رواية ١٢٠ كيلو الفصل السادس عشر والسابع عشر والثامن عشر والاخير بقلم جمانه السعيدي حصريه وجديده على مدونة النجم المتوهج
رواية ١٢٠ كيلو الفصل السادس عشر والسابع عشر والثامن عشر والاخير بقلم جمانه السعيدي حصريه وجديده
قبل لا احجيلكم الشي العجيب الي صار وياي
اريدكم تعرفون اني ابد موخبيثه ولا بعمري فكرت انتقم
رغم كلشي صاروياي بس مابقيت ادور ورا شكران حتى انتقم منها لان منتظره رب العالمين ياخذلي حقي
هو أعلم بكلشي صار وياي ويعلم اني مااذيت اي احد
منتظره العداله اللاهيه
راح احجيلكم شلون رب العالمين اخذلي حقي منهن
بيوم اني ادرب بلجم اجت بنيه سجلت اشتراك
البنيه ضعيفه سمره وجها كل حب ضعيفه بشكل
جايه على اساس تبني عضل وتسمن جسمها بلرياضه
اول مادخلت وسجلت اسمها شافتني بقت تباوع عليه
اني من شفتها تركز وياي واني اتمرن
كلت يمكن تكول بكلبها شوف هاي شكد سمينه
واني شكد ضعيفه
بقت تباوع عليه يعني نظراتها ابد مو طبيعيه
اول يوم كلت يمكن لان جديده بلجم
ثاني يوم نفس الشي حيل مركزه عليه كلما التفت الكاها تباوع عليه
كلت هاي شبيها معقوله انعجبت بشكلي
ثالث يوم اول مادخلت سلمت عليه
رديت السلام عادي
احتاجت تصعد على جهاز بس ما تعرف تضبطه
ملاك اشرتلي كالت ضبطيلها الجهاز
قربت عليها كتلها اصعدي ضبطت الجهاز
بقيت واكفه يمها اشوفها تعرف تلعب علي او لا
حنيين....شكرا
رهف...العفو اجيت امشي من يمها
حنيين...اني شايفتج قبل
رهف...وووين شايفتني اني مااعرفج
حنيين...لا ولله شايفتج واعرفج
رهف... يخلق من الشبه أربعين
حنيين...انتي مو بت خالة شكران
رهف...باوعت عليها بستغراب شكران
انتي تعرفين شكران
حنيين...اي اعرفها صديقة اختي
رهف....اي شكران بت خالتي
حنيين...شفتي مو كتلج اعرفج
رهف....اي يعني وين شايفتني اني وشكران ما نتشابه
واني ابد ما طالعه ويا شكران
خاف بلمدرسه
حنيين...لا مو بلمدرسه شايفه صورج بتليفون شكران
رهف....وووين شفتيهن
حنيين....مو كتلج تصير صديقة اختي
رهف....يعني حنيين فتحت تليفونها كدام اختج
وطلعت صوري
حنيين....لا اني راح افهمج
جمانه السعيدي
رهف....طبعا حنيين تحسيها من اهل الله شايفين هاي الفقيره كلش وينضحك عليها بسرعه
واي واحد يسلم عليها راسا تكت الأول والأخير
يعني ماعدها حدود للكلام مستعده تعترف على نفسها
رهف....اي فهميني شلون شفتي صوري
حنيين....شكران واختي صديقات اتفقن عليج
رهف...شلون اتفقن عليه
حنيين...خاف احد يسمعنا اذا عرفت اختي اني حاجيه كدامج تموتني
رهف....لا مراح تعرف احجيلي شلون اتفقن عليه
حنيين....مو انتي ازوجتي حبيب شكران
رهف...اي بس دقيقه افصل تليفوني من الشحن واجيج
حنيين...اي انتظرج
رهف...جبت تليفوني فتحت تسجبل وبقيت لازمته بايدي
رجعت عليها بسرعه
رهف...اي احجيلي
حنيين....شكران جانت تحجي كلشي الاختي تحجي عليج
وتغلط تكول اخذت حبيبي مني اله مااخليها تتهني بي
رهف...وبعدين
حنيين....بعدين كالت راح اوكعها بمصيبه اله اخلي الناس كلها تحجي بيها وزوجها يطلكها
رهف...اي كملي
حنيين...كل يوم تجي بيتكم تصورج وانتي بملابس البيت
وتحفظ الفديووو
رهف...وبعدين
حنيين...اي جمعت كم فديووو وجابت قطعة ملابس داخليه من عندج اخذتها من بيتج
وصورتها بعدين اخذت تليفون اختي وبدت تراسل
تليفون ثاني هيه جابته وياها
تليفون جديد وبدت تراسل هذا التليفون من تليفون اختي
اختي سئلتها امج تعرف شجاي تسووين
كالت اي تعرف هي دزتني حتى ارتب هاي الخطه
كامت ترسل صورج وتسوي محادثات
من تليفون اختي للتليفون الثاني
بعدين من كملت خطتها شوفتها الاختي
واختي كالت خرب ابليسج شنو من خطه هاي
الشيطان ما مخطط مثلها
رهف...طلعت تليفون حفظت المقطع وبديت اسجل واحد جديد
حنيين...انتي حاي تسجلين كلامي
رهف....لا شنو اسجل كلامج اجاني اشعار وحذفته
اي كملي
حنيين...مو تحجين الاحد اي شي حجيته اللج
رهف...لا طبعا مااحجي شلون احجي
حنيبن...كملن المقاطع ورتبن عليها محادثات
وأخير شي كالت شكران اليوم نكمل الخطه
وبليل تلكون رهف مطلكه راح اخلي هذا التليفون
بيتها وادز رساله الزوجها بمكانه
رهف...ليش تراسل من تليفون اختج ليش مو تليفونها
حنيين...تليفون شكران الخط بااسمها
خافت تنكشف
بس تليفون اختي الخط باسم اخوي واصلا مايريد هذا التليفون شامره الخط عاطل مايشتغل
اخذته اختي وشكران كامت تراسل منه
رهف...هااا فهمت يعني هذا التليفون الي تجي من الرسايل بدون خط
حنيبن...اي خاف يكشوفونه مابي خط
رهف...ليش اختج تساعدها تهجم بيتي
حنيين...اختي نسخه من شكران بعد أخبث منها
اني اختها مشوفتني نجوم الضهر
تتنمر عليه وتضربني لسانها شطوله ماعدها ذرت
اخلاق
رهف...ماعدكم احد يحكمها
حنيين...هو بس اني وياها وامي واخوي الوحيد
هذا انكس من اخلاقها
جمانه السعيدي
رهف...اي ليش تساعدها خاف اكو مصلحه بلموضوع
حنيبن...اي شكران كالت اذا اخذت عصام انطيج هديه حلوه
اختي شرطة عليها تشتريلها قطعة ذهب
رهف...الرساله الاخيره الي اجت العصام من تليفون اختج
حنيين...اي بيومها شكران دزت تليفون اختي وكالت شكرا المهمه انتهت ورهف اطلكت
رهف....هسه هاي السوالف موجوده على تليفون اختج
يعني كل الاتفاقات بينها وبين شكران
حنيين...اي اختي محافظه عليهن بلتليفون تكول لمن احصل قطعة الذهب الي وعدتني بيها شكران يله امسحهن
يعني اذا شكران خلفت وعدها وياها راح اطلع
كل هاي المحادثات ولا تفاقات
مبقيتهن تهددها بيهن
رهف....مو شكران ازوجت ليش ما اجيبلها قطعة ذهب
حنيين...تكوللها مااكدر هسه خاف زوجي يشك بيه
فتره علما اجمع من مصرفي واشتريلج
رهف....حلو الكلام
حنيبن....انتي ضايجه لان اطلكتي
رهف....لا ما ضايجه بس اريد اطلب منج مساعده
اذا تكدرين تساعديني
اني انضلمت واريدج تساعديني اخذ حقي
حنيبن.. لا مااكدر اختي اذا عرفت حجيتلج تموتني
تموت
وبعد ما تحجي اي شي كدامي
رهف...شنو رائيج انطيج فلوس وجيبلي التليفون
الي علي الاتفاق بين اختج وشكران
حنيبن...لا مااكدر ابد مااكدر انتي ما تعرفيها
رهف...وهي قابل شمدريها مو تكولين هذا التليفون هي ضامته يعني عدها تليفون غيره تستعمله كل يوم
اذا التليفون اختفى من مكانه
هي شمدريها انتي اخذتي
رهف.... دقيقه انتضري
رهف.....ملاك اريد ١٠٠ الف وبلبيت انطيج اياهن
ملاك...شسوين بيهن
رهف...اريدهن بعدين احجيلج
اخذت الفلوس
رهف....هاج حنيبن هاي ١٠٠ الف وباجر اذا جبتي التليفون
الج ١٠٠ مثلهن بعد شتردين
حنيين...هااا اخاف
رهف...منيين تخافين محد راح يعرف انتي اخذتي التليفون
بعدين اني مراح اجيبج بلطاري حتى اكول مااعرفها منو
من بخلص كلشي ارجعلج التليفون هااا شكلتي
حنيبن...مااكدر
رهف...ومراح تساعديني انتي تحبين الخير
تحبين اتساعدين الناس
حنيبن.. اي
رهف....ساعديني اخذ حقي من شكران
حنيين...صعبه
رهف.....خلاص اخذي الفلوس واني مااريد منج شي
اخذيهن اللج تستاهلين انتي مبينه حبابه مو مثل اختج وشكران
حنيين...... احاول بس مو اكيد
رهف...براحتج
جمانه السعيدي
رهف. عفتها ومشيت مااريد الح عليها أكثر
وتخاف مني
ملاك...شبيها هاي ليش انطيتها فلوس
رهف...مساعده مني الها
ملاك...فقيره
رهف...شكد ما تصورين فقيره واكثر من ما تتخيلين
رهف...بقيت طول الوكت حسبه اجيبني وحسبه توديني
اذا الله هداها وجابت التليفون
اكدر اثبت برائتي اذا كل المحادثات بينهن مسجله
بين رسائل صوتيه وبين كلام
اني مااريد شي بس اريد اثبت برائتي وخلاص
كلشي ينتهي هنا
رجعت للبيت كلش ضايجه وقلقه
مااكدر احجي كدام ملاك ولا كدام عمي مااريد السالفه تطلع
اكيد عمي اذا عرف شكران راح تنكشف ايضوج عليها
بلاخير هاي بته
اني ما مستعجله اذا باجر حنيين جابت التليفو ن
ساعته اكدر احجي كدام كل الناس
واني ما خايفه من اي احد
بس محتاجه دليل
بقه كلشي متوقف على حنيبن اذاكدرت تجيب التليفون
كلشي راح ينكشف
ملاك...شبيج مو على بعضج اليوم
عمي...اي ولله اليوم ساكته
رهف....راح أنام تعبانه
ملاك....اي كولي شبيج
رهف....مابيه شي
بلكوه نمت بعد ماقريت كل إلادعيه وتوكلت على رب العالمين
الي دزلي حنيبن ولا على البال ولا على الخاطر
يكملها عليه يكشف برائتي ويفرح كلبي
ثاني يوم الصبح كعدت اغسل برا وملاك جاي تنضف
اندكت الباب فتحته واني مالابسه حجاب
جان اشوف علي كبالي
سديت الباب وكتله دقيقه ملابسه حجاب
دخلت جوه
رهف....علي بلباب
ملاك...اي اني وصيته على كم شغله يجيبهم من الببت
علي...صباح الخير
ملاك...صباح الخير تفضل
علي...هاي الشغلات الي وصيتيني عليهن
ملاك...ادخل ليش واكف بلباب
علي....شبيج عود اني اخوج
ملاك.....شتريد
علي....احجي ياها لان مجاي اكدر اطلعها من بالي
كعدت بكلبي وما تقبل تطلع منه
ملاك...اصبر عليها شويه بلكت الله يهديها
علي...شكد يعني اصبر
ملاك...لمن الله يفرجها
علي...اني البنات كلها تركض وراي وهاي شالعه كلبي
ملاك...معروف البزون يحب خناكه
علي...بشرفج احجي وياها
ملاك...صار من عيوني
علي...فدوه العيونج اختي حبيبتي
جمانه السعيدي
رهف...كعدت ارتب غرفتي اجتني ملاك
ملاك...اليوم المزاج مو شي
رهف...اي ولله شويه ضايجه
ملاك...خير شنو الي مضوجج
رهف....بعدين اجحيلج هسه مو وكت الكلام
بعدها الشغله ما كامله
ملاك...خير انشاء الله
رهف ...رحنا للجم اني وملاك بقيت منتظرتها
وادعي تجي وجيب التليفون
اتاخرت حيل اللعب بدون واهس
حتى ملاك انتبهت عليه وكل شويه اتاشرلي شكووو
واني عيني على الباب انتظر تجي حنيين
شفتها دخلت رحت عليها ركض
بس شافتني ااشرت براسها ااي جبته
رهف...ضحكت همزين
اخذته منها وفتحته كل الخطه من بدايتها النهايتها
موجوده على هذا التليفون
كلشي خططت اله شكران موجود على هذا التليفون
بس حقيقتا اخت حنيبن أحقر من شكران الف مره
هي تعلم بيها جيبي هيج
وخلي هيج اكتبي هيج يعني هاي الخطه
بقيادة اخت حنيين
بس الفكره من الأساس فكرة شكران
رهف....هاج هاي ١٠٠ الي وعدتج بيها
حنيبن...ترجعين التليفون
رهف...بس بعد محتاجه منج خدمه وحده وتاخذين بعد ١٠٠ الف
حنيبن...شنو هاي الخدمه
رهف...ترحين وياي نسلم هذا التليفون الواحد
ونرجع ااجر سياره اخذج وارجعج شنو رائيج
حنيين...يعني هذا التليفون بعد ماترجعي اليه
رهف...ماادري اذا سئلوج عنه كولي مااعرف
محد راح يشك بيج
حنيبن.. تنطيني بعد ١٠٠
رهف...اي هاج هاي ١٠٠ بعد شتردين بس تجين وياي
وراح افهمج شنو تسووين
رهف....ملاك اني راح اطلع شويه وارجع نطلع اني وحنيبن
ملاك...وين ماخذه بت ألناس
رهف...بعدين افهمج
رهف...اجرت تكسي وطلعنا اني وحنيبن
رحنا المحل عصام وكفت السياره شويه بعيد
نزلت
رهف...باعي حنيين اريدج تحجين كلشي كلتي كدامي
العصام شلون اتفقن اختج وشكران عليه
وتنطين هذا التليفون العصام
اني انتضرج هنا حتى ترجعين عليه
حنيبن...اخاف
رهف...من شنو تخافين هنا كلمتين
مثل ما حجيتي كدامي تحجين كدامه
كوليله اني توني عرفت اختي وصديقتها اتفقن عليك
من شفت التليفون ماقبلت عليهن
اجيتك حتى تكشف حقيقتهن
هاك هذا التليفون الاتفاق كامل علي بينهن
وتعاي نرجع اني وياج للجم
حنيبن...تمام راح اروح علي بس انتي انتظريني
هنا
رهف...اي منتظرتج
راحت حنيين على عصام
جمانه السعيدي
حنيبن...السلام عليكم
عصام...عليكم السلام
حنيبن....اريد احجي وياك بموضوع مهم
عصام....اني اعرفج
حنيبن...لا انت ماتعرفني بس اني اعرفك
عصام...اي
حنيبن...شكران زوجتك تصير صديقة اختي
عصام...وبعدين
حنيين...اني البارحه لكيت هذا التليفون بكنتور اختي
وبي اتفاق ببن اختي وشكران عليك
عصام.. اتفاق عليه ليش
حنيين.. قبل لا تزوج شكران اتفقن ثنيبنهن
يخلنك تشك برهف حتى اطلكها وتزوج شكران
عصام...تحجين صدك
حنيبن...اي ولله هاك هذا التليفون شوف بنفسك
اني ماقبلت عل تصرفهن هذا
واجيت أحذرك من زوجتك
ترا رهف بريئه هنا لفقلها هاي التهمه وانت صدكت
بيهن الفديوات الاصليه هنا قبل لا تقطعهن
شكران وتشيل منهن صور امها وصورها
لان هي الي جانت تصور زوجتك بيتك
بعدين تقطع الفديوات وترتبهن
عصام...خل اشوف
حنيين...هاك هذا التليفون بس عندي طلب مثل ما ساعدتك
تكشف الحقيقه تساعدني وما اجيب اسمي
بهاي القضيه لان راح اتصيرلي مشكله جبيره بسببك
#البارت__17
١٢٠-#كيلو
#البارت السابع عشر
جمانه السعيدي
رهف...بقيت منتظره حنيين
واكفه بلشارع وعيني على المحل شفتها طلعت
بقيت واكفه اااشرتلي اوكي
رهف....اطمنت هاي هيه رجعلي حقي من شكران
الحمد لله والشكر واخيرا راح امشي واني رافعه راسي
ومحد.يكدر يحجي عليه كلمه وحده
وصلت حنيين
.حنيين....هاي هيه انطيته التليفون وحجيتله كلشي
رهف...عفيه عفيه بحنين
حنيين...يله نرجع
رهف...خمس دقايق بس
فعلا هنا خمس دقايق وشفت عصام يقفل باب المحل
بعصبيه ويمشي بسرعه يصعد بسيارته ويشغلها ويطلع
رهف....يله نرجع
رجعنا للجم بس شافتني ملاك على وجهي ابتسامه
