رواية مابين_الانتقام_والندم الفصل الثاني والثالث والرابع والخامس بقلم الكاتبه ميمي حصريه وجديده على مدونة النجم المتوهج للروايات والمعلومات

رواية مابين_الانتقام_والندم الفصل الثاني والثالث والرابع والخامس بقلم الكاتبه ميمي حصريه وجديده على مدونة النجم المتوهج للروايات والمعلومات 

رواية مابين_الانتقام_والندم الفصل الثاني والثالث والرابع والخامس بقلم الكاتبه ميمي حصريه وجديده على مدونة النجم المتوهج للروايات والمعلومات 

ماعرفتش شنوو ندير من المنظر اللي شفته قعدت صافنة .. خوي تيمور قاعد يبوس في بنت ومحاصرها ع باب الصالة وفي وضع مش حلو ..

ليان بيني وبين نفسي : منوو هاذي البنت مانعرفهاش وليش جابها للحوش ضروري نعرف ..

وضعهم ولمساته ليها خلاني نكره خوي هلبا وقعدت نشمئز ونتقزز منه .. ركبت لي داري نجري ماقلت شي ولا خليته يحس عليا خشيت للدار وسكرت الباب بقوة .. دعاء انخلعت وفزت من النوم شبحتلي بنعاس ..

دعاء : خيرك شن فيه ؟؟

ليان : مافي شي ارجعي ارقدي ..

دعاء : شنو مافي شي شوفي وجهك في المرايا مولي اصفر زي الليم والخوف واضح في عيونك وبعدين وين كنتي انتي !!

ليان : قتلك مافي شي عطشت ونزلت نشرب امية و خفت لأنه الحوش ظلام وعارفتيني مانحباش ..

دعاء : اي تمام يلا تعالي ارقدي ..

هزيت راسي رجعت هيا لفت روحها بالبطانية ورقدت مشيت توضيت وقعدت نصلي قعدت مقعمزة ومتقززة من المنظر اللي شفته ..

ليان بيني وبين نفسي : لي هالدرجة خوي وصلت معاه يدخل بنات لي حوشنا ويلعب معاهن يعععععع بابا لو يعرف شن راح يقول وشن راح تكون ردة فعله وولده الكبير هكي يدير لازم نحكي معاه الصبح ونخليه يسيب هالتصرفات الطايشة بنات الناس مش لعبة عنده يحساب كل شي يقدر يديره بالفلوس مستحيل نسمحله انه يشوه سمعتنا وسمعة بابا بتصرفاته هادي ..

قمت المصلية ورجعت لي مكاني ورقدت نضت ثاني يوم ع صوت دعاء تنوض فيا فتحت عيوني بنعاس ..

ليان : اووف خليني مزال نبي نرقد ..

دعاء : نوضي خلاص سادك نوم توا الظهر نوضي راهو متت من الجوع شنوو هيا نبي ناكل ..

ليان : وامشي كولي من شادك من شنو متحشمة انتي ..

دعاء : لا نبيك معاي خيرك هكي هيا نوضي ..

ليان : بس شوية خليني حرام عليك نعسانة ..

دعاء : تمام اني نازلة وانتي تعالي وراي ..

خلتتي ومشت لفيت روحي بالبطانية كويس ورجعت رقدت ..

________________________________________💔💔💔

عند دعاء .. 

خليت ليان راقدة و نزلت لوطا قليل نادر مانجي لي حوش خالتي لأنه ماعندي حد نجي ع خاطره الا ليان وهيا كانت مسافرة مرات تكون عندهم عزومة او مناسبة او في العيد نجي نسلم عليهم ونروح مانطولش .. اليوم بتت عندهم لأنه اصرت عليا ليان واصلا اني مانحبش نجيهم لأنه تصرفات تيمور وحركاته اتضايق فيا يمكن يكون تفكيري غلط ومرات نظلم فيه بس تصرفاته هلبا تنرفز فيا متكبر مغرور مايحبش حد غير نفسه نحس فيه مختلف عن خوته اختلاف جذري .. المهم نزلت لوطا بيش نفطر لانه كنت جعانة بنموت ماكانش في حد موجود الا الشغالة في المطبخ قاعدة تنظف ..

دعاء : صباح الخير ..

اسيانا : صباح النور ..

دعاء : معليشي اسيانا بنتعبك نبي فطور ..

اسيانا : تمام جاهز فطور حط هنا او ع طاولة اكل وين تبي تفطر انت ؟؟

دعاء : لا عادي حطيه اهني نحب ناكل في المطبخ اني ..

حطت الفطور ع الطاولة في المطبخ فيه طاولة من غير الطاولة اللي في صالة المعيشة اللي ياكلوا عليها .. قعدت نفكر شوية وخش تيمور للمطبخ لابس ومأنق وعطره تشمه من بعيد ماشبحليش ولا اصلا انتبه لي وجودي ..

تيمور : اسيانا قهوة بسرعة ..

اسيانا هزت راسها بي اي ومشت ادير في قهوة اني مطبسة ناكل طلع تلفونه واتصل ..

تيمور : توا دقايق ونكون في الشركة اسمع كويس ما ادير شي بكل لعند ما اني نجيكم اششش وسكر فمك ماعنديش خلوق لي قصصك يلاااا سكر ..

سكر التلفون مانعرفش مع منوو كان يحكي وشنوو هالاسلوب اللي يحكي فيه مع الناس ..

دعاء بيني وبين نفسي : اوووف قداش انسان ماعنداش ذوق ..

دار وجهه شافني مقعمزة ناكل ابتسم وجي جيهتي سحب الكرسي وقعمز مقابلني ..

تيمور : صباح الخير ياحلوة خيرك قاعدة بروحك ؟؟

دعاء : صباح النور عادي ليان قاعدة نعسانة وراقدة اصلا مزال بكري ..

تيمور : الساعة 11 الصبح تم خلاص اصلا الدنيا الظهر توا ..

ماجاوبتاش شربت شاهي شبحلي بنظرات مستفزة رجع راسه ع الكرسي وحط رجل ع رجل وطلع طرف سبسي هذوكا الكبار مانعرفش كيف يدخن ويكمل فيها اني جنبه وانخنقت ..

تيمور : ايي بوك كيف حاله قالوا خسر شغله وخسارة كبيرة جاته !؟

دعاء : شنوو ؟؟ مانعرفش امتي صار هالكلام ماعنديش علم ..

تيمور : ههههه من حقكن انتن لاهيات في السوق والمولات شن عرفكن بي هالامور ..

دعاء : لاا بجديات نحكي شنوو خاسر ما حكالنا شي بابا عن الموضوع ..

تيمور : اي طبعا ماحكي شي مايبيش يخوفكم ..

دعاء : شنوو قصدك ؟؟

تيمور : ما اتعبيش روحك وتفكري في هالامور لانك راح تتعبي افطري توا صحتين ياحلو اووووف اسيانا وين القهوة عندي عممممل نبي نطلع هيا ..

جابت القهوة وحطتها قدامه اني قعدت بس نفكر ..

دعاء بيني وبين نفسي : كيف بابا خسر شغله هاذا شن يحكي وليش ماقاللنا شي اوووف ..

قعد يشرب في القهوة ويشبحلي ويبتسم بخبث ..

دعاء : خيرك انت ؟؟

تيمور : خيرني !!

دعاء : ليش تشبحلي هكي ؟؟

تيمور : انتي مقعمزة قدامي شنو تبيني نغمض عيوني يعني بعدين حرام نشبحلك والا تخافي مني او شنووو ؟؟

ضايقني هلبا بكلامه ونظراته خليته وطلعت من المطبخ ركبت لي دار ليان لقيتها كيف نايضة تتكسل ..

ليان : هاا فطرتي ؟؟

دعاء : اي امالا تبيني نستناك بيش نموت من الجوع ..

ليان : هههههههه صحتين ..

دعاء : سلمك ..

ليان : خيرك باين عليك مضايقة ؟؟

دعاء : نبي نروح للحوش بالله عليك وصليني ..

ليان : ليش في حد ضايقك حنان قالت شي ضايقك ؟؟

دعاء : لا والله بس كنت نفطر وخوك تيمور قالي انه بابا خسر شغله وخاسر خسارة كبيرة واني ماعنديش علم بيه الموضوع نبي نروح ونفهم الموضوع من بابا شنوو صاير معاه بالضبط ..

ليان : تيمور قالك هالشي !!

هزيت راسي بي اي تغيرت نظرات ليان وناضت وقفت مشت للمرايا رفعت شعرها فوق وكانت تبي تنزل ..

دعاء : وين ؟؟

ليان : اقعدي هنا عندي موضوع مع تيمور نبي نحكي معاه ..

دعاء : باهي خليني نجي معاك ..

ليان : لا حبيبتي انتي اقعدي هنا اني شوية ونجي ..

دعاء : تمام ..

خلتني وطلعت من الدار قعمزت ع السرير واني نفكر في كلامه ..

________________________________________💔💔💔

عند ليان .. 

نزلت لوطا واني النار بتطلع من عيوني ..

ليان : وين تيمور ؟؟

اسيانا : شرب قهوة وطلع شغل ..

طلعت نجري للجنان نبي نلحقق عليه كان كيف بيركب سيارته ناديت عليه بصوت عالي ..

ليان : تيمووور لحظة ..

دار وجهه مستغرب رفع حاجب بي معني شنو فيه مشيتله واني متوتره ومانعرفش شنوو نقول بخصوص الموضوع اللي شفته بس اذا مانبهتاش يوقف هاللي يدير فيه راح يستمر عليه ..

تيمور : خيرر شنو فيه من ع الصبح ؟؟

ليان : تعالي شوية عندي موضوع معاك نبيك فيه ضروري ؟؟ 

سحب نفس قوي رفع يده يشبح للساعة ورجع يشبحلي ..

تيمور : تأخرت توا لما نروح نحكي معاك ماعنديش وقت حاليا اجليه موضوعك لي بعدين ..

ليان : لااا توا بنحكي فيه معاك ما يتأجلش ..

تيمور : احكي معاي كويس ومعاش تعلي صوووتك عليا فااااااهمة ..

ليان : قتلك نبي نحكي معاك خيرك ماتفهمش ؟؟

تيمور : هييي انتي ماطوليش لسانك خير مانقصهولك شنو ماتعرفيش تحكي شنوو ماتفهمش متاعك مزلتي تعاودها وربي تشوفي شي عمرك ماشفتيه ..

ليان : اني لتوا قاعدة كويسة معاك ونقولك خلينا نحكوا ماتخلينيش نحكي كل شي لي بابا ونفضحك قدام الكل ..

تيمور : ليان ماتعصبينش وماتخلينيش نطلع اهبالي عليك شنوو قصدك بي تفضحيني قدام الكل اصلا شنو اللي مدايرة اني بيش تفضحيني ؟؟

ليان : تعال معاي لانه الحرس مرات يسمعونا ..

سحب نفس بقوة وكان يكتم في غضبه مشي قدامي لعند ورا الحوش وقف ..

تيمور : يلا ست ليان اتحفينا بي موضوعك المهم شنوو احكي ؟؟

ليان : منوو البنت اللي كانت معاك اليوم الفجر في الحوش ؟؟

شبحلي بغضب وفنص فيا وسحبني من يدي بقوة وعصرها غمضت عيوني بألم وعيطت عليه ..

ليان : اااااااه يدي ارخيني بعد بتكسرهولي ..

تيمور : تراقبي فيا انتي والا شنوو بالضبط ؟؟

ليان : حول يدك احسنلك والله نحكي كل شي لي بابا ونخليه يلزك من الحوش كله شنو انت ماتتحشمش ع وجهك مدخل بنات ليل لي حوشنا وانت سكران ماقلتش مرات حد يشوفني وتبدا الناس تحكي عن بوووي شنو هالتصرفاااات انت مش صغير وادير في روحك الكبير وهكي تتصرف العتب مش ع الصغار لو غلطوا ..

شدني من فمي بقوة نحس في فكي انكسر اول مرة في حياتي حد يعاملني هكي طول عمري ماتعاملتش بشكل عنيف ..

تيمور : اسمممعي كويس وربي نكسرلك فمك لو سمعتك قلتي حتي حرف واحد عن اللي شفتيه اقسم بالله وبعدين اندير اللي يعجبني الحوش حوشي والاملاك كلهاا في يدي اني يوم يومين ونخليك تتزوجي وتقلبي وجهك من عندنا ف لذلك خليني متحملك هالفترة احسنلك ماتخلينيش انحطك في راسي وانخليك تشوفي شي ماتتوقعيشي طول عمرك ..

ليان : اذا ماندمتكش ع هالتصرف مانكونش ليااااان توا نوريك كيف اني هكي تعاملني ..

تيمور : هههههه خلي نشوف كيف بتوريني يلا بيباي يا حلووة ..

دفني ومشي قعدت نتنفس بقوة واني شفايفي يرجفوا حاولت نسيطر ع دموعي ماقدرتش قعمزت من الصدمة قلبي مكسور ماتخيلتش يطلع خوي نذل لي هالدرجة .. مسحت دموعي بحرقة وخشيت للحوش ..

ليان بيني وبين نفسي : اذا ماخليتكش تندم اني مش ليان ..

ركبت لي داري نجري خشيت للدار كانت دعاء مقعمزة لما خشيت وقفت ..

دعاء : هاا شن صار ؟؟

ليان : يلا وتي روحك بيش انوصلك لي حوشكم ..

دعاء : شن صارر فهمتي شي منه قالك ليش بوي خسر شغله ؟؟

ليان : لاا ما حكالي شي ..

دعاء : خيره خدك احمر وليش عيونك مدمعة هكي ؟؟

ليان : طلعت للشمس وتحسس وجهي منها ..

دعاء : اشبحيلي ليان ليش نحس فيك تكذبي عليا احكي شن فيه ؟؟

درت وجهي عنهاا دمعت عيوني ماقدرتش اندس شي عليها .. مشيت للدولاب انطلع في حوايجي واني نحاول نغير الموضوع ..

ليان : خيرك قتلك مافي شي شنوو نكذب يلا تعالي اختاري حوايج يناسبوك بيش نطلعوا ؟؟

دعاء : تمام ..

خذيت حوايج وخشيت للحمام دوشت وبدلت وطلعت لقيتها مبدلة حطيت مكياج واستشورت شعري ونزلنا لوطا خذيت سيارة وطلعت وصلتها لي حوشها ومشيت لي شركة بابا اتصلت بيه قبل ما نوصل ..

ليان : الوو ..

ابراهيم : هلا باباتي ..

ليان : كيف حالك حبيبي ؟؟

ابراهيم : الحمد لله كويس بما اني سمعت صوتك الحلوو ..

ليان : اني جايتك للشركة موجود انت ولا ؟؟

ابراهيم : اي باباتي موجود بس شنوو اليوم من وين طالعة الشمس غيرتي رايك راح تشتغلي هنا ولا ؟؟

ليان : نوصل ونحكي معاك في الموضوع ..

ابراهيم : ماشي اني توا عندي اجتماع مع العاملين لما نكمل نكلمك ..

ليان : تمام ..

سكرت منه وركزت ع الطريق ..

ليان : اني توا نوريك يا تيمور اذا ماخليتكش تتحسر ع القرش وناخذ كل شي من يدك ونوريك من هيا ليان منوو وشنوو تقدر ادير يحساب روحه بيزوجني ويفتك مني ..

وصلت للشركة نزلت وعطيت المفتاح للعامل يدرسها في القراج خشيت للشركة وطول للسكرتيرة ..

ليان : صباح الخير ..

السكرتيرة : اهلا وسهلا تفضلي ؟؟

ليان : المدير موجود ؟؟

السكرتيرة : اي موجود بس حاليا عنده اجتماع مع العاملين منوو حضرتك بيش نعطيه علم ؟؟

ليان : بنته ليان ..

السكرتيرة : اهلا وسهلا فيك تفضلي للمكتب من اهني اسفة ماعرفتش حضرتك ..

ليان : عادي ولا يهمك ..

مشيت معاها للمكتب قاعدة ما وصلتش تلاقيت مع تيمور عقد حواجبه بإستغراب وفنص فيا واني ابتسمت بكل هدوء وتخطيته اني والسكرتيرة .. فتحتلي باب المكتب متاع بوي خشيت للمكتب وشكرتها خلتني وطلعت قعدت اندور في المكتب ونتفرج عليه .. ليا سنين معاش جيت هنا ولا شايفة التغيرات مولي يهبل المكتب متاعه وفخم لي درجة تقول مش في شركتنا تقول في دولة اجنبية .. قعمزت ع الكنبة وحطيت رجل ع رجل مستنية جيت بوي .. فجأة انطق الباب وخش ولد شاب ممكن في عمر تيمور شخصية وجمال مانعرفش ليش لفت انتباهي من اول نظرة ليه شافني هو استغرب ..

هارون : مرحبا ..

ليان : مرحبتين ..

هارون : منوو حضرتك وليش قاعدة في المكتب بروحك ؟؟

ليان : اني بنت الاستاذ ابراهيم مديركم ..

هارون : هاا اهلا بيك تشرفنا اسف ماعرفتش حضرتك ..

ليان : اني اللي ليا الشرف ..

ابتسم و قعد ساكت وصافن في وجهي تحمحمت وسألته ..

ليان : اممم انت شنوو تشتغل هنا ؟؟

هارون : شغلي نثبت العقود والمستندات وندير مقابلات مع العاملين الجدد ..

ليان : هاا حلوو ربي يوفقك ..

هارون :  شكرا ..

ليان : تفضل قعمز ليش واقف ؟؟

هارون : عندي شغل بس جبت هالاوراق نبي الاستاذ يتاكد منهم ..

ليان : اي هو قالي انه توا عنده اجتماع يمكن قاعد ماكملش بس يكمل نخليه يشوفهم ..

هارون : اي تمام ..

ابتسمت مجاملة وطبست راسي كلامه محدود وبحت صوته تهبل اول مرة يعجبني ولد من اول نظرة مد يده ليا بيسلم ..

هارون : اسمي هارون ..

رفعت راسي كان ماد يده و يعرفني عن نفسه نضت سلمت عليه وابتسمت بهدوء ..

ليان : تشرفت بيك هارون اني ليان ..

هارون : اهلا بيك مرة ثانية ..

هزيت راسي وابتسمت سحبت يدي منه رجعت شعري للورا قدم حط الاوراق ع المكتب ..

هارون : بس لوو سمحتي لما يجي الاستاذ قوليله يتاكدلي من الاوراق ..

ليان : ان شاء الله ..

خلاني وطلع من المكتب قلبي يطق بسررعة ونحس في روحي مزال نبي نحكي معاه ونتعرف عليه اكثرر .. تمشيت ووقفت في بلكونة المكتب كتفت ايديا واني نشبح للحياش والعمارات بان كل شي صغير لأنه الشركة عالية .. غمضت عيوني بتأمل شوية وخش بوي للمكتب درت وجهي ونشبحله كان معاه تيمور ومهند ..

مهند : ليان !! شنو اديري هنا ؟؟

تيمور : جاية تتفقد امور الشركةو الحسابات تعرف اختك ..

ابراهيم : اهلا وسهلا باباتي نورتي الشركة ..

ليان : انت اصل النور حبيبي ..

ابراهيم : شن تحبي تشربي شاهي او قهوة ؟؟

ليان : مانبي شي بس عندي موضوع معاك نبي نحكي فيه ع انفراد اذا ممكن ..

تيمور : ليش يابوي احني برانية واحكي قدامنا علاش ع انفراد بالضبط ؟؟

مهند : يمكن الموضوع خاص بيها خوذوا راحتكم اني عندي شغل ماشي سلام ..

خلانا وطلع وتيمور يشبحلي بي غضب ويفنص بي معني مانقولش ع اللي صار بينا ..

ابراهيم : تيمور ارجع لي شغلك ..

تيمور : اهو طالع خوذوا راحتكم ..

خلانا وطلع من المكتب وهو ع اعصابه .. شبحلي بابا بي نظرات احنينة جي جنبي وشد يدي وقعمزني ع الصالون وقعمز مقابلني وهو شادلي يدي ..

ابراهيم : احكي حبيبتي شنوو الموضوع ؟؟

ليان : راح نشتغل معاكم في الشركة ..

ابراهيم : مية مية هيا هاذي بنتي اللي نعرفها متاكد مش راح تندمي ع قرارك هاذا ..

ليان : ان شاء لله ..

ابراهيم : وين تحبي يكون مكتبك ؟؟

ليان : وين ما كان بس نبي بلكونة تكون اطلالتها زي مكتبك لانه حلوو المنظر من هنا ..

ابراهيم : اني قداش عندي ليان ادللي راح يكون مكتبك في احلي مكان في الشركة ..

ليان : ثانكيو ..

ابراهيم : ولو من عندي غير ليونه ..

ليان : بابا فيه موضوع ثاني !!

ابراهيم : شنوو الموضوع قولي ؟؟

كنت نبي نحكي انطق الباب ..

ابراهيم : تفضل ..

وخش هارون ..

هارون : طلبتني ؟؟

ابراهيم : أي وين الاوراق اللي طلبتهن منك اليوم ..

هارون : موجودات ع المكتب قلت للانسة انها تعطيك علم بيهن ..

ليان : ءءء أ هو توا كنت نبي نقولك عليهم ..

ابراهيم : ماشي تقدر تطلع ..

هز راسه بي اي طلع وسكر الباب .. تحشمت منه هلبا توا اكيد يحساب اني تجاهلت كلامه وماقلتش لي بوي عمدا .. رجع بابا شبحلي اني كنت مطبسة وصافنة ..

ابراهيم : اي كملي بابا شنوو الموضوع ؟؟

ليان : هااا ..

ابراهيم : شنوو الموضوع اللي كنتي تبي تحكيلي عليه ..

ليان : اه مافي شي وكنت نبي نقولك عن هارون انه جابلك الاوراق ..

ابراهيم : من وين تعرفي اسمه انتي !؟

ليان : لما جابلك الاوراق اني كنت قاعدة في المكتب وتعرفنا ع بعض ..

ابراهيم : هاا ماشي ..

ليان : يلا اني بنمشي ..

ابراهيم : ع وين راح نكلم السكرتيرة ادلك ع المكتب اللي راح تشتغلي فيه وشوفي شنوو لازمك اشري ورتبي ع ذوقك وراح نخلي المحاسب يدزلك كل الاوراق تتاكدي منهم ..

ليان : ههههه يعني شنو بتشغلني من اول يوم ..

ابراهيم : لا بابا بس رتبي امورك ومن غدوا ابدي في الشغل ..

ليان : بس هاا نسيت لازم نتفقوا ع حاجة قبل ما نبدا ..

ابراهيم : شنوو هيا ؟؟

ليان : راتبي حالي من حال الموظفين الموجودين هنا ومافيش أي تفرقة بيني وبينهم ومانبيش اي شخص يقول بنته ويعاملها احسن منا تعتبرني مش بنتك هنا تمام ..

ابراهيم : صارر ..

حضنته واني مرتاحة ضمني عليه و باس راسي ..

ابراهيم : من عندي غيرك اني انتي روحي من الدنيا فرحتي انتي ..

ليان : عمري انت الله لا يحرمني منك ..

ابراهيم : ولا يحرمني من هالوجه العسل ..

ليان : ههههههه يلا اني طالعة توا وانت شوف الاوراق يبيهن الولد ..

ابراهيم : اي توا نشوفهن هو انتي شغلك راح يكون اغلبيته معاه لأنه هو تقريبا زي شغلك يصحح الاوراق والمقابلات ..

ابتسمت وفي داخلي فرحت هلبا انه راح نشتغل معاه ونكونوا جميع وفي مكان واحد وهكي راح نتعرف عليه أكثرررر ..

ليان : تمام ..

خليته وطلعت من المكتب واني مرتاحة قعدت اندور في الشركة .. كان هارون حط يده ع طاولة قدام شخص ويشبحوا هما الزوز في الاورق اللي ع المكتب اللي قدامهم الولد مقعمز وهو واقف ويحكي معاه ويأشرله ع الورقة واني نشبحلهم .. ومانحسش غير انه انسحبت من يدي بقوة درت وجهي كان تيمور خذاني للمكتب متاعه خشينا للمكتب دفيته بقوة واني مضايقه منه ..

ليان : وحق الله يا تيمور اذا مزال تمد يدك عليا راح نحكي كل شي لي بوي اعرف حدك احسن مانفضحك قدام العالم كله ..

تيمور : شنو اديري ليش جيتي هنااا بيش تشكيني لي بوي ولا وتخليه يطلعني من الشركة صح ولااا ؟؟

ليان : ههههههههه لي هالدرجة خايف مني ..

شدني من يدي وسحبني عليه بقوة نحس في صوابعه نبتوا في زندي ..

تيمور : ليييييااان فوتيني خيرلك اهو نقولك من توا اخطيني راهو خوك واحد شيطان مايعرفش لا قريب ولا بعيد الكل متساوي عنده ..

دفيته بقوة واني يدي توجع فيا وعيوني دمعت ..

ليان : كسرة في يدك ان شاء الله حقير ماحكيتش لي بوي شي قلت ماتجيش انت خوي في النهاية بس توا راح نحكيله كل شي ونخليه يطلعك من حياتنا ياااامريض ..

خليته وطلعت بسرعة من المكتب واني متوترة وعيوني مدمعة نمشي بسرعة ونحكي مع روحي .. خبطت في شخص بقوة شدني من كتافي يثبتني رفعت راسي كان هارون ..

هارون : بالشوي عليك ..

ليان : اسفة ماشفتكش ..

هارون : صاير معاك شي ؟؟

ليان : بابا قاعد ؟؟

هارون : عنده اجتماع حاليا نحكيلك معاه ..

ليان : امتي يكمل ؟؟

هارون : قريب ساعتين هكي ويطلع ..

تيمور : خيررر شن عندك معاها انت ؟؟

ليان : مادخلكش انت ..

تيمور : لياااان ..

هارون : سألتني عن الاستاذ ابراهيم قتلها عنده اجتماع حاليا ..

تيمور : ارجع لي شغلك ..

هز راسه بي اي خلانا ومشي .. شبحت لي تيمور بغضب خليته وطلعت من الشركة جي يجري وراي شدني من يدي دفيت يده وعيطت في وجهه ..

ليان : بعد يدك من عليااااا معاش تلمسني ..

تيمور : خلاص اهدي شوفي صح غلطت اني وما كانش لازم نتصرف هكي معاك نعترف بغلطي فوتيه الموضوع وماتحكيشي لي بوي لانه اكيد راح يضايق وينقهر وهو عنده ضغط تبي تجلطي بوك انتي ؟؟

ليان : ليش انت مافكرتش في بوي قبل ماتتصرف هكي توا بدي يهمك ..

تيمور : اسمعي توا احني في الشركة وعيب هالتصرفات تصير بينا ماتنسيش انه احني خوت نروحوا للحوش ونتناقشوا في كل شي تمام ..

ليان : اي وبشرط يكون الكلام قدام بوي ..

تيمور : ليان احني شن قلنا قتلك فوتيه الموضوع واني اسف لانه مديت يدي عليك معاش نعاودها وعد ..

ليان : مش راح تضحك عليا بكلامك هاذا راح نحكي لي بابا عن تصرفاتك معاي وعن الموضوع اللي شفته بعيني ..

تيمور : استغفر الله توا شن تبي انتي بالضبط ؟؟

ليان : تفهمني ليش جبت البنت لي حوشنا وليش ضربتني لما حاولت نفهمك انه اللي ادير فيه غلط ..

تيمور : ضربتك لأنه تعصبت وماقدرتش نتحكم في روحي وبالنسبة للبنت يعني لي شنوو جبتها عيب شنوو هالسؤال هذا ؟؟

ليان : عندك علم انك انت واحد مريض نفسي لازم تتعالج مع كل الاسف انك خوووي وبونا واحد مع الاسف ..

تيمور : استغفر الله ياربي ..

خليته ومشيت نتمشي ع الرصيف كان فيه كفتريا قريبة من الشركة خشيت وطلبت قهوة بدون فطور ومن الصبح زاهقة ونبي نرجع .. كملت وطلعت من الكافتيريا قعدت اني نتمشي ع الرصيف طلبت من الحارس يجيبلي سيارتي قعدت واقفة ع باب الشركة شوية واتصل تلفوني كان بابا ..

ليان : الوو ..

ابراهيم : وينك جيت للمكتب ومالقيتكش ..

ليان : نبي نمشي للسوق بنشري كم حاجة لازمتني للمكتب ومني غادي بنروح للحوش ..

ابراهيم : ماشي حبيبتي اشري اللي يعجبك وارجعي للحوش بكري لانه في مشروع لازم نحكي فيه معاك وراح يكون شراكة بيني و بين تجار جدد ..

ليان : تمام ..

سكرت التلفون وركبت سيارتي ومشيت للسوق شريت لابتوب واشياء تفيدني في المكتب حطيت كل شي في السيارة .. اتصلت بي دعاء ماردتش مانعرفش وين وليش ماتردش رجعت للحوش تقريبا الساعة 3 العصر .. درست سيارتي في القراج وخشيت كان بوي وخوتي مروحين من الشغل و كانوا كلهم مقعمزين في الصالة ..

ليان : السلام عليكم ..

الكل : وعليكم السلام ..

ابراهيم : غيري حوايجك وارتاحي وتعالي للمكتب متاعي ..

هزيت راسي بي اي خليتهم وركبت لي داري بدلت حوايجي ونزلت لوطا .. تيمور قاعد ويشبحلي بنظرات مستفزة خليتهم ومشيت لي مكتب بابا طقيت الباب ..

ابراهيم : تفضلي تعالي باباتي ..

مشيت قعمزت ع الكرسي المقابل للمكتب طلع اوراق من الدرج وحطهم قدامي ..

ابراهيم : دققيلي في هالاورق اليوم وصلوني ع خاطر نعقد شراكة بينا وبين مصنع مواد غذائية ..

خذيت الاوراق من يده وقعدت نشوف فيهن فيهم اخطاء قعدت انراجع فيهم و مستغربة ..

ليان بيني وبين نفسي : معقولة هاذم اوراق شراكة بين تجار ..

ليان : فيه غلط في الاوراق ..

ابراهيم : شنو الغلط احكيلي ..

ليان : حسب القانون الليبي والمشاريع الخدمية والصناعية يكون للشركة مبدأ خاص وشروط تنفيذية وعقود وتوقيعات من صاحب الشركة هالاوراق مافيها شي الا قداش المبلغ اللي راح يندفع وشنو اسم المصنع اللي راح نتعاقدوا معاه وتوقيعهم مش واضح بكل نحس فيهم مش قانونيات او فيهن شي غلط ..

ابتسم بابا لما سمع كلامي سحب نفس ..

ابراهيم : الاوراق صح كلهن غلط في غلط واني درت هكي بيش نختبر معلوماتك ونشوف مهارتك في الشغل طلعتي شاطرة ومايفوت عليك شي ..

ليان : حلوو يعني قاعد تختبر فيا ..

ابراهيم : هههه اي ..

ليان : وتوا شنو طلع معاك ؟؟

ابراهيم : ماهو فتلك شاطرة ..

ليان :  i know ( معناها نعرف ) ..

ابراهيم : وهيا هاذي بنتي اللي نعرفها ..

ليان : ماهو طالعتلك ..

ابراهيم : اكيد ..

قعدت مقعمزة مع بابا في المكتب نهدرزوا ونضحكوا شوية وانطق الباب كانت الشغالة ..

اسيانا : بابا الاكل جاهز ..

ابراهيم : اهو جايين بابا ..

هزت راسها بي اي نضنا مع بعض ومشينا قعمزنا ع طاولة الاكل وبدينا ناكلوا ونشبح لي تيمور ..

ليان بيني وبين نفسي : هل نحكي لي بابا عن تصرفاته او نقعد ساكتة نخاف نسكت ويتمادي اكثر ونخاف نحكي وبابا يلزه من الحوش والشركة بابا في المواضيع اللي زي هاذي مستحيل تقدر تتفاهم معاه احسن شي نعطيه وقت توا ونشوف اذا راح يتغير او لا اذا قعد ع وضعه هاذا و اسلوبه هكي بنحكي كل شي لي بابا ونخليه هو يتصرف معاه ..

كملنا عشي وقعمزنا في الصالة كل واحد شاد تلفونه ويقلب فيه شوية وجابتلنا اسيانا القهوة خذيت فنجاني وركبت لي داري نبي نرتاح شوية .. حطيت القهوة علي المكتب متاعي وفتحت اللاب توب وقعدت نتصفح فيه راسلت صاحباتي اللي في المانيا اخر شي مليت فتحت البلكونة وقعدت مقعمزة برا .. الحوش ممل هلبا ومافيشي روح ولا فرحة بكل كل حد لاهي في روحه وكل شخص يمشي معاك ع مصلحته وبس .. الشخص الوحيد اللي مايدورش في مصلحة معاي هو بوي اما الباقي كلهم ع قد المصلحة وبس .. تأخر الوقت هلبا خشيت للدار وسكرت البلكونة تمددت علي فراشي ورقدت .. نضت ثاني يوم متاخرة وهو اول يوم شغل ليا في المكتب نضت بسرعة نشبح للساعة لقيتها ال 11 الصبح غسلت وجهي وبدلت حوايجي واستشورت شعري ع السريع حطيت مكياج خفيف لازم نساوي روحي لانه راح يعرفني بابا اليوم قدام الموظفين ونكون معاهم في الشغل .. لبست سروال اسود وجاكيت بالون الاسود والداخل سورية بيضاء بدلة رسمية يعني حطيت عطر شبحت لي روحي في المرايا واني نبتسم ..

ليان : قمر وربي هههههه ..

خذيت تلفوني حطيته في الشنطة ونزلت لوطا مافطرتش في الطريق وقفت زحمة بشكل غريب وقعدت نستني يخف نشبح للساعة تاخرت هلبا ..

ليان : ياربي امتي تخف الزحمة الدنيا توا ظهر ..

و بدأ يأذن المؤذن تأففت بضيق قعدت هلبا مستنية تخف الزحمة اتصل بيا بوي ..

ليان : الوو ..

ابراهيم : ليااااان وين انتي باباااااا بسررررعة ارجعي للحوش بسرررعة ..

ليان : شن فيه باباا شن صاير !؟

ابراهيم : وين انتي توا وييين ؟؟

ليان : في الطريق جاية للشركة ليش تعيط صاير شي ؟؟

ابراهيم : ارجعييييييي بسرررعة ارجعيييي ..

توترت هلبا وخفت قعدت ماتكلمتش وتحرك السير وقعدوا السيارات يكلكسوا عليا بيش نتحرك سكرت التلفون ومشيت بسرعة .. خوفني بابا هلبا وماعرفتش شنوو الموضوع كيف طلعت من الزحمة ولحقوني سيارتين وسكرن عليا من الجهتين نحس معاش فيا ولا قطرة دم نحاول نطلع روحي منهم من كل جهه يسكروا عليا ويحاولوا يوقفوني نشبحلهم ونسووق بسرعة .. جت قدامي سيارة عيطت بصوووت عاالي وشديت افرين بيش نوقف السيارة .. وقفت وضربت راسي بكل قوة ع الستيرسو دخت وعيوني غوشن ومعاش نشوف كويس نفتح ونغمض .. شوية و انفتح باب سيارتي نشبح منوو هذا وحاط لثام ع وجهه وشاد في يده قماش ابيض حطه ع خشمي اول ماشميته اغمي عليا وماحسيتش بي اي شي بعدها ..

________________________________________💔💔💔

رواية بعنوان 

#مابين_الانتقام_والندم

________________________________________💔💔💔

#الحلقة_3 

الطريقة الوحيدة للقيام بعمل عظيم هي أن تحب ما تفعله .. 

The only way to do great work, is to love what you do.

________________________________________💔💔💔

عند دعاء .. 

حسيت ليان مش ع بعضها بس ماحبيتش نضغط عليها هلبا يمكن يكون الموضوع خاص بيها هيا وعيلتها .. رجعت للحوش وصلتني هيا ومشت طقيت الباب فتحه خوي مسلم ..

________________________________________💔💔💔

نعرفكم ع عيلتي طبعا اني عندي 2 خوت واحني 3 بنات اختي غزالة ونسرين متزوجات واني الوحيدة اللي مزال مش متزوجة مسلم خوي متزوج وعنده ولد وخالد خوي الكبير حتي هو متزوج بس ساكن بعيد علينا وعيلته مش هلبا كبيرة ..

________________________________________💔💔💔

مسلم : وين كنتي ؟؟

دعاء : كنت في حوش ليان ..

مسلم : وخيره اني مانعلمش امتي مشيتي ؟؟

دعاء : من امبارح وقلت لي ماما ماقاتلكمش ..

مسلم : والله مانعلم وقعدتي تطلعي هلبا هالايام وبدون ما تشاوري ..

دعاء : توا شنوو فاتح تحقيق معاي غير خليني نخش قبل ..

مسلم : خشي خشي مولي لسانك طويل ..

خشيت للحوش شفت امي في المطبخ هيا و عفاف مرت خوي مشيتلهم ..

دعاء : سلامات ..

عفاف : اهلين حبيبتي الحمد لله ع سلامتك باهي اللي ماصارلك شي حكتلي عمتي ..

دعاء : الله يسلمك ..

جميلة وتكون ام دعاء : كيف حالهم حوش خالتك وغريبة روحتي بكري ..

دعاء : هكي مانحبش نقعد هلبا عارفتيني مانرتاحش شنو مدايرين الغدي ؟؟

عفاف : قاعدة ما درتش شي امشي لي دارك بدلي وتعالي ساعديني في الغدي وانتي مخليه كل شي عليا اني ..

تأففت بضيق مرت خوي هيا صح حبابة وكويسة بس تجرح بكلامها وتغار مني هلبا لازم لما نطلع حتي هيا تطلع ولما نشري شي حتي هيا لازم تشري واذا ضمت حاجة او طيبت لازم اني معاها يد بي يد .. خليتهم ومشيت لي داري بدلت حوايجي لبست توتة خذيتها من ليان اني وياها عادي نلبسوا من بعض وجسمي زيها يعني نفس المقاس .. طلعت من الدار انطق الباب مشيت فتحته كان بابا خش للحوش و وجهه مضايق اذكرت كلام تيمور عن شغل بوي ..

دعاء بيني وبين نفسي : معقولة يطلع كلام تيمور صح وبابا خسر شغله ومايبيش يقول بيش مانزعلوش ..

دعاء : الله يساعدك ياحاج ..

حازم : ويساعدك بنيتي ..

دعاء : نجيبلك شي تشربه ؟؟

حازم : اي جيبيلي اميه ..

دعاء : حاضر ..

مشيت للمطبخ صبيتله طاسة اميه ورفعتهوله خذاها من يدي وشرب قعمزت جنبه ع الصالون ..

دعاء : بابا في موضوع نبي نحكي معاك فيه ؟؟

حازم : اي يابنتي احكي شن فيه ..

دعاء : نبي نسألك انت حقا خسرت هلبا في شغلك وخسارة كبيرة ؟؟

شبحلي بي إستغراب بلعت ريقي بتوتر وقعدت نشبحله مستنية جواب منه ..

حازم : منوو قالك هالكلام !؟

دعاء : مش مشيت مع ليان لي حوشهم وسمعت خوتها يحكوا ع موضوع شغلك ..

حازم : شن قالوا ؟؟

دعاء : هو سمعتهم قالوا فلان خاسر شغل مهم ومن غيره خساير كبيرة ..

حازم : مافيش منها الدوة هاذي اللي صار انه تغرمنا من الحكومة ع مكان المعمل لأنه مش واخذين رخصة وتوا كل شي تمام ..

دعاء : اكيد بابا ؟؟

حازم : اي يا بنتي ..

دعاء : الحمد لله تعرف خفت هلبا لما سمعت بالكلام ..

حازم : ماتخافيش وتوا نوضي ناديلي خوك نبيه في موضوع مهم ..

دعاء : تمام ..

خليته وركبت فوق لي شقة خوي قتله بابا يبيك نزل ومشي قعمز معاه واني مشيت للمطبخ نساعد في عفاف في الغدي .. كملنا الغدي درنا كسكسي وبراك درته اني لانه مسلم مايحباش ومستحيل ياكله ولا يذوقه واحني كلنا نحبوه .. كملنا غسلت الماعين ومشيت لي داري دوشت وبدلت وطلعت لانه ريحتي ولت طبخ وبصل واني مانحبش .. حطينا الغدي وقعمزنا تغدينا جميع عندي اياد ولد خوي عمره 3 سنوات مدلل الحوش ..

اياد : بابا عماي ابيش طيني طقوسة (( عمتي ماتبيش تعطيني القطوسة )) ..

دعاء : ياا والله يبي ياخذ قطوستي ويقتلها زي الاولي ..

مسلم : مايديرلها شي ولا بابا بس تلعب معاها ..

اياد : هيا تاعي نبيها ..

دعاء : ههههه امتي ولت متاعك اني شريتها يبقي متاعي انت خلي بابا يشريلك وحدة مش راح نخليك تقربها قطوستي ..

عفاف : مانبوهاش يا ماما امسخة اخي فيها امراض توا اني نشريلك عصفور ونحطهولك في قفص والعب بيه ..

اياد : لالا نبي طقوسة دودي ..

جميلة : خلاص توا غدوا نمشي اني وياك وجدو لي مدينة الالعاب ولي حديقة الحيوان ..

اياد : دودي مافيش مشي عانا ..

دعاء : هههه ياخبيث ليش ماتخلينيش نمشي معاكم ..

عفاف : هههه مضايق علي القطوسة ويبي ينتقم منك شفتي ولا ..

دعاء : اصلا عادي توا نمشي بروحي اني ..

اياد : تمشيش لا ادعدي هنا ..

دعاء : لا بنمشي ..

حازم : خلاص وانتي حاطة راسك من راس العيل خليه ياكل ..

نحب نعاند اياد ونعصبه ونخليه يضايق ونتعارك معاه نموت فيه هالفرخ .. كملنا ماكلة قمنا الصفرة اني ومرت خوي غسلناهم وكل واحد مشي لي داره بابا وماما خذوا اياد وطلعوا وخوي ومرته طلعوا للمول يشروا حوايج .. خشيت اني لي داري وقعدت انصور وانزل عالانستا طلع قدامي حساب تيمور في الاقتراحات لأنه اني ضايفة اخته ليان .. خشيت ع الاكاونت متاعه قعدت نتفرج عليه فيه صور هلبا ليه مش مخلي دولة مش ماشيلها مصور في افخم الاماكن نحس فيه يحب يفتخر بي فلوسه ومنصبه خشيت ع الاشخاص اللي متابعهم كانوا شوية بس 20 شخص خشيت انشوفهم لقيتهم كلهم رجال اعمال وناس اجانب مانعرفهمش طلعت من صفحته بسرعة ..

دعاء : شن عندي خاشة نقصقص ..

حذفت التلفون وطلعت ماسكات وجه وقعدت اندير في روتين عناية بالبشرة اتصلت بيا ليان كانت يدي فيها كريمات ماقدرتش انرد نظفت وجهي ومشيت غسلت طلعت للجنان جتني صاحبتي وهيا تكون جارتنا في نفس الوقت قعدنا نهدرزوا للمغرب رجعو كل اهلي للحوش وصاحبتي روحت ..

اياد : دودة ثوفي ثن جبت ..

دعاء : ترا نشوف ..

كان جايب قطوسة لعبة وفرحاان بيها المهم عنده يعاندني ..

دعاء : اعطيهولي ايادو حبيبي ..

اياد : عدك وحدة اتي ..

جميلة : خليله قطوسته يلا امشي مش راح نعطوك شي هاذي بس ليه ..

دعاء : ماما لالا نبي حتي اني ..

قعد يضحك عليا لانه دايرة روحي نبكي قمته وبست خدوده الحلوات .. قعدنا مقعمزين اني وياه في الصالة نلعبوا بالقطوسة متاعه الساعة 7 انطق باب حوشنا طلع بابا احني قعدنا مقعمزين شوية وخش بابا و وجهه مقلوب قلب ..

مسلم : ها يابوي منوو ؟؟

حازم : هذا خالك ابراهيم اب ليان ..

جميلة : ها غريبة ليش جاينا وفي هالوقت ؟؟

حازم : قال انه بنته مخطوفة وقال ردوا بالكم ع بنتكم وماتخلوهاش تطلع هالفترة لأنه حياتهم في خطر ..

دعاء : شنووو ؟؟

________________________________________💔💔💔

عند ليان .. 

دايخة ونحس في راسي بيتفجر ووجع مش طبيعي في راسي فتحت عيوني بهدوء مانشوفش كويس عيوني مشوشات ونحس في روحي مش مركزة كأني في حلم مش حقيقة بلعت ريقي بتوتر غمضت وفتحت عيوني نشبح حواليا المكان ظلاااام مانشوفش في شي غير ضي خفيف يخش من الروشن اللي كان مقابلني والهواء يحرك في الروشن ..

ليان بيني وبين نفسي : وين اني ومنوو جابني لي اهني وشن صار معاي ..

مش قادرة نفهم شي اذكرت اخرر شي صاار معاي سيارتين يلحقوا فيا واذكرت اني درت حادث وانخبط راسي في الاستيرسو بنحرك ايديا ماقدرتش كانوا مربوطات ع الكرسي وفمي حتي هو رابطينه وماقدرتش حتي نعيط قعدت نهز في الكرسي نبي انفك روحي ..

ليان بيني وبين نفسي : يارب ساعدني منوو هاذم الناس وليش خاطفيني وبوي وين هل عرف مكاني او مزال يدور عليا ..

قعدت هلبا مربوطة في الدار المظلمة وخايفة وقلبي نحس فيه شوية ويوقف ندعي في داخلي ونصبر في روحي .. نخاف هلبا من الظلام وبالذات لما نكون بروحي عندي فوبيا نقعد نتخيل حاجات مش موجودة عقلي يبدا يألف بروحه ونبدا نتخيل انه جن يلبسني او يطلع قدامي .. مرت ساعتين تقريبا واني ع وضعي انفتح الباب وخش شخص .. غمضت عيوني بقوة واني خاايفة بس مانبيشي يشوفوني ضعيفة سحب كرسي وقعمز مقابيلي فتحت عيوني عيطت بس ماطلعش صوتي وهو كان لابس قناع اسود وبس عيونه باينات يخوف قعدت نرجف ونبكي نحس في جسمي بدي زي كرسي الهزاز ..

......... : اشش ماتبكيش ولا تخافي مش راح نديرلك شي اني مجرد عندي حساب مع بوك ونبيه يخلصه انتي ماعندكش ذنب ولا راح نأذيك ارتاحي تمام ..

قعدت نهز في راسي نبيه يفتح فمي قرب مني فتح فمي عيطت بصوت عالي ..

ليان : ساااااااعدووووني يااااانااااس ياااعاااالم ساعدوووووني ..

كان واقف وراي حط يده علي فمي وسكتني نزل راسه جنب رقبتي وهمس قريب من وذني ..

............. : اششش خليك هادية ماتجبرنيش نتصرف معاك بأسلوب ثاني ..

صوته سامعاته من قبل بس منوو هذا مانعرفش ..

ليان بيني وبين نفسي : معقولة يطلع واحد من اقاربنا متاكدة مش غريب عليا ..

رفعت راسي نشبحله ركزت ع عيونه منوو نبي نعرفه عيوني كلها دموع قعد هو يشبح لي عيوني فجأة تكلم ..

............. : ماتخافيش قتلك مش راح نديرلك شي ليش تخليني طول الوقت رابطك ..

ملت راسي ع جنب بعد يده من فمي سحبت نفس قوي نحس في روحي مخنوقة ..

ليان : منووو انت منوووو وليششش خاطفني احكي في شنووو ضريتك اني شن تبي منييي ؟؟

قعد يتمشي بكل هدوء وجي قدامي سحب الكرسي وقعمز قدامي ..

.......... : ماضريتيني بشي ولا اني بنضرك توا بس عندي حساب مع الوالد وانتي بنته الوحيدة وعزيزة هلبا عليه فا شفتك انتي مناسبة تكوني نقطة ضعفه ..

ليان : وبابا شن دايرلك بابا عمره ما ضر انسان شن تبي منه اذا تبي فلووس اني نعطيك والله بس طلعنييي من هنا ..

........... : هههههه والله تصدقي ضحكتيني بكلامك هاذا صار مش ضار حد بوك هاذا واحد كذاب ومخادع ياكل في الحرام اصلا شن وصله لي هالمرحلة وهالفلوس والرفاهية غير فلوس الحرام بس حقك انتي ماتعلمي بي شي موفرلك ومعيشك احسن عيشة ..

ليان : احترررم نفسسسك وماتحكيش ع باباااا هو احسسسن منك يانذل انتم اللي تاكلووو في الحرام ..

.......... : بوك وخوتك انذال هما أكبر حرايمية وبخيلين وقريبا راح تعرفي انه كلامي كله صح ..

ليان : تحكي توا عليهم لأنه ماهمش جنبك لو فيك خيرر امشي واجهم ما اطلعش بطولاتك قدااامي ياجبااان فكنييييي يلاااا طلعنييي من اهنيييي ..

............. : هو مستني هاليوم ساعة بي ساعة اللي بنواجهم فيه وناخذ كل شي قدام عيونهم واندمهم ع كل تصرف غلط داروه في حقي ..

قاعدة ماتكلمتش خش شخص ثاني حتي هو ملثم بلعت ريقي واني نشبحلهم ..

........ : هاا شن صاار معاك فؤاد ؟؟

فؤاد : الكل يدور عليها وحتي مقدمين بلاغ للشرطة لازم نستنوا يوم بيش نكلموهم بيش مايتعقبوش الاتصال ويحددوا موقعنا خلينا نصبروا لعند غدوا ونشوفوا كيف نتصرفوا ..

......... : ماشي انت راقبلي كل شي من بعيد ..

ليان : طلعوني من اهني بالله علييييكم خلوني نرجع لي حوشي نعطيكم شن تبوا من فلووس بس طلعوني ..

فؤاد : اسمع خلينا نهددوا بوها ونطلبوا منه فلووس ونفوتوا موضوع الانتقام والتنازل متاكد مش راح يتنازل عن القضية بوها لما نستلموا الفلوس نتصرفوا فيهن ..

.......... : نخليه يتنازل غصباً عنه اني ماصدقت بدي عندي سلاح ضده تبيني نضيع هالفرصة من يدي مستحيييل ..

فؤاد : عندهم منصب قوي ونخاف يوصلولنا ونريح فيها اني وانت ..

........... : فؤاد اني اتفقت معاك من الاول قتلك اذا مش قدها انسحب وماتجازفش بروحك وانت خبطت ع صدرك وقلت اني معاك خيرك توا شن صارلك اذا خايف انسحب اني توا نتصرف في كل شي بروحي ..

فؤاد : اني مش خايف والله بس ع خاطرك ..

......... : خلاص توا تعالي برا نكملوا كلامنا وشن بنديروا توا ..

ليان : وييين مخلييني وماشيين بالله عليكم طلعوووني ماتخلونيش هنااا والله نخاف من الظلام ..

ولا كأنهم يسمعوا فيا طلعوا وسكروا الباب عليا قعدت نبكي ونرجف من الخوف ..

ليان بيني وبين نفسي : منوو هاذم وشنوو يبوا من بوي شن مدايرلهم وليش هكي حاقدين عليه وعن شنوو لازم يتنازل ..

نحس في عقلي وقف عن التفكير مش قادرة نفهم اي شي من اللي قاعد يصير ..

ليان : ياربي خلصني منهم واحميلي بابا ..

________________________________________💔💔💔

عند اهل ليان .. 

مهند : بابا اهدا توا نلقوها وين راح تمشي يعني ..

ابراهيم : وييين بنلقاها ويييين احكولي ماخليتش مكان مادورتش فيه سيارتها في نص الطريق موجودة وهيا ماليهاش اثر لا كاميرات موجودة وادلني ع مكانها ولا شرطة تقدر تطلع ادور عليها الا بعد ما يمر ع غيابها 24 ساعة شن صايرر فيها توا هل ضربوها هل جاعت او عطشت ياربي راح ننجن معاش عندي حيل ياربي بنيتي ماعندي غيرها هاذي وحيدتي يارب احفظهولي ..

تيمور : منوو تتوقعوا يكون خاطفها ؟؟

حنان : عندكم عداوة مع شخص معين ؟؟

ابراهيم : عندي هلبا منافسين بس مانتوقعش توصل بيهم يخطفوا بنتي واذا واحد منهم راهم اتصلو وهددوني بي بنتي طلبو فلوس عليها بس المشكلة ساكتين ياخوفي صارلها شي ..

قصي : توا يتصلوا اذا مش اليوم غدوا هما لما خطفوها اكيد في بالهم شي وخذوها كسلاح ضدنا ..

تيمور : كلام قصي منطقي ..

حنان : ياربي سترك خايفة يديرولها شي ..

تيمور : حتي انتي ماتطلعيش عن يخطفوك اوكي ..

حنان : بعد هكي مستحيل نعتب حتي الباب ..

انطق باب الحوش فتحت اسيانا الباب خش اب دعاء وخوها وهيا ..

حازم : السلام عليكم ..

الكل : وعليكم السلام ..

مسلم : بشرو شن صار معاكم ماعرفتوا شي ؟؟

تيمور : تتخيل لوو عارفين مكانها نقعدوا هكي مقعمزين ..

حازم : ما اتصلوش بيكم !؟

ابراهيم : ما اتصلوش ولا فيه شي وصلنا ليها لقينا سيارتها في نص الطريق بس هيا ماليهاش اثرر ..

دعاء : ياربي كون في عونها معقولة يكونوا قتلوها !؟

ابراهيم : شنووو يقتلوها اكيد لاا قاعدة عايشة اكيدة مش ميتة ماتموتش بنتي ماتمووتش ..

حازم : استغفر الله اب تيمور وان شاء الله مافيها شي وترجع سالمة دعاء من خوفها قالت هكي ..

دعاء : احميها ياربي وخليها ترجعلنا سالمة ..

حازم : قدمتو بلاغ للشرطة ..

ابراهيم : قدمت ومايقدروش يديروا شي حاليا الا بعد ما تمر 24 ساعة ع اختفائها من الحوش ..

مسلم : انتم شاكين في شخص معين ؟؟

تيمور : الناس كلها حاقدة علينا ومانقدروش نحددوا شخص واحد ولانقدروا نحاسبوهم بدون اثباات قوي ..

حازم : كلامه منطقي ..

ابراهيم : شن بندير توا فهموني نقعد هكي مقعمز ومربوط ومانعرفش بنتي شن صاير فيها ؟؟

مسلم : اني بنمشي ندور ونشوف كاميرات الشارع اللي كانت موجودة فيه سيارتها ..

مهند : واني جاي معاك ..

طلع مسلم ومهند من الحوش وقعد ابراهيم يتصل بي معارفه في الحكومة بيش تطلع دوريات ادور عليها ..

ابراهيم : بنمشي نشوف العقيد عادل ..

حازم : يلا امشي اني معاك ..

هز راسه بي اي وطلعو جميع من الحوش الكل خايف ويدور ماعدا تيمور اللي قاعد بكل هدوء وإرياحية ..

قصي : شن هالبرود اللي عندك اختنا مخطوفة اختنا ماعندناش غيرها وانسانيتك ماتحركتش حتي شوووية اختك ياهمي ..

تيمور : كملت !؟

قصي : خليك يوم واحد من العيلة وبين خوفك عليها سيب هالغرور والتكبر علي جهة ..

تيمور : شن تبي مني اندير هاا دورتوا دورت معاكم شفتوا الكاميرات وحتي هو مشيت معاكم قدمتوا بلاغ مشيت زيكم لي مركز الشرطة وكلمت الضباط اللي نعرفهم شن تبيني اندير اكثرر من هكي وفي الاخير ماوصلناش لي نتيجة نقعد ونسكت ونستني اتصال منهم وخلاص اخر حل ..

قصي : اي اقعد اقعد خلي القعدة تفيدك ..

خلاه وطلع من الحوش طلع سبسي وقعد يدخن ودعاء مقعمزة ع الصالون وتبكي وتشبحله بشبحت غل وقهر ..

________________________________________💔💔💔

عند دعاء .. 

انصدمت هلبا لما عرفت انه ليان مخطوفة .. ليان مش بس بنت خالتي لا هيا اختي واعز حتي من اختي مشيت مع بابا بالسيف لي حوشهم نبي نسمع شن يقولوا هل عرفو مكانها او لا .. مشوا يدوروا عليها اللي صدمني برود تيمور مش مهتم بكل لي خطف اخته ولا كأنها مخطوفة اصلا .. تعارك هو وقصي طلع قصي وقعد بس هو واني وامه .. نشبحله بصدمة يوم عن يوم قاعد يثبت انه هو انسان حقير وماعنداش ذرة مشاعر واحساس ..

حنان : اسيانا جيبي اميه ..

تيمور : علي منو تبكي انتي الثانية ..

رفعت راسي نشبحله ..

دعاء بيني وبين نفسي : هاذا خيره من كل عقله يحكي ؟؟

دعاء : شنو انت ماتحسش ليان مش معروف عليها شي اذا حية او ميتة اختك راهو اختك مفقودة ومايعرفوا عليها شي مانعرفش شن تبي مني نضحك يعني !؟

تيمور : توا ترجع ماتخافيش عليها ..

حنان : وخيرك تعيطي عليه شنو هو اللي قايلهم يخطفوها ..

تيمور : خليها يما مقهورة ع صاحبتها من حقها ..

مسحت عيووني من الدموع واني في داخلي ميتة من القهر خايفة هلبا ع ليان ..

دعاء بيني وبين نفسي : منوو ممكن يكون خطفها وليش شن مدايرة وهيا ماليهاش الا 3 ايام مروحة من برا لوو تعلم راهو قعدت غادي احسنلها ..

جت الساعة 11 في الليل ومافيش أي خبر عليها بوي وخوي يدوروا عليها اني كل 5 دقايق نتصل علي واحد منهم ومافيش اي خبر .. قعدت مقعمزة في الجنان واني نبكي خسرت صاحبتي ..

دعاء : اشبح شن صاار فيها وينهاا ليش ماليهاش اثر ليش الخاطفين ما اتصلوش ..

نبكي ونرجف من الصقع حسيت بي شخص غطاني درت وجهي كان تيمور حط شال علي اكتافي ..

تيمور : صقع الجو تغطي وياسرك معاش تبكي توا ترجع والله صدقيني ..

لفيت الشال عليا صقعانة قعمز مقابلني مسحت دموعي وسحبت نفس بقوة ..

دعاء : تيمور راح ترجع ليان ولا ؟؟

تيمور : راح ترجع ..

دعاء : قول والله ..

تيمور : والله راح ترجع خيرك ؟؟

دعاء : مش مرتاحة قلبي يوجع فيا خايفة عليها هلبا ..

تيمور : اوووف ليش هالقد حساساات انتن وتتأثرن بابسط الامور ..

دعاء : وانت تشوف هالموضووع بسيط ؟؟

تيمور : اني نحكي بصورة عامة مش بس علي هالموضوع علي كل حاجة تعيطن وتبكن كبرن عقولكن شوية ..

دعاء : معروف انه كل بنت هكي حساسة وتتأثر بكل شي وتبكي علي اي شي اني نعتبر في ليان اختي مش بس بنت خالتي كيف تبي مني ما نبكيش عليها خايفة يدرولها شي او يقتلوها ..

تيمور : هنيالها عندها هلبا ناس تحبها وتخاف عليها ..

دعاء : لأنه هيا حبابة وكويسة مع الكل وماعمرها ضرت اي شخص كيف مانحبهاش ونخاف عليها ..

تيمور : اي واضح ..

سكتت ونزلت راسي واني لافة الشال عليا حط هو رجل علي رجل وطلع تلفونه يتصفح فيه واليد الثانية مادها علي الكرسي .. عنده برود اعصاب مش طبيعي الناس في مواقف زي هاذي تحوس وتعصب إلا هو ماعطاش أي ردت فعل .. شوية وخش خوي مسلم هو ومهند اخ ليان نضت بسرعة ومشيتلهم ..

دعاء : هاا شن صار معاكم ؟؟

مهند : ماصار شي مالقيناش أي شي لازم نستنوا لي غدوا بالك يتصلوا بينا ..

مسلم : يلا دعاء خلينا نروحوا واي شي يصير معاكم كلموني تمام ..

مهند : ان شاء الله ..

مسلم : يلا مع السلامة ..

مشيت مع خوي وتيمور قاعد علي تقعميزته ماتحركش ولا سأل او قاللهم شن صار معاكم .. ركبت مع خوي في السيارة وروحنا للحوش في الطريق قالي خوي ..

مسلم : شن عندك بيش مقعمزة مع تيمور ؟؟

دعاء : كنت مقعمزة بروحي هو طلع وقعمز مقابيلي وهو في حوشه شن دخلي بيه اني ..

مسلم : بعدي عن هالانسااان ع قد ماتقدري وديري بالك منه راهو شيطان وافكاره حتي ابليس مايفكرش فيهن وماتحكيش معاه ولا تعطيه مجال ..

دعاء : شن قصدك ؟؟

مسلم : بعدي عنه وبس ..

دعاء : تمام ..

كمل طريقه وسكت خلاني نسرح ماعرفتش شنوو قصده ..

دعاء بيني وبين نفسي : خيره تيمور هو صح اناني اخته مفقودة وماليهاش أي اثر وهو ولا هامه الموضوع ..

________________________________________💔💔💔

عند ليان .. 

قعدت الليل كله مقعمزة ونايضة مانعرفش امتي دخت ورقدت .. نضت الصبح ع صوت كلاب تنبح فزيت خايفة قاعدة علي ما انا عليه مقعمزة وايديا مربوطات في الكرسي رقبتي متشنجة مش قادرة حتي نحركها .. بلعت ريقي بتوتر واني نشبح يمين يسار علي المكان اللي اني فيه كانت دار امسخة وفيها صناديق فاضيات ملوحات علي الارض وحديد وخيوط وتراب في كل مكان والكلاب تنبح قرب الباب نحس تجمد الدم في جسمي ..

ليان بيني وبين نفسي : وين اني شن هالمكان هذا وين مشوا هاذم وليش خلوني بروحي هنا بابا وين ليش لعند توا ماطلعنيش ونقذني منهم ...

ليان بصوت عالي : ويييينكم طلعووووني من اهنييييييي ساااااعدوووني ياااااناس ياعاااااالم طلعووووني الله يخليكم ..

عيطت هلبا ومافيش اي فايدة مافيش حد رد عليا تعبت من العياط قعدت نشبح للمكان ندور ع اي شي نفك بيه ايديا نحرك في الكرسي مايهتزش رابطين الكرسي علي حديد وراي .. واني رابطيني بيه بحيث الكرسي مايتحركش لما نهزه ولا يطيح ..

ليان : اووف ياربي ساعدني طلعني من هالمصيبة شن بندير كيف راح نطلع روحي من هنا توا ..

فاتت ساعة كاملة واني علي وضعي حاولت ع قد ما نقدر نفك يدي بس ماقدرتش وفوق منها بنموت من العطش .. شوية وخش نفس الشخص اللي خطفني وقاعد مغطي وجهه بس عيونه باينات ..

.......... : ها ياحلوة نايضة نحسابه انه الطبقات المخملية يقعدوا راقدين للظهر ماينوضوش زي هالوقت ..

ليان : حقييير كلب طلعني من هنا طلعنيييييي والله اذا ماخليتكمش تندموا مانبداش ليان بنت ابراهيم بسيطة ..

.......... : ههههه شنو اليوم مولية قوية وتهددي شن اللي تغير امبارح تترجي فيا بيش نطلعك واليوم تهددي !؟

ليان : انت شن تبي مني شن اللي درتهولكم انييي طلعوووني حرررام عليكم شنو ماعندكمش خوااات ..

......... : قتلك ماعندنا شي معاك موضوعنا كله مع بوك اول مانحلوه ترجعي لي حوشك سالمة ف احسنلك توا تقعدي وانتي ساكتة ..

ليان : اتصل بي بابا توا واطلب شن تبي منه بس ارخيني ايديا انتفخوا من الربط ورقبتي تشنجت مش قادرة حتي نتحرك ..

...... : اووف حساسة مش قادرة تتحملي من حقك يابوي مدلعة شوفي حتي انتي بنت منوو بس يالله تحملي هالكم يوم واعتبريهم اختبار ليك ..

ليان : ناس جعانة كل همكم الفلوس تموتوا قهر لما تشوفوا انسان ناجح في حياته ومستقر حسبي الله فيكم ونعم الوكيل ..

........ : نو نو غلطانة بالنسبة ليا اني مش مهمات عندي الفلوس واذا زي ماتقولي كان شفتيني توا بايعك و بي اغلي سعر في هلبا اعداء لي بوك يتمنوا ياخذوك ويستخدموك سلاح ضده بس اني مش هكي عندي موضوع مع بوك نبي نكمله ونرجعك ليه لكن اول مايوافق عليه ..

ليان : بالله عليك فك يدي والله توجع فيا هلبا ..

....... : تحملي يالله هانت ..

ليان : والله ما راح نهرب سكر الباب او افتحلي يد وحده بس يخف الوجع ارجع اربطني وافتح يدي الثانية ..

قعد واقف ويشبحلي سحب نفس قوي وجي وراي شد اطراف اصابعي وحركهن بيده زي اللي يدلك فيهم ..

ليان : شن قاعد ادير انت ؟؟

........ : نخفف عليك في الوجع ..

ليان : بعد بالله عليك هكي توجع فيا اكثر بس فكهولي ..

شد يدي وفك الحبل من عليها فتحلي وحدة والثانية لا وجي قدامي بسرعة حركت يدي بوجع نحس فيها منملة وتوجع فيا قعد مكتف ايديه ويشبحلي ..

ليان : فك يدي الثانية خيرك ؟؟

....... : انتي قلتي بس وحدة ..

ليان : باهي نبي اميه عطشانة بالله عليك ..

......... : تبي تاكلي ؟؟

ليان : لا بس اميه ..

هز راسه بي اي خلاني وطلع وسكر الباب نحاول ندير وجهي ونفك يدي الثانية ماقدرتش كل يد رابطها بقوة .. طبست انفك في رجليا فتحت شوي من الربطة انفتح الباب رجعت علي وضعي وكأنه مش مدايرة شي خش وشاد في يده شيشة اميه سكر الباب وجي وقف جنبي ..

........ : هاك ..

ليان : مانقدرش نشد الشيشة يدي توجع فيا بالله عليك شربني ..

كل اللي في بالي نبيه يتقرب مني بيش نحول القناع من ع وجهه ونكشفه ونعرفه منوو هو اني متاكدة شخص نعرفه صوته سامعاته وحافظاته .. فتح الشيشة وجي تقرب مني يشرب فيا شربت شوية واني نشبح لي عيونه وحتي هو مركز في عيوني يدي ترجف خايفة نحول القناع من ع وجهه وننصدم .. شجعت روحي وسحبت القناع من ع وجهه بسرررعة رجع خطوات للورا واني فتحت فمي بصدمة لما شفته ..

________________________________________💔💔💔

رواية بعنوان

#مابين_الانتقام_والندم

________________________________________💔💔💔

#الحلقة_4

فتحت عيوني بصدمة ماكنتش متخيلة يكون هو .. بلعت ريقي بتوتر ودمعت عيوني همست بصوت مخنوق ..

ليان : هارون هاذا انت !!

هارون : طلعتي خبيثة زي بوك واني اللي نقول مسكينة ..

ليان : ليش خطفتني هاذا فوق ما بابا مشغلك عنده ادير هكي معانا في شنوو ضريناك احني ؟؟

هارون : تحسس فيا انه بوك مداير فضل عليا شغلني بي سبب ذكائي ومهارتي في العمل واني اخترت نكون معاه بيش نخسره في عمله ونستلم الارباح ليا اني ونستني اليوم اللي نجمع فيه المبلغ اللي دمر حياتنا ونحذفه ع وجهه ..

ليان : انت شن تقول كيف تقدر تخونه هكي وتضحك ع بابا واحد نذل كنت متخيلاتك انسان نظيف وكويس بسسس طلعت العكس الله ينتقم منك يانذل والله الا مانخلي بابا يدمرك ..

هارون : نخونكم ؟؟ هههه منوو انتم اصلا انتم اكبر اعداء ليا وعمري مانكون معاكم ولا راح نكون في يوم شغلي مع بوك كله مبني ع مصلحة واول ماتكمل هالمصلحة راح نخليه يعرفني منوو اني و ولد منوو وليش هكي درت معاه ..

ليان : راح تندم ع هالتصرف صدقني راح يندموك خوتي خلي بس نطلع اني بيدي راح ندخلك للحبس يا خناب يا مجرم ..

هارون : مش اني الخناب اهلك هما الخنابة والنصابين فلوسهم كلهاا من الحرام وراح يجي اليوم اللي ناخذ كل شي منهم ونخليهم علي الحديدة ..

ليان : ماتقدرش ادير شي انت واحد جبان خواف تخاف منهم لو فعلا راجل كنت واجهتهم مش اطلع رجولتك عليا فكنييي يلا طلعنييي من اهني طلعنييييي ..

هارون : عيطي من توا لغدوا مافيش حد راح يسمعك ولا راح  يجي في بالهم مكانك اني حاطك في مكان ماحدش يتوقعه ولا يعرفه ف الاحسن ليك تكوني مؤدبة وتتصرفي بهدوء بيش مانتصرفش معاك بتصرف مايعجبكش ..

خلاني وطلع من الدار .. انصدمت من اسلوبه يمكن لو واحد من اقاربنا ماكنتش راح ننصدم هكي لأنه نعرف اغلبهم يكرهونا بس هو لا .. والمشكلة انه مشغلينه معانا في الشركة ويعرف الكبيرة والصغيرة وماحدش شاك فيه ..

ليان : لازم نكشفه ونخلي بابا يعرفه ويحاسبه يا قدااااش كنت غبية كيف عجبني شخص زي هاذا نذل وحقيرر ..

________________________________________💔💔💔

عند دعاء .. 

فات يوم كامل ع اختفاء ليان الكل عايش في حالة توتر وخوف عليها ماخلوش مكان يعتب عليهم مادوروش فيه .. اني وضعي لا احسد عليه خايفة علي روحي وعليها مانعرفش شن صار معاها وين او منوو خطفها ميتة او حية مانعرفش أي معلومة .. نضت الصبح واني دايخة الليل كله مارقدتاش من التفكيرر والخوف مشيت بسرعة خذيت تلفوني واتصلت بي حنان ام تيمور نبي نسالها عن ليان اذا عرفوا شي عليها .. اتصلت ماتردش عاودتلها اكثر من 3 مرات وماتردش شبحت للساعة كانت 9 ونص الصبح يمكن مزال راقدة خشيت للحمام غسلت وجهي وبدلت وطلعت كان الكل مقعمزين و بوي وخوي طالعين للعمل ..

دعاء : صباح الخير ..

جميلة : صباح النور حبيبتي تعالي قعمزي افطري ..

عفاف : شن صار مع ليان ما عرفوش مكانها ؟؟

دعاء : مانعرفش والله اتصلت بي مرت بوها ماردتش عليا ..

جميلة : ان شاء الله يلقوها وترجع سالمة ياروحي عليها توا كيف مروحة وخطفوها اولاد الحرام الله لا يوفقهم ..

عفاف : اني خايفة من حاجة وحدة ..

دعاء : شنوو ؟؟

عفاف : ياخوفي يغتصبوها ..

جميلة : بعيد السو خيرك تفاولي عليها ان شاء الله مايصيرش شي معاها ..

دعاء : لا مستحييييل ..

عفاف : شنوو المستحيل شنو انتي معاها ليها يوم كامل مختفية عن الحوش ومانعرفوش مع منوو وشنوو سبب اختفائها !؟

دعاء : انتي خيرك شنوو هالكلام عفاف مستوعبة شن قاعدة تقولي ..

عفاف : وانتي خيرك تعصبتي شن قلت توا اني بس تخيلت ماقلتش هكي صارلها ..

جميلة : ماتحكوش كلام اكبر منكم بوها تاجر كبير وعنده فلوس والناس توا ع فلوسها بتخطفها واكيد راح يطلبوا مبلغ مقابل يرجعوها اني متأكدة ..

عفاف : اي ان شاء لله زي ماقلتي ..

هلبا اضايقت من كلام عفاف خليتهم وخشيت لي داري بدلت حوايجي نبي نمشي لي حوشهم بيش نشوف شن صار معاهم بدلت وطلعت مشيت لي امي في دارها استغربت لما شافتني امبدلة ..

جميلة : ها وين ؟؟

دعاء : نبي نمشي لي حوش خالتي بنشوف شن صار في ليان تجي معاي ؟؟

جميلة : شن بنمشي ندير يا بنتي والبنت مزال مالقوهاش ..

دعاء : بنمشي نشوف شنو صار معاهم مش معقولة نقعدوا ونسكتوا هكي راهو ليان بنت خالتي مش بس بنتهم هما ..

جميلة : نعرف بس مشيتنا ماليهاش معني البنت ماليهاش اثر واحني مانقدروش نساعدوهم في شي ..

دعاء : مش مهم المهم نوقفوا معاهم ندوروا او نسألوا ماتجيش نقعدوا هكي ونسكتوا اني مانقدرش نقعد مقعمزة ونستني خبر خلينا نمشوا بالله عليك تعالي معاي راهي بنت اختك ..

جميلة : تمام خليني نبدل ونمشوا ..

دعاء : راح نكلم تاكسي يجينا لبال ماتكملي ..

هزت راسها بي اي خليتها وطلعت من الدار كانت عفاف مقعمزة في الصالة توكل في اياد تشبحلي بطرف عينها .. طلعت كلمت التاكسي شوي وجي قعدت مستنية امي شوية وكلعنا ركبنا ومشينا لي حوش اهل ليان .. وصلنا للحوش كانوا في هلبا سيارات عندهم قريب 10 سيارات مانعرفش منوو ممكن اقاربهم .. نزلنا وخشينا للحوش جايات عمات ليان وبناتهن وعمامها وبناتهم ورجالة مانعرفهمش سلمنا وقعمزنا ..

دعاء : شن صار معاكم ماعرفتوا شي ؟؟

حنان : لا والله مافيش أي خبر ماخليناش مكان الا ودورنا فيه ماليهاش اثر بكل ..

تكلمت بنت واسمها شهد تكون بنت عم ليان ..

شهد : اني مصدومة من حاجة وحدة حاليا اللي يخطف لازم يتصل ويطلب فدية او حاجة معينة هما ليش لعند توا ما طلبوا شي من عمو ابراهيم معقولة مايكونش خطف وتكون ليان هيا ماشية معاهم بي إرادتها ..

دعاء : انتي من كل عقلك تحكي شنووو تمشي معاهم ومنوو هما انتي ماتعرفيش انها كانت مسافرة وتوا كيف مروحة واذا كانت تبي شخص كانت حكتلي انيييي هيا ما ادس في شي عليا ماطلعيش كلام من راسك احسنلك بنت عمك راه في النهاية ..

جميلة : دعاء ماما خيرك اشش خلاص ..

شهد : احترمي نفسك واحكي كويس معاي مانسمحلكش تعلي صوتك منوو وجهلك الكلام هاا ؟؟ ماحدش طلب رايك خليك ساكتة مفهوم ..

دعاء : واذا ماسكتش شنو راح اديري هااا ..

فاطمة : جميلة شنو اسلوب بنتك هاذا ..

شهد : فوتيها ماما جاهلة ماتعرفش شنوو تحكي ماتضايقيش روحك ..

دعاء : انتي الجاهلة مش اني ..

جميلة : دعاء خلااااااص ..

حنان : دعاء احترمي نفسك واعرفي كيف تحكي عيب هالاسلوب احترمي الموجودين والحوش اللي قاعدة فيه ..

دعاء : ليش بس اني اللي تسكتوا فيا سكتوها هيا والا هيا تقربلكم اكثر مني وماتقدروش تحكوا معاها ..

مرام وتكون اخت شهد : وبعدين معاك خلاص بجد قداشك وحدة مستفزة اوووف شن هالنماذج اللي جايتنا فوق توترنا وخوفنا ع ليان جايتنا هاذي وتبي ادير مشكلة نوضي ماما خلينا نروحوا مانتحملش الناس اللي هكي اني ..

فنصت فيا امي خليتهم وطلعت من الصالة طلعت للممر واني نحس في روحي مضايقة كل قريبات ليان لفاعي ولا وحدة منهم كويسة ..

جميلة : اعذروها غير هيا مضايقة علي ليان وانتم عارفين انهم متربين جميع وماتعرفش شنوو تحكي اني نعتذر منكم نيابة عنها امسحوها في وجهي ..

سميه وتكون عمة ليان : حتي احني مضايقين عليها بنتنا مخطوفة بس مادرناش مشاكل مع الناس خليها تعرف كيف تتكلم الواضح ماعندهاش اسلوب راقي في الكلام ..

نسمع فيهم يتكلموا وامي سكتت ماعرفتش شنوو تقول بنوليلها قبل وتعوذت من الشيطان طلعت من الحوش كله .. قعمزت في المظلة اللي في الجنان ع الكراسي واني مضايقة ..

دعاء : وينك يا ليان وين مشيتي تعالي اسمعي شنوو يحكوا عليك ..

شوية وطلع ولد شاب من الحوش مانعرفاش ولا شايفاته من قبل اصلا .. شافني جي جيهتي تأففت بضيقة وقعدت نشبحي لي ظوافري ..

زيد : السلام عليكم ..

دعاء : وعليكم السلام ..

زيد : منو حضرتك ؟؟

دعاء : بنت خالة ليان تفضل منو انت ؟؟

زيد : ها تشرفت بي معرفتك اني زيد ولد عم ليان ..

ابتسمت مجاملة وهزيت راسي بي أي حك حاجبه ..

زيد : ماعرفتش اسمك ؟؟

دعاء : شن تبي في أسمي ؟؟

زيد : هكي نتعرف عليك ..

دعاء : مانحبش التعارف اني سامحني ..

زيد : خيرك ماعندكش خلوق ..

دعاء : شوية مضايقة وع قولتك ماعنديش خلوق نحكي ..

تيمور : خير شباب شن فيه ؟؟

زيد : مافي شي جيت نتعرف عليها ..

تيمور : دعاء نوضي خشي الداخل ..

شبحتله بإستغراب ..

دعاء بيني وبين نفسي : منوو هو بيش يتشرط عليا ..

فنص فيا واشر بعيونه انه نخش هزيت راسي بي اي خليتهم وخشيت للحوش مشيت للمطبخ نشرب في اميه شربت وطلعت ركبت لي دار ليان ماعنديش خلوق نرجع نقعمز معاهم .. خشيت للدار وقعدت انقلب في تلفوني مضايقة ونحس في روحي زودتها كل شخص يحكي معاي نضايق منه ونبي بس نتعارك معاهم قعدت تقريبا ساعة مقعمزة بروحي .. سمعت حركة برا الدار في الاول فتت الموضوع بعدين سمعت ضحكات بصوت هادي ..

دعاء : منوو اللي يضحك هكي ..

حطيت التلفون ع السرير ونضت من مكاني فتحت الباب شوية وبنشوف منو .. كان تيمور وشهد هو حاضن خصرها بي ايديه الزوز وهيا لافة ايديها ع رقبته يهدرزوا ويضحكوا جميع .. منظرهم يحشم وكانوا قريبين من بعض هلبا ..

دعاء بيني وبين نفسي : معقولة هكي عندهم عادي الموضوع مايتحشموش ايديروا تصرفات زي هكي وفي الحوش احني صح منفتحين بس مش للدرجة هاذي وهالحيوان والمختل ماهماش انه اخته مخطوفة يضحك ويتحرش بي شهد ..

سكرت الباب واني نتنفس بقوة وقلبي يدق بسرعة ..

دعاء : شن هالعيلة الغريبة العجيبة مش قادرة نفهم كيف يفكروا ..

قعدت ندور في الدار واني متوترة والعرق ينزل مني اني مش دايرة شي وتحشمت بدالهم نبي نطلع من الدار بس نخاف يشوفوني .. كنت نبي نطلع من الدار فجأة انفتح الباب وخش تيمور انصدمت لما شفته جمدت كل اطرافي خش للدار وسكر الباب وراه بالمفتاح بلعت ريقي بتوتر ..

دعاء بيني وبين نفسي : هذا شن يدير وشنوو في باله ..

قدم جيهتي واني رجعت خطوات للورا واني متوترة ..

تيمور : انتي شنو اديري في دار ليان ؟؟

دعاء : هو شن اسمه مكياجي ساح وجيت بيش انعدله بس هكي ..

تيمور : وين مافيش مكياج في وجهك وبعدين ليش كنتي تشبحيلنا من الباب ..

بلعت ريقي بخوف ..

دعاء بيني وبين نفسي : اني غبية نسيت اني مش حاطة مكياج ومانعرفش نكذب ..

زدت خفت لما قالي هكي شكله شافني نزلت راسي وما جاوبتاش قرب مني وشد وجهي بيده ورفعه وقعد يشبح داخل عيوني .. حولت يده ووخرت بسرعة للورا واني نحس في روحي راح نبكي من كثر الخوف والتوتر ..

تيمور : شوفي انتي شفتي كل شي وافهمي اللي تبي تفهميه لكن مانبيش اي بشر يعرف بي اللي صار اوكي وردي بالك تحسابي انه في شي بينا لا وحياة عيونك الحلوات مافي شي بس هكي نهدرزوا في كلام عادي ..

دعاء : مادخليش فيكم اني أخر همي انت وياها ديروا اللي تبوا اديروه شن دخلي فيكم اني ..

تيمور : مية مية هذا الكلام الحلوو ماتهتميش للمواضيع هاذي ولا كأنه شفتي شي الموضوع خاص بينا مانبيشي يطلع لأي بشر تمام ..

هزيت راسي بي اي طبست راسي وقعدت نلف في عيوني نبي نتهرب منه ..

تيمور : خيرك اليوم انتي مش ع بعضك امبكري في الجنان وتوا هنا شن صايرر في شي صار معاك في حد ضايقك قولي اني ناخذلك حقك منهم ؟؟

دعاء : لا بس مضايقة علي ليان ..

تيمور : ترجع ماتخافيش عليها ..

دعاء : ان شاء الله ..

تيمور : زيد شنوو كان يبي منك ؟؟

دعاء : ولا شي .. 

تيمور : متاكدة !؟

دعاء : وانت شن دخلك ماتدخلش في خصوصياتي مش حتي اني ماندخلش فيك حتي انت خليك بعيد عليا وعن حياتي مفهوم ..

تيمور : ههههه خيرك انفعلتي مجرد سؤال ليش هالعصبية بعدين انتي قريبتي واني مانبيش أي شخص يضايقك ..

دعاء : شكراً ع اهتمامك بس مافيش داعي تهتم اني لو في شخص ضايقني نعرف كيف نرد عليه ..

تيمور : برافو عليك ..

دعاء : ممكن توا تفتح الباب نبي نطلع توا اللي يشوفنا شن بيقول علينا ؟؟

تيمور : بيقول فيه علاقة بينا ..

دعاء : هل تعلم انك واحد سخيف ..

خليته ومشيت كنت نبي نطلع شد يدي وسحبني عليه انحطت يدي ع قلبه جسمي كله قعد يرجف وتوترت ..

تيمور : ماتنسيش اللي حكيناه اوك يا حلوة مانبيش أي شي يطلع هاذا راح يقعد سر صغير بينا ..

يحكي ويمشي في يده ع خدي ورجع شعري ورا وذني بالسيف قعدت ناخذ في نفس قلبي نحس فيه ع شوية ويوقف .. دفيت يده بقوة ومشيت بسرعة فتحت الباب وطلعت من الدار نزلت لوطا ومشيت لي امي ..

دعاء : هيا ماما خلينا انروحوا ..

وافقت لأنها قاعدة ع اعصابها عمات ليان مستفزات وحنان اكثر منهن .. طلعنا من حوشهم و وقفنا في الشارع فجأة طلع تيمور ورانا درت وجهي واني متوترة ..

دعاء بيني وبين نفسي : هذا خيره يلحق فيا ؟؟

تيمور : السلام عليكم ..

جميلة : وعليكم السلام ..

تيمور : دعاء هذا تلفونك نسيتيه في دار ليان واني راكب لي داري سمعته يرن ..

دعاء : ءءأ شكرا ..

تيمور : ادللي توا نوصلكم في طريقي اني ماشي للشركة ..

دعاء : لا مافيش داعي توا ناخذوا تاكسي ولا يا ماما ..

جميلة : اي صح مافيش داعي توا ناخذوا تاكسي وحوشنا قريب مش بعيد ..

تيمور : لا يا عمتي شنوو تاكسي احني اهل وقرايب يلا بس خلوني نطلع السيارة استنوني هنا تمام ..

خلانا وطلع للقراج بيطلع سيارته كتفت ايديا بضيق ..

دعاء بيني وبين نفسي : ياقداش انه واحد خبيث وملعبي زي الثعلب يلعب ع الكل ..

شبحت لي امي ..

دعاء : خلينا نمشوا يما ليش واقفين ؟؟

جميلة : عيب ماما الولد قال نوصلكم عيب نفوتوه ونمشوا ..

دعاء : أوففف ياربي ..

جميلة : خيرك اليوم انتي لوو نعلم بيك هكي ماكنتش جيت معاك حشمتيني قدام الناس ..

دعاء : ماما هما راه اللي كلهم ماينطاقوش بس ليان اللي جت فيهم كويسة كيف متحملتهم مش عارفة ..

جميلة : اسكتي يلا عن يسمعنا حد منهم شن دخلنا فيهم احني ..

طلع تيمور وكلكس علينا بيش نجوا نركبوا ركبت اني من تالي وامي ركبت جنبه من قدام وهو يسوق قعد يشبحلي من المرايا .. درت وجهي للروشن مانبيش نشوفه اصلا شوية و وصلنا للحوش نزلنا تشكرت منه امي ومشي ..

________________________________________💔💔💔

عند ليان .. 

خلاني مربوطة وطلع ع قد ما حاولت نفك روحي ماقدرتش اخرر شي تعبت واستسلمت للأمر الواقع المكان هادي بس صوت كلاب قريبة من الباب مانعرفش هل هما مربينهن ومخلينهم حرس ع الباب او لا مافهمتش شي .. فات هلبا وقت واني في مكاني انفتح الباب وخش هارون ومعاه نفس الشاب ..

هارون : فؤاد فكلها يدها ..

جاني و فكلي يدي الثانية ماصدقت انفتحت حركتها متشنجة ومانحسش بيها ..

هارون : اسمعيني ليان راح نتصل بي بوك توا ونخليك تتكلمي معاه اللي نبيه منك انك تقوليله يطلعك وينفذ كلامي ساعديني واني راح نساعدك تمام ..

ليان : مستحيل نفكر اني نساعدك واحد حقير ونذل طلعنييييي من هناااااااايا طلعنييييي يلااااا ..

فؤاد : قتلك مش راح تساعدنا خلينا نكلموه احني احسن شي ..

هارون : باهي كيف راح نخلوه يتاكد انه هيا عندنا ..

فؤاد : نصوروها فيديو ونبعتهوله ..

هارون : اي صح هذا انسب حل ارجع اربطها وحتي فمها سكرهولها بيش نصورها فيديو ..

ليان : رد بالك تتقرب منييي بعددددددد سااااعدوني يااااناااااس ياعاااالم ساعدووووني ..

جاني فؤاد شد ايديا وخلاهم ورا ظهري عيطت من الوجع ..

ليان : اااااي يدددي ااااخ ارخيني بالله عليكم حرااااااام ..

هارون : بالشوي عليها فؤاد ..

فؤاد : تعال ساعدني ماخلتنيش نربطها صح ..

جي هارون شد ايديا والثاني ربطهن بكيت من ضعفي و ع وضعي اللي اني فيه .. وقف قدامي عيوني معبية دموع واني نشهق ..

هارون : قتلك ساعديني ماقبلتيش سامحينا مجبورين نعاملوك بالطريقة هاذي ..

ليان : بالله عليك فكلي ايديا والله توجع فيا راح اندير اللي تبوه بس فكوني انتفخوا ايديا من الحبل ..

هارون : لا ..

ربط ع فمي وصله قماش وطلع تلفونه من جيبه صورني فيديو وبعثه لي بابا وبعدها اتصل بيه بسرعة فتح بوي الخط وهو خله فؤاد هو اللي يحكي وفتح السبيكر ..

ابراهيم : حقرااااء انذاااال رجعووولي بنتي والله راح اندمكم علي الساعة اللي انولدتوا فيها اطلق بنتي موضوعكم معاي اني تعالوو ارفعوني مكانها ..

فؤاد : اسمعني كويس ابراهيم افندي بنتك حاليا ضيفتنا ماتخافش عليها مش راح نديرولها شي كل اللي نبوه منك تتنازل عن القضية اللي رفعتها بحق .......... ..

ابراهيم : هااا توا عرفت انتم جماعة هذاكا الخناب تبوا فلوس ولا راح نعطيكم فلوس بس رجعولي بنتي والا اقسم بالله راح نذبحه وقدام عيونكم ..

فؤاد : ههههه وعندك عين تهدد راهو بنتك عندنا انت جرب وتجرأ مد يدك واذبحه واحني طول راح نبعتولك فيديو كيف راح نذبح مدللتك ..

ابراهيم : اسسسسمع اقسم بالله اذا تلمس شعره من راسها نهد الدنيا فوق روسكم تعرفوني كويس وشن نقدر اندير نلوحكم ورا سابع سما ماتلعبوش مع الاكبر منكم ..

فؤاد : شوف ماتخوفناش بكلامك وعياطك هاذا حط حاجة وحدة في بالك بنتك ماترجعش لعند ما تتنازل ويطلع اللي قتلك عليه من الحبس بيش يلا نسيبها وحدة بوحدة يلا سلااام ..

سكر الخط وعطي التلفون لي هارون فتحه وطلع الشفرة وكسرها ماعرفتش منوو اللي في الحبس ويبوا بوي يتنازله ..

فؤاد : تتوقع يتنازل ؟؟

هارون : غصبا عليه بنته معانا مستحيل نخليها ترجعله لعند مايطلعه من الحبس ..

فؤاد : بس منوو بيقعد معاها انت ملتزم بشغل وحتي اني شنو بتقعد بروحها هنا والا كيف ؟؟

هارون : اكيد لا راح ناخذ اجازة عمل نقوللهم نبي نسافر عندي علاج برا توا نشوف حجة ونقعد الفترة هاذي جنبها وانت كل يوم مر عليا وجيبلي اخبار عليهم ..

فؤاد : ماشي يلا توا اني ماشي للعصر توا نجيك ..

هز راسه وشبحلي فؤاد وابتسم خلانا وطلع .. قعدت بس نرمش بعيوني ومش فاهمة شي ..

ليان بيني وبين نفسي : شنوو توا بنقعد في هالوضع لعند مايتنازل بابا شن راح يصير فيا اذا ماباش يتنازل ..

هارون قدم جيهتي فتحلي اللي حاطهولي ع فمي وحتي اللي رابط بيهم ايديا فكهم قعدت نشبح لي ايديا طابع عليهن الحبل وموليات حمررر ويميلن للون الازرق قعدت نبكي هلبا خايفة منهم ..

ليان : عن منوو تحكوا ومنوو اللي في الحبس وتبوا بابا يطلعه فهموني ..

هارون : الاحسن انك ماتفهميش الموضوع سمعتي كل شي توا انتي اذا بوك بجد يحبك راح يتنازل عن القضية واحني بعدها نطلقوك واذا ماتنازلش راح تقعدي هنا طول عمرك ويحلم حلم يشوفك بعدين ..

ليان : انت مشكلتك مع بابا اني شن دخلي والله ما مدايرة شي ليش تحملوني ذنب مش مدايراته خليني نطلع ونحلفلك مانحكي لي أي بشر عليك ونخلي بابا يتنازل عن قريبك اللي في الحبس اندير اللي تبيه بس طلعني راح نموت هنا شوف ايديا شن صاير فيهم انخنقت كله تراب واني عندي ربو من التراب نتحسس بالله عليك طلعني ..

هارون : توا راح ناخذك لي مكان ثاني يكون نظيف ومش راح نربطك بس بشرط تكوني مؤدبة وتسمعي الكلام وماتلعبيش بذيلك صدقيني اني مانبيش نضرك بشي بس نبي بوك يتنازل هذا كل مطلبي منه ساعديني ونساعدك وعد وتوا راح نفك ونمشوا للمكان اللي قتلك عليه نبيك تكوني هادية وماتجبرنيش نتصرف معاك بعنف لأنه اني مانتحملش بسرعة نتعصب وننفجر ..

هزيت راسي بي اي قعمز ركبة ونص فتح رجليا من الحبل اول ماتحررت ضربته برجلي ع صدره دفيته وطلعت نجري من الدار كانت ارض زراعيه كلهاا نخل وسبيرس تقول غابة جريت بسرعة كان فيه كلب متمدد تحت ضل شجرة لما فتت نجري من جنبه قعد يجري وراي وينبح نحس في قطرة دم معاش فيا جريت بكل سرعتي واني نعيط ..

ليان : ساااااعدوووونيييي ياناااااااااااس  يمااااااا راح يعضني ساااعدوووني ..

واني نجري ع جهة اليسار والكلب مستمر يجري وراي شفت هارون ومانعرفش من وين طلع وجي قدامي درت وجهي شفت الكلب جاي يجري وينبح لو رجعت يعضني ولو كملت يشدني هارون وين راح نمشي .. عكست طريقي وخشيت في نص الشجر مكان ضيق مايقدرش يشدني فيه الكلب انضربت رجلي بسعفة نبتت في رجلي نحس في روحي متت عيطت بصوت عالي من الوجع ..

ليان : اااااااخ يمااا رجليييي ..

حطيت يدي ع فمي واني نشهق ونبكي طلعت السلة متاع النخلة بس قعد نص منها داخل رجلي قعدت نعرج وبالسيف نمشي نحس في رجلي تشنجت فجأة طلع قدامي هارون وجهه احمر وداهش قدم جيهتي رجعت للورا واني نشهق ..

هارون : نبهتك ماتلعبيش بذيلك قتلك ماتجبرينيش نعاملك بعنف ..

ليان : خليني بالله عليك خليني نمشي اني ماذنبي في شي ..

وصل جنبي سحبني من يدي بقوة وقامني ع ظهره قعدت نضرب فيه ونعيط ونبكي بالك الناس تسمعني ..

ليان : خلينننننني نزلني ساااعدوووني ياانااااس نزززززلني ..

رجعني للحوش اللي كنت فيه حذفني ع الارض بقوة ومشي سكر الباب وجي جيهتي زحفت للخلف واني نبكي ونشهق وهو شبحلي بغضب ..

هارون : اني قتلك مش راح نرجعك لعند مايصير اللي نبيه خلي هالشي خرصة في وذنك ..

ليان : اندير اللي تبيه بابا مايرفضليش في طلب والله نخليه يتنازل بس خليني نرجع بالله عليك ..

قعمز ركبة ونص جنبي شدني من كتفي بقوة وسحبني عليه ركز في عيوني سحب نفس قوي ..

هارون : شوفي ما اتعبيش روحك واتعبيني معاك قتلك مش راح ترجعي يعني مش راح ترجعي تقبلي هالوضع احسنلك وماتخلينيش نضرك هو قاعد نصبر في روحي بالسيف ..

ليان : مانقدرش نقعد هنااااا نموووت مانقدرش نتحمل هالوضع شنوو حيوان اني بيش تربطوني وبكيفكم تتحكموا فيا ..

هارون : نربط فيك لانه نعرفك مش راح تقعدي هادية اهو توا بس مجرد مافكيتك ضربتيني برجلك وطلعتي اتصوري عضك الكلب لو ماهربتي زي الفارة بين النخل ..

حطيت ايديا الزوز علي وجهي وقعدت نبكي ..

ليان بيني وبين نفسي : ياربي شن هالمصيبة اللي جتني كيف راح نطلع توا كيييف ؟؟

هارون : ليان اشبحيلي ..

بعدت يدي عن وجهي بنشوف شنوو يبي مانحس غير في شي انحط علي خشمي شديت يده بقوة نبي نبعدها ماقدرتش يد ع خشمي واليد الثانية مثبت فيا راسي من الخلف دخت وغوشن عيووني وفقدت بدون مانحس ..

________________________________________💔💔💔

عند ابراهيم .. 

ابراهيم : بسرعة خلي المحامي يجيني ..

تيمور : غير فهمنا شنوو قالولك شن يبوا ؟؟

ابراهيم : طلعوا من جماعة ........ يبونا نطلعوه من الحبس بيش يطلقوا ليان ..

تيمور : نعم ؟؟ وماتقوليش انت تبي تتنازل توا !!

مهند : امالا كيف نخلوا اختنا عندهم وهو ليه اكثر من سنة محبوس ..

تيمور : من كل عقلكم تحكوا نسيتو شنو دار فينا هالخناب خنب فلوسنا وخسرنا خسارة كبيرة ولعند توا قاعدين نسددوا فيها ..

قصي : مش مهم الخساير المهم ترجع ليان للحوش ..

تيمور : وانتم منوو اكدلكم اذا تنازلنا يخلوها ترجع يمكن يطلع يكذب علينا ويخلينا نطلعوه ومايطلقش ليان ..

ابراهيم : نتنازل ونخليه يسلمني بنتي وبعدين نسلمهلهم ..

تيمور : بس ..

ابراهيم : اشش اني راح نطلعه صح لكن بنخلي بنتي ترجعلي وبعدين نعرف كيف نحاسبهم علي طريقتي ..

تيمور : خليهم عليا اني راح نوصللهم واحد واحد ونحاسبهم ..

ابراهيم : خلي يجيني المحامي بسرعة ..

قصي : اتصلت بيه واهو شوي ويوصل ..

قعدنا نستنوا في جيت المحامي شوية و وصل وحكيتله ع القضية ..

المحامي : استاذ ابراهيم القضية صادر فيها حكم واذا ع التنازل مايطلعش بسهولة لازم تعطي فلوس وتكون عندك واسطات قوية من الدولة بيش تقدر اطلعه وهالموضوع اقل شي يبيله اسبوع لي اسبوعين بيش تكمل اجراءاته ..

ابراهيم : شنوو اسبوعين بنتي مخطوفة كيف تبي مني نصبر كل هالوقت حاول ادير حل بأي طريقة اذا ع الفلوس ساهلة اني نعطيك ونحكي مع المسؤولين عندي معارف بس انت ديرلي موضوع التنازل وطلعه بسرعة ..

المحامي : راح نحاول ع قد مانقدر بس اني قتلك اذا التنازل صار بسرعة يبيله اسبوع لأنه الموضوع مش لعب صغار ..

ابراهيم : معاش تقولي اسبوع ماتهبلنيش حاول ادير كل شي تقدر عليه واني معاك وندفع قداش ماتبي من فلوس ..

المحامي : ماشي تمام ..

تيمور : اني راح نحكي مع المسؤول وان شاء الله يقدر يساعدنا في هالموضوع ويحله بسرعة ..

ابراهيم : دير اي شي المهم ترجع ليان للحوش ..

________________________________________💔💔💔

عند ليان .. 

فقدت وماحسيتش بأي شي مانعرفش قداش مر وقت واني مغمي عليا فتحت عيوني بهدوء دايخة وراسي بيتفجر ورجلي توجع فيا قعدت نشبح حواليا كانت دار واضح قديمة بكل واني راقدة ع الارض رجلي ملفوفة لانها انجرحت وطلع دم منهاا .. وقفت علي حيلي نشبح حواليا واني دايخة ومش فاهمة شي ..

ليان : وين جايبني هذا ..

نشبح للدار فاضية مافيها اي شيء بس حصيرة مفروشة وفراش ع الارض متمددة عليه وفيه بطانية جنبي وفيه روشن موجود بس امسكر .. مشيتله وقعدت نشبح كان مكان فاضي مافيش احياش جنبه ..

ليان : هاذا وين حاذفني ياربي ساعدني ..

حاولت نفتح الباب ماقدرتش الباب مسكر وحتي الروشن ماينفتحش وفيه حماية يعني حتي لوو انكسر الروشن مانقدرش نطلع او اندير شي واصلا ماعندي شي نكسر فيه المرش .. الدار فاضية من كل شي بس فراش وحصيرة فيها نشبح للساعة اللي في يدي كانت 4 العصر الدنيا مغيمة وشكلها بتصب مطر رجعت لي مكاني لميت رجليا ع صدري واني دايخة مانعرفش شنو اندير وكيف نطلع من هالمكان جي الليل واني كل شوية ماشية جاية ع الروشن بالك نشوف شخص يفوت ونعيط طقيت هلبا ع الباب بس مافيش فايدة .. المنطقة فاضية وماحدش راح يسمعني فيها متت من الجوع يومين واني مش واكلة شي بطني فارغة والدنيا اشتي ماعطشتش بس جعت نحس في بطني بدت توجع فيا لانها فارغة .. رجعت لي فراشي تمددت عليه ..

ليان : الحمد لله الدار فيها ضي والا كنهاذا راهو اهبلت ..

جت الساعة 8 في الليل انفتح الباب خش هارون وهو شاد اكياس في يده .. لفيت البطانية عليا ورجعت ع الحيط جي قعمز مقابيلي حط الكيسة قدامي شبحتلها ورجعت شبحتله بخوف ..

هارون : طلعلي موضوع ضروري وماقدرتش نجيك بكري نعرف انك جعانة جبتلك ما تاكلي يلا نوضي كولي ..

ليان : طلعني مانبيش ناكل الله يخليك طلعني ..

هارون : ليان اشبحيلي والله العظيم مانبي نضرك بشي ولا نبي نعذبك ولا نخليك تخافي انتي قاعدة تعذبي في روحك بروحك مانقدرش نطلعك ونخليك ترجعي لعند مايكمل موضوعي حاولي تتفهميني ..

ليان : اني شن درتلك حرام عليك بالله طلعني والله مانحكي شي عليك مانخليهمش يديرولك شي ويتنازلوا بس خليني نطلع ..

طبس راسه ومسح وجهه بحسرة سحب نفس قوي ..

هارون : استغفر الله ياربي كولي حاجة وجهك مولي اصفر ..

ليان : مااااانبي شي منككك بس طللعنييييي مانبيش نقعد هنااااا طلعنييييي ..

هارون : تملي وراح تاكلي تقبلي وضعك اللي انتي فيه احسن ليا وليك ..

نزلت راسي واني نبكي مسح شواربه بتوتر طلع الاكل من الكيسة وحطه قدامي ..

هارون : اسمعي لو تاكلي توا نفكر في حل مناسب اني وياك تمام ماتبكيش يلا كولي حتي شوي ..

ليان : والله كذاب مش راح تخليني نمشي ..

هارون : توا انتي كولي ونشوفوا بعدين ..

ليان : مانبي شي منك بس طلعني شوف والله والله يمكن انت ماتعرفش بابا بابا مستعد يدير اي شي نطلبه منه نخليه يعطيك فلوس قداش ماتبي ونخليه يتنازل عن قريبك ومايديرلك شي بس طلعني من اهني ..

هارون : تمام انتي غير كولي توا لو ماكليتيش مش راح نخليك تطلعي من اهني ..

شبحتله واني عيوني معبية دموع وموليات حمر من كثر البكي .. وهو قعد صافن في وجهي ابتسم بهدوء مسحت دموعي وخذيت ساندوتش كليت منه شوية شفتي ترعش من الصقع ونيتي زاهقة من كثر البكي فتحلي عصير ومدهولي .. شبحتله بقهر بلعت اللقمة بصعوبة خذيته من يده جعانة هلبا واني صدقت كلامه انه لو كليت راح يطلعني واني نشرب سمعنا صوت مشي برا الدار فرحت هلبا واخيراً يمكن عرفوا مكاني .. ناض هو بسرعة وشبح من الروشن مانعرفش شنو شاف او منو شاف مشي طفي الضي وجاني في اللحظة هاذي انطق الباب بقوة كنت نبي نعيط جاني بسرعة قيدني بايديه وحط يده ع خصري واليد الثانية سكر فمي بيها ..

________________________________________💔💔💔

رواية بعنوان

#مابين_الانتقام_والندم

________________________________________💔💔💔

#الحلقة_5

لن يؤذيك من تتوقع منه الأذى سيؤذيك من كان امانك ..

________________________________________💔💔💔

سكر فمي بالقوة بيش مايطلعش صوتي خله وجهه قريب من وذني انفاسه نحس فيها تضرب في رقبتي همس بصوت هادي ..

هارون : اششش ما اطلعيش اي صوت مفهوم ..

غمضت عيوني واني نحس في روحي راح يغمي عليا رجليا ترجف الجو مصقع ثلج كل جسمي يرجف  . انطق الباب بقوة حطيت يدي ع يد هارون نبي نعيط نبيه يرخيني ماقدرتش كأنه حديد ضغط ع خصري بي يده وطبس ع وذني وقعد يهمسلي ..

هارون : مش راح نرخيك لوو حتي نموت يا اني يا هما ماتجبرينيش نضرك اقعدي هادية احسنلك ..

قعدت نضرب فيه برجليا ونحرك في روحي نبي بس انفك روحي منه ماقدرتش كل مانحاول يشدني بقوة ويثبتني ..

هارون : اشش ماتحاوليش اصلا مش راح نخليهم ياخذوك والله لو ع جثتي ..

قعدت نتنفس بغضب ..

ليان بيني وبين نفسي : ياربي ساعدني وفكني منه ..

فجأة اختفي الصوت والخطوات بعدت اتصل تلفونه دارله كتم بسرعة وطلعه من جيبه شبحله عرف منوو المتصل سكره ورجعه لي جيبه وقعد شادني .. مشي جهة الروشن وهو شادني شبح من الروشن مافيش حد وماعرفش منوو جي او وين مشي و ليش بسرعة طلع دفني بعيد عليه طحت ع الارض .. قعدت نتنفس بقوة واني نحس في روحي انخنقت نضت بسرعة جريت للباب وقعدت انطق عليه بكل قوتي ونعيط ..

ليان : سااااعدوووونيي يانااااااس تعااااالووواا انييي هناااا سااااعدونييي اني هناااااا ..

سحبني من يدي ودفني ع الحيط وسكرلي فمي قرب وجهه من وجهي هلبا ..

هارون : انتي ليش ماتفهميش في الكلام اللي نقول فيه ليش  تخليني نرجع نربطك اهدي واركحي احسنلك اقسم بالله راهو نقطع عليك حتي الهوا لذلك خليني نتصرف معاك بهدوء ..

دفيت يده من عليا واني نحس في روحي بنتفجر من العصبية ..

ليان : ماتخووووفنيش ولا تهددني سمعت انت واحد جبااااان خايف يشدوك ولا خايييف والله كان ماخليتهمش يندموك علي الساعة اللي فكرت فيها تخطفني مايكونش اسمي ليااااان بعد من عليا وطلعني من اهني طلعنيييييي يا جبان ..

قعدت نضرب فيه ونعيط في وجهه شد ايديا الزوز وكتفهم ورا ظهري غمضت عيوني بألم شبحلي من فوق لي لوطا قعدت نبلع في ريقي بخوف ..

هارون : عمري ما ضريت بنت ولا نبي نضر حد ف لذلك خليني علي تصرفاتي معاك ما تخليش اهبالي يطلع عليك اكثرر من مرة قتلك اني ماخطفتكش بيش نضرك وعندي موضوع مع بوك يكمل الموضوع متاعي نطلقك خاطيها ما اتعبيش روحك واتعبيني معاك افهمي الموضوع بسيط ..

ليان : ههه بسيط ؟؟ تحساب روحك بتنفذ بعملتك هاذي والله لو يشدوك الا ما يفصلوا راسك عن جسمك انت مزال ماتعرفش بابا وخوتي شن يقدروا يديروا انت لعبت مع الناس الغلط تعلم ولا ..

هارون : مايهمنيش اذا شدوني او فصلوا راسي عن جسمي علي قولتك اني ع عنادهم بديت الحرب ومستحيل نطلع منهاا خاسر لو مهما يصير مش راح نتنازلهم ونخليهم ياخذوك مني قبل ما اندير اللي في راسي حتي لوو نموت تقعدي محبوسة وماحدش يعرف مكانك وين ..

ليان : اي واضح هلبا انك ماتخافش منهم من لبدتك توا وتسكيتك ليا وخوفك صدقت بس يعرف مكاني بابا راح يخليك تبكي دم ع عملتك هاذي لذلك توا خليني نطلع واهرب احسنلك وفك روحك من بين ايديهم ..

هارون : ههههه اني صح لبدت لكن بيش ماياخذوكش مني مش خوف منهم ومتاع اني نهرب هاذي ماتمشيش عندي مانكونش راجل لو خليتك وهربت وخليتهم يفوزوا في هالحرب ..

ليان : يجي يوم ويشدوك وين راح تمشي في هذيكا الساعة اني بيدي راح ندخلك للحبس ونخليك انت وقريبك تعفنوا فيه سمعتني ولا والله كان ماخليتهمش يضربوك ليل مع نهار مانكونش ليان بنت ابراهيم ..

شبحلي بغضب قرب وجهه هلبا من وجهي رجعت راسي ع الحيط وقعدت حتي اني نشبحله بغضب ..

هارون : اششش اعرفي كيف تحكي ست ليان ماتجبرينيش نتصرف تصرفات ثانية معاك اووكي ياحلوة ..

ليان : انت بس قاعد تهدد وانت في الحقيقة ماتقدر ادير شي تعرفني بنت منوو وخوتي منوو ماعندكش جرأة ادير شي اصلا جبان و خواف انت لوو ماتخافش كان واجهتهم هما مش اطلع في بطولاتك عليا اني ..

ابتسم ابتسامة خبيثة كان شاد ايديا بقوة قرب وجهه وحطه في رقبتي ويشم فيها .. دمعت عيوني وقلبي نحس فيه راح يوقف من الخوف ..

ليان بين وبين نفسي : شن جاني وقعدت نهدد فيه واندير في روحي هكي شنو اني مانخافش ..

ليان : وخرررر من علياااااااا نذل حقيررر بعدددد ما اديرش هكي وخرررر ..

هارون : تحسابيها صعبة عليا واني مانقدرش انديرلك شي والا تحسابيني نخاف من بوك او خوتك غالطة توا وفي هالساعة نقدر اندمرك ونخليك زي الميتة وناخذ اغلي شي عندك وانتي فهمتي شن قصدي بس نزيد نعاودلك اني موضوعي مش معاك ولا عندي عداوة ضدك اني موضوعي مع بوك وبس مجرد ماينحل نرجعك سالمة ومافيكش اي ضرر حاولي انك ماتستفزينيش لأنه مانضمنلكش روحي لما ينوض عليا اهبالي توقعي اي شي انديره نرتكب حتي جريمة فيك ونخليك تشوفي انسان ثاني ..

يحكي وهو مخلي وجهه في رقبتي ويهمس قريب من وذني .. قشعر جسمي لما حسيت انفاسه تضرب فيا غمضت عيوني بغضب وهمست بصوت مخنوق ..

ليان : معاش راح ندير شي راح نقعد هادية بس بعد من عليا بعد من عليا بالله عليك ..

بعد من عليا وهو يبتسم في ابتسامة خبيثة مشي فتح الضي واني قعدت واقفة في مكاني واني نتنفس بالسيف وجسمي كله يرعش .. اتصل تلفونه طلعه وشبحلي بطرف عينه خلاني وطلع من الدار وسكرها عليا قعمزت ع الارض واني نبكي بصوت مسموع ونشهق لميت رجليا ع صدري واني نرعش ..

ليان : ياربي ساعدني شن بندير وكيف بنطلع وليش بابا لعند توا ما دار شي معقولة نساني وماهماش لا خطفي ولا وضعي اللي اني فيه ..

صوابع يدي ولوا زي قالب الثلج تجمدن من الصقع الجوو هلبااا مصقع والدار مافيها شي يدفي تقول مصنع ثلج .. قعدت ننفخ عليهن بيش يدفن حتي شوية نضت من مكاني ورجعت للفراش تغطيت واني نرعش ونشبح للاكل طايح ع الارض اصلا ماكليتش منه هلبا .. شوية وخش للدار شبح للاكل جي جنبي قامه وحطه في الكيسة خلي العصير والشوكلاطة جنبي ..

هارون : اذا جعتي كولي منهم تمام هاذم خلاص معاش ينفعوا ..

درت وجهي واني مضايقة منه يحساب روحه مداير جميل عليا .. ابتسم وقعمز مقابيلي ..

هارون : تعرفي مني جي للحوش امبكري ؟؟

درتله وجهي نشبحله بإستغراب ..

ليان بيني وبين نفسي : منو اللي جي زعما وليش يبي يقولي ..

ابتسم ..

هارون : مش واحد من اهلك هاذا صاحبي فؤاد اني دليته ع المكان ولما طق الباب ومارديتش روح وتوا اتصل بيا وقالي نحسابك خذيتها لي مكان ثاني لما مارديتش عليا ..

ليان : مجرمين انتم الزوز حسبي الله ونعم الوكيل فيكم الله لا تربحكم ولا تسامحكم ..

هارون : ههههه نحس في كلمة مجرم مش لايقة عليا بس راهي لايقة ع خوك تيمور ..

ليان : تاج راسك سمعت واحسن منك ..

هارون : المشكلة جيتي بنت ومانقدرش نغلط معاك وعندي مصلحة بيك كنهاذا وريتك المجرم منوو يكون ..

رجعت درت وجهي واني لافة البطانية عليا لف .. حوايجي ليا يومين واني فيهن مش مرتاحة انحس فيهم ضايقوني ..

هارون : صقعانة ؟؟

ماجاوبتاش اكتفيت بالصمت ع الرغم مغطية جسمي بس كله يرجف .. ابتسم خلاني وطلع مانعرفش وين .. حطيت راسي ع المخدة واني تعبانة والف سؤال في راسي خايفة ومرعوبة وحايرة في كل شي قاعد يصير ..

ليان بيني وبين نفسي : زعما منوو هو المحبوس وليش بوي حابسه وياتري هل كلام هارون صح واهلي فلوسهم تكون كلها فلوس حرام اذا بابا مانفذش كلامه معناها بنقعد هنا طول عمري معقولة ..

قعدت هلبا نفكر ودخت ومش فاهمة شي من اللي قاعد يصير معاي .. نشبح للساعة كانت 12 في الليل بدت الدنيا ترعد والصوت عااالي وقعدت نسمع في صوت الشجر تتحرك من قوة الريح خفت هلبا ..

ليان : هذا وين خلاني ومشي معقولة يطيح السطح ع راسي معقولة نموت ومعاش نشوف بابا ..

هلبا افكار قعدت تجيني ونتخيل في حاجات بتصير معاي ونخوف في روحي بروحي .. قعدت المطر تصب بالقوة وصوت المطر ينسمع من قوته نضت من مكاني واني لافة البطانية عليا ونشبح من الروشن ريح ومطر ورعد وبرق وظلام المنظر يخوف .. قعدت نردد في آية الكرسي واني ميتة من الخوف اول مرة في حياتي نخاف هكي .. شفت هارون جاي يجري وحاط جاكته فوق راسه ومطبس يجري من المطر جي للدار فتح الباب وخش وهو مبلول سكر الباب وشبحلي ..

ليان : وين مشيت وخليتني بروحي هنااا !؟

هارون : اول مايخف المطر راح نطلعوا من هنا ..

ليان : وييين مزاااال بتاخذني رجعنيييي لي اهلي بالله عليك هارون وراس اغلي حاجة عندك رجعني والله خايفة ..

هارون :  ماتخافيش اني معاك شوفي الدار سقفها تاعب وفي اي لحظة ممكن يطيح علينا لو نقعدوا هنا احتمال نموتوا احني الزوز ..

ليان : بما انك تعرف انه سقفها تاعب ليش جبتني ليها ؟؟

هارون : وين تبيني نرفعك لي فيلا مثلا !!

قاعدة مارديتش عليه وهرب الضي وجي صوت رعد قوووي نحس فيه هز الارض هز حطيت ايديا ع اوذاني واني نردد ..

ليان : يارب يارب يارحمان يارحيم ارحمنا ياربي احفظني ..

الدار ظلام رجعت خطوات للورا وقفت قريب من الروشن لانه يبان منه ضي البرق من برا ..

ليان : ههه هه هار هارون وينك ليش ساكت ؟؟

هارون : اني معاك خيرك خايفة !؟

ليان : ولع الضي بالله عليك ..

طلع تلفونه وفتح الفلاش وحطه ع الارض ورمي تيشرته المبلول ورمي سبيدروه وقعمز ع الفراش متاعي بلعت ريقي ..

ليان بيني وبين نفسي : هاذا توا بيرقد ع فراشي باهي اني وين بنرقد ؟؟

هارون : اوووف الواضح انه المطر مش راح تخف قاعدة تقوا اكثر واكثر كيف الحل توا ؟؟

ليان : خلينا نطلعوا عن يطيح السقف علينا ..

هارون : خلينا نستنوا توا بالك يخف المطر مانقدرش نمشي المطر قوية هلبا والريح حتي هيا قوية ..

تأفأفت وقعمزت ع الحصيرة واني لافة عليا البطانية قعد السقف يقطر في اميه من المطر .. قعدت نشبحله واني خايفة ومرعوبة ..

ليان بيني وبين نفسي : معقولة راح يطيح علينا ..

هارون حط راسه ع الحيط وغمض عيونه ..

ليان : هارون هارووون ..

فتح عيونه ويشبحلي بإستغراب بلعت ريقي واشرتله بيدي ع السقف ..

ليان : شوف شوف قعد يدخل في الميه علينا من فوق راح يطيح خلينا نطلعوا بسررعة ..

هارون : ماتخافيش مايطيحش هالشي عادي لأنه مشقق لي هالسبب ينقط تعالي هنا وارقدي في مكانك راح تنبلي لو قعدتي غادي ..

ليان : نوض من ع فراشي قبل ..

ابتسم وبعد من ع فراشي بس قعد قريب منه مشيت لي فراشي تمددت عليه .. هو مقعمز بس حاط راسه ع الحيط طلع طرف سبسي وقعد يدخن لفيت روحي بالبطانية وقعدت نشبحله .. شعره مبلول ونازل ع جبينه وعيونه صفررر ولحيته محدده يهبل شكله حلوو .. شبحلي بطرف عينه ونفخ الدخان غمضت عيوني بسرعة ودرت روحي راقدة مانبيش نظراتي تفضحني .. هالانسان خبيث مانبيش ننغر بشكله عيشني في رعب وخوف مستحيل نسمح لي روحي انه نميل ليه او نعجب بيه قعدت نتقلب في فراشي ماقدرتش نرقد المطر شوية وخفت وهفت صوت الرعد .. نشبح للساعة كانت ال2 في الليل هارون راقد وتلفونه حاطه جنبه ع الارض ..

ليان بيني وبين نفسي : هاذي فرصتك المناسبة يا ليان خوذيه واتصلي بي بوك او ابعثيله رسالة ..

قمت راسي نشبحله لقيته راقد قربت منه وماوقفتش بيش مايحسش عليا واني قاعدة نزحف جيهته .. هو كان جنبي وتلفونه غادي منه كنت قريبة منه هلبا مديت يدي من فوقه نبي ناخذه انقلب هارون وطاح عليا .. جيت تحته ونص من جسمه كان عليا جمدت في مكاني فتح عيونه بنعاس يشبحلي رفعت راسي جت عيني في عينه قعدت بس نرمش ..

هارون : شنو اديري ؟؟

ليان : ءأ ما ءأ ماندير في شي نبي نرقد ..

هارون : خايفة ؟؟

هزيت راسي بي أي بيش مايزبطش اني جيت ع خاطر التلفون عيونه نعسانات ابتسم بهدوء لف يده ع خصري وسحبني لي حضنه .. قعدت بس فاتحة عيوني بصدمة كنت قريبة منه هلبا وجهي ع صدره حطيت يدي ع صدره نبعد فيه من عليا ..

ليان بيني وبين نفسي : شن قاعد يدير مانبي يصير شي بينا ..

نخاف منه اكثر من خوفي من الرعد ..

ليان : هارون حوووول شن قاعد ادير ؟؟

هارون : اشش ارقدي ومن دون صوت ..

ليان : باهي حووول اني قاعدة نقولك بعد من عليا ..

سحبت روحي منه بصعوبة حقير يبي يستغلني .. رجعت لي مكاني واني قلبي يدق بسرعة وخايفة نبي نوصل للتلفون بس كيف مش عارفة .. قعدت انفكر واني في مكاني رفعت راسي نشبحله رجع رقد ..

ليان بيني وبين نفسي : لازم ناخذ التلفون لوو شن مايصير لازم نوصله شن بندير كيف بنوصله وهو قاعد قدامي احسن شي نقوله خايفة ونبي نرقد في هذيكا الجهة ..

قربت منه وحركته من كتفه بسرعة وبعدت ..

ليان : هارون نوض بالله عليك ..

هارون : شن تبي ؟؟

ليان : اسمع خليني نرقد في الجهة الثانية خايفة يطلعلي شي من الروشن بالله عليك ..

رفع حاجبه وهو مش مقتنع بكلامي .. نزلت عيوني بتوتر اذا قعدت نشبحله راح يكشفني انه وراي شي ..

هارون : ما تخافي من شي اني معاك يلا تعالي ارقدي هنا ..

هزيت راسي بي أي نضت من مكاني وجيت في الجهة اللي هو فيها حتي فراش مافيهاش بنرقد ع الحصيرة بس .. خذيت معاي البطانية والمخدة تمددت واني نحس في اطرافي متجمدة من الصقع ع الرغم متغطية مش حاسة بي اي دفي .. نشبحله امتي يرقد غمض عيونه ورقد والتلفون كان وراي مباشرة مديت يدي نتلمس وين التلفون ماقدرتش نشده درت وجهي من جهة هارون بدي ظهري عليه شديت التلفون فرحت درته صامت بيش مايطلعش صوت .. كان حاط باسورد حاولت نفتحه ماقدرتش حطيت اسمه مافتحش حطيت ارقام من راسي وبرضوا مافتحش التلفون اسكر من كمية الرموز الغلط اللي جربتهم غمضت عيوني بخيبة امل .. شفت فيه بصمة اكيد بي صبع يده بس كيف نخاف يحس عليا درت وجهي عليه لقيته راقد زحفت جنبه مديت يدي ع يده شديت اطراف صوابعه .. سحبني بقوة عليه وخلاني في حضنه حاوط خصري من الجهتين وضغط عليا بقوة حط راسه في رقبتي وهمسلي بصوت هادي ونعسان ..

هارون : ما تحاوليش تلعبي معاي راهو تتعبي هلبا ..

________________________________________💔💔💔

عند دعاء .. 

فاتوا يومين ع اختفاء ليان الكل في حالة توتر بوها مسكين ماخله مكان الا ومادور فيه عليها .. والشرطة واقاربهم كلهم يدوروا بس مافيش فايدة سمعت انه اللي خطفوها اتصلوا بي بوها بس ماقالوش شنوو يبوا مقابل بيش يطلقوها .. قاعدة في الحوش وحاطة قطوستي في حضني واني نفكر في كل شي قاعد يصير ..

دعاء بيني وبين نفسي : معقولة يكون الخاطف واحد منهم وفيهم وماقدروش يقولوا عليه لانه هو طالب منهم شي مايبوناش نعلموا بيه مش معقولة يكونوا اتصلوا وماقالوش شن يبي منهم اللي خاطفها لازم نحكي مع خالي ابراهيم نبي نسأله عليها بس من وين بنجيب رقمه ..

خش خوي وركب لي شقته خذي مرته ورفعها لي حوش هلها وجي قعمز ع الفراش ..

مسلم : جيبيلي اميه ..

نزلت قطوستي ومشيت للمطبخ صبيتله طاسة اميه ورفعتهوله خذاه مني وشرب ..

مسلم : امي وين ؟؟

دعاء : مشت مع بابا للدكتور ماهو عندها مراجعة اليوم ..

مسلم : اهااا ..

دعاء : ماسمعتش خبر عن ليان ؟؟

مسلم : قالوا الخاطف متصل بيهم وطالب مكانها يطلعوا واحد من جماعته من الحبس ..

دعاء : كيف يعني ؟؟

مسلم : فيه شخص من جماعة الخاطف محبوس وهما شرطوا ع خالي ابراهيم يطلعه من الحبس بيش يسيبوله بنته ..

دعاء : ياااا وتوا شن راح يديروا !؟

مسلم : راح يتنازلوا عن القضية ويخلوه يطلع شن بيديروا امالا ..

دعاء : باهي والمجرم كيف فيه لو طلع ودار شي في اهل ليان او يرجع يخطفها كيف بيأمنوله مزال ؟؟

مسلم : والله مانعرف انتي حتي بعد ماتروح ليان معاش تمشيلها او تطلعي معاها بيش ماتنخطفيش او ياخذوك مكانها ..

دعاء : يااا واني شن دخلي وليش معاش نمشيلها ؟؟

مسلم : خاطرك تنخطفي او شنوو !؟

دعاء : وليش يخطفوني هما عندهم عداوة مع خالي ابراهيم وخطفوا ليان اني شن ليا علاقة !!

مسلم : وحتي انتي من اقاربها يعني مش بعيدة يخطفوك حتي انتي ويقعدوا ويهددونا ..

سكتت ماعرفتش شن نقول كلام خوي خوفني هلبا ..

دعاء بيني وبين نفسي : معقولة يصير هكي بعيد السو عليا اني ليان وميته من الخوف عليها مانعرفش شن صار معاها وشن حست لبال نكون مكانها مجرد التفكير بس خوفني ..

مسلم : يلا اني ماشي للمعرض لما يرجع بوي قوليله يلحقني ..

دعاء : تمام ..

خلاني وطلع من الحوش قعدت بس اني .. رجعت حطيت قطوستي في حضني ونمسح ع الفرو متاعها ونفكر في كلام مسلم .. شوية وانطق الباب لبست كاب طويل فوق حوايجي لانه لابسة بجامة متاع حوش قصيرة .. فتحت الباب كان تيمور فتحت عيوني مستغربة ..

دعاء بيني وبين نفسي : هاذا شن يبي جاي للحوش !؟

تيمور : السلام عليكم ..

دعاء : وعليكم السلام ..

تيمور : بوك قاعد ؟؟

دعاء : لا مش قاعد ..

تيمور : وخوتك ؟؟

دعاء : توا بس مسلم كيف طلع تلقاه في المعرض ..

تيمور : ماشي ..

دعاء : شن تبي منهم ؟؟

تيمور : نبيهم في موضوع ..

دعاء : نكلمهولك ؟؟

تيمور : الموضوع مايبيش اتصال لازم من انه نقعمزوا ونهدرزوا انتي كيف حالك وينك مختفية معاش جيتي ؟؟

دعاء : الحمد لله تمام ليش بنجي وليان مافيش اي خبر عليها ..

تيمور : ليش ماهو احني أهل امتي ماتبي تعالي زورينا ..

دعاء : شكرا تفضل خش ليش واقف برا ..

تيمور : لا عندي شغل واهلك مش قاعدين في الحوش مانقدرش نخش ..

دعاء : براحتك ..

تيمور : يلا مع السلامة ..

دعاء : سلام ..

خلاني ومشي ركب سيارته وطلع قعدت صافنة ..

دعاء بيني وبين نفسي : شنوو يبي تيمور من خوتي وبوي ع شنوو ناوي بس الله يستر منه هالانسان يخوف ..

سكرت الباب وخشيت فاتت ساعة وروحت امي خشت ..

جميلة : ها يابنتي شنو قاعدة بروحك شكلك ؟؟

دعاء : اي امالا مع منوو بنقعد عفاف ومشت لي هلها ..

جميلة : مسكينة ليها هلبا مامشتش لي هلها ..

دعاء : اي بالحق جي تيمور سأل عن بابا قتله مش قاعد ..

جميلة : قصدك تيمور خو ليان او حد غيره ؟؟

دعاء : اي هو ..

جميلة : شن عنده معاهم ؟؟

دعاء : مانعلمش والله سالني عليهم قتله مش قاعدين طلع ومشي استغربت الحق ..

جميلة : حتي اني زيك خلي يروح بوك ونسأله ..

دعاء : اي ..

جميلة : اي حقا نسيت اليوم بتجينا ام هيثم ..

دعاء : علاش شن تبي ؟؟

جميلة : خطابة ..

دعاء : شنوو ؟؟

جميلة : اي شنوو مش ناوية تتزوجي قراية وكملتيها وتخرجتي شن مزال عندك من عذر ؟؟

دعاء : بس يا ماما قتلك اني توا مش ناوية نتزوج نبي نخدم ونختار الشخص اللي يناسبني نحس في روحي مزال مش مستعدة ..

جميلة : تعرفي اني مش راح نختارلك انسان مش كويس هالولد ماشاء الله عليه والناس كلها تشكر فيه وشكله و وضعه المادي كويس وصلاي ويخاف ربي مافيشي اي عيب نهائي واذا ع الجمال قنين وحتي من عيونه لونهم خضر شن تبي مزال ..

دعاء : ماما منوو قالك يهمني الجمال اني مايهمنيش اذا كان قنين او لا بس اني مانشوفش في روحي مستعدة للزواج والمسؤولية وقتلك نبي نتعين ونخدم ..

جميلة : وهو راح يخليك تخدمي عادي موافق كل خواته يخدمن عادي عندهم وراح تخدمي انتي وياه في مكان واحد ومنها نأمن ع مستقبلك واهو حوشهم قريب علينا امتي ماتضايقي تجينا ..

دعاء : ان شاء الله ..

خلتني ومشت لي دارها قعمزت ع الصالون واني مضايقة مانعرفش ليش رافضة نتزوج الولد كويس واخلاقه ماشاء الله وعيلته كويسة وكان يقرا معاي في الجامعة وبين فترة و فترة يبعث في امه واني نرفض ..

دعاء : لازم نرجع نفكر في الموضوع يمكن مانلقاش شخص زيه ..

________________________________________💔💔💔

عند ليان .. 

هارون : ماتحاوليش تلعبي معاي لاني راح نتعبك ..

لما قال هكي عرفته انه كاشفني وعارف اني دايرة هكي ع خاطر التلفون .. قعدت ساكتة ماقلت شي طبس راسه ع رقبتي وشمها بقوة قشعر جسمي وقلبي قعد يدق بسرعة ..

هارون : عطرك يدوخ اكيد عطرك بروحه يساوي راتبي كله واكثر حتي انتي زنقيلة كيف عاد ..

ليان : هارون والله معاد ندير شي بعد من عليا بالله عليك ارخيني ..

حاولت اندفه ماقدرتش شادني بقوة وحاط رجليا بين رجليه وايديه محاوطني بيهن ..

هارون : ما اتعبيش روحك وتحاولي مش راح نخليك تمشي قتلك يكمل موضوعي وبعدين نخليك تروحي ..

ليان : مانبيش نروح بس ارخيني بعد شنو انت ماتتحشمش حرررام علييييك ادير فيا هكي بعد بالله عليك حوووووول ..

هارون : اووف عاجبني حضنك دفيتيني كنت صقعان ..

ليان : حقيررر نذل فاسد بعد من علياااااا يانذل ارخيني ..

هارون : صدعتيني ياقداش تعيطي مرض لي هالصوت اثبتي معاش تتحركي تعبتيني ..

ليان : هارون بعد من عليا والله معاش ندير شي خلاص توبة مش راح نتحرك بكل بس بعد من عليا وارخيني ..

هارون : ارقدي يلا ..

ليان : راح نرقد طول بس بعد من عليا ..

هارون : بعد ما ترقدي نرخيك ..

ليان : انت ليش هكي ادير معاي شنو اللي درتهولك انييي مش تقولي مانبيش انضرك شوف تصرفاتك معاي شن يقوللها هاذي ؟؟

هارون : شن يقولولها ؟؟ ها ليش مش عاجبك توا وضعنا الجو مطر وصقع ومخليك في حضني دافية ههههههه ..

ليان : انت واحد حقير ونذل وسخيييف ارخيني احسنلك حوووووول ماتخلينيش نقتلك بعد من علياااااا ..

قعد يضحك عليا وماهماش كلامي .. قعدت نضرب فيه بكل قوتي وهو يضحك ضربته كف قوووي ارتخوا ايديه شوي .. من الصدمة درت وجهي للجهة الثانية ودفيته بكل قوتي ونضت رجعت لي مكاني .. سكت شبحلي بغضب خفت من نظراته بس مابينتش خوفي وقعدت حتي اني نشبحله بغضب ..

ليان : تستاهل قتلك ارخيني والله والله اذا تجرأت ودرت هكي معاي مرة تانية نقتلك بجد وها حطها في بالك مانخافش من حد انيييي ..

سحب نفس قووي رفع شعره عن وجهه ناض من مكانه .. رجعت خطوات للورا خلاني ومشي يشبح من الروشن قعد واقف وصافن وماقال شي .. سحبت البطانية عليا غطيت حتي وجهي مانبيش نشوفه مانبيشي يشوفني خايفة منه وضعيفة ..

ليان بيني وبين نفسي : كيف قدرت نضرب ولد هكي اول مرو في حياتي انديرها عمرري كله ماضربت ولد ولا خليت انسان يتقرب هكي مني ..

فكرت هلبا ومن كثر التفكير رقدت بدون مانحس .. نضت ثاني يوم صقعانة هلبا وبطني توجع فيا نضت واني شعري مشفشف ياربي وين بنغسل توا نبي الحمام الدار فاضية وهارون مهناش .. نضت من مكاني رفعت شعري درته كعكة جيت بنلبس جاكتي اللي رميتها لقيتها مبلولة من المطر حذفتها ورجعت للبطانية لفيتها عليا وشبحت من الروشن شفت هارون مولع نار من حطب وقاعد جنبها ويحرك فيها بعود .. مشيت للباب بنفتح انفتح استغربت ..

ليان : غريبة شن صار لبال مخلي الباب مفتوح ..

لما طلعت شبحلي نزلت عيوني اذكرت امبارح وكيف مديت يدي عليه .. مشيت قعمزت مقابيله لانه ميتة من الصقع نحس في ايديا تجمدوا ..

ليان : نبي نغير حوايجي ونبي اندوش نحس في روحي اخمرت ..

هارون : توا نرفعك لي مكان ترتاحي فيه وتريحيني منك ..

ليان : شن قصدك ؟؟

هارون : مش ضروري تفهمي قصدي هاك كولي درتلك فطور ..

ليان : مانحبش الدحي اني ..

هارون : تبي جبنة ؟؟

ليان : مانبي شي بس قهوة نشرب الصبح ..

هارون : والله سامحينا ست ليان مش فاتحين مطعم بيش نوفرلك كل شي خاطرك فيه ..

ليان : باهي نبي اميه ..

طلع من الكيسة اللي جنبه شيشة اميه وحذفها عليا طاحت خذيتها من ع الارض فتحتها وشربت ونشبح حواليا .. كله شجر وزرع وارض مبلولة كلها طين وحطب ..

ليان : انت وين جايبني ؟؟

هارون : لي مكان ماحدش يعرفه ..

ليان : حسستني تشتغل في مافيا وماحدش يعرف افكارك واماكنك اهدي حبيبي اهدي ..

ماردش وقعد ساكت نحس فيه درهتله كبده مني كتفت ايديا واني نتفرج ع الجو .. كان حلوو لانه طلعت الشمس شوية شوي وجي اللي اسمه فؤاد ..

فؤاد : صباح الخير ..

هارون : صباح النور ..

اني مارديتش طبست وخذيت عود وقعدت انحرك في النار قعمز جنب هارون ..

هارون : ها شن صار معاك عرفت شي ؟؟

فؤاد : موكلين محامي وقاعدين يشتغلوا ع موضوع التنازل ..

رفعت راسي فرحانة ..

ليان بيني وبين نفسي : واخيراً يعني راح نرجع لي حوشنا ..

ليان : وامتي يطلع ؟؟

فؤاد : هههه مستعجلة اكثر منا انتي ..

ليان : شن تبي مني يعني نقعد مع ناس همجيين زيكم !؟

فؤاد : شكرا وبارك الله فيك ..

هارون : اي وقداش يبي بيش يطلع عرفت ؟؟

فؤاد : مانعرفش والله بس هاذم هما المعلومات اللي عرفتهن وبصعوبة لازم ترجع تتصل بيهم وتفهم منهم كل شي وتتفقوا ع الموضوع بيش انت ترجعلهم بنتهم وهما يطلعوه ..

هارون : توا في الليل نكلمهم شفتلي المكان اللي قتلك عليه أمن والا لا واذا مشينا مافيش حد يدله او يزبطه ؟؟

فؤاد : ابدا ولا شخص يعرفه حتي الجني الازرق وتقدر ترجع لي عملك وانت مرتاح ..

هارون : هو العمل اللي مقيدني توا كنهاذا قعدت معاها وامنت ع الوضع بس مانقدرش ناخذها غادي ونرجع ..

فؤاد : باهي خوذ اجازة ..

هارون : لازم يكون عندي سبب قوي ونخاف يشكوا في الوضع ..

فؤاد : زي مثلا انه مكسورة يدك او مداير حادث وخليهم يعطوك اجازو ..

هارون : مانعرفش والله بنحاول ..

فؤاد : يلا اني تاخرت ع شغلي لازم نمشي واي شي يصير جديد توا نكلمك وانت رد عليا مش زي امبارح نتصل وماتردش عليا ..

هارون : ماشي ..

فؤاد : مع السلامة انسة ليان ..

ليان : روحه بلا رجعو ان شاء الله ..

فؤاد : ههههههه مشكورة ..

خلانا ومشي قعد هارون يبتسم بروحه والواضح انه فرحان بي انه بابا راح يتنازل عن القضية ..

ليان : فرحان اللي تبيه راح يصير ..

هارون : ماتتوقعيش قداش فرحان توا ومرتاح ..

ليان : مش راح نخليك تتهني بي هالفرحة بي إيدي راح اندلهم ع مكانك ونفضحك قدامهم ونخليهم يشدوك انت مكانك في الحبس ..

هارون : عادي مايهمنيش اذا انحبست اللي يهمني انه هالشخص يطلع من الحبس لأنه بريء ومش مداير شي ..

رفعت عيوني بملل ناض من مكانه ومشي سكر الباب متاع الجنان وقعدت اني مقعمزة قريب من النار بيش ندفا .. ماحسيتش غير بي حاجة انحطت ع خشمي من ورا وخدرني شديت يده بقوة واني نحاول نفك روحي ماقدرتش دخت وتلاشت الرؤية عندي وماحسيتش بي أي شي بعدها ..

________________________________________💔💔💔

تابعووووووني 

بداية الروايه من هنا

رواية منعطف خطر كامله من هنا

رواية زواج لدقائق معدودة كامله من هنا

رواية خيانة الوعد كامله من هنا

رواية نار الحب كامله من هنا

رواية الطفله والوحش كامله من هنا

رواية منعطف خطر كامله من هنا

رواية فلانتيمو كامله من هنا

رواية جحيم الغيره كامله من هنا

رواية مابين الضلوع كامله من هنا

رواية سيطرة ناعمه كامله من هنا

رواية يتيمه في قبضة صعيدي كامله من هنا

الروايات الكامله والحصريه بدون لينكات من هنا

إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇 

❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺

الصفحه الرئيسيه للروايات الجديده من هنا

جميع الروايات الحصريه والكامله من هنا

انضموا معنا علي قناتنا بها جميع الروايات على تليجرام من هنا

❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