رواية رحلة عذاب الفصل الأول حتى الفصل العاشر بقلم الكاتبه زينب مجدي فهمي حصريه وجديده في مدونة النجم المتوهج للروايات والمعلومات
 |
رواية رحلة عذاب الفصل الأول حتى الفصل العاشر بقلم الكاتبه زينب مجدي فهمي حصريه وجديده في مدونة النجم المتوهج للروايات والمعلومات
بعد العمر ده كله اشوفك كده ...مبسوطه وفرحانه ..انا سيبتك علشان اضعفك مش علشان تقوي اكتر
.....انت فاكر نفسك ايه تطلقني وترميني وتاخد مني بنتي وكمان عايز ترجع تلاقيني ضعيفه زي الاول
لا.....فوق لنفسك اللي قدامك دي واحده تاني خالص غير اللي انت تعرفها غير اللي طلقتها وخدت منها بنتها وسافرت
انا عايزه اشوف بنتي يا عصام
عصام....لأ...بنتك ايه بقي ما انتي شوفتي حياتك وعيشتي ونسيتي انك عندك بنت اصلا يا استاذه هدي
هدي....انا عمري ما نسيت بنتي ولا عمرها غابت عن بالي لحظه واحده
عصام...... ماهو باين علي لبسك وعلي شكلك وعلي شغلك كمان
هدي.....عايز ايه تطلقني وترجع تلاقيني لبسي مقطع وقاعده مستنيه تيجي تعطف عليا وترجعني...بشتغل علشان اصرف على نفسي
وعلشان جوزي بيقويني وبيساعدني
عصام بصدمه.. .نعم جوزك...انتي اتجوزتي
هدي....ايوه اتجوزت
عصام بنرفزه....طبعا..سيبتي بنتك ورمتيها وعيشتي حياتك
ايه الانانيه دي
هدي بعصبيه... انا بعد دا كله انانيه وانت خدت مني بنتي وسافرت وطلقتني غيابي وبعتلي اهلك طردوني من الشقه
واتجوزت حبك القديم. اللي شرطت عليك تطلقني...دا انا اتحللت عليك تسيبني اربي بنتي...وفي الاخر انا اللي انانيه
بدأت تتكلم بهدوء عكس النار التي بداخلها
مش مهم ده كله...انا عايزه اشوف بنتي
عصام.. .لا بعد ما اتجوزتي وشوفتي حياتك ونسيتي انك عندك بنت...مفيش حاجه اسمها بنتك
هدي بصراخ.. انا منسيتش بنتي انت اللي خطفتها مني وسافرت
عصام....وانا معنديش بنات. تخصك...بنتي متعرفش غير امها اللي ربتها..مني...ولا متعرفهاش ...وتركها ورحل
هدي بصوت عالي....لأ عارفاها كويس اوي...الصبر يا عصام وبنتي هترجع لامها اللي ولدتها.....مش اللي خطفتها
رحله وجع....الفصل التاني
عصام بعصبيه.....لقيتها يا امي نضفت ولبست واشتغلت وكمان اتجوزت..وكله بفلوسي
ام عصام....هدي تاني...ايه اللي خلاها ظهرت تاني ما كنا استريحنا منها
عصام....دي ظهرت وكمان عايزه تاخد بنتي مني..بس لا مش هسمحلها....أنا هاخد بنتي واسافر تاني
ام عصام.....يا ابني انا ما صدقت انك رجعتلي بعد السنين دي كلها هتفضل متغرب طول حياتك
دخلت زوجه عصام
مني.... ايه يا عصام مالك متنرفز ليه كده
عصام.....ام جودي عايز تاخد بنتها وبتتحداني
مني.....طيب من حقها تشوف بنتها والمفروض البنت في حضانتها
عصام.....انتي نسيتي هي عملت فيا ايه....نسيتي اني سافرت علشانها....نسيتي انها دمرتني
هدي.....انت كده كده ملكش دعوه بيها هي بنتها تشوفها وترجعها تاني
عصام.....بقولك ايه....انتي تخرصي خالص....انا قررت اسافر تاني جهزي نفسك انتي وجودي احنا هنرجع تاني....انا استحاله اخليها تلمس بنتي ولا حتي تشوفها بعينها
مني.....انا مش عايزه ارجع تاني يا عصام..كفايه غربه كده....انا عايزه اعيش وسط اهلي ...انا ما صدقت اني صالحتهم
عصام....تمام يبقي هرجع انا وبنتي وانتي لو عايزه تطلقي ورقتك هتكون عندك بكره
مني بزهول.....تطلقني...سهل عليك إنك تبيعني بالطريقه دي.. للدرجه دي انت بياع
عصام.....انا إللي بياع.....واللي راحت اتجوزت من ورا اهلها وبعدين سافرت معاه من وراهم. وخلت راسهم في التراب يبقي ايه
ام عصام..... كفايه كده يا عصام
............. . ............... .... .............
خرجت هدي من عند المحامي بعدما وكلته برفع قضيه حتي تستطيع اخذ ابنتها في حضانتها وذهبت الي البيت ودموع السعادة والحزن أيضآ علي وجهها
زوجها ابراهيم...مالك يا هدي بتعيطي ليه
هدي....ابراهيم بنتي رجعت يا ابراهيم..انا مش مصدقه إني هشوفها واخدها في حضني تاني...بس...بس.....وانهارت في البكاء. ....ابوها مش عايز يوريهالي تاني ..مش مكفيه رحله الوجع اللي شوفتها..عايز يكمل عليا
ابراهيم....متخافيش يا هدي انا معاكي وهرجعلك بنتك من تاني
هروح دلوقتي لأحسن محامي وهرفع عليه قضيه
هدي....أنا فعلا عملت كده ...روحت لمحامي ووكلته يرفعلي قضيه
ابراهيم....تمام انتي كده عملتي الصح...افرحي ان بنتك رجعت وكفايه دموع.. فوقي لنفسك علشان بنتك تيجي تلاقي امها قويه
ورن جرس الباب بطريقه متواصله افزعت هدي وجعلت ابراهيم يهرول الي الباب يفتحه
ابراهيم للواقفه امام الباب...في ايه
ازاحته من طريقها وقالت...ناديلي مراتك
ابراهيم.......بقولك انتي مين
خرجت هدي علي صوتها...قالت وهي متفاجئه ايه ده ام عصام
ايه اللي جابك هنا
ابراهيم.... مين دي ياهدي
هدي......دي ام عصام طليقي
ابراهيم....نعم حضرتك عايزه ايه
ام عصام.....مراتك مكفهاش انها أذت ابني..وخلته يسافر سنين
جايه دلوقتي بعد ما رجعلي وخلته عايز يسافر تاني
هدي... نعم يسافر تاني انا عايزه بنتي ويروح مكان ما هو عايز
ابراهيم.... حضرتك ابنك أذي مراتي كتير..وانا مش هسمحلك ولا هسمحله حد ييجي جمب مراتك تاني
ام عصام بنرفزه وعصبيه شديده....ابني انا اللي اذي مراتك.. ولا مراتك اللي سرقه شقي عمره وخانته. وخلته يهج ويسيب البلد
رحلة وجع....الفصل التالت
ابراهيم....انتي ازاي تدخلي بيتي وتغلطي في مراتي انا محترمك لانك في بيتي
والدة عصام....طالما خايف على مراتك كده ابعدها عن حياة ابني
انا ما صدقت ابني رجع
عصام بعصبيه....وهي عملت ايه لابنك دي ام...بقالها سنين مشافتش بنتها.....وبيتهيألي انتي ام وعارفه يعني ايه ضنا
والدة عصام.... هي اللي باعت بنتها وسرقت جوزها جايه لي دلوقتي تدور عليها
هدي بدموع......انا عمري ما بعت بنتي إبنك اللي خطفها مني وسافر ....وانتي ازاي تقولي عليا اني سرقته اتقي الله...انتي عمرك شوفتي مني حاجه وحشه
والدة عصام.....وال٢ مليون اللي ورثهم عن ابوه مش سرقتيهم منه ...
هدي.....يعني هو مفهمك اني انا اللي سرقتهم.....علي العموم فلوس ابنك اتنصب عليه فيهم....واحد فهمه انه هيعمل مشروع كبير يكسب من وراه دهب....وفي الاخر خد الفلوس واختفي من حياته
واكيد فهمك اني سرقتهم علشان محدش يلوم عليه ...وابنك هو اللي سرق دهبي وراح اتجوز وسافر بيه....ولما عرفت انه متجوز وكمان عامل حسابه انه هياخدها ويسافر...واجهته والصراحه مأنكرش...وطلبت منه الطلاق ورفض وقالي هسيبك تهدي علشان بنتنا....ومشي .......وفي يوم دخل عليا الشقه.....وقالي انا هعملك اللي انتي عايزاه انا هطلقك
قولتله انا فكرت ومش عايزه اطلق سيبني في شقتي اربي فيها بنتي....
قالي لا مراتي مش موافقه انك تكوني على ذمتي....انتي طالق
وياريت تطلعي من الشقه علشان محتاج ابيعها محتاج فلوسها في السفر
انا جالي ذهول من كلامه...قولتله وبنتك اربيها في الشارع قالي هي المشكله في بنتي....بنتي انا هاخدها معايا
وفجأه لقيت لساني تقل ودماغي بتوه مني كان قدامي كوبايه شاي بشرب فيها لما دخل ومعرفش حطلي في مخدر ازاي... مفوقتش غير وانتو بتصحوني وبتطردوني من الشقه وعمالين تشتموني
والدة عصام......الكلام اللي انتي بتقوليه ده كدب...انتي سرقتي شقي عمره ....وخونتيه لما بالتوكيل اللي معاكي بعتي شقته
وسرقتي ورثه كمان ...وبسببك ساب البلد وسافر
هدي.....ابنك اللي كداب وافتري عليا وظلمني وسرق مني بنتي
ام عصام بعدم تصديق.. ....لا.انتي اللي كدابه
ابراهيم... كفايه كده اوي يا مدام روحي لابنك واعرفي منه الحقيقه....علشان واضح انه ضاحك عليكم كلكم.....سيبو مراتي في حالها....علشان اقسم بالله اللي هيتعرضلها مش هرحمه
واتفضلي بقي من غير مطرود....وفكري كويس ازاي واحده تكون سارقه ملايين وبايعه الشقه....وابنك بسهوله كده يروح يتجوز ويسافر..من غير ما ياخد منها حاجته
ذهبت. والدة عصام وتركت هدي تبكي بحراره
طلع مفهمهم اني حراميه يا ابراهيم طلعني انا إللي غلطانه وانا اللي وحشه....انا لازم اكلم ابويا واخواتي علشان احكيلهم كل حاجه
ابراهيم.....اهدي وانا في ضهرك. وبنتك انا اللي هرجعها ليكي من تاني
............... ......... .................. .... .
في منزل والدة عصام
كان عصام يجلس هو وزوجته مني واخته رانيا
مني.....انا تعايرني يا عصام إني بعت الدنيا كلها علشانك...
عصام.....هدي...انا مش قصدي اعايرك انا كنت منفعل شويه وانتي شايفه الظروف اللي بمر بيها
مني.....انا مني يا عصام مش هدي
عصام بنرفزه......يوه بقي أنا مش ناقصك انا خارج
جلست مني تبكي وبجوارها رانيا تواسيها
رانيا.....اهدي يا مني انتي عارفه الظروف اللي بيمر بيها والزفته اللي رجعت ظهرت في حياته تاني وعايزه تاخد منه بنته
مني....هي سرقته انا مالي...انا بعت اهلي علشانه
انتي كنتي شاهده علي حبنا من واحنا في اعدادي...كل ما اجي اذاكر معاك كان بيتحجج علشان يقعد معانا كنتي شاهده علي كلامه وعلي نظراته...كنتي شايفه حبنا وهو بيكبر واحده واحده
واول ما اتقدم وبابا رفض علشان لسه مش معاه وظيفه.. بدل ما يدور على وظيفه.. راح دور على عروسه وخطبها في نفس الاسبوع
ورن عليا يقولي مش انا اللي اترفض
كنت هتجنن..بس حطتله مليون عذر وقولت يمكن الموضوع جه علي كرامته...وفضلت ارفض كل عريس يتقدملي..وانا شايفه بيتجوز قدامي ويخلف...وانا مستنياه برضه
ولما جالي وقالي انا لسه بحبك...تعالي نتجوز
وافقت وقولت ماشي.....قالي انا مش هروح اتقدم لابوكي تاني بعد ما رفضني....قولت برضه ماشي.. المهم نكون لبعض في الآخر
اتجوزته من ورا اهلي...وعملت باسبور من ورا اهلي وسافرت كمان من وراهم....واكتفيت اني سيبتلهم جواب...جواب حطيت راسهم في التراب بسبب اللي عملته
وسافرت معاه على اساس اعيش معاه اجمل ايام حياتي ويعوضني عن الاحساس بالذنب اللي حساه
بس لقيته زي ما هو...بيصرف في الفلوس اللي معاه ويشتغل يوم ويقعد عشره ..وديق علينا عيشتنا وفي الاخر لما مكناش لاقين ناكل.....انا طلعت اشتغل....ومن ساعتها هو شال ايده من اي مسؤوليه....بقيت انا اللي بصرف...وفي الاخر لما زهق قال انا عايز أرجع...وسمعت كلامه ورجعت. وحاولت مع اهلي لحد ما صالحتهم....بس مرجعوش معايا زي الاول شوفت كاسره في عنيهم بسببي مش اتحملها....وفي الاخر بيعايرني إني سيبتهم علشانه
ياريتني سمعت كلام ابويا مش كلام قلبي
قال يا بنتي ده مش هيتحمل مسئوليه ..بس انا اللي كنت معميه بحبه
أنا غلطانه..ولو رجع بيا الزمن هعيش تحت جزمة أبويا وامي
وعمري ما اغضبهم أبدا
رحلة وجع......الفصل الرابع
هدي....يا بابا طلع مفهمهم اني سارقاه وبعت شقته ومفهمهم إني انا اللي سيبت بنتي..وبسببي ساب البلد وسافر
والد هدي....ده عيل خسيس وانا مكنتش موافق عليه في الاول وانتي اللي اصريتي..بصيتي لشكله وبس...وأقولك ادي نفسك فرصه وصلي استخاره تقوليلي مرتاحه يابابا
هدي بدموع....انا عارفه يا بابا إني غلطانه بس ده نصيب وانا مكتوبلي كده
هاني اخو هدي.....مفيش داعي للكلام ده دلوقتي يا بابا...المهم هنتصرف إزاي...أنا مستعد اجيبه في شوال واخد البنت غصب عنه
والد هدي.بعصبيه..... أنا مربي بلطجي ولا ايه ...إحنا هنمشي قانوني وهنرفع عليه قضيه....كده كده البنت هتكون في حضانة امها..وهنكسب القضيه
هاني.....هدي متخافيش...إحنا في ضهرك وان شاء الله هنرجعلك بنتك....المهم ابراهيم موقفه ايه من الكلام اللي سمعه
هدي....الحمد لله مصدقش ولا كلمه وكمان وقف مامت عصام عند حدها وقالي برضه انه هيفضل في ضهري....ربنا يباركلي فيكم
هاني....لسه مش ناويه تصالحي اخوكي...لازم يعرف إللي بيحصل ده بلاش يعرف من بره
هدي.....انت عارف اني مش غلطانه يا هاني هو اللي بيسمع كلام مراته وهي إللي بتقوله بيصدقه مش بيراجع وراها
هاني.....طول عمرك انتي وعماد روحكم في بعض بلاش تخلي حد يفرق ما بينكم...اطلعي وابدإي انتي معلهش تعالي نفسك وكمان مراته مش هنا
ذهبت هدي إلي اخيها وطرقت الباب
عندما فتح عماد الباب ابتسم وفتح لها ذراعه لترتمي بين أحضان اخيها وتبكي
عماد بحنيه.....وحشتيني يا هدي هان عليكي تقعدي شهر متكلمنيش
هدي.....انا اسفه كنت حابه اسيبك تهدي ...مش عايزين نتكلم في اللي حصل بقي...خلينا نتصافي من غير عتاب
عماد..... ماشي. يا ستي ادخلي ادخلي
دخلت هدي وجلست على الاريكه....قاعد لوحدك ليه ما تيجي تقعد معانا تحت...ابوك وهاني بيجهزو الغدا
عماد....عيب عليكي تبقي موجوده هنا وابوك يدخل هو المطبخ
هدي.... ملكش دعوة هو بيحب يطبخ.... ولا بقولك تعالي ننزل نساعده انا وانت
عماد....يلي
نزلت هي وعماد إلي الأسفل
ودخلو المطبخ علي والدهم وهاني. وهم يضحكون
هاني....الحمد لله ربنا يهديكم
هدي....نعم يعني إحنا مجانين
عماد..بس يا صداع انتي صوتك عالي
هدي....لو سمحت يا بابا اخرج انت ريح بره واحنا التلاته هنعملك أحلي غدا
والدهم.....أنا خارج بس لو سمعت صوتكم هدخل عليكم بالخرطوم
خرج والدهم....ونطت هدي علي كتف عماد وعضت ودنه...بقي انا تقول عليا صداع والله ما هسيبك...
عماد....يا عضاضه طب تعالي بقي
شغل عماد الحنفيه ووضع رأس هدي تحتها....
هدي بنهجان هموت....
عماد. بضحك.. خليكي تحت الحنفيه شويه علشان تحترمي نفسك
هدي.....خلاص والله حرمت
هاني....والله انتو الاتنين مجانين
هدي وعماد نظرو الي هاني نظرة شر وقامت هدي بفتح الثلاجه وامسكت ازازه مايه ساقعة ومسك عماد الكاتشب وتوجهو ناحية هاني ببطئ
هاني....انا آسف
هدي....مفيش آسف للاسف
كان بجوار هاني دقيق رماه على وجوهم وجري الي الخارج
ذهبت ورائه هدي سريعا هي وعماد
وهو يجري في ارجاء المنزل
والدهم.....عوض عليا عوض الصابرين يارب في عيالي
................. ................... .................
في منزل والدة عصام...كانت تجلس هي وعصام
عصام بنرفزه.....طبعا كدابه يا ماما انتي صدقتيها هي. وكدبتيني انا إبنك
ام عصام بشك....لأ يا ابني ما صدقتهاش طبعا... بس طالما لينا حق نروح ناخده من ابوها....انت في الاول قولتنا نسكت علشان انت مسافر وعلشان خاطر بنتك بس دلوقتي نسكت ليه
عصام.....نسكت برده يا ماما علشان خاطر بنتي...متكبرش والناس تعايرها ان امها حراميه
ام عصام.....كلامك مش مقنع يا عصام ده مش سبب نسكت علشانه..كده كده الناس عارفه انها حراميه
عصام.....أنا تعبان يا ماما أنا داخل انام
دخل عصام غرفته وجد جودي تلعب مع مني
جودي....أنا اللي كسبت ماما يا بابا زي كل مره
مني....ممكن يا جودي تخرجي تلعبي بره عند تيته
جودي.....حاضر يا ماما
خرجت جودي وذهبت مني إلي جوار عصام تكلمه بهدوء
مني....كنت اتكلم معاك شويه يا عصام
عصام....اتكلمي
مني....بص يا عصام جودي لازم تعرف اني أنا مش امها وكمان طليقتك كده كده رفعت قضيه واكيد هتكسبها علشان البنت سنها صغير... ما تقابل أبوها وتقعدو تتكلمو مع بعض ودي..إن البنت تقعد معانا اسبوع ومع مامتها اسبوع...ونريح دماغنا من المشاكل ونعيش مرتاحين
عصام.....ومين قالك إن هيكون في مشاكل
مني بإستغراب..يعني إيه
عصام.....أنا هاخد بنتي وأسافر قبل القضيه ما تمشي اصلا ولو حابه تيجي معايا ماشي مش حابه برده ماشي خليكي هنا عند امي أو روحي عند ابوكي
مني.....طيب ليه نسيب اهلنا ليه ونروح بلد ملناش شغل فيها ولا لينا بيت
عصام.....علشان استحاله اخلي هدي تعمل إللي في دماغها...استحاله اريحها... طالما عاشت حياتها واشتغلت واتجوزت....كمان تاخد بنتي كده طبعا لأ البت دي بنتك وملهاش ام تاني
بعد مرور اسبوع كان عصام يستعد للسفر هو وزوجته وابنته
والدة عصام. بدموع. يا ابني راجع نفسك هتعيش حياتك كلها متغرب
عصام....متخافيش يا ماما هرجعلك قريب أوي
بعد السلام ذهب عصام..الي المطار
.............. ............... .................. ............
كانت هدي تجلس هي وابراهيم
ابراهيم... انا شايفك مش طبيعيه اليومين دول مالك
هدي......ا....مفاجأة يا ابراهيم
ابراهيم....خير يارب
هدي...... أمسك نفسك يا إبراهيم....أنا حامل
ابراهيم.....بفرحه....انتي بتتكلمي بجد
هدي بسعادة.....اه والله
وبينما هدي تشعر بالسعادة هي وزوجها اتاها تليفون
هدي....أيوه مين
المتصل.... حضرتك والدة جودي عصام خليفه
هدي بخضه.....ايوه أنا
المتصل....جودي ووالدها..ومراته عملو حادثه....والبقاء لله جودي توفت
هدي بصراخ.....بنتييييييييييييي
رحلة عذاب......الفصل الخامس
هدي بصراخ......بنتيييييييي
ابراهيم بخضه.....هدي هدي في ايه قومي يا هدي دا كابوس متخافيش يا هدي
هدي بدموع......كابوس وحش اوي يا ابراهيم.. أنا عايزه اشوف بنتي....بنتي وحشتني أوي
ابراهيم... إن شاء الله هترجعلك القانون في صفك يا هدي
ولو عايزه أنا أروح اتكلم مع طليقك واجبلك بنتك أنا معنديش مانع
هدي.....انت لأ يا ابراهيم دا عنيد أوي..استحاله يتفاوض معاك أو مع أي حد تبعي
ابراهيم..... أنا عايز اريحك ومش عارف إزاي ....قومي نصلي قيام الليل وندعي ربنا يقرب البعيد....هترتاحي أوي لما تقولي إللي في قلبك لربنا
هدي.....أنا محتاجه فعلا إني أصلي
.................... .................... .................
في منزل والدة عصام
رانيا بدموع.....عصام سافر يا ماما من غير ما يسلم عليا
والدتها ببكاء.....خاف يا رانيا...عارف انك كنتي مصاحبه طليقته وبتحبيها...خاف إنك تعرفيها بسفره
رانيا.....وهيفضل كده لحد أمتي....مشيه غلط واللي في دماغه بيعمله.....لي ايه هناك بره علشان يسافرله.....كان هيحصل ايه لو كان ساب البنت تعرف أمها وتشوفها
ام عصام.....امها مش عايزاها
رانيا.....امها هتموت عليها انا شوفتها اكتر من مره بتلف حوالين بيتنا علي أمل تشوف بنتها...ولما كلمتها قالتلي نفسي أشوفها
قولتلها مش هعرف اخرجها وعصام جوه بس هحاول اخرجها البلكونه وتشوفيها من بعيد
كانت هتطير من الفرحه. وفضلت واقفه مستنيه وعيطت عياط قطع قلبي انا ومني...ومني قالتلي انا هتكلم مع عصام تاني علشان يخلي البنت تعرف أمها
واجي دلوقتي علشان أشوفها وصلت لايه الاقيه سافر وخدهم معاه
ام عصام..بتنهيده كلها وجع.....ملوش لازمه الكلام يا بنتي
هو كده كده سافر....بس المره إللي فاتت كانت معاه فلوس الشقه بيصرف منها...يا تري المره دي هيصرف منين وهو مش معاه حاجه خالص
رانيا بإستنكار....شقه....شقة إيه...مش هو قال إن هدي هي إللي باعت الشقه من وراه علشان كده سافر
امها بنفس تنهيده الوجع.....اخوكي طلع كان بيكدب علينا كلنا.. بعدماسمعت كلام طليقته..أنا روحت لأعز اصحابه...علشان اعرف منه الحقيقه وقالي الحقيقه المره
اخوكي لما عرف انه ورث راح اتجوز اللي كان بيحبها من ورانا...وعلي أمل انه ياخد الفلوس ويعمل مشروع يصرف منه على البيتين
بس إللي حصل انه اتنصب عليه....وعرف اللي نصب عليه سافر في أي بلد وقرر يروحله
بس اتفاجئ إن مراته عرفت بكل حاجه وطلبت الطلاق
راح قرر انه هياخد مراته الجديده معاه ..وقال يبيع الشقه علشان يعرف يصرف ولما عرف إن مراته ممكن ترفع عليه نفقه وتطلب مسكن علشان البنت....طلق مراته وخد البنت معاه
رانيا بذهول.....اي ده اخويا أنا كده.....طيب ليه....ليه كدب علينا وقال انها سرقته وخلانا كلنا بنكرها....ليه يحرم ام من بنتها
هو إزاي أخويا كده
.................. ..................... ....................
في منزل والد هدي
في شقه عماد
عماد.......شروق أنا اتصالحت أنا وهدي
شروق بإبتسامه.....الحمدلله والله فرحتني انتو في الاول والاخر ملكوش غير بعض
عماد.....مش عايزك تزعلي منها يا شروق هدي طيبه جدا....بس الظروف اللي بتمر بيها هي إللي تعبت نفسيتها
شروق.....والله أنا مقدره ده..وأنا بحبها جدا..دي كفايه هي إللي مختراني ليك .....بس أنا ذنبي إيه إن صاحبتي اتجوزت جوزها
والله ما كنت أعرف انها مني غير لما هي قالت قدامي
عماد......خلاص بقي قلبك أبيض....سامحيها علشان خاطري...أنا نفسي يكون مفيش مشاكل بينكم خالص
شروق بطيبه....وانت عارف يا عماد إني والله مش بحب المشاكل...وعلشان خاطرك انت أنا هكلمها واصالحها
................ ........... ............... .............
في الأسفل عند والد هدي. وهاني
والدهم.....مش ناوي بقي تحدد ميعاد فرحك...البنت خللت جمبك
هاني.....انت عارف يا بابا في حاجات كتير ناقصه في الشقه
والده.... ما انا.قولتلك يا ابني اساعدك
هاني......لا يا بابا كله إلا كده أنا إللي لازم أعمل كل حاجه بنفسي...الحاجه إللي هكون تعبان فيها...هكون مقدر قيمتها كويس
والده.....ماشي براحتك.....بس على العموم أنا جبتلك هديه فرحك وهتلاقيها وصلت الشقه دلوقتي
هاني بضحك......يعني جبت الهديه قبل ما انا اجيب العروسه يا بابا
والده....ما الهديه دي هي اللي هتجيب العروسه
هاني......يعني إيه
والده......الشقه راحلها دلوقتي تلاجه وغساله وبوتجاز....وقبل ما تفتح بوقك دي هديه فرحك
هاني.....تعبت نفسك أوي يا بابا.....ما أنا كنت هجيبهم براحتي
والده.....براحتك ده هيكون عندك ٥٠ سنه وتكون سنانك وقعت
الحق اتجوز وخلف.....وأنا قدك كان معايا عماد وهدي
هاني.....ربنا يباركلي في عمرك يا رب
..................... ...................... .............
في شقه هدي.
عاد ابراهيم من عمله
ابراهيم.....إيه يا هدي عملتي ايه دلوقتي
هدي.....بخير والله الحمدلله...بس قلبي وجعني من الصبح بسبب الكابوس
ابراهيم......استعيذي بالله من الشيطان الرجيم....وبنتك زي الفل
هدي....نفسي اخدها في حضني يا ابراهيم وحشتني أوي نفسي امسك وشها بإيدي...نفسي المس عنيها وبوقها ومناخيرها بعد ما كبرت وشكلها اتغير
ابراهيم......إن شاء الله كل ده هيحصل لما نكسب القضيه....قومي بقي جهزي الأكل بسرعه....الماتش فاضل عليه ساعه
هدي.....هتسمعه هنا ولا علي الكافيه
ابراهيم...لأ هروح الكافيه أنا مواعد صحابي
جهزت هدي الطعام واكلو سويا
ابراهيم......يا هدي مش هينفع كده لازم تاكلي كويس انتي كده هتتعبي
هدي.....مليش نفس والله يا ابراهيم...الأكل مش عايز يتبلع
ابراهيم......لأ لازم تغصبي علي نفسك علشان صحتك يا هدهد
هدي.....ماشي يا ابراهيم.....يلا بقي علشان تلحق الماتش....وأنا عايزه اخرج اتمشي شويه
ابراهيم......ماشي يا حبيبي أخرجي براحتك
رحل ابراهيم وذهبت هدي تحوم حول منزل ابنتها تحاول رؤيتها ولو من بعيد.....رأت رانيا امامها...جرت مسرعه حولها
هدي.....رانيا رانيا...طمنيني...جودي عامله ايه
رانيا.....بخير الحمد لله
هدي.....طيب انا نفسي أشوفها
رانيا بدموع.....للأسف مش هينفع
هدي بخضه......ليه يا رانيا
رانيا ببكاء وهي تمشي.....جودي عصام خدها وسافر تاني يا هدي
رحلة عذاب......الفصل السادس
كانت هدي داخل المشفي معلق لها محلول ..وحولها والدها وزوجها واخواتها
ابراهيم إلي الدكتور.....هي هتفوق أمتي يا دكتور
الدكتور....علي المحلول ما يخلص هتكون فاقت
ابراهيم....طيب هي مالها
الدكتور.....حالة انهيار عصبي....بس إن شاء الله هتفوق وهتبقي كويسه وياريت تبعدوها عن أي انفعال
خرج الدكتور....وقال عماد بغيظ....بقي الزباله يعمل كده فيها
هو إزاي في بني آدم يكون بالارف ده
هاني....الزفت ده لو اطوله هطلع روحه في ايدي
والدهم....مش وقته الكلام ده ....عايزين هدوء علشان لما اختكم تفوق متحسش إن الجو متوتر ..واطمن عليها واطلع على المحامي أعرف منه إيه إللي المفروض يتعمل
بدأت هدي تفيق
عماد بحنيه ...عملتي ايه دلوقتي يا حبيبتي
هدي بدموع.....الحمد لله
والدها....يا بنتي علشان خاطري تهدي وأنا والله لأتصرف
ابراهيم.....انتي هدي إللي طول عمرها قويه.. مفيش أي حاجه أبدا تهدك
هدي.....دي مش أي حاجه....دي بنتي..... حتة مني ....دي الوحيده إللي قادره تكسرني.....بقالي سنين مشوفتهاش....وأول ما يكون في أمل تتاخد مني كده...أنا تعبانه أوي
هاني....علشان خاطري اهدي...الدكتور قال الانفعال وحش عليكي
هدي. بصراخ....تعبت....تعبت اوي يا هاني من ساعة ما اتجوزته وأنا تعبانه ولما طلقني تعبانه...دا مرض من ساعة ما شوفته وهو تعبني
أنا عايزه بنتي..بنتيييييييي
عماد......اهدي وفوضى أمرك لله
هدي بصراخ.....فوضت امري ليك يارب.....فوضت أمري ليك يارب
ذهب ابراهيم مسرعا إلي الدكتور....الحق يا دكتور....أتي الدكتور مسرعا....واعطاها حقنه مهدئه
خرج والدها من عندها ...وهو يشعر انه سينفجر
.. .......... .............. ...............ظ
في منزل والدة عصام
كانت تتحدث هي وابنتها
ام عصام.....وهي عملت ايه دلوقتي يعني
رانيا.....معرفش والله يا ماما...أنا ودتها المستشفى...وخدت تليفونها ورنيت على جوزها وابوها راحو ليها وانا جيت على طول
أثناء حديثهم......بدأ جرس الباب يرن بشكل متواصل والباب يدق بشده
قامو بفزع على صوت الباب...ووجدو والد هدي امامهم وعيناه ستنفجر من الغيظ
ابنك فيييييين
ام عصام بتوتر....ابني سافر
والد عماد......اقسم بالله لاخليكي تلبسي أسود عليه....هبعتله إللي يجبلك خبره....أنا هعرفه إزاي يلعب معانا
ام عصام.....عصام. عنده شغل وكان لازم يرجع تاني...يعني غصب عنه...الشركه اللي شغال فيها هناك طالبينه
والد عماد......الشركة اللي شغال فيها.....إبنك كان شغال هناك صايع عايش على قفا مراته
بس ده تحذير ليكي...إبنك لو مرجعش في خلال الأسبوع ده ومعاه البنت....هيرجعلك الأسبوع إللي بعده في صندوق
وخرج وهو منفعل
ام عصام.....ممكن يعمل في اخوكي حاجه
رانيا....اكيد لا يا ماما...ده بيهدد بس
ام عصام.....لأ ده عنيه كلها شر...دا فعلا هيأذيه
أنا لازم....اتصرف
............... .................. ......... . ......
في شقة عصام
عصام.....لسه ملقتيش شغل
مني...... صاحبة الشغل جابت واحده غيري...وقالتلي مش محتاجه حد دلوقتي.....طيب وانت إيه مدورتش
عصام.....لأ أنا مينفعش اسيب البنت لوحدها...يا انا يا انتي إللي نشتغل
مني.......طيب دور على شغل وأنا اقعد مع البنت
عصام.....انتي عارفه ان الستات فرص الشغل ليها أكتر من الرجاله
مني....طيب ما تطلب من أمك تبعتلك فلوس لحد ما ربنا يفرجها٨
عصام.....امي فاكره علشان أنا مسافر بقالي سنين إني معايا فلوس كتير.....مقدرش دلوقتي اطلب منها فلوس
............... ................. ..............
في شقه ابراهيم
ابراهيم.... نورتي بيتك يا غاليه
هدي بتعب... منور بيك
هاني وعماد.....براحتك وانتي ماشيه
عماد... أنا هنزل اجيب اكل واطلع على طول
هدي.....مش قادره اكل حاجه يا عماد
عماد.....إحنا من الصبح محدش فينا اكل حاجه هناكل لقمه سوا
وأثناء حديثهم رن جرس الباب..ودخلت شروق بسرعه ناحية هدي وحضنتها وهي تقول.....الف سلامه عليكي يا حبيبتي...طمنيني عليكي
هدي بتعب.....الحمد لله بخير
عماد......ايه الحاجات اللي معاكي دي
شروق......جهزت ليكم اكل....عارفه ان محدش اكل حاجه من الصبح
هاني.....والله بنت حلال...كنا لسه رايحين نجيب اكل....افرشي السفره بقي
عماد.....فين الاولاد يا شروق
شروق وهي. تجهز الطعام......ودتهم عند ماما
ابراهيم.....يلي بقي كلي لقمه
هدي.....مش قادره والله يا ابراهيم
عماد.....علشان خاطري قومي اقعدي وسطينا....خلينا نمشي وإحنا مطمنين عليكي
هدي.....حاضر
والتفو جميعا حول السفره يحاولو إطعام هدي
................... .................. ...............
عند المحامي
المحامي.....القضيه هتمشي عادي وهناخد حكم وأول ما يرجع هيتنفذ
والد هدي.....هيرجع قريب اوي يا متر
المحامي......انت ليه متأكد ان تهديدك لأمه هيجيب نتيجه
والد هدي......علشان عارف هي بتحبه إزاي.....وبسبب حبها الذياده ده طلعته عيل غير مسئول
المحامي.....اتمني انها تعرف تتصرف
.............. ................. ...........
في منزل والدة عصام
كانت تحدث عصام على الهاتف
بص يا عصام.....هعرض عليك عرض ولو وافقت هتبقي انت إللي كسبان
عصام....ماشي أسمع
ام عصام.......تنزل مصر و
عصام.....انزل مصر تاني لأ
ام عصام......طيب اسمع للاخر
انت هتنزل مصر...وانا هديك الفلوس اللي أنا ورثتها من ابوك وعندي دهب هبيعه وتفتح مشروع هنا وتبقي قاعد جمبي...تشتغل في مالك انت قولت ايه
عصام بإعجاب.....بس دي فلوسك يا ماما
ام عصام.....في الأول والآخر الفلوس ليكم...
( ام عصام في نفسها ..اخسر. فلوسي...احسن ما أخسرك انت )
ها قولت إيه
عصام.....ماشي يا ماما موافق
ام عصام.....بس على شرط.....ترجع البنت لأمها وتجيلك وتروحلها
ويكون مفيش مشاكل
عصام بعصبيه.....لأ بنتي لأ...هدي مش هتنتصر عليا
ام عصام......متبصش تحت رجلك.....البنت بكره تكبر وتعرف كل حاجه وهتروح لأمها..مهما انت بعتها عنها
فكر في الموضوع كويس هيكون معاك ملايين تحت رجلك..ارجع بلدك واشتغل فيها..بفلوسك ويكون الكل تحت امرك
عصام بتوهان......سبيني افكر يا ماما...وابقى ارد عليكي
رحلة عذاب...الفصل السابع
كانت تجلس هدي وابراهيم....بعدما تعافت قليلا رن عليها الهاتف وكان والدها
هدي....السلام عليكم...ازيك يا بابا عامل ايه
والد هدي بفرحه....الحمدلله يا بنتي.. أنا عايزك تجهزي عشوه حلوه أوي...علشان أنا جاي اتعشي معاكي ومعايا ضيف
هدي....انت تنور يا بابا في أي وقت....بس مين الضيف
والدها....أنا افضل إنك تشوفيه بنفسك... جهزي الأكل بسرعه علي ما اجي....سلام
اغلقت هدي الهاتف وقالت لإبراهيم....بابا بيقولي اجهز عشا كويس علشان هو جاي ومعاه ضيف
ابراهيم.....بس انتي شكلك تعبانه....متعمليش اكل...وأنا هروح اشتري اكل جاهز بسرعه. قبل ما ييجي
هدي.....بجد.....شكرا يا ابراهيم أنا فعلا تعبانه اوي
ابراهيم.....أدخلي ريحي شويه علي السرير علي ما بابا ييجي.... وأنا هقوم بسرعة اشوف لو في حاجة عايزه تتوضب في الشقه قبل ما حد ييجي
هدي.....أنا هظبط الشقه وانت انزل هات الأكل
خرج ابراهيم وبدأت هدي في تظبيط مخدات الركنه وتعديل المفارش وبعد قليل رن جرس الباب...فتحت هدي الباب وجدت أمامها هاني وعماد
هدي.....أهلا حبايب قلبي اتفضلو
هاني.....لأ انتي إللي اتفضلي جوه غيري هدومك بسرعه علشان بابا جاي ومعاه ضيف
هدي....طيب مين الضيف ده....ولازم اغير علشان اقابله....هو عمك رجع من السفر
عماد......انتي اسألتك كتير اوي.....الله يساعد ابراهيم علي الرغي ده.....أدخلي يا بنتي بسرعه ...ودفعها عماد إلي الداخل
شعرت هدي ان عمها الغائب عاد من السفر وهم يريدون ان يسعدوها بأي شكل....
بدأت تختار ما تريد......وفي الخارج اتي ابراهيم
ابراهيم... أهلا أبو نسب....منورين هنا
عماد.... بنورك يا ابو خليل.....بقولك إيه إحنا عايزين نعمل مفاجأة لهدي
ابراهيم....... هدخل الحاجات اللي معايا دي للمطبخ واجيلكم
وضع ابراهيم ما في يده وخرج لهم. ... قولولي بقي عايزين تعملو إيه
بص بقي عايزين حاجه نغمي عنيها بيها
ابراهيم.....ماشي بس فهموني إيه هي المفاجأة
هاني....يا عم عايزين نفاجأك انت كمان...بس بسرعه بالله عليك
رن هاتف عماد.....عماد....ايوه يا بابا .....خلاص وصلت؟؟،؟.. تمام اصبر دقيقه واحده
عماد....بتعملي ايه ده كله يا هدي
خرجت هدي....في ايه هو لسه الضيف بتاعكم ده وصل
امسكها هاني ووضع العصابه حول عينيها
هدي.....انت بتعمل ايه يا إبني
هاني ......اسكتي شويه لو سمحتي....خليني اخلص
هدي.....علي الله تطلع في الآخر حاجه تافهه...هطلع عينك يا هاني
هاني.....لما تشوفي الأول وبعدين تحكمي هي تافهه ولا لا
وفتح عماد الباب ودخل والده..ومن معه.. امسك هاني الهاتف وبدأ بتصوير هدي
والد هدي.....شيلي يا بنتي إللي علي عنيكي
عماد......أنا إللي هشيله....بدأ عماد بفكها....كانت هدي تفرك عينها وبدأت تركز أمامها وجدت طفله جميله...ظلت تفرك عينها اكثر وهي تظن انها تتوهم
هدي بعدم تصديق. وهي تنظر إلى كل الواقفين....جودي.....ده بجد جودي قدامي....ولا أنا بحلم
ولا بيتهيألي
والدها.....لأ يا بنتي جودي بنتك اهي....زي ما وعدتك جبتها
جريت هدي عليها وهي تحتضنها بعدم تصديق.....بنتي ده بجد
...ظلت تحتضنها لفتره طويله وهي تبكي
والدها.....سيبي بنتك تاخد نفسها هتموتيها كده
هدي ببكاء.....ده حرمان سبع سنين وشهرين من بنتي....آخر مره شوفتها كان عندها ٨ شهور
يارب ميكونش حلم....يارب إللي أنا فيه ده يكون حقيقه....ويارب لو ده حلم مصحاش منه
كانت الطفله بين يديها ساكنه تماما لا تتحدث ولا تبادلها الحضن
هدي.....جودي حبيبتي اتكلمي عايزه اسمع صوتك ....انتي وحشتيني اوي اوي
جودي بخوف....اقول إيه
هدي......قولي. اي حاجه....أنا عايزه اسمع منك اي كلام
جودي....أنا خايفه....وعايزه اروح عند ماما مني
هدي بوجع.....أنا إللي أمك يا حبيبتي..أنا اللي شيلتك في بطني تسع شهور...أنا إللي ولدتك
والد هدي.....فين الأكل إللي قولتلك جهزيه يا هدي... انتي عايزه جودي تقول عليكي بخيله
هدي.....دقيقه واحده ويكوم جاهز
هاني.... .كده عملتلك أحلي فيديو....خليكي انتي مع بنتك وإحنا هنجهز الأكل
امسك والد هدي يد جودي وقال.....بصي يا حبيبتي...دي ماما هدي بتحبك اد الدنيا كلها....وده عمو ابراهيم جوزها.....ودول بقي اخوالك عماد وهاني انتي طبعا اتعرفتي عليهم
جودي.. اه
هدي......تعالي يا حبيبتي في حضني انتي وحشاني أوي....أنا مش مصدقه إنك خلاص رجعتي لحضني.....الف حمد وشكر ليك يارب.....الف حمد وشكر ليك يارب
تعالي يا حبيبتي كلي....انتي بقي تاكلي الأكل ده كله ماشي
جودي.....ميرسي....أنا مش جعانه
هدي.....معلهش علشان خاطري كلي معايا حاجه بسيطه
جودي....حاضر
جلست هدي بجوار جودي تطعمها في فمها وهي تنظر إليها بسعاده شديده ...ولا تصدق انها حقا بين يديها....وفي دماغها ألف سؤال....كيف اتي بها الله إليها....كم انت كريم يا الله
............. ................... ................
في منزل والدة عصام
أتي عصام من الخارج وهو سعيد وظل يحكي لأمه عن الأرض الذي اشتراها
عصام......أرض يا أمي إيه واسعه جدا هنعمل عليها مصنع محترم
همضي العقد بكره وهنروح بعد بكره نسجله في الشهر العقاري
ام عصام بتردد وخوف.... هتكتب العقد بإسمي؟؟؟
عصام بإستغراب. ....ليه
ام عصام....علشان اولا طليقتك متثبتش انك عندك مصنع.. ويطلبو منك نفقه كبيره....وكمان لو حصل مشاكل بسبب مباني ولا كهربا....ابقي أنا إللي فوش المدفع... وانت بعيد عن المشاكل
وبعدين ده كله هيكون علي الورق بس......إنما كل حاجه تحت ايدك وانت المتصرف فيها
عصام بتفكير.....ماشي يا أمي إللي تشوفيه
يا جودي يا جودي.....هي جودي فين يا ماما ...راحت مع مني بيت أبوها ولا ايه
ام عصام بخوف شديد منه .. ججججج..ججججودي راحت لأمها تشوفها
عصام بعصبيه.....أمها مين دي
ام عصام....أمها إللي ولدتها هي ليها ميت أم
عصام.....قصدك امها إللي سابتها.. أمها إللي سرقت أبوها...أمها اللي اتخلت عنها
أم عصام....عصام.....أنا عارفه الحقيقه كلها....وعارفه انها مسرقتش...وانت إللي خدت الفلوس وسافرت بعد ما خسرت ورثك كله
عصام بنرفزه شديده....يعني هي كدبت عليكي وانتي صدقتيها
كدبتي ابنك وصدقتيها هي....أنا غلطان اني رجعت وسمعت كلامك....أنا هروح اجيب بنتي واسافر تاني لا حد يقولي عملت ولا سويت
أم عصام.....سيب البنت مع امها شويه وجدها هيجبها تاني على طول....هو وعدني
عصام.....وعدك....وصدقتيه....طبعا ما انتي صدقتي بنته الحراميه اللي سرقتني....مش هتصدقيه هو.....بس أنا هروح أجيب بنتي من عنيهم....والراجل فيهم يوقفلي
رحلة عذاب الفصل الثامن
هدي بسعاده....جودي أنا بحبك أوي
بحبك فوق ما تتخيلي
جودي....طيب انا مش فاهمه ازاي انتي امي..وماما مني امي...هو في حد ليه اتنين ام....وازاي أول مره في حياتي أعرف إني عندي اتنين أم
هدي.....بصي يا حبيبتي أنا وابوكي كنا متجوزين وبعدين أنا حملت فيكي وبعدين ولدتك...وبعد كام شهر بس أنا وباباكي اتطلقنا...وخدك وسافر بره....وبعدين اتجوز طنط مني فعلشان انتي لما كبرتي لقتيها هي اللي معاكي افتكرتي انها مامتك
جودي.....اه طيب لو سمحتي أنا عايزه اروح عند بابا وماما مني
هدي بزعل... انتي مش عايزه تباتي معايا يا جودي
جودي بخوف من كل من حولها فهي تراهم لأول مره....أنا خايفه
وضعتها هدي داخل احضانها... اوعي تخافي يا حبيبتي طول ما انتي معايا
جودي....طيب وديني عند بابا وماما
هدي......اصبري عليا دقيقه واحده وراجعالك يا حبيبتي
خرجت هدي عند والدها وقالت
بابا انت جبت جودي إزاي....وهي ليه خايفه مني
والدها.....يا بنتي دي أول مره تشوفك...وبعدين دي طفله.. والاحداث إللي بتحصل دي كتير عليها
وكل مره هتجيلك فيها هتتعود علي طباعك أكتر .. وتحبك أكتر واكتر
هدي بخضه....يعني إيه كل مره هتجيلك فيها....يعني هي مش خلاص هتقعد معايا علي طول
والدها......يا بنتي لازم تتعود عليكي واحده واحده.....هي كانت عايشه مع ناس تانيه طول عمرها.....صعب عليها حياتها تتقلب مره واحده....خليها تيجي وتروح
هدي بدموع.....يا بابا أنا مصدقت انها رجعتلي تاني
والدها وهو يربت علي كتفها.....كنتي بتتمني انك تشوفي حتي صورتها....دلوقتي هي بقت قدامك ووقت ما تحبي تشوفيها هجبهالك....البنت لو جت غصب عنها هتكرهك...بس لما تجيلك وتلاقي أحلي معاملة واحلي حب....هتجيلك تقعد معاكي بإرادتها
وهي حابه ده
هدي.....غصب عني والله يا بابا.....حاسه انها لو مشيت مش هشوفها تاني
والدها.....لأ من الناحيه دي متقلقيش... هي مش هتبعد عنك تاني....ولو عرفت اجبهالك يوميا هجبها
هدي.....يعني أبوها مش هاين عليه يسبهالي اسبوع ماهي بقالها سنين معاه
والدها......ابوها أصلا ميعرفش إن البنت هنا.. أنا واخد البنت من جدتها.. قالتلي لما يخرج أنا هرن عليكم تيجو تاخدوها وترجعوها قبل ما يرجع.....خليكي تشوفي بنتك وتتعود عليكي....علشان لما نكسب القضيه وتاخدي حضانتها يبقي بنتك بتحبك ومتعوده عليكي وكمان كل حاجه تمشي قانوني
هدي بإقتناع.......ماشي يا بابا إللي تشوفه....أنا هلحق ألعب معاها شويه قبل ما تمشي
..................... ........................ ................
في منزل والدة عصام
كانت تقف خلف الباب أمام عصام وتقول
حرام عليك.....ابوها وجوزها واخواتها هناك لو اتكاترو عليك هيأذوك
عصام......محدش يقدر يعملي حاجه...أنا اموتهم كلهم
والدته.... استهدي بالله يا عصام.. مش أنا كنت شارطه عليك انك هتنزل وتاخد الفلوس مقابل إنك ترجع البت لأمها
عصام.....أنا إللي اوديها بمزاجي....مش توديها انتي من ورايا
والدته....مش هتفرق كتير.....هو مش انا ستها برضه
عصام.... انتي خليتي الهانم تنتصر عليا.....يبقي اتجوزت وعاشت حياتها..وكمان بنتي تروحلها علي الجاهز
والدته.....يا ابني ما انت كمان اتجوزت
عصام......اتجوزت واحده مبتخلفش...بقالها سنين معايا مجبتش حتة عيل
والدته.....اكشفو وشوفو سبب التأخير
عصام......هيكون ايه يعني سبب التأخير انا مخلف قبل كده يبقي العيب منها هي
أنا داخل استحمي لو خرجت ملقتش البت جت والله ما تعرفي أنا هعمل ايه
دخل عصام ورنت والدة عصام علي والد هدي حتي يأتي بالبنت بسرعه
بعد قليل من الوقت أتت مني....إيه يا ماما فين جودي
والدة عصام وهي متوتره....عند أمها وعصام قالب الدنيا ادخلي هديه شويه علي البنت ما تيجي
مني.....حاضر
دخلت مني وجدت عصام يرتدي ملابسه....عندما رآها عصام امسكها من ذراعها بعنف
انتي إللي وديتي البنت لأمها
مني بوجع....والله ما أعرف انها هتروح
عصام.....ماشي أنا هشوف البيت إللي كل واحد فيهم ماشي بمزاجه ده
رن جرس الباب....فقال عصام.... البنت شكلها جت أنا هخرج ولو لقيت حد من اهلها بره مش هرحمه
خرج عصام فوجد والدته ادخلت جودي واغلقت الباب
عصام.......مين اللي جبها....عايز أعرف عملو ايه في البنت
والدته.....البت قدامك زي الفل اهي هياكلو منها حتة يعني
عصام موجهه كلامه لجودي.....قوليلي ايه اللي حصل هناك بالظبط
والزفت جوزها ده زعلك ولا قالك كلمه
.................. ................... .........
في منزل ابراهيم
ابراهيم......هتفضلي ماسكه التليفون كده كتير
هدي بسعاده......أنا مش مصدقه....أنا فعلآ شوفت جودي.. فعلا كانت في حضني من شويه
الفيديو ده جميل أوي... عايزه افضل ابص عليها طول ما انا قاعده
ابراهيم......شوفتي يا هدي لما بنفوض امرنا لله ازاي ربنا بيحللنا مشاكلنا
هدي بفرحه......ونعم بالله
ابراهيم. ....يلي نصلي قيام الليل. ونشكر ربنا علي نعمه علينا
هدي.....أنا فعلآ محتاجه اصلي.. . عايزه افضل أصلي طول الليل وأحمد ربنا علي نعمه عليا
...................... ......... .............. .......
في منزل والدة عصام
كان عصام بالخارج وجودي خلدت للنوم ...ووالدة عصام ومني يجلسون سويا
والدة عصام......بقولك يا بنتي ما تيجي نروح للدكتوره ونكشف ونشوف إيه سبب تأخير الحمل
مني بتوتر......الحمل مش متأخر ولا حاجه
والدة عصام.....ازاي مش متأخر وانتو بقالكم سنين ومفيش اطفال
مني.....بصراحه يا ماما....أنا كنت حامل في بداية جوازي وعصام صمم إني انزله....ومن ساعتها خلاني اخد مانع حمل...ورافض تماما إننا نجيب اولاد....بيقولي لما دنيتنا تستقر يبقي نفكر في الخلفه
رحلة عذاب.... الفصل التاسع
والدة عصام بإنفعال.....قتلتو روح ...موتي ابنك بإيدك....هي الرحمه اتنزعت من قلوبكم للدرجه دي...هان عليكي ضناكي....
مني بدموع... كان غصب عني والله.....كنت في بلد غريبه لا ليا فيها أهل ولا ليا فيها حد....وخوفت من عصام....خوفت منه أوي. هو اتغير بعد الجواز....مكانش كده خالص
والدة عصام.....لو إبني مفيش في قلبه رحمه...بس.انتي إللي شيلتيه في بطنك كان لازم يكون عندك قلب وتحافظي عليه
كان هيعملك إيه يعني...كان هيموتك يعني...استحاله كان هيأذيكي
مكانش ليه غيرك في الغربه...وواخدك عن حب كمان ومتجوزك علي مراته
مني....بلاش تشيليني ذنب مش ذنبي...أنا كنت عايزه اعيش...أنا بيعت اهلي علشانه...ولو كان رجعني ليهم كان استحاله يسامحوني
والدة عصام.....انتي إنسانه ضعيفه....واحده زيك إزاي تتجوز من ورا اهلها... انتي انسانه مهزومه ومستموته ليه كده....فوقي لنفسك....
مني.....اعمل ايه يعني
والدة عصام...... من دلوقتي هتبطلي الوسيله وهتحملي.....وابني أنا اللي هوقفله
................. ............. . ............
في بدايه يوم جديد
مني......عصام....اصحى بقي الساعة ١١..بتقول عندك ميعاد مهم
عصام....خلاص صحيت اهه....جهزيلي الفطار علي ما اخد دش
مني....حاضر
اتجهت مني حيث المطبخ بينما عصام كان يهم لدخول الحمام
والدته.....أنا عايزاك يا عصام
عصام....عيني يا أمي عايزه ايه
والدته....اقعد الأول.....بقولك ايه...أنا هاخد مراتك انهارده للدكتور وا شوف سبب تأخير الحمل ايه
بهت عصام وقال....أنا مش عايز عيال دلوقتي
ام عصام بقوه.....بقولك ايه....انت مش عايز عيال أنا عايزه... المصنع اللي هتفتحه ده هتسيبه لمين...لازم يكون ليك سند في الدنيا دي
عصام وهو مستغرب من لهجة امه في الكلام....في ايه يا ماما....خلاص انا هوديها للدكتور
ام عصام.....لأ أنا إللي هوديها
عصام....طيب وجودي هنسيبها لمين ولا هتاخدوها معاكم
ام عصام ....جودي هتروح لأمها علي ما نرجع
عصام بنرفزه....هتروح لمين
ام عصام بحسم.....قولت هتروح لأمها...وبعدين انا متفقه معاك إنك هتاخد إللي ورايا وقدامي مقابل إنك ترجع البنت لأمها وانت وافقت....فوق بقي لشغلك وشوف الملايين اللي تحت إيدك... علشان لو الفلوس دي راحت إحنا هنشحت كلنا...ركز في شغلك علشان تنجح....وسيبك بقي من البت..وكلام النسوان ده
عصام......ماشي يا ماما عايزه مني حاجه تاني ولا ادخل الحمام
ام عصام....مش عايزه حاجه غير إنك تفوق لنفسك ولشغلك
بعدما انهي عصام حمامه وفطاره وبدأ في تغيير ملابسه
عصام بحتذير..بقولك ايه يا مني..... امي عايزه تاخدك تكشف عليكي...اياكي تعرف حاجه عن موضوع مانع الحمل اللي بتاخديه
خلي الدكتوره تكشف وخلاص....وبطلي الوسيله واحملي علشان خاطر أمي.....شكلها مدايق علشان هتديني الفلوس خليني اسايسها....لحد ما احط ايدي علي الفلوس
مني بتوتر......لو عرفت يعني إيه اللي هيحصل
عصام بعصبيه.....الكلام اللي اقوله يتسمع.. مش لازم تجادليني وخلاص
مني.....حاضر
............... ................. ............
في منزل هدي
هدي بفرحه وهي تتحدث علي الهاتف.....بجد يا بابا انت جايب جودي وجاي ....متتأخرش بالله عليك
اغلقت هدي الخط وهي تدور حول نفسها بسعاده....جودي هشوفها تاني.....يعني أنا مكنتش بحلم امبارح...الف حمد وشكر ليك يارب
امسكت الهاتف وطلبت ابراهيم
هدي بفرحه.....ابراهيم جودي جايه في الطريق
ابراهيم وهو فرح لفرحتها.....الحمد لله...ربنا يجمعك بيها على طول يارب
هدي......كنت عايزه اقولك هات معاك حلويات وانت جاي... وكمان هات حاجه ساقعه
ابراهيم.....من عنيا إللي انتي عايزاه
هدي.....مع السلامة علشان هي قربت تيجي......
جريت هدي علي المطبخ وقالت.....اعمل اكل ايه....طلعت فرخه من الفريزر....يا تري يا جودي بتحبي المحشي ولا المكرونه ولا الرقاق
رن جرس الباب...اتجهت هدي مسرعه نحوه بلهفه
هدي......جودي حبيبتي.....وحشتيني اوي أوي أوي
اكتفت جودي بإبتسامه
وقالت هدي....اتفضل يا بابا
والدها ......لأ أنا ورايا مشوار مهم قبل ما أجي اخدها هرن عليكي
هدي...ماشي يا بابا بس تعمل حسابك تتغدا معايا
والدها.....ماشي
خرج والدها وذهبت نحو جودي بسعاده تحتضنها مره اخري
قوليلي بقي بتحبي ايه من الأكل....علشان هنقوم حالا نعمله
جودي بتفكير......أنا بحب الكريب أوي
هدي.....بس كده .....حالا نعمل أحلي كريب لاحلي جودي... يلي نعمله سوا
جودي بفرحه.....ماشي
دخلت هدي وجودي المطبخ اعدو الطعام وفرغو منه تماما
هدي.....تسلم ايدك يا جودي.....الأكل تحفه من ايدك....انتي طباخه شاطره أوي
جودي بإبتسامه.....أنتي إللي عملتي كل حاجه
هدي.....بس انتي كنتي بتساعديني علشان كده الأكل طعمه عسل
بقولك ايه.....إيه رأيك نلعب شويه
جودي بحماس.....ماشي
يينما كانت هدي وجودي يلعبون رن جرس الباب
وكان ابراهيم
ابراهيم......جودي عندنا إيه النور ده كله
جودي.....ازيك يا عمو
ابراهيم.....علشان عمو الجميله بتاعتك دي...شوفي جبتلك ايه....جبتلك عروسه أطول منك أهي
جودي بفرحه كبيره....واو... دي ليا انا
هدي.....قولي لعمو شكرا
جودي .....شكرا يا عمو واخذت العروسه وجريت إلي الداخل
ابراهيم......استني لسه في حلويات
هدي بإمتنان.....شكرا يا ابراهيم إنك فرحت بنتي كده
ابراهيم......بنتك هي بنتي يا هدي.....يارب يرزقنا بالذريه الصالحه
هدي.....اللهم آمين يارب العالمين
................ .................... ...........
عند عصام
كان يحدث والدته على الهاتف
والدته.....مش انا اتفقت معاك يا عصام ان الارض هتتكتب بإسمي
عصام بعصبيه.....انتي عايزاه تطلعيني عيل قدام الرجاله....واجيب امي هي إللي تمضي
والدته.....أقسم بالله لو الأرض ما اتكتبت بإسمي أنا وانت واختك ما هدفع جنيه
عصام.....وكمان أختي هتتكتب معانا
والدته.....ايوه هتتكتب هي علشان ما هي بنت هاكل حقها ولا ايه
عصام.....بقولك ايه يا ماما....كل حاجه هتتكتب بإسمي يا إما هاخد مراتي وبنتي وهرجع تاني
والدته بقولك ايه يا عصام..... لو الحاجه متكتبتش زي ما انا قولت....أنا إللي بقولك سافر....خد مراتك وامشي
رحلة عذاب.....الفصل العاشر
داخل حجرة عصام ومني.... كان عصام يغلي من الغضب
مني......اهدي يا عصام...انت بس إيه إللي مزعلك كده
عصام بإنفعال....امي استدرجتني لحد ما رجعت من السفر ودلوقتي بتملي عليا شروطها
مني....طيب ما تريحها وخلاص ...هتخسر ايه
عصام .....دي عايزه تكتب كل حاجه بإسمي أنا وهي واختي
يعني بالعقل لو هورث كنت ورثت اكتر من كده
دلوقتي اختي هيبقى ليها في المصنع...وهيكون ليها من ارباحه وهتكون شريكه معايا...ده طبعا غير أمي
وفي الاخر بعد موت أمي نصيب أمي هيتوزع علينا كميراث تاني
وهيكون ليها في المصنع اكتر ...ده غير بنتي إللي خلوها تروح وتيجي علي أمها...وطبعا هتعمل كل الطرق علشان تكره بنتي فيا
مني.....ما ان شاء الله ربنا هيرزقك من المصنع ده رزق كبير....مش هيحسسك ان هيكون معاك شريك
عصام.....وليه مايكونش كل ارباحه لوحدي....ليه يكون معايا شريك فيه
مني....... علي فكره....انت ممكن تشتري نصيب أختك في المصنع.....أول لما المصنع يشتغل ويقف علي رجله ويكون معاك فلوس...اشتري نصيبها
عصام...لأ هشتري ولا هبيع....أنا هيكون ليا كلام تاني وتخطيط تاني....اصبري بس وأنا هوريكي عصام لما يشغل دماغه
.................. ..................... ..................
في منزل ابراهيم
ابراهيم.....يا بنتي مش موافقه ليه ما إحنا بنطلع مصيف كل سنه
هدي......دلوقتي الوضع اختلف... بنتي يا عصام...بنتي جت..وكل يوم والتاني بتكون عندي...مقدرش اسيبها أسبوع
ابراهيم....وليه تسبيها....هنكلم ابوها وناخدها معانا
هدي......استحاله أبوها يوافق
ابراهيم.....هنكلمه الأول...ما يمكن يوافق
هدي....اسمع مني أنا بقولك مش هيوافق
ابراهيم.....طيب نطلع أنا وانتي...ده كله أسبوع ولو مش عايزه تكملي اسبوع نقعد أربع خمس أيام ونرجع
ده الأسبوع الوحيد اللي بفصل فيه طول السنه....وكمان الشقه والسفر علي حساب الشركه....أنا محتاج الأسبوع ده يا هدي علشان...بريح اعصابي فيه
هدي.......... إيه رأيك هنكلم أبو جودي الأول ولو وافق يبقي خير وبركه... ولو موافقش يبقي روح انت وهاني اخويا غيرو جو...وأنا هروح اقعد عند بابا علشان تبقي مطمن عليا
ابراهيم.بزعل.....ماشي يا هدي اللي تشوفيه....بس على العموم انا بحاول اعمل كل حاجه بتسعدك....وفي المقابل أنا مش شايف منك إنك بتحاولي تسعديني....حتي الطفل اللي نفسي فيه واتكلمت معاكي كتير أوي علشان تحملي...وانتي تقوليلي مش مستعده
مش عايزه اخلف تاني واتوجع تاني....وكأنك بتعاقبيني بذنب واحد تاني....وأنا أقول نفسيتها....بكره من نفسها تيجي وتقول أنا إللي عايزه أخلف منك.....بس سنين وبكره ده مجاش...وأنا بكبر في السن وإللي في سني معاه عيلين وتلاته.... واقول حبك ليها أهم من العيال....
بس دلوقتي سواء طلعنا السفريه أو لأ. ....لازم تديني رد علي موضوع الخلفه انهارده
هدي.....في ايه يا ابراهيم.....الموضوع مش مستاهل ده كله
كل ده علشان قولتلك ممكن معرفش أسافر علشان بنتي
ابراهيم بزعل.....الموضوع لا هو سفر ولا هو بنتك...الموضوع إني حسيت من كلامك دلوقتي...أنا مركون علي الرف ...إني مهمش
أنا جاي فرحان وعمال أحضر في دماغي مفاجئات هعملها ليكي في السفر....وهعملها لبنتك علشان افرحك
بس لقيت منك رد فعل بارد دايقني....حتي وأنا بقولك محتاج الأسبوع ده....ملقتش رد فعل كويس ....وكإني مستهلش منك انك تيجي علي نفسك شويه علشان خاطر تفرحيني
هدي.....ما انا بسافر معاك كل سنه...في إيه لما سنه اقولك مش هينفع
ابراهيم......بصي يا هدي انتي كده مفهمتيش ولا كلمه من إللي أنا قولتها.. الموضوع دلوقتي مش موضوع سفر تماما
الموضوع دلوقتي...أنا فين في حياتك...
طول الوقت براعي ايه إللي يزعلك وايه اللي يفرحك...براعي نفسيتك...براعي حزنك علي بنتك....دورتلك علي شغل.. علشان متسبيش نفسك للإكتئاب... بكون راجع من الشغل تعبان...واجي اخرجك بالليل علشان انتي بتحبي كده....كلمتك في موضوع الخلفه مليون مره...ولا مره وافقتي
لسه لحد دلوقتي مش مدياني الأمان
علي العموم أنا كلمت ابوكي علشان يحاول مع أبو جودي انه يجبها معانا...وكنت اناوي اعملهالك مفاجأة....بس خلاص بقى
رني على ابوكي وقوليلو إنك مش هتروحي
.................. ............ .............
في منزل والدة عصام
عصام......لأ طبعآ مش موافق ان بنتي تسافر مع راجل غريب
ام عصام.....ده راجل اد ابوها يعني هياكلها
وبعدين انت كده كده مشغول في بناء المصنع انت فايق للعيال الصغير
عصام وهو ينهي الحوار .....قولت لأ يعني لأ ...أنا داخل انام
دخل عصام غرفته واتته فكره
رن علي شخص ما
وقال.....لو قولتلك عايزك تخطفلي بنت صغيره تعرف
المجهول......طبعا أعرف...كل بالفلوس بيمشي
عصام......خلاص ماشي هبعتلك صورتها....بس المكان مش هنا في الغردقة تقريبًا
المجهول......دي لو في بطن أمها هخطفهالك..المهم تدفع
عصام......لأ هدفع متخافش.....البنت تفضل معاك يوم واحد....أول ما اتأكد ان أمها عملت محضر بإختفائها....هكلمك ترجعها تاني
المجهول......بس كده دي حاجه سهله أوي
خرج عصام علي والدته وقال.....أنا فكرت في كلامك يا أمي.....وعلشان أنتي بس تكوني راضيه عني ومتزعليش أنا موافق...رغم اني مش قابل كده خالص ....بس لازم أعرف المكان اللي بنتي هتقعد فيه فين بالظبط
ام عصام......ربنا يهديك يا ابني يارب ...طبعا من حقك تطمن علي بنتك أنا هكلم جدها وأعرف منه كل حاجه
عصام.....أللهم امين....أنا داخل انام محدش يصحيني
دخل عصام وقالت أم عصام لمني... مش قولتلك انا هربيه من أول وجديد
مني...ربنا يصلح حاله علي ايدك. أنا هدخل اشوفه قبل ما ينام
دخلت مني علي عصام وقالت
أنا عايزه أعرف إيه إللي في دماغك بالظبط انت استحاله تغير رأيك بسهوله
عصام.....ولا في أي حاجه
مني....عصام...أنا سمعتك وانت بتتكلم في التليفون....قولي في ايه بالظبط ....وبنت مين إللي عايز تخطفها...وهتخطفها ليه
عصام بضحك.....سوسه انتي برضه ومش ساهله
بس لو كلمه واحده خرجت بره انتي عارفه كويس أنا بعمل ايه
مني .....عارفه كويس
عصام......بصي يا ستي أنا هخطف البنت جودي وامها تعمل محضر. وأول ما اتأكد ان المحضر اتعمل البنت هترجعلها تاني
وأنا بقي اخد المحضر ده اقدمه في اوراق القضيه....واثبت انها ام غير مسئوله واسقط عنها حضانه البنت ...والبنت تفضل معايا
تابعووووووني
الفصل الحادي عشر حتى الفصل التاسع عشر من هنا
رواية زواج لدقائق معدودة كامله من هنا
رواية خيانة الوعد كامله من هنا
رواية الطفله والوحش كامله من هنا
رواية جحيم الغيره كامله من هنا
رواية مابين الضلوع كامله من هنا
رواية سيطرة ناعمه كامله من هنا
رواية يتيمه في قبضة صعيدي كامله من هنا
الروايات الكامله والحصريه بدون لينكات من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق