العينين والقلب احلام مؤجله حصريه وجديده وكامله جميع الفصول
الموت حق ووحدة من المسلَّمات الي لا يمكن للإنسان الهروب منها وقد تكون راحة النفس المطمئنة بلقاء ربها .. بس العذاب الحقيقي للأرواح الحيّة الي فقدت غواليها وصاروا تحت الثرى ..
بعد ماانتهت مراسم الدفن كانت قاعدة مع ولادها وبنت حماها عم تطلع فيهم بأسى وعم تفكر كيف رح تقدر تكمل بعد ما تركها زوجها بنص الطريق .. تأملت ابنا الشب اليافع الي لسه ما قوي عودو و بناتا التنتين الصغار الي تيتمو بطفولتهم المبكرة وقبل ما يشبعو من حنان ابوهم وعطفو ..
و بنت حماها ما كان حالها بيختلف كتير قاعدة ودموعا ع خدودا عم تتذكر أخوها الي كان عمود هالبيت وهلأ صار البيت بدون عمود وبدون سند ..
العمة جمانة : الله يرحمك يااخي كتير بكرت 😭 و يعينك ياأم رائد كيف بدك تعيشي هالأطفال
رائد : شو أطفال عمتي أنا صرت رجال ورح عيش أمي وأخواتي
جمانة : ياحبيب قلبي كلو عمرك ١٥ سنة وعندك مدرسة
رائد : عمري ١٦ مو ١٥ وبعدين رح اترك المدرسة واشتغل
😥 أمي أمي شو صرلك
..
حمل أمو وركد فيها للمشفى وبعد وقت طلع الدكتور من عندا ليخبرهم عن حالتا ..
رائد : دكتور كيفا أمي
الدكتور : أزمة قلبية مرت على خير الحمد لله بس لازم تعرفو أنو مابينفعلا الزعل ..
جمانة : الحمد لله ع سلامتا حبيبي دير بالك عليها .. خود مني هالكم قرش دبر حالك فيهن حاليا
رائد : لا عمتي لا تواخزيني بقطع إيدي ومابمدا لحدا
 |
جمانة : تقبر قلبي طالع لابوك نفسك عفيفة بس أنا مو حدا أنا متل أمك يلا ياعمري خدن لبين ماتلاقي شغل وتشوف شو بدك تعمل لا تخليني سافر وأنا مشغول بالي عليك
رائد بضعف : خليكي عمتي
جمانة ضمتو وحطت المصاري بجيبتو : ياعيون عمتك والله جوزي اتصل فيني واستعجلني لحتى روح ببقى بطل عليكن وانت شو مااحتجت بتحكي معي ماشي ؟
رائد باس راسا : ان شالله خليني وصلك عالكراج
جمانة : لا حبيبي خليك مع أمك انا باخد تاكسي وبروح لحالي دير بالك على حالك وعلى أمك وأخواتك
رائد : الله معك ..💔
( رائد شب عصامي تعب كتير بحياتو.. أسمر فاتح ودقنو سودة وعيونو عسليات بياخد عقل الناس بجمالو وطلتو وبساطتو مع انو مابيهتم بحالو ابدا بيحس قلبو اكبر من عمرو بشي عشر سنين إذا مو أكتر ..
هو من عيلة متوسطة الحال أبوه كان فاتح محل يصلح فيه كهربا لليوم الي صار فيه ماس كهربا ومات فيه متل ماشفتو كان عمرو وقتا ١٦ سنة اضطر يترك المدرسة منشان يعيش أمو وأخواتو أمو صار معها القلب والضغط من حسرتها على أبوه وعليه وعندو اختين صغار بعدن بالمدرسة هني رانيا وبسمة .
رائد : كيفك اليوم أمي
أم رائد : الحمد لله ياأمي بس بالي عندك عم تتعب بالشغل مو
رائد : لا تاكلي هم أم رائد انت مخلفة رجال لك أنا مستعد انحت بالصخر لحتى ماخليكي انتي واخواتي عايزين شي وعيشكن عيشة كريمة
أم رائد : تقبر قلبي ياأمي الله يرضى عليك ويرزقك
رائد (مسك ايدا وباسا ) : ويخليلي ياكي ياست الكل
اجت بسمة راكدة ووراها رانيا
بسمة : رائد رائد شو جبتلي
رائد (حملا وحطا على رجلو وطالع من جيبتو بسكوتة ) : جبتلك البسكوتة الي بتحبيها
بسمة : 😕 اي بطلت حبا كل يوم نفس البسكوتة
ام رائد بتعب : بس يابنت لا تقلي دم على أخوكي الي بيقدر عليه بجيبو
رائد : ههههه اتركيها أمي خلص تكرمي بكرة بجبلك غيرا
(التفت لعند رانيا ) وأنت رنون شو جاية على بالك ؟
رانيا ( عم تفرك ايديها) : هللأ مابدي شي .. بس لا تنسى الفستان الي وعدتني فيه منشان عيد ميلاد رفيقتي
رائد : لك تكرم عيونك بس اقبض آخر الجمعة بجبلك الي بدك ياه انتو بس فرجوني ضحكتكن
رانيا وبسمة : يخليلنا ياك ياارب
(سحبن وضمن كل وحدة من جهة )
أم رائد بقلبا: الله يحنن قلبكن على بعض ويرزقك ياابني تحمل التراب بإيدك يقلب دهب
..
تاني يوم ومتل العادة سمى بالله وطلع من البيت يدور على شغل وهو ماشي وقف عند محل نجار خشب ..
رائد : يعطيك العافية معلم بدك شغيل
أبو حسين ترك من ايدو : بس انت مو صغير ياابني
رائد بحرج : يمكن صغير بس بشتغل منيح وبعجبك .
أبو حسين : و مو لازم تكون بالمدرسة ؟!
رائد : 💔 لازم بس الحياة قاسية ياعم .. أبي متوفي وعندي حريمات
ابو حسين : لا حول ولا قوة الا بالله .. بتعرف تشتغل بالخشب ؟
رائد : بصراحة لاء بس انا ذكي ودغري بتعلم
اشتغلت كل شي أشغال بتخطر على بالك بسوق الخضرة بسوق السمك بسوق الحميدية بالبناء بالحديد بالبلاستيك بس بشتغل يومية ومافي شي ثابت وأحيانا دوامين ليل مع نهار لحتى ماخلي أخواتي ناقصن شي بدي ياهن يكبرو ويتعلمو ويصيرو أحسن الناس وارفع راسي فيهن
ابو حسين : يلا ياسبع لكن شلاح جاكيتك ولبيس هالمريول وتعا معي لنبلش ..
رح أعطيك خمس تالاف بالجمعة منيح ؟
رائد : يكتر خيرك ..
_ وهيك كانت حياتو لهالمسكين حتى رفيقو الوحيد ربيع ماعد عندو وقت يشوفو
///////
_ وبعد ٣ سنين أمو ساءت حالتها كتير ضل سنة كاملة يحملها ويروح فيها عالمشافي الحكومية هيك لحتى ماتت وتركتو هيي كمان كان عمرو ١٩ سنة موتا كسرو ماخلا فيه ولا عضمة بضهرو يستند عليها صح هو الي كان حامل هم البيت على كتافو بس كان عايش ببركتها ودعاها وأختو رانيا كانت تستلم شغل البيت والطبخ من لما كانت بالتاسع ..
_ ماكان لازم يضعف أبدا صار لأخواتو السند والملجأ الوحيد تعب كتير لحتى قدر يجمع شوية مصاري ورجع محل أبوه المحروق يوقف على رجليه فتحو مكتبة فيها شوية قلام ودفاتر يبيعن لطلاب المدرسة وشوي شوي كبرت المكتبة وتعبت بضاعة .. مرقو عليه إيام وسنين متل بعضا لحد ماصارت رانيا باكالوريا
..
وبيوم من الإيام .. كان على سفرة الغدا مع اخواتو ..
_ مستند وحاطط ايدو على بطنو : اييه دايمة يارنون والله فشر أحسن طباخ يطبخ متل طبخك
رانيا بابتسامة دافية : لك صحتين ابو الجود ان شالله بفرح فيك وبشوف جواد على ايدك يااارب
رائد بادلا الابتسامة
بسمة : يعني خلص قررتي اسم ابنو .
رانيا : لكن مين بدو يحمل اسم أبوكي ولي
بسمة : اي شبعرفني ضروري يحمل اسمو
رانيا : يخربيتك شو جدبة لكن مو ضروري .. ليش الواحد بجيب ولاد مو لحتى ينعاد اسمو وينذكر ويترحمو عليه
بسمة : مابعرف يمكن لأني مابتذكرو منيح لبابا مابحس متلكن
رائد : الله يرحمو خلص انتي وياها.. إي رانيا خانم
شو أخبار الباكالوريا ؟ لا تضيعي وقتك ها بدي علامات منيحة وفرع منيح اقل من دكتورة او مهندسة مابقبل
رانيا : حاضر بس كان بدي من عندك من المكتبة شوية غراض للمدرسة
رائد : اي من عيوني المكتبة كلا على حسابك بكرة امرقي وخدي الي بدك ياه .
_ تاني يوم فاتت لعندو عالمكتبة ومعها رفيقتها سرق نظرة سريعة وغض بصرو ماتمعن كتير بملامحها بس كانت حلوة ولابسة بدلة المدرسة وحجاب أبيض متل رانيا وهيي كمان كانو عيونا بالأرض ومارفعتن ابدا
رائد بقلبو : الله يستر عليها ويخليها لأهلا ويخليلي أخواتي ومايفرجيني فيهن شي يضرني ..
رانيا : كمان رفيقتي بدا نفس الغراض بس لا تغلي عليها هي بنتو لأبو قصي الي كان مدير مدرستك عرفتو ؟
رائد : اي اي عرفتو تشرفنا
غرام بقلبا : مو معقول شو حلو ومؤدب .
_ وبعد كم يوم لمحا عندن بالبيت جاية تزور رانيا سمعا عم تناديلا غرام وعرف اسما حاول يغض بصرو بس عيونا الرماديات كانو عم ينادولو اتطلع اتطلع
وبعد هالنظرة ماراحت من بالو صار يفكر فيها من أول مايفيق لحتى ينام وحتى يحلم فيها وهو نايم
رائد : لك شو هاد ليش هيك ماعم اقدر وقف قلبي صار عمري ٢٥ سنة ما سبق ودق هيك .. ههه ليش انا كنت منتبه لوجودو اصلا كل الوقت شغل شغل شغل متل الحمار لدرجة الي بشوفني بفكر عمري بالتلاتينات حتى أخواتي بشوفو فيني أب أكتر من أخ بخافو مني وبيطلبو رأيي بكل شي ..
_ حال غرام ماكان بيختلف عن حالو
كانت قاعدة بغرفتا عم تدرس : ياالله يا رائد شو عملت فيني بهالنظرة هي أنت وعقدتك ووشك الي مابيضحك لرغيف السخن أخدت عقلي ودوبت قلبي كيف إذا بتبتسملي أو بتوجهلي شي كلمة والله يمكن بيغمى عليي وبيوقف قلبي هههههه
_ مسكت القلم بدا تكمل دراسة : ههه حتى القلم الي عم اكتب فيه بذكرني فيك خلص شكلك مارح تحل عني اليوم
..
_ صار يعد الإيام لحتى يشوفا قلبو ينط من محلو لما تفوت لعندو عالمكتبة مع رانيا أو وقت تجي عالبيت ..
_ بيوم كان قاعد بالصالة حاطت ايديه شابكن ورا رقبتو وعم يشوف تلفزيون و أخواتو عم يدرسو بغرفتن
اجت لعندو رانيا ..
رانيا : مساالخير أخي كيفك
رائد : لك يااهلا وسهلا بأم الرور مشتقلك كيفك انتي طمنيني عنك كيف الدرسة
رانيا : عال العال لا تشغل بالك
رائد : إذا ناقصك شي نوطات او دروس خصوصي قليلي
رانيا : لا لا مو ناقصني شي بس بدي قلك شغلة
_ اتطلع فيها باهتمام ..
رانيا : رفيقتي غرام ...
_دق قلبو وقت سمع اسما وزاح نظرو عنها بسرعة من خوفو عيونو يفضحوه
رائد : شبها
رانيا : بصراحة أنا بحبا كتير وبتمنى تجي تعيش معنا هون
_ فتح عيونو فيها بصدمة وبعدا ضحك حسا عم تتغالظ
رائد : بدكن تعملو حزب بناتي لكن وأنا وين بدكن تزتوني
رانيا : مامنزتك ولا شي منساويها مرتك
( بقلبو ) ياااه هالكلمة شو لمست قلبي 💔 مرتي ! 😍
رائد : رانيا شو هالحكي الي شاغلة بالك فيه هلأ قومي لدراستك
رانيا : عنجد قلي شو رأيك فيها
رائد : يي! الله يستر عليها شبعرفني ماشفت شكلا منيح
رانيا : بصراحة انا حاسة انها بتحبك
_ حس شي مليون فراشة صارت ترقص جوا وقلبو معن عم يدبك
عقد حواجبو وهيي كملت حكي ..
رانيا : بحسا بتهتم فيك جياتا لعندي كترانة هالفترة ووقت احكي عنك بسياق الحديث بيلمعو عيونا..
_قاطعا وماخلاها تكمل
رائد : رانيا 😡
حتى لو هالحكي صح شلون عم تفضحي رفيقتك !
رانيا : بس أنا بعرف شو أنت
رائد : شو انا آه ؟ شو انا ؟
هالسخافة آخر مرة بسمعك عم تحكي فيها قومي لدراستك أحسن ماازعل منك يلا
اجت بسمة : شبكن ؟!
رائد : ها شرفي برريلا لهي الكرارة هلأ
رانيا : مافي شي خلص روحي لدراستك
_ مرق ايدو من جبينو لخدو كان قلبو عم يدق بسرعة من الكلام الي سمعو معقول عم تحس فيه ! وبعدين مابدو أخواتو يفتحو عيونن على هيك حكي والأهم من هيك انو بخاف على سمعتا مابدو حدا يحكي عليها حرف حتى لو الو .
_بعد كم يوم عشقها فيهن أكتر وأكتر كان متل العادة رايح يفتح المكتبة بعد الغدا لبس لبسو المعتاد بنطلون جينز وقميص بسيط وبوط رياضي وقرب عالباب بدو يفتحو ويمشي سبقو صوت الجرس استغرب اتطلع من العين الساحرة لقاها هيي
رجع لورا لما حس دقات قلبو رح يطرقو عالباب الخشب اتطلع بمراية كانت ورا الباب مشط شعرو باصابعو لورا وأخد نفس وفتح ..
التقو عيونو بعيونا لأول مرة تمعن بملامحا الناعمة بأنفا الصغير وتما وخدودا
(بقلبو ) يارب تسامحني بس مو بايدي ..
(وهيي بقلبا ) ولي شبو ليش هيك عم يتطلع فيني معقول مبين عليي شي ياربي دخيلك مابدي انزل من عينو
هههه عأساس أنا بعينو أصلا والله هالعقدة الي بين عيونو مية مكواية مابتفردا
بس حلووو حلوووو 😍 أخ قلبي
ماعرف كم دقيقة مرقو على هالحالة بس انتبه على حالو لما هيي نزلت نظرا عالأرض صار يتنحنح من حرجو
رائد : احم احم تعي يارانيا اجت رفيقتك انا رايح على شغلي
راح على شغلو ورجع بالليل اتسطح على تختو شوي وبعدا جلس واتطلع على مراية مقابيلو مسك شعرو بايدو وصار يحكي مع حالو : أوف من وين اجاني هالهم ناقصني شغلات فكر فيها غير فاتورة الكهربا وفاتورة المي وأجار الدروس الخصوصي تبع بسمة ولبس العيد ووووو هههههههه
_ ورجع اتسطح على ضهرو اخد نفس وابتسم وهو عيونو عالسقف
_اجت السوسة لعندو بدا تنخر راسو فيها وهو عم يكابر
رانيا ✊ الله يعطيك العافية
رائد تجلس :فوتي رانيا
رانيا : سخنلك عشا ؟
رانيا : لا ياقلبي مو جوعان
رانيا : بتعرف شو اليوم اتأكدت انها بتحبك
_ مابينكر انو دقات قلبو صارو ٢٠٠ بس بعدو عم يكابر .
رائد : رانياا !
رانيا : سماع مني رح احكيلك شو صار اليوم بجوز الموضوع بهمك
كتف إيديه : هاتي لشوف
➡️فلاش باك ..
بصوت رانيا ...
دخلت لعندي عالغرفة عم تهوي على وشا وصدرا عم ينزل ويطلع وابتسامتا قد ماعم تحاول تخبيها ماعم تقدر
رانيا : شبك شبك ليش هيك حالتك
غرام : لا ولا شي عدي لاحكيلك شو صار اليوم
رانيا : وهي قعدة
غرام : عمي الي بالسعودية اليوم اتصل ببابا وقال بدن يجو عالصيف ولمحلو انو بدن يخطبوني لابنو
رانيا: اي؟ وانتي مابدك ياه ؟
غرام : مابعرف صرلي زمان ماشفتو
رانيا : يعني مافيكي ترفضي ؟
غرام : مبلا فيني بابا مابيغصبني على شي
رانيا : طيب لكن ليش هيك متوترة ؟!
لتكوني شفتي حدا وترك ياملعونة
غرام : خلص رانيا شبك تضربي انتي والي اجا يحكيلك رح قوم امشي
رانيا : عدي عدي وين رايحة لسه هلأ اجيتي
باك ⬅️
رانيا : اي هاد الي صار
_ حس بغصة وحكى بقلبو : معقول أبوها يرفض ابن أخوه الي عايش بالسعودية ويقبل فيني انا؟ ههه على شو عالمصاري الي معي ولا عالشهادات ولا عالحسب والنسب
طيب والله بحبا يااارب اذا ماجعلتا من نصيبي برد قلبي وريحني من هالشعور
رانيا : اي شو رأيك
رائد : رأيي الله ييسرلا 💔
رانيا : لك أخي بدنا نفرح فيك مارح تلاقي أحسن منها
رائد : من وين اختي من وين ونحنا بالزور عم ندبر حالنا بهالكم ليرة الي عم يطلعولي من المكتبة
_اتطلعت فيه بخيبة أمل واستأذنت وراحت على غرفتا وتركتو بخيبتو الاكبر وقلبو الي عم يحترق .
تاني يوم
اتصل برانيا 📞📞
رائد : كيفك رنون شو طلعتو من المدرسة ؟
رانيا : اي طلعنا ليكنا عالطريق
رائد : هيي معك ؟
رانيا : احم هههه .. شايفتك عم تسأل !
رائد : جيبيها وتعي
رانيا : متأكد ؟ ! .
رائد : متل ماعم قلك .
_ دخلو عالمكتبة ورانيا قربت لعندو وهيي صارت تلتهي بالكتب متل العادة علا صوتو وبلش يحكي . ..
رائد : رانيا ... أنا قلبي عم يدق كتير
_ غرام تركت الكتاب من إيدا
رائد : بدي ياكي تدرسي وتنجحي وتصيري بالجامعة أنا مادرست بس حاطط كل أملي فيكن بدي ارفع راسي فيكن .. بدي هلأ ماتشوشي راسك بشي وبعد النتائج لكل حادث حديث
_ رانيا مصدومة وعم تبتسم وغرام عاطيتو ضهرا ماعرف شو ردة فعلا بس عرفت انو الحكي الها صارت تحكي بقلبا : يعني هلأ هاد الحكي الي ولا أنا فهمت غلط ؟ اكيد الي لكن ليش رانيا أصرت اجي معها اليوم .. قلبو عم يدق !! الي انااا؟؟؟!!!!!
_رجعت للواقع لما سمعتو كمل حكي
رائد : وعديني تهتمي بدراستك وماتشغلي بالك بشي هلأ
رانيا : ههههه بوعدك
رائد : يلا روحو هلأ مابحب تضلو برا كتير
رانيا : ماشي ياعم روميو سلام هههههه
_ ومن وقتا صار يقطع عن تمو لحتى يجمع حق المحبس وشوية مصاريف للخطبة بنفس الوقت مابدو ينقص على أخواتو شي
_ مرقو الشهرين البقيانين للامتحان بفارغ الصبر ماتغير شي بينو وبينا غير عيونن الي عم تحكي قصص وحكايا حتى مرة فتح موبايل رانيا شاف حالتا عالواتس اب كاتبة ( وتعطلت لغة الكلام وخاطبت عيناي في لغة الهوى عيناهُ )
أخد الرقم وصار يفتح كل ليلة ويراقب ظهورا ماكان بدو يحكي معها حرف قبل ماتصير على اسمو مابدو يغيّر هالعيون البريئة حتى لو كان هو ..
_ وبعد ماطلعت النتائج طلعت رانيا راكدة من الغرفة : لك رائد رائد نجحححت انا نجحت ركد رائد حملا وصار يفتل فيها : مبروووك مبرووك ياعيوني الحمد لله الله ماضيعلك تعب .
همست بادنو : وهيي كمان نجحت
نزلا ابتسم وقرصا من خدا بحنية : مالك نسيانة شي ياقوية
رانيا : كيف بدي انسى وانا ناطرة النتائج وحماسي لهالشغلة اكتر من حماسي لنجاحي
رائد رجع ضما لصدرو وضحك : يسلملي الحنون
بسمة : مابدكن تفهموني !
رائد : عأساس مو حاكيتلك شي الست رانيا
رانيا : مو عيب أخي انا رنونتك معقول احكي سرك لحدا ! تربايتك أبو الجود
حضن خدودا بايديه ورجع ضما لصدرو
رانيا : هلأ صار فينا نفرح فيه لأبو الجود .
بسمة : اي وشو دخل نتائج الباكالوريا
رانيا : لأنو رح يخطب غرام
بسمة : غرام غرام ماغيرا ؟ والله لنكيف
وصار ينطو عليه ويبوسو وركدت بسمة شعلت المسجلة وصارو يرقصو
رائد : لك يامجانين طولو بالكن لسه مامنعرف اذا ابوها رح يوافق ولا لاء
بسمة : وليش لحتى مايوافق يصحلو
رائد : عيب يابنت بنتو عندو وهو حر بوافق ولا لاء
رانيا : يعني هلأ شو احكي معها واخدلك موعد
رائد : لا طبعا انا بجيب رقم ابوها بطريقتي مو حلوة ناخد منها موعد
#العينين_والقلب
#أحلام_مؤجلة
#الجزء_الثاني
_ جمع قوتو وصلى ركعتين استخارة وراح لعند أبوها طلبا منو بشكل غير رسمي
رائد : يمكن ماعندي شي يخليك تقبل بس أنا طالب القرب على سنة الله ورسوله ووضعي انتو بتعرفوه ماعندي جاهة وماعندي حدا يجي معي مافي غير عمتي وجوزا اذا كنت موافق بيجو بيطلبوها رسمي ..
أبو قصي : ياابني أنا بدي لبنتي رجال وأنت رجال من ضهر رجال أبوك الله يرحمو سمعتو كانت متل المسك وهلأ انت الله يحميك معروف بالمنطقة بأخلاقك العالية واجتهادك والتزامك
رائد : الله يديمك ياعمي .
ابو قصي : ومنشان عمتك مافي داعي تعذبها هيي وجوزا نحنا أهل بإذن الله ومابدا هالشكليات انت هلأ صرت سعرك بسعر ابني قصي
قصي : أهلين بالصهر والله
رائد ابتسم : أهلين قصي
ابو قصي : وبعدين بكفي انك قريب علينا وبنتي رح تضل ادام عيني
رائد : اي عمي شو بتطلب منشان الخطبة انا جاهز
ابو قصي : مافي داعي للخطبة منروح سوا عالسوق ومنشتري المحابس وبتلبسوهن بشي مطعم وخلي مصاريك بجيبتك ادامك حياة جديدة ومصاريف كتير .
رائد : مو عرفان شو بدي قلك على قد ماكنت خايف ومتلبك على قد مالي مرتاح هلأ
ابو قصي : ارتاح عمو ارتاح وطمن بالك
قصي حط ايدو على ركبة رائد : مبروك ابو الرود مبروك سلف
رائد ابتسم : الله يبارك فيك
اتطلع عالباب وحكى بقلبو ( ياريت يخلوني شوفا يعني معقول صير ببيتن ومافي بيني وبينا الا باب ومااقدر شوفا والله اشتقتلا من وقت ماخلص الامتحان ماعد اجت لعند رانيا )
ابو قصي : اي عمي رائد بكرة جيب اخواتك وتفضلو اسهرو عنا صرنا عيلة وحدة ان شالله ومافي بيناتنا قيود
ابتسم رائد وقت عرف انو بكرة رح يشوفا : ان شالله عمي منتشرف ..يعني نقرأ الفاتحة ؟
أبو قصي : اكيد يلا بسم الله 🤲
_ بتاني غرفة كانت غرام حاضنة دبدوبا وغرقانة ببحر الأحلام مع رائد وحياتن سوا
..
📞📞📞
جمانة : مبروك حبيب قلبي مبروك
رائد : الله يبارك فيكي عمتي
جمانة : بتعرف أنا مافيني اترك جوزي وولادي بس بكرة عالعرس بجي ان شالله
رائد : ولا يهمك إيمتا ماحبيتي اهلا وسهلا
جمانة : فرحان مو هيك ؟
رائد : هههه فرحان ليش الكذب بس في شي واحد معكر فرحتي ياريت أمي وأبي معي
جمانة : الله يرحمن الي خلف مامات أكيد فرحانينلك بقبرن
رائد : الله يرحمن 💔
..
تاني يوم المسا ..
بسمة : حلوين هيك تيابي ؟
رائد : حلوين متل القمر
رانيا : وأنا وأنا ؟
رائد : لك انتي قمرين
بسمة : هلأ هيك 🤨 أنا قمر واحد ورانيا قمرين يعني بتحبا أكتر مني
رائد : شو حبا أكتر منك يا مهبولة كل وحدة فيكن بغلاوة عين من عيوني حدا بحب عين أكتر من عين ؟
رانيا : تقبر قلبي ان شالله والله مو عاطية فرحتي لحدا أخيراً رح نخطبلك ونشوفك عريس
مسك جاكيتو وصار يفتل كان لابس بنطلون جينز غامق وقميص خمري وجاكيت سبور أسود : اي ماقلتولي وأنا شلون طالع
بسمة : أمييير
..
رانيا : مساالخير خالة أم قصي
ام قصي : أهلين حبيبتي رانيا مبروك النجاح لا تواخزيني مااجيت باركتلك بس نحنا كمان التهينا بنجاح غرام
رانيا : ولا يهمك خالة مو بيناتنا ليكني أنا اجيت لعندك
أم قصي : مية أهلا وسهلا 😘😘
بسمة : مرحبا خالة
أم قصي : أهلين حبيبة قلبي يسلمولي الصبايا الحلوين
بسمة : مساالخير ( ونزلت راسا )
قصي وأبو قصي : مساالنور أهلا وسهلا
أخيراً فات رائد : يالله يالله احم احم السلام عليكم
أم قصي : وعليكم السلام ابني تفضل تفضل
قصي : أهلين بالصهر
_ قعدو كلن يدردشو ويتبادلو الحديث لحتى فاتت غرام معها القهوة
قربت لحتى تضيف أمها بالأول
أم قصي : روحي أمي ضيفي عريسك يوه عم تضيفيني الي هههه لا تواخزوها ملبكة شوي .
رانيا : اي الحق معا .
بسمة : اي شو هالجمال بكون اخي قلبو عم يخفق خفق هلأ
رائد بقلبو : يخربيتك يا بسمة شو كتيرة حكي
أخد القهوة بدون مايتطلع فيها شرب شفة وحطا عالطاولة وضل مركز بالأرض
قعدت غرام بين رانيا وبسمة وصارو يحكو شوي عن الجامعة والعلامات المطلوبة وطبعاً غرام ماحكت الا كم كلمة كان قلبا عم يدق بسرعة وخجلانة تطلع برائد .
أبو قصي : اي عمي اتطلع بعروستك هي الرؤية الشرعية لازم تشوف وشا شبك خجلان
_رفع راسو شافا قاعدة بين اخواتو لابسة فستان طويل وعليه حجاب مناسب لاففتو بطريقة مرتبة ابتسم لا شعوريا وقال : ماشاء الله
غرام خجلت وطلعت لبرا
أم قصي : وأنت اسم الله عليك متل الأمير
..
تاني يوم بالمطعم لبسو المحابس وقرب رائد همس بإدن غرام : مبروك ياعروس
غرام بخجل : الله يبارك فيك حبيبي
رائد عم يطلع بعيونا : شو قلتي
غرام بدلع : لاتكون طماع قلتا وخلصت وماعد عيدا
رائد : يعني كنتييي..
غرام : بصراحة إي بس أنت كتير تقيل وشايف حالك
رائد : ههههههه لو تعرفي شو في ورا هالتقل
قطع قصي حديثن : مبروك غرومة مبروك ابو الرود
رائد : الله يبارك فيك ياقصي عقبالك يلا شد الهمة ماحدا أحسن من حدا
ابتسم قصي وعيونو صارو يغزلو غزل : إي قول هالحكي لعمك
أبو قصي بحزم : قصي حكينا بالموضوع وقلنا بس تخلص جامعتك شوف صهرك وتعلم منو كيف بدك تفتح بيت وتنسئل عن عيلة وولاد إذا ماكنت قد حالك وبتطالع المصاري من كد يمينك
رائد : هههه إذا هيك الحق معو عمي
ام قصي : يلا كلن سنتين وبيمرقو ان شالله أصلا أنا مو مصدقة إيمت افرح فيه هو كمان بس ان شالله السمكة ماتهرب من ايدنا
قصي : احم احم
رائد : بسم الله عليك خود مي
ابو قصي اتدارك الموقف : شو تاكلو ياجماعة ؟ .
الظاهر إنو في سنارة تانية عم تعلق غير رائد وغرام بس مين هالسمكة ياترى ؟
رانيا سجلت معهد هندسي وغرام كان بدها كلية اقتصاد بس رائد اقترح عليها تدرس معهد ادارة أعمال منشان تتخرج بعد سنتين ويتجوزو وهيي قبلت ومرقو السنتين حسّن فيهن بالبيت قد مابيقدر وجاب غرفة نوم جديدة وحجز بصالة متوسطة وتجهزو من فستان وبدلة وطبعا فساتين لرانيا وبسمة
وقبل العرس بكم يوم كانو قاعدين عالغدا ..
رائد : ياسلام عالفاصولية يارنون بكرة بتعلميها لغرام تطبخ متلك ها أنا متعود على طبخك
_ضلو ساكتين
رائد : شبكن !
بسمة : رانيا بدا تقلك شي
رانيا بتوتر : لا مو أنا اخي لا تصدقا
بسمة : مبلا مو كنا عم نحكي قبل ما يجي
رائد : وحدة منكن رح تحكي بقا ولا شوو 😡
بسمة : أنا رح احكي
نحنا خايفين أنو بعد ماتتجوز ويصير عندك عيلة تلتهي عنا وتنسانا ونصير آخر همك لا تنسانا أخي والله نحنا ماالنا غيرك ( ودمعو عيونا )
رائد : تضربي انتي وياها على هالتفكير إي ؟😡
رانيا انتي العاقلة عم تحكي هيك ؟
رانيا سكتت
لك يا مهبولة انتي عيني وبسمة عيني التانية معقول انساكن أنتو ريحة امي وأبي لا ياستي انتو بناتي
لاتفكرو أنو حدا بالعالم قد ماكان غالي يكون أغلى منكن
مو بس أنتو ماالكن غيري أنا كمان ماالي غيركن انتو سندي بهالحياة أنا بلاكن مابسوى شي مابشوف بعيوني
_ بكيو تنيناتن وضمن لصدرو ونزلت منو دمعة مسحا بسرعة بعمرو ماضعف قدامن
_ المسا راح لعند غرام أبوها سلم عليه وقعد معن هو و قصي وبعدين تركوهن لحالن بالصالة وطلعو
رائد : اشتقتيلي ؟ 😉
غرام : ☺️☺️
رائد : غرام بدي احكي معك بشغلة
غرام : شو قلي
رائد : منشان أخواتي انتي بتعرفي الوضع مارح يتغير شي رح يضلو آخدين جزء كبير من حياتي واهتمامي بدي ياكي تتعودي عالوضع مابدي مشاكل ابدا
_غرام انقهرت ودمعو عيونا : هلأ هاد الي طلع معك ! لك رائد قيمك انو رانيا وبسمة رفقاتي هدول اخواتك يعني اخواتي بحطن بعيوني
رائد ابتسم : هاد العشم فيكي
اتطلعت فيه بعيونا الرماديات وزمت تما مسك ايدا ورفعا لتمو باسا بوسة خفيفة ابتسمت انو رضيت
تنحنح قصي سحبت ايدا بسرعة وفات قعد معهن والله لذيذ هالصبي مابخلي عالقلب هم .
وبيوم العرس مرقت الأمور روتينيا ماكان مصدق ايمت يخلص هالنهار بدو ياها بقا خصوصا انو طول فترة الخطبة ماقبل على حالو يلمسا بس ماعد فيه صبر
رجعو عالبيت فوتا عالغرفة باسا ع جبينا واستأذن منها ليشوف أخواتو قبل ماينامو كان متعود كل يوم قبل النوم يقعدو ويسردو شوي وبعدين يأمّن عليهن وينام هزتلو براسا مع ابتسامة
راح لعندن لقاهن عم يبكو .
رائد : عم تبكو ؟ لك شو حكينا
رانيا عم تمسح عيونا : لا تقبرني هي دموع الفرح
بسمة : أخيراً شفناك عريس
رائد : هههه اي أخيراً
اسمعي انتي وياها لاتنسو الحكي الي قلتلكن ياه ومابدي ياكن تحطو بقلبكن شي أي تصرف مني مابيعجيكن بكون مو منتبه عليه بتقلولي لامصع رقبتي
_ ضحكو مع دموع
تابع كلامو: يلا انتي وياها هلا بتسكرو الباب مابتطلعو للصبح شو فهمتو
نزلو راسن
رانيا انتي شوفيها لهالمشاغبة لا تخليها تطلع
رانيا : حاضر أخي
_ ماكان بدو ياهن يسمعو شي يخدش حياءن هدول اخواتو الي رباهن شبر شبر بس ماكان في مكان تاني يروحو عليه
_رفيقو ربيع عرض عليه يحجزلو بفندق أول كم ليلة حلوان العرس بس ماقدر يتركن بعمرن مانامو لحالن بالبيت .
وعمتن اجت عالحفلة وراحت براني على حمص ماحبت تتقل عليهن
_ رجع لعند غرام كانت ليلة مليانة حب ودفا نسي فيها كل التعب الي تعبو بحياتو لأول مرة بحس انو إنسان وعندو مشاعر وأحاسيس فياضة مو آلة شغل .
كان مالك الدنيي البنت الي حبا وسماها قلبو صارت ملكو ورفيقة دربو .. بسمة نجحت بالباكالوريا دخلت عالجامعة وغرام ورانيا تخرجو رانيا بلشت شغل بمكتب هندسي بس غرام ماحبت تشتغل ورائد قلا احسن بتضلي قدام عيني 😉 .
وبيوم كان قاعد بالمكتبة اجا لعندو ربيع (بالمناسبة ربيع كمل دراستو ودرس هندسة وصار معيد بالجامعة )
ربيع : كيفو أبو الرود
رائد : لك اهلين ربيعو والله مشتقلك كيفك أنت
ربيع : منيح الحمد لله كيف إيامك
رائد : والله متل مو شايف بهالمكتبة مافي شي مميز
ربيع : وشلون لقيت الزواج 😉
رائد : ههه غير شكل والله عقبالك
ربيع : يلا قريباً ان شالله
رائد : عنجد خطبت ؟
ربيع : ليكني هلأ انا عند أخوها وبدي اطلبا منو
سكت وتكهرب وجهو كلو : مين من أخواتي !
ربيع : رانيا .. كانت طالبة عندي .. أنا بعرفا من زمان بس هلأ شفت اخلاقا وتربايتا أكتر وبصراحة عجبتني وقررت كمل معها حياتي بعد موافقتك طبعاً
_ حس البخار رح يطلع من أدانو وقت سمع كلمة عجبتني قال بقلبو : يعني هلأ هو بحبا متل ماحبيت غرام وقلبو بدق وقت يشوفا 😤
مسكو من قبة قميصو : مابتعرف انو أخواتي خط أحمر ولااا
بعدلو ايدو : بعد هيك شو أحمر وأخضر جاية اطلبها منك على سنة الله ورسولو
رائد: حكيت معها ؟
ربيع : لا وحياة رفقتنا غير أمور الدراسة والمواد ماحكينا ومع كل الطلاب مو لحالنا
رائد : ماشي ماشي اتركا عالتيسير .
ربيع : عم تنيمني يعني ! قلي اي ولا لاء
رائد : بدي اسأل عنك
ربيع : ايه سآل قد مابدك بس يكون بعلمك ماحدا رح يصونا قدي .. بخاطرك
رائد : لك تعا وين رايح عم امزح معك معقول اسأل عنك وما حدا بيعرفك قدي خلص بحكي معها وبتفق معك عالتفاصيل
_ راح عالبيت وحكى لرانيا وبسمة وغرام
رانيا : الي بتشوفو أخي
رائد : انا شو دخلني شو انا رح اتجوزو قولي هو بيعجبك ولا لاء
بسمة : خلص اي بيعجبا
رائد : وانتي شو عرفك 😤 مو عأساس مامعك خبر بشي ست رانيا
رانيا بثقة : والله مامعي خبر بس أنا طول عمري بقول يارب وقت يجي نصيبي يكون متل اخي رائد وأول مرة بفوت لعنا الاستاذ ربيع سلم عليي قلي مو انتي أختو لرائد قلتلو مبلا وصار يجي يعطينا المحاضرة ويطلع بدون مايدور بيني وبينو أي حديث خارج المحاضرة بس أنا على مدار السنتين كنت عم راقبو وشوف تصرفاتو لك نسخة طبق الأصل عنك نفس تصرفاتك ونفس تفكيرك حتى نفس مزحك
عرفت هلأ ليش انعجبت فيه ؟
بس ماكنت بعرف أنو كمان ببادلني هالإعجاب ودائما كنت غار من بنات المعهد وخاف لشي وحدة منن تلفت نظرو
تتذكر لما كنت تحب غرام وماتبين على حالك لك حتى بهي رفيقك طلع متلك
ابتسمت غرام بخجل : اي يلا خلونا نقول مبروك
رائد : ههههه الله يصبرني عليكن خلص رح ردلو خبر إنك موافقة
_ حددو يوم اجو أهلو طلبوها من رائد وبعدا تمت الخطبة
كان كتير فرحان فيهن ربيع رفيق عمرو بيعرفو اكتر من حالو وهو الوحيد الي رح يصونا بعدو
_ حددو العرس بعد سنة ليكون ربيع خلص تجهيز شقتو .
مرقو ست شهور علاقتو بغرام متل السمنة عالعسل كل يوم عن يوم عم يحبا أكتر وهيي كمان كان هما الوحيد ترضيه وتدللو .
ماكان زاعجو الا انو ربيع ورانيا عم يشتغلو بنفس المكتب كان يحس راسو رح ينفجر وقت يتخيل انو ممكن يمسك ايدا كان بيعرف انو خوفو وغيرتو على اخواتو مبالغ فيه بس مو بايدو .
وغير هيك فيكن تقولو حياتو كانت وردية لحتى اجا هداك اليوم المشؤوم
#العينين_والقلب
#أحلام_مؤجلة
#الجزء_الثالث_والاخير
ودع غرام بالبيت استأذنتو تروح لعند أهلا وهو راح عالمكتبة متل العادة بلش بدو يشتغل لقى الطابعة مافيها حبر
رائد : أوف وقتو يخلص هلأ
لبس جاكيتو وراح على محل ببيعو لوازم للمكاتب حب يرجع مشي بما انو مامعو بضاعة وصار يتمشى بين الحارات مرق من حارة فرعية وجمد هديك الجمدة ..
رائد : قصي ! معو بنت مين هي ياترى ؟
قرب أكتر .. لك هي أختي بسمة
_كان قصي عم يحكي معها وهي عم تضحك بعدين قرب وباسا من تما .
ماعد شاف بعيونو طالع تلفونو واتصل فيها شافا بعدت عن قصي توترت بس بالآخر مابتسترجي ماترد
📞📞
بسمة : أااالو
رائد : وينك بسمة
بسمة : بالجامعة
رائد : ماشي مارح اعمل فضايح بالطريق بس بعد نص ساعة بدي لاقيكي بالبيت
...
سكر واتصل بغرام
📞📞
غرام : أهلين حبيبي
رائد : غرام وينو قصي
غرام : قصي ؟ نايم بغرفتو شو بدك فيه ؟
رائد : ماشي سكري لقلك
راح متل الطيارة على بيت اهلا لغرام فتحتلو هيي الباب
اتطلعت فيه بخوف ماعرفت شو بدا تقول
رائد : وينو قصي روحي فيقيه
غرام ارتبكت : فاق وراح
رائد بغضب : لوين راح
غرام بخوف : فهمني شو بدك منو
رائد : روحي حطي حجابك وامشي معي عالبيت
غرام : ...
رائد خبط عالباب : يلاااا
_ راحو عالبيت مشي كانت خطواتو سريعة كتير وهيي عم تركد وراه
أول مافتح الباب شاف بسمة عم تبكي ورانيا عم تبهدلا فات وضربا هداك الكف وقعت عالارض وصارت تبكي بقوة
رفع ايدو بدو يضربا التاني ركدت غرام ووقفت ادامو
غرام : لا تمد إيدك عليها اضربني أنا كنت المرسال بيناتن
رائد : بعدي انتي لا تفكري نسيانك اسبقيني عالاوضة حسابك بعدين
_فجأة برن الجرس كان قصي عالباب .. رانيا وبسمة فاتو على غرفتن وغرام فتحتلو الباب
رائد : بكل عين قوية جاية لهون ولاا
قصي : وهاد مابيثبتلك انو قصدي شريف ومالي هربان
رائد : لك انت آخر واحد بيحكي عن الشرف شو بدك هلأ ؟
قصي : جاية هدّيك منشان ماتعمل مشكلة مع غرام وبسمة
رائد : قلك شغلة خود اختك وروح من وشي وتركني اتفاهم مع أختي الظاهر هني التنتين بدن ترباية من أول وجديد
غرام انصدمت من كلمتو : امشي أخي امشي
قصي بغضب : مارح امشي و مارح اسمحلك تضرب بسمة
مسك غرام من إيدا ودفشا لعندو (صرخت من وجع ايدا )
رائد : قصي العفاريت عم تنط قدام وشي عم قلك خدا وانقلع
_ هي أول مرة بيمد ايدو عليها أساساً اول مرة بيتخانقو بعمرا ماحاجتو يرفع صوتو أو يعصب ..
_ راحت هيي وقصي عم تبكي وهو قعد بالصالة طالع باكيتو الي صرلو عندو شهر مو مدخن منو خمس سكاير ودخنو كلو بظرف ربع ساعة
رانيا : ببوس ايدك لا تعمل بحالك هيك
رائد : روحي من وشي انتي كمان
قام فك حزامو وفات لعندا .. سكر الباب ووقف مقابيلا نزلو دموعو على عرض خدودو ..
رائد : شو اعمل فيكي قليلي ؟ كسرتي ضهري وحطيتي كرامتي بالأرض كسرتيني كسرة عمري .. راااح تعبي رااحو سنين عمري الي رهنتن لربيكن .. انا فشلت وطلعت مو قد الحمل ..
مو قد وصية امك وابوكي ..
لو ضربتك للصبح بهالحزام ما رح يعادل الوجع الي عم حس فيه ولا رح اشفي غليلي منك ...
أنهار دموعا سرت على وجها بدون مصب ... طبت راسا على ركبا الي ضاممتن لصدرا وشهقت بالبكا .. ما كانت قادرة ترفع راسا ولا تحط عينا بعينو ..
فتح الباب و واتجه لغرفتو أما رانيا كانت واقفة عالباب بخوف وناطرة شو رح يعمل ..
دخل لغرفتو تمدد على تختو .. التف على حالو متل الجنين ببطن امو بس الفرق انو بدون حبل خلاص يمدو بالاكسجين .. مخنوق .. بردان .. تعبان محتاج لغرام تضمو محتاج يحط راسو بحضنا .. بكي لأول مرة بعد موت أمو نزلو دموعو شلال على مخدتو وصار يحكي بقلبو : هي اختي بسمة ؟ هي الطفلة الي كانت تركد لعندي لما جبلا بسكوتة وكانت تنام بحضني خانت ثقتي فيها معقول بعد ماراح عمري عم اتعب واشقى لربيها تجبلي حكي من الناس ويقولو ماعرف يربي اخواتو لك عم يتباوسو بالسيارة وقدام الناس لك مااحترمت الحجاب الي حاطتو على راسا
ولا غرام هي البنت الي سميتا قلبي واخترتا بين بنات الدنيي كلا كانت بتعرف وكذبت عليي ..
_ هالليلة كانت من أصعب ليالي العمر ماقدر ينام ولا ساعة خصوصا انو كان عم يسمع صوت أنين بسمة طول الليل ....
مرقو أول أسبوع ورائد محارب بسمة حراب تام مابيقعد معا ولا بيحكي معا ولا حتى بيتطلع فيها نظرة وهالشي كان عم يوجعا كتير .. رائد اختار سلاح قاسي جداً على قلوب اخواتو الي هو التجاهل
رانيا كانت ضايعة بين التنين مو عارفة حالا تهدي بسمة ولا تحنن رائد عليها ..
ربيع كان يجي لعندن متل العادة يومين بالأسبوع بس ماخبروه بشي وقالولو غرام عند أمها لأنو أبوها مسافر ..
غرام كانت بحالة يرثى لها بين شوق لرائد وعتب عليه وخوف من ردة فعل أبوها بس يرجع من سفرتو ويدرى بيلي صار
وقصي نفس الشي ضايع بين شوق وندم وخوف شوق لبسمة وندم على يلي عملو معها بلحظة ضعف وخوف من المستقبل حبو كان حقيقي وماعندو استعداد يخسرها .
..
أم قصي : وهاد يلي صار يارجال
أبو قصي : العما بعيونن هالجوز على هالموقف الي حطوني فيه مع رائد هلأ شو بدي اعمل ..
أم قصي : أنا برأيي تروح وتطلبلو بسمة لقصي
أبو قصي : ماشي ماشي بكرة بروح
أم قصي : طيب وغرام ؟
أبو قصي : غرام ! ...
غرام خليها تتربى .. بتعرفي لو صارت معي مابتركا على ذمتي يوم واحد برمي اليمين ومابترفلي عين .
أم قصي : الله يسامحك
أبو قصي : هههه انت مافي منك ياشريكة عمري (وباسا ع جبينا ) بس بنتك مدري لمين طالعة هههه
..
أبو قصي : هيك انا ربيتكن ؟؟
غرام : والله يابابا ما...
ابو قصي : اخرسي انتي لا تسمعيني صوتك
غرام : 😔😔
ابو قصي : وانت ولاا عم تطاول على أعراض العالم ومين مو حيالله عالم عرض صهرك الي حاوي عرضنا وصاينو ياحيف ياقصي فكرت حالي مربي رجال طلع عندي مراهق
قصي : بعرف اني غلطت بس أنا بحبا كل يوم بحاول اتصل برائد واعتذر منو بس ماعم يرد عليي وحاظرني خايف روح لعندو تكبر أكتر من هيك منشان الله بابا اتدخل ساعدني شو اعمل مابدي اخسرا ..
..
تاني يوم بمكتبة رائد ..
أبو قصي : يعطيك العافية أبو جواد
رائد : اهلين عمي أهلا وسهلا الحمد لله ع سلامتك
تفضل تفضل عود
ابو قصي : الله يسلمك يارائد كيفك طمني عنك
رائد تنهد : داعيلك عمي
ابو قصي : والله مالي عرفان كيف بدي اعتذر منك
رائد : العفو عمي انت مادخلك بلي صار
ابو قصي : أنا جاية والي عندك طلب نحنا من زمان شاريينا لاختك بس متل ماسمعت انا كنت رافض خطبة قصي لحتى يخلص جامعتو بس للاسف بلشو يطلعو عن طورنا بقا خلينا نتناسى الي صار ونخطّبن لبعض على عيون العالم أحسن مايصير شي مو محسوب حسابو .
رائد : بعتذر منك عمي جيتك على عيني وراسي بس أنا لسه مارقت وهالحكي بكير عليه خليهن يتربو .
أبو قصي : طيب منأجلو بس مامننساه
رائد : بأمرك انا
ابو قصي : الله يرضى عليك وهالحكي رح يضل بيني وبينك
يلا بخاطرك
_راح ابو قصي وولا واحد فيهن حكى شي بخصوص غرام
رائد بقلبو : والله مالي عرفان عم عاقبا ولا عاقب حالي . 💔
_ ومضو أسبوعين تانيات على نفس الوتيرة ..
رائد متسطح بغرفتو وعم يحكي بقلبو : وهي صارو ٣ أسابيع اشتقتلا اشتقت لصوتا اشتقت لقهوتا اشتقت ترجع تنام ع زندي اشتقت لمشاغباتا بالبيت مع اخواتي اشتقت لضحكتن هني التلاتة الي كانت مملية حياتي لك هدول عيوني وقلبي الله يسامحك يابسمة شو عملتي بحالك وفينا ..
_غرام بغرفتا فاتحة صفحة الواتس تبع رائد وعم تكتب : ماكنت بعرف انك قاسي هيك أنا غلطت بس والله نيتي صافية تنيناتن اخواتي وبهموني وبدي ياهن يكونو مبسوطين وماتوقعت قصي يعمل هيك ..
اشتقتلك رائد اشتقتلك كتير اشتقت لكل لحظة معك وكل كلمة وكل لمسة اشتقت لبيتنا ولرانيا وبسمة
_مسحت دموعا ومسحت الرسالة وقالت : لقوم شوف أمي وساعدا بالطبخ أحسن مااتسرع وابعت شي اندم عليه ..
منرجع لعند رائد الي كان سارح بخيالو عم يتذكر لحظاتو مع غرام ورانيا وبسمة
⬅️ فلاش باك
_ ذكرى رقم ١ ..
رانيا : هههههههه شو هالكيك الي عاملتيه
غرام : اي هلأ دوقي طعمتو لا يغرك شكلو
بسمة : لك هاد كيك ولا دولاب بسكليت منفس
رانيا وبسمة وغرام : ههههههههههههههههه
اجا رائد : لك شبكن انتو التلاتة اذا فرطتو ما عد تعرفو تنلمو
رانيا : تعا شوف مرتك على هالكيك الي عاملتو
رائد : هاتو شوكة لشوف وأنا بحكم
بسمة : هي شوكة تفضل 🍴
رائد أكل لقمة :😑
رانيا : هههههههه لك شوفو وشو
بسمة : ههههههههههه
غرام : الله يسامحكن 😔
رائد : أصلا هاد اطيب كيك باكلو بحياتي
غرام : عنجد رائد 😍
رائد : عنجد ياقلب رائد
رانيا : اي احم نحن هنا
بسمة : خلي الرومانسية تنفعك بس تنام بالمشفى اليوم .
رائد : حاج مسخرة انتي وياها شو رأيكن نطلع مشوار ناكل كيك برا
بسمة : انا بدي بوظة
رانيا : وانا بدي درة
رائد 👏: يلا اركدو قبل ماغير رأيي
رانيا وبسمة : يلا يلا
رائد : انت تعي لهووون
غرام : هلأ بشوفونا ☺️
رائد عطاها خدو : بس بوسة واركدي البسي يلا
غرام : 😘
تقبرني شو بحبك 😍😍
_ذكرى رقم ٢ ..
بصباحية رائد وغرام كانت نايمة على صدرو صحيو على صوت بسمة عم تدق الباب .
بسمة : ✊ رائد لسه مافقت ؟
غرام نقزت وغطت حالا
همسلا رائد : لا تخافي مقفول الباب
شو بدك بسمة ؟
بسمة : مابدك تشرب قهوة معنا ؟
رائد : روحي هلأ على مدرستك والضهر منقعد سوا ومنشرب قهوة وشو مابدك
بسمة بدلع : مابدي مو متعودة روح بلا ماشوفك
رائد : بسمة حبيبتي بس هالمرة أنا مو جاية عبالي قهوة يلا روحي
بسمة : بطلت روح يلا
رائد : رانيااااا 😤
غرام حطت ايديها على ادانا
رانيا اجت راكدة : اي اي أخي كنت عم صلي الضحى خلص رح روح أنا وياها على دوامنا والضهر منشوفكن ان شالله
( ووطت صوتا )امشي قدامي يخربيتك شو بلا فهم
رائد : آسف ياقلبي 😘😘
_ذكرى ٣ ..
فتح رائد الباب بالمفتاح وفات ..
بسمة : غرام غشاشة غشاشة بطلت العب يلا
رائد : لك ليش هيك صوتكن طالع
رانيا : مجانين طوشو راسي بالبرسيس
بسمة : هي مرتك عم تغش
غرام : لا ماعم غش هيي مابتعرف تلعب
رائد : يلا عالنوم بقا الساعة وحدة ونص صارت .
بسمة : وانت وينك لهلأ ؟؟؟
رائد : مع ربيع سهرنا بالقهوة ماعم يصحلي شوفو بالنهار
غرام : كأنو انا مرتو ولازم اسألو هالسؤال
بسمة : اي وانا كمان مرتو قصدي اختو
رانيا : 😂 بتقيمي وبتزتي مابتعرفي حالك شو عم تحكي
رائد وغرام : 😂😂
رائد : يلا يلا قدامي عالنوم انتي وياها عندكن دوام بكرة 👏
فاتو رانيا وبسمة على غرفتن وهني عم يضحكو
_ ذكرى ٤..
اجا رائد من المكتبة باستراحة الغدا تغدا وفات عالغرفة ومعو غرام
قعدو على طرف التخت وقرب منها وباسا بوسة عميقة كلا حب وشغف 💏
بسمة : غرام غرام
فتحت الباب بقوة
انتفضو هني التنين
وغرام انحرجت كتير
بسمة : ييي 🤭 كنت عم تبوسااا !
رائد : بسمةةة لا تتجاوزي حدوك ☝️
بسمة صارت تبكي : شفت كيف تغيرت علينا
رائد قام لعندا وحضنا وحكى بحنية : لك ياعيوني أنا كلي الكن بس مو تقتحمي خصوصيتنا بهالشكل
بسمة : اي مابعرف انك كنت عم تبوسا
رائد : تاني مرة بتدقي الباب هي غرفة تنين متجوزين مابصير هيك تهجمي وتفوتي
بسمة : طيب آسفة .. آسفة غرام
غرام : ولا يهمك بسمة شو كان بدك
بسمة : كان بدي فستانك النيلي
رائد كتف ايديه : ليش ماعندك فساتين
بسمة : مبلا عندي بس بحب فساتين غرام
غرام : تكرمي بسمة هي الخزانة كلا على حسابك
_ اخدت بسمة الفستان وركدت فيه على غرفتا اما رائد سكر الباب وسند ضهر غرام عليه وقرب قبل مايوصل على تما كانت بسمة لابسة الفستان بغرفتا ورجعت راكدة
✊ افتحي غرام افتحي شوفي شو لابقلي
نقزو هني التنين وفرطو ضحك فتحولا فاتت تتفتل وتنط وتقول بجنن بجنن شوفو شو حلو عليي وهني يضحكو ..
➡️ عودة
أخيرا رائد حسم أمرو وقرر يروح يجيبا
أم قصي : شلونك حبيبي هيك بهون عليك كل هالوقت مابتطل عليي
رائد حمل إيدا وباسا : آسف مرت عمي بتعرفي إنك بمقام أمي بس والله ماكنت رايق كتير
أم قصي : الحق معك شو بدي قلك
أبو قصي : أهلين رائد زارتنا الأنوار والله
رائد وقف وصافحو : أهلين عمي منورة فيك تسلم 🤝
.. بعد ازنك بدي آخد غرام
أبو قصي : غرام مرتك ابني بتاخدا ايمت مابدك بدون ازن حدا
أم قصي : بس أنا الي عندك رجاء
رائد : ...
ام قصي : منشان قصي والله حالو مابسر لا عدو ولا صديق سامحو الله يوفقك اعتبرو أخوك الصغير وغلط
رائد : انتي بتأمري مرت عمي حاضر .
أم قصي : يعني اعتبر كلامك موافقة على خطبتن ؟
رائد اتطلع بعمو
ابو قصي : منك لمرت عمك أنا مادخلني هههه
رائد : بس أنا وعمي متفقين نأجل الموضوع هلأ
أم قصي : مالي خاطر عندك ؟
رائد : خلص مرت عمي أنت بتموني عالروح موافق بس امهلوني كم يوم لرتب الأمور بالبيت لأنو بصراحة أنا محارب اختي لهلأ ماحكيت معا
أبو قصي : خود وقتك كلو ولا يهمك ... ياغرااام البسي وجهزي غراضك لتروحي مع جوزك
رائد دق قلبو بس حاول مابيبن على حالو ورسم بين عيونو هديك العقدة الي بدا مية مكواية على قولة غرام 😁
غرام ضلت بغرفتا وماحركت ساكن بعد ربع ساعة فاتت أمها لعندا
أم قصي : لك شوو ليش مالبستي
غرام : مابدي روح معو
أم قصي : فوق عملتك وعملة أخوكي الك عين تحكي يلا أمي يلا الله يرضى عليكي جهزي حالك هلأ ببيتكن بتحكو وبتتصالحو وبتعتذرو من بعض
رائد بقلبو : ليش هيك طولت
اتطلع بعمو لقاه عم يبتسم
ابو قصي : قوم أنت تصرف
قام رائد راح على غرفتا ودق الباب
غرام : مابدي مابدي
رائد : مرت عمي انا رائد
طلعت أم قصي وغرام اتمسمرت محلا
فات وقف جنبا وحط ايديه بجياب بنطالو : شايفك طولتي
اتطلعت بعيونو بشوق وماحكت ولا حرف
رائد : معك خمس دقايق لتخلصي رح استناكي برا 😠
بعد شوي طلعت حاملة شنتة صغيرة حطتا عالارض ووقفت
غرام : بدك شي أبي
أبو قصي : اي بدي تعي عدي قدام جوزك
قعدت غرام وعيونا بالارض
ابو قصي : سمعي يابنت هاد بيت أبوكي ومفتوح الك بأي وقت بتدفشي الباب برجلك وبتفوتي بتعدي بالصدر وكلنا منطلع لبرا
غرام : الله يديمك يابي
أبو قصي : بس إذا رجعتي اجيتي حردانة بكسرلك رجلك وبرجعك محل مااجيتي
غرام رفعت راسا ونزلو دموعا ع خدودا
حتى رائد استغرب من كلامو
أبو قصي : أنا لو بعرف انو رائد ظالمك بقيم عيونو بس أنا وأنت منعرف كتير منيح أنو مالو ظالمك
غرام : خلص يابي والله آسفة ماعد زعلك وقامت باست ايدو
ابو قصي : الله يرضى عليكي وعلى جوزك
رائد : يلا بتوصونا شي وقام حمل الشنتة
_ راحو عالبيت وهو على نفس العقدة طول الطريق ماوجهلا حرف وحتى مااتطلع فيها نظرة
أول مافاتو جنت رانيا وركدت لعندا ضمتا كتير وغرام ضمتا وفرحو كتير ببعضن صارو يبكو ويضحكو
رائد : أنا فايت نام ساعة مابدي اسمع صوتكن
رانيا : تكرم أخي
_ نام رائد فترة من الزمن وفاق ووقت فتح عيونو شاف غرام عم ترتب غراضا بالخزانة
رائد : أنا ماقلت مابدي حدا يفيقني
غرام : حاولت ماطالع صوت
ووقفت كم ثانية عيونا بالأرض وهو عم يتأمل فيها
رائد تجلس سند ضهرو على ضهر التخت وفتح ايدو : تعي لحضني لشوف
غرام ركدت وحطت راسا على كتفو وهو ضما وباسا من جبينا
رائد : اشتقتلك
غرام : يعني سامحتني رائد
رائد بحزم : لا ماسامحتك بس مابيعني إني ماحبك ومااشتقلك .. أنا قررت ازعل منك وعاقبك وأنت قدام عيوني
غرام : حاضر 😔😌
بس والله ماكنت عرفانة هيك رح يصير
رائد : انتي استغفلتيني ياغرام أنا عتبي عليكي كبير لأنك بتعرفي طبعي وبتعرفي خطوطي الحمرا وتجاوزتيها الدنيي كلا بتعرف أنو أخواتي خط أحمر وانتي اشتغلتي مرسال غرام ياست غرام شو توقعتي مني استنا لشوفن سوا بغرفة نوم !!
غرام رجعت راسا على كتفو وبكيت بدون ماتحكي شي ورائد ضما زيادة وتنهد
رفعت راسا تذكرت شي : وجعتلي ايدي وقت دفشتني
رائد حمل ايدا وباسا : اي لأنك بتستاهلي ..
_ بعد ساعة .. كانت بسمة بغرفتا مع رانيا وغرام لما دخل عليهن رائد لابس روزة الدنيي كلا بملامحو و وحركاتو
رائد : رانيا وغرام افرقونا بريحة طيبة
رانيا وغرام : حاضر
رائد : عمي أبو قصي طلب ايدك لقصي وأنا وافقت مبسوطة هلأ ؟
بسمة : مابنبسط لترضى عني
رائد : ومافكرتي برضاتي لما تركتيني بشغلي عم اتعب واشقى لحتى حضرتك تدرسي بالجامعة ورحتي مع واحد غريب بسيارتو ؟
أنا شو بعرفني كم مرة طالعة معو وشو صاير بيناتكن وأنا نايم على وداني مفكر اختي عم تداوم بجامعتا ورح تتخرج تصير محامية وشوف حالي فيها
بسمة : 😭 والله والله ياأخي برحمة أمي وأبي أول مرة منطلع برات الجامعة والي صار لحظة ضعف ومن سوء حظنا أنك كنت مارق بالصدفة وشفتنا
رائد : خلص هلأ رح تتجوزيه وبتنسي انو عندك أخ .
بسمة : لااا أخي ببوس إيدك كرمال الله لا تعمل فيني هيك أنت سندي وأبي وأخي وكل قوتي أنا مارح اقبل بهالجوازة اذا ماكنت مسامحني
قرب رائد بسرعة أخدا بحضنو : مسامحك مسامحك ياعيون اخوكي
..
أبو قصي : اي أبو جواد انت بتعرف طلبنا بس أنا بدي تتم هالخطبة والنفوس صافية والقلوب رايقة
رائد : لا تخاف عمي مو أنا الي بحمل بقلبي شي بس عتبي كبير على قصي لأنو أنا صنت عرضو وقت ماكانت على اسمي إذا فكرت فيها بسري لوم حالي وخاف الله مايجعلا من نصيبي وهو هيك جازاني
ابو قصي : يلا الي صار صار ونحنا ولاد اليوم وهي هو جاية لنص بيتك يبوس راسك ويعتذر منك
قصي : أنا آسف رائد
رائد : بس عندي شرط مابدي نطول بالعرس لأنو بصراحة إذا طولت الخطبة بجوز مااتحكم بأعصابي
قصي : اي مية شرط متل هالشرط 😍
رائد : ههههه عجبك الحكي مو هيك ولا
ابو قصي : يلا قومو ياولاد بوسو شوارب بعض لشوف
قامو رائد وقصي تعانقو وباسو كتاف بعض وقعدو
أم قصي : الله يكملكن بعقلكن يلا ياغرام جيبيلنا هالعروس
فاتت غرام معها رانيا وبسمة سلمو وقعدو قصي ضل منزل راسو
رائد : اي رفاع راسك هلأ عم تعملي خجلان
قصي رفع راسو واتطلع ببسمة : انا آسف بسمة آسف على كل شي سببتلك ياه
..
_ بعد أسبوع صار عرس رانيا وربيع حضرو العرس ورجعو عالبيت بدون أي تغيير يذكر بعلاقة رائد وغرام
_ وبعدا بشهر كمان صار عرس بسمة وقصي
رجعو عالبيت قعد رائد بالصالة حل كرافتو وصار يدخن وهو صافن
اجت غرام من الغرفة لابسة قميص نوم وفوقو روب ساتان مربوط من خصرو حاوطت كتافو بايديها
غرام بهمس : مااشتقتلي حبيبي ؟
كانت أول مرة بتعرض حالا عليه بهالطريقة بس هو طول كتير بقسوتو معها
رائد بدون مايتطلع فيها : غرام مالي رايق
غرام : ليش مو رايق لازم تكون فرحان
رائد : فرحان ! فرحان وأنا خسرت أخواتي التنتين بشهر واحد .
غرام : بس انت ماخسرتن رائد هني تجوزو رجال بحبوهن واختارن قلبن
رائد : اي مع هيك حاسس البيت بارد ومافي روح
غرام باستياء : اي فهمنا بقا شو ماحدا بحب أخواتو غيرك هي أنت أخدتني من أهلي وحرمتن مني
رائد : أنا حرمت اهلك منك ؟!
غرام : اي ها كيف الي ماقبلتو على حالك قبلتو لغيرك
رائد : بكفي غرام انتي مابتعرفي اخواتي شو بالنسبة الي
غرام : هههه أنا الي بعرف ماحدا بيعرف غيري والدليل أنك سامحت أختك وماسامحتني
تركتو ووفقت
غرام : أنا رح البس بجامتي ونام
رائد : غرام
غرام : خلص رائد كلنا تعبانين ولازم ننام
..
تاني يوم الساعة ١٠ الصبح بالمطبخ ...
رائد : صباح الخير
غرام : صباح النور شو شايفة شمستك عالية مابدك تروح عالمكتبة
رائد : لا مابدي روح
غرام التفتت : فيك شي حبيبي عم يجعك شي ؟
رائد : إي عم يجعني .
قرب حملا واتجه فيها لغرفة النوم ليرجعو لقصة حبن مجدا وازدهارا ..
..
#مشهد_النهاية:
بعد ٤ سنين
جنى بنت بسمة : خالو خالو شو جبتلي معك
رائد : لك اهليين حبيبة قلب خالو جبتلك هي البسكوتة منيحة ؟
جنى : هئ 🙁 مو طيبة
رائد : اه ياقوية انتي طالعة لأمك
ليا بنت رانيا : خلص جنى مابصير تتغالظي على خالو هيك
رائد : يؤبشني العاقل الي طالع لأمو تعي لاحملك انتي كمان 😘😘
جواد ابن رائد : كأنو هدا بابا انزلو انتو التنتين
رائد : ههههههههه دخيل أمك أنت على هالتخلفة
غرام مدت راسا من المطبخ : شبني أنا ؟ 🤨
رائد : لك أنت القلب 💗
غرام : هههه حبيبي أنت فوت يلا أخواتك جوا
رانيا : يعطيك العافية أخي
رائد : لك الله يعافي قلبك ياحنونة طمنيني ان شالله مو تعبانة من الحمل
رانيا : والله مابيخلى الأمر بتعرف بيتي وبنتي وشغلي كلو تعب بتبعب
رائد : الله يقويكي ياعمري
بسمة : يعني هيي حنونة وأنا لاء 🤨
رائد : هههه انتي مابتتغيري
بسمة : بتغير لكن شو كنت محامية ورح صير قاضية قد الدنيي
غرام : إي تفضلي سيادة القاضية الغدا جاهز يلا رانيا
_ قعدو عالسفرة وقعد رائد يراقبن كيف عم يمزحو ويضحكو مع بعض ويحكي بقلبو : والله ضحكتكن بتردلي روحي انتو التلاتة لك انتو عيوني وقلبي ....
...
وبعد ٢٠ سنة .. (افتراضاً)
غرام : رائد رائد يلا قوم حبيبي بلا مانتأخر على حفلة تخرج جواد من كلية الطب
رائد فتح عين وحدة : غرام كيف مضى هالعمر ؟
غرام : بماأنو اخدك النوم وعامل حالك نسيان رح ذكرك كمان أنو بعد الحفلة بدنا نروح نخطبلو جنى
فتح عينو التانية وتجلس : جنى بنت قصي ماغيرا ؟
غرام : ماااغيرا
رائد : بحياة ربك شبا ليا بنت ربيع خلينا نخطبلو ياها
غرام : يوو رائد شو على كيفنا الصبي بدو جنى بعدين شو هي بنت ربيع وبنت قصي هدول بنات اخواتك
رائد : يعني بدي ارجع عيد السيناريو مع قصي ؟ 🤦♂️
غرام : ليكون مو عاجبك ؟ 🤨
رائد مسك ايدا وباسا : لك عاجبني وكل يوم وكل سنة بيعجبني أكتر وأكتر
انتهت
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
أدخلوا واعملوا متابعة لصفحتي عليها كل الروايات بدون لينكات بمنتهي السهوله من هنا 👇 ❤️ 👇
تعليقات
إرسال تعليق