رواية عروس الجبايش الفصل الثالث بقلم ياسه حصريه وجديده

رواية عروس الجبايش الفصل الثالث بقلم ياسه حصريه وجديده 

كـ نجـوماً سـرمديـة

لا نلـمع الأ فـي الظلام الدامـس

يُمــن :- مشينا بالسيارة محد يحچي الزلمه ساكت والولد ينافخ وانا ابچي بلايه حس لحد ما طلعنا الچبايش دموعي ضلت تنزل عشرة عشرة تگول اليوم ابوي مات 

طول الدرب الدمعه الما بطلت احس بروحي انسلبت مني لا اكل ولا شرب ولا نوم وبس بچي و نعاوي الزلمه دار عليه

و گال

حاكـم :- ليش البچي بابا لا تبچين كافي انتِ أمانه الله ورسوله يمي وان شاءالله ما اقصر وياج واحطج بعيوني الاثنين من هاي الساعه وانتِ وحده من بناتي لا تبچي حبيبتي سكتي 

مسحت دموعي بربطتي و بس النشغه تطلع رد يحچي وياه ابنه يطبگ على مطعم طبگ للمطعم وفتح الباب نزلني ورد يحچي وياه ابنه ينزل ويانا بس الولد ما يرضا 

و يگله 

-- ما اشتهي يابة عوفني رحمه الروح امك وابوك 

سكت منه واخذني من ايدي للمطعم 

گعدت مكسورة مذلوله اباوع بالوجه دمعتي بطرف عيني گعد گبالي مبتسم ويگول 

حاكـم :- شنو تردين اكل طلبي لا تستحين شنو مشتهيـه 

يـُمـن :- ما اريد شي اريدك سالم 

-- يسلمج الله بابا بس لازم تاكلين ما تريگتي والبارحه ما شفتج تعشيتي ميصير تبقين بدون اكل 

سكتت و نزلت راسي بلايه ما ارد رجع گال 

-- انزلج كباب 

ما اجاوب ساكته صاح الولد و طلب كباب

و تكه وببسي جابوا گبالي وانا شميت الريحة وانا روحي ذابت ضليت ارجف رجيف حط الخبزة گبالي و گال يلا بسم الله 

مديت ايدي واكلت ارجف من الجوع اريد اللزم روحي ما اكدر كل شوية اكول هاي اخر لگمه زحمه من الزلمه وارد اكل غيرها واكول اخر وحده لحد ما خلصت ماعوني وهو ابتسم وحط ماعونه گبالي تشكرت منه وما رضيت امد ايدي عليه استحيت هسه شيـگول عليه 

نزل جاي اليه واله وشرب جكارة و اخذ جاي ثالث الابنه و طلعنا وصلنا للسيارة لگينا يخابر من شافنا اجينه سد نقاله

و اخذ الجاي من ايد ابو بله ما يحچي شغل ومشى ايد يشرب بيها جاي وايد يسوق 

بعد انا من شبعت احس هودت

و استقريت وعيوني نعست ما اگدر افتحهن الليل كله ما نايمة غصب عني استسلمت ونمت ما فزيت غير على صوت الهورنات و صوت الولد يگول 

-- انعل ابو الحط بيدكم سيارات 

حاكـم :- لا تغلط على الناس عيب

رائـف :- هذول مو اوادم حيوانات شوف شلون يمشون بالرون 

-- سوق وانتَ ساكت 

درت وجهي هاي بغداد وصلت الها 

جنت عايشة هنا كبرت وربيت بيها صار سنتين من مشيت للچبايش بس ما جنهن سنتين عبالك عمر طويل غيرتني الچبايش من ساسي الراسي تطبعت بيها وصرت حالي حال اهلها باللبس والحچي اليشوفني ويشوف حالي يگول بعمرها ما شافت الحضر وخلصت حياتها كلها بالريف 

بقينا بالساعه نمشي ويا الازدحامات يله وصلنا البيتهم عين الحارة باردة البيت حلوة ويرد الروح من برى بس ما ادري من بطنه شني حلو مر الله اعلم عاشر وشوف يگلبي لا تحكم على المظاهـر

نزل الولد دگ الباب ورجع صعد شوية

و انفتح الباب على وسعه طبب السيارة بنص البيت شفت ابنية لابسه برموده زيتونية واگفه وره الباب ، صفنت متفاجأة علينا و عيونها طبت بنص السيارة تباوع عليه وعلى أبوها 

نزل الزلمه و هي اجت تركض حظنتها باسها براسها و حظنها بـ اثنين اديه وانا فتحت الباب ونزلت باوعتله مستغربه وردت تگول الابوها 

هالـه :- باباتي حبيبي مشتاقتلك 

حـاكم :- روحي بابا اني مشتاقلكم شلونج

هاله :- زينه منو هاي الابنية

حچت هيج وتباوعلي رد الزلمه ضحك ويگلها 

-- هاي يُـمـن بنت عمج هادي

هاله :- اهلاً وسهلاً حبيبتي 

يُـمـن :- هلا بيج حبيبة 

أبتسمت و تباوع الابوها و اخوها النزل وتعدانا و طب للبيت شايل الدنيا على راسه ركضت وره لزمته من ايده وتگله

--  ليشش متسلممم ممشاقلي  

رائـف :- مالي خلگج وخري من عندي 

جر ايده منها وطب والابنية ظلت بصدمتها 

اخذني الزلمة من ايدي و طببني للبيت لگينا ابنية ثانيـة شابـة و ولد اضن اصغر من رائـف العريس و امهم تصير بگـد عمتي كلثوم بس شني هي مره وعمتي مره تهي بهي يا حلاتها ويا لبسها ويا ريحتها لابسـه دشداشة كلها تطريز و شايله شعرها كباية و الشعر اسود وبيه خصل من الشيب والادين والرگبه متلتله بالذهب 

الكل يباوع عليه بستغراب ياهو انا وشعدي جاية عليهم الزلـمه حطني بنص الهول مالهم و گال بصوت عالي و واضح 

هاي يُـمـن بنت المرحوم هادي ابن عمي

و زوجة رائـف وچنه هذا البيت 

يُـمـن :- المره سمعت انا مرت ابنها بساع دگت على صدرها و تگول

بديعـة :- عزاا العززاني حاكـم شنو هذا الحچي لا تشاقى

حاكـم :- بديعـة هاي يُـمـن مرت رائـف عينج عليها و حسبيها حسبه البنات

بديعـة :- شنو هذا الحچي بيكفكم تقررون و اني رجل كرسي بالبيت

حاكـم :- الولد اخذ قرار وانتهى الموضوع

رائـف :- يا قرار الاخذته يابة يا قرار مو صدگت وتريدني اصدگ وياك گتلك قبل وارجع اعيدها هسه گدامها وگدام الكل اني لا اريدها ولا متقبلها من الاساس من كل عقلك جايبلي وحده من الچبايـش ترى اني سكتت هناك احتراماً الك و صار اتفاق بيني وبينك ما احسبها مره لو اعرف اموت لا تفر الموضوع عليه

بديعـة :- شنو هذااا اللعب اذا مرايدهااا شكووو جايبها وجاااي

رائـف :- موو اني ابوي الجابها ابوي الورطني بيهااا خلي حير بيها 

-- لكم تردون تجلطوني شنووو هاي الحزوره وين عايشين احنه جايبين وحده مدري منين ما منين وتگولون عقدنا عليها انوب تتعاركون بيناتكم واحد يشمرها براس الثاني تخبلتوا

حاكـم :- هاله بابا اخذي يُمــن بغرفتكم ترتاح تعبانة من الطريـق 

اجت هاله عليه اخذتني وهي مصدومة بس ترمش ما تحچي صعدتني فوط الغرفتهن هي واختها طبيت للغرفه و انا يا دمعه صبي ولا تنشفين

جوه الدنيا احتركت و صوت عمي يصيح ويغلط عليهم وصوت المره لعبت جوله والولد يصيح بصفحة والزلمه بصفحه

و المره بصفحه احتركت الدنيا حرك وين يلا سكتوا ورها صارت رگعه بالباب قويه انا فوگ وسمعتها انوبينه صوت السيارة اشتغلت اضن الولد طلع من البيت مختاض

گعدت بالگاع و ايدي على خدي دموعي تطيح وارد امسحها والابنية واگفه بلايه حس بس تباوع مصدومة انفتح الباب وطبت اختهم الثانيـة نفس الشي ما تحچي گعدت على جربايتها و تباوع عليه وين ضلت على هذا الحال اخر شي گالت

غـادة :- لااا بعد ما اگدر اتحمل فهميني الموضوع شلون هيج تزوجتوا وشلون اهلج انطوج بدون مراسيم زواج و اخوية ميريدج و ابوية الخاطبج عفيه ترى دخت فهميني

رفعت راسي باوعتلها لابسه دشداشه گصيفه و ضافره شعرها گصيبه صفح 

و تشبه امها مرتبة و حلوة

يُـمـن :- علمي من علمج لا ادري ولا فاهمه السالفه جدتي وعمي اجوا گالوا راح تعرسين وترحين ويا رجلج ولبسوني 

و جابوني

غـادة :- هاي شنو وين اكو هيج 

هاله :- لعد امج ابوج وينهم

يُـمـن :- ابوي ميت و امي ما ادري عنها عافتني وهجت 

وحده باوعت للثانية وسكتن مني بعد ما سألن شوية و نسمع واحد يصيح غـاااادة هاااله ويننننجن لحگواا اميييي راح تموت

فزن البنات يركضن نزلن من الدرج وانا نزلت اركض وراهن لگينا المره طايحة بالگاع و ابنها الصغير حاطها بحظنه 

و يمسح على صدرها وهي ما تحچي بس مغمضه و عمي المسكين انخبص بيها يروح منا ويجي منا و البنات بقن يبچن على أمهن

واثــق :- خابرو رائـف يجي بسرعه لكم امي راح تموت  

گامت هاله تركض خابرت عليه ما يجاوب كتبتله رساله امي تخربطت تعال بس وصلت الرساله خابر يسأل مخبوص وهي ترد عليه تبچي عشر دقايق همّ حايرين بيها يغسلون بوجهها و يبوسون بيها و هي مغمضه لحد ما طب رائـف يركض ويصيح وينها شبيهااا دنگ عليها و يبوس بيدها ويگول

-- يوم حبيبتي شبيج شيوجعج 

بعده يحچي وياها وطب واحد يمشي وراه شو هذا جفت لا احم ولا دستور والبنات بلايه حجابات و هدومهن گصايف ياهو هذا اخوهم الثالث لو شني السالفه چا شگد همَ تقرب عليها و لزم ايدها و يگول 

بـُـرهـان :- خاله خاله تسمعيني 

هيَ من سمعت صوته فتحت عيونها وتگول 

هواء هواء اريد هواء 

فزوا يتراكضون يعلون بالبنكه و يفتحون بالبيبان وهي تصيح هواء اختنگت 

بُـرهـان :- بس وخروا منها ما بيها شي 

رائـف :- وجهها اصفر صاير 

حاكم :- ساعدنها تروح للغرفة يله بناتي 

گومنها البنات للغرفه و الولد راحوا وراها متخبلين على امهم والولد الثالث بقى واگف ويباوع على عمي وضحك  و هز براسه وعمي وگعد على الكرسي و يگول 

-- شفت خالتك و سوالفها ما تكبر لا والله 

بُـرهـان :- تدلل عليكم 

رجع باوعلي وابتسم و گال

-- هاي عروستنا مـو  

-- هاي يُمـن الحلوة الحبابة اني متأكد عقلها اكبر منهم كلهم وراح تحتويهم كلهم بس تحتاج شوية صبر مو هيج عمـو 

-- آن شاءالله 

حچيت هيج و افتريت وصعدت فوك ما طبيت الغرفـه البنات بقيت گاعده يم الباب استحي اطب وحدي غرفتهن بيها خصوصياتهن زحمه 

وين ضليت گاعدة هاي الگعدة وخدي لحد ما صعد رائــف لگاني مبسطه بالگاع بسرعه گمت وگفت باوعلي من فوك ليجوه و يگول 

-- شوفي يا بنت الناس عقدت عليج وجبتج هنا بس لا انتِ زوجتي ولا اني زوجج كل  واحد بينا خليه بعيد عن الثاني ما اريد أأذيج بكلمة ولا بتصرف خليج بعيدة عليه وكفيني شرج وتكفي شي ابوي ورطني بيج وجبتج هنا لان عمامج ناوين يكتلونج يعني سويت فضل عليج ونقذت حياتج هسه الاريده منج توگف هاي الزينه بعينج وتحترمين نفسج و تبتعدين عني ولا اني بيج ولا انتِ بيه لحد ما اشوف شلون احل الموضوع واخلص منج واخلصج منهم فهمتي لو لا فهم ولا علم 

ما جاوبت نزلت راسي للگاع وهو فتح وحده من الغرف و طب بيها وسد الباب وره حيل صعدن البنات لگني واگفه غـادة فاتت للغرفة بدون ما تحچي وياي بس هاله طببتني وبقت تحچي عليه شلون واگفه هنا و ما طابه للغرفـة مرتاحه طببتني و تگول گعدي ارتاحي 

گعدت بالگاع وحايرة بزماني عود صدگ هذا الصار و صرت ضحية امي و انكسر ظهري بهذا العرس الزلمه ما يريدني و امه ما تريدني واهلي ما يردوني وين امشي بروحـي يربي وين يريد بيه زمانـي 

ضليت گاعدة وايدي على خدي و گلبي واج نار وحسره ها كبرها بصدري البنات كل وحده كاضه دفترها وتقرأ وانه گاعده گبالهن و صافنه شوية وگامت غـادة نزلت 

وراها صاحت على هاله مشت هاله تشوف اختها و انا بعدني على گعدتي ربع ساعـه وردت هاله صعدت وتگول

-- امـي تريدج 

گمت وياها نزلت الغرفة امهم اول ما طبيت باوعتلي ما عجبتها و روحها لعبانه مني وگالت 

بديـعة :- اسمج يُمـن 

-- اي 

-- شگد عمرج 

-- يو ١٤ يو ١٥ 

-- حزوره هيَ 

-- ما ادري ما اعرف 

-- اكيد اميه لا تقرين ولا تكتبين 

-- لا اعرف اقرأ واكتب 

-- شنو طالبة 

-- لا خلصت السادس أبتدائي و بطلت 

-- شوفـي عيوني اللي صار غصب عني وعن ابني وحاكم داك صدره الاهلج وماخذج منهم حتى لا يقتلونج و اني مو ظالمة حتى اقبل ابنية بعمرج تنقتل بدون سبب بس بنفس الوقت ما اقبل بوحده مثلج زوجة الابني وجنه بيتي راح تبقين هنا لحد ميرتب ابو رائـف الموضوع ويا اهلج و يرجعج هسه الاريده منج تگعدين بـ احترام حتى نحترمج حدودج ما تتجاوزيها و الخطوط الحمر ما تتعديها بناتي متتقربين منهن ما احـب يتطبعن بطبعج و ابني لا تحاولين وياه لان محد يتأذى غيرج عوفيني ساكته عنج و متحمله وجودج بيتي لحـد ما تنتهي هاي المهزله مفهوم 

الچان الحايط يتحرك و يحچي تحركت وحچيت بقيت منزله راسي و الذل ذبحتي ذبح تمنيت اشوف امي هسه و اگلها ليش هيج سويتي بحالي ليش هيج ضيعتني ليش 

بديعــة :- البنات بدأ دوامهم و ميگدرون يشتغلون بعد وانـي تعبان شغل البيت منا وجاي عليج ماشي 

هزيت راسي بله ما ارد 

بديعـة :- الاكل متوصلين يمه اني اطبخ انتِ نظفي و غسلي مواعين وبس

نفس الشي ما ارد بس اهز براسي 

-- يله روحي ويا هاله الغرفتج وممنوع كلمة وحده تطلع برى هاي الغرفة هذا الكلام يبقى بيني وبينج 

طلعت من يمها لگيت هاله واگف باب الغرفه متانيتني بس شافتني گالت 

-- شنو رادت ماما من عندج 

-- گالت خل هاله تاخذج الغرفتج 

-- يا غرفـة 

-- ما ادري هيَ گالت

-- دقيقة اشوفها 

راحت طبت الامها شوية وردت طلعت گالت تعاي رحت وراها اكو بنهاية البيت من صفحة الدرج غرفـة مقفوله فتحتها وطبينا بيها الغرفـه بيها خانات كبار المنيوم وبرده معلگه و الباقي فارغ 

هاله :- هاي الغرفه بيها المفارش والغطوات وملابسنا الشتائية ضامينهن بهذول الخانات و منا وجاي حتنامين بيها يعني صارت غرفتج لان ماكو غيرها فوك بس مالتنا والولد كل واحد غرفته وجوه بس هاي وغرفه بابا وماما والأستقبال 

ما احچي ساكته وبس اباوع رجعت ابتسمت مقهورة وتگـول

-- لا تضوجين يا عمري اني اشوفها افضلج تگعدين هنا وحدج تاخذين راحتج اكثر لان بغرفتنا جنتي متضايقه صح هي بيها هذول الخانات الكبار بس والله نظيفه ومرتبه شوفي حتى بردتها بين فتره وفتره نبدل

-- لا ما ضايجة هيج احسن انعم الله عليكم حلوة الغرفه نعمه من الله 

-- حبيبتي الله ينعم عليج ، باعي هذول الخانات يمج طلعي المفرش اللي يعجبج وفرشي ونامي عليه و اخذي راحتج نزعي حجابج شعرج هيج يتعب من الحجاب من اجيتي الهسه لابسته واني حروح ويا غادة نحضر العشة واي شي تحتاجين بس صيحي عليه 

-- ريتج سالمه 

راحت هاله وسدت الباب وراها وانا فتحت الخانات ادور بيها باوعت الفراشات مطبگه و المخاد و لحف ريحتهن ترد الروح ما ادري بيمن غاسلينهن اخذت دوشك

و مخده وجرجف فرشتهن بالگاع و ذبيت ربطتي و تمددت جسمي كله يون عليه وراسي چن زفه بيه الله لا ينطيج يا سعدية ولا يخليك يا غـازي الله لا يسامحج يا يمه 

شويـة واجت هالـه جابت صينية بيها عشة وگعدت وياي تاكل وتگول 

-- بابا گال اكيد تخجل تطلع اليوم فـ جبت العشة واجيت اتعشه وياج 

اكلنا انا وياها وطلعت وياها غسلت ورجعت تمددت و حطيت اديه على عيوني وغمضت متعوبه وگلبي هلگد شايل قهـر بساع رحت بسابع نومه ما گعدت غير وجه الصبح صوت المؤمن يقرأ قران ضليت گاعده واسمعه و روحي تفرفح اريد اصلي بس شلون اطلع استحي خاف گاعدين و ما يرضون اطلع 

جبتها منا رديتها منا ما گدرت بعد بس صاح الله اكبر فزيت من مكاني واگول الله اكبر الله اكبر حي على الصلاة حي على الصلاة اللهم صل على محمد وال محمد 

حطيت ربطتي على راسي وطلعت محد گاعد الضوء طافي تذب الابره تسمع صوتها مشيت على كيفي للحمام غسلت وتوضيت و طلعت صار بوجهي عمي حاكـم بس شافني فز وراها ضحك وگـال

حاكـم :- صباح الخيـر

يمـن :- صباح العافية

-- ليش گاعدة هيج وقت رجعي نامي حبيبتي الدنيا ظلمة هنا ميگعدون هيج وقت

-- گعدت اصلي 

-- هاا الله يتقبل 

-- چا ما يگعدون الولد والبنات للصلاة 

هز راسـه و يگـول 

-- من جنت صغير ابوي الله يرحمة يگعدنا الصلاة الصبح والما يگعد يطگه ويگله گوم ولك لا يبول بليس بـ اذنك ومن هذاك اليوم الهذا اليوم اني اگعد الصلاة الصبح اخاف من بليس اله عائلتي لا فادت بوله بليس لا فادت غضب الله جربت كل الطرق وياهم وما يگعدون خليهم هم وربهم اني العليَ نصحت وحچيت و كل لشه تتعلگ من كراعها ، روحي صلي بابا ورجعي كملي نومتج لا تبقين گاعدة 

رحت للغرفـه دورت على سجادة و تربة ماكو طلعت لگيته ماد سجادته بس بعده ما مصلي 

يمـن :- عمي 

حاكـم :- ها حبيبتي 

-- اريد سجادة وتربة

-- هاي الخانه تلگين بيها اخذيلج سجادة وتربة وقران بدل ما ضالات مهجورات 

رحت للخانه مال التفزيون فتحتها طلعت السجادة والتربة والقران بسته وحطيته على راسي و مشيت الغرفتي مديت سجادتي وصليت 

انه صدگ اصلي واصوم ولابسه ربطه

و استحي و اخاف ربي بس ديني مو كامل صلاتي مو مضبوطه تجيني ساعات اتهاون بيها واصليها متأخره وساعات انساها

و تروح عليه و ثاني يوم اصليها قضاء ما في الذمه بس اليوم من مديت سجادتي

و صليت و وره ما خلصت صلاتي سجدت الربي وبچيت اشكي حالي ضليت ساجده وابچي واحچي ويا الخلقني واشيكله ضعف حالي و ظلم الناس الي حچيت اليوجعني اله بلايه ما استحي حچيت بلايه ما اتردد حچيت بلايه ما احس ثكلت عليه احسيته يسمعني و حسيت براحه حسيت بـ امان الغرفه هاي ما جنها خاليه لا حسيته موجود بيها و يسمع شكوتي ويهون عليه 

بـ أمانه وقربة مني

رفعت راسي واگول

-- يوم لا ينفع مالاً ولا بنون الا من اتى الله بقلب سليـم ياربي وانا بالدنيا محد نفعني لا اب ولا ام ولا عم ولا اهل چا بالاخرة شلون ياهو ينفعني ياهو الياخذ بيدي ربي وسيدي ومؤلاي انخلقت وحيده و اموت وحيده وبين وحدة الدنيا وحدة الأخر انتَ القريب المجيب ثبتني على الهداية والصلاح

و قربني منك و حببني بالتحبه و التشوفه صح ربي وسيدي ومؤلاي لا تهد ايدي انتَ السند والعون والقوي وانا اوعدك ما اعوفك ولا اتبعد عنك بس لا تبعدني عنك وخليني قريبة منك بكل وكت 

دنكت حبيت التربـة و گمت لميت سجادتي و حطيتها على الشباك شفت الشباك يطلع على الحديقة الخلفية ضليت رافعه البرده وفاتحه الشباك واباوع الحديقة صغيرة تصير بظهر البيت بيها كراسي ثلاثه و طبله صغيرة ونركيلة ملفوفه بصف الكراسي 

ضليت گاعدة واباوع فوك الساعتين كل شي ما اسوي بس صافنه على الزرع شلون يتحرك من الهواء اخر شي سمعت صوتهم اضن يردون يرحون الدواماتهم 

ساعه وهم يتحركون ويسولفون وراها صار هدوء بالبيت واجاني صوت امهم واگفه وره الباب و تصيح عليه تريدني اطلع لبست ربطتي وطلعت 

بديعـة :- يلا عيني صح النوم عدنا شغل روحي تريگي حتى تخلصين شغلج 

عافتني ومشت وانا رحت للمطبخ الاكل على الميز والجاي بعده حار صبيت جاي

و گعدت اكل الصمون الحار يرد الروح والاجبان شتشتهين يا روحي اكلت اكل مال ملاهيك ميته من الجوع وبن لاگيه هيج اكل عد سعدية لو عد غازي اكلت

و شربت جاي وگمت لميت الاكل وغسلت المواعين و طبيت للهول نظفته كله ومسحت التخم والبلازمه و رجعت للحولي نفس الشي وهي گاعده وبيدها الريموت بس عينه بالتفزيون وعين عليه شلون اشتغل 

بس كملت الحولي گالت

-- نظفي الفوك وياج بس لا تفوتين للغرف

ما گلت باطل شلت وصلتي و سطلي

و المعطرات اشكال الوان وصعدت نظفت الصاله والممر و مسحت التخم الفوك

و البيبان مال الغرف والحمام و نزلت على الدرج 

كملت الجوه و طلعت للبره غسلت الحوش و رشيت الزرع وغسلت الكراسي مال الحديقة الخلفية وشلت النركيلة غسلتها ورجعتها بمكانها 

احس اديه تگطعت و ظهري طگ بالنص من التعب، طلعت هيَ وگفت بـباب المطبخ و صاحت عليه باوعت الها الهث من التعب 

بديعـة :- كافي بعد عاشت ايدج فوتي ارتاحي 

لفيت الصوندة و رجعتها المكانها وطبيت 

بديعـة :- فوتي سبحي و نامي بعد ما عدنا شي

طبيت الغرفتي اخذت دشداشتي المطگعه 

و هدومي الداخليه مخيطتهن الف خياط 

و مشيت للحمام جنت توني غاسلته

و ريحته ترد الروح واشكال الغسولات والشامبوات معلگات فتحت الدوش

و طبيت جوى المي احس التعب يطيح

 ويا المي غسلت راسي بالشامبو وجسمي بالغسول وحجرت رجليه بالمحجارة اول مره احس بروحي نظيفـه وسابحه سبحه صحيحه ساعه گامله جوه المي اغسل بروحي ما مصدگه بالدوش والشامبوات والغسولات التخبل لو ما عيب من المره چا ضليت للعصر بالحمام بس استحيت وطلعت اول ما طلعت 

صاحت هذا مشط على الميز اخذيه الج  اخذت المشط وطبيت الغرفتي مشطت 

و لميت شعري و تمددت بفراشي شفت روحي انه بخير وين صرت اليوم وين جنت امس خليه لا يريدني ولا يقربني انا هم ما اريد العرس بس كون اضل عدهم ميخالف اشتغل واخدم احلل لگمتي واسكتهم عني المهم هسه انا بخير إذا بقت هيج حياتي 

نعمه وبركة شو البيت يخبل والاكل يخبل و عندي غرفه انام بيها واگعد بيها احسن الف مره لا احسن بمليون مره من ضيم سعـدية والجوع والظلم مال غازي

و الفراره مال البيع بالشوارع 

غفيت وانا اردد الحمدلله الحمدلله ساعه و سمعتها تصيح عليه گمت طلعت والربطه فوك راسي لگيتها تسوي بالزلاطه 

بديـعة :- ما عندج غير هاي الملابس 

يُــمـن :- لا عندي  

-- هم هيج خراگين لو مرتبات 

سكتت ما رديت من شافتني ساكته گـالت 

-- بسيطه عود نشوفلج ملابس جديدة المهم هسه حظري المواعين الاولاد على جيه 

رحت حظرت المواعين والخواشيك

و رجعت توضيت وصليت الظهر و طلعت للمطبخ لگيتها رايحه الغرفتها بقيت گاعده على الكرسي متانيتها اندگ الباب گمت فتحته طبت هاله 

هاله :- هلاوو

يُـمـن :- هلا بيج الله يساعدج 

-- شنو الغده ميته جوع

--  والله ما ادري امج طبخت  

-- گولي عمه خاله لا تكولين امج ترى ماما من تسمع هيج تزعل عليج 

حچت هيج وطبت بعدني ما ساده الباب

و طب وراها واثـق  

واثـق :- شنو الغده 

ضحكت شمالهم جاين مجاعه 

واثـق :- ليش تضحكين اكو شي يضحك

-- لا بس هاله هم طبت تسأل جوعانه وضحكت العفو مو عليك 

ما جاوبني عافني و طب فشلت من روحي هسه انا شبيه اضحك بوجهه اعرفه يعرفني حاجيلي نكته حتى فتحت حلگي شگد عيب هسه شيگول عليه 

صاحت عمتي بديعـة يُـمن شغلي النار على الاكل بين ميبدلون شغلت النار و گعدت اندگ هورن مال سيارة طلع واثـق فتح الباب طبت للبيت سيارة رائف هو بسوق وياه ابنية گاعدة بالصدر 

واثـق من شافها ضحك و دار وجهه يباوعلي مرتبك و هي نزلت باسته و اجت تمشي و رائـف بمشي وراها  و وجهه مخطوف وصلت يمي صفنت وتباوع للولد وراها گالت 

أديان :- هلاو 

يُـمـن :- هلا بيج 

طبت للبيت و عيونها عليه وعليهم وهمَ يمشون وراها وجوهم صفر شني السالفه ما ادري رحت وراهم شفت عمتي فرحت بجيتها و فتحت اديها الها و الابنية حظنتها 

و وحده تبوس بالثانيـة گعدت قريبة عليها وعمتي فرحانه بيها والابنية باوعت عليه

و تگول خاله منو هاي الابنية هنا عمتي تذكرني يمكن جانت ناسيتني المره صارت صفره و حارت بروحها بقت تبلعم وين يله گالت الها 

-- هاي بنت ابن عم عمج حاكـم 

-- ها اهلاً وسهلاً شعجب جايتكم اشو مگلت يمكم خطار 

رائـف :- راح من بالي 

حچى هيج و راح گعد و واثـق گعد بصفه نزلت هاله من فوك مبدله ملابسها بس شافتها ردت فعلها مثل الباقين خافت وتوترت گامت الها باستها وحظنتها وهاله تردلها بس عيونها عليه 

بديعـة :- يمـن صبي الغده 

واثـق :- لا ننتظر ابوي 

-- ابوك يتأخر اتصل و گال تغدوا

أديان :- لعد وين غادة 

بديعـة :- بين منرتب الغده هي تجي يله يُمـن استعجلي 

حچت هيج و أشرتلي براسها رحت للمطبخ و هيَ اجت وراي صارت قريبة مني وهمست بهدوء لا واحد يسمعها

بديعـة :- ممنوع تفتحين موضوع مهرج على رائـف گدام أديان مو بس أديان اي مخلوق خارج عائلتنا ميعرف بالموضوع هذا فهمتي 

هزيت راسي بدون ما اجاوب و درت اصب بالتمن وهي راحت صبت المركة و صاحت عليهم گعدوا على الميز يتغدون و انا رجعت للغرفة ما گعدت وياهم اسمع ضحكهم وسوالفهم وغادة اجت وياهم ساعه و طلعت بعدهم گاعدين بالصاله يشربون جاي والمواعين بعدهي بمكانها على الميز كفيتهن وغسلتهن و صبيت تمن وفوگاه مرگـه و گعدت اكل بالمطبخ طلع هـوَ بيده نقاله يخابر ومن كمل مخابره ورجع جنت بعدني بمكاني اكل

و گف يمي و گال 

-- أديان بنت خالتي و حبيبتي و ما بقي شي و اخطبها ان شاءالله موضوعج مينفتح گدامها و اذا سألتج شعندج هنا گولي مريضة وعدنا مشاكل عائليه بالبيت

و دزوني هنا لحد ما تنحل المشاكل لان يخافون عليه مفهوم 

ما جاوبته مدنگه والخاشوكه بيدي رجع گال مو احچي وياج سمعتي 

رفعت راسي عليه جان مدنك عليه ويحچي بهمس ما يريدها تسمع صارت عيني بعينه وهاي اول مره عيوني هيج تصير بعيونه 

اباوعله و يباوعلي بدون ما ارد بقيت اباوعله و عيوني تجمع بيها الدمع بلعت ريگي ما اريد ابچي لا عليمن ابچي انا قوية ودمعتي منا وجاي غالية ما اطيح برخص رديت 

يُـمـن :- ليش هو اكو شي ثاني غير هذا الحچي صدك اهلي عدهم مشاكل عائلية وبس تخلص ارجع لا تشيل هم غير هيج ما راح احچي 

دار وجهه من عندي باوع للصاله ورجع يباوعلي و يگـول 

-- و شوكت ترجعين 

-- من اطلگني

-- اذا طلگتج يكتلونج

-- الله واحد والعمر واحد والمكتوبلي لا انا ولا انتَ نغيره 

ما جاوبني عافني وراح يمهم رجعت كملت اكلي و شلت ماعوني غسلته و رجعت اريد اروح للغرفـه صاحت عليه حبيبته

-- يُـمـن تعالي گعدي نشوفج نتعرف عليج 

-- عذريني حبيبة مريضة و ما اگدر اگعد 

-- سلامتج شبيج 

-- مرض ماله دوه اسم الله عليج 

عفتها و رحت الغرفتي قفلت الباب عليه 

بعد ما طلعت لليل وهيَ يمهم سمعت عمي اجى و سودة عليه سأل عليه اول ما طب گالوله نايمة أذن المغرب فتحت الباب وطلعت لگيت الولد نفسه الاجه امس

و بعد وياه مره تطلع اكبر من عمتي بديعـة بس تشبها گلت السلام عليكم ردو السلام تعديهم ومشيت للحمام توضيت و رجعت 

للغرفـه صليت و كملت و گعدت استغفر 

دگت الباب هاله و طبت 

هاله :- يُـمـن خاله لميعـة و ابنها ب وبُـرهان حيبقون للعشاء و أديان همات هنا وخاله سميعة ام أديان جايه بالطريق

 فـ الولد قررو يسون مشاوي برى بالحديقة و ماما تگول خل تجي تساعد

طبگت سجادتي و گمت واگول صار 

هاله :- بس بالاول اخذي هذول ماما دزتهم 

يُـمـن :- شني هذول

-- ملابس 

-- منين 

-- من عندي 

حچت وهي مستحيه مني وتگول

-- باعي والله نظيفات وجديدات اختاريتلج احلى شي عندي والله ماما مو قصدها شي بس تحب تشوفج اطلعين حلوة هي ناوية تشتريلج باجر بس اهلها اجوا اليوم قبل لا تروح للسوك ودزتلج هذول 

-- لا تبررين حبيبة انا ما اكش منج ولا اكش من اي بشر گلبه نظيف مثل گلبج انتِ اختي 

أبتسمت و اجت باستني و تگول

-- والنبي حبيتج من اول ما شفتج انتِ كلش حبابة

-- انا هم احبج والله حسبتج اختي

-- تمام لعد بدلي وتعالي وها ما دامني اختج اريد اطلب منج طلب 

-- عيوني الج

-- تغيرين لفت الحجاب هذي اني من يمي اختنكت 

-- هههه شلون الفه هي ربطه ما تنلف غير لفه

-- حجيبلج شال واجي

طلعت تركض و انا بدلت هدومي بهدومها جايبتلي بجامة و القميص مالها طويل حد وحد ويا الركبة لونه سمائي فاتح وبيه ضربات نيليه طبت تضحك بيدها حجاب 

هاله :- جبتلج اكثر حجاب احبه 

اخذته منها و لبسته ما رضت على لفتي هي لفته الي من جديد و طلعنا اني وياها لگيتهم گاعدين بالصاله عمي بس شافني ابتسم فرحان بيه و عمتي هزت راسها بالقبول جني عجبتها و المره خالتهم تباوعلي والضحكة تارسه وجهها 

صاحلي عمي رحت عليه بسته براسه

و گعدت يمـه 

هاله :- شوف بابا شلون طالعة كيكه تجنن والنبي  

حاكم :- ههه هي كيكه من زمان 

واثـق :- كيك صنع رباني لا صالون ولا حمره وكحله 

غـادة :- شقصدك ولك 

واثـق :- ليش ضجتي منو يمج مو هاي أديان تقبلت الموضوع بروح رياضية 

أديان :- هههه ايااا حقيررر 

رائـف :- يلا جهزولنا الاغراض حتى نشوي 

حچه هيج وگام گالت عمتي

بديعـة :- يمـن قطعي اللحم والمعلاك بالعجل 

گمت للمطبخ جايبين لحم ومعلاك خير من الله كصصته و ملحته و طلعت حظرت المنقله والفحم اندل مكانهن الصبح من نظفت لگيتهن بالحديقة الخلفيـه شغلت المنقلـه وشيشت اللحم و المعلاك طلعوا لگوني محظره كل شيء و واكفه متانيه النار تخف حتى اشوي 

واثـق :- يابة شلون أبنية معدله شكراً تعباج 

رائـف :- جيب الكراسي من يمك  

بعده واثـق هسه دار يجيب الكراسي

و جفتت علينا كومه ناس ام أديان و اخت بُـرهـان و بعد ولد اثنين شباب اخوان أديان وابوها وابو بُـرهـان والبيت انكلب كلاب 

فرشوا بالحديقة والتموا البنات بصفحة والنسوان الاكبار بصفحة والزلم بصفحة والشباب يشون و الضحك والسوالف بكل مكان حبيت الاجواء و غيرت من نفسيتي شويـة بس ما شاركتهم بشي ولا حچيت ويا احد ولا اختلطت ويا احد گعدت بالزواية البعيدة واباوع عليهم 

بس اكو واحد من أخوان أديان ما شال عيونه مني وين ما اروح يباوعلي وكل ما ارفع راسي الگاه صافن عليه كلش ضوجني بس سكتت گلت اضن هم عادي عدهم 

و مالهم قصد بيها لان بناتهم ضحك وسوالف وبلايه حجابات گاعدات يمهم 

فرشو سفره طويله و رتبنا الاكل بيها والمقبلات والصمون والببسي وهذيج الگعده الحلوة گـالت عمتي  

لميـعـه :- شنو شـصار على هاي الأبنية المشيتوا عليها 

سميعـة :- والله ما عجبته يگول مو حلوة

واثـق :- صدگ تشبه رجليـن نهلـه المخبلـه

سميعـة :- بعد هذا نـؤفل لازم يحط عيب لو ملكه جمال لازم يطلع بيها شي وما تعجبه

رائـف :- وانتَ ويـن شفت رجليها وحكمت

نـؤفل :- غير لابسه بجامه و رجليها جنهن اصبعي الصغير 

بديعـة :- والله اني اگول انشوفلك وحده من الاقارب افضل ما تروح تجيب غريبة عاد من عدنا وبينا نعرفها وتعرفنا هذا افضل حل 

نـؤفل :- بصراحه انـي يمكن لگيت العروس وقتنعت بيها هههه 

بُـرهـان :- يا صلاة محمد اي بله ومنو هاي سعيدة الحظ اللي اقتنع بيها الأستاذ نؤفل من بعـد كل هذا البحـث 

نؤفل :- هههه شو خجلت 

كلهم ضحكوا عليه هو يصير اخو أديان الجبير وأبن سميعـة خالـه رائـف ، رجعوا سكتوا وره شويـة گـال 

نـؤفل :- اگول عمووو إذا اخطب منك مره تنطيني 

غـادة :- ايععع بس لا اني 

نـؤفل :- ايع بعينج عابت الشكلج اني اكلبج 

هاله :- لا تگول اني وداعت امي انتحر 

نـؤفل :- شوف هاي الثانية مصدگه روحها 

واثـق :- بس لا اني يمااا دخيلك ربي جنت شاك بيك مو راحه من زمان وطلع شكي بمحله

كلهم ضحكوا وانا ابتسمت ونزلت راسي رجع الولد يگول 

-- لا يابة اني اريد اخطبت خطاركم يُـمـن اسمها موو 

تابعووووووني 

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الحلقه الاولى من هنا

الحلقه الثانيه من هنا

الحلقه الثالثه من هنا

الحلقه الرابعه من هنا

الحلقه الخامسه من هنا

تابعوا صفحتي علشان يوصلكم اشعار فور نزول الروايات من هنا 👇 ❤️ 👇 

صفحة روايات ومعلومات ووصفات

❤️💙🌺🌹❤️💙🌺🌹❤️💙🌺🌹❤️💙🌹🌺💙❤️