رواية ما بين الانتقام والندم الحلقه الاولى بقلم الكاتبه ميمي حصريه وجديده على مدونة النجم المتوهج للروايات والمعلومات
 |
رواية ما بين الانتقام والندم الحلقه الاولى بقلم الكاتبه ميمي حصريه وجديده على مدونة النجم المتوهج للروايات والمعلومات
قصة مش عادية... تجمع بين الحب والخذلان، الغموض والخيانة، والقرار اللي يبدّل حياة كاملة!
💔 لما الحب يتقاطع مع الجرح...
💣 ولما الانتقام يكون الطريق الوحيد للنجاة…
هل الندم ينفع؟ ولا خلاص فات الأوان؟!
✍️ أحداث مشوّقة، مليانة مشاعر، صدمات، وأسرار تخليك تنشد من أول سطر.
🔫 رومانسية، غموض، دراما، وشوية أكشن يخلوك تعيش الحدث كأنك قدامه!
📌 خليك قريب من الصفحة، وانضم للي يقروا الرواية لحظة بلحظة عينك ع الصفحة 👀
وتهيّأ لأحداث تهز القلب وتحبس الأنفاس.
________________________________________💔💔💔
الحلقة_1
اجواء شتوية الدنيا غائمة مطر خفيف ريحة التراب غمضت عيوني براحه واني نشم في ريحة بلادي .. واخيراً كملت ورجعت لي ليبيا قداش كنت مستاحشة هالاجواء .. سحبت شنطتي وقعدت نتمشي علي الرصيف شبحت للساعة اللي في يدي وكانت العشرة الصبح اتصل تلفوني ابتسمت لما شفت اسمه اكيد عرف اني وصلت ..
.......... : الوو Hello daddy ..
ابراهيم : هاا بابا وصلتي والا مزال ..
.......... : بابا The plane did not take off ..
ابراهيم : ادوي عربي بابا تعرفيني مانحباش الجو هاذا ..
........... : هههه ندوي معاك بالانجليزي بيش تعرف انه بنتك تعلمت اللغة وقرت كويس واجتهدت ..
ابراهيم : نعرف انك شاطرة توا قولي الحق ماطلعتش طيارتك ؟؟
.............. : لا حبيبي طلعت واني حاليا في المطار ..
ابراهيم : احني شنوو متفقين مش قلتي لما نطلع نبعتلك فويس ونقولك ابعتلي سواق ..
.............. : تعرفني كويس مانحبش هالامور سواق وحماية ودوشة اني نبي نتمشي ونشوف اجواء طرابلس ليا 5 سنين مفارقتها ..
ابراهيم : من دون كلام زايد اني توا راح نجيك ..
........... : واو استاذ ابراهيم بجلالة قدره بيجيني للمطار ؟؟
ابراهيم : بنتي الوحيدة كيف مانجيهاش ..
........... : يلا تمام نستناك ..
ابراهيم : يلا حبيبتي باباك جايك ..
سكر الاتصال ضحكت رجعت التلفون للشنطة وقعدت نتمشي علي الرصيف وشعري يلعب بيه الهوا وقفت سياره قدامي استغربت منوو هاذا ..
صاحب السيارة : محتاجة توصيلة ؟؟
.......... : لا شكرا ..
صاحب السيارة : مش واخذ منك فلوس ماتخافيش ببلاش اركبي ..
........... : شكرا مانبيش ..
صاحب السيارة : مش أمان عليك تتمشي في الشارع وانتي بنت زي القمر ..
فنصت فيه ضحك ونزل من سيارته رجعت كم خطوه للخلف ..
صاحب السيارة : خيرك ليش اضايقتي نبي مصلحتك ؟؟
........... : ياخوي توكل مانبي شي منك رجاءا امشي من قدامي ..
صاحب السيارة : توا خيرك خايفة هاذا كله عشان قلت نبي نوصلك ..
......... : اوف قداشك لصقة قتلك مانبيش انت ماتفهمش ..
سحبت شنطتي ومشيت ..
بيني وبين نفسي : شن هالناس بجد مايتحشمش واحد يقولك مرة مرتين لا خلي عندك كرامة وامشي ..
رجع ركب سيارته وصل جنبي كلكس عليا ونزل روشن السيارة غمضت عيوني واستغفرت ربي ..
صاحب السيارة : راح تصب المطر وينبلوا حوايجك واضح انهم ماركة هيا اركبي ..
ماجاوبتاش مشيت للجردينة كانت فيها كافتيريا قريبة خشيتلها نبي بس نفتك منه مانبيش نعيط في نص الشارع من اول يوم درهولي كبدي .. كنت في المانيا نقرا 5 سنين ولا شخص تحرش فيا او قلل قيمة معاملتهم كلهم كويسين وحتي اني ما اختلطش مع هلبا هما بس 3 بنات صاحباتي نقرا معاهن ونطلعوا جميع اما الباقي بس زملاء دراسة فقط .. طلبت قهوة و طلعت كتاب عن علم النفس نحب هالاشياء الفكرية لبست نظارات طبية وقعدت نشرب في القهوة ونقرا .. اتصل تلفوني وكان بوي سألني ع مكاني قتله اني قاعدة في كافيه .. شربت القهوة وطلعت للشارع شوية ووصل بوي نزل السايق فتحله باب السيارة مشيتله نجري وحضنته واني نضحك وعيوني دمعوا من الفرحة ..
ابراهيم : باباتي حبيبتي واخيرا رجعتي مستني هاليوم ساعة بساعة ..
......... : استاحشتك كوميات كوميات ..
ابراهيم : مش بقد شوقي ليك يلا اركبي الكل مستنيك ..
هزيت راسي بي اي سحبت الشنطة وركبت معاه في السيارة ماشيين للحوش ..
________________________________________💔💔💔
تعريف عني وعن عائلتي الكريمة اسمي ليان وحيدة لي بوي يتيمة الام متزوج بوي مراة ثانية عندي 3 خوت منها .. تيمور _ قصي _ مهند _ هيا حنان _ وبوي ابراهيم ..
اني لأنه الوحيدة ف كنت المدللة بين خوتي قريت في ارقي الجامعات وطلعت برا بيش نطور من نفسي وقرايتي وطبعا الفضل يرجع لي بوي لأنه كان مساندني طول السنين اللي فاتوا ماخلانيش يوم نحس بنقص الام كان هو كل شي بالنسبة ليا .. بوي طبعا صاحب شركات ورجل اعمال كبير وعنده رزق والحمد لله وكان عنده منصب بس عمره ما كان متكبر ويحب الخير للناس ..
________________________________________💔💔💔
ابراهيم : ايي احكيلي كيف كانت رحلتك ..
ليان : بيرفكت ..
ابراهيم : الحمد لله توا راح تاخذي ريست ..
ليان : وبعدين راح نبدا ندور ع عمل ..
ابراهيم : احني حكينا في هالموضوع بابا ..
ليان : اي واني عطيتك جوابي قتلك مانشتغلش معاكم في الشركة نبي نأسس شغلي الخاص بيا ..
ابراهيم : تبيني نفتحلك مشروع خاص بيك او شركة بي أسمك ؟؟
ليان : لا بابا لا مش هكي قصدي يعني نبي نشتغل ونتعب ونأسس مشروعي الخاص بتعبي اني مانبيش انت توفرلي كل شي مانبيش الكل يشوفني انه مدللة نبي نعتمد علي نفسي ..
ابراهيم : خلي هالكلام لي بعدين نتناقشوا فيه ..
خذيت نفس وسكتت يبي مني نشتغل مع خوتي في الشركة وهما لو نخش للمكتب بس يطلعوا الف قصة ويخلوني نكره عيشتي خصوصا تيمور متسلط لي ابعد حد والفلوس عامية عيونه ومخلياته مغرور ومتكبر لدرجة ماتنوصفش ..
وصلنا للحوش فتحو الحرس باب الفيلا خشش السواق السيارة للقراج ونزلنا جميع خشينا للحوش .. كانت مرت بوي حنان لابسة قفطان قصير لعند الركبة وشعرها صابغاته أصفر والتاتو والفيلر ولاعبة في شكلها لعب ..
حنان : ياهلا نور الحوش والله ..
مشيت سلمت عليها طبعا هيا تقول هكي بس هيا في داخلها ماتبيش وجودي نهائيا ..
ليان : بنورك خالتي كيف الحال ؟؟
حنان : الحمد لله بخير ..
ابراهيم : الاولاد وين امالا ؟؟
حنان : مزال ماروحوش من الشركة ..
ابراهيم : ماشي اني بنطلع توا خلي اسيانا اتوتي لي ليان حاجة تاكلها ..
هزت راسها بي اي دار وجهه بوي ابتسملي وخلانا وطلع من الحوش مشيت قعمزت ع الصالون وهيا نفس الشي قعمزت وحطت رجل ع رجل وهيا تمضغ في المستكة نادت بصوت عالي ..
حنان : اسييييانا تعالي ..
ليان : مش جعانة اني بنركب ندوش ونرتاح ..
حنان : معقولة يا ليان تخليني وتركبي واني نستني فيك من الصبح خلي نهدرزوا شوية خيرك مستعجلة ..
ليان : اي نهدرزوا ليش لا بس بعد ما نرتاح توا تعبانة اعذريني ..
خليتها وركبت لي داري ليا سنين مفارقتها بس قالي بابا غيرت ديكورها و اثاثها فتحت الباب وخشيت .. مغيرين كل شي فيها الاثاث والزواق والديكور كل شي متغير حاجة وحدة قاعدة زي ما هيا واللي هما صور امي الموجودة ع جهة كاملة من الحيط قدمت جهة الحيط واني عيوني مركزات ع صور امي دمعوا عيوني وحسيت بخنقة ابتسمت بحزن وكلمتها ..
ليان : اليوم رجعت بعد جهد وقراية وتعب راح نحقق حلمك اهو تخرجت وتوا بنشتغل ونكون مسؤولة عن قرارتي كبرت ليان كبرت اميرتك الصغيرة ..
غمضت عيوني براحة نحس فيها تسمع في كلامي وفخورة بيا خذيت حوايجي وخشيت بندوش ..
________________________________________💔💔💔
عند ابراهيم ..
جمع اولاده في الشركة ..
ابراهيم : اسمعوني اختكم روحت من السفر المفروض تروحوا للحوش ..
تيمور : بدينا يا بوي وشنوو هالقصة الكبيرة راهو مش مروحة من الحج كانت مسافرة عادي وشنوو يعني وين كانت واذا ماجيناش شن راح يصير انت بي دلالك هاذا راح اضيعها واضيعنا راهو عندنا خدمة ومسؤوليات مش فاضيين لي هالقصص الفاضية ..
ابراهيم : انت تعرف روحك مع منوو تحكي توا ؟؟
تيمور : نعرف روحي كويس ومع منوو نحكي واذا ناسي يا بوي نذكرك راهو اني تيمور ولدك الكبير وكلامي واوامري ماتقلش
عنك بي شي ..
ابراهيم : اني اللي وصلتك لي هالمرحلة وبيدي نقدر انزلك للصفر ماتتبهاش بروحك هلبا ..
قصي : ها ياوبوي قالوا تبيني ..
ابراهيم : وتيلي اوراق الشراكة اللي راح نوقعها اليوم وجيبهولي لي مكتبي ..
قصي : حاضر ..
________________________________________💔💔💔
عند تيمور ..
خلانا بوي وطلع مشي لي مكتبه سحبت نفس قوي ورجعت راسي ع الكرسي طلعت دخان وولعت طرف وقعدت ندخن ..
قصي : خيرك نحس فيك مش ع بعضك ؟؟
تيمور : رجعت ست الحسن والدلال وراح يتغير بوي وتتغير تصرفاته وبيقعد يهدد فينا بالاملاك والفلوس ..
قصي : غلطان بونا عمره ما فكر بالفلوس والاملاك هذا تفكيرك انت ..
تيمور : انت مزال ماتعرف شي أسالني اني ..
قصي : وشن تبينا نديروا راهو في الاخير هاذي اختنا وليها حق في املاك بوي حالها من حالنا ..
تيمور : سكر فمك شنو حالها من حالنا احني اولاد وهيا بنت غدوا او اللي بعده بتتزوج وين بتمشي الفلوس لي راجلها خيرك انت غبي وماتفهمش الرزق من حقنا احني وبس ..
قصي : بوي قاعد عايش راهو وانت تفكر في تقسيم املاكه ورزقه من توا ..
تيمور : اني كل شخص يوقف في طريقي وينافسني نمحيه من ع الوجود ..
________________________________________💔💔💔
عند ليان ..
طلعت من الحمام انشف في شعري انطق باب داري ..
ليان : تفضل ..
خشت الشغالة جايبتلي سفرة الاكل ..
ليان : حبيبتي والله ماني جعانة ..
اسيانا : مدام حنان قتلي ديري اكل ليك انت ..
ليان : شكرا ..
حطت السفرة ع الطاولة وطلعت جففت شعري ومشطته ربطته حطيت سيروم لي وجهي رطبته وشوية تنت وعطر وقعدت ناكل .. كملت مشيت تمددت ع سريري ميتة من التعب رقدت وبدون مانحس .. نضت العصر تقريبا ع صوت تلفوني يتصل كانت بنت خالتي دعاء هيا في نفس عمري ولما سافرت قعدت تبكي من بعدي وطول السنين اللي فاتت ماخلتنيش نتواصلوا ديما مع بعض ..
دعاء : الوو ..
ليان : هلا ..
دعاء : هلا حبي كيف حالك بشري جيتي او مزال ؟؟
ليان : اي وحاليا في الحوش ..
دعاء : بجديات ترا احلفي ..
ليان : اي والله في الحوش ..
دعاء : ياااااي قداااش فرحتيني بي هالخبر تجيني او اني نجيك يالله اختاري بسررعة ..
ليان : لا توا اني نجيك لأنه مانحبش قعدت الحوش بس شوية نبي نرتاح توا كيف نضت من النوم خلي نكلم بابا ناخذ سيارة ونجيك ..
دعاء : تمام نطلعوا ندهوروا برا نخليك تشوفي اجواء طرابلس فاتح مول جديد جنبنا يجنن وحوايجه كلهن ماركة وفيه كوزمتك ومكياج وكله برندات عالمية وحاجة صح تعرفي جربته وشريت منه ماسكات للوجهه ومكياج وارواج و....... ..
قعدت تتكلم وبس ماسكتتش واني نسمع فيها هدرزتها حلوة وهيا طيبة هلبا وهاذا السبب اللي مخليني نحبها ونتعلق بيها ماعندهاش ع النفاق ولا تحب تكذب بشي ونية تحكي كل شي في قلبها .. حاطة التلفون علي وذني واني خذاني النوم نعسانة ودايخة ..
دعاء : يالله اني راح نوتي روحي لبين ماتجي ماشي ..
ليان : تمام ..
سكرت منها نضت غسلت وجهي ومشيت للشنطة متاعي طلعت حوايجي منها ورتبتهم في الدولاب وحطيت عطوراتي ومكياجي ع الزيانة وغيرت فراش سريري لانه ماعجبنيش فتحت الرواشن خش هواء بارد للدار قعدت واقفة في البلكونة نتفرج جت سيارة دخلوها الحرس توقعته بوي هو اللي جي .. طلعت حوايجي بدلت وحطيت مكياج ووتيت روحي ونزلت الساعة كانت الستة تقريبا كان جاينا وقتها ولد اخ مرت بوي واسمه هشام ..
هشام : السلام عليكم ..
ليان : وعليكم السلام ..
هشام : والله صدفة حلوة امتي روحتي من السفر جاي صدفة بنشوف الاولاد تلاقيت معاك رب صدفة خير من الف ميعاد ..
ليان : اليوم بس وصلت ..
حنان : ياروحي عليهم مزال في العمل تعرف انهم مايقدروش يخلوا بوهم بروحه ..
هشام : اكيد شركتهم وفلوسهم كيف يخلوها ..
ليان : اني نستأذن منكم بنطلع ..
هشام : وين غير توا بس شفناك ؟؟
ليان : صاحبتي عازمتني وقتلها جاية غير يوم نشوفك ..
حنان : قلتي لي بوك طالعة ؟؟
ليان : ليش اني عيلة قدامك ..
حنان : كلميه وخوذي أذن منه قبل لأنه تعرفيه كويس انه مايحبش حد يطلع وهو مايعلمش ..
هشام : ماتخافوش عليها ليان قد حالها مايصيرلها شي وين ماشية نوصلك ع طريقي لو تحبي ؟؟
ليان : لالالا شكرا اني نعرف نسوق ناخذ سيارة وبنطلع ..
هشام : انتي توا تردي في عزومتي يعني ؟؟
ليان : عزومتك توصيلة !!
هشام : تقريبا هههه ..
ليان : يسلمووا كلك ذوق بس قتلك نبي نطلع بسيارتي نغير جو ..
هشام : ع راحتك ..
خليتهم وطلعت ..
ليان بيني وبين نفسي : ماقداش لصقة استغفر الله ..
مشيت للبواب خذيت منه مفتاح وحدة من السيارات ..
________________________________________💔💔💔
عند هشام ..
هشام : اووووف امتي راح تكون ليا ..
حنان : هههه ماتحلمش هلبا هاذي مدللة بوها مش راح يعطيها لمن كان ..
هشام : عمتي انتي رطبيلي الوضع من عندك نبيها وراسك امك ديرلي راي ..
حنان : ياا انت من كل عقلك بوها مش راح يقبل مستحيل نحكي في اي شي يخصها ولا ندخل في حياتها ماتشوفش فيها كيف تحكي معاي من فوق خشمها ..
هشام : باهي شن اندير فهميني هيا مش عاطية مجال ولا تخلي حد يتقرب منهاا ..
حنان : اهتم بيها حسسها انه انت تحبها واكيد هيا راح تحبك اصلا وين تلقي زيك وزي جمالك ..
هشام : بجد عمتي اني جميل ..
حنان : تهبل مش جميل وبس هنيال اللي بتاخذك ..
هشام : ليان اووف ليان ماتطلعش من راسي ..
________________________________________💔💔💔
عند ليان ..
مشيت للبواب بيش ناخذ منه مفتاح السيارة ماقبلش يعطيني إلا بموافقة من بوي ..
ليان : اني قتلك اعطيهولي شنوو هالتصرفات ..
جي الحارس ..
الحارس : هاذي اوامر الوالد مانقدروش نعترضوا عليهم انتي اتصلي بيه وخليه يوافق واهي السيارة قدامك مش راح يشدك عليها حد ..
ليان : استغفر الله ياربي ..
طلعت تلفوني من شنطتي ورجعت للجنان قعمزت ع الكرسي ونتصل بي بوي بس مايردش رجعت اتصلت مره ومرتين وفي التالتة فتح الخط ..
ليان : الووو بابا وينك ليش ماتردش ؟؟
ابراهيم : كنت في اجتماع بابا ليش تتصلي صاير شي ؟؟
ليان : نبي نطلع والحارس ماباش يعطيني مفتاح السيارة ..
ابراهيم : وين بتمشي ؟؟
ليان : ماشية نشوف دعاء ..
ابراهيم : انتي مش اليوم بس روحتي من السفر ارتاحي وين طالعة ..
ليان : ارتحت وبعدين اني نبي نغير جو نحس في روحي مخنوقة ..
ابراهيم : ماشي بس ما اطوليش نبيك تكوني موجودة علي العشي نتعشوا جميع ..
ليان : تمام ..
ابراهيم : ديري بالك ع روحك باباتي ..
ليان : ان شاء الله ..
سكرت الاتصال مشيت للحارس خذيت منه المفتاح وركبت السيارة وطلعت اتصلت بي دعاء قالتلي انها واتية وتستني فيا مشيتلها للحوش .. خشيت سلمت ع خالتي وطلعنا اني ودعاء طبعا اني وياها نفس الجو نحبوا كل شي زي بعض ..
دعاء : تعرفي لعند توا مش مصدقة انه نشوف فيك قدامي ..
ليان : ولا اني تخيلي ركبت الطيارة واني نرعش مش مصدقة امتي نوصل ونرجع لي طرابلس ونشوفك ونشوف بابا استاحشتكم هلباااااااا واني غادي ..
دعاء : حتي احني استاحشناك بس شوفي راهو لأنه سافرتي وقعدتي هلبا غادي حسيتي بوحشة توا اني مليت هنا ونبي بس نسافر ونسيب الكل ونرتاح هنا ضغوطات عليك تجيك من الاهل والمجتمع ..
ليان : مانعرفش والله بس اني نحب ليبيا ..
دعاء : منوو اللي مايحبش بلاده بس مرات لما نضايقوا نتمني بس نسافروا اني هنا لما نضايق يا نمشي للمول او نطلع لي مطعم بيش تتغير نفسيتي ..
ليان : ههههه هو هذا الصح ..
دعاء : توا وين تبي نمشوا للمول او المطعم ؟؟
ليان : لا للمول نشري كم حاجة للحوش وبنرجع لانه بابا قالي انه يبيني نكون موجودة علي العشي ..
دعاء : اي حلوو تعشي وشوفي خوتك ..
ليان : تعالي معاي ..
دعاء : هاا مانعرفش مرات ماما ماتوافقش نمشي ..
ليان : لا خالتي خليها عليا تعرف اني مستاحشاتك وتوا كيف مروحة من السفر راح توافق وتخليك تقعدي عندي ..
دعاء : تمام ..
مشينا للمول كان فاتح جديد وهلبا ناس جاية حاضرة الافتتاح واغلبهم عائلات جاية تشري خشينا اسوقنا وطلعنا منه مشينا لي كافي شربنا عصير طبيعي ورجعنا للسيارة .. نسوق ونهدرز معاها ونضحك مشينا مسافة بعيدة عن المول توا نبي نطلع من الطريق متاعه ماحسيتش الا بي انفجار هز الارض هز .. وقفت السيارة ودرت وجهي مصدومة دعاء عيطت وحطت يدها ع فمها رجعت السيارة نزلنا بسررعة ومشينا جري لي مكان الحادث ناس تعيط وتبكي وتحاول اطفي النار وماتقدرش النار وصلت لي أعلي مكان في المول نحس في جسمي قعد كله يرجف ودموعي لا اراديا قعدت تنزل ع وضع الناس اللي قاعدة تموت قدام عيوني .. شخص من بينهم يخبط ويعيط ويقول مرتي وصغاري ساعدوني ياناس يبي يخش ماخلوشي جتني دعاء حضنتني وهيا تبكي وترعش واني نحس في قلبي تقطع ع حالهم تلفوني يتصل بس ماسمعتاش قعدنا هلبااا واقفين في مكان الحادث وصلت المطافي وحتي طيارات اطفي في النار .. بس شن الفايدة راحو ضحايا هلبا جرحي وناس ماتت لا تعد يطلعوا في الصغار المحروقين والمنظر كان يقشعر الجسم منه ساعدت ناس هلبا في الاسعافات عندي خبرة في مجال الطب ع الرغم اني قارية قانون قمت اطفال وساعدت بتضميد جروحهم البسيطة دعاء بس تشبح وتبكي خايفة ومرعوبة في مراة لقيتها تبكي ..
المراة : دكتورة بالله عليك انقذيلي بنتي ماتخليهاش تموت بالله عليك ..
الدكتورة : ان شاء لله مش راح تموت بس اهدي هاذي تبي مستشفى ضروري عندها حرق عميق لو قعد هكي راح يلتهب ويتلوث لازم تنظيف وعناية في المستشفي ارفعيها للاسعافات بسرعة خلي يرفعوها ..
المراة : مانقدرش انقيمها نخاف عليها تتأذي اكثرر ..
ماتحملتش وقمتها عنهاا ومشيت جري لي سيارة الاسعاف ع الرغم مش مار عليا موقف زي هاذا حسيت عندي قلب قوي وشجاعة انه نساعد الناس ماحسيتش بضعف صح انكسر قلبي وبكيت ع وضع الناس بس ماخليتش عواطفي تأثر عليا .. خذوها من يدي بسرعة ركبت معاها امها وطلعت الاسعاف .. جت محطات التلفزيون بيش اطلع الاخبار ناس والعة فيهم النار وهما لاهيين يصوروا رجعت لي دعاء وقفت جنبها هاذي قاعدة تبكي وترعش ..
ليان : خلاص يلا خلينا نروحوا ..
دعاء : شوفي ءء شوفي ناس كيف ماتت لوو ماطلعناش قبل شوي راهو توا احني صارلنا زيهم ..
ليان : الحمد لله علي كل حال ربي يحبنا ونجانا من هالفاجعة اللي صارت ..
قاعدة ماكملتش كلامي ماحسيت غير انه انسحبت من يدي بقوه .. كان خوي تيمور وجهه احمر ومتنكطي عيط في وجهي ..
تيمور : ليشششش ماترديش ع تلفوووونك نحسابوك متي او صارلك شيييي شن هالاهمال اللي عندك بوك قريب مات ماخلاش مكان مادورش فيه عليك وانتي واقفة هناااا مافكرتيش ماقلتيش ممكن يصير شي اليووم بس روحتي ماقدرتيش تصبري لي غدوا بيش تطلععععي ..
يعيط عليا قدام الناس الموجودة تحشمت هلبا ودمعت عيوني ماحكيتش معاه شي ودعاء قعدت صافنة ماعرفتش شنوو الموضوع .. جاني بوي يجري و وجهه اصفر وشفايفه جافات سحبني لي حضنه وهو يبوس في راسي وجبيني ..
ابراهيم : اوووووف الف حمد وشكر ليك يا ربي وقف قلبي نحسابه صارلك شي مش قتلك ماتطلعيش يا بابا شفتي لوو ما ربي ستر كان متي اليوم بعد عمر طويل يابنتي ..
تيمور : لا والله هو هذا كلامك توا معاها بدال ماتهزبها وتخليها تعرف غلطتها واخذها بالاحضان خيرككككم انتم ..
ابراهيم : تيموووور الزم حدك لما تتكلم معاي ليش نهزبها وع شنوو بدال ماتخاف ع اختك وتطمن عليها قاعد تحاسب فيها ..
قصي : ها يا بوي لقيتوها ؟؟
مهند : خوفتينا عليك انتي وين كنتي بالله عليك ؟؟
ابراهيم : تعالي بنيتي شنوو هالدم صارتلك حاجة نرفعك للمستشفي ..
هزيت راسي بي لا مافتحتش فمي بحرف رفعت راسي لقيت بوي يشبحلي بخوف ..
ابراهيم : احكي يا بابا ليش ساكتة فيك شي ؟؟
ليان : مافيا شي ما تخافوش ..
ابراهيم : الحمد لله وانتي يابنتي يا دعاء كويسة ماصارلك شي ..
دعاء : اي يا خالي الحمد لله كويسة ..
تيمور هز يده ومشي من قدامنا قعد مهند وقصي معانا رجعنا مع بعض ركبت اني ودعاء مع بابا وخوتي جو بسياراتهم .. حرام دعاء طول الطريق ترعش وتعصر في ايديها اتصلت خالتي اني رديت عليها وطمنتها انه هيا كويسة .. رجعنا لي حوشنا جميع نزلت من السيارة وخشيت لاقتنا حنان ..
حنان : ياا رجعتي الحمد لله نحسابوك متي ..
ليان : اي رجعت مزال ما متت قاعدة فيا الروح ..
حنان : اي واضح قدامي نشوف راهو ..
دعاذ : اهلين خالتي كيف حالك ؟؟
حنان : خالتي !! ماتشوفيش كويس شكلك اني قريبة من عمرك شنو خالتي هادي !!
ليان : خيرك دعاء هيا في عمرنا اصلا ماتقولش عندها 3 شباب قريب يهدوا الحيط ..
ابتسمت دعاء وحنان رفعت عيونها بملل مش راضية علي كلامي .. خش بوي هو وخوتي تيمور مشي بكل هدوء قعمز ع الصالون وحط رجل ع رجل وطلع سبسي وقعد يدخن ..
ليان : دعاء تعالي نركبوا فوق نغيروا حوايجنا ونغسلوا ..
دعاء هزت راسها بي أي ركبنا لي داري دوشت اني وبعدها هيا وغيرنا حوايجنا ونزلنا لوطا كانوا موتيين العشي قعمزنا جميع ع الطاولة ..
ابراهيم : كيف حالك توا بابا ؟؟
ليان : الحمد لله كويسة ماتشغلش بالك ..
قصي : كيف صار الانفجار ؟؟
مهند : سمعت قالوا سيارة مفخخة ..
حنان : حسبي الله ونعم الوكيل ماتوا هلبا ناس شنوو ذنبهم الله لا يوفقهم اللي داروا هكي ..
تيمور : ع خاطر الفلوس الناس تبيع روحهاا ..
قصي : هذا اللي يدير هكي في بلده اغسل يدك منه مايربحش لا دنيا ولا اخرة شن بيدير بالفلوس وهو مفجر روحه في نص الناس ..
تيمور : يربح بيخلي فلوسه لي اهله ..
ليان : اي اهل اللي تحكي عليهم اصلا كيييف اهله يقبلوا ولدهم يدير هكي هكي هما بلا ضمير كيف ولدهم يقتل الناس بدون رحمة هذا شيطان مش بشر اصلا حرام نعدوه من البشر ودولتنا ضعيفة ومعاش فيها امان و....... ..
تيمور قاطعني ..
تيمور : ليان ماتحكيش شي اكبرر منك مفهوم ..
ليان : ماقلت شي غلط اني ليش نحس فيك ادافع عليهم انت راضي بالفاجعة اللي صارت توا مئاات الناس ماتت شنوو ذنبهم ..
تيمور : شنووو قصدك انه اني داعشي ؟؟
ابراهيم : خلاص خيركم شنوو هالكلام هذا مش قاعدين نتعشوا ولا احترموا النعمة اللي قدامكم ..
تيمور : شنو تحكي وتشبحلي علم بنتك كيف تحكي مع خوها الاكبر منهاا قبل واذا مايهونش عليك تزعلها بس قولي واني نعرف كيف نربيها من اول وجديد ..
قال هكي وضرب بي يده ع الطاولة وناض وطلع من الحوش زمطت ريقي بتوتر نحس في روحي تنرفزت من كلامه شن هالتفكير اللي عنده ..
ابراهيم : استغفر الله كولي يا بنتي ما ادوريشي ولا تحطي في بالك الكلام اللي قاله ..
مهند : هو من يوم يومه هكي شنو ماتعرفوشي ..
حنان : خيره راهو ماقال شي غلط وانتم في كل موضوع لازم اضايقوه شن نسيتوا انه هو اكبرر منكم ..
مهند : اكبر اي بس في العمر ..
قصي : يا راجل فكنا منه اكفينا شره ماعندناش خلوق للمشاكل ومعاه هو بالذات ..
دعاء بس صافنة وتشبح واحني كأنه في معركة وكل واحد يحكي ع الثاني كملنا عشي ركبت اني وياها لي داري .. قعدنا نتفرجوا ع الاخبار اللي نزلت عن الانفجار وقداش ناس ماتت وقداش فيه جرحي ..
دعاء : اسمعي خيره تيمور فالح كان يفنص فيك ويعيط عليك !؟
ليان : هو هكي من زمان ..
دعاء : راهو انتي مش صغيرة شنووو يحساب روحه ..
ليان : فوتيه خليه ماعنديش ليه خلوق واصلا لما يحكي مانردش عليه بيش يعرف نفسه هو الغلطان مش اني اذا فتحت فمي ورديت عليه بيحطوا كل اللوم عليا اني ..
دعاء : بصراحة اني هلبا اضايقت منه ماهضمتاش كان نقولك يدره الكبد ..
ليان : ما ادوريش حبيبتي ماتحطيشي في بالك ..
دعاء : شنوو رايك تجي تقعدي عندنا كم يوم نطلعوا ونغيروا جو ونخلي بابا يرفعنا لي البيضاء قالوا صاب ثلج غادي نشوفوا الاجواء ..
ليان : لا مانقدرش اصلا توا كيف مروحة نبي نقدم اوراقي ونبدا نشتغل ..
دعاء : بتخشي مجال المحاماة او بتشتغلي في الشركة مع بوك ؟؟
ليان : هو بابا قالي اشتغلي معاي اني محتاج محامية ادققلي في الاوراق الحكومية والعقود ويبيني اني بس اني مانبيش نشتغل في شركة بابا لأنه نعرف خوتي مايبونيش نكون معاهم وحاجة ثانية اني نبي نكون شغلي الخاص نبي نكون مسؤولة عن نفسي ونتعب ونشتغل بيش نوصل للي نبيه بابا اذا اشتغلت معاه مش راح يعطيني راتب حالي حال العمال ..
دعاء : والله مانعرف شن نقولك انتي حرة في قرارتك بس اني نشوف انه كلام بوك هو الصح لأنه في وقتنا هاذا والوضع اللي صاير صعب تحصلي وظيفة وراتب كويس وناس تتحسر بيش تحصل شغل عاد انتي احمدي ربك بوك بيشغلك بدون أي شي وتحصلي ع كل شي تبيه بسهولة ..
ليان : مانعرفش حايرة اني ..
دعاء : انتي فكري كويس وقرري وين بتشتغلي ..
ليان : اي ان شاء الله ..
دعاء : واني توا لازم انوض انروح للحوش ..
ليان : لا باتي وين مروحة اني قلت لي خالتي راح تقعدي عندي اليوم وهيا وافقت ..
دعاء : اذا هكي مية مية ..
قعدت معاي دعاء باتت قعدنا هلبا واحني نهدرزوا ورقدنا في وقت متأخر .. نضت تقريبا الفجر الساعة 4 عطشااانة هلبا وكان وقت صلاة الفجر نزلت لوطا بيش نشرب امية سمعت طقطقة في صالة الضيوف اللي الداخل ماهو عندنا زوز .. استغربت منوو جاينا في هالوقت حرت هل نمشي نشوف او لا .. تجاهلت الموضوع مشيت للمطبخ شربت اميه وخذيت شيشة ودرت وجهي نبي نركب لي داري انصدمت ب اللي شفته قدام عيني ..
________________________________________💔💔💔
هلا هلا يا حلوين كيف حالكم وحال الصحه مستاحشتكم هلبااااااا ومستاحشة لي تفاعلكم وتعليقاتكم الحلوة اعطوني رأيكم في الحلقة الاولي طبعا مش راح يبنالكم ع شنو تحكي الرواية بالضبط ولا من هما الابطال وهاذا شي بسيط عن احداثها اعطوني رأيكم فيها نكمل او نوقف ...
تابعووووووني
الحلقه الثانيه والثالثه والرابعه والخامسه من هنا
رواية زواج لدقائق معدودة كامله من هنا
رواية خيانة الوعد كامله من هنا
رواية الطفله والوحش كامله من هنا
رواية جحيم الغيره كامله من هنا
رواية مابين الضلوع كامله من هنا
رواية سيطرة ناعمه كامله من هنا
رواية يتيمه في قبضة صعيدي كامله من هنا
الروايات الكامله والحصريه بدون لينكات من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق