القائمة الرئيسية

الصفحات

رواية زين الحلقه الثانيه عشر والثالثه عشر بقلم الكاتبه سحر فرج حصريه وجديده على مدونة النجم المتوهج للروايات والمعلومات

11111111111111


رواية زين الحلقه الثانيه عشر والثالثه عشر بقلم الكاتبه سحر فرج حصريه وجديده على مدونة النجم المتوهج للروايات والمعلومات 


رواية زين الحلقه الثانيه عشر والثالثه عشر بقلم الكاتبه سحر فرج حصريه وجديده على مدونة النجم المتوهج للروايات والمعلومات 


حسام : طيب قوم معانا وحرك نفسك شويه علشان تهضم السمك اللى انت خلصته كله هو والجمبرى .. قوم قوم وبطل دلع يا عم انت وحرك رجلك علشان تهضم.

الكل فضل يضحك وفعلا عمر قام معاهم، وراح التلت شباب على الكافيتريا وسابوا البنات مع بعضهم بيضحكوا على عمر وعلى اللى بيعمله .

ليل : المكان هنا تحفه، ياريت نفضل قاعدين هنا على طول وننسى كل الماضى واللى حصل فيه .

أيه : فعلا يا لولو المكان حلو اوى والمناظر جميله والبحر روعه .

شاهندا : الصراحه انا جيت روما قبل كده كام مرة بس اول مرة اعرف ان فى جزيرة بالجمال ده كله فى روما. 

ليل : فعلا هو مكان جميل جدا والاجمل لمتنا الحلوه دى يارب ديمها علينا كلنا وما تفرقنا ابدا ابدا .

ايه : اللهم امين يارب العالمين 


الشباب التلاته كانوا رجعوا من الكافيتريا بعد فترة قصيرة، وكانوا جايبين معاهم عصاير وازايز مايه وشويه شيكولاته وحلويات والبنات فرحت جدا وفضلوا قاعدين سهرانين على البحر طول الليل بيتمتعوا بجمال المنظر والهدوء اللى مالى المكان كله فى جو شاعرى ورومانسى جميل .

وفى اخر السهرة قام الكل وكل واحد فيهم مسك ايد مراته ورجعوا على الفندق وكل واحد اخد مراته ودخل الجناح الخاص بيه بعد ما سلموا على بعض وفضلوا يتكلموا شويه عن اللى ناويين يعملوه اول لما يطلع النهار .

            __________________


سميحه وسماح وعبير كانوا رجعوا على الفيلا بعد ما قضوا يوم جميل واتغدوا كمان فى مطعم فى المول وهما فى طريقهم خلوا السواق يوصل شاهى عند يوسف فى الفيلا واطمنوا عليها.

واول لما دخلوا كلهم عبير بفرحه كبيره بصتلهم هما الاتنين وشكرتهم على اليوم الجميل ده اللى عمرها ما هاتنساه ابدا وخدت كل الحاجات اللى اشترتها واستأذنت منهم وطلعت على اوضتها علشان تعير لبسها وتاخد شور وتشيل الحاجه فى الدولاب .


سميحه قعدت بتعب وبصت لسماح اختها 

وقالت : ياااااه تعبت جدا النهارده يا سماح والله وحاسه ان بقالى كتير ممشتش كتير بالمنظر ده .

سماح : ومين سمعك يا اختى ده انا رجلى مش مستحمله خالص ووجعتنى اوى بس كله يهون علشان خاطر عبير وبالتحديد علشان خاطر الراجل الطيب "عم حسن" اللى كان مخلى باله من ليل وكان سند ليها بعد موت ابوها الله يرحمه .

سميحه : عندك حق والله يا سماح واللى زيه ده دلوقتى مش موجود فى زمانا ده خالص راجل طيب وحنين وفى حاله ويعرف فى الاصول والواجب جدا جدا ربنا يديله الصحه وطولة العمر.

الناس اللى زى كده بقت قليله فى الزمن ده يا سماح أوى .

سماح : ياااه يا سميحه فعلا راجل طيب وأمين، ده حتى كان هايضحى بحياته وعمل حادثه كبيرة وهو بيدور على أهل ليل، حتى البواب عندى من فترة بلغنى انه راح السرايه وسأل عن بابا الله يرحمه وعنك انتى كمان يا سميحه . 

سميحه : مش بقولك اللى زى عم حسن ده بقى عمله نادرة فى الزمن ده ربنا يديله الصحه، ويرحم اللى ماتوا.

انا هاقوم اطلع على اوضتى واغير لبسى لانى خلاص مش قادره خالص من كتر التعب وبالمرة اتوضأ واصلى اللى فاتنى.


سماح : ومين سمعك خدينى معاكى يا اختى ادينا نتسند على بعض الظاهر علينا كبرنا خلاص .

سميحه : بتقولى فيها ده الظاهر علينا عجزنا يا سماح .

سماح : الظاهر كده يا اختى 😂

يا ترى العرسان اخبارهم ايه وحشونا جدا .

امتى الايام تعدى ويرجعوا بالسلامه لانهم وحشونا بجد من دلوقتى .

سميحه : ربنا يرجعهم بالسلامه ويملوا علينا البيت كله عيال باذن الله .

وطلعوا على فوق وكل واحدة فيهم دخلت لأوضتها .

          _______________________


عدى الليل وطلع النهار والشمس نورت الدنيا بنورها ودفئها .

يوسف وشاهى كانوا صحيوا من نومهم وجهزوا نفسهم علشان يروحوا على المستشفى علشان يطمنوا على صحه عاصى والد شاهى .

ونزلوا وفطروا حاجه خفيفه على السريع وبعدها على طول خرجوا من الفيلا وركبوا عربيه يوسف وطلعوا بيها على طول على المستشفى .

وقبل ما يوصلوا المستشفى يوسف كان سايق وموبيله رن فجأه وكان مدير مكتبه المتصل  وبلغه ان فى شىء مهم جدا حصل ولازم يروح على الشركه دلوقتى .

يوسف بص لشاهى وقال : انا لازم اروح على الشركه دلوقتى الدنيا ملغبطه هناك شويه هاوصلك لحد باب المستشفى واسبقينى انتى وانا هاخلص حاجه مهمه هناك وارجعلك على طول متقلقيش . 

شاهى : تمام يا عمو ولو فى حاجه مهمه خليك براحتك وأنا هافضل مع بابا لحد ما تخلص كل اللى وراك .

يوسف : لا مش للدرجه دى ساعه بالكتير واكون عندك يا حبيبتى .

وفعلا وصلوا اودام باب المستشفى ونزلت شاهى من العربيه ودخلت على طول ويوسف راح على الشركه . 

وأول لما دخلت شاهى راحت علشان تركب الاسانسير وتطلع بيه للدور اللى فيه الرعايه المركزه .

وفتحت باب الاسانسير ودخلت ولسه هاتقفل الباب شافت اودامها دكتور معتز وهو بيدخل من باب الاسانسير فابتسم لها وقال : صباح الخير .

شاهى بخجل بصتله وقالت : صباح النور يا دكتور معتز .

معتز فضل ساكت خالص، وافتكر صورها اللى شافها على الاكونت بتاعها واستغرب جدا وسأل نفسه معقول تكون هى دى اللى فى الصور طيب ازاى؟!! ازااااااااى.

وبصلها وشاف التغير الكبير اللى حصل ليها من شكل ولبس وكل شىء تقريبا وخلاها تتغير للاحسن ورجع سأل نفسه تانى وقال : يا ترى ايه السبب ؟!

شاهى من نظرات معتز ليها استغربت  واتكسفت جدا وحاولت انها تقطع الصمت ده وقالت : يا ترى بابا حالته ايه النهارده .

وفى اللحظه دى الاسانسير كان وقف والباب اتفتح وخرج معتز وشاهى من الاسانسير ووقفوا اودامه ورد على سؤالها 

وقال : اطمنى يا انسه شاهى، وانا جاى فى الطريق اتصلت على الدكتور زميلى اللى كان موجود نبطشيه طول الليل فى المستشفى  وعرفت منه أن الحاله فى تحسن والحمد لله، واكيد هاننقله على اوضه خاصه بعد ما اشوفه بنفسى واطمن .


شاهى بفرحه مدت اديها ناحيته ومسكت أيده وقالت : بجد يا دكتور معتز!!

أخيرا بابا هايرجع لينا تانى وهايقوم بالسلامه 

وفجأه........

انتبهت أنها من فرحتها مسكت أيد معتز غصب عنها فسحبت ايديها على طول وقالت أنا أسفه .

معتز : حصل خير يا انسه شاهى واتفضلى معايا على مكتبى عقبال لما اشوف الحاله وننقل بابا على اوضته وتشوفيه وتتكلمى معاه براحتك وتتأكدى بنفسك .

شاهى ابتسمت وراحت مع معتز على مكتبه وأول لما دخلت معتز شاور لها على الكرسى وقال : اتفضلى استريحى .

وأنا هاروح اطمن على بابا بنفسى واخليهم ينقلوه لاوضته، وارجع اخدك ليه على طول متقلقيش .

ويادوبك معتز اطمن انها قعدت ولف نفسه ولسه هايخرج من باب مكتبه رجع بص لشاهى بكل فضول وقال : هو انتى عندك اكونت على الفيس بوك بأسمك ؟ 

شاهى السؤال فاجئها وقالت بدون تفكير : لا معنديش .

معتز استغرب جدا من جوابهاده!!

وبصلها بأستغراب وقال : متأكده ؟!


شاهى بتوتر ردت وقالت : أه متاكده 

معتز باستغراب : تمام بعد إذنك وخرج من المكتب بس أسئله كتير دارت فى راسه ومكنش لاقى لها أى جواب .

وبدا يقول لنفسه طيب الاكونت اللى دخلته إمبارح ده ازاى مش بتاعها وعليه صور كتير ليها من زمان ازااااى، ازاااااااى بس . 


حتى فى المكتب شاهى استغربت نفسها وليه كذبت أن ليها اكونت قديم على الفيس!! وكدبت ليه وعلشان مين ؟!

وقالت لنفسها : وهو بيسأل ليه وأيه يخصه اذا كان ليا أكونت ولا لا؟ وعايز منى ايه اصلا ؟

وأيه سبب النظرات اللى بشوفها فى عيونه دايما ليا دى؟!!!

وفضلت على الحال ده شويه لحد ما دخلت عليها ممرضه وبلغتها انها تروح معاها على اوضه والدها الجديده اللى اتنقل فيها.


شاهى انتبهت ليها ولكلامها وقامت بفرحه وراحت معاها على اوضه باباها وأول لما دخلت لقيته نايم على سريره وأبتسم أول لما شاف شاهى .

شاهى بكل فرحه جريت عليه وحضنته بكل فرحه وقالت: بابا حبيبى حمد الله على سلامتك يا روح قلبى.

عاصى بتعب ابتسم وقال : الله يسلمك يا روح قلب بابا وحشتينى يا شاهى .

شاهى : انت اللى وحشتنى اوى يا حبيبى وكنت خايفه عليك جدا .

عاصى بحزن بصلها وقال : بجد كنتى خايفه عليا يا بنتى ؟

شاهى بعيون مليانه دموع : اكيد طبعا كنت خايفه عليك با حبيبى . 

عاصى : يا ترى هاتسامحينى يا شاهى وتدينى فرصه تانيه اعوضك عن كل الايام اللى بعدت عنك فيها وأهملتك ؟ 

شاهى دموعها نزلت ومسكت أيد باباها وباستها وقالت : مسمحاك طبعا يا حبيبى ونسيت كل اللى فات ومن النهارده هانبدا صفحه جديده جدا ما بين أب وبنته .


عاصى هو كمان دموعه نزلت وقال : بس انا للاسف مش هاقدر اسامح نفسى على اهمالى ليكى طول السنين الطويله دى، مش هسامح نفسى أبدا يا بنتى .

شاهى حضنته وقالت : حبيبى يا بابا ارجوك لازم نطوى الصفحه دى من عمرنا ونبدا صفحه جديده ونسامح بعض زى ما ربنا بيسامح عباده لو غلطه .


عاصى مسح دموع بنته وقال : وانا من اللحظه دى اوعدك انى هاكون شخص تانى خالص غير عاصى القديم اللى كان كل همه فى الدنيا شغله وثروته وشركاته وخلاص، 

من اللحظه دى هايبقى عاصى الأب اللى بيحب بنته الوحيده وبيهتم بيها وهايعوضها عن كل الحاجات اللى اتحرمت منها طول عمرها.

شاهى : ربنا يخليك ليا يا حبيبى .

المهم طمنى انت عامل أيه دلوقتى وصحتك عامله أيه؟ انا كنت هاتجنن عليك أنا وعمو يوسف .

عاصى بحزن رد وقال : وماما مزعلتش عليا هى كمان يا بنتى ؟

شاهى غصب عنها ردت وقالت : ماما كانت زعلانه على حضرتك وكانت عاوزة تسفرك برة مصر فى اكبر المستشفيات .

عاصى : وهى فين دلوقتى مش معاكى ليه بدام كانت خايفه عليا .

شاهى : الصراحه انا من ساعه ما حضرتك جيت هنا وانا قاعده مع عمو يوسف فى الفيلا بس هى اكيد شويه وهتلاقيها هنا وجايه تطمن عليك .

عاصى : ماشى يا بنتى، وفين يوسف مش معاكى ليه ؟

شاهى : عمو يوسف كان جاى معايا بس جاله تليفون من الشركه مهم ووصلنى لحد هنا وزمانه جاى .

ولسه مكملتش كلامها إلا وكان داخل يوسف من باب الاوضه بكل فرحه وبيقول : انا هنا مين بيسأل عليا . 

وقرب يوسف من اخوه عاصى وحضنه وباسه وقال : حمد لله على سلامتك يا حبيبى قلقتنا عليك اوى .

عاصى بكل حنيه وحب قال : الله يسلمك يا حبيبى وربنا ما يحرمنى من وقفتك دايما جنبى .

يوسف : عد الجمايل بقى يا باشا وضحك وقال : يا عاصى انت اخويا اللى ماليش غيره فى الدنيا دى كلها ولازم أكون جنبك فى كل شىء .

الحلو والوحش 

الخير والشر

الصحه والمرض

احنا اخواااااات با حبيبى.

شاهى بدلع : يا سلام يا عمو وانا روحت فين بدام ملكش غيره فى الدنيا .

وفجأه.......

دخل عليهم معتز وسلم على يوسف وشاهى عيونها مركزه عليه .

ويوسف رد السلام وشكره على تعبه معاهم طول فترة تعب اخوه عاصى .

يوسف بص لعاصى وقال : دكتور معتز كتر خيره فضل جنبك طول الكام يوم اللى فاتوا دول وكان دايما بيطمنا على صحتك .


عاصى ابتسم وقال : الصراحه انا مش عارف اشكره ازاى وكل اللى اقدر اقوله ليه دلوقتى متشكر جدا ليك وربنا يجازيك كل خير على كل اللى بتعمله للمرضى .

معتز عيونه مجتش على شاهى خالص وده اللى خلاها تستغرب جدا. 

معتز رد على عاصى وقال : ملوش داعى انك تشكرنى يا عاصى بيه، ده واجبى وشغلى ورسالتى فى الحياه اللى حاربت كتير علشان اقدر اوصلها.

وعلى العموم الف سلامه على حضرتك مرة تانيه وياريت نبعد خالص عن التوتر والقلق والعصبيه طول الفترة اللى جايه دى لحد ما نسترد صحتنا من جديد، والزيارة برضه تكون قصيرة وخفيفه والف سلامه عليك وخرج على طول وساب الاوضه . 

شاهى عيونها كانت عليه لحد ما خرج ويوسف لاحظ عليها كده فقال : نحن هنا روحتى فين يا شوشو ؟

شاهى انتبهت لصوته وبصتله وقالت : بتقول حاجه يا عمو ؟

يوسف : بقول سرحانه فى ايه يا قطه ؟

شاهى قربت عليه وحطت ايديها فى وسطها وقالت : هاكون سرحانه فى أيه بس يا عموووو .

أنا مستغربه بس ان ماما مجتش لحد دلوقتى مش اكتر، هاخرج برة شويه واتصل اشوفها مجتش ليه .

يوسف حس بشىء غريب بين شاهى ومعتز بما انه عارفها كويس اوى فرد وقال : تمام يا قطه بي ما تتأخريش .

شاهى خرجت من الاوضه بسرعه وبصت يمين وشمال بدور على دكتور معتز لحد ما لمحته دخل اوضه مريض تانى فى اخر الممر فمشيت وراحت على طول لهناك .

وفضلت منتظرة بره الاوضه شويه لحد ما خرج معتز بعدها بكام دقيقه واتفاجأه بوجود شاهى اودامه فى انتظاره، فعمل نفسه مش شايفها ومشى وسابها .

شاهى : معتز 

فالتفت ليها معتز وبصلها .

شاهى بأحراج : اقصد دكتور معتز .

معتز : افندم .

شاهى قربت خطوتين منه وقالت : انا عاوزة اعترفلك بحاجه مهمه .

معتز : آسف مش فاضى ورايا شغل .

شاهى : مش هأخرك كتير هما دقيقتين مش اكتر ارجوك .

معتز : وانا اسف الثانيه الواحده مع المرضى بتفرق معاهم جدا يا انسه شاهى، ولف نفسه وادالها ضهره ولسه هايمشى .

شاهى : انا عندى اكونت على الفيس بوك

والصور اللى عليه كلها كانت بتاعتى من فترة .

فى اللحظه دى معتز وقف لثوانى معدودة وهو مديلها ضهره وفكر فى كل كلمه شاهى قالتها واتنهد جااااامد ومشى على طول بدون اى كلمه .

شاهى كبريائها وجعها جدا واستغربت تغير معامله معتز ليها فجأه كده واستغربت اكتر نفسها. 

وفجأه وهى واقفه وعيونها مكان ما معتز مشى وسابها حست بأيد بطبطب على كتفها ولفت نفسها علشان تشوف مين هو الشخص ده لقيته عمها يوسف .

فاترمت فى حضنه من غير ما تحس وبدأت تعيط بكل وجع .

يوسف كان سمع كل الحوار اللى دار بينها وبين دكتور معتز، واصلا كان عنده احساس ان معتز معجب بشاهى من نظراته ليها من فترة .

بدأ يهدى شاهى وقال : اهدى يا حبيبتى حصل ايه بس لكل ده قوليلى .

شاهى بحزن : الماضى بتاعى عمره ما هايتنسى يا عمو .. شاهى القديمه هاتفضل موجوده على طول .. مع انى حاولت انى انساها واكون شاهى جديده عكس الاولى  بس الظاهر مقدرتش .

يوسف: حبيبتى عمر الماضى ما هاتقدرى تنسيه .. المهم انك تغيرى من نفسك وتبقى شاهى جديده الكل يحبها ويحترمها وهو ده اللى هايمحى على شاهى القديمه .


شاهى بعياط : ربنا يعلم انا بحاول أد إيه إنى أغير من شاهى القديمه .

شاهى البنت الدلوعه المستهترة .. اللى كانت بتسهر لوش الصبح مع اصحابها فى الكافيهات اللى كل حاجه كانت بتشتريها بفلوسها، حتى الناس اللى كانوا حواليها كانت بتشتريهم بفلوسها، محدش كان يقدر يقولها لا . 

لحد ما ظهرت ليل فى طريقها وانقذتها وكانت السبب فى التغير الكبير ده .

بس للاسف هايفضل الماضى يطاردها فى كل شىء ويفكرها بشاهى القديمه .

يوسف : أهدى يا حبيبتى وحاولى تنسى الماضى بكل اللى فيه وبإذن الله ربنا هايكتبلك كل خير.  

شاهى مسحت دموعها وبصت لعمها

وقالت : شكرا انك معايا فى كل شىء بيحصل ليا فى اى وقت، انا مش عارفه من غيرك كنت عملت ايه .

يوسف : شاهى انتى مش بنت اخويا عاصى وبس ، انتى اختى الصغيرة اللى بحبها ولازم اكون جنبك فى كل شىء .

شاهى : ربنا ما يحرمنى منك يا حبيبى ، يالا بينا نروح لبابا زمانه مستغرب إحنا اختفينا فجأه كده ليه .

يوسف : لا متقلقيش انا سبته ينام شويه وقولتله هاخد شاهى وننزل على الكافيتريا شويه نشرب قهوة .

شاهى : طب يالا بينا لان دماغى فعلا محتاجه فنجان قهوة، وبالمرة أكلم عبير وأطمن عليها واعزمها على العشاء فى أى مكان باليل .

يوسف وشه اتغير اول لما شاهى جابت سيرة عبير وابتسم وقال : عشاء ومن ورا عمو يوسف يا شوشو لا أنا زعلان .


شاهى ابتسمت وحست ان عمها معجب بعبير فضحكت وقالت : جرى أيه يا عمو هو حصل ولا ايه ؟!

يوسف : حصل ايه بس يا بنتى مش بتقولى عشاء وخروج وكده .

شاهى ضحكت وقالت : مش على شاهى يا عموووووو .

يوسف : طيب بطلى لماضه ويالا يا هانم ننزل نشرب القهوة لان راسى هاتفرقع من شدة الصداع اللى فيها .

وفعلا خدوا بعضهم ونزلوا على الكافيتريا هما الاتنين .  

             __________________


العرسان فى الفندق كانوا صحيوا من بدرى واتجمعوا فى المطعم .. وبعد ما فطروا خرجوا يعملوا جوله على الجزيرة .

زين كان ماسك أيد ليل وماشيين على شط البحر بيستمتعوا بجمال المكان اللى حواليهم من شمس ورمله ومايه .

وحسام وأيه فضلوا انهم يقعدوا تحت شمسيه على البحر ويستمتعوا بالمنظر والهدوء اللى حواليهم فى كل مكان. 

وعمر وشاهندا كانوا ماشين ورا زين وليل وبيحاولوا انهم يهزروا ويرخموا عليهم كعادتهم .

وفجأه .............😲😲😲😲

وهما ماشين هما الاربعه سمعوا صوت صريخ واستغاثه من على بعد وكأن بنت بتصرخ بأعلى صوت .


وقف الكل وبكل صدمه واستغراب ليل بصت لزين وقالت : ايه الصوت ده ؟ 

زين : مش عارف!!

وسمعوا صوت الصرخه تانى وحاولوا يعرفوا مصدرها فين بالضبط .

زين بصلهم وقال : الصوت جاى من الاتجاه ده تعال نشوف فى ايه بالضبط يا عمر . 


#الحلقة_13

#الجزء_الثاني

وفجأه .............😲😲😲😲

وهما ماشين هما الاربعه سمعوا صوت صريخ واستغاثه من على بعد وكأن بنت بتصرخ بأعلى صوت .

وقف الكل وبكل صدمه واستغراب ليل بصت لزين وقالت : ايه الصوت ده ؟ 

زين : مش عارف!!

وسمعوا صوت الصرخه تانى وحاولوا يعرفوا مصدرها فين بالضبط .

زين بصلهم وقال : الصوت جاى من الاتجاه ده تعال نشوف فى ايه بالضبط يا عمر .


زين مشى خطويتين ورجع بص للبنات ورجع بص لعمر بحيرة كبيرة

وقال : طيب خليك يا عمر معاهم انت هنا ومتسبهمش لوحدهم وانا هاروح فى اتجاه الصوت ده واشوف فى ايه بالضبط وانا حاسس ان اكيد الصوت ده مش اكتر من مجموعه مع بعضهم وبيهزروا .


ليل بخوف مسكته من ايده وقالت : لا انا مش مطمنه خالص يا زين بلاش تروح هناك لوحدك وتعالوا نرجع كلنا على الفندق لو سمحتوا ارجووووكم انا خايفه.

زين حاول يطمنها ويهديها وقال : حبيبتى لو سمحتى متخافيش واكيد حاجه هايفه وبسيطه مش اكتر خليكى مع عمر وشاهندا وانا هاروح اشوف فى ايه بالضبط وارجع بسرعه متقلقيش، وبعدين هايكون فى ايه يعنى اطمنى!!

وفعلا اطمنت ليل شويه من كلام زين بس حاجه غريبه جواها كانت مخوفاها جدا ومش مطمناها. 

وفعلا مشى زين فى اتجاه الصوت اللى سمعوه وفضل ماشى يدور على مكان مصدره فين بالضبط وللاسف مكنش سامع اى شىء نهائي تانى وده اللى خلاه مش عارف يمشى او يدور فى اى اتجاه بالتحديد ، بس أتصدم أول لما عينه لمحت على بعد حاجه غريبه مكنتش يتوقعها ابدا، فقرب منها بسرعه واتصدم اول لما شاف بقعه دم كبيرة على الارض .

فقرب منها اكتر بكل حرص ، ونزل على الارض برجله لمستواها ومد أيده عليها علشان يتأكد انه فعلا دم . 

وللاسف اول لما مد ايده ومسك حفنه من التراب اللى عليه الدم ده فى ايده اتأكد أنه دم فعلا .

فقام وقف بصدمه كبيرة وبشويش التفت يمين وشمال يدور على أى شىء يوصله لمصدر الدم ده ويتتبعه.

لحد ما شاف بقه دم تانيه على بعد كام متر واستغرب اكتر،

وسمع فجأه على بعد كام متر منه صوت راجل بيتكلم بالأيطالى وفهم زين من كلامه ده انه بيهدد بنت وبيتوعد لها أنها لو ما نفذتش اللى هما طلبوه منها بالضبط هايقتلوها بجد المرة دى مش هزار ولا مجرد تهديد زى المرة اللى فاتت .

فاتصدم زين من كلامه وتهديده ده للبنت وقرب من مصدر الصوت بكل هدوء واللى كان جاى من ورا صخره كبيرة واقفين وراها هما الاتنين .

فقرب من ورا الصخرة بشويش وحاول يشوف شكل الراجل والبنت دول ايه وفعلا قرب اكتر وشاف البنت وهى قاعده على الارض بتنزف من وشها وراسها وبتتوسل ليه انه يسيبها فى حالها ويخليها تمشى، وكان الراجل ده ماسكها من شعرها بكل قوه وجبروت.

وكانت رجل البنت اليمين بتنزف بشده، وده اللى جنن زين اكتر لما شاف منظرها ده ولسه هايقرب زين منها ويساعدها 

الا واتفاجأه بحد ضربه فوق راسه ووقعه على الارض 😔

           ___________________


وبعد كام دقيقه بالتحديد ليل بكل توتر وخوف بصت لعمر وقالت : انا قلقانه على زين اوى، ومش هاقدر اقف اكتر من كده انا هاروحله يا عمر . 

عمر : عندك حق هو كده اتأخر علينا جدا، خليكم أنتم هنا أو ارجعوا عند حسام وأيه وأنا هاروح اشوف زين وأجيبه بسرعه ونرجع ليكم على طول . 

شاهندا : لا متسبنيش هنا أنا وليل لوحدنا

أنا خايفه اوى يا عمر وقلبى قلقان من ساعه ما سمعت الصرخه دى .

ليل : وأنا مش هاروح فى أى مكان إلا رجلى على رجلك يا عمر ولو مش هاتيجى معايا هاروح أنا لوحدى وأشوف زين بنفسى .


عمر بنفاذ صبر بصلهم هما الاتنين وقال : طيب يالا بينا هاخدكم معايا بس مش عاوز أسمع أى صوت ليكم نهائى لحد ما نشوف فى أيه بالضبط بيحصل .

ليل بكل توتر وقلق بصتله وقالت: ماشى يا سيدى بس يالا بينا بقى. 

وفعلا عمر خدهم ومشيوا هما التلاته فى نفس الاتجاه اللى مشى منه زين وفضلوا يدوروا يمين وشمال لحد ما اتصدموا وخافوا اكتر لما شافوا بقعه الدم اللى كانت على الارض .

ليل بكل خوف وصدمه بصت بذعر لعمر وقالت : زين فين يا عمر ؟!

عمر بتوتر : أهدى يا ليل ومتخافيش دى اكيد أى لون وقع على الارض من اى حد ولا أى حيوان او طائر مجروح وبينزف مش اكتر متخافيش واهدى. 

ليل : لا يا عمر انا قلقانه أوى وحاسه أن فى حاجه كبيرة حصلت هنا. 

شاهندا بكل خوف وتوتر جواها بتحاول تداريه علشان متقلقش ليل وعمر اكتر 

قالت : يا بنتى متقوليش كده هايكون حصل ايه بس اكيد هنلاقيه دلوقتى متخافيش يا ليل.

ليل حاولت تتمالك نفسها شويه وكملوا مشيهم وهما بيدوروا على زين لحد ما فجأه وبكل صدمه وقفت ليل وبرقت بعيونها الاتنين😲 أول لما لمحت نضارة زين واقعه على الارض ومكسورة نصفين .

ليل بصدمه بصت لعمر بكل خوف وقالت : زين حصله أيه يا عمر؟!!

عمر بسرعه جرى ناحيه النضارة ومسكها فى ايده من على الارض علشان يتأكد انها فعلا نضارة اخوه واتصدم أول لما اتأكد انها فعلا نضارة زين اللى كان لابسها .

ومن الصدمه الكبيرة اللى كان فيها بدأ عمر يجرى يمين وشمال وبأعلى صوته بينده ويقول : زيين 

ياااااااااا   زييييين 

يااااااا  زيييييييييييين 

ليل بدأت تعيط جامد وشاهندا رغم الخوف اللى جواها بتحاول تهديها بس غصب عنها بدأت تعيط هى كمان.

وبدأ التلاته يجروا فى كل مكان بكل خوف وقلق يدوروا على زين اللى اختفى فى لمح البصر .

حتى حسام وأيه كانوا بيتمشوا على البحر مع بعضهم هما الاتنين بظروفها، وسمعوا صوت عمر وهو بينده على زين بأعلى صوته واستغربوا جدا وراحوا يدوروا علي مصدر الصوت لحد ما لاقوهم واتصدموا من حاله ليل وشاهندا وعياطهم  انهيارهم وسألوا عمر عن السبب .

وعمر بكل توتر وقلق حكالهم على كل اللى حصل معاهم من ساعه ما سابوهم وعلى اختفاء زين الغريب .

حسام كان مصدوم فقال : ازاى يعنى اختفى اكيد بيتمشى هنا او هنا يا عمر ودلوقتى هايجى متقلقوش .

عمر بعصبيه بصله وقال : يا ابنى بقولك كان فى واحده بتصرخ وفى كمان آثار دم على الارض فى كل مكان ولقينا نضارة زين مكسورة وهو اختفى معرفش ازاى😡


ازاى بقى تقولى بيتمشى يا حسام ازاااى بس قولى .

حسام : اهدى طيب يا ابنى انت علشان خاطر البنات وخلينا نفكر ونشوف هانعمل ايه، واهم حاجه تعال نرجع البنات على الفندق الاول واحنا هانتصرف .

ليل بعياط : انا مش راحه فى أى مكان غير لما زين يرجع. 

شاهندا : وانا كمان مش هاروح فى أى مكان ولازم نفضل كلنا مع بعض .

عمر : البنات عندهم حق، وبالمنظر ده مينفعش نسيب البنات لوحدها خالص يا حسام فى أى مكان واحنا مش عارفين ايه بالضبط اللى بيحصل هنا على الجزيرة الشؤم دى 😡

حسام : طيب تعالوا نرجع على الفندق كلنا ونشوف الكاميرات اللى هناك اكيد الجزيره عليها كاميرات فى كل مكان وفى كل ركن منها واكيد هانعرف زين اختفى فين بالضبط.

_____________________


وفى الفيلا عند سميحه كان الكل متجمع فى الجنينه سماح وسميحه ومعاهم عبير قاعدين وبيتكلموا مع بعض .

سميحه فجأه حست بشىء غريب جواها وبصت لسماح اختها وقالت: "اعوذ بالله من الشيطان الرجيم" مش عارفه انا قلبى وجعنى من الصبح ليه كده ربنا يسترها.

سماح : ليه كده بس يا حبيبتى تلاقيهم شويه برد وهايروحوا لحالهم .

سميحه : جايز برده ان شاء الله وقامت وقفت وقالت : انا هاروح المطبخ واخلى ميرفت تعملى اى حاجه دافيه جايز يريحونى شويه بدل الوجع ده اللى حاسه بيه . 

عبير : وتقومى ليه بس يا طنط وحضرتك تعبانه انا هاروح على المطبخ واعمل لحضرتك بنفسى الحاجه الدافيه خليكى مرتاحه .


سميحه بكل طيبه وحنيه ردت عليها 

وقالت : تسلميلى يا حبيبتى بس ما تتعبيش نفسك قولى لميرفت وهى هاتعمل بنفسها وارجعى اقعدى معانا .

عبير : ولا تعب ولا حاجه يا ست الكل انتى تؤمرى وانا انفذ على طول .

وعلى العموم دقايق وتكون الحاجه الدافيه عندك يا حبيبتى .

وفعلا قامت عبير وراحت على المطبخ وسماح بدأت تقلق على اختها ومنظرها وحالتها المتغيرة وحست فعلا ان لونها اصفر وجبينها عليه قطرات عرق صغيرة .

سماح بصت لاختها وقالت : سميحه حبيبتى 

تحبى اتصل بالدكتور يجى ويطمن عليكى بنفسه ويطمنا.

سميحه لسه هاتتكلم وترد عليها بس للاسف مسكت صدرها وبدأت تتألم جدا وقالت مش قادرة ، مش قادرة اتنفس يا سماح الحقينى وفى لحظه فقدت الوعى .

سماح بصرخه جريت على اختها وقالت : سميحه .. سميحه .. سميحه ردى عليا يا حبيبتى .

الحقونى .. الحقونى بسرعه حد يتصل بالاسعاف بسرعه.

وجه البواب وجت عبير وميرفت وداده زينب بسرعه على صوت سماح والاستغاثه اللى سمعوها منها، وخلال ثوانى اتصلوا على المستشفى وطلبه عربيه إسعاف وخلال عشر دقايق بالضبط كانت وصلت عربيه الإسعاف ونقلوا سميحه على المستشفى .

وركبت سماح اللى كانت خايفه وميته من كتر العياط على اختها واللى حصلها فجأه 

هى وعبير مع السواق الخاص بيهم وراحوا ورا عربيه الإسعاف على طول.

وأول لما وصلوا اودام باب المستشفى بسرعه دخلوا سميحه على جوا ودخلوها اوضه الإستقبال.

وانتظرت سماح بكل خوف وتوتر هى وعبير اودام باب الطوارئ .

عبير : أهدى يا طنط إن شاء الله هاتكون كويسه وتقوم بالسلامه . 

سماح بدأت تعيط اكتر وقالت : أنا مش عارفه حصل كده ازاى فى لحظه، دى كانت قاعده معانا وبتكلمنا وفطرنا مع بعض كلنا وخرجنا الجنينه كمان على يدك يا عبير، بس انا لاحظت ان وشها لونه متغير وشاحب وباين عليه التعب والارهاق من ساعه ما شوفتها الصبح .

عبير : باذن الله هاتبقى كويسه .. هى بتشتكى من اى حاجه اصلا .. يعنى هى مريضه قلب او سكر او ضغط ؟!

سماح : ايوا هى عندعا الضغط من سنين طويله ودايما بتاخد علاجها بانتظام انا مش عارفه بس أيه اللى جرالها بس؟!!

عبير : ربنا يسترها ويشفيها ويعديها على خير ان شاء الله اطمنى يا طنط.

سماح بعياط وحرقه قالت : يارب يااارب انا ماليش غيرها فى الدنيا دى كلها هى اختى وامى وصحبتى وحبيبتى وكل ما ليا اشفيها وعافيها يارب وقومها بالسلامه.


وعيطت بحرقه اكتر وقالت: اقول أيه لزين وعمر لو اتصلوا علينا فجأه دلوقتى أقول ايه بس ياربى ؟!

وفجأه موبيل عبير رن وعبير طلعته من جيب البنطلون بتاعها وردت على طول 

وقالت : ايوا يا شاهى اذيك .

شاهى : الحمد لله بخير حبيبتى ، اذيك انتى يا عبير واخبار طنط سماح وسميحه أيه يارب يكونوا بخير ؟!

عبير بعدت شويه بالموبيل عن سماح علشان تتكلم براحتها وقالت : الصراحه احنا فى المستشفى طنط سميحه تعبت جدا من شويه ونقلناها على المستشفى بتاعه دكتور حسام . 


شاهى بذهول ردت وقالت : ايه ده معقوله!؟

وهى عامله ايه دلوقتى طمنينى ارجوكى يا عبير؟ 

وانتم فين بالتحديد دلوقتى ده انا فى المستشفى برضه بس قاعده فى الكافيتريا مع عمو يوسف .

عبير ردت وقالت : احنا واقفين اودام باب الطوارىء منتظرين حد بهرج من جوا ويطمنا على طنط سميحه .

شاهى : طيب اقفلى بسرعه وثوانى وهاكون عندك على طول .

ويادوبك قفلت عبير الموبيل وشافت باب الطوارئ اتفتح وخرج دكتور من جوا فقربت من سماح اللى كانت جريت اول ما شفته علشان تطمن على اختها .

سماح بكل قلق وتوتر بصتله وقالت : طمنى يا دكتور ارجوك اختى عامله ايه دلوقتى وعندها ايه بالضبط ؟

الدكتور : حضرتك اختها ؟

سماح : اه انا اختها .

الدكتور : الصراحه الحاله صعبه جدا ولازم ننقلها حالا على الرعايه فى اسرع وقت ممكن .

سماح بصدمه : يا خبر هى جرالها ايه يا دكتور قولى ؟

الدكتور : للاسف عندها ذبحه صدريه وجلطه على القلب، بعد اذنك لازم ادخلها فورا للرعايه المركزه.

وفعلا دخل الدكتور وقفل الباب وراه وساب سماح فى ذهول وصدمه كبيرة.

سماح بدأت تعيط بحرقه من شده الصدمه

وعبير قربت منها وحضنتها وقالت : اهدى يا طنط ارجوكى متعمليش فى نفسك كده وان شاء الله هاتبقى كويسه وبخير .


شاهى بعد ما قفلت مع عبير قامت وقفت وبلغت يوسف باللى عرفته ويوسف اتصدم وفى ثوانى كانوا خارجين من الكافيتريا وراحوا على مكان الطوارئ .

واول لما وصلوا شافوا سماح وعبير والحاله الصعبه اللى كانت سماح عليها .

يوسف بقلق قرب منهم على طول وبص لسماح وقال: خير يا سماح هانم والف سلامه عليها الدكتور قالكم ايه ؟

سماح مقدرتش ترد عليه من كتر العياط وعيتط اكتر لما شافت يوسف وشاهى اودامها وعبير على طول بلغت يوسف بكلام الدكتور واتصدم هو وشاهى باللى سمعوه من عبير عن حاله سميحه هانم .


يوسف : ان شاء الله هاتبقى افضل من الاول وتقوم بالسلامه اهدى يا سماح هانم ارجوكى وادعيلها زى ما كلنا هاندعيلها، سميحه هانم انسانه قويه ومؤمنه وان شاء الله ربنا هايقف معاها وتقوم بالسلامه .


سماح : اقول ايه لزين وعمر لما يسألوا على مامتهم أقول أيه بس يا يوسف قولى .


يوسف : ان شاء الله هاتقوم بالسلامه وتخرج من المستشفى ومش لازم نبلغهم باى شىء دلوقتى غير لما نطمن عليها وتشد حيلها وتف

سماح : يارب يا يوسف ياااارب انا ماليش غيرها فى الدنيا دى.

يوسف : ان شاء الله خير.

وبعدها يوسف مسك موبيله وبعد شويه عنهم واتصل على دكتور معتز وبلغه بكل اللى حصل لسميحه هانم وكمان طلب منه انه ما يبلغش دكتور حسام بأى شىء دلوقتى لحد ما يشوفوا هايعملوا ايه بالضبط وبعدها قفل معاه على طول ورجع وقف جنب سماح والبنات عند الطوارئ .

وخلال دقايق كان وصل معتز عند الطوارىء وسلم عليهم كلهم وحاول يطمن سماح بالذات ودخل بنفسه علشان يطمن على سميحه ويعرف الحاله ايه بالضبط من الدكتور اللى كشف عليها . 

           ___________________


وفى ايطاليا على الجزيرة عند العرسان الدنيا كانت مقلوبه على الاخر ومدير أمن الفندق كان مع حسام وعمر والبنات بيفرغوا الكاميرات اللى موجوده فى كل ركن فى المكان بعد ما بلغهم حسام بكل اللى حصل من الاول واختفاء زين.  

وجابوا الكاميرات وبالتحديد فى المكان اللى اختفى فيه زين بالضبط .. وأول لما شافوا زين ظاهر فى الكاميرا ليل بذهول

قالت : زين اهو ، زين أهو يا حسام أول ما سابنا وراح يدور على صوت الصرخه اللى كنا سمعناها فى المكان .

عمر : اهدى يا ليل ارجوكى واستنى لما نشوف حصل أيه بالضبط بعدها .

كملوا مراقبه الكاميرات وشافوا زين لما شاف بقعه الدم على الارض وكمان لما قام ووقف جنب الصخره حوالى دققتين تلاته، واستغربوا هو كان واقف بيعمل ايه، وحاولوا انهم يجيبوا الكاميرا التانيه اللى فى الاتجاه الخلفى للصخرة وللاسف كانت مش شغاله وده اللى لفت نظر حسام بالتحديد واستغرب لكده .

وفجاه الكاميرا اللى كان ظاهر فيها زين وقفت خالص هى كمان وده اللى خلاهم يستغربوا اكتر واكتر للى بيحصل.

وللاسف محدش عرف ايه اللى حصل ولا زين اختفى فين ؟

وكمان أيه سر الكاميرات اللى اتعطلت فجأه دى وبالذات فى التوقيت ده .

ليل بدأت تعيط جامد وعمر وحسام اتوتروا اكتر واكتر واستغربوا جدا للى بيحصل .

ومدير الامن طلب من الامن كله انه يقلب الجزيرة كلها لحد ما يلاقوا زين فين وايه اللى حصل وايه سر الدم اللى موجود ده.


وفعلا الكل كان بيدور فى كل شبر على الجزيره حتى عمر وحسام كانوا معاهم بيدوروا فى كل مكان .

والبنات فضلوا فى الفندق مع ليل فى اوضتها واللى حالتها كانت وحشه جدا من كتر خوفها على زين ومش مبطله عياط ولا هى ولا شاهندا بنت خالته .


وبعد فترة طويله واخر ما زهقوا وفضلوا يدوروا حوالى خمس ساعات حسام وعمر طلبوا من مدير الفندق انه يتصل بالشرطه فى روما ويبلغوهم باللى حصل.

حسام : احنا لازم نتصل بالشرطه وهما اللى هايقدروا يقولوا زين اختفى فين بالضبط وايه اللى حصله .

عمر : عندك حق يا حسام إحنا كأننا بندور  على إبرة فى كوم قش أنا مش عارف بس هو اختفى فين وازاى ؟

حسام : انا خلاص عقلى هايقف من كتر التفكير وفى علامات استفهام كتير مش قادر افسرها .

عمر : طب والعمل أنا بدأت اقلق وأخاف على زين يا حسام ومش عارف هانقول أيه لى ليل وللبنات دلوقتى .

والكارثة الأكبر لو ماما اتصلت علينا وسألتنى عن زين هاقولها هو فين يا حسام ؟ 

هاقولها اخويا ضاع ومش لاقيه خلاص؟!


حسام : أهدى يا عمر واتماسك اكتر من كده علشان خاطر ليل بالذات لو شفتك فى الحاله دى هاتتعب اكتر .

كل الكلام اللى دار بينهم ده، كان فى شخص واقف على بعد بيسمعهم وهما مش شايفينه وفضل يراقبهم لحد ما قاموا من مكانهم وطلعوا للبنات فوق .

البنات كانوا قاعدين مع ليل فى اوضتها واول لما سمعوا صوت خبط على الباب خافوا وقلقوا .

أيه قامت وقفت وقربت من الباب بكل حزر وقالت : مين بيخبط ؟

حسام رد وقال : افتحى يا حبيبتى انا حسام ومعايا عمر . 

ليل أول لما سمعت كده قامت وقفت بسرعه وراحت فتحت الباب وعيونها فى كل مكان بتدور على زين ، واتصدمت لما ملقتهوش واقف معاهم .

ليل بحزن : فين زين مجاش معاكم ليه ؟

عمر قرب منها ومسك ايديها وقال : للاسف يا ليل لحد دلوقتى مش قادرين نوصله ولا نعرف بالضبط أيه اللى حصله .

ليل بصدمه بصتله أوى وقالت : يعنى أيه!! زين ضاع، 

زين أختفى،

زين مش هاشوفه تانى خلاص، 

اخوك ضاع مننا يا عمر .

وبصت لحسام وقالت : صاحبك ضاع يا حسام، زين خلاص مش هاشوفه تانى .

وفى لحظه واحده وقعت ليل على الارض وفقدت الوعى من كتر زعلها وخوفها على زين وعلى اختفاءه الغريب ده .

عمر : ليل 

ليييييل 

وبسرعه شالها من الارض وحطها على السرير وأيه وشاهندا كانوا مصدومين من كل اللى بيحصل حواليهم وحسام قرب منها وبدأ يفوقها .

حسام بص لأيه وقال : هاتى بسرعه ازازة برفان من عندك يا أيه .

أيه فى لحظه كانت جايباها من على التسريحه، وادتها لحسام وحسام بدأ يفوقها واحده واحده لحد ما فاقت ليل وعيونها فتحت وبدأت تبصلهم واحد واحد وهى بتقول بكل تعب ووجع : زين .. زييين 

زييييين ضاع خلاص وبدأت تعيط جامد وبكل حرقه لأنها مش عارفه مصير زين ايه. 


حسام : اهدى يا ليل ارجوكى واحنا طلبنا من مدير الفندق انه يتصل بالشرطه وزمانهم جايين واكيد هايقدروا يعرفوا بالضبط زين اختفى فين وازاى ويقدروا يلاقوه ويرجعوه بنفسهم .

عمر : ان شاء الله زين هايرجع وهانرجع نتجمع تانى كلنا، انا عندى أمل كبير فى ربنا وان شاء الله هايرجع اطمنى يا ليل .

ليل بكل حرقه : ان شاء الله يا عمر، ان شاء الله هايرجع انا قلبى حاسس .

شاهندا : ان شاء الله يا حبيبتى هايرجع. 


يا ترى زين اختفى فين وايه اللى حصل معاه بالضبط😔

ويا ترى هايقدروا يرجعوه تانى لما الشرطه تيجى الجزيرة😔

تابعووووووني 



الحلقه الرابعه عشر والخامسة عشرة من هنا




بداية الروايه من هنا




أدخلوا واعملوا متابعة لصفحتي عليها كل الروايات بمنتهي السهوله من هنا 👇 ❤️ 👇 


صفحة روايات ومعلومات ووصفات






تعليقات

التنقل السريع
    close