رواية وسيطرت المشاعر الفصل الرابع عشر والخامس عشر والسادس عشر بقلم الكاتبه زهرة الربيع حصريه وجديده على مدونة النجم المتوهج للروايات والمعلومات

اتسعت عنيه بشده وهو بيشوف الفيديو واخيرا فهم مراته هربت ليه وسابت له البيت بقى يعيدوا اكثر من مره ما كانش بيتفرج على الفيديو لانه فاكر اليوم ده وحافظ اللي حصل فيه ...بس كان بيشوف شكلها و الصدمه اللي في عيونها وهي واقفه حاطه ايدها على بقها و بتهز راسها بالرفض لكل اللي بتسمعه

رجع بافكاره لليوم ده وللموقف اللي حصل في مكتبه وبقى يفتكر كل كلمه اتقالت

كان قاعد بضيق شديد وهو بيسمع لحازم اللي كان متعصب بشده وبيقول...... هو انت بجد فاكر اني هعدي اللي سمعته ده .....يعني تضحك عليا وتستغفلني ومتوقع مني اعديها زي كل مره

سليم اتنهد وقال ...انا لحد دلوقت مقدرتش افهم ايه اللي مضايقك....ولا انا ضحكت عليك في ايه

حازم قال بعصبيه .....ضحكت عليا في ايه.....قول ايه اللي ما ضحكتش عليا فيه ....انت مش لسه من اسبوع واحد جيت لي البيت بنفسك وساومتني وقلت لي انك هتطلق مراتك وتتجوز بنتي وفي المقابل هرجع لك كل الاسهم بتاعة الشركه واتنازل عن الاداره

سليم قال ببرود ...حصل.... وانا لسه عند كلامي

حازم قال بدهشه....نعم... عند كلامك ازاي .....انت فاكرني نايم على وداني..... انا عرفت ان لك لسه اول امبارح راجع من عند الدكتور ومراتك حامل كمان ....قول ما حصلش

سليم ضحك وقال...... ده انت متابعني اول باول بقى.... على العموم هاكدب ليه ....حصل...بس ايه دخل ده بقى بموضوعنا

حازم قال بغيظ...انت عايز تجنني ...ملوش دخل ازاي.... طالما مراتك حامل هتطلقها ازاي ولا انت بتنيمني

سليم اتنهد وقال ....شوف يا حازم بيه ...انا هتكلم معاك بكل صراحه و متاكد انك هتفهمني كويس.... انا شاب في اول عمري واكيد في حاجات بتعجبني وبتلفت نظري ومشاعر حاجه من الحاجات دي... بنت جميله ونغشه وعنيده عجبتني واستفزتني ومقبلتش ترافقني زي غيرها فما كانش قدامي سكه ليها غير الجواز عشان تبقى تحت ايدي واطولها ...وطبعا ده مش هيأثر على حياتي في حاجه ...في الاول وفي الاخر دي مجرد خدامه عندنا وبنت السواق بتاعنا يعني لا تليق بيا ولا تليق بمقامي ولا ينفع اقدمها للمجتمع اللي انا عايش فيه...و كنت ناوي اخد معاها فتره انبسط كده و اشوف واحده من مستوايا .... بس للاسف كلفتتني وطلعت حامل من اول تلت شهور انا ذنبي ايه في اللي حصل ده

حازم قال بغضب.... وانا.... انا ذنبي ايه بنتي تتجوز واحد متجوز ومراته حامل

سليم قال بسرعه ...بس انا وغاده مش هنتجوز دلوقتي ....مش انت بنفسك قلت لما تخلص جامعتها ..وهيه لسه فاضلها سنه ونص حتى تخلص تكون مشاعر ولدت من زمان..وانا وكل اللي عايزه منها ابني ...لاني اكيد مش هسيب ابني لحد ...خصوصا لما تكون واحده زي مشاعر هتربيه في الفقر.....فهمتني كده ...يعني انا اللي ناوي عليه اخذ الطفل واديها القرشين اللي يلزموها وتشوف حالها واشوف حالي وبعد كده الخيار يبقى في ايد غاده لو حبت تربي الطفل معايا اهلا وسهلا ....لو لا مش حابه انا هجيب له داده المهم ابني يبقى قدام عيني

حازم هدي شويه وقال..... انت قصدك ايه.... هتحرم مراتك من ابنها ...هتاخدوا منها

سليم قال بسرعه وتاكيد .....طبعا هاخده منها ....ده ابني... ابن سليم النمس ولازم يتربى في المستوى اللي انا عايش فيه.... وهي عمرها ما هتشوفه تاني

وكمل بتهديد وقال ...انا عارف كويس ازاي اخليها تنساه وكانها ما جابتهوش ده لو عايزه تكمل حياتها وتعيش بهدوء

حازم ضحك بشر وقال...... وانت هتقول لها الكلام ده

سليم ابتسم وقال... ليه هو انا عبيط عشان اقول لها الكلام ده ....طبعا لا ...او عرفت بالكلام ده دلوقتي قبل ما الولد يبقى في ايدي مش هعرف اسيطر عليها ولا اخده منها... هي دلوقتي عايشه في ميه البطيخ وفاكره اني بحبها وبموت فيها ..وللامانه والصراحه هي تتحب بس كعشيقه مش اكتر من كده

بقلم ....زهرة الربيع

حازم قال .... طب ولو عرفت بخطتك دي قبل ما تولد هتعمل ايه

سليم قال...انا عامل حسابي لكل حاجه ...ولو عرفت هتيجي تواجهني فورا ووقتها هتبقى اختصرت عليا الطريق هاجهز لها اوضه واحبسها فيها لحد ما تولد واخد الولد .....في جميع الاحوال كل اللي عايزه منها هو ابني وبس ...متقلقش انا حاسبها كويس اللي زي مشاعر دي متقدرش تواجهني ولا تقف قصادي في محاكم ولا تطلب طلاق حتى...افرمها وهيه عارفه كده كويس

حازم وقف وقفل بدلته وقال..... انت كده وضحت لي الامور....وعلى فكره غاده لسه ما تعرفش باتفاقنا ولا تعرف انك هتتجوزها.... بس انا متاكد ان الخبر ده اكتر خبر في الدنيا ممكن يفرحها انت عارف هي بتحبك قد ايه...كده على اتفاقنا اول ما مراتك تولد وترمي عليها يمين الطلاق هترجع لك شركتك وهنحدد الفرح

سليم سلم عليه وقال.... وانا مستني اليوم ده بفارغ الصبر

سليم كان تايه في شروده بيفتكر كل كلمه قالها وعقله مش قادر يستوعب ولا يتخيل ابدا انها سمعت كل الكلام القذر ده

فاق من شروده على صوت غاده بتقول .....سليم ايه كل ده .....مش قلت لك اني عايزه اتكلم معاكم

سليم بلع ريقه بالعافيه والدموع بتلمع في عيونه وقال .....مشاعر.... مشاعر فين

غاده قالت بضيق .......جوه هتكون فين ...على فكره عماله تستعجلني علشان عايزه تطلع تنيم ابنها لو سمحت تيجي خلينا نتكلم ونخلص

