تفاح_أخضر
بقلم_أمينه (محبة الرحمن ) الفصل الاول حصريه وجديده
تفاح_أخضر
بقلم_أمينه (محبة الرحمن ) الفصل الاول حصريه وجديده
المقدمة
من شدة هواها.. آغار عليها من تلك الفاكهة التي تعشقها لحد الجنون .
تلك الفاكهة التي أخرجت أبونا آدم من الجنة.. وأخرجت جنون عشقي عندمآ لامست شفتيكِ الورديتان كأنهما زهرة أقحوان، تقبل حبات اللؤلؤ ، وتروى من نهر ريقكِ كا الخمر يذهب العقل..وبان السرور على وجنتيكِ بشكل ملفت .
من فرط غيرتي أصبحت شبيه بركان لايستطيع أن يحتوي النار التي تحرقني من الداخل .. فينفجر هياماً وجنوناً .. رفقاً بقلب حار من فرط غيرته من تلك الفاكهة.
الحياة بشعة كثير ماتعطي الإنسان إلي بده ياه وخصوصاً اذا كانت بطلتنا يتيمة الأبوين وفوق منا عندا اختها إلي أصبحت مسؤوله منا .
كيف رح تصرف راما مع التحديات والظروف إلي تختبر صبرها لأبعد حد لكن لصبر حدود..
كيف كل الحب لأختها وحبيب عمرها يقلب لكره ..
مين الأيد الخفيه إلي عم تحركهم مثل مابده...
واحداث كثيره مع أبطال قصتنا ..
تفاح_أخضر
بقلم_أمينه (محبة الرحمن )
الجزء_الأول
كل شخص فينا جواته سر مابحب حد يعرف عنه خصوصاً إذا كان شي مو منيح او شي خارج عن إيرادتنا من مصاعب الحياة الي عم تنفرض علينا مثل القدر المكتوب في كتابك من اول تكوينك في احشاء امك .. متل ماحكت ستي الي مكتوب ع الجبين لازم تشوفه العين .. من هون رح احكي قصتي الي يمكن تكون قصة في شي فلم او مسلسل او قصة واقعيه رغم كل شي فيها من فرح وحزن بس حبيت اشاركم اياها .
قصتي بلشت من وقت ماتت امي الي ربتني انا واختي زمرد الي تصغرني ب ثلاثة أعوام بعد موت ابي بسكته قلبيه من وقت كنا صغار وترك حملنا ع أمي الي شتغلت وكدت لحتى تأمن النا متطلبات الحياة الرئيسيه بعد ماتخلى عنها اهل ابي وأهل امي لانه كل شخص فيهم فيه من الهموم والمتاعب الي نستهم هل الأرملة وبناتها بس عمي علي هو الوحيد الي بقي على تواصل معنا.
ماتت أمي وهي عم تشتغل لتأمن لقمة العيش النا . ماتت وهي عم تشتغل بمصنع لصنع مواد التنظيف الي هب فيه حريق.
ماتت وهي تنطق بأسمي انا وزمرد .
ماتت وهي خايفه علينا من الدنيا .
خلص راحت وتركت إلي التعب والشقى وحمل اختي الي عم حاول بكل جهد اني ماقصر بشي ناحيتها.
----------
وقفت قدام المرايه وانا عم اربط شعري وعم اطلع بعيوني الذبلانه ..فجأه حسيت بدوخه بسرعه مسكت بالكرسي الي جنبي وغمضت عيوني لحتى راحت الدوخه .. فتحت عيوني وانا باخذ نفس .
دخلت زمرد وهي لابسه لبس المدرسه : انا جاهزه بالوقت المحدد..يلا نطلع.
طلعت ع وجهي الشاحب وبسرعه مشيت لعندي ومسكت ايدي بخوف: وجهك اصفر رجعتلك الدوخه .
هزت راسي بالنفي لحتى ماخوفها: لا ياقلبي انا بخير .. يلا امشي قدامي لا تتأخري ع مدرستك .
وصلتها ع مدرستها: حبيبتي زمرد انتبهي ع دروسك منيح بدي تنجحي وبمعدل عالي .
زمرد: رح ابذل كل جهدي وانجح بمعدل عالي و رح اهدي النجاح الك لأنك حرمتي حالك من الدراسه لحتى تدرسيني.
بستها ع خدها ودخلت المدرسه وانا كملت مشي لمجمع الباصات ووقفت استنى الباص واذا ب سعيد يوقف جنبي: الحمدالله لحقتك قبل ما يوصل الباص .
ضحكت بوجهه: صباحو .. خير في شي مهم.
وقف وهو واضع ايديه بجيابه وعم يطلع ع السيارات الرايحه والجاي : مافي شي بس بحب أصبح بوجهك بحس يومي يكون كثير منيح واموري ميسره ياحب حياتي.
: خجلتني .. اي سعيد كيفها خالتي هلأ.
تتهد: ع حطت ايدك..عنيده ماتوخذ ادويتها الا بعد ماتعذبني انا ومنال ..
: الله يعينها خالتو لأنها مو متقبله فكرة انها مريضه.
سعيد يأشر بحاجبه: هي الباص اجى يلا جهزي حالك .
وصل الباص وطلعت فيه قعدت ع جهة سعيد وانا بطلع عليه من الشباك وعم ابتسم اله وهو واقف وعم يبادر بنفس الابتسامه ... مشي الباص لحد ماختفى من قدامي .. بقيت اعم اطلع من الشباك وسرحت بعالم ثاني وماصحيت الا رجال كبير بالعمر عم يدقر باصبعته: يابني الشوفير بده الاجره .
