روايه اعمي ولكن الفصل الثاني والثالث بقلم إسراء محمود حصريه وجديده على مدونة النجم المتوهج للروايات والمعلومات
 |
روايه اعمي ولكن الفصل الثاني والثالث بقلم إسراء محمود حصريه وجديده على مدونة النجم المتوهج للروايات والمعلومات
" قسوة الحياة تقوى القلب وتجعله يقسي على كل من حوله حتى حب حياته فهل ستظل هذة القسوة ام ستأتى من تُنير عتمة هذا القلب "
اشرق يوم جديد استيقظت ليان ونزلت درجات السلم برشاقه
ليان ..دادة يا دادة.
الدادة ..نعم يا لي لى.
ليان باستغراب ..فين بابا يا دادة مش لقيتوا فى اوضته؟؟
الدادة .. عاصم بيه صحي الصبح بدرى وسافر.
ليان بتذكر..اة صح نسيت.
الدادة ..احضرلك الفطار بقا؟؟
ليان..لا يا دادة شكرا هروح افطر مع ندى بقا.
الدادة ..ماشي يا حبيبتى.
خرجت ليان وقادت سيارتها بجنون ووصلت إلى بيت ندى..
طرقت الباب وفتحت لها والدة ندى
والدة ندى " ليلى " امرأة فى منتصف الأربعين من عمرها تمتلك طيبه وحنان إلى حد كبير تعتبر ليان ابنتها الثانيه .
ليلى ..الندله إللى مش بتسأل على مامتها بقالها كام يوم.
ليان وهى تقبلها ..عارفة انى مقصرة بس مشغولة بالجمعيه.
ليلى قرصتها من خدها.. متتكررش تانى.
ليان وهى تتملص من تحت ايديها .. حاضر يا فندم خلاص علم وينفذ.
ليلى ..ماشي إفراج ادخلى بقا صحي الحيوانه إللى جوا.
ليان بخبث..حاضر من عنيا.
دخلت ليان إلي المطبخ وأخذت زجاجة مياه باردة ودخلت غرفة ندى وجدت ندى نائمه على السرير بطريقه غريبه وغير مريحه اقتربت منها ليان وسكبت زجاجة المياه فوقها...
ندى بفزع ..ايه فى ايه البيت بيغرق 😐😐
ليان وهى تكاد تموت من الضحك على منظر ندى..ههههههه احسن علشان تفضلي نايمه كل دا.
ندى وهى تجرى خلفها بالشبشب..والله ما هرحمك يا ليان.
ليان وهى بتجرى..عااااااااااا يا ماما الحقيني.
ندى ..محدش هيلحقك منى اصبري عليا.
ليان وهى تختبئ وراء ليلي .. الحقيني يا ماما عايزة تضربني.
ليلي ..بس يا ندى ملكيش دعوه ب لي لي.
ندى بغضب ..على فكرة انا بنتك زيها.
ليلى ..لا هي اكتر.
ندى وهى تدبب بقدميها فى الارض ..دايما كدا نصرها عليا ماشي يا ليان هانم انا وانتي والزمن طويل.
ضحكت ليان عليها بخفه وبدأت تجهز مع ليلي الطعام..
عند يامن فى الفيلا استقيظ على يد تتحرك علي شعره..
يامن وهو يبعد يد والدته من على وجهه ..نعم عايزة ايه؟؟
كوثر بحزن من اسلوبها ..عايزة ابني يرجعلي تاني.
يامن بسخريه ..كان زمان يا كوثر هانم.
كوثر بدموع ..يامن انا عارفة اني غلطت بس انا كان لازم اعمل كدا انا مره واحده بقيت الام والاب ابوك بعد ما طلقني راح اتجوز واحده تانيه ونسينا وبقيت انا إللى بشتغل وبصرف على البيت علشان ابين انى مش محتاجه ليه ايوة انا غلطت بس انا حبه اصلح كل حاجه بنا ونرجع زي زمان.
يامن بسخريه..زمان.... زمان دا إللى هو ايه إللى انتي كونتي سيباني فيه لدادة.....زمان دا إللى كونتي شغله نفسك اذا البيه جوزك بيخونك ولا لا؟؟!......زمان دا إللى كونت لما اجي اكلمك او احكيلك عن حاجه كونتي تسبيني وتمشي وتقوليلى مش فاضيه دلوقتى يا يامن لما ابقا ارجعلك وياريتك بترجعي تقعدي معايا لا بترجعي تشوفي جوزك جه ولا لا عمل ايه مشي مع مين انما انا اخر اهتمامتك أو ممكن اصلا مكونش اي حاجه بنسبالك.
كوثر بدموع ..ارجوك يا يامن كفايه كفايه.
يامن ..انتي إللى خلتيني اتكلم ياريت تسيبيني فى حالى بقا.
كوثر ..بس انت حالى ازاى اسيبك.
يامن بسخريه ..زي ما سيبتيني زمان.
كوثر ..انا امك يا يامن.
يامن بحده..امي ماتت من زمان اتفضلي يلا برا.
خرجت كوثر ودموعها على وجنتها وقلبها مكسور على ابنها الذي وللأسف ضاع منها للأبد.
" أُصارع الماضي والذكريات لكى أُسامحكِ.....لكن فى كل مرة هما ينتصران عليَّ......ندمك اصبح لا يعنى لي شيئا فأنتى من تركتينى برغبتكِ......ليتنى أستطيع أن أُسامحكِ "
عند ندى وليان نزلا وذهبا إلي المول ليشتروا ملابس للجمعيه ويشتروا أشياء للفيلا وللحفل غدًا...
ليان ..بصي علشان نلحق نخلص انتى هاتى الهدوم وكل المستلازمات إللى هتحتاجها الجمعيه وانا هجيب مستلازمات الفيلا ونتقابل فى مطعم....
ندى ..تمام
بدأت ندى تشتري الملابس على أساس المقاسات التي أخذتها من مديرة الجمعيه..
ودخلت إلي محل ملابس رجالى لتشتري مستلازمات الأطفال والرجال الذين هناك
وهى في طريقها للدخول اصتدمت بشخص ما..
ندى وهى ترفع رأسها..انا اس....
جاسم ..انتى تانى؟!!!!
ندى بغضب ..انت بتراقبنى ولا ايه؟؟!
جاسم بسخريه..وانا هراقب واحده زيك ليه من جمالك؟؟!!
ندى بغضب وتحذير ..بقولك ايه اتعدل بدل ما انا اعرف ازاى اعدلك.
جاسم بعصبيه ..مين ديه إللى تعدلنى انتى شايفه نفسك على ايه يا بت انتى انا اقدر اعرفك مقامك بس انا بقول بردو اسمك بنت وبلاش سمعتك تبوظ.
ندى بعصبيه..انت شايف نفسك على ايه غور يلا من هنا مش ناقصه قرف هى.
وتركته وقبل أن تدخل إلي المحل سمعته وهو يقول.
جاسم بسخريه ..انا قولت راجل مسمعتيش كلامى اخرك داخله تشتري من محل رجاله صح هو دا مقامك وتركها وغادر المكان..
نزلت دمعه من ندى.
ندى لنفسها..اوعى تسمحي لحد تانى يجرحك اوعى تنزلى دمعه علشان شخص ميستهلش وقليل الذوق رأيه مش مهم فى حاجه طول ما انتى واثقه من نفسك .
مسحت دموعها ودخلت المحل اشترت كل ما كانت تحتاج إليه..
بعد فترة كانت ليان جالسة تنتظر ندى سمعت صوت الشخص الذى لا يغادر تفكيرها التفتت ليان ورأته لثانى مرة وهو يستند على عصاه التى ترشده للأماكن ومعه نفس الشخص الذى كان معه فى النادى كانت ليان تراقب كل حركه من يامن وكل تعبير يظهر علي وجهه.
عند يامن وجاسم
جاسم ..بس يا سيدي دا كل إللى حصل معرفش ليه كل شويه تطلعلى
يامن بعصبيه..وانت فرحان على إللى عملتوا فى البنت انت جرحتها حتى لو هى اتكلمت معاك بقله ذوق فانت مش من الذوق انك تجرحها وتجرح أنوثتها حتى لو هى مش حلوة متقولهاش كدا...
جاسم بحده..بس يا يامن هى إللى لسانها طويل وانا مش اى حد انا ظابط شرطه يعني ليا مركزى ومينفعش تقل ادبها عليا.
يامن ..مفيش سبب ممكن يخلينى اقف معاك انت إللى محترمتهاش ولازم تعتذرلها مفهوم يا جاسم.
جاسم ..بس......
يامن بحده ..مفيش بس هتروح تعتذرلها مفهوم؟؟!
جاسم ..حاضر فك بقا التكشيرة ديه.
يامن..اهو فكيتها.
جاسم ..لا مش كدا عايز اشوف ابتسامتك الحلوة.
ابتسم يامن ابتسامه جعلته أكثر وسامه وجمال...
عند ليان كانت سرحانه فى ابتسامته التي أخذت عقلها وجعلت قلبها ينبض بشكل سريع.
فجأة وجدت من يضربها على رأسها..
ليان..ااااه.
ندى..الهانم سرحانه ولا حست انى جيت واقعدت معاها.
ليان.. معلش يا ستى المهم جبتى كل حاجه.
ندى بحزن..اة.
ليان ..مالك؟؟!
ندى..اصل حصل .......
ليان بعصبيه ..دا انسان قليل الذوق ومش محترم ومش متربي و....
جاسم ..وايه تاني يا انسه؟؟
شهقت ليان بفزع ..انت مين؟!!
جاسم ..انا الشخص اللي قليل الادب وقليل الذوق ومش متربي.
ليان بإحراج..انا اسفه.
جاسم ..لا ولا يهمك.
هنا لاحظت ليان وجود يامن بجانب جاسم ويظهر على ملامحه الجديه.
جاسم وهو ينظر لندي ..انسه ....
ندى بعصبيه.. اسمي ندي.
جاسم ..ماشي انسه ندي انا كونت عايز اعتذر منك مكنش قصدي إللى انا قولتوا بس انتي إللى استفزتيني.
ندي بعصبيه ..انا بردو؟!!!!!!!
جاسم بحده ..ايوة انتي اومال هكون انا؟؟
ندي بعصبيه..لا واحد من الشارع.
يامن ..بس منك ليها وبعدين يا جاسم احنا مش جاين نتخانق انت جاي تعتذر وانتي يا انسه ندي بلاش نكبر الموضوع هو حس بغلطوا وجاي يعتذر.
جاسم ..عموما انا اسف يا انسه ندي.
ندي..وانا كمان اسفه يا استاذ.
جاسم ببتسامه ..اسمي جاسم.
ندي ..تمام.
جاسم ..اتشرفت بمعرفتك.
ندى ببرود ..انا لا.
جاسم اتعصب وبص ليامن.
ندي ضحكت ..بهزر والله.
جاسم بصلها بإعجاب لضحكتها.
لاحظت ندي هذا وشعرت بالإحراج...
يامن ..بعد اذنكم نستأذن احنا.
ليان ..اتفضلوا.
دق قلب يامن عندما سمع صوت ليان لكن التفت وغادر وجاسم معه أيضًا.
جاسم..بقولك فى سهره حلوة انهاردة وفيها شويه بنات مزززز يعنى ما تيجي معايا.
يامن بهدوء ..امتى ربنا يتوب عليك من القرف دا؟؟!
جاسم ..ما تيجي يا عم تعشيلك يومين.
يامن ..لا روح انت يا جاسم انت حر فى نفسك انا مش مستعد انى اغضب ربنا.
جاسم..ماشي انت حر بس انت إللى خسران على فكرة.
يامن ..ماشي.
عند ندى وليان
ندى..شوفتى اعتذرلى ازاى بس بردو انا مش هنسي إللى عملوا.
ليان.. لا يا ندى كدا غلط هو جه واعتذر منك يبقا تسامحى.
ندى ..مش سهل اسامحه انا لازم اهين رجولته زى ما أهانى.
ليان بطيبه ..لا يا ندى ربنا بيسامح احنا إللى بشر مش هنسامح؟؟!
ندى ..انتى قولتى ربنا وانا مش من سهل انى اسامح وانسي.
ليان..وانا مش بقولك تنسي بس لازم تسامحى طالما اعتذر.
ندى ..خلاص يا ليان نتكلم فى الموضوع دا بعدين.
ليان ..ماشي يلا قومى علشان تعدى على الجمعيه تديهم اللبس دا وانا هروح ابدا فى تجهيز الفيلا واشوف مهندسين الديكور ظبطوا ايه بظبط..
ندى ..اشطا.
غادرت ليان وندى وكل واحده ذهبت المكان الذي من المفترض أن تبدأ فى تجهيزه....
دخلت ليان غرفتها ونظرت إلي السماء لنجمة عالية جدااااا وتلمع بشدة..
ليان بدموع ..وحشتينى اووى يا ماما كان نفسي تكونى موجودة الفترة ديه بذات واجى كل يوم اترمى فى حضنك واحكيلك إللى عملتوا......بفرح جدا لما بساعد الناس زي ما كونتى انتى بتعملى بس أوقات بحس ان طيبتي الزيادة ديه مش حلوة بس انا مش هتغير لان انا صح لازم كلنا نبقا كدا.
بعد فترة دخلت ليان ونامت فى السرير وبدأت تتذكر يامن ببتسامته.....نظرة عيناه.....ملامحه....شياكته طردت الأفكار من رأسها ونامت بسلام..
فى مكان أخر....
م..هاااا فى جديد فى موضوع القضيه؟!
جاسم..يعني لسه مفيش اخبار غير اننا متابعين كل حاجه بس مفيش دليل.
م .. مش عايز غلط فى القضيه ديه بذات.
جاسم..تمام ان شاء الله.
م.. ماشي لما نشوف.
تاني يوم الصبح صحيت ليان وكلمت ندى..
ليان ..الو يا ندى لسه نايمه
ندى..لا صحيت اهو وهنزل اروح الجمعيه اجبهم معايا ونيجي على عندك.
ليان ..تمام وانا هقوم اجهز.
أغلقتت ليان مع ندى الخط وقامت وبدأت تتجهز أخرجت فستان من اللون الروز ووضعت لمسة من "الميك أب" رقيق جدا وتركت لشعرها العنان.
وعندما سمعت صوت الاتوبيس التابع للجمعيه نزلت ليان واستقبلتهم وبدأت الاغانى وبعض منهم بدأ يرقص مع ندى بجنون
والأطفال اخذوا يلعبون فى الأماكن التي خصصتها ليان لهم
والشباب جعلتهم يجلسون ويلعبون بعض الألعاب الذين يحبونها بطريقه مناسبة لهم
كانت ليان منشغله بكل تفاصيل الحفل وكانت مهتمه بالجميع..
فى مكان بعيد عن ليان بمسافه بسيطه كان يامن يتمشي وكان يسمع صوت ليان حوله مما جعله يستغرب لماذا لم تأتي لتسأل إذا كان بحاجة للمساعدة..... سرح فى طريقة كلامها مع الأطفال وطيبتها وتعاملها مع الناس ولكن فاق عندما سقط فى المسبح بدون أن ينتبه....
عند ليان كانت تتابع يامن بعينيها وكانت تريد الذهاب والتحدث معه لكن كانت خائفة من أن يجرحها مرة أخري لكنها انتبهت إليه عندما وجدته يقع في المسبح وبدون تردد أسرعت نحوه وقفزت في المسبح وبدأت تحاول رفعه وإنقاذه حتي أخيرا استطاعت أن تخرجه بعد محاولات......
ليان بخوف ..انت كويس حصلك حاجه؟؟
يامن وهو يحاول أخذ نفسه..انا كويس .
ليان ..طيب تعالا معايا جوا الفيلا اجبلك لبس بدل لبسك.
استسلم لها يامن ..ماشي.
أمسكت ليان يديه لترشده لمكان الفيلا.
أحس يامن بكهرباء في يده من لمستها....
ليان ..دادة يا دادة.
دادة..نعم يا لى لى.
ليان ..اطلعى فوق هاتى قميص وبنطلون من بتوع بابا وهاتى ليا معاكى تشيرت وبنطلون.
دادة..حاضر يا لى لى.
تحركت الدادة إلى الطابق العلوى لتجلب ما طلبته ليان.
جلست ليان ويامن فى غرفة الصالون.
ليان بإحراج..اسفه انى مهتمتش بيك من اول الحفله انا عارفة ان ده غلطى.
ابتسم يامن ..لا ولا يهمك انا إللى كونت سرحان ومخدتش بالى.
صمت كلاهما للحظات قاطعها يامن...
يامن ..انا اسف لو اتعصبت عليكى شويه فى الجمعيه بس الصراحه كونت حاسس انك مش متقبله وجودى.
ليان بإندفاع..لا خالص بس انا استغربت شويه انك يعنى وسيم وشيك وباين من مظهرك أنك مش محتاج مساعدة من حد زى بس هو دا إللى خلانى استغرب.
يامن ..مفيش حد مننا مش محتاج المساعدة ايوة انا مش محتاج فلوس او انك تسفرينى على حسابك علشان العمليه انا اقدر اعمل كدا بس انا محتاج الدفء إللى حستوا فى الجمعيه كونت مفتقد الابتسامه او الضحكه إللى بتطلع من القلب معاهم مش الابتسامه إللى احنا بنرسمها علشان نخفي وجع كبير جوانا انا زيي زيهم مفيش اختلاف كل واحد فينا عايز المساعدة ديه بس مع اختلاف اذا كانت المساعده ماديه او معنويه.
أعجبت ليان كثيرا بطريقه تفكيره..عندك حق كلامك كله صح حتى انا بفرح لما بكون معاهم وبحس ان احزانى كلها اختفت.
قاطع كلامهم دخول الدادة.
الدادة ..اتفضلي يا لى لى الحاجه إللى طلبتيها.
ليان ببإتسامه مشرقه ..اتفضل يا يامن ادخل اول اوضه ديه بتاعت المكتب غيّر فيها هدومك والدادة هتيجي تاخد منك هدومك المبلوله.
ابتسم يامن لها ..ماشي شكرا بس ممكن توصليني بقا للاوضه؟!
ليان ..طبعا يلا.
أمسكت ليان يد يامن والذي بدوره شد علي يدها أكثر.
أدخلته غرفة المكتب وخرجت وهي مبتسمه لانها تحدثت معه وفهمت ما يضايقه..
أبدلت ليان فستانها لبنطلون وتشيرت ابيض ولملت شعرها على هيئة ذيل حصان.
نزلت ليان من غرفتها وجدت يامن في إنتظارها.
ليان ..اسفه لو اتأخرت عليك.
يامن ..اصلا دا بيتك يعني تتاخري براحتك.
ليان..لا طبعا مينفعش اتأخر عليك.
يامن ..صح انتي قولتيلى قبل كدا اسمك اصل انا مش فاكر.
ليان ..اسمي ليان.
يامن ..اسمك حلو اووى.
ليان ابتسمت ..ميرسي وانت كمان اسمك حلو اووى.
يامن ..ربنا يخليكي.
ليان ضحكت ..طيب مش يلا نكمل الحفله برا علشان انا سايبه ندي لوحدها.
يامن ..ماشي يلا.
خرجت ليان ويامن يمشي كل منهم بجانب الأخر.
يامن... كان يشعر معها بسعادة لاول مرة يشعر بها.
ليان.... كانت تشعر بالإطمئنان وهي بجانبه.
ندى..ليان انتي روحتي فين فجاة كدا؟؟
ليان ..معلش كونت بعمل حاجه.
ندى انتبهت لوجود يامن ..ازي حضرتك.
يامن ..بلاش حضرتك ديه بحس اني كبير فى السن قولى يامن بس.
ندى ابتسمت ..تمام يا يامن.
ليان ..ايه رايك نرقص يا يامن؟؟
يامن ..هو انا معنديش مانع بس هرقص ازاى.
ليان ..سبلي نفسك بس.
يامن ..موافق.
أخذت ليان يد يامن وبدأت ترقص معه.
يامن كان يشعر بالفرح وهي بين يديه وترقص معه وليان كانت تشعر انها لاول مرة تشعر بالإنبساط مع أحد هكذا
انتهت الاغنيه وجدت ليان من يشدها من قدمها
ليان ..سارة عامله ايه؟؟
حضنتها ساره..كويسه بس انتي وحشتيني اووى يا لي لي.
قبلتها ليان من خدها ..انتي وحشتيني اكتر يا قلب لي لي.
يامن ..هي ليان بس إللى ليها الكلام دا وانا لا لا كدا انا ازعل.
احتضنت سارة يامن ..لا طبعا يا يامن انت اصلا أميري.
يامن ..وانتي أميرتي الصغيرة.
ساره ..طيب مش انا اميرتك؟؟
يامن ..اة طبعا.
سارة ..تعالا العب معايا انت ولي لي.
يامن ..انا موافق طبعا بس نشوف لي لي هتقول ايه.
ليان ..موافقه طبعا يلا نلعب.
أمسكت ليان يد سارة ويامن أمسك يدها الأخري.
ليان ..هاا يا ست سارة عايزة تلعبي ايه؟؟
سارة ..استغمايه واللى هيتمسك هيبقا هو إللى فيها.
ليان ..ماشي موافقه.
يامن وسارة فى نفس واحد ..انتي إللى فيها.
ليان ..ماشي لبست ليان طرحه على عنيها وطلعت تجرى وراهم.
ليان ..إللى همسكه فيكم هموتوا.
سارة وهي بتضحك وتجري ويامن بيجري معاها..
فجأة ليان حست ان فى حد وراها لفت وحضنته.
ليان ... مسكتك هييييييييه
صُدم يامن من ما فعلته ليان لم يكن ليتوقع ان تفعل هذا.
ابتعدت ليان بعد أن أدركت فعلتها.
ليان ..انا اسفه معلش مكانش قصدي.
يامن ..لا ولا يهمك.
سارة ..طيب نكمل لعب.
ليان بإحراج..لا خلاص يا ساسو كفايه كدا انهاردة انا تعبت.
ساره ..ماشي.
انتهي اليوم وودعت ليان يامن والباقية من الجمعيه..
وصعدت وارتمت فوق السرير بتعب وتذكرت اليوم من اوله حتي اخره وابتسمت.
عند يامن ذهب إلي بيته وصعد إلي غرفته ونام على السرير وابتسم عندما تذكر ليان وهى فى أحضانه كان يتمني أن تظل في حضنه للأبد ثم ابتسم ونام بسلام.
فى مكان أخر فى منطقة مهجورة..
عاصم ..طلبتني ليه انا سايب بنتى وشغلى علشانك.
الشخص ..عادى يعني يا عاصم الشغل اهم.
عاصم ..طيب فى جديد او حاجه؟؟
الشخص ..الشحنه هتدخل عن طريق عربيه شحن كبيرة تكون تبعك انت وكل دا هيتم اخر الشهر اهم حاجه متشككش فيك حد مش ناقصه هي لحد ما الشحنة تتم.
عاصم ..طيب وبنتي مفيش خطر عليها او ممكن حد يأذيها؟؟
الشخص..قولتلك لا الأمورة بتاعتنا محدش هيجي جمبها اطمن.
عاصم ..ماشي لازم اسافر دلوقتى علشان الحق اوصل لبنتي الصبح.
الشخص ..ماشي يا عاصم امشي بس بنبهك اي غلطه منك تساوي حياتك.
عاصم بخوف ..تمام.
رحل عاصم بخوف من مصيره المجهول
روايه اعمي ولكن
للكاتبه \esraa Mahmoud
🤩🤩🤩🤩🤩🤩🤩🤩🤩🤩
الفصل الثالث
" اتصارع مع الكثير من الأسئلة هل انتِ بشرٌ مثلنا ام أنكِ ملاك في هيئة انسان هذة الضحكه التي تنير لي قلبي هذا الحنان الذي لم أجد له مثيل هذا القلب المشع بالحب تجاهى فعَلَمَ قلبي ان كلمه احبك ما هي إلا كلمه صغيرة لقد وصل حبي لك إلى درجات من الجنون ..احبك وسأظل احبك "
استيقظت ليان هذا الصباح وهي تشعر بالحيوية والنشاط ونزلت تركض على درجات السلم..
ليان ..دادة يا دادة.
الدادة ..ايوة يا لي لي.
ليان ..بابا مكلمكيش يا دادة وقالك هيجي امتي.
قاطع كلام الدادة صوت عاصم..
عاصم ..انا جيت يا قلب بابا.
جرت ليان إلى والدها وتشبثت في رقبته.
ليان بشوق..وحشتني اووي اووي يا حبيبي اتأخرت اووى عليا.
عاصم ..معلش يا حبيبتي كان عندي شويه مشاغل.
ليان بدموع ..بردو مش تبعد عني كل دا تاني انا مليش غيرك مش كفايه ماما إللى ماتت وسبتني.
عاصم بحزن ..ربنا يرحمها يا حبيبتي وبعدين مش عايز اشوف الدموع ديه تاني عايزاني اتعب يعني وازعل منك.
ليان وهي تمسح دموعها مثل الأطفال ..لا خلاص انا بطلت عياط اهو.
وضع عاصم يده على كتف ليان ومشي بها حتي الصالون ..قوليلى عملتي ايه الكام يوم دول؟؟
ليان بحماس ..بص يا سيدي..........
كان يستمع لها عاصم باستمتاع فهي ابنته الوحيدة اغلى ما عنده فى الدنيا.
عاصم ..ويامن دا كويس يا لى لى.
ليان..اة يا بابا شكله طيب اووى.
عاصم بخبث ..وايه كمان؟؟
ليان بخجل ..على فكرة هو صديق بس وبعدين انا بساعده يخرج من إللى هو فيه لاني حاسه ان في حاجه مضايقاه.
عاصم ..ماشي يا لي لي المهم تخلى بالك من نفسك ولو في اي حاجه قوليلي.
ليان ..حاضر هقوم انا البس علشان اروح الجمعيه.
عاصم ..ماشي.
صعدت ليان وأبدلت ملابسها لتشيرت كت ابيض وفوقه جاكيت احمر وبنطال اسود ولملمت جزء من شعرها وتركت لشعرها الباقي العنان.
نزلت ليان برشاقه وركبت سيارتها وذهبت إلي بيت ندي.
ليان ..الو يا ندي.
ندي ..انتي فين يا بنتي انا لابسه بقالي ساعه ومستنياكي.
ليان ..انزلى خلاص انا تحت.
ندي ..طيب ثواني وهكون عندك.
نزلت ندي إلي ليان.
ليان ..انتي يا بنتي مش هتغيري طريقه لبسك ديه؟؟!
ندي ..مالها طريقه لبسي؟!!!
ليان ..يعني ولادي شويه امتى هتخرجى من إطار البس دا وتغيري من شكلك شويه.
ندى بعصبيه ..اغير شكلى لمين لشويه الحيوانات إللى ماشين فى الشارع دول إللى كل همهم انهم يبصوا على جسمنا وبس....
اغير شكلى علشان اجيب عريس حلو بدل ما اعنس ما إللى بيحب بجد هيجي ياخدك ومش هيفرق معاه لبسك ولا شكلك....
اغير شكلى علشان شويه ناس ملهمش حاجه غير انهم يتكلموا على إللى زيي ومش مهم يجرحوا مشاعرهم او لا المهم انهم يتكلموا....
انا يا ليان قررت انى هحافظ على إللى باقي منى ومش هيفرق معايا اى حد حتى الرجاله انا مش عايزة حد فيهم يقرب منى ولا عايزة أتجوز لان اكترهم بيكونوا حيوانات بيجروا ورا رغباتهم وبس ويقضوا وقت لطيف مع كل بنت شويه تحت مسمى انا راجل فا عادى انا مش هغير طريقه لبسي علشان حد يا ليان لما ابقا حاسه انى عايزة اغيرها هغيرها.....
ليان..انا اسفه يا ندى لو ضايقيتك مكانش والله قصدي حاجه.
ندى ..لا يا ليان مزعلتش انا عارفة انك عايزة مصلحتى وبعدين مقدرش اضايق منك انتى اختى يا بنتى.
حضنتها ليان بحب..وانتى اكتر من اختى.
ندى ..طيب مش يلا بقا بدل ما الناس تفهمنا غلط.
ليان ضحكت ..ايوة يلا.
بعد قليل توقفت سيارة ليان أمام الجمعيه نزلت ندي أولا ومن ثم دخلت إلي الجمعيه وبعد فترة ترجلت ليان من السياره ووجدت صغير يظهر على ملامحه الحزن وممسك بيد والدته.
ليان ..اهلا بحضرتك.
والدة الطفل ..اهلا بيكي انتي يا حبيبتي.
ليان ببتسامه ..اي خدمه اتفضلي.
والدة الطفل .. انا مامت ادهم وسمعت عنك وعن جمعيتك ولقيت دا انسب مكان ممكن يساعد ابني انه يتعايش مع الوضع إللى اتحط فيه غصب عنه ويرجع يبتسم تاني.
نزلت ليان إلي مستوي الطفل ..العسل دا مكشر كدا ليه مين مزعلك؟؟
ادهم ببرائة .. اولا انا زعلان علشان مش قادر اشوفك وانا سمعت من ماما انك حلوه اووى ولا شايف انتي فين وبضايق اني مش عارف العب مع اصحابي ولا اجرى زيهم.
إدمعت أعين ليان ومن ثم احتضنته.. طيب ايه رايك اننا هنلعب سوا؟؟... انا وانت وكتير ومين عارف بكرا ممكن تخف وترجع تشوف تاني.
ادهم بحماس ..بجد هو انا ممكن ارجع اشوف تاني.
ليان ..طبعا ليه لا؟!!
ادهم ..بس انا عايز اشوفك انتي اول واحده.
ليان ..يا سلام غالى والطلب رخيص.
ادهم ..هنبقا اصحاب؟؟
ليان ..احنا اصلا بقينا اصحاب خلاص ولا انت عندك مانع.
ادهم وهو يعدل من هيئته.. ازاى يكون عندي مانع وانا هصاحب واحده قمر زيك؟!!
ليان ضحكت ..بكاش.
وقفت والدة أدهم مبتسمة أن صغيرها عاد ليبتسم مرة أخري.
والدة ادهم..انا مش عارفة اشكرك ازاى انتى عملتي معجزة انك خلتيه يضحك.
ليان ..انا معملتش حاجه انا إللى بشكرك انك جبتيه الجمعيه واني اتعرفت عليه انا حبيته جدا.
والدة ادهم ..انتي ربنا هيقف جمبك اووى على كل إللى بتعمليه هنا وانا مجتش هنا غير لما عرفت عنك وعن جمعيتك.
ليان ..شكرا جدا ليكي وبصت ل ادهم ..مش يلا بقا يا دومي ندخل بقا جوا واعرفك على صحاب ليك جوا.
ادهم بحماس ..اوك يلا.
دخلت ليان وهي ممسكه بيد الصغير وهي تمزح معه وضحكاتهم تصدح في الأرجاء...
إقتربت ليان من يامن الذي كان جالسًا في الحديقة يشرب قهوته كالمعتاد...
ليان ..ازيك يا يامن.
يامن ابتسم ..كويس علشان سمعت صوتك.
ابتسمت ليان بخجل ..احب اعرفك على صديق جديد ليا هنا فى الجمعيه.
يامن ملامحه اتغيرت وحس بشعور غريب ..مين دا؟؟
ليان ابتسمت ..ادهم طفل عنده 7 سنين ودا يا ادهم يامن بس دا كبير اووى.
ادهم ..يعني عجوز ومش هيقدر يلعب معانا؟؟!
ضحكت ليان ونظر له يامن بإنزعاج..
ليان ..لا يا ادهم هو مش عجوز اووى.
ادهم ..طيب لو على كدا ماشي مد ايده ليه اهلا تشرفت بمعرفتك.
يامن ..انا اكتر.
ادهم ..طيب يلا هتقوم تلعب معانا ولا اخد مزتي وامشي؟؟
يامن بصدمه ..مزتك الواد دا انتي متاكده انه عنده 7 سنين؟؟!!!!
ضحكت ليان ..يعني مش اووي.
ادهم .. على فكرة انا مش صغيرة مش تستقل بيا عيب كدا يا استاذ.
يامن..لا وهو انت إللى هتعلمني العيب؟!!
ادهم ..وايه يعني؟!!
يامن بغضب ..لا انا هدخل اوضتي احسنلي انا شكلى بتهان هنا.
لم تستطع ليان كبت ضحكتها أكثر وظلت تضحك كثيرا ..استني بس يا يامن انت هتزعل من ولد صغير؟
ادهم بتزمر..انا مش صغير.
ليان ..خلاص يا باشا انت مش صغير.
يامن ..انا ماشي خليه ينفعك بقا.
أسرعت ليان خلفه وأمسكته من ذراعه ..لا أستني انا جايه علشانك.
ونظرت لندي وأشارت لها ان تأخد ادهم يلعب مع الأطفال.
يامن كان مصدوم انها أمسكت يده ..خلاص تعالى نخرج.
ليان ..هنروح فين؟؟
يامن ..ايه رايك في كافيه هنا انا بروح فيه دايما تعالى هنروح نقعد فيه شويه ونتكلم.
ليان ..ماشي اشطا معنديش مانع.
أمسكت ليان يد يامن وبدأت تحركه وهما مغادرين.
ليان ..نركب العربيه ولا هو قريب؟؟
يامن ..لا هو مش بعيد تعالى نتمشا احسن.
ليان ..اوك.
يامن ..قوليلى مين اكتر حد غالى عليكي؟؟
ليان ..بابا وندى ومامت ندى والدادة.
يامن ..اومال فين مامتك؟؟
ليان بحزن ..ماتت ..ماتت وسبتني بعد ما علمتنى حاجات كتير من أهمها الجمعيه ديه علمتني اني اتعامل بطيبه وحسن نيه من غير ما استني مقابل لان المقابل هاخده فى الاخرة مش هنا علمتنى ان الفلوس متغيرنيش وان علاقتى بربنا متتاثرش في يوم من الأيام..علمتنى ان المرض مش حاجه وحشه نبكي عليها دا اختبار من ربنا ولازم نفوز بيه علمتنى ان الكانسر مش هو إللى بيموت احنا بنموت لما عمرنا بيخلص او لما ربنا يشتقلنا اووى فابياخدنا عنده انا اة موت ماما كسرنى ومرضها وتعبها وانا واقفه عاجزة مش قادرة اعملها حاجه لحد لما جه اليوم إللى ربنا حب فيه يريحها من المرض دا ويخلصها منه وماتت مامتي ومن ساعتها بابا مهتم بكل تفصيله في حياتي اقل حاجه بيهتم بيها.
يامن ..ربنا يرحملك مامتك شكلها كانت ست كويسه اووى وربنا يخليلك باباكي.
ليان ..وانت بقا مين اغلى حد في حياتك.
يامن..مفيش.
ليان باستغراب ..ازاى؟!!!
يامن..من يوم ما انا اتولدت وانا لوحدي يا ليان معنديش حد غالى عليا غير ممكن جاسم علشان هو إللى قريب مني شويه انما مفيش حد تاني قريب مني.
ليان بعفويه ..طيب هو انا ممكن اقرب منك لو مش عندك مانع.
يامن..بس انا خايف اجرحك او اكسرك انا أوقات بتكون معاملتي مش حلوة مع الناس إللى بحبهم دا بيحصل غصب عني.
ليان ..لا متخافش انا هستحمل.
يامن ابتسم..طيب خلاص انتي إللى جبتيه لنفسك هقرفك كل شويه.
ليان ببتسامه .. اقرفني براحتك.
يامن ..هاا وصلنا ولا انتي ممشيانا وخلاص ولا ايه بظبط؟؟!
ليان .. لا خلاص اهو دخلين علي الكافيه.
يامن ..طيب الحمد لله وصلنا بسلام دا انا كونت خايف وانا ماشي معاكي.
ليان بغضب ..ليه ان شاء الله باكل أطفال انا؟؟
يامن ..لا يا ستي انا إللى باكل الأطفال.
ليان ..ايوة طبعا انت انا اصلا كيوت ميتخافش مني.
يامن ..صح انتي يتخاف عليكي يا طفلتي.
ليان..طفلتك بس انا مش طفله.
يامن ..وانا شايفك طفله وطفلتي انا وبس.
ليان ابتسمت بخجل ..احنا خلاص وصلنا يلا خد بالك في سلمتين ايوة كدا نقعد بقا جوا ولا برا.
يامن..هي مش هتفرق معايا انا فى الحالتين مش شايف يعني.
ليان ..خلاص تعالا نقعد برا احسن في هدوء وهواء.
يامن ..ماشي.
في مكان تاني كانت ندي تضع شيئا ما علي عينيها وتجري خلف الأطفال وكان يراقبها جاسم باستمتاع.
ندي ..انتوا فين لا بقولكم ايه اوعوا تزغزغوني برستيجي هيضيع وهقع فى الارض.
إقترب منها الأولاد وبدأوا "يزغزغوها" ويهربون.
ندي ..احنا فينا من كدا طيب بس تقعوا في ايدي مش هرحمكم.
ظلتت ندي تجري خلفهم وجاسم يضحك علي شكلها وطيبة قلبها وصوت ضحكتها الذي يصدح في قلبه قبل أذنه.
لمح جاسم ندي وهي علي وشك الوقوت فأسرع إليها وأنقذها
أحست ندي بجسد صلب تحتها ودفء وراحه لم تشعر بهم من قبل.
أزالت ندي من علي عنيها القماشة التي كانت تغطي بها عينيها صدمت عندما رأت قربه منها فوجهها أمام وجهه تقريبا.
أبتعدت ندى عن جاسم
ندى بخجل تحاول أن تخفيه .. اهلا بحضرتك يا استاذ جاسم.
جاسم ..استاذ جاسم ايه يا بنتى قوليلى يا جاسم بس زى ما انا بقولك ندى بس.
ندى بخجل..هحاول.
جاسم ..ايه دا هو انتى بتكسفي زى البنات كدا عادى.
ندى بعصبيه ..ليه هو انت مش شايفنى بنت.
جاسم ..عايزة الصراحه ولا الكدب.
ندى ..اكيد الصراحه.
جاسم ضحك..شايفك اجمل بنت مسترجله فى الدنيا ديه كلها.
ضحكت ندى على دمه الخفيف
جاسم ..ايوة كدا اضحكى مش هناخد حاجه من الدنيا.
ندى..هو انت بتشتغل ايه؟؟
جاسم..ظابط شرطه ايه مش باين عليا؟!
ندى بصدمه..نعم ظابط شرطه ازاى انت كبيرك عسكري وكدا ابقا كرمتك اووى.
جاسم بسخريه..عسكري دا انتى لو عرفتى انى مقدم كمان ممكن تتشلى.
ندى..لا كمان مقدم مين إللى دخلك كليه الشرطه دا اكيد حمار مش بيفهم.
جاسم .. لا انتى مستقليه بيا بقا هبقا اخدك مرة زيارة لسجن تشوفى شكلى وانا هناك..
ندى ..ماشي انت كونت جى هنا ليه صحيح؟؟
جاسم وهو بيخبط على دماغه ..اة صح نسيت يامن.
ضحكت ندى ..ازاى نسيت صاحبك لا وبتقولى مقدم اه ما هو باين.
جاسم ..هو فين طيب؟؟
ندى..خرج من شويه مع ليان.
جاسم .. الحمد لله طمنتينى ربنا يطمنك يا بنتى.
ندى ..لا دا انت لاسع على الاخر.
جاسم ضحك..انتى لسه عارفة لا خدى من دا كتير.
ندى .. طيب حلو علشان تضحكنى شويه.
جاسم ..مصلحجيه.
ندى..ميرسي عارفة.
أقترب أدهم منهم.....
ادهم ..ندى مش هتيجي تلعبي معانا؟؟
ندى .. لا يا دومي هاجى انا وجاسم نلعب معاكم.
جاسم..مين دا إللى يلعب يا ماما نسيتى انى ظابط شرطه وليا مركزى؟!!!!
ندى ..بس يا بابا انت ظابط شرطه ايه وبتاع ايه يلا اقلع الجاكيت بتاع البدلة دا وتعالا يلا العب معانا.
جاسم ..ماشي ربنا قادر على المفترى.
ندى..بتقول حاجه؟؟!
جاسم .. لا خالص بتهيألك اكيد.
ندى ..ممكن....!!
عند عاصم فى الفيلا...
كان يجلس عاصم في غرفة المكتب ويتابع أوراق الصفقة التي ستدخل باسم شركته ووجد أنه سوف يكون المشتبه الأول والأخير في هذه الجريمة ومن المأكد أنه أول من يشك به الشرطة إن كشفت هذه العملية......
هاتف عاصم شخص مهم من العصابه.
عاصم ..الو بقولك ايه انا مش ناوى اكمل.
الشخص ..نعم هو لعب عيال يا روح امك انت؟؟
عاصم بعصبيه ..انا في الحالتين خسران خسران يبقا مكملش احسن.
الشخص ..وانا وعدتك انك تحت حمايتى انا ومحدش هيقدر يقربلك ولا حتي الشرطه.
عاصم ..وانا خلاص قررت انا مش هكمل في الشغل القذر ده وأضيع نفسي وبنتى معايا.
الشخص .. وانت فاكر انك كدا مش بضيع بنتك كدا بنتك بنتك انا مراقبها 24 ساعه لانى كونت متوقع انك هتعمل الحركه ديه ولو مش مصدقنى اقفل وانا اوريك بعينك.
ما لبث عاصم أن أغلق الخط مع هذا الشخص حتي وصله رسالة بصورة ابنته ليان من هذا الشخص فكان لها صور وهي تضحك في الجمعية وأيضا وهي تمشي ممسكة بيد شخص كفيف......وصلته رسالة أخري والتي كان مكتوب فيها .......
"تليفون منى للرجاله بتاعتى واخلص عليها وساعتها ندمك مش هيفيد بحاجه قدامك 24 ساعه بس تقرر فيهم انت عايز ايه "
شعر عاصم ان الدنيا تنغلق أمام وجهه وانه عاجز عن حماية ابنته من الخطر....شعر عاصم بالإختناق وبدأ في فتح أول زراير القميص خاصته ومن ثم وقع مغشيًا عليه.....
فى نفس الوقت دخلت الدادة و معها القهوه الخاصة بعاصم وتفاجأت به ملقي على الأرض صرخت وجرت مسرعة تتصل بالإسعاف.
عند ليان ويامن....
كانت ليان تتأمل يامن بهدوء.
يامن.. حبيتى قبل كدا يا ليان؟؟
ليان ..لا بس اسمع ان الحب حاجه حلوة اووى.
يامن..هو حلو بس مفيش حاجه حلوة بتكمل لحد الاخر.
ليان ..ازاى مش فاهمه؟!!
يامن ..بمعني ان مفيش حب من غير وجع وجرح والوجع بيبقا صعب لو جيه من حبيبك بذات.
ليان ..طيب وليه يجرحوا بعض طالما هما بيحبه بعض؟؟
يامن..أوقات بيبقا غصب عنهم واوقات الدنيا هي إللى بتقف قدام طريق سعادتهم.
ليان ..طيب وليه متقولش انهم مكنوش متأكدين من حبهم لبعض وربنا حب يحطهم في اختبار يبين فيه ليهم قد ايه هما بيحبه بعض وقد ايه انهم ميقدروش يستغنوا عن بعض..!!!
يامن .. صح ممكن بس إللى يقدر يستحمل بقا علشان كدا انا مش عايز احب وبحاول اتحكم فى قلبي.
ليان.. و ايه السبب إللى مخليك واخد فكرة مش حلوة عن الحب؟؟
يامن بشرود ..علشان مطلعش زى.... زى اهلى واعيد إللى عملوه فيا فى ولادى
ليان ..مش لازم نكون زى اهلنا احنا بشر يعنى كل واحد فينا مختلف عن التانى كل واحد فينا المفروض يتعلم من أخطاء غيره مش نكرر الأخطاء ديه يإما دا هيكون غباء مننا احنا انا معرفش اهلك عملوا ايه بس مهما عملوه انت المفروض تسامحهم وتحاول تصلح منهم.
يامن ..دول اصلا مش بيتعلموا ومهما اتكلمت او عملت عمرهم ما هيتغيروا ولا هيحسوا بغلطهم.
ليان ..لا كلنا بنغلط بس مش احنا إللى هنعاقبهم يا يامن دا مش من حقنا.
يامن بعصبيه ..اومال ايه إللى من حقنا اننا نتظلم منهم
ونسكت انهم يهملونا وعادى كدا انهم يكونوا اهم حاجه عندهم الفلوس وانهم يتحدوا بعض دا يبقا صح اننا نعيش في سجن هما عملوه لينا وهى اوضه ضلمه زيك زى قلبك نفسه ولو خرجت يسألوك خرجت ليه اصل دا مش من حقك انك تخرج وتعيش حياتك زيك زى باقي البنى آدمين ليان انتى طيبه اووى ومش شوفتى إللى انا شوفته يبقا متحكميش عليا وتظلمينى زى ما هما ظلمونى.
كانت ليان علي وشك الحديث ولكن قاطعها صوت هاتفها برقم الدادة...
ليان ..الو يا دادة.
ليان..ايه فى ايه اهدى بس مش فاهمه منك حاجه ...بتقولى ايه بابا تعب ودخل المستشفي ...مستشفي ايه ...طيب طيب انا جايه اهو فى الطريق مسافة السكه بس وهكون عندك.
أغلقت ليان مع الدادة وبدأت دموعها في الإنهمار.
يامن ..فى ايه يا ليان باباكى دخل مستشفي ليه؟؟
ليان بدموع ..قولى انه مش هو كمان هيسبنى قولى انه مش هيسبنى يا يامن.
أمسك يامن يدها وضغط عليها بشدة..اطمنى هو ان شاء الله يقوم بسلامه واوعدك انى انا كمان مش هسيبك ويلا هروح معاكى ليه يلا بسرعه.
قامت ليان وجمعت أشيائها هى ويامن وذهبوا إلي المستشفي...
تابعووووووني
رواية زواج لدقائق معدودة كامله من هنا
رواية الطفله والوحش كامله من هنا
رواية جحيم الغيره كامله من هنا
رواية مابين الضلوع كامله من هنا
رواية سيطرة ناعمه كامله من هنا
رواية يتيمه في قبضة صعيدي كامله من هنا
الروايات الكامله والحصريه بدون لينكات من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق