رواية ولاد المعلم الحلقة 14/15/16/17/18 بقلم الكاتبه أماني السيد حصريه وجديده على مدونة النجم المتوهج للروايات والمعلومات

دهبيه : اتفضلى

علا : ايه دول

دهبيه : دى شويه حاجات اطفال عجبتنى اشرتها لحفدتى او حفيدى

علا : مكنتش عارفه تنادى عليها بايه شكرا

دهبيه : قوليلى ماما سواء كملتى مع بيجاد او لا قولى ماما

علا : حاضر يا ماما تسلم ايدك

دهبيه : بصى يا حبيبتى جاد حكالى كل حاجه ابنى عملها معاكى وانا بصراحه الوضع مكنش ابدا عجبنى كنت اتمنى انك تحكيلى بنفسك واسمع منك مش من جاد وايه اللى خلاكى تستمرى الفتره دى كلها ليه مارفضتيش الوضع ده من الاول مع ان كان فايدك ترفضى

علا : مرضتش اعرض سمعت بنت للقيل والقال او اخلى ان الناس تقول ان المعلم بيجاد مالوش كلمه وهرب من جوازه غير انى كنت عايزه اخلص من جبروت مرات ابويا وولادها فوافقت على اساس ان الوضع مؤقت ولما روحت مع بيجاد بيت المزرعه وعدنى انه مش هيلمسها وتلات اربع شهور ويطلقها قولتله ماشى وفعلا وافقت وسكت قالى بلاش ماما وبابا يعرفوا عشان شكلك قدامهم وانا هجبلهم اى طريقه احكيلهم بيها بعدين عشان يتقبلوكى ومايجبرونيش اطلقك وانا وافقت وفعلا فضلت حوالى ٦ شهور كده عايشين مكتوب كتابنا فقط وبعدها بدات الخلافات بينا وجاد قالى لو مديتنيش حقوقى الشرعيه هضطر اخدها من غيرك وان ملمستهاش عشانك

وانا زى الهبله صدقته المهم عدا حوالى اربع شهور كمان وعرفت ان أشرقت حامل ساعتها طلبت الطلاق وهو رفض يطلقنى روحت لبابا كان تعبان ومحجوز في المستشفى بيجاد وقتها وقف جمبى وانا كنت محتاجاه وبعدها بابا مات واخويا الصغير اللى كان مساندنى رجع من السفر يحضر العذا وقتها اخواتى طردونى من البيت وطردوه هو كمان واخدوا كل ورث بابا ليهم وهو كاتب الشقه باسم مراته والفلوس المهر بتاعى كانوا اخواتى داخلين بيها مشاريع معاه ومكنتش باسمه كانت باسمهم عشان يقدروا يتصرفوا

خفت وقتها اعرفه انى هطلق يسيب شغله ودراسته ويرجع ويضيع عليه السنه اللى فضلاله

ملقتش مكان اروحه ومكنش معايا فلوس عشان اعرف اتصرف اضطريت استنى معاه تانى كان وقتها بيحاول يعوضى بهدايا غاليه ودهب لان قبل كده مكنش بيجبلى حاجه وبقى يسبلى مصروف ووعدنى اول ما اشرقت تولد هيعرفنى عليكوا والولاده جابت سبوع والسبوع جاب الاربعين وفضلنا كده لحد ما قدرت احوش من مصروفى مبلغ محترم وكنت بحافظ على الهدايا بتاعته ورحت لجاد فضل يقولى استنى اخويا وانا عارفه لو مكنش بيحبك كان سابك هو متمسك باشرقت عشان ابنه وقالى انى اجى احكيلكم بنفسى وفعلا جيت وعرفتكم

زيدان: منكرش إن انا كنت عارف من زمان ان بيجاد متجوز اتنين وسكت يمكن لو قتها اتكلمت وماسكتش مكنش حد فيكم اتظلم انا عليا غلط كبير وعايزكم تسمحونى ومش عايزك تحقدى على اشرقت هى زيك مظلومه

علا : انا مش حاقدة عليها منكرش ان جه عليا وقت حقدت عليها بس صدقنى خلاص ماعنديش حقد عليها نهائى

دهبيه : حبيبتي العقله وانا وابوكى صدقيني مش هنسيب حقك وبيجاد هياخد عقابه عاجلا كمان متقلقيش

علا : مش فارقه معايا يتعاقب ولا لأ انا عايزه اطلق وكويس انكم عرفتوا الحقيقه بدرى

دهبيه : طيب عايزين نتابع مع دكتور حمل سوا انا اعرف دكتور ممتاز هوديكى ليه

علا : إن شاء الله

جاد : خلاص براءة انا يا علا هانم

علا بضحك : لما تساعدنى انى اطلق منه تبقى براءة خالص

جاد : انتى اختى واللى عايزاه هساعدك فيه ولو رجع مش هعرفه مكانك لحد ما انتى قولى تمام كده

علا : خلاص اتفقنا

مشيوا من عندها وهما زعلانين من الوضع اللى ابنهم حطهم فيه

End flash back

بعد فتره جاد وصل عند اهله

جاد : البيه فين

دهبيه : نايم جوه ادخل صحيه

جاد دخل لاخوه وصحاه : حمدالله على السلامه

بيجاد: الله يسلمك

جاد فين علا

جاد : وانا هعرف منين هو انا جوزها

بيجاد عايز تقنعنى انها مكلمتكش

جاد : كلمتنى عايزه ورقة الطلاق ومش هتظهر غير لما انت تطلقها وانا كنت عمال ادور عليك طول الفتره اللى فاتت عشان تطلقها عشان اعرف مكانها

بيجاد : وانت مالك ومالها ومحموق عليها ليه

جاد : لان مراتك من الزعل جالها القلب والحمل خطر عليها وممكن لاقدر الله يحصلها حاجه في اى وقت وقلبها مايستحملش ساعتها يا ترا هتلاقى حد يسعفها ولا لا

بيجاد بعصبيه : انت بتقول ايه

جاد : اللى سمعته الدكتوره اللى كانت متابعه معاها كلمتنى وقالتلى لانها عارفه انها تبعى لانها جالها قبل كده اشتباه فى جلطه ولحقناها

بيجاد : يعنى مراتى يحصلها كل ده وانا معرفش

جاد : اديك عرفت استفادت هى ايه هتصلح قلبها ولا هتعوضها ظلمك ده انت حتى اختفيت لما هى مشيت ومهنش عليك تدور عليها طلقها يا بيجاد طلقها وسبها هى بطلت تحبك

بيجاد : منكرش انى غلط بس كنت حابب اقعد مع نفسى اعرف انا عايز ايه ومين عشان مظلمش حد تانى

جاد : هما اتظلموا مش لسه هيتظلموا

عارف يا جاد انت انانى حتى معايا مفكرتش وانت بتتجوز اشرقت واهلها يعرفوا انها زوجه تانيه ان ده هيمنع جوازى من باسمه حتى لو انا وهى اترضينا واتصالحنا بس انت انانى حبيت مين فيهم يا بيجاد عايز تكمل مع مين مع اشرقت ام ابنك ولا علا ام ابنك برضو واللى ممكن تموت وهى بتولد

بيجاد : بعياط سبنى لوحدى

جاد : رد عليا مفكرتش فينا ليه دبستنى معاك ليه فى ظلم اتنين ليه وتقولى حبيتهم ازاى ازاى حبتهم

طيب انت حبيت وانت راميها في بيت المزرعه زى الكنبه واستغليت ظروفها ده حب امتلاك مش حب مشاعر

بيجاد : حبيتها حبيتها وكنت عامل كده عشان ماتهربش غصب عنى اهملتها عشان افضل محافظ على اشرقت وابنى عشان لو عرفت كانت هتطلب الطلاق زى ما عملت وطلقتها

جاد : يعنى بتحب علا طيب واشرقت زنبها ايه تعيش مخدوعه وحد مشاركها فيك

بيجاد : حبيتها برضو حبيتها مكنتش قادر ابعد عنها

جاد : طيب دلوقتي اشرقت خلاص طلقتها وعدتها قربت تخلص وعلا طالبه الطلاق هتطلقها ولا هتعمل ايه

بيجاد : لا مش هطلقها هحاول الاقيها واعوضها

واشرقت هحاول ارجعها

جاد : هتخليها ترضى بالامر الواقع

بيجاد : هحاول على الاقل ابقى حاولت

جاد : طيب شغلك المصانع بتكلمنى عايزه عجول والمزرعه مافيهاش عجول

بيجاد : ليه راحت فين

جاد : انت بتسالنى انا اخر طلبيه اخدها يونس ومن ساعتها مافيش عجول وكل العجول اللى ابوك اخدها مسجلها واللى يونس اخدها برضو متسجله

بيجاد : ازاى الكلام ده

جاد : معرفش بس المال السايب يعلم السرقه وانا مسكت الملفات ومفهمتش حاجه ابقى روح بقى شوف هتعمل ايه فى شغلك

بيجاد : يعنى ايه يعنى انا كده خسرت كل حاجه واتبقالى شويه ملاليم مايقوموش المزرعه تانى

جاد : مانت برضو الفتره اللى غبتها كبيره وفى مرتبات لازم تتدفع وخدمات لازم تتدفع

بيجاد : حط راسه بين ايديه وفضل يعيط ويقول يارب راح جاد سابه وخرج عشان مايضعفش

######——-

عند اشرقت وباسمه

اشرقت: مالك يا بوسبوس مكلضمه ليه

باسمه: جاد شالنى من دماغه وبطل يحبنى وواضح إن مافيش اى امل لرجوعنا

اشرقت: انا اخر مره كنت حاسه انه بيحاول يقربلك

باسمه: وانا كمان كنت فاكره كده لكن للأسف كنت غلطانه جاد كرهني اوى يا باسمه

اشرقت: طيب حصل ايه

باسمه حكتلها على كل حاجه

اشرقت: لا يا باسمه غلطانه جاد لسه بيحبك لو مكنش بيحبك مكنش هيفضل غضبان منك ويعاتبك اللى عمله ده عتاب

باسمه: طيب اعمل ايه

اشرقت : الموضوع محتاج معافره مش من اول مره هتياسى

باسمه: حتى لو رجعته تفتكرى اهلك هيوافقوا اصلا على ارتباطنا

اشرقت: انتى ليه بتسبقى الاحداث نرجعه الاول وبعدين نشوف موضوع اهلك ده ماشى

باسمه: طيب اعمل ايه

اشرقت: شوفى يا ستى من واقع معرفتى بجاد فهو عايز يحس انك شرياه

باسمه : اه اروح اصالحه وهو يرفض مره واتنين وابقى كده خلاص خسرته وخسرت كرامتى

اشرقت : اول حاجه بطلى الدبش ده تانى حاجة لا انا مقلتش كده اسمعى يا ستى

اشرقت : ……

ياترى اشرقت هتنصح باسمه بايه توقعاتكم

انا مستغربه الناس اللى واخده موقف من علا ليه بجد

هى مرضيتش بمزاجها ده كان واقع فرض عليها ومقدرتش تغيره ولما قدرت بعدت بجد ليه الهجوم عليها

رواية ولاد المعلم الحلقة الخامسة عشر

مازال الحديث مستمر بين اشرقت وباسمه

باسمه: عايزانى اعمل ايه يعنى انا مش هقل من نفسى اكتر من كده

اشرقت: بس انتي لازم تعرفيه انك عايزاه

باسمه: عايزانى اروح اقوله انا لسه بحبك

اشرقت: اه ومش بس كده وتقوليله انا ندمانه على. اللى عملته انا كنت صغيره وانت عندك حق المفروض كنت اواجهك بمخاوفى

باسمه: طيب لو صدنى

اشرقت: ندخل وقتها على الخطة التانيه

باسمه : طيب ايه رايك ابعتله رساله

اشرقت: لا وجها لوجه افضل

باسمه: انتى عايزانى اروحله من غير سبب لا استحاله

اشرقت: بصى عيد ميلاد سند هعمله في الشقه بتاعتى اللى عندهم كلميه هناك فاضل أسبوعين هانت

#####______

عند علا وام منعم

ام منعم : ها يا حبيبتي ناويتى على ايه

علا : صدقيني حاولت انى اتخيل حياتي معاه لكن للاسف مش قادره صعب انسى الظلم اللى شفته معاه صعب

ام منعم: يعنى خلاص كده قررتى

علا : اه خلاص كده انا هروحلهم بعد معاد كشف الدكتور واواجه بيجاد وهطلب الطلاق انا حاسه انى افضل وانا بعيد

ام منعم : زى ما تحبى يا بنتى

###########

عند بيجاد نزل المزرعه وكانت فاضيه وحس إن ده عقاب ربنا عشان اللى عمله وانه هيبدا من اول وجديد بس المره دى قرر يبدا بعيد عن حماه عشان مايكررش الغلط

وفعلا بدا يكلم مصانع جديدة وبدا يعرف الكميات المطلوبة وبقى ينزل بنفسه المحافظات عشان يجيب العجول بارخص سعر ومن جهه تانيه مكثف البحث عن علا وبيحاول دايما يوصل الود مع اشرقت وكان بيزورها من وقت للتانى بحجه سند وهى كانت بتعامله بلامبالاه

##########

عدى اسبوعين على تلك الأحداث بدون أشياء جديدة غير ان علا بدات تاخد كورسات لغه عن طريق النت عشان تقوى اللغه عندها لان من ضمن هوايتها هى تعلم اللهجات المختلفه وخاصه الصينيه والكورية لانها بتحب المسلسلات الكوريه والصينية

يوم عيد الميلاد كان مليان مفاجأت

@############

فى بيت زيدان ودهبيه

دهبيه : طمنيني يا حبيبتي عامله وجوزك معلش انشغلت عنك الفترة اللى فاتت

وجد: ولا يهمك يا ماما اطمنى كل حاجه بقت كويسه وانا بقيتواعرف اتعامل مع ابيل واهتم بيه كويس اوى وهو كمان بقى يعمل اى حاجه عشان يبسطنى

دهبيه : طمنتينى الحمد لله

وجد : اخبار جاد ايه

دهبيه : اسكتى مش ساب البت اللى كان مصاحبها دى

وجد : هههههههههههه ايلا ليه كده

دهبيه : مقالش تفاصيل انتى عارفه جاد بيطلع الكلام بالعافيه بس المهم انه سابها انا مكنتش بطيقها

وجد : طيب بيجاد

دهبيه : مافيش جديد بيحاول يوصل لاى حاجه بخصوص علا واشرقت خلاص مش باينلها رجوع

واثناء حديثهم جت رساله لوجد وابتسمت وبصت لامها

وجد : ماما فى مفاجأة حلوه اوى ليكى انتى وبابا

دهبيه : ليه انا وابوكى

وجد : اه انا هدخل انادى بابا ماتتحركيش من هنا

دهبيه : حاضر يا حبيبتي

وجد دخلت نادت بباها وخرجوا هما الاتنين ووجد فتحت الباب وكانت عشق واقفه ومعاها ابيل جوز وجد كان بيجبها من المطار

زيدان ودهبيه بصوا بصدمه وعيون بتلمع بسبب الدموع

دهبيه جريت الاول على عشق وفضلت تحضنها وتبوسها من كل وشهت

زيدان: شد عشق من ايد دهبيه وحضنها جامد مكنش عايز يخرجها من حضنه بقت دهبيه وزيدان كل شويه يشدوها من بعض وفى الاخر شدتها وجد عشان تسلم عليها

دهبيه : وحشتيني اوى يا عشق خلاص كده مش هتسافرى تانى

عشق: لا خلاص الدكتوره عشق مش ناويه تبعد عن حضنكم ابدا ابدا

دهبيه : احلى دكتوره عشق دى ولا ايه ودخل عليهم جاد وبعديه بيجاد وفضلوا فتره مع بعض وسط ترحيب بعشق من كل العيله جت اشرقت وسلمت على عشق ورحبت بيها دهبيه جدا واخدت خفيدها فضلت تبوس وتحضن فيه وقررت اشرقت تعمل عيد الميلاد عند دهبيه وزيدان عشان شقتها محتاجه تنضيف ومش هتلحق تخلصها

وبدات اشرقت وباسمه ووجد وعشق يجهزوا عيد الميلاد وسط ضحك من الجميع وانتهزت باسمه انشغال الجميه وطلبت من جاد انه يتكلم معاها فى البلكونه بالقرب من اختها عشان متكنش معاه لوحدها

😊😊😊😊😊😊😊☺️

جاد: خير يا باسمه

باسمه: جاد انا عايزه اعترفلك انى لسه بحبك وكنت غلطانه لما كنت بعاندك وببعد عنك وانا ابدا ابدا مكنتش مرتاحه في البعد عنك وغلطانه انى مكنتش بواجهك بمخاوفى وسبتها تتملك منى

جاد : مصدوم من باسمه وكلامها

: طيب وايلا انتى عارفه انى خاطب

باسمه: جاد انت بتحبها

جاد : لا

بس المطلوب بقى انى اعمل دلوقتي زى بيجاد واتجوز اتنين واحده بحبها وقلبى معاها وواحده مديها كلمه

جاد سابها ومشى وكان عايز يوصل رساله لاشرقت يمكن تقدر تسامح اخوه ويرجعوا ساعتها يكون في امل لو راح جاد يتقدم لباسمه وفى نفس الوقت بيثأر لكرامته من اللى عملته فيه

باسمه عنيها دمعت ودخلت الحمام وغسلت وشها عشان دموعها ماتنزلش قدامهم

____________&&&&

عند بيجاد واشرقت

بيجاد : اشرقت ممكن اتكلم معاكى

اشرقت: لو بخصوص سند فهو قدامك اهو تقدر تسالنى واحنا هنا وسط الكل

بيجاد : اشرقت لو سمحت انا عايز اتكلم معاكى على انفراد احنا لسه في العده يعنى مش حرام

فى الوقت ده دهبيه كانت في المطبخ وعشق مشغوله بسند وابن وجد وبتلعب معاهم

بيجاد : اشرقت ليه مش عايزه تدينى فرصة تانيه انا اه غلط مش هقولك غصب عنى لا بس انا عرفت غلطى

اشرقت : لو هنتكلم في الموضوع ده يبقى لو سمحت من دلوقتي توقف كلام لانى مش مستعده افتح مواضيع فى موضوع انتهى بالنسبالى

فى الوقت ده علا خبطت على الباب وفتحتلها دهبيه

دهبيه : ايه ده علا اهلا اهلا يا حبيبتي ورحبت بيها وماحبتش تخليها تواجهه اشرقت فاخدتها على غرفه المكتب

خشى يا حبيبتي اقعدى هنا وانا جيالك حالا

كانت دخله علا المكتب واثناء فتحها الباب سمعت بيجاد وهو بيكلم اشرقت

بيجاد : لا يا اشرقت موضوعنا مانتهاش انا لسه بحبك وعارف انك بتحبينى فمالوش لازمه اللى بتقوليه ده وكل حاجه ممكن تتصلح انتى مكنتيش عارفه بوجود علا فى حياتى وكنا عايشين مرتاحين ومبسوطين

اشرقت: بس دلوقتي في واحده تانيه فى حياتك

بيجاد : بس انا بحبك انتى عايز اكمل معاكى انتى

اشرقت: طيب وعلا تقدر تطلقها

بيجاد : للاسف علا حامل اعتبريها مش موجوده هى كده كده هى مختفيه

اثناء ذلك الحديث دخلت علا وكانت سمعت كل كلامهم

علا : مش مضطره انها تعتبرنى مش موجوده لانى جايه اطلب الطلاق عشان مبقاش موجوده فعلا والكلام ده اهلك عارفينه انى مش عايزه اكمل معاك وسبتهم وخرجت وبيجاد وقف مصدوم مكنش عارف يتحرك كان اخر حاجه متوقعها هو انه يشوف علا او يخليها تسمع كلام زى ده اتسمر مكانه ومبقاش عارف يعمل ايه

خرجت علا وقابلت عشق فى وشها بس هى كانت ماشيه دموعها على خدها وبطنها وجعاها ومش مركزه وعشق ندهت عليها

عشق : علا علا استنى مالك يا بنتى فيه ايه وبتعيطى كده ليه ايه اللى حصل وشكلك تعبان اوى كده ليه تعالى تعالى اقعدى ارتاحى

علا : حمد الله على السلامه يا عشق انا تعبانه فعلا ولازم امشى عن ازنك

عشق : مش هتمشى يا علا غير لما اطمن عليكى

علا حست بحاجه سخنه على رجليها بصت لقت دم مقدرتش تتكلم ووقعت وعشق صوتت وخرجوا كلهم على صوتها وشافوا منظر علا و دهبيه جريت على علا

دهبيه : علا علا مالها يا عشق حصل ايه وبصت على بيجاد لقته واقف تايه مش عارف يتصرف حست ان فى حاجة حصلت بس مش وقته اهم حاجه تلحق علا راحت زعقتله تعالى شيلها نوديها المستشفى بسرعه علا تعبانه وممكن تكون حالتها خطر

فاق بيجاد على صوت مامته وشال علا ونزل بيها وعشق نزلت معاهم واديته اسم مستشفى يطلع عليها

وفعلا راحوا كلهم المستشفى

زيدان ودهبيه وجاد وباسمه وعشق وبيجاد كانوا في المستشفى

ووجد قاعده في البيت مع اشرقت والأطفال

فضلوا حوالى ساعه فى الطواريء بيحاولوا يسعفوها وبعدين قرروا يدخلوها عمليات ودخلت عشق معاهم العمليات وفضلت لمده ٥ ساعات متواصلة

أخيراً خرجت عشق من العمليات

بيجاد: ها طمنيني يا عشق فى ايه

عشق: ايه اللى وصلها لكده لدرجة انها تبقى رافضة الحياة بالشكل ده

بيجاد بص لاهله وبعدين فى الارض

زيدان: عشق طمنينا الاول وبعدين هنحكيلك كل حاجه

عشق :

ياترا علا عايشه ولا ماتت خلاص

رواية ولاد المعلم الحلقة السادسة عشر

زيدان: طمنينا الاول يا عشق وبعدين نعرف ايه اللى وصلها لكده

عشق : حصلها اجهاض وعملها نزيف كان صعب نوقفه وكان قلبها تعبان لو حاله قلبها دى لوحدها كانت محتاجه عمليه كانت هتبقى بسيطه انما للاسف النزيف اثر جامد فى عمليه القلب المفتوح اللى اضطرينا نعملهالها فى العمليه ومن ستر ربنا ان فصيله دمها متوافره معنا ونقدرنا نعوض جزء من اللى فقدته بس للأسف هى حاليا في مرحلة الخطر لازم يعدى ٢٤ ساعه ونشوف الوضع مستقر ولا لسه

دهبيه : ببكاء ربنا ينجيها يارب ربنا ينجيها وبصت لابنها

انت عملت ايه او قلت ايه يوصلها لكده حالتها كانت ابتدت تتحسن ايه اللى حصل وصلها لكده قولى

بيجاد : انتى كنتى تعرفى مكانها

زيدان: انت هترد على السؤال بسؤال

بيجاد : سمعتنى وانا بتكلم مع اشرقت فى المكتب

زيدان: يعنى ايه سمعتك بتتكلم معاها تقوم تنهار ماهى كانت عارفه انك متجوز ومخلف منها ومحصلش كده احكى سمعت ايه

بيجاد حكاله كل الكلام اللى دار بينهم واللى سمعته علا

واول ماخلص لقى الم نزل على وشه من ابوه

زيدان: انا ندمان على تربيتى ليك كنت فاكرك راجل يعتمد عليه لكن للأسف انت ملكش اى صله بالرجوله إطلاقاً استخدام ضعف غيرك عشان تمتلكه دى انانيه وانا مش هسمحلك تتمادى فيها اسمع انا وامك كنا نعرف مكانها وكنا سيبنها تهدى قولنا يمكن الميه ترجع لمجاريها بعد طلاقك من أشرقت وكنت فاكر انك هتحافظ عليها لكن للاسف لتانى مره اطلع غلطان انت لا تستحق اى فرص

دهبيه : طلقها يا بيجاد طلقها بقولك

بيجاد: مش هطلقها سامعين مش هطلقها

جاد : راح ضربه بالبوكس هطلقها غصب عنك

بيجاد: انا نفسي افهم انت مالك ومالها محموق اوى ليها كده ليه خرج نفسك منها

جاد : مش هخرج منها كفايه عليا الفتره اللى فاتت وانا ندمان على اللى عملته معاها عشان كده بقولك هطلقها ورجلك فوق رقبتك هى بطلت تحبك وعايزه تخلص منك من زمان افهم بقى

بيجاد: اسكت اسكت مالكش دعوه هى راضيه واتا هكلمها وهقنعها وهترجع تانى ليا اخرج انت منها سامع بقولك ايه انت بالذات مالكش دعوه

دهبيه : راحت ضربته بلقلم فوق بقى فوق حب التملك ده ماينفعش سبها سبها تعيش حياه سويه وابعد عنها

بيجاد سابهم وجرى بالعربيه ووقف عن مسجد في السيده زينب ودخل اتوضى وصلى وفضل يبكى وجه شيخ يتكلم معاه

الشيخ : اهدى يابنى مالك بتعيط ليه محتاج مساعده

بيجاد بصله : انا مخنوق اوى وبخسر كل حاجه خسرت شغلى وببنيه من اول وجديد كنت متجوز اتنين طلقت واحده والتانيه بين الحياة والموت

وبدأ بيجاد يحكيله كل حاجه عن حياته من الاول

الشيخ: صلى على النبي يابنى

بيجاد: عليه افضل الصلاه والسلام

الشيخ: انت صليت استخاره قبل جوازك من ال واحدة فيهم

بيجاد: لا عشان زى ما قولتلك الاولى كان مصلحه والتانيه جه فجاه

الشيخ: قوم يابنى طلع صدقات داوى مرضاكم بالصدقات وبليل استحمى وصلى العشا وبعدها الاستخاره ونام واللى فيه الخير ربنا يقدمهولك

بيجاد: حاضر يا شيخ طلع بيجاد على المزرعه ودبح عجلين عجل بنيه شفاء علا وعجل بنيه صلاح حاله وخلص ورجع المستشفى تانى

دهبيه : ايه اللى جابك تانى

بيجاد: ماما انا عارف انى غلطان وانانى بس ارجوكى سبينى اطمن عليها ارجوكى ولما تفوق وعد هعملها كل اللى هى عايزاه

جاد : وعيد ميلاد ابنك انهارده هتعمل ايه

بيجاد: مش عارف مش عارف

باسمه واقفه ساكته ومستغربه رد فعل بيجاد هل فى حد ممكن يحب اتنين مع بعض بنفس الدرجة وفى وسط سرحانها فاقت على صوت جاد

جاد : تعالى اوصلك تروحى لاختك

باسمه: لا انا هستنى اطمن عليها

جاد: عشق قالت لسه ٢٤ ساعه روحى وادعيلها خلاص الدنيا ضلمت واكيد اهلك هيقلقوا عليكى وزمانهم زعلانين على العيد ميلاد اللى باظ

باسمه: لا طبعا بالعكس همل زعلانين على علا ومش بيفرق معانا اعياد ميلاد مش بنعملها اصلا احنا كنا عاملينها عشان نفرح مامتك

جاد : طيب تعالى نروح وانت هقولك الاخبار بالتليفون

بعد إلحاح طويل قدر يقنعها انه هيوصلها وهى ركبت ورا وهو قدام

@__________

_____

عند اشرقت اتصلت ببيجاد عشان تطمن على علا

اشرقت: الو يا بيجاد علا حالتها ايه دلوقتي

بيجاد : حكالها كل حاجه

اشرقت: طيب انا جهزت اكل ليكوا وهبعتهولكم للاسف مش هقدر اجى عشان سند بس هكلمك اطمن عليك قصدى عليكوا كلكوا

بيجاد: مالوش لزوم يا اشرقت انا ماليش نفس للاكل انا خايف علا يجرالها حاجه وافضل شايل ذنبها طول عمرى

اشرقت: إن شاء الله هتبقى كويسه

بيجاد : كلهم ضدى يا أشرقت وهما عندهم حق بس انا مش محتاج حد غيرك دلوقتي صدقيني محتاجك اوى

اشرقت : …..

رواية ولاد المعلم الحلقة السابعة عشر

اشرقت صعب عليها بيجاد رغم اللى عمله معاها

بيجاد: صدقينى يا أشرقت انا بحبك وعايزك وغصب عنى خبيت عنك خوفت لما تعرفى تسبينى انا لما بعدت واختفيت كنت عايز اراجع نفسى واعيد حساباتى لقتنى بحبك انتى علا حبيتها اه بس مش زيك انا لو حبيت علا زى ما حبيتك ماكنتش سبتها عشان مصلحتى انما انتى الوضع اتغير مانكرش ان البدايه عشان مصلحه مع باباكى لكن بعد كده بقيت انا وجاد اللى نجيب للباكى موردين من الخارج يعنى اصبح الوضع معكوس هو اللى مصلحته معانا مش العكس ولو كنت عايز اسيبك كنت سبتك بعد ما اخدت مصلحتى لكن انا حبيتك حبى لعلا امتلاك مش حب

زى اللى معاه لعبه حلوه وخايف حد يجيى ياخدها منه يرجع يندم عليها

اشرقت صدقيني العلاقه اللى بينا محتاجه فرصة تانيه حاولى تسامحى وافتكرى ايامنا الحلوه مع بعض فكرى فى ابننا اللى اهم منى انا وانتى تعالى نرجع ونخليه يعيش بينا عيشه سويه

اشرقت كلام بيجاد اثر فيها

اشرقت: بيجاد طيب ادينى فرصه افكر لو سمحت

بيجاد: خدى وقت بس ارجوكى وانتى جمبى انا محتاجك جمبى يا اشرقت عارف انها انانيه بس غصب عنى محتاجك

اشرقت قفلت معاه وفضلت تبكى

@””””””””$$

عند جاد كان سايق بيوصل باسمه

جاد : هوصلك عندنا في البيت اختك هناك لسه وجد بلغتنى

باسمه : تمام انا كده كده كنت عايزه اروحلها عشان اطمن عليها

: جاد هو انت فعلا عايز بيجاد يطلق علا عشان تتجوزها وتعوضها زى ماقولتلى قبل كده

جاد: هو انتى شيفانى و.س.خ اوى كده عشان ابص لمرات اخويا

باسمه: انت اللى قولتلى

جاد وقف العربية

كنت بضايقك يا باسمه عايز اشوف رد فعلك

باسمه: ليه

جاد : عشان لسه بحبك عرفتى ليه

ايوه يا باسمه لسه بحبك ومقدرتش انساكى ارتبط بايلا وحاولت كتير اقنع نفسى انى بحبها لكن معرفتش اخر مره عزمناكوا فيها جبتها عشان اضايقك واشوف نظره غيره فى عنيكى حاولت كتير اخد خطوه جديه في علاقتى معاها لكن كنت بحس نفسى مخنوق مش عايز اكمل كنت بتلكك باى حاجه واخدها حجه عشان مروحش اتقدملها لحد ماغلطت في حقى وسبتها

باسمه : يعنى انت مش مرتبط

جاد : لأ

باسمه: ولا هترتبط

جاد : على حسب بقى لو لقيت اللى تقدر ترجعنى وترجع ثقتى فيها يبقى ليه لأ

باسمه: صدقنى يا جاد انا شارياك ومستحيل اكرر غلطتى تانى

جاد : دور العربيه ومشى لما نشوف

#______________________

عند دهبيه وزيدان فى المستشفى

زيدان : زمان اشرقت زعلانه دلوقتي عشان عيد ميلاد سند ده اول عيد ميلاد ليه

دهبيه : لا اشرقت عاقله وانا كلمتها وهى يا حبيبتي زعلانه على علا

زيدان : قلبها ابيض اشرقت خسارة فى ابنك

دهبيه : هما الاتنين خسارة فيه

زيدان: على فكره ابنك بدا يرجع وضعه تانى فى الشغل بعد ما وقعناه انا وجاد

دهبيه : بيجاد زكى بس انانى . هو ممكن الراجل يحب اتنين

زيدان: ما جعل الله لرجل من قلبين في جوفه

ممكن يكون ابنك شايف حاجه في كل واحده مخلياه متمسك بيها بس اللى انا عايز اقولهواك انه بيحب اشرقت انما علا تملك عاملها زى اللعبه عشان كده انا متعاطف اكتر مع علا

دهبيه : لنفس السبب ابنك كان تقريباً عايش معانا هو واشرقت وانا كنت بشوف حبه ليها واضح انما علا لأ ده زعقلها قدمنا ومشاها لو كان بيحبها كان اعترف يومها قدمنا بكل حاجه ومكنش همه اشرقت هتعرف تجيب حقها منه انما علا لا علا ضعيفة محتاجه اللى يشجعها ويقف جمبها

زيدان: اشرقت تبان جامده انما من جوه هشه

دهبيه : بس انا عارفه إن اشرقت عاقله وهى عارفه هى عايزه ايه وهتعمل ايه متقلقش

زيدان: ربنا يصلح الحال

_____&&_______&&________&&_______&&

عند عشق كانت قاعده مع مدير المستشفى على وزميلها فى العمليه سامح

( سامح ) كان زميل عشق وكان معاها فى البعثه وبينهم اعجاب .

على ( صاحب المستشفى وهو اللى بيديرها ارمل من سن جاد وبيجاد ودكتور نسا وتوليد وهو اللى انقذ اشرقت ووقفلها النزيف )

على : ايه قصه قريبتك دى يا عشق

عشق : دى مرات اخويا

على : معلش بدون الدخول في حياتها الشخصية بس انا محتاج نبذه عنها لانها لو وافقت ممكن تحتاج علاج طبيعي احنا لما فاقت من البنج كانت بتهلوس بسبونى اموت ايه اللى وصلها لكده

عشق : انا كنت مسافره فالتفاصيل كلها مش عندى بس اللى اعرفه وحكيتله اللى تعرفه

على : طيب ليها حد اقدر اتكلم معاه

عشق معرفش هسالى ماما

اتصلت عشق على مامتها وبابها وبلغتهم بكلام الدكتور وهما رحوله الاوضه

زيدان: السلام عليكم

على وسامح : وعليكم السلام

على : فى غرفة العمليات المريضه كان واضح انها رافضة الحياه وكانت بتهلوس بكلام زى مش عايزه اعيش سيبونى اموت انا محتاج اعرف بعض التفاصيل عشان لو فاقت احتمال نوصلها بدكتوره نفسيه لانها اكيد بعد فقدان ابنها هتعانى من الاكتئاب

دهبيه : لا حول الله يارب

زيدان بدأ يحكى للدكتور كل حاجه يعرفها

على : تمام شكرا لحضراتكم وإن شاء الله تطمنوا عليها

خرج زيدان ودهبيه من عند الدكتور

على : واضح انها هتخضع لعلاج نفسى

سامح : اكيد ومن غير زعلىيا عشق اخوكى كمان لازم يتابع مع دكتور نفسى

عشق: عندك حق هو مش عارف يقرر هو عايز ايه فى حياته وبيظلم اتنين للاسف المفروض كان راحله من زمان

بس فى ناس فاكره ان الطب النفسي ده للمجانين فقط مع اننا لو راجعنا دواخلنا اغلبنا محتاج دكتور نفسى لان كلنا في حياتنا حاجات مش عارفين نتخطاها مثلا مريض الهوس بيكون فاكر انه حب زى اللى قتل نيره كده ده كان محتاج دكتور نفسي لو أهله من البداية اخدوا بالهم وعرضوه على دكتور نفسى مكنش عمل كده حتى اللى بيتعاطى مخدرات اغلبهم محتاجين دكاتره نفسيين يعالجوهم نفسيا قبل ما يعالجوهم من الادمان عشان مايرجعوش للادمان مره تانيه وبرضه الام اللى بتكون متعلقه بحد من اولادها وبيموت بتحزن عليه واحيانا حزنها بياثر على اخواته دى بتكون محتاجه دكتور نفسانى واللى خارجه من حاله ولاده وغيرها كتير اوقات كتير بيكون معانا ناس تساعدنا نتخطى مرضنا واوقات مابيقدروش وبنكون محتاجين نروحلهم فعلا

بيجاد عنده حب التملك طول عمره بيحب حاجته وبيحافظ عليها حتى لعبه من وهو طفل موجوده عنده لحد دلوقتي اناووبيجاد كنا بنكسر اللعب او نشحتها او نرميها هو لا لعبه كلها تقريبا لسه زى ماهى حتى لما بيغير تليفون بيفضل محتفظ بالقديم كل تليفوناته عنده لحد دلوقتي وحاجات تانيه كتير

على : بصى يا عشق فى دكتور شاطر جاد اسمه حسن معانا هنا في المستشفى كلمى بيجاد يحجز معاه صدقينى هيفيده

عشق: انت عندك حق انا هتصل بيه واقنعه

سامح: الله يعينك يا عشق اول يوم ليكى وحصل ده كله امال كمان اسبوع هيحصل ايه

عشق : بضحك كل خير إن شاء الله

سامح : باباكى ومامتك طيبين اوى وواضح انهم محتارين وجايين على بيجاد

عشق: عندهم حق اشرقت وعلا صعبانين عليهم

سامح: كل حاجه هتتحل إن شاء الله

على : استاذنكم انا عشان عندى مرور على المرضى

عدى دكتور على على كل المرضى واجل علا للاخر

دخل اطمن عليها وفضل يكلمها وهى نايمه وبعدين سابها وخرج

___&&&&_______

عشق اتصلت على بيجاد

عشق: الو بيجاد انت فين

بيجاد: فى مسجد جمب المستشفى طمنينى علا كويسه وفاقت ولا لسه

عشق : لأ لسه انا عايزاك تيجى محتاجه اتكلم معاك هستناك فى كافتريا المستشفى

دخل بيجاد المستشفى وقابل عشق

عشق : اقعد يا بيجاد انا عارفه انك زعلان ومحتاج تتكلم ومحتاج حد جمبك انا مش هلومك ولا هتكلم عن اللى فات لانه خلاص عدا مش هعرف ارجعه خلينا في اللى جاى انت عايز ايه

بيجاد: عايز اشرقت حبيبتى وام ابنى والدفئ بالنسبالى

وعلا برضو صعب اتخلى عنها علا دى انا احيانا بعتبرها بنتى مش مراتى بحب دلعها وشقوتها انا عارف انى طفتها ومبقتش زى الاول بس لو انا مكنتش عاملت عليها الحصار ده كان ممكن اخسرها من زمان

عشق : انت كده خسرتهم هما الاتنين وعشان تعرف تعيش لازم تعرف انت عايز ايه ايه رايك تروح لدكتور نفسانى تتكلم معاهو

بيجاد : عايزهم الاتنين هو اى راجل متجوز اتنين بيبقى مجنون ومحتاج دكتور نفسي الشرع محلل للراجل اربعه هتيجى بقى الاندبندنت وومن هيخلوه مجنون ومحتاج علا

عشق: مش قصدي يا بيجاد انك مجنون والشرع فعلا محلل ده بس مش محلل الغش والخداع انت كدبت كام مره على اشرقت وعلا تقريبا بقالك ٣ سنين عايش في كدب هتفضل كده لحد امته جرب اسمع كلامى مش هتخسر حاجه انا عايزه مصلحتك انت اخويا اللى بحبه وبرضو علا لما تفوق هنعرضها على دكتور نفسي انا احيانا لما كنت مسافره فى الغربه كنت بروح لدكتورة نفسيه افضفض معاها مش شرط اكون مجنونه لا خالص

بيجاد باستسلام : ماشى يا عشق حدديلى معاد معاه

عشق : دكتور حسن هنا ممتاز وانا كلمته وهو فاضى بعد ساعه روح اقعد معاه وان شاء الله كل حاجه هتبقى تمام