سليم حط التليفون في جيبه ودخل معاها وهو حاسس انه اول مره هيشوف مشاعر بعد فتره طويله ... حاسس بكسوف شديد كل ما يفتكر اللي سمعته منه....وحاسس بتوتر لان كلامه كان مقنع ومخيف وبيديها الف عذر لانها مواجهتهوش ...دماغه كانت هتنفجر من التفكير والضياع و خايف من اللحظه اللي هتيجي عيونه على عيونها

غاده قالت بسرعه..... اهو سليم جه وهنتكلم اخيرا

سليم بص لمشاعر باسف ووجع نظرات مش مفهومه وتعب واضح

مشاعر بصتلو باستغراب من نظراته ليها ..والاغرب انو اتقدم وقعد جنبها على الكنبه اللي هي قاعده عليها وهيه كانت متوقعه يقعد جنب غاده

غاده اتضايقت بس حاولت ما تبينش وقالت.... كده اقدر اتكلم

مشاعر قالت بخنقه ...يا ريت ...ياريت نخلص

غاده قالت بضيق.... على فكره انا كمان ورايا الف حاجه مش انت لوحدك اللي مشغوله يعني

مشاعر قالت بسرعه..... بس انا مش معطلاكي تقدري تروحي للالف حاجه بتوعك...انا مش هاممني اي حاجه من اللي هتقوليها ولا عندي فضول اعرفها ....بس انت اللي معطلاني

غاده نفخت بخنقه وقالت.... يا رب صبرني بس

سليم قال بسرعه.... في ايه يا غاده..... انا قلت لك قبل كده ما تدخليش مشاعر في اي حوار بيني وبينك.... انا شايف ان ما فيش اي حاجه تتقال

مشاعر قالت بسرعه..... صح ده كلام ناس عاقلين انا فعلا ما ليش دخل بينكم ......قال يا داخل بين البصله وقشرتها ماينوبك الا ريحتها

سليم بصلها بدهشه و غاده قالت بذهول..... بصله ....انا بصله

مشاعر لسه هترد ادهم قال بسرعه وضيق ...انتي مكبره الموضوع ليه يا غاده.... انت ممكن تكوني قشرتها وسليم البصله عادي

سليم و غاده بصوله بغيظ وهدى قالت بسرعه..... ادهم ملناش دعوه احنا

ادهم سكت وفضل قاعد بضيق ومستني الجلسه دي تخلص بفارغ الصبر لانه حابب يتكلم مع سليم ويراضيه

سليم كمان كان عايز يخلص لانه ضروري يتكلم مع مشاعل قال بسرعه..... غاده لو سمحت ....سيبك من الكلام ده كله وقولي انت عايزه ايه

غاده لسه هتتكلم ادهم جاله تليفون وكان من لبنى قال بذهول.... يا خبر ده انا نسيت خالص..... ازاي عملت كده

هدى قالت باستغراب .....خير يا ادهم في حاجه ولا ايه

ادهم قال بتوتر...ده ..ده معاد مهم تبع الشغل ونسيته خالص

هدى لسه هترد سبقها سليم و قال بجمود.....روح ميعاعدك وتعالى بسرعه عشان عايزك في موضوع مهم

الكل اتفاجئوا ان سليم كلمه بعد اللي حصل وادهم قال باستغراب...عايزني انا....انا ممكن اجل المعاد يعني او ...

سليم قال ....لا روح ....كده كده احنا لسه شكلنا مطولين

ادهم هز راسو بالموافقه ومشي بس مشاعر راحت وراه بسرعه وقفته وقالت...ادهم

ادهم بصلها باستغراب وقال..خير يا مشاعر

مشاعر قالت بحرج شديد...انا اسفه جدا جدا اني ورطتك كده مع اخوك وبوظت علاقتكم...صدقني مكانش قصدي ..كنت لوحدي ومش معايا فلوس وكان لازم اروح المستشفى ....معرفتش اعمل ايه ..لو كان على نفسي كنت استحملت لو هموت ...لكن خفت على ابني اللي في بطني ..وفكرت اكلم خالد بس انت عارف ظروفه الماديه مكانش هيقدر و

ادهم قاطعها وقال بسرعه..انتي بتقولي ايه...عيب عليكي الكلام ده ...انا ايه وخالد ايه اصلا ...انا مبسوط انك كلمتيني واسف لو اتصرفت غلط معاكي او مع سليم...كان بحسن نيه والله

مشاعر ابتسمت وقالت...انا حاسه بالذنب لاني السبب في زعله منك

ادهم ابتسم وقال....سليم عمره ما يزعل مني ....متقلقيش انا هراضيه متشليش اي هم ..واوعي اسمع منك الكلام ده تاني ..في اي وقت تحتاجي حد جمبك كلميني من غير اي تردد

مشاعر ابتسمت بامتنان ولسه هتشكره غاده قالت بضيق....مشاعر هانم ..هو انا هفضل هنا لبكره

مشاعر اتنهدت بخنقه وقالت...شكرا يا ادهم...يلا روح مشوارك وانا هروح اشوف البصله...قصدي هشوفها عايزه ايه

ادهم ضحك ومشي ومشاعر رجعت قعدت معاهم

غاده بدات فورا وقالت....انا عايزه اقول حاجه تشهدو كلكم عليها

والتفتت لمشاعر وقالت....شوفي يا مشاعر انا ما عنديش اي عداوه معاكي.... انا لما عرفت ان سليم طلبني للجواز كنتي انت سيبتي البيت ....وهو نفسه قال لي انه بعد اللي عملتيه مش هيرجع لك..... يعني انا ما عنديش اي مشكله معاكي ولا عايزه ازعلك ولا ازعل اي حد مني..... انا مش زي ما انت شايفاني ابدا و الموقف اللي عملتيه معايا لما جيت اشوف الاوضه ضايقني جدا لان انا ما ليش ذنب في اللي حصل بينكم.... ودلوقتي انا مراعيه الطفل اللي على ايدك ده علشان كده جيت اتكلم معاكي قبل ما اتكلم مع سليم..... لو انت عندك نيه ترجعي لسليم ومش حابه انه هيبقى عنده زوجه تانيه قولي لي دلوقت و انا هنسحب فورا .....انا كنت قادره اقول الكلام ده لسليم بس انا مش عايزه اسمع منه هو.... مش عايزاه يكدب عليا انا عايز اسمع منك انتي

مشاعر ابتسمت بسخريه وقالت.... عايزه تسمعي.... طيب اسمعي.... اي واحده داخله بين راجل ومراته لسه منفصلوش تبقى بترخص نفسها ....ليه بقى بترخص نفسها لان في ازواج بتوصل لحد الماذون علشان تطلق وبيرجعوا لبعض تاني ده اولا .....ثانيا بقى مفيش حاجه اسمها تسالي واحده اذا كانت مش حابه ان جوزها يبقى عنده زوجه تانيه لان انت نفسك اكيد مش حابه ان سليم يكون عنده زوجه تانيه ....الجواز مرتين او ثلاثه ده شيء ربنا حلله واي حاجه ربنا حللها ما اقدرش اتكلم فيها ...بس ربنا قال ان خفتم الا تعدلوا فواحده...... وحبيبك ده ما يعرفش عن العدل اي حاجه

بقلم...زهرة الربيع

سليم بص لها بدهشه وهي كملت كلامها لغاده عادي جدا وقالت..... انتي بنت ما شاء الله جميله ومثقفه ولسه صغيره جدا والصراحه انا مش شايفه اي داعي يخليكي تعملي في نفسك كده..... الحب اللي يذل صاحبه ما يبقاش حب يبقى اهانه.... يعني انتي كنتي ممكن تستني عادي جدا لحد ما يتم الطلاق وتبقي بعد كده تشوفي حياتك معاه ...تالت حاجه بقى بالنسبه انك بتساليني انا هكمل معاه او لا وانا لسه حباه او لا احب اطمنك انا ما بقاش عندي اي نيه افضل معاه .... انا موجوده هنا غصب عني ولو انا زيك عندي اب واقف في ضهري وفلوس وقوه كنت بهدلته في المحاكم وقدرت اخد ابني من عينيه ومكنتش استحملت اقعد في الذل والقرف ده... لكن انا هربت قبل كده من البيت لاني لو قررت ارفع عليه قضيه مش هطول اي حاجه....طبعا لان هو سليم النمس انما انا طلعت ولا نزلت بنت السواق .....انما انتي تقدري تعملي كتير بس الظاهر انك بتحبي الاهانه

سليم لمعت عيونه بالدموع لما قالت كده وحس بضعفها اللي هو سببه

ومشاعر وقفت ولسه هتمشي غاده شدتها من ايدها وقالت بغضب....... انا لسه بتكلم معاكي على فكره ....انا احترمتك وجيت اتكلم معاكي وانت لتاني مره تهينيني وتقللي مني

مشاعر دفعت ايدها وقالت بغضب ......ايدك يا ماما لتروحي من غيرها ......انا اللي عندي قلته ومش حابه اقول ذياده ولا اسمع ذياده..عن اذنكم هنيم ابني

غاده حسيت ان كل اللي قالته معاها حق فيه وحست باهانه شديده وده زود غضبها بشده وقالت بانفعال..... معاكي حق مفيش داعي للكلام ....ومن الاول اصلا ما كانش في داعي انا الغلطانه اللي نزلت بمستوايا واتنازلت وجيت اتكلم مع واحده زيك راحت ولا جات من الخدم

هنا سليم وقف وقال بغضب...... غاده

غاده اتفزعت من صوته ولسه هتتكلم مشاعر رجعت وقفت قدامها وفاجأت الكل لما ضربتها قلم قوي جدا وقالت بغضب شديد..... مش انا قلت لك بتحبي الاهانه ....علشان كده مش عايزه تمشي من غير ما تتهاني

غاده بصت لسليم وقالت بذهول وهي حاطه ايدها على خدها ....شفت مراتك عملت ايه ......انت هتفضل ساكت

سليم اتصدم باللي عملته مشاعر و كان في موقف لا يحسد عليه ابدا بس اتنهد وقال.... ما كانش ينفع تقولي اللي قلتيه

الاثنين اتصدموا لان مشاعر اتوقعت انه هيبهدلها لانها عملت كده وغاده بصت له بذهول وقالت ......هو ده اللي طلع معاك ....عارف مراتك معاها حق..... انت ما تستاهلش اكون مراتك

قالت كده واخذت شطها وطلعت جري

والكل استغرب موقف سليم واستغربوا اكثر انه ما راحش وراها يراضيها زي كل مره

مشاعر بصت له شويه باستغراب واخدت ابنها وطلعت على اوضتها

سليم اتنهد بتعب وتوتر من كل اللي حصل ولسه هيطلع ورا مشاعر نادر وقفه بسرعه وقال....... سليم انا عايزك

سليم قال بخنقه من غير ما يبص له..... وقت تاني

و لسه هيطلع على السلم ابوه قال بسرعه ودموع.... ادهم حكى لي انت زعلان مني ليه

سليم اتسعت عينيه بذهول و التفت له بسرعه وصدمه وووووو

حسره عليك يا ادهم يا غالي كل شويه حد يورطك في بلوه🙆‍♀️

الخامس عشر

اخوك قال لي على كل حاجه.. عرفت انت ليه طول عمرك زعلان مني وبتكرهني ..وصعب عليا انك ساكت لحد دلوقتي ....انا ابوك يا سليم كنا ممكن نتكلم ونتفاهم احسن ما تفضل شايل مني العمر ده كله

سليم غمض عنيه بغضب شديد وهو بيلعن ادهم في سره لانه مكانش قادر يتكلم نهائي

حاول يسيطر على اعصابه وقال بجمود...انا شايف ان مفيش موضوع نتكلم فيه اصلا....احنا كويسين خالص كده....و كل واحد عارف مكانته عند التاني

ولسه هيمشي نادر قال بسرعه ودموع ...بس انت مش عارف مكانتك عندي ابدا يا سليم.. انا عمري ما حسيت ان انت وادهم توام.... بالعكس طول عمري بحس ان انت ابني الكبير اللي اتسند عليه في اي وقت....انا مش عارف ابرر لك اللي سمعته ازاي.... ولا كنت بتمني اواجهك في موضوع زي ده ....ولا كنت اتخيل انك تسمعه اصلا ......سليم يا حبيبي والله كانت غلطه في وقت ضعف وقلة حيله....لقيت الدكتور فجاه بيقول لي لازم واحد فيكو هي ...هيموت..... ما عرفتش بعمل ايه ولا بقول ايه

سليم قال بسرعه ووجع.... مقدر طبعا فاهم فاهم قلبك هو اللي اختار وقتها مش لسانك.... بس مش مشكله عادي...بس اللي كان شاغلني انو ليه يعني مش اكتر ....انما عمري ما اتمني

انك تكون اخترتني انا...لان بصراحه عمرك ما فرقت معايا

نادره اتملت عيونه بالدموع وقال...... طيب انا غلطت حقك عليا.... ممكن تسامحني يا سليم قبل ما اموت

سليم ابتسم بسخريه وقال بقسوه ....لا لا لا بلاش الطريقه دي...كلمة اموت دي مش هتجيب معايا ... استخدمها مع ادهم احسن هتاثر فيه... في النهايه انت صاحب فضل عليه .....يعني اخترت انو هو اللي يعيش وكانك الاه ...ونسيت انت والدكتور بتاعك ان الحياه والموت بايد ربنا وبس ...والدليل قدامك اهو ابنك اللي ما لوش اهميه اللي اخترت انه يموت بكل سهوله عايش قدامك

نادر لسه هيتكلم سليم قال بسرعه.... انا تعبان جدا ومش حابب اتناقش في اي حاجه .....هقول لك حاجه واحده تريحني وتريحك..... اعتبر ان امنيتك تمت واختيارك طلع في محله .....اعتبرني مت يومها .... نهارك سعيد يا نادر بيه

قال كده وطلع على السلم بسرعه مش عايزه يشوف دموعه اللي غرقت خده ..دموع طفل اتحبست جواه سنين وكل ما يتفتح الموضوع تنزل بغزاره

نادر قعد على الكنبه بحزن شديد والم وهدى كانت واقفه بعيد وبتبكي بحزن ومش قادره تتكلم

اول ما سليم مشي قعدت جنب نادر بسرعه و مسكه ايده وقالت بقلق عليه... اهدى..... ما تزعلش صدقني كده كويس قوي...على الاقل عرفت اللي مزعله وكلمته

نادر قال بحزن.... متاخر قوي.... قوي يا هدى....انا الللي قاهرني اني طول عمري غضبان منه وفاكر انه ولد قاسي وقليل الادب ....عمري ما اتخيلت اني انا الغلطان في حقه واستاهل منه اكتر من كده.... معاه حق..... كل الحق... يفرق ايه عن اخوه علشان اعمل كده..كان فين عقلي وقتها مش عارف.... بس انا والله ما قصدت ....انتي عارفه اننا جبناهم بالعافيه ما كنتش عايز اخسر اي حد فيهم....ولما..لما الدكتور قال ان لازم في واحد فيهم هيروح لقيت نفسي فجاه بقارنهم ببعض.... كان هيفضل معايا طفل واحد..... غصب عني كنت عايز الافضل ..كان ادهم متفوق ومن الاوائل بيصلي وبيصوم ولد مثالي بالنسبه لي عكس سليم كان لعبي ودايما جايب لنا المشاكل.... عارف ....عارف وفاهم انه ما كانش ينفع اختار ما فيش حاجه تبرر اللي عملته وانا بعد ما اخترت ادهم ندمت ....وقلبي كان بيتحرق وهما جوه العمليه ...وفضلت ادعيله ... لو كان مات يومها كنت حسيت اني قتلته بايدي..... والله يا هدى انا جريت على اوضته قبل اوضة ادهم وقلبي كان مقبوض عليه لحد ما فاق وكلمنا ....بس ايه الفايده ..خلاص ضيعتو... للاسف خسرته

عند ادهم راح على العنوان اللي بعتته له لبنى لقاها قاعده بتبص في الساعه بملل واول ما شافتو قالت بعتب...كل ده ياباش مهندس هيه الساعه عندك كام دقيقه

ادهم سلم عليها وقال بسرعه.... انا اسف جدا جدا جدا بجد يعني انا مش عارف اقول لك ايه ..حصلت مشاكل غصب عني والله

لبنى ضحكت وقالت..... حصل خير ولا يهمك...اتفضل

ادهم قعد ولبنى قالت.... ها بقى ايه سر اللقاء الجميل ده

ادهم ابتسم وقال ...رحمه

لبنى ضحكت وقالت ....كده على طول من غير مراوغه

ادهم ابتسم وقال...انا راجل دغري قوي وما بحبش اللف والدوران.... عشان كده طلبت اقابل حضرتك... مش هاخبي عليكي من اول ما قابلت رحمه و انا بفكر فيها ...قلبي ميال ليها بطريقه عجيبه مش عارف افسر سببها.... بس طبعا شفت بنفسك لقائنا الاول ما كانش احسن حاجه.... واللي حصل بعد كده كوارث...بس استوقفني موقف حضرتك لما كنا في القسم ما حاولتيش حتى تعرفي ايه اللي حصل و فورا اتنازلتي عن المحضر

لبنى اتنهدت وقالت ....علشان انا عارفه كل اللي حصل لانو مش جديد عليا....مش هخبي عليك يا باشمهندس زي ما انت جيت معايا دغري انا هاجي لك دغري ....رحمه مريضه و اللي عملته معاك ده مش اول مره تعمله ....هي متعوده كده اي شاب يكلمها بتبقى حاطه في دماغها نظرية المؤامره وان الشخص ده لازم عايز يؤذيها او يتحر،،،ش بيها ....هي بتبص للرجاله كلهم بنفس المنظور ده شيفاهم كلهم كده...وده بسبب صدمه حصلت معاها زمان

بقلم....زهرة الربيع

ادهم ابتسم بسعاده وقال.... كنت متاكد

لبنى بصتلو بدهشه وقالت.....دي حاجه كويسه

ادهم قال بسرعه ....لا ابدا.... اكيد مش كويسه طبعا بس كان عندي احساس ان كل ده غصب عنها وانها مش شخصيه عدوانيه زي ما بتبين....طيب ممكن ابقى فضولي زياده عن اللزوم و تحكي لي ظروف مرضها وسببه

لبنى اتنهدت وقالت...تمام .... طالما مهتم هحكي لك

في البيت سليم طلع بغضب وقبل ما يفتح باب اوضته بقى يحاول يهدى وهو بيفتكر كل اللي شافه في الفيديو وازاي هيواجهها بعد كل ده

فتح الباب ودخل بتوتر ومشاعر اول ما دخل شالت الولد بسرعه وحضنته وقالت بارتباك.... لو قربت مني ولا عملت حاجه هصوت واعمل لك فضيحه في البيت كلو.... انا ما كنتش عايزه امد ايدي عليها هي اللي غلطت الاول

سليم كان عايز يضحك على حركاتها هو نسي اصلا موضوع غاده واللي عملته معاها قرب منها بخبث وقال...... طب انا راضي ذمتك.... القمر اللي كانت تحت دي تنضرب.... يا بنتي دي نعمه يعني تتباس... وتتشال على الراس

مشاعر بصت له بغيظ وقالت...... بالنسبه لك ...انما بالنسبه لي زي الصرصار على الحيط لو قرفتني تاخد بالشبشب عادي

سليم ضحك بخفه وقال.... بلاش تغيري منها قوي كده... احنا لسه ما اتجوزناش ...امال لما نتجوز وتشوفيها في حضني هتعملي ايه

مشاعر قالت بضيق...... والله ما يهمنيش.... طالما قاعده في حضنك ومش قاعده على دماغي ...خلاص براحتها

سليم قرب منها قوي وبقى يبص لعيونها بعشق شديد واشتياق وكانه بقى له سنين ما شافهاش وقال بتوهان.....وحشتيني....وحشني جنانك قوي ..ووحشني بحر عيونك الغريق كنت هموت من العطش في صحرة فراقك

مشاعر رمشت بعيونها بذهول وسليم قرب اكتر وشال الولد من بين ايديها وهي واقفه بذهول شديد وحطه على السرير وقربها ليه ولمس شعرها بحنيه وقال.... اشتقت لشعرك قوي ...ولريحته اللي بتقتلني

وبقى يستنشق ريحة شعرها بارتياح

مشاعر بلعت ريقها بتوتر وقالت...س...سليم ..سليم في ايه ....هو انت تعبان ولا حاجه

سليم ابتسم وبص لعيونها وقال..... تعبان جدا بس اخيرا لقيت دوايا

مشاعر لسه هتتكلم شدها لي بقوه وقرب منها بلحظه مجنونه اتمناها بقى له كتير

مشاعر اتصدمت وبقت تحاول تبعده بس ما قدرتش

واول ما بعد عنها شويه بص لعيونها بابتسامه تسحر وقال بغمز .....عدنا للساحه.... واللي جاي ما فيهوش راحه

مشاعر اتسعت عيونها على اخرهم وضربتو قلم ضعيف بسرعه واتخضت اكتر لما ضربته وحطت ايديها على بقها بخوف منه

سليم بصلها بصدمه وقال...... يا حلاوتك

عند خالد كان بيشرف على الخدم في الفيلا باوامر من نادر لان ايديه مش هيقدر يشتغل بيهم وكان حرفيا الكل مش طايقه من تحكماته وتصرفاته كانه صاحب المكان

وهو بيتكلم مع الخدم جالو تليفون بعد بسرعه ورد وقال...ايوه يا حازم باشا

حازم رد بغضب رهيب وقال...انت وحبيبة القلب وجوزها كمان استنو حق القلم اللي الحلوه بتاعتك ضربته لبنتي...شكلها كده مش عارفه هيه لعبت مع مين الحيوانه الواطيه

خالد بلع ريقه وقال..اكيد..اكيد متعرفش واللي ما يعرفك يجهلك يا باشا...صدقني كان من غير قصد وانا هخلي مشاعر تعتذر لبنت حضرتك وتبوس ايدها كمان

حازم قال بغضب....هيحصل ...بس خليني الاول اعرفها مقامها ..واخلي جوزها الغالي يطردها من البيت بنفسه

خالد قال بتوتر ...انت..انت ناوي على ايه سعادتك

حازم قال بحقد..متقلقش اللي ناوي عليه انت هتحبه قوي...استعد علشان هتاخد حبيبتك وتغورو من البلد كلها ومش عايز المحكم هنا طول ما انا عايش ولا حتى بعد ما اموت

قال كده وقفل معاه وخالد بلع ريقه بتوتر وقال....ليه كده يامشاعر....استرها يارب

عند ادهم طلب عشا ليه وللبنى وكان بيسمعها باهتمام وهيه قالت بحزن شديد ... كانت مراهقه ما كملتش ال ١٥ سنه وكانت زي الورد متفوقه في دراستها وبتحب كل الناس عموما

وكان في استاذ عندها في اعدادي وبيديها دروس هيه ومجموعه اصحابها.... كانت على حسب سنها معجبه بيه جدا ...هو كمان ابدا اعجابه بيها واقنعها انه بيحبها وانت عارف البنات في سن المراهقه بيصدقوا اي حوار

كانت مبسوطه جدا وقتها وطايره من السعاده

وفي يوم اتصل عليها وقال لها ان المجموعه جايين علشان ياخدوا الدرس وما كانش ميعاده واتحجج بان معاه سفر تاني يوم وهيديهم الدرس في اليوم ده

طبعا رحمه فرحت جدا و راحت جري

لبنى اتملت عيونها بالدموع وحاولت تمسك كوبايه الميه واديها بترتعش

سليم ناولها الكوبايه وهو بيسمعها باهتمام وحزن على حالتها

شربت شويه وكملت وقالت بدموع.... لما راحت ما لقيتش حد من الطلاب هناك كانت هي لوحدها ...هو قال لها انهم شويه وجايين على الطريق بس الواطي ما كانش جايبها علشان درس ولا زفت....وبدأ يتهجم عليها

ادهم غمض عنيه بغضب وحزن

ولبنى قالت ...هيه اتخضت جدا منه.... الشخص اللي كان ملاك بالنسبه لها بقى شيطان فجاه وكل همه انه يتمكن منها...عافرت كتير واترعبت اكتر ومن صدمتها ضربته على دماغه و الحمد لله قدرت تهرب منه بعد معاناه قبل ما يأذيها

بقلم...زهرة الربيع

ادهم اخذ نفسه بارتياح وشرب هو كمان وقال باهتمام شديد ....وبعدين

لبنى قالت بدموع...اللي حصل بعدين كان اسوء من كده بكتير ...لانها جات متبهدله ومنهاره وحكت لنا انا وابوها كل اللي حصل...... وكانت عايزه ترفع عليه قضيه بس باباها كان مترشح للدايره وقتها وللاسف رفض يقف جنبها و قال لها انسي اللي حصل ومتجبيش سيره لحد

كانت صدمه اكبر بالنسبالها ان والدها اللي المفروض هو امانها يتخلى عنها كده ....جالها اكتئاب حاد ومبقتش تخرج خالص ....و انا لما لقيت حالتها بتسوء بقيت اتحايل عليه نرفع القضيه او يعمل اي حاجه علشانها.... بس هددني بالطلاق وقال لي مش هيخسر تعب السنين كلها علشان يرفع قضيه ويعمل شوشره على الفاضي.... لا وكمان مقبلش يخليها تسيب المدرسه واضطرت تشوف الاستاذ ده قدامها كل يوم ...وكل حركاته القذره اللي كان يعملها معاها بقى يعملها مع غيرها و يصطاد فريسه تانيه قدام عيونها وهي ما قدرتش تتكلم.... ومن يومها وهيه شايفه كل الرجاله انتهازيين كلهم يهمهم مصلحتهم بما فيهم ابوها ... كنت بحاول اطلعها من الدايره دي وانسيها كل اللي حصل بس حالتها بقت تسوء وبدات تخاف من كل حد حواليها حتى ابوها نفسه بقت تخاف منه... اتحايلت عليه تاني نوديها لدكتور بس رفض خاف يتقال بنته مجنونه.... ولحد ما توفى كانت حالتها تعبت خالص زي ما انت شايف كده..... بعد ما اتوفى حتى اللي قدرت اوديها عند دكتوره نفسيه تتعالج عندها

و نزلت دموعها بشده وقالت.... لو كان عندها ام اقوى مني كانت لحقتها من الاول حتى لو اتطلقت ...بس انا جبانه ما كنتش اعرف ان هيحصل فيها كده ....وبدفع ثمن جبني وخوفي لحد النهارده

ادهم اتنهد بحزن شديد وناولها منديل وقال.... ارجوكي اهدي ....انا اسف ما كانش قصدي افكرك

لبنى مسحت دموعها وحاولت تقوى وقالت...... انا عمري ما نسيت يا باشمهندس اللي حصل ما يتنسيش

ادهم قال بسرعه ....لا هيتنسي .....هيتنسي صدقيني في ناس كتير بتعيش مواقف صعبه وبتعديها وانا مش هسيبها لوحدها ابدا

لبنى بصت له بدهشه وقالت..... انت تقصد ايه

ادهم قال بسرعه.....اقصد اني معجب جدا برحمه ...واللي قولتيه مغيرش حاجه بالعكس ذود اعجابي بيها...و لو توافقي من بعد اذنك حابب اتواصل معاها يمكن يكون فيه فرصه بينا....انا مش حابب اتواصل معاها من ورا ضهرك عشان كده كنت حابب اقابلك ونتكلم واستاذنك يعني

لبنى ابتسمت وقالت.... انت انسان خلوق جدا ....ويسعدني طبعا...بس بما اني امها مش شايفه اي امل في اللي انت بتقوله

ادهم ابتسم وقال..... طول ما ربنا موجود الامل موجود ما تقلقيش عليها ابدا انا هحاول اخليها تثق فيا ... كمان كنت حابب اعترف لك بحاجه يعني...... انا كنت متجوز ومطلق

لبنى بلعت ريقها بتوتر وقالت.... كملت..... كده الموضوع بقى من المستحيل

ادهم قال بسرعه..... ليه بس ده انا طلقت بمنتهى الذوق وما عملتش اي مشاكل واديت طلقتي كل حقوقها

لبنى اتنهدت وقالت ...مش دي الفكره...بس انا لسه بقول لك مشكلتها مع الرجاله انهم انتهازيين وبيخدعوا البنات واي راجل مطلق حطاه في الخانه دي....ان الست اللي كانت معاها دي ملاك بس ما قدرتش تستحمله

ادهم قال .....ياه للدرجه دي

لبنى ضحكت وقالت..... واكثر...... دي حتى عمرها ماكان عندها صحاب بس لما بقت تروح تتعالج عند الدكتوره النفسيه قابلت واحده مطلقه كانت جالها صدمه بعد طلاق.....وبقم صحاب جدا زي الاخوات عارف ليه....لانها مطلقه وبتشكيلها من جوزها ومظلومه .....اي واحده مطلقه تبقى مظلومه ده قانون كده

ادهم ضحك بخفه وقال....طب انتي الافضل تخليها تعرف نماذج احسن..يعني ناس متجوزين وسعداء مثلا

لبنى ابتسمت وقالت...مش هتهتم لانها مش بتصدق ... بس عارف انا موضوع صاحبتها المطلقه زعجني في الاول وخفت انها تزود عقدتها لكن بعدين حمدت ربنا 1000 مره لان البنت دي ساعدتني جدا ووقفت معانا كتير وبقت اقرب لها مني.... تعرف جات لي فكره انت ممكن تقرب لها عن طريق البنت دي ...هيه صاحبتها قوي بقى لهم تلت سنين زي الاخوات

ادهم ابتسم وقال..... والله فكره معاكي رقمها طيب

لبنى قالت بابتسامه ......اه طبعا..... ده انا كنت....

بس قطعت كلامها واتسعت عينيها بذهول شديد وقالت.... رحمه

ادهم التفت وراه وكانت رحمه واقفه بدموع وصدمه وقالت...... انا مش هصدقه بجد ....هو انا تقيله قوي على قلبك لدرجه ان اول واحد يقابلك تحكي له عني وعن اسراري وعن كل مشاكلي... معقوله انتي كمان مش قادره تستحمليني ياماما

لبنى حطت ايدها على بقها بذهول وهيه مش مصدقه انها سمعتهم ووووووو

السادس عشر

انا مش مصدقه ان امي قاعده تحكي عن اسرار مرضي لحد غريب بكل بساطه معقوله للدرجه دي بقيت عبء عليكي

لبنى قالت بسرعه .....رحمه حبيبتي انا هفهمك ..ارجوك اسمعيني يا حبيبتي انا...

رحمه قالت بزعيق ودموع.... اسمع ايه ....مين ده...ها... انتي تعرفيه من امتى علشان تحكي له حاجات زي دي عني.... انا مش مصدقه ...مش مصدقه ابدا

قالت كده ولسه هتمشي بس ادهم مسك ايدها بسرعه وقال ....رحمه لو سمحتي افهمي الاول

رحمه دفعت ايده وقالت بغضب شديد...انت بتعمل ايه.... ازاي تمسك ايدي كده ....انت صدقت نفسك ولا اي..اصلا ازاي تلمسني يا حيوان انت.. ده انا ه.....

بس قطعت كلامها بدهشه لما ادهم حط قطعه كبيره من الاكل اللي قدامهم في بقها وقال...بس بقى ...خلصي اللي في بقك حتى تتكلمي

رحمه حطت ايدها على بقها بذهول وبقت تحاول تبلع بس كانت قطعه كبيره و بقها مش مستوعبها بسهوله بصت لادهم بذهول و لسه بتحاول تتكلم سكتها وقال بسرعه.... عيب...قلنا ايه ..نخلص اللي في بقنا الاول ..اتعلمي الاتكيت انتي كبرتي

رحمه بصتلو بدهشه ولبنى كانت واقفه متوتره

بس ادهم بص لها وقال .....مدام لبنى ممكن تسيبينا لوحدنا.... ما تقلقيش هجيبها لحد البيت

لبنى هزت راسها بالموافقه ومشيت

ورحمه مسكت كوبايه الميه شربتها وهي حاسه انها هتختنق من الاكل وقالت بغضب..... ايه اللي عملته ده ....كنت هتموتني انت مجنون

ادهم ابتسم و قال .....ممكن تقعدي عشان نتكلم

رحمه بصت له بنفاذ صبر وقالت....لا انت لازم تتعالج... بجد شوف لك دكتور

ولسه هتمشي ادهم قال بسرعه ....انا جايز اكون مجنون ....بس على الاقل مش جبان زيك

رحمه بصتلو باستغراب وقالت.... نعم

ادهم قرب منها وقال ....زي ما سمعتي انتي جبانه وخوافه كمان

رحمه ضحكت وقالت باستهزاء ....ياسلام...وهخاف من ايه بقى ... يمكن منك

ادهم قال بثقه ...لا خايفه على روحك....خايفه تقعدي نتكلم اقنعك باللي هقوله ....خايفه اغير كل معتقداتك و تخسري كل افكارك..... من اول مره اتقابلنا فيها وانا بشوف الخوف في عيونك

وحط ايديه في جيوبه وكمل بثقه شديده وقال ....وعاذرك الصراحه لان مهما كانت شخصيتك قويه... عمرها ما هتكون صعبه عليا

رحمه بصت له بذهول وضحكت بسخريه شديده وراحت قعدت علي الكرسي وقالت...اتفضل اقنعني..... بس بسرعه لاحسن ركبي بتخبط في بعضها من الخوف.... وخايفه اعمل بيبي هنا يبقى شكلي وحش

ادهم كان عايز يضحك على سخريتها وفرح جدا ان خطته الاولى في استفزازها نجحت ...راح قعد على الكرسي قصادها وهو حرفيا مش عارف هيتكلم معاها في ايه ...بس ما كانش عايز يخليها تمشي زعلانه تحت اي ظرف

في البيت عند سليم اتفاجئ باللي عملته مشاعر وقال بدهشه... ايه ده يا حلوه

مشاعر قالت بتوتر شديد ...انا..احم انا ما قصدتش ...بس انت تستاهل

سليم حاول يكبت غيظوا وقال ....وايه اللي عملته علشان استاهل كده بقى ..هو انتي مش مراتي وده حقي

مشاعر قالت بسرعه .....هو ايه اللي حقك... انت مالك النهارده مش مظبوط ليه...... اسمع يا سليم انا وانت هنتطلق وحقك ده ابقى نفذه مع مراتك الجديده...و خليك بعيد عني سامع

سليم مسك ايدها وقال والحب واضح في عيونه.... انتي مراتي القديمه والجديده ...الاولى والاخيره و اللي بحسه معاكي عمري ما هحسه مع اي واحده تانيه

بقلم....زهرة الربيع

مشاعر حطت ايدها على دماغه وقالت باستغراب.... انت سخن النهارده ولا حكايتك ايه

سليم قال بوقاحه... سخن قوي ....تحبي نسخن دلوقت

ولسه هيقرب بعدت بسرعه وقالت.....قولتلك خليك بعيد عني ....بلاش استهبال .. انا داخله اخد شاور....وانت خلي بالك مع ابنك ساعده يمسك الببرون اهو نستفيد منك بحاجه

ولسه هتمشي مسك ايدها وقال ...طيب ما اساعدك انت وامسك لك الدش ....وهو حبيب بابا هيمسك الببرون لوحده ...ده عاقل جدا... وبيقدر

مشاعر دفعت ايده وقالت..... لا مستحيل تكون طبيعي النهارده ..روح شوفلك دكتور يمكن تعقل شويه

قالت كده ودخلت على الحمام وهو قال بصوت عالي ...ما انا بحاول اعقل... بس مش قادر يا ام نادر

مشاعر قفلت باب الحمام وابتسمت على جنانه ... بقاله كتير قوي ما تصرفش معاها بالطريقه دي... نفس تصرفاته زمان قبل ما تحصل معاهم كل المشاكل دي

بس اختفت ابتسامتها فجاه والتوتر بان على ملامحها وهيه بتقول في نفسها .....معقوله يكون عرف انا هربت ليه....طب لو عرف ما واجهنيش ليه ...معقوله يكون ناوي يطلقني وياخد مني الولد زي ما قال له....لا لا مستحيل..مهو يقدر يعمل كده من اول ما لقاني ....بس انا عارفه سليم عمره ما كان هيتخلص مني الا لما يعرف انا سبتو ليه عشان يرد كرامته...و يمكن بعد كده ياخد الولد ويحرمني منه ويتجوزها عشان شركته.... انا مش عارفه بيخطط لايه دلوقتي يا ترى ناوي على ايه ... انا كمان مش عارفه اهرب تاني من هنا بس لازم اتصرف..... لازم اخد ابني ونبعد و اضمن المرادي انه مش هيلاقيني

في الكافيه عند رحمه ادهم قال .... تحبي تشربي ايه

قالت بضيق شديد ....مش عايزه اشرب حاجه.... اتفضل ارغي قول اللي معاك وخلصني خليني امشي... علشان دي هتبقى اخر مره تشوفني فيها.... ومش عايزه اشوفك حواليا ولا اقابلك حتى لو بالصدفه وطبعا مش محتاجه اقولك ملكش دعوه بماما تاني ....يلا اتفضل سمعاك

ادهم اخد نفس عميق وقال....تمام.... مدام بقى دي هتبقى اخر مره نتقابل فيها فمضطر اقول كل اللي معايا ولو اني كنت حابب نمشي شويه شويه...بس اللي تحبيه....انا ادهم النمس 31 سنه مهندس معماري من الناحيه المهنيه ناجح جدا الحمد لله ...بس من الناحيه الاجتماعيه مش قوي اتجوزت قبل كده وطلقت من تلت سنين بس برده الحمد لله....المهم اني من يوم ما قابلتك وانا معجب بيكي جدا مش بتفرقي خيالي ابدا واتمنى جدا لو تديني فرصه و

بس قاطعته وقالت .... نعم.... استنى استنى فرصة ايه وهباب ايه.... انت مطلق بجد... ولا دي نكته.... يعني لعبت لك بواحده قبل كده وجاي تلعب بيا انا كمان

ادهم قال بسرعه..... لا انا ما قلتش لعبت بيها ولا هلعب بيكي انا قلت مطلق بس ...مطلق عادي زي ناس كتير بتطلق

وبص حواليه في الكافيه وقال بصوت عالي .....شباب حد مطلق هنا

اربع شباب من المكان رفعوا ايديهم وهو رفع ايده معاهم وقال ......زي كل دول ..انا مش اول واحد يطلق يعني

رحمه قالت بغضب..... كلكم اوساخ

ادهم اتنهد وقال.....طيب يا ستي الله يكرمك مش مشكله بقى نستحمى ونستخدم برفن كتير الدنيا هتتظبط ان شاء الله

رحمه قالت بغيظ..... بلاش برود

ادهم قال بسرعه..... ودي كمان مقدور عليها ....هجيب لك دفايه..ها قلت ايه

رحمه قالت بغيظ شديد .....هنقضيها استظراف بقى وكده

ادهم قال بجديه...ما انتي اللي بتستظرفي من الاول اهو.... هو ايه اللي كلكم كلكم دي.... ما كل اللي مطلقين دول مطلقين ستات ....معناها اجي انا علشان طلقت واحده اقول على كل الستات وحشين.... طبعا غلط يا ماما فيه ناس كويسه وناس وحشه....و في ناس بتحاول تبقى كويسه و كلنا عندنا عيوب وكلنا بشر حتى انتي

رحمه قالت بضيق .....ما يهمنيش كل اللي قولتو....مقتنعتش ومش موافقه ...ممكن بقى ما اشوفش وشك تاني

ادهم قال بسرعه ....ممكن جدا ....بس بعد ما تقابلي والدتي لانها هتموت وتشوفك ....وانا مش هقدر اعتذر لها دي ست كبيره في السن

رحمه قالت بذهول.... والدتك.... وانا اعرف والدتك من فين عشان تحب تشوفني...انت بتقول ايه

ادهم قال بابتسامه.... ما انا حكيت لها عنك .....وبعدين ما انا قابلت والدتك اهو وما اعرفهاش

رحمه قالت بغيظ..... يا رب صبرني

ادهم ابتسم ومسك ايدها

رحمه بصتلو بغضب ولسه هتسحب ايدها قال بسرعه...اهدي هكتبلك رقم الدكتور بتاعي...انا عندي السكر واكلت حلويات وممكن اقع منك هنا مش هتعرفي تتصرفي...افتحي ايدك

رحمه فتحت ايدها فورا بدهشه وهو طلع قلم و كتب لها عنوان بيتهم على كف ايدها وقال بابتسامه.... ده عنواننا فيلا نادر النمس اسف اني كدبت عليك ..انا معنديش السكر

وبصلها باعجاب وقال...بس الظاهر مش هسلم منو مهو مفيش احلى من كده

رحمه مبقتش عارفه تزعقله ولا تبتسم على كلامه كان مش بيديها اي فرصه للغضب

ادهم ابتسم وقال...طبعا تقدري تسالي قبل ما تيجي على اللي موجودين في البيت... يعني لا تفتكري اني قاعد لوحدي وجايبك اتحر،،،ش بيكي ولا حاجه احنا هناك اسره كبيره وقاعدين كلنا سوا

رحمه قالت ...ويا ترى كلهم مجانين زي حضرتك كده

ادهم ابتسم وقال ... لا انا مش هتلاقي زيي ....مش بس هناك ولا على الكره الارضيه كلها

رحمه ابتسمت بسخريه وقالت.... مغرور قوي

ادهم ابتسم باعجاب وقال .....ومن حقي ....كفايه انك قاعده معايا

رحمه حست بكسوف جميل محستش بيه بس حاولت ما تبتسمش على كلامه وقالت بسرعه.... عموما تعبت نفسك على الفاضي...لاني مش هاجي

ادهم ابتسم وقال ......بس انا هستناك .....مش انا بس كل اللي في البيت هيستنوكي.... ومتاكد مش هتكسفيني قدامهم

رحمه قالت بدهشه .....والله بجد مبهوره بثقتك

ومشيت بسرعه وهو مشي وراها وهو بيقول.... ممكن اديك دروس لو تحبي..... طب استني هوصلك..... استني يابت وعدت والدتك اني اوصلك

رحمه قالت وهي مكمله مشي..... بت اما تبتك

ادهم ضحك ومشي وراها وبعد معاناه قدر يقنعها توافق انه يوصلها بس بعربيتها

على الطريق كان ادهم كل شويه يبص لها وهو مبسوط جدا جدا

رحمه ارتبكت من نظراته وقالت ....ممكن تركز في طريقك

ادهم ابتسم وهو بيبص لها وقال.... انا كده مركز في طريقي

رحمه اتنهدت وقالت.... لو سمحت يا باشمهندس ركز في الطريق اللي قدامك بدل ما نلبس لنا في حد الدنيا ليل

ادهم بص قدامه وقال ...تمام هبص قدامي اهو ....قولي لي بقى هتيجي عندنا امتى

رحمه قالت بغيظ... هو انت مولود كده ....الغباء ده وراثي ولا اجتهاد شخصي... قلت لك مش هاجي..مش هاجي اغنيها

ادهم ابتسم وقال ....على العموم براحتك انا هفضل مستنيك ...وماما كمان هتفضل مستنياك لو حابه تزعلي ست قد والدتك براحتك

رحمه ضربت كفوفها على بعض وقالت بذهول....يا بني ادم انت عايز تشلني ....وهي والدتك هتستناني انا ليه ...ايه البلوه اللي اتبليت بيها دي ياربي

ادهم لسه هيرد جالها تليفون وردت وقالت..... ايوه يا ميرو انتي فين

وسمعتها شويه وقالت ....لا انا راجعه على البيت خلاص ...قربت اوصل

وسمعتها تاني وقالت.... طب يا بنتي انتي مستنيه بره ليه ما تدخلي تستنيني عند ماما

وسمعتها تاني وقالت... اه فهمتك طيب خلاص ....انا داخله على البيت اهو و هشوفك بره ...وقفلت معاها وبصت لادهم وقالت بزهق ....ممكن تسوق بسرعه بقى علشان صاحبتي مستنياني

ادم ابتسم وقال ....دي الحاجه الوحيده اللي ما اقدرش اوافقك فيها ....لان انا عايز الطريق دي ما تخلصش خالص

رحمه نفخت بضيق وبصت قدامها وسكتت

وادهم ابتسم على عصبيتها وشغل اغنيه عمرو دياب بابا وبقى يغني معاها

رمش خطاف ....وسحر اصناف

وانا قلبي يتخاف... عليه يا بابا

ورد يتشال ....ولونه قتال

شغلني وازال..... مافات يابابا

وكان بيدندن معاها بصوت جميل وهو بيبص لها من وقت للتاني

رحمه حاولت تشغل نفسها عنه وما تبصلوش رغم ان ملامحها باين عليها الرضا الكامل ومن جواها مبسوطه بحركات وجنانه

عند مشاعر خرجت من الحمام وبقت تنشف شعرها

سليم بقى يبص لها باعجاب وقرب منها قوي وقال...تحبي اساعدك

مشاعر رجعت لورا وقالت بارتباك .....اه تقدر تساعدني ......هتساعدني جدا لو تقولي فيك ايه... ايه سر الحنيه الزايده دي.... ما لسه امبارح كنت بتمسح بيا البلاط ولا نضف خلاص ما بقاش محتاج تمسحه

سليم ضحك وقال....لا وحياتك ضهري وجعني من كتر المسح الغضروف ليه ظروف

وضحك ببرود كالعاده

مشاعر قالت بضيق.... يا لهوي على خفه الدم معدتي قفشت من الضحك

سليم بقى يجيب هدوم ليه من الدولاب وقال.... عموما اتعودي على الحنيه جاي منها كتير

ولسه هيروح الحمام قالت بسرعه....وده ليه ان شاء الله

سليم ابتسم وقال.....ما انتي عارفه ان حبيبك مجنون وبحالات ولا انتي شايفه ان فيه سبب تاني

مشاعر بصتلو بتوتر وهزت راسها بالرفض وهو ابتسم ودخل على الحمام وسابها متوتره جدا

قعدت على السرير وقالت ....عرف...اكيد عرف.... طب لو عارف ما بيتكلمش ليه

قطع تفكيرها صوت الباب ردت وقال بضيق... مين

جالها صوت خالد بيقول .....ده انا يا مشاعر

مشاعر راحت فتحت فورا ببيجامتها الخفيفه بتاعه النوم وقالت بابتسامه .....نعم يا حبيبي

خالد بقى يتاملها باعجاب شديد وقال بتوهان...ايه الجمال ده... وحشاني يا مشاعر

بقلم...زهرة الربيع

مشاعر ابتسمت باستغراب وتوتر من الطريقه اللي بيقولها بيها وقالت .....وانت كمان اكيد بتوحشني يا خالد ...ايدك عامله ايه دلوقت

خالد فاق لنفسه وقال بسرعه.... ايدي..اه تمام ...لسه بتوجعني بس الحمد لله.... المهم ان انت بخير..... المجنون ده ما عملش معاكي مشكله بسببي صح

مشاعر ابتسمت وقالت..... ما تقلقش عليا.... انا بخير.... ان شاء الله هكون دايما بخير

خالد بص حواليه بتوتر وقال .....طيب يا مشاعر انا كلمت واحد اعرفه .....راجل واصل قوي وهيساعدك تطلعي من هنا وتطلقي من الحيوان جوزك ده .....بس كل اللي عليك الصبر اصبري وما تعمليش اي حركه مجنونه.... اوعي تفكري تمشي تاني انا ما صدقت رجعتي

مشاعر بصتلو باستغراب وقالت.... مين ده اللي هيساعدني

بس قبل ما يرد باب الحمام اتفتح وهو قال بسرعه ....بعدين بعدين هتكلم معاكي

ومشي قوام وهي قفلت الباب ودخلت

سليم قال باستغراب.... مين كان على الباب

مشاعر قالت بضيق..... ده خالد...واهو مشي من على الباب مدخلتهوش علشان متعملش حوار زي كل مره ...شاء الله تبقى مرتاح كده

ولسه هتروح ناحيه السرير سليم شدها من دراعها بعنف وقال بغضب يرعب ....فتحتيله بمنظرك ده

مشاعر اتسعت عينيها بذهول من شكله وقالت ....ايوه فتحتله يا سليم فيها ايه.... ما ده اخويا وياما شافني كده

سليم قال بغضب رهيب.....ياما شافك كده ...يلبسك ده وصدرك اللي فاتحها على البحري وعازم الجيران

مشاعر زعقت فيه وقالت بغضب من وقاحته ...وفيها ايه .....دي بيجامه ويا دوب زرار اللي مفتوح فيها هو انا واقفه بقميص نوم...و بعدين وافرض مفتوح افرض ده اخويا ....اعلقها لك في رقبتي علشان تحفظها هتجنني

هنا سليم خرج عن شعوره ومسكها من دراعاتها الاثنين وقال بغضب وعنف..... مش اخوكي... مش اخوكي... خالد مش اخوكي فهمتي كده

مشاعر اتسعت عينيها بصدمه ووووو

دماااار دماااار دماااار الللي جاي حوااار ياترى رحمه وادهم هيشوفو ميرا عند البيت ..وياترى ايه رد مشاعر عن اللي قالو سليم ...وايه رد خالد لما يعرف ان سليم قلها ...وطبعا مننساش حازم واللي ناوي عليه ...يلا يا زهراتي عايزه تفاعل جامد وصلو البارت ده ل 2000لايك زي ما متفقين علشان التنزيل يبقى يومي وباستمرار يلااااااا🏃‍♀️🏃‍♀️🏃‍♀️🏃‍♀️

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم

الفصل الاول من هنا

الفصل الثاني من هنا

الفصل الثالث من هنا

الفصل الرابع من هنا

الفصل الخامس من هنا

الفصل السادس من هنا

الفصل السابع من هنا

الفصل الثامن والتاسع من هنا

الفصل العاشر من هنا

الفصل الحادي عشر من هنا

الفصل الثاني عشر من هنا