رواية على حافة الثأر الحلقه الخامسه بقلم زينب ماجد حصريه وجديده
-طيب بس ابتعد شوي ، دا تخوفني بهالطريقة
-انت تخافين ؟ انت تخوفين امة بحالها وما تخافين
حجاها واندار عني.. حجيت :لحظة اكدر اعرف شنو الصار وياك بالضبط ؟
باوعلي: تغشمين نفسج وتسويها متعرفين ؟
-مدا اغشم نفسي اني دا اسألك حتى اعرف !
-روحي أسألي رجلج النكس
-ارجوك لتتكلم بالطريقة ، لربما انت محاب تحجي وهذا شي يخصك واني اعتذر اذا صارلك ضرر بسببي .. لازم اروح
حجيتها ودا اريد امشي .. لزم ايدي فزيت وهو حجه بعصبية : اذا صارلي ضرر الزلمة المطلتي بالشارع شصارله شرجي انت شنو من بشر
-ايدي ارجوك
تركها .. وابتعدت منه دخلت جوا بسرعة صرت اتحسس غراضي واحاول اخذهن وارجف .. لبست الكوت وشديته على خصري .. وطلعت دنكت اسحب بالبوت والبسه واجر بالسحاب، رجع هو طلع ويكلي : اني ما قصدت اضايقج حتى اتطلعين بهالوكت .
- سلملي ع الحجية كلش هواية
- مو صحيح تسوقين بهيج وقت ، واصلا ما يصير تسوقين وانت بهالحالة
- مو مشكلة ادبر نفسي ..
- اذا تضايقتي من حجيي انا اسف يابه بس رجعي يصير الصبح وروحي
هو يحجي واني احاول افتح بالباب .. حجه : زين على الأقل انتظريني بس البس واجي اوصلج .
 |
فتحت الباب وسحبته عليه .. هو دخل جوا بسرعة واني طلعت برا جان الجو بارد حيل .. ومظلم ومينشاف شي .. طلعت الفرع ادور سيارتي وين طابكها .
صاح وراي : منا
التفتت ورايا .. باوعتله مشى باتجاه فرع ثاني ..
تبعته لحد ما شفت سيارتي ، دا اريد احجي والسويج بيدي : ارجع بعد اني اكدر ...
سحب السويج من ايدي : بطلي عناد وامشي
- لا ، انطيني اني اكدر اروح
- اتخربطتي بنص الطريق شراح يصير ؟
- راح احير بنفسي
- دصعدي وبطلي شنفصة
- العفو !!؟
- ولج دصعدي تيبسين الكلب جمدت اصعدي
فتحلي الباب ويدفع بظهري .. رفعت رجلي وصعدت السيارة .. سداها ورايا .. وهو صعد ليكدام ..
بقيت اباوع عليه بأستغراب ..
حرك السيارة ومشى بيها لبيتنا..
وصل ، نزل فتح الباب .. ودخل السيارة، اني كاعد انزل .. شفته ديرجع الباب وراه صحت : لحظة
رجع : محتاجة شي
- لا بس ما اعتقد تلكى تكسي بهيج وقت
- ادبرها
- اكو غرفة خاصة جانت لريبر تكدر تبقى بيها لحد ميصير الصبح
- لو كاسر جان انت بقيتي عدنا وما طلعتينا بهالليل يشرفنص
حجاها وابتسم .
ابتسمت : انت ليش كله اسلوبك هشكل
- ميعجب ؟
- لا بس استهزاء بالطرف الاخر محلو
- محلو صدك و ألله ؟
ابتسمت : اني اسفة اذا تعرضت لامور خارج عن ارادتي بس صدقا اني ما عندي علم بكل اللي صار .. شفت والدتك بالباب وعرفت مسجون خابرت على مدير الامن كالولي مو بالمركز فطلبت من بابا وين مجنت يطلعك فوراً بس مكالولي انت وين انسجنت وشنو صار اجيت اطمن ولعل اعرف خبر بس .. مو مهم ان شاءالله تكون بخير
- ليش عايشة بتكلف ورسمية
- مفهمت
- تحاجيني جني واحد كاعد بمؤتمر وعنده شركة وكاعد تتعاقدين وياه
- مو الافضل اعامل بأحترام !
- لا انت بصورة عامة احسج معقدة ، انسانة ميتة بس على قيد الحياة
- يمكن وصفك دقيق بس الإنسان ميختار قدره بنفسه
- محد مختار قدرة بس احنا النختار بأي طريقة نعيش هالقدر .
- شلون ؟
- حاولي اتسعدين نفسج بأي شي
- الاي شي ماله وصف للإن مموجود ..
- مو دا اكلج معقدة ومخربة حياتج بهالعقد
- اللي معايش ظرفي يعتقد اني مخربة حياتي .. بس مو هيج هي حياتي خربانة
- المثلج شينقصه حتى حياته تخرب ؟
الاف ويمكن ملايين الناس يتمنون يعيشون بمكانج
- ولإن معايشين .. ميعرفون لو عاشوها كان هربوا منها ، ع العموم الغرفة اللي بيمين الحديقة تكدر تنام بيها وباب المطبخ راح اتركه مفتوح في حال احتاجيت شي .
انداريت متوجه لباب الصالة صعدت الدرجتين دا الزم الباب الخشب الجبير .. سمعت الباب انطبگت ورايا، انداريت هو ماكو !
اتنهدت ودخلت للبيت لزمت الباب ودفعته واني اباوع بأركان البيت .. انتچيت ع الباب .. بارد اظلم كئيب ..
توجهت للدرج وصعدت ..
دخلت غرفتي نزعت البوت اباب غرفتي وسديت الباب وشغلت التدفئة ، شلحت الكوت من عندي وعلكته وسحبت الكتر من شعر نزل .. بقيت اباوع لوجهي بالمراية .. سحبت ويبز وكمت امسح وجهي من بواقي المكياج .. معقدة ! بشنو معقدة
صفنت ، ابتسمت
الجو يمهم حلو العيشة وياهم بيها روح ..
مشيت اخذت شاور دافي وطلعت .. لبست شي خفيف ووكفت فاتحة الشسوار وانشف بشعري وصافنة اتذكر كلام عباس وهو يكولي لو ما اني انت هسه ميتة
كمت اربط كلامه وكلام شوان لما كلي ابقيج بغبائج : اكيد عباس يعرف شي!
مشيت للسرير .. تغطيت واني الافكار مثل الدوامة اتدور براسي .. باوعت نسيت كلوب الغرفة مطفيته وباردة اتعاجز اكوم ، سحبت كمامة العين ونمت ..
حسيت باب الغرفة انفتحت
باوعته عباس .. اتفاجئت بيه واني اسأله : شتريد
- اني رايدج
حجاها وهو يتقرب مني للسرير ويفتح الغطا ..
مجان لابس قميص ولا بلوز بس بالفانيلة الداخلية وجسمه وزنوده السمر بارزه بعضلاتها .. سويتله مكان بس هو جان جاي بلهفة حتى يحضني .. رحت ضيعت نفسي بحضنه واني اسحبه اليه بقوة ..
لحظات مرت واني نايمة وحاضنته بقوة وخايفة يتركني وبتعد مني .. ما اعرف شنو هالشعور الغريب اللي حسيته .
فجأة فزيت ..
وخرت كمامة العين .. اباوع سريري فارغ
استغفرك اللهي .. كعدت واني افرك وجهي .. وارجع اباوع للمكان عقلي بعده مطالع من اجواء الحلم .. اني شلون دا احلم هيج وليش دا اتصوره بهالطريقة ..
اني اكيد انجنيت ...
مو طبيعي اللي ديصير ويايا
كمت من مكاني رحت غسلت بسرعة وبدلت وطلعت من البيت لكيت الحارس موجود بالباب ، حجه : الوالد البارحة اجا وسأل عنج وملكاج وحاولنا نتصل ونعرف وينج وما رديتي
صعدت بالسيارة بلا ما اجاوبه ..
جان مشغل موسيقى بالسيارة .. انغام الموسيقى خلتني اروح بافكاري بعيد .. واصفن اتذكر الحلم .. تنهدت بحسرة اني معقولة صدك دا اتعاطى مخدرات ! مو معقول اتخيل شخص مثل عباس واتحلم بيه .
دخلت مكتبي ..
اشتغلت كملت .. جنت هادئة ومحاولت احاسب ولا اتجادل ويا اي موظف .. باوعت الساعة ١ الظهر كمت سديت الماك وضميته بالجنطة واخذت جنطتي الصغير وطلعت ..
خابرت ندى ..
كلتلها : انت وين ؟
-بالبيت
- شصار وياج ؟
- على وضعي زعلانة عند اهلي وخايفة يكول لاهلي اني جنت عند عصام وتصير مشكلة ولهسه كاعدة على اعصابي ومدا اعرف شسوي
- حضري نفسج دنطلع شوية
- ياريت مليت من جو البيت مريلي
- لا حدزلج السايق واني راح انتظرج بالمطعم لان قريب عليه
- ماشي
نزلت للمطعم وانطيته عنوانها وطلبت منه يجيبها ويجي .. ونزلت كعدت طلبت عصير .. نص ساعة واجت ..
- هلووو
- هلو نداوي
كمتلها بوستها واجتي كعدت كدامي ..
بقت تسولفلي مشاكلها واني صافنة بغير افكار حجت : فيان ويايا
- وياج قلبي لتهتمين اكول اتطلكي افضل مدام معاجبج ومو هذا ذوقج اتركي افضل متبقين على ذمته وانت دا ترتكبين الخطيئة بحقه .
- اي بس اني لهسه مخابرت ولا حتى اتحمدتله بالسلامة ..
- مو مهم
- انت مو على بعضج احسج دا تصفنين هواية ومشغولة
- تعرفين الحارس اللي شفتي بيوم الصارت المشكلة
- بلي الاجلح
ابتسمت ، اي هو كالي كلام شغل بالي عن شوان
سولفتلها الكاله شوان واللي كاله عباس
حجت : اكيد لازم شي على شوان لهالسبب سجنه وسواه كل هالفعالية حتى يبعده منج .. بس الصدك هو الحارس هذا مينبلع هالاجلح شايف روحه شوفه .. ميتحاجه حقه شوان يخاف عليج منه.
-يعني برأيج اخابره يجي افتهم الموضوع منه
- اي لازم
- ما اعرف هالحارس صح اسلوبه فظ وقبيح بس عنده ذكاء وسرعة بديهية يتصرف بيها بالاوقات الحرجة ..
- اكولج تكولين ارفع دعوى على خالد
- اي افضل واتنازلي عن كل حقوقج حتى تخلصين ، البارحة رحت لبيتهم
- منو خالد
- لا يا خالد ، هذا الحارس
- لويش دا تروحين لبيته
- امه خطية فرحت دا اتطمن بس جانوا كلش لطيفين وجو عائلي ابيتهم كل رائع .. اتخيلي غرفتهم وبيتهم كله متطلع مساحته يمكن ٥٠ مترة .. بس احسهم سعيدين
- بيا منطقة
- بالحرية فرعهم ضيق ومنطقة شعبية ، تعرفين عاجبني اعيش بنص هيج مناطق
- صدك تحجين اوووع كلها هوسة وناس هواية محتعرفين تتعاملين وياهم كلش
-ليش
-اييي معدان ، اكولج هسه عوفينا من هذا المعيدي بداعتي لو طلكته متلكيلي شغل فدوة .. ما اريد ارجع اكعد ابيت اهلي لا شغلة ولا عملة اريد اشوف حياتي
-مو مشكلة اشوفلج بابا يدبرلج شغل .. بس اكولج اخابره لو اخلي هوشيار يخابره ويجي للمكتب باجر .. ولو مراح اخذ راحتي بالحجي بالمكتب .. بس محابة اني اتصل
غمزتلي : اكولج فيان اليوم شغلتج مو خالية ؟
- لويش ؟
- مدوخج هالحارس
- شلون يعني
- يعني تحجين بيه هواية
- لا بس يعني لان اللي حجاه شغل بالي فلازم استفسر عن السبب شوان مو امان
غيرت الموضوع بس اتوترت من كالتلي هشكل ما اعرف ليش ..
حاولت ابعده من فكري
ما ادري راسي بشنو ديخربط وشدا يتصور ..
عقلي صاير كلش سخيف .
ثاني يوم ابالي اخابره ..
بس اول ما وصلت الدائرة شفته كدامي ..
دخلت سيارتي وكلت للحارس ، اندهلي عباس .. طبك السيارة واني بين ما سحبت الجنطة مال الماك .. وجنطتي الصغيرة .. دا اريد انزل .. صار ورايا
حجه : شلونج ست اني جاي حتى احجي وياج
انداريت باوعتله: بأيش ؟
- خابروني على مود الراتب وعقد وعقوبة جزائية وشرط وهالحجي وما ادري شنو يعني اني ما بودي ابطل غير هم البطلوني على اي اساس اني اتعاقب
- منو اللي اتواصل وياك، بهالخصوص ؟
- واحد دازه شوان
- طيب ، حجيت بصوت ناصي : بصراحة جان ابالي ادز عليك اليوم دا احجي وياك
باوعلي : ادزين عليّ .. امريني
- اشوف لو نحجي خارج الدائرة لإن يعني
- قصدج الحيطان الها اذان
ابتسمت : بالضبط
- براحتج
اشرت للحارس .. تقدم كدامي
: انطي مفاتيح السيارة
انطاه واني رجعت كعدت ، وهو صعد ..
حجه .. وين نسولف بأي مكان
- بالسيارة افضل
- اي زين لعد اسمعج
- اني حابة اعرف معنى كلامك اللي كلته قبل يومين من جنت بيتكم
- عليمن ؟
- لو ما انت اني ميتة
- شوفي ست شكوك بس اني واثق منها اللي اسمه شوان جان متفق ويا دكتور داخل المستشفى .. لما دخلتي المستشفى جان مجرد حالة بسيطة بحيث لما انطوج مغذي رجعتي اتغردين بروسنا وتتأمرين ..
وطلعت حتى اجيب السيارة وهو بعدني وطردني منج لما رجعت بالليل لكيتج انت والميت الدكتور اللي جان يشرف على حالتج سوا مشكلة وشكيت بالموضوع وعلى اساسها طلعتج
- شلون يعني
بقى يسولف ويشرح عن الصار بالتفصيل
حجيت : اني هماتين مدا احس نفسي بخير هالفترة وضعي احلامي افكار مشوشة
- ست هو من ناحية الافكار والوضع انت ميئوس منج بصريح العبارة اكولها الج ولا تعتبرينها علي شي بس الصدك عدج خيط
- مفتهمت اشون يعني عندي خيط ؟
- يعني اطباكات
- ما اعرف بس مد افهم بالضبط المفردات
- شلون احجيلج ياها بعد اكثر من هيج شوفي ست من الاخير تحتاجين دكتور نفسي
- اي صح حتى دكتورة ماما نصحتني بهالشي ، بس اني ما احب احجي وافضفض لاحد يعني ما اعرف حتى لو دكتور ما احب اسولف واشكي.
- مو اكلج انت معقدتها .
- دا تأذيني بهالكلام
باوعلي بالمرايا، ابتسم : اسف
- المهم نرجع لحديثنا الأول
- قصدج سالفتنا
عقدت حاجبي : وشنو الفرق ؟
- يعني شوية العربي الفصيح اني وياه مو صداقة
- ليش انت مو عربي ؟
- عربيش رحمة لاهلج ست انت على نياتج .. اني لو بيدي اهج من العراق كله تكلي عربي دخل اعترف بالعراق حتى اعترف بالعرب
ابتسمت : المهم .. تكدر ترجع تزاول عملك بس.. قاطعني
-شني ازاول
- يعني ترجع لشغلك
- اي كولي ارجع لشغلك بعد تعقديها وتشمرين فصحى مو والله احس بروحي كاعد ويا سيبويه
ضحكت بهدوء ودنكت احط ايدي اخفي وجهي.. وكتله : انت فضيع
- انهيها من تزاول تردني بفضيع انت كلش حالتج غاسل ايدي منها من العچس والعباس
- عچس شنو انوب !؟
- يعني العكوس ذني
واشر
هزيت راسي : اوكي
اكو شغلة لخ ..
- اللي هي ؟
-ما اريدك تكعد جوا بالاستعلامات ولا ويا الحرس
اريد تحط مكتب بغرفة هوشيار
-قصرتي جا هسه انت بيضتيها بيضتيها تصخمينها وتخليني اكابل هالگرّگمة شني
- انت تكولي كلماتج غريبة وانت كلماتك مشفتها لا بالقاموس العربي ولا بالكردي ولا بالانكليزي ولا بأي قاموس لغوي من وين دا تجيب هالحجي انت؟ كركمة هسه شنو بله ؟
-يعني مجرجف خايس
فتحت عيني : عجيب ليش اني افتهمت گورگمة دا افهم مجرجف
ضحك بصوت عالي .. ابتسمت
باوعلي : هسه وين تريدين نروح
- ارجع للدائرة
-تمام
رجعنا للدائرة .. نزلت كتله : اطبكها بللكراج واصعد للمكتب
- تأمرين ست .
صعدت لمكتبي .. دقايق ودخل هوشيار .. بقيت مستمرة اشتغل وهو يحجيلي بامور العمل دخل عباس.. كتله : هوشيار ترتب مكتب لعباس بنفس غرفتك .. احتاجه قريب
ضل يباوع على عباس مستغرب : بس ست
- لتناقش نفذ
طلع ، حجيت : اي كلمة ابتزاز او تهديد تبلغني .
- تمام
-تكدر تاخذ راحتك
- شكراً الج .
بقيت اشتغل ساعة اكثر
اجا شوان اني منشغلة بالكتابة ع اللاب ..
تقرب من عندي ، تعمدت اتجاهله ، دنك وهو يريد يبوس خدي
بعدت راسي قبل ليوصلني وباوعتله : اعتقد هذا مكان عمل
- بس اني مشتاقلج
- اني اكول تترك هالامور وتلتهي بشغلك
- شنو هي الامور اللي نتركها .. ليش متحاولين تنطيني فرصة نصلح اللي بيناتنا ؟
- ماكو شي بيناتنا حتى نصلحه
- اني اشوف انت صحيتي الان وصرتي احسن وكمتي تتخذين قرارات وتخالفين اوامر وتضربين التوجيهات بعرض الحائط يعني ما عدتي مريضة ، وبهيج نكدر نرجع للمربع الاول ونتفق على موعد زفافنا
باوعتله ، حجيت : صارلنا شكد مخطوبين ؟
- على كولتج صرنا ١١
- ولا مرة على مدار ١١ سنة ولا حتى لحظة .. باوعتلك بيها وحسيت بحب لو مشاعر لو خوف لو حتى احترام بنظراتك .. ولا مرة حسيت اني محط اهتمامك لإن تحبني مو لإن مستهدفني وتحاول تخليني بطريق مصلحتك.
- مو مشكلتي اذا انت بلا مشاعر واحساس ومتحسين بيه .
- مثل كل مرة تحط الخلل بيه ، واني موافقة ما عندي مشكلة .. نعم بيه الخلل لهذا ممستعدة للخطوة الأن
- اذا ننتظر تستعدين نشيب وتعجزين واحنا ممتزوجين
- تكدر تنهي كلشي بيناتنا وتشوف حياتك، ما اعتقد موقف حياتك ١١ سنة لإنو تحبني كل هذا الحب اللي ما لمسته ولا مرة خلال كل هالسنين .. ريح نفسك وريحني .
- الكلام وياج عقيم جداً
- التفاهم كذلك اذا تلاحظ فشلون تريد نأسس أسرة ونكون عائلة ! لهذا دا اكولك ممستعدة .
- نجرب يمكن لو صرنا بغرفة وحدة وبفراش واحد يمكن الموضوع يتغير مو معقول ١١ سنة وانت حارمتني حتى من لمسة أيدج .
- الغرفة والفراش مراح يحل ازمة مشاعر صارلها سنين .
- طيب الحل شنو فيان اني دا اشتاقلج هواية .. ودا... قاطعته
- قصدك الانتخابات جاية ورايد تستفاد باكبر قدر ممكن وبدل ميكون لقبك اقارب كاكا دلشاد تصير نسيبه .. يعني الربح في عشرة ..
- وين الخلل لو فكرت هيج بالنهاية الربح اللي يصيبني حيصيبج انت هماتين .
- الزواج مو مشروع مصلحة ولا اني مادة للأستغلال حتى تاخذني للربح .. هالتفكير مستحيل اتقبله .
طبكت اللاب وكمت من مكاني
حجه : اتركي خلينا نروح نتغدا بفد مكان .
- عندي شغل
- شنو هو شغلج ترجعين واحد سز لو تطلعين تفترين وياه
- انت شلون تسمح لنفسك تتكلم ويايا بهالطريقة ؟
- فيان اصحي على اللي دا تسوي ، بوكت اللي لازم هالانسان يكون السجن تحطيلا مكتب ابابجججججججججج
- اذا تعتقد رفع صوتك يخيفني فانت جداً غلطان، هذا عمل واني فضلت هذا الشخص يكون حارس افضل من غيره.
- شصار حتى غيرتي رأيج وصرتي تتقبلين العرب
- مغيرت رأي بس احنا ببغداد مو بهولير والعمل يتطلب منك تشتغل مع مختلف القوميات ، عن أذنك .
سحبت جنطتي و طلعت ..
ضرب المكتب ورايا ملتفتت طلعت عباس كاعد .. بس شافني كام تعديته ومشيت وهو مشى ورايا ..
طلعت الدائرة .. وهو اخذ السويج من الاستعلامات وسبقني يركض للسيارة .. صعدت بلا كلام طول الطريق لحد ما وصلت البيت ، دا انزل، حجه : ست
انداريت : نعم
- بس بخصوص دوامي
- اي ؟
- شلون طبيعة الدوام شوكت احل شوكت اوقات الدوام .
- استمر بدوامك الفترة هذه لحد ما ارتب بديل .
حجيتها ومشيت ، فتت باجي موجودة .. وام غيث تكول : هلا عيوني .. جيتي بوكتج مسوية شلون دولمة .. تلوك لحلكج
ابتسمت الها، وحجيت : هلا باجي ، هلا ام غيث ..تعبانة وحابة اصعد ارتاح لتندهوني على غدا .. واكلوا صحة وعافية لاتنتظروني
حجت باجي واني دا امشي طلعت نور كبالي بنت ام غيث ابتسمتلها واشرت الها براسي باشارة ترحيب .. تركتهم وصعدت
بدلت وحاولت انام مكدرت .. بقيت بفراشي ضايعة بافكاري .. خطرلي الحلم واني اباوع المكان استذكره
كمت من مكاني سحبت البردة وكمت اباوع من فوك ..
شفت نور بنت ام غيث اخذتله صينية غدا .. بقيت اباوع لحد مطلعت رجعت البردة ، اخذت نفس واني افكر بطريقة اخلص بيها نفسي من شوان وقيوده .
لبعد العصر واني حابسة نفسي بغرفتي ومتقوقعة بافكاري الصامتة .. اندكت الباب، سحبت الماك وحطيته ع البطانية واني متمددة .. دخلت نور : كاكا طالبج جوا
- بابا اجا
-بلي
- تمام
راحت واني بدلت تراك شتوي ونزلت ..
سلمت عليه كال : اليوم عازم شوان والاهل ع العشا
- عزيمة اني اخر من يعلم بيها !
- دا ابلغج بابا
طلعت بيداء من المطبخ : هلو فيان
اتجاهلتها وحجيت : عندي شغل ولازم اطلع بالليل مواعدة صديقتي اروحلها
- يتأجل الشغل بابا
بيداء : مو دنسلم عليج عيني شدعواج بس الله الچبير
- بابا محلو هشكل تحطني امام الامر الواقع وتعزم الكل بدون علمي
- هيج هيج لو انطيتج علم مراح يعجبج لهذا حاولي تلتزمين هدوئج وتناقشين مواضيعج بتعقل اكثر
- جيد مواضيعج واضح العزيمة شنو غايتها
- فيان
-تمام بابا راح اتواجد بالعزيمة بس لتحاول تفرض عليه امور اني ما مستعدة الها ارجوك
-راح نتناقش ونحل كلشي
تركتهم وطلعت .. لكيت نور دا تنطي جاي لعباس ..
وكفت هي مشت بسرعة ، حجيت : تكدر تاخذ راحتك واخذ السيارة وياك .. وقت ما اتصل بأي وقت تحضر عندي .
- تمام ست
ترك الجاي اخذ السويج وطلع بالسيارة
صعدت .. محاولت ارتب نفسي .. ولا حتى البس شي يناسب العزيمة بقيت بالتراك البيتي ورافعة شعري بكتر .
حاولت قدر الامكان اعتزل بغرفتي ما اختلط بيهم .. اسمع البيت صار ضوضاء وهوسة .. اندكت الباب وطلبوني .. حتى انزل هزيت راسي وكلتلهم .. دقايق .. ومنزلت وقفلت الباب
لحد ما صعد شوان ..
دك الباب : فيان ، موجودة
- نعم لحظة
سحبت الكتر من شعري نفشته .. وبدون ترتيب .. فتحت الباب .. كال : لحظة حاب نسو... قاطعته واني اتعداه واريد امشي
لزم ايدي : احجي وياج ، اشوف لو تلبسين شي افضل من التراك مو مناسب تستقبلين اهلي بهيج منظر
- ليش العزيمة بمطعم ؟
- لا جوا
- مدامها جوا وبالبيت فهذه ملابس البيت
تركته ونزلت .. هم كلهم كاعدين بالصالة رفعت ايدي وكلت الهم : سلاو
محد منهم جاوب وبقوا يباوعون بوجهي وبوجه ابويه .. خزرني بابا وانحرج .. وشوان صار وراي واني كاعدة ع التخم ، حجه : هذه هي فيان طول الوقت
بقوا يحجون ويتنابزون بالكلام ..
حجه بابا وحاول يقطع الموضوع وكال: اتفضلوا للطاولة
الطاولة مال المطبخ ناقليها للصالة وفاتحيها على مشرعيها وموسعيها ومرتبيها بقماش ابيض وترتيب .. كعد والدي على راس الطاولة ، بيداء دا تقترب وتكعد على يساره .. سحبت الكرسي وكعدت بالمكان .. راد تحجي والدي صار يأشرلها .. كعد بصفي شوان وابوه وامه كدامنا ..وبصف شوان بيداء ومقابيلها باجيتي .
بلشوا بالأكل .. اني قابضة ايدي وحاطتها على اطراف الطاولة بدون ما اكل .. شوان شال من الاكل حط بماعوني مباوعتله .. حجه ابوه : شلونه الشغل فيان
رفعت عيني ببطئ وباوعت بوجهه ، ابويه نز ايدي.. باوعتله وتنهدت : جيد
حجت امه :لا تكون العزيمة غصبا عنك اشوفك مو طايقتنا .
- العفو ليش هالكلام؟
- بلا سلام بلا كلام وكأنج كاعدة ويانا غصب مو عيب
نزها ابوه .. وشوان كاللها : فيان مريضة هالفترة ومصار مدة لما رجعت شوية شوية للعمل ولروتين حياتها الطبيعي.
تنهدت .. وحجيت : نور
اجت نور بسرعة : نعم
_كلاص مي اذا ممكن حبيبتي
حجه ابوه : كاكا احنا مقبلين على انتخابات وحدث مهم بتاريخنا وتاريخ عائلتنا واحنا نتمنى نتكاتف حتى تنجح حملتك الأنتخابية بخير
حجه شوان : وهذا غاية عملي وجهدي ، لازم تنجح حملتنا ونجاح عمو دلشاد نجاحنا كلنا ويصب بمصلحة الجميع
رد والدي : الله يحفظكم شكرا لحرصكم وتفانيكم بحملتنا فعلكم انما ينم عن محبة خالصة وصدق القرابة وصلابتها وعني شخصيا فخور بيكم وبابني شوان .
حجه ابوه : طبعا كاكا ..واني اشوف الأستعجال بزواج شوان وبنتنا فيان .. وقت مثالي الان ويصب بمصلحة حملتك .. ومصلحة بنتنا .. نعزم جميع الشخصيات المقربة والداعمة .. ونعمل وليمة كبيرة بهولير وندخلها ضمن منهاج حملتنا
حجيت : وانت شايف موضوع زواجنا مشروع يخدم منهج الحملة
- يا بنتي موضوع الزواج كلش طال واتأخر وابنا كبر وانت كبرتي هماتين ولازم تأسسون عائلة وتجيبون اولاد رايدين نفرح بيكم .
حجه بابا : اضم صوتي لصوتك عزيزي مسرور .. موضوع الزواج جدا تأخر وصار لازم ينحل .. واكيد بموافقة بنتي .. بابا حبيبي اذا عندج شي يضايقج او ملاحظة اطرحيها مدام الاهل والكل موجود ..
املي شروطج لو كان عندج شروط ..
كلهم صاروا يباوعولي .. تنهدت واخذت الخاشوكة وصرت اشرب الشوربة ، حجت امه : قلة احترام من يسألوج ومتجاوبين بنتي .. ما اعرف ليش كل هذا التكبر ضيعتي نفسج وضيعتي عمر ابني بعجرفتج وغرورج وهاي كاعدين هياتنا ننتظر الكلمة منج حتى تواااافقين اي أسلوب هذا !
ما كأني سمعت استمريت اكل الشوربة ..
حجه ابويه : كملوا اكلكم نحجي بالموضوع بعدين .. تفضلوا .. فيان كومي طالبج بابا
كام وسحب ايدي .. كمت وياه واخذني للمطبخ رفع ايده وكام يهدد : اسمعي فيان اذا تعتقدين جريمتج اللي اقترفتيها ما عليها حساب وهمانة وهاي للمرة الاخيرة احذرج .. انتبهي لتصرفاتج ولا تحرجيني ويا ضيووووفي صغيرة انت شنو الاسلوب اللي كاعد دا تحرجيني بيه الناس جاييين ديسمعوج
- من لم بلغتني بالعزيمة غصبا انتم جايين دا تفرضون عليه اوامركم مو ابالكم اتسمعوني
- شنو اللي تريدي هذه مصلحتي معقولة الغرباء تهمهم مصلحتي اكثر من بنتي .
- مصلحتهم قصدك
- ليش متكولين مصلحة مشتركة .. فيان للمرة الاخيرة احذرج تتصرفين بهالاسلوب المتعجرف كدامهم والا اقسم بالله راح اتصرف وياج بشكل ميعجبج ابداً .. فهمتي .
حجاه ودفعني وهو يكول : انتظرج ع الطاولة
ومشى .. تبعته واني ادخل وعلى طول رفعت صوتي واكولهم : انتم مستعدين تسمعوني وتعرفون مشاعري ؟
اني مريضة مثل مكال ابنكم مو صاحية
منو حاب يزوج ابنه لبنية مريضة، الفترة اللي يكولكم عنها اتمرضت بيها مجنت مريضة .. عجبني وطخ براسي ارفع المسدس واقتل انسان وهيج صار راح بابا وشوان يلفقون ويلملمون ويسعون بكل معارفهم وجهدهم يطمطمون اللي صار ويرشون اللي حاولت اقتله بس حتى محد يعرف بالموضوع ويقال عنه حادث .. لكنه مو حادث فعلياً اني كانت لي رغبة بقتل الأنسان اللي كدامي وبعدها الرغبة متوفرة بقتل انسان تعرفوه .. وتعرفون السبب اللي دا تتجاهلوه وتحاولن تبينون بالمنظر الرقي والمتحضر وانتم متسببين بقتل انسانة بريئة ما اقترفت اثم بحق احد غير نفسها .. حللتوا لنفسكم تقتلوها وتبرؤن قاتلها وجايين بكل جرأة تكعدون ببيتي وتمثلون اسلوب المجتمع الراقي .. اني صرت اقرف منكم ومن خلقكم ومن ابنكم ومنكم كلكم واني اتمنى اقتلكم كلكمممممممم
حجيتها واني ادفع الكرسي على ميز الطعام
ما احس الا ابويه يسحبني بقوة ويضربني .. صرخت : تضربني ليش يا ابويه يا متحضر يا مثقف مو على اساس هذه الجلسة حتى تستمعوووولي ليش لما حجيت بدل ما تستمع تتهجم وتضرب
اذن انتم مجايين حتى تسمعولي انتم رايدين احجي اللي انتو تريدوه وامشي باللي انتم تقرروه واعيش باللي انتو تشوفوه .. وهيهات اني ما اعيش مثل متريدوووووون
حجيتها ومشيت سحبت كوت صار كدامي .. مال نور لبسته طلعت الحرس بالباب حاولوا يوقفوني .. بعدتهم ومشيت بسرعة.. تبعني شوان التفتت واني اهدده : ثق بالله لو ضغطتوا عليه اكثر راح افضحكم كلكم وافضح كل اعمالكم القبيحة واقتل نفسيييي ابتعد مني .. اني دا احذرررررك
انداريت ابجي .. وامشي بحركة .. تبعوني الحرس بالسيارة .. وكفت تكسي وصعدت كبل بلا ما احجي ..
دموعي تنزل بحركة بلا توقف واني امسحهم بقوة وادية ترجف ..
حجه السايق : العفو اختي محتاجة شي
- اطلع للحرية
دليته الطريق .. وطلبت منه ينزل وينده عباس من بيته لان اني مجايبه تليفوني ولا شايلة فلوس .. طلع عباس واحا يركض .. حجيت : جيب السيارة وادفع الكروة للسايق
- تأمرين ست
دفع الكروة وكال : اتفضلي عدنا
- انت متفهم ؟ دا اكولك جيب السيارة
مجاوبني وركض للسيارة بسرعة ..
صعدت بالسيارة ، كمت ابجي بقوة ..
حجه : صاير شي اكدر اساعدج بشي ؟
مجاوبته ، رد حجه : وين تريدين ست ؟
- اطلع للاقليم
- اقليميش ؟ هسه !!!
- اي لكردستان
- رحمة للعباس لا تخزينا طالعة بتراك وكفشتج الله يستر منها وتهفين بنعال وجواريبج يفشلن ست يا اقليم يا سفر
- انت ليش تلغي .. شغلتك هنااااا تنفذ وبسسسس افتهمت .. ممسموحلك تفك حلكك وتاخذ راحتك ويايا بالحجي .. لسانك ينكص لو حاولت .. نفذ
- لا لا شوفي اذا انت طابكات خيوطج وكابات عليج الليلة ترا اني والعباس اخبل منج عاجبج نتباطح هسه
- شنو هالمنطق المقرف .. نفذ بلا لغووووة
- — اي مو تأمريييين
داس بالسيارة .. رفع سرعة السيارة ١٢٠
لزمت : انت دا تريد تموتنا ، سوق عدل
ميجاوبني ورفع السرعة اكثر
.. حجيت : انت مخبل حتدعمنا .. خفف سرعة
يزيد .. دا اكولك خفف
صحت باذنه حيل واني اكوله : اوووووكف
داس بريك .. صار صوت قوي .. وانركعت بالكرسي الكدامي ورجعت .. واللي واكفين لهناك اجوا على صوت السيارة ..
نزل الجام وكال : ماكو شي بخير
رفع الجام واني اكوله : انت مخبل .. لا لا مستحيل
حرك السيارة واني اكوله : اطبك لتسوق بعد .. اطبك
طبك قريب من النهر بالكريعات .. وطفى السيارة
نزل من السيارة .. المكان مظلم .. خفت .. فتح الباب اليمي كتله : شوف اذا دا تحاول تسوي شي يخوفني ثق.... قاطعني
- هو انت الشرفنص اكو شي يخوفج ، تعاي
- شرفنص شنو احتررررم نفسك
- خوش خوش .. صيحي غلطي واذا عاجبج ضربي بس بوكسيات مو راشديات ما بيه حيل حرارة راشدي بس الج حرية مطلقة هاي اني كدامج فرغي غضبج وسوي اللي يعجبج
- انت شدا تحاول تسوي .. وخر
سحب ايد : لا ما اوخر
سحبت ايدي بسرعة، حجه : اسمعي لا تهدئين بقمة عصبيتج ولا تبخلين على نفسج بتفريغ طاقتج ولا تنهزمين من مشاكلج .. واجهي .. اني مو دكتور نفسي بس انت محتاجة دكتور نفسي والعباس .. وما اعرف بس متأكد هالشي راح يفيدج لو حاولتي تشكين وتفرغين اللي بكلبج .. مراح اضوج ولا ازعل اضربي صرخي اغلطي اني راح اتحملج .
بجيت : اني تعبانة كلش محد مستعد يسمعني صدك كل الحواليا يمثلون هم يحبوني محد منهم يحبني والله ميحبوني
انتجيت ع السيارة وكمت ابجي ..
رفعت راسي واني اكوله : لتعتقد اللي سووه وهم يرشون اللي قتلته حب هم بس ديحاولون يصبغون سمعتهم ويتلافون المشكلة
لما وكعت بالمستشفى شفت احد اهتم واجا للمستشفى؟ .. شفت حب حقيقي سهروا بي على راسي وهم خايفين عليه لو شمروني مثل الكلب.. وحطوك تحرسني مو حبا بيه بس حتى يسيطرون عليه
كلهم لا امي تحبني ولا ابويه ولا اي احد
هم يريدوني روبورت لمصلحتهم
اني بنظرهم مو بشر
واذا قتلوا اختي المقرب واللي جانت كل حياتي مو مهم المهم سمعتهم المهم ميخسرون مصلحتهم المشتركة ..
اني تعبت اريد اموت بس محابة اموت وهم يعيشون بخير اذا ما اخليهم يتمنون الموت مراح ارتاح ولا راح اموت .
احجي والدموع تجري
حطيت اديه بين وجهي وصرت ابجي بقوة ..
حط ايده على راسي يمسح ..
- منو اللي تريدين تكتلي
- اللي كتلوا اختي
- اخو شوان وهذا اللي صوبتي ..
-مراح ارتاح اذا ما اشوفهم ديموتون كدامي ويتوسلون الرحمة مثل مسووا بيها
ترجتهم واحد واحد وبوست اديهم بس حتى ميكتبوها بس كتلوها كتلوهاااا
كمت ابجي بقوة من كل كلبي
-فيان ، فيا اسمعي اني راح اساعدج تكتلينهم بس ما راح اسمحلح تموتين .. متفقين
رفعت راسي مسحت وجهي : شلون تساعدني ؟
-خبالج وعقلي لو اجتمعوا صدكيني يصير انفجار يشيلهم كلهم .
كمت امسح بوجهي واجر بخشمي واكوله : توعدني تساعدني فعلاً ؟
اخذ ايدي وحطها على لحيته ولزمني شاربه : وعد ولو ما وفيته تزينين هالشارب بيدج .
سحبت ايدي
حجه : بس اذا متصير زحمة تصعدين بالسيارة انت كردية جسمج مدبغ بالبرد اني عربي مالت حر مو مالت برد من يوم العرفتج ليجاي اركض وراج بالبرد وبطني اسهال
-يييي بلا قرف
حجيتها ووجهي تعبان من البجي.
صعدت بالسيارة .. مشى ليكدام وصف كدام مقهى ع الشط نزل الهم شوية واجا .. وجايب بطانيتين عقدت حاجبي : شنو هذه
-عازمج على استكان جاي على دجلة
- بهالبرد
- لما ينجمع برد دجلة ويا حرارة الجاي تنولد الراحة النفسية .
نزلت من السيارة واني اخذ البطانية منه وهو يلفها عليه حيل ويدفيني بيها .. مشى كبالي ونزل كعدني على مسطبة .. تلفلفت من كل الحوانب وكمت ادفي نفسي بالبطانية
راح جابلي كوب جاي .. وبيده كوب حجه : تكدرتي تخلين كوبي يمج
ومشى جاب بطانية اله واجا : ادني جا مو كله الج .
ابتسمت وادنيت واني اخذ الجاي .. سحب البطانية وكام يدفي رجلية ..
حجه : الجواهري لما شاف دجله شرحلها البكلبه
كالله : يا دجلة الخير قد هانت مطامحنا .. حتى لأدنى طماح غير مضمونِ .. خلوا من الهم الا هم خافقة
كملت له : بين الجوانح اعنيها فتعنيني
- جوانح لو جوارح
- جوانح
- طلعتي اضبط مني بلغتنا
- انت مكمل دراسة ؟
- الصراحة لا .. خامس ادبي وبطلت ما كملت .. ضليت اشتغل اعمال حرة .
- ليش
- تكدرين تكولين دايح .. مسربت مو وجه قراية
وانت ؟
-ماجستير ادارة واعمال بعمان
-يعني ما درستي بالعراق
-بابا كان يشتغل تجارة بين العراق والاردن فدخلني اني واختي جامعة بعمان واستقرينا لحد السقوط رجعنا لهولير
-اربيل قصدج
-بلي
شربت جاي واني اباوع للنهر .. حسيت يباوع بوجهي باوعتله
حجه : اعتبريني دكتورج النفسي واحجي
-شحجي
-اللي براسج فكري بصوت عالي وخليني اساعدج بافكارج واصححها
-افكاري مشوشة ومشوهة اني نفسي ما افتهم فكري
- منين بدت المشكلة
-اي مشكلة
-اللي وقفت حياتج وخلتج انسانة طافية ومحاسة بكل نعم الحياة اللي عدها
- مشكلتي اختي
بسبب شغل بابا جنه ننتقل هواية شي سليمانية شي هولير شي بغداد شي عمان فمجان يبقالي صديقات غير اختي .. نطلع ناكل ننام كله سوية
من احنا وصغار جيهان لسيروان وفيان لشوان .. بس كبرت جيهان محبت سيروان مثل ما هو مثل ان هو يحبها
قبل السقوط بابا جابنا على بغداد وجان مقرر نستقر بالعاصمة .. هنا جيهان اتوظفت واشتغلت وحبت شخص كان وياها اسمه خالد
بس لما صار السقوط احنا رجعنا لعمان وبعدها لاربيل .. مقطعت علاقتها نهائي بس بابا جان ديلح عليها بالخطبة من سيروان وهي كانت متمردة وانسانة تعشق الحياة وترفض كل قيود الدكتاتورية والعبودية اللي يمارسها ابوية بحجة الخوف علينا والمصلحة العامة .. فلما مكدر يخليها تخضع خطبني لشوان حتى العائلتين يرتبطون، وكانوا متفقين خطبة جيهان وسيروان بعدنا
خالد جان يجي لاربيل حتى يلتقي جيهان
جانت تحجيلي عن حبها اله .. مجانت بس تحبه جانت طايرة بيه وهيمانة وطاقتها وهي تسولف عنه بودك تكوم تدورلك حبيب وتحب وتشابه شعورها .. بسبب حبها وثقتها الزايدة غلط جانت تعتقد الطرف الأخر كد هذه المحبة فقدمتله اغلى ما تملك ..
اني وياها بالغرفة بيوم اللي اجتني ووجهها اصفر وتكولي : فيان اني واكعة بمشكلة كلش جبيرة .. اني حامل
لما بلغته وعرف بموضوع حملها كام يسحب نفسه وميرد ع الأتصالات .. الحب الكبير اللي جانت هيمانة وهي تسولف بيه صار مذلة وهي تتوسله بس حتى يساعدها لإن لو عرفوا اهلي ممكن يقتلوها
كام يتهرب اي رقم تخابر منه بعد ميرد عليه
لحد ما صارحها وكاللها : ما اكدر اخذج واني رجال عربي وميليق بيه اخلف نغل وهذه مو عاداتنا ولا تقاليدنا .. جانت تتوسلة وتكوله حتى لو بس فترة ونتطلق اهلي لو عرفوا راح اموت
يكلها مستحيل منو اليكول اللي ابطنج أبني ومني اللي اتخون اهلها ما الها امان وانت مدام سلمتيني نفسج وما همتج سمعة اهلج تعتقدين لو اتزوجتج تصونيني وتصونين سمعتي .. وكعد يحجي باليصير والما يصير والعادات والتقاليد ناسي هو اللي جرها لهذا الخطأ وكأنها ارتكبته ويا الحايط مو وياه وكاعد ديحملها اثم اليخالف العادات والتقاليد بكل معنى الحقارة
وقتها اني اتهجمت عليه وصرت اهدده بس ما نفع ويوم يوم بطن اختي دا تكبر بدون حل ..
لحد ما بيوم سيروان عرف بموضوع حملها
لميت وياها ملابسها حتى تطلع لزاخو لحد ما تصدر الفيزة التركيا حتى ادزها الها وتطلع لتركيا دا تقدم ع الأمم المتحدة وتهاجر لامريكا .. يكون الموضوع اسهل وهي تجيب بيبي وتسجله بأسمها لأن هنا ممنوع
لكن وما اعرف بأي طريقة سيروان عرف هي طالعة واعترضها وهي بزاخو كاعدة.. خابرتني تكولي : فيان سيروان عرف مكاني وراح يكتلني .. خابري بابا يتصرف بسرعة بلغي ماما سوي شي اني راح اموت ولو متت لا تسامحين ولتخلين حقي يضيع فيان راح اموت
وهي ع الاتصال داخل الها
جنت اسمع صياحها وضربه الها وفشاره وشتيمته وهي تتوسل وتبوس الادين حاى ميكتلهاجنت اصيح بكل قوتي حتى يبعد عنها
.. اخر شي سمعته من اختي هي بجيها وتوسلها ميكتلوها
.. لميت اهلي ابويه امي كلهم كلتلهم سيروان حيكتل جيهو .. بس لما بابا خابر وتواصل وراد يوصله جان الموضوع منتهي وهو قاتلها ومكمل وحتى اقاربنا والداير مدايرنا ميعرفون بهالقصة وان بنتنا حملت من الحرام وقتلناها غسل عار من زاخو اخذوها لتل المخطئات ومقبرة غسل العار بسليمانية ( مقبرة المنبوذات )
مكان يدفنون بيه كل بنية تخالف اهلها ويبعدوها عن العين ومتندفن مع مقبرة اهلها لإن تعتبر عار .. تنهدت بحسرة ودمعت عيوني
التفتت اله وهو مركز ويايا بكل حواسه ومشاعره ، حجيت : اسألك كم رجل زاني بهذه الحياة ؟
حجيتها واني ابعد الدموع من عيني
: ما ابالغ اذا اكول تلث ارباع الرجال يزنون
-يزنون بمن برجال مثلهم ؟ لو نساء ليش هو يعتبر من مقوماته ويفتخر بهالافعال بينما هي تنقتل ويقتلوها بحجة الحرام ما كأن الحرام يشمل الكل ولا كأن القتل افضع من الزنى وحرمته اكبر ..
يحللون للرجل بحجة ميعيبه شيء ويخصصون مقبرة كاملة واللي هي فعليا تعتبر مجزرة مو مقبرة بحق بنات ما حبوا رجال حقيقين وخانوا ثقتهم .
محرم وعار عليه وعلى اي انسان يوصل لهذه المقبرة ويزورها واللي عنده عزيزة بيها لازم يزورها بنص الليل والا العار يشملك لما يعرفون انت دا تزور زانية ماتت غسل عار لان يخافون الناس تحجي وصلوا بيهم مرحلة يهددوني بالقتل لو رحت مقبرة المنبوذات وزرتها حتى لا الناس تعرف بموضوعها
لان وحتى يطمطمون سالفتها اعلنوا ان جيهان اتزوجت احد من اصدقاء بابا وسافرت لامريكا .. ممنوع تكول هي انقتلت ممنوع تجيب ذكرها ممنوع تزورها .. ممنوع احد يعرف
ظلموها وهي عايشة وديظلموها وهي ميتة ومستمرين بظلمهم اني صرت اكرهم واتمنى اقتلهم كلهممممم
حط ايده على ايدي : اهدي حقج .. بس اسألج ابوج امج جانوا موافقين على قتلها
- بابا مجان موافق بس لما قتلوها مهتم بقتلها بكد مهتمم شلون يطم الفضيحة وميخلي احد يعرف وهم مستغلي بسبب هالموضوع بحجة هالشي لازم يبقى سر ومحد يدري بيه ولو درى احد سمعة ابويه وتجارته تكون بالحظيظ فحاول يبعد الشبهة عنا فوافق على نفيها لمقبرة المنبوذات ومحاول ولمجرد تفكير يجرم اللي قتلها
ماما مقبلت وانتفضت وصارت مشكلة كلش جبيرة
وعلى اثرها اتطلكوا .. جنت اعتقد ماما مأذيها موضوع اختي مثلي
لكن اللي صار ان ماما باقل من سنة بعد الطلاق حبت شخص واتزوجته زوجة ثانية بدون علم زوجته الأولى .. واستقرت ببغداد لإن عائلة اكرم بهولير.
اخوية ما اتقبل زواج ماما .. فراح يدرس بأيطاليا واستقر هناك واتزوج وكون أسرة
اني تركت العراق وطلعت لعمان درست الماجستير هناك .. عائلتنا اتهدمت واتشتت شملنا واتفرقنا كلنا ومات كلشي حلو من لما ماتت، اني من ذاك اليوم ميتة وانتظر اليوم اللي اخذ حقها واقتل نفسي واتبعها .
- رحتي لعمان وحدج ؟
-شلون يعني وحدي قصدك سكنت
- اي يعني عشتي وحدج هناك
- بلي ، لان بعد ما اخو شوان قتل اختي ردت افسخ الخطوبة بابا ما وافق فطلعت لعمان وابتعدت منهم ..
اكو تأنيب ضمير ولو ضئيل بداخل ابويه ويا اللي صار بأختي هالشي اللي يخليه متعلق بيه من دون اخوية فجان دائما يطالبني ارجع واوكف وياه بعمله وما راح يحاول يضغط عليه ومن هالكلام ..
وحتى استقر يمه وابقى حواليه .. وفرلي منصب بحسب اختصاصي مديرة ادارة بوزارة حكومية ببغداد.. هو مدير عام بيها بس بحسب شغله وشركته بأربيل فما متفرغ تفرغ تام للمنصب فحطني بمكانه وانطاني بيت هنا ووعدني ميضغط عليه ولا يجبرني اتزوج شوان لحد ما اكون مستعدة
بس ديخالف اللي وعدني بيه .. وديضغط عليه هواية ودا افكر اترك بغداد واطلع او يمكن اترك العراق ما اعرف .. بس مو كبل ما اسوي اللي ابالي .
متجاوب وياي بقى صافن واني لازمة الجاي صار ثلج ، ردت احجي سبقني : طلع الفگر هم بيه فوائد
عقدت حاجبي : ليش ؟
-بسبب ان كل واحد متمكن يهاجر كلكم اتشتتوا وصار كل واحد منكم بديرة .. احنا اختي ترملت وين تروح كعدت يمنا ، امي ارملة وين تروح كضت بخوانيكي واني يوم اشتغل يوم لا وهي دايرة البيت براتب التقاعد مال ابويه .. ومكابلها لا طالع لا متزوج لا مستقر لان ما عندي ... يعمي لو جانت عدنا فلوس محد بينا يبقى .
-بس حياتكم حلوة حسيتها دافية
- لإن امي موجودة ايام التتمرض وتنام مستشفى .. البيت ما ينجرع الله وكيلج ما بودي اخطي عتبتة الباب لو ما اختي
- العفو مو ادخل بخصوصياتك لكن مرة ذكرت عندك اطفال بس بسياق الحديث تكول ما متزوج
- مطلك وعندي منها اثنين اطفال ولد
- معايشين وياك
- لا ويا امهم كل فترة اختي تروح تجيبهم يوم اشوفهم ويرجعون ..
-وليش تركتهم
-ما تاركهم بس اطفال اني وين اعرف للجهال غير امهم
-متزوجت امهم ؟
-لا متفقين في حال اتزوجت الجهال يرجعولي
- وبهيج حارمها الزواج
- ما حارمها بس هي اللي طلبت الطلاك وهي الاخذت الجهال بعد تتزوج وتاخذهم خو ما يصير .
- هي الصوج كله وانت بريء !
- القضية مو مجرم وبريء .. بس مشاكل هي وامي لا امي خيرة ولا هي فحاولت شكد ما اكدر ما ادخل بيناتهن بس ما صفن .. زين اخوي الجبير عازل ومتزوج واني الصغير شلون اعوف امي !؟ والصدك هم ما عندي امكانية افتح بيت .. يوم الكى شغل يوم لا .. واحفر بالحجر وما احصل شسوي فمشاكل على جهال على شغل على كعدة اختي ويانا فكالتلي ما اتحمل عيشتك وطلكني ... زعلت كم شهر دزيت ناس حتى يرجعونها ردوا خبر تريد طلاك ما تريد رجعة .. كتلهم بكيفها بس اني ما عندي انطي مؤخر حتى اطلك اتنازلت عن المهر بس حتى اطلكها بس رادت غرفة الاخشاب عاد اجو حملوها واخذوا كلشي وصفيت انام ويا امي بالدوانية .
- اذا انت ما متمكن من الزواج لويش اتزوجت
- بعد شسوي امي وعمايلها شافتني مسربت وما افلح بشغلة دكت الا اتزوج تكلي من تتزوج وتصير عدك مسؤلية تتغير .. يا اتغير ورطتني ورطة الله وكيلج محمد كفيلج جتي ايام حتى امي كرهتها
ابتسمت : ليش
- جا ما عندي منين اجيب وورطتني بزواج وحدة من كرايبها عاد المرة اتولتني جيب جيب جيب جيب ما خليت شغلة تعتب عليه عمالة عامل صباغ سايق اشكال الوان .. لميت الفلس ع الفلس اشتريت سيارة اشتغلت تكسي اتمرضت امي بالورم واحتاجت فلوس كمت بعت سيارتي واخوي اداين حتى نسوي عملية امي وذيج اتخبلت شلون ابيع السيارة علمود العملية كتلها جا منين اجيب تكلي اداين حالك حال اخوك وشكد انطى انت تنطي مثله
العملية جانت ب١١ مليون واخوي دبر ب٣ ملايين ياهو اليداين ٨ ملايين ؟ تكلي ما مجبور ا داين ٣ مثل اخوك
اكلها اي والخمس ملايين البقية منين نجيبهن تكلي ماكو غيرك يحير بيهن
فد حجي ومعاين بوكت امي بيه مريضة وارواحنا طالعة خابرتني امها شايفتلي وحدة تنطيني بالفايز
كتلها منين اوفي اني اطلع بالتكسي يا دوب اجيب لكمة بيتي اورط روحي دين بالفايز شبية.. عاد بعت السيارة.. وينعل زينها كفرتني .. سنة وهي يا السيارة ويا طلابة السيارة وبعتها وما فكرت بيه وبالجهال موعت اذاني والعباس كرهتها وكرهت البيت وكرهت حتى امي شنو اللذة من هالفكر هسه اني مسربت يا يمة دعوفيني مسربت على روحي بس بعد امي تنكدر تندكر وهاي تاليتها.
ابتسمت : زين بما انو اشتغلت عندك نية ترجعها
- لا ينعل يومها شرجع ابألله .. ناقصني طاك طاك طاك باذاني ما تنحمل يمعودة .. وبعدين راتبيش هو الصبح خابرون لازم انطي اضعافه هذا هوشيار اخ الكح****
- ليش دا تفشر .. عيب
- العفو والله نسيت انت مرة بس اخذني الحماس بالكلام كومي لا تصير مو زينة رجلية يبسن كومي
- لا عاجبني المكان حلو محابة ارجع للبيت
- وهم تتخربطين وتعالوا شيلوني انت شايفة روحج شكبرج ما تنشالين .. يلا
- انت من وين تجيب هالجرأة تكلمني بطريقة وكأني اني اللي اشتغل عندك ! كومة اشتغلوا عدنا حرس ولا واحد منهم اتجرأ يرفع عينه بعيني مو يكلمني هشكل انت غريب !
- لو امي هنا جا كالتلج بعد اعبيس المسربت .. شلون يصير المسربت اكثر من هيج كومي
ابتسمت وكمت من مكاني : غير اعرف المسربت شنو بالتحديد
- يعني مسربت الوضعية وطاك الدنيا بجلاق وماشي بمبدأ وين ما توصل توصل
وسوا حركه بحلكة وعينه
- انت غريب الاطوار صدكني
- دكومي عيني سندس كومي عصاعيصنا يبست من البرد وهي بعدها تزرك بهالفصحى وترد ليورا
- ايييع ، شنو هالمنطق
- غير تمشي بنچرت يالحمزة
- حمزة منو
- هذا عم الرسول فدوة اروح لاسمه بفلم الرسالة خاط الكفار خوط بعد ايدي.. اكلج هسه اكعد احجيلج قصته بهالبرد دمشييي عود بالسيارة كومي اعضامي اتبربدن وعلي
ضحكت واني امشي للسيارة ومدا افهم كلامه شديكول عليه مفردات بحياتي مسامعتها .. وصلني لباب السيارة واخذ البطانية من عندي، صعدت سد باب السيارة ومشى
اتنهدت .. وانتجيت على شباك السيارة اباوعله وهو يمشي .. ذبيت حسرة .. رجع هو ويمسح اديه ببنطرونه الوصخ
صعد كتله : اي امسح ببنطرونك عفية
باوعلي بالمرايا : عليه
- ليش اكو غيرك
- مي شبيج غسلت ادية
حتى لو تاخذ كلينكس وتنشف اديك ميصير بالملابس
- انت لعد فايتج هواي ما شايفتني من اغسل وجهي الصبح واطلع وماكو خاولي وبس امي واكفة ع الطباخ وامسح وجهي بظهرها .
- ايييع
- ايع بعينج غير امي
- وشله دخل تمسح بملابس هي لابستهم يمكن متعرقة بيهم
- اروحن فدوة لصنان امي
- حتقيء .. اسكت
- جا غير امي
- اسكتتت .. حتقيئ و ألله
- اوووي و ألله .. انزول عليج
ضحكت : عجيب يعني انت مقتنع باللي دا تسوي وهالسلوب
- اووو وبكامل قواي العقلية وعلي
- مخبل و ألله
- اي و ألله ..
بقيت مبتسمة وهو يقلد عليه بعمر ممار عليه هيج شخصية غريبة كلامه واسلوبه يضحكوني .
ضل يسوق بالسيارة
اتنهدت واتذكرت شلون جنت قبل ساعات لما طلعت من البيت .. جان بودي احرك روحي دا اخلص وهسه كاعدة دا اضحك واتبسم
باوعتله : عباس
- هلا يابه
- شكراً
- على ؟
يحجي ورافع راسه يبارعلي من المرايا الامامية
- شكراً وبس ..
ابتسم : خادم للطيبين
ابتسمت، وحجيت : بس مو ترجع تسوق بسرعة مثل قبل شوية بداعتي ترا اخاف من السرعة
- لا كبل شوية ردت اضيع الورانا
- الورانا ! منو قصدك
- الحرس تابعينج لبيتنا ومن اتحركنا بقوا يتلاحكونج .. فسويت هيج وضيعتهم ودخلت فروع حتى ما يلگوني
- صح لاحظتهم من طلعت بالتكسي تبعوني بس نسيتهم
- وين رايدة نروح ، بس مو للاقليم عليج العباس
ابتسمت : لا .. ارجع النا للبيت
- اي الحمد لله .
هزيت راسي .. وصلنا للبيت ، فتح الباب .. طلع النا الحارس .. دخل السيارة اني فتت للبيت وتركتهم ورايا .
طلعت باجي : رجعتي يا عيني وين جنتي مو كلبوا الدنيا عليج يا بنتي
- طلعت اشتم هوا باجي لو حتى الهوى صار ممنوع
- لا يا بنتي مو ممنوع بس لو مطمنتنه عليج
- منو يهمه اني شيصير بيه وشحس حتى يطمن
- لتكولين هيج كلنا نحبج ونريد مصلحتج
- مصلحتي كلتيلي .. تصبحين على خير باجي
- خابري لابوج طمني لتعوفي
- تلكي غركان بالعسل ويا الست بيداء باجي مو صحيح نزعجه
صعدت لغرفتي .. بدلت التراك .. ولبست بيجامة حمرة بيها رسومات ميكي ماوس .. وتيشيرت ابيض نص ردن... ردت انام بس حسيت اني جوعانة كلش .
اخذت ترواكة صوف لبستها ونزلت للمطبخ .. لكيت نور موجودة : اليوم هنا نور
اندارت .. هلو حبيبتي شلونج
-اسفة اخذت الجاكيت مالتج بدون اذن
-عادي كدامج
-بايتين هنا اليوم
- الشغل جان هواية فماما كالت نبقى نكمل الشغل وننام بس مجاي نوم وهسه كعدت طلعت برا .. فالحارس البرا جوعان وكاعد دا اسويله اكل
- منو عباس لو احمد
- لا هذا الاسمر
- عباس ، وشنو حتسويله
- باقي هواية من العشا اساسا محد اكل
- زين .. كملي وحطلي العشا جوعانة
- تمام
لفيت الجاكيت الصوف على جسمي وطلعت بالبرد .. دكيت الباب فتحها عباس ومحمد كاعد ع السرير
- مساء الخير
كام احمد على حيله : اهلا ست هلا بيج
- الغرفة تسع لشخص واحد .
عباس : ندبرها هو ع السرير واني افرش بالكاع
-اذا احد بيكم حاب يرجع خل ياخذ السيارة ويروح والصبح يجيبها
بقوا يباوعون بوجه بعض عباس كاله : اذا تريد روح واني ابقى
-ها زين بيش الساعة ست تطلعين علمود السيارة
-ب٨ ونص لازم انت هنا
-تمام مشكورة ست
اخذ السويج وطلع، حجه : اختياراتج توب
-ليش ؟
-بس بالنسبة لميكي ماوس فد شي
ابتسمت : التدفئة مدا تشتغل لويش مغلين الهيتر ؟
-ما ادري هستوني طبيت
وكف لزم ريموت التدفئة يحاول بيه : ديذب هوى بارد
-الهيتر خطر ملازم تتركه مشتغل ، تكدر تاخذ راحتك راح اداوم ويا احمد .
-مشكورة ست
- تصبح على خير
-تلاكينه
مشيت دخلت للمطبخ نور حاطتلي الأكل ودا تريد تشيل الصينية .. كمت اغمس واكل .. بس طول ما اني اكل نور مرجعت من غرفة الحارس .
كمت من مكاني باوعت من الشباك
مسدود الباب .. عقدت حاجبي .. دا اريد اطلع .. دخلت ام غيث : ها داده رجعتي
-بلي خالة ، بس نور راحت دا توصل الصينية لغرفة الحارس ولهسه كرجعت نبهيها بهالخصوص
طلعت ام غيث بسرعة ..
دكت الباب ونور فتحته .. سحبتها وكامت ترزل بيها .. تركتهم وصعدت ..
طفيت كلشي وبقيت اتذكر الكعدة ع النهر .. تنهدت جانت اجواء جميلة وهادئة ريحتني وطلعتني من الجو المشحون ..
هذا الانسان بيه سحر رغم اسلوبه فظ وهمجي ويتجاوز وغريب الاطوار بس ظريف والوقت وياه ممتع.
نمت بهدوء ..
لحد مصار الصبح وردت اطلع صابني الفضول اطلع على غرفة الحارس واشوفه اذا موجود
فتحت باب الغرفة ..
هو نايم على بطنه وحاضن المخدة ودافن وجهه بيها و وملابس قميص ولا تيشيرت .. بس متغطي بالبطانية لحد نص ظهره
.. تركته وطلعت للدوام كبل ..
دا اشتغل ..ودزيت على مخلد ابو الحسابات واني اناقشه بموضوع العمل كال : نعم ست لا تشيلين هم راح نكملهم باسرع وقت قبل موعد الزفاف
- عقد حاجبي اي زفاف ؟
- زفافكم انت والاستاذ شوان
- مفتهمت
- اسف ست اني بس سمعت ان موعد زفافكم صار يوم الجمعة القادم .
اخذت نفس وكتله : شكرا الك تفضل ،
دست جهاز المناداة اجا هوشيار كدامي حجيت : شنو موضوع الزفاف
- ست اني سمعت من الاستاذ شوان حالي حال البقية ليش انت ما عندج علم
- شوان وين ؟
- بمكتبه ست
ضربت ع المكتب وكمت بسرعة .. توجهت لمكتبه فتت .. تغريد يمه يسولف وياها .. حجيت : برا لو سمحتي
طلعت بسرعة .. سديت الباب حجيت بعصبية : انت باي حق تعلن موعد زفاف اني ما اعرف بيه شدا تحاول تسوي هااااا
حجيت ودفعته لزمني من ركبتي : مو اني اللي ينهانون اهلي ومن وحدة بلا قيمة مثلج
دفعته : حيوان ، اني اللي بلا قييييمة، لك انت تطول تمسح كعب حذائي حتى تتجااااوز لتنسى انت منو وشنو كلك خلك راعي بفضلي صرت وبفضلي وصلت لتنسى رووووحك من حجي ويايا افتهمتتتتتت
رجع لزمني من ركبتي وكال : الفيديو اللي صوبتي بيه الولد وقتلتي موجود عندي وبكل بساطة اكدر اخلي يرفع عليج دعوى واحولها ابتزاز وادفنج تحت سابع ارض لو مسويتي المطلوب منج
- انت دا تهددني !!
- وبموافقة ابوج نفسه .. يا ترضين تصيرين كلبه عندي.. يا ابليج بقضية ادفنج بيهااااا واعلمج منو هو شوااااااان .... يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️💙🌺🌹💙🌺🌹💙❤️💙🌺🌹❤️💙🌺🌹❤️💙🌺🌹❤️💙🌺🌹
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
❤️🌹🌺💙❤️🌹🌺💙❤️🌹🌺💙❤️🌹🌺💙❤️🌹
تعليقات
إرسال تعليق