: اه اسفه ماكنت منتبها
بسرعه طالعت الأجرة واعطيته اياها وهو أعطاه لشخص الي قدامه وكذا حتى وصل للشوفير.
وقف الباص نزلت منه وانا امشي بسرعه لحتى ما بتأخر على شغلي .. دخلت المشفى وبسرعه رحت لعند الدفتر الي بوقع عليه اول مانوصل وبعد مايخلص الدوام .. مسكت القلم ووقعت .
ام محمود: كويس انك ماتأخرتي يابنتي يلا بسرعه بدلي ثيابك وع شغلك لانه اليوم يوصل الدكتور سيف .
عقدت حواجبي: مين هاد .
ام محمود: هاد اشطر دكتور في جراحة الأورام والأعصاب اله سنة بأمريكا عم يعمل أخطر العمليات واليوم رجع لحتى يستلم القسم الجراحه هون .
: اه ..طيب خليني روح بلش شغل قبل لا يوصل .
بسرعه دخلت بدلت ثيابي ولبست لبس عاملات النظافة في المشفى ..بلشت جر العربه الصغيره الي فيها الأدوات الازمه وبلشت انظف وامسح ولم الزباله الي ع الارض والي في سلال الي بغرف العمليات لانه مستلمه تنظيف هاد القسم مع عرين وينال وبدر .. خلصت لم الزباله وربطت الكيس وحملته .
ينال : لوين.
رفعت الكيس: بدي كبه برا.
ينال: اذا مافيها غلبه خذي هاد الكيس معك.
من غير اي اعتراض اخذت الكيس ورحت كبيتهن بالحاويه الي برا .. مشيت لحتى ادخل صفت قدامي سياره لونها اسود وفخمه..نزل منها شب وهو لابس بدلة ونظاره سوداء مشي وهو رافع راسه كأنه شخصيه مهمه لحظات اختفى من قدامي.. دخلت جوا ومشيت لعند عرين: هيك القسم نظيف .
اعطتني الممسحه: خذي قال شو الدكتور أحمد بدو نعيد ع غرف العمليات بسرعه.
: اف ليش كل شي نظيف.
عرين وهي تسحب فيا: لحتى الدكتور سيف مايعلق ع شي لانه شخص بلا رحمه وقاسي كثير .
خفت منه قبل لاشوفه .. خلصنا تنظيف واذا باب قسم العمليات يفتح ويدخل منه مجموعه من الأطباء والطبيبات والممرضات والكل ماشي ورا الشب الي شفته دخل لجوا المشفى قبل لحظات.. بسرعه سحبتني عرين وطالعتني برا القسم.
سحبت ايدي: مالك سحبتيني هيك.
عرين: خفت ليشوفنا ويبلش فينا تعليمات .
لسه ماخلصت كلامها واذا بدر يركض ناحيتنا: بنات بسرعه الدكتور سيف عامل اجتماع النا .
طلعت بوجه عرين الي تحكي: ياحبيبي اكلنا هوا.
خلال ثواني كنا كل قسم العمليات من دكاترة وممرضين وعاملين نظافه الكل قاعد وعم يستمع لدكتور سيف وهو يحكي تعليماته: هاي المشفى من أكبر المستشفيات الي في المنطقه بل في القارة لهيك مابدي أي أخطاء او شي مومنيح يصير فيها خصوصاً قسم الجراحه الي تحت اشرافي واكيد معظمكم يعرف مين الدكتور سيف الي مايرضى بأي تقصير من أكبر دكتور لاصغر عامل نظافه بهاد القسم لانه بمجهودي انا وابي الدكتور عزدين قدرنا نكبر اسم المشفى ونعمل الو هاد الاسم الي ينافس أكبر مستشفيات العالم لهيك مابرضى بأي تقصير والي يقصر منكم نهايته برا مفهوم .
الكل : مفهوم .
د. سيف: وينن عمال الي مسؤولين عن نظافة القسم .
وقفنا .
اطلع فينا بجديه: اهم شي النظافه لو تنجبرو تناموا هون ليل مع نهار .
هزينا راسنا : تمام .
د. سيف: كلكم تستلمو الشغل بالنهار .
ينال: اه لانه كل العمليات تكون بالنهار ونخلص شغلنا ع الساعة عشره .
اطلع ع مسؤول الموظفين : شو الحكي هاد كيف بليل مايكون في موظفين .
المسؤول: لانه مافي عمليات باليل .
د. سيف عصب: افرض اجت حاله طارئه ونجبرت تعمل عمليه وقتها تروح تطق ع بيوتهن لحتى تجيبهم .. انت مرفوض من المشفى من الحظه هاي سلم كل شغلك لنائبك وروح للمحاسبة والله معك لانه مايلزمني مسؤول مابفكر للمدى البعيد وأمور المفروض موظف صغير يعرف فيها .
وقتها خفت منه لانه باين انه مافي بقلبه رحمه ابداً .. اطلع فينا وصرخ بوجهنا واشر على ينال وعرين: انتم من اليوم وقت مايخلص الدوام تبقوا بالمستشفى لبكرا وثاني يوم المساء يبقى هدول الثنائي(أشر علي انا وبدر) .
بدر: دكتور هيك راح ننجبر نداوم من الصبح لثاني يوم للعشرة باليل وهيك تعب علينا وفي ورانا مسؤوليات.
رفع د.سيف حاجبه: مابحقلك تتذمر لانه رواتبكم مرتفعه مقابل المستشفيات الثانيه واذا مو عاجبك فيك تترك من الحظه.
سكت بدر .. وهو كمل تعليماته للدكاتره.. بقيت اطلع عليه وهو يحكي بثقه ويهزء الأكبر منه عمراً من الأطباء اذا أبدو رأيهم بشي موضوع كانت القسوة باينه ع ملامحه .
همست عرين: كم تعطي عمرو. جاوبتها بهمس: ٢٩
ضحكت: لا . ٣٥.
فتحت عيوني وانا مصدومه: جد .
عرين: اه مو باين عليه لانه اهم شي عنده يلعب الرياضه والجيم والاكل الصحي لهيك باين أصغر من عمره .
د.سيف: فيكم تروحو ع شغلكم .
الكل طلع والضيق باين ع ملامحنا ... كملنا شغلنا وساعه العاشره بدلت ثيابي وطلعت وانا بفكر كيف رح انام بكره بالمشفى واترك زمرد لوحدها في البيت .. وصلت البيت وانا حامله بأيدي كياس فيها خضرا واغراض طلبتهم زمرد.
دخلت البيت واذا روائح الأكل منبعثه من المطبخ .. مشيت لعندها : ممم .
زمرد: يلا غسلي بكون جهزت الأكل.
بستها ع خدها ودخلت اخذت دش ولبست ثيابي وطلعت لعندها .. بلشنا اكل وخبرتها عن موضوع دوامي اليلي .
زمرد: خلص اتركي الشغل ودوري ع غيره لانه هيك تعب عليكِ.
: مابقدر لانه الراتب مرتفع وعم يلبي كل حتياجاتنا واذا خسرته لشغل ماراح الاقي مثل هاي الفرصة ابداً.
زمرد: بس بخاف انام لوحدي .
: رح احكي لجارتنا ام سعيد تخلي بنتها منال تنام عندك هيك تمام .
زمرد: اخوها سعيد يوافق اخته تنام برا البيت؟
: كملي اكلك وسعيد عندي.
زمرد: ياعيني علي واثقه من حالها 😉.
حمرو خدودي: اف مازنخك .
خلصت اكل وجليت الجليات وعملت فنجانين قهوة ومسكت كتبها وبلشت اشيك ع دراستها.
.........
ثاني يوم قمت وكالعاده الدوخه تمسك فيا ابقيت وقت بفرشتي لحتى راحت قمت بسرعه جهزت الفطور وصحيت زمرد وجهزنا أمورنا وبعدها وصلتها للمدرسه وانا طول الطريق بعطيعها تعليمات ونصائح.. بعدها وصلت لموقف الباصات وكان سعيد عم يستنى فيا .
: صباحو.
سعيد بنظرة حب: صباحك ورد .
مد ايده وهو ماسك ورده حمرا: تفضلي .
حمرو خدودي .. اخذتها: يسلموا.
سعيد: شو رايك اجي المسا اخذك من المشفى.
تنهدت وخبرته بدوامي الإضافي وطلبت منه يخلي منال تنام عند زمرد وافق من غير اي اعتراض: غاليه والطلب رخيص وانا رح انام ع السطح لحتى ابقى قبال بيتكم واخذ بالي منهم .
ضحكت: عنجد .. يالله قدي جمايلك كثرت مابعرف كيف ردلك كل شي عملته منشاني.
غمزلي😉: مافي جمايل بين المحبين .
ذبت بثيابي لانه كلامه عم يوصل لقلبي مباشره وحس فيه.
ضحك: ليه الخجل..معقول مو باين علي اني احبك اكثر من روحي اي كل الحارة تعرف بحبي الك.
خجلت وبلشت افرك ايدي: سعيد خلص هلأ يسمعك شي حدا.
قرب وهمس بأذني : يسمعو لانه خبرت امي وخلال المده هاي رح اطلب ايدك رسمي .
لمعو عيوني : خالتي وافقت .
حكيت هيك لأني بعرف انها مابدها اياني لسعيد رغم أنها تحبني بس بدها تخطب اله بنت اختها.
سعيد: لكان شو انا اقنعتها.
اجى الباص: عن اذنك لازم روح.
تركته وطلعت بالباص واحلامي الورديه عم تاخذني لعالمي الخاص لانه اخيراً رح ابقى لحب طفولتي .
وصلت المشفى واول مادخلت لقيت عرين مكشره : واخيراً شرفتي .
طلعت بساعه الي ع ايدي : لسه باقي ربع ساعه .. ليش معصبه هيك.
عرين: اسكتي ياشيخه قرفنا الشغل وساعته لك بدي انجلط منه.
عقدت حواجبي: عن مين تحكي؟.
عرين: في غيرو د.سيف الله لا يسامحه مارضي يخليني انام لو ساعه ولك من مبارح مو نايمه راسي بدو ينفجر.
:اف هلقد كان في عمليات باليل!.
عرين : عمليات شو ما في ولا حاله مستعجله بس هيك نجاسه منه.
:ياحبيبي اكلنا هوا .
صوت ام محمود من ورانا: بسرعه وقعن ع الدفتر قبل لا يبلش الدوام .
وقعت وبلشت شغل كان يوم متعب كثير وبأخر الدوام ودعت عرين الي كانت تمشي وهي شبه نايمه .. دخلت لغرفة المعدات اخذت نفس وقعدت ع الارض وركيت ضهري ع الحيط غمضت عيوني لحتى ريح جسمي لانه بالوقت هاد ماحد منتبه عليا ..
اصحيت ع صوت بدر : راما قومي.
: خير شوبدك.
بدر: د.سيف عم يلف بالاقسام قومي بسرعه ليشوفك نايمه.
