- لا والله مو گد الثقه والآمانه واني بنتي ما مستغنيه عنها حتى ارجعها للموت بيدي

-- وليش استغنيني عنها قبل و عفتيها

-- قبل مجبورة

-- ام يوسف رجاءً اني هسه واصل من السفر وتعبان والدنيا طالعه من خشمي

ليش ما تتكفين شري مو احسن

-- لا والله وتهدد فوكاها والك عين تجي وتحچي وتهدد

-- ليش يابة مالي عين شنو بس لا طلعت من الطريق ونكسرت عيني واني ما ادري

-- امشي اطلع برى

ما جاوبها بس باوعلي و گال

-- گومي يلااا

-- متروح المكان وما الك مره يمي امشي اطلع برى

-- اخر مره اكول گومي

يُـمـن :- ما اروح

-- مو بمزاجج گـووووومي گلت

شهيناز :- ولاااا بمزاجككك برى يلااااا

بحركه سريعة من عنده دنگ عليه وجرني من ايدي گومني احس ايدي انخلعت وهي منا منتهيه بيها تمزق من الكتله مالتهن اجه كملها عليه و جرني حيل هي جره وهي عيطه

اجت امي جرتني من عنده وحجت وياه بصوت عالي

-- لك بنص بيتي و هيج تتعامل وياهااا الله اعلم هناك شلون حالهااا اخر مره اگول اطلعععع برى لا تخليني اتصرف تصرف ما يعجبك

-- ههه شـتسوين بلااا شرحيلي

-- اسوي شي ما يعجبك ولا يعجب احد

باوعلي بنفاذ صبر وگال

-- فضيها يُـمن

-- شوف بنتي مالها طالعه منا ورجعه الك ما ترجع ولا انتَ ولا اكبر مخلوق بالدنيا ياخذها من عندي فهمت لو لا

صار قريب من عدها كلش بحيث فرق بينهم مسافه بسيطه باوعلها من فوك ليجوه وراها گــال بصوت هادى

-- وين تردين تبقينها ست

-- هناا بيتي يعني وين

-- هاا خوش حجي وبيش تبيعين ليلتها

رفعت ايدها رادت تضربه بسرعه لزم ايدها قوي ورد بعصبيه عليها

-- شوفي اني الهسه محترمج لان اكبر مني لا تخليني اتصرف تصرف ما احبه يُمـن مرتي غصباً عليج وعليها مرتي وبذمتي وبيتج هذاا ما يشرفني تبقى بي فـ سكتي من عندي احسلج

-- منين اجت مرتك هااا منين بس لاااا مصدك روحك وين عقدها وين شهودك

شوف لك انجوم السماء اقربلك تحلم تلوح اضفرها منا وجاي واليطلع بيدك سويي

دار من يمها وباوعلي جنت ماخذه الزارية وجسمي يرجف مثل السعفه ودموعي على خدي

رائـف :- راح اروح اليوم اعوفج هنا يم هاي

واني ادري بيج شنوو بسس هااا و الكعبة الشريفة إذا تخايلت بيني وبين روحي مسوية شي غلط لو جارتج هاي الدربها

اصلبج واعلگج باب الشارع

عافنه وطلع وامي وراه انهدت بالغلط والنعايل رجعت گعدت وصافنه بـ الكلام

شنو يعني قصده امي مو زينه و استهزاءة

واسلوبة وياها ابد مو طبيعي وهي امي من الاصل مو طبيعية ما جاي ارتاح الها

لا وفوگاها هسه شلون جاي تغلط وتتجاوز

وللبسها گدامه وكلام بُـرهان و واثـق كلشي يثبت امي مو زينه بس من اجيت لليوم ما شفت منها شي غلط و الليل ونهار گاعدة يمي وحتى نقالها مشمور لا تخابر ولا واحد يخابرها

رجعت طبت امي و گالت

-- ابن الكلب والله والله إذا ما ندمته ما اطلع شهيناز بس خل يصبرلي

-- انتِ شني سالفتج

-- يعني شنو سالفتي شقصدج

-- ليش هيج لابسه گدامه وليش هيج ما مستورة وبعدين حتى بُـرهان ما جان راضي على جيتي هنا و الفلوس والذهب والبيت منين جبتيهم شني الموضوع احچيلي

-- اشو متعرفين تحچين

-- ما حچيت غلط وضعج مو طبيعي من اجيت لليوم الف علامة على وضعج

-- وشبيه وضعي شفتيني شادة الخصر واتمركص احترمي نفسج واحچي عدل لا تخليني اعيد تربيتج

سكتت من عدها وهي عافتني وراحت الغرفتها ضايجة ما عاجبها الحچي

بقيت گاعدة وحدي ايدي على خدي هسه انا عليمن اضوج على روحي على قسمتي على حالي لو على وضع امي المو قانوني لو على الحچي الگاله رائــف

بقيت ساعه كامله وحدي وبس صافنه ودمعتي بعيني رجعت اجت عليه گعدت مقابيلي و سكتت ما تحچي بقت مده ساكته وانا نفس حالتها ساكته بدون صوت

وراها گالـت

-- من رجعت من بيت جدج خفت وين اروح وين امشي ومنو يحميني وصلت البغداد واني روحي ترجف من الخوف

وين اگعد وين امشي مرت عليه ايام نوم ما انام اكل ما اكل افتر من مكان المكان

ومن شارع الشارع بلكي الگه سگف اضم روحي جواه لحد ما بيوم من الأيام تعرفت على هاشـم هذا الرجال الله ذراه الي من السماء شالني من وطلعني من الظلمات للنور وياه يله عشت و انحييت

ساعدني و تعب وياي اول شي أجرلي بيت المده شهرين وبعدين رجع ساعدني

و فتحت صالون وبقى وياي بكل خطوه لحد ما الله سهل عليه وخلصت من الأيجار و اخذلي هذا البيت و گعدني بيه ومن هذاك اليوم الهذا اليوم اني بهذا البيت معززة مكرمه ما ناقصني شي مدلله دلال

اروح الشغلي وارجع وكلشي متوفلي من الخيط للأبرة صح البيت زراعي والمنطقة تعبانه بس العافية درجات

-- ومنين هذا هاشم وين عرفتيه وين شفتيه وين عشتي من رجعتي من بيت جدي حقي اعرف حياتج حقي الگه اجوبه للاسئله مو صدك لو اني غلطانه

-- اي حقج ما غلطانه بشي بس اكو مواضيع

لو حچيتهن ما راح تفهمينهن وراح يتعبنج

بس خلي بالج اني ما غلطت بشي وكل الايام الفاتت اني باقيه نفسي ما تغيرت ولا غيرتني الايام

-- رحتي بطرك الثوب والربطه فجأة بين ليلة ويوم صار عندج بيت وصالون وذهب وفلوس وانتِ لا عندك اهل ولا طالعج ورث منين اجنج كلهن هذني گالتي من هاشم بس يا هاشم هذا وشني البينج وبينه حتى هيج يجيبلج ويحطلج بعتي روحج اله

-- هواي تجاوزتي واني ساكته اگول متفهم وجاهله والحچي السمعته أثر بيها بس اخر مره اگولج احترمي نفسج

-- يمااا فهميني منينننن هذاااا وشعندج وياااه احچي حتى احترم وما اتجاوز احچي حتى من اتعير بيج ارد وادفعلج وادافع الروحي

ما جاوبتني بقت ساكته من شفتها ساكته

عفتها و گمت رحت للغرفه طلعت جبتي وربطتي لبستهن و مشيت الباب الشارع اريد اطلع لزمتني ما تخليني اطلع

-- عوفيني اروووح

-- وين ترحين

-- البيت رجلي

-- هاا والله زين وهذا هم محسوب رجال هم حاسبة نفسج متزوجة وعندج بيت

-- عاد عايشة تحت جناحة مستورة احسن ما ابقى هنا وترحين تبعيني بعد يومين مثل ما بعتي روحج

بسرعه ضربتني راشدي وگالت

-- طايحه الحظ اللسانج اطول منج بس عليمن اطلعين إذا جدتج سعدية

-- سعدية الما عاجبتج كل كتلها وضيمها اهون عليه من فضيحتي هاي گدام الناس