رواية رحلة عذاب الفصل الحادي عشر حتى الفصل التاسع عشر بقلم الكاتبه زينب مجدي فهمي حصريه وجديده في مدونة النجم المتوهج للروايات والمعلومات
 |
رواية رحلة عذاب الفصل الحادي عشر حتى الفصل التاسع عشر بقلم الكاتبه زينب مجدي فهمي حصريه وجديده في مدونة النجم المتوهج للروايات والمعلومات
هدي بإبتسامه.....إبراهيم بابا جودي وافق انها تطلع معانا المصيف بابا لسه مبلغني
إبراهيم.....وأنا هطلع لوحدي
هدي بزعل......ليه
إبراهيم...... لو أبوها مكانش وافق كنتي هتروحي معايا
هدي بضيق......انت ليه مش مقدر ان بنتي إللي محرومه منها من سنين يدوب رجعتلي....ليه مش عايز تحس باحساسي
إبراهيم....واحس بحاجه أنا محروم منها إزاي....هو أنا جربت أبقي اب علشان احس
هدي.....إبراهيم....انت متغير معايا أوي....انت مكنتش كده
إبراهيم..... إحنا هنخلف ولا لأ يا هدي
هدي..... اكيد هنخلف بس الصبر..اديني وقتي
إبراهيم......بعد السنين دي كلها مأخدتيش وقتك
هدي.....لأ مخدتش وقتي....لما نفسك في الخلفه كده ليه مخلفتش من مراتك الأولي
إبراهيم...... كانت حامل مره...والحمل نزل...وبعدين محصلش نصيب ....معني إني مخلفتش في الجوازه الأولي....إنك تمنعي نفسك تخلفي انتي التانيه
هدي.....بص يا ابراهيم....أكسب قضيه حضانه بنتي...وبعدين نتكلم
إبراهيم بإبتسامه سخريه.....استني لما تكسبي القضيه....وكمان بعدين نتكلم....لأ شكرا على تعبك
هدي بنفاذ صبر....هو في ايه يا ابراهيم....انت بقيت مش طبيعي ومعاملتك ليا اتغيرت....هو ده الحب إللي بتكلمني عنه
إبراهيم.....والمفروض ان الحب ده يكون من نحيتي أنا بس.....المفروض إنك متبذليش مجهود خالص علشان حياتنا تمشي....أنا اقدم في تنازلات وانتي لأ
.................. .................. ......... .....
في منزل والدة عصام
كان عصام يتحدث علي الهاتف
عصام بإبتسامه.....ايوه يا رقيه....شوفتي البنات اللي هنشغلهم في المصنع
رقيه......أيوه شوفتهم...وكله تمام...المصنع يخلص بس... والمكن والبنات موجودين
عصام.....الناس شغاله بإيدها وسنانها علشان نخلص في أقرب وقت....وأنا نفسي نخلص بسرعه علشان اشوفك على طول ...وتبقي قدام عيني طول الوقت
رقيه.....بقولك ايه....احترم نفسك معايا....أنا مش بتاعة الكلام
عصام.....كنت عايز اشوفك ما تيجي اعزمك علي العشا
رقيه.....بقولك يا استاذ عصام...إني واحده محترمه...مش بتاعة خروج مع رجاله
عصام.....من ساعة ما شوفتك وانتي عارفه اني حبيتك وحاسس برضه بإعجاب من نحيتك
رقيه....أنا هجبهالك علي بلاطه يا أستاذ عصام....أنا حتي لو في إعجاب من نحيتي....استحاله أخرج معاك ولا اتكلم معاك غير في حدود الشغل.....أنا استحاله أخون ثقة أهلي
عصام بإعجاب.....مين قالك إنك هتخوني ثقة أهلك...هو الحب بقي خيانة ثقه
رقيه....إحنا الحب عندنا مش بييجي غير لما يكون في حاجه رسمي غير كده لأ
عصام...... يعني لو اتقدمت رسمي.....هتوافقي
رقيه.....إحنا البنات عندنا ملهاش رأي....الرأي رأي بابا
عصام.....لو بابا رفض علشان أنا متجوز
رقيه بمكر......لو جيت لبابا وانت مش متجوز...أو حتى مطلق..بابا ممكن ميرفضش
عصام.....يعني عايزانى أطلق مراتي
رقيه......أنا مليش دعوه تطلق ولا لا... أنا بقولك ممكن بابا يوافق امتي
وياريت مترنش عليا تاني غير لما المصنع يخلص ونبدأ شغل
انت عارف اني من عيله محافظة واستحاله تقبل بكده
مع السلامة
أغلق عصام الهاتف...وهو مبتسم...وقال في نفسه
هي دي البنات المحترمه.....مش إللي راحت تتجوز من ورا اهلها
.... ............... . . .......... ....... ......... .
في منزل والد هدي
إبراهيم بغضب......أنا صبرت كتير أوي ومن حقي أخلف....أنا عديت التلاتين....هخلف أمتي يعني
والد هدي.......أنا بنتي غلطانه....وأنا هتكلم معاها في الموضوع ده....بس انت مدايقش نفسك
انت صابر بقالك كتير وده حقك
إبراهيم..... دي بتقولي لما أكسب القضيه..وبعدين يبقي نتكلم....يعني مش في دماغها خالص ....ولا فارق معاها زعلي خالص
والد هدي.....اهدي انت بس وأنا هكلمها....إزاي مش فارق معاها زعلك....اكيد فارق معاها...انتو عشرة يوم ولا اتنين...انتو عشرت سنين
إبراهيم.....مش باين يا عمي انه فارق خالص.....أنا حاسس والله إني مصدوم فيها ....كإن إللي فارق معاها هو القضيه وبس
في الاول كنت شايف نفسيتها تعبانه وكل ما اقولها طيب نخلف يمكن ..الطفل الجديد يحسن نفسيتك....تقولي مقدرش أخلف تاني دلوقتي
حاولت معاها في موضوع الشغل قولت يمكن لما نفسيتها تتعدل تفكر في العيال.....مفكرتش.....دلوقتي بنتها رجعت...إيه المانع تاني
والد هدي.....صدقني هكلمها ...وأنا استحاله أوافق على الوضع ده....ده حقك
إبراهيم.....طيب استأذن أنا يا عمي
خرج ابراهيم...وامسك والد هدي الهاتف وقام بمهاتفه هدي
أثناء سير إبراهيم في الطريق ظل يتذكر الرسائل التي تأتي إليه يوميا...وتذكر أول رسالة...وكان لا يعرف من يرسلها ولا يعرف معاناها
أول رساله..... كانت واخداك مسكن
ظل إبراهيم يفكر في معني الرساله ولكن لم يصل لشيء
وفي اليوم التاني اتته رساله أخري فهم منها معني الأولي
هي مش عايزه تخلف منك ليه
رساله أخري.....معقول مش عارفه تنسي جوزها الأول
رساله أخري.....لو حبتك استحاله كانت ترفض تخلف منك
رساله أخري....بكره علشان ترجع بنتها...تطلب منك الطلاق علشان ترجع للي مش عارفه تنساه...
ظل إبراهيم يفكر في هذه الرسائل التي تأتي اليه يوميا
كان في البدايه يكذبها...ويعلم ان طليقها هو الذي يفعل ذلك ..حتي يعكر حياتها
ولكن توصل في النهايه ان هذا الكلام وان كان القصد منه إثارة المشاكل...إلا أنه كلام صحيح
دخل بيته وهو بداخله يغلي من الغضب ولكن يرسم الهدوء على وجهه
هدي بصوت عالي.....انت شايف إني عيله صغيره رايح تشتكيني لأبويا
إبراهيم......انتي إزاي صوتك يعلي كده
هدي..... ماهو بسبب عمايلك.... رايح تشتكيني لأبويا علشان يرن عليا يهزقني ....هي الخلفه بالعافيه
إبراهيم. بصدمه......بالعافيه
هدي.. بنفس الصوت العالى.......يعني معني إللي انت بتعمله ده إيه....أنا مش عايزه عيال دلوقتي....وانت رايح تقول لأبويا علشان يرن عليا ويهزقني علشان أخلف......أنا مش عايزه عيال دلوقتي أنا حره
إبراهيم بهدوء.....هدي......انتي طالق....ارجع البيت الاقيكي مشيتي
رحلة عذاب...... الثاني عشر
كانت هدي تجلس بذهول في منزل والدها
والدها.....مالك يا هدي...وجوزك مش جاي معاكي ليه
هدي بدموع وبخوف من والدها.....ابراهيم طلقني يا بابا
والدها بصدمه....ايه.... طلقك....ايه اللي حصل
هدي بدموع..... اخد موضوع الخلفه حجه علشان يطلقني
والدها.....بعد السنين دي كلها وتقولي اخده حجه
هدي...... اشمعني ما افتكرش موضوع الخلفه غير لما بنتي رجعت
والدها....كتر خيره انه صبر عليكي ده كله...واستني لما بنتك رجعت
هدي......ليه ميسبنيش براحتي....واحده مش عايزه عيال...
والدها.....هو فعلآ غلطان واحد غيره كان اتجوز عليكي من زمان...بس مشكلته انه صبر عليكي
.............. ............ ............
في منزل والدة ابراهيم
اخته بصدمه...طلقتها طب ليه يا ابني
ابراهيم.....اكتشفت انه لازم يحصل كده من زمان....من أول مره طلبت منها نجيب أطفال ورفضت
اخته....كنت صبرت عليها كمان شويه..انت عارف انها نفسيتها تعبانه ....راعي حالتها النفسيه
ابراهيم.....هي هتفضل نفسيتها تعبانه طول حياتها....وأنا مين يراعي حالتي النفسيه....أنا واحد يتيم اب وام. ومليش اخ...مليش غيرك في الدنيا....ليه ميكونش عندي عزوه...هفضل طول حياتي وحيد كده
اخته بدموع....أنا خايفه عليك علشان عارفه إنك بتحبها أوي
ابراهيم. بتأثر.......يغور الحب........ أنا استاهل إني اتحب يا ميرفت ......بس هي محبتنيش أنا عملت معاها كل خير...ليه أصبر اكتر من كده .....هي انانيه وبتحب نفسها بزياده
المهم أنا قررت اتجوز....شوفيلي عروسه
ميرفت بخضه.....اصبر شويه يا ابراهيم....انت اكيد هترجعها...وهي ابوها هيضغط عليها وهيخليها تحمل
ابراهيم.....وأنا مقبلش انها تخلف مني علشان ابوها ضغط عليها
شوفيلي واحده تكون بنت ناس يا ميرفت..وعايزه تعيش
ميرفت.....أنا من رأيي تصبر شويه...لازم تصبر لحد لما تهدي علشان متاخدش قرار وقت غضب.....ترجع تندم عليه
ابراهيم.....أنا هصبر بس مش كتير
................ ............... ............صلو على محمد
بعد مرور شهر
في منزل والدة عصام
عصام.....المصنع يا ماما بعد ما اتشطب بقي تحفه..هنبدأ نجيب المكن ونظبط الدنيا
والدة عصام.....الحمد لله....كده ورقنا كله تمام ومظبطه
عصام بفرحه... طبعا يا أمي....المهم البنات إللي هتجبيهم يشتغلو علي المكن يكونو صناعيه كويسين
امه.....لا متقلقش....أنا جايبه شويه بنات....ايدهم تتلف في حرير
عصام.....المهم....فين مني وجودي
والدته......مني نزلت تشتري شويه طلبات للبيت ..ومعاها جودي
عصام......طيب كويس كنت عايزك في موضوع كده...
والدته........خير
عصام.....ماما انا نفسي في حاجه أوي ولو مختهاش ممكن اموت
والدته بخضه.....بعد الشر عليك...عايز ايه
عصام.....ماما انا بحب وعايز اتجوز...بحبها أوي يا ماما لو متجوزتهاش.هموت
والدته......انت عارف مراتك نزلت تجيب ايه.....نزلت تجيب ترتايه علشان تحتفل انت وهي بحملها
عصام بعصبيه.....حمل.....حمل ايه...أنا مش عايز منها عيال
والدته.. أوعي تكسر فرحتها....حرام عليك....وبعدين مش دي مني اللي قعدت تحبها سنين...وكنت هتموت عليها
عصام بنرفزه....كنت بقي دلوقتي مش عايزها ....ولازم أطلقها
والدته......طلاق ايه يا ابني متقولش كده....دي حامل في ابنك وأنا استحاله أوافق إنك تطلقها وهي حامل....مش كل واحده تجيب منها عيل وتسيبها
عصام في نفسه.....ايه المصيبه اللي جاتلك دي يا عصام...لازم تتصرف
رن جرس الباب وكانت مني وجودي
مني بفرحه....عصام انت جيت امتي.
قام عصام وقال.....انتي ازاي تخرجي من غير إذني
مني.....أنا استأذنت من ماما
عصام......ماما....كمان مش عامله ليا اي اعتبار وامسكها من شعرها...وكمان بتردي عليا..وظل يضربها في بطنها ووالدته لا تستطيع أن تبعده عنها...ولم يتركها حتي رأي الدم بعينيه
رحلة عذاب.......الثالث عشر
داخل المشفي.. كانت ترقد مني علي السرير يبكي بحرقه
والدة عصام....كفايه عياط يا بنتي بكره ربنا يرزقك وتجيبي غيره
مني....طيب ليه عمل كده
دخل عصام وهو يتصنع الجهل....انتي إزاي متعرفنيش إنك حامل
إزاي اتفاجأ كده من الدكتور
نظرت امه له بغيظ ونظرت في الاتجاه الآخر
مني.....كنت هقولك انهارده....أنا أصلا لسه عارفه ..وزادت في البكاء....ملحقتش افرح بيه
عصام.....بكره نجيب غيره...انتي عارفه طبعا اني مكانش قصدي ومكنتش أعرف أصلا إنك حامل
مني..... طيب ليه ضربتني...أنا أصلا معملتش حاجة
عصام.... معلهش كان عندي شويه مشاكل في المصنع...وجت فيكي...حقك عليا
ام عصام بغيظ.....بقولك ايه اخرج هاتلها حاجه تاكلها ولا روح شوف الدكتور
دخل الدكتور وقال....عامله ايه دلوقتي
مني....بخير الحمد لله
الدكتور....أنا لازم ابلغ علشان أثر الاعتداء باين عليكي
نظر عصام إلي مني برجاء....فقالت مني
مفيش اي اعتداء يا دكتور...أنا وقعت من السلم
الدكتور..... هو أنا كدكتور مش هعرف أفرق بين الاعتداء بالضرب وبين وقعة السلم
مني......أنا المريضه يا دكتور وبقولك مفيش اي اعتداء ولو حد جه سألني هقول نفس الكلام
الدكتور بغضب....براحتك....علي العموم تقدري تخرجي انهارده
................ ...... .............. .............
في منزل والد هدي
كان عماد وهاني يجلسون مع هدي
عماد..... هو أنتي ليه عناديه كده انتي غلطانه يا هدي ولازم ترني على ابراهيم تعتذري...وترجعي بيتك
هدي....أنا غلطانه ليه....أنا قولتله نأخر الخلفه شويه
هاني.....بس انتي اخرتيها كتير....أنا آهه لسه خاطب....ولو هي قالتلي نأخر الخلفه مش هوافق ومش هكمل الجوازه أصلا
هدي..... حالتك انت غير حالتي أنا....أنا عندي قضيه وعندي بنت بقالها سنين بعيد عني
عماد...... البنت ورجعت وبتشوفيها بإستمرار والقضية وانتي ضامنه إنك هتكسبيها....يبقي نعند ليه
هدي....أنا مش بعاند علي فكره...ده حقي....إني أخلف لما اكون مأهله نفسي ده
هاني..... انتي مش عناديه وبس....انتي كمان انانيه....ده هيكون حقك لما تكون حاجه تخصك لوحدك
هدي..... انت شايفني وحشه كده يا هاني...شايفني عنديه وانانيه كمان....ليه يعني أنا عملت ايه
هاني..... مش عارفه عملتي ايه....وقفتي لابوكي واخوكي لما عصام اتقدم وهما رفضو قولتي لأ أنا موافقه
ابوكي قالك سألنا والناس قالو اهله كويسين بس هو لأ
قولتي طالما اهله كويسين يبقي هو كمان كويس
ابوكي كان مصمم على الرفض بس انتي وقفتيله..وقولتيله لأ أنا مستريحه..وأنا موافقه...وأنا إللي هعيش معاه ....بصيتي ساعتها لشكله الحلو...ومهمكيش كلام ابوكي واخوكي الكبير
ابوكي قال طالما هي موافقه براحتها .. وحصل إللي حصل....ومحدش لام عليكي ولا قالك ده إختيارك
وبعدين لما جه ابراهيم...كان راجل ونعم الادب والاحترام....شالك في عينه...سنين وانتي عايشه معاه مفيش شكوي واحده منه.. ماشي معاكي خطوه بخطوه في موضوع القضيه ومستحمل المشاكل علشان خاطرك .....والراجل طالب بحقه....انه يكون عنده اولاد...ليه ترفضي يعني
هدي بدموع..... لو بيحبني كان صبر عليا
عماد بنرفزه.... ولو انتي بتحبيه كنتي عملتيله الحاجه الوحيده إللي طالبها منك ....انتي عارفه مشكلتك إيه..... إنك كنتي واخده ابراهيم علشان تنسي بيه عصام...وده كان اكبر غلط عملتيه...وشكلك كده لسه بتحبي طليقك
هدي بدموع وانهيار.....انتو ليه شايفني وحشه كده.....أنا استحاله اكون لسه بحبه....ده دمر حياتي وسرق بنتي....
هاني......دموعك وعياطك دول كانو بيفرقو معانا زمان لما كنتي مظلومه فعلا...انما دلوقتي أنتي إللي ظالمه....ولو خسرتي ابراهيم اعرفي إنك خسرتي كتير أوي...وهتندمي
.................. ................. ..............
في منزل والدة ابراهيم
ابراهيم......إيه لسه مشوفتليش عروسه
أخته..... يا إبني أصبر شويه لما الموضوع يهدي...يمكن ترجع مراتك تاني
ابراهيم بإبتسامه سخرية....إسمها طليقتي مش مراتي....وأنا خلاص مش هرجعها تاني حتي لو هي طلبت ده
اخته..... طيب ايه اللي حصل لده كله....انت اتقلبت عليها ١٨٠ درجه ليه كده
ابراهيم..... علشان اكتشفت انها لسه بتحب جوزها الأول
اخته بخضه.... متقولش كده يا ابراهيم.. مراتك بتحبك...ده إللي يشوفكم كان بيحسدكم علي السعادة إللي انتو فيها
ابراهيم..... انتي ليه مصممه انها مراتي....دي خلاص بقت طليقتي....والسعادة إللي كل الناس كانت بتشوفها كنت أنا إللي بظهرها....وأنا دايما إللي كنت بسعي إني أعمل كل حاجه حلوه... بس مش لاقي مقابل لده
أخته..... طالما انت مقتنع بكده....خلاص دي حياتك وانت أدري بمصلحتك.....وانت إللي تختار إللي هتتجوزها بنفسك
ابراهيم. بتفكير. .... في واحده في الشغل بس لسه مسبقش ليها الجواز...بس محترمه جدا جدا....تفتكري ممكن توافق علي واحد مطلق مرتين
اخته..... طيب فرق السن بينكم كبير
ابراهيم..... بتاع خمس ست سنين كده
اخته.... فرق السن مش كبير بس انت متأكد من اخلاقها يعني كويس
ابراهيم....... دي محترمه جدا جدا عينها مش بتترفع من الأرض
أخته....خلاص علي بركة الله....خد رقم أبوها وروحله واتقدم لها....وبعدين هي اسمها ايه
ابراهيم...اسمها زينب
.................. ................ ..............
في منزل والدة عصام
عصام..... الحمد لله على السلامة
مني...الله يسلمك....فين جودي
دخلت جودي بسرعه تحتضنها وهي تبكي
جودي ببكاء..... عملتي ايه يا ماما
مني.....الحمد لله يا حبيبتي...متعيطيش أنا كويسه اهه
جودي.....أنا خوفت عليكي أوي
مني....متخافيش يا قلبي أنا بخير
عصام......طيب أنا خارج دلوقتي علشان في حاجه مهمه لازم أعملها....وماما بتعملك الأكل...وأنا مش هتأخر....عايزه حاجه
مني....لأ شكرآ يا عصام
خرج عصام وقالت هدي لنفسها.....لو تفضل حنين عليا كده يا عصام....يارب اهديه وخليه يرجع يحبني زي الاول
خرج عصام من المنزل وامسك الهاتف وطلب رقم رقيه
رقيه.....يا استاذ عصام قولت لحضرتك مترنش عليا بابا لو عرف إنك بتكلمني في التليفون ممكن يقتلني
عصام.... طيب متقوليش لابوك إني بكلمك
رقيه......أنا استحاله أعمل حاجه من ورا أهلي..أو حتي اقدر أكسر كلمه واحده لبابا أو ماما
عصام بإعجاب شديد.....بس أنا كنت عايز أكلمك في حاجه كده مدايقاني
رقيه......لأ أنا آسفه مقدرش اتكلم معاك اكتر من كده ...مع السلامة
اغلقت رقيه الهاتف وابتسمت ابتسامه عريضه
ام رقيه...... كنتي بتكلمي مين يا بت
رقيه.... ده عصام صاحب المصنع إللي هشتغل فيه إن شاء الله
أمها...... ومالك راسمه عليه دور الأدب ليه كده
رقيه...... أصل عصام ده بعد المعلومات اللي جمعتها عنه عرفت انه عنده ازمة ثقة في الستات عموما فقولت ادخله من الحته دي
أمها..... ازمه إزاي يعني
رقيه...... اقولك...... اصل بعد ما اتكلمت معاه شويه عرفت ان مراته الأولي وقفت قدام اهلها علشان تتجوزه....وهي حكتله الموضوع ده على أساس تعرفه انها اتمسكت بيه....بس إللي حصل انه زعل لما عرف انها عملت كده ....ومراته التانيه راحت اتجوزته من ورا أهلها وسافرت معاه بره مصر...فهو الموضوع ده كمان دايقه....فهو بقي حاسس ان ده قلة احترام في البنت
فأنا دخلتله من الحته دي.....إني البنت المحترمه إللي استحاله ترفض كلمه لأهلها ...ولا حتي تقدر تعمل حاجه من وراهم
أمها.....يعني هتوافقي علي واحد كان متجوز اتنين
رقيه.....دا لسه في واحده علي ذمته بس انا استحاله أوافق غير لما يطلقها
امها.....وإيه إللي يجبرك علي واحد اتجوز مرتين
رقيه.....اولا..لأنه شكليا حلو جدا جدا.....ثانيا..معاه فلوس كتير وبيفتح مصنع والدنيا هتكون منغنغه معانا....ثالثا. أنا عرفت مداخله ومخارجه فهعرف أتعامل معاه كويس أوي....واخد منه إللي أنا عوزاه
رحلة عذاب......الرابع عشر
في منزل والدة عصام كان يعم الهدوء فبعد مرور اسبوع علي وقعه مني بدأت تسترد صحتها قليلا...كانت تجلس بجانب جودي تحفظها سورة جديده من المصحف وأم عصام في المطبخ تعد الطعام..رن جرس الباب وفتحت أم عصام الباب دخل عصام وهو ينظر أرضا وقال مني
مني بإبتسامه.....نعم يا عصام
عصام بسرعه دون أن ينظر لها.قال. ...انتي طالق بالتلاته وورقتك هتوصلك في أقرب وقت.....وخرج مسرعا من المنزل قبل أن يستوعب احدا ما قال وصرخت والدة عصام أما مني فأصابها الذهول ووقعت فجأه علي الارض مغشيا عليها
خرج عصام يسير في الطريق وهو يشعر بالضيق وتذكر عندما كان في بيت والد رقيه
والد رقيه......أنا استحاله بنتي تخش على دره
عصام.....هي هتكون في بيت والدتي أما رقيه هتكون في شقه خاصه بيها
والد رقيه......يا ابني إيه إللي يجبرني إني اجوز بنتي لواحد متجوز مرتين اصلا....أنا بنتي بنت بنوت لسه..... تقعد تتشرط وهيجلها احسن رجاله.....أنا بنتي مش بيتقدم لها عرسان قليله...علشان اديها لواحد متجوز ويبقي ليها دره
عصام...... وانتي يا رقيه إيه رأيك في الكلام
رقيه...... أنا لا ليا رأي ولا ليا إي حاجه....أنا مقدرش اقول كلمه غير إللي بابا قالها... هو ادري بمصلحتي
عصام..... يعني المشكله اني متجوز
والد رقيه.....ايوه بنتي متدخلش علي دره.... لما تساوي امورك يبقي تعالي.....دي لو فضلت من جواز اصلا
عصام بخضه.....لأ يا عمي ان شاء الله هساوي أموري واجي اتقدمها علي طول
والد رقيه.....إللي فيه الخير يقدمه ربنا
... ........... . ........... صلو على الحبيب
في منزل جديد تظهر فتاه في غايه التوتر
والدتها..... هو أنتي كل عريس يتقدملك تتوتري كده يا زينب
زينب..... غصب عني والله....بس خالي مقالكيش مين العريس ده
والدتها......قال واحد معرفوش بس جاب رقم خالك وكلمه في الموضوع وخالك قال ييجي ويشوفو بعض
الجرس بيرن لما افتح وانتي جهزي نفسك
دخل ابراهيم ومعه خال زينب... وقامت والدة زينب بمناداتها
خرجت زينب وهي تنظر أرضا ولم ترفع نظرها اليه
خرج خال زينب ووالدتها وتركو زينب بمفردها
ابراهيم بإبتسامه.....إزيك يا أستاذه زينب
زينب وهي تميز الصوت جيدا رفعت وجهها بسرعه....استاذ ابراهيم
ابراهيم...... أيوه أنا
زينب...... انت العريس
ابراهيم.....أيوه
زينب..... بس حضرتك علي حد علمي متجوز
ابراهيم.....لأ أنا مطلق بقالي أكتر من شهر ...
زينب..... ممكن أعرف سبب الطلاق
ابراهيم...... لو حصل بينا نصيب اكيد هحكيلك كل حاجه....بس علشان اكون واضح معاكي أنا مطلق مرتين مش مره واحده
زينب...... بس دي حاجه تخض....وأكيد لازم أعرف سبب الطلاق..علشان مبقاش في نفس الموقف ....وعلشان احط كل حاجه قدام عيني وأنا بفكر
ابراهيم.... الجوازه الاولي كانت عن حب....كنت بحبها من صغري..بس لما اتجوزنا والحب بدأت زهوته تقل....أكتشفت اني شخصيه وهي شخصيه تانيه تماما...معرفناش خالص نتفق مع بعض....بس هي كانت محترمه جدا علي فكره....بس هي كانت عايشه في دنيا وأنا في دنيا تانيه خالص ...فمعرفناش نكمل مع بعض.....والجوازه التانيه كانت كل حاجه ماشيه تمام...بس هي مش عايزه تخلف...وأنا نفسي في أطفال وقعدنا سنين مع بعض بس في الآخر مقدرتش شوقي للأطفال غلب عليا وحصل الانفصال
ابراهيم......اسألي عليا كويس قبل ما توافقي
زينب..... أنا عارفه اخلاق حضرتك كويس جدا....الشركه كلها بتحلف بأمانتك وادبك واخلاقك.... بس برضه هصلي استخاره وأرد علي حضرتك
.................. ................... اللهم صلي على سيدنا محمد
في منزل والد مني
كانت مني تجلس علي السرير تبكي بإنهيار
والدتها.بإنفعال شديد .....بعد ما فضحتينا وحطيتي راسنا في التراب طلقك ....طبعا ما هو شايفك رخيصه
عملتي ايه خلتيه يطلقك
مني وهي تقطع في الكلام من البكاء....والله ما عملت حاجه...ده ضربني ونزل الحمل اللي في بطني ومفتحتش بقي بكلمه
والدتها...... وانتي تقدري تفتحي بوقك وانتي عينك مكسوره قدامه...ما انتي رخصتي نفسك ورخصتي عيلتك لازم يديكي باللي في رجله
مني.....يا ماما ارحميني
والدتها..... ارحمك وانتي مرحمتناش ليه
مني.بإنهيار...... أنا مش مصدقه انه عمل فيا كده....طيب أنا عملت ايه....دا انا كنت بتمني رضاه..... كنت قايده صوابعي العشره شمع ليه ولامه وبنته
والدتها .....في ناس ميملاش عينها غير التراب....بس أرجع واقول انتي السبب...انتي إللي عملتي في نفسك وفينا كده ....شوفي مين ممكن يتجوزك بعد إللي عملتيه
مني بإنهيار...... ماما انا مقدرش أعيش من غيره....ماما أنا هموت لو مرجعليش
والدتها.....بس بقي غلي نفسك شويه كفايه رخص بقي
خرجت والدتها وامسكت مني الهاتف وطلبت عصام
عصام.....أيوه يا مني
مني ببكاءشديد......عصام بالله عليك عرفني أنا عملت ايه....لو دايقتك في حاجه قولي....لو مدايق علشان حملت خلاص مش هحمل تاني أبدا...بس متسبنيش....أنا مقدرش أعيش من غيرك يا عصام
عصام..... اهدي يا مني انتي تعبانه
مني..... أنا اغور في داهيه.....المهم ترجعني....متشمتش حد فيا يا عصام...بالله عليك رجعني
عصام بتأثر لحال مني..... أنا آسف يا مني...بس أنا هتجوز...والعروسه رافضه يكون ليها ضره ..وأغلق الهاتف
ظلت مني تصرخ صراخ شديد....صراخ يخرج من القلب ويقطع الروح....صراخ تتمني أن ينتهي بموتها.....ولم تشعر بأي شيء غير وهي في المشفي وحولها الدكتور وعائلتها وامها تبكي بشده
....................... .................... .............
بعد مرور اسبوع
كانت جودي تجلس مع هدي
جودي...... هو فين عمو إبراهيم..أنا كنت بحب اشوفه والعب معاه
هدي..... أنا وعمو ابراهيم اتطلقنا
جودي بخضه....انتو كمان....يعني مش هعرف اشوفه تاني ومش هعرف اشوف ماما مني تاني
هدي..... مش هتشوفي ماما مني ليه
جودي.....علشان بابا برضه طلقها
هدي بإنتباه..... إيه طلقها....انتي متأكده
جودي.....أيوه طلقها وراح خطب واحده تانيه اسمها طنط رقيه وتيته راحت معاه وأنا روحت معاه
هدي.....ايه.....وكمان خطب
................. ............... صلو على الحبيب
في منزل والدة ابراهيم
ابراهيم بفرحه......زينب وافقت
اخته..... إيه ده بجد ألف مبروك....انت كده هترجع شقتك تاني
ابراهيم...... لا شقتي ايه...أنا هبيعها بكل حاجه فيها هبيعها وابيع ذكرياتها....واشتري مكان جديد علشان أبدأ كل حاجه من أول وجديد
رحلة عذاب....... الخامس عشر
كانت هدي في غرفتها تدور حول نفسها
وتبكي
يعني إيه ابراهيم خطب يعني كده خلاص حكايتنا انتهت
لأ لأ اكيد في حاجه غلط...... بقي ابراهيم إللي كان بيتمني رضايا يبيعني بسهوله كده...معقوله مكانش بيحبني .....وبدأت تزيد في البكاء.....ليه كده يا ابراهيم.... دا انا كنت فكراك العوض. ليه كده... أنا عارفه إني غلطت...بس كنت أعمل اي حاجه إلا كده
أنا كنت قاعده ومطمنه وعارفه إنك هتيجي في أي وقت ترجعني..عمري ما كنت اتخيل إنك تروح تتجوز
دق الباب ودخل والدها عليها
والدها....إيه يا هدي أخيرا عيطتي....كان لازم اعرفك انه خطب...بدل ما تعرفي من حد غريب
هدي وهي تمسح دموعها..... هو حر يا بابا يخطب ولا ميخطبش إحنا خلاص اصلا إحنا مطلقين
والدها..... لسه بتعاندي ولسه بتكابري..... يا بنتي فوقي بقي...هتخسري إيه أكتر من إللي خسرتيه
هدي بدموع..... انتو السبب في كل إللي وصلتله....دايما أي حاجه بقولها بتنفذوها حتي لو غلط....انت إللي علمتني الانانيه يا بابا....لما كل ما اعوز حاجه اخدها ...عمرك ما قولتلي علي حاجه لأ
والدها..... كنت بعوضك....علشان شايفك يتيمه من ساعة ما اتولدتي..... كنت مش عايز احسسك إنك ناقصك حاجه
هدي..... كان في حاجات لازم تقولي لأ وتكسر دماغي فيها..... لما عرفت عن عصام انه مش كويس كان لازم ترفض الجوازه.....حتي لو أنا هموت.....لما لاقيتني مش عايزه أخلف من ابراهيم كان لازم تجبرني من بداية جوازي إني أخلف.. أنا كنت عيله ومش عارفه مصلحتي....كان لازم توقفني وتفوقني....بدل ما الدنيا هي إللي تفوقني
والدها...... ونسيتي تقولي إني ربيتك علي إنك متطلعيش نفسك غلطانه أبدا....علشان دايما بدافعلك حتي وانتي غلطانه
ساعة عصام انتي مكونتيش صغيره....وقولتلك صلي استخاره ١٠٠ مره وانتي كنتي مصممه ...قولت اسيبك تجربي مش لازم احرمك من حاجه انتي عايزاها........سكت قليلا وقال..........بس انتي عندك حق ...أنا إللي أخطأت في تربيتك من الأول...سامحيني يا بنتي
.................. ............... صلو على الحبيب
في منزل مني
كانت ترقد علي السرير...وهي تنظر إلى السقف ولا يوجد علي وجهها أي تعبير....دخلت عليها والدتها
والدتها.... خلاص بقي يا مني غار في داهيه عصام ده...انتي هتموتي نفسك عليه
كانت مني صامته تماما ولا ترد
والدتها...... طيب بقولك ايه إيه رأيك تنزلي تشتغلي هتلاقي نفسك نفسيتك اتغيرت شويه
مني لا ترد أيضا
والدتها..... يا بنتي فوقي لنفسك بقي ..قوليلي علي حاجه حلوه شوفتيها منه تخليكي تعملي في نفسك كده
مني بصوت واطي.....بحبه ...ومن إحنا صغيرين وأنا بحبه
والدتها...... إللي انتي فيه ده مش حب.....ده تعلق مرضى علشان أنا وابوكي منفصلين من صغرنا ومسدقتي لقيتي حد يتكلم معاك كلمه حلوه ... اترميتي عليه...انتي بس لو انتبهي لنفسك هتعرفي إنك ضيعتي سنين من عمرك من غير فايده..... كان زمانك متجوزه قدام الناس كلها ومعاكي بدل العيل اتنين وتلاته
مني...... مين قالك اني عايزه أخلف
والدتها...... مفيش ست في الدنيا مش نفسها في عيال
مني..... لأ في...أنا..... أخلف ليه ها....علشان الطفل يكبر يلاقي ابوه وامه مطلقين...ويعيش عند ابوه اسبوع يلاقي شده وحزم وزعيق وضرب...ويروح لأمه اسبوع... تكون طول النهار في الشغل وترجع مش قادره عايزه تاكل وتنام.....وتنسي ان في طفله مستنياها طول النهار...وفي الاخر اطلع طفل كاره نفسه وملوش شخصيه...وسهل أي حد يخدعه...وحاسس انه عاله علي كل الناس
أنا مش عايزه أخلف طفل يعيش إللي أمه عاشته
.................... ................ صلو على سيدنا محمد
في منزل والدة عصام
عصام...... إيه يا ماما مش هتيجي تشوفي الشقه دي رقيه فرشاها بذوق عالي أوي
والدته...... أنا لا عايز اشوف الشقه ولا عايز اشوفك انت أصلا... هو انت إزاي كده يا ابني....انت ظلمت مني أوي
عصام...... صدقيني يا ماما أنا كنت مش مستريح مع مني خالص....مكنتش حاسس بالامان نحيتها...دي واحده سابت اهلها وهربت وكمان اتجوزت من وراهم إزاي يكون في امان من ناحيتها
والدته..... ليه متقولش انها حبتك زياده عن اللزوم
عصام..... ما رقيه بتحبني زياده عن اللزوم....عمرها ما عملت حاجه من ورا اهلها....ودايما بتحترمهم....أي واحده بتعمل حاجه من ورا اهلها....دي واحده مش متربيه....وعمر ما في ولد بيآمن لواحده بتخون ثقه أهلها...حتي لو اتجوزها بيفضل شاكك فيها...إحنا الرجاله بقي ودماغنا كده....سيبك بقي من مني
أنا فرحي آخر الشهر وعايز اشوفك فرحانه كده ومبسوطه
والدته.... واختك يا عصام مش عايز تشوفها فرحانه ومبسوطه...ليه مقولتلهاش علي الفرح
عصام...... أختي بتحب تقعد تديني درس في الأخلاق كل ما تشوفني....لو انتي عايزه تقوليها قولي بس قوليلها ملهاش دعوه بيا خالص...مش عايز اسمع نصايح من حد
وكمان عندي ليكي خبر حلو أنا هرجع جودي لأمها
والدته.....ليه كده...ما انت كنت ماسك فيها بإيدك وسنانك
عصام..... بصراحه ابو رقيه مش راضي يخلي البنت معانا
والدته..... هي مش هتكون معاكم هي هتكون معايا أنا أهي بتونسني بدل ما أنا قاعد لوحدي
عصام...... معلهش بقي يا ماما بقولك رافض...قالي إنك لازم هترجعيها في أي وقت...وحتي لو فضللت معاكي بعد العمر الطويل ليكي هترجع ....فقالي لازم ترجع لأمها.....وكمان أنا هخلص من القضيه إللي الهانم رفعاها دي
والدته بزعل..... براحتك...بس العيله اللي دخلتها دي ممشياك علي العجين
.................. ................. صلو على الحبيب
في منزل ابراهيم كان يتحدث علي الهاتف
ابراهيم..... الشقه كده زي الفل واتفرشت احلي فرش....كان لازم تيجي تشوفيها قبل الفرح علشان لو عايزه تعدلي حاجه
زينب بكسوف..... كده كده بكره هاجي واشوفها وابقي اغير فيها براحتي
ابراهيم..... المهم أنا متفق مع المأذون علي بعد المغرب على طول....بكره تكوني مجهزه نفسك قبل كده
زينب...... هو ليه الاستعجال ده....كان المفروض نقعد لما ناخد علي بعض شويه...ونعرف بعض
ابراهيم..... كل ده ومنعرفش بعض بقالنا شهرين مخطوبين اهه
زينب.... طيب سلام بقي علشان في حاجات كتير ورايا لازم أعملها
ابراهيم..... ماشي مع السلامة
رن هاتف ابراهيم برقم غريب
ابراهيم..... السلام عليكم
..... مبروك يا عريس سمعت ان بكره فرحك
ابراهيم..... الله يبارك فيكي يا هدي
هدي...... بالسرعه دي....دا انت ما صدقت بقي
ابراهيم...... كنتي عايزه حاجه يا أستاذه هدي
هدي بدموع....لأ كنت عايزه اباركلك واقولك إنك بعتي بسهوله
ابراهيم...... أنا عمري ما بيعتك فضلت شاريكي لآخر يوم بس انتي اللي مشترتنيش...... كنت مستني منك رنة تليفون بس
وكنت هجيلك جري....بس حتي ده محصلش.. للدرجه دي أنا كنت مستهلش عندك....علي العموم ملوش لازمه الكلام....أنا فرحي بكره..وانت ربنا يعوضك بواحد أحسن مني ١٠٠ مره
رحلة عذاب.........السادس عشر
في منزل والدة ابراهيم
أخته..... قوم بقي يا ابراهيم كل ده نوم هو في عريس ينام ده كله يوم فرحه
ابراهيم بنعاس...... سبيني نايم شويه يا ميرفت
ميرفت..... لأ كفايه نوم....انت عريس ولازم تقوم تشوف وراك إيه
ابراهيم..... حاضر..قايم......
ميرفت..... كلمت بتوع القاعه وظبطت كل حاجه
ابراهيم..... كل حاجه تمام بطلي انتي تقلقي نفسك
ميرفت..... انت ابني مش أخويا مكنتش أقلق عليك هقلق على مين...... يارب يجعلها زوجه صالحه ويفرح قلبك يارب
.................. .................... ....... صلو على الحبيب
عند زينب
أمها.... أللهم بارك عروسه زي القمر يا حبيبتي ..
زينب بدموع..... أنا مش عارفه هسيبك إزاي يا ماما لوحدك
والدتها...... لأ مفيش دموع....أنا انهارده اسعد يوم في حياتي....بنتي قدامي أهي عروسه زي القمر
زينب..... بجد يا ماما فرحانه.... يعني رفضك لإبراهيم في الاول مش مأثر عليك
والدتها.... أنا زي اي أم في الدنيا عايزه لبنتي أحسن عريس في الدنيا....وتكون أول بخته زي ما هو أول بختها..... بس طالما انتي موافقه وصليتي استخاره ولقيتي نفسك مستريحه خلاص...أهم حاجه عندي سعادتك
زينب...... ربنا يباركلي فيكي يا ماما
أصحاب العروسه.....العريس جه العريس جه
زينب بتوتر.. ماما أنا خايفه
والدتها بإبتسامه... متخافيش يا حبيبتي.. لازم تبقي فرحانه..انتي انهارده ليلتك
أخذ ابراهيم زينب وذهبو علي القاعه.....كان فرح اسلامي هادي وجميل
المأذون...... بارك الله لكما وبارك عليكما وجمع بينكما في خير
ميرفت.... الف مبروك يا حبيبي ربنا يسعدك يارب
ابراهيم.... الله يبارك فيك يا حبيبتي
كل من الفرح بارك للعريس والعروسه وبعدها جلس ابراهيم وزينب
ابراهيم..... ألف مبروك
زينب....الله يبارك فيك
ابراهيم..... أول مره امسك ايدك
زينب....طالما كتبنا الكتاب خلاص
بعدما جلسو قليلا.. زينب.... أنا عايزه اقوم أقف مع صحابي شويه
ابراهيم بإبتسامه.... ماشي قومي....وأنا هقف مع الشباب أصحابي شويه... مش عايز حد يلمح طرف فستانك
زينب..... علي فكره انت عملت فاصل في القاعه.. وفصلت البنات عن الرجاله... اكيد محدش هيشوفني
ابراهيم.. دلوقتي خالك وولاد خالك وعمك وولاد عمك ييجو يباركولك ....اوعي تقفي ترقصي قدام حد من ولادهم
زينب بإبتسامه.... حاضر.. أي أوامر تانيه
ابراهيم بإبتسامه... لأ كفايه كده لو افتكرت حاجه تاني هاجي اقولهالك ...
زينب بضحك بصوت عالي..... كده كتير عليا دا إحنا لسه أول يوم
ابراهيم.... لأ لازم تتعودي على كده....أنا معترف إني غيور جدا...واتمني إنك تتفهمي النقطه دي
زينب بنفس الابتسامة المرسومه على وجهها....وأنا كنت بتمني ان زوجي يكون غيور عليا
كانت هدي تقف في زاويه من بعيد وتنظر إلي ابراهيم....وتري كل هذه الابتسامات ...ودموعها تنزل بغزاره... فخرجت من القاعه مسرعه
كانت زينب تقف وسط أصحابها البنات وهم يدقون على الدف وهي تتمايل بينهم بسعاده وفرح...وحولها اصدقائها فرحين جدا لها
كان الفرح ملئ بالسعادة وكل من في الفرح سعداء
انتهي الفرح واخذ ابراهيم زينب وذهبو إلي عشهم الجميل
.......... . .......... .............
في منزل هدي..... كنت تجلس علي السرير تبكي بحرقه
هدي.....أنا مكنتش أعرف إني بحبك كده يا ابراهيم...بس أنا إللي غلطانه....أنا إللي مقدرش وجودك معايا
ايوه يا هدي لازم تعترفي بالحقيقه حتي لو بينك وبين نفسك
انتي إللي غلطانه.....انتي كنتي بتحبي عصام أوي رغم إنك مشوفتيش منه حاجات حلوه كتير.....بس هو من ساعة الخطوبه وهو مغرقك في الكلام الحلو والوعود الحلوه....متغيرش غير بعد فتره من الجواز...كنتي بتحبي شكله الوسيم وكلامه الحلو.....بس هو غدر بيكي واتحول عليكي مره واحده
وابراهيم جالك في الوقت الغلط....كنتي لسه بتحبي عصام...وانتي عماله توهمي نفسك إنك بتكرهيه
شوفتي من ابراهيم كل خير...وكان مستحمل كل تقلباتك وعصبيتك...وحرقة قلبك علي بنتك....عمره ما اشتكي منك لحد...وكان بيعاملك بما يرضي الله
أنا إللي اتغيرت بعد ما رجع عصام....والشيطان لعب في دماغي....وفضل يفكرني بذكرياتي مع عصام
بس والله اتاكدت إني كرهته لما لقيته متكلم عليا وحش قدام الناس ومفهم اهله إني حراميه وسارقاه
ومعرفتش إني بحبك يا ابراهيم الحب ده كله غير لما خطبت واتجوزت ....واتأكدت إنك ضيعت من ايدي
دق الباب.....مسحت هدي دموعها بسرعه...أيوه يا بابا
والدها.... عصام بره ومعاه جودي
هدي بخضه......عصام ايه اللي جابه هنا ...دقيقه واحده يا بابا جايه
خرجت هدي وجلست مع عصام
هدي..... خير يا استاذ عصام
عصام..... أنا جبتلك جودي بشنطه هدومها هتفضل عايشه معاكي علي طول بس كل يوم جمعه هاجي اخدها
هدي بإستغراب.....إيه الغيير إللي حصل ده
عصام بإبتسامه مستفزه..... أصلي خلاص هتجوز.. والمصنع إللي فتحته واخد كل وقتي ومش فاضي.....بس ياريت تروحي تتنازلي عن القضيه
هدي بتفكير......اتنازل عن القضيه وترجع تاخد البنت مني تاني وابقي خسرت تاني.....لو عايزني اتنازل عن القضيه تعملي تنازل عن جودي
البارت صغير.... بس هنزل بواحد تاني ان شاء الله بالليل
رحلة وجع.....السابع عشر
في منزل والدة عصام
عصام.....يا أمي فاضل اسبوع واحد علي فرحي...ولا بتروحي للعروسه ولا بتكلميها حتي بالتليفون
ام عصام.....يا عصام أنا مش راضيه عن تصرفاتك ابدا...ولا قلبي مستريح للجوازه دي
عصام بعصبيه...بس أنا مستريح يا ماما ومبسوط كمان.... هو انتي يا أمي مستكتره عليا تشوفيني مبسوط وفرحان....أنا دي أول جوازه افرح بيها كده
ام عصام...... يا ابني انا كل إللي يهمني سعادتك بس انت ظلمت مني أوي
عصام..... ماما مني دي واحده رخيصه راحت اتجوزت من ورا اهلها....مش عايزك تفكري فيها اصلا علشان خلاص نسيتها
ام عصام.....يا ابني ماهي اتجوزتك علي سنة الله ورسوله
عصام.....يا ماما بقولك مش عايز اسمع سيرتها....غارت في داهيه أنا مش عايزها
..................... ................. .............
في منزل مني
والدتها..... يا مني اجبلك تاكلي
مني...... مليش نفس لأي حاجه يا ماما
والدتها...... يا بنتي لازم تاكلي هتموتي من قلة الأكل....أنتي مش شايفه نفسك خسيتي إزاي
مني...... أنا نفسي اموت يا ماما.... لو مكنش حرام كنت موت نفسي من زمان
والدتها...... أنا مش عارفه انتي مموته نفسك عليه كده ليه....هو شاف حياته...... كان واخدك انتي في أيام الفقر....وأول ما ربنا فتحها عليه وفتح مصنع...طلقك......وسمعت كمان انو هيتجوز بعد اسبوع
مني بجنون..... هيتجوز....هيتجوز ....دا انا كنت اقتله واقتلها
والدتها بزعيق....... فوقي لنفسك بقي...هو مش عايزك مش بيحبك .طلقك ورماكي عايزه منه إيه تاني
دخلت مني إلي غرفتها وامسكت هاتفها وظلت ترن علي عصام مرارا وتكرارا حتي فتح الخط
عصام بعصبيه...... نعم.....خير.......في ايه....عماله ترني عليا ليه
مني ببكاء..... انت فعلا فرحك بعد اسبوع
عصام..... أيوه بعد اسبوع
مني......طيب وأنا
عصام....... انتي إيه.....أنا مش طلقتك....عايزه مني إيه تاني
مني...... عصام أنا بحبك....أنا ممكن اموت لو اتجوزت واحده غيري
عصام...... وأنا مش بحبك يا مني ولا عايز اشوفك ولا أسمع صوتك تاني....وياريت مشوفش رقمك علي تليفوني تاني
أنا دلوقتي خاطب....وخاطب واحده محترمه أوي عمرها ما عملت حاجه من ورا اهلها ولا عمرها قابلت واحد من ورا اهلها واتجوزته وسافرت معاه....أصل أهلها عرفو يربوها....مش واحده لا مؤاخذة
أغلق عصام الهاتف...ووقفت مني وهي تنظر إلى الهاتف وسيل من الدموع ينزل علي وجهها ..تنظر إلى الهاتف وهي لاتصدق ما سمعت اذناها
................. ................ ..............
في منزل هدي
كانت هدي وجودي يلعبون
جودي..... ماما هو إحنا مش هنروح البيت عند عمو إبراهيم
هو وحشني أوي
هدي وامتلأت عيناها بالدموع......عمو ابراهيم خلاص اتجوز من اسبوع يا جودي وإحنا مش هنشوفه تاني
جودي..... بس أنا نفسي اشوفه أنا بحبه أوي كان بيخرجني يفسحني ويجبلي لعب كتير...وكان بيلعب معايا
دخل هاني وجودي تتحدث
هاني...... طيب إيه رأيك اخرجك أنا والعب معاكي
جودي. بفرحه.....بجد هيييييييييييي
هاني...... قومي يا هدي البسي
هدي.....مليش نفس اخرج يا هاني
هاني...... لأ هتخرجي معايا أنا وجودي....أنا عايزك تخرجي تغيري جو
.................... .................... ............
عند ابراهيم وزينب ....
كان زينب وابراهيم يجرون بسعاده
ابراهيم..... كفايه بقي انا تعبت
زينب...... لا تعبت إيه إحنا لسه في أول الخروجه انت عجزت ولا ايه..... وبعدين إيه المكان اللي مقعدني في ده إللي مفهوش ولا بني آدم
ابراهيم..... ما هو المكان ده لو كان في بني ءادمين مكنتش سيبتك تلعبي كده وتجري براحتك
زينب.... تمام.....أنا كده شبعت جري عايزه نغير بقي
ابراهيم..... عايزه تروحي فين
زينب بتفكير.... إيه رأيك نروح دريم بارك
ابراهيم...... ولو إني بدوخ بسرعه بس...مش هرفضلك اول طلب تطلبيه مني...من عيوني
زينب بإبتسامه.... تسلم عيونك....يلا بينا
ذهب ابراهيم وزينب إلي الملاهي
ابراهيم..... إيه رأيك تركبي إيه الأول
زينب.... هركب أول حاجه علي زوقك عايز تركب ايه
ابراهيم وهو يشاور..... إيه رأيك نركب دي
زينب..... اوكي يلا بينا
ركب ابراهيم وبجانبه زينب وهو يمسك يدها ويبتسم...بدأت اللعبه تتحرك....وزينب تضحك بسعاده شديده وبجانبها ابراهيم سعيد بسعادتها
انتهت اللعبه
زينب..... الله جميله أوي.....نركب ايه تاني
ابراهيم..... اختاري
زينب.....اممممم.....إيه رأيك دي
ابراهيم..... يلا بينا
ظل زينب وابراهيم يلعبون بسعاده ...
زينب بإبتسامه......كفايه كده..... أنا دوخت أوي
ابراهيم .... اللي يريحك أنا معاكي فيه
زينب.... بس أنا مش عايزه أروح دلوقتي
ابراهيم....مين قالك إننا هنروح دلوقتي.... إحنا دلوقتي نتعشي وبعدين نطلع نركب مركب في النيل
زينب..... يالهوي على الدلع إللي أنا فيه..... عايزاك تفضل كده علي طول
ابراهيم.. بضحك...لأ متحلميش.... دا إحنا علشان في شهر العسل بس
زينب...... إن شاء الله أيامنا كلها هتكون عسل .... تعالي بقي نطلع اللعبه دي علشان نودع بيها الخروجه الحلوه أوي دي
لأ اصبري شويه علشان دوخت....نستريح شويه وبعدين نلعب
.................. ................ .........
داخل عربيه هاني
هاني...... عايزين تروحو فين
جودي..... أنا معرفش اماكن هنا في مصر بس عايزه أروح مكان يكون فيه العاب كتير
هاني..... من عيوني يا قلب خالك
وصل هاني وهدي وجودي
جودي......واو ايه الالعاب الجميله دي
هاني..... إيه رأيك بقي
جودي وهي تجري وتمسك يد هدي. ....جميله جدا يا خالو....اجري يا ماما عايزه ألعب
هدي. بضحك.....براحه شويه يا جودي إيه الحماس ده كله
جودي.....عايزه العب يا ماما.....يلي نركب اللعبه دي يا ماما جميله أوي...
هدي...... يلي يا قلبي....يلا يا هاني
هاني...... يلا بينا
ركبت جودي اللعبه وظلت تصرخ بسعاده وهدي سعيده جدا بفرحة جودي
انتهت اللعبه.....ونزلت جودي تجري بإتجاه لعبه أخري
هدي.....يا حبيبتي براحه هنلعب كل اللعب متخافيش
جودي بسعاده....اوكي يلي بسرعه يا ماما
هاني..... لأ أنا دوخت اركبو انتو وأنا هستناكم
ركبت هدي وجودي اللعبه....احتضنت هدي جودي بسعاده وقالت فرحانه يا حبيبتي
جودي بسعاده..... فرحانه اوي
كانت جودي تصرخ بسعاده واللعبه تتحرك وهدي تضحك بفرحه علي سعادتها
انتهت اللعبه
هاني.... إيه رأيك تستريحي شويه وبعدين نكمل
جودي بحماس..... لأ أنا عايزه اكمل
هدي...... إيه رأيك نشتري فيشار ناكله وبعدين نكمل
جودي....اوكي
هاني..... خلاص استريحو انتو شويه وأنا هجيب
جودي.....أنا هاجي معاك
هاني.....تعالي....مش هنتأخر عليك يا هدي
هدي..... براحتكم أنا هستريح شويه
ذهب هاني وجودي ورأي هاني أحد اصدقائه ووقف معه قليلا
جودي..... خالو أنا هشتري أنا يا خالو
هاني.....ماشي حبيبتي
وقفت جودي تشتري الفيشار ورات ابراهيم
جودي بسعاده...... عمو إبراهيم... عمو ابراهيم
ابراهيم بإبتسامه..... جودي عامله ايه
جودي بسعاده......أنا الحمد لله كويسه انت وحشتني أوي
ابراهيم.....وانت اكتر يا حبيبتي...انتي ماشيه لوحدك ليه...انتي هنا مع مين
جودي.....أنا مع ماما وخالو....انت مش هترجع البيت بقي انت وماما...أنا عايزه ألعب معاك زي الاول
ارتبك ابراهيم
زينب بإبتسامه......مين القمر دي يا ابراهيم.....تعالي سلمي عليا يا حبيبتي
احتضنت زينب جودي وقال ابراهيم... دي جودي بنت هدي طليقتي
زينب...... ماشاءالله زي القمر
ابراهيم..... دلوقتي ماما وخالو بيدور عليكي يا جودي لازم ترجعي ليهم
جودي...... خالو واقف مع واحد اهه مش بيدور عليا
ابراهيم.......تعالي اوديكي ليه
ذهب ابراهيم إلي هاني واعطاه جودي
هاني......أهلا ابراهيم.....وحشتني ياراجل
ابراهيم......وانت اكتر والله عامل ايه وإيه اخبارك....لسه فرحك مقربش
هاني.....اديني بزق في الأيام اهه مش عايزه تمشي
ابراهيم بضحك.....بكره تجري يا عم مش هتمشي بس...مش عايز اي حاجه ....السلام امانه للحاج.....عايزه حاجه يا جودي
جودي.....مع السلامة يا عمو
هاني......يوصل إن شاء الله
ذهب ابراهيم إلي زينب وأخذ هاني جودي وذهب بإتجاه هدي
..................... .................... ... ..........
في منزل والد رقيه
رقيه.....إيه يا بابا الكلام اللي انت بتقوله ده أنا فرحي بعد اسبوع
وجهزت الشقه وكل حاجه
والدها...... ما نلغي الفرح إيه إللي هيحصل يعني
رقيه...... طيب وعصام يا بابا
والدها...... عصام ده كل حاجه امه واخته شركا معاه فيها
أما المدير بتاعي عنده بدل الشركه تلاته وعنده فلل وعمارات غير الشركات اللي بره مصر....وهيخليكي تتنغنغي فلوس
رقيه......بس ده كبير يا بابا من سنك
والدها...... هو إللي عنده خمسين سنه يكون كبير...وبعدين شكله مش لايق عليه السن خالص
رقيه....... بس عصام شكليا أحلي بكتير أوي
والدتها.......وانتي يا اختي الشكل هتعملي بيه ايه.....المهم إللي هيرفعك علي وش الدنيا ويجبلك كل حاجه نفسك فيها
وهيغرقك دهب ولبس وفسح.....وانتي سنك صغير وهيفضل يدلع فيكي علشان ميحسسكيش بفارق السن ده...وانتي وشطارتك تخليه يكتبلك إللي أنتي عايزاه بإسمك
رحلة عذاب....... الفصل الثامن عشر
في منزل ابراهيم
زينب...... مش معقول الاجازه تخلص بسرعه كده..... خلاص هنرجع الشغل بكره
ابراهيم....... اه...والله الواحد وحشه الشغل وفي نفس الوقت مش عايز أرجع
زينب.... طيب يلا ساعدني بقي في الأكل قبل ما الضيوف ييجو
ابراهيم.. .هما زمايلنا في الشغل كلهم جايين ولا في ناس مش جايه
زينب.......لأ اكيد في ناس مش هتيجي بس هعمل أكل بزياده طبعا علشان مضمنش الظروف
أبراهيم...... تمام يلي بينا
زينب..... معلهش بقي هتعبك معايا بس لحد ماما ما تيجي
ابراهيم..... انتي تتعبيني براحتك
..................... .................... ..................
في منزل والد رقيه
والدها..... إيه يا رقيه... نهيتي الموضوع مع عصام ولا لسه....المدير بتاعي مستعجلني
رقيه..... بصراحه يا بابا مش عايزه اسيب عصام ده وسيم جدا...ومديرك شكله عادي أوي
والدتها..... يابت يا غبيه ده عنده تل فلوس هيغرف ويديكي
رقيه..... مش مقتنعه يا ماما ما عصام عنده فلوس برضه
والدها..... عصام عنده إيه مصنع... مديري عندي بدل المصنع تلاته وفاتح كام شركه غير الفلل والعمارات والعربيات
رقيه.... بس كبير في السن
والدتها....... بقولك ايه اتجوزيه سنه واحده ولا كام شهر حتي تخليه يكتبلك فيلا بإسمك ويحطلك فلوس في البنك ويغرقك لبس..... وبعدين ارجعي اتجوزي عصام بتاعك ده
رقيه..... ومين قالك انه هيرضي يطلقني
والدتها.... الرجاله إللي زي كده بيتجوزو كام شهر ويطلقو بيخافو علي بيتهم يتخرب ومراته الأولي تعرف..... وافقي وطلعينا علي وش الدنيا
رقيه بإقتناع..... حاضر يا ماما
............... ................. .... ........
في منزل والدة عصام
والدة عصام...... كنت فين ده كله يا عصام
عصام بسعاده ظاهر علي وشه......كنت جايب شويه حاجات ناقصيين في الشقه ودتهم.. وطلعت على المحامي بتاع ام جودي مضاني علي شويه ورق كده علشان مرجعش اخد البنت....أكمل بضحك........ فاكرني إني بعد ما اتجوز هرجع أفكر فيها تاني بكره رقيه تملالي البيت عيال
والدته..... ربنا يتمملك علي خير واشوفك دايما فرحان كده
عصام...... يارب يا ماما يارب. ادعيلي كتييير
رن هاتف عصام بعد اذنك يا ماما هدخل ارد علي حمايا
عصام..... السلام عليكم.. ازيك يا عمي
والد رقيه...... وعليكم السلام بخير الحمد لله... كنت عايزك في حاجه يا عصام
عصام.... خير يا عمي....أنا انهارده جبت الحاجات الناقصه في الشقه وروحت خلصت كل حاجه مع المحامي زي ما قولتلي...شوف لو عايزني اعمل اي حاجه تاني
والد رقيه وهو يتصنع التأثر...... بص يا إبني انت طبعا مؤمن بالنصيب...... كل شئ قسمه ونصيب يا ابني
عصام بعدم فهم....... يعني إيه يا عمي
والدها...... يعني أنا معنديش بنات للجواز
عصام...... إيه إللي حصل مني.....أنا عملت ايه غلط... دا إحنا فرحنا بعد كام يوم
والدها.... انت متنفعش لبنتي
عصام..... أنا جايلك البيت حالا.....أنا عايز افهم في ايه....لو عملت حاجه غلط هصلحها
والدها...... متجيش البيت يا إبني..علشان مش هتلاقي حد....والجواز يا ابني مش بالعافيه..... إحنا مش عايزينك
وأغلق الهاتف في وجه عصام
امسك عصام الهاتف وطلب رقيه مرارا وتكرارا وهي لا ترد
بدأ عصام في تكسير كل شئ حوله وهو يصرخ
دخلت والدته بفزع.....في ايه يا إبني مالك
عصام بدموع صادقه..... ابو رقيه رن عليا بيقولي كل شئ نصيب
وعايز يفشكل الجوازه
والدته...... إيه إللي حصل يعني....انت عملت حاجه
عصام......والله ما عملت حاجه....بس أنا رايحلهم البيت.. لازم أعرف في ايه.....أنا استحاله اسيب رقيه...دا انا أموت فيها
.......... ................. ................
في شقه هاني
كانت هدي وهاني يرتبون بعض الأشياء
هدي.....أخيرا يا هاني قربت تدخل....كفارة يا راجل
هاني بضحك.... خطوبتي ...تدخل موسوعه جينست كأطول فتره خطوبه
هدي بضحك......انت تدخل موسوعه جينست وعروستك تاخد جايزه نوبل في الصبر
هاني..... تعالي بقي اوريكي الاوضه إللي عملتها ليكي علشان لما تيجي تباتي عندي
هدي.... الله.....وكمان عاملي اوضه دا انت مدعلني أوي
هاني..... لو مكنتش ادلعك يا جميل ادلع مين
وفجأه سمعو صوت تكسير
ذهبو بسرعه ناحيه الصوت
هدي.....إيه إللي عملتيه ده يا جودي ايدك اتعورت
هاني...... كسرتي الفاظه....دي عروستي هتموتني فيها... دي بقالها سنه بتحوش في تمنها
هدي..... فداها يا حبيبي المهم هي بخير
هاني..... هدي أنا غيرت رأيي مش هعملك اوض عندي.. بره انتي وبنتك
هدي بضحك ...... هجبلك واحده غيرها....متخافش
هاني.... مش عايز منكم حاجه بره انتي وبنتك....وأنا ربنا يسترها عليا لما تعرف إللي حصل في الفاظه بتاعتها
................ ............ صلو على سيدنا وحبيبنا محمد
في منزل ابراهيم
ابراهيم........ إيه يا زينب جهزتي خلاص وصلو
زينب...... خلاص لبست اهه وكله تمام
قام زينب وابراهيم بإستقبال الضيوف
الضيوف......ألف مليون مبروك
ابراهيم..... الله يبارك فيكم جميعا ...نورتوناوالله
احدالضيوف...... منور بإصحابه
ابراهيم..... عملين ليكم بقي شويه اكل إنما ايه..... يلي زينب نجهز الأكل
أحد الضيوف.....لأ يا استاذ ابراهيم اقعد انت وأنا هجهز مع زينب
ابراهيم...... مش عايزين نتعبك يا أستاذه آمال
آمال..... ولا تعب ولا اي حاجه....يلي يا زينب وريني المطبخ
دخلت زينب وآمال المطبخ
آمال..... ماشاء الله بيتك جميل.... زوقك ده ولا زوق ابراهيم
زينب......كل حاجه هنا زوق ابراهيم
آمال بصوت واطي لكن زينب سمعته... ماهو زوقه حلو في كل حاجه ما عدا النسوان
زينب....... نعم بتقولي حاجه
آمال بعصبيه....لأ مبقولش.. بس انتي لحقتي عملتي الأكل ده كله لوحدك
زينب...... لأ ابراهيم ساعدني في كل حاجه
آمال بحقد ظاهر.... وكمان ساعدك في الأكل.....ابراهيم ده مش بيتعلم من اخطائه أبدا
زينب بضيق منها ومن حقدها الظاهر...... هو في حاجه يا أستاذه آمال شايفاكي مدايقه
آمال بإندفاع وبدون تفكير...... انتي وقعتيه إزاي....أنا بقالي كتير أوي بحاول... بقي بعد إللي عملته ده كله يختارك انتي
زينب بعد فهم..... انتي بتتكلمي علي إيه
آمال......متاخديش في بالك.....اغرفي الأكل اغرفي
آمال في سرها.....والله ما هسيبك علي ذمته كتير....اصبري عليا وشوفي أنا هعمل فيكي ايه
رحلة عذاب........ التاسع عشر
في منزل والدة عصام
ام عصام .....يا ابني مالك....فوق لنفسك غارت في داهيه هي إللي خسرانه.
عصام بوجع.... أنا عايز بس اعرف عملت ايه....ليه فجأه ابوها نهي معايا كل حاجه. .......أنا بحب رقيه أوي يا ماما أنا حاسس ان روحي بتتسحب مني
والدته.....بعد الشر عليك ....مش الجيران قالولك انها اتجوزت . إللي يبيعك بيعه....مش تكون هي شافت حياتها واتجوزت وخلفت...وانت قاعد حزين عليها الوقت ده كله
عصام..... اكيد أبوها هو اللي غصبها علي الجوازه دي... رقيه بتحبني أكتر ما انا بحبها
والدته.......رقيه مش بتحبك....رقيه كانت بتحب فلوسك...ولما لقيت إللي هيدفع أكتر راحتله
عصام..... انتي ليه ظالماها كده.....رقيه دي أحسن بنت في الدنيا كلها
... ............. ............. ...........
في منزل ابراهيم
زينب........ابراهيم
ابراهيم... نعم
زينب...... عندي ليك خبر يارب يفرحك
ابراهيم بإنتباه.. أي حاجه منك بتفرحني
زينب...... استعد.....أنا حااااااامل
ابراهيم بسعاده.....بجد....انتي حامل...أخيرا...الحلم اتحقق
زينب.....الحمد لله....بس لازم نروح للدكتوره نتأكد الأول
ابراهيم..... نروح دلوقتي حالا ألبسي بسرعه
زينب...... استريح شويه انت لسه جاي من الشغل
ابراهيم....... استريح ايه أنا راحتي لما نتأكد
.... ............ ............
في منزل والد هدي
والد هدي..... إيه يا هدي فين جودي
هدي......دخلت تنام شويه
والدها....... كويس انها نامت كنت عايزك في موضوع
هدي.. .خير يا بابا
والدها...... مش ناويه بقي تخرجي من الحاله اللي انتي فيها دي....في فرح هاني كنتي مبسوطه..قولت بنتي رجعتلي تاني....بس بعد الفرح رجعتي حزينه تاني
هدي..... والله يا بابا أنا حاسه اني تايهه وضايعه....... كل قراراتي غلط....كل الناس بدأت حياتها من جديد ومبسوطين إلا أنا برجع لنقطه الصفر
كان هيحصل ايه لو كنت سمعت كلامك ومتجوزتش عصام....
كان هيحصل ايه لو كنت رضيت ابراهيم وخلفت وعملت عزوه ليه ولنفسي. .....كان هيحصل ايه....لو كنت اعتذرتله لما طلقني.... كان مستني مني ارن عليه بس....بس أنا كابرت واعتمدت علي انه بيحبني واستحاله يستغني عني
والدها... كويس يا بنتي إنك عرفتي أخطائك... وعرفتي ان العند اخرته وحشه... اخرته ندم وخساره
بس الحمد لله ان بنتك رجعتلك تاني وبقت في حضنك... وابراهيم خلاص اتجوز وشاف حياته.. شوفي حياتك انتي التانيه وهو ربنا يسعده...وانتي ربنا يسعدك ويعوضك خير يارب
هدي... يارب يا بابا
... ............. ............. صلو على الحبيب
في منزل رقيه
والدة رقيه...... إيه يا بنتي جوزك بقاله شهر مجاش
رقيه.....أهو لما بيعرف يزوغ من مراته يوم بييجي
والدتها... مش عايزاكي تزعلي
رقيه.....وأنا إيه إللي يزعلني.....اهو بيغيب ولما بيرجع بيحاول يعوضني بالدهب والفلوس....واديني بخرج براحتي واتفسح براحتي وكل يوم في مكان شكل
والدتها.... المهم يكتب الفيلا دي بإسمك
رقيه..... إن شاء الله هخليه يكتبهالي.....المهم بابا مستريح بعد ما اترقي في الشغل ومرتبه زاد أضعاف
والدتها..... مبسوط يا اختي وكل يوم سهر للصبح ما الفلوس جريت في ايده بقي
عايزاكي ترني على جوزك علشان يعرف إنك زعلانه إنه مش بييجي خليه يزود عليكي في الصرف شويه لما يحس انه مقصر
رقيه..... هو متفق معايا من الأول إني مرنش عليه نهائي....وأنا بصراحه مش عايزه اطلق أنا العيشه دي عجبتني أوي.. إحنا كنا مدفونين بالحيا .. وأنا بعرف اخد منه إللي أنا عوزاه
والدتها.... أيوه كده شاطره وعارفه مصلحتك ورفعتي نفسك ورفعتينا علي وش الدنيا
..... ............ ........... صلو على الحبيب
في منزل مني
والدتها......ماله العريس يا مني محترم جدا وشاريكي
مني.. أنا خلاص مش هتجوز تاني نهائي
والدتها.. .... ليه يا بنتي تدفني شبابك....انتي لسه صغيره
مني..... صغيره..... أنا حاسه إني عندي مييييت سنه
والدتها......انتي لسه في عز شبابك وزي القمر والف واحد يتمني ضفرك
مني... ماما أنا لسه بحب عصام.. وندمانه جدا إني اقنعته نرجع من السفر...اينعم كنت أنا إللي بشتغل واصرف بس كفايه إنه كان معايا...أنا بحبه....بحبه اوي...وعندي أمل يرجعني تاني
والدتها بصدمه..... لأ انتي مش طبيعيه....انتي لازم تروحي لدكتور نفسي
............... ............. ......صلو على الحبيب
في منزل ابراهيم
ابراهيم...... أنا مش مصدق نفسي أخيرا هبقي اب
زينب بغيره.....ماهو باين عليك الفرحه كان ناقص تقوم تاخد الدكتوره بالحضن
ابراهيم بضحك...... عيب إللي بتقوليه ده....وبطلي غيره شويه
وبعدين بقي من انهارده مفيش شغل....انتي تقعدي وترتاحي لحد ولي العهد ما ييجي بالسلامة حتى شغل البيت أنا إللي هعمله
زينب..... لا والله.....واسيبك للست آمال تجبلك فطار كل يوم وتعملك شاي
ابراهيم...... آمال مين دي إللي اسمحلها تعملي حاجه
انتي عارفه إني برفض اخد منها حاجه.....وبعدين انتي عايزه تضيعي فرحتي بإبني إللي جاي
زينب...... والله أبدا...... بس أنا بحبك أوي يا ابراهيم....مش عايزه واحده تبصلك حتي بعنيها
ابراهيم......وأنا والله فرحان إنك بتغيري عليا وبتحبيني
تابعووووووني
رواية زواج لدقائق معدودة كامله من هنا
رواية خيانة الوعد كامله من هنا
رواية الطفله والوحش كامله من هنا
رواية جحيم الغيره كامله من هنا
رواية مابين الضلوع كامله من هنا
رواية سيطرة ناعمه كامله من هنا
رواية يتيمه في قبضة صعيدي كامله من هنا
الروايات الكامله والحصريه بدون لينكات من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق