رواية زواج لدقائق معدودة الفصل الثاني بقلم الكاتبه زهرة الربيع حصريه وجديده على مدونة النجم المتوهج للروايات والمعلومات

قتلت جوزي علشان عرف باللي بيني وبين سند اخوك اديني حكيتلك اللي حصل لسه جاهز تساعد

نوح كان بيبصلها بدهشه شديده واتجمد لثواني

بس فاجأها لما ضحك بسخريه وقال..سند...اخوي ..اممم طب تمام كويس انك عرفتيني

ونادى بصوت عالي وقال..نجاتي..خلي الرجاله يدخلو ...انا خلاص سمعت منها

غنوه ارتبكت وقلقت جدا من رده وبقتش فاهمه هيرد على الرجاله يقول ايه

عند سند كان واقف قدام شروق بغضب ميتوصفش وقال...انا مش قولتلك قبل سابق تقفلي باب اوضتك من جوه... افرض كان حد غيري دخل

شروق وقفت بفزع وشدت الخمار بتاعها لبسته بسرعه وقالت بغضب

وانت تدخل اصلا ليه...وايه هو اللي افرض غيرك دخل يعني انت تشوفني كده عادي

سند قرب منها وقال بغضب بيحاول يخفيه..اه عادي..طالت او قصرت هشوفك كده واكتر لما تبقى مرتي وعلى زمتي قريب

شروق بصتلو بغضب شديد وقالت...دي احلام في دماغك لحالك يا واد عمي ...متتعبش روحك انا لو هبور واعنس وانت اخر راجل في الدنيا مهتجوزكش

سند احتدت عنيه بغضب وقال..اه...طبعا عندك اللي حباه ومريداش غيره هتبصي لسند ليه

شروق بلعت ريقها بتوتر وحرج وقالت..انت...انت قصدك ايه مفهماكش

قرب منها قوي وقال بغضب يخوف...قصدي انسيه يا شروق انسيه خالص..ده اخوي وكل اللي باقيلي ...بلاش تخسرينا بعض بسببك ..نوح مش نصيبك يا بت الناس فهمتي مش نصيبك.

قال كده وطلع بغضب ورزع الباب وراه وشروق قعدت على السرير بقلق منو ومن كلامه واتاكدت انو سمعها واترعبت جدا انو يحكي لاهلها

سند طلع وهو مش شايف قدامو وهيتجنن من اللي سمعه منها ولسه هينزل وقفت قدامو ست في اوخر الاربعين وقالت بسخريه...بردك كنت عندها...ما قولتلك اسمع كلامي وهاتلي حته من أترها لو حتى منديل وانا اشوفلك الشيخ بلال لتكون عملالك عمل بت هويده

سند نفخ بزهق وخنقه وقال...يا اما حرام عليكي مش كل ماهتقابليني هتسمي بدني ارحميني انا مطايقش نفسي

امه قالت بسخريه ....ومطايقش نفسك ليه يا ود حليمه هيه الغندوره لساتها شيفاه راجل وشيفاك رجل كنبه

سند بصلها بغضب وقال ..اما...قولتلك مطايقش كلام السعادي ...سيبيني في همي بقى معايزش ازعلك مني

قال كده ومشي من قدامها بغضب شديد

حليمه قالت بزعيق علشان تسمعه ....وجاي على نفسك ليه زعلني يا ود الحاكم مهو مبقاش ناقص الا تزعل امك عشانها يا اخرت صبري

بس سند موقفش واتجاهل كلامها اللي متعود عليه

حليمه بصت لطيفه واتنهدت بغضب وقالت...ولا تزعل روحك يا ابن بطني عمرها بت هويده ما هتغلى عليك ولا هتكون غير ليك..وبكره تقول امي قالت

حصريا بقلم...زهرة الربيع

اما تحت عند نوح كانوا الرجاله مستنيين رده وحكمه وهو اتنهد وقال... شوفو يا رجاله انا ولا مره قضيه حيرتني كده سواء في المحكمه وانا محامي ولا في مجلس عرب وانا النائب بتاعكم ..دايما كنت بعرف السبب فببقى عارف مين الظالم و مين المظلوم

حسنين بصله بضيق وقال.... تقصد ايه يا عمده

نوح حمحم وقال.... البنيه برده ما عايزاش تتكلم ...يمكن خايفه او مصدومه من اللي حصل...المهم انها ما قالتش اي حاجه

غنوه بصت له بدهشه وهو ابتسم لها بخبث وقال ...وعشان كده انا ما اقدرش احكم في حاجه معرفهاش عشان مبقاش ظالم...قدامكم حل من اثنين يا اما تسلمو الموضوع للحكومه وهما يحققوا فيه وينطقوها بمعرفتهم او...

بس قبل ما يكمل قاطعوا حسنين لما وقف وضرب عصايته في الارض بغضب وقال ....لاه يا عمده ده دم ولدي والحكومه ما هتدخلش فيه و ناس البلد تقول حسنين ما قدرش ياخذ طار ولده من حرمه وجاب لها الحكومه

نوح وقف وضرب العصايه بتاعته بنفس الطريقه وقال بغضب... ولا انا اقبل يتقال عليا اني سلمت واحده من غير ما اسمعها ولا اعرف اسبابها ..بلاش يتقال علي اقول لربنا ايه لما يسألني عن دمها... اسمع يا حسنين يا اما تهمل الموضوع للحكومه وهم يحققو فيه ولو ليك حق تاخده ...يا اما تستنى عليها لغايه ما تتكلم

غنوه كانت بتسمعوا باستغراب ومش فاهمه بيعمل ايه وحسنين قال ... يعني ايه هنستناها لحد ميته

نوح قال بسرعه.... مش كتير... نديها فرصه بس ونبرأ ذمتنا اسبوعين ثلاثه بالكثير لو ما اتكلمتش..وقتها وعد مني ليك انا اللي هسلمها لك بيدي... بس خلينا نديها فرصه تفوق من صدمتها يمكن تتكلم

حسنين قال بغضب... ماشي يا عمده ...لجل خاطرك هاستنى الاسبوعين بس ما هستناش اكتر من كده.. .. بينا يا رجاله

قال كده ومشي هو ورجالته

وحميد ابتسم بسعاده وقال بسرعه...ربنا يباركلك يا نوح بيه ربنا يعلي مراتبك

نوح قال بسرعه.... لا سيبك من مراتبي دلوك انا ما بحبش المراتب اصلا ضهري بيوجعني منها

خلينا في القابض اختك دي لو ما اتكلمتش في ظرف الاسبوعين دول هضطر اسلمها ..مهقدرش اسيب حق الراجل اكثر من كده

حميد هز راسه بسرعه وقال....انا هحاول معاها وان شاء الله تتكلم

نوح قاطعه وقال بسرعه ....لا انت ما تحاولش ولا تتعب نفسك سيبها لي هنا الاسبوعين دول وانا هظبطها وهنطقها بمعرفتي

حميد وغنوه اتسعت عينيهم بزهول وبصوا لبعض بدهشه وحميد قال بغضب مكتوم ...قصدك ايه يا عمده اسيبهالك كيف بعني ..هسيب بت صبيه هنه وسط رجال من غير اي سبب وتبيت كمان اسبوعين

نوح ابتسم بسخريه وقال...اعقل كلامك يا ود الجزار ..انت سايبها في حما نوح الحاكم ومع اهل بيته مهيش في الشارع ولا وسط كلا*ب علشان تخاف عليها

حميد قال بتوتر ...احم مقصديش جنابك بس...

قاطعو وقال....انا اللي عليا عملتو ...ويكون في معلومك حسنين ناويلها على غدر..ميغركش اللي قالو قدامنا ...واختك لو خرجت من هنه هتتقتل عيار طايش ويقولوا ما قريناش منيها..و وقتها ما هقدرش اعمل لك حاجه

غنوه قالت بسرعه وغضب ....يعملوا اللي يعملوه هي موته ولا اكتر... المرة يا تعيش بشرفها يا تموت اكرم

نوح ضحك بسخريه وقال ...شرف اه ....ايوه ما انا عارف معلش تعالي على شرفك شويه... قصدي تعالي على نفسك شويه

حميد قال بتوتر..مينفعش يا عمده كلامك ده مينفعش واصل... لو عايز تساعدنا لاقيلنا حل غير ده

نوح لسه هيرد بس جاله اتصال شاف الاسم واتنهد وقال... ثواني هرد ونكمل

ورد وقال بجديه... ايوه خير

كان صوت بنت ناعم وقالت... وحشتني يا عمده كل ده ما تكلمنيش اخص عليك

نوح حمحم وبعد عنهم وقال... كنت هكلمك اكيد بس مشغول فيه حاجه مهمه ... انتي زينه

قالت باستغراب ....زينه..زينه مين انا دولي خطيبتك انت مش مسجل رقمي ولا ايه ...اوعى تكون مش مسيف رقمي وحاطط قدامه ماي لاف وقلب احمر فيه سهم

نوح اتنهد بخنقه وقال ....اكيد مسجلك يا دولي... قصدت انت زينه يعني كويسه ...المهم سيبيني دلوك لان معايا شغل ولو عايزه حاجه مهمه قوليها

دولي قالت بسرعه... اه انا اتصلت علشان اقول لك ان انا وبابي جايين نتغدى عندكم .. اصل بابي كان عايزك في شغل وانا لقيتها حجه علشان اجي اشوفك لانك وحشتني وانت مش بتيجي ابدا

نوح اتنهد وقال.... ماشي هستناكم

وقفل معاها ورجع لحميد وغنوه وقال ...ها كنا بنقول ايه

عند سند راح على اوضته بغضب وكلام شروق بيتردد في ودانه بقى يروح ويجي في الاوضه بغضب شديد وقال...نوح برضك كل حاجه نوح معرفش لو كان مديها ريق حلو كان عملت ايه

ومسك الطفايه هيكسرها بمنتهى الغضب بس وقفتو لما قالت بسرعه ...ما تكسرهاش... دي السابعه الاسبوع ده ..بتستفيد ايه من الخساير دي

سند اتنهد بغضب وحاول يكتم غضبه ورجعها مكانها وقال.... وانتي بتعدي وراي ليه كنت بجيبهم من جيب اللي خلفك ماكسر براحتي

شروق قالت بضيق ....هو لازم تكون بتجيب من جيب اللي خلفني علشان اقول لك ان ده غلط

سند اتنهد وقال بخنقه .. واقفه عندك ليه ادخلي

شروق قالت بتوتر.... لا انا زينه كده ..انا جيت عشان اقول لك كلمتين اثنين وهمشي على طول لانه معايا مذاكره هو احم انا ...

سند قاطعها بسرعه وقال ....انا ما سمعتش حاجه مهقولش حاجه لابوكي او امك متقلقيش....مش عشانك ..ده عشاني ..علشان كرامتي مهو ما ينفعش فيما بعد لما اتجوزك يقولوا كان عارف انها عشقانه اخوه واتجوزها

بقلم ...زهرة الربيع

شروق بصتلو بغضب شديد وقالت... لو على الموضوع ده ريح بالك ..لاني قولتلك نجوم السما اقربلك

ولسه هتمشي شدها بقوه بين اديه وقال بغضب....ايه اللي مش عاجبك فيا ماتتكلمي يا بت الناس انطقي وانا واعمل اي حاجه عشانك

شروق حاولت تبعد من بين ايديه وقالت.... هملني يا سند كل واحد حر يعمل اللي هو عايزه ...هو كده من غير اسباب رايداه وخلاص

سابها ومسك الطفايه وكسرها على الارض بغضب شديد وقال بزعيق.... ما تقوليش رايداه

شروق بصتلو بدهشه وقالت... بردك كسرتها

سند قال بغضب شديد...مش احسن ما اكسر راسك

شروق قالت بانفعال....تكسر راسي اه....طب اسمع بقى انا خلقي ضيق ومش حمل ادادي واربي...ورايده اتجوز واحد متربي وعاقل وكبير وفاهم هو بيعمل ايه .. ودي حاجات مش فيك ولا عمرها هتكون فيك وخد راحتك بقى كسر باقي الاوضه على اقل من مهلك

قالت كده وطلعت بغضب وسابته واقف باصص لطيفها بزهول شديد واحتدت عينيه بغضب وقال.... شكلها امي معاها حق اكيد بيشغلها علشان كده متعلقه بيه ماشي يا نوح

وطلع من الاوضه بغضب رايح عنده ومصر يتكلم معاه

عند حليمه كانت بتبص حواليها بخوف واول ما اتاكدت ان ما فيش حد طلعت قزازه صغيره وكبتها قدام اوضه شروق وقالت.....لما اشوفك من بكره يا بت هويده كيف هتقدري تقولي لاه لولدي

بس اتجمدت مكانها لما سمعت شروق من وراها بتقول... مرت عمي انتي بتعملي ايه

اما تحت كان حميد مصر ياخد اخته ويمشي ونوح كان مصر جدا انها تفضل في البيت وقال.... انت مخك مقفل كده ليه يهمك سلامه اختك ولا كلام الناس

حميد قال.... عايز سلامه اختي واحفظ كرامتها في نفس الوقت يا عمده ...ولا عايزني احافظ عليها واسيبها ملطشه لكلام الناس ..انت اكتر واحد خابر البلد ولو واحده صبيه قاعده في بيت فيه اتنين رجاله غرب بيتقال عليها ايه

نوح اتنهد بخنقه وقال.... محناش ساكنين لحالنا معانا عمي حكيم ومرته ومرت ابوي وبت عمي... كل دول مش ماليين عينك

حميد قال بضيق ....بردك ما ينفعش ما تعودناش على كده بأي صفه تقعد هنا هقول للناس ايه بلاش الناس هقول لاهلي وناسي ايه

نوح ابتسم وقال...الناس هنقولهم انها قاعده في شغل اختك بتدرس علاج طبيعي

وبصلها من فوق لتحت وقال...وانا محتاج جلسات

حميد بصلو بضيق وهو قال بسرعه...محتاج جلسات لبت عمي شروق ..عايزينها تمشي على رجلها كيف الخلق بدل ما اهي بتعرج ومشيتها صعبه

ده اللي هتقوله للناس.... اما بالنسبه لأهلك هتروح تقولهم جناب النائب طلبها تبقى من العيله ..واي حد من العيله لازمن يبقى في بيت العيله

حميد بصلو باستغراب شديد

واتصدم بشده لما قال بثقه... هتبقى مرت اخوي سند

غنوه اتسعت عينيها بزهول وكانت هتقع من طولها وبقت تبصلو بدهشه شديده واتفاجئوا كلهم بسند قال بزهول شديد ...سند مين اللي هتبقى مرته؟؟

نوح ابتسم وبص لغنوه بمكر شديد وقال ...اها حتى العريس جيه على ذكره ..واللي ياجي على زكره تبقى عروسته شاغله فكره....... نقرا الفاتحه وقافي كده ولا نشرب الشربات الأول وووووو

تابعووووني

بداية الروايه من هنا

رواية وتبقي لي كامله من هنا

رواية كبرياء صعيدي كامله من هنا

رواية انكسار امرأه كامله من هنا

رواية عشق بلا رحمه كامله من هنا

رواية زواج لدقائق معدودة كامله من هنا

رواية بسمه موجوعه كامله من هنا

رواية معشوقتي الصغيره كامله من هنا

رواية طلاق بلا تبرير كامله من هنا

رواية شهد حياتي كامله من هنا

رواية العاصفه كامله من هنا