رواية فات أوان الندم البارت السادس بقلم الكاتبه أماني سيد حصريه وجديده

رواية فات أوان الندم البارت السادس بقلم الكاتبه أماني سيد حصريه وجديده

وصل منصور والمعلم عبد الظاهر لمنزله وكان معاهم نسرين

دخلوا الشقه وساعد منصور عبد الظاهر انه يدخل الاوضه بتاعته ويرتاح

اول ما دخل عبد الظاهر غرفته جلس على السرير وسند على ضهر السرير واتكلم براحه

ـ يااااه محدش بيرتاح غير فى بيته

ـ عشان كده يا معلم خد بالك من أكلك وصحتك

ـ أهو درس والواحد أتعلم إحنا مابنتعلمش ببلاش

ـ بس كان درس تقيل شويه عشان كده لازم تفضل فاكره وتاخد بالك من علاجك ومن أكلك....

المهم يا معلم أنا هستأذن دلوقتي وابقى اعدى عليك فى المكتب اطمن عليك

ـ لا استنى عايزك فى كام موضوع كده

ـ خير يا معلم

فتح المعلم درج بجوار سريره وطلع منه رزمه فلوس وحطها قدام منصور

بصلها منصور باستغراب

ـ فلوس إيه دى يا معلم

ـ دى الفلوس اللى دفعتها فى المستشفى

ـ انت كده بتشتمنى يا معلم وأنا هزعل

ـ الحق مايزعلش يا منصور وكفايه إنك ماسبتنيش لواحدى وراعيت حُرمت بيتى دى لواحدها بكنوز الدنيا

ـ خيرك سابق يا معلم وأنا مانستش وقفتك جمبى وقت ما احتاجتك

ـ أصيل يا منصور

ـ خلاص شيل بقى الفلوس دى ومانتكلمش فى الموضوع ده تانى لأن وقتها هقول إنك مش معتبرنى زى ابنك

اتنهد عبد الظاهر ورجع الفلوس تانى مكانها وطلب من منصور يتأكد إن الباب مقفول كويس

ـ بص يا منصور يا بنى على الباب مش عايز حد يسمع الكلام ده

قام منصور واتأكد إن الباب مقفول كويس

ـ خير يا معلم

ـ المثل بيقول إيه أخطب لبنتك ولا تخطبش لابنك وبصريح العباره كده انا عايز اجوزك بنتى

سكت منصور كلام عبد الظاهر صدمه ... هو حالياً فى صراع كبير مع أبوه ولسه بيبدأ مشروعه وعليه ديون لو اتجوزها اكيد هيظلمها معاه لأن وقته كله للشغل وماعندوش شقه ولا جاهز للارتباط لأن فلوسه كلها فى المشروع بتاعه اللى لسه فاتحه

وفى نفس الوقت هو معندوش اعتراض على النسب او البنت ولكن خيركم من عرف قدر نفسه

طال الصمت وكسره صوت المعلم عبد الظاهر

ـ أنا بنتى غاليه عندى اوى اوى يا منصور عشان كده بقولك اتجوزها ... أنا خايف عليها ومش هأمن عليها غير وهى معاك وغير كده عايز اعملك توكيل اداره عشان لا قدر الله لو حصل حاجه تقدر تتصرف وتبيع لنفسك كل حاجه

انا اخواتى نفسهم أموت انهارده قبل بكره عشان يورثونى ولو جرالى حاجه بنتى مش هتطول من ورثها ربع جنيه

أنا عايز احميها يا منصور وأنت الراجل الوحيد اللى أقدر اطمن عليها وهى معاه

سمع منصور كلام المعلم والحيره ذادت جواه من ساعه دخول المعلم المستشفى ومحدش جه من قرايبه زاره أو اطمن عليه وفعلاً لو جراله حاجه مش هتعرف تعيش لواحدها أكيد هيضايقوها

ـ ها يا منصور ساكت ليه بنتى مش عجباك

ـ لأ يا معلم بنتك ست البنات وأنا أطول اناسبك وأحط ايدى فى ايدى

ـ ماتقولش كده منصور انت راجل بجد ومش قلبل

ـ الحكايه كلها إن انا كل فلوسى فى بضاعه زى مانت عارف ولسه المعرض مفتوح جديد حتى ماعنديش شقه اتجوز فيها لو اخدتها هتجوزها فين هل هى هتقبل بشقه إيجار ودهب بسيط ؟؟

يا معلم انا عايز لما اتجوز أصون الست اللى اتجوزها مش ابهدلها معايا ووقتى كله يبقى للشغل مش ليها

وغير كده أنا رافض موضوع التوكيل ده ومش هقبل بيه

ـ لو حصلى حاجه بنتى مين يقف جمبها وهما بيورثوها

ـ بص يا معلم انا موافق على جوازى من بنتك مش رافض بس عايز شويه وقت عشان اعملها فرح واجبلها شقه يليقوا بيها وتانى حاجه تقدر تبيع لبنتك جزء من ممتلكاتك وماتقلقش أنا هقف معاها لو حصل حاجه

ـ هتقف معاها بصفتك ايه لو متجوزتهاش ؟؟

الاعمار بيد الله يا منصور افرض جرالى حاجه قبل ما تتجوزوا وقتها لا انت ولا غيرك هتقدروا تقفوا قصادهم وومكن وقتها يبيعوها اللى كتبتهولها

بص يا منصور أنا مش عايزك تجيب شقه انا عايزك تتجوز معايا هنا أنا عايش هنا لواحدى أنا ونسرين بعد وفاه مراتى بقالنا سنين عايشين لوحدنا عشان كده عايزك تتجوز هنا وضب الشقه واتجوز فيها وتونسونى فى وحدتى

ـ يا معلم ترضهالى او ترضاها لبنتك

ـ واضح أنى بضغط عليك يا منصور خلاص انسى الكلام ده

سكت منصور بيفكر فى كلام عبد الظاهر

من جواه حاسس فعلاً بمسئوليه تجاه نسرين من أول مره شافها فيها وخايف لو رفض عرض المعلم وقتها المعلم ممكن يجوزها لواحد تانى

هو اعجب بيها من ساعه ما شافها عشان كده بيبعد عنها طول الوقت عشان مايحاولش يكلمها ويخون المعلم وقتها وفى نفس الوقت مش قادر ياخد خطوه فى عرض المعلم

ـ مالك يا منصور ساكت ليه انا رفعت عنك الحرج الظاهر أنى كنت غلطان لما فتحت الموضوع ده بس أنا عملت كده من العشم

ـ ماتكملش يا معلم أنت عارف انك فى مقام أبويا وأنا مش هكدب عليك وهكون صريح معاك أنا معجب بالانسه نسرين ولولا الظروف كنت أنا اللى بدأت بطلبها

عشان كده عندى اقتراح ولو وافقت عليه يبقى نتوكل على الله وناخد خطوه رسميه لو الانسه نسرين وافقت طبعاً

ـ سامعك يا منصور

ـ بما انى مش هقدر اجيب شقه أنا موافق اقعد معاك هنا والشبكه على أد ما ربنا يقدرنى هجيب وبإذن الله هجيب اوضه نوم جديده ولو هى حابه تغير حاجه انا ماعنديش مانع

ـ تمام يا منصور أنا موافق

ـ بس تكتبلها نسبه من المعرض مهر ليها

ـ يابنى أنا عندى كتير وهى مش محتاجه

ـ ربنا يبارك فى اللى عندك بس لما نتجوز هتبقى مراتى ومسئوله منى

ـ على خيره الله أنا هكلمها وأول ماخد منها الموافقه هبلغك عشان تبلغ اهلك وتيجوا تطلبوها رسمى

ـ وأنا مستنى موافقتها استأذنك همشى دلوقتي وهنتظر مكالمه منك

ابتسم عبد الظاهر وودعه بإبتسامه

منصور مش بس اثبت إنه شاب جدع وشهم ويستأمنه على بنته كفايه إن والدته تبقى سميحه

بمجرد ما جه اسمها على باله ارتسمت ابتسامه كبيره على وجهه

كل ما يفتكر سميحة، قلبه يتخبط جواه كأنه لسه شاب واقف قدامها أول مرة. كان بيشوفها "ملكه "، ملامحها نقية وضحكتها بريئة، والعيون اللي فيها دفا يكفي يحيي بلد بحالها.

ضحك بس ضحكة كلها وجع:

"يا ريت الزمن كان بيرجع… يا ريت كنت أنا اللي دخلت بيتها قبل حسين، كنت صنتها… كنت خليتها عايشة زي الملكة، ما شافتش لحظة همّ ولا وجع."

كل ما صورتها تعدي قدامه، قلبه ينقبض، يحس إن فيه وجع ساكن جواه بقاله سنين، وجع مالوش دواء.

كل مرة يبص في وش منصور، يحس إن الزمن رجّعله حلم ضاع. "يا ريتك ابني… يا ريت كنت طالع من صلبي، كنت ساعتها أقول الدنيا ادتنى كل حاجه."

نفسه يجوزه بنته لمنصور وقتها هيبقى حقق حلم قديم وهيكون منصور فعلاً زى ابنه .

حب سميحه جواه ما ماتش… لا بالعمر، ولا بالزمن . حب بيتحرك جواه كل ما يشوف سميحة او حد يخصها … أو يلمح منصور.

اتجوز وعاش مع مراته فى اسره هاديه وكانت زوجه صالحه حاول كتير مايفكرش فى سميحه .خلى وقته بالشغل وكانت بالنسباله فى جزء بعيد جوه قلبه

لحد ما سمع بخبر طلاقها، قلبه اتشق نصين. حس كأن العمر رجع بيه عشرين سنة لورا، صوته جواه بيصرخ: "يا ريت… يا ريت الزمن يرجع."

كان بيشوفها في خياله زي الأول، بنفس الملامح، بنفس الضحكة… حتى ريحتها ما فارقتوش. حاول يقنع نفسه إن اللي بينه وبينها انتهى من زمان، وإن مراته الله يرحمها كانت كفاية تسند قلبه وتداري وجعه. بس الحقيقة… إن سميحة عمرها ما غابت، كانت جواه زي جرح قديم، كل ما يفتكرها ينزف من تاني.

اللي زوّد الوجع إنه شايف منصور… منصور اللي نفسه يبقى ابنه بجد. شايف فيه رجولة وأصالة ما لاقهاش في غيره. كل مرة يقعد معاه يحس إن ربنا رجّع له فرصة جديدة: "لو منصور خد بنتي، يبقى أنا أخدت الدنيا كلها… وأخيرًا ضمّيت بين الماضي اللي ضاع والحاضر اللي باقي."

الحب اللي شايله عبر الزمن مش حب عادي… ده حب اتخلق من وجع الفقد، واتربى على نار الندم، ولسه لحد النهارده بيخبط في قلبه زي أول يوم شاف فيه سميحة.

نادا عبد الظاهر على بنته وقرر يكلمها فى ارتباطها من منصور واتمنى من كله قلبه إنها توافق

فى بيت حسين كان قاعد فى شقته ونا*ر الغيره بتاكل قلبه

إزاى منصور بالسهوله دى اخد منه كل حاجه

قاطعت مشيره سرحانه وقاعدت جمبه ووضعت كفها على رجله

ـ هتفضل قاعد زى الولايا كده مش عارف تعمل حاجه انت بقالك يومين ما دخلتش جنيه المحل ده غير ال ٥٠.٠٠٠ الف اللى لهفهم محمود

ـ مش عارف يا مشيره هتجنن مش عارف اعمل ايه

ـ واللى يجبلك الحل

ـ ياخد عينى

ـ انا عندى الخل بس مش عايزه عينك

ـ اللى تقوليه يتنفذ

ـ تخلى فاروق شريك معاك

ـ موافق

ـ اللى قهر منصور وخلاه يعند معاك كده طلاقك من أمه سميحه عشان كده لازم ترجعها تانى ومش بس كده لأ انت تحاول تاكل عقلها لحد ما تحن عليك تانى وترجعلك وتقنع ابنك إنه يشاركك

ـ تفتكرى منصور هيوافق

ـ أكيد منصور هيوافق منصور كل اللى يهمه إن امه تفضل على ذمتك عشان محدش يجيب فى سيرتها ومجرد ماهترجعها وتعاملها حلو هو بنفسه يطلب يشاركك

سكت حسين وكلام مشيره بيلف فى دماغه كل حاجه بتقول إن سميحه لسه بتحبه ليه مايستغلش ده ويحاول يرجعها تانى

ـ تصدقى دماغك دى الماظ بكره هستنى منصور يروحلها واروح اتكلم معاها

ـ عايزاك تكتر فى الندم وأنك حسيت انك ندمت لما طلقتها وابنك بعد عنها وقتها حسيت إنك خسرت كل حاجه عايزاك تعمل المستحيل عشان تسامحك

ـ تفتكروا سميحه هتوافق ترجع لحسين ؟؟

ـ ممكن نسرين توافق على منصور ولا هتحطم حلم ابوها اللى ماتعرفش عنه حاجه ؟؟

أمانى_سيد

فات_اوان_الندم

ملحوظه بارت بكره هيتاجل ليوم الجمعه عشان عندى معاد متابعه مع الدكتور

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم

البارت الاول من هنا