رواية ملاك الأدهم الحلقه الثالثه عشر والرابعة عشرة والخامسة عشرة بقلم الكاتب عادل عبدالله حصريه وجديده
 |
رواية ملاك الأدهم الحلقه الثالثه عشر والرابعة عشرة والخامسة عشرة بقلم الكاتب عادل عبدالله حصريه وجديده
وفجأة يرن هاتف ادهم !!
يتجاهل ادهم الرد علي هاتفهه ويركب سيارته سريعا ويخرج من بوابة القصر بسرعة بالغة وخلفه سيارات الحراسة !!
عامر : انتوا واقفين بتتفرجوا علي اخوكم !!! يلا انت وهو روحوا الحقوه واوعوا تسيبوه ليعمل مص.يبة .
يركب نور سيارته ومعه اخيه الاصغر زياد يحاولون اللحاق بأدهم .
بعد الخروج من بوابة القصر
زياد : علي فين يا نور ؟ ادهم اختفي ومش باين مشي منين !!!
نور : انا هتصل بأدهم واعرف هو فين ونلحقه بأي طريقة .
زياد : طيب سوق بسرعة شوية ، احنا كده مش هنلحقه ، ده كان طاير بالعربية !!!
يحاول نور الاتصال بأخيه كثيرا دون رد !!!! ثم يعطي الهاتف لزياد ويقول : مش عايز يرد ، اتصل انت يا زياد علشان اعرف اسوق ، خليك وراه لغاية ما يرد .
ادهم يقود سيارته بسرعة جنونية وبجواره صديقه نادر وخلفهم باقي رجال حراسته بسياراتهم .
نادر : هدي السرعة شوية يا ادهم احنا كده هنموت قبل ما نوصل !!
يزيد ادهم من سرعة سيارته بلامبالاة بكلام صديقه !!! حتي تكاد السيارة ان تطير من الطريق !!!
نادر : طيب حتي رد علي التليفون اللي مش بيبطل رنات من ساعة ما ركبنا !!
ادهم : ده رقم غريب بيتصل وكمان اخويا نور بيتصل ، اكيد خرج ورايا وعايز يعرف احنا فين علشان يلحقنا .
نادر : ومش بترد علي نور ليه ؟؟
ادهم : مش عايز حد معايا وكمان مش عايز اقف واضيع وقت .
نادر : ومين الرقم الغريب اللي بيتصل بك في الوقت ده ؟؟
أدهم : مش عارف .
نادر : طيب رد عليه وشوف مين .
ادهم : مش مهم .
نادر : يا ادهم رد ، ده اكيد حاجة مهمة اللي تخلي حد يتصل بيك في الوقت ده اكيد حاجة مهمة اوي .
ادهم : مفيش اهم من ملاك يا نادر .
نادر : طيب ما ترد يمكن حاجة بخصوصها .
ينظر ادهم له ويفطن الي كلامه ثم يمسك بهاتفهه ويرد علي المتصل ...
ادهم : الو ، مين ؟
.........
ادهم : ايوه انا ادهم الفيومي .
.........
ادهم : ايييييه ؟؟ ازاي ؟
.........
ادهم : انتي مين ؟
.........
ادهم : طيب ابعتي اللوكيشن ؟؟
.........
ادهم : مسافة السكة هكون عندك .
ثم ينهي ادهم المكالمة فيسأله نادر : مين يا ادهم ؟؟
ادهم : احنا هنغير الطريق ونروح المنصورة .
نادر : المنصورة !!! انا مش فاهم حاجة !!
ادهم : كلم الرجالة وعرفهم اننا رايحين المنصورة حالا وخليهم ورايا .
نادر : حاضر يا ادهم ، بس فهمني بقي في ايه ؟؟؟
في منزل الحاج ابراهيم عمدة احدي قري المنصورة ...
يصحو الحاج ابراهيم ( عمدة القرية ) لصلاة الفجر فيجد ابنته هيام تجلس ويظهر عليها التوتر وتمسك بهاتفهها !!!
الحاج ابراهيم : مالك يا هيام فيه ايه ؟؟
هيام : هقولك علي حاجة يا بابا وارجوك متزعلش مني .
الحاج ابراهيم : تبقي اكيد عملتي اللي في دماغك واتصلتي به !!!
هيام : ايوه يا بابا .
الحاج ابراهيم : ليه يا بنتي كده ؟!! كده بنت عمتك هتزعل اوي !! ده غير كمان انه ميصحش نعمل كده دلوقتي لتفكر اننا مش عايزنها تقعد عندنا !!!
هيام : يا بابا انت مشوفتش يارا كانت منهارة ازاي !!!
الحاج ابراهيم : كنتي علي الاقل تصبري يومين تلاته لما بنت عمتك تهدا وبعدين تتصلي بجوزها .
هيام : مقدرتش اشوفها منهارة بالشكل ده واقعد ساكتة يا بابا .
الحاج ابراهيم : ولما كلمتي جوزها قالك ايه ؟
هيام : قال انه جاي دلوقتي .
الحاج ابراهيم : جاي دلوقتي ؟!!
هيام : ايوه .
الحاج ابراهيم : انتي كلمتيه امتي ؟
هيام : من حوالي ساعتين تقرببا يا بابا .
الحاج ابراهيم : ده كده قدامه نص ساعة ويكون هنا ، انا هصلي الفجر وارجع بسرعة .
في قصر الفيومي
يعود نور وزياد الي القصر وما أن تراهم والدتهم هاجر حتي تسألهم : ادهم فين ؟ رجع معاكم ؟؟
نور : اختفي من الطريق ومش لحقناه واتصلت به كتير ومش بيرد .
عامر : مش انا قولتلكم تفضلوا مع اخوكم ومترجعوش من غيره ؟؟
نور : يا بابا والله مش عايز يرد ، اتصلت به اكتر من خمسين مرة ومش بيرد وفي الاخر قفل تليفونه و أحنا مش معانا عنوان المكان اللي هو رايحه !!!
هاجر : انا قلبي مقبوض يا عامر ، ادهم مجنو.ن وممكن يعمل كار.ثة !!
عامر : طيب يلا انا جاي معاكم .
هاجر : علي فين يا عامر ؟؟
عامر : انا اخدت رقم تليفون الولد اللي اسمه جاسر ده من شيرين بنت اخويا واحنا في الطريق هعرف العنوان بالظبط ونروح نلحق ابنك قبل ما يتهور ويعمل مص.يبة .
هاجر : انا مش هقدر اقعد استني كده !! انا جاية معاكم .
عامر : هتيجي معانا فين ؟!! انتي تستني هنا وهنبقي مع بعض علي التليفون .
يخرج عامر الفيومي ومعه ولداه نور وزياد .
تبقي هاجر تبدو في قمة التوتر بينما تحاول تمارا تهدئتها....
تمارا : اهدي يا طنط ان شاء الله خير ، اطمني هيرجعوا ومعاهم ادهم بخير .
هاجر : يارب ، بس انا قلبي مش مطمن
تمارا : اطمني يا طنط ، مادام عمي عامر خرج يبقي متقلقيش ابدا هيرجع ومعاه ادهم بخير .
هاجر : كله بسبب اختك !!! هي فين مش باينة ليه ؟؟
تمارا : قصدك شيرين ؟؟
هاجر : طبعا ، اومال مين غيرها ؟؟
تمارا : مالها يا طنط ؟؟
هاجر : انتي هتعملي عليا انك مش عارفة يا تمارا ؟؟!!!
تمارا : هي قافلة الباب علي نفسها ورافضة تفتح او تتكلم مع حد .
هاجر : اكيد طبعا ملهاش عين تتكلم مع حد .
منزل الحاج ابراهيم
يصل ادهم ورجاله الي منزل العمدة ويدق باب منزله .
تفتح هيام وتقف امام الباب.....
أدهم : انتي بنت خال ملاك ، قصدي يارا اللي كلمتيني ؟؟
هيام : ايوه ، حضرتك ادهم الفيومي ؟
ادهم : ايوه ، يارا فين ؟؟
هيام : هي فوق لكن بابا بيصلي الفجر دلوقتي واسفة مش هقدر ادخلك البيت الا لما بابا يرجع .
ادهم : مفهوم مفهوم ، المهم طمنيني يارا كويسة ؟؟
هيام : لما تطلع تشوفها ، اهو بابا وصل اهو ...
يأتي الحاج ابراهيم : اهلا وسهلا يا ابني ، انت ادهم جوز يارا بنت اختي ؟
ادهم : أيوه يا حاج ، تسمحلي اطلع اشوفها ؟؟
الحاج ابراهيم : طيب اطلعي الأول يا هيام شوفي بنت عمتك لسه صاحية ولا نامت .
ثم قال لأدهم : تعالي يا ابني ورايا .
ثم صعد الحاج ابراهيم الي غرفة يارا و دق الباب مرتين وفي الثالثة قال لها : افتحي يا يارا انا خالك ابراهيم .
قامت يارا وفتحت باب غرفتها وهي تحاول مسح دموعها بكلتا يديها وما ان رأت أدهم حتي ارتمت بين ذراعيه ......
ادهم : ليه ؟؟ ليه يا ملاك ؟؟ ليه سبتيني ومشيتي ليه ؟؟
ملاك ( يارا ) : انا.....انا بحبك اوي .
أدهم : وانا كمان بحبك اوي يا ملاك ، انا كان عندي استعداد اعمل اي حاجة والاقيكي .
يارا : يارا ، اسمي يارا يا ادهم .
ادهم : انتي رجعتلك الذاكرة ؟؟
يارا : اقعد يا ادهم ، اقعد وانا هحكيلك وافهمك كل حاجة .
ادهم : مش مهم ، مش عايز اعرف اي حاجة ، الحاجة الوحيدة اللي انا بفكر فيها دلوقتي انك تكوني جنبي ومعايا ومتبعديش عني لحظة واحدة .
يارا : مش يمكن لما تعرف الحقيقة كل حاجة تتغير ؟؟
ادهم : مفيش حاجة ممكن تبعدني عنك .
يارا : حتي لو عرفت اني خبيت عنك حاجات كنت لازم تعرفها من بدري ؟!!!
أدهم : ايييييه !!!! تقصدي ايه ؟
يارا : ما انا قولتلك يا ادهم اقعد وسبني احكيلك كل حاجة بصراحة ووضوح وبعد كده قرر اذا كنت هتفضل تحبني ولا نظرتك ليا هتتغير .
#ملاك_الأدهم #الحلقة_الرابعة_عشر
#الكاتب_عادل_عبد_الله
يارا : ما انا قولتلك يا ادهم اقعد وسبني احكيلك كل حاجة بصراحة ووضوح وبعد كده قرر اذا كنت هاتفضل تحبني ولا نظرتك ليا هتتغير .
ادهم : طيب اتكلمي يا ملاك قولي كل اللي في نفسك .
يارا : اسمي يارا يا ادهم ، انا اسمي يارا .
ادهم " يبتسم " : لكن انا بحب اسم ملاك اكتر .
يارا " بخوف " : ادهم ...... انا رجعتلي الذاكرة قبل ما اخرج من المستشفي .
ادهم " بأندهاش " : يعني ايه ؟؟
تنظر له يارا وتشير برأسها بالايجاب وتخفض رأسها في صمت .
أدهم : ردي عليا ، يعني ايه ؟ يعني كنتي بتخدعيني وتضحكي عليا طول الوقت ده ؟؟؟
يارا : لا مش بخدعك انا حبيتك بجد يا ادهم وكنت هقولك .
ادهم : وانتي رجعتلك الذاكرة امتي بالظبط ؟ بعد ما فوقتي من العملية علطول ولا بعدها بكام يوم ؟؟
يارا : انا ...
ادهم : انا مش مصدق اللي بسمعه ده !!! بقي حته بنت مفعوصة زيك تضحك عليا طول الفترة دي وانا مصدقها زي المغفل !!!
يارا " بدموع " : انا مش ضحكت عليك ولا خدعتك يا ادهم ، لازم تعرف يا ادهم انا ليه عملت كده .
ادهم : مش عايز اعرف منك حاجة تاني ، هتقولي ايه ولا تدافعي عن نفسك ازاي !! انتي مش ملاك انتي طلعتي شيطا.نة .
يارا " تنهار بكاءا " : حرام عليك متظلمنيش ، سيبني اكمل كلامي وبعدين احكم عليا زي ما انت عايز .
ادهم : انا حكمي عليكي حاجة واحدة بس ان ملاك ماتت ، ملاك ماتت بالنسبالي خلاص ، انتي طالق !!
يقف ادهم وينصرف بسرعة وتحاول يارا اللحاق به وسط شلال من الدموع ولكنها لم تستطيع .
تعود يارا وترمي بجسدها الي الفراش وتبكي بانهيا.ر !!
تلحقها هيام ابنة خالها وتحاول تهدئتها ...
هيام : اهدي يا يارا مش معقول اللي بتعمليه في نفسك ده !!
يارا " ببكاء " : خلاص يا هيام ادهم راح مني ، الانسان الوحيد اللي حبيته من قلبي وفكرت اني ممكن اكمل حياتي معاه راح مني للأبد .
هيام : طيب اهدي وانا هكلمه وأحاول افهمه كل حاجة .
يارا : انتي ليه اتصلتي به يا هيام ليه ؟؟ اتصالك به في الوقت ده ضيع مني كل حاجه ، اوعي تتصلي به تاني .
هيام : انا لما شوفتك بتبكي من ساعة ما وصلتي وحكيتيلي انا وبابا حكايتك معاه فكرت اكلمه علشان يفهم كل حاجة وترجعوا لبعض .
يارا " ببكاء " : خلاص يا هيام ، ادهم كده ضاع مني للابد والحكاية خلصت .
هيام : لأ مضعش ولا حاجة ، انا هكلمه تاني وافهمه كل حاجة .
يارا : اوعي تكلميه ، اتفضلي يا هيام بعد اذنك وسبيني لوحدي انا عايزة انام .
هيام : لا ، انا مش هسيبك وانتي كده الا لما تهدي .
يدخل الحاج ابراهيم اليهم محاولا تهدئتها ....
الحاج ابراهيم : اهدي يا بنتي ، اهدي يا يارا .
تزداد يارا في بكائها !!!
الحاج ابراهيم : لا يا بنتي ، لا يا يارا مش عايز اشوفك كده !! سبيلي انا الموضوع ده واللي اتكسر يتصلح .
يارا : خلاص يا خالو انا بعد اذنك مش عايزة حد يكلمه .
في القاهرة أمام فيلا عز الدين
تقف سيارة عامر الفيومي ومعه ابناه نور وزياد واخاه محمود .
المكان يبدو من الخارج هادئ ولا أثر لوجود ادهم !!
نور : واضح ان ادهم لسه موصلش .
زياد : ازاي لسه موصلش ؟؟ ده كان طاير بالعربية !!
عامر : احنا مش هنقف نخمن وصل ولا لسه .
ثم توجه عامر الي بوابة الفيلا .
عامر " ينادي علي احد حراس الفيلا " : تعالي يا ابني ، الاستاذ جاسر موجود ؟؟
الحارس : ايوه ، مين عايزه ؟
عامر : انا عامر الفيومي رجل الاعمال وكنت عايز اقابله .
الحارس : دلوقتي ؟! هو ده ميعاد زيارة او مقابلة ؟!!!
عامر : معلش عايزه في موضوع مهم ميستحملش تأخير .
يرن الحارس الجرس علي جاسر الغمراوي الذي ينزل سريعا ومعه سلاحه الشخصي يخبئه في ملابسه الي بوابة الفيلا .
جاسر : ايوه ، مين اللي عايزني ؟؟
عامر : أنت جاسر الغمراوي ؟؟
جاسر : ايوه انا جاسر ، انتوا مين ؟؟
عامر : انا عامر الفيومي رجل الاعمال ومعايا اخويا واولادي .
جاسر : مين فيهم أدهم ؟؟
عامر : لأ ادهم مش معانا ، انا جاي دلوقتي لأني عرفت ان ادهم جاي هنا دلوقتي ياخد مراته .
جاسر : يارا مش هنا ، ثم أن يارا خطيبتي ومش مراته وانا مش هتنازل عنها ابدا وابنك لو جي هنا يبقي جني علي نفسه .
عامر : ايه الكلام الفارغ اللي بتقوله ده !! انت متعرفش احنا مين ولا ايه ؟؟!
جاسر : الظاهر انتوا اللي متعرفوش انا مين !! انا...
عامر : ميهمنيش اعرف انت مين ، احب اقولك اننا كنا جايين هنا في الوقت ده علشان نمنع ابني انه يتهور ويعمل فيك حاجة ، ومكنتش متوقع انك ترد علينا بالوقاحة دي ولا حتي عملت حساب لسني ومركزي .
جاسر : انت جاي بيتي تشت.مني وتهد.دني ؟؟!!
وهنا تنزل نجلاء والدة جاسر وتتدخل في الكلام ...
نجلاء : فيه ايه يا جاسر ؟
جاسر : عامر بيه الفيومي واولاده جايين يهددوني في بيتي علشان طلبت من ابنهم يرجع لي يارا خطيبتي !!!
نجلاء : مين فيهم ادهم ؟؟
جاسر " بسخرية " : ادهم مجاش معاهم ، الواضح انه بعتهم يهددوني وخاف ييجي !!
عامر : أسمع ... ادهم الفيومي مبيخفش بيتخاف منه بس .
نجلاء : عامر بيه ميصحش كلامك ده انت في بيتنا مينفعش تغلط فينا بالشكل ده ، تعالي اتفضل نتفاهم .
عامر : مفيش تفاهم بينا يا هانم بعد كلام ابنك ده ، ولو مرات ابني عندكم مش ادهم اللي هييجي ياخدها من هنا ، انا اللي هاخدها من هنا بنفسي ، يلا محمود ، وجودنا هنا دلوقتي ملوش داعي .
ينصرف عامر الفيومي ومعه اخاه محمود و نور وزياد ويقتادون سيارتهم .
محمود : هنمشي يا عامر ؟ افرض مشينا من هنا وادهم وصل بعدنا ؟ هتبقي كا.رثة !!!
عامر : مش هنمشي الا لما اعرف هو فين .
وقبل ان يبتعدوا كثيرا عن الفيلا يحاول عامر الاتصال بأدهم عدة مرات فيجد هاتفهه مازال مغلق فيتصل بصديقه نادر .....
في المنصورة
يخرج ادهم من منزل الحاج ابراهيم ويركب سيارته بعصبية بالغة وينطلق من امام المنزل وخلفه سيارات الحراسة !!!
نادر : فيه ايه يا ادهم ؟ ايه اللي حصل ؟
لا يرد عليه ادهم ويظل صامتا !!
نادر : بقولك فيه ايه يا ادهم ؟؟؟
ادهم " بعصبية " : اسكت خالص .
يظل ادهم اثناء قيادته لسيارته شارد الذهن يتذكر ما حدث منذ أن رأتها عينيه اول مرة .........
فلاش باك ...
حين كان يقود سيارته وظهرت فجأة أمامه مباشرة فتاة ترتدي فستان أزرق لامع تجري بسرعة وكأنها تهرب من شيئا ما حتي أنها لم تلاحظ سيارته القادمة بسرعة فيصدمها بسيارته وينزل منها ليجدها غارقة في د.مائها فينقلها الي المستشفي !!
يتذكر حين انصراف الممرضة ثم دخل الي الغرفة ونظر اليها وبمجرد أن وقع نظره عليها انبهر بجمالها !!!
حين كانت تتمدد علي السرير وكانت شديدة الجمال حتي انها تبدو وكأنها ملاك من السماء أو حورية من الجنة بتلك الملامح البريئة الفاتنة وشعرها الناعم المسترسل علي الوسادة .
ثم يتذكر حين افاقتها من العملية
عندما قالت له ملاك " ببراءة " : مش انت جوزي حبيبي يعني المفروض تقولي يا حبيبتي مش تناديني باسمي !!
يتذكرها حين قالت...
ملاك : انت اللي تديني الدواء بايدك .
أدهم : ماشي لما نشوف اخرة الدلع ده .
وعندما اعطاها الدواء بيده ، ثم ابتسمت وقالت : كده الدواء بقي طعمه حلو .
وتتوالي مشاهد ذكرياته معها منذ ان رأها في مخيلته وفجأة .....
باااك
نادر : حاسب يا ادهم كنت هتعمل حادثة !!! طيب سيبني اسوق انا يا ادهم مكانك .
ثم يقف ادهم بسيارته علي جانب الطريق وتقف خلفه باقي سياراته .
ادهم : خد الرجالة يا نادر و روحوا انتوا .
نادر : لأ يا ادهم انا مش هسيبك وانت في الحالة دي ، احنا اصحاب ومينفعش اسيبك في الحالة دي لوحدك .
ادهم : انا عايز اكون لوحدي شوية بعد اذنك .
نادر : يا ادهم ....
ادهم : اسمع اللي بقولك عليه يا نادر .
نادر : حاضر يا ادهم .
وقبل انصراف نادر يأتيه اتصال من عامر الفيومي !!!
نادر : عامر بيه بيتصل .
ادهم : بابا بيتصل عليك انت ليه ؟
نادر : اكيد علشان تليفونك مقفول .
ادهم : طيب هات الفون .
يرد ادهم علي والده ..
ادهم : ايوه يا بابا .
عامر : انت فين يا ادهم ؟؟
ادهم : خلاص انا راجع علي القصر .
عامر : راجع فين ؟!! انا واخواتك وعمك محمود في القاهرة عند جاسر الغمراوي وكنت متوقع الاقيك هناك !!!
ادهم : وليه روحتوا هناك يا بابا ؟؟
عامر : المهم قولي انت فين دلوقتي ؟؟
ادهم : انا في مكان تاني خالص وراجع علي القصر ، اطمنوا وروحوا انتوا وانا جاي وراكم علطول .
عامر : لقيت ملاك ؟؟
أدهم : لما ارجع يا بابا نبقي نتكلم ، سلام .
ينهي ادهم المكالمة ثم يقول لنادر : يلا يا نادر امشوا انتوا .
نادر : بردو مصمم ؟؟
ادهم : ايوه ، انا هقف هنا شوية واروح علي القصر .
ينصرف نادر مع باقي الحراسة .
يقف نادر علي جانب الطريق الزراعي بينما يتسلل ضوء الصباح الي السماء ولا يشغل ذهنه الا ذكرياته مع ملاك ( يارا ) وشعوره الان بالخديعة منها !!
تظهر الشمس وتطل باشعتها الي سماء الكون .
يعود أدهم الي سيارته ويجلس فيها قليلا قبل ان يتحرك .
عاد ادهم الي القصر صباحا ، وما أن دخل القصر حتي هرول اليه الجميع ...
هاجر : حمدلله ع السلامة يا ادهم ، انت كويس ؟؟
اشار لها برأسه بالايجاب .
عامر : كنت فين يا ادهم ؟ و فين مراتك ؟
ادهم : معلش يا بابا ، انا طالع انام دلوقتي .
عامر : طيب طمنا الاول وبعدين اطلع نام .
أدهم : بعد اذنكم .
#ملاك_الأدهم #الحلقة_الخامسة_عشر
#الكاتب_عادل_عبد_الله
عامر : كنت فين يا ادهم ؟ و فين مراتك ؟
ادهم : معلش يا بابا ، انا طالع انام دلوقتي .
عامر : طيب طمنا الاول وبعدين اطلع نام .
أدهم : بعد اذنكم .
انصرف ادهم وصعد الدرج الداخلي للقصر الي غرفته .
هاجر : ادهم ماله يا عامر ؟؟ انا اول مرة اشوف ادهم ابني بالشكل ده !!!
عامر : شكله مصدوم !!! المهم اننا مطمنين انه وسطنا دلوقتي ، لما يقوم من نومه نبقي نشوف اللي حصل ، يلا احنا كمان لازم ننام .
نور : يلا يا تمارا نطلع ننام .
تمارا : مش هتروح الجامعة ؟؟
نور : لأ مش رايح النهاردة ، احنا منمناش طول الليل .
نانسي : هو ابيه ادهم ماله يا زياد ؟؟
زياد : انا مش فايقلك دلوقتي يا نانسي ، انا طالع انام .
شيرين : ادهم ماله يا بابا ؟؟
محمود الفيومي : مش عارف يا شوشو ، لكن واضح عليه انه فعلا مصدوم من حاجة ، هي ايه لسه معرفش !!
قبل العصر بقليل
يبدأوا جميعا في الاستيقاظ واحدا تلو الاخر ما عدا ادهم مازال نائما في غرفته !!!
عامر : معقول لسه ادهم نايم لحد دلوقتي ؟!!
هاجر : ايوه ، حاولت اصحيه من ربع ساعة مرضيش يقوم .
الجد سليمان الفيومي : اطلعي يا هاجر قولي لأدهم جدك سليمان عايزك .
تجلس العائلة كاملة ويبدو علي وجوههم الوجوم والحزن ، بينما ينزل ادهم بخطي بطيئة علي غير عادته !!!
الجد سليمان الفيومي : ايه يا ادهم النوم ده كله ؟!!
ادهم : معلش يا جدي حاسس اني تعبان شوية .
الجد : عملت ايه البارح يا ادهم ومراتك فين ؟؟
يدير ادهم وجهه " ضيقا بالسؤال " .
الجد : مالك يا ادهم ؟ فيه ايه ؟؟
ادهم : مفيش يا جدي ، بس لو سمحت مش قادر اتكلم دلوقتي .
هاجر : يعني ايه مش قادر تتكلم ؟ اتكلم وطمنا ايه اللي حصل ؟
عامر : اتكلم يا ادهم ، انا من بالليل لحد دلوقتي وانا حاسس اني تايهة ومش فاهم حاجة !!!
ادهم : يابابا ....
الجد : اتكلم يا ادهم وطلع اللي جواك ، مش هتفضل ساكت كده واحنا كلنا حواليك مش فاهمين حاجة !!
ادهم : حاضر يا جدي ، بأختصار مراتي ماتت .
عامر : اييييه !!! ماتت ازاي ؟؟؟
الجد : لا حول ولا قوة الا بالله ، ماتت ازاي يا ادهم ؟ حادثة ولا حد عمل فيها حاجة ؟؟
ادهم : لا يا جدي مش قصدي ، انا قصدي انها ماتت بالنسبالي .
الجد : ايه اللي حصل يخليك تقول كده ؟؟
ادهم : مش عايز اتكلم يا جدي بعد اذنك في الموضوع ده .
الجد : يا ادهم انت ابننا وانت بالذات لك معزة خاصة عندي ولو مش هتتكلم عن مشاكلك معانا هتتكلم مع مين !!
ادهم : انا خلاص قفلت الموضوع ده يا جدي ومش هتكلم فيه مع اي حد .
الجد : بقي كده يا ادهم ؟!!
ادهم : اسف يا جدي ، أنا اول ما اكون قادر اتكلم اول حد هتكلم معاه اكيد انت يا جدي .
الجد : مش هغصب عليك اكتر من كده .
كانت شيرين تستمع لكلمات ادهم وتري حزنه الواضح عليه مما أشعرها بسعادة بالغة لأنها ازاحت ملاك عن طريقها للوصول لقلبه .
اول من لاحظ ذلك كانت اختها تمارا التي قالت لها : حاولي تداري فرحتك دي شوية .
شيرين : ليه ؟ وفيها ايه لما افرح ان حبيبي هيرجعلي ؟!
تمارا : فيها ان شكلك هيكون وحش اوي لما ادهم يكون حزين بالشكل ده و البيت كله حزين علشانه وانتي تكوني فرحانة !! واقولك نصيحة مني يا شوشو بلاش تحاولي تقربي من ادهم علي الاقل دلوقتي .
بعد مرور عدة ايام .....
في منزل الحاج ابراهيم
الحاج ابراهيم : يارا يا بنتي .
يارا : نعم يا خالو .
الحاج ابراهيم : هتفضلي حبسه نفسك كده ولا بتخرجي من اوضتك ولا بتكلمي حد ؟!!!
يارا : معلش يا خالو لما اعصابي ترتاح هخرج .
الحاج : انا نفسي تقعدي معايا انا وهيام بنت خالك شوية نتكلم مع بعض لحد ما نلاقي الحل اللي يرضيكي ويريحك .
يارا : نتكلم في اي حاجة الا الموضوع ده .
الحاج ابراهيم : يعني انتي خلاص مش ناوية ترجعي لجوزك تاني ؟؟
يارا : ايوه يا خالو .
تدخل هيام الغرفة مسرعة تنادي يارا بلهفة...
هيام : يارا .. يارا
يارا : نعم يا هيام فيه ايه ؟
هيام : طنط نجلاء مرات عم عز الدين الله يرحمه تحت وعايزة تقابلك .
يارا : طنط نجلاء !!! و هي عرفت اني هنا ازاي ؟؟
هيام : معرفش .
الحاج ابراهيم : هتقابليها يا بنتي ولا مش عايزة تقابليها ؟؟
يارا : مش عارفة يا خالو ، انا مش عارفة هي عايزة مني ايه ؟؟
الحاج ابراهيم : مهما كان الست في بيتنا ، انا هنزل اقابلها واشوفها عايزة ايه علي ما تنزليلها .
يارا : ماشي يا خالو .
الحاج ابراهيم : يا مرحب يا مرحب ، ازيك يا نجلاء هانم .
نجلاء : ازيك انت يا حاج ابراهيم .
الحاج ابراهيم : الحمد لله في نعمة ، اولادك عاملين ايه ؟
نجلاء : الحمد لله بخير بس بنتي الكبيرة مزعلاني .
الحاج ابراهيم : بنتك جودي ؟ مش هي اسمها جودي بردو ؟
نجلاء : لا يا حاج انا مش قصدي جودي ، انا قصدي يارا ، مش يارا بردو زي بنتي ولا ايه يا حاج ابراهيم ؟
الحاج ابراهيم : ايوه طبعا زي بنتك وانا بعتبرك زي المرحومة اختي تمام .
نجلاء : انا مربية يارا وكان عمرها سنتين و اول ما كبرت وبقيت عروسة كبرت عليا ومبتسمعش كلامي وكمان بتتحداني .
تدخل اليهم يارا ومعها هيام ......
يارا : وانا عمري ما اتحديتك ابدا يا طنط وطول عمري بسمع كلامك وبعاملك علي أنك في منزلة ماما الله يرحمها .
نجلاء : بأمارة أنك بعد ما عزمت الناس علي حفلة خطوبتك سيبتي البيت وهربتي وخلتيني في نص هدومي !!!
يارا : يا طنط ما انا قولت لحضرتك كتير اني مش عايزة اتجوز جاسر !!
نجلاء : شوفت يا حاج ابراهيم بنت اختك اللي كانت لسه بتقول بتسمع كلامي بترد عليا ازاي ؟!!!
الحاج ابراهيم : يا نجلاء هانم البنت تسمع كلامك في اي حاجة الا في الجواز لازم تكون موافقة وراضية ، الشرع بيقول كده ولو بنتي نفسها رفضت عريس مش ممكن انا اجبرها عليه .
نجلاء : انت كمان بتشجعها يا حاج ؟؟
الحاج ابراهيم : انا بتكلم الكلام الصح اللي يرضي ربنا ومفيش حد يقدر يقول غيره .
نجلاء : يعني عجبك لما هربت من الفرح وفضحتنا ؟!! وكمان راحت اتجوزت من ورا اهلها ؟!! هو ده اللي يرضيك يا حاج ابراهيم ؟؟
يارا : انا معملتش حاجة غلط ، انا اتجوزت .
الحاج ابراهيم : ايوه يا نجلاء هانم يارا بنت اختي اتجوزت علي سنة الله ورسوله وكلمتني واخدت موافقتي قبل كتب الكتاب .
نظرت يارا لخالها بتعجب ثم قالت : ايوه يا طنط ، خالو ابراهيم انا اخدت موافقته ووافق علي جوازي قبل ما اتجوز .
نجلاء : وعرفت كمان انك اتطلقتي منه
يارا " بتعجب " : وعرفتي ازاي ؟
نجلاء : انا مفيش حاجة بتستخبي عني ، علي العموم احنا ممكن ننسي كل اللي فات ونبدأ صفحة جديدة يا يارا .
يارا : تقصدي ايه ؟
نجلاء : قصدي ترجعي بيتك وسط اخواتك وتتجوزي جاسر اللي بيحبك وصدقيني يا بنتي مش هتلاقي حد يحبك ويصونك زي جاسر ابني .
يارا : يا طنط ...
الحاج ابراهيم : طيب نأجل الكلام في الموضوع ده يا نجلاء هانم دلوقتي لأن يارا لسه نفسيتها واعصابها تعبانه .
نجلاء : ماشي يا حاج ابراهيم وانا هكبرك واسمع كلامك واديها مهلة اسبوعين علي ما اعصابها ترتاح .
الحاج ابراهيم : ربنا يعزك يا نجلاء هانم كلك ذوق وبتفهمي في الاصول .
نجلاء : طيب أستأذن انا بقي علشان ارجع بدري .
الحاج : لا يمكن ابدا لازم نتغدا مع بعض .
نجلاء : لا سامحني يا حاج خليها مرة تانية .
أنصرفت نجلاء من المنزل فجلس الحاج ابراهيم بالقرب من يارا وقال لها : ناوية علي ايه يا بنتي ؟
يارا : من ناحية ايه يا خالو ؟
الحاج ابراهيم : من ناحية حياتك !! يعني مش ناوية فعلا ترجعي لأدهم ؟؟
يارا : لا يا خالو .
الحاج ابراهيم : مادام كده رافضة تتجوزي جاسر ابن نجلاء ليه ، اللي اعرفه انه شاب كويس واي بنت تتمناه !!
يارا : لكن انا مش برتاحله .
الحاج ابراهيم : عايزة نصيحتي يا يارا يا بنتي ؟
يارا : اتفضل يا خالو .
الحاج ابراهيم : لو مش هترجعي لأدهم يبقي الاحسن ليكي انك تتجوزي جاسر ، الشاب ده اذا كان متمسك بيكي للدرجة دي يبقي اكيد بيحبك وهيسعدك ، ده رأيي يا بنتي والرأي الأول والأخير ليكي .
يارا : سبني افكر يا خالو .
الحاج ابراهيم : انا قولتلها تديني فرصة علشان تفكري برحتك وتاخدي القرار السليم .
بعد عدة ايام ....
في شركة الفيومي
يجلس ادهم في مكتبه و يدخل اليه صديقه نادر .
نادر : انت لسه قافل علي نفسك ومش عايز تتكلم حتي هنا في الشغل ؟!!
ادهم : انا جيت الشغل علشان اخرج من اللي انا فيه ، لكن مفيش فايدة !!
نادر : صدقني يا ادهم لو اتكلمت هترتاح ، انت دلوقتي سامع صوت عقلك وبس ، انما لو اتكلم هتسمع صوت تاني ممكن يخفف من ألمك وحزنك .
أدهم : عندك حق يا نادر ، اقفل الباب وتعالي اقعد هنا .
ذهب نادر ليغلق الباب واذا به يفاجئ بشيرين قادمة !!!!
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
الحلقه الثالثه والرابعه من هنا
الحلقه الثامنه والتاسعة من هنا
الحلقه العاشره والحادية عشر والثانية عشرة من هنا
الحلقه الثالثه عشر والرابعة عشرة والخامسة عشرة من هنا
تابعوا صفحتي عليها كل الروايات بدون لينكات علشان يوصلكم اشعار فور نزول الروايات من هنا 👇 ❤️ 👇
❤️💙🌺🌹❤️💙🌺🌹❤️💙🌺🌹❤️💙🌹🌺💙❤️
تعليقات
إرسال تعليق