رواية ملاك الأدهم الحلقه السابعه بقلم الكاتب عادل عبدالله حصريه وجديده
هاجر : بتقول ايه ؟!!!!
ثم تفقد اعصابها وتسقط فاقدة للوعي !!!!!!
تقوم تمارا وشيرين بافاقتها ثم يذهبوا مسرعين الي المستشفي ...
في المستشفي
يرقد ادهم بعد ان اصيب بعدة كسور في ساقيه الاثنتين وتم تجبيرهما .
بمجرد رؤيته تهرول اليه هاجر ...
هاجر : يا حبيبي يا ابني !! حصلك ايه يا حبيبي ؟ حصلك ايه يا ادهم ؟؟
ادهم : متخافيش يا امي الحمد لله جات بسيطة .
هاجر : بسيطة ازاي والكسور دي كلها ؟!!!
هرولت اليه شيرين وجلست بجانبه وحاولت اظهار اهتمامها وقلقها عليه : الف سلامة عليك يا ادهم ، انا اتخضيت عليك اوي ، طمني حصلك ايه ؟
ادهم : الحمد لله حادثة بسيطة ، اومال فين ملاك ؟؟
تمارا : الف سلامة عليك يا ادهم .
ادهم : الله يسلمك ، بقولكم فين ملاك ؟؟
شيرين : منعرفش هي فين ، احنا اول ما عرفنا بالحادثة جرينا علشان نطمن عليك .
ادهم : متشكر اوي يا شيرين .
شيرين : ايه اللي بتقوله ده يا ادهم !! ده احنا د.م واحد احنا ولاد عم ووو..
يقاطعها ادهم ويقول : ماما كلمي ملاك وقوليلها تيجي .
 |
بعد نصف ساعة جاءت ملاك وبمجرد دخولها شاهدت ادهم يرقد وساقيه في الجبس وبجواره مباشرة شيرين التي بمجرد رؤيتها لملاك اقترب بشدة من ادهم وقالت له : استني يا ادهم اعدلك المخده اللي ورا ضهرك .
اشتاطت غيظا وحرت الي ادهم وازاحت شيرين جانبا ...
ملاك : حبيبي يا ادهومتي ، حصلك ايه يا روحي ؟
ادهم : الحمد لله حادثة بسيطة .
ملاك : بسيطة ازاي وكل الجبس ده !!
ادهم : الحمد لله انها جات علي قد كده ، انتي مش جيتي مع ماما وبنات عمي ليه ؟
ملاك : انا معرفتش الا لما طنط اتصلت بيا من نص ساعة .
شيرين تقف غاضبة وتشعر بأن خطتها فشلت وتنظر بغيظ ثم تزيح ملاك من جواره قائلة : وسعي كده علشان ادي لأدهم الدوا .
ملاك : لأ ادهم هياخد الدوا من ايدي انا ،صح يا ادهم ؟؟
يبتسم ادهم : فاكرة لما كنت بديلك الدوا بايدي ؟
ملاك : ايوه وده دوري انا دلوقتي ، ثم تاخذ كوبا من الماء وتعطي لأدهم الدواء .
تخرج شيربن من الغرفة مسرعة في قمة غضبها وتنصرف !!
في فيلا عز الدين
نجلاء : لسه لحد دلوقتي موصلتش لأي اخبار عن يارا ؟؟
جاسر : عملت كل حاجة يا ماما وموصلتش لحاجة زي ما تكون فص ملح ودابت وملهاش اي أثر !!
نجلاء : يعني تكون اختفت فين ؟
جاسر : انا مسبتش حد من صحباتها الا وسألتها حتي المستشفيات واقسام الشرطة سألت فيهم ومفيش أي خبر عنها ولا حد يعرف هي فين !!
نجلاء : انا كمان سألت كل قرايب باباها ومامتها ومحدش يعرف عنها حاجة !!
جاسر : والعمل ايه ؟؟ احنا لازم نلاقيها في اقرب وقت !!
نجلاء : نا بفكر اعمل اعلانات ضخمة علي مواقع السوشيال ميديا واعرض مكافأة كبيرة لأي حد يقولنا اي خبر عنها .
جاسر : فكرة حلوة هتعرضي مكافأة كام ؟؟
نجلاء : ١٠٠ الف جنية مش خسارة فيها المهم نعرف مكانها .
جاسر : مش مهم الفلوس ،المهم خلي بالك علشان اكيد هتلاقي نصابين يحاولوا ينصبوا علينا !!
نجلاء : متخافش ، انت هتبقي جنبي ومفيش حد هياخد مني جنية واحد الا لما أتأكد من مكانها الأول .
في قصر الفيومي
تمارا : اهدي يا شيرين متعمليش في نفسك كده .
شيرين : مش عارفة اعمل ايه !! البنت دي سيطرت علي قلبه واهتمامه بشكل غريب !! عمري ما تخيلت ان ادهم يحب حد بالشكل ده !!
تمارا : انا قولتلك خلاص انسي اللي في دماغك خلاص ادهم مش ليكي .
شيرين : وانا قولتلك ادهم ده ملكي انا لوحدي .
تمارا : انتي كده بتعاندي نفسك ومش هتسفيدي حاجة بالعكس كل يوم هيزيد غضبك عن اليوم اللي قبله لما تشوفي حبه واهتمامه بها !!
شيرين : بكره تشوفي انا هعمل ايه ؟؟
تمارا : ممكن تعرفيني ناوية تعملي ايه ؟
شيرين : اولا انا شايفة مرات عمي مش مرتاحة للبنت دي هبتدي اغذي الاحساس ده عندها اكتر واكتر ومن ناحية تانية لازم اعرف البنت دي مين وايه اللي وراها .
تمارا : وهتعرفي هي مين ازاي ؟ اذا كانت هي نفسها مش عارفة هي مين !!
تضحك شيرين : التكنولوجيا يا حبيبتي ، التكنولوجيا هي اللي هتقولي هي مين .
تمارا : ازاي ؟؟
شيرين : هصورها صورة واعمل عنها بحث علي السوشيال ميديا ، اكيد هيكون لها صورة علي حساب فيس ولا انستا ولا اي موقع ، ومنه احدد شخصيتها واعرف كل حاجة عنها .
تمارا : انتي مصيبة !! ازاي جاتلك الفكرة دي ؟؟ خلي بالك صعب تصوريها
شيرين : انا صورتها فعلا بدون ما تشعر لكن للاسف الصورة مش واضحة اوي ، لازم اصورها صورة تانية .
في المستشفي
ملاك : ادهومتي فيه واحد بره اسمه نادر بيقول انه صاحبك ؟!
ادهم : ايوه ده نادر صاحبي خليه يدخل بسرعة .
دخل نادر الي الغرفة ...
نادر : سلامتك يا ادهم ايه اللي حصل ؟؟
ادهم : حادثة بسيطة .
نادر : بسيطة ازاي ؟! ده انت اتكسرت !!
ادهم " يضحك " : الحمد لله ، عمر الشقي بقي .
نادر " يضحك ويغمز بعينه اتجاه ملاك " : ايوه وانا عارفك طول عمرك شقي .
ادهم : لم نفسك يا صاحبي المدام واقفة !!
ملاك " تبتسم " : احم احم ، طيب اخرج انا واسيبكم علي راحتكم .
ادهم : ماشي يا ملاك ، والله كلك ذوق .
تخرج ملاك خارج الغرفة وتغلق الباب خلفها ...
نادر : ايه يا صديقي انت استحليت الموضوع ولا ايه ؟!!
ادهم : موضوع ايه مش فاهم ؟!!
نادر : البنت دي يا ادهم ، انت نسيت ولا ايه ؟؟
ادهم : قصدك ملاك ؟؟
نادر : الله اعلم اسمها ايه ، ايوه اللي انت سميتها ملاك .
ادهم : ملاك مراتي يا نادر .
نادر : مش كان اتفاقنا انك هتقطع كل الاوراق بعد خروجها من المستشفي ؟!
ادهم : يعني كنت عايزني اسيبها في الشارع وهي متعرفش حاجة عن نفسها او اهلها او حتي عايشة فين ؟!!
نادر " يصمت قليلا يفكر ثم يسأله " : هي راحت معاك قصر الفيومي ؟؟؟
ادهم : طبعا .
نادر : وقولت لعيلتك ايه ؟
ادهم : قولتلهم مراتي اتجوزتها .
نادر : يعني هي عايشة معاك في القصر دلوقتي ؟؟
ادهم : ايوه .
نادر : انت دخلت عليها يا ادهم ؟؟
ادهم : ملاك مراتي ومهما حصل مش هسيبها ابدا .
نادر : اوعي تكون عملت دخلة يا ادهم !! احنا كنا بنقول اننا منعرفش اذا كانت متجوزة ولا مخطوبة ولا مرتبطة !! لو عملت كده ذنب البنت دي هيبقي في رقبتك و هتكرهك و عمرها ما هتسامحك ابدا .
ادهم : نادر انت صحيح صحبي لكن موضوع الدخلة ده حاجة خاصة مينفعش تتكلم فيها معايا !!
نادر : ده لما جوازك يكون حقيقي يا ادهم ، مش جواز صوري زي كده !! ولما احس انك هتعمل غلطة كبيرة واجب عليا انبهك .
ادهم : ملاك انا حبيتها بجد وهتكمل معايا حياتي ومش هسمح لحد ابدا يبعدها عني .
نادر : حبيتها !! ادهم الفيومي بيتكلم عن الحب ؟؟ غريبة دي !!!
ادهم : وفيها ايه ؟ حد قالك ان معنديش احساس ومشاعر ؟!!
نادر : كمان بتتكلم عن الاحساس والمشاعر ؟ ده كده الموضوع كبير بجد .
ادهم : انت لسه مش مصدق اني حبيتها فعلا ؟!
نادر : ماشي يا صديقي حبيتها ، وهتعمل ايه لما ترجعلها الذاكرة ؟؟ اكيد هتكون عايزة ترجع لحياتها وتنساك !!
ادهم : حتي لما ترجعلها الذاكرة مش هسمح انها تبعد عني .
نادر : هتغصبها انها تعيش معاك غصب عنها ؟؟
ادهم : بلاش نتكلم في الموضوع ده دلوقتي ونسبق الاحداث .
نادر : انت عرفت هي مين ولا لسه ؟
ادهم : معرفتش ومش عايز اعرف .
في قصر الفيومي
يجلس عامر الفيومي مع هاجر في حديقة القصر يتناولون الافطار....
هاجر : هتروح الشركة دلوقتي ولا هتروح لأدهم المستشفي ؟؟
عامر : هروح الشركة نص ساعة اشوف الشغل وبعد كده هروح لأدهم ، تيجي معايا ؟
هاجر : لأ روح انت ، وانا هروح مع نانسي وملاك .
عامر : هي ملاك رجعت البارح من المستشفي ؟؟
هاجر : ايوه ، كانت في المستشفي من كام يوم وادهم صمم البارح انها ترجع القصر علشان ترتاح .
عامر : اوكي .
هاجر : مالك يا عامر ؟ شكلك متضايق من حاجة !!!
عامر : مرات ابنك .
هاجر : قصدك ملاك ؟
عامر : ايوه ؟
هاجر : مالها ؟
عامر : البنت دي لغز بالنسبالي .
هاجر : مش فاهمة تقصد ايه ؟
عامر : اوقات احس انها طيبة اوي وبنت ناس واوقات تانية احس انها خبيثة ومش فاقدة الذاكرة وبتدعي كده لسبب ما في نفسها !!
هاجر : من ناحية انها بتدعي فقدان الذاكرة ده انا مش معاك فيه البنت فعلا فاقدة الذاكرة انما احساسك بعدم الارتياح لها بيأكد نفس الاحساس عندي .
عامر : طيب انتي مش مرتاحة لها ليه ؟؟
هاجر : معرفش السبب ، يمكن علشان الطريقة اللي ادهم اتجوزها بها !!
عامر : عموما الايام هتثبت كل حاجة ، انا ماشي رايح الشركة ونتقابل عند ادهم في المستشفي .
تمارا نائمة في غرفتها تستيقظ علي صوت دقات علي باب غرفتها !!
تمارا : مين ؟
شيرين : انا اختك شيرين .
تمارا : ادخلي يا شوشو .
تدخل شيرين وتبدو عليها علامات السعادة والفرح !!
تمارا : مالك يا بنتي فيه ايه ع الصبح ؟
شيرين تضحك ثم تقول : يارا عز الدين .
تمارا : مين ؟
شيرين : يارا عز الدين .
تمارا : مين دي ؟؟
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
الحلقه الثالثه والرابعه من هنا
الحلقه الثامنه والتاسعة من هنا
تابعوا صفحتي عليها كل الروايات بدون لينكات علشان يوصلكم اشعار فور نزول الروايات من هنا 👇 ❤️ 👇
❤️💙🌺🌹❤️💙🌺🌹❤️💙🌺🌹❤️💙🌹🌺💙❤️
تعليقات
إرسال تعليق