نوفيلا يومًا_ما بقلم فتاة_من_ورق بسمه_السباعي الجزء_السادس_والأخير حصريه وجديده على مدونة النجم المتوهج للروايات والمعلومات
 |
نوفيلا يومًا_ما بقلم فتاة_من_ورق بسمه_السباعي الجزء_السادس_والأخير حصريه وجديده على مدونة النجم المتوهج للروايات والمعلومات
فارس : انتي شو ؟ احكي زينة
زينة : انا بنت الميتم
فارس : شو ؟ شو يعني
زينة : من لما وعيت على الدنيا و انا بعرف انو الميتم بيتي و اطفال الميتم اخواتي .. خبروني بالميتم انو اهلي معروفين مين هنن و توفو بحادث بس انا ما بعرف عنهم شي و ما بحياتي شفتهن
فارس : و هلأ انتي وين عايشه ؟
زينة : عند مرة ختيارة ما الها حدا .. بهتم فيها مشان حس انو الي حدا بالدنيا
فارس : ليش لهلأ لحتى خبرتيني ؟
زينة : كيف بدي خبرك من البدايه مشان تشفق عليي و تقلي انا عيلتك و بالاخير تتركني و تروح
فارس : هسس ما تكملي .. مين قلك بدي اتركك ؟ بالاول بلشتي كلامك انو السر رح يفرقنا عن بعض و هلأ بتقوليلي اشفق عليكي بالاخير اتركك .. زينة انا ما صدقت لاقي وحده متلك و بعمري ما رح انظرلك نظره شفقة .. انتي بعيوني كامله و رح كون اسعد انسان اذا بتقبلي تكملي عمرك معي و تصيري ام ولادي
زينة : أول مره بحس انو في حدا بهالدنيا بدو ياني
فارس : بدي ياكي لاخر العمر .. شو اسما الختيارة اللي عايشه عندا ؟
زينة : خديجة
فارس : بتاخديلنا موعد من الست خديجة مشان نجي انا و امي نخطبك
زينة : هههه اي
فارس : معناها مسحيلي دموعك الغاليين و روحي ركض على البيت خديلي الموعد و رديلي خبر
زينة : باي
فارس : الله معك
*بقيت عم راقب زينة لحتى ركبت بالميكرو...التفتت لقيتا ناسية شالها على الكرسي حملتو و مشيت...
فارس : يا الله يا زينة مخبيه كل هالحزن بقلبك و ساكته و صابره و بتخلي كل اللي يشوفك يفكر حياتك كامله .. بوعدك كون اهلك اللي انحرمتي منهن طول عمرك
________________________________________________
#بقلم_فتاة_من_ورق_بسمه_السباعي
سوسن : وينك لهلأ يا جمال شغلت بالي عليك .. يا رب يتصل و يطمني عن حالو
مريم : ماما انكسرت حلقتي
سوسن : ورجيني لشوف
مريم : صارت توجعني ادني منها
سوسن : رح فكلك ياها و خبيها بصندوق الدهب و السبت و انا رايحه على الدوام باخدها على الصايغ بصلحها
مريم : شكرا ماما
سوسن : عفوا حبيبتي روحي ضبي دفاتركن انتي و اخوكي مشان حطلكن الغدا
مريم : حاضر ماما
*دخلت على غرفتي لحتى خبي حلقات مريم بالصندوق .. فتحت الصندوق ما لقيت ولا قطعه دهب ...
سوسن : بسم الله وين راحو
*دورت بكل مكان بالغرفه ما في اثر للدهب .. قررت استنى لحتى يرجع جمال و افهم منو ما بدي اظلمو ...
