رواية زين الجزء الثاني الحلقه الرابعه عشر والخامسة عشرة بقلم الكاتبه سحر فرج حصريه وجديده على مدونة النجم المتوهج للروايات والمعلومات
 |
رواية زين الجزء الثاني الحلقه الرابعه عشر والخامسة عشرة بقلم الكاتبه سحر فرج حصريه وجديده على مدونة النجم المتوهج للروايات والمعلومات
حسام : اهدى يا ليل ارجوكى واحنا طلبنا من مدير الفندق انه يتصل بالشرطه وزمانهم جايين واكيد هايقدروا يعرفوا بالضبط زين اختفى فين وازاى ويقدروا يلاقوه ويرجعوه بنفسهم .
عمر : ان شاء الله زين هايرجع وهانرجع نتجمع تانى كلنا، انا عندى أمل كبير فى ربنا وان شاء الله هايرجع اطمنى يا ليل .
ليل بكل حرقه : ان شاء الله يا عمر، ان شاء الله هايرجع انا قلبى حاسس .
شاهندا : ان شاء الله يا حبيبتى هايرجع.
______________________
وللاسف عدى حوالى اسبوع على اختفاء زين ومحدش قدر يوصل لمكانه ابدأ طول الفترة الطويله دى حتى الامن بتاع الجزيرة نفسه او حتى يعرفوا سبب اختفاءه ايه بالضبط.
والكل كان فى حاله خوف وتوتر وقلق وحزن وبالذات ليل وعمر .
حتى الشرطه لما جت من روما مقدرتش توصل لاى خيط يوصلها لزين، او تعرف سبب اختفاءه ايه طول الفترة دى زكانت بتدور وبتحقق مع الكل فى الجزيرة كلها .
حسام وعمر كانوا معظم وقتهم بيدوروا فى كل مكان وبيسألوا كل الناس اللى كانت موجوده على الجزيره فى اليوم ده عن زين جايز حد يكون شافه او يعرف ايه اللى حصل معاه بالضبط فى التوقيت ده .
لحد ما بظروفها وهما ماشين على شط البحر قابلوا شاب اسمر اللون ملامحه بتدل على انه عربى كان واقف شغال جنب مركب صغير من المراكب الكتير اللى كانت موجوده.
حسام قرب منه وكلمه بالايطالى الاول
وقال : مساء الخير
الشاب ابتسم لهم وقال بالعربى: مساء النور .
عمر وحسام اتفاجئوا انه بيتكلم عربى زيهم وشكهم طلع فى محله .
حسام : انت عربى ؟
الشاب : انا من سوريا وبشتغل هنا من فترة على الجزيرة واسمى جاسر .
حسام : اهلا وسهلا بيك يا جاسر، انا حسام وده صديقى عمر من مصر وبقالنا كام يوم هنا على الجزيرة دى .
جاسر : اهلا وسهلا بيكم وبأهل مصر نوروتوا ايطاليا كلها، ويا ترى جايين هنا شغل زى حلاتى ولا مجرد سياحه ؟
حسام بحزن : بدأ يحكى لجاسر كل اللى حصل معاهم وسبب وجودهم هنا على الجزيرة واختفاء زين الغريب من اسبوع وده اللى خلى جاسر يستغرب جدا .
جاسر بصله وقال: معقول كل ده يحصل على الجزيرة الصغيرة دى وازاى الشرطه لما جت مقدرتش توصل لاى شىء او حتى تلاقى خيط وتبحث وراه ؟
والاهم هو اختفى فين ومين ليه مصلحه فى اختفاءه ده ؟!
عمر : هو ده اللى احنا مش قادرين نوصل ليه لحد دلوقتى وبقالنا اكتر من اسبوع على الحال ده بندور عليه فى كل شبر هنا.
حسام : ياريت يا جاسر لو سمحت تساعدنا، انت اكيد تعرف اماكن هنا كتير اكتر مننا، بما انك شغال هنا وجايز تعرف ايه اللى بيجرى هنا على الجزيرة بالضبط وهل دى او حاله اختفاء تحصل ولا فى حد اختفى هنا قبل كده ؟
جاسر : انا تحت امركم انتم الاتنين واعتبرونى اخ ليكم، ومستعد للمساعده، ادونى بس عشر دقايق اروح اغير لبس الشغل بتاعى واجى معاكم .
حسام : احنا متشكرين جدا يا جاسر واحنا هاننتظرك انا وعمر هنا لحد ما تغير لبسك وتيجى .
وفعلا استأذن جاسر منهم وراح على اوضته وغير لبسه وخلال عشر دقايق كان رجع لحسام وعمر وبدؤا عمليه البحث عن زين فى كل شبر على الجزيرة .
وهما ماشين عمر مد ايده فى جيب البنطلون وطلع الموبيل بتاعه، وطلع صورة زين اخوه ووراها لجاسر جايز يكون شافه بظروفها فى اى مكان.
وجاسر للاسف اول لما شاف الصورة شاور برأسه بالرفض وقال: الصراحه اول مرة اشوف الاخ زين.
حسام وعمر بصوا لبعض بحزن وكملوا مشيهم مع جاسر على أمل انهم يوصلوا لاى شىء يوصلهم لزين فى اقرب وقت.
وفضله يدورا اكتر من ساعتين فى كل مكان لحد ما تعبوا من كتر المشى وللاسف مقدروش يوصلوا لاى شىء يدلهم على زين .
______________________
حاله سميحه كانت زى ما هى فى الرعايه ومفيش اى تحسن نهائى خلال الفترة الاخيرة دى.
سماح وعبير ومعاهم يوسف وشاهى كانوا يوميا عندها وبيطمنوا عليها وعلى حالتها من دكتور معتز وزميله .
يوسف رغم الظروف اللى كانوا فيها دى بدأ يقرب من عبير اكتر ويعجب بيها .
عكس اللى كان بيحصل بين معتز وشاهى
وكان بيحاول معتز دايما انه يتجاهلها ويبعد عنها وده اللى كان مزعلها وواجع قلبها جدا ومتعرفش ايه السبب.
الاسطى حسن وقت ما عرف بتعب سميحه هانم وحجزها فى الرعايه جاب مراته وجه اكتر من مرة خلال الاسبوع ده واطمنوا عليها وعلى صحتها وخصوصا انه عارف ان زين وعمر مش موجودين فى مصر وكان لازم يعمل الاصول والواجب فى غيابهم .
سماح كانت مستغربه جدا ان شاهندا وزين وعمر متكلموش نهائى خلال الاسبوع ده وتخيلت انهم علشان بيقضوا شهر العسل مش قادرين يتصلوا وفى نفس الوقت مكنتش مطمنه برضه وكان قلبها قلقان عليهم .
ومحاولتش هى كمان تتصل بيهم علشان هايسألوها عن سميحه اكيد ومكنتش هاتقدر تخبى الخبر الوحش ده عليهم.
معتز كان يادوبك خارج من الرعايه ووقف مع يوسف شويه يشرحله حاله سميحه هانم بالتفصيل وانه هايضطر انه يبلغ حسام بالحاله بتاعتها لان فى حاجه مهمه محتاج يسأله عليها وياخد رايه فيها.
يوسف بصله وقال : مع إنى كنت رافض نهائى أن أى حد فيهم يعرف الموضوع ده بس ده شغلك يا معتز ومقدرش اقولك ما تتصلش بحسام.
معتز : تمام يا يوسف ، وياريت تاخد سماح هانم والبنات وتروحهم على البيت ملوش لزوم وقفتهم ووجودهم فى المستشفى طول المده دى وطول ما الحاله كده.
يوسف : عندك حق يا معتز وانا غلبت معاهم والله وخصوصا سماح هانم من كتر خوفها وقلقها على اختها بتصمم انها تيجى تقعد طول اليوم لحد ما تطمن عليها .. انا هاروح ليهم واخدهم من الكافيتريا واروحهم على الفيلا متقلقش .
معتز بص ليوسف وقال : يا ترى عاصم بيه اخبار صحته ايه دلوقتى؟ ويا ترى ماشى على العلاج بانتظام ولا لا؟
اصل الصراحه بنسى اسالك على صحته من ساعه ما خرج من المستشفى؟
يوسف ابتسم ورد وقال : الحمد لله بخير اطمن وماشى على التعليمات أول بأول متقلقش يا دكتور .
معتز : طيب الحمد لله هاستأذن أنا واروح أكلم دكتور حسام بعد اذنك .
ولسه معتز هايلف نفسه ويمشى يوسف بصله
وقال : معتز لو سمحت دقيقه عاوز اقولك على حاجه مهمه.
معتز بأستغراب وقف ولف نفسه وابتسم وقال : نعم يا يوسف خير!!
يوسف قرب منه واتردد شويه انه يتكلم معاه فى حاجه خاصه زى كده وبأحراج بصله وقال : الصراحه مش عارف أقولك أيه ، بس كل اللى هاقدر اقوله ليك ان شاهى بنت كويسه جدا وقلبها ابيض وشافت وقابلت حاجات كتير جدا فى حياتها اثرت عليها وعلى نفسيتها وعلى حالتها بسبب اهمال ابوها وامها ليها من صغرها ..
شاهى يا معتز كانت ضحيه ليهم، وشاهى بتاعه زمان انتهت ومش موجوده .
شاهى اللى انت شايفها دلوقتى اودام عيونك وبتحاول تتجاهلها دايما وتبعد عنها وتوجعها وتحكم عليها لمجرد شويه صور قديمه،
بنت مختلفه نهائى على اللى انت شوفتها من مجرد صور وخسارة تخسرها وتكون سبب فى وجعها وألامها من جديد وتيجى عليها زى ما حاجات كتير جت عليها وكسرتها.
معتز كان مصدوم من كلام يوسف الصريح ليه ده معاه، ومكنش متخيل أبدا إن تجاهله لشاهى واضح ليوسف كده .
ومقدرش يتكلم خالص من كلام يوسف معاه.
يوسف بصله وقال : أنا آسف إنى بتكلم معاك فى شىء شخصى زى كده بس شاهى بالنسبه ليا مش بنت اخويا عاصى وبس، شاهى بنتى الصغيرة.
وانت كمان يا معتز بحبك وبحترمك وبعزك وبعتبرك اخويا الصغير .. وعارف ومتاكد انك تعرف فى الاصول والعادات والتقاليد بما انك راجل صعيدى كويس اوى.. بس ارجوك متحكمش على اى شخص من غير ما تعرف ايه اللى وصله لكده وتسمعله.
معتز ابتسم وقال : كلامك ده شىء يسعدنى ويشرفنى جدا يا يوسف والله.
وربنا يديم الاخوة ما بينا .. وعاوز اقولك انى راجل صعيدى زى ما بتقول كده اتربيت على عادات وتقاليد طول عمرى بحاول امشى عليها ومغيرهاش
بس ...........
يوسف : انا مش عاوز افرض عليك اى شىء انت مش عاوزه يا معتز انا بحاول اعرفك بعض الظروف اللى شاهى مرت بيها فى حياتها وكانت ضحيه ليها مش اكتر علشان متظلمهاش انت كمان .
معتز بأحراج بصله وقال : بما انك اتكلمت معايا بكل صراحه انا كمان هاصارحك واقولك انى معجب بشاهى فعلا بس ..........
يوسف : بس دى ؟! سيبها للايام هى اللى هاتعرفك كل شىء انت عاوز الاجابه عنه وتطمن قلبك لما تديلها فرصه.
ودلوقتى اتفضل مش عاوز اعطلك عن شغلك روح لمكتبك وكلم حسام وانا هاروح على الكافيتريا .
معتز بابتسامه رد وقال : تمام يا يوسف وانا سعيد انك كلمتنى وفهمتنى حاجات كنت عاوز اجابه عليها واستأذن وراح على مكتبه.
ويوسف نزل وراح على الكافيتريا لسماح والبنات.
وكل الحوار اللى حصل ده سمعته عبير اللى كانت واقفه بتراقبهم على بعد كام متر وسمعت كل شىء دار بينهم .
وحست من جواها انها كمان لازم تغير من نفسها وتحاول تبقى الانسانه اللى تليق بيوسف الشريف الجدع الشهم اللى بيحب الخير لكل اللى حواليه..
وتبطل كمان الطمع والغيرة والحقد اللى جواها وخصوصا تجاه ليل.
وتبقى انسانه جميله فى كل شىء من حيث الشكل والقلب والروح وتحب الخير لكل انسان حواليها فى يوم ساعدها ووقف جنبها.
______________________
ليل وشاهندا وأيه كانوا قاعدين مع بعضهم فى استراحه الفندق على امل ان حسام وعمر يرجعوا ويقوللهم عن اى شىء بخصوص
زين يطمن قلوبهم .
ليل بحزن : انا هاتجنن انا مش عارفه هانفضل لامتى قاعدين ندور على زين كده، لازم نعمل
شىء، لازم نبلغ السفارة المصريه هنا فى ايطاليا وهما اكيد هايقدروا يساعدونا ويوصلوا لاى شىء .
شاهندا : عندك حق يا ليل احنا فعلا لازم نبلغ السفارة المصريه اللى فى روما باختفاء زين بالمنظر ده لاكتر من اسبوع وان الشرطه الايطاليه مقدرتش توصل لاى شىء لحد دلوقتى ولا تعرف سر اختفاءه.
أيه : ان شاء الله أول لما حسام وعمر يرجعوا نجهز الشنط بتاعتنا وننزل على روما على طول، ونروح ونبلغ السفارة بتاعتنا هناك اول لما نوصل .
حسام وعمر كانوا رجعوا على الفندق وكان معاهم جاسر كمان، وشافوا البنات قاعدين على بعد فى انتظارهم فقربوا منهم وحسام عرف جاسر على البنات وعرفهم كمان
بجاسر .
حسام : جاسر قابلناه هنا على الجزيرة وبيحاول يساعدنا اننا ندور على زين وبقالنا كذا ساعه بندور وللاسف مقدرناش نوصل لاى شىء برضه .
البنات رحبت بيه وليل بصت لعمر وقالت : احنا لازم ننزل فورا على روما ونبلغ السفارة المصريه هناك باللى حصل مع زين وهما اللى هايقدروا يعرفوا بالضبط ايه اللى جرى معاه .
وبعيون كلها دموع قالت : انا مش هافضل قاعده بالمنظر ده وانا معرفش جوزى حصله ايه يا عمر .
عمر قرب منها وقال : ارجوكى متعيطيش يا ليل وخلى عندك امل كبير فى ربنا وباذن الله هايرجعه لينا تانى بس قولى يارب .
وفجأه..........
موبيل حسام رن وعرف ان اللى بيتصل معتز واستغرب جدا من اتصاله ده وكنسل عليه على طول وبينه وبين نفسه قال مش وقتك خالص يا معتز.
والموبيل رن تانى وحسام اضطر انه يرد
وقال : اهلا يا معتز اخبارك ايه ؟
معتز : اهلا يا حسام انا بخير الحمد لله واسف إنى اتصلت عليك فى وقت زى كده بس كان فى حاجه مهمه وعاوز اخد رايك فيها .
حسام بفضول رد وقال : متقولش كدة يا ابنى المهم فى ايه خير قولى ؟!
معتز : الصراحه سميحه هانم والدة زين وعمر حالتها تعبانه جدا وهى حاليا عندنا فى الرعايه بقالها حوالى اسبوع وعندها ذبحه صدريه وجلطه على القلب .
حسام بصدمه رد وقال: بتقول ايه سميحه هانم؟!!
هنا عمر وليل وشاهندا اتصدموا لمجرد ان حسام ذكر اسم سميحه هانم .
عمر بصدمه وقف وقرب من حسام وقال : ماما مالها يا حسام انطق ؟
حسام : اقفل طيب يا معتز وهاكلمك بعد شويه تانى .
عمر بتوتر وقلق بص لحسام وقال: قولى يا حسام ماما مالها انطق ؟
حسام : اهدى يا عمر كل الحكايه انها تعبت شويه ونقلوها المستشفى ومعتز معاها متقلقش .
عمر بكل حزن وخوف رد وقال : تعبت ازاى يعنى وعندها ايه بالضبط ؟
احنا من ساعه اختفاء زين نسينا نكلمهم اصلا ونسأل عليهم دى غلطتى انا يا حسام، ماما عندها ايه ومن امتى يا حسام قولى بصراحه كل حاجه ؟!
حسام : الصراحه يا عمر معتز بيقول عندها ذبحه صدريه وجلطه على القلب وفى الرعايه المركزة بقالها اسبوع .
هنا عمر وليل وشاهندا انهاروا من الصدمه وحسام وايه حاولوا يهدوهم ويطمنوهم رغم الحزن اللى حسوا بيه هما كمان على سميحه هانم.
عمر : انا لازم انزل حالا على مصر، مش هاقدر اقعد هنا ثانيه واحده بعد اللى سمعته وعرفته عن ماما ده .
حسام : طيب وزين ؟
عمر : لازم اكون مع امى فى وقت زى ده يا حسام .
حسام : طيب ممكن تهدى الاول ونقعد ونفكر هانعمل ايه بالضبط لو سمحت .
عمر : انا مش هافضل فى الجزيرة دى ثانيه واحدة اكتر من كده بقولك وماما بين الحياه والموت واحنا بعيد عنها،
يالا نطلع نجهز الشنط ونرجع على روما ونبلغ السفارة المصرية هناك وبالمرة نحجز تزاكر السفر .. انا لازم اكون فى مصر النهارده يا حسام لاااازم لاااااازم انت فاهم .
دى امى يا حسام امى.
وفعلا بعد كلام عمر المؤثر ده الكل طلع على فوق وجهزوا كلهم شنطهم على طول ونزلوا على تحت وجاسر كان كل ده فى انتظارهم تحت فى استراحه الفندق.
وخد رقم حسام وعمر معاه على موبيله وبلغهم ان لو فى اى شىء جديد بخصوص اختفاء زين هايبلغهم بيه على طول.
حسام وصى جاسر مرة تانيه ان يبلغه اول بأول عن اى شىء يوصله بخصوص الموضوع ده وجاسر وعده بكده وطمنه .
الشباب كلها نزلت على روما وحسام وعمر راحوا بلغوا السفارة المصريه بكل شىء وبلغوهم كمان انهم لازم ينزلوا على مصر الليله بسبب تعب والدتهم، والسفارة ساعدتهم فى كده، وخلصوا لهم كل شىء.
والسفاره وعدتهم انهم هايبلغوهم بكل شىء يوصلوا ليه بخصوص اختفاء زين .
ليل كان صعبان عليها جدا انها تمشى من غير ما تعرف زين فين واختفى ازى .
وحسام بلغ عمر والبنات انه هايفضل فى روما ومش هايقدر ينزل مصر دلوقتى لحد ما يظهر زين ويرجعوا مع بعض على مصر .
فقررت ليل انها تفضل فى روما مع حسام وأيه هى كمان .
وعمر هو اللى هايرجع هو وشاهندا على مصر علشان يطمن على والدته ولما تتحسن باذن الله يرجع تانى لروما ويدور على زين .
___________________________
الايام كانت بتعدى ورا بعضها ومفيش اى جديد فى حاله سميحه وكمان بخصوص اختفاء زين .
عمر لما وصل القاهرة هو وشاهندا وراح على المستشفى واطمن على والدته، بلغ سماح ويوسف والكل بأختفاء زين فى ايطاليا من ساعه لما راحوا على الجزيرة.
وده اللى خلاهم يستغربوا جدا جدا وقلقوا على زين اكتر .
حسام كان على اتصال دائم بعمر فى مصر هو وجاسر وكانوا بيبلغوه بكل شىء يقدروا يوصلوله اول بأول .
___________________
وفى مكان بعيد شويه على اطراف مدينه فى العاصمه روما وبالتحديد فى مخزن قديم لقطع السيارات كان موجود
"زين الجبالى" .
قاعد على الارض وحالته سيئه جدا ودقنه طويله ودم ناشف على وشه وايده وشعره اللى كان كله تراب.
وكان مقفول عليه باب اوضه صغيرة فى المخزن .
فقام وقف بكل ارهاق وتعب وقرب من باب الاوضه دى وبصوت عالى قال بالايطالى : افتحوا الباب .. افتحوووووا الباااب .
انا هنا ليه؟!
افتحوووووووا البااااااب.
لحد ما جه شخص طويل وعريض وعضلاته كبيرة زى البودى جارد وبصله بكل عصبيه وقال : انت مش هاتبطل ازعاج كل شويه يا راجل انت.
زين : افتحوا الباب انا هاوديكم فى ستين داهيه.. افتحووووووا
انتم مش عارفين انا مين .. انااااا
"زين الجبالى" اللى هايوديكم فى ستين داهيه يا مجرمين.
الراجل بصله من فوق لتحت وضحك اوى بسخريه وقال : مين زين الجبالى ده.
زين بعصبيه : افتح الباب ده وانا هاعرفك مين هو زين الجبالى يا حيوان .
انتم عاوزين منى ايه انا هافضل هنا لامتى انا بقالى اكتر من اسبوعين هنا ليه ؟؟؟؟
الراجل لسه هايرد عليه اتفاجأه ان باب المخزن بيتفتح من برة ودخل الراجل الكبير بتاعهم ومعاه بنت جميله .
فجرى ناحيته ووقف اودامه وقال : اهلا يا جون باشا .
الراجل الكبير بصله وقال : اخبار زين ايه دلوقتى ؟
البودى جارد : مش مبطل اسئله وعاوز يعرف هو هنا ليه ؟
الراجل الكبير ضحك وقال : هو هنا علشان
حاول يدخل نفسه فى شىء ميخصهوش هما كده دايما المصريين عاوزين يتدخلوا فى كل شىء .
وبص للبنت اللى كانت معاه وقال مش كده يا قطه .
زين كان اول مرة يسمع صوت الراجل ده هنا فى المكان وحس أنه يعرف الصوت ده وسمعه قبل كده كويس اوى وفضل يفتكر هو سمع الصوت ده فين قبل كده وفضل يفكر ويفكر لحد ما افتكر واتصدم ان ده صوت مدير الفندق .. ايوا هو مدير الفندق اللى على الجزيرة .
ايوا هو "جون"
وبدأ يصرخ ويخبط على الباب وينده بأسم المدير ويقول : جوووون
افتح الباب ده .. افتح انا هنا ليه يا مجرم .
جون فضل يضحك بسخرية وأمر البودى جارد انه يفتح لزين الباب بما انه عرفه وعرف صوته خلاص .
وفعلا راح وفتح لزين الباب وزين اول لما الباب اتفتح بكل عزمه ضرب البودى جارد بالبوكس فى وشه ووقعه على الارض ولسه هايقوم من مكانه ويضرب زين، الراجل الكبير كان اسرع ومسك مسدسه وضربه بالنار فى صدره وفى لحظات وقع على الارض قتيل غرقان فى دمه .
زين اتصدم من التصرف بتاع جون وسرعته دى فى ضرب النار وقرب منه ومهمهوش المسدس اللى فى ايده ولا همه الرجاله اللى معاه ومسكه وشده من الجاكيت اللى كان لابسه وقال بأعلى صوته : أنت عاوز منى ايه يا جون ؟
عاااااااوز منى ايه ؟؟؟
وفجأه..................😲😲😲
#الحلقة_15
#الجزء_الثاني
جون فضل يضحك بسخرية وأمر البودى جارد انه يفتح لزين الباب بما انه عرفه وعرف صوته خلاص .
وفعلا راح وفتح لزين الباب وزين اول لما الباب اتفتح بكل عزمه ضرب البودى جارد بالبوكس فى وشه ووقعه على الارض ولسه هايقوم من مكانه ويضرب زين، الراجل الكبير كان اسرع ومسك مسدسه وضربه بالنار فى صدره وفى لحظات وقع على الارض قتيل غرقان فى دمه .
زين اتصدم من التصرف بتاع جون وسرعته دى فى ضرب النار وقرب منه ومهمهوش المسدس اللى فى ايده ولا همه الرجاله اللى معاه ومسكه وشده من الجاكيت اللى كان لابسه وقال بأعلى صوته : أنت عاوز منى ايه يا جون ؟
عاااااااوز منى ايه ؟؟؟
وفجأه..................😲😲😲
زين اتصدم واتفاجأه كمان بالبنت اللى كانت واقفه جنب جون وفضل باصص عليها اوى وافتكر انها هى نفس البنت اللى كانت بتصرخ على الجزيرة وسمع صوتها وكان بيحاول يساعدها وينقذها من الشخص اللى كان بيضربها وهى السبب فى وجوده هنا اصلا فى مكان زى ده كل الفترة دى .
وباستغراب بصلها وقال : انتى السبب فى وجودى هنا .
انتى اللى كنتى بتصرخى على الجزيرة وكنتى قاعده على الارض غرقانه فى دمك وبتتوسلى للشخص اللى كان بيضرب فيكى انه يسيبك ويبعد عنك وحاولت اساعدك وانقذك منه بس ملحقتش .
البنت حاولت تهرب بعيونها منه وبصت "لجون" اللى هو "الراجل الكبير"
بكل خوف ومقدرتش تنطق ولا اى كلمه .
وفاجأه اتنين من البودى جارد بتوع جون دخلوا بسرعه اول لما سمعوا صوت ضرب النار .
جون بأشارة منه وقفهم مكانهم وآمر البنت اللى معاه انها تخرج بره هى كمان وترجع على العربيه فورا .
زين بصلهم بكل استحقار وقال : انا دلوقتى عرفت انتم كنتم عاوزين منها ايه يا مجرمين انا هاوديكم فى ستين داهيه .
جون بصله بكل سخريه وقال: برافو عليك يا زين، دايما اقول عليك انسان ذكى جدا من اول مرة شوفتك فيها على الجزيرة،
وكنت متأكد انك سمعت كلامهم كله وانت واقف بتراقبهم لما كنت معاهم على الجزيرة علشان كده ضربتك على راسك بإيدى دى علشان اضمن انك متقولش لاى حد من اللى كانوا معاك الكلام اللى سمعته وننكشف ونروح فى داهيه بسببكم .
زين بصله بكل احتقار وقال : متقلقش لان انا هاوديكم كلكم فى ستين داهيه وهابلغ عنكم الشرطه يا كلاب .
جون بنظرة كلها غضب من اللى قاله زين فابص للبودى جارد اللى كانوا واقفين جنبه مستنين اى اشارة منه انهم يخدوه ويدخلوه الاوضه ويقفلوا عليه كويس .
وفعلا فى ثانيه مسكوا زين هما الاتنين من ايده رغم محاولته الهروب منهم ولانهم اقوى منه دخلوه للاوضه بالعافيه.
زين اول لما قفلوا الباب عليه فضل يزعق ويقول : يا كلااااااب سيبونى
يا كلاااااب .. يا مجرمييين .
جون اول لما سمع كده خرج على طول من المكان وآمر انهم يتخلصوا من الجثه اللى على الارض دى فورا ويفضل شخص منهم قاعد فى المخزن يحرس زين كويس لحد ما يبعت ليه الاوامر الجديده .
واول ما خرج جون وركب عربيته هو والبنت اللى كانت معاه مشى بيها على طول وهو فى شده غضبه .
___________________
عدى يومين على الحال ده ومحدش كان عارف اى اخبار عن زين نهائى .
ليل طول الوقت كان عندها امل كبير انه هايرجع ليها فى اى لحظه وكانت دايما بتدعى ربنا انه يكون كويس وبخير وانه يرجع لها فى اسرع وقت ممكن وكمان كانت بتدعى لخالتها سميحه انها تقوم بالسلامه وترجع العيله الجميله الهاديه من جديد .
الكل كان متجمع فى المستشفى عند سميحه بعد ما معتز اتصل على عمر وبلغه ان سميحه هانم حالتها بدأت اخيرا تتحسن وبقى مسموح لها بالزيارة لمده قصيرة .
عمر من فرحته خد خالته سماح وشاهندا بسرعه بعربيته وراح على المستشفى وطلع على الرعايه على طول .
وكان معتز واقف بيدى أوامر لممرضه بخصوص مريض تانى فى الرعايه المركزة .
عمر كان وصل هو واللى معاه وشاف معتز واقف فقرب منه وقال : طمنى يا معتز اخبار والدتى ايه ؟
بجد هى فاقت وبدأت حالتها تتحسن وهاترجع زى الاول فى وسطنا زى ما قولتلى.
معتز : اهدى يا ابنى وخد نفسك الاول واطمن الحمد لله سميحه هانم فاقت وبدأت تتحسن فعلا، ودلوقتى تشوفها بنفسك بس اهم حاجه بلاش اى شىء يزعلها وبلاش تبلغها بموضوع زين ده نهائى خالص دلوقتى.
وقولها اى حاجه لو سألت عنه وياريت متتعبهاش فى الكلام لو سمحت يا عمر .
عمر بفرحه رد وقال: حاضر .. حااااضر متقلقش انا ما صدقت انها بقت افضل وهاتقوم بالسلامه واستحاله ابلغها بموضوع زين خالص فى حالتها دى .
معتز اطمن واستأذن وراح على مكتبه وعمر لبس ملابس الرعايه ودخل لوالدته .
واول لما دخل عندها شافها نايمه زى الملاك على السرير بس للاسف اجهزة كتير حواليها فى كل مكان .
عمر قرب منها وعيونه اتملت بالدموع غصب عنه، ومسك ايديها وقال : الف سلامه عليكى يا روح قلبى .
قومى بقى يا امى وحشتينى اوى
ووحشنى ضحكتك الحلوة ووحشنى صوتك وحضنك الدافى اللى محتاجه اوى اوووى يا امى دلوقتى .
وباس ايديها وبدأ يعيط غصب عنه لانه فعلا محتاج لها فى الوقت ده بالذات .
الام فتحت عيونها لما حست بيه وبكل حنيه
قالت : كده برضه فى راجل بيعيط يا عمر يا حبيبى .
عمر مسح دموعه وابتسم وقال : لا مش بعيط ولا حاجه أهو والف مليون سلامه عليكى يا ست الكل .
الام : الله يسلمك يا حبيبى انت هنا ازاى وليه وبتعمل ايه هنا المفروض انت فى ايطاليا انت وعروستك .
عمر : استحاله اعرف ان القمر بتاعى تعبان بالمنظر ده ومالغيش كل شىء وارجع واكون جنبها ومعاها .
الام : ربنا يخليكم ليا يا حبيبى وما اتحرمش منك ومن زين ابدأ.
هو فين زين مش معاك ليه هو وليل وسماح وشاهندا ؟؟
عمر حاول يتهرب من سؤالها فابتسم بوجع وقال : خالتوا سماح واقفه بره هى وشاهندا ودكتور معتز مانع الزياره لاكتر من شخص حاليا.
انا هاخرج لهم وهى تدخل لحضرتك وتطمن عليكى بنفسها .
الام علشان عارفه عمر كويس اوى، حست ان فى شىء هو مخبيه عنها وبيتهرب منه .
فقالت : اخوك زين فين يا عمر ؟
عمر وقف مكانه ومقدرش ينطق ولا كلمه ولا يجاوب عليها ويقول ايه لحد ما قرر
وقال : زين لسه فى ايطاليا هو وليل انا اول لما عرفت الخبر من حسام مردتش ابلغه وازعله ورجعت انا وشاهندا لوحدنا .
الام اتأكدت أن فى شىء هو بيحاول يخبيه عنها بس حاولت تكدب احساسها ده .
عمر : هاخرج انا دلوقتى واخلى خالتوا سماح تدخل وتطمن على حضرتك .
وفعلا خرج عمر وحس ان قلبه مكسور ومش عارف يعمل ايه .
سماح اول لما شافت عمر خرج جريت عليه وقالت : طمنى يا حبيبى ماما عامله ايه ؟
عمر : الحمد لله كويسه يا خالتو اطمنى واتكلمت معاها كمان وكلمتنى .
سماح : اومال انت زعلان كده ليه خوفتنى يا عمر ؟
عمر : ماما سألتنى على زين يا خالتوا وانا كدبت عليها وقولت انه لسه فى ايطاليا هو وليل ، وانهم ميعرفوش انها تعبانه علشان اكيد هاتسألك.
سماح : ربنا يسترها يا حبيبى ونسمع اى اخبار عن زين تطمنا وكمان يقدر حسام يوصله .
عمر : يارب يا خالتوا يااارب .
ودخلت سماح لاختها علشان تطمن عليها وسابت عمر مع شاهندا .
عمر : انا خايف على زين اوى يا شاهندا ومش عارف ازاى لحد دلوقتى مقدروش يوصلوله او يعرفوا سر اختفاءه ده ايه ؟
شاهندا : فعلا الواحد خايف جدا ومش عارفه ازاى لحد دلوقتى مقدروش يعرفه سر اختفاءه ده ايه .
عمر : انا لازم اتصل بحسام دلوقتى واعرف اخر الاخبار منه ويارب يكونوا قدروا يوصلوا لاى شىء .
شاهندا : يارب ان شاء الله يا حبيبى .
_________________________
واودام باب الفيلا بتاعه زين البواب كان قاعد بيشرب كوبايه الشاى بتاعته .
ولاحظ ان فى شخص بيراقب الفيلا من على بعد وان الشخص ده بقاله كده حوالى تلت ايام بالضبط بيجى يقف فى نفس المكان ده يوميا .
فقام البواب وقف من مكانه وساب كوبايه الشاى اللى كانت فى ايده، ومشى فى نفس الاتجاه اللى الشخص ده كان واقف متدارى فيه علشان محدش يشوفه .
واول لما وصله وقف اودامه وقال : انت بتعمل ايه يا راجل انت هنا ؟
حسان بكل بجاحه قال : ابدا هاكون بعمل ايه يعنى واقف فى الشارع ولا حرام اقف فيه يعنى ؟!
البواب : لا انت مش واقف بالصدفه انت بتقف فى نفس المكان ده كل يوم وانا واخد بالى منك كويس اوى .
وكمان بتفضل تلف حوالين الفيلا بقالك تلت ايام بالضبط، انت اكيد حرامى وانا هابلغ عنك الحكومه يا حرامى.
حسان بخوف اول لما سمع اسم الحكومه اتكلم عدل وقال : حرامى ايه بس وحكومه ايه اللى تجبها ليا، يا عم انا راجل غلبان وبدور على مكان اشتغل فيه وأكل عيش منه مش اكتر متخافش .
البواب : واللى عاوز يشتغل يقف فى الشارع كده ويراقب الفيلا ؟
حسان : الصراحه انا بشوفك قاعد فى مكانك ده كل يوم وكنت محروج اسألك .
البواب : طيب يالا يا اخويا من هنا ولو شوفتك مرة تانيه بتلف حوالين الفيلا ولا واقف قريب منها هاسلمك للشرطه بأيدى دى
انت فاهم .
حسان : خلاص يا عم انت كنت اشتريت الشارع واللى فيه ولا ايه ؟
البواب : بقولك امشى بالذوق احسنلك .
حسان بصوت واطى قال : هامشى بس اكيد هارجع تانى، ومشى على طول وبعد عن المكان خالص، ورجع على الشقه اللى كان مأجرها هو وصابر .
___________________
عبير كانت خرجت من بدرى مع شاهى علشان كانوا متفقين يفطروا مع بعضهم فى النادى ومعاهم يوسف وبعدها يطلعوا على المستشفى .
وفى النادى كانوا قاعدين هما التلاته بيتكلموا مع بعضهم، فحبت شاهى انها تديهم فرصه انهم يتكلموا ويقربوا من بعض شويه .
شاهى : هاروح اجيب حاجه من الكافيتريا حد فيكم عاوز حاجه ؟
عبير بأحراج : طيب استنى اروح معاكى علشان ما تروحيش لوحدك .
شاهى : على اساس انى هاتوه يعنى يا بنتى ولا ايه ؟!
يوسف : الظاهر شكلها مش عاوزة تقعد معايا يا شاهى .
عبير بأحراج ردت وقالت : لا ابدا .
يوسف : طيب ممكن نقعد مع بعض شويه حابب اخد رايك فى كام حاجه مهمه لو سمحتى .
عبير بخجل : تمام مفيش مشكله .
شاهى غمزت ليوسف ومشيت راحت على الكافيتريا وسابتهم قاعدين مع بعضهم .
يوسف حاول يجمع كلامه وبص لعبير
وقال : عبير انا عايش لوحدى من سنين طويله بعد موت والدى ووالدتى ومكنش ليا فى الدنيا دى كلها غير اخويا عاصى ابوا شاهى .
سافرت برة وخلصت دراستى وكافحت واشتغلت الشغل اللى بحبه من صغرى لحد ما قدرت اعمل شركه كبيرة للانتاج الفنى وبقى اسمى معروف والحمد لله .
يوسف : بصى يا عبير وبصراحه كده ومن غير اى مقدمات انا معجب بشخصيتك جدا من اول مرة شوفتك فيها فى فرح زين وحسام وعمر وباقى البنات ، وحسيت انك مختلفه فى كل حاجه عن اى بنت انا قابلتها فى حياتى .
وكنت عاوز اعرف رايك قبل ما اروح لعم حسن واطلب ايدك منه .
توافقى انك تكونى مراتى يا عبير وشريكه حياتى ؟؟
عبير اتفاجأت بكلام يوسف ومكنتش تتخيل ابدأ ابدا انه يطلب طلب زى ده وفى مكان زى ده وكمان بالسرعه دى .
يوسف : انا عارف انك اتفاجأتى بكلامى ده بس انا مش من النوع اللى يلف ويدور انا حابب انى ادخل البيت من بابه واطلب ايدك بس حبيت اخد رايك الاول واشوفك موافقه ولا لا .
عبير من جواها كانت فرحانه جدا جدا بكلام يوسف ومكنتش تتخيل ابدا ان يوسف الشريف بحاله يطلب منها طلب زى ده وبالسرعه دى .
يوسف : شكلى انى استعجلت لما طلبت طلبى ده .
عبير بسرعه ردت وقالت : لا ابدا .
يوسف ابتسم لها وقال : طيب ايه رايك اروح لعم حسن واطلب ايدك منه ؟
عبير بخجل : تمام
يوسف : تمام ايه مش فاهم يعنى ؟
عبير : تمام يا يوسف انا موافقه عليك .
يوسف : يااااااه اول مرة اعرف ان اسمى حلو كده .
رجعت شاهى على كلمه يوسف
فقالت : احم احم اقول مبروك ولا ايه يا عموووووو ؟
عبير اتكسفت ووشها احمر ويوسف ضحك ورد وقال : قولى مبروك يا ستى وعقبالك يارب يا حبيبه قلبى ويبقى فرحنا كلنا فى ليله واحده .
شاهى بأبتسامه حزينه قالت : ان شاء الله يا عمو .
وفجأه موبيل يوسف رن وكان معتز بيبلغه ان سميحه هانم حالتها اتحسنت والكل موجود فى المستشفى بيطمن عليها .
فرح يوسف جدا للخبر ده واول حاجه عملها يوسف بعد ما قفل معاه انه بلغ شاهى وعبير باللى قاله دكتور معتز، وقاموا كلهم وركبوا العربيه مع يوسف وراحوا على المستشفى على طول .
______________________
حسام وليل وأيه كانوا قاعدين فى الفندق من تحت فى انتظار وصول جاسر ليهم بعد ما بلغ حسام فى التليفون ان عنده معلومات مهمة وخطيرة جدا بخصوص اختفاء زين، ولازم يجى بنفسه ويبلغه بيها وحسام كان فى انتظاره هو وليل على نار .
واول لما جاسر وصل للفندق قام حسام من مكانه واستقبله ورحب بيه .
حسام : اهلا يا جاسر خير طمنى ؟
جاسر : الصراحه المعلومات اللى عرفتها مكنش ينفع ابلغك بيها على الموبيل وكان لازم اقولهالك بنفسى يا حسام .
ليل : خير يا جاسر طمنا قدرت توصل لاى حاجه بخصوص زين ؟
جاسر : ايوا قدرت اوصل لشويه معلومات خطيرة عن مدير الفندق اللى اسمه جون
اللى انتم كنتم نازلين فيه على الجزيرة
وعرفت عن طريق عامل من اللى شغالين فى الفندق بتاعه .
حسام باستغراب بصله وقال : جون مدير الفندق !؟ انت متأكد؟
جاسر : ايوا يا دكتور حسام مدير الفندق ده عنده شبكة كبيرة لسرقه الاعضاء .
ليل وأيه بصدمه كبيرة!!
بتقول سرقه اعضاء .
جاسر : ايوا سرقه أعضاء وهو المسئول عن الشبكه دى فى ايطاليا .
حسام : طيب وايه دخل زين فى اللى انت بتقوله ده ؟!
جاسر : العامل اللى انا عرفت منه الاخبار دى بظروفها كان بيتكلم معايا وكان عاوز يخلينى اشتغل معاهم فى الشبكه دى ولما شكيت فى كلامه بدأت استدرجه فى الكلام لحد ما قدرت أعرف منه المعلومات دى كلها وعن جون مدير الفندق ده .
ليل بكل خوف وتوتر قالت : طيب ايه برضه علاقه كلامك ده باختفاء زين ؟
جاسر : العامل ده فى وسط كلامه قالى ان الراجل المصرى اللى اسمه زين اللى اختفى من فترة على الجزيرة كان سمعهم وهما بيتكلموا عن الشبكه دى وعلشان كده خطفوه فى مكان من بتوعهم.
حسام بخوف وقلق رد وقال : طيب وهو مين حكاله الكلام ده ؟
جاسر : سمع بظروفها الكلام ده لما جون كان بيقوله لحد على الموبيل بتاعه وقاله انه اضطر لكسر الكاميرات وتخريبها ولعب كمان فى بعضها علشان يخفى كل اللى حصل لزين قبل ما الشرطه توصل .
ليل قامت وقفت وبدات تعيط وقالت : زين يا حسام يا ترى عملوا فيه ايه ؟
حسام قرب منها وقال : اهدى يا ليل لما جاسر يكمل بقيه كلامه .
ليل بكل خوف : بيقولك سرقه اعضاء يا حسام سرقه اعضاااااء .
حسام : ارجوكى تهدى يا ليل وخلينا نكمل كلام ونشوف هانعمل ايه .
وفعلا قعدت ليل بكل خوف ورعب زى ما حسام طلب منها وجاسر كمل كلامه على طول وبلغهم ان العامل ده سمع جون وهو بيقول انهم هايودوا زين على المخزن القديم بتاعهم لحد ما يقرروا هايعملوا ايه معاه .
ليل : انا مش هاقدر اقعد اكتر من كده لازم نبلغ الشرطه وكمان نبلغ السفارة المصريه وهما هايقدروا يوصلوا للمخزن ده ويقبضوا على جون .
حسام : فعلا هو ده اللى هيحصل وفى اسرع وقت كمان .
واول حاجه عملوها فعلا انهم بلغوا السفارة المصرية والشرطه الايطاليه بكل كلام جاسر اللى هو عرفه .
_____________________
زين كان رايح جاى فى الاوضه اللى كان محبوس فيها فى المخزن عمال يفكر يعمل ايه علشان يقدر يخرج من المكان ده .
وفجأه سمع صوت باب المخزن بيتفتح فقرب من باب اوضته يحاول يسمع ايه اللى بيحصل برة بالضبط .
فسمع صوت البودى جارد اللى كان قاعد بيحرسه بيتكلم مع بنت .
وفجأه سمع صوت طلقه نار خرجت من مسدس وبعدها طلقه تانى .
فاستغرب جدا من اللى بيحصل برة ومش عارف بالضبط هو ايه .
لحد ما فجأه لقى باب الاوضه اللى كان محبوس فيها بيتفتح عليه.
ودخلت نفس البنت اللى كانت مع جون واللى بسببها زين اتخطف واتحبس كده بالمنظر ده طول الفترة دى.
زين باستغراب بصلها وقال : انتى بتعملى ايه هنا وايه صوت ضرب النار ده ؟
سارة : ارجوك مش وقته الاسئله دى كلها ويلا بينا نخرج من المكان ده فورا قبل ما حد يوصل من العصابه ويموتنا احنا الاتنين هنا .
زين : انتى بتتكلمى عربى ؟! وعصابه ايه اللى بتقولى عليها ؟
سارة : يا سيدى ايوا انا سوريه ودى عصابه كبيرة لسرقه الاعضاء وارجوك يالا نخرج من هنا فورا .
زين : طيب انتى ليه عاوزة تساعدينى وتهربينى من هنا ؟
سارة : علشان انت الانسان الوحيد اللى كان عاوز يساعدنى لما كنت بصرخ لما كانوا بيضربونى، وبسببى انت موجود هنا وهما اكيد هايموتوك، وكمان نظرة عيونك ليا لما جيت مع جون فوقتنى من اللى انا فيه وقررت انى اساعدك زى ما انت كنت عاوز تساعدنى .
زين حاول يجمع اعصابه وقال : هاتى المسدس ده ويالا بينا بسرعه .
وفعلا سارة ادتله المسدس وخرجوا من الاوضه ولسه هايقربوا ويخرجوا من باب المخزن بس جون ورجالته كانوا اسرع منهم وهجموا على المخزن .
جون قرب من سارة وضربها بالقلم على وشها لدرجه انها من شده القلم وقعت على الارض وجرى زين عليها وحاول يقومها .
بس البودى جارد جريوا عليه ومسكوه.
جون بكل عصبيه قرب من سارة وشدها من شعرها وقال : كنت عارف انك هاتعملى كده وهاتيجى لحد هنا وتحاولى تهربيه وتهربى معاه .
اوعى تفكرى انى عبيط او اهبل لااا ، انا سهلت ليكى كل العقبات اللى ممكن تقابلك وعملت نفسى سكرت من كتر الشرب وسيبتك تعملى كل اللى انتى عوزاه ده لحد ما توصلى لهنا .
سارة : انت مجرم .. مجرم
وبتوسل قالت : حرام عليك سيبنى ارجع لأهلى سيبنى ارجع لبلدى سيبنى أمشى من هنا واوعدك مش هاقول اى حاجه لاى حد عن الشبكه بتاعتك .
وسيب زين كمان، هو مالوش أى ذنب فى كل اللى حصل ده .
جون ضحك بصوت عالى وقال : انتى الظاهر عليكى اتجننتى يا سارة ودى اخر حاجه ممكن افكر فيها .. وقت ما ازهق منك مش هاسيبك ترجعى لاهلك زى ما انتى متخيله .
وقت ما هازهق منك هاموتك بأيدى دى انتى فاهمه يا قطه .
وبالنسبه لزين اللى انتى خايفه عليه اوى كده هايموت دلوقتى اودام عيونك بعد ما ناخد اعضاءه ونستفيد منها
و
تابعووووووني
أدخلوا واعملوا متابعة لصفحتي عليها كل الروايات بمنتهي السهوله من هنا 👇 ❤️ 👇
تعليقات
إرسال تعليق