سابته وقامت راحت لمامتها

عشق : ماما انتى وبابا روحوا وتعالوا بكره وانا هبات معاها انا كده كده كنت هستلم شغلى هنا كمان اسبوع بس مش مشكله هستلمه من انهارده روحوا ارتاحى وغيرى وانا لو حصل اى حاجه هكلمكم على طول وكمان مايصحش نسيب اشرقت لوحدها

زيدان: عندك حق هنمشى وفى اى وقت كلمينا وانتى يا دهبيه كلمى ام منعم طمنيها على علا

دهبيه : ماشى يا عشق وكل شويه بصى عليها اطمنى عليها وكلمينى

عشق : حاضر يا ماما

مشى كل واحد راح بيتهم وفضل فى المستشفى على وعشق وسامح وبيجاد ودخل بيجاد للدكتور النفسى عشان يتكلم معاه

بيجاد: مساء الخير

حسن : مساء النور

بيجاد : انا بيجاد اخو دكتوره عشق هى قالتلى انها كلمتك عنى

حسن: اه اتفضل انا محتاج اسمعك وندردش سوا

بيجاد : ……..

مساء الخير يا نجمات عامين ايه انا بس عندى سؤال ليه ماشفتش هجوم على باسمه هى واشرقت لما كانت عايزه ترجع تانى جاد وهو خاطب وهاجمته علا مع ان اللى عاملته باسمه نفس اللى عملته علا بل واشتركت كمان معاها اشرقت

ويا جماعه علا لما اتجوزت بيجاد مكنتش عارفه ان فرحه يوم جوازهم هى كانت فكراه خاطب وكانت متوقعه انه هيفشكل بعد جوازهم لانه قالها انه خطبها في لحظه غضب فمعلش نكون عادلين شويه

رواية ولاد المعلم الحلقة الثامنة عشر

عند بيجاد دخل لدكتور حسن زى ما عشق نصحته

حسن : ازيك يا استاذ بيجاد عامل ايه

بيجاد: الحمد لله بخير

حسن : عشق كلمتني عنك بس محكتليش تفاصيل ممكن انا وانت نتكلم مع بعض شويه اناوعايزك تتكلم معايا كانك بتتكلم مع نفسك

بيجاد: انا مش عارف ابدأ منين دماغى مش جايبه حاجه معينه ابدأ بيها

طيب نبدا من طفولتك

بيجاد: ماشى نبدا

حسن: وانت صغير كنت بتحب لعبك وحاجتك

بيجاد: اه وانا صغير كنت دايما بحافظ على حاجتى وخصوصاً لو حد تانى كان معجب بيها كنت دايما بشترى اللعب الغاليه اللى تبهر الولاد

حسن: طيب ولما كنت بتزهق منها كنت بتعمل ايه فيها

بيجاد: كنت بشيلها واحتفظ بيها

حسن: طيب مافكرتش تديها لحد اصغر منك يلعب بيها او تسلفها لحد او حتى تبعها

بيجاد: انا مش محتاج فلوس عشان ابيعها وبعدين اغلبيه الحاجه اللي كنت بشتريها مش بتبقى تقليدية عشان حد تانى يجبها بسهوله فانا اوزعها ليه لا بفضل محتفظ بيها حتى لما كبرنا وغيرنا شقتنا ماما لما لقت انى بحافظ على حاجتى ادتنى اكبر اوضه في اخواتى

حسن: طيب مامتك وباباك ماكنوش بيعلقوا او يقولولك اديها لحد من اخواتك الاصغر مثلا

بيجاد: لا هما عارفين انى بحب حاجتى ومحبش حد يجيى جمبها مره جاد كسرلى مسدس فضلت من غير اكل وشرب لحد ماجبولى واحد شبهه بالظبط هما عارفين انا بحب احافظ على حاجتى فسبونى براحتى بالعكس هما شايفنى منظم

حسن: طيب والحاجات دى وزعتها ولا لسه موجوده

بيجاد: فى اوضتى زى ماهى بحاجتى كلها

نسيبهم شويه ونروح عند دكتور على

$__________$_________$_________

دخل دكتور على على علا فى الاوضه وكانت لسه نايمه جاب كرسي وقعد جمبها

على : انتى لسه صغيره اوى اوى يا علا على الهم ده انتى تستحقى حياه احسن من كده انا عارف انك سمعانى قومى واقفى على رجلك ابنى نفسك انتى حوليكى ناس كتير بتحبك ماتستحقيش النومه دى ابدا قومى واجهى واغلبى الدنيا وحبى نفسك عشان انتى تستاهلى وسابها وخرج

بعد ما خرج علا فتحت عنيها وشافت نفسها نايمه وجسمها كله مش حاسه بيه بصت على الاسلاك وعرفت انها عملت العمليه وعاشت حمدت ربنا فى سرها انه اداها فرصه تانيه للحياه وقررت انها تستغلها عشان تعيش حياه احسن هى من حقها تعيش عيشه افضل من دى واول حاجه تعملها لازم تتخلص من علاقتها ببيجاد للنه انسان انانى ونرجسى

علا لنفسها : عنده حق انا ليه اعيش عمر اكبر من عمرى انا عايزه اعيش سنى بقيت حره اقدر احقق نجاحات وابنى لنفسى حياه على زوقى انا زى الفراشه الحره ليه اربط نفسى بشخص انانى انا لو حبيت نفسى اكتر من كده مكنتش هسمح لبيجاد يعملنى لعبته انا لازم احب نفسي لازم اقدرها لانها تستاهل الحب استغفر الله العظيم من كل ذنباً عظيم يارب سامحنى على لحظات يأست فيها من رحمتك خلصت تفكير ورجعت نامت تانى من تأثير المخدر

#____________#__________#____________#

عند اشرقت وباسمه

اشرقت: طمنينى على علا عامله ايه

باسمه: قالتلها على اللى عشق قالتهولها

اشرقت: ربنا يقومها بالسلامه

باسمه: على فكره انا وجاد رجعنا تانى لبعض

اشرقت : بتهزرى احكيلى كل حاجه بالتفصيل

باسمه حكت لاشرقت كل حاجه من اول ما كلمته فى البلكونه وقت التجهيزات لعيد الميلاد لحد ما كان بيوصلها بالعربية

اشرقت: سرحت لبعيد

باسمه: سرحتى فى ايه

اشرقت: جاد اول مره كان عايز يوصلى انا مبرر لعلا عشان مكرهاش او اخد موقف منها

باسمه: فعلا طيب بيجاد كلمك

اشرقت: عايزنى اديله فرصه تانيه

باسمه: وانتى ناويه على ايه

اشرقت : لو بيجاد رجع ندمان فعلا على اللى عمله هوافق ارجعله تانى بس بشروط

باسمه: معقوله هتسمحيه

اشرقت: باسمه انا مش بكره بيجاد انا كرهت تصرفه معايا انوا خلانى عايشه مخدوعه بس انا لما حطيت نفسى لحظه مكانها لقيت انها هى المتضرره اكتر .

يكفى انها كانت محرومه من كل حقوقها ويكفى نظره الناس ليها أنا مستغربه ازاى هى رضيت بكده طيب انا لو كملت واستحملت عندى مبرر هو ابنى اللى اكيد هكون عايزاه يتربى تربيه سويه ومايحسش انه اقل من زمايله وهو شايف ابوهم وامهم مع بعض انما هى ايه مبررها

باسمه: مكنلهاش حد يقف جمبها وحتى اخواتها طردوها ده اللى عرفته من جاد

اشرقت: انا بإذن الله بكره هزورها اطمن عليها وبرضه اكون جمب بيجاد فى وقت زى ده

باسمه: حنيتى يا شوشو

اشرقت : قومى يا بت قومى نامى بصى احنا في ايه وهى فى ايه

##_____________#___________#_____________#

تانى يوم الصبح

عشق دخلت لعلا الاوضه تطمن عليها لقتها صاحيه بصتلها بفرحه وجريت عليها

عشق: علا انتى فوقتى الف سلامه عليكي كنا هنموت من القلق كلنا عليكى

علا بصتلها بابتسامه بهتانه : انا الحمد لله كويسه اطمنى

عشق اتصلت باهلها طمنتهم عليها

علا : عشق ممكن تكلمى بيجاد خليه يجيى

عشق بتوتر : هو هنا واقف بره من امبارح مستنى يطمن عليكى هتقدرى تقابيله ولا ناجلها

علا : لا انا عايزه اكلمه انا عايزه لما اخرج من هنا اكون شفيت من كل حاجه

عشق دخلت بيجاد وسابتهم وخرجت ووصت بيجاد مايتعبهاش

بيجاد دخل على علا وقرب منها وقعد على الكرسي جمبها ومسك ايديها وباسها : سامحيني يا علا سامحيني انا بحبك ومكنتش بضحك عليكى

علا : وبتحب برضو اشرقت وهى اولى بيك منى هى ام ابنك وبتحبك ومالهاش ذنب فى حاجة

بيجاد: عشق صدقيني انتى فهمتى كلامى غلط انا برضيها عشان ترجعلى تانى

علا : بيجاد انت لو حبتنى بجد مكنتش حبيت اشرقت ممنش هيبقى فى قلبك مكان لحد بعدى انما انت حبيتها انا مصدقاك انك حبتنى بس مش هينفع نكمل تانى

بيجاد : طيب هبعد فتره اسيبك ترتاحى فيها و

قاطعته علا : لو سمحت ابعت هات ماذون وخلينا نطلق انا ارجوك اعمل كده عشان افضل فكرالك زكرى كويسه

بيجاد : علا انا عارف انى ظلماك هعوضك صدقيني

علا : بيجاد لو سمحت انا لحد اللحظه دى مش عايزه ادخل حد بينا من فضلك ابعت هات الماذون يطلقنى

بيجاد : طيب على الاقل لما تخرجى

علا : انا عايزه لما اخرج اكون قدرت اتعافى من كل جروحى ماينفعش اقفل على جرح من غيره ما انضفه من فضلك سبنى يا بيجاد

بيجاد : بدموع حاضر يا علا هبعت اجيبه واتصل بجاد عشان يكون شاهد على طلاقه زى ما كان شاهد على جوازه وحضر زيدان ودهبيه وعشق ودكتور على وجاد عدى على ام منعم جابها عشان تطمن على علا

دهبيه كانت قاعده جمب علا حضانها وام منعم قاعده من الناحية التانية وزيدان كان محضر ورق فى ايده

الماذون: أرمى يمين الطلاق

بيجاد رمى يمين الطلاق فى داخله اشرقت وباسمه

اشرقت دخلت شافت بيجاد واقف تايهه راحت اديته سند فى ايده وطلبت منه ينزل يشتريله زبادي وبيجاد ماصدق وخرج من الاوضه وراحت بعد كده لعلا سلمت عليها والماذون خلص الإجراءات وخرج

زيدان طلب من الكل يخرج عشان يتكلم براحته مع علا هو ودهبيه وكانت ام منعم حاضره الكلام

زيدان: اتفضلى يا علا ده ورق الشقه اللى انتى قاعده فيها انا اشترتها وسجلتها باسمك ده حقك

علا : لا مش حقى الشقه دى انا هفضل فيها فتره لحد ملاقى مكان تانى السبب اللى كان ممكن يخلينى اخدها راح خلاص

زيدان: لا يا علا الطفل ده كان هيبقى حفيدى وليه مكانه عندى بس مكنش هيبقى السبب انى احبك انا ودهبيه ونعتبرك بنتنا فعلا وعلى فكره انا شارى لكل واحده من بناتى شقه باسمها وانتى بنتى وانا اعتبرتك كده فعلا عشان كده جبتلك شقه زيهم

دهبيه : اوعى تكسفينا يا علا رينا يعلم فى الفتره الصغيرة اللى قضياها معاكى حبيتك ازاى

ام منعم: اقبلى يا علا ربنا عوضك بامين واب بيساعدوكى تقفى على رجلك تانى بلاش تكسفيهم

علا : سمعت كلام ام منعم واخدت الورق وهو حضنها ودهبيه قررت انها لما تخرج تروح تقعد معاها لحد ما تقوم بالسلامه

فضلوا قاعدين معاها تقريبا نص اليوم وكانت اشرقت وباسمه وعشق معاها ووجد جتلهم شويه ومشيت لانها حامل للمره التانيه وكلهم فرحوا ليها حتى علا وحاولت اشرقت وباسمه يضحكوا علا وخصوصاً باسمه لانها جربت احساسها لما قالت لجاد انها بتحبه وقالها انه خاطب بعد مرور نص اليوم دخل دكتور على وطلب منهم يمشوا لان وقت الزيارة انتهى حاولت عشق انها تخليه يعملهم استثناء لكنه رفض ولما خرجوا رجعوهو تانى عشان يتكلم مع علا

يا ترا دكتور على هيتكلم معاها فى ايه ؟! اوعوا حد يقولى ارتباط 😉

يتبع

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم

الحلقه الاولى من هنا

الحلقه الثالثه والرابعه من هنا

الحلقه الرابعه من هنا

الحلقه الخامسه والسادسه والسابعه من هنا

الحلقه الثامنه والتاسعه والعاشره والحادىه عشره والثانية عشرة والثالثة عشره من هنا

الحلقه الرابعه عشر والخامسة عشرة والسادسة عشر والسابعة عشر والثامنة عشر من هنا

اللي بيحب الروايات الكامله والحصريه من هنا 👇 ❤️ 👇

روايات كامله وحصريه

❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