________________________________________________
#بقلم_فتاة_من_ورق_بسمه_السباعي
فارس : مساء الخير
ام فارس : مساء النور حبيبي
فارس : كيفك يا احلى حماية بالعالم ههههه
ام فراس : صرت حماية ههههه اخدت موافقة اهل العروس ؟
فارس : ما بتكفي موافقة العروس ؟
ام فارس : هلأ اكيد مهمة موافقتها بس اهلها هن الاصل
فارس : امي زينة ما عندا اهل
ام فارس : شو عم تحكي
فارس : زينة يتيمة من زمان و ربيت بدار الايتام ما بتعرف شكل اهلها بس منحوها اسمهن و توفو بحادث و هي هلأ عايشه عند مرة ختيارة
ام فارس : ربيت بدار الايتام ؟
فارس : اي شو يعني
ام فارس : انا اخد لابني وحيدي بنت من دار الايتام ما معروفة مين هي
فارس : بس امي زينة معروف اصلها
ام فارس : انا ما باخد لابني وحيدي وحدة ما عندا اهل لو معروف اصلها وين بيت جدها بيت عمها بيت خالها ؟
فارس : امي زينة ما بتعرف شي بهالدنيا غير دار الايتام و لما طلعت منو عاشت مع مرة ختيارة لحتى ما تعيش لحالها و عم تشتغل و تصرف على حالها شو ذنبها اذا قرايبينها ما حدا سأل عنها شو ذنبها اذا كان هيك نصيبها من الدنيا تعيش و تكبر بمكان غير بيت اهلها
ام فارس : ما ذنبها بس ما بتناسبني دور على غيرها
فارس : كيف ما بتناسبك و انتي ما بتعرفيها ؟ شو عم اشتري كيلو بندورة لحتى دور على غيرها ؟
ام فارس : هاد اخر كلام عندي اتركها و دور على غيرها
فارس : ما بترك زينة لو بدي موت .. بعدين وين حنيتك ؟ وين محبتك للناس و رحمتك فيهن ؟ ولا هالشي مخصوص بالناس الاكابر و المعروفين
ام فارس : عيب تحكي مع امك هيك
فارس : و انتي كمان امي عيب تحكي عن هالمسكينة هيك .. انا اذا كنت متمسك بزينة طاق هلأ متمسك فيها مية طاق و بدل ما تحكي هيك فكري كيف تكسبي زينة لصفك و تعامليها كأنك امها مشان تكسبي فيها ثواب و تكسبي سعادتي امي .. انا ما رح شوف السعادة غير مع زينة .. تصبحي على خير
*دخلت على غرفتي و سكرت الباب .. توقعت كل شي الا رده فعل امي...
________________________________________________
#بقلم_فتاة_من_ورق_بسمه_السباعي
ام روعة : مين عم يبعتلك ؟
فرحة : هاد ورد
ام روعة : شو بدو
فرحة : عم يحكيلي عن كمية السعاده اللي بقلبو لانو قبلت عزيمتو على فنجان قهوه بكرى
ام روعة : الله يعطيكي ليرضيكي يا بنتي
فرحة : ماما
ام روعة : نعم
فرحة : لي ما بدك روعة تجي تزورنا ، انسيلي السبب انو مشان راحة بابا
ام روعة : بخاف عليها تترك زوجها الرجال مالهن امان بكرى هي بتطلع من هون هو بيدور على بديل من هون
فرحة : ههههه ماما عصام زوج اختي ما في باخلاقو ، مو كل الرجال متل بعض لسا من شوي قلتيلي انو مو كل اصابعي متل بعض ولا نسيتي ام الرور ؟
ام روعة : شو هي ام الرور بقص لسانك اذا بتعيديها
فرحة : ههههه عم امزح معك ماما
ام روعة : اي قومي اجلي الجليات ما حبيت مزحك يمكن لازم ارجع لعادتي القديمة معك
فرحة : ههههه لا لا خليكي هيك و بوعدك ما عاد امزح و رح ضل اجليلك لحتى يصير عندك جلاية
ام روعة : الله يرضى عليكي و على اختك
________________________________________________
#بقلم_فتاة_من_ورق_بسمه_السباعي
*نيمت الاولاد و بقيت سهرانة عم استنى رجعة جمال .. مر ساعه و ساعتين و ٣ و ٤ .. ادن الفجر سمعت صوت مفاتيح جمال على الباب...
جمال : بسم الله سوسن
سوسن : اي سوسن مو جني
جمال : شو مسهرك لهلأ
سوسن : عم استناك بتحب حطلك عشا او فطور او يمكن سحور بهالوقت مو ؟
جمال : مو جوعان روحي نامي
سوسن : جمال وين دهباتي
جمال : دهبات شو
سوسن : جماااال وين دهباااااتي ما تعمل حالك ما بتعرف وينهن لانو ما حدا غيرك بيعرف وين مفتاح صندوق الدهب
جمال : هدول من حقي انا جايبهن
سوسن : يعني عم تعترف انك اخدتهن
جمال : كنت بدي اربح و عوضلك ياهن بس خسرت
سوسن : تربح شو ؟ عم تلعب قمار جمال
جمال : بوعدك المره الجايه اربح و عوضلك كل شي
سوسن : لسا في مره جايه انت ما بتستحي و بكل عين قويه بتقلي انا جايبهن طالما هيك طلاع من بيتي
جمال : بيتك ؟
سوسن : بتحب ذكرك انو كتبتلي هالبيت باسمي يوم اللي جبتلك عامر ؟ لبرا جمال
جمال : انتي سامعة حالك شو عم تحكي ؟
سوسن : اللي عم احكيه هلأ كان لازم احكيه من زمان .. انت ما بتستاهل الصبر اللي صبرتو عليك يا خسارة كل لحظه بعدت عن اهلي كرمال ضل معك ، طلاع من بيتي جمال روح احسن ما لم الناس عليك روووووح
جمال : طالع بس بوعدك انو رح تندمي على كل حرف حكيتيه
*طلع جمال من البيت قفلت الباب وراه و خليت المفاتيح بالباب...قعدت بالارض مسكت راسي بإيديي و صرت ابكي بشكل هستيري....
سوسن : اندم .. لسا بدي اندم .. ما في شي اندم عليه غير انو تزوجتك و تركت اهلي كرمالك .. يا ريتني سمعت كلامهن و بعدت عنك .. الله لا يسامحك ضيعتلي عمري بالقهر و العذاب و حتى دهبي ما خليتلي ياه .. سامحوني يا ولادي لانو ما عرفت اختار الزوج المناسب ليكون اب مناسب الكن....
________________________________________________
#بقلم_فتاة_من_ورق_بسمه_السباعي
*فتحت عيوني بعد ما حسيت حالي عم اختنق....
ام فارس : بسم الله شو هالكابوس البشع .. بسم الله الرحمن الرحيم
*رحت على غرفة ابني فارس .. دقيت الباب و فتحتو...
ام فارس : صباح الخير
فارس : صباح النور
ام فارس : جيت شوفك ازا صاحي مشان تصلي الفجر معي
فارس : انا ما نمت اصلا
ام فارس : ليش حبيبي
فارس : انا اسف زعلتك بكلامي بس ما بدي اترك زينة امي .. زينة ما الها حدا غيري بعد الله
ام فارس : و انا اسفه ظلمتا للبنت .. بعد الضهر منروح و منخطبا من هي المرة اللي عايشه عندها
فارس : الله يخليلي ياكي
ام فارس : و يخليلي ياك و ان شاء الله بشوف اولادك عن قريب ، يلا قوم توضى مشان تصلي معي
فارس : ان شاء الله
*طلعت من غرفة ابني .. حسيت هالكابوس اجا لحتى ينبهني انو ما لازم اتجبر على هالبنت و متل ما قال ابني فارس لازم حن عليها و عاملها كأنها بنتي هي يتيمة و ما الها غيرنا...
________________________________________________
#بقلم_فتاة_من_ورق_بسمه_السباعي
*بعد الفطور جهزت حالي و طلعت لحتى شوف ورد .. وصلت على المكان اللي حددلي ياه و صرت دور بعيوني على ورد لحتى شفتو .. كان قاعد بآخر الكفتيريا و عم يتطلع بساعتو كأنو عم يعد الثواني...
فرحة : مرحبا
ورد : اهلا و سهلا
فرحة : تأخرت عليك
ورد : لا ابدا
فرحة : حلو هالمكان
ورد : عيونك الحلوين .. شو بتحبي تشربي ؟
فرحة : قهوه .. نسيت انو عازمني على قهوه ؟
ورد : ما نسيت بس بتقدري تغيري
فرحة : لا بحب القهوه
ورد : لو سمحت تنين قهوه
فرحة : ساده
ورد : اكيد ساده
فرحة : شكرا
ورد : العفو ولو ، بقدر افتح معك الموضوع دغري و بدون لف و دوران ؟
فرحة : بتمنى هالشي لانو بدي ارجع على البيت
ورد : فرحة انا
فرحة : انت شو
ورد : انا حابب
فرحة : حابب شو
ورد : استغفر الله خليني احكيي
فرحة : اي احكي عم اسمعك
ورد : انا حابب اتقدملك
فرحة : تتقدملي يعني تخطبني
ورد : اي
فرحة : هيك و انت ما بتعرف عني شي
ورد : بس بعرفك بأيام المدرسه بس اذا بتحبي تحكي شي انا مستعد اسمعك لبكرى
فرحة : ورد انا عشت بحياتي اشياء بشعة كتر خلتني انطفي تماما صرت فكر اني سيئه عن جد لحتى كل هالامور البشعة عم تصير معي ؟ ما بعرف شو صار ولا ليش هيك صار حتى .. الشي الوحيد اللي بعرفو و بقدر خبرك ياه انو طاقتي بلشت تخلص عن جد و اني انطفيت .. ما عاد بدي شي من ايا حدا ابدا .. لا بدي حدا يحبني .. ولا بدي حدا يطبطب عليي و يواسيني ولا حتى حدا يوقف جنبي .. ولا بدي ايا شي من ايا حدا ولا من هالدنيا كلا .. بكفيني ضل لحالي .. و كل اللي بدي ياه انسى مهند و ارتاح .. ارتاح و بس .. ما عاد في شي بالدنيا قادر يصلح الشي اللي انكسر جواتي.
ورد : انتي غلطانه كتير بهالحكي فرحة انتي بتستاهلي حدا يعوضك بتستاهلي ترجعي للحياة و تحبيها و ترجعي متل ايام زمان تضحكي من قلبك و ترجع اللمعة لعيونك .. مهند كسر صغير كتير بالنسبة لقصص الناس اللي عم نسمعها و جبر كسرك من مهند قدام عيونك تطلعي فيني بتعرفي اني شاريكي و رايدك و بدي عيش عمري لإسعدك و عوضك .. انتي بس قوليلي شو بدك و انا جاهز لأعمل كل شي بيسعدك و بيرجعلك فرحتك و ترجعي اسم على مسمى.
*تطلعت بعيون ورد شفت حنية بحياتي ما شفتها....
فرحة : ورد أنا مابدي منك شغلات كتيره كل اللي محتاجتو أمان .. أنا محتاجة حس إنو إلي سند بهالدنيا إنو في كتف يسندني وضهر اتكي عليه .. أنا بدي إنت تعوضني عن كل الحرمان و القهر و الوحده بحنّيتك .. بدي قربك يمحي من قلبي خوفي من خسارتك .. مابدي تخلّيني نام شي ليله و أنا حاسستك بعيد أو يمر موقف وحس حالي ما بعرفك .. كأنك غريب .. بدي ما ياكل الهم من راسي شقفه و أنا عم فكر إنو ممكن نفترق ممكن ما نكمل .. حسّسني إنك رح تحارب الكون كرمالي و إنو إذا بيتسكر بوجهك باب رح تفتح بدالو عشرة و تكسر كل حيط أو حاجز بينحط بيناتنا لتوصلّي .. و لنكون سوا لآخر العمر .. طلباتي و احلامي ما بيشبهو طلبات أيا بنت بس هاد الشي الوحيد اللي بيخليني كون سعيده و ترجعلي الفرحة اللي فقدتها من زمان.
ورد : يا فرحة انا من اول يوم شفتك فيه و بدعي ربي يوما ما تكوني من نصيبي لهيك بوعدك كون سندك و أمانك بوعدك كون متل ما بتتمني و احسن بس انتي وعديني تعطيني فرصة و تعطي حالك فرصة لنعيش من هلأ كل دقيقة بسعادة
فرحة : بوعدك.
*لأول مره بحس بالراحه و الأمان .. قدرت ابتسم بصدق لأول مره بعد وجع و قهر طويل .. و لأول مره بحكي كل شي من قلبي بدون ما خاف او احسب حساب لردة فعل الشخص اللي قبالي .. يمكن طلع ورد بحياتي بهالوقت اللي انا تعبانه فيه لحتى يخبرني انو لسا الدنيا بخير و لسا في ناس صادقه و قلبها طيب...
ورد : فرحة عم تسمعيني ؟
فرحة : اي
ورد : ايمتى بقدر زوركن انا و اهلي لنطلب ايدك و تصيري فرحتي ؟
فرحة : بخبر اهلي و بردلك خبر
ورد : اشربي قهوتك بردت
فرحة : شكرا
________________________________________________
#بقلم_فتاة_من_ورق_بسمه_السباعي
*وصلنا على البيت اللي عايشه فيه زينة...كان بيت صغير مكون من غرفه وحده بحارة عتيقه...
خديجة : اهلا و سهلا شرفتونا
ام فارس : النا الشرف ست خديجة
خديجة : يعني هيك اجا الوقت اللي رح تطلع فيه زينة من عندي
ام فارس : هي سنة الحياة
فارس : بوعدك خالة خديجة تضل زينة تزورك و تضلي انتي تزوريها ببيتها الجديد
خديجة : الله يوفقكن و ييسر اموركن
ام فارس : خلونا نقرأ الفاتحه على نية التيسير
*و هيك بلشت حياتي من جديد .. حياتي مع زينة اللي رح تزين حياتي و تصير هي عيلتي و انا عيلتها .. غمزت زينة و قرأت الفاتحة....
________________________________________________
#بقلم_فتاة_من_ورق_بسمه_السباعي
*ضليت طول اليوم عم ابكي .. مسكت تليفوني اكتر من مرة لحتى احكي مع فرحة بس كل مرة بتذكر انو زعلتها و ما راضيتها بأيا عين بدي احكي معها و فضفضلها هلأ...
مريم : ماما ليش عم تبكي
عامر : البابا رجع ضربك
سوسن : لا ما ضربني
مريم : انتي زعلانه مننا
سوسن : لا حبايبي ما بزعل منكن انا زعلانه من حالي و من اختياري الغلط
عامر : ما تبكي ماما نحنا منحبك كتير و ما بدنا تموتي
سوسن : و انا بحبكن كتير انتو اللي مهونين عليي حياتي
________________________________________________
#بقلم_فتاة_من_ورق_بسمه_السباعي
*بصباح اليوم التاني...
لبست قميص زهري و حطيت حمرة زهرية .. حسيت انردتلي الروح بعد ما كانت مفارقتني من زمان...
فرحة : صباح الخير بابا صباح الخير ماما
ابو روعة : صباح الورد
ام روعة : صباح الفل شو هالحلاوة هي
فرحة : طالعتلك ماما
ابو روعة : خبرتي ورد يتفضل بعد المغرب
فرحة : اي بابا خبرتو
ام روعة : الله يوفقك و ييسر امرك
فرحة : امين يا رب بدكن شي
ام روعة : ما تنسي تجيبي معك حلو و انتي راجعه
ابو روعة : لا انا بجيبهن
فرحة : متل ما بدك بابا ، باي
ام روعة : الله معك
*نزلت على الشارع اخدت نفس عميق و ابتسمت و مشيت...
________________________________________________
#بقلم_فتاة_من_ورق_بسمه_السباعي
*وصلت زينة على المحل و ضليت عم اتأمل عيونها...
زينة : يسلمو على التوصيله بدك شي
فارس : اي
زينة : شو
فارس : ما عاد بدي تشتغلي بالمحل
زينة : ليش
فارس : ما عاد بدي تطلعي بالبرد و تتعبي بالشغل بدي تضلي اميرة بالبيت و كل شي بيوصل لعندك
زينة : خايفه كون عم احلم
فارس : ما عم تحلمي زينة
زينة : هالحكي كان حلمي .. طول عمري بحلم ما اتعب و ضل بالبيت مرتاحه اصحى ايمتى ما بدي و نام ايمتى ما بدي
فارس : حلمك تحقق اليوم بتستقيلي و بتفرغي حالك لتحضيرات عرسنا باقي اسبوع
زينة : ان شاء الله
فارس : انتبهي على حالك
زينة : و انت كمان .. باي
فارس : باي.
________________________________________________
#بقلم_فتاة_من_ورق_بسمه_السباعي
*ضبيت تياب جمال بشنتة و حطيتها على باب البيت لانو كنت حاسة رح يجي على البيت بغيابي...قفلت الباب على اولادي و مشيت...كل خطوة عم اخطيها عم حس بتقلها...بهتت و كسر قلبي ما عاد في شي يصلحو...
________________________________________________
#بقلم_فتاة_من_ورق_بسمه_السباعي
*وصلنا مع بعض على المكتب...انا و فارس عيوننا عم تلمع بس سوسن وجهها تعبان و باهت...
فارس : خبرونا شو عملتو بالعطلة ههههه
فرحة : انت خبرنا او برأيي نحكي نحنا التلاته مع بعض
فارس : انا خطبت زينة
فرحة : انا رح انخطب لورد
سوسن : انا رح ارفع دعوى طلاق على جمال
فارس : شووو سوسن
فرحة : عن جد عم تحكي سوسن
سوسن : اي والله جد الجد .. الدموع اللي نزلهن بالمشفى كانو مجرد كذبة ليسرق دهباتي و يلعب فيهن قمار
فرحة : ليش ما حكيتي معي ليش عشتي هالحزن لحالك ؟
سوسن : كيف بدي احكي معك و انا مزعلتك
فرحة : جدبة و بتضلي طول عمرك جدبة انا و انتي خوات و لو تخانقنا منجي تاني يوم ولا كأنو في شي
فارس : نحنا ايد وحدة سوسن و كوني اكيده انا و فرحة معك و جنبك ما رح نتركك بحياتنا
فرحة : حكيتي مع محامي
سوسن : لا
فارس : رفيقي محامي رح يساعدك لتطلقي بأسرع وقت و ترتاحي منو
فرحة : و بعدا منروح انا و انتي و منصالح اهلك
سوسن : الله لا يحرمني منكن
*خلص دوامنا بكل هدوء و كل واحد مننا رجع على بيتو...
________________________________________________
#بقلم_فتاة_من_ورق_بسمه_السباعي
*وصلت على البيت فتحت الباب ركضو لعندي ولدين صغار...بالاول ما استوعبت بعدين صرخت بأعلى صوت عندي...
فرحة : روووووووووعة
روعة : هههههه اي
فرحة : ايمتى اجيتي
روعة : صرلي نص ساعة هون .. معقول اختي الصغيرة بدها تنخطب و ما احضر خطبتها
فرحة : ههههههه يا عمري انتي
روعة : على فكرة بابا و ماما بيعرفو
فرحة : بتعرفو و ما خبرتوني
ام روعة : حبينا نفاجئك
ابو روعة : لو خبرناكي رح تصرعينا اتصالات هيك مفاجأة احلى
فرحة : اي والله احلى مفاجأة بالدنيا
روعة : جبتلك معي فستان ناعم مشان تلبسيه اليوم
فرحة : بتعرفي ليش بحبك ؟
روعة : اممم لاني اختك
فرحة : لا لانك بتجيبيلي فساتين هههههه
روعة : ههههه روحي جهزي حالك باقي ساعة لحتى يوصلو
فرحة : بتعرفي الوقت كمان
روعة : اكييييد
*جهزت حالي و رفعت شعري ببكله ناعمة .. حطيت مكياج ناعم و لأول مره بحس حالي حلوه هيك و مستمتعه بكل التفاصيل اللي عم اعملها و عم تصير معي....
*وصلو ورد و اهلو على الموعد...نظرات ورد اللي مليانه حب و حنية خلتني حس اني اسعد انسانه...ركضت على المطبخ و بعتلو رسالة لورد...
فرحة : "بيقولو بعد كل عتمة في نور .. و هاد النور كان أنت
اللي بيجي ليغيّر الحياة .. يحلّي درب ويهوّن التعب
كان لازم أعبر سنين هالظلام وأتحمّل الوحشه
لأشعر بقيمه النور .. و يتعوّض دمع صبري بضحكه
صار فيني أمشي لقدام بدون ما ألتفت لورا
وبخطوات ثابتة وقويه .. لأنّي على ثقه إنّي ما بنهزم طول ما انا معك و انت معي
في قلب مساند خطواتي وعيون عم تتأمّلني و تنطرني و هالعيون عيونك .. في دعوات عم تنرفع للسما بصوتك عم تردد فيها اسمي
أجيت أنت .. الشخص المناسب بالوقت المناسب
و صرت النور اللي جمّل الحاضر و أزال الرهبة و الخوف من المستقبل .. و محا كل مآسي الماضي .. انت النور اللي ضاوي كل الحياة بعيني"
ورد : "انتي فرحتي و سعاده قلبي انتي الضو لروحي و نصي التاني اللي طول عمري بحلم لاقيه .. بوعدك عيش عمري لإسعدك بوعدك و انتي معي ما تنزل دمعتك الا من شدة الفرح"
فرحة "كنت بحاجة لشخص و أنا معو حس براحة و أمان لقلب لاقي حالي فيه و حس بإنتماء إلو كأنو وطني و بيتي بهالدنيا الغريبة .. لروح تقاسمني الحياة بالتعب و الراحة .. بمرارة الأيام و حلاوتها بكل تفاصيلها البشعة قبل الحلوة .. بحاجة لعيون إذا تأمّلت فيها شوف صورتي صافية و عم تلمع و كأني أجمل شخص بالدنيا .. بحاجة لإيد اتمسّك فيها و تنسّيني الدنيا .. امشي كل الدروب بدون خوف أو قلق لأن احساس بالطمأنينة محاوط قلبي طالما هالإيد بأمانها ماسكتني .. بحاجة لحدا ما يتغيّر .. يضل متل أول مرة و دائماً بعيني يكبر .. لحُب يعوّضني عن كل شي مرّيت فيه .. لكتف أرمي همي عليه .. أظهر ضعفي و انهياري و كلّي ثقة إنّو رح يساندني ويقوّيني .. بحاجة لمساحة سلام بين هالركض و السعي و كل هالحروب اليومية فسحة سلام يرتاح فيها هالقلب وحس بلذة العمر .. و رزقني الله فيك .. متل مابحب .. على قد ما بحتاج و متل ما بحلم و بتمنى الحمد لله عليك يا أجمل أرزاقي"
________________________________________________
#بقلم_فتاة_من_ورق_بسمه_السباعي
*تمت خطبتنا انا و ورد .. حمدت الله على اختياري الصح هالمرة و انو ثقتي عرفت اعطيها للشخص الصح و صرت متأكدة انو عند رب العالمين عوض كبير و جبر كتير و انو مهما ضاقت فيك الدنيا يوما ما رح تنفرج و تنسى كل وجع عشتو....
*سوسن بلشت تفترق عن جمال بكامل ارادتها بعد ما خلاها تندم على اختيارها الو....
*فارس تزوج زينة و بالعرس كان مبين من عيونهن انهن اسعد تنين بهالدنيا....
ورد : فرحة .. يا فرحتي تعالي بدنا نقطع كيك عيد ميلادك ال ٢٦
فرحة : قصدك عيد ميلادي ال ١٦ ههههه
ورد : ما بتفرق المهم اتركي تليفونك و تعالي ما في بيناتنا هنن عشر سنين هههه
فرحة : بعد ما عرفتو القصة كلا حابة خبركن اخر شي قبل ما روح قطع الكيك ... لا تحصرو فكرة الزواج بمجرد فستان فخم و عُرس و السلام .. الزواج رحلة ما تقبلو فيها الا مع رجل تختاريه بعقلك قبل قلبك .. و غير هيك "ليذهب قطار الزواج إلى الجحيم" إذا ما اخدك للجهة اللي بتريديها و بتتمنيها و تلاقي فيها راحتك .. الزواج ما بيكتمل الا بظل رجل يكون رفيقك و يحلي حياتك و سنينك .. اختاري زوج يمشي على طريق النبي الكريم .. مو شرط يكون فقيه أو عالم بالدين .. بس بيكفيني سعيو للآخره و جهادو المستمر لنفسو و يخاف الله فيكي .. ما بيكفيه يعيش معك بالدنيا .. انما يسعى معك ليكمل رفقتكن بالجنة .. اختاري شريك حقيقي تتحد أهدافكن مع بعض و تسعو لتحقيقها .. اختاري رجل يفتخرو ولادك فيه و يتخذو منو قدوة.
ورد : يا فرحتي دابو الشموع
فرحة : يلا ورد جايه .. بتمنالكم ليله سعيده و حياة مليانه فرح تصبحو على خير
*رميت تليفوني و ركضت لكمل حياتي برفقة احسن انسان عرفني فيه القدر...
يومًا_ما
انتهت
بقلم_فتاة_من_ورق_بسمه_السباعي
شكرا لكل حدا دعمني و قلي كلمة حلوه اسعدتني لكمل هالقصه بعد غياب طويل ، بتمنى تكون نالت اعجابكم و غيرت نظرتكم لكتير من امور الحياة❤💕
خبروني شو اكتر شخصية حبيتوها ؟ و شو اكتر شخصية تعاطفتو معها ؟ و اكييييد شو اكتر شخصية كرهتوها ههههه ؟؟
بحبكم_كتير_و_بكبر_فيكم
ليله_سعيده
رواية زواج لدقائق معدودة كامله من هنا
رواية الطفله والوحش كامله من هنا
رواية جحيم الغيره كامله من هنا
رواية مابين الضلوع كامله من هنا
رواية سيطرة ناعمه كامله من هنا
رواية يتيمه في قبضة صعيدي كامله من هنا
الروايات الكامله والحصريه بدون لينكات من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق