ياجارتي_اسمعي_حكايتي بقلم_نور_سوريا مستوحاة_من_الواقع الجزء_الآۆلْ_والثاني_والثالث_الاخير حصريه وجديده على مدونة النجم المتوهج للروايات والمعلومات

 ياجارتي_اسمعي_حكايتي بقلم_نور_سوريا مستوحاة_من_الواقع الجزء_الآۆلْ_والثاني_والثالث_الاخير حصريه وجديده على مدونة النجم المتوهج للروايات والمعلومات 

ياجارتي_اسمعي_حكايتي بقلم_نور_سوريا مستوحاة_من_الواقع الجزء_الآۆلْ_والثاني_والثالث_الاخير حصريه وجديده على مدونة النجم المتوهج للروايات والمعلومات 

3 أجزاء و 3 قصص بقصة وحدة حبيت أكتبهم بطريقة مختلفة

بديعة وإلهام جارات بنفس العمارة..واقفين عالدرج وعم يشوفو صبحية والعَتّالين..

صبحية عم تنقل اغراضها للبيت..لتصير جارة هالتنتين..

بديعة: بالظاهر هي بدها تسكن بالعمارة.. ان شاء تكون أحسن جارة..

إلهام: وأنا مو عاجبتك يابَعدي..لحتى عم تندبي حَدي..

بديعة: اي مين جاب سيرتك.. بيظل لسانك متبري منك.. اي انتي رفيقتي ومتل أختي..ولولاكي كنت بقبر ستي

إلهام: هههههه دمك خفيف ومزحك ظريف..

بديعة: شو رأيك بكرة الصبح نجي لعند الجارة.. ونتعرف عليها بهالزيارة

إلهام: اي..منتعرف ع قصتها ومنشوف شو حكايتها

تاني يوم (عم يندق الباب)

صبحية: اللهم اجعله خير.. مين جاي الصبح بكير

بديعة: صباح الخير جارتنا..جينا نزورك فاضيتلنا؟

صبحية: أهلا وسهلا ..تفضلو مية هلا

إلهام: قلنا منزورك ومنشرب عندك قهوة.. ومنتعرف عليكي ازا مافيها سِئْلة

صبحية: بس لا تواخذوني البيت شوي مكركب.. وقلت اليوم بنظفو ليصير مرتب

بديعة: حبيبتي نحن منساعدك.. ولا لشو اسمنا جارات بيتك..

قامو كلهم وبلشو تنظيف وترتيب .. وتعاونو بهالشغل العصيب.. وانتهو بوقت للعصر قريب..

ولما الشغل خلصو.. القهوة  عملو .. وبلشو اطراف الحديث يتبادلو..

صبحية: شكرا كتير إلكم..مابعرف كيف هالمعروف ردلكم.

إلهام: أمانة لا تتشكرينا..نحن واجبنا عملنا

بديعة: قهوتك كتير طيبة ياضرسانة.. ما ذقت متلها من سنة

إلهام: ولي على قامتك يا بديعة يحرق حريشك شوو فضيعة..اي مو مبارح كنتي عندي وشربتي من قهوتي!!!

بديعة: وانتي بتظلي تدققي عكلامي و واقفتيلي سنجأ عرض.. اي خِفَّي عليي شوي و لا تحملي السلم بالعرض........

صبحية: ههههههههه ما أهضمكم وما أحلاكم.. بتظلو متل الردادة والنواحة.. وانا فعلا كتير حبيتكم.. وحابة أعرف أكتر عنكم بصراحة.

بديعة: تكرمي رح نحكيلك قصتنا.. بشرط عن قصتك كمان تقليلنا..

صبحية: والله من عيوني التنين.. يا أحلى جارتين

بديعة: يا ستي مالّا إنتي ..انا أرملة وهي حردانة..

بس مو هاممها هالمقوصة..مو شايفتيها كيف مبسوطة و سمنانة؟

إلهام: سمنانة وشايفة حالي.. وهيك أحلالي..

صبحية: ولا يهمك حبيبتي إلهامو.. جسمك هيك كتير حلو..