ملاك...ولله انتي مو طبيعبه شبيج بس فهميني ليش هليام
هيج متغيره ما تحجيلي فهميني شكوووو
رهف...عندي كومه حجي بس انزع الرداء والحجاب واجيج
ملاك...يله لان كتلني الفضول
رهف...اولا اريدج تباركيلي واذا تعرفين تهلهلين هلهلي
ملاك...غير افتهم
رهف....البارحه كدرت احصل من حنيبن دليل برائتي
اخت حنيين صديقه شكران وهنا طبخن هاي المصيبه سوه
ملاك...يااا هاي حنيين ماغيرها
رهف...هاي مو حنيين هذا رب العالمين الي رجعلي حقي
بطريقه اا على البال ولا على الخاطر
رغم اني اعرف كل سوالف حنيين وجنت اكدر اراسل
عصام باسم مجهول
واخلي يشك بيها طبعا اني متاكده اذا فتح تليفونها راح يلكه بلاوي
بس اني مااريد اخذي حقي بلفضايح مثل ماهي سوة وياي
اني اخلاقي وتربيتي ما تسمحلي
الشهر بيها وافضحها رغم هي تستاهل وعدها بلاوي
ما الها حد
بقيت منتظره اريد رب العالمين ؤجيبلي حقي منها
من اول مادخلت حنيين للجم وهي عينها عليه
تالي تجت وزكعت بلسانها وحجت كلشي
قدمتي دليل برائتي واني ماعده بمكاني
هاج اسمعي حجي حنيين
ملاك...يااا عزا شكد شايلات حقد وكره همزين وكعن
بشر اعمالهن
ملاك.. .وهسه وين جنتي شسويتي
رهف... ماكو شي دزيت الدليل العصام بعد ساعه نسمع اخبار حلوه
ملاك...شنو الدليل
رهف....تليفون علي كل الاتفاقيه بين شكران وصديقتها
ملاك...الله يستر من الجاي
رهف....كولي هلا بلجاي هله ومية هله
ملاك....لا ولله الله يستر
جمانه السعيدي
رهف...عصام من شاف هاي المصيبه قرر يرجع للبيت
يشوف شنو القصه هو اصلا جان شاك بشكران
وما حس بنفس السعاده الي عاشها ويا رهف بزواجه
يعني ازوج وتورط ماكدر يحب شكران بس مايكدر يعوفها
خاف يكولون هذا لعبي يزوج منا ويطلك منا
وصل للبيت هلمره حاول يسيطر على اعصابه بس شافته شكران استغربت ليش راجع
شكران...هااا حبيبي شو رجعت
عصام...شويه تعبان اريد ارتاح
شكران...سلامتك الف سلامه
عصام...اريد جاي
شكران...تدلل
عصام...نسيت تليفوني بلمحل اريد تليفونج اتصل منه
شكران...تليفوني
عصام...اي تليفونج ليش خفتي
شكران...لا ماوخفت هاك هذا تليفوني
عصام...افتحي شكران...اي هاك
عصام... ليش واكفه كتلج اريد جاي
شكران....اليوم موطبيعي
عصام...شبيه مو طبيعي اريد جاي روحي بسرعه جيبي جاي وتعاي ولا تناقشين
.عصام...دخل على الماسنجر والواتس والتلي وشاف كل المحادثات المصيبه مو مشكلة رهف
المصيبه العلاقات الي ما تنعد ويا الولد
حتى مقاطع فديو خليعه الها مصادقه اكثر من عشره
بس يطلع عصام تستلمهم واحد واحد
واكو ثنيين منهم خاصين تستقبلهم بلبيت
مادام هي طول النهار بلبيت وحدها تتسلى وياا هذا وذاك
جمانه السعيدي
شكران خلت القوري وحضرت الكوب ورجعت
لكت عصام يكلب بلمحادثات والرسايل
صورها الي ما باقي احد مادازتهن اله صور خليعه
شكران.. هاي شجاي تسوي
عصام....اشوف مصايبج
شكران...انت اليوم مو طبيعي احد دازك عليه
عصام....اي حقارتج دلتني عليح
.شكران.....بس افهمك
عصام....شتفهميني مايحتاج احد يفهمني اني شكد جنت غبي ومغفل صدكت لعبتج على رهف
كل هاي مصايبج لبستيهن الرهف
ليش اتهمتي رهف بشرفها
شكران...يا رهف ما متهمتها انت لكيت الدليل
بنفسك بتليفونها
عصام....طلعت التليفون الي علي الاتفاقيه بينها وبين صديقتها
وهذا الاتفاق انتي لو مو انتي
شكران...خل تولي هاي حاقده ولفقتلي هاي السوالف
عصام....هي حاقده انتي ليش ادبسز
شنو هاي العلاقات ليش جاي ادخلين زلم بيتي
شكران....لا انت فاهم غلط
عصام....اني كلش هادء بله فهميني شلون فاهم غلط
هذا مو انتي جايبته بيتنا هنا موجاي تنامين ويا على فراشي وهذا شنو قصته
صورج هاي ما تخافين تنتشر
شكران...سامحني بعد ما تتكرر بس هلمره
اني اعترف اني غبيه ومااعرف اتصرف
عصام...انتي غبيه شلون غبيه وانتي غلطتي الشيطان
اكو وحده غبيه هيج تخطط
شكران... بس هلمره استرني وبعد ما تنعاد ابد
عصام....الشي الي ضايج علي شلون فرطت برهف علمود وحده ساقطه مثلج شلون مشيت وراج وزوجتج
تعرفين اني ابد ماكدرت احبج
انتي مثل المرض بس الالم
شكران...سامحني فدوه بعد مااعيدها اخذ التليفون مااريده
عصام...هااا هسه اخذ التليفون بعد ما شبعتي
اني اضحكين عليه ولج انتي ما تسوين نعال
هم خاينه وجذابه وهم ساقطه وبلا اخلاق
بس اريد افهم شلون لعبتي هاي اللعبه عليه وخليتني اطلك رهف
شكران....انت اليه شنو رهف انت اليه من البدايه ورهف اخذتك مني تستاهل كلشي صار وياها
وحده ثوله كلشي ما تفتهم
عصام...وانتي الي تفتهمين تتهمين بنات العالم
خل اكون صريح وياج اني هسه ابد ما ضايج
الضوجه الحقيقه جانت من طلكت رهف
رغم اني هسه عرفت خيانتج ولعبج عليه بس ما ضايج
لان اني بعمري ما حبيتج
واكبر غلطه غلطتها بحياتي ازوجت وحده حقيره مثلج
جمانه السعيدي
شكران....سامحني بس هلمره واني راح اصير وحده ثانيه
ابوس ايدك ابوس رجلك سامحني
عصام...هذا التليفون عليه هجمان بيت رهف
وهذا التليفون علي حقارتج ياساقطه
اذا مااخليج علج بحلوك الناس مااسمي عصام
لازم تكونين عبره الكل وحده بلا اخلاق مثلج
روحي الله لايبارك بيج ولا باامج انتي وياها نفس النسخه
قرب عليها عصام وضربها راشدي طير فجها
سحبها من شعرها وشمرها بلشارع
عصام... تستاهلين اكثر من هيج يا زباله
اني اعلمج اذا مااخليج تتندمين على كل يوم عشتي وياي
مااسمي عصام
رهف...تدرون شنو أغرب شي بهاي القصه
شكران اطلكت من عصام
وما عاشت وياا غير شهرين وعشرين يوم
بكد الوقت الي اني عشته ويا
ياربي هاي شنو من عداله حتى ولا يوم واحد اكثر
نفس المده بلضبط
ولبست فضيحه مثل ما لبستي فضيحه
وراح تتطلك رب العالمين اكتاللها من نفس المكيال
لا اكثر ولا اقل
اتصلت خالتي على عمي
خالتي...... الحك زوج شكران طردها
ويشك بيها تعال حل مشكلتها مثل ما حليت مشكلة رهف
عمي...ليش شصاير فهميني
خالتي...لازم عدها تليفزن ويشك بيها تعال احجي ويااا
لان ناوي يرفع قضيه يشتكي عليها
نفس قضية رهف بلضبط تعال حلها بسرعه قبل لا تتطور مو انت حليت قضية رهف
رهف...خالتي الحد هاي اللحظه وهي ضالمه
جاي تقارن شكران بيه وتكول نفس قضية رهف
الله اكبر عليها شكد ضالمه
عمي...غير افتهم شنو القصه بلاول
خالتي...اي تعال احجي وياا بنتك وانت تفتهم
اذا انت كاعد يم الخاتون متعجب ماخله وحده
جنها كاوليه
راح عمي للبيت وحجتله شكران نص الحقيقه
شكران...صديقتي ملفقتلي تهمه جايبه تليفون
ومخليه علي محاداثات وتكول ذني المحاداثات الشكران
وتتهمني اعرف زلم على عصام
وعصام صدك بيها ويريد يشتكي عليه
مثل قضية رهف بلضبط بابا روح علي وحل هاي
المشكله خاف صدك يشتكي عليه
رهف...عمي المسكين صدك بكلام شكران
بس من اتواصل وياا عصام
وعرف الحقيقه بلادله حقيقة تهمتي الباطله
وحقيقة شكران صاحبت العلاقات المتعدده
تخبل هلمره اتخبل من صدك
عمي....شنو الحل برائيك
عصام...هلمره اشتكي عليها ومستحيل اسكت
قضية خيانه زوجيه
وقضية تلفيق تهمه الرهف
شكران هجمت بيتي مرتين اول مره خسرت رهف بسببها
وهلمره خسرت سمعتي
الناس شتكول وهي اشوف زلم داخله البيتي
اني مجاي احجي كلام من عندي
كلشي موجود هنا
عمي...الله أمر بلستر استرها الخاطر ذني الشيبات
اني بعد مااكدر على الفضايح
جمانه السعيدي
عصام...شكران لازم تتادب اذا فلتت من العقاب
راح تسوي مصايب اكبر من هاي المصيبه
عمي...اي تعويض تطلبه اني حاضر ونتنازل عن كلشي
وطلكها بستر
انت خوش انسان وما شفنا منك غير الطيب
كمل فضلك علينا بس هلمره
عصام...اعذرني هلمره شكران داست على شرفي
وعلى كرامتي
جانت تضحك عليه ومستغفلتني
عمي...هاي المشكله مراح أضر شكران بس راح تمس
سمعتنا كلنا
عصام...انت وامها عليكم نص هاي المصيبه
لو مربينها صح مجان اتهورت هيج يعني بنيه
عمرها عشرين تكدر أدبر هاي المصايب كلها
الله اكبر هاي مو بنيه هاي شيطانه
رهف...تعب عمي ورجع للبيت كلش ضايج
لان عصام مصمم يمشي بهاي للقضيه وما يقبل يتنازل عن حقه
ثاني يوم عصام راح اشتكى على شكران بلمحكمه
دزولها طلب حضور للمحكمه
نفس هذا اليوم الي اشتكى بي عصام على شكران
اجا يعتذر مني
جنا طالعين من الجم اني وملاك بعد ما خلصنا
شغلنا اني نزلت من الدرج قبل ملاك
واني جاي انزل شفت سيارة عصام بلباب
عرفت جاي عليه
بقيت واكفه بنص الدرج منتظره ملاك تنزل وانزل وياها
نزلنا اني وياها طلعت للشارع سويت نفسي ما شفته
رهف كمت احجي ويا ملاك
راسا هو نزل من السياره وصاح رهف من رخصتج
التفتت علي بعدين رجعت امشي وكانما ما سمعته
اجا يمشي وراي
عصام...دقيقه من رخصتج
رهف...شكووو خير
عصام... اريد احجي وياج عندي كلام مهم
رهف... اي كلام ماكو بينا اني وياك كلشي انتهى خلاص
عصام...اسمعيني بس هلمره
رهف...انت ما تفتهم مو كلت اي كلام ماكو بينا
عفته ومشيت
عصام...اني طلكت شكران ورفعت عليها قضيه حتى اخذلج حقج منها
رهف...عبالك مااسمعه
عصام....سمعتيني طلكت شكران وراح اخذ حقج منها
رهف...باوعت علي وكانما شايفه شي ماعاجبني
او شي اشمئز منه
عفته ومشيت
ملاك....هذا شبي
رهف...اليوم مذكرني عباله هو الي راح يطلع حقي
مايدري رب العالمين هو الي اخذلي حقي منها ومن امها
خلي يعيش الندم
خلي يتحسر اني تعلمت مااباوع على الشي الي يوكع مني
وعصام وكع من عيني وكلبي
ومراح اسمحله يرجع الحياتي مره ثانيه
خالتي انهارت من اجاها تبليغ على شكران
هجمت على عمي
شلون حليت قضية رهف وما تكدر تحل قضية شكران
وهنا ثنيبنهن نفس القضيه
عمي...منوكالج نفس القضيه
بتج مسويه مصايب ما ينلبس عليهن ثوب
وعصام لازم عليها بلاوي
خالتي...اي شيريد انطي بس يتنازل عنها
عمي.. واني منتظرج تحجين مو مليت واني احجي ويااا
هاي حوبت رهف طلعت بيجن انتي وبتج
وبعد شوفي رب العالمين شراح يسوي بيجن
#البارت__18_الاخيررررر
١٢٠-#كيلو
#البارت الثامن عشر والأخير
جمانه السعيدي
رهف....اول مره بحياتي كلها احس بلانتصار
اي اني هسه يله انتصرت وأخذت حقي مربع من كل واحد اذاني
راح امشي وراسي مرفوع ومحد يكدر يحجي عليه كلمه وحده طلعت حقي من شكران ومن خالتي ومن عصام
عمي هلايام محتار بزمانه
معقوله بعد هذا العمر ولالتزام تجي حجايه بسبب شكران
هو شنو ذنبه
ليش يشيل مسؤلية تهورها استهتارها
رهف...عمو اريد كتبي اريد ارجع ادرس خارجي
اذا بعدهن موجودات بيتكم
عمي...هذا احسن قرار عفيه انتي فعلا ماكو منج
رهف....وبعد اريد افتح مشروع حتلو ازغير
اريد اشتغل اريد اعتمد على نفسي
الدنيا ما مضمونه واني مااريد اعيش تحت رحمة احد
عمي...شوفي شنو الي يناسبج واني وياج
رهف...خل افكر شنو احس مشروع يناسبني
ثاني يوم عمي راح البيته يجيبلي الكتب
رجع بليل
رهف...هااا عمو جبت الكتب
عمي ...خالتج حاركتهن اني اجيبلج غيرهن
رهف...حتى الكتب ما سلمن من حقدها
عمي... مانريد منها شي بس نخلص من شرها
رهف ...ثاني يوم عمي جابلي كتب وبديت ادرس
هاؤ السنه فاتتني انشاء الله اعوضها
اجت محاكمة شكران والقاضي ااجلها اكثر من مره
ينتظر يصير صلح بين عصام وشكران
بس عصام مصصم على رائيه
شكران لازم تاخذ جزائه العادل حتى تبطل حقاره
رجع عصام يلاحقني يجي للجم بين يوم ويوم
بس اني ابد ما انطي وجهه
مستحيل ارجعله بعد الشي الي صار بينا
جمانه السعيدي
بيوم طلعت ملاك من الجم راحت بيت اهلها بقيت وحدي
طلعن البنات هو جان منتضرني برا
كلما تنزل بنيه يسئلها هم اكو بعد احد الحد ما نزلت اخر وحده لبست الرداء والحجاب جاي اطفي الاضويه اريد اقفل الباب
مااحس اله عصام واكف بصفي
الصراحه اتفاجئت بي وخفت منه بدون وعي صحت بصوت عالي انت شتريد جاي هنا
عصام...لازم احجي وياج انتي مجاي تنطيني مجال
اي اسمعيني مره وحده اسمعيني ليش جاي تنجاهليني
رهف....شنو اجاهلك انت ما تستحي هذا مكان عمل انت
جاي تقتحم خصوصيتي اطلع لا اعيط والم الناس عليك
عصام...اذا ماتسمعيني مراح اطلع شعلتي كلبي صار فتره اركض وراج وانتي ولا عبااك
اريد افهمج موقفي شنو لازم تسمعيني
رهف...افهم انت بلنسبه اليه انسان غريب ماكو اي شي بيني وبينك كلشي بينا انتهى خلاص
سحب المفتاح من ايدي وكعد على المكتب
عصام...اسمعيني اريدج تعرفين شي مهم اني متمسك
بهاي القضيه ومصمم شكران تاخذ جزاها العادل
علمودج اريد اطلع حقج منها اني اكدر اخليها تتنازل
عن كلشي واطلكها واكدر اطلب تعويض
لان هسه هي تحت رحمتي اني لازم عليها بلاوي
بس اني ماقبلت اي صلح بيني وبينها اريد حقج يرجع
اني احبج رهف حتى من ازوجت شكران
ماكدرت انساج انتي الحب الاول بحياتي
جمانه السعيدي
رهف...ترا اني مو غبيه ولا رهف الفقيره الي عرفتها كبل
بسيطه وغبيه وتصدك بكلشي
اني اليوم وحده ثانيه لو تحبني صدك وتعرف اخلاقي ما ماتشك بيه لو تعرفني صدك ما تتهمني بشرفي
لو تريد تاخذلي حقي جان دورت ورا هاي المشكله
حتى تعرف الحقيقه جان سئلتني سمعتني
انطيتني مجال ادافع عن نفسي مو تشمرني بلشارع
واتوسل بيك تسترني تطبك الباب عبالاك ما تسمعني
رحت جبت عبايه وفلوس من الجيران بس حتى اكدر
ارجع الببت عمي
عصام...اني تخبلت كمت مااشوف من العصبيه والقهر
صرت شيطان مو بشر وخاصه لمن لكيت الجهاز
والفديوات الي علي تجلط اكبر واحد
خليج بمكاني مااضوجين ما تنفعلين
رهف...حتلو اضوج هم اسمعك انطيك فرصه ادافع عن نفسك مو كبل طلاك وشمرتني بلشارع
تعرف اني ليش جنت بعينك رخصيه وفرطت بيه بسهوله
لان ماعندي اهل تحسب احسابهم لان ماعندي سند
شكد جنت فرحانه بيك كلت اي هو هذا العوض من رب العالمين واخيرا اجاني الانسان الي يعوضني عن اهلي كلهم
تالي طلعت انكس من خالتي وشكران
عصام...كتلج ماكدرت اسيطر على اعصابي بوكتها
سامحيني وخل نرجع واي طلب تردي اني حاضر اي شي
حتلو تردين اسجل البيت باسمج ماعندي مانع
رهف...شسوي بلبيت عندي بيت وعندي راتب ابوي الله يرحمه الفلوس مو كلشي جنت محتاجه وطن
مو محتاجه بيت اطلع من حياتي ولا تتخيل راح ارجعلك بيوم من الايام مادام انت ماعندك ثقه بيه خلاص
كلمن يروح بطريق انطيني المفاتيح
ترا ما يهمني اذا شكران انسجنت او حتى انعدمت
اهم شي عندي طلعت برائتي اهم شي الناس كلها عرفت حقيقة الشي الي صار وياي
عصام...ليش هلكد صايره قاسيه مو اني حبيبج معقوله نسيتني بهاي السهوله
رهف...اسئل نفسك شسويت وراح تعرف اني ليش تغيرت
عصام...اني بعدني احبج واموت عليج
رهف.. واني كرهتك خلاص مااريد ارجع للماضي ابد
انطيني المفاتيح من رخصتك
عصام....ذني المفاتيح فكري زين مراح تلكين واحديحبج بكدي ابد
رهف.. اخذت المفتاح وهو نزل واني نزلت ورا احس نفسي ارتاحيت بعد ماحجيت كلشي بكلبي اني فعلا ما بقى بكلبي ذرة حب العصام
بلبيت ملاك...صدك تردين تفتحين مشروع
رهف...اي هيج شي بسيط على كدي
ملاك....شنو رائيج تدخلين وياي شريكه
رهف...بشنو
ملاك...بلجم انجدده ونشتري أدوات رياضيه واني وياج بلنص بعدين اني مااكدر استغني عنج بلفترة الجايه
لان اني حامل اليوم من رحت الاهلي سويت تحليل
رهف...صدك مبروك الف مبروك
ملاك...الله يبارك بيج حبيبتي
رهف...اني هم عندي خبره حلو اليوم وصلت ٨٨ كيلو باركيلي
ملاك...الف مبروك حبيبتي كله هذا بسبب صبرج وإصرارج
رهف...وبعد ناويه اوصل للوزن المثالي تعرفين قالوني
اتحسن هواي وتخلصت من شراهة الاكل
ملاك...هذا يعني انتي على الطريق الصحيح عفيه
جمانه السعيدي
ملاك...ممكن احجي وياج
رهف...اذا موضوع علي اعذريني اريد اكمل دراستي
وراح اصير شريكه بلجم وياج
ملاك...بس هو يحبج صدكي علي اخوي واعرفه بعمري ما شفته هيج متمسك بشي هلمره صدك وكع بلحب
رهف...على الاقل اني حاليا ما مستعده للارتباط خل نعوفه للزمن ايجوز بالمستقبل يصير قبول
ملاك...علي اذا سمع هذاا الكلام راح يتمسك بيج اكثر
البارحه يكول بس خل تقبل مستعد انتظرها عشر سنيين
خاف يخطبها احد غيري وتقبل بي ساعته انتحر
رهف....كلشي بيد رب العالمين اذا قاسملنا تصير واحد للثاني راح نصير
ملاك.. والنعم بلله
جمانه السعيدي
يافرحة عمي بحمل ملاك عبالاك ماعنده اطفال هذا اول طفل
طاير من الفرح
سمعت خالتي ملاك حامل وتخبلت علينا
شلون تطلع حامل انت شنو تريد جهال ماتجي تكعد يم جهالك ذوله اذا تريد جهال
كل يوم دازه على عمي اعدل بينا ليله اليه وليله الملاك
بس عمي رافض يرجع الذاك البيت
جاي يدز مصرف للولد وما منقص عليهم شي
يكول مااكدر ارجع الذاك البيت من اشوف خالتج اختنك
رهف...دخلت شريكه ويااا ملاك بلجم جبنا اجهزه حديثه
وطرورنا المكان اكثر حسيت هاي الشغله مناسبه اليه
لان ملاك محتاجتني واني هم محتاجتها
هي حامل ومراح تكدر تشغل المكان وحدها
واني اريد ادرس مراح اكدر افتح مشروعي وادرس
اجا يوم محاكمة شكران ودزولي استدعاء
شفت الانكسار بعيون عمي لان اني بس أأكد الأضرار الي صابتني بسببها راح تنحكم اقل شي ٣ سنوات
راح تنحكم اكيد الشي الي سوته مو قليل بحقي
بس اني سئلت اذا اتنازل عنها راح تبقى قضيتها ويا عصام
ممكن تنسد بتنازلها عن كل حقوقها وتدفعله تعويض
لان باعتبار اضضررت سمعته بسببها وخانت الامانه
قررت الاخر لحظه من هاي القضيه اكون اني رمز الخير والشرف رحت وتنازلت عن شكران
الخاطر عمي الي رباني وتعب عليه ومستمر الهاي اللحظه يدعمني ويدافع عني
اما قضيتها هي وعصام المحكمه مااعتبرتها
قضية زنا حقيقيه لان هو ما شافها بعينه ويا واحد داخل بيته وعلى فراش الزوجيه كل مجرد كلام بلتليفون
قررت المحمكه شكران تتنازل عن كل حقوقها وتدفع تعويض
١٠ مليون دينار عراقي للضرر الي سببته العصام
خالتي تواصلت ويا خالي الي بلخارج وطلبت منه يساعدها
بمبلغ بسبب هاي المشكله
خالي دزلها ١٠ مليون كاملات انطوهن تعويض
وهيج انسدت قضيه شكران صارت مطلقه وصاحبت
سمعه سيئه
بديت ادرس اخذ الكتب وياي للجم لان اني اروح بلوحده الضهر وارجع ١٠ بليل اي وقت زياده اقر
بلاضافه اكو كم مدرسه داخلات عدنا بلجم يساعدني اقرا
واذا اكو موضوع صعب يكعدن يفهمني
اجت الامتحانات وكمت مااروح للجم اخلص وقتي بلبيت اقرا اكثر شي اعتمدت على النت اطلع الدروس واحفظهن خلصت امتحانات وبهذا الوقت ملاك كبرت بطنها ماتكدر تروح للجم
صرت اني المسؤله عن الجم بكلشي
بقيت منتظره النتيجه طلعت ناجحه بمعدل ٧٠
بيوم طلعت النتيجه
جمانه السعيدي
اجا عصام وكف باب الجم بس شفته ضجت
عصام...اجيت اباركلج على النجاح
رهف...شكرا
عصام...مافكرتي
رهف....ولا راح افكر افهم كلشي بينا خلص
عصام....بس اني بعدني احبج
رهف....الله يخليك ابتعد عني اني وياك مراح نرجع سوه ابد
شكران من سمعت اني نجحت ماتت قهر وكالت الابوها اني هم اريد ارجع ادرس خارجي
جابلها كتب حتى تدرس
عفيه غيره حتى بهاي غياره على العموم مالي علاقه بيها بعد لا اقترب منها ولا اريدها تقترب مني
قدمت جامعه اهليه كلية قانون وبهذا الوكت عمي صارت عنده بنيه ااجنن سمها هدير
بفترة ولادة ملاك
علي جاب اهله واجا تقدملي رسمي
اتفاجئت بيهم لان ماكان عندي علم بهذا الموضوع
بس ملاك وعمي كانو يعرفون وهم الي مخططين
الهاي الخطبه بعد إلحاح علي عليهم
ضغطوا عليه حتى أوافق حسيت علي فعلا مناسب اليه
لان صار سنتين ينتظرني رغم اني ابد ما انطيته وجهه
انخطبنا اني وعلي فرحان بيه بشكل
يعني مستعد يكابلني ويكعدكل الوقت من يرجع من الشغل بليل يجي للجم نرجع للبيت اني ويااا
واكثر الوكت لو يتغدا عدنا لو يتعشى
لو نطلع اني ويا نتعشى برا
اخذني اشترالي ذهب يخبل قيمته ٢٥ مليون
من غير الغرفه والملابس كلهن ماركه
من سمعت خالتي وشكران
دزن خبر نريد نجي نباركلها وخل تنسى الشي الي صار
كتلهن لا والف لا ممنوع اي وحده تقرب مني
تردن تقربن مني حتى تاخذن علي مثل مااخذتن عصام الله اعلم شنو المصيبه هلمره
اذا وحده منجن قربت مني اشتكي عليها
ازوجت بيت اهل علي زواجنا كان اسطوري
شي يخبل سوينا العرس بقاعه
والزفه كبل للفندق طلعنا اسبوعين الاربيل
عيالي ناس محترمين بشكل راقين الابعد حد
بعمري ما سمعت كلمه موحلوه منهم
ولا يوم كالو انتي منفصله وابنا اعزب بلعكس كلهم يحبوني وخاصه عمي وعمتي
عمتي ما تقبل اكول عمه تكول كولي ماما احلى
وزني حاليا ٧٠ كيلو رغم حملت وجبت وصار عندي أطفال ثنيين بس محافظه على جسمي
خلصت جامعه بس مجاي اشتغل بمهنة المحاما
مكمله بلجم اني وملاك
ملاك صار عدها حسن وهدير
عمي كمل بناء بيته بعد ٣ سنوات من واجه من ملاك
وانتقل البيته
واني وعلي انقلنا البيت اهلي وحاليا عايشين بي
شكران الحد الان مامزوجه اخوانها ثنيينهم ازوجو وطلعو من البيت بسبب المشاكل
شكران شاده ويا نسوان اخوتها
مشاكل ما تنتهي وخالتي مشجعته تتعارك وياهن
قررو ياخذوهن ويعيشون بعيد عن شكران وخالتي
خالتي تمرضت عدها ضغط وسكر
ماتكدر مثل قبل بعد مابيها حيل كاعده بلبيت هي وشكران شكران عدها راتب مطلقات عايشات منه ثنيبنهن
خالتي دزت تطلب الطلاك من عمي قبل اربع سنوات تقريبا
تريد اطلع راتب تعيش منه عمي بس سمع كبل طلك ماصدك يخلص منها ومن مشاكلها الي ما تنتهي
انتهت قصة رهف
الحكمه من هاي القصه
الكون انخلق على كفت ميزان
كل إنسان عايش بكفه وأعماله بلكفه الثانيه
يعمل خير تصعد كفت الميزان ويصعد الانسان بعمل الخير
يعمل شر تنزل كفة الميزان ومايحصل بس نتيجة عمله
اذا تعمل خير يرجعلك خير
اذا تعمل شر يرجعلك شر كما تدين تدان
من يعمل منكم مثقال ذرة خير يره
دمتم سالمين
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺🌹❤️🌺🌹🌹❤️🌺💙
إرسال تعليق