رواية 30 يوم حياه البارت التاسع والعاشر بقلم اميره أسامه حصريه وجديده في مدونة النجم المتوهج للروايات والمعلومات
 |
رواية 30 يوم حياه البارت التاسع والعاشر بقلم اميره أسامه حصريه وجديده في مدونة النجم المتوهج للروايات والمعلومات
منه...اخلصي قوليلو بسرعه قبل مايمشي
وعد...انا خايفه
منه...اخلصي يابت
وعد....بارتباك زيييين
زين...ايوه ياوعد
وعد...ااااا انت نازل
زين...بابتسامه اه مالكم في ايه اعدين تتوشوشو ليه شكلكم عاملين عامله
وعد...احنا لا خالص ليه بتقول كده
زين...احساس عملتي ايه فالحاجه بتاعتي اللي فالاوضه🤨
وعد...والله ماعملت حتي أسال منه
منه ..اه والله يازين هي بس عايزه تستأذنك علي حاجه.
وعد ..بصتلها وعد وهي بتبرقلها انا لا خالص
منه...والله عايزه تقولك علي حاجه
زين...في ايه ياوعد قولي عايزه ايه انتي مكسوفه مني ولا ايه اظن احنا مفيش بينا كسوف وبعدين اتعلمي من البت الرخمه دي لما بتكون عايزه حاجه بتدخل زي القطر مبتتكسفش😂
منه...بقي كده ماشي يازين انا مخصماك وزعلانه منك😔
زين...بضحك اتفلقي اصلا متقدريش
منه....بصراحه اه مقدرش ازعل منك🙈😘
زين....قولي ياوعد وسيبك من المجنونه دي
وعد....بدون مقدمات زين انا انا عايزه اطلع رحله🙄
زين...رحله رحله ايه
وعد...العين السخنه
زين...حاضر عيني نخلص بس من فرح صالح ولاحه والبنات ونعدي زحمه العيد وكده كده احنا ان شاء الله بنجهز للرحلات اللي بنعنلها كل سنه في الحته.
وعد...ايوه بس انا مقصدش الرحلات اللي بتعملوها فالحته هنا
زين....بتركيز امال تقصدي ايه ياوعد
حست وعد انها ارتبكت من نظرات عينه بس حبت تكون شجاعه وتكمل كلامها اللي ندمت انها فتحته
وعد....في رحله صحابنا عاملينها وانا بصراحه نفسي اروح معاهم
زين...نعم ومن امته يا وعد بوديكي انتي او منه في مكان لوحدكم ويوم ما تحبي تخرجي تسافري اكيد مش موافق طبعا وبعدين مين صحابك دول
وعد...ياسمين
منه...واخوها هشام هو اللي عاملها بيعمل زيكم رحلات كده يازين
بصتلها وعد عشان تسكتها ومنه عايزه تضحك
زين...ياسمين وكمان اخوها هشام اولا انتي عارفه اني مبستريحش لياسمين دي عشان مشكلكم خالص وهشام اخوها عيل تافهه بتاع بنات وانتوا بردو عارفين
وعد...ايوه يازين بس هما معاهم اهلهم
زين...وحتي لو احنا معاكم مفيش مرواح وياريت نقفل عالموضوع ده
وعد...عايزه تستفزه اكتر وزين بيحاول يبان هادي لاكن من جواه كان بيغلي من الغيظ.
وعد...بس انا كان نفسي اروح مع صحابي
زين....بسيطه يوم ما نطلع ابقي قوليلهم واللي حابب يجي اهلا وسهلا انتي عارفه طبعا عدد الباصات اللي بنطلعها فالحته بتبقي اد ايه بس بردو ولا ياسمين ولا اخوها تقوليلهم
وعد....بس هما اهلهم مش هيوافقوا
زين...وعايزناني انا اوافق صح
وعد...لا مش كده بس انت واثق فيا يعني
زين...اكيد واثق فيكي والمفروض بردو ان صحابك اهاليهم واثقين فيهم ولا هما مش اد الثقه دي
وعد...لا طبعا بس اكيد هيرفضوا لنفس السبب اللي انت بترفض عشانه
زين...يبقوا ناس محترمين ولازم نوافق ونحترم قرارهم
وعد ..ايوه بس لنت كمان مش عايزني اقول لياسمين وهشام وانا بصراحه طالعه الرحله عشانهم
زين...وعد انا لحد الوقت بتكلم بهدوء وبحاول اقنعك وانتي مصممه تضايقيني
وعد...انا مش بضايقك انا بحاول اقنعك مينفعش ترفض من غير سبب
زين....لا ينفع ياوعد واظن لما بنت تطلع رحله مع ناس مجرد صحابها و الرحله هيبقي أغلبها شباب اظن ده سبب كافي يخليني ارفض زهقانه محتاجه تخرجي شاوري عالمكان اللي عيزاه انتي ومنه وانا هوديكم بنفسي او خدوا امي معاكم لاكن سفر بنات لوحدها معنديش الكلام ده
وعد...وانا مش عايزه اروح في مكان خلاص ومشيت من ادامه وهي متعصبه
زين...وعدددد
وقفت وعد وهي قلبها بيدق من صوته
وعد...نعم
زين...بهدوء اظن مش صح اكون بكلمك وتمشي وتسبيني ولا صح انك تزعلي من الاصول
وعد...خلاص بلاش سفر نخرج مع بعض انا وصحابي ومنه هتبقي معانا هي كده كده عرفاهم
زين....انتي مصممه تضايقيني طب بصي ياوعد خروج مع صحابك مش هيحصل وخروج من غير اي حد فينا بردو مش هيحصل عايزين تخرجوا معايا او مع امي انا موافق عايزين تستنوا لما نسافر مع بعض موافق اكتر من كده معنديش ولو علي صحابك عايزين يجولك هنا ينوروا
اظن انا كده عداني العيب سلام عليكم نزل زين بعد ما رزع الباب
بصت وعد لمنه
وعد...ايه
منه...مش عارفه بس عموما هو باين انه مضايق من هشام ده
وعد...طيب هنعمل ايه الوقت
منه...ولا حاجه ننفذ الخطه اللي بعدها
وعد...اللي هي ايه
منه....تفضلي اعده ساكته وتعملي انك زعلانه ومتتكلميش معاه خالص واي وقت هياخد الخطوه ويكلمك انا لو معاكم هخلع والباقي عليكي اتحركي يا اختي انا مش هفضل اخطط كده كتير حسسيه بيكي كلمتين حلوين حنيه دمعتين ملهمش لزمه يابت انا اللي هقولك تعملي ايه
ضحكت وعد...انتي مسخره زين لو عرف اننا متفقين عليه وبالاخص انتي هيعلقك
منه...بضحك كله يهون عشان عيونك يا جميل😘
وعد...😘😘
..........
في محل كيمو كان المحل زحمه وكله جاي يشتري سحور اخر يوم رمضان
عامر وايهاب كانوا شغاليين معاه ومش ملاحقين عالطلبات
عامر...ولا ياكيمو انت هتقفل فالعيد ولت هترجع السندوتشات
كيمو...لا هقفل وهرجع بعد العيد ان شاء الله عايز ارتاح شويه وبعدين عشان فرح صالح ولاحه تالت يوم وقبلها بيوم هنبقي بنحضر للفرح يعني مفيش وقت للمحل بصراحه
ايهاب...كنت هقولك كده علي فكره
كيمو....وانتوا ايه نظامكم فالعيد في شغل بليل طبعا
عامر اه طبعا انا عندي اوردرين في نايت كلاپ اول يوم العيد وتاني يوم العيد عندي عيد ميلاد تالت يوم طبعا اعتذرت عن الشغل بس عندي رابع يوم العيد فرح كبير ادعيلي ياكيمو ده فرح ناس تقيله واللي مرشحني صاحب العريس كنت بغني في نايت كلاپ قبل كده وكان سهران هو وصحابه واتعرفت عليه ولقيته بيكلمني من كام يوم وروحت واتفقت معاه هو والعريس
كيمو. ربنا معاك يارب ويزقك ياعامر...طب وانت يا بوب
ايهاب....انا عندي اول يوم حفله في ساقيه الصاوي وتاني يوم عندي فرحين وطبعا التالت اعتذرت ورابع وخامس هكون فالمركب اللي بغني فيها علي طول
كيمو...ربنا معاكم يارب
ايهاب...يارب
............
في مكتب عادل
المساعد بتاعه
خبط عالباب ودخل
عادل....ايوه ياسمير
سمير...في راجل كبير بره عايز يقابلك
عادل...في حد غيره
سمير...لا
عادل...طيب دخله
سمير....تمام بعد اذنك
عادل...اتفضل
ثواني والباب خبط وأذن عادل ليه بالدخول
حاج محسن...السلام عليكم ياابني
عادل قام وقف عليكم السلام اهلا اتفضل ياحاج
محسن...معلش يا ابني اني جيت من غير معاد انا فالحقيه معرفكش بس واحد صاحبي عارف حكايتي وعارف اني بدور علي محامي شاطر فا رشحك ليا انا ساكن قريب منك هنا
عادل متقولش كده ياحاج ده مكانك تيجي وقت ماتحب اتفضل عرفني علي نفسك وقولي اقدر اساعدك ازاي
محسن...انا اسمي محسن عبد الحكيم عندي 60 سنه عشت كول حياتي متغرب وشغلي كله بره في الخليج كنت بشتغل سواق في شركه كبيره والكفيل بتاعي كان ابن صاحب الشركه انا سافرت من مصر وانا عمري 20 سنه ورجعت من خمس سنين يعني قضيت فالغربه 35 من عمري كنت بروح وباجي علي مصر اتجوزت وخلفت ولد وبنت الولد عنده 39 والبنت عندها 35 المهم اشتغلت حجات كتير اوي لحد ما وصلت لشغلتي فالشركه دي وبقيت سواق كل فلوسي كانت راحه علي ولادي وعلي جهازهم كبرت وعلمت وجوزت ولما قررت اجي مراتي اتوفت رجعت قولت ايه اللي هينزلني خليني مكمل بس وصلت لسن 55حسيت اني خلاص كفايه عليا اوي كده ارتاح بقي العيال اتعلمت واتجوزت والقرشين اللي جمعتهم يعيشوني اللي فاضل من عمري نزلت وطبعا طول السنين دي مكانوش ولادي بيسألو فيا غير لما يحتاجو فلوس اعدت اربع سنين من بوم مانزلت كنت بشوفهم كل 3 شهور مره وياريتهم كلنوا بيتجمعوا ويعملولي يوم لا ده لما كانوا بيعدوا بالصدفه مكالمه التليفون كانت كل شهر مره ميعرفوش اذا كنت عايش ولا ميت المهم من سنه ابني الكبير هو وبنتي وطبعا جوز بنتي ومرات ابني كانوا معاهم اتفقوا انهم يعملوا مشروع مان اظامهم حتت ارض كبيره فا قالوا يشتروها ويبنوها ويسكنوها ايجار جديد لقيتهم اتصلوا بيا وقالولي انهم جايين يتغدوا معايا فرحت مع اني كنت مستغرب بس فرحتي بولادي واحفادي نستني جم وعرضوا عليا الفكره قولتلهم حلوه اوي اتكلوا علي الله وربنا يرزقكم الحلال فرحوا وبعدها لقتهم بيقولولي خلاص ادام الفكره عجبتك يبقي انت اللي هتمولهالنا قولتلهم ياريت اللي معايا كان يسد قالولي هات اللي معاك واحنا نكمل او نقسط قولتلهم تقسطوا بقيت المبلغ طب والبناء والتشطيب هتجيبوا تمنه منين
قالولي هنتصرف المهم الارض متروحش علينا ندخلنا في كلام كتير وجدال اكتر طبعا انا رفضت قولتلهم لو كان معاكم مبلغ وباقي غلي مبلغ صغير كنت شاركت لاكن انتوا مش معاكم خالص واللي معايا يعيشني مبسوط ليه اديكم كل الفلوس واعد استني اكل منك ولا من اختك ابني قالي هتعيش معانا ونبيع الشقه ونكمل علي باقي الفلوس قولتلهم كمان عايزني اسيب مكاني سألتهم معاهم اد ايه قالو 100 الف ابني وجوز بنتي قولتلهم والارض بكام قالو مليون ونص يعني معني كده انهم عايزين مني مليون و400 الف قولتلهم انا اصلا معيش المبلغ مش موافق ليه امرمط نفسي في اخر سنين عمري ابني اتحول هو وبنتي واتصدمت صدمه عمري لما لقيته بيقولي يا تديهملنا بالذوق يا هناخدهم غصب عنك وهنرفع عليك قضيه حجر وردت بنتي وقالت كلمه ضاعفت صدمتي اكتر لما قالتلي مامت كده كده ميت هتعمل ايه بالفلوس دي وبعدين مسيرنا ناخدهم مع العلم ولادي مش محتاجين اي فلوس واحد شغال في مجال السياحه والتانيه مدرسه بتعلم اجيال
وطول السنه دي بقي وهما بيحاولوا معايا بكل الطرق لحد ما حسيت ان قلبي ابتدا يخاف منهم حاسس انهم بيتفقوا عليا خصوصا ان الارض اتباعت لكن زنهم علي أخد الفلوس مش طبيعي اناخايف يتقفوا علي موتي صدقتي يا ابني انا مش خايف من الموت اد مانا خايف علي ولادي من الذنب
صحيح ولادي قلبهم اتشال واتحط مكانه صخر بس انا اب يا ابني وعايز اقولك ان طول سنين سفري كنت ديما بكلمهم ولما كنت باجي مصر مكناش بنأعد يوم فالبيت كنت ديكا اخرجهم اقول عشان اعوضهم فتره غيابي عنهم وميحسوش اني مقصر في حقهم نزلت دموعه بقهر ووجع صدمتي فيهم متتوصفش خصوصا انهم قالولي الكلام ده في وشي قولي ياابني اعمل ايه ولا اتصرف ازاي قلبي واجعني اوي مش قادر اخد قرار ضدهم فكرت اعاقبهم واكتب وصيتي واتبرع بفلوسي لمكان يستاهل واوجعهم بس صعبانين عليا بقول يمكن ظروف الحياه معاهم ضاغطه عليهم بحاول الاقيلهم مبرر مش عارف اعمل ايه ضغطي واطي علي طول من التفكير قولت أسأل حد خبره يقولي اتصرف ازاي غو حتي يقولي اني كنت غلطان اني سافرت وسبتهم فا مبقوش حاسيين بيا وقلبهم بقي مليان جفا من ناحيتي يمكن اكون انا اللي غلط
عادل...بحزن امسح دموعك يا حاج محسن. واهدي شويه اولا انت مش غلطان انت اب لقي رزقه في بلد تانيه سافر واتغرب وطلع عينه عشان يعلم ويكبر ويجوز انت أديت رسالتك علي اكمل وجه يا حاج محسن بس ولادك الطمع عاميهم مش مقدرين قيمه الرزق اللي في حياتهم غيرهم ابوهم ميت وبيتمنوا بس يطبطب عليهم...
انا بس هستأذنك اديني عنوان بنتك وابنك
حاج محسن...ليه
عادل...فالحالات اللي زي دي بنختار الحل السهل الاول وهو اننا نعمل أعده وديه يمكن نطلع منها بفايده نقدر نشيل الغشاوه اللي علي عيونهم وقلبهم
حاج محسن...طب ولو موصلناش بفايده للحل ده هنعمل ايه
حاج محسن ..وقتها مفيش ادامك غير حل من اتنين انك تعمل زي ما قولت وتكتب كل حاجه ليه بأسم مؤسسه خيريه طبعا ده في حالت لا قدر الله بعد الوفاه او انك تكتب فيهم محضر بعدم التعرض وهتكتب فالمحضر كل اللي حكتهولي ده وتطلب انهم يمضوا علي عدم التعرض ليك ولو حصل حاجه ليك هما اول ناس بتتوجه لهم التهمه
حاج محسن...هقف ادام ولادي فالمحكمه
عادل.. لو حكمت يبقي لازم عشان هما لو سبقوا هيقفوا عادي ادامك فالمحكمه وساعتها مش بعيد يطردوك من حياتهم خالص وحتي عرضهم بانك تعيش معاهم هيبقي مرفوض منهم المهم مش هنسبق الاحداث خلينا الاول فالحل الودي يمكن
لاعل وعسي ان قلبهم يحن ويرجعوا لحضنك
حاج محسن...يارب يا ابني
عادل ..اتفضل اكتبلي هنا عناوينهم وارقام موبايلاتهم الشخصيه واديني رقمك انت كمان وعنوانك عشان لو احتاجتك وعشان أسأل عليك
حاج محسن...ربنا يباركلك يا ابني ويخليك لاهلك كتبله كل حاجه فالورقه واداها لعادل
عادل...تمام يا حاج محسن روح انت وارتاح ومتقلقش
ان شاء الله ربنا هيحلها من عنده
حاج محسن...طيب متفقناش يا ابني علي اتعابك
عادل.. اتعاب ايه بس ياراجل ياطيب
حاج محسن...لا شوف ده شغل وانا معايا ومستوره الحمد لله
عادل...عارف والله يا راجل يا طيب بس انا لسه معملتش حاجه عشان اخد تمنها خلينا بس نخلص واللي فيه الخير يقدمه ربنا
حاج محسن...ربنا يسعدك يا ابني سلام عليكم
عادل...عليكم السلام
فضل عادل اعد مضايق عشان الراجل ده...اتصلت عليه فالوقت ده شمس
عادل...الو
شمس...ايوه ياعادل عامل ايه
عادل...بخير يا حبيبتي انتي عامله ايه
شمس...الحمد لله مال صوتك
عادل...ابدا مفيش
شمس...وانا هغيب عن صوتك يا عادل قولي مالك
عادل...ابدا والله بس قضيه كده راجل كبير ولاده واقفين قصاده وعايزين يرفعوا قضيه حجر عليه عشان فلوس لدرجه ان الراجل خايف يموتوه
شمس...ياساتر يارب هو في كده
عادل...واكتر من كده والله ياشمس انا شوفت وسمعت قواضي غريبه
شمس...ربنا يرحمنا يارب بس فك كده بقي ده بكره الوقفه وبعده العيد
عادل...بضحك لا ياشيخه
شمس...علي فكره انت رخم انا غلطانه اني بضحكك
عادل...خلاص حقك عليا
شمس...بقولك ايه انا راحه انا وامي اشوف فستان البسه عشان فرح بوسي
عادل...يابنتي انتي مجبتيش مع بوسي وهي بتختار فستانها ليه
شمس...ملاقتش حاجه عجباني والله
عادل...طيب روحي يلا عشان تلحقوا الدنيا زحمه واباكي ياشمس تجيبي حاجه ضيقه
شمس...انت تعرف عني كده
عادل...بصراحه لا بس اهو لازم اقولك وخلاص
شمس...ماشي ياقلبي انت مطول فالمكتب
عادل...لا خالص انا اصلا قايم الوقت مفيش حد بره وكل الشغل متأجل لبعد العيد انا مكنتش هفتح النهارده بس سبحان الله شكلي فتحت عشان الراجل الغلبان ده
شمس....سبحان الله المهم هروح بقي عشان متأخرش هكلمك لما ارجع
عادل...بس خلي بالك من موبايلك عشان لو كلمتك
شمس...حاضر يلا باي
عادل...باي
...........
في محل كيمو
كيمو...ولا ياعامر ما تروح تقول للولا لاحه يجبلنا شاي
عامر...انت بروح امك هافضل تديني في اوردرات كده كتير
عادل..السلام عليكم مالها امي يالا
عامر...الله يبارلك تعالي خد اخوك من ادامي بدل ما أغزهولك
عادل.. ليه مانتو حبايب
عامر...لا خلاص بطلنا
كريم ..ولا ياعادل انت رايح فين وسايب مكتبك ليه
عادل...خلاص اجزت خدت اجازه العيد
مريم...ورايح فين
وقف عادل رفع كم القميص ولا اي مكان جاي اساعدكم
كريم...تساعد مين ياعم لا روح شوف رايح فين بالزمه استاذ عادل المتر بنفسه يجي يساعدنا ويبيع فول وطعميه
عادل....وفيها ايه ياعم
عامر...مسك كريم من التيشرت نعم ياروح امك واشمعني اخوك مانت ساحلني انا واخوبا من اول رمضان وقارف اهلي بكل المقالب بتاعتك
كريم ...بضحك يالا مقصدش انت حبيبي بس دي جمله بتتقال قبل ما يطلع عينه
عامر...اه اذا كان كده ماشي وبص لعادل يلا يا اخويا روح اطلبلنا شاي
عادل...بضحك بس كده ترمرني ياعامر باشا
عامر...وانبي انت برنس ومفيش منك
.....
في شقه يوسف
صحيت روحيه من النوم
روحيه لنفسها انا فين وشقه مين دي وصوره مين دي
ااااه ده الولا يوسف ابني
ولا يا يوسف انت فين ياموكوس اااه يا ناي الواد ده بيروح فين ويسبني لوحدي كده والنبي مانا اعدالك فيها
٥تحت روحيه الباب وخرج وقفت علي ادام باب البيت تبص شمال ويمين
لمحها زين...
زين....ولا ياعمر
عمر...نعم ياعم زين
زين...خليك هنا لحظه خلي بالك من الورشه هاجي بسرعه
عمر...تحت امرك ياعم زين
جري زين ولحقها قبل ما تمشي
زين...علي فين ياروحيه
روحيه...بأبتسامه ازيك يازين
زين...اللهم صلي عالنبي افتكرتيني اهو وصحتك بقت بومب بتضحكي علينا ولا ايه ياروحيه
روحيه...ليه ياولا وانا تعبانه ولا ايه
زين...انتي زي الفل وقمر
روحيه...ياختي انشالله يخليك بتفكرني بالمرحوم
زين...مابلاش سيره المرحوم دي ياروحيه انا لسه مدخلتش دنيا
روحيه....انت ياواد تطول تبقي زيه
زين...لا ياستي ماطولش قوليلي بقي راحه فين
روحيه...مش عارفه زهقانه ومش لاقيه يوسف قولت اخرج اشوفه
زين...هو فالشغل شويه وهيجي تعالي اطلعي اعدي مع مديحه لحد مايجي
روحيه.. لا مش عايزه الوليه دي بتناقرني
زين...دي بتحبك يا مفتريه
روحيه...وانا كمان بحبها والله بس انا نفسي اتمشي فالسيده اوي يا زين بقالي كتير ما تمشتش ونفسي اروح ابراهيم زمان كان بياخدني كل يوم نجيب طلبات البيت ونرجع
مسك زين ايد روحيه حطها في ايده طب يلا بينا
روحيه...علي فين ياولا
زين...هخطفك يا روحيه وهلففك السيده كلها واجبلك دره وفشار وأشربك حمص الشام ونخربها
روحيه...بضحك طب وشغلك ياولا
زين...يتحرق الشغل وانا عندي كام روحيه
زين ..ولا ياعمر خلي بالك من الورشه
ادهم...علي فين يا زين
روحيه...هخطف روحيه شويه وجاي
ادهم...طب والورشه
زين...امانه في رقباتكم
هيما...رايح فين يالا تعالي محدش فاضيلك
زين...ارجع الاقي الوشه ناقص منها مسمار واللي هلق الخلق انزلكم الصاله دي عالارض
ادهم...بضحك واحنا مالنا ياابن المجنونه
هيما.. الله يخربيتك يازين روحيه جننتك
😂😂😂😂😂😂😂
هيما...ولا ياعامر خلي بالك من الورشه
عامر...الله يحرق عامر عاللي جابوا عامر علي ام دي صحوبيه مبقتش عارف انا شغال في بنك ولا مطرب ولا بتاع فول ولا ميكانيكي
لاحه...طب اخلص وحياتك امك وتعالي خد الشاي
عامر...انتوا منكم لله 😭😭
البارت العاشر...
زين...مبسوطه ياروحيه
روحيه....اوي بقالي زمان متمشتش فالسيده
زين...زمان ايه بس انتي ساكنه فيها ياروحيه انتي هتصيعي عليا
روحيه...ضربته علي كتفه ياواد اتربي اقصد يغني اني انزل واتمشي فيها انا مبخرجش من الحاره ويوسف الله يعينه يارب في شغله علي طول وبيجي هلكان
زين...ياستي انا موجود وقت ما تحسي انك مضايقه وعايزه تغيري جو موجود تيجي تقوليلي بس عايزه اخرج وانا هوديكي ما كان ما تحبي تعالي نجيب فشار
روحيه...الله والنبي نفسي فيه
زين...وهو بيمدلها ايده احلي علبه فشار لست الكل
روحيه...انشالله يخليك
زين....ايه مبسوطه
روحيه....اه مبسوطه والجو حلو والزحمه بتاعت الناس دي حلوه تحسسك كده انك عايش وفي حياه
زين....ربنا يفرح قلبك ياروحيه ايه ده استني ده الواد يوسف بيتصل
روحيه...قوله مش رجعاله البيت واقفل في وشه ياواد يازين😒
زين...بضحك بعتيه في ثانيه عشان الخروجه يا روحيه...وفتح الموبايل وهو بيضحك الووو
يوسف...وديت امي فين يالا
وبتضحك علي ايه انطق بتخوني يازين
زين...بضحك الله يحرقكم عيله مجانين انا هلاقيها من امك ولا منك ياواطي
يوسف...بضحك طبعا مطلعه عينك
زين...لا والله وكفايه انها مبسوطه
يوسف...انتو رحتو فين
زين...قالتلي عايزه تتمشي فالسيده عايز اقولك اني لحقتها في اخر ثانيه كويس اني خدت بالي قبل ما تخرج من الشارع خدتها وقولت اروح امشيها شويه ادام زهقانه
يوسف...ربنا يخليك ليا يا صاحبي ومتحركش منك ابدا انت وخالتي مديحه تعبانين معايا اوي
زين...عيب يا يوسف انت اخويا وهي امي
يوسف...طب انتوا راجعين امته
زين...خليك في حالك لسه شويه وبعدين انت غيران ولا ايه يلا اتكل علي الله
يوسف...وحشتني ياجدع مشوفتهاش من الساعه 10 الصبح انتو فين
زين....احنا أدام مسجد السيده زينب علي طول وبناكل فشار وهأكلها لسه أيس كريم
يوسف....ايس كريم يبقي استني انا جاي متتحركوش
زين....بضحك ماشي انت فين صحيح
يوسف...اكيد روحت امال انا عرفت ازاي انك خدت امي يا غبي
زين...ايوه صح.. المهم قول للعيال يخلوا بالهم من الورشه
يوسف....دول هينفخوك
زين...بضحك سيبك منهم والله انا اللي كنت عايز الخروجه دي مش روحيه يلا بلاش رغي انجز
يوسف.دقيقتين وابقي ادامك سلام
زين...سلام
.......
يوسف...بقول ايه انا رايح لزين بيمشي امي فالسيده
عامر...استني ياض يا يوسف خدني معاك اتمشي خلاص تعبت
كيمو...علي فين ياض لسه في شغل
عامر...وربنا ابدا اخوك واخويا معاك انا خلاص أجزت كل سنه وانت طيب ياشيخ انت تعبت اهلي
كيمو...بكره تجيلي ندمان
عامر....ولا ياكيمووو
كيمو...ايه
عامر...طلقنيييي
كيمو...بضحك بتبعني عشان ابو عيون ملونه ماشي
عامر...التغيير مطلوب ياقلبي
كيمو...انشف ياض انعل ابو شكلك
عامر...عايز حاجه اجبهالك وانا جاي
كيمو...لا مش عايز يا سيدي شكرا اه بقولك ايه ما تجبلي عصير قصب
عامر...بلاش عشان السكر يالا
كيمو...ياعم نفسي فيه مجتش من كوبايه
عامر...ماشي عيني
يوسف...لنا ركنت العربيه يلا
عامر...احنا مش هنروح بيها انا بحسبك بتدورها
يوسف...نروح بيها ايه السيده مفيهاش مكان للبني ادمين هنمشي بالعربيه يلا ننط في اي توك توك
عامر...مطرب اد الدنيا زيي يركب توك توك😒😒
يوسف..بصوت عالي يا توك توك ومسك عامر من قفاه اركب ياعم المطرب ورماه جوه التوك توك
................
روحيه اعده علي حجر في الشارع واعده تتفرج عالناس وتاكل الفشار بفرحه واتحولت فرحتها لطفله صغيره خارجه يوم العيد بصلها زين وأبتسم
زين...ايه ياروحيه ما توسعي كده شويه وخديني جمبك
روحيه...تعالي اعد ألا قولي يازين هو انت مش ناوي تتجوز
زين....ايه عندك عروسه
روحيه....عندي
زين...ودي مين بقي اللي جيالي من روحيه هانم
روحيه...بصتله بطرف عينها انت بتتمسخر عليا يا ولا طب والنبي ما انا قايله
زين...لا خلاص حقك عليا
روحيه...ابدا😏
زين....خلاص بقي وحيات زين عندك خلاص بقي متبقيش قلابه كده بهزر
روحيه....ماشي لما نشوف اخرتها معاك..
زين...مين العروسه
روحيه....البت وعد
بصلها زين بصدمه وهو مبتسم وعد
روحيه....اه وعد
زين....واشمعني وعد ياروحيه
روحيه....انت مش بتحبها يبقي مفيش عروسه غيرها
زين....وانتي ايه عرفك اني بحبها وكمل بصوت واطي يا ابن الكلب يايوسف ملاقتش غير روحيه تجرسني معاها
روحيه...معرفتش من حد بس حسيت انت ياواد مبتشوفش نفسك لما بتشوفها بتبقي عامل ازاي ده انا الوقت لما قولت اسمها ضحكتك نورت وشك ولا ماشوفتش نفسك يوم مافطرنا مع بعض اول ما طلعت السطح كنت بتدور عليها ازاي بعينيك
زين...بأستغراب لا ياشيخه وافتكرتي كل ده علي حظ اهلي انا ياروحيه
روحيه...بضحك يعني انا صح
زين... بزمتك الواد يوسف مش هو اللي مسيحلي
روحيه...لا والله ابدا بس ادام بتقول يوسف يبقي انا احساسي صح
زين...صح يا روحيه
روحيه...طب ما تتجوزها مستني ايه ياولا
زين...خايف ياروحيه متوافقش وبعدها هيبقي صعب نبقي مع بعض في مكان واحد بعد ما هتحس اني مشاعري من ناحيتها اتبدلت
روحيه....ومين قالك انها مش هتوافق وهي ترفض ليه اصلا هي تطول
زين....دي وعد ياروحيه وبعدين الحوار مش حوار تطول انا اكبر منها ب13 سنه ياروحيه في فرق سن كبير
روحيه ..ولا كبير ولا حاجه انا كان بيني وبين ابراهيم 16 سنه الحق يابني الحقيقي ميعرفش سن ولو انت بتحبها عمرك ما هتحسسها بالفرق ده ولو هي بتحبك عمرها ما هتحسسك بردو
زين...لو عالحب ياروحيه فأنا بحبها بس هي
قاطعته روحيه...هي بتحبك ياولا
زين...بصلها بصدمه وانتي ايه عرفك بقي انها بتحبني
روحيه ..قولتلك اللي بيحب ما بيحسش ولا بيشوف نفسه بيبقي عامل زي العيل الصغير اللي عامل عمله فاكر انه مخبي والناس كلها كشفاه ياواد الحب بيغير الكلام والاسلوب والطريقه ونظره العين
زين...بقيتي شاعره من امته ياروحيه
روحيه...بضحك ياواد انا حبيبه قديمه واسمع مني البت بتحبك
زين...ودي اتأكد منها ازاي ياروحيه
روحيه...هتتأكد لما تقولها عاللي في قلبك
زين...خايف اسمع كلامك اتسوح انا اصلا مش عارف انا ازاي فتحت معاكي حوار زي ده
روحيه...اسمعني بس والله بتحبك وبكره تقول روحيه قالت وساعتها هبقي عايزه الحلاوه
زين...والله ياروحيه هحليلك بوئك باحلي حلاوه
روحيه...عارف يازين انا بشوف نفسي انا وابراهيم فيك انت ووعد اتحرك يا ولا وفرح قلبي بيك
زين...عارفه ياروحيه
روحيه...ايه
زين....انا بحبك اوي
يوسف...احييييييييييه وكمان بتفولها بحبك يا حزنك يا يوسف يا ابن ابراهيمم
زين...بس ياااض وطي صوتك
يوسف...اوطي صوتي خايف من الفضيحه يا اخويا
عامر....قفشناك ياخاين
بتسرح ببنتنا عايز تجبلنا العار
يوسف.. هو لسه هيجيبه ماجابه خلاص
زين...بضحك ياض انت وهو وطوا صوتكم الله يخربيتكم هتفضحونا
يوسف...بتقول لامي بحبك يا زيني يا نااااس صاحب عمري بيقول لامي بحبك
زين...الله يخرب بيت امك وبص لروحيه لاموأخذه يا خالتي
روحيه ..وعلي ايه لا موأخذه مانت واطي زي صاحبك😏😏وضربت يوسف علي دراعه وانت واد جاي عامل دوشه ليه
عامر....اااه شكلنا جينا في وقت غلط ياچو وعملنا دوشه لروحيه وزين
يوسف...شرفي بقي فالارض ياصاحبي لا وكمان جايبلها فشار
زين....وهو مش قادر يمسك نفسه من الضحك ياض اتلم الناس هتقول علينا مجانين
يوسف...ياريتهم يقولوا مجانين احسن ما يصدقوا المصيبه اللي احنا شايفنها دي امي وصاحبي بياكلو فشار وبيحبوا في بعض
عامر...انا لو مكانك اقتلهم بايدي
روحيه...🤔🤔انت ياواد انت وهو وحشتكم العلقه بتاعتي صح بس ياخساره انا معيش عصايه بس مش مهم في رجلي شبشب
يوسف.مسكها بسرعه وباس راسها لا لا خلاص ابوس راسك 😂😂😂
روحيه...هتتربي ولا لا
يوسف...بضحك اه والله خلاص يا روحيه الواحد ميعرفش يهزر كده ابدا معاكي
عامر...بعت القضيه ياصاحبي قدرت تسامحهم بالسهوله دي
روحيه...ناولني ياواد الشبشب
عامر...بضحك لا والله خلاص تعالي اصالحك واجبلك ترمس
روحيه...طب يلا هات
عامر...مفيش شكرا مش عايزه علي طول كده هات عيب والله😒
روحيه بصتله 😒😒
عامر...يالهوي عالبصه
زين...بقول ايه تعالو نجبلها ايس كريم من الراجل الواقف بالعربيه ده
يوسف....لا خليها دي عندي وخدهم وراح وقف ادام العربيه
يوسف...عابزه بطعم ايه يا اما في ڤانيليا ومانجه وفراوله عايزه ايه يا اما
روحيه....هات مانجه
عامر وانا مانجه
زين...انا فراوله
يوسف...وانا ڤانيليا
جابو الايس كريم وحطت روحيه ايدها في ايد زين ومشوا وسط الشارع والعربيات وهما ببضحكوا ومبسوطين
روحيه....ماتدوقني كده ياواد يايوسف الطعم بتاعك
يوسف...طب هتدوقيني
روحين...لا بقرف
زين...ضحك بصوت عالي قصفت جبهتك
يوسف...بتقرفي مني يا اما طب مش مديكي انا كمان بقرف
روحيه...دوقي بدل مانزل شبشبي علي دماغك
يوسف...ياساتر اتفضلي
روحيه...ماسخه ملهاش طعم بتاعتي احلي😒 دوقني كده ياواد ياعامر
عامر...لا ياروحيه معتكي نفس الطعم باكلومانجه زيك
روحيه...دوقني بس
عامر...هي طفاسه نفس المانجه وربنا
روحيه...وانا ايش عرفني دي مانجه سكري ولا عويسي
عامر...امك بتستظرف يا يوسف
يوسف...بضحك اديها بدل ما توطي تجيب شبشبها
عامر...خدي ياخالتي
زين....😂😂🙈🙈🙈🙈
روحيه....بتاعتي احلي😏
عامر...ماشي يا ست
بصت لزين..🙄
زين...خدي ياروحيه دوقي
يوسف...محترم
زين...مانا لو مبقتش محترم روحيه هتقل مني فالشارع وصراحه عيب علي طولنا😂
روحيه...الله
زين...عجبتك
روحيه ..ما تتاكلش دي ولا دواء الكحه😒😒
زين...بضحك وهو بيقلدها امال ايه الله
روحيه...قولت اجبر بخاطرك
زين...بقول ايه يلا بسرعه نعدي اجري يا روحيه
يوسف...اجري يا روحييييه
..................
اما فالحاره ابتدت مديحه و فاطمه ونعمه وناريمان وسهير يعملوا اطباق كحك ةيبعتوا يدوقوا جيرانهم
وجيرانهم يدوقوهم
وباقي شباب الحته ابتدوا ينفخوا بلالين كتير ويحطوها في شبكه ويعلقوها بين البيوت والمسجد عشان بعد صلاه العيد يفكو الشبكه ويطيروا البلالين..
عدي اليوم وتاني يوم عدي فطروا وودعوا رمضان افضل شهر في السنه وعلي اد حزنهم ان الشهر خلص علي اد فرحتهم بالعيد
اما عن الشباب قضوا يوم الوقفه كلهم فالشارع بين القهوه وبين لعب الكوره
واستعدوا لأسقبال العيد علي انغام اغنيه ياليله العيد😍
وفضلت الحاره مليانه بالناس لحد الصبح اتجمع كل الناس عشان يصلوا صلاه العيد الميكرفونات كانت مسمعه كل ركن فالسيده من تكبيرات العيد زحمه ولبس ابيض وبلالين واطفال بتضحك وبتلعب وبتجري
ناس بتعيد علي بعض ومش فارق مين بعيد علي التاني الاول ومش فارق مسلم ولا مسيحي اللي مسيحي واقف يوزع عالاطفال بلالين وحلويات ومسلم بيديله الكحك بهجه وفرحه تخلي القلب يدق من كتر السعاده ترابط غريب مش موجود في اي بلد فالعالم
هو ده العيد في مصر😍
.........
مديحه.... صباح الفل يازين رايح تصلي
زين...اه يا امي مش رايحين تصلوا ولا ايه
مديحه لا رايحين كل سنه وانت طيب ياحبيبي
زين...وهو بيبوس ايدها وانتي طيبه ياست الكل اتفضلي
مديحه...ايه الفلوس دي كلها
زين...عديتك ياقمر
مديحه...يا ابني عديه ايه يبس دي فلوس كتير اوي
زين...ده مصروف البيت ومعاهم زياده عيدتك
مديحه...بردو كتير ياحبيبي
زين...مفيش حاجه تكتر عليكي يا امي ما يجيش من بعد خيرك
مديحه...يارب ما تحرم منك يا حبيبي
زين...ولا منك يارب امال فين البنات
مديحه...بيلبسوا جوا شوفهم زمانهم خلصوا
زين...ماشي يلا روحي البسي
راح زين خبط علي اوضتهم
منه..مين
زين...انا يامنه خلصتوا
منه...ادخل يازين ايوه خلصنا
فتح زين الباب وابتسم صباح الخير
منه ووعد...صباح النور
زين...كل سنه وانتوا طيبين
منه...وانت طيب ياحبيبي
وعد...وانت طيب😔
قرب منهم زين ومد ايده لمنه. اتفضلي يا ستي عديتك
منه...ايه ده كل دي عديتي انت سرقت بنك ولا ايه
ضربها زين علي راسها سرقت ايه ياجزمه
منه ضحكت كل سنه وانت طيب
مد زين...ايده لوعد كل سنه وانتي طيبيه ياست المقموصه
بصتله وعد بطرف عينها وغصب عنها أبتسمتله بحب ولاول مره يبان علي كلامها ونظرتها الحب وانت طيب يازين
زين مسك منه ومسك وعد من ايدهم وقفهم جمب بعض ووقف ادامهم
زين...انا عايز اقولكم كلمتين وياريت تفهموني
انا مش رخم ولا بحب اضايقكم انا بخاف عليكم فوق ما انتوا ممكن تتخيلوا لما بقولكم علي حاجه لا بفضل طول اليوم متعصب ومضايق عشان رفضتلكم طلب بس بيبقي غصب عني انا ليا نظره غير نظرتكم وبشوف اي حاجه غير ما انتوا بتشفوها منه انتي اختي وعارفه ان مش عايز حاجه من الدنيا غير ان اشوفك احسن مني وانتي وعد انتي غاليه عندي اوي فوق ما تتخيلي انا مش هقولك بحسك اختي او بنت خالتي او الكلام ده لا انا بحس اني جيت الدنيا عشان احميكي وبس
منه وهي بتغمزلها يا سيييدي
زين...سايفه الغياره دي😉
ابتسمت وعد لزين
زين...خلاص مش زعلانين مني
منه...لا والله
وعد...عمري ما ازعل منك ابدا
منه...بصراحه بعد الكلمتين الحلوين دول عايزين حضن جامد وبصت لوعد بطرف عينها
زين...ياسلام انا اطول شدهم هما الاتنين في حضنه
باس منه من راسها
وقرب من وعد باسها وخدت نفس طويييييل وكأنه كان محتاج يشم ريحه شعرها وقربها منها نسيت وعد نفسها وكأنها ما صدقت مسكت بأيدها في ضهره ودخلت جوه صدره وهي مغمضه عينها وبتشم ريحه البرفيوم بتاعه كانت حاسه أن قلبها هيخرج من مكانه من كتر الدق.
منه.. ابتسمت لها وغمزتلها بعينها لاكن وعد مكانتش معاها كانت حاسه انها في دنيا تانيه
خرجهم زين من حضنه وهو نفسه يفضل فالوضع ده شويه اكتر
زين...حاول يغير الموقف بسرعه يلا يابت انتي وهي ابعدوا انتوا ما صدقتوا تتحضنوا ولا ايه هنتأخر عالصلاه.
منه...ماشي جايين اهو
زين...ماشي ماتتأخروش بص علي وعد بطرف عينه
لمح وهد هي كمان بتبصله بطرف عينه واول ما شافته بيبصلها نزلت وشها الارض بأرتباك.
أبتسم زين وخرج وسابهم
زين...انا هقف بره عالقهوه يا امي لحد ما تخلصوا
مديحه ماشي يا حبيبي جايين وراك علي طول
بعد دقايق اتجمعوا كلهم فالحاره سلموا علي بعض وعيدوا علي بعض
توته...كل سنه وانت طيب ياقلبي
ادهم...وانتي طيبه يا احلي توته فالدنيا
توته..بدلع هنفضل واقفين يلا بقي رجلي وجعتني
تدهم...اتعدلي ياتوته احنا فالشارع انا مش اد الدلع ده ومضمنش نفسي فالشارع
توته...بضحك هو انا عملت حاجه مفتررري
ادهم...اللهم أطولك ياروح بقولك ايه
توته...قول ياقلب توته
ادهم...الشقه كلها اسبوع وتخلص والحاجه جاهزه ماتيجي نخلص ونفرش ونتجوز مش قادر استني للعيد يابت
توته...بصوت عالي والنبي طب احلف
ادهم...يابت المجنانين يابت وطي صوتك
توته...صوت ايه يا اخويا اللي اوطيه ده المل لازم يعرف عشان مترجعش في كلمتك
هيما ..في ايه انتو بتتخانقوا
ادهم...يا بنت المجانين
توته...خناق ايه بس ادهم عايز نتجوز قبل العيد الكبير يا اما
سهير...والنبي احسن انتوا خلاص حاجتكم خلصت مبروك
ادهم ..بصوت واطي يخربيت امك ياتوته
زين...البس😂😂
عادل...كان لازم تقولها فالشارع😂
ادهم...وانا يا اخويا عارف انها هتسيح وتشردني كده
احمد العربي...ايه ناوي تقدم الجواز مش قادر خلاص علي بعد ست توته
ادهم...والله يا حاج انا كنت هاخد رأيك وقولت افرح المجنونه دي ان ممكن نعمل كده بس هي سيحتلي
احمد...بضحك علي خيره الله حددوا المعاد اللي يناسبكم اخلصوا من اسبوع العيد ده كله وافرشوا وخلصوا وبعد كده حددوا اليوم اللي يعجبكم
ادهم...يعني مش زعلان والله يا حاج كنت هفاتحك انهرده بس اقول عليها ايه توته
ضحكت توته...انا سكتلك كتير لازم اسيحلك عشان نخلص بقي
رحاب....جدعه ياتوته
هيما....مبروك يا توته ربنا يكمل فرحتك علي خير انتي وادهم وليكي عليا هعملكم حتت فرح يتحاكي عليه اهل السيده كلهم
صلاح...نعم يا اخويا يعني اخوك تعمل معاه كده وانا واخويا ايه محدش هيعمل حاجه
هيما...وحيات غلاوتك تالت يوم العيد هتولع وفرحكم انتوا كمان هيبقي للصبح
سهير...يارب يجعل ايامنا كلها فرح ويفرحك يا هيما قريب ان شاء الله
هيما وهو بيبص لزين...ايوه يا كده ياسوسو ادعيلي كتير من قلبك هااا من قلبك
زين...ياض انا ساكتلك اكراما لابوك واخوك 😂
مديحه....ياواد مالك ربنا يفرحه ان شاء الله
هيما...ده عدو الفرحه يا خالتي
زين...اه انا عدو الفرحه😂😂 هانت يا اخويا النتيجه تطلع وابقي تعالي اطلبها
هيما...وحيات امك
زين...بصحك اه وحيات امي
منه فضلت تضحك هي والبنات وتبص لهيما بحب
عامر...وهو باصص لرحاب عقبالنا كلنا يارب ما يلا بقي نروح نصلي
راحوا كلهم صلوا وخلصوا واحتفلوا الاطفال بعد الصلاه وبقوا يجروا ورا البلالين اللي غرقت الشارع كله
عدت الايام بسرعه وقبل الفرح بيوم ابتدوا الشباب يجهزوا الشارع واتفرش الشارع كله واتجهز من قبلها بيوم واتعلقت الانوار بطول الشارع وتالت يوم العيد صحيوا العرايس بوسي وشهد راحوا عالكوافير وتوته اللي جهزتهم بنفسها هي وشمس وسهير كانوا زي القمر
جه صالح وصلاح خدوهم بالعربيات ومشيوا وراهم صحابهم كلهم بالعربيات والموتسكلات عملولهم زفه كبيره ومن زحمه العربيات كان ولا كأنه موكب مش زفه وفضلوا يلفوا لحد ما ابتدوا المعازيم يجوا...
صالح...يا خربيتك يا بت يا بوسي ايه القمر ده
بوسي...بجد شكلي حلو
صالح ...وربنا قمر بحبك يا بت
بوسي...وانا بحبك اكتر انا فرحانه اوي ياصالح
صالح....ربنا يفرح قلبك يارب وطول مانا عايش افضل افرح فيكي كده علي طول
بوسي...ربنا يخليك ليا❣️
في عربيه صلاح....
صلاح....ايه الجمال ده هي توته بتعرف تجهز عرايس اوي كده ولا انتي اللي حلوه بزياده
شهد....بس بقي يالاحه الله
صلاح...انتي بتتكسفي مني يابت لحد الوقت امال لما نتجوز هتعملي ايه
شهد ..بس يالاحه بقي الله
صلاح...حاضر هسكت بحبك🤨
شهد...بضحك طب ورافعلي حواجبك ليه انت كده عايز تقتلني
صلاح...بأبتسامه مقدرش انتي روحي يا شهد وانتي عارفه
شهد...لاحه
صلاح...نعم
شهد...انا خايفه ومتوتره ومكسوفه مش عارفه ازاي هدخل الفرح والكل باصصلي كده
صلاح....لا متخافيش اول ما نروح هتفكي وهتتبسطي
شهد....انا بحبك اوي
صلاح...مش كنا خلناها كتب كتاب ودخله
شهد..انت با اخويا اللي قولت شبكه
صلاح...عشان حمار
ضحكت شهد بصوت عالي
صلاح... العبببب وطي صوتك يا بت🤨
شهد...بحبك يالاحه
صلاح.وانا بموت فيكي يا قلب لاحه
بعد شويه وصلوا الشارع
وابتدت الزفه
مرضتش انكد عليكم بس هأجلها مش هلغي الفكره 🤨🤨🤨 عشان تبقي تسلطيهم عليا اوي😒
نعدي الفرح علي خير وهروق عليكي اتقلي
محضرالك نكد زي الفل وبما اني بحب المفجآت ما فش هنزل المصيبه انهرده هنزلها وانتي مش عارفه 😒😒😒 Sozy Osama
الفصل الحادي عشر والثاني عشر من هنا
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
