رواية صراع القاسم البارت الحادي والعشرون حتى البارت الخامس والعشرين بقلم الكاتبه سلوي عوض حصريه وجديده
ناديه: خلاص بقا يا اخويا مراتك وبنتك رجعولنا، احنا المفروض نعمل فرح.
دهب: انا عايزه امشي.
عصام: يعني ايه تمشي مش فاهم؟
دهب: انا تعبت، عيشت كل حياتي ف كدبه كبيره، انا مش عايزه اقعد هنا، انا همشي لوحدي مش عايزاكم ف حياتي، انا بكرهكم كلكم، ابعدو عني.
لتسقط دهب مغشيا عليها
ليلي: بتي! دهب جومي يا بتي وهنمشو من البلد ديه كلها، هاخدك وهنروحو بعيد ومحدش هيعرف طريجنا، بس جومي.
عصام: هاتي اي حاجه نفوقها بيها يا ناديه.
حمزه: لا يا خالي، انا هشيلها اطلعها فوق، هيا حاليا ف صراع واللي حصلها مش سهل علي اي حد.
قاسم: وانا كمان من رءيك عصام، امري لله طلعها فوق يا ابني.
ثم يتحدث الي ليلي
قاسم: عاجبك كده؟ لو كنتي ساءلتيني كنت هقولك كل حاجه.
ليلي: سامحني يا عصام بس انا عايزه بنتي ترجع زي الاول.
قاسم: اسمعي يا ست ليلي، انا جايز ماليش حج ادخل أو اتكلم، بس هجولك انك غلطانه من اول الحكايه لاءخرها. كيف هانت عليكي بتك تشغيلها خدامه؟ عشان ايه؟ عشان الفلوس والورث؟ طاب ما الاحسن كتي ودتيها لابوها، كانت هتعيش عيشه زينه. لكن اجول ايه؟ البنيه صغيره علي كل اللي جرالها، وعجلها هيتحمل ايه وله ايه؟
 |
ليلي: عندك حج يا ولدي، انا كان نفسي ان بتي تعيش حداكم ف عز، لكن والله راجعت نفسي واستغفرت ربنا وتوبت عن ذنبي.
قاسم: وكان هيبجا حالك كيف لو كان عباس جتلها؟
عصام: للاءسف انتي دمرتينا كلنا.
فاتن: خلاص بجا، المهم دلوك دهب، انا خايفه يجرالها حاجه.
ليلي: له بتي جوية ومش هيجرالها حاجه، متفسروش انتو بس ف وشي.
ناديه: مش عارفه اقولك ايه، ربنا يسامحك يا ليلي علي الحزن اللي عيشتينا فيه زمان، لاء وجايه كمان تكملي علينا وتكتبي بنت اخويا باءسم راجل تاني.
ليلي (بصريخ): كفايه بجا، حرام عليكم، أنا دم ولحم.
ناديه: خلاص هنعمل ايه يعني.
ليلي: انا هطلعلها اجعد جارها عشان لما تفوج تلجاني جارها.
عصام: استني انا جاي معاكي.
ناديه: اقعدو مع بعض، صفو كل حاجه وربنا يهديكم لبعض.
هنا ينزل حمزه
حمزه: انا حطيتها ف السرير، معلش لازم نصبر، والايام مسيرها تداوي كل حاجه، ومافيش اسرع من الايام.
قاسم: ربنا يهدي.
حمزه: ماما، خليهم يعملولنا قهوه.
ناديه: يا ابني ده انتو مكلتوش.
حمزه: اكل ايه بس ومين له نفس ف المغامرات اللي احنا فيها ديه.
ناديه: طاب اعملكم سندوتشات جنب الاكل، حاجه تسند قلوبكم.
حمزه: ماشي يا امي.
فاتن: اجي اساعد حضرتك؟
ناديه: تعالي يا حبيبتي.
وبالفعل تذهب ناديه ومعها فاتن، ليتحدث حمزه الي قاسم
حمزه: تفتكر دهب ممكن تسامحهم؟
قاسم: دهب طيبه، بس زي متجول حصلها صدمه، وكتر خيرها بردك.
حمزه: طيب، انته بكره بعد المغرب المفروض تكون ف بيتك وتعرف الكل انك اخدت براءه.
قاسم: تمام، وكمان هشوف عبدالسميع واتكلم معاه. وف وسط الكلام هجوله أن ابوي جبل ما يموت جاللي أن بيتنا فيه كنز مدفون تحتيه، وهجوله اني عايز احفر عشان الكنز واشوف رد فعله ايه.
حمزه: اوعا تغلط ف اي حاجه لاحسن نتكشف.
قاسم: له متخافش، بس انا بردك عايز اجولك علي حاجه.
حمزه: قول.
قاسم: وانا ف الحجز اتعرفت علي واحد اسميه اسامه، اسامه ده لما عرف اني جاي ف جضيه مخدارت جاللي أن ممكن يعرفني علي معلمه وهو يصرفلي باجي البضاعه، وجاللي كمان أن معلمه اسميه حافظ، وانا عارف حافظ ديتي تاجر كبير جوي، وكذا مره تطلع ماءموريه عشان يجبضو عليه ميلاجهوش عشان بيغير مكانه، لكن اسامه جاللي علي مكانه الجديد، وجاللي أنه كل يومين بيبعتله زياره كبيره ليه ولكل المساجين اللي معاه، وجايم ببيته وعياله.
حمزه: جميل اوي كده.
قاسم: اصبر بس.
حمزه: اديني صبرت.
قاسم: اسمعني بجا زين، اول هام متخليش حد يزور اسامه خالص، وتاني هام تخلي مرته تروح تزوره وتجوله أن بجالها مده محدش ساءل عليها وعلي عيالها، ولما اسامه يعرف كده هيعترف علي حافظ وتجدرو تجبضو عليه. اما عبدالسميع، الله ف سماه، هلاعبه واسويه علي الجنبين.
حمزه: طاب ومهران وأبوه؟
قاسم: دهب تجوم بس بالسلامه وهيا اللي هتساعدك تجبض عليهم وعلي حليمه، عشان ديه متستاهلش اجولها يا اما. ومع اني وعدت ابوي الله يرحمه ف جبره اني هتغير وابجا زين، بس معلش بعد ما اربيهم كلهم.
حمزه: يارب يا قاسم خلينا نخلص.
هنا تدخل عليهم فاتن وناديه
فاتن: اتفضلو عشان اكيد مكلتوش طول النهار.
وهنا يرن تليفون حمزه ليجد المتصله نواره
حمزه: خير يا انسه نواره؟
نواره: انا جدامي ساعه وهبجا برا البيت، والعيال كمان جاعدين معاي.
حمزه: تمام وانا جايلك.
قاسم: نواره ديه؟
حمزه: اه.
قاسم: جولها خلاص متاجيش، ملوش لازمه.
حمزه: ليه؟ مش قولنا عشان عبدالسميع ميحاولش يعني أنه يمسكك من ايدك من ناحيه نواره؟
قاسم: له، جولها بس خليها متاجيش.
حمزه: خلاص يا انسه نواره، اخوكي بيقولك خليكي عندك.
نواره: حاضر.
ليشعر حمزه ببعض الحزن
حمزه: عن ازنك يا قاسم، البيت بيتك، انا طالع اريح.
ناديه: مش لما تاكل حتي سندوتش علي الاقل؟ وبعدين قهوتك بردت.
حمزه: معلش يا امي، حاسس بدوخه كده، هريح شويه وبعدين انزلكم تاني.
ليصعد حمزه الي غرفته ويلقي بجسده علي سريره ليقول في نفسه:
حمزه: ايه اللي جرالك يا حمزه؟ ايه اللي زعلك كده لما قاسم قالك متخليش نواره تيجي؟ ده انته قابلت ملكات جمال وبنات احسن العائلات تتمني نظره منك. ايه يا حمزه ده، انته اصحابك كانو مسمينك ابو قلب فولاذ. انا هنا هتصل ب نواره، اه عشان اطمن عليها مفيهاش حاجه.
ثم يعود ويقول:
حمزه: اعترف انك حبيتها، الحب اللي بيسموه من اول نظره. بس يمكن يكون اعجاب. يوووه بقا مش عارف، انا كل اللي عارفه اني عايز اسمع صوتها.
---
اما في الغرفه الموجودة بها دهب نجد عصام يتحدث الي ليلي:
عصام: عاجبك اللي وصلنا له؟ عاجبك كده؟
ليلي: وانا كنت اعرف منين انك بتحاول توجع الجاسوسه؟ كت بشم علي ضهر يدي مخلاص بجا، انا كمان عيشت ف مرار وانا بعيده عنك، وبتنا بتكبر جدامي. كان نفسي بتي تعيش ملكه والكل يخدموها، ولا انته ناسي مرت ابوي كانت بتعمل ايه فينا انا وشريفة الله يرحمها؟ وأبوي من كتر حبه فيها كتبلها كل حاجه، وانا واختي اشتغلنا خدامين ف ملكنا.
عصام: وانا لما حبيتك واتجوزتك كنت مخليكي مش ناقصك حاجه، انتي عارفه اني الحمدلله الخير عندي كتير اوي، كنتي حتي عرفتيني اني عندي بنت؟ حتي لو كنتي فاكره اني بخونك؟ دهب ذنبها ايه؟
ليلي: معرفش، معرفش، انا تعبت، ارحموني بجا، ايه كلكم علي؟
لينظر عصام الي دهب ليجدها تتحرك وعيناها مفتوحتان
عصام: دهب! بنتي حبيبتي.
دهب: انا عايزه امشي من هنا.
عصام: يعني يهون عليكي ابوكي اللي عاش طول عمره محروم منك؟ مش يمكن لو مشيتي ورجعتي تاني تلاقيني خلاص موت وفارقت الدنيا كلها؟
دهب: له بعد الشر عليك.
عصام: سامحي امك يا بنتي، سامحيها عشان خاطري، انا ماصدقت لقيتكم، صدقوني ربنا وحده يعلم انا كنت عايش ازاي.
ليلي: يعني انته متجوزتش؟
عصام: شايفه امك الهبله دهب؟ بيقولك أنه كان عايش بيدور عليكي.
عصام: ومتخيلتش يا بنتي اني الاقيها هنا ف البلد، وربنا باعتلي اجمل هديه، هيا انتي يا دهب.
ليلي: يعني بتك هديه وانا له؟
عصام: انا لسه واخد باللي انك بتتكلمي صعيدي.
ليلي: مش بجاللي سنين عايشه هنا؟
عصام: وانتي بقا يا دهب دخلتي المدرسة ولا ايه؟
دهب: اه، انا معايا معهد تمريض.
عصام (بحزن): لو كنتي عايشه معايا كنتي هتبقي احسن دكتوره ف الدنيا، وكنت فتحتلك مستشفى خاصه بيكي.
دهب: عارف لو كنت جيت من كام يوم وعرفت انك ابوي، كت خليتك كتبتلي كل حاجه تملكها.
عصام: وانا هعمل كده بالفعل.
دهب: له، انا معيزاش حاجه خلاص، ربنا شفاني من الطمع، وانتي كمان يا اما جولتي انك خلاص مش هتطمعي تاني.
ليلي: توبه والله يا بتي.
عصام: طاب، مافيش بوسه لبابا؟
دهب: بابا حبيبي، ليه كل حاجه حلوه.
عصام: طاب تعالو بقا ننزل نقعد معاهم تحت ونفرحهم أن دهب بقت كويسه.
نواره: هو حضرتك عايز مني ايه بالظبط؟
حمزه: ما قولتلك بطمن عليكي، وكمان عشان اعرفك أن قاسم اخوكي جاي عندكم بكره.
نواره: هو انته متعرفش هو ليه مخلانيش اجي عنديكم؟
حمزه: نكد عليا، ربنا يسامحه.
نواره: بتجول ايه؟ مش سامعه.
حمزه: احسن برده.
نواره: طاب سلام بجا عشان اشوف اللي ورايا.
حمزه: هو احنا لسه اتكلمنا.
نواره: وهو احنا فيه بينا كلام؟
---
حمزه: نواره، بصراحه بقا انا معجب بيكي، بس كل اللي عايز اعرفه منك انتي شعورك ايه من ناحيتي؟
نواره: الكلام ده عيب، انا كده هجفل.
حمزه: استني بس متبقيش حمقيه، انا بساءلك عشان لما اكلم قاسم واخطبك منه مترفضينش.
نواره: معلش يعني ف السؤال، ميته حصل الاعجاب ده؟
حمزه: ديه حاجه مش باءيدي، قوللي بقا أقوله؟
نواره: اصبر بس لغيت منخلص من كل المشاكل ديه.
حمزه: يعني موافقه؟ قوليها بقا.
نواره: ما انا جولت اهو، امال جولتلك كلم جاسم ليه؟
حمزه: اموت انا ف الصعايده.
---
نواره: بس بجا انا بتكسف.
حمزه: حبيبي المكسوف.
نواره: بطل بجا كلامك ده.
حمزه: الا قوليلي يا نور عيني، هو انتي اتعلمتي؟
نواره: اه الحمدلله، انا خدت الثانويه العامه بمجموع كبير، ودخلت معهد عشان جاسم جال كفايه كده. وبصراحه كان نفسي ادخل كليه حجوج، بس الحمد لله علي كل حال.
حمزه: اول ما نتخطب هقدملك ف كليه حقوق.
نواره: بجد؟
حمزه: اه بجد.
نواره: ربنا يخليك ليا.
حمزه: بس بجا انا بتكسف.
لتضحك نواره:
نواره: طاب اجفل بجا.
حمزه: متخلينا نتكلم شويه.
نواره: له، انته كلامك كله بيخليني اتكسف. تصبح على خير.
حمزه: وانتي من اهلي.
---
نواره: من أهلك مره واحده؟
حمزه: ده انتي كل اهلي.
نواره: انا هجفل.
لتغلق نواره الخط مع حمزه لتقول:
نواره: الله، عوض ربنا جميل جوي. جملها بالستر يارب.
#سلوى_عوض
#صراع_القاسم
بارت 22
قاسم: سامحيني يا اختي أنا مكتش أعرف.
فاتن: خلاص بجا اللي راح راح، ربنا يخليك ليا ويطول ف عمرك يارب.
ناديه: إيه ده، ديه دهب نازله اهيه مع عصام وليلي.
فاتن: الحمدلله إن ربنا هداها.
