حكاية فاطمه الفصل الثالث والرابع والخامس بقلم الكاتبه كوكي سامح حصريه وجديده على مدونة النجم المتوهج للروايات والمعلومات
حكاية فاطمه الفصل الثالث والرابع والخامس بقلم الكاتبه كوكي سامح حصريه وجديده على مدونة النجم المتوهج للروايات والمعلومات
__ فاطمه فتحت الباب وكانت خالتها واقعه على
الأرض وقاطعه النفس.. البيبى على ايدها.. جريت
وحطت البيبى على كنبه الانتريه وقالت.. خالتى
مالك.. اكيد غيبوبه سكر.. طيب اعمل ايه دلوقتى
يا ربى.. دخلت تدور على حقنه الأنسولين.. بس
للأسف مكانش فيه.. طلعت لجارتها ام محمد تستغيت بيها.. خبطت على الباب ولما فتحت
ام محمد.. مالك يا فاطنه فى ايه؟
فاطمه.. خالتى تعبانه اوى.. غيبوبه سكر كالعاده
ام محمد.. طيب انا نازله معاكى
__ خرجت بنت ام محمد وكان اسمها الهام
الهام بذهول.. مين👀 فاطمه.. يا مصيبتى انتى لسه بالفستان يا بت .. حصل ايه ها.. حصل ايه.. العريس طلع مش راجل صح ولا طردك ولا فى ايه بالظبط.. ما تقولى يا بت
فاطمه.. بعدين بعدين.. نزلت جرى ووراها ام محمد وبنتها.. دخلوا الشقه والبيبى على صرخه
واحده
الهام.. احيييه مين ده كمان وجريت على الولد
فاطمه.. انا نازله اشترى الحقنه من الصيدليه
ومش هتأخر.. خرجت على الباب ورجعت وقالت
خلى بالك من الولد
ام محمد.. بسرعه يا فاطنه ونزلت على الارض
وبتحاول تفوق خاله فاطمه وكان اسمها شريفه
__ الهام خرجت تبص على الباب واتأكدت
ان فاطمه نزلت.. قالت بذهول.. فى ايه يما..
البت فاطمه جابت لخالتها العار راجعه بفستان
الفرح ومعاها عيل.. اكيد فى مصيبه.. يكونش
الجوازه دى كانت ساتر والواد ده ابنها
ام محمد.. اسكتى دلوقتى
__ فاطمه نزلت الشارع وراحت على الصيدليه
مجهوله.. يادى الفضايح.. مش دى البت فاطمه
يا ولاد.. يادى المصيبه البت لسه بفستان الفرح
فاطمه ماشيه ومتجاهله.. دخلت الصيدليه
فاطمه.. انا عاوزه حقنه انسولين بسرعه.. خالتى
فى غيبوبه وبتموت
كان فى بنت واقفه فى الصيدليه وجاره فاطمه
ولما شافتها استغربت وقالت.. مش كان فرحك
امبارح والمفروض ان النهارده صباحيتك
فاطمه.. بقولك خالتى بتموت.. هاتى الحقنه وبعدين احكيلك
__ البنت جابت الحقنه وفاطمه نسيت انها
مش معاها فلوس. مشيت وقالت لها هتبقى
ترجع تحاسبها.. وهى خارجه من الصيدليه
شافت ان جيران المنطقه كلهم متجمعين
فاطمه قالت فى سرها.. بيتفرجوا عليه ولاد
الكلب.. ما بيصدقوا يفرحوا فى المصايب
مجهوله.. مبروك يا عروسه.. هو انتى لسه
بالفستان ليه يا فاطمه.. رددت واحده واقفه..
هو فستان بس وحياتك دى راجعه ومعاها عيل
فاطمه حطت ايدها على ودانها وصرخت.. بسس
بسسسس.. اسكتوا بقى.. انا خالتى بتموت
وسابتهم وطلعت على شقه خالتها..ادتها الحقنه
وسندوها ونيموها على السرير
فاطمه.. خالتى ام محمد.. ممكن سؤال
ام محمد.. قولى يا فاطنه
فاطمه.. الولد جعان من امبارح وانا مش عارفه
اتصرف.. ومش عارفه ياكل ايه ولا يشرب ايه
الهام.. رضعيه هههههههههه
فاطمه.. تصدقى انك مش محترمه فعلا
الهام.. ليه.. هو مش الواد ده ابنك ولا ايه
ام محمد قرصت الهام.. اسكتى يا بت
معلش حبيبتى دى بتهزر
فاطمه.. طيب الولد جعان.. المفروض اعمل ايه
ام محمد شالت الولد وقالت.. ده لسه بيرضع
عاوز دكتور يكتبلك على لبن صناعى.. وبعدين
ده محتاج يغير كمان.. وعاوز كفوله
فاطمه.. كفوله؟؟؟
الهام.. اسمه بامبرز يا يما.. الكفوله دى على ايامكم
فاطمه.. ماشى انا هتصرف.. وشالت الولد وبتهزه
علشان تسكته
ام محمد.. احنا هنطلع وشويه كده لما خالتك
تفوق هننزل نطمن عليها.. خرجت هى وبنتها
وطلعوا شقتهم
فاطمه قفلت الباب وقعدت تسكت الولد
وكل ده هى بفستان الفرح.. بعد مرور ساعه
الخاله فاقت ولما شافت فاطمه استغربت
الخاله.. انتى هنا بتعملى ايه؟
فاطمه قعدت تعيط وتلطم على وشها
الخاله.. يبقى اكيد زعلتى عريسك.. صح
فاطمه.. العريس طفش يا خالتى.. والشقه طلعت
مفروشه.. وخلاص انا اتفضحت فى الحته كلها
الخاله.. يا نهار اسود ومنيل.. انا قولتلك بلاش
الجوازه دى من الاول
__ البيبى على صرخه واحده
فاطمه شالته وقربت من خالتها وقالت..
عمار وولاء طفشوا وسابوا الولد كمان
الخاله.. يا مصيبه سوده وحلت على دماغنا
فاطمه.. انا مش عارفه اعمل ايه؟
الخاله.. يلا بينا على القسم.. نسلم الواد ونقولهم
اللى حصل من يوم ما أتقدم لحد يوم الفرح
فاطمه.. بس انا خايفه ندخل فى س و ج
الخاله.. عندك حق احنا كده هنروح فى داهيه
وبعدين انتى مرات عمار على سنه الله ورسوله
لو روحنا القسم وعرفوا ان الولد ابن اخته مش
هيعملوا اى حاجه.
فاطمه.. الولد جعان اوى.. دخلت غيرت فستان
الفرح وقالت إنها رايحه لدكتور علشان يكتبله على لبن صناعى
وخدت الولد وافتكرت ان التاكسى واقف
مستنى الفلوس.. خدت فلوس من خالتها ونزلت
وعلى ايدها الولد.. الفون رن وكان زين
بس كانت شايله الولد ومش عارفه ترد
طلعت على أول الشارع وكان التاكسى مشى
لما اتأخرت عليه
__ وقفت توكتوك ولما ركبت كلمت زين
رد عليها وقال انه رن بالغلط وخصوصا ان الرقم
عنده من غير اسم.. قالت انا فاطمه
الفصل الرابع
زين.. فاطمه مين حضرتك؟
فاطمه.. انا العروسه بتاعه امبارح فاكرنى يا زين
زين.. عروسه؟
فاطمه.. ايوه انا العروسه بتاعه أوردر الكباب والكفته
زبن سكت ثوانى.. الولد بيصرخ.. زين بعد الفون
عن ودانه.. ايه الصوت ده
فاطمه.. ده الولد بيعيط انا اسفه جدا.. المهم انت افتكرتنى يا زين.. انا العروسه بتاعه أوردر الكباب والكفته.. صوت دوشه الشارع مع وصراخ البيبى
فاطمه.. يا زين.. انت سامعنى ؟
زين.. ايوه سامعك.. واسف انى رنيت على حضرتك
فاطمه ولا يهمك.. المهم تعالى خد الفلوس
زين.. خلاص يا عروسه.. انا مسامح
فاطمه.. لا ده حقك.. ولازم تيجى تاخده.. واصرت
انها تشوفوا علشان ياخد الفلوس.. قالها انه
بعيد عن المكان.. بس هى قالت إنها فى مكان
تانى خالص.. مش شقه امبارح.. ولما قالت العنوان
قالها انه قريب منها وممكن يشوفها.. التوكتوك
وقف قدام عماره الدكتوره.. فاطمه نزلت وبلغت
زين بالعنوان وقفلت معاه.. وطلعت على العياده
وبعد ما كشفت على الولد واطمنت عليه
والدكتوره كتبت لها نوع لبن يشربه.. نزلت
وهى مش عارفه هتعمل ايه فى اللى جاااى
وفى المصيبه اللى هى فيها.. خرجت على باب
العماره.. رنت على زين بس مردش.. وقفت تستناه
زى ما وعدته .. زين جاى بالموتوسيكل ومشغل
مهرجان ( قلبي تعبان من جواه. قلبى راح وياه
ونساه. قلبى. غلب قلبى معاه. قلبى خايف من اللى
رماه 👏💃💃.. وقف قصاد العماره.. وقف
الموتوسيكل ونزل لما شاف فاطمه.. قربت منه
وطلعت الفلوس.
زين.. طيب مش تسلمى الاول
فاطمه.. ازيك.. خد الفلوس بقى!
زين.. مالك قفشه ليه كده
فاطمه.. فقشه.. على اساس انك تعرفنى يعنى
زين.. انا اسف يا عروسه لو كنت ضايقتك
فاطمه.. ما بلاش عروسه دى الله يباركلك
__ زين حط ايده على شفايفه وابتسم.. اسف
يا مدام فاطمه
فاطمه بغيظ.. خد الفلوس يا زين
زين.. خلى
فاطمه.. شكرا.. كفايه زوقك معايا
__ البيبى بيعيط.. فاطمه بتهزه وبتسكته
زين.. ابنك ده ؟
فاطمه.. لا مش ابنى
زين.. ما انا قولت كده بردوا .. اصل امبارح لما
شوفتك كنتى عروسه بفستان فرحك.. فأكيد
مش ابنك.. يبقى ابن اختك صح؟
فاطمه.. انا مليش اخوات
زين.. اومال مين ده؟
فاطمه المفروض انه ابن اخت جوزى.. يعنى انا
مرات خالو
زين.. انتى متجوزه؟؟؟
فاطمه.. يا ابنى مش انت شوفتنى بفستان الفرح
زين.. بصراحه اه.. بس حاسس انك مش عروسه
وشكلك حزين.. وبص الناحيه التانيه وقال.. وكنتى زى القمر مزززه مزززه يعنى
فاطمه.. عااااا.. بتقول حاجه
زين ابتسم.. لا بقول ايه اللى جرى؟
__فاطمه الدموع نزلت من عينها.. انا عروسه شؤم
وحظى وحش فى الدنيا دى.. يوم ما قولت اتجوز
واستريح واعيش عيشه مرتاحه.. العريس يهرب
زين.. نعم.. يهرب من القمر ده.. اقسم بالله حمار
فاطمه.. هرب هو اخته وسابوا الولد.. وانا هتجنن
زين.. طيب ساب الولد ليه.. حاجه غريبه فعلا
فاطمه.. ما انا مش هتجنن من شويه
زين.. اركبى
فاطمه.. عاااا.. قالت بشويش من غير ما يسمع
.. وحيات امك.. ده العشم قاتلك
زين.. يا عروسه اركبى.. انا هوصلك
فاطمه.. شكرا انا هاخد توكتوك.. وبلاش كلمه عروسه دى.. ممكن.. انا أسمى فاطمه
زين.. طيب خليكى مكانك اوعى تمشى
فاطمه.. ليه؟
زين.. هركن وارجعلك
__ زين طلع بالموتوسيكل وركنه فى جراچ
ورجع لفاطمه.. وطلب منها يقعد معاها فى مكان
يسمع منها حكايتها ويمكن يكون فى حل
فاطمه.. الولد جعان ولازم يرضع
زين.. طيب رضعيه
فاطمه.. الرضاعه عاوزة موال.. طلعت اللبن والبيبرونه.. شايف دول
زين.. عاااااا
فاطمه.. مش وقت عااا الولد عاوز يرضع ده جعان من امبارح زي كده.. يعنى لازم اروح البيت.. بس
وعد منى هتصل بيك واشوفك مره تانيه
زين.. انا عاوز اقعد معاكى حالا
فاطمه.. مش هينفع دلوقتى.. انا قولتلك اللى فيها
زين ايده فى شعره.. طيب بقولك تعالى معايا
وانا هتصرف
فاطمه.. على فيين؟
زين.. على كافيه
فاطمه.. والله مش هينفع
زين.. طيب ممكن تحكى حكايتك باختصار
فاطمه.. هتساعدنى
زين.. احكى طيب
فاطمه.. انا اتجوزت فى اسبوعين راجل غنى
وراجع من بره ومعاه فلوس كتير واتفق مع خالتى
انى هتجوز فى شقة اخته ولما اتجوزنا طفش
والشقه طلعت مفروشه ليوم واحد بس
زين.. عاااااااا
فاطمه..مالك تنحت ليه كده
زين.. يعنى جواز مصلحه ومن الاخر كده انتى ملكيش فى الحب .. بت بتاعه فلوس يعنى
اللى زيك كان تمامه راجل خليجى يقعد معاها يومين وخلاص
فاطمه بغضب.. انت بتقول ايه يا بنى أدم انت..انا ماشيه.. مسك ايدها.. والله بهزر.. اصل حكايتك
مستفزه بجد..ده انتى اتنصب عليكى يا بنتى..
وغير العيل ده.. ده انتى وقعتك سوده
فاطمه.. ده غير الفضايح.. انت عارف.. انا رجعت
حارتنا بفستان الفرح والولد على ايدى
زين.. بفستان الفرح.. ليه مكانش عندك هدوم
فاطمه.. كان شرطه اتجوز عند اخته وطبعا شقتها
جاهزه من كل حاجه.. روحت مره فى اول اسبوع من خطوبتنا بعد ما اشتريت كل الهدوم وعلقتها
فى الدولاب كمان لدرجه انى ظبطت التسريحه
من ميك اب وبرفان.. وكنا كل يوم تليفونات.. وقبل الفرح بيوم ولاء كلمتنى وقالت إن حصل معاها مشكله مع صاحب العماره.
زين.. ولاء مين ؟
فاطمه.. اخت عمار
زين.. لا مؤاخذه.. عمار مين؟
فاطمه بنرفذه.. عريسى يا زين
زين.. يا ستى متزقيش براحه عليه.. ما انا معرفش
فاطمه.. المهم عملت مشكله مع صاحب العماره
ووصلت للبوليس ومشيوا من العماره بس خدت شقه فى مكان احسن ولما طلبت منها اساعدها فى فرش الشقه
قالت انهم نقلوا كل حاجه وانا عروسه وعاوزه تريحنى.. حتى عمار لما سألته قال ان كل حاجه
جاهززززه
زين.. عمار مين؟
فاطمه.. جوزى يا زهايمر
زين بابتسامه.. اسف
__ الولد بيعيط وعلى صرخه واحده
فاطمه.. انا ماشيه بقى علشان ارضع الولد
زين.. طيب هشوفك امتى؟
فاطمه.. انا هتصل بيك.. سلام
زين.. رايحه فين ؟
فاطمه.. انا ماشيه.. ما انا قولتلك
زين.. طيب ممكن عنوان بيتك
فاطمه.. انا هكلمك.. لأنى لازم اشوفك يا زين
زين.. ممكن سؤال
فاطمه.. اتفضل بس بسرعه
زين.. طيب انتى وافقتى تقعدى فى شقه اخته ليه؟؟!
فاطمه بتوهان.. اخت مين ؟
زين.. عريسك يا فاطمه
فاطمه.. اه.. علشان كان مسافر وتقريبا
خاف اققعد لوحدى
زين.. الموضوع فى حاجه كبيره ومش مفهومه
فاطمه.. انا عاوزه أمشى بقى
زين.. ثوانى هوقفلك تاكسى
فاطمه.. تاكسى.. لا وقف توكتوك احسن
زين وقف توكتوك وركبت فاطمه ومعاها الولد
ودفع الحساب قبل ما يطلع بيها وقالها.. انتى فاكره عنوان شقه اخت عمار
فاطمه.. المفروشه
زين.. لا الشقه اللى انتى روحتى فيها
فاطمه.. اه فاكره طبعا
زين بصلها اوى وقرب منها.. خلى بالك الشقه دى
هى اللى هتوصلك لعمار واخته
فاطمه.. بجد.. ياريت
الشاب صاحب التوكتوك.. يلا يا جدعان انا ورايا
ورديه وطالع عينى من الصبح
زين.. الله يسهلك.. بس بقولك.. متركبش حد معاها
وطلع فلوس زياده علشان محدش يركب معاها
وطلع التوكتوك بيها
وكانت عينها على زين وسرحانه فيه
.. فى الحاره ..
فى شقه فاطمه..خالتها نايمه على السرير تعبانه
ويدوب بتفوق من التعب.. الباب خبط عليها..
قامت بتتسند وهى بتقول.. فاطمه نسيت المفتاح
فتحت الباب وملقتش حد خرجت تبص اتكعبلت
فى بوكس هدايا.. استغربت.. طلعت على الباب
تبص.. بس مكانش فى حد.. اختفى.. خدت البوكس ودخلت بيه على جوه وقعدت على السرير والبوكس جمبها.
__ فى التوكتوك_
فاطمه راكبه والتوكتوك فرمل
ووقف لدرجه ان الولد كان هيقع من ايدها
فاطمه.. بالراحه فى ايه.. ولقت ست مجهوله ركبت جمبها
فاطمه.. انا متفقه معاك ان محدش يركب معايا
المجهوله.. معلش يا حبيبتى انا زى ولدتك وبنتى
بتولد.. ادعيلها وحياه الغالى عندك
فاطمه.. ربنا يقومها بالسلامه.. خلاص اطلع يسطا
التوكتوك طلع وغير اتجاهه
فاطمه.. انت رايح فيين؟ مش ده الطريق
الست اللى راكبه جمبها طلعت منديل اوبااا
وكتمت نفس فاطمه وخدرتها؟
فاطمه بتحاول تقاوم إنما اتخدرت ومش حاسه
بحاجه؟؟؟
___ فى الحاره____
__ الخاله قاعده وعدت ساعتين على غياب فاطمه
الباب اتفتح عليها.. وكانت ام محمد والهام بنتها
علشان يطمنوا.. دخلوا عليها الاوضه.. رحبت بيهم
الهام.. الله ده بوكس هدايا.. وقعدت جمبها
ام محمد.. يا بت عيب كده
الهام.. شكله حلو اوى يما ..ده اكيد من عريس فاطمه.. وبصت حواليها.. هى فييييين ؟!
الخاله.. خرجت تشترى حاجه بس اتأخرت اوى
.. اتصلى بيها كده.. الهام مسكت الفون واتصلت
بس كان جرس ومحدش بيرد
الهام.. مش بترد يا خالتى!
الخاله.. انا قلقانه عليها اوى
الهام.. هى راحت فييين؟
ام محمد.. يا بت وانتى مالك وغمزت لها تسكت
الهام.. يو يما بقى.. مش بطمن على بطه
الخاله.. راحت مشوار بس اتأخرت عليه وهى
عارفه ان انا تعبانه
__ الهام ماسكه فى ايدها البوكس.. بقولك يا
خالتى.. هى ايه حكايه عريس فاطمه.. وايه
اللى حصل بالظبط هاااااا.. هى مدخلتش صح
ولا دخلت وحصل حاجه ومصمصت شفايفها..
وبعدين مين العيل اللى معاها ده؟
ام محمد.. يا بت خالتك تعبانه اسكتى
الهام.. حاضر
الخاله.. يارب البت اتأخرت اوى.. وتجاهلت كلامها
الهام.. خالتى افتح البوكس
الخاله.. يا بنتى ده يخص فاطمه.. لما ترجع تفتحه
هى
الهام.. طيب
الخاله قامت دخلت الحمام وأم محمد قامت معاها
لأنها كانت دايخه
الهام بنت حشريه وعندها فضول لما خرجوا من
الاوضه مسكت بوكس الهدايا وفتحته
الهام.. يا نهار اسود.. يا مصيبتى.. وخرجت تجرى.
الفصل الخامس
__ الهام بعد ما فتحت البوكس خرجت تجرى وعلى صرخه واحده.. يا نهار اسود.. يا مصيبتى
الحقونيييييييييييي الحقونييييييييييييي.. وفتحت باب الشقه وطلعت السلالم جرى وهى بتقول.. الحقنييييي.. الحقنييييي.. وخبطت
على باب شقه جارهم مالك وقارى فاتحتها فى نفس الوقت.. لما فتح وشاف شكلها اتخض
مالك.. فى ايه مالك يا بت شكلك عامل ليه كده!
الهام.. تعبان.. تعالى معايا بسرعه
مالك.. تعبان.. اعوذب بالله.. فيين👀؟!
الهام.. تحت فى شقه البت بطه
مالك.. وايه اللى هيجيب التعبان هنا!؟
الهام.. احييييييه.. انت لسه هترغى.. بقولك تعالى
موته وخلصنا منه
__مالك جرى على المطبخ وخد سكينه ونزل معاها جرى.
__ الخاله خارجه من الحمام ومتسنده على ام محمد وكانت تعبانه ودايخه
الخاله.. ايه ده باب الشقه مفتوح ليه!
ام محمد..اكيد البت سبتنى وطلعت.. انا غلبت
فيها والله يا شريفه
ام محمد.. محدش مرتاح.. ربنا يهديها
__ الهام دخلت ومعاها مالك وكانت مرعوبه
الخاله.. فى ايه يا ولاد! مالكم؟؟
مالك.. تعبان يا خالتى
الخاله.. يا مصيبتى.. مش قادره تتنفس.. جه منين
الله اكبر الله اكبر
ام محمد.. تعبان👀 حابس حابس
الهام وقفت على الباب..مالك دخل الاوضه وقرب
من بوكس الهدايا وشاف حاجه غريبه جدا؟؟
____ فى محل الكباب ____
__ زين وصل المحل وركن الموتوسيكل بعد ما خلص الطلبات كلها وكان كل تفكيره فى فاطمه
وعيونها الحلوه.. شد كرسى وقعد قدام باب
المحل وطلب وجبه الغدا بتاعته.. بعد دقايق خرج
زميله آسر وقعد معااه
__ زين شاب عنده 28 سنه وسيم، طويل، شعره
اسود، بشرته فاتحه وباباه صاحب المحل وهو بيشتغل عنده وعايش بعقده؟؟
آسر.. رنيت عليك من شويه.. مردتش ليه!
_ زين سرحان ومش سامع حاجه
آسر.. زين زين!
زين.. ها.. معاك
آسر.. فى حاجه ولا ايه ؟
زين.. مفيش.
آسر.. اوعاا يكون حد زعلك ومش عاوز تقولى
زين.. قابلتها وشوفت عنيها
آسر.. هى مين دى!
زين.. فاطمه
آسر.. مين فاطمه ؟
زين بتنهيده.. بنت جميله وزى القمر
آسر.. زبونه يعنى ولا ايه.. انا مش فاهم حاجه
زين.. هى زبونه ومش زبونه.. تقدر تقول طلعت
من الفانوس
آسر.. نعم.. فانوس ايه يا علاء الدين 😂
زين.. البنت مزززه اوى
آسر.. قول كده بقى.. مزززه.. تستاهل يعنى
زين.. تستاهل بس.. بقولك مزززه.. وقام وقف
وبيوصف شكلها.. الوش قمر.. ولا الشعر حرير..
ولا جسمها يالهوى على جسمها وجماله
آسر. اشطا.. قرب منه وطلع من جيبه سيجاره
حشيش.. خد روق دماغك
زين ابتسم وخدها منه وبص جوه المحل وقال
اوعااا يكون ابويا هنا.. ده لو شافنا تبقى مصيبه
آسر.. ابوك روح من بدرى.. مراته كلمته وطلع
يجرى زى العيل الصغير
زين بتريقه ومسك وسطه.. اخ تعبانه.. الحقنى
يا بابا.. تقولش كان خلفها ونساها بروح امها .. ولع السيجاره وبيشربها وخد اول نفس
وقال.. انا مش عارف ليه ابويا بيعمل فينا كده
من يوم امى ما ماتت وكل يوم والتانى يتجوز
واحده شكل
آسر.. حقه يا جدع.. الراجل محتاج ست جمبه
زين.. ههزقك وربنا.. حقه ايه يا عم.. ابويا
كبر وعنده اكتر من 70 سنه ومتجوز بت قد
بناته.. والمصيبه حامل.. ومن يوم ما الزفت
ده اتزرع فى بطنها ومحدش قادر عليها
بنت الكلب دى
آسر.. يا عم مراته وليها حق عليه وكلها
كام شهر وتبقى ام اخوك وحط ايده على كتف
زين.. ابسط يا عم.. هيجيلك اخ قريب
زين خد نفس تانى بغيظ.. انا حاسس انه مش اخويا.. البت دى بتضحك عليه وعلينا
آسر.. يا عم حرام عليك بلاش تسيئ الظن
زين.. البت دى العوبان وانا مش هسيبها
آسر.. ايه يا عم قلبتها دراما ليه.. اشرب السيجاره
وروق.. صحيح انت قولتلى البنت اسمها ايه
زين.. فااااااااطمه
__ زين خد الفون وبعد عن صاحبه واتصل بيها
وكان جرس ومحدش بيرد!
زين.. هى مش بترد ليه؟؟!
____ فى التوكتوك ____
__ فاطمه نايمه متخدره ومش حاسه بحاجه
والولد بيعيط.. الست بتفتش فاطمه.. الواد صاحب
التوكتوك نزل وركب معاها ورا ولسه بيمسك
جسم فاطمه.. الست المجهوله.. انت بتعمل ايه! ..
شيل ايدك يا جدع.. يلا اتصل بالجماعه
__ الولد بيصرخ.
المجهوله.. الواد ده صدعنى.. يخربيته مبيفصلش
صاحب التوكتوك مسك الفون ورن رنه وقفل.. وبعد دقايق كان قدامه عربيه فخمه جدا نزل منها
شاب.. سلمه 5000 جنيه واستلم منه فاطمه والولد
____ فى الحاره ____
__ مالك بص فى البوكس وشاف 👀 تعبان
بيتحرك بجد زى ما الهام قالت وجوه البوكس
صور لفاطمه واتنين فيران ميتين.. رفع السكينه
ولسه بينزل بيها على التعبان.. الخاله دخلت وقالت بصرااااخ.. بلاش يا ابنى تأذى نفسك
مالك نزل ايده وبص وراه.. لازم يموت يا خاله
يأما نموت احنا.. ده تعبان واكيد سام.. انا هموته
الهام برعب وزعيق.. موته بسسرعه.. انت مستنى
اييييه!!!؟ ؟
الخاله.. يا ابنى لو موته هيأذيك.. اسمع منى
مالك.. لازم يموت ابن الكلب ده
الخاله قربت منه وقفلت البوكس.. روح بسرعه
لعمك حسين جارنا هو اللى هيخلصنا منه من غير
أذيه.. وبقت تعلى صوتها.. لا تأذينا ولا نأذيك
__ مالك فتح البوكس ومن غير ما يسمع الكلام
نزل على راس التعبان وقتله ووشه كله اتغرق دم
الهام.. مات.. الحمد لله
الخاله بزعيق وغضب.. ليه يا ابنى كده تجيب
الأذيه لنفسك
مالك بتناكه.. ميجبهاش الا رجالها 💪
الخاله.. ليه تأذى نفسك يا ابنى!
مالك.. فى ايه يا خاله.. التعبان لو مكانش
مات.. كنا كلنا هنموت وقرب من الهام وقال بشويش.. عجبتك يا لولو
الهام.. هو انا بحبك من شويه ورقعت حته ضحكه
انت سندى وضهرى يا ملوكى
ام محمد.. وانت يا مالك هتفضل كده يا اخويا
مش عاوز تعمل حاجه!
الهام.. يما بقى فى ايه.. الراجل نازل يخلصنا
من الزفت ده تقومى تبكتيه
ام محمد.. ابكته علشان عاوزه مصلحتك يا بنت
بطنى.. ابكته علشان عاوزاه يخلص واشوفك
فى بيت العدل
مالك.. ان شاء الله قريب يا خالتى ام لولو
ام محمد.. ام لولو.. احيييه.. ده بيقولك يا لولو
يعنى مفيش جواز السنه دى
الهام بكسوف.. خطيبى وبيدلعنى يما
ام محمد.. خطيبك.. اه.. خطيبك بشبكه صينى يا موكوسه ومصمصت شفايفها
الهام حطت ايدها على شفايفها.. بتقولى ايه يما؟
ام محمد.. معلش بقى مقصدش.. خالتك مش
غريبه
__مالك اتحرج ودخل غسل وشه من الدم وبعد ما خلص.. قعد جمب البوكس وطلع منه الفيران
والتعبان ولفهم فى قماشه وحطهم فى شنطه
الخاله.. اعوذب بالله.. انا لو اعرف انه فى كده
مكنتش اخدته خالص
الهام.. هو من عريس بطه يا خالتى
الخاله بنرفذه.. عريس ايه بقى منه لله.. انا لقيت
البتاع ده على باب الشقه وشاورت بإيدها
__ الهام قعدت جمب مالك وبقت تدور وتشوف
البوكس فى ايه وطلعت منه صورتين
لفاطمه مكتوب عليهم.. حب ثم حب ثم عشق
ثم عشق ثم قبول.. عند الرفض.. حزن ثم اكتئاب
ثم عنس ثم حياه سوده ثم مر ثم دموووووع ثم انتحار ثم موووووووووت
الخاله بذهول.. دى صور فاطمه.. مكتوب عليها
ايه يا بنتى
الهام بخوف.. بطه معمول لها عمل بالعشق
ام محمد.. يا عينى يا بنتى
الخاله.. الصور دى مكتوب عليها ايه
__ الهام قرأت كل المكتوب بصوت عااالى والخاله تعبت
لما سمعت الكلام وعرفت ان فاطمه معمولها سحر
مالك بذهول.. طيب ايه لزمه التعبان والفيران
الهام.. معرفش
ام محمد.. اكيد لزوم السحر
مالك بذهول.. ايه ده فى ورقه جوه.. مسكها
وابتدى يقرأ كل اللى جواها وكان مكتوب فيها
فاطمه بنت فوزيه وعبد الهادى نفذى المطلوب
خذارى تموتى التعبان.. ارميه فى رمله صفراء
اما الفيران ادفنيهم والصور احرقهيم وبكده
قبلتى عشقى.. أما بقى لو رفضتى.. يبقى
تقتلى التعبان وبكده جوابك وصلنى ورفضتى
عشقى يا بنت عبد الهادى
الهام.. احيييه.. انت قتلت التعبان
الخاله.. يا نهار اسود حسبى الله ونعم الوكيل فى كل مؤذى
ام محمد.. خير متخافيش يا اختى
مالك.. فى كلام مكتوب تانى زى طلاسم بس
مش مفهومه
الهام.. بقولك ايه انت خد البوكس المهبب
ده وعلى مقلب الزباله عدل.. يلا بسرعه
مالك.. وصور فاطمه
الهام.. اقطعهم.. ولا اقولك ومسكتهم بإيدها
وقطعتهم.. وبعد ما خلصت لفت البوكس
فى شنطه ومالك خدهم ومشى على مقلب الزباله
الهام.. اه يا دراعى
ام محمد.. مالك يا بت
الهام.. اه يما حسيت بنغزه فيه
ام محمد.. ما انتى مش بتسكتى خالص
الخاله بتعيط.. البت اتأخرت.. انا خايفه عليها
اوى
__ مالك رجع وقال إنه رمى الحاجه زى ما طلبوا
منه واستأذن وطلع شقته
الهام.. يلا يما
ام محمد.. احنا هنقعد لحد ما فاطنه ترجع
الهام.. طيب انا هطلع لابويا واخواتى
احضر لهم العشا ولما ترجع اطلعى
ام محمد.. اطلعى
___ فى غرفه مجهوله ____
__ فاطمه نايمه متخدره من غير الولد
دخل راجل مجهول.. البت حلوه والله خسارة
اللى هيحصل فيها رد عليه واحد معاه.. يا عم
واحنا مالنا ده نصيبها بقى.
الراجل المجهول.. بس جميله وحلوه يا خسارتك
رد وقاله.. حد قالها تركب توكتوك لوحدها.. نيهيهيهيهيهي. وخرجوا وسابوها.. بعد مرور
ربع ساعه فاقت وحست بالبرد وبقت ترتعش
قامت وهى بتقول.. اسكت بقى بطل زن.. انا
عارفه انك جعان وكأنها فى حلم فتحت عينها
وشافت نفسها مرحبا نايمه على ؟؟؟؟
___فى شقه زين ___
__ زين نايم فى اوضته وبيتصل ب فاطمه
والفون اتقفل خالص.. زعل جدا وافتكر انها
قفلته منه ومش عاوزه تكلمه.. طلع سيجاره وبعد ما شريبها نام
الباب اتفتح عليه وحس بحد بيلمس جسمه
فاق وقام بسرعه.. ايه ده زهره؟؟؟
__ فى الحاره ___
فى شقه مالك.. بعد مخلص فون مع الهام خطيبته
وكانت كل مكالمته عن فاطمه واللى جرالها
قفل معاها ونام وبعد نوم عميق قام على صوت
غريب وكان صوت انثى.. قتلته ليه ؟
مالك.. ها مين مين؟
الصوت.. بقولك قتلته ليه؟
مالك.. قتلت مين ؟!
الصوت.. جوزى
مالك.. جوزك مين ياست.. انتى مين.. انا مش شايفك
الصوت.. ولا عمرك هتشوفنى
مالك.. انتى مين بس!
الصوت.. بقولك قتلته ليه؟
مالك.. انا مقتلتش حد!
الصوت.. قتلت جوزى النهارده.. انا مراته وفجأه
ظهرت قصاده حيه كبيره
مالك.. عاااااااااااااا
تابعووووووني
رواية زواج لدقائق معدودة كامله من هنا
رواية خيانة الوعد كامله من هنا
رواية الطفله والوحش كامله من هنا
رواية جحيم الغيره كامله من هنا
رواية مابين الضلوع كامله من هنا
رواية سيطرة ناعمه كامله من هنا
رواية يتيمه في قبضة صعيدي كامله من هنا
الروايات الكامله والحصريه بدون لينكات من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
الصفحه الرئيسيه للروايات الجديده من هنا
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق