خارج النطاق الفصل الخامس والسادس بقلم هلا غرابلي حصريه وجديده
ربطلي رجلي و رجع علقني على العليقة على الحيط متل الخفافيش جنب جاكيتو ،رجلي فوق و راسي تحت و راح قعد على الصوفاية هو و عم ينكش اسنانو بعود خشب
شيرين:مسعود نزلني خلص فهمت الحكي....بدك تتركني طول الليل هيك
مسعود:ايه
شيرين(تبكي):بكرهك و بكره كل عيلتك بكرهكن كلكن و رح حاسبكن واحد واحد
قام مشي باتجاهي ،فكيتو بدو يفكني بس مد ايدو على جيبتو و طالع سكاكين صغيرة و رجع قعد محلو ،مسك اول سكينة ،رجع ايدو لورا وبعدين رماها باتجاهي ،صرخت صوت من خوفي ،ضربت السكينة بالحيط جنب بطني و نزلت على الارض
مسعود:اووف ما زبطت
رجع رمى التانية جنب رجلي و وقعت على الارض
مسعود:و كمان هاي ما زبطت
شيرين:مسعود خلص ببوس رجلك ،قلبي رح يوقف ،قتلني فورا و بلا لعب الاعصاب
مسعود:ما انت يلي عم تلعبي ،قلت لفرجيكي انا كيف بلعب
 |
مسك التالتة و هو عم يديق عيونو و يحدد الهدف و رماها ،غمضت عيوني ،اجت على شعري و وقعت على الارض
..صعب كتير بابشع لحظات بحياتك ،تحاول تستحضر احلى ذكرياتك ،غمضت عيوني انا و عم اتذكر امي و اخي مجد و بيتي و غرفتي و تختي و حتى ريحة كتبي ،كانت سكاكين مسعود عم تضرب بالحيط و تنزل على الارض فاضية بدون نقطة دم ،ما بعرف اذا كان فعلا هو عم يخطأ الهدف متقصد او حسن حظ ،بس خلصت االسكاكين يلي بايدو،قام جمعن و رجعن لمحلن و نزلني من عن العليقة ،فكلي رجلي
مسعود:لو اجتك سكينة وحدة كنت رح اتركك معلقة ليتصفى دمك بس من حسن حظك انو كلن اجو على الحيط
شيرين:. ...
مسعود:سخنتيلي المي؟
شيرين:...ايه
مسعود:لحقيني معناها بتيابي على الحمام،بدي تفركيلي ضهري بالليفة
كنت حابة كتير بهديك الليلة قوم و جيب السكاكين من جيبة جاكيت مسعود و شكن ببطنو بس ما كنت بقدر اقتل صرصور حتى اقتل انسان ،بس كل شي عملو مسعود ما قدر يثنيني عن فكرة الهروب ،ما عادت رجعت نفيسة ابدا لعنا بعد ما قطعولا ايدا بنص الساحة و قدام كل الناس بتهمة السرقة
فتحية:شفتي يلي بيسرق شو بصير فيه ،ديري بالك لكل عمل بتعمليه من ورا ضهرنا الو عقاب عنا و ما كل مرة بتسلم الجرة
تغير مسعود معي كتير و صار يعاملني بشكل سيئ كتير بعد.ما فقد ثقتو فيني ،بعد يومين كنت عم احلب االبقرة و حسيت على حركة دعسات برا ،تركت من ايدي و طلعت لشوف مين فيه ،شفت فتحية حاملة سطل حليب و سفرطاس معدن و ماشية و عم تتلفت حوليا ،فاتت على قن الجاج ،لحقتا فورا بعد ما شلحت من رجلي ،مديت راسي لشوف شو عم تعمل و ما لقيتا ،فتت لجوا و دورت عليا بكل القن ،ما كان الها اثر،كأنو انشقت الارض و بلعتا،رجعت لكمل حلب البقر انا و كل فكري مشغول فيا حتى رجعت سمعت صوت دعساتا ،رجعت قمت على روس اصابيعي و مديت راسي من شباك الزريبة ،شفتا راجعة هي و حاملة نفس السطل و السفرطاس بس فاضين
شيرين:وين راحت بالحليب ،الجاح ما بيشرب حليب ،على اهالقصة
رجعت فتت على القن انا و عم اطلع حولي ،ما في اي شي غريب ، طلعت من القن انا و عم فكر ،حملت سطل الحليب و رجعت على االبيت
فتحية:انت وين كنت؟
شيرين:كنت عم احلب البقر
فتحية:مين طلب منك ليش،ما قلتلك اطلعي انشري الشراشف على السطح
شيرين:نشرتن
فتحية:تاني مرة ما بتعملي شي بدون ما اطلب منك
شيرين:حاضر ،شفتك انت و فايتة على القن
تغيرت ملامح وجهها فجأة و تلبكت
فتحية:ايه كنت عم طعمي الجاج
شيرين:اممم
فتت على غرفتي انا عم ابتسم و طقطق اصابعي
شيرين:فتحية مخبية سر كبير كتير بالقن ،و خايفة كتير انا اعرفو؟شو هو يا ترى؟و لمين كنت اخدة الحليب و الاكل !اخ بس ،لازم اعرف
وقفت على المرية سرح شعري و حطيت كحل اسود بعيوني و تعطرت بالمسك يلي كنت بكره ريحتو ،بس هون الو شعبية كبيرة يمكن لانو ما بيعرفو غيرو عطر،بعد ما فات مسعود على الغرفة
شيرين:انا بدي روح شوف قشطة بكرا ؟
مسعود:ليش؟
شيرين:زيارة
مسعود:لا
شيرين:ليش لا ؟هاي امك بتطلع كل يومين كل مرة عند حدا شكل و انا ببقى محبوسة بالغرفة هون
مسعود:هيدا الناقص تحطي راسك براس امي
شيرين:طب قلا تاخدني معا لوين بتروح ،احسن ما ابقى محبوسة هون
مسعود:كمان لا،ما بيلبقلك
تاني يوم الصبح كنت اول ما فايقة و طالعة من الغرفة لغسل وجهي،سمعت صوت فتحية و ابو مسعود و مسعود على غير العادة موجودين بالبيت
مسعود:يابي ولا واحد فين رح يسترجي يفوت على ارضنا و يلي بفوت مناكلو باسنانا
ابو مسعود:من طول عمرا الشرطة بتخاف تطلع لهون بس شكلو ابو البنات شغلة كبيرة لانو ما ملو و لا فقدو الامل و الن اكتر من اسبوع هون و عم يدور علين بكل الارض و اكيد رح يصلو لعنا ؛و اذا رفضنا فوتن و عندنا ،رح يشكو بالموضوع
فتحية:ما تخاف و حتى لو فاتو منخفي البنتين و باقي البنات يلي جبناهن ،بس كيف عرفو محلن ،ليكون ابو توفيق هو يلي مخبرن
ابو مسعود:ابو توفيق ما الو علاقة ،بس هادا الخروي الخليوي مدري شو كان اسمو ،تاركتو البنت بالسيارة قال عن طريقو قدرو يعرفو محلن و يلاقو السيارة
مسعود:يابي انت ما تاكل هم شي ،يلي بدو ياخد سمرا مني و مين ما كان يكون رح يتنفس انفاسو الاخيرة ،بفصل جلدو عن لحمو و بعلقو براس الطريق ليعرف كل واحد بيتجرأ يقرب لهون مصيرو
ابو مسعود:يا كديش انا كتير اكل هم سمرا يعني؛اذا فاتت الشرطة لهون احتمال تشوف الحشيش يلي عم نزرعو على اراضينا و وقتا ما بس سمرا يلي رح تروح و نحن رح نروح قبلا بس كل واحد على طريق
مسعود:طب يابي انت امر بس و انا بنفذ
ابو مسعود:خلي اخوك سيف و خنجر يبقو مع الشرطة محل ما متواجدين حتى يخبرونا اول باول الجديد و تحركات الشرطة و نحن رح نوقف شغل هالفترة لانو ما بدنا نكون بشي و نصير بشي جديد
فتحية:اخ بلشت حس انو هالبنتين وجهن منحس علينا و رح يجيبولنا مصايب؛خلينا نروحن من وجهنا
ابو مسعود:طولي بالك لنعرف شو بدو يصير بس اذا اضطر الامر رح نعطين اياهن حتى يحلو عننا
مسعود:يابي خطرت على بالي فكرة ،منضرب عصفورين بحجر ،منخلي الشرطة تفقد الامل منن و نبعدن عن هون نهائيا و بيفضالنا الجو للشغل
ابو مسعود:احكي
مسعود:هلأ على الطريق بحكيلك
طلع مسعود و ابوه من البيت و انا عم يدق قلبي من الفرحة؛رجع دب الحماس بجسمي و حسيت انو في امل كبير لتعرف الشرطة محلنا ،طلعت غسلت وجهي و شفت فتحية عم ضب الاكل
فتحية:انا رايحة طعمي الدواب و انت روحي شغليلي حطب لاسلق الفروج
اخدت فتحية الاكل و راحت و انا طلعت وراها ،شافني مسعود من بعيد و اشرتلو بايدي و مشيت فورا ورا فتحية من غير ما تنتبه علي انا و عم راقبا؛شفتا فاتت على القن ،وقفت جنب الباب اتسمع على حس صوتا؛سمعت صوت باب انفتح ،مديت راسي و شفتا ماسكة الاكل بايد و بالايد التانية مهدية باب خشب و عم تنزل تحت الارض ،طبقت الباب وراها بايدا و فتت على القن انا و عم اطلع على الباب الارضي،كان لونو متل لون الارضية؛صعب لاي حدا يقدر يعرف انو في باب هون ،رجعت من الارض على البيت انا و عم فكر ب لغز فتحية و شو موجود تحت الارض بس كنت متأكدة انو في انسان عم تخفيه فتحية عن كل الناس تحت الارض و خايفة حدا يعرف بوجودو و اذا انا بعرف هاللغز رح يتغير كل شي لانو هيك بكون مسكت فتحية من نقطة ضعفا بس يلي كان شاغل تفكيري اكتر هو وجود الشرطة و الامن بمحل قريب علينا ،المسا فات مسعود لعندي و حامل تيابي بأيدو ،اول ما شفتن حسيت روحي رجعتلي و فكرتو رح يعطيني اياهن لالبسن و يرجعوني عند اهلي، قربت لعندو لاخدن منو
مسعود:لا لا ،ما بقدر اعطيك اياهن محتاجن
سمرا:بشو لازمينك ؟
مسعود:مدي ايدك و غمضي عيونك
سمرا:ليش؟
مسعود:هيك ،مديا يلا
سمرا:طيب
فكرتو رح يلبسني شي اسوارة ،غمضتن انا و مطمنة ،مسك ايدي بقوة و شرطا بسكينة ،فتحت عيوني انا و عم صرخ و اسحب ايدي و الدم عم ينفر منا بس ثبتا منيح و حط تيابي على الجرح فورا
شيرين:مجنون انت ،ليش هيك عملت ؟
مسعود:الجرح سطحي ،هلأ بيوقف الدم فورا ،ما تخافي
شيرين: فكرتك بدك تلبسني اسوارة
مسعود:بس ارجع اوثق فيكي ،بجبلك بدل الاسوارة اتنين،عم توجعك؟
شيرين:ايه كتير
مسعود:هلأ غسليا بالمي منيح و لفيا
ما عرفت مسعود ليش هيك عمل بس هالشي زاد من اصراري انو اتمسك باي شي لاطلع من هون ،تاني يوم حملت السطل و رحت لاحلب البقر ،تركت السطل بالزريبة و تابعت عالقن
شيرين:خلينا نعرف سرك يا فتحية
كنت متوترة من هيك خطوة مجهولة،فتحت و نزلت على سلم ،كان في ممر طويل بس مضوي بشعلة،مشيت انا و عم ضيق عيوني حتى شفت منظر صدمني و نمل كل جسمي من و،ما كنت متوقعة انو فتحية هيك يكون سرا
#خارج_النطاق
#هلا_غرابلي
#الجزء_السادس
شفت بنتين صغار اعمارن بال 6 سنين قاعدين بالارض و عم يلعبو بالحجارة و يحطون فوق بعض و عم ياكلو تفاحة ،تذكرت كلام مسعود فورا عن توم البنات يلي جابتن فتحية من كام سنة و دفنن مسعود هن و عايشين ،هدول هن ،هدول بنات فتحية عايشين تحت الارض ، بس قدام الناس هن ميتين ،كان منظرن بقطع القلب ،كيف قدرو يعيشو كل هالسنين هون ،كيف فتحية عم تقدر تتركن كل هالوقت الطويل لحالن و لايمت بدن يضلو هيك متخبين ما تشوفن الشمس و محكومين بالجهل و التخلف يلي هون ،انسحبت بهدوء و طلعت على السلم و فتحت الباب لاطلع بس وقعو عيوني على وجه فتحية ،ارتعبت و كنت رح اوقع من السلم على الارض بس مسكتني من تيابي،بلعت ريقي و طلعت
فتحية:انا لازم موتك و بهاللحظة و الا بخسر بناتي
شيرين:ما تخافي ما رح احكي لحدا عن يلي شفتو ،زعلت علين و عليكي
فتحية:ازعلي على حالك و على يلي بدو يصير فيكي
شيرين:ما رح يصير فيني اكتر من يلي صار ،انا ما بدي ساومك على اولادك بس حرام يبقو هيك تحت الارض؛هدول بني ادمين ما حيوانات
فتحية:انا يلي بقرر و انا بعرف مصلحتن
شيرين:بعرف انو مصلحتن يبقو تحت الارض حتى ما حدا يشوفن و يقتلن بس انا فيني اقدملك معروف اذا بتساعديني
فتحية:؛بلشتي تفاصلي
شيرين:ما هيك بس اعتبريا مصلحة مشتركة انا بستفيد و انت كمان
فتحية:احكي
شيرين:خليني اهرب انا و قشطة و رح باخد بناتك معي ،خليني اطلع من هون و طلعلك اياهن و بضمنلك سلامتن و انو يعيشو حياة نظيفة و صحية على الارض لانو هدول بحاجة شمس و هوا نظيف و الا رح يموتو و تصيبن امراض من نقص فيتامين مهم ما بتاخديه الا من الشمس و رئتينن كمان بحاجة لهوا متجدد احسن من الرطوبة تحت و الا بصير معن ربو و ما فيي خبرك عن نوبات الربو يلي ممكن تكون قاتلة ،يعني اذا زوجك ما قتلن و دفنن انت رح تقتلين بالعيشة هون
فتحية:انت بدك مصلحتك و بس
شيرين:صدقيني بدي مصلحتي و مصلحتن ؛انا تعاطفت معن و زعلت علين ،شو قلتي؟
فتحية:......اذا طلعو من هون ،يعني ما بقا رح اقدر شوفن ابدا ،يعني كانو ميتين و شو بقا بتفرق عاشو ولا ماتو
دمعو عيونا و غصت هي و عم تحاول تخبي وجعا،لاول مرة بشوف فتحية بهيك حالة،ملامح وجهها تغيرت من قوة لضعف و قلة حيلة
شيرين: تعي معن
فتحية:لا مستحيل ،ابو مسعود بيلاقيني و بيقتلني
شيرين:طيب على الاقلية بتعرفين عايشين مرتاحين و مبسوطين ،عم يتنفسو هوا نظيف و بس يصيرو صبايا فيكي ترجعي تاخدين
فتحية:كيف بدي اخدن؟
شيرين:متل ما اخدونا انا و قشطة و خلي الحادثة تكون صدفة و هيك برجعو بناتك لحضنك و بتزوجو جنبك بدون ما حدا يعرف انو هدول بناتك
سكتت و هي متفاجئة من الفكرة و حسيت في قبول من ملامح وجها
شيرين:فكري و رديلي خبر ما رح تندمي ابدا
قربت علي و رفعت اصبعتا بوجهي لتهددني
فتحية:و انت اذا بتجيبي سيرة لحدا عنن يا سمرا لادفنك عايشة تحت الارض معن
شيرين:لا ما رح احكي ،مسعود معو خبر فين؟
نزلت راسا كانو عم تفكر بالجواب يلي عرفتو مسبقا
فتحية:ايه معو خبر ،هو يلي كان اخدن ليدفنن بس شفق علين او يمكن شفق علي قد ما بكيت بهداك اليوم و حطن بالبستان لبين ما دبرلن هالمحل بس انت ما رح تقليلو انو صار معك خبر بوجودن
شيرين:متل ما بدك
فتحية:بس اذا...
شيرين:خلص قلتلك ما رح احكي لحدا بس انت فكري بالموضوع منيح و لا تنسي الشرطة و الامن هون يعني فرصة منيحة و الطريق سالك لنوصل على المدينة بأمان و انا باكدلك اذا وصلنا لهنيك ما حدا رح يعرف محلنا
رجعت انا و فتحية على البيت و هي عم تعيد و تكرر بنفس الجملة و التهديد،بس الشي يلي تغير من هداك اليوم هو معاملتا اتجاهي؛كان بتحسن ملحوظ و خاصة انو انا يلي كنت اخد احيانا الاكل للبنتين دجا و ثريا و اقعد العب معن و احكي معن مع انو كان حكين قليل و ركيك بس بيتواصلو مع بعضن بطريقة غريبة حتى من غير ما يحكو او باصوات ما مفهومة ،بس كنت عم حبن كتير و شوف فين الامل يلي بدو يطلعني من هالحفرة،سألتا لفتحية عن قرارا بعد اسبوعين و بعد ما سمعت مسعود عم يطمن ابوه انو امور الشرطة حلها بطريقتو لهيك قلقت و خفت اكتر
فتحية:موافقة بس..
شيرين:عنجد
لفيتا و بوستا انا و عم ابكي من فرحتي
فتحية:بس خايفة انك ما ديري بالك علين و تخليني اندم..
شيرين:ما تخافي ولله لاعتبرن متل اخواتي ،شو الخطة؟
فتحية:بكرا ابو مسعود و اولادو عندن شحنة للتجار بنص الليل و نحن رح نستغل هالوقت و تاخدين و تطلعي انت بس من غير قشطة
شيرين:مستحيل اطلع من غير قشطة ،جيبيا تنام عنا بهديك الليلة ،اعملي اي شي بس قشطة بدا تكون معي و تساعدني بالبنات
فتحية:طيب رح حاول بس ما على الاكيد بس اسمعي يا سمرا ما بدي تهربي انت و تتركي بناتي وراكي بالطريق و الا ولله لخلي اولادي الاربعة و اولاد ضرتي ينزلو يجيبوكي من وين ما كنت
شيرين:اوثقي فيني و انا عطتيك كلمة رجل بناتك قبل رجلي بهالطريق ،رح حطن تحت جناحي و دير بالي علين و طمنك باول فرصة
فتحية:رح وصلكن لاقرب نقطة امنة و من هنيك رح بتلاقي حدا ناطرك اسمو باسل بعربة بحصان ابيض،هو يلي رح ياخدكن و ينزلكن على مشارف المدينةو بتعطيه عنوانك حتى كل فترة يمر يطمن على البنات و يعطيكي مصروفن
شيرين:تمام تمام بس انت امنيلنا الطريق
فتحية:اوعى تغلطي قدام حدا ،مسعود ما رح يعرف بشي من هالحكي
شيرين:ماشي ماشي
كنت ناطرة هاليوم بفارغ الصبر،هديك الليلة اجت ياسمين تنام عنا بحجة انو فتحية بدا تعمل اقراص حلو و ياسمين بتساعدنا فين ،طلعو ابو مسعود و اولادو التسعة من البيت باستثناء سيف يلي بقي نايم بالبيت كرمالنا ، ما كان معنا غير وقت قليل ما يقارب الساعتين،لبست تياب و سمكت بعد ما فهمتا لياسمين كل شي و رحنا على القن اخدنا البنات و طلعنا من الضيعة من طرق ضيقة و نحن ماشين ورا فتحية ،دخلنا بين الشجرنحن و طالعين لفوق حتى وصلنا على النهر ،فتحية حطت بناتا على كتفا وحدة وحدة و وصلتن على الضفة التانية و انا و قشطة دخلنا بالمي الباردة حتى وصلنا لعند فتحية يلي كانت عم تبكي و تودع بناتا و تبوسن و اضمن و تشمن حتى انا و قشطة بكينا عليا
فتحية:انا اكتر من هون ما بقدر وصلكن،هلأ بتابعو لفوق بخط واحد حتى توصلو على الشارع الرئيسي بس ما بتطلعو فورا عليه عالمكشوف بضلو ماشين على موازيه بس بعد خط شجر حتى ما حدا يشوفكن و بعد مسافة رح تلاقو العربة ناطرتكن و الباقي بتعرفوه بس ديرو بالكن من ابو مسعود و اولادو لانو انا ما بعرف وين عم يحملو الحمولة ....سمرا اوعى تنلقطو ...اذا انلقطو انا بخسر دجا و ثريا...ما رح يخلون يعيشو
شيرين:طيب طيب ،خلينا نمشي بسرعة
رجعت ضمتن و باستن هي و عم تأمنا علين و تركتنا بصعوبة نكمل طريقنا لحالنا بعد ما اعطتنا شعلة بضو خافت ،كنا انا و ياسمين مبسوطين انو اخيرا رح نطلع من هالخندق ،مشينا متل ما خبرتنا فتحية نحن و عم ندور على العربة بخيل ابيض حتى شفناه و ركضنا عليه
باسل:اطلعو يلا بسرعة
طلعنا قعدنا انا و ياسمين و كل وحدة مننا حطت بنت بحضنا وشد سراج الخيل و مشي فينا
باسل:من وين طلعو هدول؟
شيرين:شوفي؟
وقف العربة فجأة و بعدين لف و صار يرجع لورا
شيرين:شو يلي صار ،ليش عم ترجع؟
باسل:ابو مسعود و اولادو عم يحملو شحنة هوت ،بدي ارجع قبل ما يحسو علي
شيرين:ايه بسرعة ،خدنا من طريق تاني
باسل:ما في طريق تاني ،رح ننطر بين الشجر لبين ما يخلصو و بعدين منتابع طريقنا
ياسمين:شيرين؛حاسة حاالي دايخةو بدي استفرغ
شيرين:ياسمين شدي حالك ما وقتا هلأ
ياسمين:ما قادرة
قامت بسرعة و نزلت من العربة و صارت تستفرغ على الارض و تسعل بصوت عالي
باسل:يا سلام،دخليا و سكتيا الله يخليكي و الا بيعرفو محلنا
شيرين:ياسمين دخيل الله رح تفضحينا
ياسمين:شيري ما قادرة وقف على رجلي
شيرين:شو صرلك،شدي حالك
فجأة سمعنا صوت رصاص و بين من بعيد اتنين طوال ما قدرت شوف ملامحن عالعتمة ،صرخو بصوت عالي
_مين هون؟
باسل:يالله ،اطلعو بسرعة رح نمشي
طلعتا لياسمين على العربة انا و عم سندا علي ، ضرب باسل الخيل بالسوط و انطلق بسرعة بوجهن و هدلاك بلشو يضربو رصاص حتى يوقف حتى ياسمين غابت عن الوعي و البنتين خافو و صارو يصرخو و الخيل جن جنونو من الرصاص و صار يصهل بصوت عالي و يركض و يتمايل حتى انحرف عن الطريق و نزل بالمنحدر و وقع و انقلبنا كلنا من فوق لتحت ، ركضو االباقي علينا هن و عم يضاو علينا ليشوفو مين جوا العربة و ماسكين اسلحتن و مصوبينا اتجاهنا ، سحبو باسل من محلو على الارض،كان وجهو كلو دم و غايب عن الوعي ،بعدين سحبو ياسمين يلي كانت كمان فاقدة وعيا و بعدين سحبو البنات يلي كانو عم يبكو و خايفين و بعدين طالعوني ،و اول شخص شفتو بوجهي كان مسعود؛قرفص على رجليه و هو مفتح عيونو و متفاجئ و عم يطلع فيني ليتأكد من هويتي
مسعود:سمرا !
مسكني من ايدي بهمجية
مسعود:شو عم تعملي هون ؟
شيرين:انا ...انا كنت . .
مسعود:كنت عم تهربي؟
خنجر:مين هدول البنتين يلي معك ؟
شيرين:... ..
جاسم:جاوبي لمين هدول البنتين يلي معك؟
اطلعت بمسعود يلي كان عابس و عم يعض على شفايفو
شيرين:هدول ....هدول ...التقينا فين نحن و على الطريق
مسعود:خنجر رجعن على الدار بسرعة
اجا صوت محسن من بعيد
محسن:مسعود شو صار عندك؟
قام وقف هو و عم يضب سلاحو
مسعود:ما في شي محسن،عابرين طريق و خلصنا علين ،انتو تابعو شغلكن
رجع محسن و انضم لباقي الرجال و بقي مسعود و خنجر و اخواتو مزيون و جاسم معنا
مسعود:ما تخبرو محسن او ابوكن بالشي يلي شفتو هلأ و انا بتصرف و بحاسبن
جاسم:بس بدنا نعرف مين هالبنتين الصغار يلي معا لانو القصة ما فاتت راسي
مسعود:جاسم ارجع لباقي الرجال و اترك هالموضوع علي
جاسم:حاضر
مسعود:و انت كمان الحكي الك مزيون
مزيون:حاضر
مسعود:خنجر بتوصلن على الدار واوعى تغفل عينك عنن حتى تسلمن لامي و بتقلا مسعود رح يحرق الاخضر و اليابس ليرجع
خنجر:ماشي اخي بس هاي شو وضعا
مسعود:احملا و ما تطلع على الشارع حتى تتأكد انو صرت بعيد عن نظرنا ،ما تخلي محسن يشوفا لانو رح يقتلا
خنجر:حاضر
رجعنا على الضيعة و خنجر حامل ياسمين على ضهرو حتى صحيت و رجعت لوعيا بنص الطريق ،اول ما شافتنا فتحية انخطف لونا ،وصلا رسالة مسعود و صبت كل غضبا علينا و ما حاولت تسمع مني يلي صار ؛رجعنا البنتين على قبو القن و رجعت حبستني انا و ياسمين بغرفتي
شيرين(تبكي):كلو منك انت السبب
ياسمين(تبكي):ولله ما عن قصدي،ما بعرف شو صرلي،انت بتعرفي اني قاتلة حالي لاطلع من هون بس فجأة قلبت معدتي و ما قدرت امسك حالي ...محسن عرف ؟
شيرين:لا
ياسمين:لحمدلله لحمدلله
شيرين:بس مسعود عرف ورح يحاسبني الي مو الك ،انت يلي وقعتينا و انا يلي بتحاسب عنك ،يالله على حظي
على وجه الصبح ،حسيت على حركة مسعود بالغرفة عم يغير تيابو و بعدين دخل تحت الحرام ،عملت حالي نايمة و قربت منو و حطيت راسي على صدرو،بعدني عنو
مسعود:حسابك لبكرا ،هلأ تعبان و بدي نام
شيرين:مسعود انا خلص ما بقا عيدا
مسعود:شكلك نسيتي شو اخر مرة انا قلتلك
شيرين:لا ما نسيت بس انا اشتقت لاهلي ...(تبكي)..من حقي شوف اهلي ..انت عندك عيلة و عم تشوفا كل يوم و عم تحرمني من اهلي
مسعود:هاي الدموع ما رح تنفع معي هالمرة لانو انا كتير معصب و الحق كلو على امي ،هاي نهاية المعروف يلي قدمتلا اياه تستغل غيابي لتهربك ،طعنتني بضهري امي غدرتني بس كلو بدو يتحاسب
شيرين:امك ما دخلا ا،انا يلي بقيت عليا حتى قنعتا تهربني و تهرب بناتا معي؛مسعود ما دخلن البنات و حتى ياسمين ما دخلا ،انا الحق علي بكل شي
مسعود:اكيد انت الراس الكبير بكل شي لهيك رح يكون حسابك كبير هالمرة
دار ضهرو و تركني قلقانة و خايفة و عم فكر شو بدو يحاسبني مسعود هالمرة
تاني يوم الساعة عشرة فقنا على صوت ابومسعود،عم يخبط على باب غرفتنا و ينادي مسعود بعصبية ،فاق مسعود متوتر و انا نشف الدم بعروقي،فتح مسعود الباب
مسعود:ايه يابي شو في؟
ابو مسعود:غسل وجهك و الحقني على غرفة القعدة
فات يغسل وجهو و انا لحقتو و حاملة المنشفة بايدي
مسعود:ادعي لله يكون بيي ما عرف شي من يلي صار مبارح و الا بتكوني ورطيني كمان و وقتا يا سمرا حسابك رح يكبر كتير
فات مسعود لعند ابوه و اانا وقفت ورا الباب اتسمع
ابو مسعود:وين البنتين يلي لقيتون مبارح مع قاطع الطريق؟
مسعود:اي بنتين يابي؟
ابو مسعود:مسسسعود ،جاسم خبرني بكل شي
مسعود:يابي كان الشاب لحالو ،ما كان معو حدا
ابو مسعود:مسسسعود احكي و الا رح ازعجك كتير
مسعود:يابي جاسم مبارح حشش كتير و انت بتعرف يلي بحشش كيف بصير يشوف شوفات ما مزبوطة ،يعني البنتين تهيؤات بس
ابو مسعود:هلأ منتأكد ؛فتحية
فتحية:ايه
ابو مسعود:نادي خنجر و مزيون
فتحت الباب فتحية و شافتني بوجهها، قربت علي هي و عم تزورني
فتحية:الله ياخدك و يقطع الساعة يلي صدقتك فيا
تركتني و راحت و رجعت و جنبا خنجر و مزيون ،فاتت لجوا و سكرت الباب وراها و انا رجعت اتنصت
ابو مسعود:ايه احكو لشوف مين كان مع سايق العربة مبارح ؟
خنجر:....
مزيون:.....
ابو مسعود:شبكن سكتو ...احكو
خنجر:لحالو يابي ،ما كان معو حدا
ابو مسعود:مزيون؟
مزيون:ما كان معو حدا ،كان لحالو
ابو مسعود:ها ،لكن من وين طلعو هالبنتين يلي حكى عنن جاسم الغبي
مسعود:قلتلك يابي حشش كتير
ابو مسعود:هالغبي؛عرفتو هويتو لهل الكر؟
مسعود:لا يابي ما عرفناه و قتلناه 3 رصاصات بقلبو حتى نتأكد انو مات
ابو مسعود:غبي ،تاني مرة ما بتتصرف منك لحالك ،بترجع تسألني ،بلكي كان حدا باعتو ليتجسس علينا ،يمكن يكون من طرف مهران و رجالو
مسعود:يابي مهران ما بيسترجي يقرب بعد الشي يلي عملناه ، و صيتنا فايح بالطريق كلو
ابو مسعود:ما تستهينو فين ،رغم قصرن بس خبيثين ،ما نسينا شو عملو فينا من 4 سنين
مسعود:يابي و نحن ردينالن اياها و من وقتا ما بقا استرجو يغلطو معنا ،انت ارتاح ،ما تاكل هم شي
ابو مسعود:طيب بس فتحو عيونكن على اخوكن جاسم و ما تتركوه يحشش على كيفو ،ما ناقصني وجعة راس ،نحن ما صدقنا ايمت خلصنا من قصة الشرطة
مسعود_خنجر_مزيون:حاضر يابي
فتح الباب مسعود و انا بعدت فورا بس لمحني ،لحقني على المطبخ و مسك ايدي و سحبني على الغرفة و سكر الباب
شيرين:مسعود خلص مرقت القصة على خير
مسعود:اضطرينا نوقف تحميل بس بتعرفي لو جاسم خبرو لابي انو انت و قشطة كنتو بمحل التحميل شو كان عمل فيكن ،كنتو تمنيتو الموت مية مرة ،بس هالموقف يلي حطيتيني فيه قدامو ما رح سامحك عليه يا سمرا
شيرين:اعمل يلي بدك اياه ،ما بتفرق معي ،اساسا كلكن رح يجي يوم و تتحاسبو وقت الشرطة تعرف محلنا و تاخدنا من نص ارضكن المتخلفة
مسعود:ها ،ااشرطة ما بقا رح ترجع لهون ؛بتعرفي ليش ؟
شيرين:ليش!
مسعود:لانكن ميتين
شيرين:مافهمت
مسعود:الشرطة بقيت عم دور عليكن حتى لقت تيابكن القديمة و عليها اثار دم ،يعني اكلتكن الذئاب و ما بقي منكن غير تيابكن،شو رايك؟
شيرين:انت ...انت..شيطان ،و انت و ابوك ما كتير بتفرقو عن بعض
مسعود:لو انا ما بفرق عنو،ما كنت بعدك واقفة قدامي لهلأ و عم تتنفسي و الدم عم يمشي بعروقك
شيرين:ها ،معناها يا ريت كنت بتشبهو ،كنت على الاقل متت و ارتحت و ما بعدني لهلأ عم اتعذب
مسعود:لسا ما شفتي شي من العذاب
شيرين:شوفتك كل يوم ما في اكتر من هيك عذاب
دفشني على الحيط و مسك وجهي بايديه
مسعود:لسانك اطول منك
قمت ايديه عن وجهي
شيرين: بس ما اطول منك
مسعود:سمرا،رح تندمي كتير
شيرين: انت عم تكبر االقصة،انا جيت لاعتذر منك مبارح بس انت يلي ما قبلت
سمعنا صوت زغاريد و اصوات من برا ،بعد عني مسعود و طلعنا لنشوف شو القصة،شفنا زهرة واقفة برا و عم تزغرد و محسن عم يوزع حلو للناس
فتحية:زهرة شو صاير عنكن؟
زهرة:باركيلنا
فتحية:مبروك بس على شو ؟
زهرة:قشطة حامل
حطيت ايدي على تمي
شيرين:ياسمين حامل!
اطلع فيني مسعود و عبس و رجع سحبني من ايدي على الغرفة
شيرين:شبك ،اتركني
مسعود:و انت ؟
شيرين:شو انا؟
مسعود:ليش ما عم تحبلي لهلأ؟
شيرين:انا ....احبل .....لا مستحيل ...
مسعود:ليش؟
بلعت ريقي انا و عم فكر كيف ما خطرتلي فكرة الحمل من قبل ،انا ممكن احمل من مسعود و وقتا رح تصير الطلعة من هون مستحيلة،رح تكون هالضيعة قبري
مسعود:سمرا ..احكي ..
شيرين:ما بعرف ليش ،بجوز كون انا ما بجيب اولاد مثلا
دفشني على التخت
مسعود:انا ما بفهم هيك ،بدك تحبلي و اليوم و بهالساعة كمان
التقيت بياسمين وقت فتنا انا و فتحية نباركلا على الحمل بفترة العصر ،كانت متسطحة و وجهها تعبان كتير و عم تستفرغ كل ما تاكل شي ،خفت كتير انو يجي يوم و كون انا بمحلا ،ما قدرت انفرد فيا ولا دقيقة بس وقت انفردت بفتحية
فتحية:ما بقا بدي شوفك بالقن من يوم و رايح ،فهمانة؟
شيرين:خلينا نرجع نحاول مرة تانية بس هالمرة من غير ياسمين
فتحية:مستحيل ،لولا مسعود ،لكانو بناتي هلأ مدفونين تحت الارض
شيرين:على اساس هن هلأ عايشين على الارض
فتحية:خليكي بحالك و شوفي كيف رفيقتك حامل ،غاري منا
فتلت ضهرا و مشيت
شيرين:على اساس انجاز يعني
فتحية:شو حكيتي؟
شيرين:ولاشي ...ولاشي
كنت خايفة كتير من عقاب مسعود هالمرة بس تاني يوم بالليل طلع ابو مسعود و اولادو ليكملو تحميل شحنة مبارح،و بقينا انا و فتحية و سيف بالبيت ،هاي الليلة صار فيا شي ما متوقع ابدا،فقت على صوت ضجة باالبيت؛قبل ما قوم من التخت،كان باب غرفتي مدفوش و فاتو علي رجال طبيعين طولن من طولي ،مسكوني من ايدي و طلعوني لغرفة القعدة هن و حاملين اسلحتن وعم يهددونا فين ،شفت فتحية قاعدة و واقف جنبا واحد منن و حاطط السلاح براسا و بعدين جابو سيف هن و موجهين السلاح عليه و عم يهددو بانو رح يضربو اذا تحرك اي حركة
مهران: مين هاي ؟شكلا غريب عنكن
سيف:هاي مرة اخي مسعود
مهران:اوووه كتير منيح ،رح ناخدا معنا و نعتبرا رهينةو بعدين منتفاوض
تابعووووووني
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
❤️🌹🌺💙❤️🌹🌺💙❤️🌹🌺💙❤️🌹🌺💙❤️🌹
تعليقات
إرسال تعليق