رواية زين الحلقه العاشره والحادية عشر بقلم الكاتبه سحر فرج حصريه وجديده على مدونة النجم المتوهج للروايات والمعلومات
 |
رواية زين الحلقه العاشره والحادية عشر بقلم الكاتبه سحر فرج حصريه وجديده على مدونة النجم المتوهج للروايات والمعلومات
ليل بفضول وهما بيكلوا بصت لزين وقالت : الله حلوة اوى المفاجأة دى .
زين ضحك وبص لحسام وقال : لسه المفاجأه يا حبيبتى مش هى دى .
ليل بصت للبنات وقالت : معقول كل الجمال اللى حوالينا ده فى كل مكان ومش هو المفاجأه .
اومال المفاجاه هاتبقى عامله ايه بقى.
أيه : واااااو عندى فضول اعرف فى جمال وروعه اكتر من كده ايه يا حبيبى ؟
حسام قرب منها وضمها لحضنه وهو قاعد جنبها وباس ايديها وقال : الصبر يا روح قلبى .
عمر : يا سلام على الرومانسيه تعالى يا بت يا شاهندا فى حضنى انتى كمان اشمعنى حسام وأيه ههههههههه .
حسام بصله من فوق لتحت وقال : يا لهوى على الغيره يا جدعاااان .
زين : من ناحيه غيرة فالظاهر كلنا هانغير يا صاحبى خلى الرومانسيه دى لحد ما نوصل على الجزيرة .
ليل : أيه ده!! إحنا هاننزل من على اليخت ونروح جزيرة واااااااو .
حسام : يا عم لم لسانك ده انت اتعديت من عمر اخوك ولا ايه ؟ كده هاتضيع المفاجأة .
عمر بغيظ : وماله عمر يا عم انت ؟
ما تخلى بالك من لسانك انت يا عم حسام يا دنجوان .
ليل : قوللنا بقى جزيرة ايه بس اللى هانروحها ؟
زين : امرى لله مضطر اقول على جزء من المفاجأه يا حسام معلش اعذرينى، البنات صعبوا عليا ومش هاقدر اخبى عليهم اكتر من كده.
حسام غمزله بعيونه وقال : ماشى يا عم زين زى ما تحب بس مش كل حاجه هه اظن فاهمنى .
زين ابتسم وبص للبنات وقال : بصوا يا بنات احنا رايحين "جزيرة لامادالينا" اللى انا زورتها قبل كده اكتر من مرة وكنت دايما بتمنى انى اروحها مع شريكه حياتى وافرجها على المناظر الرهيبه الجميله اللى فيها .
وهى جزيرة جميله جدا وفى اكتر من شاطىء ذات رمال خلابه وناعمه وعليها مطاعم روعه مشهورة بأكلات مميزة ولذيذة وممكن نتفرج على الشواطئ دى كلها واحنا على اليخت او على القارب زى كده .
علشان نستمتع بجمال جوها وميتها الصافيه اللى بتشبه الفيروز وعلشان كده معظم الناس بتيجى عليها ويقضوا شهر العسل فيها .
ولسه زين هايكمل كلامه حسام وقفه وقال : خلاص يا عم انت ما صدقت ولا ايه واتفتحت فى الكلام ههههههههه وفضلوا يضحكوا ويهزروا لحد ما نزلوا من على اليخت كلهم وكل واحد فيهم ماسك ايد مراته.
______________________
سميحه وسماح ومعاهم عبير كانوا وصلوا المستشفى وطلعوا لحد حجره الرعايه اللى كان محجوز فيها عاصى ابو شاهى واتفاجئوا بوجود شاهى ووالدتها ومعاهم يوسف وكانوا واقفين فى انتظار خروج دكتور معتز من حجرة الرعايه علشان يطمنهم لان الزياره كانت لسه ممنوعه زى ما حسام آمر معتز قبل ما يسافر ومش قبل ما الحاله تستقر .
يوسف اول لما شاف سميحه واللى معاها قرب ناحيتهم ورحب بيهم .
يوسف : اهلا وسهلا سميحه هانم ليه بس تعبتم نفسكم مكنش ليه داعى والله تتعبوا نفسكم وتيجوا .
سميحه : متقولش كده يا يوسف ده اقل واجب نعمله وبعدين انت زى زين وعمر بالضبط ولازم كنت اجى واطمن على اخوك بنفسى ده اقل شىء يا يوسف الواحد يعمله يا ابنى.
سماح : اذيك يا يوسف .. وربنا يطمنك انت وشاهى عليه يارب ويخرج بالسلامه باذن الله .
يوسف : اهلا بحضرتك يا سماح هانم ومتشكر جدا على الزياره الجميله دى .
وعيونه ركزت على عبير الى كانت واقفه مبتسمه ومنتظره نظرته دى ليها .
عبير : مساء الخير يا استاذ يوسف، والف سلامه على استاذ عاصى .
يوسف : الله يسلمك يا عبير وشكرا جدا لزيارتك، وبصلهم وقال : تعالوا اتفضلوا اعرفكم بمديحه مامت شاهى .
وخدهم وراح فعلا ناحيتهم عند مديحه مرات اخوه وشاهى اللى كانوا واقفين عند باب الرعايه .
وعرفهم ببعض وشاهى فرحت جدا بوجود عبير وفرحت اكتر بوجود سميحه اللى بقت تحبها جدا جدا لانها حست بطيبه قلبها وحنيتها وعطفها عليها من ساعه ما كانت فى المستشفى ايام ما اتخطفت هى وليل .
فاقربت منها شاهى وحضنتها ورحبت بيها بكل حب وده اللى غاظ أمها اوى واستغربت العلاقه اللى بين بنتها وسميحه .
سميحه بكل حنيه طبطبت على كتف شاهى وقالت : عامله ايه يا حبيبتى وبابا اخباره ايه دلوقتى طمنينى؟
شاهى : والله يا طنط منتظرين دكتور معتز يخرج ويطمنا من عنده .. إحنا لسه واصلين من شويه وسألنا عليه بلغونا أنه جوه عند بابا وواقفين فى انتظاره .
سماح : ان شاء الله خير وهايبقى افضل من الاول ويخرج بالسلامه يا حبيبتى متقلقيش يا شوشو .
شاهى : يارب يا طنط ان شاء الله .
وفجأه باب حجرة الرعايه اتفتح وخرج معتز ومعاه دكتور تانى وأبتسم أول لما شاف الكل واقفين اودامه فقرب منهم وقال : اهلا وسهلا بيكم يا جماعه منورين المستشفى .
يوسف رد وقال : اهلا يا دكتور معتز طمنا اخبار عاصى أخويا أيه النهارده ؟
معتز : اطمنوا الحمد لله الحاله النهارده افضل بكتير عما كنا متوقعين وكله بفضل الله وبفضل دعواتكم اكيد ليه .
شاهى بفرحه وغصب عنها قربت من معتز ومسكت ايده وقالت : صحيح يا "معتز" وانتبهت لكلامها وقالت : اقصد يا دكتور معتز بابا بقى كويس وبخير اخيرا .
معتز سحب أيده على طول وحس بفرحه غريبه ملت قلبه وأبتسم وقال : صحيح يا انسه شاهى وتقدروا من بكرة ان شاء الله تدخلوا وتطمنوا عليه بس من غير ما تتعبوه فى الكلام او تقوله حاجه تدايقه او تزعله احنا ما صدقنا ان الحاله تتحسن وفترة الخطر تزول.
يوسف من فرحته خد شاهى فى حضنه وقال : الحمد لله .. الحمد لله يا حبيبتى اخيرا اطمنا عليه.
معتز انتبه لوجود سميحه وسماح وعبير وسلم عليهم ورحب بيهم .. وبلغهم ان الوقفه كده ملهاش اى لزوم وكفايه انهم اطمنوا على عاصى ومن بكرة يقدروا يزوروه براحتهم .
يوسف شكر معتز جدا جدا وخدهم كلهم ونزلوا على تحت ومعتز استأذن وراح على مكتبه .
واول لما نزلوا كلهم وصلهم يوسف لحد العربيه بتاعتهم وشكرهم على زيارتهم الجميله اللى اسعدته دى وكان وشهم حلو على عاصى اخوه واطمن عليه.
سميحه بصت ليوسف وقالت : اولا مفيش شكر بينا دى الاصول والواجب يا ابنى وبعدين بقى تسمح تسيب لينا شاهى النهارده .
شاهى باستغراب قالت : انا يا طنط؟!
عبير ردت وقالت : اه يا شاهى هانم علشان تيجى معانا نشترى شويه حاجات وتفرجينى على البلد شويه زى ما وعدتينى .
سميحه : اهى عبير قالتلكم اهى تسمح بقى يا يوسف تسيبهالنا شويه واهى بالمرة تغير جو المستشفى ده .
يوسف : اكيد طبعا يا سميحه هانم انا تحت امرك فى اى طلب .
مديحه مامتها ردت بغيظ وقالت : انتى هاتفضلى كتير كده مش عاوزة ترجعى معايا الفيلا وتقعدى معايا وهاتفضلى مقضياها قاعده عند عمك يوسف من ساعه ما باباكى اتحجز فى المستشفى ولا ايه يا شوشو .
شاهى اتحرجت جدا من طريقه مامتها اودامهم ويوسف حس بكده فرد وقال : ده على اساس انك بتقعدى فى الفيلا اصلا ومهتميه بيها وبحياتها يا مديحه هانم وبعدين هى مش قاعده عند حد غريب على ما اعتقد دة قاعده فى بيت عمها على فكرة .
مديحه اتعصبت اكتر وقالت : بتهيئلى
انا بكلمها هى يا يوسف وموجهتش ليك اى كلام ولا هى وكلتك محامى عنها وانا معرفش .
يوسف لسه هايرد عليها بعصبيه شاهى وقفته وقالت : اه وكلته يا ست ماما وهافضل قاعده عنده لحد ما بابا يخرج بالسلامه ولحد ما حضرتك تعرفى كويس أوى إن عندك بيت ومسئوليه وزوج وبنت محتاجين ليكى وعاوزين اهتمامك وحنيتك وهما اولى من اصحابك ورحلاتك وقعداتك وسهراتك والبيزنس بتاعك .
مديحه اتصدمت من رد فعل شاهى وكلامها ومن غير ما تنطق ولا كلمه بصت لها من فوق لتحت وخدت بعضها وراحت لعربيتها وركبتها وطلعت بيها على طول بأقصى سرعه .
سميحه راحت مسكت أيد شاهى وقالت : متزعليش نفسك يا حبيبتى هى مهما كان مامتك واصبرى عليها شويه .
سماح حاولت تغير الموضوع وبصت لهم وقالت: تسمحوا تركبوا بقى العربيه اليوم هايضيع مننا وأحنا لسه معملناش اى حاجه خالص .
يوسف قرب من شاهى وقال : يالا يا حبيبتى روحى وأستمتعى بوقتك وغيرى جو شويه وبابا زى ما انتى شوفتى افضل الحمد لله ودكتور معتز طمنا عليه، وانا فى انتظارك فى الفيلا بعد ما تخلصوا براحتكم.
شاهى ابتسمت لعمها وقالت : ماشى يا احلى عمو فى الدنيا .
وفعلا ركبت سميحه والبنات العربيه وسماح اودام جنب السواق وطلعوا بالعربيه على طول .
ويوسف بعد ما أطمن عليهم ركب عربيته وطلع بيها على شركته يطمن على الشغل بتاعه اللى ما يعرفش عنه اى شىء بقاله كام يوم .
وكل ده ودكتور معتز كان واقف بيراقبهم من شباك مكتبه وعيونه بالتحديد مركزه على شاهى، واول لما مشيو ابتسم ودخل يكمل شغله .
______________________
الكل كان قاعد على اليخت بيستمتعوا بجمال المناظر كلها اللى حواليهم سواء كانت مايه زرقاء وصافيه وشفافه جدا او جو بديع فى منتهى الروعه او سماء بلون الفيروز وشمس جميله وساطعه والاجمل من ده كله اللمه الحلوة اللى مجمعاهم كلهم والضحك والهزار واللهمسات الرومانسيه اللى بينهم .
لحد ما قربوا من الجزيرة وبعد شويه وصلوا ليها ونزلوا من على اليخت وعيونهم مبهورة بكل شبر فيها وكان فى مجموعه واقفه فى انتظارهم بترحب بيهم بالازهار الجميله اللى كانت فى ايديهم.
زين فرحان ان المكان عجبهم كلهم وبالذات ليل اللى كانت سعيده جدا جدا بالمكان فقربت من زين ومسكته من أيده بفرحه زى الطفله الصغيرة وقالت : المكان حلو اوى اوى يا حبيبى انا مش عارفه اشكرك ازاى على المفاجاه الحلوه دى .
زين ابتسم وقال : حبيبتى تشكرينى أيه بس، المهم عندى إنى أشوف الفرحه اللى فى عيونك دى، وبعدين لسه المفاجاه الكبيرة مشفتهاش لحد دلوقتى.
شاهندا باستغراب بصتله وقالت : معقول كل اللى إحنا شوفناه ده ولسه فى مفاجآت تانى مشفنهاش يا زين .
زين رد وقال : اكيد طبعا يا شوشو، ويالا بينا بقى علشان الناس دى واقفه فى انتظارنا من بدرى على فكرة واحنا واقفين بنرغى .
وفعلا المجموعه اللى كانت فى انتظارهم كانوا عبارة عن تلت اشخاص وخدوهم وركبوهم عربيات صغيرة تشبه عربيات الجولف وكل عريس وعروسه فى واحده منهم وطول ما هما راكبين كانوا مستمتعين جدا جدا باللى بيشفوه حواليهم فى كل مكان.
لحد ما وصلوا اودام فندق جميل جدا جدا مع صغر حجمه، لكن منظره الخارجى من بره كان تحفه .
والبنات بدأت تستغرب ويسألوا نفسهم هما ليه هنا ؟!
أيه بصت لحسام وقالت : ايه ده احنا داخلين فندق ليه ؟
وليل كذلك : احنا جايين هنا ليه يا زين؟!
وشاهندا : ايه ده فندق وهنا على الجزيرة كمان معقول يا عمر ؟
عمر بصلها باستغراب وقال : مش عارف يا شوشو انا عامل زى الأطرش فى الزفه ذيك بالضبط بس اكيد هانعرف احنا هنا ليه دلوقتى اول لما نوصل ؟
العربيات وصلت كلها عند باب الفندق وبدأ الشباب والبنات كلها تنزل ودخلوا على جوا على طول .
واول لما دخلوا مدير الفندق كان فى استقبالهم وعرفهم بنفسه وكان اسمه
(جون) ورحب بيهم جدا، وقرب من زين بالذات وقال باللغه الايطاليه : اهلا وسهلا بحضرتك زين بيه الجزيرة كلها نورت بيكم كلكم.
عمر والبنات استغربوا جدا ان مدير الفندق بذات نفسه واقف فى استقبالهم وكمان عارف زين .
زين بدأ يكلمه بالايطالى شويه والكل واقف مش فاهم اى شىء منهم غير حسام اللى كان فاهم لغتهم وكلامهم كويس جدا .
والمدير بعد ما خلص كلامه مع زين طلب من عامل الفندق انه يوصلهم لفوق .
ليل بفضول قربت من زين وقالت : ممكن اعرف احنا هنا بنعمل ايه ؟ والراجل ده كان بيقولك ايه بالضبط وتعرفه منين اصلا ؟
زين مسك ايد ليل ومشى وقال : دلوقتى هاتعرفى كل حاجه يا روح قلبى .
ليل بغيظ : ماشى يا زين لما اشوف اخرتها ايه معاك.
وطلعوا على فوق فعلا كلهم والفندق كان عبارة عن دورين فقط لا غير وجميع الاوض بتطل على البحر .. ووصلوا مع العامل لحد باب اوضهم هما السته وناول كل شاب فيهم مفتاح غرفته ونزل على طول .
زين غمز لحسام وقال : نستريح شويه واشوفكم باليل على العشاء بقى يا شباب سلام .
حسام رد وقال : تمام يا صاحبى متتأخرش علينا وبالذات انت يا استاذ عمر وياريت تبطل لعب العيال بتاعك ده شويه ماشى، اظن فاهمنى .
عمر : يا دى النيله عليك يا عمر يا ابن
"ام عمر" وعلى اللى بيحصلك ماشى يا عم حسام ماشى، مع إنى مش فاهم اى شىء بس اشطى ماشى .
دخل زين وليل اوضتهم وقفل وراه الباب .
ودخل حسام وأيه اوضتهم هما كمان وقفلوا الباب وراهم .
وعمر بص لشاهندا وقال : يالا يا بنتى لما نشوف اخرتها معاهم أيه العيال دى، ومسك ايديها ودخلوا على اوضتهم وقفلوا الباب وراهم .
ليل أول لما دخلت اتفاجأت بالأوضه واللى كان فيها اللى عبارة عن بلالين كتير فى كل مكان وشموع صغيره والسرير عليه قلب كبير بالورود الجميله الملونه .
وتربيزة صغيرة فى الوسط عليها تورته صغيرة وكاسين فيهم عصير .
ليل فرحت جدا جدا وقربت من زين ورفعت ايديها على صدره بمنتهى الرقه والرومانسيه وقالت : انا مش عارفه اشكرك ازاى على المفاجاه الحلوة دى يا حبيبى .. ربنا يخليك ليا واقدر اسعدك زى ما انت بتسعدنى دايما .
زين : رفع ايده ومسكها من دقنها بكل عشق وقال : لو عاوزه تسعدينى فعلا خلى الضحكه الحلوة دى دايما على شفايفك واوعى فى يوم من الايام اشوفك حزينه او زعلانه .
ليل ابتسمت وخدت نفس كبير ونامت على صدره وقالت : طول ما انت جمبى وبتحبنى عمرى ما هاكون حزينه ولا زعلانه خالص با روحى .
زين : وانا عمرى ما هابعد عنك ولا هاحب حد غيرك ابدا ابدا طول عمرى يا روح قلبى .
حسام وأيه كانوا فى اوضتهم وأول لما دخلت أيه اتفاجات باللى فى الاوضه وفرحت جدا جدا وحسام فرح لفرحتها دى وقرب منها وضمها لحضنه وقال : يا ترى المفاجاه عجبتك يا روحى ؟
أيه بدلع مسكت حسام من لياقه القميص وقالت : هى عجبتنى وبس .. دى عجبتنى جدا جدا يا حبيبى، بس انا مستغربه حاجه ؟
حسام فضل يبص حواليه فى الاوضه وبفضول قال : مستغربه من ايه يا روحى ؟
أيه مش كنتم قولتوا اننا هانيجى هنا كنا جبنا الشنط معانا علشان نغير لبسنا ده .
حسام ضحك اوى ومسكها من ايديها وخدها وقرب ناحيه الدولاب وقال : افتحى يا ستى الدولاب ده .
أيه باستغراب مدت ايديها وفتحت الدولاب واتفاجات بالشنط كلها بتاعتهم محطوطه فيه ففرحت جدا وقالت : ايه ده معقول كل حاجه عملتوا حسابكم فيها .
حسام : حبيبتى اقدر اقولك من دلوقتى ان شهر العسل بدأ .
أيه بفرحه : يا ترى دى كانت فكرة مين فيكم بالضبط ؟
حسام : الصراحه الفكرة كانت بتاعه زين لانه زار المكان هنا قبل كده اكتر من مرة وعارفه كويس اوى، والناس هنا عارفينه كويس اوى ولما بلغنى بالفكرة عجبتنى جدا جدا ووافقت عليها وبدأنا نخطط لكل حاجه مع بعض .
أيه : طيب عمر فين فى ده كله ليه ما شاركتهوش معاكم ؟!
حسام : الصراحه زين كان عاملها ليه مفاجاه وكان عاوز يفرحه بيها .
وفضلوا يتكلموا شويه وبعدها فتحوا البلكونه اللى فى الغرفه وعجبهم جدا المنظر اللى شافوه وغروب الشمس اللى فى البحر والانوار الملونه اللى ملت الجزيرة كلها .
وعند عمر فى غرفته شاهندا فرحت جدا باللى شافته فى الاوضه من بلالين وورد وشموع وتورته وكانت مفكرة عمر هو اللى خطط لده كله وعمر اتفاجأه زيها بالضبط وعمل نفسه هو فعلا اللى عمل كده علشان يفاجئها ويفرحها لما حس انها فعلا فاكره ان هو اللى نفذ كل شىء فى الغرفه .
فحب يغير الموضوع وقرب من التورته وخد واحده كريز حمرا بأيده وقرب من شاهندا .
و..............
نكمل الفصل اللى جاى.
ولو التفاعل حلو هانزل فصل تانى النهارده وانتم وشاطرتكم بقى لان من الفصل ده اقدر اقول ان زين الجزء التانى هايبدا من دلوقتى
🤫🤫🤫
#الحلقة_11
#الجزء_الثاني
وعند عمر فى غرفته شاهندا فرحت جدا باللى شافته فى الاوضه من بلالين وورد وشموع وتورته وكانت مفكرة عمر هو اللى خطط لده كله وعمر اتفاجأه زيها بالضبط وعمل نفسه هو فعلا اللى عمل كده علشان يفاجئها ويفرحها لما حس انها فعلا فاكره ان هو اللى نفذ كل شىء فى الغرفه .
فحب يغير الموضوع وقرب من التورته وخد واحده كريز حمرا بأيده وقرب من شاهندا .
و..............
قال : افتحى بوقك .
شاهندا ابتسمت بخجل وفتحت بوقها وعمر قرب منها وحط الكريزه وبعدها باسها بمنتهى الرقه والرومانسيه وعاشوا اجمل لحظات مع بعضهم .
___________________
وفى مكان تانى خالص عند حسان اللى كان قاعد فى الشقه اللى أجروها بيتفرج على التلفزيون وكان مستنى صابر يجى بالاكل لانه كان جعان جدا.
فامسك ريموت شاشه التليفزيون وبدأ يقلب فيه شويه بين القنوات كلها لحد ما جاب قناه معينه وفضل يتابع كلامهم عن اهم الافلام والمسلسلات اللى هاتتعرض فى شهر رمضان الكريم، وعن اخبار الفنانين وعالم المشاهير وفجأه سمع المذيعه وهى بتتكلم عن المخرج الكبير
"زين الجبالى" اللى احتفل باليله زفافه من كام يوم فى اكبر الفنادق الضخمه فى القاهرة الكبرى على احدى اقربائه واللى اسمها
"ليل عبد الرحمن" واللى كانت زى الاميرات بفستانها الابيض وللاسف البرنامج بدأ يعرض كام صورة من الفرح الاسطورى ليهم واتصدم حسان أول لما شاف صور زين وعروسته ليل وهى بفستان فرحها الابيض ومكنش مصدق ولا يتخيل أبدا إن ليل حب عمره منذ طفولته خلاص اتجوزت وبقت ملك راجل غيره .
حسان قام من مكانه بصدمة كبيرة وقرب جدا من شاشه التلفزيون علشان يتأكد فعلا من انها ليل فعلا اللى هو يعرفها وبرق بعيونه أول لما اتأكد انها فعلا ليل للاسف، واللى اكدله ده اكتر المذيعه وهى بتقول ان المخرج الكبير زين الجبالى ارتبط و اتجوز من فتاه بعيده عن الوسط الفنى وعادت اسمها تانى
"ليل عبد الرحمن"
وفى اللحظه دى بالذات سمع حسان خبط على باب الشقه فقرب من الباب بكل صدمه وحزن وقبل ما يفتح قال : مين برة ؟
صابر مم برة رد وقال : انا صابر افتح يا حسان الباب متخفش .
حسان اطمن وفتح على طول الباب ودهله وقفل ورجع بسرعه وقرب من التلفزيون علشان يشوف باقى الصور وكلام المذيعه عن فرح زين الجبالى وليل .
صابر باستغراب بصله وقال : سيبك من التلفزيون اللى بتتفرج عليه ده وتعال يالا ناكل والاكل سخن علشان انا ميت من الجوع يا صاحبى.
حسان بكل عصبيه بصله وقال : اسمع يا زفت انت عاوز اشوف الست دى بتقول ايه بالضبط .
صابر بكل خوف دماغه راحت لحته تانيه خالص وبصله وقال : ايه الحكومه بتدور علينا ولا ايه يا حسان؟!!
حسان بغيظ اكتر بصله وقال : حكومه ايه وزفت ايه افتكرلنا حاجه عدله يا حمار انت فال الله ولا فالك يا شيخ .
صابر : اومال فى ايه قولى طيب وطمنى يا حسان؟
حسان بكل عصبيه رد وقال : الهانم اتجوزت غيرى خلاص .
صابر باستغراب رد وقال : هانم مين يا ابنى انت اللى اتجوزت غيرك ما تنطق على طول وتفهمنى حصل ايه؟!
حسان بحزن رد وقال : ليل اتجوزت من اللى اسمه زين الجبالى خلاص .. هى مفكرة ان بجوازها ده مش هاقدر اوصل ليها،
بس على مين انا هافضل وراها لحد ما اطولها حتى لو راحت واستخبت فى سابع ارض برضه هاجبها واخد اللى انا بحلم بيه معاها طول عمرى بالذوق او بالعافيه خلاص انا فاض بيا منها وهاطولها يعنى هاطولها ولا هايهمنى زين جبالى ولا زفت.
صابر بصدمه رد وقال: انت تقصد ليل قريبتك اللى خطفناها واللى كانت السبب فى دخولنا السجن يا حسان ؟!!
حسان : اه هى ليل وهاخطفها تانى وتالت ورابع لحد ما اطول اللى انا عاوزه منها، ليل دى بتاعتى انا وبس فاااهم .
بتاااااااااااعتى🤨
صابر : الله يخرب بيتك انت وهى مش كفايه اللى عملتوه فيا وكنتم السبب فى دخولى السجن حرام عليك بقى اهى اتجوزت خلاص انساها وسيبها فى حالها وفكك منها بقى.
حسان بكل غضب بصله وقال : بقولك ايه انا هافضل وراها مهما تبعد عنى ، ومحدش ضربك على ايدك عاوز تكمل معايا اهلا وسهلا مش عاوز الباب يفوت جمل ونقطنى بسكاتك خلينى افكر هاعمل ايه بدل ما اسكتك بمعرفتى وانت فاهم انا ممكن اعمل فيك
ايه😠
صابر بخوف : يا ابنى انا خايف عليك هاتفضل لامتى ماشى وراها وهى اصلا مش عوزاك ولا بتفكر فيك من أصله، وبعدين انت لسه بتقول اهو انها بقت على ذمه واحد تانى يا عم انساها يا حسان وفوق لنفسك وتعال نسلم نفسنا للحكومه ونخلص الكام سنه دول على خير انا قلبى مش مطمن .
حسان : بقولك ايه نقطنى بسكاتك وروح جهز الاكل اللى انت جبته ده خلينا نتسمم اللقمه دى واحنا ساكتين لا كده لاتغور فى ستين داهيه بعيد عنى انت فاهم .
صابر بخوف بصله وقال : خلاص يا عم انت هاتقلب عليا انا ليه!! هو انا اللى كنت سيبتك واتجوزت من واحد غيرك ولا ايه ؟
حسان بكل غضب وعيون بتطلع شرار قرب من صابر وشده من قميصه وقال : غووور من وشى يا صابر واعمل اللى قولتلك عليه احسنلك .
صابر خاف من حسان جدا ومن نظراته وخد شنط الاكل ودخل بيها على المطبخ من غير ما ينطق ولا كلمه .
________________________
سميحه وسماح من كتر اللف اللى لفوه فى المول استأذنوا من عبير وشاهى انهم يروحوا يقعدوا فى المطعم اللى فى الدور الارضى شويه ويريحوا رجلهم عقبال ما هما يتفرجوا براحتهم ويجيبوا كل اللى عبير عوزاه .
سميحه : معلش يا عبير يا حبيبتى رجلى شدت عليا شويه من كتر اللف اللى لفناه فى المول روحوا انتم كملوا لف واحنا هانستناكم فى المطعم .
عبير : انا اسفه والله يا طنط انى تعبت حضرتك من كتر اللف ده، كفايه كده وتعالوا نرجع على البيت مفيش مشكله .
سماح : لا كفايه ايه روحوا يا عبير كملوا بقيت المحلات واحنا هانستريح شويه عقبال ما انتم ترجعوا وبعدها نطلب الغداء ونتغدى كلنا مع بعض .
شاهى : طنط عندها حق يا عبير هما هايروحوا ينتظرونا فى المطعم عقبال لما نكمل فرجه على باقى المحلات وفى شويه حاجات انا كمان عاوزة اشتريها .
عبير سكتت شويه وبصت لشاهى وقالت : تمام يا شوشو .
وفعلا سميحه وسماح نزلوا على الدور الارضى وراحوا على المطعم وقعدوا على اقرب تربيزة فاضيه .
وعبير وشاهى طلعوا للدور التالت اللى كان فيه محل كبير شاهى متعوده تشترى منه لبسها دايما .
واول لما دخلوا المحل وبدؤا يتفرجوا صاحبه المحل بذات نفسها قامت من مكتبها وابتسمت وراحت سلمت على شاهى ورحبت بيها .
شاهى سلمت عليها وطلبت منها انها تفرجها على احدث الموديلات الجديده اللى جبوها فى المحل من بره.
والمديرة بنفسها طلبت من موظفه من موظفات المحل انها تجيب كل التشكيله الجديده اللى وصلت من باريس وتوريهم لشاهى هانم .
كل ده وعبير واقفه مصدومه من اللى بيحصل اودام عيونها من معامله صاحبه المحل لشاهى .
شاهى بصت لعبير وقالت : ايه روحتى فين يا بنتى تعالى اختارى معايا شويه فساتين من الموديلات الجديده .
عبير ابتسمت وقالت : معاكى اهو هاكون روحت فين يعنى، وبدأت تختار مع شاهى مجموعه حلوة من الفساتين اللى كانت هاتتجنن عليهم وعلى جمالهم والوانهم .
شاهى بعد ما عبير اختارت معاها كام فستان مسكتهم وقربت من عبير وقالت : ممكن سياتك تدخلى وتقيسى الفساتين دى كلها .
عبير بصدمه : انا !؟ مش دول بتوعك انتى يا بنتى .
شاهى بابتسامه رقيقه ردت وقالت : يا حبيبتى دول ليكى انتى واعتبريهم هديه بسيطه من أخت لأختها .. يالا بطلى رغى بقى وادخلى وقيسى علشان منتأخرش على طنط سميحه فى المطعم .
عبير بفرحه كبيرة مسكت الفساتين من أيد شاهى وحضنتها وشكرتها ودخلت على مكان البروفه وبدأت تقيس فستان بعد التانى وكلهم كانوا أحلى من بعضهم وحلوين جدا على عبير .
وفى الاخر شاهى حاسبت المحل على كل الفساتين بالفيزا بتاعتها وخدوا الشنط كلها وشكرتهم .
وبعد ما خلصوا نزلوا وراحوا على المطعم على طول وقعدوا مع سميحه وسماح وطلبوا الغداء وعبير كانت فى قمه السعاده اللى فى الدنيا بكل الحاجات الحلوة اللى جبوها ليها كلهم.
___________________
وفى روما وبالتحديد على الجزيره اللى على البحر، العرسان كلهم كانوا استعدوا وخلصوا لبسهم وكل شاب فيهم مسك أيد عروسته ونزلوا على المطعم علشان يتعشوا ويقضوا بقيت سهرتهم فرجه واستمتاع بكل شىء على الجزيرة .
زين كان متفق مع مدير الفندق على تجهيز كل شىء وكان المدير فعلا مجهز لهم تربيزة كبيرة بتطل على فيو حلو جدا والكل اول لما دخلوا للمطعم الناس كلها صقفوا ليهم وشغلوا موسيقى رومانسيه ووصلوهم لحد التربيزات وقعدوا كلهم .
عمر باستغراب : هى الناس دى كلها عارفه اننا عرسان فى شهر العسل ولا ايه يا جدعان ؟
زين ابتسم وقال : كل شىء معمول حسابه يا استاذ انا مخطط لكل حاجه من قبل الفرح بكام يوم .
شاهندا : ايه ده يعنى انت بس يا زين اللى عامل كل الحاجات الحلوة دى ومتفق عليها مع مدير الفندق ؟
عمر وشه جاب ميت لون من الاحراج وزين خد باله من كده هو وحسام اللى كان بيضحك على منظره ومرديش يحرج اخوه فرد على شاهندا وقال : لا طبعا انا وحسام وعمر كمان اتفقنا على كل حاجه وخططنا لكل شىء مع بعض وبما انى جيت الجزيره دى قبل كده فتوليت انا مهمه كل شىء على اجمل وجه وعلشان يعجبكم.
عمر خد نفس طويل وضحك وقال : اه طبعا حتى انا اللى نصحتهم هما الاتنين بالجزيرة دى علشان عارف هى اد ايه جميله وخلابه ورومانسيه جدا صح يا زين .
زين بص لحسام بضحك ورد وقال: صح يا استاذ عمر .
شاهندا بصتله باستغراب وقالت: يعنى انت جيت هنا قبل كده وانا معرفش ؟
عمر باحراج معرفش يقول ايه بس بعد تفكير رد وقال : لا اول مرة اجى الجزيرة دى بس كنت قريت عنها كتير وشوفت صورها الجميله من على جوجل ومن كلام زين عليها برضه بدأت اقرا عنها اكتر واتفرج على كل صورها وفعلا عجبتنى جدا .
حسام : تسمحوا تبطلوا رغى شويه بقى ونطلب العشاء لان ميت من الجوع .
عمر بضحك رد وقال : ومين سمعك يا دكتور ده انا هاموت من كتر الجوع يالا يا جماعه شوفوا هاتختاروا ايه .
زين : مفيش حد هايختار حاجه العشاء انا طلبته من زمان وزمانهم هاجيبوه بعد شويه متقلقوش .
ليل : ايه ده افرض حاجه احنا مش عاوزنها هانكلها ازاى بقى يا استاذ زين ؟
زين ابتسم وبصلها بكل حب وقال : وانا من امتى كان اختيارى وحش .
ليل باحراج ردت وقالت : لا مقصدش كده أنا قصدى إن كل واحد فينا ذوقه غير التانى وهيختار حاجه غير التانى مش اكتر يا حبيبى .
وقبل ما زين يرد عليها الأكل كان بدأ يوصل والتربيزات كلها اتملت بأصناف كتيرة وشهيه جدا وكانت عباره عن اسماك اشكال والوان وجمبرى واستاكوزا وكاليمارى والكل انبهر بالأكل وزين ابتسم وقال : ياريت الاكل يكون عجبكم .
عمر بانبهار 😲😲😲 رد وقال: هو عجبنا وبس الله عليك
يا زين يا جبالى وعلى ذوقك يا اخويا .
الكل فضل يضحك على كلامه وبدؤا فعلا الأكل، وكان الأكل كله طعمه تحفه وأنواع السلطات والصوصات كانت جميله وجديده وده اللى لفت نظر ليل وكمان أيه جدا، واتعشوا فى جو رومانسى جميل .
وبعد ما خلصوا اكلهم خدوا بعضهم وخرجوا يتمشوا شويه على الجزيرة فى جو شاعرى وعلى ضوء القمر والموسيقى اللى كانت فى كل مكان يروحوه .
_______________________
معتز كان يادوبك لسه واصل بيته بعد مجهود كبير بيقضيه طول اليوم فى المستشفى وسط المرضى .
وكان عايش لوحده فى شقه بعيد عن اهله لان معظم اهله كانوا عايشين فى قريه فى قلب الصعيد .
دخل معتز اوضته وغير لبسه كله ودخل اخد شور وبعد شويه خرج من الحمام وراح على المطبخ وبدأ يجهز لنفسه فنجان قهوة يضيع بيه الصداع الرهيب اللى كان حاسس بيه والارهاق .
وبعد ما خلصه مسك الفنجان فى ايده وخرج من المطبخ وراح قعد على الكنبه اللى اودام شاشه التلفزيون بعد ما شغلها .
وبدأ يشرب فى قهوته ويتابع بعض القنوات التلفزيونيه ووقت ما زهق مسك موبيله وبدأ يقلب فيه شويه ويتابع بعض الاخبار .. وفجأه جت على باله شاهى العاصى ففكر على طول انه يدور على الاكونت بتاعها على الفيس بوك ويحاول يتعرف عليها وعلى شخصيتها من خلال البوستات اللى هى بتنزلها عندها .
وفعلا فضل فترة طويله يدور عليه لحد ما ظهر اكونت وعليه صورتها واسمها ومن هنا ابتسامه لا اراديه اترسمت على شفايفه وبدأ يقرا البوستات بتاعتها ويتفرج على الصور كمان .
واتصدم لما بدأ يتفرج على الصور بتاعتها وشاف شاهى تانيه خالص غير شاهى اللى يعرفها دلوقتى وهى البنت المؤدبه والمحترمه والهاديه .
البنت اللى لبسها محتشم وبطرحه ومكياج خفيف .
لكن دى صور بنت لبسها عريان وبشعرها ومكياج اوفر وشباب كتير معاها فى معظم صورها .
معتز مكنش مصدق كل اللى شافه وبذهول بص للصور وقال: معقول هى دى شاهى ؟!! طيب ازاى وليه كانت كده اصلا وايه غيرها للاحسن؟؟ اللى اودامى فى الصور دى بنت منحرفه متهورة ومدلعه .
اكيد فى سر ورا التغير الكبير اللى حصل لها وخلاها انسانه مختلفه عن اللى انا شايفها فى الصور دى دلوقتى؟
يا ترى ايه اللى حصلها ؟؟
وازاى كانت كده اصلا؟
ازااااااااى؟
اسئله كتير خطرت فى باله ومكنش لاقى لها اى اجابه للاسف .. فقفل موبيله ورماه على التربيزه اللى كانت اودامه وعدل نفسه على الكنبه وغمض عيونه بصدمه كبيرة من كل الصور اللى شافها لشاهى .
_____________________
وعلى الجزيرة الشباب كانوا فى قمه السعاده والفرح من كتر الحاجات الجميله اللى شافوها وكانت بتقابلهم وهما بيفرجوا عليها وهما بيتمشوا على الجزيرة .
لحد ما وصلوا لشط البحر وكان فى مكان جميل جدا فى غايه الروعه، ساحر ومنظره يجنن وكان عباره عن صخور كتيرة ضخمه وصغيرة فى كل مكان اشكال والوان .
فراحوا وقعدوا عليها شويه يستمتعوا بصوت الامواج العاليه ومنظر البحر اللى يسحر بالليل وضوء القمر .
وفى جو شاعرى وجميل ورومانسى كل شاب من الشباب اخد عروسته وراحوا قعدوا جنب بعض يتمتعوا بسحر المكان .
مع هزار عمر اللى مكنش بيخلص وذكريات كتير بينه وبين زين وشاهندا وهما صغيرين .. وذكريات كتير بين ليل وبين أيه ربطتهم ببعض من صغرهم .
ليل بصت لزين وقالت : انا عطشانه جدا يا جماعه .
شاهندا ردت وقالت : وانا كمان عطشانه اوى برضه .
زين ابتسم وقال: بس كده حالا واكون جايب مايه وشويه عصاير وشيكولاتات من الكافيتريا اللى هناك دى .
وفعلا كان فيه كافيتريا صغيرة على بعد كام متر من مكان قعدتهم فوقف زين وحسام علشان يروحوا يجيبوا الحاجات .
شاهندا بصت لعمر وقالت: قوم يا عمر روح معاهم انت كمان .
عمر مسك بطنه وقال : لا مش قادر سيبينى فى اللى انا فيه انا شكلى أكلت كتير ومش قادر اتنفس .
زين افتكر تعب اخوه وبكل خوف أول لما عمر مسك بطنه قال : مالك يا عمر ايه اللى بيوجعك بالضبط طمنى يا ابنى ؟
عمر : يا ابنى بقولك شكلى دبتها اوى فى الاكل ومش قادر اتنفس من كتر اللى كلته، متخليش دماغك تروح لبعيد اطمن 🙄
حسام : طيب قوم معانا وحرك نفسك شويه علشان تهضم السمك اللى انت خلصته كله هو والجمبرى .. قوم قوم وبطل دلع يا عم انت وحرك رجلك علشان تهضم.
الكل فضل يضحك وفعلا عمر قام معاهم، وراح التلت شباب على الكافيتريا وسابوا البنات مع بعضهم بيضحكوا على عمر وعلى اللى بيعمله .
ليل : المكان هنا تحفه، ياريت نفضل قاعدين هنا على طول وننسى كل الماضى واللى حصل فيه .
أيه : فعلا يا لولو المكان حلو اوى والمناظر جميله والبحر روعه .
شاهندا : الصراحه انا جيت روما قبل كده كام مرة بس اول مرة اعرف ان فى جزيرة بالجمال ده كله فيها فى روما.
و..
تابعووووووني
الحلقه الثانيه عشر والثالثه عشر من هنا
أدخلوا واعملوا متابعة لصفحتي عليها كل الروايات بمنتهي السهوله من هنا 👇 ❤️ 👇
تعليقات
إرسال تعليق