خارج النطاق الفصل التاسع والعاشر والاخير بقلم هلا غرابلي حصريه وجديده
طلعنا من باب المطبخ و دفشتني لبرا لعند رجال ضخم و شعرو رمادي ،عمرو تقريبا بال 50 سنة
فتحية:هاي هي هديتي لامير الجبل
مسكني من ايدي و اطلع فيني
ممدوح:طيب ،بخبرو بس شو سبب الهدية ،ما بدك مقابل؟
فتحية:لا ابدا ،ما بدي شي بس ديرو بالكن كتير منيح منا انو تهرب لانو تاريخا طويل بمحاولات الهرب
ممدوح:ما توصي ؛الدبانة ما بتتنفس الا بعلمنا ،بحطا بقسم الجواري الا الخدم ؟
فتحية:الخدم و زيادة عليا و جور عليا منيح لانو عذبتنا كتير يلا امشي بسرعة قبل ما يجي مسعود ...سمرا انا كنت لازم ادفنك تحت الارض بس هيك بكون عم ريحك و انا ما بدي ريحك ،بدي اياكي تتعاقبي عقاب ابدي ،خدا من وجهي قبل ما غير رأيي
شيرين:لوين اخدني ...اتركني ...عم قلك اتركني
 |
حملني و حطني على الحصان و طلع هو و عم يصرخ علي و يهددني بالضرب بالسوط ،ما كنت عارفة لوين اخدني بس كنت خايفة كتير من كلام فتحية و مطمنة انو خلصت من الموت ،وصلنا على قلعة كبيرة براس الجبل هي نفس القلعة يلي شفتا انا و ياسمين اول ما جينا لهون ،فتحولو باب حديد كتير كبير
البواب:شو جايب معك ؟
ممدوح:هدية لامير الجبل
نزل عن حصانو هو و ماسك اللجام بايدو،ساعدني لانزل هو و عم يملي علي تعليمات
ممدوح:هون بدك تكوني حذرة كتير ،من اول محاولة هرب الك بيقتلوكي بدون اي فرصة اولى ،بدك تسمعي الكلمة و اطيعي الاوامر ،هون الك تم ياكل ما الك تم يحكي
شيرين:لوين جايبني ؟
ممدوح:هيدا قصر امير الجبل ،فوتي من هون
فتنا من باب خلفي للقصر ،استقبلتنا مرة كبيرة بالعمر اسما ياسمينة
ياسمينة :خدم الا جواري؟
ممدوح:حطيا خدم ،اسما سمرا
ياسمينة:ماشي
ممدوح:الامير فايق ؟
ياسمينة:ايه و نزل على الصيد
ممدوح:طيب،ياسمينة هاي اذا حاولت تهرب من هون ،بتخبروني فورا لينعملا اللازم
ياسمينة:حاضر
طلع ممدوح من المطبخ و سحبتني ياسمينة من ايدي
شيرين:انا شو بدي اعمل هون ؟
ياسمينة:اعملي يلي بينطلب منك بس
شيرين:حاضر ،هيدا ممدوح شو بكون هون؟
ياسمينة:هيدا المستشار الخاص للامير
حطيت ايدي على تمي و ضحكت،اطلعت فيني ياسمينة بطرف عينا
ياسمينة:شو المضحك؟
شيرين:مستشار خاص للامير!عنجد ما عم صدق ،انتو باي قرن عايشين ،خدم و جواري و امير و مستشار و قلعة و احصنة ،يالله وين انا ،مستحيل يكون كل يلي عايشة فيه انا حقيقة ،اكيد عم احلم
ياسمينة :سمرا بدل هالحكي يلي عم تحكيه و ما مفهوم منو شي ،فوتي غيري تيابك و بلشي شغل
شيرين:حاضر
غيرت تيابي انا و عم اطلع بزوايا القصر ،كان مكان كتير فخم الديكور و النقوش يلي بالسقف و اللوحات و المنحوتات كلها قديمة ،حسيت حالي فايتة على متحف ،كان كلها شغلات نادرة ،تابعت اتفرج و نسيت حاالي حتى اجا صوت من وراي
اميرالجبل :مين انت؟
فتلت ضهري و شفت شاب طويل ابيض و شعرو اسود مسرح لورا و لابس قميص ابيض و بنطلون اسود و جزمة سودا جلد ،كان وسيم كتير و خاصة عيونو كانو جذابين كتير لدرجة تلبكت و نزلت راسي
شيرين:انا ...انا سمرا
امير :مين سمرا؟
شيرين:انا ..
ممدوح:هاي سمرا هدية من ام مسعود يلي ساكنين بارض العمالقة
شيرين:هدية !شو شايفني قدامك !ما ناقص غير تغلفني و تحطلي شريطة حمرا
ممدوح:انت شو جابك لهون ،انا ما حطيتك بقسم الخدم
شيرين:كنت عم اتفرج على اللوحات و نسيت حالي
ممدوح:ايه بسرعة انزلي لتحت و ما بقا بتتواجدي بمحلات ما الك
امير:انا قلتلك حطا بقسم الخدم ؟
ممدوح:لا جلالتك بس ام مسعود باعتا خدم ،لانو ما بكر
امير:انا يلي بقرر وين محلا،حطا بقسم الجواري
شيرين:لا انا مرتاحة بمحلي ...جلالتك
بلعت ضحكتي انا و عم بعد عنن و انزل على الدرج
امير: لحظة...انا ما اعطيتك الاذن لتمشي
شيرين:عفوا
ممدوح:اوقفي منيح و نزلي راسك انت و عم تحكي مع جلالة الامير و بس يقلك روحي بتروحي
رفعت حواجبي
شيرين:حاضر
ممدوح:جلالتك بدا تعليم كتير و انا رح اشرف على الموضوع
شيرين:فيني امشي هلأ
امير:خدا ممدوح لعند زمرد و قلا تجهزا لبكرا
مسكني من ايدي بفظاظة و سحبني وراه
ممدوح:امشي معي
شيرين:لوين؟
طلعنا على االطابق التاني و التقيت بصبية بعمر ال 35 سنة
زمرد:شو جايب معك؟
ممدوح:خدي نظفيا و لبسيا و علميا الاصول ،بكرا بدو اياها الامير
سحبتني التانية من ايدي هي و عم تطلع فيني
زمرد:من وين جيتي انت كمان !اوف
التقيت ببنات كتير من عمري و اصغر مني و اكبر مني و كان لبسن غريب فساتين طويلة شيفون و حرير و شعرن مسدول على اكتافن ،وقفت مبهورة فين لانو حسيتن لوحات فنية من الجمال و الرقة ،بعد وقت قصير ،صرت وحدة منن ،نفس اللبس و نفس تسريحة االشعر ،قربت على وحدة منن اسما ميس لاقدر افهم شو عم يعملو هون ،بعد ما خبرتني كل شي بالتفصيل ،حسيت حالي وقعت بورطة اكبر من ورطة مسعود و اهلو ،و ما كان قدامي غير ارجع حاول اهرب مرة تانية او موت على انو اقبل هيك حياة رخيصة ،بالليل انفردت بزمرد
شيرين:زمرد انت كتير حلوة اسم على مسمى ليش ما بيتزوجك الامير و بتصيري اميرة
زمرد:شو بدك ؟
شيرين:زمرد الله يخليكي طلعيني من هون انا ما بدي شوف الامير ،و لا بدي اختلي فيه
زمرد:لازم نفذ الاوامر
شيرين:هربيني من هون الله يخليكي و خلي القصة صدفة ،ما حدا رح يعرف انك ساعدتيني ،قليلي بس كيف بطلعو من هون و انا علي الباقي
اطلعت فيني بعيونا و وسعت حدقتن ،هزت براسا هي و عم تبتسم
زمرد:طيب ماشي رح قلك كيف بطلعو من هون بس انا ما دخلني شو بصير معك بعدين
شيرين:ماشي ، عم اسمعك
خبرتني زمرد بالتفصيل كيف بقدر اطلع من هون ،ما كان في مخرج من هالقلعة غير باب واحد يلي فتت منو لهون
زمرد:رح تطلعي من باب المطبخ ؛رح اتركلك اياه مفتوح بس سمرا ديري بالك انا ما دخلني شو بصير معك بعدين و ما بتجيبي اسمي
شيرين:اكيد
،بعد نص ليل بعد ما الكل نام بتختو ،نزلت على روس اصابيعي للطابق الارضي و طلعت من باب المطبخ يلي كانت زمرد تاركتو مفتوح الي ،وصلت لباب الحديد الخارجي ،كان عالي كتير بس كنت بقدر اتخطاه ،
مسكت عواميد الباب بايدي و حطيت رجلي على اول خط حديد من الباب و بلشت اطلع خط ورا التاني ،وصلت لاعلى الباب و جيت لابرم ضهري و انزل من الجهة التانية بس شفت 4 كلاب سود كبار شرسين ما بحياتي شفت ابشع و اضخم منن ، اول ما شافوني بلشو ينبحو علي و واحد منن مسك بفستاني و صار يشدني لتحت و انا كان بدي ارجع اطلع لفوق ، شعلت انارة من الطابق التاني و انفتح باب البرندا و طلع امير الجبل من جوا
امير:مين فيه هون ؟ ممدوح ..ممدوح ...
فاق الكل على صوت الكلاب و على صوت صراخي انا و عم خلص طرف فستاني من تم الكلب يلي كان عم يشدو لاوقع عن الباب ،اجا ممدوح ركض لعندي هو و ماسك سلاح و عم يقوص بالهوا
شيرين:انا سمرا انا سمرا
ممدوح :هاي انت ،شو عم تعملي فوق ؟ بدك تهربي ؟
اجا امير هو و عم يلف جسمو بمشلح ،اطلع فيني هو و عم يلهت
امير:هاي شو عم تعمل فوق ؟
ممدوح:شكلا عم تحاول تهرب ،نبهتني مرة ابو مسعود منا
امير:تهرب ؟
شيرين:نزلوني من هون
اجا ممدوح ليساعدني انزل بس امير الجبل مسكو من ايدو و منعو
امير:اتركا تنزل لحالا متل ما طلعت
شيرين:الله يخليكن نزلوني
شرطت الفستان بايدي و كبيتو بس كلب منن صار يتعربش على الباب و بدو يلقطني حتى من عن الباب،و ركض امير الجبل مسكني بين ايديه
امير الجبل:مجنونة ...لو تركتك توقعي على الارض شو كان صار فيكي!
شيرين:.....
ممدوح:جلالتك اعطيني اياها لنفذ حكمك فيا
امير:...
ممدوح:انا قلتلك اذا بتهربي هون ما الك فرصة تانية
نزلني عن الارض و انا بعدني عم اطلع فيه
امير:حطا بالحبس لتعرف تاني مرة تهرب و بدي اعرف كيف وصلت للباب الخارجي و اي حدا الو ايد بالموضوع بدو يتعاقب معا
شيرين:وين !
ممدوح:حاضر جلالة الامير ،رح لاحق الموضوع و انت مشي معي
مسكني من ايدي و سحبني وراه
شيرين:لوين اخدني ؟
نزلت على درج تحت الارض،كان ظلام كتير بس ممدوح مسك شعلة بايدو و تابع نزول هو و عم يسحبني من ايدي
ممدوح:رح تبقي هون حتى اشعار اخر من الامير
طلع و قفل الباب علي و تركني لحالي مع شعلة نار ما طولت كتير لانطفت و بقيت لحالي حتى غلبني النوم ،فقت على صوت االباب عم ينفتح ،فات ممدوح و حامل بايدو صنية اكل ،حطا على الارض و دفشا بايدو لجهتي
شيرين:انا لايمت بدي ابقى هون ،انا بدي حكي الامير
ممدوح : بس بدو الامير يحكي معك بيطلبك لعندو و من هون لوقتا ،رح تبقي هون
دفشت الاكل بايدي
شيرين:ما بدي اكل ولا لقمة قبل ما اطلع من هون
حمل الصينية و طلع و قفل الباب علي
شيرين:الله لا يوفقك يا فتحية ،الله ياخدك انت السبب ،كنت عارفة رح يصير فيني هيك ...اوف ... ،كانت ما عاجبتني الحياة مع مسعود ،طلعت يا محلاها مقابل هالحبس و هالشخصية المجنونة قال امير و جواري
قمت وقفت و مشيت للباب انا و عم لمس الحيطان و صرت خبط على الباب
شيرين:افتحولي الباب ...بدي اطلع من هون ...حدا يرد علي ....يا جواري يا خدم ..افتحولي الباب ...انا بفرجيكن
ما حدا رد علي ،رجعت قعدت محلي و تندمت كتير على الاكل يلي رفضتو بعد ما صار بطني يجعني من الجوع ،رجع انفتح الباب و فات ممدوح و معو زمرد ،دخلت هي و عم تضحك ضحكة صفراوية
زمرة:جلالة الامير كريم و قلبو طيب لهيك رح يفكر اذا بيعطيكي فرصة تانية ، اليوم بشوف رقصك و اذا بتستاهلي فرصة تانية بينظر بامرك..
شيرين:رقصي؟ انا ؟ههههههههههه هههههههههه بدي ارقص لاميركن هههههه
اطلعت زمرد بممدوح
زمرد:من اول ما شفتا انا ما ارتحتلا ابدا ،حس السخرية عندا عالي و كمان ما مؤدبة او عاطية اهتمام لقوانين القصر ،خبر الامير انو ما بتستاهل فرصة تانية
فتلو ضهرن ليطلعو ،قمت وقفت فورا
شيرين:لحظة لحظة ،انا ما رفضت ،انا بس تفاجأت يعني ،خلص موافقة برقص
تنهدت زمرد كانو ما عجبا جوابي ،طلعت من الحبس تحت الارض و رجعت على قسم الجواري و فتت متل الغريبة او الشاذة عنن،كان الكل عم يطلع فيني و يتهامسو علي ،اكلت و تحممت و غيرت تيابي و لبست فستان خمري ساتان و شيفون مشكوك و بعدين اجت وحدة من الخدم ،همست بادنا لزمرد و بعدا قامت وقفت زمرد و صفقت بايدا
زمرد:يلا على جناح الامير
مشيو كلن و انا مشيت معن ،ما كنت عارفة لوين و شو بدي اعمل بس كان هالوضع افضل من الحبسة تحت مع الفيران و الصراصير ،انفتح باب كبير و فاتو البنات و انا فتت وراهن ،وقفو بطريقة منسقة و مرتبة و بلش صوت الموسيقى و العزف و بلشو يتحركو بانسياب و لياقة مع الموسيقى ،انا كنت اطلع علين كيف يمدو ايدين و يحركون لفوق و لتحت و بعدين يفتلو جسمن هن و عم يهزو خصرن و قلدن فورا رغم اني كنت متأخرة كتير بالسرعة عنن و شكلي مضحك بيناتن بس كنت عم حاول كل جهدي حتى ما ارجع للغرفة تحت الارض،كان ممدوح واقف و عم يطلع فيني و حاطط ايدو على خدو و عم يهز براسو و زمرد واقفة جنبو عم تضحك ،بعدين عرفت انو عم تضحك علي،بعدين بعدو البنات كلن عني و تركوني لحاالي بالساحة ،اناوقفت رقص حتى شفت امير قاعد و عم يطلع فيني و اشرلي بايدو لتابع رقص ،اطلعت بالكل انا و متلبكة و زمرد واقفة عم تفتل خصل شعرا بايدا و تهز راسا
شيرين:انا ما بعرف ارقص هيك ،متلكن يعني
امير:ليش زمرد ما علمتك ؟
شيرين:لا ما علمتني
زمرد:جلالتك انا علمتا بس هي ما تعلمت للاسف
شيرين:كذابة ولله كذابة ما علمتني شي
زمرد:ما اقل ادبك ،ما بصير تحكي بهالطريقة قدام جلالة الامير
شيرين:انت ما دخلك بطريقة حكيي بس ما تكذبي و تقولي علمتيني
امير:خلص ،هدوء
زمرد:حاضر جلالة الامير ،انا ما رح رد عهالاهانة لانك بتعرفني منيح ،كل الجواري يلي هون انا يلي علمتن و ربيتن بس هاي كتير صعب التعامل معا و عنيدة و متعبة و تعليما مضيعة للوقت
شيرين:انا ؟
زمرد:اذا بتسمحلي احكي يعني اذا بتبعت حدا و بتسأل عنا بالمنطقة يلي كانت ساكنة فيا ،رح تسمع شي ما رح يعجبك اكيد و رح يأكدلك صدق كلامي و بعتقد انها هدية غير صالحة للاستخدام او حتى للمنظر و الصمد
شيرين:ها ، يعني انت على اساس صالحة للمنظر و الصمد ،منخارك اكل مساحة وجهك كلها و اذاحبيتي تاخدي فيه نفس عميق بتسحبينا كلنا
صارو باقي البنات يضحكو بصوت عالي استفز زمرد كتير
زمرد:جلالة الامير شفت بعينيك و سمعت بادنيك كمية الوقاحة و قلة التهذيب من هالجارية و منستنى منك العقاب يلي عودتني ترد فيه على قلة هالاحترام الموجهة الك قبل ما تكون الي
شيرين:العقاب لازم يكون الك ما الي لانك عم تكذبي ،و هي يلي ساعدتني لاهرب و كانت بتعرف انو في كلاب ورا الباب بس كان بدا اياني حاول كرمال انلقط و انحبس
زمرد:انا ؟
رفع ايدو الامير ليسكت الكل
الامير:ممدوح ابعت حدا لارض العمالقة يسأل عن قصة هالبنت و انت زمرد بتنزلي على قسم الخدم من اليوم ...
زمرد:جلالة الامير انا ..
الامير:اما انت يا سمرا ما شايف عقاب مناسب الك غير الموت ،بس خلينا نعرف قصتك بالاول لانو واضح وراكي قصة كبيرة ،ممدوح رجعا للحبس
شيرين:لا امانة ،بخاف من الصراصير و الفيران تحت
اخدني ممدوح غصب عني و زتني بالغرفة ،ما بعرف اديش بقيت فيا يوم او يومين او يمكن اسبوع ،كان الوقت بطيء كتير و كنت ناطرة شي معجزة لاطلع من هون ،كنت نام و احلم اني ارجع لحياتي الطبيعية لبيتي لاهلي لجامعتي بس كان صوت ممدوح الخشن كان يردني على ارض الواقع ،فاتت زمرد لعندي هي و حاملة صنية الاكل
شيرين:شو ما في غيرك يجبلي الاكل ؟
زمرد:فيه بس انا حبيت جبلك اياه هالمرة ،اسمعي انت عدوتي من هاللحظة و يا انا يا انت بهالقصر
شيرين:انت انت ،انا ما حابة ابقى هون
زمرد:رح فرجيكي يا سمرا ،انا لكن انحط بقسم الخدم و انا ست الجواري
شيرين: بتستاهلي لانو نيتك انقلبت عليكي
زمرد:و انا رح سود عيشتك هون
مسكت الاكل و كبتلي اياه على الارض
زمرد:يلا كلين من الارض
طلعت من عندي هي و عم تضحك ،بعدا فات ممدوح و طلعني
شيرين:لوين اخدني ؟بدكن تموتوني ؟ليش انا شو عملت ؟
ممدوح:....
طلعنا على جناح الامير ،دق ممدوح الباب دقتين و فات و انا فتت وراه ،كان امير الجبل عم يلبس تيابو و الخدم حوليه عم يساعدوه
امير:جبت البارودة
ممدوح:ايه
شيرين:اووه ..لحظة لحظة ...انا ما عملت شي كبير حتى اتعاقب عليه بهالطريقة ،انا كان بدي حريتي بس ،بدي ارجع لحياتي و لاهلي
امير:ليش بعتتك ام مسعود لهون ؟
شيرين:كرمال تخلص مني
امير:ليش بدا تخلص منك ؟
شيرين:على حسب قولا اني انا قدمي اسود علين و من وقت ما فتت ارضن هلت المصايب علين
امير:في صحة بهالموضوع ،جيتي من يومين و عملتي فوضى كبيرة هون ،ممدوح شو عرفت عنا كمان ؟
ممدوح:جلالتك بتكون زوجة مسعود ..
الامير:يعني مرة ابنا لام مسعود !
ممدوح:ايه بس زوجا ما بيعرف انو هي هون عنا ،حسب ما تخبرت انو مفكر انو هربت و سمعت كمان انو ...
الامير:ايه ؟
ممدوح: انو عملت مشاكل كتير ،حاولت تهرب عدة مرات حتى اخر مرة عملت حريق كبير بس عندا نقطة جيدة وحيدة ..
الامير: ايه؟
ممدوح:حاولت تصلح بين الارضين و اجتمعت بعيلة مهران و زوجت بنتو لابن ابو مسعود
الامير:شي مثير للاهتمام ! و هلأ كيف العلاقة بيناتن؟
ممدوح:رجعت توترت لانو ام مسعود خربت كل شي
الامير:هيك بصير بس تغيب الرجال ،معناها صار لازم ندخل ؟
ممدوح:يلي بتشوفو جلالتك و سمرا شو بعمل فيا؟
الامير: سمرا ...يا سمرا ما اشتقتي لاهلك؟
شيرين:ايه كتير
الامير:معناها اطلعي تجهزي لنروح زيارة على ارض العمالقة و منأجل الصيد لبكرا
شيرين:لا لا انا اشتقت لاهلي بس ما قصدي فتحية و مسعود ،انا عندي اهل...
الامير:كل هالبنات يلي هون عندن اهل ،و انا ما بهمني من وين جيتي قبل ما تخطي رجلك هالارض يلي هي كلا تحت نفوذي،انا بهمني انو انت صرتي هون و يلي بدوس هالارض ما بيطلع منا ،هون ارضك و اهلك ،مفهوم؟
شيرين:اممم
طلعنا بعربة خيل و توجهنا لارض العمالقة
شيرين:سمعان بشي اسمو سيارة ؟
امير:ايه
شيرين:ليش ما بتشتري سيارة احدث و اسرع من هالعرباية
امير:لانو مضرة للبيئة
شيرين:امم جواب مقنع
وصلنا على ارض العمالقة ،نزل امير الجبل من العربة و الكل ركض عليه انحنى قدامو و رحبو فيه ترحيب يليق بالاسم ،و بدقايق قصيرة اتجمهرو حوليه اهل الارض كلها ،بصعوبة شقينا طريقنا بيناتن لوصلنا على بيت ابو مسعود ، التقينا بجاسم اول شخص من عيلة ابو مسعود ،بعدين طلع الباقي يستقبلو حتى لمحت مسعود واقف جنب ابوه ؛ما كان شايفني لسا ،فات امير الجبل من الباب و انا مشيت وراه حتى التقو عيوني بمسعود،فتح عيونو على الاخر كأنو ما صدق يلي شافوه قدامو،مسكني من ايدي
مسعود:سمرا !
شيرين:اترك ايدي هيك
مسعود:شو عم تعملي مع الامير؟
شيرين:اسأل امك ،بعتتني هدية للامير و انا هلأ صرت جارية من جواريه
مسعود:امي!
اطلع فيني امير الجبل و اشرلي بعيونو لاقعد جنبو ،تركت مسعود مصدوم و رحت قعدت جنبو و فتحية رح تنهار و توقع على الارض من جيتي لعندن مع الامير
ابو مسعود:اهلا و سهلا بجلالة الامير؛باركتلنا ارضنا بجيتك لعنا
امير الجبل:ابو مسعود انا جيت اليوم لانهي الحرب بينكن و بين ارض الاقزام ،من هاللحظة ما بقا بدي اسمع اي مشاكل بيناتكن ،بدنا نلتفت لشغلنا
ابو مسعود:انت بتأمرنا ،اي شي بتطلبو منا اعتبرو تنفذ
امير الجبل:سمعت زوجت ابنك لبنت مهران
ابومسعود:ايه ولله بس بعد يلي صار ،البنت رجعت لاهلا و ما رحنا رجعناها
امير الجبل:بتاخد جاهة من عنكن و بتروحو لعندن و بترجعو تطلبو البنت حسب الاصول
ابو مسعود:حاضر جلالة الامير
امير الجبل:ايه ام مسعود بدي اتشكرك كتير على الهدية يلي بعتيلي اياها
نزلت راسا ام مسعود بدون ما تنطق كلمة ،فتح الباب مسعود بعصبية و طلع من البيت
ابو مسعود:ما في شي من قيمتك جلالة الامير
سمعنا صوت صراخ و فوضى برا ، بعت ابو مسعود ابنو جاسم ليتفقد الوضع ،رجع جاسم مخطوف لونو و عم يلهت
جاسم:يابي ....يابي ...الحق
ابو مسعود:شوفي جاسم؟
جاسم:مسعود علقان مع رجال الامير برا
طلع يركض ابو مسعود و هو ماسك عبايتو بأيدو و فتحية عم تولول ،قام امير و طلع و انا ركضت وراه ،كان ابو مسعود ماسك ابنو من ضهرو عم يشدو لورا
ابو مسعود:مجنون انت ...شو عم تعمل ...ارجع لوعيك .
الامير:كيف بيتجرأ !
ضربو كف قدام الناس و عليت الاصوات،لمحت ياسمين واقفة من بعيد على باب االبيت عم تتفرج،استغليت الفرصة و رحت لعندا
ياسمين:شيرين ...انت عايشة
شيرين:ايه ...تعي نحكي جوا
فتت انا و اياها على غرفة القعدة
ياسمين:فكرتن قتلوكي بعد ما الحريق يلي صار اخر مرة و طلعو اشاعة انك هربتي
شيرين:هيدا كلو تخطيط فتحية ،بعتتني هدية للامير
ياسمين:اسمعي الشرطة عرفو انو بعدنا عايشين و دخلو عالارض لهون بس محسن خباني تحت الارض حتى ما يشوفوني و قعدو يومين يدور علينا و بعد ما فقدو الامل طلعو من هون
شيرين:عنجد!فرحتيني كتير بهالخبر
ياسمين:وين الفرحة ؟عم قلك فاتو و طلعو و ما لاقونا
شيرين:المهم عرفو انو نحن بعدنا عايشين و موجودين ،يمكن سمر بنت مهران هي يلي مخبرتن
اطلعت على بطنا
شيرين:ولدتي؟
نزلت راسا و بلشت تبكي
ياسمين:ايه ولدت و جبت بنت و ما طلع الضو عليا ،اخدو قبل ماا رضعا و دفنوا الظالمين
شيرين:اوووه
ياسمين:مع اني ما بحبو لمحسن و ما بدي ولد منو بس متت وقت اخدوا ،كان نفسي شوفا و شما ،حملت فيا تسع شهور و تعبت كتير و بالاخير بثواني قتلو
شيرين:رح يتحاسبو كلن واحد واحد
ياسمين:ما حدا رح يتحاسب منن و نحن هون محبوسين عم نموت كل يوم مية موتة ،انا ...انا مفكرة اقتل حالي و اخلص من هالعيشة
شيرين :ياسمين اوعى تفكري بهيك شي؛وعد ليجي يوم و نطلع من هون و ننسى كل يلي مرينا فيه بس شوية وقت
ياسمين:انا تعبت و مليت و هلا محسن بدو ولد و اذا طلعت بنت رح يرجع يقتلا ؛ما بقا قادرة اتحمل هيك شي
شيرين:شبك ركزي ،خدي احتياطاتك ما تحبلي ابدا ،شغلي مخك ،هانت كتير ،حاولي ترجعي تتواصلي مع سمر
محسن:سمرا انت هون ؟
شيرين:ايه
محسن:اطلعي ،الامير بدو اياكي
شيرين:ياسمين متل ما قلتلك خليكي قوية بوعدك نطلع من هون
طلعت لبرا ،كان بعدو التجمع و المشكلة على وشك انو تخلص و رجال الامير ماسكين مسعود من ايديه و رجليه كانو وحش مفترس ،اجت عيني بعين فتحية ،زورتني هي و عم تهز راسا
الامير: لازم يكون عبرة لغيرو حتى ما يرجع يتجرأ اي حدا على الامير و حاشيتو
ابو مسعود:جلالة الامير منطلب العفو و السماح منك
ركضت فتحية تبوس ايدو للامير و تترجاه
فتحية:هيدا ابني الكبير هيدا اول فرحة الي ،ما تحرمني منو
ابو مسعود:غلط و ندم جلالتك،بعدو ولد طايش و عقلو ما كامل ،سامحو هالمرة كرمالي
الامير:ابو مسعود انت لازم تتعاقب كمان لانك ما عرفت تربيه و تعلمو الاحترام
ابو مسعود: متل ما بتامر جلالتك
الامير:امرك بايد سمرا ، شو بتقول سمرا بيتنفذ ؟
#خارج_النطاق
#هلا_غرابلي
#الجزء_العاشر_والاخير
الكل اطلع فيني
شيرين:انا....
الامير:ايه
فتحية:سمرا هيدا ابني هيدا مسعود زوجك ،مستحيل تسخي فيه
تذكرت كل شي عملو فيني مسعود كيف اغتصبني و كيف علقني على الحيط و اخر مرة كان رح يقتلني و يدفني عايشة و هو السبب بيلي انا فيه هلأ
شيرين:جلالة الامير بيستاهل الموت بس انت حكيم و كريم ،برأيي لازم يتعاقب عقاب كبير بس يضل عايش حتى يحكي لغيرو و لاولادو و احفادو عن الذنب يلي عملو بحقك و العقاب يلي نالو ،خلي العقاب يخلد بذاكرتو ،خليه كل ما شم ريحتك من قبل حتى ما يشوفك يدفن راسو بالارض متل النعامة
اطلع فيني مسعود ،رفعت حواجبي و انا مخبية ابتسامة الشماتة
الامير:احسنتي بالتفكير ، جيبو على القصر و هناك بينال عقابو على مهل
طلعنا بالعربة و رجعنا على القصر ،نزلوه لمسعود على زنزانة تحت الارض ، كان صوتو يوصل لقسم الجواري هو و عم يصرخ من وجع الضرب ،كانت ناري عم تخمد منو و من امو فتحية ،بعد 5 ايام من العذاب الجسدي افرج عنو الامير و ردو لارضو ،كنت واقفة على الشباك و هن عم يطالعوه من القصر بكل ذل و هوان ،لمحني واقفة عم اتفرج عليه ،حسيتو رح يخترق الحرس و الابواب و يطلع لعندي و يخنقني ،بس كنت مطمنة و مرتاحة انو ما رح يسترجي يخطي هيك خطوة طول ما انا تحت جناح الامير ،دخلت عندي زمرد
زمرد:الامير بدو اياكي بغرفتو
اطلعت بزمرد
شيرين:يلا رايحة،تياب الخدم لبقتلك اكتر من فساتين الجواري
زمرد:رح تندمي كتير على هالحكي
طلعت على غرفة الامير،دقيت الباب دقتين و فتت ،كان متمدد بالتخت و شالح تيابو الداخلية من فوق
شيرين:عفوا !برجع بوقت تاني
الامير:لا تعي،في علبة مرهم اعشاب على الطاولة جنبك ،جيبيا و ادهنيلي ضهري
شيرين:انا؟
الامير:في حدا غيرك بالغرفة؟
شيرين:لا ،بس قصدي يعني في اي حدا يقوم بهالمهة غيري
الامير:لا بدي انت ،اعتبريه رد معروف على يلي قدمتلك اياه ،نسيتي اني سلمتك مصيرو لمسعود
شيرين:انا ما طلبت منك هالشي و بعدين طلع في مقابل الو
الامير:طيب
قام جلس ضهرو و كتف ايديه قدام صدرو
الامير:انا هلأ بدي امرك امر ،نفذي يلي طلبتو منك هلأ
شيرين:و اذا ما نفذت ،بدك تعاقبني؟
الامير:اكيد
شيرين:شو بدك تعاقبني؟مثل مسعود يعني؟
الامير:لا عقاب اكبر لانو انت ما عم بطيعي الامير يعني ما عم تحترميني
شيرين:ها ،طيع اوامر الامير !،شو اسمك؟
الامير:امير الجبل
شيرين:ما قصدي اللقب ،قصدي اسم العلم
الامير:...زين
شيرين:زين !اسمك زين ؟
الامير:ايه ،ما حدا بيعرف هالاسم غير ممدوح و هلأ صرتي انت
شيرين:كتير حلو الاسم ،شو عمرك؟
الامير:26 سنة
شيرين:26 سنة!ههههههه عمرك هيك بس و مخوف كل هالعالم ،فكرتك اكبر من هيك
الامير:ليش؟شكلي بيوحي ؟
شيرين:لا شخصيتك بتوحي
الامير:يعني شو بتتوقعي عمري؟
شيرين:37 سنة،انت شو بتحطلي عمر؟
الامير:18
شيرين:لا انا 22
الامير:شكلك و تصرفاتك بتعطي عمر ال 18
قعدت على الكرسي انا و عم اطلع بزوايا غرفتو
شيرين:كأنك عايش لحالك بكل هالقصر ،وين اهلك ؟
الامير:ابي ميت و امي ...كمان...ميتة
شيرين:كيف ماتو؟
الامير:ابي مرض و مات و امي قتلا ابي
شيرين:عنجد كيف ...ليش...
الامير:خاينة...اتفقت مع مستشار ابي على انو تهرب معو من القصر بس ابي و الحرس حسو علين و وقتا عدما ابي بساحة القصر هي و المستشار
شيرين:...ما قادرة اتخيل الموقف
الامير:يعني كان المفروض اعدمك وقت حاولتي تهربي
شيرين:و انت شفتا لامك هي و عم تنعدم قدامك
الامير:ايه ،كان عمري 5 سنين بس بتذكر كتير منيح
شيرين:يعني كانت على علاقة مع ..
الامير:لا ابدا ،كانت بدا تطلع من هون بس و المستشار كان عم يساعدا
شيرين:يعني ماتت ظلم ،انا ما بلوما ،هون حبس ،بس قدرت افهم شي انو انت ربيت بلا حنان و حب ،لهيك طلعت هيك
الامير:كيف يعني هيك؟
شيرين:يعني انسان بلا مشاعر و لا رحمة
الامير:ابي كان كريم و سخي
شيرين:ما بكفي،اذا حطيت وزن بكفة ميزان و التانية تركتا فاضية ،رح يصير توازن شي؟
الامير:لا
شيرين:الانسان بدو قلب و عقل سوا ليعيش سعيد و اي كفة زادت او نقصت عن التانية ،بتخرب حياتو ،بس هالشي بيوضح ليش ما تزوجت لهلا يمكن لانك ما حبيت ؟
الامير:مستحيل حب و اتزوج لانو كل جنس النساء خاين
شيرين: انت عممت حالة امك على كل جنسا بس امك ما خاينة ،امك كان بدا حريتا بس ،حرام تكرها لامك ما بتستاهل
الامير:بكرها لانو كانت رح تتركني و تهرب لحالا،ما فكرت تاخدني معا،و اذا ابي قتلا او ما قتلا ما كانت رح تفرق كتير عندي لانو بكل الاحوال كنت ما بقا رح ارجع شوفا
احمر وجهو و صار يسعل كتير ،قربت عطيتو كاسة مي ،بعد ما شربا على دفعات و اخد نفس
الامير:انت بتسالي و بتحكي كتير حتى تخليني انسى عاقبك
شيرين:اي اكتر وحدة بتفضلا من الجواري؟
الامير:كلن نفس الشي كرماال اذا مفكرة اني ممكن فضلك عنن
شيرين: انا غير عنن
الامير:شو يلي بخليكي متميزة ،فرجيني
شيرين:انا متميزة بعقلي
الامير:صح ،اثبتي هالشي بجدارة ،بس انا ما بهمني هالشي ابدا
شيرين:يلي بيهمك ما بتلاقيه عندي ،في عندك عشر بنات برا بتلاقي طلبك عند وحدة منن
الامير:بس انا بدي اياكي انت ،حابب جرب شي جديد او هالشي بتعتبريه خيانة لزوجك
شيرين:مين زوجي ؟مسعود !ما بحياتو كان زوجي،انا ما اخترتو ،اصلا انا لو ما كنت عندك هلأ،كنت رح كون تحت التراب جثة هامدة،كان عم يحفرلي قبر تحت الارض و يدفني عايشة
الامير:معناها انا انقذت حياتك
شيرين:اذا تركتني عايشة ،ايه
الامير:هالشي انت بتقرريه
شيرين:اذا بدي عيش بالطريقة يلي انت بدك اياها،بقرر اني موت
ابتسم و هو عم يهز راسو
امير:طيب قربي شوي و احكيلي عن الحياة يلي امي ضحت بحياتا كرمالا
قربت و قعدت جنبو
شيرين:حاضر
حكتلو لامير عن حياتي بالتفصيل ،عن اسلوب حياتنا و الجامعة ،كان علامات الاندهاش واضحة عليه
الامير:يعني انت بتعرفي تسوقي سيارة
شيرين:اي طبعا
الامير:طيب بتعرفي تركبي خيل
شيرين:لا ما جربت بس اكيد الموضوع سهل كتير
قام عن التخت و لبس قميصو هو و عم يطلع فيني و يبتسم
الامير:هلأ منشوف
شيرين:شو بدك تشوف ؟
فتح خزانة التياب و اعطاني تياب من عندو
شيرين:شو بعمل فين ؟
الامير:البسين و رح تلاقيني ناطرك تحت
تركني و نزل و انا بعدني واقفة مصدومة ،لبست القميص و البنطلون و الجزمة و وقفت على المرية اطلع على حالي
شيرين:اديش الي ما لبست بنطلون ،يالله رح انسى شكلي فيه
حطيت الطاقية على راسي و نزلت شفتو ناطرني على الباب و معو حصانين ،اطلع فيني من تحت لفوق
الامير: ما تخيلتن هيك رح يطلعو عليكي ،...اطلعي يلا
شيرين:انا قلتلك ما مجربة من قبل
الامير:بس قلتي الموضوع سهل ،شو غيرتي رأيك؟
شيرين:لا طبعا
طلعت على الخيل و سندت ضهري،اطلع فيني و ضحك
شيرين:انا رح اسبقك
امير:ههههههههه بتعرفي شو لفت نظري فيكي او شو عجبني فيكي
شيرين:شو هو؟
امير:انك قوية و واثقة من حالك بس هالمرة زدي العيار شوي
شيرين:و اذا سبقتك ،شو بتعطيني بالمقابل؟
امير:يلا بدك اياه
شيرين:بتطلق سراحي و بتخليني ارجع لعند اهلي
امير:اتفقنا
مد ايدو لصافحو،حطيت ايدي بأيدو
شيرين:اتفقنا
طلع على الخيل و مشينا حتى وصلنا على طريق مفتوح طويل من جوانبه الاتنين شجر عالي
امير:يلا
حرك رجليه و ضرب بايدو بخفة على الحصان و مشي ،و انا كنت بعدني واقفة بمحلي
شيرين:يلا امشي ..شبك واقف...اتحرك يلا ...يا غبي يلا يا حيوان
شديتو من اللجام بقوة حتى انطلق بسرعة كنت رح اوقع على الارض بس رجعت ثبتت حالي،كان زين سابقني بمسافة منيحة ، رجعت ضربت الحصان حتى يسرع خطواتو بس جن جنونو و ركض بسرعة خيالية و انا ماسكة فيه بايدي الاتنين فيه و عم صرخ حتى مريت من جنب زين يلي تفاجئ بوجودي جنبو فجأة
شيرين:دخيل الله ...الحقني ..ما بعرف شو صرلو
امير:امسكي منيح حتى ما توقعي
لحقني حتى صار بموازاتي ،قرب بحصانو لعندي و انتقل على حصاني
امير:شو عملتيلو ؟
شيرين:ما بعرف ..فجأة هيك صار
امير:حتى الخيل ما قدر يتحملك ،قلتيلي الموضوع سهل
لف و رجع فيه
شيرين:لا ابدا ،السيارة اسهل بكتير على الاقل ما بتجن هيك ،انت بتتحكم فيا و بسرعتا
امير:و هيدا كمان بتتحكمي فيه و بسرعتو بس الفرق السيارة جماد اما هيدا فيه روح ،بدو وقت ليعرفك و يتعود عليكي و وقتا فيكي تتحكمي فيه
شيرين:بس انا اعتبر اني سبقتك
امير:هههههه انت ما عرفتي كيف تمشيه حتى تسبقيني ،لو ما ادخلت انا بالوقت المناسب؛اكيد كان جسمك مكسر هلأ ،هاي تالت مرة انا بنقذ حياتك ،لازم تكوني ممنونة الي
اطلعت فيه و ابتسمت
شيرين:و انا ممنونة الك
وصلنا على باب القصر ،نزل عن الحصان و ساعدني لانزل و بعدين اجا شاب اخدن مننا و مشي زين باتجاه بعيد عن القصر ،لحقتو انا و ساكتة ،وقف قبال بركة مي كبيرة عاكسة لون الشجر الاخضر يلي حوليا و فيا بطات عم يسبحو بالمي
شيرين:الطبيعة هون حلوة كتير
التفت لورا و كانو هلأ انتبه على وجودي ،قربت و وقفت جنبو
شيرين:هلأ انت كل يوم بتشوف هالمنظر قدامك ،ما بتمل منو
امير:لا ابدا ،لانو ما بتخيل في احلى منو بالوجود
قربت اكتر لشوف البطات عن قرب ،كان بدي حط ايدي على وحدة منن و لمسا بس هجمت علي الام و من لبكتي وقعت بالمي ،انفجر زين بالضحك علي
امير:هههههههههه
شيرين:اوووف
استمر بالضحك حتى غص بالسعلة
شيرين:انت شكلك اخد برد و مرضان حتى عم تسعل كل شوي
نزل راسو و تغيرت ملامح وجهو للحزن
امير:...ايه ...
رفع راسو و رجع يضحك
امير :بس انت بتضحكي كتير ، ما حدا هون مرحب فيكي
شيرين:لا بس هي فهمتني غلط انا كنت بدي المس ابنا بس
امير:حتى الحيوانات بخافو على اولادن و بيحمون باي طريقة
رجع شرد بالمي و الشجر حتى اجا ممدوح
ممدوح:جلالتك انت اليوم تعبت كتيرو الطقس عم يبرد؛برأيي ترجع ترتاح بغرفتك و رح ابعتلك مشروب دافي
امير:لا مرتاح ،بس اتعب بطلع لحالي
ممدوح:متل ما بتأمر
امير:بس خود سمرا لتغير تيابا
تركتو لزين واقف بمحلو و شارد و انا عم ابعد عنو لفوت على القصر بس كنت بعدني عم اطلع عليه حتى التفت لعندي و ابتسم ،درت وجهي بسرعة و اطلعت غيرت تيابي بس بقي عقلي و تفكيري عندو ،حسيت بشي غريب اتجاهو متل مغناطيس عم يجذبني لابقى معو و ما فارقو ، صرت كل يوم اطلع على غرفة الامير لنحكي بكل شي،عنو و كيف عاش و ربي و كبر بهالقصر ،ما كنت بقدر خبي اعجابي فيه للامير يلي كان عم يكبر كل يوم حتى ما عاد حسيت بالوقت جنبو و تمنيت كتير انو كون التقيت فيه بغير محل و غير ظروف ،كانت الامور عم تتحسن للافضل و كنت عم اتميز بين كل البنات حتى اكتفى فيني عنن بس الشي يلي تغير هو صحتو يلي كانت عم تتدهور لورا حتى اجا اليوم يلي تعب فيه كتير ،صار هزيل و وجهو اصفر حتى صار طريح الفراش و عم يبزق دم ،جبلو ممدوح الدكتور ليفحص حالتو
الدكتور:انا خبرتك من قبل انو رح يوصل لهل المرحلة ،ما بقدر اعملو شي
شيرين:شو يعني ؟
الدكتور:يعني ما بقي من حياتو الا القليل
بقيت هديك الفترة جنبو مع انو كان معظم اوقاتو نايم و تعبان بس الوقت يلي كان يصحى فيه ،كان يطلع فيني و يبتسم
الامير:انت بعدك هون ؟
شيرين:وين بدي روح
الامير:سمرا ،انا بعرف اني ما مطول و رح موت بنفس المرض يلي مات فيه ابي ،لهيك انت حرة ،رح خلي ممدوح يوصلك لاول المدينة و ارجعي لعند اهلك
شيرين:عنجد؟
الامير:ايه ،بس رجاءا اطلعي من هون وقت كون نايم
شيرين:ليش؟
الامير:انا ما حسيت حالي عايش الا معك و الفترة يلي قضيتا معك كانت عمر كامل الي ،حابب ردلك هالجميل و حققلك الشي يلي بدك اياه
شيرين:زين ...
الامير:حلمت بأمي ..شفتا لابسة ابيض و واقفة باخرة الطريق و فاتحتلي ايديا الاتنين لضمني ،يمكن ناطرتني ، انا عشت بكرها لامي بس هالفترة حاسس حالي اني اشتقتلا كتير و حابب شوفا
شيرين:ما تحكي هيك،انت عم تاخد الدوا و رح تتحسن و يا ريت لو بتسمع مني و مننزل على المشفى بالمدينة،هنيك العلاج افضل
الامير:النتيجة وحدة ،بس هون بختصر طريق عذاب طويل علي .. ابعتيلي ممدوح لاحكي معو
بنفس الليلة ،تركت زين نايم و طلعت مع ممدوح ليوصلني على مشارف المدينة بس من نص الطريق ،قلبي وجعني و صرت ابكي و ما تخيلت انو اقدر ابعد عن زين او ما اقدر ارجع شوفو مع انو قضيت شهور كتير لخطط اطلع من هون ،من نص الطريق وقفتو لممدوح
شيرين:لف و ارجع
ممدوح:رح نوصل
شيرين:ما بدي ،يعني ما بدي هلأ ارجع ،لاطمن عن صحة امير الجبل و بعدين برجع لعند اهلي
ممدوح:طيب ماشي متل ما بدك
رجعت على القصر لعند زين بس بعد ما فات الاوان ،لفظ انفاسو الاخيرة بالوقت يلي انا طلعت فيه من القصر ،حسيت قلبي انكسر وقت شفتو عم يندفن تحت الارض جنب قبر ابوه و امو ،ما توقعت انو حب حدا هون بهيك مكان خارج العالم ،صار االقصر متل القبر و المكان المهجورة ما فيه روح و ميت بعد ما مات زين،بعد يومين من وفاتو ،كنت واقفة على الشباك بغرفتو بالليل و الدنيا عم تمطر،كنت ناطرة ممدوح ليرجع من مشوارو حتى اطلب منو انو يوصلني عند اهلي بس تغير كل شي وقت فاتت لعندي زمرد
زمرد:شو شكلك عجبتك العيشة هون و مفكرة حالك صرتي اميرة و بدك تاخدي محل الامير و تحكمي علينا
شيرين:زمرد ما رايقتلك ،انا بدي ارجع لعند اهلي و تاركتلك القصر الك كوني انت الاميرة
زمرد:ما رح تلحقي ترجعي
فتلت ضهري لعندا و كتفت ايدي
شيرين:ليش بقا؟
زمرد:زوجك على الطريق جاي ياخدك و يرجعك معو
شيرين:مين مسعود ؟
قربت لعندي هي و عم تطلع من الشباك
زمرد:ها ..وصل
وقع نظري على مسعود راكب خيل و فايت من باب القصر ،دفشتا لزمرد بعيد عني هي وعم تضحك بصوت عالي و نزلت اركض لاهرب من مسعود قبل ما يوصل ،انا و نازلة من الدرج طلع بوجهي
مسعود:وين بدك تهربي مني ،قبرك بعدو ناطرك
حملني على ضهرو و انا عم صرخ و ابكي،كنت بعرف انو كل فرصي بالحياة خلصت هلأ،حطني على ضهر الخيل هو و عم يتوعدلي بالعقاب،كنت طول الطريق عم ابكي و ارجف من البرد و الخوف حتى وصلنا على البيت،فتح الباب و فوتني انا و عم صرخ
ابو مسعود:ابني ليش جبتا لهون ،خدا لهنيك فورا
مسعود:يابي ما قبل ما برد قلبي منا
دخلني على الغرفة و صار يضربني
مسعود:انا تعملي فيني هيك ،تذليني قدام كل الناس و توطي راسي و تخلين يضربوني ،ما عاش يلي بدو يذلني مين ما كان يكون ،فكرتي حالك انو ممكن تنفدي مني و تهربي بعد الشي يلي عملتيه ،الموت قليل عليكي
فتحية:يلا مسعود خلينا نخلص منا قبل ما يطلع الضو علينا
شيرين:الله ياخدكن ،الله لا يسامحكن
حملني مسعود و راح على الارض و ابوه و امو و اخوه جاسم ماشين وراه، اول ما شفت حفرة غميقة بالارض منظرا مرعب،حسيت رح غيب عن الوعي من الخوف
مسعود:جاسم قرب احفرا لسا ،بدي اياها غميقة كتير؛بدي ادفنا تحت سابع ارض
قرب جاسم و بلش يحفر و انا صرخ و ابكي و اترجاه لمسعود ،قرب على الحفرة و زتني فيا و مسك الرفش هو واخوه و بلشو يطمروني بالرمل
شيرين:لحظة ..لحظة ...جاسم بدي احكي شغلة قبل ما موت لازم ابو مسعود يعرفا
جاسم : شو بدك ؟
مسعود:ماترد عليا تابع طمر
شيرين:جاسم الموضوع ضروري كتير ،ما رح تندم اذا سمعتني
وقف جاسم يتسمع لحكيي بس فتحية هجمت على جاسم و خطفت من ايدو الرفش و بدا تطمرني بالرمل قبل ما تابع كلامي بس ابو مسعود مسكا من ايدا
ابو مسعود:خلينا نسمعا بالاول
فتحية:عم تكذب ،كذابة ،ما تصدقوا
ابو مسعود:انت سمعتيا شو حكت حتى تقولي عنا كذابة
مسعود:يابي عم تماطل وقت حتى ما نقبرا
شيرين:فتحية و مسعود ما بدن اياني احكي هالحكي لانو يلي عملوه شي كتير كبير
اطلع فين ابو مسعود
ابو مسعود:شو عاملين؟
مسعود:يابي كذابة
جاسم:يابي خلينا نسمعا و بعدين منكمل
ابو مسعود:احكي
اخدت نفس و انا مسح الرمل عن وجهي
شيرين:اابنتين يلي شفتن معي وقت كنا عم نهرب بهديك الليلة بكونو اخواتك البنات دجى و ثريا ،البنات يلي ولدتن فتحية من 6 سنين بعدن عايشين ،مسعود ما دفنن متل ما قلك
جاسم:شايف يابي قلتلك شفت بنتين بس انت ما كنت تصدقني و فكرتني محشش
ابو مسعود: انت قلت الشاب كان لحالو ؟
جاسم:يابي ...كان معو سمرا و قشطة بس مسعود نبهنا ما نقلك حتى ما تعصب
ابو مسعود:فتحية و مسعود صحيح هالحكي ؟
مسعود:….
فتحية:لا لا عم تكذب
ابو مسعود:فتحية اذا بيطلع انت يلي عم تكذبي لاقبرك محلا
فتحية:كذب كذب كذب
انخطف لونا لفتحية و هي بقيت هم تردد.كلمة وحدة كذب
ابو مسعود:طب وينن البنتين اذا حكيك صحيح ؟
شيرين:مخبيتن فتحية تحت قن الجاج ،طلعوني من هون لاخدكن و دلكن على محلن
ابو مسعود:جاسم طالعا من الحفرة
طالعني جاسم من القبر و مسعود و فتحية عم يطلعو فيني و يزوروني بس ما كنت خايفة منن لانو ما ضل شي لاخسرو اكتر ،مشينا نحن الخمسة باتجاه القن ،فتحتلن الباب يلي بالارض و نزلت على السلم و نزلو ورايي جاسم و ابو مسعود
جاسم:هاي اول مرة بعرف انو في باب هون و غرفة تحت القن
ابو مسعود: امشي لنشوف
مشينا بالممر حتى وصلنا على المكان يلي بيتواجدو فيه البنتين بس ما كان في حدا ،كان فاضي و ما في اي اثر للبنتين
ابو مسعود:وينن؟
شيرين:ولله كانو هون و انا كنت نزلن الاكل بايدي ،اكيد فتحية مغيرتلن محلن لانو عرفت انو بدي احكي علين
مسعود:يابي قلتلك انو هي كذابة و عم تماطل بموتا
شيرين:طب اسألو ياسمين هي كانت معي و شافتن و بتعرف فين
بعتو جابو ياسمين من البيت و سالا ابو مسعود عن البنتين
ياسمين:هاي اول مرة بسمع انو فتحية عندا بنتين
شيرين:ياسمين شبك ..البنتين دجا و ثريا يلي كنا بدنا نهربن معنا ،شبك نسيتي
ياسمين:ليش نحن ايمت كنا بدنا نهرب ،انا ما بعرف عن شو عم تحكي
شيرين:ياسمين دخيل الله احكي رح يقتلوني رح يدفنوني انا و عايشة ،شبك انا رفيقتك شيرين
ياسمين:سمرا ما بعرف عن اي بنتين عم تحكي ،ما شفت بنتين و ما بعرف شي
شيرين:يا ربي ،ولله ما عم اكذب ،دورو علين اكيد رح بتلاقون
فتحية:ابو مسعود هاي حية و فتانة ،عم طلع حكي من بطنا لتفتن بيني و بينك و بين ابنك ،صدقني كلما عجلنا بموتا منرتاح اكتر ،بكل لحظة عم تتنفس فيا ،بتكون خطرة علينا
ابو مسعود:ما قبل ما اتأكد من الحقيقة
فتحية:خلينا ندفنا بالاول و بعدين تأكد على مهلك ،نسيت شو عملت فينا و كيف ذلتنا قدام الناس و بهدلت ابنا
ابو مسعود:صح ،يلا
اطلعت بالسما ،كانت عم تبرق و ترعد و انا متمددة بالحفرة و مسعود واقف عم يطلع فيني و جاسم ماسك الرفش و عم يطمر جسمي بالرمل ،بعد ما خلصت كل محاولاتي بالهرب ،استسلمت لقدري و غمضت عيوني انا و عم اتخيل وجوه الناس يلي بحبن ،اهلي و رفقاتي و زين يلي اعطاني الفرصة للوحيدة للنجاة بس انا رفضتا ...
الله اديش ريحة التراب الممزوجة مع مية المطر منعشة كتير ....كان فيني قول انو الجهل و التخلف هو يلي انتصر بالاخير و هو يلي حكم هالمجتمع و اي محاولة للخلاص من الظلام لللنور كان حكما الاجهاض حتى قبل ما تكتمل ملامحا، بس ما غمضت عيوني الا لارجع فتحن على صوت رصاص عالي و صوت سيارات الشرطة
مسعود :شو في؟
ابو مسعود: شو عم يصير...من وين هالصوت
_الكل يرفع ايديه ...ما حدا يتحرك ...المكان محاصر.. ...اذا معكن سلاح حطوه على الارض ..الكل يسلم حالو.
(النهاية)
_________________
ميرنا :و اخيرا خلصت
ام ميرنا:ميرنا اجت رفيقتك تالا
ميرنا :ايه ماما،قليلا تفوت لهون
قمت وقفت و انا عم رتب الاوراق فوق بعضن ،انفتح الباب و فاتت تالا
تالا:لسا ما لبستي،يالله منك رح نتأخر
ميرنا:لك هلأ لخلصت و ضل 25 ورقة لسا ما طبعتن ،ليكي امانة تعي اطبعيلي اياهن لبين ما فوت اخد دوش سريع و البس
تالا:اوف منك...يلا بسرعة
فتت تحممت و طلعت فتحت خزانتي و طلت تيابي يلي مجهزتن لهل اليوم
تالا:طبعتن و كبستن فوق بعض حسب ما مرتبتين و حطيتن بالظرف ،اكام ورقة كتبتي؟
ميرنا:500
تالا:برافو برافو
ميرنا:و انت اديش طلعت قصتك؟
تالا:300
ميرنا:يا رب يا تالا نفوز بهالمسابقة و يقبلو النص
تالا:انا و اياكي نفوز مع بعض ما بتزبط لانو بدن نص واحد
وقفت على المرية و سرحت شعري على عجل و حملت الظرف
ميرنا:يلا قومي
طلعت من غرفتي و ناديت لامي
ميرنا:ماما نحن رايحين ادعيلنا
ام ميرنا:الله لا يضيعلك تعبك يا بنتي
ميرنا:يلا سلام
وقفنا تكسي و اطلعنا بسرعة على شركة الانتاج السينمائي،كان في شباب و بنات كتير من عمرنا و اكبر و الكل ماسك بايدو ظرف و فيه النص يلي بدو يقدمو للشركة يلي بدا تختار واحد منن حتى ينعمل فيلم ضخم ،فتت قبل تالا ،قدمت النص للجنة و قعدت حكيت عن فكرة الفيلم ،حسيت في علامات قبول و اعجاب من وجوهن ،طلعت انا و مرتاحة من جوا
تالا:شو سألوكي؟
ميرنا:بس سالوني عن فكرة النص و خبرتن بشكل مختصر
تالا:ايه ؟
ميرنا:حسيتن انو عجبن ،بس عدد المقدمين كبير معقول تطلعلي فرصة
تالا:ايه احتمال ،انا دوري لسا مطول
ميرنا:ما مشكلة ببقى معك
بعد ما قدمنا على المسابقة ،نطرنا بحدود الشهر حتى تطلع النتيجة ،رحت انا و تالا لجيب النتيجة ،و التقينا بنفس المجموعة يلي شفناهن بالتقديم ،قربت تالا بين الزحمة لتقرأ اسم الفايز الوحيد المعلق على ورقة على الحيط و طلعت عم تنط و تضحك
تالا:ميرنا ..انا يلي فزت ...قبلوني انا ...جبت اكتر علامة 80 بالمية
ميرنا:عنجد!الف مبروك
قربت بستا انا و مصدومة
ميرنا:يالله ولله قصتي كمان حلوة و غريبة ليش ما قبلوني كمان
قربت لارجع اتاكد ،شفت اسمي و محطوط جنبو علامة 20 بالمية ،الحبكة ضعيفة و النص ركيك
كانت فرحة رفيقتي تالا ما واسعتا اما انا كنت مقهورة كتير انو ما انقبل نصي؛رجعت على البيت مكتئبة ،شافتني امي و عرفت فورا من ملامحي
ام ميرنا:ما تزعلي ،عسى ان تكرهو شيئا و هو خيرا لكم ،كل انسان بتجيه فرصة لعندو و هاي ما فرصتك ،من بكرا دوري على شركة تانية و اعرضي النص علي
ميرنا:ما بدي ،خلص رح شيل الموضوع من راسي و انسى الكتابة ،رح ...رح دور على شغل بشي محل
ام ميرنا:ميرنا من اول مرة رح تستسلمي،انت بنت موهوبة ما لانك بنتي بس انت فعلا موهوبة و انا قلبي بقلي انو رح شوف اسمك مضوي شي يوم بس الشغلة بدا صبر و اجتهاد،قومي يلا غيري تيابك و تعي اتغدي ،عاملتلك الاكلة يلي بتحبيا و كمان كفيلي القصة ،وصلنا لعند ياسمين وقت بتطلع حامل ،مو هيك
ميرنا:ايه ..يلا شوي ماما و بلحقك
طلعت امي من غرفتي و انا قمت غيرت تيابي و وقع نظري على اللابتوب ،الي سنة عم اكتب فيا للقصة و بالاخير ما انقبلت
ميرنا:يالله ...20 بالمية ...كل هالتعب و بالاخير باخد علامة 20 بالمية
حملت اللابتوب و حطيتو فوق الخزانة حتى ما بقا ارجع شوفو و اتذكر اني انا فشلت ،بعد يومين اتصلت برفيقتي تالا
تالا:بكرا رايحة وقع العقد و الشهر الجاي رح يبلشو تصوير
ميرنا:رح تكوني معن بالتصوير
تالا:قالولي ما ضروري كون بس انا حابة كون ،بدي شوف الممثلين عن قرب و اتعرف علين و بدي اتصور معن كمان
ميرنا:عرفتي مين رح يمثل ؟
تالا:لا لسا لانو بعدن عم يختارو ممثلين يناسبو شخصيات النص
ميرنا:مبروك تالا انت بنت طيبة و بتستاهلي كل خير
تالا:شكرا الك و انت خيرا بغيرا ،يلا انا مضطرة سكر ،المخرج عم يتصل فيني
ميرنا :ايه ماشي؛مري عندي بكرا بس تخلصي
تالا:انشالله انشالله يلا باي
ما بقا رجعت شفتا لتالا ابدا من اخر مرة و حتى اتصلت فيا كتير بس ما كانت ترد علي و حتى وقت كانت ترد كانت تسكر بسرعة و تقول انو مشغولة ،تغيرت كتير معي و اانا بررت هالتغيير بانشغالا و انا حبيت اشغل حالي كمان حتى انسى الكتابة و اشتغلت بمكتبة ببيع و تاجير الكتب و الروايات ،بعد 9 شهور اتصلت فيني رفيقتي سوزي
سوزي:بدك تروحي تحضري الفيلم تبع تالا؟
ميرنا:ليش خلص؟
سوزي:ليش ما شفتي لافتات معبية الطرق ؟
ميرنا :لا ما انتبهت
سوزي:على كل حال انا توقعت انو تكون خبرتك على العرض االاول؟
ميرنا:لا ما معي خبر
سوزي:ما على اساس انتو صحبة مع بعض
ميرنا:ايه كنا بس هي التهت بالفيلم و انا متل ما بتعرفي صار عندي شغل كمان ،ايمت الموعد ؟
سوزي:بكرا الساعة 5 ،بشوفك هنيك ،تعي بكير حتى يطلعلنا محل
ميرنا:ماشي
انا و راجعة من شغلي على البيت ،تقصدت اطلع على كل لافتة بالطريق حتى شفت اعلان الفيلم ،كان البوستر كتير حلو و الممثلين يلي فيه من الصف الاول ،اتصلت بتالا حتى باركلا بس ما ردت علي ،تاني يوم على الساعة 5 التقيت بسوزي و اختا سارة على باب السينما و رحنا حجزنا تذاكر و فتنا على السينما ،كان عجأة كتير و الكل عم يحكي عن الفيلم
سوزي:شو اسمو ؟
سارة:اسمو الهروب
ميرنا:الهروب!وقت قدمنا انا و اياها كانت مسمية النص قلوب متحجرة
سوزي:بجوز الشركة غيرولا الاسم لانو ما عجبن او ما لابق للمحتوى
سارة:وينا رفيقتكن تالا؟
سوزي:ما شكلا اجت او عم تحضرو بغير محل ،اصلا يمكن اذا بتشوفنا ما رح تسلم علينا لانو ما بقا من مستواها ههههههه من غير شي هي راسا كبير و هلأ اكيد بكون كبر اكتر
ميرنا:يلا رح يبلش ،هدوء
حطيت البوبكورن بحضني و ركزت عيوني على الشاشة ،بلشت شارة الفيلم بتقديم الممثلين و كل طاقم الاخراج و الانتاج
سوزي:ها ليكو اسما لتالا ،شفتوه
ميرنا:ايه
بلش اول مشهد ببنتين طالعين بالسيارة على طريق جبلي
شيرين: ياسمين وطي الصوت او حطيلنا اغاني هادية كرمال ركز بالطريق
ياسمين:حاضر حاضر ،هلأ انت متأكدة ماشين بالطريق المزبوط؟
شيرين:يس ،فتحي ورقة الطريق يلي اعطانا اياها ابو توفيق و تأكدي احسن ما تقعدي تحكي
ياسمين:طيب
شيرين:شو صار معك؟
ياسمين:شو عرفني هههههه خلص ماشين صح ،بيتا لهاي الختيارة براس الجبل و شكلنا قربنا نوصل
شيرين:و انشالله ما تكون طلعتنا على الفاضي
ياسمين:لا ولو ابو توفيق اكدلي انو منلاقي طلبنا عندا ،شو خسرانين دخيلك خلينا نعتبر حالنا طالعين مشوار
قمت وقفت انا و عم غص بحبة البوشار ،اطلعت علي سوزي
سوزي:شبك ...ليش وقفتي ...لسا هلأ بلش الفيلم
زتيت البوشار من ايدي و طلعت انا و عم ابكي ،اتصلت فيا كتير حتى ردت عليى
ميرنا:انت شو ...انت وحدة ندلة و حقيرة ،انا يلي امنتك على شغلي و دخلتك بيتي هيك بتعملي فيني ،بتسرقينيو بتبدلي الاوراق
تالا: مو انت يلي كتبتي بالنص البقاء للاقوى
ميرنا:انا بفرجيكي؛اوعى تفكري انو فيك تعملي هيك عملة و تنفدي ،انا رح افضحك قدام كل الناس يا سراقة يا حرامية
تالا:ايدك و ما تقصري يلا باي ما فاضية عم احتفل بالنجاح
رجعت على بيتي انا و منهارة ،ما تخيلت ابدا انو ممكن رفيقتي تسرق تعبي و تسرق حلمي و تطلع لفوق على كتافي ، سالتني امي عن سبب حزني بس ما كنت قادرة قلا لانو ما كان بدي تنقهر علي و كنت بحالة صدمة ما قادرة احكي فيا شي و بقيت على هالحالة مدة طويلة حتى اجا اليوم يلي اتصلت فيه فيني سوزي
سوزي:سمعتي شو صاير؟
ميرنا:شو صاير؟
سوزي:رفيقتك تالا الها 3 ايام مفقودة و ما الها اثر و االشرطة عم دور عليا حتى الخبر نزل بالجرايد المحلية
ميرنا:عنجد !
سوزي:لك احذري شو كمان ؟
ميرنا:شو؟
سوزي:الكل عم يقول انو انخطفت خطف من ورا الفيلم يلي كتبت قصتو
ميرنا:شو دخل الفيلم؟
سوزي:هههههه ما بعرف ،معقول عيلة ابو مسعود حقيقية و هن يلي خطفوا لانو حكت عنن
ميرنا:لا مستحيل ،القصة خيال
سوزي: لانو الشرطة شافت سيارتا على طريق الجبل الاحمر ،طلع بسموه الاحمر على لون الدم ،ولي خفت انا من الحكي بس ، ياحرام ...المهم انو ما عاد لقولا اثر من بعدا ،يا امي بجوز يكونو دفنو تحت الارض هلأ
ميرنا:يالله ،ما عم صدق ،طب شو اخدة لهنيك؟
سوزي:يمكن قد ما نجح الفيلم كبر راسا كتير و صدقت حالا و فكرت حالا البطلة و طالعة ادور على الامير ههههههه
مر على اختفاء تالا اسابيع و شهور كتير و ما بين الها اثر ابدا بس انا كنت من جوا عم احمد ربي كل دقيقة على المعروف يلي قدمتلي اياه تالا و ما خبرت حدا ابدا انو انا يلي كتبت القصة غير امي ،و على اثر حادثة اندرج الفيلم تحت بند الافلام الواقعية.
تمت
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
❤️🌹🌺💙❤️🌹🌺💙❤️🌹🌺💙❤️🌹🌺💙❤️🌹
تعليقات
إرسال تعليق