ناديه: ربنا يهدي النفوس يا بنتي.
(هنا يدخل حازم)
حازم: يا أهل الدار، حازم وصل.
ناديه: حازم حبيبي، حمدالله عالسلامه.
حازم: الله يسلمك يا نونه.
عصام: ياربي، الصداع وصل.
حازم: كده برده يا حج، أنا صداع؟ طاب خلاص أنا همشي تاني.
(يمثل الزعل)
حازم: عن إذنكم، أنا شكلي مش مرغوب فيا.
عصام: بس يا أهبل، تعالى أعرفك على دهب بنتي، وليلي مراتي.
حازم: إيه ده؟ هيا ديه مراتك اللي كنت مصدعنا بيها؟
ناديه: اتلم يا حازم، عندنا ضيوف.
حازم: اصبري بس يا ماما. (ينظر لدهب) بقا معقوله القمر ديه تبقا بنت خالي؟
عصام: آه شوفت بقا.
حازم: أمال فين الواد حمزه؟
ناديه: قال حاسس بدوخه وطلع يريح شويه.
(يتجه حازم نحو قاسم)
حازم: أهلا بحضرتك.
قاسم: أهلا بيك.
(ينظر حازم لفاتن)
حازم: أوبا، مين الجميل؟
قاسم: أختي فاتن.
حازم: أهلا بيكي تونه.
ناديه: حازم!
حازم: هو أنا عملت حاجه؟ أنا جعان ولا ما عندكوش أكل ف البيت ده؟
ناديه: حالاً العشا هيجهز.
حازم: هطلع أغير وأنزل، تكونوا جهزتوا العشا.
عصام: آه، اطلع وارحمنا من صداعك شويه.
حازم: مش عارف أنا محدش طايقني ليه، ده أنا حتى عسل واتحب.
ناديه: آه يا قلبي، انته العسل كله.
عصام: خليكي إنتي كده على مدلعاه. قوللي يا وحش عملت إيه ف المشروع بتاعنا؟
حازم: للأسف...
عصام: أنا قولت كده، انته ميعتمدش عليك ف حاجه، وهتخرب الشركه.
حازم: دايمًا كده ظالمني، على العموم أنا خلصت المشروع وسلمته كمان قبل ميعاده.
عصام: شاطر، برافو عليك. أنا برده بقول إن حازم ابن أختي أشطر وأنجح رجل أعمال.
دهب: مش لسه حضرتك كنت بتجول إنه فاشل؟
حازم: جرايه يا دهب! انتي بتهدي النفوس ولا إيه؟
(تضحك دهب)
دهب: حاجه زي كده.
(يضحك حازم)
حازم: شكلنا هنبقا أصحاب.
(يشعر قاسم بالغيره)
عصام: وانته طالع ابقا صحي أخوك، عيل رخم.
حازم: اهو الرخم ده بقا قاعد معاكم شويه.
عصام: ليه بقا؟
حازم: عشان المناقصه الجديده بتاعت أرض المعارض، طرحوها للبيع وأنا قدمت وكسبناها.
عصام: برافو عليك.
حازم: عارف مين اللي هيخدمنا ف موضوع المناقصه ديه؟
عصام: مين؟
حازم: قاسم.
قاسم: وأنا تحت أمركم.
حازم: أشطه، هاخد شاور ونتعشى ونقعد نرتب هنعمل إيه.
عصام: اصبر بس شويه، في شويت مشاكل تتحل وبعدين نبقا نشوف موضوع المناقصه.
حازم: هيا ميعادها إمته؟
عصام: بعد شهر هنبدى نشتغل.
قاسم: لسه بدري يا راجل.
عصام: بطل رغي واطلع خد شاورك، إحنا جوعنا.
حازم: عمرك ما هتتغير أبدًا يا خالو، بعد ما خدت اللي انته عايزه مني رميتني!
(يمثل الزعل)
حازم: آه ياعيني عليك يا حازم يا مظلوم يا حازم.
(تضحك دهب)
دهب: ده انته تحفه بجد.
(ينظر لها قاسم بغضب، وهنا ينزل حمزه)
حمزه: يوووه، القلق كله جيه! إيه جابك يا ابني انته؟
دهب: حرام عليك، ده حتى دمه خفيف جوي.
حمزه: ده؟! أرحم خلق الله عيل تقيل.
عصام: قولتش أنا حاجه.
ناديه: ده حازم ابني هو اللي بيخليني أضحك.
حمزه: آه عشان أراجوز! شايفه يا دهب؟ بذمتك أنا أراجوز؟
(تضحك دهب)
دهب: لاء طبعًا، ده انته جميل خالص.
قاسم (بغضب): إيه كل شويه دهب دهب! وانتي كمان فشتك عايمه على طول!
حازم: أفندم، حضرتك بتقول إيه؟
(يشعر قاسم أنه مخطئ)
قاسم: عن إذنكم، أنا هروح أبيت عند عم منصور.
عصام: فيه إيه يا راجل! والله ميحصل أبدًا. إحنا هنتعشى وتطلع تريح، ولما تصحي هنقعد ونشوف هنعمل إيه.
(يتحدث لعصام)
عصام: وانته يا زفت، احترم نفسك شويه.
حازم: وأنا عملت إيه؟
عصام: خلاص، خلصنا.
دهب: أنا طالعه أتمشى ف الجنينه، تعالي معايا يا فاتن.
فاتن: حاضر.
(تخرج دهب ومعها فاتن. يقترب حمزه من قاسم)
حمزه: روح الحقها.
قاسم: هيا مين؟
حمزه: دهب اللي انته غيران عليها. على فكره، باين عليك أوي، أصل أنا كمان طبيت زيك.
قاسم: انته بتحب دهب؟
حمزه: دهب مين؟ لاء طبعًا، دي زي أختي. أنا بحب واحده تانيه خالص. بص الصراحه بقا، أنا معجب بنواره أختك وعايز أتجوزها.
قاسم: أيوه بس انته عارف يعني إن يعني أمنا يعني...
حمزه: أنا ماليش دخل ف كده، بقولك أنا عايز أتجوزها. وبعدين انته هتساعدني ف موضوع نواره، وأنا هساعدك ف موضوع دهب.
قاسم: جصدك إيه؟
حمزه: قصدي إنه باين عليك قوي.
قاسم: بصراحه يعني ومن غير زعل، أخوك ده بارد جوي ويفور الدم.
حمزه: هو طول عمره بيحب الضحك والهزار، بس صدقني هو بيهزر بس، لكن عمره ما عمل أي حاجه تغضب ربنا.
قاسم: أنا مش جصدي...
حمزه: أنا عارف إنه مش قصدك، كل الحكايه إنك غيران على دهب.
قاسم: مش مسأله غيره، بس أنا مبحبش الحال المايل.
(نتركهم ونذهب إلى عبدالسميع حيث كان يجلس مع حافظ)
عبدالسميع: بجولك يا حافظ، يومين كده وتجهزلي الرجاله عشان نبدؤ الحفر.
حافظ: بس كده سهله، بس أكيد هتحتاج ناس يحرسوكم وانتو شغالين.
عبدالسميع: آه والله كلامك صح.
حافظ: خلاص، سيبها عليا. هجيبلك أسود يحرسوكم. بس جوللي، انته متوكد أن البيت ده فيه كنز؟
عبدالسميع: أمال مليون ف الميه! أمال أنا صرفت كل المصاريف ديه ليه؟
حافظ: تمام يا أخوي.
عبدالسميع: بيني وبينك، أنا أول ما تفتحو المجبره هاخد الزيبج الأحمر عشان أرجع شباب الشباب، وبدل الواحده أتجوز أربعه.
حافظ: للدرجه ديه؟ طاب مديني أنا كمان من الزيبج الأحمر ده.
عبدالسميع: اصبر بس لما نحفر ونلاجوه، بعد ما أنا أخد اللي يكفيني، لو فاض هبجا أديلك
#سلوى_عوض
#صراع_القاسم
بارت 23
حافظ: كتر خيرك يا معلمي ياله بجا ابدء ف الحفر خلينا نعدو ونركبو طياره العز
عبدالسميع: ما انا الاول لازم اخلص من عيله جاسم
حافظ: ايه هتموتهم ولا ايه
عبدالسميع: مجنون انته اموت عيله بحالها له انا همشيهم من البيت
حافظ: كيف يعني
عبدالسميع: سهله هروح انا عشان اغورهم من البيت
حافظ: روح ربنا يسهلك الصعب
عبدالسميع: ايوه ادعيلي كده خليها تتسهل اجوم انا بجا عشان اخلص بدري بدري
حافظ: طاب هتوديهم فين
عبدالسميع: هوديهم بيتي الجديد
حافظ: عافيه عليك بس ربنا يهديهم ويوافجو
عبدالسميع: هيوافجو متنبرش فيها انته
حافظ: خلاص روح ولما تغورهم ابجا اديني تلافون عشان اشيعلك الرجاله
عبدالسميع: متناش رجاله شداد
حافظ: هبعتلك اسود
لينصرف عبدالسميع ف اتجاهه الي منزل قاسم وبعد ساعه يصل عبدالسميع ليج اشرف جالس أمام المنزل
اشرف: يا مرحب بيك يا معلم
عبدالسميع: عبدالسميع مرحب بيك يا غالي الا جوللي خواتك موجودين
اشرف: اه كلهم جوه خير في حاجه
عبدالسميع: كل خير تعالي عشان عايزكم ف موضوع مهم
اشرف: اتفضل تعالي
لتدخل اشرف ومعه عبدالسميع
اشرف: يا شريف يا شرف انزلو تعالو
عبدالسميع: وعايز والدتك كمان ف الجعده ديه
اشرف: من عيني اشرف اطلعي يا عفاف نادمي علي امي
عفاف: دجيجه
لتصعد عفاف الي غرفه حليمه
عفاف: تعالي كلمي عبدالسميع عايزك تحت
حليمه: بفرحه اكيد جايب خبر زين من عند جاسم
عفاف: طاب اخلصي ياله عفاف جايه وراكي اهو
لتنزل عفاف اهي جايه ورايا
اشرف: اعملي جهوه وهاتي فاكهه
تتنزل حليمه
حليمه: يا مرحب بالغالي عبدالسميع
عبدالسميع: مرحب بيكي يا ام جاسم اسمعوني عايز اجولكم حاجه مهمه
حليمه: خير
عبدالسميع: انا كت مع المحامي ف زياره لجاسم وهو كويس وبيسلم عليكم كلكم
حليمه: بذمتك ولدي زين
عبدالسميع: اه زين والمحامي كمان طمني وجاللي جريب جاسم هيطلع براءه
حليمه: من خشمك لباب السما
عبدالسميع: بس هو جاللي افضي البيت عشان اوضبه
حليمه: بيت مين
عبدالسميع: بيتكم ده
حليمه: واحنا هنروحو فين
عبدالسميع: عندي ف بيتي بيت زي الفل وموضبه مخليه زي المحكمه
اشرف: تمام يبجا نروحو نجعدو علي ما البيت هنا يخلص ايه رايكم
شريف: موافجين طبعا
شرف: موافجين
عبدالسميع: هناك البيت عندي واسع جوي وفيه خدم وجنينه وفيه كمان كذا تلاجه معبايين من خير ربنا
حليمه: له انا مش ههمل بيتي روحو انتو وانا هجعد هنا
عبدالسميع: يعني ياحجه هتجعدي هنا واحنا بنوضبو وهيبجا فيه خبط ورزع
حليمه: زي بعضه
عبدالسميع: طاب بعد اذنكم انا عايز الحجه وحديها
عفاف: متوافجي بجا ايه عايزه تحرمينا من الخير اللي عند المعلم
عبدالسميع: مرا بومه صحيح
حليمه: مش هطلع من بيتي غير علي جثتي
عبدالسميع: تعالي يا ام جاسم نتكلمو برا شويه
اما نواره فكانت تستمع إليهم دون أن يراها احد
نواره: (تتصل بحمزه) جاسم عندك
حمزه: طاب سلمي عليا الاول
نواره: مش وجته دلوك فيه نصيبه هتحصل
حمزه: ميبصه ايه انتي بخير
نواره: امال بكلمك ازاي
حمزه: خلاص بطمن عليكي
نواره: يا اخي اديني جاسم عايزاه ضروري
حمزه: طاب افهم بس فيه ايه
نواره: الزفت عبدالسميع جاه عندينا
حمزه: بغيره اوعي تكوني قعدتي معاه
نواره: له طبعا انا كت واجفه مداريه علي السلم بس الغريبه أنه مساءلش عليا
حمزه: بعصبيه وانتي عايزاه بساءل عليكي ليه
نواره: براحه فيه ايه المهم هو جالهم أنه هيوضب البيت هنا وأننا كلنا هنروحو نجعدو ف بيته
حمزه: هاتي ولاد قاسم وتعالي
نواره: طاب لما جاسم يجوللي وبعدين امي مرضياش بس هو جالها تعالي نطلعو برا نتحدتو
حمزه: اه عشان يهددها ويخليها توافق
نواره: اسمعي انتي هتاخدي ولاد قاسم وتنزلي وهتقوليلهم أن مامتهم عايزه تشوفهم
نواره: بس اسمعي بعد ما الزفت ده يمشي
نواره: بس اخاف جاسم يزعجلي
حمزه: اسمعي اللي بقولك عليه وأنا هتحرك دلوقتي وهبقا قريب منك
نواره: حاضر انا هروح بجا اسمعهم بيجولو ايه
حمزه: خليني معاكي علي الخط
اما في مدخل المنزل كان عبدالسميع يقف مع حليمه
عبدالسميع: ايه يا ام جاسم مش عايزاني اوضب البيت ليه
حليمه: وضبه واناجاعده فيه
عبدالسميع: اسمعي انا خلايجي ضيجه وانا مش ههمل بيتي
عبدالسميع: اه عشان خايفه جريمتك تتكشف
حليمه: بخوف جريمه ايه
عبدالسميع: جتل جوزك
حليمه: له هو مات وحديه انا مجتلتوش
عبدالسميع: اه باءماره الكوبايه والفوطه اللي معايا ما انا هجولك دهب جبل ما تموت محروجه جالتلي علي كل حاجه وكمان علي مكان الكوبايه والفوطه تعالي بجا نجولو لعيالك اللي عملتيه
حليمه: له خلاص همشي معاهم بس اعمل معروف متاءذييش ولا تعرف حد بحاجة
عبدالسميع: خشي جوليلهم انك موافجه
حليمه: حاضر حاضر
لتدخل حليمه علي اولادها
حليمه: خلاص انا موافجه
عفاف: اش عجب يعني عبدالسميع اصل انا خليت ام جاسم تكلم جاسم وهو ف الحجز وجالها أن ديه أوامره ياله جهزو حاجتكم وانا هروح مشوار ولما تجهزو كلموني عشان اجيب عربيه كبيره واخدكم علي البيت اللي هينور بيكم
لينصرف عبدالسميع
نواره (تتوجه لحمزه): لحمزه سمعت
حمزه: اه وانا ف الطريق ياله جهزي ولاد قاسم واجهزي
اما اشرف فكان يتحدث الي حليمه
اشرف: هو انتي يعني لازم تاخدي الأوامر من جاسم لتنزل نواره عليهم اما بجولك صابرين اتصلت وجالتلي عايزاني اوديلها العيال تشوفهم
اشرف: غوري وغوريهم ومتجيبهمش تاني خليني الشيله تخف علينا
نواره: حاضر هسيبهم مع امهم واجي وحدي
عفاف: بت يا نواره متتاءخريش عشان تلمي الحاجه معانا
نواره: حاجه ايه اشرف بعدين لما تاجي نبجو نعرفوكي
احلام: كل ديتي عشانك انتي يا مجشفه هدي حظوظ بجا بخت العور هد السور وحظ العداله مايل
شريف: ياله اطلعي ونزلي عيال اخوكي
نواره: عايزه حاجه يا اما
حليمه: بتوهان له بس متتاءخريش يا بتي نواره هوديهم واجي علي طول
عفاف: ابجي هاتلينا حاجه حلوه من عنديهم
نواره: حاضر
اشرف: متغوري بجا وبطلي رط اه ولما ياجي عبدالسميع ابجي اتجلعي عليه عشان يديكي جرشين
نواره: حاضر
اشرف: تاخديهم منيه وتديهموللي وله فالحه بس تدي كل حاجه لجاسم
نواره: له حاضر يا اخوي اي حاجه هااخدها منيه هديهالك علي طول
اشرف: طاب اخفي واوعي تاجي بالعيال تاني ها اكسر عضمك
نواره: له هسيبهم عند امهم هيا اولي بيهم
اشرف: جدعه انتي كده
نواره: اهم حاجه رضاكم عني
اما حمزه فكان يرتدي ملابسه علي عجل وهو نازل علي السلم يجري
ناديه: حمزه رايح فين وبتجري كده ليه
حمزه: بعدين يا امي بعدين
ناديه: طاب براحه علي نفسك شويه
ليخرج حمزه ليركب سيارته وأخذ يتصل علي نواره وهيا لا ترد
حمزه: ردي يا نواره طمنيني عليكي هحاول اشوفها يمكن فاتحه نت ايه ده يووه ديه قافله من بليل هرن عليها تاني برده مش بترد
ثم أخذ يجري بالسيارة بأقصي سرعه ممكنه
اما نواره فدخلت غرفه الاطفال
نواره: زياد عمتي نواره انتي جايه تجعدي معانا
نواره: اسمعني زين يا زياد انا هااخدك انت وخواتك وهنروحو عند ابوكم
زياد: بجد ياعمه نواره اه والله بس حسك عينك حد يعرف حاجه
نواره: انا جولتلهم اني هوديكم عند امكم
زياد: امي وهيا فين امي ياعمه ديه هملتنا ومشت ولا كأننا عيالها
نواره: خلاص بجا ياله تعالي البسك انت وخواتك عشان ابوك هيشيع حد ياخدنا بالعربيه
زياد: حاضر يا عمه بس تعرفي ابوي وحشني جوي بس نفسي يعاملنا انا واخواتي معامله زينه علي جد معاملته العفشه معانا بس والله بنحبه جوي
نواره: اجولك علي سر
زياد: سر ايه
نواره: ابوك بجي طيب جوي جوي وكمان مبجاش بخيل
زياد: جد يا عمه نواره: اه والله
#سلوي_عوض
#صراع_القاسم
بارت 24
نواره: ياله بجا البس انته وانا هلبس خواتك.
زياد: حالا اهه ياعمتي.
نواره: بس زي ما فهمتك.
زياد: متخافيش واد اخوكي راجل.
نواره: ربنا يحرسك انته وأخواتك.
زياد: هو انتي يا عمتي هتتجوزي الراجل العجوز ده؟ انا اول ما اشوف ابوي هجوله متجوزش عمتي للراجل ديتي. انتي زي الجمر وتستاهلي احسن واحد ف الدنيا.
نواره: حبيبي يا زيزو.
أما حمزه فكان يقود السيارة بأقصى سرعه وبكل عصبيه.
حمزه: قسما بالله لو حد اذاها ها اشيله من علي وش الدنيا.
ايه يا حمزه مالك انته؟ أمته حبيتها كل الحب ده؟ مش عارف، مش عارف. كل اللي انا عارفه اني بحبها وبحبها اوي كمان.
وبعد نصف ساعه من الحيره يقترب حمزه من منزل قاسم.
أما نواره فكانت قد أخذت الاطفال وتهم أن تنزل الي أسفل.
نواره: شوفت يا سي زياد اديني نسيت تلافوني. استني هخش اجيبه.
لتترك نواره الاطفال وتدخل غرفتها لتأخذ هاتفها وتنظر إليه.
نواره: يا مري، ده حمزه متصل فوج الالف مره. الحمدلله اني كت عاملاه علي الصامت.
لتخرج نواره من غرفتها.
نواره: ياله بينا يا ولاد.
لتأخذهم وتنزل الي الأسفل.
نواره: ايه ده هما غارو علي فين؟ ياله احسن بردك.
لتخرج نواره بالأولاد وتبتعد عن البيت ثم تتصل علي حمزه.
حمزه (بعصبيه): انتي كنتي فين كل ده؟
نواره: اصلي كت بلبس عيال اخوي وكت سايبه التلافون ف اوضتي. انته فين؟
حمزه: انا قريب من البيت.
نواره: طاب انا هلف من الشارع اللي ورانا.
حمزه: وانا جايلك. ومتقفليش الخط، خليكي معايا لغيت منتقابل.
نواره: حاضر.
لتتقابل نواره مع حمزه.
حمزه (بعبيصه): اركبو.
لتركب نواره السياره مع الاطفال.
حمزه: انا مش قايلك الزفت الموبايل يبقا ف ايدك دائما؟ يعني اتصل بيكي فوق الالف مره لما كنت هتجنن وادخل البيت اخلص علي كل اللي فيه.
زياد: انته بتكلم عمتي كده ليه؟
حمزه: انته زياد؟
زياد: هو انا.
حمزه: معلش، اصلي كنت قلقان عليها اوي. أصلها غاليه عليا اوي اوي.
زياد: بردك مهما كان متكلهماش كده.
حمزه: انا اسف يا سيدي زياد. خلاص، سوج وانته ساكت.
حمزه: حاضر يا سي زياد بيه.
ليضحك زياد.
زياد: هو انته صح بتعز عمتي؟
حمزه: اوي اوي.
زياد: طاب متتجوزها بدل الراجل العجوز اللي جرب يموت ده.
حمزه: ما انا هخطبها من قاسم بس بعد منخلص من المشاكل اللي احنا فيها.
زياد: بس اسمع، تعاملها احسن معامله واوعا تزعجلها تاني. عمتي نواره غاليه عندي جوي.
حمزه: شكلك انته اللي هتبقا حمايا.
زياد: هو انته شغال ايه؟
نواره: ده يبجا الظابط الجديد.
زياد: اه ظابط؟ انا كمان نفسي ابجا ظابط.
حمزه: ده انته هتبقا ظابط صعب اوي.
زياد: ف الصح، بس اي مجرم لازم ياخد جزاته.
حمزه: إنشاءالله هتبقا احسن ظابط ف الدنيا.
أما مهران فكان يتحدث مع والده.
مهران: الا جوللي يا أبا، حدش اتصل عليك؟
عباس: له.
مهران: طاب متجرب كده تكلم البت دهب.
عباس: هتصل عليها.
ليتصل عباس بنواره.
نواره: يا مري، عباس بيتصل علي. انا احسن حاجه اعرف جاسم وهو يجوللي اعمل ايه.
لتذهب دهب الي قاسم.
دهب: الحجني يا جاسم، عباس بيتصل علي.
قاسم: ردي عليه وافتحي السماعه.
دهب: حاضر.
نواره: اخبارك ايه ياعم عباس؟
عباس: زين، امال فينك انتي روحتي وجولتي عدولي؟
دهب: له، أصل معدتي كانت وجعاني.
مهران: هاتها اكلمها.
اخبارك ايه يا عروستي؟
دهب: بخير الحمدلله، كت تعبانه شويه بس روجت.
مهران: الف سلامه عليكي يا جلبي.
دهب: الله يسلمك يا غالي.
مهران: نفسي اشوفك عشان وحشتيني.
دهب: حاضر، يومين بس وهجابلك.
مهران: هستني علي نار يا حبيبتي.
ليأخذ منها قاسم الهاتف ويغلق الخط في وجه مهران.
قاسم (بعبيصه): ايه يا ست دهب، انا هدور احلج عليكي من المعجبين؟
دهب: وهو انا عملت حاجه؟ وبعدين ايه تحلج علي ديه؟
قاسم: معلش، بس اصل انا يعني بجيت بغير عليكي.
دهب: نعم، تغير عليا؟ اش عجب يعني؟
قاسم: افهمي بجا، بغير عليكي يعني جلبي... يعني بصي انا مبعرفش اجول كلام مذوج.
دهب: انا رايحه اجعد مع حازم.
قاسم: ايوه، طيري الباجي من نافوخي.
دهب: وهو انا عملت حاجه؟
قاسم: طاب اسمعي يا دهب، من دلوك ورايح مافيش جعاد مع الواد البارد اللي اسميه حازم ده، ولا تجعدي مع أي راجل. وانا مبجولش كلامي غير مره واحده عشان متزعليش مني.
دهب: يا سلام! الكلام ده كت تجوله لدهب اللي كانت خدامه عنديكم ف بيتكم. لكن انا دلوك مش خدامه، انا بت اللوا عصام علي سنجه عشره، وانته جاعد ف بيتنا. لا تكون مفكر نفسك يعني كبير علي.
قاسم (بحزن): كتر خيرك يا بت الأصول. انا ههملك بيتك وامشي يا بت سياده اللوا. واسف لو كت عديت حدودي معاكي.
دهب: انا مش جصدي.
قاسم: ولا جصدك ولا مجصدكيش. عن ازنك يا ست دهب هانم.
ليهم قاسم أن يترك الفيلا ويخرج ليجد نواره داخله عليه ومعها أطفاله.
زياد: ابوي حبيبي، اتوحشتك جوي يا أبا.
ليحتضنه قاسم هو وإخوته.
قاسم: وانتو كمان وحشتوني جوي. إنما ايه اللي جابكم؟
نواره: اصل حمزه باشا كلمني. ولما جولتله أن عبدالسميع كان عندينا وجالهم فضو البيت عشان هيوضبه، وامك ف الاول مكانتش موافجه، بس لما عبدالسميع خدها وخرجوا معرفش ايه اللي حصل خلاها وافجت.
قاسم: طاب ياله عشان هنمشو من هنا. بكفايانا تجلنا علي الناس.
ليدخل عليهم حمزه.
حمزه: انا سامعك بتقول تقلت علي الناس؟ ناس مين؟
قاسم: معلش يا باشا، انا ها اخد اخواتي البنات وعيالي وهروح اجعد ف الأرض. وانا الحمدلله باني اوضتين هناك.
حمزه: كلام ايه ده؟ لاء طبعا. انتو مش هتمشو من هنا الا لما كل حاجه تبقا تمام.
قاسم: معلش، انا كده هبجا مرتاح.
لينزل عصام.
عصام: ايه يا اولاد مالكم؟ ماشاء، مين الولاد الحلوين دول؟
حمزه: دول ولاد قاسم.
عصام: ايوه كده، خليهم يعملو حس ف البيت.
حمزه: قاسم عايز يمشي.
عصام: يمشي يروح فين؟
قاسم: معلش، خلوني براحتي.
عصام: لاء طبعا، مش هتمشو من هنا.
حمزه: سامحني يا باشا، انا مش هجعد هنا تاني.
عصام: فيه ايه؟ انته، في حد زعلك؟
دهب (ببكاء): انا اللي زعلته، بس والله ما كت اجصد. انا اسفه ياجاسم، سامحني اعمل معروف. ولما مشيت من هنا ها اجي معاك.
حمزه: بعد اذن يا خالي، ممكن دهب وقاسم يخرجو يتكلمو ف الجنينه؟
عصام: اه طبعا، روحي معاه يا دهب.
ليقرب حمزه من عصام.
حمزه: متخليك حلو كده وخلي الولاد معاك عشان عايز اتكلم مع نواره.
عصام: اه، قولتلي حمزه حبيبي يا خالو.
تعالو يا ولاد نروح عند تيته ليلي.
زياد: حاضر ياباشا.
عصام: قوللي ياجدو.
زياد: حاضر ياجدو.
حمزه: هيا امي فين؟ مش باينه.
عصام: قاعده هيا، وفاتن وليلي مع حازم اخوك.
حمزه: الله يكون ف عونهم. تعالي يا نواره، عايز اقولك حاجه.
نواره: حاجه ايه؟
حمزه: بطلي غياء بقا. ايه ده مافيش فهم عندك خالص؟
نواره: كده طيب. عمي عصام، استني انا طالعه معاكم.
حمزه: انتي يا بت استني هنا.
نواره: مش انا غبيه اجعد لحالك بجا؟ انا هجعد مع حازم، دمه خفيف وبيضحكني.
لتجري نواره وتتركه.
حمزه: طيب يا نواره، وحياه امي لا عرفك ازاي تسيبني وتجري. أن ما وريتك مبقاش انا حمزه الحسيني.
أما دهب فكانت تبكي.
قاسم: بتبكي ليه انتي دلوك؟
دهب: عشان انته زعلان مني وانا مكانش جصدي والله ما اجصد.
قاسم: طاب اجعدي علي المرجيحه امرجحك.
دهب: يعني مش زعلان مني؟
قاسم: له خلاص.
دهب: تعرف اني لما كت حداكم ف البيت وانته دخلت عليا وانا بحلب الجاموسه وجولتلي اشربي حليب كتير عشان تتجوتي، وكمان لما جولتلي متخليش حد يشوفك غيري، حسيتك بتغير عليا. وخصوصي لما جولتلي انك هتجعدني مع عمي محمد الله يرحمه ف جاعه كبيره وجتها حسيت انك بتغير علي. لكن جولت لحالي: انتي فين وهو فين؟ وجتها جلبي دجلك. اصل جلوبنا مش باءيدينا.
قاسم (بفرحه): افهم من كده انك يعني حاسه بحبي ليكي، وجلبك بيدج لما بتشوفيني زي ما جلبي بيدج لما بشوفك؟
دهب: حاجه زي كده.
قاسم (بحزن): بس شيلتي تجيله جوي وهمي تجيل هم يكسر الضهر.
دهب: ولا هم ولا حاجه، خليها على الله.
قاسم: انتي عارفه يعني ايه امي تجتل ابوي؟ يعني عار عليا طول العمر.
دهب: محدش ليه ف نفسه حاجه. وكل عيله فيها الزين وفيها الشين، وصوابعك مش زي بعضيها.
قاسم: ربنا يجملها بالستر. المهم عشان خاطري، معايزكيش تتكلمي مع أي راجل غيري، ومتوجعيش جلبي من الغيره عليكي.
دهب: حاضر يا سيدي قاسم.
قاسم: وانا كمان هكلم عصام باشا وأعرفه اني عايز اتحوزك.
دهب: ومستعجل ليه؟
قاسم: له، مش فاهم.
دهب: جضدي لما نخلصو من اللي احنا فيه.
قاسم: زي ما تحبي.
دهب: طاب انا هدخل جوه.
قاسم: ماشي، خشي.
لتدخل دهب لتجد حمزه جالس وحده.
دهب: ايه مالك وشك محمر كده ليه وبتنفخ؟
حمزه: الست نواره هانم بقولها تعالي نقعد نتكلم، تقولي لاء انا هطلع اقعد مع حازم والجماعه، اصلي حازم دمه خفيف وبيضحكني.
لتضحك دهب.
دهب: ديه عايزاك تغير عليها يا حضرة الظابط.
حمزه: ده انا مش طايقها.
دهب: واللي يخليها تغير عليك وتموت كمان من الغيره؟
حمزه: بعد الشر عليها.
دهب: خلاص، براحتك.
حمزه: انا قصدي بعد الشر عليها من الموت يعني. مقولتيش هتخليها تغير ازاي؟
دهب: انته اول متشوفها، تعمل نفسك بتكلم واحده علي الواتساب، وانا هجولها باين عليه مرتبط بواحده. إنما ايه جمر، تجوم تغير عليك. وكمان هجولها انك خليتني كلمتها.
حمزه: ده انتي طلعتي مش سهله.
دهب: اي خدمه نخدمكم وناكل من بيتنا.
حمزه: طاب يالمضه.
دهب: انا لمضه خلاص، ماليش صالح بيك. خليها كده محساش بيك، وانته هتتحرج من كتر النفخ.
حمزه: يا بنت الايه.
لتجري دهب وحمزه يركض وراءها.
لتخرج دهب علي الليفنج لتجدهم يضحكون.
دهب: طاب متضحكوني معاكم.
ليلي: والله حازم ده طلع دمه زي السكر.
حازم: ميرسي يا طنط.
فاتن (في سرها): عيل بارد، جال طنط جال.
عصام: تعالي يا دهب، عايز اتكلم معاكي.
دهب: حاضر.
عصام: وانته كمان يا حازم، تعالي معانا.
حازم: اوك.
ناديه: طاب خليكم انتو قاعدين هنا واحنا هنخرج نقعد ف الهول برا، وكمان عشان الولاد يشربو حاجه.
عصام: طيب تمام.
ليخرجو ويتركو عصام ودهب وحازم.
دهب: خير، حضرتك كت عايزني ف ايه؟
عصام: اسمعي يا دهب. طبعا انتي انك بنتي الوحيده، وياريتك اتربيتي معايا وف حضني، لكن الحمدلله على كل حال. المهم انا فكرت وقررت اني اجوزك لحازم ابن عمتك، عشان ابقا مطمن عليكي. وكمان ده قريبك يعني عمره ما هيقسي عليكي، وانا اللي مربيه.
دهب: اصل انا يعني...
عصام: ايه يا حازم، قولت ايه؟
حازم (بحزن، فقلبه معلق بفاتن، لكنه لا يستطيع رفض أي طلب لخاله عرفانا بجميله عليه هو وأخيه، فقد قام عصام بتربية حمزه وحازم بعد أن استشهد والدهم في معركه مع الخارجين علي القانون، فوالدهم صديق عصام الوحيد وأوصاه علي أولاده): اللي تشوفه حضرتك.
عصام: خلاص، الف مبروك يا اولاد.
ليخرج عصام ويتركهم في حيره.
ناديه: امال فين الولاد؟
عصام: الف مبروك يا اختي. حازم خطب دهب وانا وافقت.
#سلوي_عوض
#صراع_القاسم
بارت 25
قاسم: أنا سمعت صوت زغاريد، خير يا رب؟
ناديه: والله وشكم حلو علينا أوي. حازم ابني خطب دهب بنت خالك
(قاسم ينظر إلى دهب نظرة حزن)
قاسم: مبروك يا دهب… مبروك يا أستاذ حازم.
عصام: الله يبارك فيك، عقبال ولادك.
قاسم: في حياتك يا باشا. إن شاء الله. أنا بعد إذن حضرتك هاخد إخواتي وعيالي ونروح نقعد في الأوضتين اللي في الأرض.
عصام: اللي يريحك، بس خليك دايمًا على اتصال معايا.
قاسم: حاضر يا باشا… يلا يا نواره هاتي العيال وهاتي فاتن خيتك.
زياد: متخلينا قاعدين يا أبا، أنا حبيتهم قوي.
قاسم: معلش يا حبيبي، يا بخت من زار وخفف.
حمزه: ليه عايز تمشي يا قاسم؟ خروجك من هنا فيه خطر عليك.
عصام: سيبه يعمل اللي يريحه.
(قاسم يقول في نفسه: "عصام باشا كأنه ما صدق")
حمزه: لو هتمشوا بلاش تقعدوا في الأرض.
قاسم: أمال هنروح فين؟
حمزه: هتقعدوا في استراحة الضباط.
قاسم: كتر خيرك.
حمزه: إنت ناسي إن معاك أطفال وبنات؟ مينفعش تقعدوا في الأرض بأي شكل.
قاسم: ماشي حاضر.
حمزه: هجهز العربية على ما تخرجوا.
نواره (بحزن): السلام عليكم، هتوحشونا… ابجي ودينا يا دهب.
دهب (بحزن): حاضر.
ليلي: معلش يا جاسم، خلي فاتن قاعدة معايا. أنا عمري ما فارقتها من يوم ما اتولدت، واختي موصاني عليها.
قاسم: تقعدي يا فاتن.
فاتن: بعد إذنك يا أخوي.
قاسم: على راحتك… يلا يا نواره مكتوب علينا نفارق الحبايب.
(يخرج قاسم ومعه أطفاله الثلاثة ونواره أخته)
قاسم: أي حاجة تحتاجيها يا فاتن كلميني على طول.
فاتن: حاضر يا أخوي.
(حليمه تجلس حزينة)
حليمه: يا مرك يا حليمه، دلوقتي عبدالسميع عرف كل حاجة. لازم أتصل بالمحروج عباس، شكله كدب عليّ وما موتش دهب.
(تتصل مرارًا حتى يرد عباس)
حليمه: إنت ما بتردش ليه من أول مرة؟
عباس: أصلي كنت نايم.
حليمه: نامت عليك حيطة! إنت كدبت عليّ وما موتتش البت دهب.
عباس: أصل عبدالسميع كشف المستور وهددني. وبعدين إنتِ جتلتِ جوزك، وأنا عايز مليون جنيه وإلا أبلغ عنك وهيعدّ موعدك.
حليمه: مليون جنيه؟ هجيبلك منين؟ معاييش.
عباس: يبقى جهزي نفسك لحبل المشنقة. قدامك يومين بس.
حليمه: طيب أصبر عليّ، كان يوم أجهزهم.
عباس: خلاص، يومين بس. وغوري.
حليمه: كده بردك تقول كده لخيتك حبيبتك؟
عباس: حبيبة إيه؟ ده حبك مرض. وبعدين إنتِ كنتِ مخطوبة لعبدالسميع وتضحكي عليّ؟
حليمه: ما أنا هجوزهاله!
عباس: بطلي رط… وجعتِ راسي.
حليمه: ماشي يا أخوي.
عباس: إخوت يخوتك. (يغلق الخط)
حليمه: كده رقبتي بقت في إيد عبدالسميع وعباس… طيب ما أنا أموت نفسي قبل ما الحكومة تعدمني. (تشرب السم) يا بطني… السم صعب جوي…
(قاسم يركب السيارة مع حمزه ونواره وأطفاله)
حمزه: أنا مش فاهم حاجة. إزاي خالي وافق بسهولة إنكم تمشوا؟ وكمان موضوع خطوبة حازم ودهب، إمتى حصل؟
قاسم: عادي يا به، بيته وبنته وهو حر.
حمزه: لا، في حاجة مش مفهومة.
نواره: وأنا كمان حاسة كده.
قاسم: خلاص وصلنا يا باشا، خلينا نرتاح.
حمزه: قاسم، أنا بكرر طلبي لإيد نواره.
قاسم: دلوقتي مش وقته.
زياد: وافج يا أبا، حمزه صاحبي طيب قوي.
قاسم: اللي فيه الخير يقدمه ربنا.
حمزه: كده بردك يا قاسم؟ شايفني كده؟
قاسم: معلش يا باشا، حقك عليّ.
حمزه: باشا إيه؟ أنا أخوك.
قاسم: متحرمش منك.
حمزه: أنا هقعد مع خالي وأفهم دماغه فيها إيه… اتفضلوا هنا، فيه أوضتين متوضبين.
(قاسم يدخل الحمام ليستحم)
نواره: قوللي بقى، إيه حكاية خطوبة دهب وحازم؟
حمزه: معرفش، وأنا مستغرب إن خالي وافق تمشوا.
نواره: طيب خلي بالك من نفسك.
حمزه: وإنتِ كمان، أول ما أعرف حاجة هكلمك. (يخرج)
(قاسم بعد قليل)
قاسم: اجعدي يا نواره، عايز أتكلم معاكي.
نواره: حاضر يا أخوي.
قاسم: إنتِ موافقة على حمزه؟
نواره (بكسوف): اللي تشوفه يا أخوي.
زياد: هي يا أبا موافقة!
قاسم: استنى يا ولدي. عايز أسمعها منها.
نواره: الصراحة أنا موافقة.
قاسم: على خير الله، نخلص من اللي إحنا فيه ونعمل خطوبتكم.
نواره (بفرحة): ربنا يخليك لينا يا أخوي.
(في بيت عصام)
حمزه: السلام عليكم.
الجميع: وعليكم السلام.
حمزه: يا خالي، ممكن تفهمني إيه اللي حصل؟ إزاي توافق على خطوبة دهب وحازم؟
عصام: أنا عارف إن قاسم عينه من دهب، وهي كمان مشغولة بيه.
حمزه: أمال ليه الخطوبة دي؟
عصام: إنت عايزني أجوز بنتي لواحد أمه قاتلة ومجرمة؟ وبعدين عنده 3 أطفال؟! لا يا حضرة الظابط. بنتي لازم تتجوز واحد من مقامها.
حمزه: بس قاسم ملوش ذنب.
عصام: ذنبه إنها أمه. وبنتي مش هتربي عيال مش عيالها.
ليلي: أنا كمان شايفة كده.
عصام: إنتي تسكتي خالص! مكفاكيش إن بنتي اتربت بعيد عني طول عمرها؟
دهب: خلاص يا عمي، اللي حضرتك عايزه هنفذه، بس ما تضربش أمي تاني.
ناديه: يلا يا جماعة، استهدوا بالله.
عصام: يلا اطلعوا كلكم فوق.
(ليلي تأخذ فاتن وتخرج. دهب تذهب مع ناديه.)
(قاسم مع أطفاله)
عمرو: إنت بتحبنا صح يا أبا؟
قاسم: آه يا حبيبي، ومعنديش أغلى منكم. سامحوني على اللي فات. من دلوقتي هعيش عشانكم.
زياد: نسامحك على إيه؟ إنت أبونا.
قاسم: أنا كنت فاهم الدنيا غلط. الفلوس مش كل حاجة. تعالوا في حضني.
(يحتضنهم ويناموا جميعًا)
(ناديه مع دهب)
ناديه: مالك يا بنتي؟ مش عايزة تتجوزي حازم؟
(طرق على الباب)
حازم: ينفع أدخل يا ماما؟
ناديه: اتفضل.
حازم: أنا مش عايز أتجوز دهب. أنا معجب بفاتن. ودهب زي أختي.
ناديه: طيب، نعمل خطوبة شكلية ونفركش بعدين. أكون قدرت أقنع خالك.
(تلتفت لدهب) إنتِ بقى، معجبة بقاسم ولا حب من طرف واحد؟
دهب: بحبه وعايزة أطمن عليه.
ناديه: طيب كلميه من الفرانده.
(دهب تتصل على قاسم، لكنه لا يرد. فتتصل على نواره)
دهب: إزيك يا نواره؟ ممكن أكلم جاسم؟
نواره: هو نايم مع عياله.
دهب: أعملي معروف، صحيه.
نواره (تدخل): جاسم، قوم يا أخوي، دهب عايزة تكلمك.
قاسم: لا… مش عايز أكلم حد. اطلعي واقفلي النور.
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
الفصل السابع والثامن والتاسع من هنا
الفصل العاشر والحادى عشر من هنا
الفصل الثالث عشر حتى الفصل السابع عشر من هنا
الفصل الثامن عشر والتاسع عشر والعشرون من هنا
الفصل الحادي والعشرون حتى الفصل الخامس والعشرون من هنا
الفصل السادس والعشرين حتى الفصل التاسع والعشرين من هنا
أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇
❤️💙🌺🌹❤️💙🌺🌹❤️💙🌺🌹❤️💙🌺🌹❤️💙🌺🌹❤️💙🌺🌹
تعليقات
إرسال تعليق