بسرعه طلعت ع الساعة الي بأيدي وإذا الي نايمه ساعتين قميت بسرعه : ليش ماصحيتني أبكر من هيك.
بدر يسحب المعدات: شفت مافي شغل والقسم فاضي تركتك لحتى تريحي جسمك.
: شكراً اخي بدر
: العفو .. بسرعه اطلعي .
جر العرباي وطلع وانا اخذت معداتي وجريت العرباي وطلعت لبرا واذا د.سيف ينادي عليا .
رحت لعنده .
: نعم دكتور.
د.سيف: روحي نظفي الساحه الخارجيه.
: بس انا شغلي بقسم العمليات.
د.سيف: اذا مابدك تفضلي لبرا المشفى .
حكى هل كلمتين ومشي وهو رافع راسه .
حكيت بيني وبين حالي(اف شو متكبر وشايف حالك ).
سحبت العرباي وطلعت لبرا بلشت كنس وامسح ولم ورق الشجر .. خلصت وقعدت تحت شجره لحتى ارتاح ..طالعت جوالي ورنيت ع زمرد وماردت.. رنيت ع منال : الووو.
: كيفك منال شو صاحيه.
منال: اي مو جايني نوم .
: اسفه لانه خليتك تغيري مكان نومتك.
منال : مو مشكله بالعكس انبسطت مع زمرد .
: رنيت عليها وماردت .
منال: نامت بكير لانه بكرا عندها امتحان .
: درست؟
منال: اه درست وقبل لتنام سعيد جاب النا عشا جاهز تعشت ونامت .. لاتخافي عليها هي بأمانتي .
: شكرا الك حبيبتي .. يلا بدي سكر .
سكرت الخط وانا مبتسمه : اخ شو حنون ياسعيد .
واذا جوالي يعطي اشعار انه في رساله واتس اب بسرعه فتحتها وإذا سعيد باعث الي( مساء الخير ياحبي بدي طمنك انه زمرد امورها تمام وانا هلأ ع الاسطوح وعم اطلع ع بيتكم راح ابقى هيك لصبح .. مابدي اوصيك انتبهي ع حالك .
بحبك❤)
حضنت الجوال وانا اهمس : وانا بحبك بحبك بحبك.
واذا بدر جاي لعندي ومعه كاستين شاي : تفضلي.
اخذتها: شكرا... وين د.سيف ليشوفنا عم نرتاح.
بدر وهو يشرب: لاتخافي دخل مكتبه.
شربت: كيفها سوسو .
ابتسم: احلى شي صار بحياتي بعد ما الله اخذ أمانته لمها .
مسكت ايده: الله يرحمها والله يخليلك سوسو العسل وتملأ حياتك بسعاده .
هز راسه: امين .. يا حبيبتي طلعت من البيت وهي تبكي بدها تروح معي .
: لا توكل هما اكيد خالتي رح تهتم فيها لحد ماترجع.
بدر: اصلاً لولا امي مابعرف شو صار بحالي .
كنا عم نحكي ومو منتبهين د.سيف عم يراقب فينا من شباك غرفته .
خلصنا شرب الشاي وقام كل واحد فينا لشغله.
كنت ماشيه في الممر واذا د.سيف بوجهي بلعت ريقي وكملت مشي .
د.سيف: وقفي .
وقفت: نعم دكتور.
د.سيف: جيبي معداتك ولحقيني لغرفة العمليات.
نفذت حكيه وتوجهت للغرفة ..كان واقف وعم يستنى فيا : عقمي المعدات وبلشي تنظيف.
طلعت ع الغرفة كانت تلمع من النظافة بس عملت مثل ماحكى لحتى يحل عني.. بقي واقف وعم يطلع علي .. ارتبكت ..
د.سيف: شدي حالك اكثر بالشغل بأي وقت تيجي شي حاله مستعجله.
هزت راسي: حاضر .
مشي من جنبي وتسطح على السرير الي بنص الغرفه مخصص للعمليات غمض عنيه ووضع ايده عليهن شكله بده ينام .
ريحة عطره بقت عالقه مكان مامشي استنشقتها وحكيت بداخلي( شكلها ماركه علبة العطر )... كملت شغلي وطلعت لجهته كان ع نفس الوضعيه موعارفه هو نايم ولا صاحي منشان هيك قررت انسحب بهدوء واذا صوته يوقفني: لوين .
بلعت ريقي وبتوتر: لبرا.
كمل حكي وهو بنفس الوضعيه: وين لبرا بدك تروحي تشربي شاي تحت الشجره ؟.
صفنت ماعرفت شو احكي لانه كان شايفنا انا وبدر .
راما: .....
قام ووقف قبالي وهو يطلع في عيوني: طبعاً رح تسكتي لأنك غلطانه.
تشجعت وحكيت: عفواً منك دكتور بس ماغلطت بشي نفذت كل شي طلبته مني بالحرف الواحد .
رفع حاجبه: لا غلطتي وقت تكوني بساعات العمل وعم تشربي شاي وطقي حنك مع زميلك شو اسمه هاد.
: اسمه وقت الراحه يعني بريك في فترة العمل وهل شي مو ممنوع في سياسة وأنظمة المشفى .
بلش يعلا صوته: يعني عم تبرري فعلتك انه بريك لكان هاد عذر للي ماله عذر ... اسمعي رح مشيلك اياها المره لكن المره الجاي رح يكون توقيعك ع ورقه فصلك .
كنت بدي احكي واذا تدخل ممرضه وهي عم تركض: دكتور الحق حاله مستعجله حادث سير وشكله بحاجه لعملية فوراً .
د.سيف: تمام ابقي وجهزي المعدات الازمه للعمليه ... وانتي(وجه حكيه الي) روحي نادي دكتور التخدير بسرعه وبعدها ترجعي لهون .
بسرعه رحت ناديت الدكتور وخلال دقائق كانت الغرفه جاهزه مع كادر المساعد .
بعد فحص المريض وعمل الفحوصات الازمه تم إدخاله ع غرفة العمليات.. دخل د.سيف وهو لابس ثياب العمليات تيشيرت وبنطلون ازرق وطاقيه ووقت الي مرق من جنبي: خليكي هون وماتطلعي الوقت تخلص العمليه عم تفهمي.
هزيت راسي بنعم ونا بداخلي عم احكي( ياربي مابقدر اشوف هيك منظر بخاف يغمى علي) واذا بحس بالدوخه الي عم تيجيني .. تمالكت نفسي ومشيت لعند الحيط وثبت ظهري عليه وانا عم شوف الغرفه عم تدور فيا غمضت عيوني لحتى راحت الدوخه وبقيت واقفه ع نفس المكان وانا اسمع د.سيف عم يحكي مع الممرضين وهو عم يعمل العملية .. قويت قلبي بعد مضي شي ساعتين وطلعت لجهة د.سيف الي كان عكس شخصيته الصارمه القاسيه كان واقف بكل ثبات ورواق وهو عم يشتغل كانت الأدوات بين ايديه كأنهم ريشه عم يرسم ومستمتع بالشي الي عم يعمله والكل حوليه متوترين وع أعصابهم شكله حالة الشب خطيره .. فجأه رفع راسه واذا عينه تيجي بعيني مابعرف ليش خفت ونزلت نظري بسرعه قلبي بدق .. بلعت ريقي واذا صوت الممرض الي جنب د.سيف ينادي عليا: لو سمحتي تعي امسحي الدم الي ع الارض بسرعه.
اخذت الممسحه وبسرعه قربت لعندهم وبلشت امسح واذا بقي نقط تحت رجلين د.سيف احترت اتركهم ولا اطلب منه يبعد شوي حكيت بداخلي(غبيه كيف رح يبعد وهو عم يعمل العمليه ) فقررت انسحب رفعت رأسي لحتى انسحب واذا يوقع نظري ع راس الشب الي شبه مفتوح من هول المنظر بلشت تلعي معدتي وبحس بالدوخه بسرعه تركت الممسحه الي وقعت ع الأرض ووضعت ايد ع ثمي وايد الثانيه ع بطني وركضت لبرا وانا ماسكه نفسي لحتى ما استفرغ بالغرفه .
الممرض: مالها هاي وين راحت .
دكتور التخدير : كأنها بدها تستفرغ.
د.سيف وهو يشتغل : اهتموا في العمليه بدل الحكي الفاضي .
سكت الكل ونظرهم لعنده .
طلعت من الحمام الي القريب من غرفة العمليات وانا عم امسح ثمي واخذ نفس بصعوبه .. رجع منظر الجرح في مخيلتي وبسرعه قلبت معدتي ورجعت استفرغ.. ابقيت هيك يمكن لساعة لحتى هديت وطلعت لبرا المشفى وقعدت تحت الشجره الي في الساحه الخارجيه.. غمضت عيوني وبلشت أبكي بصمت تذكرت اليوم الي ماتت فيه امي وكيف شفتها وهي بلا روح .. وجعني قلبي طلعت مني تنهيده تهد جبال .. رفعت رأسي لحتى شم شويت هوا لانه حسيت ماعاد يدخل لجوا رئتي واذا مطرة مي صغيره قدامي و د.سيف ماسكها وهو لسه في لبس العمليات .
دموعي ينزلوا ع خدي مو راضين يوقفوا ..
فتح المطرة ومدها إلي: خذي اشربي.
اخذتها وشربت منها ورجعت أعطيته اياها.. أخذها وسكرها: شدي حيلك وقومي نظفي الغرفه مع زميلك .
بصوتي المبحوح: مات ؟
ابتسم ابتسامه جانبيه: له هاد السؤال يتوجه إلي؟
تركني وراح .. استغربت من موقفه اتجاهي واهتمامه في لو لدقائق .. مسحت وجهي وقمت لعند بدر وبلشت شغل معه.
.............
(د.سيف ).
مشيت من عندها ودخلت لغرفتي مشيت لمكتبي ورميت بكل ثقلي ع الكرسي ..اخذت نفس ووضعت مطرة المي قدامي ع المكتب ورجعت ظهري لورا ارتخت اعصابي .. طلعت بالمطرة وصورتها وهي عم تطلع في وعيونها كلها دموع وعم يلمعو تحت ضو القمر مثل شي قطه .. تنهدت وحكيت بداخلي( ليش اهتميت لمشاعرها ! يمكن شفقت عليها لأنها اول مره تشوف منظر مثل هيك ) واذا الباب ينفتح وتدخل د.هديل: الي ماخذ عقلك يتهنى .
أشرت بأيدي انه تدخل .. دخلت وقعدت قدامي : مبروك نجاح العمليه رغم صعوبتها.
: تعرفي بفضل الله مافي شي يصعب علي .
د.هديل: ليش هيك شكلك كأنك مرهق.
: كثير مرهق بدي أحاول انام شي ثلاث ساعات لانه عندي كمان اربع ساعات عمليه .
د.هديل: روح نام وانا اعملها لانه باين التعب عليك كثير.
وقفت : استحاله انا رح اعملها يلا بدي اروح انام ع السرير الي بالغرفه الثانيه.
د.هديل: ع راحتك.
خلصت كلامي وأخذت مطرة المي معي وتوجهت للغرفة الثانيه مديت جسمي على السرير وخلال ثواني كنت نايم وانا حاضن مطرة المي .
............
(راما)
خلصنا تنظيف مع أذان الفجر .
بدر: جعت كثير بدي اطلع لبرا اشتري فطور تيجي معي.
: اخاف يطلبنا د.سيف.
بدر: نايم بسابع نومه ..أسمعت د.هديل عم تنبه باقي الدكاتره مايدخلوا لعنده لانه مرهق .
: اذا هيك يلا .
طلعت معه وشترينا فطور وتمشينا شوي بالشوارع ونحنا عم ناكل سندويش الفلافل .
: اطمنت ع سوسو.
بدر بحنيه: اه نامت وهي عم تسأل عني .
: ياحبيبتي.
بدر: عم حس امي عم تتعب بترباية سوسو لهيك بدي ادور على مربيه اوحضانه حطها فيها اوقات دوامي.
: والله فكره وهيك ترتاح خالتي .
بدر: المشكله بدي حد موثوق لحتى أمن على سوسو عنده.
: الا ماتلاقي توكل على الله.
دخلنا من البوابه الخارجيه للمشفى ونحنا نوكل ونضحك ومانتبهنا على العيون الي كانت عم تراقبنا.
........
(د.سيف )
قمت من النوم ع صوت المنبه غسلت وزبطت اموري وطلعت لمكتبي وقفت عند الشباك ومطرة المي بأيدي مابعرف ليش لسه ماسكها ..واذا يوقع نظري ع البنت عاملة النظافه مع زميلها داخلين من برا وهم عم يضحكوا .. اندق الباب
: اتفضل .
د.هديل: صباحووو ..خذ فنجان القهوة صحصح.
لفيت لعندها وأخذت الفنجان : يسلمو.
د.هديل: افطرت.
هزيت راسي بنعم .
د.هديل: ليه حاسه انك عم تفكر بشي لانه اول مره اشوف الحيره في نظرة عيونك .
ضحكت: اف تفهمي بلغة العيون .
غمزت عينها 😉: ولو يا صديقي ماحد يعرفك قدي .
شربت القهوة دفعه وحده ووضعت الفنجان ع الطاولة وفتحت مطرة المي وشربت منها وانا بسكر فيها استغربت كيف شربت منها وانا اكثر انسان يقرف بهاد الكون .. رفعت حاجبي بأستغراب .
د.هديل: من شو مستغرب .
مشيت لعندها : شكله حبيب القلب لسه مجاز وعم تشتغلي في لهيك رح اتركلك المكتب وهج.
طلعت وانا عم اركض وهي فارطه ضحك .
د.هديل هي صديقتي من ايام الجامعه والكل مستغرب مني لانه شخصيتي القاسيه افرضها ع الكل الا عليها لأنها الها معزه خاصه وزادت بعد خطوبة اخي د.فهد المتخصص بالنسائية والتوليد اكبر مني بسنه .
وانا ماشي شفت عاملة النظافه وزميلها وقفتهم : خير وين كنتم .
طلعوا بوجه بعض بأستغراب.
: كنتم تتوقعوا اني مابعرف انكم طلعتم لبرا .
بدر: دكتور احنا كنا.
قاطعته: ولا كلمه .. مخصوم منكم أجرة نص يوم يلا كل واحد ع شغله .
مشويو من جنبي : انتِ وقفي .
رجعت قبالي باين ع ملامحها الانزعاج: نعم دكتور.
: شو اسمك ؟
: راما.
: تمام .. دقائق وكوني بغرفة العمليات .
مشيت وتركتها واقفه مكانها ...
بدلت ثيابي ودخلت الغرفه واكانت موجوده مرقت من جنبها وتوجهت لعند المريضه: كيف المعنويات خالتي.
: نحمد الله يا ابني .. الله يوفقك اذا مافي امل الورم ينشال كله او يسبب الي بشي اعاقه خليني اطلع هلأ.
مسكت ايدها : له ياخالتي ليه هيك متردده توكلي على الله وبعد ماتقومي بسلامه راح اذكرك بحكيك وخوفك هاد الي ماله داعي.
: ياابني حاسس انه الموت قريب مني .
حاولت انا والفريق الطبي نهدي من روعها وخوفها لكن ما استجابت لهيك قررت اجل العمليه لكن صوت راما وقفني قبل ما خبر زملائي.
راما: ممكن دكتور احكي مع خالتي.
اشرتلها تفضلي.
مشيت بخجل ومسكت ايدها وطبطبت عليها بحنيه : خالتي لاتخافي من منظر الغرفه والإضاءة والمعدات الطبيه (ضحكت) ومنظر الدكاتره كأنهم سلاحف النينجا صح.
المريضه طلعت علينا وبعدها ضحكت: اي والله يشبهوا سلاحف النينجا.
كملت حكي: كوني متأكده هدول السلاحف هم رمز القوة في مسلسلات الكرتون لهيك عندي يقين بالله والدكتور سيف وزملائه انهم رح يستأصلوا الورم وترجعي بخير وسلامه لأولادك الي عم ينتظرو برا وكل شخص فيهم عم يدعي الك بخوف .. لهيك فكري فيهم قبل كل شي وحابه طمنك انه د.سيف رح يبذل كل جهده وانا واثقه فيه كثير انه رح بنجح .
المريضه: منشان أولادي حا اعملها .بس عندي طلب.
د.سيف: تفضلي.
: بدي البنت هاي تبقي واقفه جنبي وماسكه بأيدي لحد مااتخدر كامل .
د.سيف : تمام .. راما ابقي معها وانت دكتور فيك تبلش تخدير .
بعد ماتخدرت انسحبت راما وقعدت بأخر الغرفه وكانت متكمشه ع نفسها وباين انها خايفه .. بلشت في العمليه واجهتني بعض الصعوبات وبفضل الله بعد اربع ساعات خلصت .
د.هديل: انت غسل وانا خيط الجرح.
تركت كل شي بأيدي : تمام .. بس تخلصي خبريني لحتى شيك ع الجرح.
مشيت للمغسله الي ع جنب سحبت القفاز ورميته بالزباله وشلت الكمامه وغسلت وعقمت أيدي وبعدها غسلت وجهي .. واذا ايد راما ممدوده ومعها فوطه طبيه لحتى امسح وجهي .. اخذتها ومسحت وجهي .
راما بترقب: طمني دكتور نجحت العمليه.
طلعت عليها بطرف عيني: شو شايفه .. وانتِ شو دخلك بنجاحها.
سكتت ونسحبت من قدامي بهدوء.
طلعت لعند المريضه واذا كل كادر الطبي عم يطلعوا لجهتي.. صرخت: شوفي ؟
الكل لف وجهه .. اخذت نفس لحتى أهدأ وحكيت بداخلي( يه ليه مزعوج بس لاني كسرت بخاطرها.. بس هاد طبعي اف اف من متى ضميري يأنبني ) قاطعني صوت هديل: خلصت دكتور .
مشيت لعندها وتفقدت خياطة الجرح : تمام ... انقلوها ع العنايه الحثيثه ليومين واذا كل شي تمام بتنقلوها ع غرفتها.
خلصت كلامي وطلعت لباب غرفة العمليات وخلال ثواني كانوا أولادها حولي: طمنى دكتور .
: الحمدالله نجحت العمليه وهلأ راح ننقلها للعنايه الحثيثه لمدة يومين لحتى نتأكد انه كل شي تمام بس بشكل عام استئصلنا الورم رغم خطورة مكانه .
: شكرا دكتور .
هزيت براسي ومشيت لغرفتي بدلت ثيابي وطلعت برا المشفى وانا مزعوج ومتضايق لاني تصرفت مع راما بحقاره رغم انه كان الخوف ع المريضه باين في عيونها.
....
(راما)
وقت صرخ بوجهي بسرعه انسحبت من قدامه وانا منحرجه من كلامه معي .. طلعت ابرا وقعدت تحت الشجره وانا اخذ نفس وعم اطلع لسما لحتى ماتنزل دموعي بس نزلوا غصب عني وقتها بكيت بحرقه وماهتميت لناس الي عم تطلع فيا وهي رايحه وجايه .. مسحت دموعي وطلعت لجهة الباب الرئيسي للمشفى واذا د.سيف طالع وكالعاده ماشي ارض اشتدي ماحدا قدي ركب سيارته ونطلق فيها .. بس شفته طلع ارتحت نفسياً لانه عامل الي فوبيا يطلع بوجهي بكل مكان .. مسحت دموعي ورجعت لغرفة العمليات . .. وبعد يوم متعب ماصدقت والساعه تصير عشرة بسرعه بدلت ثيابي وطلعت لشارع الرئيسي وإذا حد يهمس بأذني(اشتقتلك ).
نقزت ولفيت لحتى شوف مين يكون واذا سعيد واقف وعم يبتسم .
اخذت نفس: اف خوفتني .
قرب مني : ول ع قلبي ماكان قصدي.
بسرعه وضعت ايدي ع ثمه: لا تدعي ع قلبك بعيد الشر عنك.
شال ايدي وهو يطلع بعيوني بحب: الله لايحرمني منك .. (رفع ايده وفيها كيس) تفضلي.
فتحت عيوني ع الآخر: اوووه اكيد تفاح أخضر.
ضحك: طبعاً في غيره الي ماخذ قلبك ع فكرة بلشت غار منه.
اخذت الكيس : هههه في حد يغار من تفاح وطي صوتك لحد يسمعك ويحكي عنك مجنون.
مسك ايدي ووقف وهو يأشر بأيدو الثانيه لتكسي لحتى يوقف: طبعاً مجنون بحبك .
احمرو خدودي ..وقف التكسي وطلعنا فيه أعطاه العنوان ونطلق .
سعيد : عندي الك خبر كثير حلو.
هزيت راسي : شو هو .
سعيد: بكره رح اخطبك من عمك علي.
دمعو عيوني : واخيراً .
سعيد: اوعي تبكي .. بدي شوف الضحكة ماليه وجهك.
ضحكت .
غمز😉 كلها كم يوم واسمك يرتبط بأسمي للأبد.
شوفير التكسي: هون انزلكم.
سعيد : اه هون
مد ايده واعطاه اجاره ونزلنا .. وصلت لعند باب البيت وهو واقف ع شارع يطلع فيا .. ابتسمت اله ودخلت لجوا واذا زمرد تهجم عليا وتحضني: واخيراً روحتي .
حضنتها: ياقلبي طول الوقت وانا كل تفكيري عندك .
باستني ع خدي : يلا روحي خذي حمام فاتر لحتى تريحي أعصابك وانا جهزت الك مجدرة من الي تحبها قلبك.
: عز الطلب اوه ميته من الجوع.. خذي التفاح غسلي وجهزي مع الاكل.
زمرد اخذت الكيس: اكيد تفاح أخضر اي نفسي اكل تفاح احمر نفسي اعرف شو سر عشقك اله.
هزت كتفي: بحس انه يجسد شخصيتي لهيك احبه.
زمرد: بلا مافهمتها هاي تجسد شخصيك.
: يعني قاسي من برا ولونه حلو ومغري بس من جوا في شوية حموضه بحسه متلي اف خلص رح الوقت ونحنا نحكي .
اخذت حمام دافئ وقفت قدام المرايه امشط شعري الي واصل لعند كتفي واذا بحس بدوخه وصداع قوي وافقد وعيي.
فتحت عيوني واذا زمرد ترش قطرات المي ع وجهي وهي تبكي .
زمرد بخوف: وأخيرا صحيتي لك مت من الخوف .
ابتسمت بأرهاق: لاتخافي اكيد اغمى علي من الإرهاق .
مسحت دموعها بطرف كمها: اختي اتركي شغلك والله كثير متعب وانتِ جسمك نحيل مايتحمل كل هاد الجهد .
رفعت راسي الي في حضنها وقعدت قبالها مسكت ايديها: لاتخافي المهم انتِ تدرسي وتنجحي بمعدل يدخلك المجال الي حابه تدرسي .
زمرد: شكرا الك لولاكي كان انا هلأ بلا مستقبل .
حضنتها: انتِ كل دنيتي يا اختي لهيك قومي لحتى ناكل والا يغمى علي مره ثانيه.
اكلنا وخبرتها انه سعيد رح يخطبني من عمي علي انبسطت وبعدها أسمعت أخبارها واذا من التعب نمت ع الكنبه .. مددت جسمي ووضعت مخده تحت راسي وغطتني وطفت الضو الحتى نام براحه .
.....
(د.سيف )
وصلت الشقه الي ساكن فيها لوحدي لاني بحب الاستقلاليه والهدوء ... رميت مطرة المي ع الكنبه ورميت بكل ثقلي وانا عم اخذ نفس وامسح وجهي بأيدي .. واذا الجوال يرن .. فتحت الخط : خير لحقت هديل تعطيك التغير الي حصل الي خلال اليومين .
د.فهد : خير مالك ليه مهموم وفي عيونك حيرة غريبه.
: خي احكي ل خطيبتك تتركني بحالي والا بعاملها مثل باقي الموظفين.
د.فهد: مادخلني بيناتكن منك لا الها اسطفل..اسمع خي الوالد مشتاق الك وعازمك ع العشاء بالفيلا هو وخالتي .
د.سيف: مافي داعي تلف ودور احكي انه عشاء عمل وبس.
د.فهد: المهم وصلت الفكره لا تتأخر ع ٨ تكون مزروع ع باب الفيلا وألا باجي اسحبك من أذنك مو مثل المره الي فاتت ماجيت والوالد كنسل الاجتماع.
: جاي والله جاي بس اسكت انت تعرف ليه مابحب روح ع الفيلا .
د.فهد : منشان خالتي ... خي كلها ساعتين زمن اتحملها فيها.
: أمري لله رح اجي يلا سلام.
سكرت الخط ونكدت لانه مابحب اجتمع مع خالتي مرت ابي الي تزوجها بعد موت امي بسنه .. اه شو بحب اتجنبها مع انه ما عمري شفت منها شي عاطل بس وجودها مكان أمي بخليني اختنق.
جهزت نفسي وقت دقت الساعة ثمانيه كنت واقف بالحديقه وعم سلم على ابي وخالتي .. وبعدها اقعدت معهن .
ابي (د. عز الدين ) : اذا مافي عشاء عمل مانشوفك.
: لا موهيك القصة انت تعرف انه وقتي كله بالمشفى والجيم والبيت لهيك ما عم أفضى .
خالتي: الله يعطيك العافيه .. المهم انت بخير مابدنا شي .
بأبتسامه صفرا: شكرا خالتي.. صحيح وين فهد .
خالتي : طلع مع هديل ع عشاء أصدقاء.
د.عز الدين: الجاعة على وصول رح خبرك لشو الاجتماع .. الاجتماع لحتى تكون المشفى الراعي الرسمي لاتحاد كرة القدم في البلد يعني الدوري .
: عم تمزح؟
د.عز الدين: من متى بمزح بهيك أمور.. وليه هيك مستغرب .
: راعي لكرة القدم لا مو منيحه منشان سمعت المشفى واذا لابد بدك ترعى شي ليش ماتكون الراعي الرسمي لمشفى مرضى السرطان او الكلى او القلب او دور الايتام او دور الرعاية المسنين ليش كرة القدم تحديداً.
د.عز الدين: انا صاحب المشفى وبعرف وين مصلحتي وما اخذت القرار الا بعد دراسه انه رح يرد علينا بالمنفعه الكبيره من حيث الماده وزيادة مراجعين المشفى .
: مابعرف الفكره مو داخله راسي لانه المعروف الي يرعوا اتحاد كرة القدم اما شركات اتصال او بترول او سلسلة مطاعم او فنادق مو مشفى .
د.عز الدين: هاد قراري وعليك التنفيذ.. اص ولا كلمه وصلوا الجماعه وأياك تخرب الموضوع .
قامت خالتي ودخلت جوا وبقيت مع أبي..كنت مخنوق طول القعده لانه الموضوع مو خارط مشطي .. بعد ماتم الاتفاق على كل شي استأذنت وطلعت مباشره على شقتي الي الاقي فيها راحتي .. بدلت ثيابي ونمت .
يتبع (تفاح 🍏 )
تعليقات
إرسال تعليق