رواية ارهقني الفجور الفصل الاول بقلم نوسه محمد حصريه وجديده

 رواية ارهقني الفجور الفصل الاول بقلم نوسه محمد حصريه وجديده 

اول يوم دراسي لي دخلت المدرسه وكلي ثقه بنفسي رغم ملابسي المقطعه وشنطتي المصنوعه من شوال سكر  ابدا ما حسيت اني بقل عن اي بنت شايله افخم شنطه ولابسه احسن لبس كنت بدي نفسي طاقه ايجابيه رغم اول تنمر جاني من صديقه عمري وطفولتي  علا قالت لي نوسه ليه ما جابو ليك شنطه زي شنطتي وكانت بتتفاخر بي ملابسها الجديده وشنطتها الجديده رغم كلامها جارح بس ما هزا فيني شعره كنت بدي نفسي طاقه ايجابيه انو العلم والتعليم ما محتاج  مظاهر  وطول ما غرضي التعليم ما ح اعاين لمنظر دخلت المدرسه حسيت اول ما دخلنا علا بقت تتهرب مني رغم انها

كانت صاحبتي شديد وانا بحبها من قلبي اول ما دخلنا اتلمت علي بنات شكلهم بنات عز وابادلو السلام بحنيه ولهفه وشوق وانا علي نياتي وقفت مع علا وبديت اسلم عليهم حسيت سلامهم لي بقرف  واتجاوزوني حتي علا فاتت معاهم انكسرتا شديد ودموعي بدت تنزل بس سمعت صوت استاذه منال بتنادي فيني قشيت دموعي ومشيت ليها بي كل ادب  واحترام سلمت عليها قالت لي انبسطتا شديد لمن عرفت انك اتوزعتي معانا في المدرسه هنا وطبعا ح تخشي الفصل النموزجي عاوزاك تشرفيني انا واثقه منك انك قدرها قلت ليها ان شاء الله رغم الطاقه السلبيه الكنت فيها بس كلام الاستاذه اداني طاقه ايجابيه  سمعت صوت الجرس مشيت وقفت في الطابور  وكنت مبسوطه شديد بس كل ما اعاين لي نظره علا لي وزميلاتا بحس بنقص واتزكر كلام الاستاذه بزداد قوه جنبي واحده هاديه وشكلها حالا زيها زيي قالت لي كيفك انتي منو قلت ليها نوسه قالت لي صفيه انا  قلت ليها اهلين صفيه عام سعيد قالت لي عامك اسعد ممكن نكون أصدقاء قلت ليها اكيد من هسي انا اختك ابتسمت وعاينت لي المديره سلمت علي كل الطلاب وقالت لينا تم توزعيكم حسب مستواكم التعليمي ح تمشو الفصول وكل واحده تقيف جنب الفصل الاتوزعت فيهو لغايه ما تجي ام الفصل توزعكم بكل ادب واحترام نفذنا كلام المديره سبحان الله ولحسن حظي انا وصفيه وقعنا في فصل واحد وعلا وشلتها وقعو في الفصل التالت وكان بعيد من فصلنا شويه 

انا نوسه اتربيت في اسره بسيطه جدا ابوي موسي امي ياسمين امي اكتر انسانه صبوره في الدنيا اتحملت مع ابوي الدنيا القاسيه رغم انها من العاصمه واتربت في بيت عز امي كانت قنوعه اختارت ابوي عن حب وانتصر الحب علي الفقر رغم انتقادات اهلا وكل اقربائي بس كانت بتقول ليهم انا مرتاحه اتعلمت من امي الراحه ما قروش الراحه راحه البال ابوي كان مكافح بحترم امي شديد بينهم قصه حب عظيمه  كان ليها نعم السند وهي كانت ليهو ام واب انا من قومتا ما لقيت لي عمه او عم او حبوبه كنت بسالهم بقولو لي ابوك كان واحد ونجا من حادث كانت فيهو امو وابوهو في بدايه مشوار حياتهم اتوفو وابوي ربنا طول في عمرو اتربا مع حبوبه ابوي واعمامو كانو كعبين معاهو بس هي كانت الطرف الحنين عليهو احتوتو لغايه ما ربنا اخد امانتو وهنا ابوي شقا طريقو بعد اعمامو طردوهو من البيت  ودخل السوق كان بشتغل اغسل عربات وشويه شويه اشتغل مكنيكي وللان شغال مع صاحبو بس الحياه بقت غاليه كل البشتغلو ما بكفي الاكل والشراب  من قمنا لقينا حياتنا ما زي غيرنا واحتياجاتنا بالعافيه ابوي حتي يجيبا لينا امي طلبت من ابوي تشتغل كان بقول ليها انا ما عرستك عشان اتعبك انا اتزوجتك عشان تعيشي ملكه واليوم دا ح يجي ان شاءالله رغم حالتو الماديه بس كانت عندو قناعه انو ما ضاقت الا لفرج وكان بردد لينا كلمه ان شاءالله بجي اليوم والح اجيب ليكم فيهو كل شي  

دي حياتنا البسيطه انا كنت اكبر اخواني في اولي ثانوي  اخواني غسان وزهير  واسماء وانا كلهم اصغر مني

وقفنا قدام الفصل وجات  استاذه منال كانت ام فصلنا سلمت علينا وقالت لينا اصطفو بالطول وما عايزه كلام وهي تعاملها صارم شويه وزعتنا  في الصف ومن حظي انا وصفيه وقعنا في درج واحد وكانت مبسوطه وانا مبسوطه اكتر منها ودخلنا الفصل وكانت الحصه الاولي ماده الكيمياء وسبحان الله انا كانت معلوماتي كتيره شديد ابوي قبل المدرسه كان بقول لي ح يديكم ماده كده وكده وبدرسوكم كده وكده بقا عندي شغف للقرايه كنت بسالو بقول ليهو انت عرفت الحاجات دي من وين اكتشفت انو ابوي قرا حدي تالت ثانوي وبسبب وفاه حبوبتو وقف قرايه ودخل السوق وعرفت انو كان اول الفصل بس الظروف ما ساعدتو  الاستاذه كانت بتسال وانا برد وقفتني وقالت لي انتي قريتي الكتاب قبل المدرسه قلت ليها لا يا استاذه بس في الاجازه لمن اكون اتونس مع ابوي ابوي كان بونسني بالعلم واداني معلومات كتيره في كل المواد الجديده علي قالت ليهم صفقو ليها وسالتني من اسمي قلت ليها اسمي نسيبه موسي قالت لي موفقه ان شاءالله  يوم دراسي كان حلو شديد  وكنت مبسوطه شديد نهايه اليوم ودعت صفيه وقلت ليها عاوزه اشوف علا عشان نرجع البيت بقيت افتش لي علا  صفيه قالت لي نطلع سوا ومشينا عشان نشوف سعاد لقيناها مع شلتها بنات بحبو الحياه من اول يوم ادوني احساس انو الدنيا حلوه وعاوزين يعيشوها   وطريقه لبسهم غير الساعه والاسبورت الفخم وشنط فخمه والنوع المهتم بي نفسو  وهم خلقه الله حلوات شديد  الطالبات بدو يطلعو وسعاد قالت لي نوسه كان ماشه امشي انا لسه قلت ليها علا انا بخاف امش براي وانتي عارفه قالت لي طيب انتظري انتظرتها لغايه ما جات وطلعنا وكان عندها تلفون  طلعتو واتصلت وبقت تتكلم وتضحك والشارع كلو اعاين لينا قلت ليها علا عايني الناس اعاينو ليك قالت لي ناس شنو كان انتي شايفاهم انا لا وبعدين انتي مالك ومالي سكتا ما رديت عليها وصلنا البيت وامي كانت منتظراني احكي ليها وشكلها كانت متخوفه من حاجه قالت لي اها كيف المدرسه قلت ليها يمه وزعوني في الفصل النموزجي والاستاذه صفقت لي وبقيت احكي ليها في التفاصيل وهي مبسوطه قالت لي الحمد لله شايفه قبيل معاك علا اعملي حسابك الناس ديل ما من توبنا قلت ليها يمه انا فاهمه ما تخافي علي سكتت مااتكلمت معاي تاني وانا زاتي سكتا وبقيت اعاين لي ملابسي المشرطه وشنطتي امي حست بي ضمتني عليها قالت لي معليش يابتي نحنا مقصرين في حقك بس انتي شايفه براك الحال ابوكم ما بي يدو حاجه قلت ليها يمه لا لا ما تبكي انا مبسوطه ومرتاحه عارفه ابوي ما عندو غسان اخوي اصغر واحد بقرا في اولي اساس ادردق بالارض قال الا يجيبو ليهو شنطه مرسوم فيها لاعب كوره امي بقت تقنع فيهو وهو ما داير يقتنع ابوي جا لقا امي تحنس فيهو وهو يدردق شالو من الارض وقال لي امي اعملي اي شي للاكل وهاك امشي البوتيك الجنبنا اشتري ليهو شنطه غسان فرح شديد امي ساقتو ومشت اشترت ليهو قال لي معليش ح اشتري ليك ما تزعلي قلت ليهو لا يا ابوي انا والله ما عاوزه قال لي عشان نيتك دي ان شالله ربنا اديني شغله حلوه وابسطك قلت ليهو والله يا ابوي م محتاج قال لي انا ما مرتاح طول ما شايف نفسي مقصر بس الله عالم بي طبطبت عليهو وحاولت اغير الكلام حكيت ليهو بحصه الكيمياء والحصل فيها انبسط مني شديد قال لي ان شاءالله اشوفك اكبر طبيبه في البلد قلت ليهو ان شاءالله يا ابوي امي جات داخله وقدامها غسان مبسوط وجابت معاها حاجات الاكل قالت لي ابوي بتاعت البوتيك ادتني الشنطه بالقسط قالت ليها علي راحتك متي ما تسددي دينك سددي ابوي قال ليها الحمد لله ومسك غسان قال ليهو اها مبسوط وكانت الفرحه ظاهره في وشو 

مرت الايام وكل يوم البنات بتنمرو علي ومره الاستاذه سمعتهم عاقبتهم وطلبت منهم يعتزرو لي وكانت من ضمنهم علا نهايه اليوم قالت لي انا اعتزر ليك انتي قلت ليها علا  انا م طلبت منك تعتزري لي كان تتناقشي مع الاستاذه قالت لي عشان انتي شاطره الاستاذه دايره تطلعك لينا في راسنا حسيت انها بتحاول تصغرني وماعندها زره احترام للخوه البينا سكت منها ما رديت حست بي زعلت قالت لي انتي عويره بينا زعل قلت ليها عادي وطلبت منها نمشي البيت قالت لي دقايق ح نمشي انتي مستعجله مالك وكانت في حمامات بقولو مسكونه ما قاعدين ندخلا بس فكرت ليهم نهايه اليوم بمشو ليها عشان واثقين انو مافي زول بيدخلها وبقيت منتظره لغايه ما غفير المدرسه قال لي منتظره منو قلت ليهو علا قال لي مافي بت في المدرسه قلت ليهو شفتهم دخلو الحمام القديم قال لي ديل مجنونات الحمامات دي مهجوره بعملن فيها شنو وكان بكورك فيني انا خوفتا وقلبي ادق خوفتا علي علا وقلت يارب ما تجيها حاجه والغفير ماشي قدامي وانا وراهو  وصلنا سمعنا صوت ضحكهم قال لي ربنا استر دخلنا ويا ريتنا ما دخلنا انا اعصابي باظت وحيلي مات وبقيت ارجف تتوقعو شوفنا شنو …………….يتبع