رواية سجين الغدر 2 وقت الحساب الحلقه السادسه والسابعه والثامنه والتاسعه والاخيره من تاليفي، ، محمد منصور. ** منص ** حصريه وجديده

رواية سجين الغدر 2 وقت الحساب الحلقه السادسه والسابعه والثامنه والتاسعه والاخيره من تاليفي، ، محمد منصور.  ** منص ** حصريه وجديده 

رواية سجين الغدر 2 وقت الحساب الحلقه السادسه والسابعه والثامنه والتاسعه والاخيره من تاليفي، ، محمد منصور.  ** منص ** حصريه وجديده 

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

                         ‏

ويروح ناحيتها جابر ولسة بيغيطها يدخل عليه ابنه سمير  ويقف علي باب الاوضة  ويبص لمراتة وابوة جابر وهما بالمنظر دة ويقول

يعني المكالمة ما كنتش كذب 

ويخرج المسدس من جيبه ويصوبه ناحية جابر  فيصرخ جابر قائلا 

سمير افه،،،،،

ولكن تخرج الرصاصه ليسكت الجميع.  ولكنها رصاصة جت في اللمبة الموجودة في الاوضة.  وبقيت الاوضة طلمة تماما.   وتخرج رصاصة ثانية ويحط جابر ايدة علي جسمة ويتحسس جسمة وهو مش مصدق ان مافيش رصاصة جت في  فيبص وراء منه وهو يقول للقاء مرات ابنه

لقاء انتي كويسة

فترد لقاء وهي ترتعش من شدة الخوف

أة.

جابر

طيب لو تعرفي توصلي للأباجورا وتولعيها ولعيها

فتنور لقاء لمبة الاباجورا. وتصرخ لما تشوف سمير.  واقع علي الارض والدم مغرق وشة وهدومة كلها فيبص جابر ناحية ابنه سمير ويصرخ من القهر ويقول 

سمير.  رد علية 

وتلف لقاء. نفسها بالملايا وتروح ناحية سمير اللي وصل له جابر وضمه لصدره وهو بيعيط عليه بحرقه

فيرن موبيل جابر ويبص جابر للرقم وهو الرقم اللي بيكلمة منه شناوي فيفتح ويقول 

هاقتلك يا شناوي سامع هاقتلك زي ما قتلت ابني 

 شناوي

دة جزاتي برضو اني سمعت  ضرب النار. قولت اتصل اطمئن  عليك يا صاحبي 

جابر بغضب شديد

ابني مات بسبب لعبتك الوسخه وانا مش هارحمك يا شناوي 

شناوي

ياجابر  المهم ان انت بخير علشان تلحق بنت سمير.  هي اسمها اية صحيح.  مريم. افتكرت 

جابر بتهديد 

لو مريم  حصل لها حاجه هاقتل بنتك

شناوي ببرود 

اسكت.  مش جميله طلعت مش بنتي. اكيد عزت حكي لك. 

ولو مريم ماتهمكش خليك قاعد عندك

جابر بتوسل 

شناوي ابوس ايدك مريم عيلة صغيرة ملهاش ذنب في اللي حصل زمان ارحمها وارحمني 

شناوي

وانت ما رحمنتنيش ليه ده انا كنت هاتشنق ظلم بسببك عموما ما ضعيش وقت وانزل دلوقتي من عندك وروح شقتك القديمه اللي في العجوزه هتلاقي مريم مربوطة  في اوضه النوم بتاعتك والغاز مالي الشقه عشان ماعرفش مين ساب  محبس الغاز مفتوح.  ولو مالحقتش تكون عندها خلال ساعتين هاتموت مخنوقه

ويقفل شناوي في وش جابر فيقول له جابر

شناوي رد عليه شناوي مريم.  لا لا كفايه ابني واللي حصل له

ويبص  لجثه ابنه سمير  وهو بيلبس هدومه بسرعه.  

ولقاء تبص له وتقول

سمعاك بتقول مريم.  مريم مين

جابر وهو بيلبس جذمتة يقول

مافيش وقت للرغي دة.  البسي هدومك وانا هابعت. لك عربيه اسعاف تاخد جثه سمير. وبعدين هاتصل بيكي واعرف انتي فين

ويستعد للنزول فتقف لقاء قدامه وهي تقول

مريم بنتي صح. دخلت في الحساب اللي بينك وبين اللي بيعمل فينا كدة

جابر

يا بنتي مافيش وقت للرغي.  لازم انزل حالا

لقاء بعصبية شديدة

مش هاسيبك تنزل الا لما تقول لي.  اية اللي بيحصل لمريم بنتي

جابر بمنتهي الغضب

قولت لك مافيش وقت.

ويزقها جابر زقة عنيفة ويبعدها عن سكتة.  ويخرج من البيت باقصي سرعه  ويروح ناحية عربيتة  ويركبها ويتحرك بيها وفجاه تخرج من شارع جانبي زفه عروسه. علي عربية كارو. ومعازيم كتير وكان العريس مجانص والعروسه مراته السبع وقدام الزفه.  سكر.  بفلنه محملات  علي موتوسيكل وعمال يرقص ويغني. وجابر يضرب لهم كلكسلات ويشاور لهم ويقول

وسع طريق خليني اعدي

فيبص له سكر ويقول ببرود

ما تضرب واحده تيت تيت ربنا يبارك لك في عربيتك دي العروسه يتيمه 

جابر

وسع من طريقي يا متخلف انت

سكر

يا اخي اعمل ثواب ولا تصحي تلاقي العربيه بتاعتك ميكروباص 

جابر

بقول لك وسع من طريقي بدل ما ادوسك

سكر ببرود 

هاتعرف تدوس ولا هتنادي حد يدوس معاك 

ويقف سكر بالموتوسيكل قدام عربية جابر ويقفلو  الطريق تماما قدام عربية جابر.   ويروح سكر ناحيه جابر ويدخل راسه من الشباك ويدوس علي الكلكس بايده.   فيقول له جابر وهو بيخرج راس سكر من شباك العربية 

ابعد عن عربيتي يا متخلف

سكر وهو يغني 

متغير ليه حيران كده ليه 

 ‏

جابر وهو عمال يبص  في الساعه والوقت بيعدي  واعصابه بتنحرق يقول بعصبية شديدة 

 ‏

ابعد عن طريقي احسن لك

سكر

والله ابدا مش لما تتعرف علي السبع

جابر بزهق

سبع مين

سكر

العروسه

وينادي سكر 

بت يا سبع يا بت انزلي يخرب بيت اللي جابتك الباشا الحيوان ده هايزفك 

جابر بعصبيه

هازف مين ابعد انا مش فايق لك

سكر

وربنا دم امك خفيف وانت متعصب كده 

ويفتح سكر باب العربية اللي وراء  ويقعد  مجانص ومعه  السبع فيبص لهم جابر ويقول 

انتوا بتعملوا ايه 

سكر

هاتزف السبع وربنا انت محترم.  بدل ماهي بتتزف علي عربية بيجرها حمار تتزف في عربية سايقها حمار 

جابر

انزل،،،،،،،

سكر مقاطعه وينظر للسبع

مش قولت لك دا باشا حيوان بذمتك يا باشا بص للسبع سيبك من الشنب اللي طالع لها والله يتيمه مع انها جربانه ومعفنه بس قمر

جابر وهو عمال يحاول اخراجهم من السياره يقول

انزلو انتوا مجانين ولا ايه

سكر

انت مش مصدق ان السبع بنت دي بنت والله ااقلعي يا بت وري الباشا مكان التاتو 

جابر بعصبيه

تقلع ايه. يا متخلف يا حيوان 

سكر

طيب نعمل الدخله علي الكنبه اللي وراء دي اقلعي يا بت هانعمل الدخله دلوقتي.   اندهو بتاع الفيديو 

جابر

دخله ايه يا ولاد الكلب

وفي الوقت دة يبص سكر بطرف عينه لراجل تبعه فيجري الراجل دة بسرعه وينزل تحت عرببة جابر.    ويخرم الخرطوم الخاص بتانك البنزين وبعد ماخرم الخرطوم  بدا البنزين يتسرب علي الارض.    وسكر عمال  يضايق في جابر وبطرف عينه بيبص علي مؤشر البنزين وهو في النازل  وفي نفس الوقت  يتقطع تيل الفرامل وسكر كان يقول

ما تقلعي يا سبع انتي مكسوفه من الباشا

ثم يبص لجابر ويقول

قولها تقلع دي مكسوفه منك 

جابر بعصبية 

يا عم ابعد عني انت واللي معاك دول ابوس ايدك بنت ابني  في خطر

سكر

بنت ابنك في قطر فين في قطر طيب اتصل بيها وخليها تبارك للسبع وبالمره تقولها تقلع عارف السبع لو قلعت وشوفت الحبيه اللي في ظهرها. دي عليها حته حباية معبيه دمن وكل ما قول لها تعالي لما افقعها تقول لا،،،،،،،

جابر مقاطعة له 

الله يخرب بيتك انا مالي بالحباية

سكر

تقلع ونعمل الدخله هنا علي الكنبه والله اول ولده من السبع بتاعتك

ويخرج الراجل اللي تبع سكر من تحت العربية فيقول سكر لجابر 

اما انت راجل بارد هو في حد عزمك علي فرحنا عشان تخش بعربيتك كده يالا يا عم امشي من هنا 

وينزل مجانص من العربية ومعه السبع.  وجابر مستغرب من كل اللي حصل. ويوسع سكر طريق لعربية جابر ويتحرك جابر بالعربية وبمنتهي السرعه.   ويرن جرس الموبيل تاني فيفتح جابر الخط وساعتها يسمع صوت شناوي بيقول

جابر ما عرفش مين خرم التانك عندك خلي البنزين اللي في العربيه يتسرب وكلها كام كيلو والعربيه هاتفضي من البنزين وتقريبا تيل الفرامل اتقطع فخلي بالك ان العربيه من غير فرامل فانا سايبك لقضاء ربنا لو البنزين خلص قبل ما تحتاج الفرامل هاتعيش وهاتلحق مريم  انما لو احتجت للفرامل ولسه في بنزين هاتموت وتموت معاك مريم فخلي بالك من نفسك يا صاحبي  علشان انا مش عايزك تموت دلوقتي، ،،،

وينهي  شناوي المكالمة فيبص جابر الي مؤشر البنزين فيلاقي  البنزين مؤشره في النازل فيدوس فرامل فيلاقي ما فايش فرامل فيصاب جابر بالخوف والرعب ويقول

اة يا ولاد الكلب 

ويبتدي صراع جابر مع الطريق والزمن.   لانقاذ مريم وانقاذ نفسه من الموت.    وبدا يفادي العربيات بمنتهي السرعه وكل عربية تقرب منه كان بيشوف شبح الموت فيها.  وقدر يعدي من المطب دة بصعوبة وخلص البنزين ووقفت العربية في منطقة هادية.  فنزل جابر من العربية  وهو مش مصدق انه لسة عايش.   ويبص في ساعته فيلاقي ان في ساعه ونص عدو من الساعتين.  اللي قالو عليهم شناوي فبدأ يجري في الشارع زي المجنون.

لغاية ما وصل جابر للشقه ودخل الشقة  وفضل يدور في كل الاوض علي مريم. لغاية مالقي قدام منه مجانص بيبص له وبيضحك وضربه.  ضربة واحدة خليته يقع فاقد الوعي، ،،،،

وفي نفس الوقت ومن جوة جنينة فيلا عزت  يقف  ابراهيم ومعه ذهب  وقدام منهم تقعد  جميله مع مالك خطيبها وكانوا في حاله حب وابراهيم عمال يبص علي جميلة بحب شديد فتميل عليه ذهب وتقول له 

علي فكره جميله تليق عليك انت اكتر من مالك

فيبص لها ابراهيم  ويقول باستغراب

انتي بتقولي ايه

دهب

بقول اللي انت سمعته وانا عارفه انت قد ايه بتحب جميله 

ابراهيم بارتباك 

انا لا خالص جميله بالنسبه لي زي اختي وبس

دهب

ابراهيم ما فيش حد يعمل اللي انت بتعمله مع جميله وتكون بالنسبه لي زي اخته وبس

ابراهيم

دهب بلاش السيره دي انا اصلا مش مركز في اي حاجه دلوقتي غير مستقبلي وبس 

دهب

عليه انا ده انت جميله بالنسبه ليك هي مستقبلك وحياتك كلها

ابراهيم 

يا لو تحس بيا زي ما انتي حسيتي بيا

دهب

خلي بالك يا ابراهيم جميله ما بتحبش مالك زي مانت متخيل هي بس مشدوده لي وهي كتير كانت عايزه تفشكل معا بس هو بيضحك عليها بكلامه الحلو.  مالك دة عيل ملزق 

ابراهيم

يعني تفتكري يا دهب انها ممكن في يوم ما تكنش لمالك

دهب

ولو هي مش لمالك عايزها تكون لمين

ابراهيم ضاحكا

سؤالك خبيث بس عموما انا نفسي انها تكون ليا انا.

 جميله حب عمري انا قلبي عايش بينادي عليها وعينيه ما بتشوفش غيرها

دهب

ايوه بقي والله انت اللي تستاهلها مش ابن سراج دة 

ابراهيم

ده يبقي احلي يوم في عمري يوم ما جميله تكون ليا 

وفي هذه اللحظة  ينضم لهم مالك وجميله وتقول جميله

قاعدين علي جنب ليه وعاملين تجيبوا في سيره مين

دهب

في سيرتك يا هانم انتي نسيتي اننا عندنا بروفات عشان المسرحيه الجديده بتاعتنا وانتي معطلانه

جميله

صح ده انا نسيت طيب يالا بينا 

في الوقت دة  يسمعوا كلهم صوت عزت بيقول 

ازيكم يا ولاد

فيبصو له ويسلموا كلهم علي عزت فيقول عزت لمالك

ازيك يا مالك.  والدك سراج عامل اية

مالك

بخير والله يا عمي

عزت

طيب كنت عايزك يا مالك في كلمتين توصلهم لوالدك سراج

جميلة

يا بابا عندنا بروفة

عزت

معلش يا جميلة مش هاعطلكم كتير

فيستاذن مالك منهم ويروح  مع عزت وجميلة تبص عليهم، ،،،،،،

ومن جوة مكتب عزت يقف مالك قدام عزت ويقول له

صدقني يا عمي حاولت معها كتير لكنها مش عايزنا نتجوز الا لما تخلص تعليمها

عزت

ما ينفعش اللي انت بتقوله دة. لازم تسيطر وتخليها توافق علي الجواز

مالك بضحكة كلها خبث يقول

اية يا عمي مش قادر تستحمل خلاص. انا عارف ان جميلة حلوة وحلوة اوي كمان لكن لازم تمسك نفسك شوية مش كدة 

عزت

مالك بلاش تلميحات سخيفة 

مالك

انا مش بلمح. بس انت فعلا مش قادر تستحمل وهاتموت وانا اتجوز جميلة علشان تدخل انت عليها بعد ما تخدرها مش دة اللي نفسك في 

عزت

اسمعني كويس انت واخد مني فلوس علشان تبيعها لي وهي مراتك. وانا بقي حر اعمل فيها اللي انا عايزة. وحاجة كمان لو انت مش هاتقدر تنفذ اللي اتفقنا علية انا هاشوف غيرك يعلقها منك واشتريها منه

مالك

لا وعلي اية. روق كدة يا عمي. 

عزت

يبقي خلاص تخلصو اللي بتعملو وتكلمها تاني في موضوع جوازكم فاهم ولا لا

مالك

بقول لك اية لما انت مش قادر كدة. ماهي قدامك في الفيلا ليل ونهار ما تخلص واعمل فيها اللي انت عايزة

عزت

دة تفكير الاغبياء اللي زيك. انا لو عملت كدة يبقي حكمت علي نفسي باني ادوق طعمها مرة واحدة بس. انما طول ما هي مراتك انا هاكون معها وقت ما احب.

مالك

انت مستحيل تكون انسان

عزت

انا وانت من نفس الطينة يا ابن سراج . ،،،،،،،،،،،

وفي نفس الوقت ومن جوة شقه جابر القديمة.  في اوضة نومه كان جابر علي السرير متكتف وايديه مربوطة في شباك السرير.  وقدامه  يقعد  شناوي وفي ظهرة سكر ومجانص وجابر بيحاول يفك نفسه وبيقول 

فين مريم  يا شناوي

شناوي

مريم  في بيت ابوها.  هو انا برضو واطي زيكم علشان اخد حقي من عيله صغيرة 

جابر باستغراب 

اومال انت ليه قولت انها هنا

شناوي

علشان عايز اشوفك وحشتني ونفسي اقعد معاك شويه

جابر

شناوي اقتلني وريحني وبلاش تلعب باعصابي كده انا مش هاستحمل وكفايه انك قتلت ابني وبكده يبقي انت خد حقك مني وبزياده 

شناوي

مين قالك ان خد حقي ده انا لسه ببتدي دول 15 سنه سجن يا صاحبي.    بس نفسي أسئلك طول ال 15 سنه دول ما صعبتش عليك.  طيب وانا بيتحكم عليه بالاعدام ضميرك ما قالكش حرام ليه يموت ظلم 

جابر

شناوي حقك عليه.   بس لازم تعرف ان عزت هو السبب هو اللي قال لي نعمل كده علشان نطلع براءه من قضيه خطف وقتل سالم 

شناوي

وعشان تطلعه براءه اتسجن انا ظلم اتحرم من بيتي وتموت مراتي وبنتي يربيها واحد تاني علي انه أبوها كل ده ليه

ويروح شناوي ناحيته ويضربه بالقلم. بغل السنين الظلم فيتوجع  جابر اوي  من قوه القلم ويقول جابر 

أضرب كمان يا شناوي. حقك 

شناوي

تعرف اني اول مره في حياتي كلها اضرب حد بس الظلم وحش اوي يا جابر ربنا يرزقك باللي يظلمك 

جابر

شناوي حقك عليه سام،،،،،،،

فيضربه شناوي كمان  قلم و بنفس القوه وقلم تاني وقلم تالت ورابع ويفضل شناوي يضرب جابر فيبص  مجانص لسكر. ولسة هايروح ناحية  شناوي علشان يحوشه  سكر يمنعه ويقول له

سيب شناوي ياخد حقه

مجانص

هايموت في ايده

سكر

يموت هنبعت نجيب غيره

ويتوقف شناوي عن الضرب وبوق جابر بيجيب دم من كتر  الضرب ويقول  شناوي بمنتهي الصعوبه وهو بيعيط 

ل ليه حر. حرام عل عليك الظ الظلم طعمه مر قوي عملت لكم ايه ده انا كنت بحبكم.  وبعتبركم زي اخواتي

ويمسح شناوي دموعه وهو يقول 

لكن خلاص وقت الظلم راح وشناوي الطيب مات وجه وقت الحساب

جابر بصعوبه 

هاتعمل فيه ايه تاني اكتر من اللي انت عملته مش كفايه ان ابني مات بسببك 

شناوي

مش كفايه وانا لسه ماخدش حقي 

ويبص شناوي  لسكر ويقول

هات الزباله اللي اسمه نصر 

فيفتح سكر باب الاوضة ويخرج ويرجع في ايده نصر  اللي كان مضروب علقة موت.  وايده عماله تترعش فيبص له جابر باستغراب ويقول 

دكتور نصر  هو عرف مكانك أزاي

نصر 

ماعرفش. بس اكيد من مراقبتة ليكم. يا شوية اغبياء 

سكر

لا بصراحة احنا عرفنا مكانك عن طريق دكتور شمال زميلك. شغال نفس شغلتك بيقطع في لحم الغلابة ويبيع 

شناوي لجابر 

بس اية رايك في دكتور نصر شايف ايده بتترعش ازاي اصل سكر قالي علي جرعه مكيفات بتضرب خلايا الاعصاب علشان كدة اديت جرعه كامله للدكتور نصر مش خسارة في. 

وبعد كدة يبص شناوي لنصر ويقول

سنين كتير ربنا سترك وانت مش عايز ترجع عن اللي بتعمله وسايق فيها اهو انا بقي جاي اخد حق كل واحد اتقطع علي ايدك

نصر

هاتعمل فيا اية تاني اكتر من اللي عملته دة انا مش قادر اقف علي رجلي واعصاب جسمي كلها اتلفت

شناوي

لا. ازعل منك دة انا عايزك في اخر عملية اعتبرها ماتش اعتزالك وعلشان ارحمك تفتح لي صدر جابر وتطلع لي قلبه الاسود 

سكر

ايوه بقي ولما يطلع القلب نشوحه في الزيت مع حته بصله

جابر خائفا 

شناوي اوعي تكون ناوي تعمل اللي بيقول عليه ده

شناوي

وليه لا دي فكره حلوه.  مع اني ماليش في الزفارة. بس وماله 

وبعدها يبص شناوي لنصر  ويقول

وكمان عايز الكليه الشمال وفص كبد زي اللي خدوهم من سالم. طبعا فاكرة والعملية دي كلها تتم من غير بنج. عايز جابر يحس بكل الوجع اللي في الدنيا وبكل لحظة حرمان اتحرمها حد من اللي بيحبهم بسبب لعبة غدر من شوية اندال زيكم

نصر

انا ما قدرش امسك مشرط بايدي دلوقتي. 

شناوي بحده

هاتمسك مشرط وهاتعمل العملية

جابر 

لا لا ابوس ايدك يا شناوي ارحمني

شناوي

انت مالك خايف ليه كده

جابر وهو يبكي 

ابوس رجلك سيبني اعيش.  

شناوي 

بلاش عياط وخليك راجل   طيب تحب ارجع لك سمير  ابنك واخد اللي انا عايزه من جسمك 

جابر باستغراب شديد 

ابني سمير مات

شناوي

تبقي عبيط لو صدقت ان شناوي يقتل او يكون السبب في موت انسان برئ وانا لو عايز اقتل ها قتلك انت وعزت مش هاقتل ابنك ولو مش مصدق اتفرج 

ويبص شناوي لسكر فيفتح سكر باب الاوضة ويخرج يجيب  سمير وهو متكتف   فيبص له جابر وهو هايتجنن لدرجة انه اغمي عليه  ،،،،،  

ومن جوة  فيلا عزت كان عزت قاعد وبيحاول انه يوصل لجابر لكن جابر موبيلة كان مقفول فيقول لنفسه

يا تري يا جابر انت لسة عايش ولا يكون شناوي خلص عليك

 وتعدي من قدام منه جميلة وكانت زي القمر  فبص لها عزت وهي بتعدي من قدامه بلبس البيت وشاف جيهان وقلبة دق اوي وسمع صوت مالك والشيطان في نفس الوقت

طالما هي قدامك لية ما تخدش منها اللي انت عايزة

فقال عزت لنفسه

هو صح طالما قدامي لية ماخدش منها اللي نفسي في.  ماحدش يعرف بكرة مخبي اية واهو لو موت ابقي ميت وانا واخد جيهان حبيبتي. في حضني 

وقام عزت ودخل المطبخ وخرج حباية منوم وحطها في كوبية عصير برتقال اللي بتحبه جميلة.   وطلع وراء جميلة ودخل عليها الاوضة فبصت له جميلة وقالت

بابا في اي اية

عزت

جايب لك عصير يستاهل بوقك

جميلة باستغراب

اول مرة تعملها يا بابا

عزت

علشان انا زعلت لك كتير الفترة اللي فاتت وناويت اراضيكي

ويمد عزت ايدة بكوبية العصير لجميلة فتمسك جميلة كوبية العصير وهي تقول له

ماشي يا سي بابا. انا مرضية

وشربت جميلة كوبية العصير. وقالت وهي بتحط الكوبية جنبها

تسلم ايدك يا بابا.

فيبتسم عزت ابتسامة الثعبان. ويقول

اسيبك تنامي

ويخرج من الاوضة لدقائق وجميلة تروح في نوم عميق فيفتح باب الاوضة ويدخل علي اطراف اصابعة ويقعد علي طرف السرير ويبص لجميلة برغبة شديدة ومد ايدة ومسك اللحاف الموجود عليها وقلع هدومه وقرب من  جميلة و ،،،،،،،،،،،،،،،،

                       نهاية الحلقة السادسة

ح(7)

سجين الغدر 2

وقت الحساب

                       

من تاليفي، ، 

محمد منصور.  ** منص **

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

                        ‏

خلصت الحلقة  اللي فاتت علي ان عزت حط منوم لجميلة في العصير بتاعها واستناها لغاية ما نامت ودخل عليها وكان عايز يحرمها من شرفها ويتمتع بيها.  بعد ما شاف فيها صورة جيهان حبيبته اللي عمره منسيها.  لكن بمجرد ما قرب من جميلة سمع صوت خبطة علي  باب الاوضة اتخض عزت ولبس هدومه بسرعه.  وفتح باب الاوضة علشان يشوف مين اللي خبط الباب.  وشاف ست عند اخر الممر. ولبسة ايشارب اسود علي وشها وبتجري تخش جوة اوضة.   فراح وراها عزت بسرعه  ودخل  الاوضة اللي هي دخلتها. وقبل ما ينطق باي كلمه لقي حقنه بنج 

بتتغرز  في رقبته علشان يقع مغمي عليه،،،.،

وفي نفس الوقت كان سكر بيفوق جابر اللي اغمي عليه اول ما شاف سمير داخل عليه الاوضة متكتف واول ما فاق جابر ورجع له تركيزه قال وهو عمال يبص لسمير 

ازاي ازاي

شناوي

هو ايه اللي ازاي

جابر

انا شوفت سمير وهو ميت والدم  نازل من دماغه 

شناوي ضاحكا

لا غلط.   انت شوفت سمير واقع علي الارض والدم مغرق وشه ما كنش بينزف لكن مع صعوبه الموقف وان ابنك شافك في المنظر دة.  انت ماخدش بالك.  ان سمير مش سمير 

جابر

انت بتقول أيه

شناوي

بقول ان اللي شافك مش سمير ابنك.  دة واحد شبه وبشويه مكياج بقي سمير بالظبط وعلشان ما تتعرفش عليه سمير المزيف ضربنا رصاصة في لمبة الاوضة علشان تبقي كحل.  وبين اول رصاصه وتاني رصاصه كان الدم نزل من سقف الشقه عشان يغرق اللي عامل نفسه سمير   وقبل ما تلم نفسك اتصلت بيك عشان اشل تفكيرك واشتت انتبهاك وقولت لك الحق مريم.    ورجالتي قبضو علي مرات ابنك علشان لما تكتشف اللعبه ما تلحقش تتصل بيك 

جابر

انت يا شناوي يطلع منك ده كله

فيضحك شناوي بشده ويقول

انا طيب يا جابر لكن. مش عبيط زي ما انتوا فاكرين و ديما بيقوله اتقي شر الحليم اذا غضب وانا دلوقتي غضبان وكلي شر.    وكان نفسي اخلص عليك وعلي عزت بايديه لكن انتو ارخص من اني اخش فيكم السجن تاني. ودلوقتي بقي بعد مارجعتلك ابنك بالسلامه نقدر نبدأ العمليه

جابر

شناوي ابوس ايدك ارحمني انا طلبت منك الرحمه اكتر من مره.  خليك احسن مني وسامحني

شناوي

ربنا اللي بيسامح.  لكن انا.  لا.      لكن انت صعبت عليه وبفكر اني الغي العمليه ومش هاخد منك الكليه ولا فص الكبد 

سكر

ليه كده بس يا عم شناوي اومال هنتغدي ايه

شناوي لسكر 

هنجيب كبده بلدي 

سكر وهو بيبص لجابر

بس هو في احلي من كبدة حيوان زي دة 

شناوي

عيب يا سكر احنا متربين مش هانقبي واطيين زيهم 

ثم يبص شناوي  لجابر ويقول 

بس انا علشان اسامحك خالص ونيتي تصفي من ناحيتك عايزك تحكي لسمير ابنك انت عملت فيه أيه وجمعت ثروتك دي منين

جابر

شناوي.   بلاش كده انا طول عمري مثل اعلي لابني

شناوي بمنتهي الغل. يقول 

وانا طول عمري محروم من بنتي.  ويا أما  تعمل اللي قولت لك عليه ياما اخلي نصر يبدا العمليه ومن غير بنج

فيبص جابر  ل سمير اللي كان بيبص له وفي عيونه اسئله كثيره ولكن فمه المكمم منعه من الكلام.  فيبص سكر  لجابر. ويقول 

ايه هانستني كتير نصر راجل كبير وبيحب ينام بدري لخص

شناوي

شكلنا كدة يا سكر  هانتغدي بالكبده بتاعت جابر  النهارده

سكر ضاحكا

حبيبي يا عم شناوي هو ده الكلام

جابر

لا لا هاحكي له علي كل حاجه

ويبص جابر ل سمير تاني ويحكي الحكاية من اولها لاخرها فتنزل دموع سمير اللي مش مصدق ان ابوة بالوساخة دي

ومايقدرش جابر يبص في عيون ابنه ويقول لشناوي 

خلاص يا شناوي خلصت عليه وارتحت

شناوي

لسه فاضل العمليه

جابر

عمل،،،،،،

ولكن مجانص يحط كمامه علي بق جابر فيمنعه من الكلام ويقول شناوي لجابر

انا خد حقي بمجرد ما عرف ابنك حقيقتك وانا عارف ان سمير ابنك محترم مش زيك انما فاضل حق رشدي اللي اكيد مات علي ايديكم وحق سالم وحق عوض وحق كل مظلوم مات بسبب لعبة الغدر دي.  علشان كدة نصر بايدة اللي بتترعش دي هايعمل لك عملية وانت ونصيبك بقي يا تطلع حتة واحدة يا تطلع كذه حتي 

وبعد كدة يبص شناوي لسكر

بعد ما نصر يخلص العملية سلمو للبوليس وهما ياخدوا حق كل اللي ماتو علي ايدة ،

نصر 

والبوليس هايقبض عليه بتهمه اية

شناوي وهو بيبص لسكر

هو انت ماقولتش للدكتور يا سكر.   ان العيال اللي خدهم اخر مرة من مخزن عزت وجابر.  اتصورو وهما عنده في العيادة وبيتقطعو جوة الاوضة اياها

فينصدم نصر ويقول

انتو وصلتو ازاي للاوضة السرية

سكر

اصل الممرضة بتاعتك.  طلعت كلبه فلوس صورتك وباعت صورك لينا.  يا حمار 

وساعتها كان شناوي بيبص لسمير وبيقول له

اسف اني دخلتك انت ومراتك في انتقامي.  بس اللي اعمله ابوك فيا ما كنش شوية

فتنزل دموع سمير حزن علي اللي عرفه عن ابوه وقال شناوي نصر بعصبية

اعمل العملية

ويروح دكتور نصر ناحية جابر وهو ماسك المشرط وايدة بتترعش  وحط المشرط عند كلية جابر الشمال وبدأ يقطع. في لحم جابر وجابر بيصرخ صرخات مكتومه،،،،،،،،

وتعدي الليلة والصبح بدري تقف جميلة قدام  عزت اللي استعاد وعية بعد حقنه البنج اللي خدها في رقبته وكانت جميلة بتقول 

اية اللي خلاك تنام علي الارض كدة

عزت وهو لسه عيونة  مزغللة ودماغة تقيلة يقول

ماعرفش. انا كنت كويس وفجاة لقيت نفسي وقعت مغمي علية

جميلة

طيب تحب اتصل بالدكتور يجي يطمئن عليك

عزت

ملهوش لزوم.  انا هابقي كويس

جميلة

طيب انا لازم اروح المعهد النهاردة علشان العرض الاول للمسرحية بتاعتنا.

عزت

روحي المعهد بتاعك وانا هابقي بخير

جميلة

خلاص ماشي. وانا لما اخلص برضو هاتصل اطمئن عليك 

وتمشي جميلة ويروح عزت  ناحية الشاشة اللي بتعرض اللي تم تسجيلة عن طريق كاميرات المراقبة. ورجع  الشريط لغاية ما وصل لليلة امباراح  ولكنة ملقاش اي حاجة غريبة.  ومافيش حد غريب دخل الفيلا ولا في حد خرج منها فاستغرب اوي وقال لنفسه 

يعني اية اللي خدرتني امبارح دي كانت. واحدة من اللي عايشين  معانا في الفيلا.  طيب هي مين 

 وفي نفس الوقت ومن جوة مطبخ فيلا عزت.    كان عزت واقف علي باب المطبخ دة وبيبص للي شغالين عنده وبيحاول يفتكر اللي شافها امباراح بتجري.  لكن كل اللي كانو واقفين كانو اقصر من اللي شافها. فبصت واحدة منهم لعزت وقالت 

عايز حاجة يا عزت بية

فيمردش عزت  عليها. ويخرج من المطبخ. ويرجع للاوضة اللي اتخدر فيها ويبدا. يدور في كل شبر في الاوضة عن اي حاجة ممكن توصله للي عملت في كدة. لكنه ما يوصلش لاي حاجة.  فيقعد علي السرير الموجود في الاوضة وهو عمال يفكر في كل اللي بيحصل له، ،،،،

 وفي نفس الوقت ومن جوة عربية مالك اللي كانت واقفه قدام معهد فنون مسرحية.  كان مالك قاعد جوة العربية وجنب منه بنت اسمها سعاد  وكان عمال يضحك معها وماسك ايدها لكن مالك وهو بيهزر مع سعاد  دي لمح بطرف عينه ابراهيم داخل المعهد. فقال لسعاد بسرعه 

يالا انزلي بسرعه

سعاد 

انزل ليه.  قوام كده زهقت مني

مالك

ابراهيم عدي علينا وشكله شافني.  وممكن جميله تساله عليه ويقول لها انه شافني معاكي

سعاد 

وفيها ايه انا زميلتك في المعهد وعادي لما اقعد معاك 

مالك

لا مش عادي جميله اتصلت بيا اكتر من مره وانا بسببك ماردتش عليها يالا انزلي بقي هي اصلا ما بتحبكيش

سعاد بدلع 

مش مهم هي تحبني المهم انت

مالك

مش وقته الكلام ده

فتميل عليه سعاد وتقول 

مالك انا بحبك 

وفي نفس الوقت  تقف جميله قدام عربية مالك وكانت معها دهب  وتقول له

لما انت هنا ما بتردش ليه علي موبيلك 

مالك بارتباك شديد

انا ما سمعتش الموبيل رن

فترن عليه جميله ويرن موبيل مالك وتقول جميله

ليك حق ما تسمعش رنتي ما انت مش فاضي. والهانم اللي معاك دي اهم مني

وتسيبة وتمشي هي ودهب فيبص مالك لسعاد ويقول لها بعصبية 

ما انا قولت لك انزلي عجبك كده

وينزل من العربيو ويجري وراء  جميلة لغاية ما يوصل لها ويقف قدام منها وهو بيقول 

يا جميله دي كانت بتسالني علي حاجه وكنت مش عارف ارد عليكي 

جميله

الكلام بينا انتهي ارجع وروح لها بدل ما تزعل منك 

وتسيبة وتمشي فيقف قدام منها مالك تاني ويقول 

ياجميله ممكن تقفي عشان نتكلم مش هاينفع افضل اجري وراكي كده في الشارع 

جميله

وانا مش عايزا اتكلم معاك هو ايه بالعافيه

مالك

لا مش بالعافيه بس انتي خطيبتي ولازم تسمعيني

جميلة وهي بتقلع الخاتم وتحطه في ايد مالك

انا ما حبش اكون نمره اتنين في حياة اي حد. حتي لو انت

مالك بعصبيه

ايه يا جميله واضح ان ابراهيم عرف يسخنك عليه 

جميله باستغراب

ابراهيم. وابراهيم ماله بالموضوع ده

مالك

مش هو اللي جري وراح قال لك اني قاعد في العربيه مع واحده

جميله

ما تظلمش ابراهيم يا مالك ابراهيم ما قاليش حاجه ده انا حتي سالته عليك وانا خارجة من البوابة  قال انه ما شافكش

مالك

لا بجد وانا هاصدق الهري ده. 

جميلة

انا مش كذابة

مالك

انتي اة مش كذابة لكن هو خبيث وارتاح لما وقع بينا وانا بقي لازم اعلمة الادب.  

ويسيبهم مالك ويدخل المعهد ويفضل يبص علي ابراهيم لغاية ملاقا.  فراح ناحيته جري وهو عصبي جدا. وضرب ابراهيم بالبوكس في مناخيرة وكان بيقول 

ارتحت لما وقعت بيني وبين جميلة

فيبص ابراهيم لمالك مستغرب ولسة مالك هايضربه كمان بوكس. قدر ابراهيم يمسك ايدة وهو بيقول 

في ايه يا مالك.   ما تلم ايدك بدل ما اقطعهالك

وفي الوقت دة تقف جميلة قدام مالك وتبعده عن ابراهيم وهي تقول

ايه اللي انت بتعمله ده انت مجنون

دهب 

ابراهيم ما قالش حاجه لجميله انا اللي شوفتك وانا داخله المعهد واتصلت بجميله وقولتها تطلع تشوف بنفسيها وقابلتها عند باب المعهد

مالك

انتي

دهب

اه انا.   ايه اشوفك وانت بتخون صاحبتي واختي واسكت

مالك

انا ما بخنش جميله دي زميلتي في المعهد وكانت بتسالني علي حاجه 

دهب

انا شوفتك وانت تقريبا في حضنها ده كان ناقص تبوسو بعض في الشارع

ويضرب مالك دهب بالقلم علي وشهها وهو يقول

كدابه. بنت كلب

فتتوجع  دهب من قوه القلم فيهجم ابراهيم علي مالك ويضربه بالقلم زي ما ضرب ذهب ويقول ابراهيم 

اول مره اعرف انك مش راجل

فيبص له مالك والشر في عيونه ويقول

انت بتضربني.  بتضرب مالك ابن سراج

ابراهيم

طظ فيك وفي ابوك هو انت عشان ابوك معاه فلوس ده يديك الحق انك تضرب بنات الناس

مالك

انا هاوريك يا ابراهيم لو ما ضيعتش مستقبلك

فتقف جميله قدام  مالك  وهي بتبص لي دهب اللي ماسكة  خدها وعماله تعيط بحرقه.  فترفع جميلة ايدها وتنزل بقلم قوي جدا علي وش مالك فيبص لها مالك. وكل اللي في المعهد اتلمو علي الخناقة دي. وكانت جميلة بتقول 

قول لباباك سراج ان جميلة ضربتني بالقلم. وخلي يجي يجيب حقك. مني 

فيبص مالك لجميله ويقول لها

بتضربيني بالقلم يا جميله بتشتري ابراهيم ودهب وتبعيني انا ماشي والله يا جميله لتندمي

ويسيبهم مالك ويمشي وجميلة تروح ناحية صاحبتها وتاخذها في حضنها وهي تقول لها

كنت بتقولي علية اية

فتبتسم ذهب وهي بتعيط وتقول

عيل ملزق

وتضرب ذهب جميلة في كتفها وهي تقول

ذوقك عكر

ويضحك الثلاثة وجميلة تبوس صاحبتها وهي تقول

حقك علية. اضربتي بسببي 

ذهب

هو في بين الاخوات حقك وحقي ،،،،،،،،،،

وبعد مرور كام ساعه ومع حلول الظلام تقف خمس عربيات  مرسيدس . قدام بوابة فيلا عزت وينزل  20 راجل مسلحين ويدخلوا لفيلا عزت بالقوة  بعد ما سيطروا علي حراس الفيلا ويدخلو الفيلا. فيقف قدام منهم عزت ويقول 

انتوا مين ودخلتوا هنا عايزين اية 

فتخرج نوال  ومعها عزام من وراء الرجاله وتقول نوال 

ازيك يا عزت بيه

عزت باستغراب شديد

انتي ايه اللي جابك هنا

نوال 

جه وقت خروج الشيطان من الجنه وقت الحساب. الوقت اللي هناخد منك في كل اللي حيلتك حتي جميلة 

عزت بعصبية

جميلة مش هاتخرج من هنا الا وانا ميت 

فتقف جميله جنب  عزت بعد ما خرجت من اوضتها علي الصوت وتقول

مين دول يا بابا

نوال 

جميلة. دة مش باباكي.  

جميله باستغراب وهي بتبص لعزت

بتقول ايه دي

عزت

دي ست  كداب 

في الوقت دة يسمع عزت صوت ست هو عرفها كويس بتقول 

لا مش كذابة 

و تدخل للفيلا ست ملامحها مش باينه وكانت  علي كرسي بعجل.   وتبص ناحيه جميله فيبص عزت للست الموجوده علي الكرسي اللي ملامحها بانت وبصت له بغضب الدنيا كله فقال وهو قلبة هايقف من الصدمه 

جيهان مرات شناوي. طيب ازاي انتي ميته

وتفضل جيهان تبص له بصة ترعب

                          نهاية الحلقة السابعة

ح(8)

سجين الغدر 2

وقت الحساب 

                          

من تاليفي، ، 

محمد منصور.  

** منص **

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

بسم الله توكلت علي الله. وهو رب العرش العظيم

                        ‏

وفي هذه اللحظه تدخل الي الفيلا امراه علي كرسي بعجل وتبص ناحيه جميله فيبص عزت للمراه الموجوده علي الكرسي ويقول باستغراب شديد ويكاد قلبه يقف 

جيهان مرات شناوي

فتبص له جيهان بصة ترعب وعزت بيقول 

انتي موتي. ازاي ازاي عايشة 

جيهان بصوت يرعب 

جه وقت خروج الشيطان من الجنة. ورجوعه لجهنم  ومن تاني جميلة ترجع لحضن ابوها وامها 

وتقترب جيهان منه وتبص له بصة كلها كرة. وهو بيعبد عنها وهو خايف اوي وعمال يقول 

انتي عايزا مني اية 

لكن واحد من الرجاله الموجودين في الفيلا يمسك عزت اوي. ويحط ايده علي بوق عزت.  وعزت بيحاول انه يفلت منه.  لكنه ماقدرش وتبص جيهان لنوال وتقول

الحقنه

فيبص عزت وهو مرعوب لنوال اللي رايحة ناحية جيهان وفي ايدها حقنه شكلها غريب وتمسك جيهان الحقنة من ايد نوال. وتغرز سن الابرة في الوريد الرئيسي اللي بينقل الدم للمخ. واللي موجود في رقبه عزت.  فيصرخ عزت صرخة مكتومة ويبص لجيهان وهو مش فاهم هي عملت اية.  فتقول جيهان

هانت كلها كام ساعه. وتخلص الحكاية بس نصيحة خليك ديما في الفيلا واوعي تهرب علشان علاجك هنا وبس.  دور علي العلاج قبل ماتبقي، ،،

وتسكت جيهان وتبص للراجل اللي ماسك عزت بطرف عينيها.   فيضربة الراجل بكعب المسدس في راسه. ضربه قوية يقع بعديها عزت مغمي عليه، ،،،،،،

وبعدها بشوية ومن جوة بالكونه شقه سكر.   يقعد  شناوي وكان بيبص للحارة  وهو حزين فدخل عليه سكر ومعه كوبيتين شاي وقال 

باصص للحارة بقالك ساعه كامله. للدرجة دي عجباك خرابا سيتي اللي احنا عايشين فيها 

فيضحك شناوي ضحكة بطعم المر.  وياخد كوباية الشاي من علي ايد سكر وكان باين عليه الهم فيقول سكر

مالك حزين لية كدة

شناوي

صعبان عليه شناوي 

سكر باستغراب

شناوي مين اللي صعبان عليك

شناوي

انا

سكر

وانت صعبان عليك شناوي ليه.   ما انت خد حقك من جابر وسلمت نصر للحكومة.    يعني المفروض ما تكنش زعلان

شناوي

ازاي ما كنش زعلان.  دة في بني ادم اتعذب بسببي

سكر باستغراب 

بني ادم.   مصيبة لو يكون صعبان عليك جابر

شناوي

انا ما تعودش اكون سبب في اذيه حد

سكر

انت ازاي كده وازاي في قلبك رحمه علي حد كان ها يخليك تتشنق ظلم 

شناوي

انا، ،،،،

سكر مقاطعه له 

انت غلطان لو فكرت كده دي عالم وسخه وتستاهل اكتر من كده وانت لو فكرت انك ترحمهم انا مش هارحمهم والمشوار اللي بداته معاك هاكمله لو حتي لوحدي

شناوي

للدرجه دي

سكر

واكتر من كده.  عم شناوي انا اتكويت مره بنار الظلم وما خدش حقي والمره دي انا مش هاسيب حقك

شناوي

ومين اللي ظلمك يا سكر

سكر

ابويا

شناوي باستغراب شديد 

ابوك

سكر

اه.  ضحك علي امي واتجوزها وسرق دهبها واول ما حملت في مجانص رماها في الشارع وخد شقتها واتجوز عليها وامي من الحسره ماتت بعد ما خلفت مجانص  ما استحملتش الظلم.   وانا بقيت لوحدي في الشارع ومعايا اخويا ناكل من هنا شويه ومن هنا شويه لغايه ما لقيت نفسي بقيت حرامي ونصاب ومزور.   عايزني بعد ده كله اشوف ظلم ناس لراجل طيب زيك وفي ايديه اجيب حقه واسكت

شناوي

انت بتساعدني علشان اتظلمت وذوقت طعم الظلم

سكر 

الغدر وحش. ومش بساعدك  علشان كده وبس 

شناوي

اومال ايه تاني

سكر

علشان انت بتفكرني بامي

شناوي ضاحكا

بفكرك بامك ماشي ياعم شكرا

سكر ضاحكا

مش قصدي والله.   انا قصدي انك طيب زيها.  ومهما كان ابويا بيعمل فيها.  كانت بتدعي له وكانت عايزا تكمل معها.

وانا كنت عيل وكرهت ضعفها لو كل مظلوم سكت علي ظلمه وساب الظالم يسوق فيها.  يبقي نستاهل اللي يحصل فينا وساعتها الظالم هايحس انه صاحب حق.  الدنيا كدة يا عم شناوي يا ظالم يا مظلوم 

شناوي

بس انا. مش عابز ابقي ظالم ولا ابقي مظلوم.  انا كل اللي عايزه.   اخد بنتي جميله في حضني وارجع شقتي القديمة وعيش اللي فاضل من حياتي وانا في حضن بنتي

سكر

وماله خد حقك من اللي سرق بنتك وكان عايز يسرق فلوسك وبعد كده خد جميله في حضنك وعيش حياتك

شناوي

انت شايف كده يا سكر

سكر

وابو كده وام كده احنا في سبق وخلصنا علي اثنين  وفاضل  الشيطان. عزت 

شناوي 

يبقي لازم اكمل اللي بدته

سكر

اللي بدانا سوي.   و مش ناوي بقي تجيب 5 جنيه وافرجك  علي السبع وهي بتستحمي 

فيضحك عم شناوي ويقول

وربنا بحبك زي جميله بنتي

سكر

انا اللي بحبك يا راجل يا طيب

ويبص شناوي للحارة تاني وهو بيقول 

جه وقت حسابك يا عزت ،،،،،،،

وبعدها بساعه ومن جوة فيلا عزت.  يدخل ابراهيم ومعه ذهب.  للفيلا اللي كان بابها مفتوح  وتصرخ دهب اول ما تشوف  عزت مغمي عليه. وواقع علي الارض والدم نازل من دماغه.  فيروح ناحيته ابراهيم بسرعه ويهز في لغاية ما يفوق وابراهيم بيقول له 

عمي عزت. مالك في اية 

عزت بصعوبه شديدة وعيونه كانت مزغلله قال

 ناس هجموا علي الفيلا وخطفوا جميله بنتي

دهب مصدومه

جميله اتخطفت انت بتقول أيه يا عمي

عزت 

ايوة اتخطفت بس انا مش هاسكت 

ويقوم عزت بصعوبه ويروح لجابر فيلته ويسال عليه مرات ابنه لقاء لغاية ما عرف انه في اوضة نومه فاول ما دخل عليه لقي جابر بيقول

انت جيت يا وش المصايب ادي اخرة لعبتك الوسخة

عزت 

مالك

فيرفع جابر هدومه ويوري عزت مكان الخياطة والجرح. اللي ناحية كليته.  وكان بيقول. بعصبية 

شناوي ابن الكلب خلي نصر.  ياخد كليتي وفص من الكبد.  وكله بسببك انت امشي انا مش عايز اعرفك تاني

كان يوم اسود يوم ما سمعت كلامك 

فيتوجع جابر بسبب العصبية والجرح يشد عليه فيقول له عزت 

احنا في اللعبة دي سوي من الاول. والفيلا والفلوس اللي عندك بسبب لعبتي. ولازم تهدئي  علشان في مصيبه حصلت ولازم نتكلم 

جابر

مصيبه ايه اكتر من اللي انا في.  يا ما قولت لك سيب شناوي ياخد بنته ويغور يبعد عن طريقنا

عزت

بنته وهي فين بنته

جابر باستغراب 

بتقول ايه

عزت 

بقول ان جميله خدتها جيهان 

جابر

جيهان مين

عزت

جيهان مرات شناوي

جابر

عزت انت في وعيك. جيهان ماتت من سنيين

عزت

جيهان ما متتش جيهان عايشه وطلعت متفقه مع اللي اسمها نوال 

جابر

لا بقي ده احنا كده بنعيش اسود ايام حياتنا

عزت

انا مش عارف ازاي تطلع عايشه ولما هي عايشه ليه سابت لي بنتها كل السنين دي معايا

جابر

ممكن خافت علي نفسيها وعلي بنتها منك

عزت

خافت وظهرت ليه دلوقتي.  واللي هايخلني اتجنن الحقنه اللي خدها في رقبتي.  وبتقولي علاجها في الفيلا.  

جابر

انا مش فاهم منك حاجة ومش عايز افهم. بالنسبه لي ان كدة شناوي خد حقة مني ومش عايز مني حاجة تاني

عزت

يعني ايه الكلام ده.  احنا في حرب سوي هانسيبهم يكسبونا 

جابر

بعد اللي حصل لي انا بره الحرب دي

وفي الوقت دة يدخل سمير. عليهم الاوضة. ويبص لجابر وهو بيشاور علي عزت. ويقول بعصبية 

الراجل ده بيعمل ايه هنا. وازاي لقاء تدخلة عندك 

عزت لسمير وبحدة 

انت بتتكلم معايا ليه كده

سمير

انا هنا في بيتي واتكلم زي ما انا عايز

جابر

سمير ما يصحش كده.

سمير لجابر وبعصبية 

بقول لك ايه الشيطان ده لو فضل في بيتنا هنا هانسي انك والدي و انت وهو هاتخرجوا من هنا فاهم ولا. لا 

جابر باستغراب 

انت بتقول ايه

سمير بعصبيه

بقول اللي انت سمعتو كفايه كل الوساخه اللي عرفتها عنكم وما بلغتش البوليس لغاية دلوقتي. عنكم 

جابر

عايز تبلغ عن ابوك.   بدل ما تجيب حقي من اللي فتح جسمي وسرق اعضائي 

سمير ضاحكا 

سرق ايه. الراجل النظيف اللي زي شناوي ما يعملش كده هو بس كان بيحرق اعصابك

جابر

يعني اية 

سمير

يعني انت سليم وما خدش منك ايه حاجه عارف ليه عشان انت صعبت عليه هو بس خلي الدكتور يفتح لك جرح ويلمه بكام غرزه

جابر يفرح بشدة ويقول

يعني انا سليم. ماخدش مني حاجة 

سمير

سليم وده مجرد جرح وهايلم وهاتبقي كويس لكن انا اللي عمري ما هابقي كويس. بعد اللي عرفتة عنك 

 

جابر

سمير انسي اللي فات وسامحني انا والله ندمت علي اللي حصل

سمير

مش بايدي لكن انت ابويا ولازم اكرمك في اخر ايامك ودلوقتي

ثم يبص لعزت ويقول

الشيطان ده يخرج من هنا وتقطع علقتك بي نهائي 

جابر

اللي انت شايفه يا ابني

ثم يبص جابر لعزت ويقول

عزت انت سمعت سمير ابني قال ايه ياريت تاخد بعضك وتطلع بره وما شوفش وشك تاني

عزت

انت شايف  كده

سمير وهو يزق عزت برة الاوضة يقول

يالا غور اطلع بره

ويزق سمير عزت برة الاوضة. وجابر يبص لسمير ويقول والفرحة علي اخرها 

يغور في ستين داهية المهم اني بخير. وهاعيش. صح يا سمير. مش انا هاعيش 

سمير

اللي عايزة ربنا هو اللي هايكون. 

جابر

طالما ما اتخدش حاجة من جسمي هاموت لية. انا هاعيش وهاعيش سليم مش هاموت. مش هاموت

ومن شدة الفرحة يحس جابر بوجع شديد في قلبة ويمسك قلبة وهو يقول بصعوبة

الحقني يا سمي،،،،،،

ولكن القلب توقف  ومات جابر بالسكتة القلبية، ،،،،

وبالليل ومن جوة  فيلا عزت يقعد  شناوي في اوضة نوم عزت  ومعه سكر ومجانص ويفتح باب الاوضة  عزت ويدخل ويتصدم لما شاف شناوي قدام منه. وشناوي بيبص له ويقول له 

واحشتني يا اوطي خلق الله

عزت مرعوبا 

شناوي.   عايز اية مني 

شناوي

عايز بنتي 

عزت

بنتك خدتها جيهان 

شناوي

جيهان هي لسة عايشة.  تصدق فاجتني 

ويبص شناوي ناحية الحمام الموجود في الاوضة وتخرج جيهان وهي بتضحك وشناوي يبص لها وهو يقول

تصدق طلعت عايشة 

عزت

خلاص بقي خلصت وبنتكم معاكم عايزين ايه بقي مني 

شناوي وهو يبص لسكر بيقول لعزت 

جاي علي علشان اديك الفلوس اللي انت بسببها  حرمتني من بنتي وسرقتها 

ويحط سكر شنطه فيها فلوس كتير ملايين فيبص عزت للفلوس ويقول شناوي

هي دي الفلوس اللي انت عملت عشانها كل حاجه خدها ولو عايز جيهان كمان خدها.   وانا هاخد منك الحاجه اللي نقصاني

وعزت كان بيبص له باستغراب شديد لانه مش فاهم هو يقصد اية وقال عزت 

انت تقصد أيه

فيبص شناوي  في ساعته ويقول

هانت وهاتعرف 

ثم يبص شناوي لجيهان ويقول لها

مش هانت برضو

جيهان

هانت جدا. 

وفي الوقت دة  تبدا اليد اليمين لعزت تصاب باعاقه غريبة زي اعاقة شناوي. فيستغرب عزت من اللي بيحصل  ويقول بصعوبه وهو يتهته والرياله تنزل من بوقة 

اي اية ال اللي بي بيحصل لي

فترجع أيد شناوي اليمين  سليمه ويتكلم بطريقه طبيعيه ويقول لعزت

انا نقلت العبط اللي عندي عندك وبقيت انا السليم وانت العبيط حلال عليك الفلوس 

فيبص عزت لشناوي اللي بقي  سليم  باستغراب شديد وهو هايتجنن، ،،،،،،،،،،

                     نهاية الحلقة الثامنه 

                     ‏

ح(9)

الاخيرة 

سجين الغدر 2

وقت الحساب

                         

                            

                                ‏

  من تاليفي، ،

  ‏

  ‏محمد منصور.  ** منص **

  ‏

  ‏وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ 

  ‏

  ‏بسم الله توكلت علي الله. وهو رب العرش العظيم                     ‏                   

 وفي هذه اللحظه تبدا اليد اليمين لعزت تصاب باعاقه غريبه زي اعاقة شناوي. فيستغرب عزت مما يحدث ويقول بصعوبه وهو يتهته والرياله تنزل من فمه

                       ‏

ايه اللي بيحصل لي

                       ‏

فترجع أيد شناوي اليمين  سليمه ويتكلم بطريقه طبيعيه ويقول لعزت

                       ‏

انا نقلت العبط اللي عندي عندك وبقيت انا السليم وانت العبيط حلال عليك الفلوس 

                       ‏

فيبص عزت لشناوي اللي اصبح سليم تماما باستغراب شديد ويكاد يتجنن 

ويقول  عزت بصعوبه وهو لسة بيتهته 

از. ازاي ان انا بق بقيت ك كده وان انت خف خفيت

شناوي

اصل انا دعيت ربنا ان اللي فيا يبقي فيك وفي المقابل انا لوخفيت مش عايز الفلوس وعشان كده ناويت اتبرع بفلوسي كلها لواحد عبيط وانت صاحبي الوحيد وعبيط فحلال  عليك الفلوس

عزت

لا ان انا مش عا عايز فل فلوس.  خل خليني. ار ارجع اتك اتكلم زي الاول من غير التهتهه دي وايدي ترجع تتحرك

شناوي

وارجع انا عبيط تاني لا ياعم انا كده زي الفل سليم ومش عبيط وايديه الاتنين بيتحركوا هاعوز ايه تاني من الدنيا

فيبص عزت لجيهان ويقول لها بتوسل 

جيهان قولي لي شناوي يرجعني زي الاول انا مش عايز اعيش كده

فتضربة جيهان بالقلم وهي تقول

اسمي أم جميلة. لاني بكرة اسمي لما بيطلع منك 

عزت

اضربي كمان . بس ابوس رجلك 

وينزل عند جذمة جيهان علشان يبوسها  لكن جيهان تبعدة عنها وهو يقول

خلي شناوي يرحمني.

جيهان باستزهاء 

يرحمك.  دة انا 15 سنة بعيدة عن جوزي وبنتي بسببك 15 سنة مستنيا اللحظة دي وانت قدامي مكسور ومذلول تحت رجلي انا وشناوي. اوعي تكون فاكر اني لما بعت لك نوال بالفلوس كنت غبية ولما جيبت الفيلا دي وجهزتها علشان انتقامي منك. يكمل.  كنت عايزا ليك الراحة. لا يا عزت انا بس حبيت اخليك تعمل ذنوب كتير وتكبر وذنوبك تكتر حبيت اخليك تحب الدنيا جدا علشان تنسي وقت الحساب ورغم كل اللي كان معاك فضلت فاجر. وكمان بتربي بنتي علشان طمعان في فلوسها وجسمها.  

عزت

لا. 

فتضربة جيهان بالقلم وتقول

الفيلا  مترشقة كاميرات  بتسجل لك كل كلمة صوت وصورة. ومسجله لك اتفاقك الخسيس مع مالك خطيبها واظن فاكر ليلة ما فكرت تهجم علي جميلة وتسرق منها شرفها. ساعتها كان لازم احمي بنتي.  انا اللي ليلتها  اديتك الحقنه وخدرتك.  

وتمسكة جيهان من شعره وهي بتقول

حتي انت ساعتها شكيت في كل  اللي شغالين عندك في الفيلا.    لكنك غبي يا عزت ورغم اني عيشت معاك في الفيلا. لكنك عمرك ما شوفتني

فيستغرب عزت بشدة فتقول جيهان

الدولاب اللي في الاوضة اللي جنب اوضة جميلة.  بيوصل لسرداب بيودي لاوضة تحت الفيلا. وكنت ديما عايشة في 

الاوضة.  قريبة من بنتي علشان احميها وقت اللزوم من شيطان زيك 

وتعيط جيهان وتقول بحرقة 

حرمت علي نفسي الحرية. زي ما اتحرمت علي شناوي  وخليتك تصدق اني ميته علشان تنساني واقدر انتقم منك  وفي نفس الوقت حاولت اوصل لدليل براءة شناوي.  لكن ماقدرتش وزي ما شناوي عاش في سجن عيشت انا كمان وفضلت اتابع جميلة وهي بتكبر قدامي لحظة بلحظة واستنيت شناوي يخرج وخوفت علية منك علشان كدة طلبت من نوال ان عزام جوزها يقول انه ابو جميلة واخليك تنسي شناوي وتركز مع عزام لغاية ما يكمل انتقامنا 

فينزل عزت عند جذمة شناوي وهو يقول

انتقامك انت ومراتك انا مش هاقدر استحملة ابوس رجلك ارحمني 

 فيبعد شناوي وش عزت  عن جذمته وهو يقول 

ابعد بس علشان الرياله ما توسخش الجذمه

ويقعد  شناوي علي السرير. وهو يقول

وبعدين المفروض لما تطلب الرحمة تطلبها من المظلوم مش مني انا

عزت وهو مصدوم

مش انت شناوي

في الوقت دة. يتفتح  باب الاوضة. وتدخل جميلة وذهب ومعاهم شناوي الحقيقي بيده اليمين  المعاقه وبكلامه المتهته.   فيبص له  عزت وهو علي الارض باستغراب شديد وقلبه كان هيقف من اللي بيشوفو.  وقال وهو منهار 

انتوا ايه عايزين تجننوني اقتلوني ارحم من كده

شناوي بصعوبه 

هاتموت ما تقلقش وماتستعجلش

عزت

انت شناوي 

شناوي

صح انا

فيبص عزت لشناوي اللي  علي السرير ويقول

اومال مين ده

فيخلع شناوي القاعد علي السرير ماسك بنفس وش  شناوي.   ويظهر وش أبراهيم صاحب جميله في المعهد فينصدم عزت ويقول

ابراهيم انت مع شناوي ازاي

جميلة وهي بتقرب من عزت

ازيك يا عزت بيه. 

فتبص جميلة ل شناوي وتدمع عيونها وشناوي يبكي بحرقه وياخذها في حضنه ويقول

دلوقتي اقدر احضنك يا جميله بابا

فتعيط جميله وتستخبي  في حضنه ابوها  وتقول

حبيبي وحياتي خدني في حضنك وخبيني يا بابا. من اي كلب حاول ينهش لحمي 

عزت بتهتهه 

يعني أيه، ،،،

فيضرب سكر.   عزت علي قفاه وهو بيعيط وبيقول 

استني يا ابن البارده خليني اتفرج علي الحضن.  ده كله الا  الحضن بتاع الحلقه الاخيره ده

فتمسح جميله دموعها وتبوس ايد شناوي وتروح ناحية مامتها جيهان وتحضنها وتقف وسط ابوها وامها وهي بتقول

يالا نكمل اللي بدانا سوي

وتبص جميله لعزت بصه كلها كره وتقول له

ايه مش مصدق عينيك مش مصدق اني عرفت انك وسخ من بدري اوي.  وحرمت بنت عندها خمس سنين من ابوها وامها.  وعلشان اية الفلوس 

فتحط جميلة ايدها في شنطه الفلوس.   وتخرج رزمه من الفلوس وترميهم في وش عزت  وتقول

الفلوس اهه اللي انت ربتني علشانها وحرمتني من اهلي خد الفلوس بس انسا انك تخف من المرض اللي عندك. الحقنة اللي أديتهالك ماما دي متركبة علي ايد صيدلي انجليزي. واخد كتير اوي.  علشان يركبها.  وانا صاحبة فكرت انك تكون عبيط ياللي كنت فاكر نفسك اذكي خلق الله 

عزت باستغراب

ازاي كل ده يطلع منك انتي

جميله

شوفت بقي ان شناوي خلف بت لعبه بيك.   كنت بتربيني علشان انا اللي اخلص عليك.  زي فرعون ما ربي موسي وكانت نهايته علي ايده.  كان احسن ليك انك كنت سيبتني لاهل امي تربيني.  لكن كويس اني اتربيت علي ايدك وشوفت وساختك قدامي والبركة في ماما اللي.  عرفتني كل حاجة عنك بس ماما طيبة زيادة عن اللزوم كانت عايزا تسلمك للبوليس وخلاص

وتمسك شعر عزت بمنتهي الغل وتبص في عيونه جامد وتقول

لكن انا قولت لا.  لازم تتعذب زي الكل اللي اتعذبو علي ايدك.  ورسمت لك الخطة الجميلة دي. انت وجابر. من اول ليلة وبابا جالي فيها عند الفيلا. كنت انا اللي متفقة معه.  

بس صحيح عبيط زيك يعرف ازاي انه كان بيتلعب بي.  عايز تسرق شرفي انا قدامك اهو قوم امسح الرياله وخد مني شرفي 

سكر وهو بيسقف

الله عليكي يا ماما جيهان عرفت ترضيعها صح. قال وشناوي جاي يسالني علي عنوان عزت وهو عارف من الاول العنوان 

فتبص له جميله بصه معنها السكوت  فيقول سكر

معلش نسيت ان دي الحلقه الاخيره. كملي يا جميلة 

وتبص جميله لعزت. تاني وتقول

كان لازم ناخد حق كل اللي اتظلمو علي ايدكم وبدات اللعبه بغدر منك لي ابويا وخلصت بوقت حسابكم. وعلشان كدة عيش اللي باقي من حياتك عبيط

عزت وهو بيبص لشناوي

لا عرفت تخلف يا شناوي

عزت لجميله بتهته

وانتي ياجميله برافو عليكي عرفتي تاخدي حق ابوكي لكن افتكري اني في يوم من الايام كنت ابوكي ولو بالكدب وماحرمتكيش من حاجه عشان خاطر الايام دي عايز ارجع زي الاول وهابعد عنكم وزي ما دخلت حياتكم هاخرج منها

جميله

تفتكر اني انا لو رجعتك زي الاول.   بابا وماما  هاترجع لهم احلي سنين عمرهم وهما معايا وانا بكبر وسطيهم. افتكر انه مش هاينفع 

عزت بعصبيه

لا هاينفع انا عزت الحديدي اللي الكل بيحلف بذكائي مش هاسكت وهادور علي علاج للمرض اللي عندي  لو كلفني كل ثروتي

ويجري عزت ناحيه باب الاوضة فيمنعه مجانص من الخروج فيبص شناوي لمجانص ويقول

سيبه يخرج يا مجانص.  كفاية اوي اللي حصل له 

فيسيبه مجانص ويخرج عزت  من الاوضة  ويروح ناحبة  عربيته وهو عمال يقول

انا عزت الحديدي. هاخف وهارجع زي الاول وهوريك يا شناوي انت وبنتك. انا راجع لكم اخد حقي

ولسة هايركب عربيته سمع شناوي بيقول 

مالكش حاجة هنا.  اطلع منها علي رجلك زي ما دخلتها علي رجلك. كل املاك رجعت تاني باسمي بعد ما مضيت علي توكيل يحق لي ابيع بي اللي حيلتك

فيخرج عزت من الفيلا بعد ماراح راجل من الرجاله اللي برة ومنعه من ركوب العربية.  

ومن جوة الفيلا يقف ابراهيم قدام شناوي ويقول له

بكده بقي انت تبقي خدت حقك من اللي ظالموك واظن بقي انت مش عايزني تاني

شناوي

انا مش عارف اشكرك ازاي بس انت شاطر جدا في تقليد الاصوات

دهب

عم شناوي ابراهيم ده موهوب جدا واشطر واحد عندنا في معهد التمثيل

شناوي

باين عليه انه شاطر جدا

جميله وهي بتبص لابراهيم تقول

تعبناك  معانا يا ابراهيم

ابراهيم ببصه كلها حب يقول 

ما فيش تعب ولا حاجه انتي عارفه قد ايه انت غاليه عندي 

دهب

وبس

ابراهيم بارتباك

انا لازم امشي

جميله

لا انت هاتقعد معانا شويه

ابراهيم

هاقعد اعمل ايه

جميله

انا عايزاك تقعد معانا يبقي تقعد

سكر

خلاص بقي الست جميله امرت

ابراهيم

خلاص اقعد 

وفي نفس الوقت كانت جيهان بتبص لشناوي وتقول له

جه الوقت بقي نرجع تاني لشقتنا بتاعت زمان ونبيع الفيلا دي.  لان مستحيل اقعد في مكان في ريحة عزت 

شناوي

مش مهم هاكون فين المهم اني هاكون معاكي.

جيهان ودموعها بتجري علي خدها بتقول

واحشتني اوي يا شناوي. وياما اتبهدلت من غيرك 

شناوي وهو بيعيط في حضن جيهان 

باذن الله. اللي جاي من عمرنا هايكون من غير بهدلة

لكن جميلة تخش وسطهم وهي بتقول وعيونها مرغرغه بالدموع 

انا اللي محتاجة الحضن دة

فيفتح شناوي حضنة لجميلة وجيهان تحضن جميلة ايضا فيتاثر كل الحضور بهذا المشهد.   ويبص سكر لمجانص اللي كان بيعيط ويقول له

انا محتاج حضنك اوي يا مجانص

فيفتح مجانص ايدة الاثنين ويحضن سكر فبعد ماكان سكر بيعيط تغيرت ملامح وشة للقرف وقال

مجانص. انت في حد ميت تحت باطك،،،،،،،،،،

وبعدها بشهر ومن جوة المعهد. تقعد جميله مع دهب و ابراهيم فيقف قدام  جميله مالك ويقول لها

واحشتيني

فتبص  له جميله وتقول 

ازيك 

مالك

تعبان من غيرك

جميله

لا انت اجمد من كده ده انت مالك ابن سراج باشا مش واحده زيي هي اللي تتعبك 

مالك

جميله ممكن نتكلم مع بعض شويه

فيبص لها ابراهيم وتبص  لها دهب فتقول جميله  وهي بتبص لي ابراهيم

أستاذن من ابراهيم الاول 

فيبص مالك لابراهيم باستغراب ويقول لجميله

أستاذن من ابراهيم ليه

جميله

علشان ابراهيم  بقي خطيبي

ابراهيم وهو بيبص لدهب باستغراب ودهب بتبص لجميله وهي فرحانه باللي سمعته  فيقول مالك لجميلة

انتي بتقولي ايه يعني ايه خطيبك وانا

جميله

انت ايه

مالك

انا خطيبك 

جميله

كنت خطيبي. 

مالك

وياتري عم عزت موافق علي الكلام ده

جميله

مين عزت ده

مالك

عزت باباكي

جميله

انا اسمي جميله شناوي  وماعرفش حد اسمه عزت.  والاتفاق اللي كان بينك وبين عزت تقدر تقول عليه بح 

مالك بارتباك

اتفاق اية 

جميله

انك تبيعني لي وانا مراتك.  يا راجل هو في يعمل كدة غير القوادين. عارف يعني اية قواد يا ابن سراج 

مالك

انتي بتقولي ايه.  دة 

جميله مقاطعة له

هاتمشي من قدامي ولا اديك باوسخ جذمة علي دماغك وافضحك في المعهد كله 

فيمشي مالك من قدامها بسرعه. فتقول ذهب لجميلة 

انتي بتكلمي بجد انا مش مصدقه انك خلصتي من ابو دم تقيل ده

جميله

عشان ابراهيم عرف يخرجه من قلبي ودخل هو وقعد في قلبي من جوه

فيقوم ابراهيم ويبوس راس جميله ويقول

والله بحبك ومن زمان كنت بتمني حبك يا اجمل حاجة حصلت لي 

فتبص له جميلة وتضحك، ،،.،،،،

وبعدها بكمان شهر. وبعد نص الليل ومن تحت احدي الكباري كان عزت قاعد بياكل من كيس اسود في بواقي اكل.  وفي الوقت دة يقف قدام منه توك توك وجوة التوك توك سواق اسمه رجب فبص رجب دة لعزت ولهدومة المتبهدلة وبص له عزت وقال

جاي تاخدني

رجب

انت عرفت ازاي

عزت

اصلي عملتها قبلك. 

لكن رجب ينزل من التوك توك. بسرعه ويبنج عزت اللي حاول يهرب وهنا افتكر عزت. سوزي وهي عند نصر وافتكر سالم وعمال عزت يحاول الهروب من رجب وهو بيفتكر عوض اللي خبطة بالعربية وعوف ورشدي وبنت العشر سنين اللي امر بقتلها.  شريط حياة شيطان بيتعاد  قدام منه لغاية ما فقد الوعي وماصحيش الا واللي اسمه رجب دة بيحطة علي طاولة التشريح ودكتور بيقف قدام منه وبيكشف عليه وخدره تاني. واتقطع لحم عزت واتباعت اعضاءه للي دفع.   ومات الشيطان الموته اللي يستحقها 

وان ربك لمرصاد.   

وربك ليس ظلام للعبيد ولكن انفسهم يظلمون 

ورجب سواق التوك توك دة لي حكاية هابقي احكي لكم قريب باذن الله 

ونرجع لشناوي اللي جوز جميلة لابراهيم وعمل مصنع نسيج ومسك الادارة  لسكر ومجانص.  وربنا ظلم المظلوم ورد له حقة حتي ولو بعد سنين.  

 خصلت حكاية شناوي.  ولعبة الغدر. ويارب تكون عجبتكم

مستني رايكم.  واشوفكم بكرة باذن الله. وحكاية جديدة

بداية الرواية من هنا

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