رواية عروس الجبايش الحلقة التاسعة بقلم ياسه حصريه وجديده

رواية عروس الجبايش الحلقة التاسعة بقلم ياسه حصريه وجديده 

ليست كل العواصف تأتي لتدمر 

حياتك ، فالبعض منها يأتي ليوضح لك الطريق 

............................. 

يُـمـن :- شني رجلج شلون تزوجتيه شني لا تتدخلين يماا شني هذا اللعب 

شهيناز :- احترمي واحچي عدل 

-- چا فهميني شني رجلج شلون 

شهيناز :- حالي حال الناس شلون يعني 

-- وعمي ؟ 

-- شبيه عمج

-- مو هو رجلج وشردتي منه بدون ما يطلگج

-- لاا

-- شني لا يعني مو مرته

-- مرته بس مو دائمي

-- شني مو دائمي يمه لا تخبليني

-- الكلب أبن الكلب جان يعقد عليه فتره بس وانتهى يعني مو زواج دائمي 

-- وين اكو هيج شني تضحكين عليه

-- لا ما اضحك واكوو هيج واكثر واكثر مو اگلج مو كل شي لازم تعرفين إذا عرفتي راح تعبين وتتأذين

-- ههه على اساس هسه انا ما تعبانه وبهذا حچيج ما تعبت اكثر يما شني هذا الفلم 

-- طبي خليني افهمج جوه الناس منا احنه  بالشارع لا واحد يسمعنا

طبيت جوه و رجليه غدت خيوط بعد شأسمع وشأشوف گعدت بالديوانية وهيَ گاعدة گبالي گالت الها 

-- احچي يما فهميني

-- عمج چان ماخذني زواج منقطع كل شهرين ثلاثة يخلص عقدنا و يجدده 

-- ويصير هيج زواج 

-- اي يصير

-- وجدتي تدري 

-- اي تدري وهي الفرضت عليه هذا الزواج هو بالاول راد ياخذني مره حالي حال كل الناس بس هيَ ما تخليه ومن شافته مصر اله يتزوجني گالتله اخذها اتمتع بيها بس لا تحسبها مره گدام العالم وهو نذل ونكس كسر ظهري واستغلكم و جبرني تحملت كل هاي الاشهر وكل هاي الايام الخاطركم 

بس من مات اخوج بعد خلص صبري

و هجيت من كل الظيم 

ضليت ساكته وما احچي ولا ارد بس صافنه وين يله رديت الها وگلت 

-- يما اني بيا مستنقع عايشة ليش الهاي الدرجة احنه قذرين الاخ ما يتأمن الاخت ما تتأمن العم الخال الأجداد يما كل الناس هيج لو بس اهلي 

-- اكو مثلهم واكو الاحسن واكو الاتعس منهم هاي الدنيا بيها كل الانواع بس بيت جدج من انكس واخس البشر العرفتهم والشفتهم والسمعت بيهم 

-- وانا شني ذنبي ما فكرتوا بيه ما خفتي ينكسر خاطري وبختي بعملتكم هاي انا انتم اهلي شني ذنبي اعيش هيج عيشه موش مثل الوادم 

ما ردت عليه وجنها ما همها حالي 

كل الحچته وردت بيه عليه 

-- هسه عرفتي بيه متزوجة وعرفتي بعمج شلون جان ماخذني بعد ماكو شي مضموم عليج وماكو شي اخاف بعد لا تسأليني شيء عوفي البگلب بلگلب تعبت منه وما اريد اذكرى

-- وهذا رجلج الجديد من اخذتيه مثل ما اخذتي عمي بالسر شني التغير

-- لا مو سر هذا عاقد عليه بشرع الله وسنه نبيه و ولده اثنينهم يعرفون و رجال عنده خير من الله مقدرني ومعيشني عيشة كريمة ومدلله وين هذا وين عمج الفكر أبن الفكور

ضليت ساكته ما ادري شـگول و شني احچي رجعت هيَ تباوع عليه وراها گالت

-- يُــمن ما دام عرفتي كل شيء بعد منه من اليوم تتقبلين الرجال وتحسبيه بحسبه ابوج وتحترمينه وتقدرينه وخليه ساتر علينه ومعيشنه احسن من ما ناخذ الشوارع اني وياج  ويرحون عمامج يذبحونه عاد هذا نسايرة ونقبل بيه الخاطر مصلحتنا

ما ارد ولا انطق احس جبال على گلبي حاطه ولا بيه ازيحهن عني ولا بيه احمل ثكلهن ، رجعت گالت

-- هاشم واصل واله اسمه وسمعته ومكانته بالمجتمع وعنده خير من الله والهذا السبب اني مجلبه بيه أذا اعوفه اخسر كل الخير الاني بيه صح هاي المنطقـة مو شي و بعدهي ما كامله بس احسن من الماكو احسن من الشارع

بيتي كله سيراميك وكاشي واثاث كامل وذهب وفلوس وشغل و واعدني ياخذلي بيت قريب على بيته بس اول مره يرتب وضعه وياه مرته و ولاده

-- صار مرتين تگولين اولادة يعني متزوج ومرته عايشة 

-- اي

-- عاشت ايدج

عفتها وگمت طلعت گعدت بالحوش يربي ضاكت بيه الدنيه الوسيعه دخيلك وين اروح وين اولي ضليت گاعده لحد ما مليت

اخر شي گمت طبيت جريت الغطاه وتغطيت ونمت

ثاني يوم العصر واجه عمـي حاكم تلگته أمي تهلي وترحب بيه وهو يباوع عليه

و مقهور جابت امي الجاي وگعدت يمنا شوية وگال

حاكم :- اني اجيت عليج عمو حبيبتي وما اعرف شلون افتح الموضوع وياج خجلان والله مالي عين احطها بعينج من بعد اللي صار وياج

يُـمـن :- لا تحچي هيج والله ما قصرت وياي كفيت وفيت بس بعد كل بشر وقسمته 

-- رائـف يريدج وما يقبل بالطلاق البارحه يله اجه من السفر تدرين بيه جان مسافر بشغل وگبل اجه عليكم حتى يشوفج ويرجعج وياه للبيت تالي متصايح وياه امج و امج طاردته وما قابلة ترجعين ومن البارحه لليوم الولد متهستر علينا

خرب وياه امه ويا اخته ويا اخو وحتى وياي

يريدج يگول مرتي واريدها

-- عمي رائـف ما يريدني كل الرايده مره خدامة اله والخطيبته والامه مره ما تفتح حلگها وتشكي وتحچي مره مثلي مطيعه لا وراها اهل ولا عمام الليل نهار يدمغ عليها

-- لا ما اقبل هيج لعد تگولين أني وين رحت أني ابوج واهلج وكل عمامج صح صارت وياج هاي المشكلة بس أني ما جنت موجود واستغلن غيابي ومن رجعت و عرفت باللي صار اخذت حقج منهن وزيادة وداعتج كلهن تحاسبن 

-- بيك الخير والبركة عمي رحم الله والديك 

-- شوفي بابا حبيبتي رائـف صح ما چان قابل بكل الموضوع وغلط بحقج هواي واستعجل وخطب بس بالأخير عرف بنفسه يحبج ويريدج وهسه ندمان ودازني عليج 

شهيناز :- يا حب هذا ابو رائـف شوف حال الأبنية شوف وضعها مرتك وبنتك وخطيبة ابنك جارمات بيها وابنك ما اعرف شنو وضعه عبالك واحد مضيع دربه ما يدري شيريد يحبها ويروح يخطب فوگاها يحبها ويكتلها يگطعها تگطع يحبها وياخذها اختصاب حتى مو حاله حال الزلم وين اكو هيج حب

-- هذا قبل هسه تغير الوضع وجاي يعترف يگول مرتي اريدها وغلطت بحقها واريد اصحح غلطي ام يوسف سبحان الما يغلط البشر مو معصوم لا عبالج اني قابل على تصرفات رائـف وامه لا بالله العظيم كل شيء صار ما قابل عليه وحاسبتهم واحد واحد بس بنفس الوقت المشاكل هاي تصير وسوء الفهم يصير بكل العوائل خلينا ننطيهم فرصه يصححون غلطهم ويرجعون سوه و الابنية صغيرة وحرام ينكسر ظهرها بالطلاق وهي بهذا العمر ومجتمعنا ما يرحم وانتِ ما دايمتلها مو گتيلي

تزوجتي و اكيد شفتي حياتج ويا زوجج 

وزوجج رجال غريب خو ما يحير بيها خليها ترجع الزوجها والله يهدي سرهم  ويسعدهم ويرزقهم بالذرية الصالحة

-- وخطيبته  

-- فركش الخطوبة وكلشي انتهى من اول ما رجع من السفر 

-- وامه ابو رائـف مستحيل تسكت عنها من بعد ما خربت خطبه بنت اختها

-- الوضع قبل يختلف عن هسه قبل جان ما يريدها هسه يريدها ومشتريها ومعترف بيها زوجه وشريكـة الحياته امه مستحيل تتجرئ عليها مره ثانية وصدگيني البارحه من رجع من يمكم سولنا مسرحية بالبيت بحيث امه صاحت التوبة واستغفر الله 

امي سكتت شكلها اقتنعت بالحچي رجع هو باوع عليه وسألني

-- ها بابا شگلتي

-- ما ادري عمي

-- فكري براحتج اليوم وباجر وعگبه لحد ما تشوفين نفسج اخذتي قرار ردي خبر واجي اخذج 

شهيناز :- خل تفتح رجلها اول مره وبعدين الله يكتب البيه الخير

-- ما دام هيج بعد اني اترخص من عدكم

-- ابقى للعشه

-- الله يديمكم مشكورة

گام عمي و حط بيدي 100 الف گال هذا مصرف شگد توسلت بيه واتعذرت منه ما اخذهن بس ما قبل لحد ما سلم علينا وراح اول ما راح اجت امي گعدت يمي وگالت 

-- ها امي حبيبتي شنو رأيج

-- ما ادري 

-- عوفي هسه لا تاخذين قرار ارتاحي وفكري براحتج وإذا هو يحبج صدك ويريدج ينتظرج لحد ما تقررين 

-- الله كريـم 

خلص هذا اليوم وأنا الف فكرة وفكرة اجت على بالي ساعه اريد ارجع ساعه لا ابقى هنا يم امي ساعه اخاف من عمتي 

ساعه اگول لا بعد ما تحچي لحد ما تعبت ونمت والصبح فزيت على صوت زلمه بالبيت لبست ربطتي وگمت اشوف ياهو

اول ما طلعت صار بوجهي زلمه لاهو

سمين ولاهو ضعيف عده كرش بس مو كلش جبير وسط  شعره خفيف عبالك اصلع وجهه محسس يلمع لمع وبطرك الشورت والفانيله ام التعلاگه دنكت ميته من المستحه هو بسرعه گال

هـاشم :- هلا بابا صباح الخير 

يُـمـن :- ياهو انتَ

طلعت امي من الغرفه لابسه برمودة والفانيله دلعه والشعر محلول والمكياج على اخر حباية ورحيتها گبلها تمشي تگول جنها العافية ضحكت وردت 

-- هذا عمج هاشـم 

-- هلا اهلاً وسهلاً 

حچيت هيج و عفتهم وافتريت وطلعت للحوش امشي على العكازة واحس رجليه صارن ياثكلهن هسه هذا رجلها وانا اعيش وياهم وهمَ هيج لابسين گدامي 

وصلت للمغسله اللي بالحوش غسلت وگعدت على الشمس وايدي على خدي وصفنه تاخذني وصفنه تجيبني لحد ما طلعت امي صاحت عليه اجي اتريك طبيت للديوانية لگيت رجل أمي گاعد بس لابس تراكسود نعمه من ستر روحه متربع وگاعد على القنفه والحاسبة گباله فاتحها ويشتغل بيها والنركيله بصفه 

جابت امي صينية الريوك وگعدت يمي 

صبتله جاي وانطته اله وتگله

-- تفضل حبي 

-- عاشت إيدج يا حلوة 

ديله بله هذول صدگ يحجون وعايشين اللحظه تهي بهي  

رجعت گعدت يمي وبدأت تاكل وانا بس گاعدة و صافنه بروحي الغريبة وين اروح وين امشي حتى بحظن أمي صرت غريبة 

شهيناز :- متاكلين 

شلت الجاي شربت منه شافتني ما اكل سوتلي لفه وحطتها بيدي دگ نقاله رد 

هاشم :-  بعد وكت 

-- لشوكت تبقى مهمل مو تدري الشغل كله واگف يعني تعاند لو شنو فلمك فهمنيي 

-- يلاااا برر اسمعك اسمعك 

-- اي حقك شلون انتَ رجال ما عندك  وقت وما فارغ  وزير واني ما ادري 

-- اي بيت ام يوسف جيب الفايلات وتعال 

سد النقال ورجع يشتغل بين ما كملنا اكل شالت امي الصينية وراحت للمطبخ وأنا گمت للحوش گعدت بالشمس استحي ابقى گاعدة يمه وبنفس الوكت هذا الزلمه 

شايف روحه وما عاجبه العجب 

ضليت گاعدة برى وهمَ جوه ساعه واندگ الباب لا گمت ولا تحركت ولا جني اسمعه طلعت امي تگول 

-- مو تسمعين الباب ما فتحين

ما جاوبته بقيت على سكتي هزت راسها ما راضيه عليه واجت للباب فتحته وهي بهذا اللبس طب ولد بعمر رائـف بس هذا عنده شوارب بلايه لحيه جنه ضابط مدري شني  امي باسته وترحب بيه وهو يرد عليها السلام 

صفنت صفنه عمري على الوضع هذا هاي

شلابسة گدامه وانوب تبوسه شني هاي وين گاعدين هيج الوضع خرط وانا ما ادري وين العيب وين الحرام 

طب يمشي بيده جنطه وامي تمشي وراه 

وصل يمي باوع الأمي و غمز الها وضحك 

وأشر الها بنفس الوقت براسه هي ضحكت وجاوبته

-- بنتي يُـمـن

تميم :- هلا والله وأخيراً اجيتي وشفنه هذا الوجه الحلو شلونج عيني 

ما جاوبت بس باوعت الأمي مستغربـة بسرعه فهمتني وردت 

-- هذا أبن عمج هاشـم

تميم :- گرايبج يعني 

ما رديت بقيت على گعدتي جانا صوت ابو يصيح عليه عافنا و فات الابو وامي اجت يمي وتگول 

-- شنو تبقين هيج عيب ترى عمج صار بخاطره منج وسألني ليش ضجتي من شفتيه 

-- هاي انتِ هيج تلبسين گدام كل الولد لو شني سالفتج بعد ماكو حلال وحرام تطورتي 

-- وإذا عادي ترى هذول من محارمي وبعدين شبيه لبسي قابل متصلخه هي بجامه وقميص 

-- مو جنج عشاية اللحظة ومصدگه بروحج بغدادية گايمة تتبغددين حتى بحچيج 

-- وليش ما اعيش واصدك من حقي ادلل واعيش عيشة خير مليت من الفكر والظيم

-- اي حقج بس هسه انا وين اگعد إذا رجلج وأبنه بالديوانية

-- رجلج شنو عيب عليج گولي عمو البيت شگده وشكبره قابل بس الاستقبال عدنا 

-- وينه البيت هو ديوانية ومطبخ وغرفتكم 

-- گومي بغرفتنا 

-- لا عوفيني هنا بالشمس 

صاح عليها رجلها راحت تركض تشوفه وانا بقيت گاعدة وعيوني على باب الديوانية 

الولد گاعد بالكرسي الگبال الباب ويلعب بنقاله والاب بالحاسبة يشتغل درت وجهي على باب الشارع ورجعت رفعت راسي للسماء واگول

-- يارب ضاكت الدنيه عليه وين اروح بروحي 

بسرعه طاحت دموعي مسحتهن وحطيت راسي على الحايط وغمضت واگول امي مو نفسها القديمة صايرة وحده ثانية الاشكلها لا للبسها لا تصرفاتها و فوگها متزوجة

و الزلمه يجي و يروح و عنده ولد و ولده يجون شلون اعيش هنا واخذ راحتي كلش صعبه عليه ما اگدر 

سندت روحـي و گمت طبيت من الممر للمطبخ لگيت أمي تطبخ گعدت على باية الدرج بسرعة گالت 

-- سويت تبسي دجاج يلوك الهذا الحلك الحلو

-- عاشت ايدج 

-- عمج يحب هاي الاكله وياها خضره وطرشي همزين سويت هواي عيب من الولد وقت غده مصير يروح بدون غده 

-- عادي ولده متقبلينج بحياة ابوهم 

-- اي عادي كلش حبابين ويحبوني 

-- و بناته

-- بناته ما يعرفن واكيد راح يجي يوم ويعرفن ويتقبلني مثل الولد 

-- شگد عنده ولد وبنات 

-- اثنين ولد تميم الچبير ومراد على راسه و بنات ثلاثة اصغر وحده مواليدج 

-- متزوجات البنات 

-- بس وحده متزوجة الباقيات يدرسن 

وافـي متزوج وعنده و طالب جامعي مرحله ثالثة 

-- شلون عرفتيه وين شفتيه شلون تزوجتوا

-- عرفته وخلص ماكو داعي للتفاصيل 

-- شوكت ناوي يعترف بيج گدام مرته

نصت العين و رفعت روحها بهدوء

و باوعتلي و گالت 

-- ميهمني إذا اعترف او ما اعترف المهم گلبه وجيبه الي وهذا اهم من مرته والاعتراف گدامها 

-- هههه

-- على شنو الضحك بله

-- الگلب ما يحب اثنين ولا يهوى اثنين 

بنفس الوكت هو لا يحبج ولا يحب مرته 

يحب روحه وبس 

-- ولا يحبني يطبه طوب المهم معيشني ومدللني والباقي وهو وگلبه ومرته وعشيرته طزز بيهم جميعاً 

بقيت اباوع عليه ما مصدگه شلون هيج تغيرت دگ نقالها جاوبت اكيد العاملة مال الصالون هي تخابر عليها لان من اجيت لليوم محد يخابرها قصص وروايات عراقية كرار صلاح غيرها وهي تحچي وياها تغسل بالخضره وتحضر بالصينية 

بعدهي تسولف وياها وسمعنا عمـي هاشم يصيح بصوت عـالي 

هاشم :- لو أبوي يطلع من الكبر ويگلك اختملي على هاي الاوراق ما تختم 

تميم :- ما بيهن شي ليش هيج معاند وياهم وموگف شغلهم خطيه والله 

--  صار الف مره اگلك لا تسألني ليش ولا تفتح موضوعهم گدامي

-- يابة الناس خوش ناس وشغلهم كله قانوني ليش واگف بيه خليهم يشتغلون  يعني منين يجيبولك هيج مبلغ حرام عليك

-- انتَ گلتها حرام عليه بعد معليك بالباقي وبعدين هذا المبلغ عدهم اضعافه واليريد يشتغل يدفع و يمشي اموره 

-- نزل شوية من عنده خطيه والله مساعدة ساعدهم 

-- ولا ربع وسد السالفه بعد لا تعيدها

الولد سكت  بعد ما سمعنا صوتهم وأمي صاحت عليه رد

-- هااا خالتـي اسمعج 

-- متروح تجيب لبن وخبز حار حتى اصبلكم تتغدون 

-- والله يا خالتـي العزيزة أني تعذريني ما اگدر اتغده راح اروح 

-- ياا وين تروح غير سويت غده 

-- شسويتي بله اغريني حتى ابقى

-- تبسي دجاج 

-- لا ما اريد شكراً

-- غير يجنن تتعال ضوگه تاكل اصابعك وراه

اجه للمطبخ انا على الدرج گاعدة باوع عليه و كمل طريقه راح يم الطباخ شال القبق و شمه الاكل بسرعه وجهه انعقج 

ورفع روحه من الاكل ويگول

تميم :- دجاج مصلحه فلوس رجلج وين خرب بيكم المن ضامينهن للگبور 

-- يااا ولك والله دجاج ذبح هذا البارحه اشتريتها من السوك حتى اسئل يُـمـن 

باوع عليه و رد 

-- منو يشهد للعروس 

-- عوف السوالف هاي وروح من راس الشارع جيب خبز ولبن 

اجه عليه و اگف ويباوعلي ويگول

-- ترحين وياي 

فتحت عيوني على وسعهن مصدومة شني هالميانه وامي واگفه بكل هدوء تباوع رجع گال

-- يمه شوف العيون تگول عيون ريم تسحن الروح 

امي ضحكت وعمي مناك صاح 

-- بدله اكلان الخـ... هذا امشي جيب الخبززز

ضحك و طلع من باب الممر و أنا باوعت الأمي الامر عدها طبيعي كلش صفنت بيها وبروحي الوضع ما يصرفلي و هذا مبين واحد تعبان وامي اتعب منه والعائله كلها خارطه ما اگدر ابقى هنا ما جاي ارتاح الحاله امي هناك مهما صار بيه احسن من وضعي هنا عاد هناك عندي غرفه اگعد بيها و عمي و واثـق و يحبوني وحتى رائف بكل سيئاته يبقى رجلي ستر وغطاه عليه مو هذا الغريب وحچيه الطايح حظه گمت و گلت الأمي 

-- خابري عمـي خلي يجي ياخذني 

-- ليش 

-- احسلي 

-- شنو الأحسن ابقي هنا منا لمن يتأدب زوجج 

-- عركتي مو وياه حتى يتأدب

-- والضرب والاغتصاب والخطبه هذا كله وما وياه مشكلة 

-- وضع گبل مو مثل هسه

-- ميخالف ابقي هنا كم يوم خليهم يرحون ويرجعون عليج مره واثنين واربعه خليهم يعرفون بيج غالية مو بسهولة ترجعين 

-- كتلج اريدد ارجع كاافي حسي بوضعي

-- شبيييه وضعج اشو مدللتج وحايرة بيج من الصبح الليل 

-- كثر الله خيرج 

عافتني وفاتت يم رجلها رجعت گعدت على الدرج وايدي على خدي خمس دقايق وطلعت 

شهيناز :- راح اخابره بس اول يقبل بشروطي يلا ارجعج

يُـمـن :- شني شروطج

-- ميرجع الخطيبته ويعزلج من امه 

-- ما يگدر يعزل من امه يحبها

-- ويحبج انتِ حسب ما يگول وانتِ بالوقت الحالي وضعج اهم من وضع أمه لان وياج راح يأسس عائله وبيت وامه عدها عائله وبيت ما واگفه عليه 

-- شتردين تحطين حطي بس خابريهم يجون 

-- تفتحين رجلج يلا ترجعين 

-- يماا 

-- وغممممه خلي النفس كرامه مو هذا إذا شافج هيج راح يطيح حظج اكثر واكثر 

-- بس

-- ولاااا صوووت گلت تفتحين رجلج يلااا ارجعج غير هيج ما عندي لو ترگعين راسج بالحايط

عافتني ورجعت تحضر بالغده سكتت منها وهي سكتت بس ضاجت بين ما اجه الولد 

جاب الخبز وگعد بالديوانية اخذت امي الصينية و راحت يمهم ودتها ورجعت حضرتلي غداي وحدي بالمطبخ تدري بيه ما اگعد يمهم 

الولد تغده وطلع بعد ما شفته و عمي غسل وطب الغرفته وامي راحت وراه 

گمت انا المكاني لعبانه روحي من روحي

للعصر وراح عمي بس وجهه ثكيل عليه وشكله ما عجبته شلون عازلي روحي منهم يريدني اگعد يمهم و دگ سوالف  وحتى أمي ضايجه من شفتها ضايجه ما فتحت سالفه الرجعه بعد 

مرت يومين و بهاي اليومين عمي حاكم كل شوية يخابر و واثـق نفس الشي يسألون عليه ويحجون وياي من نقال امي لحد ما رحنا فتحنا رجلي ورجعت امشي عليها طبيعي

من الدكتور ومرينا على الصالون مال أمي

وهنا استلمتني غسل وتبديل من فوك ليجوه طلعتني جديدة گصت شعري كله وساوته ويا المگصوص صار لحد رگبتي  وحفت وجهي وجسمي وسوتلي تنظيف وتقشير هي والعامله ومن بقت شغلات بسيطه عافت العامله تكمل الباقي وراحت گالت شوية وارجع 

ساعه ورجعت گالت يلا التكسي واگفه 

رجعنا للبيت واول ما وصلنا نزلت غراض من الصندوك جايبتهن اليَ

اول ما گعدنا فتحتهن اشوفهن داخليات وسيتات مال عرسان و هدوم بيت اشكال والوان 

شهيناز :- شوفي هذول يطيحن اكبر شارب 

بيج خير وطلعي كيدج واكسبي رجلج 

وخليه ما يشوف غيرج 

-- شلون يعني ترى عيب

-- شنوو العيب هاا ومنين عيب من رجلج 

حلالج شوفي يُـمـن سالفه الثول والبراءه تنسينهن و تصيرين وحده ثانية رجلج حلو 

ولوتي و مشيطن وطاكه كلها جوه رجليه يعني يرادله تعب شويه وبهاي الفهاوه ما تحصلين شي تعبي وفكري عدل و حطيه بالجيب غير هيج تبقين مدكه جره ايده وايد امه و مو مره وحده يحط على راسج لا ثلاثه يجيب عليج وعيونح تشوف شغلي عقلي و فهمي اليتعب بالاول يلعب بالأخير وانتِ تعبي حتى تلعبين وتنفتحلج الدنيه 

بقيت ساكته وعيوني على الهدوم المطشره رجعت صاحت 

-- فهمتتتي لو اشرح بالقلم العريض 

-- فهمت 

-- عفيه صيري بطله وحطي بـ اصابع مثل المحبس 

-- ان شاءالله 

-- يلا هسه حضري ملابسج وغراضج واني راح اخابر عمج يجون ياخذونج 

راحت هي تخابر وانا حضرت غراضي وگلبي يدك مثل الدمام عبالك اليوم زفتي 

مدري شبيه ارجف ساعه وشوية واجى 

عمـي و واثـق

شهيناز :- رائـف وين شو بس انتوا

حاكم :- هو دازنا ما جينه من كيفنا

-- حتى لو دازكم اني اريد احچي وياه

-- ام يوسف اذا ما تعرفين بطبع رائـف فهاي مشكلة رائـف نحس وإذا طنكر من واحد للموت ما يفك منه و بيتكم بعد ما يطبله لان طردتيه و أني واخوه اجينا ناخذ يُـمـن ما يحتاج نسويها سالفه ونكبر الموضوع من جديد

-- بس اني عندي شروط اريده يسمعهن

-- گولي واني اسمع والتردونا يصير 

-- واذا ما قبل 

واثـق :- يقبل يقبل هاي يمي وعد  

-- ماشي اول شي بعد ميمد ايده عليها ولا يضربها وثاني شي ما يرجع الخطيبته ويكسر بخاطرها ويعزل بيها من امه 

حاكم :- وين يعزل وهي طفله والدنيا تخوف مو أمان

-- عزلوله بنفس بيتكم مو مشكلة بس كون امه ما توصل يمها 

عمي سكت وباوع الواثـق شوية وگال

-- سهله اني بيدي اعزللها بس مو هسه لازم ارتب الها المشتمل الفوك اول مره يعني تنتظرني فد شهر شهرين و شتريد يُـمـن تأمر وتدلل و اني حاضر

ابتسمت وعيوني انترست دموع ورديت عليه

-- الله يحفظك ويطول بعمرك ان شاءالله

-- ويحفظج بابا حبيبتي الطيبة الهادئه 

شهيناز :- انتَ الكافل ابو رائـف يُمـن امانه يمك 

-- ان شاءالله بعيوني الاثنين احطها والصار قبل ما ينعاد 

--ما دام هيج بعد ما عندي كل كلام اخذوها والله يسعدها و يوفقها 

-- وانتِ بابا ما عندج كلام تحچينه تردين شي بنفسج شي گولي 

-- لا عمي اريدك سالم 

-- لعد يلا گومي نروح 

گمت لبست جبتي وعدلت حجابي و طلعت وياهم وامي توصي بيه ادير بالي على روحي واخابرها يوميه لحد ما صعدنا بالسيارة وهي وياي بس مشت السيارة بچيت 

صح تحبني بس حياتها غير عن حياتي 

وطبعها صاير غير طبع ما اگدر اتقبله 

وفوگاها متزوجة ورجلها غريب 

و مستثگلني وعنده ولد يجون وياه وصعبه ابقى بنصهم واخذ وانطي وياهم 

لو باقيه امي مثل قبل شكلها حچيها لبسها تصرفاتها ما متزوجة چا عشت يمها وانا مرتاحه وما انجبرت ارجع العمتي وضيمها 

طول الطريق عمي يوصي بيه على رائـف 

وعلى روحي و واثـق يضحك ويرد 

-- إذا تصير مثل امها تسحله من ياخته وإذا تبقى بهاي الفطارية يسحلها من شعرها واحنه ننتظر النهائي بيناتهم

-- هههه لا يُمـن حبابة ومؤدبة وان شاءالله تكون اسره وعائله كلها حب واحترام مو هيج بابا 

يُـمن :- ان شاءالله 

وصلنا للبيت البنات وعمتي بالصاله اول ما طبيت وانا الخوفه ما كلتني اكل گامت هاله فرحانه برجعتي باستني و غادة وگفت سلمت عليه من وره خشمها ما راضيه برجعتي بس شكلها مجبورة تسلم عليه اكيد صايرتلها مشكلة چبيرة خلتها تگوم وتسلم وراها اعتذرت وتگول

-- اني اسفه غلطت بحقج بعد ما تنعاد 

وان شاءالله نصير اخوات العفو منج تجاوزت عليج وأذيتج

-- الله يسامج انا ما شايلة بگلبي عليج 

رجعت گعدت بس شني ضايجة ضوجه الله وحده يعلم بيها باوعت العمتي دايره وجهها وتهز برجلها سريع من خلصن البنات سلام گالت وهي گاعده

لميعة :- عود عذرينا ست يُـمـن بعد ما نتقرب على طولج الحلو والحمدلله على سلامتج 

باوعت العمي وانا ساكته وعمي رد بمكاني

-- شحچينااا 

لميعة :- ليش سويت شي أني 

واثـق :- ما انصحج تسوين لان ابنج جايته الحاله وهاي المره مو بس تكسر وتفلش وغلط ونعايل لاااا هااي المره يذب نفط وحرگكم 

-- والله يسويهاا ابن بطني قابل بعيده عليه

واثـق :- لعد يا حبيبتي يا امي تكفي شره وخلينا عاشين بسلام 

حاكـم :- صعدي بابا الغرفتج 

يُـمـن :- وين اصعد 

-- الغرفه رائـف بعد متنامين هنا غرفته هيَ غرفتج من اليوم يلا حبيبتي هاله بابا ساعدي اختج صعدي الغراض وياها 

اجت هاله صعدت وياي الغراض والضحكه ما فاركت وجهها طبينا للغرفه تلمع من النظافه وفارشين فراش جديد والريحه تخبل ريحه عرس بيها

هاله :- نظفتها وجهزتها الكم ومن اليوم بعد انتِ زوجته غصباً على اليعجبه والما يعجبه بس فدوة طولي خلكج وياه شويه ترى والله تعبان ومتشتت وضايع احتويه ولمي من الضياع لا تخسرينه والله كلبه طيب صح عصبي وعقده ومرات يصير شويه مكروه بس گلبه طيب 

-- هههه  

-- ههه خلينا نرتب ملابسج هنا بالخانه قبل لا يرجع 

رتبنا الهدوم بالكنتور و شالت العلالگيك 

نزلتهن وياها ونزلت گمت انا نزعت 

جبتي و حجابي ومشطت شعري و گفت گبال الامرايه اباوع الروحي 

-- شني الجايني وشلون راح اعيش

شـ مكتوب عليه و شلونه دربي الجاي

رفعت ايدي للسماء و ادعي 

-- ربي سهل امر واكتبلي الخير لا تعوفني وحدي ساعدني ابدي من جديد وحنن گلبه عليه بربي ما اريد شي بس السلام والآمان 

بعدني واگفه وانفتح الباب و طب شكله 

طبيعي لا فرحان ولا ضايج وحتى جنه 

ما شايفني شي مهم بحياته ، طب وسد الباب وراه واجه عليه و گال

رائـف :- شلونج 

يُـمـن :- الحمدلله 

-- رجلج صارت زينه

-- اي زينه

-- تعاي گعدي اريد احچي وياج 

رحنا گعدنا على الجرباية وهوَ قريب من عندي اخذ نفس طويل و راها گال

-- كلشي فات مات ومن اليوم نبدي حياة جديدة ماشي 

هزيت راسي بدون ما ارد رجع يگول

رائـف :- خلينا نتفق على كل شي من هسه حتى بعد يومين ما نتزاعل 

ساكته ما ارد بس اباوع عليه رجع گال

-- اول شي لازم تخلين بالج شنو يصير بيناتنا ما يطلع باب هاي الغرفه زعل فرح سوالف ضحك مشاكل حرف واحد ما يطلع ماشي

-- آن شاءالله

-- إذا احد حچى وياج لو تجاوز عليج ما تردين نهائياً تجين وتحچيلي واني اتصرف 

-- ان شاءالله 

-- هسه نجي للفقرة الاهم امج

بلعت ريگي و رديت 

-- شبيها امي 

-- تنسينها وتحسبينها ضايعة مثل اول يوم اجيتي هنا وإذا تحسبينها ميته يكون افضل

يتبع

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الحلقه الاولى من هنا

الحلقه الثانيه من هنا

الحلقه الثالثه من هنا

الحلقه الرابعه من هنا

الحلقه الخامسه من هنا

الحلقه السادسه من هنا

الحلقه السابعه من هنا

الحلقه الثامنه من هنا

الحلقه التاسعه من هنا

تابعوا صفحتي علشان يوصلكم اشعار فور نزول الروايات من هنا 👇 ❤️ 👇 

صفحة روايات ومعلومات ووصفات

❤️💙🌺🌹❤️💙🌺🌹❤️💙🌺🌹❤️💙🌹🌺💙❤️