إلهام: شايفة العالم اللي بتفهم كيف بتحكي.. مو متل كلامك الدج  بيبكّي

بديعة: بتعرفيني بمزح كتير.. واكيد مو قصدي دايقك.. وفعلا غلاكي بقلبي كبير.. و الزعل أبدا ما بيلبقلك

صبحية: يلا بقى فضوها .. و خلونا للسيرة نكملها..

بديعة: تكرمي يا أحلى صبحية..اي والله العقدة عندك هَنِيَّة.. 

صبحية: تسلمي

بديعة: حياتي عند أهلي ..كانت كتير طبيعية وروتينية.. وقلت بظل عندهم عمهلي ..ولاحقة عالزواج والمسؤولية..

بس لما صار عمري عشرين .. تقدملي عماد  الحسين.. وقامت الأفراح والليالي الملاح.. وعملولي حفلة وحنة.. و طبلة وزمر و رنة..

عشنا مع بعض أحلى عشر سنين وجبنا ولدين علاء وسيرين.. وبعدها سافر عماد بشغل  عروسيا.. وبعد سنة لحقناه بالبر من تركيا.. عشنا هونيك سنتين من أحلى السنين.. 

وبعدها رجعنا عسوريا بلدنا ..وبمدينة الرقة شي شهر سكنَّا.. بس يا فرحة ما تمت.. روح زوجي لربها رجعت...

صبحية: يارب يالطيف..بس ياترى مات كيف؟

بديعة: كان رايح عشغلو وعمل حادث قوي بسيارتو..

وبعد ما عزونا بموتو.. طلعلنا حصة كبيرة من ورثتو..

بس يلي مالو حظ لا يتعب ولا يشقى..

وراحة البال مستحيل تبقى..

من بعدها صار قصف على مدينتنا.. وللأسف نزلت القذيفة ببيتنا.. مات ابني  قدام عيوني.. و دفنت بقايا جسمو بإيديي..

وماكان في قدامي غير انو نهرب انا وبنتي..

وفعلا طلعنا بتيابنا اللي علينا ..ومع مهرب تعاملنا..

طلع نصاب وبَلْهَموطِي... وكان جاي عبالي أُسْفُقو ببوطي.. بس قلت معلش يا سِت.. خلينا ننفد انا وهالبنت..

كان طريقنا صعب وطويل.. وأخد معنا من طلوع الصبح لآخر الليل.. بس ربكم رحيم وبفضلو وصلنا بالسليم..

وصلنا بعد مشقة لهي المدينة ونزلنا عند قرايبتي أمينة.. بس زوجها صعب هالمسكينة.. وكلامو أحد من السكينة..

قعدنا عندهم فترة شهرين.. والحمد لله قدرت بعدين إني اشتري بهالعمارة بيتين..

واحد فيه سكنا والتاني أجرنا

صبحية: اللي بيصبر بينول والشدة عنو بتزول..

إلهام: يا حبيبة قلبي يا بديعة.. فعلا انك كتير صبورة ورائعة

بديعة: تسلمي لقلبي يا إلهام.. ربي يبعد عنك الحزن والاوهام.. بس اتركيلنا فنجان هالقهوة من إيدك.. وبلشي احكيلها لصبحية قصتك

إلهام: اي العين تطرقك..بتظل ضيقة عينك ومابخلص من لسانك! استكترتي عليي هالفنجان الصغير ..أصلا بدي جدد لأنها طيبة كتير

صبحية: اي مو تكرمي وعحسابك كل قهوتي

إلهام: ااااخ عقولة المثل.. رضينا بالبين والبين ما رضي فينا.. والله يطول هالبال.. ويزيل الهم عنا

صبحية: احكي إلهام احكي... والله شغلتي بالي

بديعة: من طول عمرك يا زبيبة........

إلهام: انا هلأ يابديعة زبيبة.. اي شو لسانك جايبتيه من زريبة؟!

بديعة: اي متل عوايدك لا تعملي.. ولا تشطي وتمطي بالحكي.. مشان ما تلعيلنا قلبنا لعي

إلهام: انا رح احكي قصتي..وبالأسلوب اللي بيعجبني..  واللي عاجبو عاجبو واللي مو عاجبو ينتف حواجبو

صبحية: والله خايفة يكون أول هالمزاح شتم وآخرتو لطم.. 

إلهام: والله انا زوجي متل ما بيقولو ابن فرفور و ذنبو مغفور.. بس انا حردت منو وقلت بنفسي ابنك لاتعلمو خلي الدهر يعلمو.. بس بالظاهر اتفق القط والفار على خراب الدار

أمه ملعونة و شخصيتها قوية.. وماعندها مزح وكلو بتاخدو بجدية.. وبكل عرس إلها قرص.. يعني بتتدخل بكل كبيرة وصغيرة وابنها بيسمع كلامها لهالخطيرة..

وتظل تعبي براسو إني  بالبيت موشاطرة ومابشتغل  وإنو هو كتير برا بيتعب وبينعل.. هو صحيح نومي شوي تقيل بس والله لا بكل ولا بمل..

و زوجي شكلو مو كتير زابط واغلب الوقت بدنو حاطط..

بس القرد بعين أمو غزال.. والخنفسة شافت بنتها عالحيط قالتلها تؤبريني متل اللولية بالخيط..

انا كنت كتير متحملتو ومتحملة نكد أمو..

وقول يا بنت معلش بكرة بيصطِلِح وقلبي بينتعش..

وكنت كتير إحكي  معو وانو يحَكِّم عقلو ويتصرف من شورو .. وهو كان بيعرف انو الحق معي وانو امو عم تغيضني.. بس كان إذن من طين وإذن من عجين.. 

ومع هيك انا تحملت وعلى قلبهم قعدت..

وحتى كنت ظل مازحو وبعمل فيه مقالب تضحكو.. 

وبآخر مقلب اجيت لكحلها ام عميتها.. حطيت زيت عالارض لمازحو..ام تزحلط ووقع وانكسرت إجرو..

أكلت بهادل وشتايم من حماتي وحلفتلها اني بمزح وما صدقتني.. قالت عني إني بقصد هالشي.. وهي مَوتِتْ ابنها وهو عايش و حطت خطيتو برقبتي..

وانا وقتها ضبيت اغراضي وحردت هون عند أهلي اللي مستأجرين عند بديعة جارتي..

بديعة: العمى بقلبك .. حدا بيعمل عملتك!

صبحية: والله ياإلهام زعلتيني كتير وهالشي اكيد إلو تدبير..

بس ازا ركضت ركض وحوش غير نصيبك ما بتحوش

بديعة: أيوااا هالحكي تعلميه وحلقة بإذنك حطيه..

إلهام: شو يعني..فَهموني

صبحية: حبيبتي زوجك هاد نصيبك.. واكيد قلبو طيب متلك.. وهالمشكلة أكيد إلها حل و بيرضي الكل..

إلهام: بس لو فيه خير ما كان رماه الطير

بديعة: حبيبتي انتي طلعتي من عمايل أمو واكيد هو غير  بطيبتو و قلبو

إلهام: بدي ظل حردانة عند اهلي.. لحتى هو يحس بقيمتي ويرجعني بس طبعا بشروطي..

بديعة: اي ست صبحية دورك.. هاتي احكيلنا قصتك.

ولا قاعدة وماإلك علاقة باللياقة..

صبحية: مين قال مابدي إحكي يابديعة.. ليش هيك انتي بالحكم عالناس كتير سريعة.. يا ستي أنا مطلقة ومريت بفترة ضِيْقة

إلهام : يبعتلك الهنا يا صبحية.. على هيك سَمْعة و خَبرية..

بديعة: اي كملي صبحية كملي وقصتك كلها احكي..

صبحية: طليقي حنون و كريم و بنفس الوقت أناني ولئيم.. يا حظي ويا سعدي.. قال اجت الحزينة لتفرح أم ما لاقت لحالها مطرح.. 

كنت حس إني رح عيش عندو حياة حلوة وللأسف طلع أكبر بلوة..

اااخ والله المنحوس منحوس ولو علقو عراسو فانوس..

كان بيحب الدلال إلو لحالو و مابيقدم اهتمام لغيرو..

ولك إضرب على حظي شو مشحر و إفنى على نصيبي المعتر..

والله كنت حس معو بالأمان ..بالرغم من إنو في بعقلو شوية جنان.. ونفسو دنية وبيحب النسوان..

بس فعلا اللي استحوا ماتوا..

عشت معو 5 سنين قهر  و كل فترة ألقطو عم يحكي مع بنت بالسر.. عأساس يقلي نزوة وعم إتسلى..ومو دريان انو قلبي بيغلي و بيتقلى..

و صحيح خلاني كفي دراستي ..بس من وظيفتي كان بدو يحرمني..

بس انا طنشت و عنّدت..وأبداً ما وافقت..

زادت بيناتنا المشاكل والخناقات.. ويحط الحق عليي بكل المرات.. 

بس قلت يا بنت اصبري كرمال هالولد اللي عندي..

بس اللي صار آخر شي إنو جبلي فليفلة حدة كتير وحطها بوشي..

مشان أعملو فيها مكدوس وهو يظل مرتاح و عجوالو بغرفتو محبوس..

وبعد ما اشتغلت فيهم شوي و تفلفلو من الحد إِيْدَيْ.. طار عقلي من راسي و فتت لعندو لإطفي غضبي.. 

لقيتو ماسك هالجوال وبيضحك.. وماعلى قلبو هم ولا  نفسو عم يتمالك.. وهيك عينك كنت عينك..

قربت منو وغازلتو.. اطلع فيني وغمزتو.. مسحت بإيديي عوجهو و عيونو وشعراتو.. وهو بلش ينط ما يحط.. وع شوي رح يتنجلط..

ومابقى عرف كيف يشيل الحد ومافي غير بيضرب بكل خد..

وانا إطلع فيه وشمتانة.. و بمصيبتي الجاية عرفانة.. بس ما كان هاممني غير إني إتخلص من هالشخصية الهفتانة..

و بلش مسبات وبهادل.. هالقليل الأصل..

وهون طالق 3 مرات قلي .. وانا تركتو عم يولول ويبهدلني .. وبلشت ضب اغراضي..

كنت بدي آخد معي ابني ..بس هالمقصوف الرقبة ما خلاني.. و رحت بوشي لبيت أخي..

ظليت بفترة العدة قاعدة عندو.. وعم إتحمل غلاظة مرتو.. بس ماعد قدرت إتحمل هالعيشة..مع مرت هالأخ الكرنيبة..

وبعد العدة دوّرت و قدرت لاقي هالبيت وإستأجرتو.. ومبارح حتى إجيت و سكنتو..

وان شاء الله بدي طالب بإبني.. لأنو صغير وحضانتو من حقي..و مابدي يربى عند هيك أب وبيظل سند إلي بكلشي..

بديعة: ولك يقصف عمر هيك رجال.. لك مشانهم مو محرزة تزعجي هالبال

إلهام: فعلا يا مأمنة بالرجال متل المي بالغربال

وبعد شوي اندق الباب.. وقامت صبحية تشوف مين هالحباب..

محمود: مرحبا يا أختي.. ياترى عندك إلهام مرتي؟

صبحية: اي أهلا وسهلا.. 

إلهام هاد زوجك .. وعم يسأل عنك..

 إلهام: يي هاد محمود يقبر قلبي..اكيد جاي وبدو مراضاتي.. لقوم شوفو و روح معو

بديعة: ولك اقعدي و كِنِّي.. دغري نطيتي و سَخسختي.. ولك تَقْلِي عليه حالك..وخليه يعلا قدامو مقدارك..

إلهام: اي شتقتلو وشتقت لبيتي.. وهو عندو نفس طيبتي.. وبيظل زوجي وكل حياتي

قامت إلهام وركضت لعند الباب .. وكأنها بدها تلحق شي أكلة كباب..

بديعة: يبعتلها اربعة سوا.. حمة ونار وبارود وهوا..

لك شفتيها كيف دغري ركضت لعندو.. ونطت لما سمعت صوتو.. وكأنها مو مصدقة ايمت ترجع لحضنو ..

شكلها نِسْيتْ انها كانت حاطة شروط..ومابترجع إلا ليعملهم هالعكروت..

اييييه والله نحن النسوان قلبنا مشرشح و عقلنا مْكَرسَح .. وكلمة بتاخدنا وكلمة بتجيبنا.. ولا شلون يا جارتنا؟!

صبحية: صدقتي يا جارتي يلي معك بتحلى حياتي..

                            انتهت