رواية المتهم X الحلقه الثانيه كتابة واقتباس محمد منصور **منص** حصريه وجديده
 |
رواية المتهم X الحلقه الثانيه كتابة واقتباس محمد منصور **منص** حصريه وجديده
وقبل ما نبدأ نوحد الله ونصلي علي خير خلق الله سيدنا محمد.
اللهم صل وسلم علي محمد صلاة تحل بيها العقد وتفك بيها الكرب
من جوة مدرسة السلوم الاعدادية ووقت ما كان حكيم واقف في الفصل وماسك صباع طباشير وبيفتكر لحظات الغضب والقلق اللي اترسمت علي وش فريدة لما دخل المطعم وحيد. وكتب علي السابورة. علي طريقة الحساب
فريدة. + X. وحرف الاكس بيستخدم ديما في تعريف كل ما هو ملهوش اسم في عالم الرياضيات الخاص ب حكيم. وبعد ماكتب
فريدة. + X. يساوي
وملقاش اي حاجة يكتبها يحل بيها المعادلة الغريبة دي. ودة كان مضايقة جدا اصل استاذ حكيم ما يحبش اي مسالة حسابية هو بيحلها تنتهي بال لا حل. ووقت ماكان بيفكر يدخل عليه طالب شاطر جدا اسمة سمير. في ايدة كتاب وقف سمير وراء حكيم وقال
استاذ حكيم كنت، ،،،،،،،
حكيم مسك البشاورة بسرعه ومسح المكتوب علي السبورة خاف يكون سمير قراء اسم فريدة. وبص حكيم ل سمير وقال بعصبية
انت ازاي تدخل عليه ما غير ما تستاذئن
سمير باستغراب
انت اللي قايل لي اني انا بالذات وقت ما محتاجك اجي لك وادخل لك في اي وقت ومن غير استاذان. وانا عملت اللي انت قولته تقوم تزعل لي لية
وقعد سمير علي دكة وبدا يعيط بص له حكيم واتنهد وراح لغاية عنده وطبطب عليه وقال
طيب خلاص كفاية عياط
سمير
انا ما بحبش حد يزعق لي وانت يا استاذ حكيم عارف كدة
حكيم خدة في حضنة وقال
عارف وخلاص قولت لك
بدأ سمير يهدي ويمسح دموعه وقال حكيم
لما دخلت شوفت اية اللي كان مكتوب علي السبورة
سمير
لا ما شوفتش
حكيم
طيب كنت جاي عايز اية
سمير بص في كتابة وشاور علي مساله حسابية مش عارف يحلها وكان بيقول
رغم انك شرحت لي المسالة دي اكتر من مرة لكني مش عارف احلها
حكيم
علشان انت مش عايز تحلها
سمير
لا عايز
حكيم
طالما عايز تحلها اهي قدامك حلها
سمير
مش عارف محتاج مساعدتك
حكيم
ولو انا مش موجود
سمير
مش هعرف احلها
حكيم
وتبقي المسالة انتصرت عليك
سمير
طيب هعمل اية طالما مش قادر
حكيم
تحاول وتحاول وتحاول لغاية ما تحلها. ما تخليش اي حاجة تكسبك وتطلع قدام منها خسران حتي لو مساله رياضية
سمير
طيب دلني علي اول الطريق
حكيم
استخدم المنطق تتحل المساله،،،،،،،،،،
في نفس الوقت كان في مدرس زميل حكيم اسمه عرفه. وعرفه دة مدرس عربي لكنه بيكرة حكيم جدا من ساعة ما طلب منه يجي يدي درس ل بنته اللي ديما بتسقط في الرياضة وحكيم رفض. لانه ما بيحبش يدي دروس برة نهائي. وعرفة دة كان قاعد مع مدير المدرسة الاستاذ حسين
وكان بيقول
اقسم لك بالله اني شايفة بعينية وهو بيحضن الواد اللي اسمة سمير وعمال يقول
له كلام مخل بالاداب
حسين اتصدم
اية اللي انت بتقوله دة يا عرفه. دة كلام تطير في رقابتنا كلنا. دة العيال دي اهاليهم من العرب
عرفه
ما هو علشان كدة حبيت اعرفك ان حكيم دة مش طبيعي تقدر دلوقتي لو هو بني ادم طبيعي لية ما اتجوز لغاية دلوقتي
حسين
طيب اكتم واسكت وخليني افكر اعمل اية في المصيبة السودا دي
عرفه
هي فيها تعمل اية. زي ما جالنا منقول من القاهرة ترجعه تاني القاهرة او اي محافظة تانية بس يغور بعيد عننا
حسين
خسارة والله دة حكيم رفع مستوي الطلبة في الرياضيات وخلاهم يحبوها رغم صعوبتها
عرفه
خلاص خلي في المدرسة لغاية ما عيل من اللي بيقعوا تحت ايده يروح يحكي مع ابوة او امه ويعرفو علي حقيقتة وساعتها مش بعيد تيجي الاهالي تولع في المدرسة كلها واحنا جواها
حسين
يا ساتر يارب فال الله ولا فالك
عرفه
طيب خلاص اعمل الصح وابعده عن مدرستنا خالص
حسين
واستاذ جابر اللي بيعتبر حكيم زي ابنه. دة جابر صديق عمري. اكيد هيزعل لو عرف اني السبب في نقل حكيم. اللي بيخدمة وديما بيسال عنه وانت عارف جابر في حالته الصحية دي محتاج اللي زي حكيم يكون في خدمتة
عرفه
يعني اية
حسين
اتاكد الاول وبعدها اللي عايزة ربنا هيكون
عرفه
عقبال ما تتاكد هتكون خربت. والنار هتاكلنا واحد وراء التاني، ،،،،
من احدي كافيهات السلوم يقعد وحيد علي تربيزة وكان بيشرب شيشة وكوكتيل وبيبص لساعة الكافية الكبيرة. واول مادقت الساعة 2. بص ناحية باب الكافية وشاف فريدة وهي بتدخل الكافية وبدور عليه بعيونها رفع لها ايدة علشان تشوفو وشافته فعلا وراحت ناحيته وهو بص لها وقال
لسة زي ما انتي مواعيدك يظبطو عليها الساعة
فريدة بمنتهي الحدة
عايز اية يا وحيد
وحيد
وانتي واقفة كدة. هو دة ينفع
قعدت فريدة وبصت له وهو قال
تشربي قهوة معايا. ولا اجيب كوكتيل من اللي بتحبي
فريدة ماردتش فهو ابتسم وقال
وحشتيني
وحاول يمسك ايدها لكنها شالت ايدها بعيد عنه وقالت
انت هتقول عايز اية ولا هسيبك وامشي. وهطلع من هنا علي القسم اعمل لك محضر عدم تعرض
ضحك اوي وقال
كبرتي يا فريدة وبقيتي تعرفي تروحي اقسام لوحدك. دة انا فاكر اول مرة شوفتك كنتي عيلة بنت 18 س. ضحك عليها عيل صايع وخلها مدام وسابت بيت ابوها علشانه وبعد ما شبع منها رماكي في الشارع ل كلاب السكك
فريدة
ما انت كلب من الكلاب دي. وياما نهشت في لحمي وشغلتني اوسخ شغلانه وفي اخر الطريق بعتني لواحد عربي رغم اني كنت مراتك
وحيد
دي تجارة وانا خليتك تعملي اللي انتي شاطرة في. مع ان الراجل زعلان منك. لانك هربتي منه قبل ما يلمسك هو اللي دفعه فيكي شوية
فريدة
الكلام دة عدي علية 16سنه. اتنقلت فيهم من محافظة ل محافظة خدها كعب داير كنت كل ما احس انك بتقرب مني وقربت توصل لي اهرب. لغاية ما لقيت نفسي في السلوم. ابعد نقطة في مصر قولي ازاي عرفت طريقي
وحيد
جروب مدرسة السلوم لما حب يحتفل باوائل محافظة مطروح . صورك مع بنت ونزل الصور علي الفيس. وموقع المدرسة الرسمي وبنتك. طالعة الثالثة علي المحافظة
وطلع موبيلة وفتح معرض الصور وخلي فريدة تشوف صورتها مع بنتها جميلة في احتفال المدرسة. اتصدمت فريدة ووحيد كمل وقال
بنتنا كبرت اوي
اتصدمت فريدة اكتر واكتر وقالت
جميلة مش بنتك
ضحك اوي اوي وقال
ازاي بس. وانتي قبل ما ابيعك ب ليلة عرفتيني انك حامل. ودة كلام عدي عليه 16سنة. وجميلة دلوقتي عندها 15 س. يعني هي اللي انتي هربتي وكنتي حامل فيها. وانا شوفتها وحتي بالامارة شبهي
فريدة
صورها علي الفيس تخدعك
وحيد
دة لو انا شوفتها في الصور وبس. هو انتي صحيح مالقتيش مدرسة اوسخ من دي تدخليها فيها
فريدة قلقت علي بنتها وقالت
عملت اية في بنتي يا وحيد
وحيد
سلمت عليها وقولت لها اننا معرفه قديمة و
وسكت وحيد قلقت فريدة اكتر وقالت
و. اية. انطق
وحيد
وبس
فريدة
عارف لو كنت لمست بنتي انا هقتلك فاهم
وخرجت جري من الكافية قاصدة المدرسة اللي فيها بنتها ،،،،،،،،،
في نفس الوقت من القاهرة كان حمزة بيفتح باب كبارية وبيدخل علشان يقابلة بودي جارد المكان طلع كارينة الشرطة بتاعه وقال
انا مش جاي في مشكلة. انما لو حبين تبقي مشكلة انا جاهز.
هنا تقف قدام البودي جارد صاحبة الكبارية
رقاصة معتزلة اسمها سوسو. بصت ل حمزة من فوق ل تحت وقالت
نعم
حمزة
سوسو بنفسيها طالعة تتكلم معايا. والغريب انك صاحية في ميعاد زي دة.
سوسو
عندي جرد. وبقول لك تاخد كام وتمشي
حمزة
انا غير اللي بيجو لك. وياخدوا منك فلوس علشان يعملو نفسيهم مش شايفين كمية الفجر اللي عندك.
ضحكت سوسو اوي وقالت
ما حدش منكم يا بتوع البدل الميري جالي والا كان عايز فلوس او نسوان
حمزة
انا بقي غيرهم وجاي لك عايز حاجة تانية خالص
سوسو
عايز اية
طلع صورة وحيد وِقال
عايز دة
تفت سوسو علي الصورة وقالت
اتفو علي دة راجل. اهو دة اوسخ واحد جالي منكم
وحيد
ولما انتي مش طايقة تبصي في وشة اتجوزتي ازاي
سوسو
ما كنتش اعرف انه كدة. واهي غلطة واتصلحت
وحيد
طيب المرشدين بتوعي دلوني علي طريقك وقالو انك اخر واحدة شوفتي وكان عندك في الكبارية قبل ما بختفي
سوسو
ايوة كان عندي. كان جاي ياخد مني فلوس بالعافية
وحيد
وخرج من عندك راح فين
سوسو
كان بيقول انه رايح السلوم.
وحيد باستغراب شديد
السلوم
سوسو
اة.
حمزة
وراح السلوم لية
سوسو
اكتر من كدة ما عرفش
حمزة
ما انتي كنتي ماشية حلو هتسوقي العوج لية
سوسو
واسوق العوج لية دة انا نفسي اغمض عيني وافتحة الاقيكم قبضين عليه وكل واحدة اتاذت بسببه تشوفو وحبل المشنقة متلف حوالين رقبته
حمزة بص شوية في عيون سوسو يشوفها بتكذب ولا. لا. لكنه حس انها فعلا مغلولة منه فقال
ماشي
وسابها ومشي. وخرج من الكبارية وطلع موبيلة واتصل بمديرة سراج وقال
وحيد في السلوم
سراج
مش قولت لك حد بلغة وهرب
حمزة
لا. يا فندم. التحريات اللي جمعتها قالت انه راح كبارية سوسو وخد منها فلوس بالعافية وسافر وكل دة حصل بيومين قبل ما البت الشمال تبلغ عنه
سراج
واية اللي يسفر واحد زي وحيد السلوم
حمزة
دة بقي اللي انا هعرفة لما اوصل هناك
سراج
انت ناوي تسافر ولا اية
حمزة
طبعا يا فندم. وحيد دة بتاعي انا وماحدش هيجيبة غيري
سراج
خلاص تمام سافر وانا هخلي مديرية امن مطروح تبعد لك اكفاء ظابط عندها يساعدك في الوصول ل وحيد، ،،،،،،
ونرجع تاني للسلوم وفريدة بتجري في شوارع السلوم قاصدة مدرسة بنتها ووصلت عند باب المدرسة وسالت البواب
جميلة بنتي. خرجت ولا لسة
البواب
اخر مرة شوفتها كانت واقفة مع راجل غريب مش من هنا وبعد كدة ما عرفش راحت فين
لطمت فريدة ووقعت علي الارض وقالت
يبقي خطفها.،،،،،،،
خلصت حلقة النهاردة. وبكرة باذن الله نكمل اللي بيحب ربنا يعلق
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
❤️🌺🌹❤️🌺❤️🌹❤️🌺🌹🌹❤️🌺🌹❤️🌺❤️🌺🌹💙❤️🌺🌹💙
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق