خارج النطاق الفصل الاول والثاني بقلم هلا غرابلي حصريه وجديده
شيرين ياسمين وطي الصوت او حطيلنا اغاني هادية كرمال ركز بالطريق
ياسمين:حاضر حاضر ،هلأ انت متأكدة ماشين بالطريق المزبوط؟
شيرين:يس ،فتحي ورقة الطريق يلي اعطانا اياها ابو توفيق و تأكدي احسن ما تقعدي تحكي
ياسمين:طيب
شيرين:شو صار معك؟
ياسمين:شو عرفني هههههه خلص ماشين صح ،بيتا لهاي الختيارة براس الجبل و شكلنا قربنا نوصل
شيرين:و انشالله ما تكون طلعتنا على الفاضي
ياسمين:لا ولو ابو توفيق اكدلي انو منلاقي طلبنا عندا ،شو خسرانين دخيلك خلينا نعتبر حالنا طالعين مشوار
شيرين:ملا مشوار هالمشوار ،الطريق صعب و في متاهات كتير
رجعت ياسمين علت صوت مسجلة السيارة على العالي على اغنية يا سهر الليالي
ياسمين:في غيم بالسما ،شكلا رح تمطر، اسرعي شوي خلينا نرجع على وقت
 |
انا و عم سوق لمحت شي من جهتي؛هيئة شكل انسان طويل كتير و لابس اسود؛قطعتو انا و عم اطلع بالمرية بس فجأة اختفى؛التفتت على ياسمين ،شفتا عم تكبس بموبايلا
ياسمين:كل ما منطلع لفوق ،عم تروح التغطية
شيرين:يا ريت قلتلو لمجد هو يلي يروح عني
ياسمين:ها على اساس كتير اخوكي كان رح يروح،انت احيانا بتجيبلو غرضو لعندو
شيرين:اوووف
كنت من جوا قلقانة و متوترة و بعد ما قطعت نص الطريق ندمت كتير اني طلعت هالطلعة ،بعد نص ساعة وصلنا على بيت خشبي صغير
ياسمين:وصلنا و اخيرا
نزلت انا و عم اطلع بالبيت و الارض يلي حوليه ،قربت و دقيت الباب دقتين لانو ما كان في جرس،بعد دقايق قليلة فتحتلنا الباب مرة خمسينية ،شعرا الابيض و تجاعيد وجهها اعطاها هيئة مرعبة
شيرين:نحن من طرف ابو توفيق
ردت بصوت مبحوح هي و عم تتفحص شكلنا
ام صالح:ايه ،فوتو
تركت الباب مفتوح و فاتت و نحن فتنا لوراها و نحن عم نطلع بالبيت ،عمار قديم كتير و رطوبة و العفونة اكلة الحيطان
شيرين:قلنا ابو توفيق انو منلاقي طلبنا عندك
ام صالح:شو طلبكن؟
شيرين:طلبنا عشبة البقدونس السرخسية
قعدت على كنبة مهترية هي و عم تسعل
ام صالح:ايه ...عندي طلبكن ،جاين لحالكن؟
ياسمين:ايه
ام صالح:اممم
طلعت على الحديقة هي و عم تتكي على عصا و نحن لحقناها ،قربت على نبتة و مسكتا بايدا هي و عم تطلع فيا و تهمس بصوت ما مسموع،قربت لعندي ،مديت ايدي لاتناولا منا،سحبتا لجهة معاكسة
ام صالح:ما قبل ما اعرف شو بدك تعملي فيا ؟
شيرين:لازمتني للجامعة ،عم اعمل بحث عن النباتات المهددة بالانقراض و بدي قدما بالبريزنتيشن
ام صالح:كل هالنبتات يلي قدامك انا برعاهن متل اولادي و ما بطلع وحدة من هون قبل ما اعرف لوين بدا تروح و اتأكد انو بدا ترجع
شيرين:بوعدك يومين و رجعلك اياها
ام صالح:اذا بقيتي عايشة،رجعيا؟
شيرين:عفوا!
اعطتني النبتة و هي عم تطلع فيني نظرات غريبة
شيرين:شو سعرا؟
ام صالح: صفر ليرة
اطلعت بياسمين و ياسمين رفعتلي كتافا
شيرين:طيب ،شكرا كتير ،نحن لازم نروح
طلعت انا و ياسمين من عندا و هي ماشية ورانا و عم تعكز على عصايتا ،انا عم افتح باب السيارة لفتلي نظري قلعة حجر كتير كبيرة على قمة الجبل
شيرين:ياسمين اطلعي شوفي
ياسمين: ياااا ،شو هيدا ...قلعة !
ام صالح:هيدا قصر امير الجبل
شيرين:امير الجبل !
ياسمين:هههههه قصر و امير متل حكايات كان يا ماكان
شغلت السيارة و مشيت
ياسمين:ما حبيتا ابدا لهل المرة و بتكذب كمان ،قال قصر امير الجبل
شيرين:ولا انا ما حبيتا ،لا شكلا و لا حكيا مريح
ياسمين:المهم اخدنا يلي بدنا اياه
شيرين:و بس نخلص منبعتلا اياها مع ابو توفيق ،انا مستحيل اطلع لعندا مرة تانية
ياسمين:بس عندا نبتات نادرة كتير و شكلا غريب ،ما شفت متلن بحياتي
رجعت شغلت ياسمين الاغاني و تابعنا طريقنا ،حتى لمحت على الطريق شي كبير و اسود بنص الطريق ،وقفت السيارة بسرعة قبل ما امشي فوقو
ياسمين:شو هيدا؟
شيرين:ما بعرف ،لحظة لانزل و شوف
فتحت الباب و نزلت انا و عم اتلفت حولي ،لمعت السما لمعة قوية و بعدا رعدت بقوة ،نفض جسمي و التفتت لوراي على صوت ياسمين عم تضحك علي
ياسمين:يا جبانة
شيرين:تضربي
قربت لميز الشي الغريب الاسود ،كان كيس كبيرة اسود ،فتحتو بطرف اصابعي و هفت ريحة بشعة منو و اول ما شفت المنظر رجعت خطوتين لورا و انا قرفانة ،كان كلب ميت و الدبان و الدود عم ياكلو ،فتلت ضهري لارجع على السيارة و شفت واحد عم يمشي بخطوات سريعة باتجاه ياسمين ،طويل كتير بشكل خيالي و لابس جاكيت اسود طويل ،كانت ياسمين عم تقلب بالاغاني و ما منتبهة عليه حتى صرخت صوت
شيرين:يااااسمين ...انتبهي
اطلعت فيني ياسمين و ما فهمت علي ،ركضت بسرعة و هو صار يركض وقت شافني عم اركض باتجاه السيارة ،طلعت فورا وقفلت الابواب و مشيت بسرعة انا و عم القط نفسي
ياسمين:شبك
شيرين:وطي الصوت حتى تسمعيني
اطلعت على المرية و ما شفت حدا
شيرين:كان في واحد.شكلو غريب كتير جاي باتجاه السيارة من جهتك و نادتلك صوت بس انت ما سمعتيني
ياسمين:مين هالواحد ؟ما شفت شي
شيرين:كيف بدك تشوفي و انت يا حاطة راسك بالموبايل يا عم تقلبي بالاغاني
ياسمين:طيب هاي طفيتو ،ارتحتي هلأ ،صحي شو طلع بالكيس
شيرين:كلب ميت
نحن و ماشين بالطريق و انا عيوني مفتحتن على عشرة و عم اطلع على الجهتين و متوترة حتى صرخت صوت ياسمين
ياسمين:شيري انتبهي
وقفت السيارة باخر نفس
شيرين:يالله ،شو هادا كمان ؟
كان في جذع شجرة كبير مسكر الطريق
ياسمين:كيف بدنا نتابع هلأ،ما فيكي تطلعي فوقو
شيرين:اكيد لا،خلينا ننزل نزيحو من الطريق
اول ما حطينا رجلنا برا السيارة ،كبست المطرة
ياسمين:هلأ كملت
شيرين:تعي امسكي من طرفي
كان كتير تقيل ،تعبنا نحن و عم نرفعو و ننقلو للجهة التانية
شيرين:ما كان موجود نحن و جاين
ياسمين:ايه صح ،غريب
جلست ضهري انا و عم نفض ايدي و برمت جسمي لارجع على السيارة ،و شفت نفس الشكل بس هالمرة واقف جنب باب السيارة ،صرخت صوت ياسمين وقت شافتو و انا بقيت واقفة بمحلي و رجلي عم يرجفو و وهو واقف و عم يطلع فينا و ماسك عودة و عم ينكش اسنانو فيا ،اطلعت ببعض انا و ياسمين و بعدين التفتنا لعندو و بلش يمشي باتجاهنا و نحن نرجع لورا حتى سرع خطواتو و نحن بلشنا ركض نحن و عم نصرخ ،التفتت لورا و ما عاد شفتو ورانا و زاد خوفي اكتر
شيرين:ياسمين وقفي ،ما عاد ورانا
ياسمين:يا امي شفتي شكلو اديش غريب ،شيري انا خايفة كتير
شيرين:لازم نرجع عالسيارة امن من انو نبقى بالشارع
ياسمين:و بلكي كان ناطرنا هنيك ،يالله،مين هيدا و شو بدو مننا
شيرين:ما بعرف بس الواضح انو نيتو ما منيحة ،لو كان غير هيك ،ما كان ركض باتجاهنا و هو يلي حط الجذع و الكلب و قطعلنا الطريق
رجعنا بنفس الطريق نحن و ماسكين ببعض و خايفين ،كانت السيارة بعدا موجودة بمحلا و ما في اي حدا حوليا
شيرين:خلينا نركض و نطلع فيا و نقفل الابواب
اول ما دورت السيارة و بدي امشي ،فجأة قام واحد من المقعد الخلفي من السيارة و ثبتني بايديه بمحلي و انا عم صرخ ،فتحت ياسمين الباب و نزلت بسرعة لتهرب بس خبطت بواحد تاني بيشبهو ،ثبتا بايديه الاتنين على الباب
شيرين:شو بدكن منا ،بدكن مصاري ....هاي جزداني
اعطيتو جزداني ،مسكو و زتو من الشباك
مسعود:انزلي من المركبة
شيرين:شو بدكن منا..(تبكي)
نزل ايديه عن جسمي هو و عم يطلع فيني و عابس
مسعود:رح نزل ايدي عنك هلأ،انزلي من المركبة
شيرين:طيب طيب
فتحت الباب و نزلت و ركضت،لحقني و مسكني من ايدي بغمضة عين و سحبني انا و على الارض باتجاه السيارة
شيرين:اتركني ...شو بدك مني ...الله يخليك اتركني
اطلع بالشخص التاني يلي كان محاوط ياسمين يلي كانت عم تبكي و تستنجد ،بس ما كان فيه حدا بالطريق غير نحن الاربعة
مسعود:يلا خلينا نمشي و بعدين بترجع بتخفي المركبة بالوادي
كل واحد منن مسك وحدة فينا ،كانت اشكالن ما مألوفة ابدا ،طولن بيتجاوز المترين و اكتافن عريضة كتير و واحد منن بشرتو بيضا و التاني داكنة و عيونن كبيرة و جاحظة و شعر اسود اشعث مكسي و غزير حتى تيابن غريبة ،للوهلة الاولى بتفكرن وحوش بس هيئتن هيئة بشر ،حاولت كتير افلت من ايدو على الطريق ،عضيتو بس كان لحمو قاسي حتى اسناني ما غرزت ابدا ،حاولت اضربو بايدي بس كنت متل يلي عم يضرب حيط حتى عصب مني و ضربني كف و غبت عن الوعي و وقت صحيت ،كان حاملني على ضهرو و عم يمشي بين شجر عالي بطريق نزول حتى وصلنا لنهرمجراه قوي ،شلحو من رجلين و مسكو احذيتن بايدن و دخلو بالمي حتى وصلو للطرف التاني ،حسيت حالي متل الغنمة و اخدينا على الدبح و كنت عم ادعي لله يكون كل هالشي كابوس ،حتى وصلنا على النقطة الاخيرة
مسعود:يابي ....يابي .....
خبط على باب بيت حتى انفتح من جوا
فتحية:مسعود!شو جايب معك ؟
مسعود:لقية
فات هو و عم يضحك و وراه اخوه هووو حامل ياسمين و زتونا على الارض ،اطلعت على ياسمين و رحت قعدت جنبا فورا بس كانت الصدمة المشهد الغريب يلي بحياتي شفنا عدد كبير كتير من العمالقة ،نسوان و رجال كلن طوال كتير و كلن عم يطلعو فينا كانو نحن يلي شكلنا غريب و ما مألوف ،قام وقف واحد منن و كان واضح انو هو الكبير فين
ابو مسعود:هدول هن ،ماشي حالن
#خارج_النطاق
#هلا_غرابلي
#الجزء_الثاني
جاسم:نصبنالن كمين و وقعو فيه
قرب علينا و نحن رجعنا لورا ،حط ايديه على ركبو و حنى ضهرو و اطلع فينا
ابو مسعود:شطورين ،خير ما عملتو
شيرين:مين انتو و شو بدكن مننا؟
تجاهلو سؤالي
مسعود:يابي وحدة الي و وحدة لاخي جاسم
قام واحد بيشبهن من القاعدين
محسن:و ليش ما وحدة الي و وحدة لاخي مزيون؟
مسعود:نحن يلي لقيناهن و اصطدناهن
ابو مسعود:خلللص ...خلص ...انا بعرف فين و موصي علين من شهرين ،لهيك قلتلك روح انت و اخوك جاسم احرس الطريق ، فتحية و زهرة تعو خدن لجوا و بعدين منقرر لمين
قربو علينا و مسكونا من ايدينا و بدن يسحبونا لجوا ،سحبت ايدي انا و عم صرخ انا و ياسمين
شيرين_ياسمين:اتركونا ....بعدي عني ...ما تقربي مني ....عم قلك اتركيني
فوتونا بالغصب على غرفة تانية ،كان فيا تختين و خزانة ،شلحونا على الارض و قفلو الباب و راحو
ياسمين(تبكي(:شفتي كيف عم يتقاتلو علينا و يتقاسمونا ...هدول مو بشر،هدول وحوش يمكن اكلين لحوم البشر
شيرين:نحن لازم نطلع من هون
ياسمين:نحن خلص انتهى وضعنا و علقنا هون
قربت على ياسمين
شيرين:ياسمين ما وقت البكا هلأ، لازم نلاقي طريقة نطلع من هون و نرجع ع محل السيارة
ياسمين:صعب،شو عرفنا بطريق الرجعة
شيرين:منحاول
قمت وقفت انا و عم اطلع بزوايا الغرفة،كان فيا شباك.،ركضت بسرعة و فتحتو بس طلع بوجهي سياخ حديد
شيرين:يالله
اطلعت ياسمين بالشباك و رجعت تبكي
ياسمين:رح ياكلونا ...بجوز يشوونا قبل او يسلقونا
شيرين:اووف انا ناقصتك هلأ
قربت على الباب و حطيت ادني لاتسمع علين
ابو مسعود:السمرا لمسعود و القشطة لمحسن ...
جاسم:بس يابي انا كنت مع مسعود.و انا يلي جبت التانية
ابو مسعود: جاسم الموضوع انتهى
جاسم:حاضر يابي متل ما بتأمر ،انت بتفصل و نحن منلبس
ابو مسعود:هلا دور اخواتك الكبار ،انت دورك بالدفعة التانية
جاسم:متل ما بدك يابي
ابو مسعود:مسعود قلتلي اجو بمركبة!
مسعود:ايه يابي و بكرا من الصبح رح نخفيا
ابو مسعود:منيح منيح
مسعود:يابي ايمت رح ....
ابو مسعود:طول بالك ليجهزون بالاول،فتحية و زهرة من بكرا بتجهزون
فتحية_زهرة:حاضر
ابو مسعود:يلا على النوم
الجزء التاني:
اتوترت اكتر بعد.ما سمعت حديثن ،ما قدرت افهم شو بدن مننا او على شو يجهزونا ،صرت اتمشى بالغرفة انا و عم فكر،مية فكرة خطرت براسي بس كلا كانت افكار سيئة،غفيت ياسمين على الارض و انا بقيت فايقة و عم قاوم التعب و النعس حتى سهيت و غفيت و ما صحيت الا على صوت فتحية و زهرة عم يفيقونا
فتحية:فيقو يلا
جلست قعدتي انا و عم افرك عيوني
شيرين:احكو ليش حابسينا هون؟
حطت طاولة صغيرة قدامي و حطت عليا صنية فيا بيض مسلوق و جبنة و لبنة و زيتون و بندورة و خيار و كاستين حليب
زهرة:افطرو هلأ ،صحة و هنا سلفا
فتحية:و لنرجع منبلش
ياسمين:بشو بدكن تبلشو...هاااي...وين رحتو
تجاهلونا و طلعو و قفلو الباب علينا،قربت ياسمين تاكل و اول لقمة حطتا بتما رجعت تبكي
ياسمين:هدول بدن يعلفونا قبل ما يدبحونا و ياكلونا
شيرين:ياسمين انت شكلك متأثرة كتير بأفلام الرعب يلي عم تحضريا
ياسمين:و هادا شو بتسميه ،ما رعب ،يلي صار معنا من مبارح لليوم ما رعب
شيرين::رعب بس ما متل انت متخيلة،كلي هلأ ،بجوز هاي وجبتنا الاخيرة لليوم
ياسمين:يعني شو ...رح نموت
شيرين:قصدي بجوز ما تلحقنا وجبة تانية اليوم ،ما قصدي اخر وجبة بحياتك
ياسمين:نيالك على برودة هالاعصاب
شيرين:اي لكن انا يلي نمت مبارح بسرعة و شخرت مو هيك
ياسمين:من الخوف و تعب التفكير
فطرنا بصعوبة و نحن عم نشرب كاسة الحليب و احكيلا لياسمين شو سمعتن عم يحكو مبارح ،انفتح الباب و فاتت فتحية و زهرة ،قامت زهرة للصينية من قدامنا و راحت ،بقيت فتحية عم تطلع فينا ،رجعت زهرة و بأيدا صنية تانية
فتحية:تعي انت و وقفي هون
شيرين:انا ؟
فتحية:ايه
شيرين:ليش ؟
فتحية:اعملي متل ما عم قلك يلا
قمت وقفت و قربت عليا انا و خايفة ،ناولتا زهرة مقص ،فتحت المقص و قربتو ،انا خفت و رجعت لورا ،مسكتني من زندي و قربتني لعندا
شيرين:شو بدك تعملي؟
فتحية:وقفي بثبات ،ما رح اعملك شي
حطت المقص من طرف بلوزتي و بدا تقصا ،رجعت لورا
شيرين:شو بدك تعملي؟
فتحية:اشلحي خلصيني
شيرين:مابدي
فتحية:هدول شكلن بدن يعذبونا
قربت زهرة لجهتنا ،كانت ملامح وجها و نبرة صوت اهدى و احن من فتحية
زهرة:سمرا حبيبتي ما رح نأذيكن ،بهدوء اشلحو تيابكن و خلينا نبلش
شيرين:نبلش بشو؟
راحت على الطاولة و جابت الصنية و قامت منا سكر معقود و صارت تمطا قدامنا
زهرة:نبلش تنظيف
ياسمين:ليش؟
فتحية:عم بلش عصب انا
زهرة:طولي بالك فتحية ،شويش شويش منفهمن ،انتو ما بتنظفو العروس قبل ما تتزوج
شيرين:العروس؟نحن شو دخلنا ؟
زهرة:انتو العرايس
ياسمين:عرايس!لحظة لحظة نحن عرايس لمين ؟
زهرة:انت عروس لابني محسن و اختك سمرا عروس لابن ضرتي مسعود.
اطلعنا ببعض انا و ياسمين
ياسمين(تبكي):مستحيل...موتونا اهون من انو تعملو فينا هيك ..شيري سمعتي
شيرين:نحن عنا اهل و اهالينا رح يدورو علينا و رح يلاقونا و اذا لقونا بهيك وضع انتو رح تتحاسبو و تنحطو بالحبس انتو و كل العيلة
فتحية:اذا لقونا و لقوكن ،وقتا يحاسبونا ،خلينا نبلش هلا حتى نخلص على بكير،عنا شغل كتير
شيرين:بعدي عني ..اتركيني ...ما بتلمسي شعرة مني فهمانة و بعدي هالقرف عني
فتحية:زهرررة ...نادي مسعود يجي يشوف عروستو كيف عم تعذبنا
زهرة:يلا يا بنتي بلا شوشرة و مشاكل ،مسعود مجنون ،بلا ما يدرى و يزعجك
شيرين:ما بتقربو مني لا انت و لا هي و لا حتى هو ..(تبكي)مستحيل انا اقبل خليكن تعملو فينا هيك
طلعت فتحية و رجعت هي و ابنا و هي عم تمط معقود السكر بايدا
فتحية:شوف ..ما عم تقبل لا هي و لا اختا ،عم تصرخ و تدفشنا بعيد عنا
قرب لعندي هو و عم يطقطق اصابيع ايديه
مسعود:اسمعي الكلمة احسن ما زعلك كتير
شيرين(تبكي):مستحيل خليك انت او غيرك يقرب مني فهمان
قرب مني اكتر و مسكني و قلبني،صار راسي تحت و رجلي لفوق و طلع سلك من جيبتو و ربطلي رجلي و علقني على علاقة بالحيط
شيرين(تبكي):نزلني...يالله ...يا وحوش نزلوني
مسعود:خليا هيك معلقة،بس تغير رايا نزلوا
فتحية:و انت كمان منعلقك جنب اختك الا بتقعدي عاقلة
ياسمين:طيب طيب بس نزلوا
زهرة:بس نخلصلك الك،منزلا
بلشو بياسمين ،كانت فتحية تمد معقود السكر على جسما لياسمين و تشيلو دفعة وحدة و ياسمين تصرخ و فتحية تزورا
فتحية:بلا هالصريخ
انا بقيت معلقة متل الغنم المدبوح انا و عم صرخ ،بعد ساعة اخدت زهرة ياسمين على الحمام و اجت فتحية نزلتني على الارض
فتحية:قربي يلا
مسكتني و شدتني لعندا بهمجية و عصبية ،ما كان وجعي اخف من ياسمين ،كان مضاعف و كانو عم تعاقبني،طلعت ياسمين من الحمام ،كان وجهها احمر كتير و لافة جسما بالمنشفة ،قعدتا زهرة على كرسي و بلشت تسرحلا شعرا و بعدين فتت انا على الحمام ،شفت طنجرة كبيرة كتير فيا مي عم تغلي و تحتا حطب مجمر
فتحية:قعدي على هالكرسي
شيرين:المي سخنة كتير؛بنسلق هيك
فتحية:ايه احسن حتى يروح كل وسخك و سوادك
شيرين:انا جسمي نظيف
فتحية:هلأ منشوف
فركتلي فتحية كل جسمي بالصابون و الليفة و عملتلي رجلي بحجر الحمام ،كانت متل يلي عم تفرك جاجة بايديا ،و كل ما قلا شوي شوي ،تقوي ايدا ،طلعت من الحمام ،شفت ياسمين قاعدة على الكرسي و زهرة عم ترسملا بالحنة على ايديا و رجليا ،قربت فتحية لعندا و وقفت فورا راس زهرة تطلع عليا
فتحية:انا رسمي احلى
زهرة:ولله انا معروفة بكل هالارض ما حدا بيطلعلو معي بنقش الحنة
فتحية:ايه هلأ منشوف
قعدت على التخت و بلشت فتحية ترسملي على ايدي و رجلي،ما ضل مطرح الا و نقشتلي فيه حنة حتى ما عاد بين لون الجلد و هي عم تتنافس هي و زهرة مين بينقش احلى ،و انا ياسمين عم نطلع ببعض
شيرين:ايمت هيدا بيروح؟
زهرة:ما بطول كتير ،شي 3 ايام
بعد ما خلصو ،جابت ماسورة حديد طويلة و مسكتا من خشب ،حمو على الفحم المجمر و قربتا مني
شيرين:شو بدك تعملي؟
فتحية:بدي لفلك شعرك
شيرين:يالله هيك بينحرق
فتحية:ما تخافي ،هلا شوفي ما احلاه كيف رح يصير مبروم
بعد ما قسمتلي شعري ،صارت تمسك كل خصلة و تلفا على ماسورة الحديد و تنطر دقيقة و البخار يطلع من شعري ،بعدين تسحب الماسورة و تنزل الخصلة مبرومة و ترجع تحمي الماسورة من جديد لطبقا على كل الشعر
فتحية:عنكن هيك شي انتو؟
زميت شفايفي
شيرين:ايه عنا بس احدث من هيك؛بتنحط بالكهربا
زهرة:ايه نحن هون ما عنا كهربا
ياسمين:كيف عايشين بلا كهربا؟
زهرة:عادي
اطلعت فتحية بزهرة و ضحكت بخباثة
فتحية:بكرا بتعيشو و بتعرفو
شيرين:اديش بدكن لتتركونا نهرب من هون ،اطلبو يلي بدكن اياه
ياسمين:اعتبرونا متل بناتكن،بترضو حدا يعمل فين هيك
فتحية:نحن ما عنا بنات ،زهرة جيبي الفساتين لنقيسن اياهن و نشوف شو بدن تعديل
زهرة:يمكن بدن تقصير
رجعت زهرة و هي حاملة فستانين بيض ،اول ما شفناهن انا و ياسمين رجعنا نبكي
شيرين:هدول عنجد بدن يزوجونا
ياسمين:نحن انتهى مستقبلنا ،الله لا يوفقك يا ابو توفيق
شيرين:حسابو عسير لنطلع من هون
ياسمين:هادا اذا طلعنا ...(تبكي)
قيستني الفستان فتحية و هي عم تحط دبابيس عليه لديقو و تقصرو ،كان فستان ابيض باهت بكم و بقبة مسكرة و بكشكش دانتيل مطرز و مشكوك يدوي
فتحية:زهرة ابعتيه لعند الخياطة سمية و قليلا تخلصو من هون لساعتين
زهرة:حاضر
فتحية:و اتفقدي الشباب وين وصلو
زهرة:حاضر
حطتلنا فتحية كحل عربي بعينا و مسكت قلم روج احمر ،حطت منو على الشفايف و على الخدود و عطرتنا بالمسك و رفعتلنا خصل شعرنا لورا بدبابيس شكلا متل العروق لونا ابيض و مشكوك فيا حبات لولو ابيض
فتحية:قعدو هون يلا ،راجعتلكن
طلعت فتحية و قفلت الباب علينا
شيرين:لازم نلاقي حل
ياسمين:النا من مبارح على نفس الحكي
رجعت فتحية و زهرة و هن حاملين بايدن االفساتين ،لبسونا اياهن و وقفو يتفرجو علينا
زهرة:طلعتو حلوين كتير ،فتحية روحي انت اتجهزي و انا ببقى عندن
فتحية:خلي عيونك مفتحة علين
زهرة:ايه ،انا حابة احكي معكن كلمتين قبل ما نطلع لبرا
شيرين:تفضلي
زهرة:انا بعرف انو انت علقتو هون و سوء قدركن جابكن لهون و رح تبقو هون و حتى لو حاولتو تهربو ما رح تقدرو ،لانو انا قبلكن حاولت اهرب ببنتي بس رجعو جابوني
ياسمين:انت كمان عملو فيكي هيك ؟
زهرة:تقريبا بس انا بنت عمو لابو مسعود ،يعني كان مصيري واضح من اول ما خلقت و يا ريت ما بقيت عايشة و قتلوني متل ما عم يقتلو البنات هلأ
ياسمين:بدن يقتلونا؟
زهرة:لا ،انتو ما رح يقتلوكن ،بس رح تندمو كتير انو عشتو لحد هاللحظة
اطلعنا ببعض انا و ياسمين
شيرين:انت واضح انو انت غيرن ،خلينا نهرب و مناخدك معنا
زهرة:ما بقدر،انا هون صارت حياتي و هون اولادي و ما بقدر اتركن ،بدي منكن انو تسايرو وضعكن ،بعرف انو صعب كتير لانو المرة هون ،بهالبقعة الضايعة من الارض للخدمة و الفراش بس ،ما تخافو اول الشي رح تتعذبو بس بعدين رح تتعايشو و تصيرو متلنا و يصير كل شي عادي عنكن،حاولو تتعودو بسرعة لانو كلما تعودو اسرع؛بتصير حياتكن اسهل
فجأة طلع صوت الطبل و المزامير و الزغاريد من برا
زهرة:ها ...شكلن بلشو...انا قايمة هلأ بتجي فتحية لعنكن
قبل ما تطلع ،وقفت على الباب
زهرة:لا تنسو شو قلتلكن ،كلما تعودو اسرع كلما صارت حياتكن اسهل
اجت فتحية هي و لابسة عباية خضرا طويلة للارض مشكوكة و لابسة اساور و حلقات و اكتر من عقد دهب برقبتا و عم تزرغد ،اطلعت بياسمين و انهارت اعصابي و رجعت ابكي،حسيت خلص ما بقا في مهرب من الشي يلي ناطرنا،قربت فتحية و نزلتنا الطرحة على وجهنا
فتحية:اي وحدة منكن بتحاول تهرب ،رح تكون اخر لحظة بحياتا ،خلو العرس و الفرح يمرق على خير
طلعت فتحية و بقيت انا و ياسمين مع بعض
شيرين:نحن رح نهرب و الليلة
تابعووووووني
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
❤️🌹🌺💙❤️🌹🌺💙❤️🌹🌺💙❤️🌹🌺💙❤️🌹
تعليقات
إرسال تعليق