محطات العمر البارت الأول والثاني والثالث والرابع والخامس بقلم الكاتبه جمانه السعيدي حصريه وجديده على مدونة النجم المتوهج
محطات العمر البارت الأول والثاني والثالث والرابع والخامس بقلم الكاتبه جمانه السعيدي حصريه وجديده على مدونة النجم المتوهج
قصه حقيقيه وحصريا
تعالو اسمعو قصتي
اني اريج مواليد ٩٣ من فتحت عيني للدنيا وكمت افهم الكلام
واني اشوف خلافات بين امي وابوي
ابوي انسان نرجسي مزاجي ما يحب بس نفسه
قبل لايزوج امي وهو كاره العيشه بلعراق
عنده حلم يطلع للخارج
متوقع مجرد مراح يطلع للخارج راح يصير مليونير
والاجنبيات يركعن جوه رجلي
يريد يتخلص من الأحكام والقيود الي بلعراق
يريد يعيش حر
مايعرف هاي الحريه الها ثمن ويمكن هو مراح يكدر يسدد هذا الثمن
عم ابوي طالع للخارج قبل زواج ابوي بخمس سنوات
كان يدز صور الاهله وابوي متابعه ويتواصل ويااا
فكرة الهجره عجبته تخبل عليها
يكعد يكوم ياكل يشرب بس يسولف بلخارج
متوقع بس يوصل هناك الدوله راح تستقبله بلاحضان
وتنطي فرصه عمل وراتب وسكن
مايعرف هو راح يشوف المر واحتمال ينجح
اويفشل الله اعلم هو وحظه
اهل ابوي مكان عاجبهم هاي الفكره ودائما معترضين على هاي الافكار
وخاصه هو يريد يسافر تهريب مو سفره قانونيه
يعني ممكن يموت قبل لا يوصل للبلد الي رايح عليها
وهنا بيت جدي اقترحو على ابوي يزوج
على اساس اذا ازوج راح يعوف فكرة السفر وينساها
تصير عنده زوجه واطفال وينشغل
وينسى فكرة السفر نهائيا
بعد إلحاح من بيت جدي وإصرار منهم على زواج ابوي
ومعارضتهم الفكرة سفره
وخاصه هو ماعنده فلوس يسافر بيهن
وبيت جدي مصممين اذا يزوج يساعدو بفلوس الزواج
بس اذا يسافر محد يساعده
ابوي وافق وقرر يزوج بس ما شأل فكرة السفر من باله
وخاصه هو كان على تواصل يومي ويااا عمه
ابوي كان عمره بوقتها ٢٥ سنه
هنا بدت بيبي ادور على عروسه الابوي
تريده يزوج ويستقر
بعد بحث استمر اكثر من سبع اشهر
بيبي اقتنعت باامي
امي من عائله بسيطه عدها اخ اكبر منها مزوج
وامها جدي كان ميت بفترة خطبت امي وزواجها
يعني امي ماعدها بس اخ وحيد اكبر منها مزوج وعايش وياهم بلبيت
بعد ما تقدم ابوي الامي اهل امي وافقو خوش انسان ابن عائله محترمه
ليش لا البنيه بلاخير مكانها بيت زوجها
جمانه السعيدي
هسه نحجي عن عائلة ابوي
عائلة ابوي تتكون من امه وعنده اخ اكبر منه
واخته ازغر منه بسنتين
عمي حازم الجبير مزوج بت عمته وكاعد بيت عمته
يعني كعيدي
لان بيت عمته ماعدهم غير هاي البنيه الوحيده اسمها بيداء
زوج عمت ابوي مزوج ثنيين نسوان وحده ماصار عدها اطفال
ازوج عمت ابوي وصارت بيداء
هي هاي الي ازوجها عمي حازم
وعدهم عمتهم ارمله يعني عمت بيداء ارمله عايشه وياهم بلبيت
يعني عمي حازم عايش بيت عمته وعايشين وياااا بنفس البيت عمه وعمته وشريجت عمته بالاضافه إلى عمتهم ارمله
اما عمتي اني اسمها وسن ازغر من ابوي
كانت بهاي الفتره بعدها ما مزوجه
بس مخطوبه الواحد من معارف جدي معارفهم من بعيد
عايشين بلبصره
بعد سنه من زواج ابوي ازوجت عمتي وسن
هسه نجي الزواج امي من ابوي
بعد ما تقدم ابوي الامي تمت الموافقه
اتفقو على كل التفاصيل وتم الزواج بخير وسلامه
جمانه السعيدي
اول كم شهر ابوي كان فرحان بهذا الزواح
بس ما نسى فكرة السفر
يتمنى يجي يوم ويسافر بي ويعيش بااي دوله من دول اوربا
بعد ٣ اشهر من زواج امي وابوي طلعت امي حامل
اكثر ثنيين فرحانين بهذا الخبر امي وبيبي
اما ابوي حس نفسه تورط
الاطفال يعني عائله واستقرار وهو مايريد هاي العائله داخل العراق
كان يعتبر زواجه مجرد مرحله وراح تخلص
اذا حصل فرصه للسفر
بدا يخلق مشاكل وياا امي
كل يوم مشكله شكل
واكثر شي كان زاعجه وجود هذا الطفل
كان مصمم امي لازم تنزل هذا الطفل
لان هو ما مستعد يكون اب ومايريد عائله تربطه بلعراق
بيبي كانت تصبر امي وتواسيها وتوكف بصفها
ودافع عنها بعد كل ازمه تصير بينها وبين ابوي
بالاضافه اهل امي ممنوع عدهم بنيه تنفصل
كلما امي تروح زعلانه
خالي كان يتعارك وياها ويرجعها بيت عيالها
مايريدها تنفصل وترجع علي
بقت هاي المشاكل بين مد وجزر صلح يوم وزعل يومين
منا لمن اني اجيت الهاي الدنيا
ابوي ماحبني ولا تعلق بيه
رغم يكولون الطفل الاول ياخذ كل المعزه
بس ابوي كان كاره وجودي بهاي الدنيا
بهاي الفتره كانت أوضاع العراق متوتره
حصار وماكو فرص عمل والسلطه بدت تتشدد اكثر من قبل بسبب الثوره الشعبانيه
يعني مو بس ابوي ٧٥ % من شباب العراق يتمنون يهاجرون وبعد مايرجعون للعراق
الناس من كد الجوع بدت تبيع اثاث بيتها حتى تكدر بس تعيش
حلم العائله العراقيه توفر اكل شرب وبس
كلما أطول المده الضروف تصير أصعب
ابوي بدا يحس بلضياع دائما عصبي ليش مجاي يكدر يحقق أحلامه
جمانه السعيدي
وخاصه السلطه جانت حيل مسيطره بذاك الوقت
يعني واحد مستحيل يفكر هاي السلطه ممكن
تنزاح والمواطن العراقي يعيش حياته بسلام
ابوي كل يوم يشتغل شغله ويعوفها ابد ما مقتنع برزقه
يحس العراق مو مكانه
مكانه الحقيقي اذا سافر وعاش برا
المهم كتلكم عمتي ازوجت بعد زواج ابوي بسنه
كان عمري شهرين وعمتي ازوجت
بقت امي عايشه هذا الصراع وياا ابوي الي ماعاجبه العجب
وبسبب حالته النفسيه
كان يخلق المشاكل من جوه الكاع
بس امي صابره ومتحمله على أمل بيوم من الايام ابوي راح يتغير
ويرضا بهذا الواقع
ابوي كان يجبر امي تاخذ موانع حمل
لان برائيه الوضع بلعراق مو تمام
والحصار اثر على الناس
وهو موكد المسؤليه وما مستعد يتورط اكثر
ويصير عنده اطفال
وهو بلاخير بس يحصل فرصة سفر راح يسافر ويهج من العراق وبعد مايرجع ابد
الحد ماصار عمري ١٠ سنوات
سقط النظام وحال العراق بوقتها كان يخوف
لا أمن ولا امان
ومحد يعرف شلون راح يستقر الوضع
ابوي الوحيد الي كان فرحان بهذا التغير
لان حس راح تنفتح أبواب الخير علي
هلمره لازم يسافر وينتهز أقرب فرصه يحصل عليها
بدا يسئل ويستفسر شلون يكدر يطلع من العراق
بدون ما ااي احد يعرف يشتغل بلسر
مايريد احد يعرف خاف يعترض على سفره
#محطات العمر
#البارت الثاني
#جمانه السعيدي
اريج....بابا كان يحاول ويسئل ويستفسر شلون يكدر يطلع
بس يشتغل سكته
مايريد اي احد يعرف هو يريد يسافر
بس عنده مشكله ماليه هو يعرف بسبب هاي المشكله
مراح يكدر يسافر بسهوله
السفر يحتاج فلوس وهو ماعنده اي مبلغ
ولا حتى مبلغ زغير لان ماكان يصبر بلشغل يومين اتلاثه ويعوفه
يمكن اكثر شغله بقى بيها شهر واحد وعافها
ماكو غير ذهب امي هو الحل الهاي المعضله
بدا يفكر شلون يكدر ياخذ من امي ذهبها
ويريد يبيع الغرفه اكيد اذا كال اريد اسافر وبعد ماارجع
مستحيل امي تنطي ذهبها
لو تبيع الغرفه علمود يهج ويعوفنا اني وياها
بيومها جاب الامي دشداشه جديده وحلويات
وعطر تعبئه
واجا يدك ناعم
بابا...حبيبتي عيوني تدرين انتي احسن مره بلدنيا
امي....يااا اليوم شكوووو شسامع
بابا...اني احجي صدك مستحيل اكو وحده تتحمل واحد مزاجي مثلي شكد جاي اضغط عليج بتصرفاتي
ومشاكلي الي ما تخلص مع ذالك انتي باقيه
ولا جاي تحجين ولا تشتكين
خادمتني وخادمه امي وشايله البيت كله على راسج
حتى موضوع الاطفال صبرتي علي
رغم الي ازوجت وياج هسه عدهن اتلاثه واربعه
جمانه السعيدي
امي....يعني انت موافق اعوف المانع واحمل
بابا ..اكيد اني اريد ولد لعد تبقى اريج وحدها لازم يكون عدها اخ
امي...يالله ياهادي القلوب
بابا...بس اصبري شويه عندي شغله بس اخلصها راح اغير حياتنا ١٨٠ درجه
امي...شنو هاي الشغله
بابا...مشروع كلش ناجح راح يغير حياتنا ١٠٠/١٠٠
امي...يالله مشروع الك وحدك يعني انت تشتغل بي
بابا...اي لوحدي اني ماأحب الشراكه
امي...اي هاي الاخبار الحلوه
بابا. .بس اكو شغله وحده ابدي بيها مشروعي
امي....شنو هاي الشغله فهمني
بابا...محتاج فلوس افتح بيهن مشروعي وماعندي فلوس
محد يقبل يقرضني
رغم هذا المشروع ناجح وبي فلوس خير من الله
وهم بيني وبينج اني مااريد احجي هواي بهذا المشروع خاف اي احد ياخذ مني الفكره
ويشتغل عليها وساعته كلشي مااستفاد
امي...وهسه شلون
بابا...مااعرف منيين اجيب فلوس
امي...هذا المشروع مضمون
بابا...يااا مضمون ارباحه مليون بلميه
امي...اني انطيك ذهبي بيعه وافتح بي مشروعك
بابا...والغرفه هم ابيعها صارت قديمه بس اشتغل
اجيبلج وحده موديل جديد
امي...ميخالف بس كون تشتغل وتستقر
جمانه السعيدي
اريج....كدر بابا يقشمر امي اخذ الذهب باعه وباع غرفة النوم
وامي تشجع بي على اساس راح يشتغل ويغطينا الخير
منا ومنا
ابوي انطا الفلوس الواحد على اساس يرتبله الطلعه من العراق
بس هذا الشخص طلع قفاص اخذ الفلوس ونهزم
ضاع اثره عبالك فص ملح وذاب
ابوي تخبل مو علمود الفلوس لا لان ماكدر يطلع
خارج العراق مثل ماكان يحلم
ابوي لا حافظ على الفلوس ولا سافر
مر شهر وثنيين ابوي اتأكد هو انضحك علي
وكلشي ماحصل
صار عصبي اكثر من قبل يدخل يطلع يخلق مشكله
على اي سبب مشكله على الزغيره والجبيره
حياتنا صارت جحيم حرفيا ماكو راحه بهذا البيت
اني كنت اكره وجود بابا بلبيت
افرح من يطلع ارتاح نفسيا
امي ماتسكتت كانت تسئله على مشروعه
لان شافت ابوي نفس وضعه وبعد تعب اكثر
فلس مايدخل للبيت من ابوي لو ما راتب بيبي
جان كتلنا الجوع
وابوي من كد الصدمه مايقبل يرجع يشتغل ويقبل بلامر الواقع
لا معاند شنو انت معاند رب العالمين هذا وضعك اقبل واسكت
لا يقبل يشتغل ويبدي من جديد
ولا يسكت ويبطل مشاكل بلبيت
وصلنا السنة ٢٠٠٥ وهلمره ابوي لكه واحد ثقه يطلعه من العراق بس هم محتاج فلوس
منيين يجيب فلوس وهو حتى مايقبل يشتغل
بدا يفكر بخطه شيطانيه يبيع البيت الي احنا ساكنين بي
وياخذ فلوسه ويسافر
البيت بسم بيبي شلون يقنع بيبي تبيع البيت حتى يطلع للخارج
على فكره حتى بيبي كانت حيل ضايجه من تصرفات ابوي وعصبيته داخل البيت
اجا البيبي بفكره حتى يقنعها تبيع البيت بدون مايعرف
عمي حازم ولا عمتي وسن
البيعه لازم تكون بلسر
جمانه السعيدي
بهاي الفتره كانو الامربكان مسيطرين حيل
وهواي ناس تشتغل وياهم لان ينطون رواتب خياليه
وكله بلدولار
احا ابوي كعد يم بيبي وسد باب الغرفه
مايريد امي تسمع خاف توصل خبر الاخو لو الاخته
بابا...امي حبيبتي
بيبي...خير لازم عندك شي ابد مو خالي
بابا...يعني اني اذا اوكع بشده منو يساعدني غيرج
بيبي....شده ياستار ياربي
بابا...اي اني لكيت شغله تخبل وبيها فلوس
راتبها ٣ مليون بلشهر
بيبي...يالله اي هيج اشتغل ودير بالك على ببتك
ولله مااعرف زوجتك شلون متحمله وضعك هذا
هاي البنيه بت اصول
ولا انت منو يتحمل أفعالك هاي
بابا...هسه اسمعيني زين
اكو شغله وياا الامريكان بيها خير من الله
اشتغل مترجم وياهم راتبها ٣ مليون بلشهر
بيبي...يااا ويا الامريكان لا يمه اخاف عليك
بابا .... هو شنو تخافين عليه اروح ادخل للقاعده الامريكيه
ومن اخلص سياره تنقلني ترجعني
لا راح اقاتل وياهم ولا ارفع سلاح شغله مضمونه
وحلوه بس يمه فدوه لا تحجين
لان العراقيين يضوجون من الي يشتغلون ويا الامريكان
يعتبروهم اعدائهم
بيبي....كون شغله زينه وانت ضامنه ليش ما تشتغل
بابا.. يردون ضمان
بيبي...شنو يعني ضمان
بابا....يخافون لا ابيعهم للعراقيين يعني اجسس
للعراقين واحجيلهم الامريكان شنو شغلهم داخل هاي القاعده
بيبي....انت صدك تحجيلهم
بابا. .لا افهمني شلون احجيلهم هو اني ميت على هاي الشغله واريد الزمها باديه وسنوني
بيبي...اي شنو الضمان
بابا....يردون كون اكو شي باسمي يخاذون الاوراق يمهم
ضمان
بيبي. مافهمت
بابا....يعني كون بيت سياره باسمي يخلون اوراقهن يمهم
خاف اغدر بيهم ياخذون البيت لو السياره
ضمان عمل يعني حتى يتأكدون اني اشتغل وياهن
ومراح احجي اسرارهم الاي احد
بيبي...انت لاعندك بيت ولا سياره
بابا...اي مو كتلج انت راح تساعديني
بيبي...شلون اساعدك
بابا.. تكتبين هذا البيت باسمي هيج مجرد تنازل
يعني على الورق وبس
بيبي...يااا شلون اكتب البيت باسمك واخوك واختك
بابا...يمه اني قابل راح ابيع البيت اصلا اني مااكدر ابيعه
لان أوراقه راح تكون بيد الامريكان
شلون ابيعه
يمه هيج بس كتابه على ورق
اني شنو قابل راح اكل حق خواني صدك تحجين
بيبي...مااكدر اكتب البيت باسمك
بابا...هااا ماتكدرين عبالي تساعديني خلاص يعني ماكو شغل
من باجر احضر أوراق السفر راح اسافر وبعد ما تشوفين وجهي ابد
بيبي...شلون تسافر ومرتك وبتك
بابا. خليهم يمج بس هلمره اذا طلعت مراح ارجع ابد
بيبي...لاتكول هيج قابل بس هاي الشغله اكو شغل هواي
بابا...لو هاي الشغله لو اسافر هااا شكلتي
هاي الشغله سهله بس اترجم حجي بسيطه وسهله ومريحه
اصلا اني من راتبي اكدر اشتري بيت احلى من هذا البيت الف مره
يمه لا اضيعبن هاي الفرصه من ايدي
ترا الف واحد يتمنى يشتغل هيج شغله
هااا شكلتي
بيبي...مااكدر اخلي البيت باسمك
بابا...زين هاي هي باجر احضر أوراقي واطلع من العراق
بيبي...زين اخذ رائي اخوك شلون اتنازل عن البيت وهو مايعرف
بابا....اي روحي افضحيني خل الناس كلها تعرف
صدك لو كالو لا تأمن سرك يم مره حتلو امك
بيبي....انت متأكد من هاي للشغله
بابا...يمه اذا ماعجبتني ماراح اخسر شي البيت باسمي مراح ياخذون
مجرد ضمان للعمل
يمه انتي ماعندج ثقه بيه يعني اني قابل راح اكل حق اخوي لو اختي
هيج اني ناقص بنظرج
جمانه السعيدي
بيبي....يمه هاي امانه حصة اخوانك
بابا...اجيب القرءان واحلف اني مراح اكل حصة اخواني
بيبي...لا تحلف اني مصدكتك
بابا...لا تحجين اي شي عن الشغل ولا عن التنازل
لان شغلتي راح تخرب كلها
جمانه السعيدي
اريج...كدر بابا يقنع بيبي لان هي مره جبيره وتصدك بكلشي صدكته
ثاني يوم دزني اني وماما البيت جدي
وجاب دلال يقيم البيت بدون ماتعرف بيبي
باع البيت وطلب مهله ست اشهر حتى البيت
يفرغ ويستلمه الدلال
بدا يستعجل إجراءات السفر
هو شهر واحد وابوي اختفى طلع وبعد مارجع
بيبي كانت تكول هو راح للشغل
٣ ايام وبابا ماكوووو سافر بدون حتى مايودعنا
ولا عافلنا بيت نسكن بي
ولا فلوس نعيش بيها
ولاوحتى فكر بحال امه المسكينه وشنو مصيرها
من تعرف البيت انباع ووين راح تسكن
وهي بهذا العمر
المهم بعد سفر ابوي بأسبوع واحد واحنا ندور علي وخابصين الدنيا
خصوصا بغداد جانت تخوف بهاي الفتره
بس بيبي كانت اطمنا هو يشتغل داخل القاعده الامريكيه
وممنوع يطلع لو يتصل حسب ما بابا حجالها
اجانا خبر من عم بابا هو مسافر
بس ماعرفنا هو باع البيت
بيبي كامت تبجي لان سافر وعافها وعاف زوجته وبنته
عمو حازم كام يغلط على بابا ويحجي علي
شلون يسافر ومابكول ولا يتصل علينا
حتى عمتي وسن هم كانت تحجي علي
شلون يسافر هيج فجئه بدون مايعرف اي واحد
من عدنا
بيبي بقت أسبوع كامل تبجي علي
منتظره منه مكالمه تطمن على وضعه ووين صار وشلون حالته
اتصلنا على عم بابا
كال بعد ما وصل بس عندي تواصل ويااا
هو زين وماكو اي شي يسبب قلق
بعدها وصل للدوله الي بيها عمه وطمن علي بس ماكان يتواصل ويانا دائما
بيبي كانت تلح على عمو حازم
حتى يتصل يطمن علي مرات يرد ومرات لا
بس عمه ابو مازن كان يطلمنا علي بين فتره وفتره
الحد مافات خمس اشهر واجا الدلال دك الباب
الدلال....ممكن تفرغون البيت لان بقى شهر واحد
وتخلص المده اذا كدرتو تفرغون البيت اكون ممنون
بيبي....يااا بيت هذا بيتنا
الدلال.. اي اني اشتريته من ابو اريج وعندي أوراق تثبت كلامي ليش انتم ما تعرفون
اني اشتريته قبل خمس اشهر وهو طلب مهله ست اشهر ويفرغ البيت
بيبي...بيتنا هذا انت اشتريته
الدلال...اي اني استريته وعندي عقد الملكيه
راسا بيبي ما تحملت الخبر وكعت من طولها
#محطات العمر
#البارت الثالث
#جمانه السعيدي
اريج...وكعت بيبي بلباب والرجال ابو البيت بعد واكف
امي من شافتها كامت تعيط
اني خفت حيل حتى خفت أقرب عليها
امي حضنتها بس هي ما تتحرك ابد
الرجال ابو البيت كال ناخذها للمستشفى بسيارتي
طلعنا للمستشفى اني وامي وبيبي والرجال
بس وصلنا والدكتور اجا شاف بيبي
كال احتمال جلطه بس لازم تحاليل حتى نتاكد
شويه واجا عمو حازم ورانا للمستشفى
الجوارين منطي خبر
راد يعرف ليش امه انجلطت
حازم...شبيها امي ليش هيج صار وياها
امي...طلع اخوك بايع البيت هي سمعت ووكعت
حازم...شلون باع البيت هو اصلا مو باسمه
امي.. مااعرف بس الرجال عنده أوراق ملكيه البيت
حازم....بسلا هذا الكلام صحيح
اريج...عمو حازم ماصدك اتوقع هاي لعبه
لو هذا الرجال متوهم او يمكن ابوي ماخذ منه فلوس
ومنطي عقد مزور
الرجال ابو البيت بس وصلنا للمستشفى عافنا وراح
حاله بيبي ابد ماكانت اطمن
لان لا فتحت عيونها ولا حجت كلمه وحده
بليل ادهورت حالتها حيل
الدكتور كال اخذوها للانعاش
اجو الممرضين واخذوها الغرفة الانعاش
شويه وطلعو يركضون جابو جهاز الصعقه الكهربائي
هلمره عمو حازم دخل وياهم جوه واني وامي بقينا برا
جمانه السعيدي
امي تدعي البيبي وتبجي
لان فعلا خوش مره ولا يوم عاملت امي معامله موزينه
امي ساعه تدعي البيبي وساعه تدعي على ابوي
لان هو السبب بكل هاي الأشياء الي جاي تمر علينا
للسته الصبح الدكتور أعلن وفاة بيبي
ابوي شكد واحد بلا ذمه وضمير بيبي ماتت بسببه
عمو حازم كلب المستشفى عياط وصياح
يبجي ويغلط على ابوي مايعرف شلون يتصرف
كلشي صار بسرعه
شلون بيبي ماتت العصر جانت مابيها شي
شكد هاي الصدمه جانت جبيره عليها ماكدرت تتحملها وماتت
اخذو بيبي يدفنوها عمه وسن طلعت من البصره للنجف
واجت وياا الجنازه
كلبت البيت عياط على امها
الله يساعدها موت بيبي كان أكبر صدمه النا
لان هي لا مريضه ولا تعبانه
بس ماكدرت تتحمل خبر البيت انباع وبعد ماعدها مكان
تسكن بي جمانه السعيدي
بعد ماخلصت الفاتحه راح عمو حازم يتاكد من خبر بيع البيت
وفعلا اتأكد بيبي متنازله عن البيت الابوي
وابوي بايع البيت
شكد حاول يتصل على ابوي
بس ابد مايرد علي ابوي عرف امه ماتت بسببه
مع ذالك ابد مااتصل ولا اعتذر من عمي وعمتي
حتى مايرد على اتصالاتهم
بقينا بلبيت بس اني وامي بدينا نجمع بغراضنا
خلاص بعد ماعدنا بيت يلمنا اني وياها
رجعنا البيت خالي خالي وزوجته ابد ماكان عاجبهم الوضع مايردونا نعيش وياهم بنفس البيت
رغم بيبي موجوده وامي الها حصه من هذا البيت
بس مايكدرون يحجون ثنيينهم يخافون من بيبي
خالي مهند عنده ٣ ولد
ثنيين اكبر مني عمار اكبر مني بخمس سنوات
وسام اكبر مني بسنتين
وازغر واحد احمد ازغر مني بسنه وحده
كعدنا بغرفة بيبي اني وامي
كل يوم كنا نسمع كلام مثل السم من زوجة خالي
بس ما تحجي ويانا مباشرتا لا ادردم وهي تشتغل
ماتعرف احنا كارهين هذا الوضع اكثر منها
بس الضروف كانت أقوى منا
هذا الوضع الصعب بسبب ابوي الله لا يوفقه
مافكر بينا وين نروح
شكد اناني يفكر بنفسه وبس
ابن خالي الجبير عمار عمره بوقتها ١٨ سنه
واني عمري ١٣ سنه بس اني كلشي افتهم
بلبدايه كان بس يباوع عليه من اطلع من الغرفه
بعدين بدا يحاول يحجي وياي
بس اني كنت مااحبه
ومااحبهم كلهم لان امهم بس تحجي علينا
كارهتنا وكارها وجودنا بلبيت بدون سبب
جمانه السعيدي
ثنيين مثلنا اني وامي وهاي ضروفنا وين يرحن
ماعدهن مكان غير هذا البيت
بتحريض منها خالي راح تعارك وياا عمي
خالي... انتم ماعليكم سلام شلونواخوك يبيع البيت
مافكر بزوجته ولا بنته
عمي...اني مثلك دايخ ومريض من يوم عرفت لليوم
يعني عاجبك وضعي
اني كنت مفكر ارجع بيت اهلي
لان مامرتاح هنا وهو يبيع البيت وينهزم
شلون ضحك على امي مااعرف
خالي.. اتصل علي يدز فلوس حتى زوجته وبتها ياأجرن بيت ويكعدن بي ويدزلهن مصرف
عمي. هاك رقمه وتواصل وياا اني اتصل علي مايرد عليه
بلكت انت يرد عليك
خالي...هو مجبر بعيشتهن شنو قابل اني اتحملهن
اني شنعدي مثلا كوه مدبر عيشتي اني وجهالي
عمي...اكيف يرد عليك عود وصي يدز حصتي من البيت ويااا
اريج...خالي جاب الرقم وبقى يتصل علي بس بدون فايده
مايرد على اي احد
رجع خالي اتواصل وياا عمه وكام يحجي علي
علمود الفلوس والمصرف
من بعدها حتى عم ابوي كام مايرد علينا
بيبي كانت متكلفه بمصاريفنا اني وامي لان خالي
ماعنده ضروفه صعبه
مابطل عمار يتحرش بيه بس اطلع من الغرفه
يبقى يسولف وياي لو يااشرلي
بس اني ابد عبالك ما موجود أكرها اكره امه
حتى خالي مااحبه
لان مجاي يتفهم ضروفنا يمكن لو ما يخاف من بيبي جان طردنا بلشارع
كنت اول ماارجع من المدرسه ابدل ملابس واتغده
وكبل اطلع كتبي واقرا
لا اطلع ولا ادخل ومااختلط بيهم ابد
حتى امي نفس الشي ما تطلع من الغرفه حتى تتجنب المشاكل
طبعا عمار صح اكبر مني
بس راسب هواي يله توه بالرابع عام ملتهي بلعب مايقرا
جمانه السعيدي
بعد ست اشهر من وفاة بيبي ام ابوي رجع خالي تواصل وياا عم ابوي ابو مازن
وهلمره يحجي بلغة التهديد
لو يطلك اختي لو يدزلها مصرف
تعرفون ليش خالي متخبل من وجودنا بلبيت
لان بيبي كانت تساعده بلمصرف من راتبها
بس هسه حصته من الراتب صارت النا اني وامي
وهو ضايج لهذا السبب يريد بس يدفعنا بأي طريقه حتى ترجع بيبي
تساعده بمصرف البيت
وصل تهديد خالي الابوي لو اطلك لو ادز مصرف
اكيد ابوي مراح يدز مصرف لان جاي يفتح مشروع خاص بي بس ممكن يطلك
وفعلا اجت امي ورقة طلاكها
شكد جنت متوقعه امي تكره ابوي بس هواي بجت
من شافت ورقة طلاكها
يمكن جانت متأمله يستقر ويشتغل ويدز عليها
او يمكن بعدها تحبه بعد كل هاي المصايب الي مرت عليها
مااعرف بس اني ضجت من شفت امي تبجي بسبب ابوي
خالي تخبل شلون يدز ورقة الطلاك
شلون يطلكها هيج بكل سهوله
بصراحه
يعني امي راح تبقى على كلبه ومراح يكدر يتخلص منها
زوجة خالي كلما يفوت وقت اكثر تحقد علينا اكثر
رغم اني وامي ابد مانمر بيها
ولا نقرب عليها بلعكس امي شايله نص شغل البيت
بس ماتريدنا ولاتحب تشوفنا اني وامي
عمار مابطل يحاول يستدرجني
مره يكول تعاي اقريج رديت علي شلون تقريني وانت اصلا جماعتك واصلين للجامعه
انت كسلان شلون تقريني
مره تعاي شوفي شجبتلج
مره تعاي اتفرجي ويانا تلفزيون
كم مره حاول يوصلني للمدرسه بس اني رفضت
كان يمشي وياي غصبا عليه
ابد مجاي اكدر استلطفه احسه واحد سخيف
بعد سنه ونص من انفصال امي عن ابوي
اجا الامي عريس
رجعت من المدرسه لكيت امي وبيبي يحجن بهذا الموضوع
بيبي.. خوش ولد وموضف وبيته وحده بعد شتريدين
امي.. عنده ولد ثنيين
بيبي...وشتردين منهم اذا ربيتيهم الج اجر
اريج...شكد ضجت مااريد امي تزوج وتعوفني
مااريد اي احد ياخذها مني
هي امي وابوي اني ماشفت حنان الاب
وهسه هي هم تريد تعوفني
ماكدرت اتغده نمت بدون اكل وادعي كون هاي الخطبه تخرب
ثاني يوم اجا العريس يشوفها
طبعا هو من نفس عمرها شاف امي وعجبته
بس عنده شرط واحد
مايريدني وياها
ما مستعد يتحمل مسؤليتي
خير امي لو اني لو هوووو
اذا تقبل بهذا الزواج تعوفني وتروح وحدها
واذا ما تقبل خلاص ماكو زواج
جمانه السعيدي
اريج اني من سمعت هذا الشرط فرحت لان اكيد امي راح تختارني ما معقوله تعوفني علمود رجال
بس بيبي كانت تشجعها على الزواج لان امي زغيره
توها عمرها ٣٤ سنه
بعدها زغيره وخالي هم شجع هاي الزواجه
بيبي.. ازوجي بعدج زغيره بلكت يصير عندج اطفال
وبتج خليها عندي اني اخليها بعيوني
خالي.. تعرفين شكد راتبه مليون و٦٥٠ الف
وبيته ملك وعنده سياره بعد شتردين مثلا
يتقدملج رئيس الوزراء هو انتي وحده منفصله
امي. .اريد بتي وياي
بيبي...بتج قابل زغيره جبيره وتفتهم ازوجي لا اضيعين هلي الفرصه من ايدج
الكل شارك وانطه رائيه اله اني محد سئلني موافقه لو لا
يردون ياخذون مني امي وحتى ما كلفو خاطرهم
يسئلوني
بس طلع خالي كمت ابجي
امي...ليش تبجين
اريج...لا تزوجين وتعوفيني
امي....اني مراح اعوفج كل يوم اجي اشوفج
اريج....لا تزوجين وتعوفيني
امي...اني ودي اخذج وياي بس هو مايقبل
بلكت اكدر بعد الزواج اقنعه واخذج تعيشين وياي
#محطات العمر
#البارت الرابع
#جمانه السعيدي
@الجميع
اريج....امي سمعت كلام اهلها ووافقت على الزواج
وماسمعت كلامي
اني حاليا من كبرت عرفت امي عدها حق بهذا الزواج
لان امي لا شهاده ولا فلوس والا اخ حنيين
ابوي اخذ منها حتى ذهب عرسها وغرفتها والبيت الي جانت عايشه بي
شنو راح يكون مصيرها وهي وياها بنيه شلون راح تعيش
اكيد من حقها تزوج
بس كان لازم تفكر بيه اني شنو مصيري
ليش اعيش واكبر بدون ام واب
على الاقل لازم تنتظر لمن يجيها واحد يقبل بوضعها هذا
يقبل بيها هي وبتها
مو تضحي بيه وتروح تربي جهال مو جهالها
زوج امي اناني
يريد امي تهتم بي وبجهاله وتعوفني
اني شنو ذنبي ليش اتحمل تهور ابوي وانانيته
بدت امي تحظر العرسها واني جاي اموت من القهر والحسره
كانت تحاول تواسيني وتصبرني
تقنعني هي راح تاخذني وياها بعد فتره
بس اني كنت متأكده هذا مجرد كلام لان زوجها قافل
عليه مايريدني
ما مستعد يتحمل مسؤليتي
اني شنو قصتي مااعرف يمكن اني فكر
من اول ما نولدت ابوي مايقبل يتحمل مسؤليتي
من بعدها خالي رفض يتحمل هاي المسؤليه
وهسه زوج امي كمل عليه يريد ياخذ امي ويعوفني
ليش اني ماعندي حظ بااهلي
خاف ابقى هيج بدون حظ طول عمري
المهم امي ازوجت كان يوم عرسها يوم بارد بلنسبه اليه
احس مشاعري تحجرت
جمانه السعيدي
لبست ثوب ابيض وتمكيجت عطرت شعرها ولفته
لبست حجاب ابيض
اجا زوجها واخذها بسيارته
واني بقت عيني عليها كلما امسح دموعي ينزلن
ليش اني لازم اكون الضحيه بكل المواقف
ليش امي قررت اضحي بيه وتشوف حياتها
ليش ابوي قرر يضحي بيه ويسافر يعيش حياته
امي راحت وحدها هي وزوجها واني وبيبي بقينا
بلبيت
اكثر واحد كان فرحان خالي
خلص من هاي المسؤليه هسه يكدر ياخذ نص الراتب مثل قبل
يومين واني ماشايفه امي
اليوم الثالث بيبي كالت نروح انشوف امج ونبارك الها
بدلت ملابسي وطلعت واني كلي لهفه
مشتاقه الامي من يوم انولدت لليوم واني وياها ما متفاركات ابد
ناكل ونشرب ونام سوا كنت احسها اكثر من ام
اختي وصديقتي وامي وكلشي بلنسبه اليه
وصلنا للبيت فتح الباب ولد ازغر مني تقريبا بسنتين
دخلنا جوه
امي بس شافتني اجت عليه وحضنتني حيل
بقت تبوس بيه
بيبي....هااا من لكه احبابه نسه أصحابه
امي....العفو يمه بس مشتاقه الاريج حيل اني وياها ما متفاركات قبل
قربت امي على بيبي حضنتها وباستها
اريج .. كعدنا بلهول
شويه واجا زوج امي سلم علينا وكعد يسولف على بيبي
واني عيني على امي
احسها متغيره حيل
صايره حلوه حسيتها سعيده بوضعها الجديد
فرحت وضجت بنفس الوقت
فرحت لان اني ماشايفه امي سعيده ابد من يوم وعيت الهاي الدنيا ابوي جان معيشها بجحيم
من سافر ابوي امي ضاجت على بيبي ورجعت عاشت نفس الجحيم بسبب خالي وزوجته
اليوم احس امي فرحانه
مرتاحه يمكن هلمره امي أخذت استحقاقها
يمكن هذا الرجال الي اني اكرها لان اخذ مني امي
ايجوز يطلع خوش انسان ويعامل امي معامله حلوه
جمانه السعيدي
اني حزينه بنفس الوقت لان امي لكت راحتها بعيد عني
حتلو غصوبها تبتعد عني بس هي مرتاحه بدوني
اني مااحس تكمل سعادتي اله بوجود امي قريبه عليه
اتحسرت من كل كلبي امي انتبهت
امي...ليش حبيبتي ليش تتحسرين
اريج...ماكو شي بس شويه ضايجه
راحت امي جابتلي علاكه حلويات ومعطر وكريم مرطب
انطتني
دنكت عليه باستني لا اضوجين حبيبتي اني راح اجي اشوفج واطمن عليج
رجعنا للبيت اني وبيبي امشي كوه اسحل بروحي سحل
ماأحب اعيش بمكان مابي امي
اكره اي مكان مابي امي
حاولت الهي نفسي بدراستي وخاصه اني السنه ثالث
متوسط بكلوريا
من ارجع اتغده اغسل المواعين الي اكلت بيهن اني وبيبي ادخل للغرفه ادنك على كتبي لليل
زوجت خالي مجان عاجبها الوضع تريدني اغسل وانظف
يعني اخدمها هي وولدها
بمكان ماساكنه وياهم
بس بيبي كانت تكول مالج شغل بيها خليها تحجي وتسكت
انتبهي المدرستج اهم شي تنجحين
رجعت بيبي تنطي نص راتبها الخالي حتى تخف المشاكل والكلام شويه
خالي سكت وبطل يحجي عليه اني وامي
بش زوجته ماتقبل تسكت والقاهرها اكثر بيبي واكفه ويااي وما تقبل احد يحجي عليه
جمانه السعيدي
بيوم جنت تعبانه ونايمه العصر جان يوم جمعه
وبيبي طلعت اجيب كم حاجه من السوك
مااحس اله واحد رفع الغطه عني
فتحت عيوني لكيته عمار
كعدت على حيلي
اريج. هااا شتريد
عمار.. اريد احجي وياج
اريج. ..اكو نضره بعيونه سخيفه وأيده تحاول تلزم جسمي
غطيت جسمي حيل اعرف نيته الغدر اني عايشه ويااا واعرف اطباعه
راسا كمت اعيط بصوت عالي خاله خاله بيبي
بيبي خالوووو خالووووو
عمار.. اس اس فضحتينا الله لا يوفقج
اريج.....حاول يسد حلكي دفعته ورجعت اعيط بصوت اعلى من قبل
عافني وطلع من الغرفه بسرعه
جنت كلش خايفه منه صح حاولت ابين اني شجاعه
وكمت اعيط بس بلحقيقه اني جنت خايفه منه وواحد حقير وما متربي ابد
من رجعت بيبي حجيتلها علي
بيبي....اني راح احجي الابو علي
اريج .بيبي هاي مو اول مره دائما يتحرش بيه
واليوم شافج طلعتي ولكها فرصه
بيبي...همزين حجيتي اني بعد مااعوفج وحدج لو اخذج وياي لو انطيج مفتاح الغرفه تقفليها عليج
جمانه السعيدي
اريج...بيبي احجي الخالي علي بلكت يخاف ويبتعد عني
بيبي...اله اطيح حظه
بليل بيبي دزت على خالي وكامت تحجي علي
ووصته يمنع عمار يوصل يمي
خالي ماعجبه الكلام رغم هو يعرف اخلاق ابنه كلش زين
بس حس اني جاي اشوه صورته
راح خالي وحجا الزوجته السعلوه عليه
وهي اجت الغرفة بيبي وكفت بلباب وكامت تعد وتصف عليه وعلى امي
ام عمار...تعاي انتي شلون تحجين على ابني
انتي شجابج الاخلاقه وتربيته انتي اصلا ما تعرفين ريحة التربيه ابوج حرامي باك حلال خوانه ونهزم
وامج مطلكه ام الرجوله
وانتي كل شويه بيت منو رباج منو علمج ريحة الاخلاق
بيبي...هاااا اوكفي هذا الحجي على بتي وعلى اريج
انتي الي ما مربايه
ولا عندج اخلاق انتي اكثر وحده تعرفين ابنج
واحد دايح لا شاطر بمدرسه ولا شاطر بشغل
ام عمار...عفنا التربيه الجن انتن الي تعرفن تربن
اسمعي ولج اذا جبتي طاري ابني على السانح
اكصه فهمتي لو لا
الله اعلم ويامن جاي تلعبين وجايه تشمرين
مصايبج على ابني انتي مبينه مو راحه
بيبي....انجبي والزمي نفسج فهمتي لو لا
اريج...اني ساكته بس اباوع بعيوني يعني لو اسكت على تصرفات ابنها لو اطلع اني بلا اخلاق
وهي اكثر وحده تعرف ابنها وتعرف تربيته شنو
بعد ما حجت علينا زوجت خالي لمن ملت وغلطت حتى على بيبي اجا خالي سحبها واخذها
زين ليش مااجيت من البدايه يا زلمة البيت وأخذت مرتك
ليش عفتها تغلط على امك واختك
اريج...بيبي صعد ضغطها وخالي حتى مااجه اطمن عليها
عصرتلها ليمون
وانطيتها حباية ضغط
ماكدرت تنام المسكينه فوك ماعايشين بيتها وياكلون نص راتبها النوب ما عاجبهم الوضع
من بعد هاي المشكله زادت القطيعه بينا وبين زوجته خالي اكثر واكثر
بيبي راحت جابت هيتر كهربائي نطبخ علي
نشتري خبز وناكل اي شي وياااا
وما ناكل من طبخ زوجت خالي احناعدنا ثلاجه بغرفة بيبي وتلفويون
بس عبالكم سكتت ابد من الصبح لليل السانه
يشمر كلام مثل السم علينا
بيبي ماترد عليها لان هي انسانه مو محترمه تغلط وتفشر
وبيبي ما تتحمل كلامها
بعدها بفتره كمت اشوف عمار هو وياا اثنين يمشون وراي
من اطلع للمدرسه ويسمعوني كلام مو حلوه
رجعت حجيت البيبي عنهم
بيبي...اني اوصلج للدوام وارجع اجيبيج هذا خنزير
خاف يسوي بيج شي
فعلا بيبي الصبح توصلني للمدرسه
ومن اخلص دوام الكاها كاعده باب المدرسه تنتظرني
عمار من شاف بيبي توصلني وترجعني
بطل يراقبني لو يمشي وراي
نجحت من الثالث الحمد لله والشكر اجت العطله
حتى بيبي ترتاح مني يوميه توصلني وترجعني خطيه
جاي تتعب بسببي
اما امي اول زواجها تجينا كل أسبوع مره
بعدين كل أسبوعين ساعه وحده وترجع البيتها
بعدها شهر كامل ما توصل النا وبعدين شهرين تجينا ساعه وحده
حسب كلامها زوجها ما يقبل تجينا للبيت وتعوف
بيتها تبقى تتوسل بي حتى يقبل يجيبها ساعه تشوفنا وترجع البيتها
بيبي تكلها اسمعي كلام زوجج اكعدي بيتج واسكتي
مااريدج تطلكين مرتين
والضاهر امي مرتاحه بحياتها الجديده
ومتمسكه بزوجها حيل حقها بعد الي شافته وياا ابوي
حقها تتمسك بزوجها
#محطات العمر
#البارت الخامس
#جمانه السعيدي
لجين....كنت عايشه ومطمنه بهاي الدنيا بوجود بيبتي
ولله لأمي تهم بيه ولا اب يذكرني
حتى عمي حازم كرهني وابد مايسئل عني بسبب
ابوي لان اخذ حصته من الورث
ومااعرف اي شي عن عمتي وسن ولا حتى تذكرني ولو بسؤال
المهم بيبتي جانت موفرتلي كل احتياجاتي
ابد ما ناقصني شي
كل فتره جان عمار يحاول يقرب عليه
مرات يجيني بأسلوب حلوووو حتى يقنعني
هو يحبني ويريدني
يحاول يعبرلي عن حبه بكلمات غزل بين فتره وفتره
بس اني عندي مشكله مااحبه ولا احب اهله وخاصتا امه
واحسه مثل الثعلب المكار
يريد يقشمرني لان هو ابد ماعنده صفه حلوه
جذاب غشاش انتهازي لعبي محيل
شلون واحد عنده هاي الصفات كلها ممكن يحب وينحب
استمرت بيبي توصلني للمدرسه وترجعني
مرات تكون مريضه اروح وحدي وارجع وحدي منا لمن خلصت الاعدادية
امي خلال هاي التلث سنوات جابت ولد يخبل
يعني اني صار عندي اخ
شكد فرحت بي واخيرا صار عندي اخ شكد اشتاقله
وابقى منتظره امي اجيبه وتجينا
جمانه السعيدي
اما اني تغيرت حيل
صرت جبيره وحلوه ملامحي تخبل
جسمي انثوي شعري حلووو
بعد ماخلصت السادس وقبل لا تطلع النتائج
اجا واحد يخطبني من بيبي
ولد موضف ومؤدب وابن ناس
بس عنده شرط واحد اعوف الدوام
يعني الحد السادس اعدادي وكافي دوام مايقبل
اكمل دراستي
ام العريس ...احنا جايين على اريج
بيبي...اهلا وسهلا
ام العريس ...هي خلصت سادس
بيبي...اي خلصت امتحانات
ام العريس....ابني موضف وراح يسكنون وحدهم
بس عنده شرط ما تكمل دراسه ابني مايريد وحده داخله معهد لو كليه
بيبي....لا ماعنده بنيه تزوج قبل لا تكمل دراستها
ام العريس....وقابل هي شسوي بشهاده البنيه اول وتالي البيت زوجها وهو حالته الماديه زينه وعنده راتب
وراح يسكنون وحدهم بلطابق الثاني
اني عندي ولد مزوج وعايش ويانا بلبيت عنده اطفال اتلاثه وهذا ابني راح يسكن وحده بلطابق للثاني
بيبي....ابنج خوش ولد اني ماكلت علي شي موزين بس صارتلي عبره
كبل امها تركت المدرسه و زوجت
وطلع زوجها موخوش ادمي وطلكها لو جان عدها شهاده
جان توضفة وعاشت ملكه
ولا منيت هذا وذاك عليها
ومراح اعوف اريج تواجه نفس المصير اني تعبانه عليها
ومراح اقبل تزوج قبل لا تحصل شهاده
ام العريس....اي بس ابني خوش انسان تكدرين تسئلين علي وتتاكدين
بيبي....الإنسان مايثبت على وضع يتغير وياا الظروف
كلما تتغير الظروف يتغير
ايجوز اليوم هو خوش انسان بس باجر محد يعرف
شراح يصيربلدنيا غير رب العالمين
ام العريس...بكيفج عيوني إذا غريتي رائيج
اتصلي عليه لان اني اشوف هاي احسن فرصه
حرامات اضيع من اديكم
بيبي.. الله يوفقكم وتحصلون بت حلال تناسبكم
من طلعت المره خالي اجا سئل بيبي شتريد
بيبي...جايه على اريج تخطبها الابنها موضف وسكنه وحده
خالي...وبعدين
بيبي...رفضت اريدها تحصل شهاده
خالي.. اي شهاده يمه البنيه لاام ولا اب وانتي تكولين الولد موظف بعد شتريد مثلا خليها تزوج
بيبي...انت مالك دخل بيها لا كاعده بيتك ولا تصرف عليها
اذا ماتكمل دراستها مستحيل اقبل تزوج
خالي...بكيفج بس راح تندمين
بيبي...اني مااريد ازوجها بكيفي
جمانه السعيدي
اريج...الصراحه اني كنت موافقه بس حتى اريح بيبي من هذا الحمل خطيه شايله همي
بس من سمعت كلام بيبي اقتنعت بي
كلامها معقول فعلا امي لو عدها شهاده مجان احتاجت احد
بليل من ردنا انام
اريج...بيبي ليش ماقبلتي حتى تخلصين من هذا الحمل
بيبي...يااا حمل هذا انتي مو حمل عليه
انتي مونستني مهونه عليه مصايب الدنيا
مرات اكول لو امج ماخذتج وياها اني شلون راح اكدر اكعد وحدي هنا
انتي مو بس حفيدتي انتي بنيتي وصديقتي
اريج...يعني اني ما متعبتج
بيبي...لا ولله انتي على كلبي مثل الماي البارد اريدج تحصلين شهاده
وارفع راسي بيج ووين رايحين الزلم تتخرجين وتاخذين احسن واحد
اريج...فدوه الهلحلك الحلو ياربي مو عجوز ضيم
بيبي...هااا اني عجوز ولج اني احلى منج
اصلا اني ازغر منج
اريج...يله اريد انام بهذا الحظن الحلو افتحي ايدج
بيبي.. تعاي
فتحت ايدها ودخلت بحظنها
بيبي...اني قررت ماازوجج ابد
اريج....لا موخوش سالفه ليش ماازوجيني 😄😄😄
بيبي...لان مااكدر افاركج ابد
اريج...اني الي مااكدر استغني عنج ابد اهلي استغنو عني
وعافوني وانتي الي عوضتني عنهم كلهم
الله يحفظك اليه
طلعت النتائج ناحجه معدلي ٩٧ هاي كانت أكبر فرحه اليه بهاي الدنيا كلها
انقبلت معهد تحليلات هذا الحجي سنة ٢٠١١
بيبي ماخلت شي بنفسي جابتلي ملابس يخبلن
وساعات وجنط
واجرتلي خط يوصلني للمعهد ويرجعني
مو بس اني وياي كم بنيه
وهنا زوجت خالي شبت النار بكلبها لان ولدها الكبار ثنيبنهم مابيهم حظ
عمار ترك المدرسه طردو هلكد ماعنده رسوب
واسامه هاي ثالث سنه يعيد سادس
اما اني كل سنه اطلع من الاوائل بدون دروس خصوصيه
ولا دورات تقويه ولا مدارس اهليه
كلما اطلع وارجع اسمعني كلام مثل السم
وتطعن بشرفي وشرف امي
دائما تعير ولدها بيه تكول هاي الي نص بطنها جوع
مخلصتها لفات فلافل وجبن تطلع من الاوائل
انتم مابيكم حظ
بيبي تكول عوفيها هلكد ما كاتلتها الغيره لان راح تتخرجين وولدها مابيهم حظ
كلشي كان تمام وماشي مثل مااريد واحسن
بس شي واحد متعبني حالة بيبي الصحيه مو تمام
متعبها الضغط حيل واني خايفه عليها ووضعها ما يطمن ابد
جمانه السعيدي
خلصت سنتين المعهد وطلعت من الأوائل بقيت منتظره التعيين بيبي تكول كملي دراستج قدمي كليه
بقيت سنه منتظره التعيين كاعده بلبيت وساكته
بهاي الفتره بيبي هواي تشكي من ضغطها دائما ضغطها معلك
رغم اني اطبخلها اكل ماصخ وماكو شي بحياتنا يضوجها
بس الدكتور يكول الضغط مرض صامت
يتسلل للدم بدون ما يحس الشخص بااي اعراض
يعني ممكن يكون الضغط صاعد
والشخص المصاب مايعرف
بس بيبي كانت تعرف نفسها كلما تتخربط واخذها اقيس ضغطها يطلع صاعد
اخذناها الأكثر من دكتور وغيرنا العلاج اكثر من مره
بس بدون فايده
بليل مااكدر انام هلكد ما قلقه عليها
اخاف انام واكعد الصبح الكاها ماتت وعافتني وحدي
اليل كله اباوع الها تتنفس لو لا
اذا صار عليها شي اضيع بدونها منو اليه من بعد عينها
امي تجي كل يومين نص ساعه وترجع ركض البيتها
خالي يجي يطمن عليها مايكعد غير خمس دقايق ويطلع
اني الي كنت لاانام ولا اكعد حتى الاكل نسيته
خايفه عليها
رغم هي حاسه بيه وتحاول اطمني كد ما تكدر
بس اني اعرف الموضوع مو بسيط
هي تشكي من زمان من الضغط اكثر من سبع سنوات بس كانت تكابر
وتكول مابيه شي
اكثر شي ذني التلث سنوات الاخيرات تعبت حيل
الحد ما مره كانت تعبانه حيل كعدت بليل كالت اريد اطلع للصحياة
اخذته لازمتها اخاف عليها
قبل لانوصل وكعت مني مااكدرت اسيطر والزمها
زين ووكعت بلكاع
بدون وعي كمت اعيط بصوت عالي
طلع خالي وشافني حاضنتها وكاعده بلكاع ابجي
قرب خالي عليها حاول يحجي وياها
بس ماردت علي
زوجت خالي واكفه تباوع علينا من باب غرفتها
وبعينها نظرة شماته
ابد ماقربت ولا كالت شبيها عبالك تشمت بيها
ماتعرف الموت مابي شماته
طلع خالي جاب سياره واجا حتى مابدلت رحت وياها بملابس البيت
خليتها بحضني وابجي عليها
منا لمن وصلنا اباوع عليها حلكها صار صفح
ووجها اصفر حيل
بعد الفحص اتاكدنا ضربتها جلطه
بقت فاقده الوعي يومين
دخلو أنبوب بحلكها وصلو بمعدتها حتى تتغذه
عن طريق هذا الانبوب
ماتحجي بس نايمه من تسمعني احجي وياها وابجي
دموعها ينزلن على المخده
اكيد جاي تسمعني
اريج....بيبي حبيبتي لا تعوفيني اني ماعندي احد غيرج
انتي تعرفين اني شكد احبج
اذا اسمعيني حاجيني انتي مراح تعوفيني مووو
انتي كلتي مااعوفج
راح تصيرين زينه وترجعين وياي للبيت
اني مااكدر ارجع وحدي شلون ادخل غرفتج وانتي ماكوووو
اريج...لزمت ايدها وبسته راسا حركت اصابعها
اريج...بيبي انتي جاي اسمعيني لا تعوفيني ووين اروح
ماعندي احد غيرج محد يتحملني
محد يفهمني غيرج
جمانه السعيدي
يومين وثالث يوم الدكتور كال عدها تحسن
وضعها احسن من امس
جيبولها شوربه خفيفه
اريج شكد فرحت بكلام الدكتور بلكت صدك وترجع وياي
بقيت كاعده ومكابلتها كل الوقت اباوع عليها بلكت تحجي وياي
خالي يجي ويروح يجيب شوربه لو ماي
امي يوميه تجي تبقى ساعه وترجع البيتها
اله اني أسبوع كامل مكابلتها لا رجعت للبيت
لا سبحت ولا بدلت حتى الاكل مااحس عندي قابليه على الاكل امشي نفسي بااي شي
دموعي مايقبلن يوكفن ابد مادام هي ما تحجي وياي
ولا عدها اي تفاعل ولا حركه
كلبي ما مطمن عليها
اليوم السابع اكو وحده ويانا بنفس الغرفه
تحجي وتسولف عليه وطمني على بيبي
للعصر بتها عاطت بصوت عالي اجا الكادر الطبي
لكوها ميته حاولو ينعشون الكلب بس بدون فايده
المره الي جانت تحجي وياي قبل ساعه ماتت
بجيت عليها بجي مو طبيعي
خفت هذا المنظر يتكرر وياي وافقد بيبي
فعلا بليل الساعه عشره كنت كاعده منتضره خالي يجي يبات وياي
كاعده كبال ببيبي
عيوني يحركني هلكد مابجيت
باوعت النفس صعد وبعد مانزل قربت علي بيبي
خليت اذني يم خشمها
ما تننفس رجعت باوعت للقفص الصدري
ماكو اي نفس طلعت بلممر اركض مثل المخبله
واعيط الحكو عليه الحكو عليه
اجو الممرضين يركضون هلكد ما صوتي كان مرعب
دخلو للغرفه يركضون واني اركض وياهم
بس فحصو النبض كالو ماتت
اجا الدكتور الخفر عاد الفحص كال ماتت
اني سمعت كلمة ماتت واني كمت اعيط بكل صوتي
رجيت المستشفى رج خالي يكول واني باب المستشفى
الخارجي سمعت عياطج
كلت امي ماتت هذا صوت اريج
انتظرونا.
تعليقات
إرسال تعليق